Wopo wɔkɔnge w’okokaso nkembɛ djawo djɛso tá daka djɛ Yehova dj’andja wa bango?

1-2. Kɛkɔnge k’oyɛso ladjɛ nanghaka winá w’okongaso andja wa bango?

ISO ndɔsaka daka djɛ Yehova djɛ mpɛnyɛ andja wa nyɛtshi wanɛ l’andja wa bango wa sii la ntshina efula. (2 Pɛ. 3:13) Kaanga sopewe kɔɔ wina wɔ andja wa bango wasɔ yongoyɛ akambo wɛnaso lɔɔko kɛnɛ, nyɛnyɛka ente wapalekɔ otale lonkina.—Mat. 24:32-34, 36; Ele. 1:7.

² Koko, ayale ilá kɛkɔnge kɛ sombeka akambo wa nsɔsɔlɔ, isankfumɔ ladjɛ nkembɛ djawo djɛso tá daka djɛsɔ. Ladjikɛnge? Ladjikɛnde kaanga djawo djɛ wolo nkoka mpɔla. La nsɔnsɔlɔ, ɔpɔstɔlɔ Poolo etaka osambó wɔ djawo ante ‘mpekanto ketovundaka lankeke.’ (Heb. 12:1) Dj’ipa djawo djɛso ndɔhɔla, iso ladjɛ nshishimaka mbala la mbala tolembetelo tɛnyɛ ente lako ilá andja wa bango woyɛ.—Heb. 11:1.

3. Kɛkɔnge k’ɔkɔpaso nshishima la djamba djɛnɛ?

³ Lá djamba djɛnɛ, tongoshishima topo tosato t’okokaso nkembɛ djawo djɛso tá daka djɛ Yehova djɛ andja wa bango: 1) má ntɔnɔlaka lá oshinga wɔ mbendo, 2) má ntɔnɔlaka lá nkfulu kelekɔ́ la Yehova, edjinge 3) má ndaapɛyɛ tshɛ lá elemo welá nyuma. Masɔ tɔngɔyɛna lamo losango lɔ Yehova te Abakuka okembɛwɔ djawo djɛso lɔɔko kɛnɛ. Koko, ntondontondo, nyontshɔ tokolenda akambo amɔtshi w’okokaso mpomana la wakɔ lɔɔko kɛnɛ walɔmba iso ndjala la djawo djɛ wolo tá daka dj’andja wa bango wayaye.

AKAMBO WALƆMBA NDJALA LA DJAWO DJƐ WOLO

4. Akano wakɔnge walɔmbama ndjala la djawo djɛ wolo?

⁴ Lofu la lofu, iso ndɔsaka akano walɔmbama ndjala la djawo djɛ wolo. Ndjɔmbɔnba, iso ndɔsaka akano walendana la ntombe yɛso, etombo, nkalasa, bala, waana, edjinge olemo wela ndemba. Angoyala wɔlɔ ndawopola ente: ‘Akano wɔsami nyɛnyɛka djɛ ndekɔ l’eshikikelo ente andja wanɛ watahete edjinge wangɔhɛnama l’andja wa bango wa Ndjambe? Ndokoko langɔsake akano etengo anto wakanelaka ambɔ nyɔyi ndeke ekomo k’akambo ankfumɔ?’ (Mat. 6:19, 20; Luka 12:16-21) Tɔngɔsaka akano wa wɔlɔ ntsha iso nkembɛ djawo djɛso djɛ ente andja wa bango wamboyala nsɔsɔlɔ entshupa.

5-6. Lamo oyɛso la djonyi djɛ djawo djɛ wolo lá deko djɛ ekakasano? Pɛyɛ ndjɔmbɔmba.

⁵ Tongopomanake lonkina l’ehemba wɛlɔmba ndjala la djawo djɛ wolo. Mbala imɔtshi, tɛna ndjolo la lɔnyɔkɔ, olando wopashile kana akambo wakoka ntɔlɛmbɛ. Má bango, tokoka nkfulumeyɛ ehemba l’eshikikelo kenkfumɔ. Koko ntsha wembiloyɛ ndeka wopo wɔ sakanelaka angɔlɔmbama ndjala la djawo djɛ wolo djɛ nkfulumeyɛ edjinge nkindjɛ nkambela Yehova l’osasa.—Ɔrɔ. 12:12; 1 Pɛ. 1:6, 7.

⁶ Winá w’oyɛso la ntondo k’ohemba ɔmɔtshi, tokoka nyɛna entengo andja wabango wa Yehova wapayɛki lotshinda. Nkambo djɛsɔ osakisolawɔ nde topalekɔ la djawo djɛ wolo? Ape ngo nghɔsɔ. Tokolenda ndjɔmbɔmba kɛmɔtshi. Winá wokaso ntshitshi k’efula, tokoka nkanela ente yane ipawalaki lotshinda. Koko ekomo ekomo yane ingowala ngo mbalá. Wopo wɔk’ɔmɔ ndeke, winá wɔlɛmbaso efula tokoka nkanela ente andja wabango wapayɛki lotshinda. Koko ntsha djawo djɛso dekɔ wolo iso ndjewaka ente alaka wa Ndjambe wangokotshama. (Yee. 94:3, 14, 15; Heb. 6:17-19) Má ndjala l’eshikikelo kɛ nghɔsɔ, iso nkindjɛka ndjila ɔtɛmwɛlɔ wɔ Yehova l’idjena yɛ ntondo lá lowiko lɔso.

7. Ekanedji kɛkɔnge kelekɔ l’anto k’oyɛso ladjɛ ndjewɔ?

⁷ Nkambo nkina djɛlɔmba ndjala la djawo djɛ wolo nde olemo w’ipoposanyɛ. Efula k’anto wopoposanyɛkaso lewɔ nkanelaka ambɔ ‘losango lɔ wɔlɔ’ lolendana l’andja wa bango wa Ndjambe lopangokotshama. (Mat. 24:14; Ezk. 33:32) Totawolake kaanga ndambo daambi djɛ ehamo wɛwɔ nkitshakitshɛ djawo djɛso. Dj’ipa nkambo djɛsɔ ntokomela, iso ladjɛ nkembɛ djawo djɛso. Toko shishima topo tosato t’okokaso nangha nkambo djɛsɔ.

TƆNƆLAKA LÁ OSHINGA WƆ MBENDO

8-9. Wopo wɔkɔnge ntɔnɔla l’oshinga wɔ mbendo okembɛwɔ djawo djɛso?

⁸ Yopo imotshi y’okokaso nkembe djawo djɛso nde má ntɔnɔlaka l’oshinga wɔ mbendo. Oshinga wɔ mbendo alekɔ ekete ketoshikikɛ ente alaka wa Ndjambe wangoyala nsɔsɔlɔ. Winá w’ɔtɔnɔlaso lá elonga kɛ oshinga wɔ mbendo ndafutama edjinge kɛnɛ kɛ Yehova ndoyapekala djɛ nangha nkambo djɛsɔ, iso nkembɛka djawo djɛso ente daka djɛ Ndjambe djɛ lowiko l’ipa l’ekomo l’andja wa wɔlɔ djengokotshama nsɔsɔlɔ. Lamo okokaso ntepela nghɔsɔ?

⁹ Kɛkɔnge kɛlɔmbamisá djɛ mfuta oshinga wɔ mbendo? Yehova atomaka Wɔnande wɔ ntondo wɔ ngandji efula, ntepela ente ilongo yɛnde yɛ ma ma, m’olongo djɛ nde ndowotshɔ lanɛ lá looko etengo onto wɔdjɔ. Winá wɔ ndayalaka lanɛ lá looko, Yeso akfulumeyɛka wepo w’ehemba enkfumɔ. Masɔ nde ɛnaka ndjolo edjinge avɔka nyɔyi kɛ yɛnyi efula. Ɔsɔngo oshinga wɔ Yehova ndafute! Ndjambe kɛso kɛ ngandji atasamba ndjawola kaanga ndambo daambi djɛ Wɔnande nyɛna ndjolo nghɔsɔ edjinge mvɔ ngo dj’iso ndjala la lowiko ngo l’ila k’etsho ɛmɔtshi. (Dj. 3:16; 1 Pɛ. 1:18, 19) Ladjikɛnde Yehova awolaka Wɔnande wɔ ntshina wɔsɔ mvɔ lá nkambo djɛso, nde angokotshɛ daka djɛ ntɔpɛyɛ lowiko l’etshinda l’andja wa bango.

TƆNƆLAKA LÁ NKFULU KELEKƆ́ LA YEHOVA

10. Lá nkilika Ɛfɛsɛ 3:20, kɛkɔnge kɛ Yehova oyɛnde la wolo wɔ nangha?

¹⁰ Yopo yape yɛ nkembɛ djawo djɛso nde ntɔnɔlaka la nkfulu kɛ Yehova. Nde alekɔ la nkfulu kɛ nkotshɛ alaka wande ankfumɔ. Lá nsɔsɔlɔ, daka djɛ lowiko l’ipa l’ekomo l’andja wa bango nkoka nyɛnama etengo mpangokotshama lá wiso w’anto. Koko mbala la mbala Yehova angolakake akambo wɛnama lá wiso w’anto etengo wapakotshamaki lotshinda. Nde nkoka nangha nghɔsɔ, ladjikɛnde nde alekɔ Ndjambe, Kanga-Nkfulu-Inkfumɔ. (Djɔ. 42:2; Mar. 10:27) Djɛkondeke, topakoke nkamɔ winá w’otolakande akambo wɛnama etengo wolo lá wiso w’anto!—Wala Ɛfɛsɛ 3:20.

11. Pɛyɛ ndjɔmbɔmba kɛmɔtshi kɛ daka djɛ nkamɔ djɛ Ndjambe ndalake. (Lenda ipapango: “Alaka amɔtshi wá nkamɔ wakotshamisá.”)

¹¹ Tokoshishima akambo amɔtshi wɛnama lá wiso w’anto etengo wapakoke nkotshama wa Yehova nalake enkambi wɛnde wel’etsho wɛ ntondo. Nde ashimelaka Abrahama nya Sara ante wangowota wɔna lá lotshundo lɔwɔ. (Ewa. 17:15-17) Nde alakaka Abrahama ante ntonkana la ntonkanola tɔnde wangokita looko lɔ Kanana. L’ila k’ɛnɔnyi efula ntonkanola tɔ Abrahama, ntepela ente ase Isariyɛlɛ wayalaka lá lomfumbe lá Edjipito, ɛnamaka etengo daka djɛnde mpongokotshama. Koko djekotshamaka. Ndambo m’ɔkɔngɔ, Yehova ewoyɛka ante nyɔ kɛmɔtshi kembotshunda Elizabɛtɛ angowota wɔna. Nde atepelaka lonkina ante Mariya, oseka w’omoto wotopɛ oyɛ, angowota Wɔnande, nkambo djɛsɔ nkotshɛka daka djɛ Yehova nalake amboheta nunu dj’ɛnɔnyi lá bedji dj’Ɛdɛna!—Ewa. 3:15.

12. Kɛkɔnge kɛ Yosua 23:14 la Izaya 55:10, 11 otoshikikɛwɔ lá nkambo djɛ nkfulu kɛ Yehova?

¹² Iso nkembɛka djawo djɛso tá nkfulu kelekɔ la Yehova kɛ ndjakala andja wa bango má ntɔnɔla l’alaka wande edjinge lá wopo wɔ ndaakotshɛ. (Wala Yosua 23:14; Izaya 55:10, 11.) Nangha nghɔsɔ ntɔlɔngɔsɔlaka dj’iso nkotshɛ́ anto ankina dj’iwɔ ndjawola ambɔ daka djɛ Ndjambe djelendana l’andja wa bango djepalekɔ dɔ kana nkaakanyi. Yehova nyɔmɛlɛ atepelaka la kɛnɛ kelendana l’olongo wɔ bango la looko lɔ bango ante: ‘Etepela wɛnɛ welekɔ kɔmano edjinge nsɔsɔlɔ.’—Ndj. 21:1, 5.

YAPƐYƐ L’ELEMO WELÁ NYUMA LÁ LOWIKO LƆKO

13. Wopo wɔkɔnge nsanghanyɛ y’otshumano okembɛwɔ djawo djɛso? Pakisola.

¹³ Nkambo dj’asato dj’okokaso nangha djɛ nkembɛ djawo djɛso nde ndɔsaka wina djɛ nangha elemo welá nyuma. Ndjɔmbɔmba, kolenda wopo w’owaso wapɔ má nsanghanyɛ yɛso y’otshumano. Anna, kanga lonanghisá ɛnɔnyi efula l’elemo wetshikitanyi wɛ winá enkfumɔ, atepelaka ante: “Nsanghanyɛ nkotshɛka lemi djɛ djawo djɛmi ndjala wolo. Kaanga ntsha kanga lɔpɛyɛ djamba apalekɔ l’akoka efula wa ndakanyɛ, kana apatepela kaanga djoyi mɔtshi djɛ bango, langokotake nkambo mɔtshi djenkotshɛ́ djɛ ndjala la looka lɔ wɔlɔ l’akambo wa nsɔsɔlɔ welá Bible la djekembɛ djawo djɛmi.”b Ape l’ehamo djawo djɛso nkembaka lonkina winá wekameyɛso kɔmantɛrɛ yɛ wananyɔ l’ankaana.—Ɔrɔ. 1:11, 12; 10:17.

14. Wopo wɔkɔnge olemo w’ipoposanyɛ olekawɔ nkembɛ djawo djɛso?

¹⁴ Iso nkembɛka djawo djɛso lonkina winá w’oposaso tá olemo w’ipoposanyɛ. (Heb. 10:23) Barbara kanga lokambela Yehova ndekana ɛnɔnyi 70, atepelaka ante: “Langɛnake winá enkfumɔ ente olemo w’ipoposanyɛ nkembɛka djawo. Winá wolekami nshimela anto ankina alaka wa wɔlɔ efula wa Yehova, ndeke djawo djɛmi olekawɔ nkemba.”

15. Wopo wɔkɔnge wekelo w’onto nyɔmɛlɛ okembɛwɔ djawo djɛso? (Lenda edjinge asango.)

¹⁵ Nkambo nkina djelá nyuma deka nkembɛ djawo djɛso nde: wekelo w’onto nyɔmɛlɛ. Susan ntepelaka ante angowake wapɔ má nonghanyɛ winá wɔ ndjekaka. Nde ntepelaka ante: “Lofu lɔ lobengo, lemi ndjekaka djamba djɛ wekelo dj’Etange k’Olami djɛ songeka lobengo lɔwɔlama. Lofu lɔ kɔtshi la l’ape, langɔlɔngɔsɔlake nsanghanyɛ yɛ l’anteyi kɛ lobengo. Ko etsho enkina wetshikalá, langonanghake wekelo w’onto nyɔmɛlɛ.” Ladjikɛnde angokilikake nonghanyi kɛnde kɛ wekelo, Susana nkindjɛka nkembɛ djawo djɛnde. Irene, kanga lokambisá l’ila k’ɛnɔnyi efula lá biro dj’ekekete ntepelaka ante wekelo wɔ prɔfɛsi yɛ Bible nkembɛka djawo djɛnde. Nde ntepelaka ante: “Langokamɔke djɛ nyɛna ente prɔfɛsi inkfumɔ yɛ Yehova ingokotshamake tii lá tokakambo tɔ daambi.”c

‘KENGOKOTSHAMA APE L’EHAMO’

16. Lamo eshikikelo kɛ Yehova ndapɛyɛ Abakuka olendanawɔ edjinge laso lɔɔko kɛnɛ? (Hebero 10:36, 37)

¹⁶ Enkambi wɛ Yehova ɛmɔtshi wambokonga ekomo kɛ nkfumbo dj’akambo djɛnɛ ilá efula. Lá wiso w’anto, nyɛnamaka etengo ekotshamelo kɛ daka djɛ Ndjambe kembiloyɛ. Yehova atepelaka nkambo djɛsɔ winá wɔ ndashikikɛ ɔprɔfɛtɛ Abakuka ante: ‘Ladjikɛnde ɛnɛlɔ kelekɔ lá nkambo djɛ lofu loshikikamisá, ketatshu tá ekomo kɛnde, edjinge kepangotepela ongolo. Kaanga kembotshatshimba, kindjɛ ndookongela! Ladjikɛnde kengokotshama ape l’ehamo. Kepangotshatshimba!’ (Aba. 2:3) Ndjambe ndapɛyɛ eshikikelo kɛsɔ ngo le Abakuka toko? Ndokoko, etepela wɛnde welendana edjinge laso lɔɔko kɛnɛ? Má wolo wɔ nyuma k’ekina, ɔpɔstɔlɔ Poolo akambaka l’etepela wɛsɔ te Akristo wakongelaki andja wa bango. (Wala Hebero 10:36, 37.) Ee, toyale l’eshikikelo ente kaanga ntsha daka djɛ Yehova djɛ ntowikɛ djɛnama etengo mbiloyɛ, ‘djengokotshama ipa l’ehamo. Djepangotshatshimba!’

17. Wopo wɔkɔnge nkaana kɛmɔtshi okambande la dako djɛ Yehova ndapɛyɛ Abakuka?

¹⁷ Enkambi wɛ Yehova efula wakambaka la dako djɛ ‘nkindjɛ nkongela,’ amɔtshi l’anteyi kɛwɔ wambonangha nkambo djɛsɔ l’ilá k’ɛnɔnyi efula. Ndjɔmbɔmba, Louise, awangaka nkambela Yehova m’ɔnɔnyi wɔ 1939. Nde ntepelaka ante: “L’etsho ɛmɔtshi, lakanelaki ente Armagɛdɔ wangoyɛ lá ntondo kɛ lemi nshiyɛ nkalasa yel’adjiko. Koko nkambo djɛsɔ ntananghemá. L’ilá k’ɛnɔnyi, langowake wapɔ má mbalaka ɛkɔndɔ w’etaso ente ‘ɛkɔndɔ w’okongelo,’ ntepela ente ɛkɔndɔ wemá Bible welendana la Nɔa, Abrahama, Yɔsɛfu, edjinge anto ankina wakongisá ilá efula lá ntondo k’iwɔ ndowa lofuto lɔwɔ me Yehova. Nkindjɛ nkongela ambonkotshɛ́ lemi edjinge anto ankina efula djɛ ndjala l’eshikikelo ente andja wa bango wamboyala entshupa.” Enkambi wɛ Yehova efula wembokambela ilá wawola ikanyi yɛsɔ!

18. Wopo wɔkɔnge nshishima etongelo okembɛwɔ djawo djɛso tá andja wa bango wayaye?

¹⁸ Koko lá nsɔsɔlɔ, tɔtɛnyi andja wa bango. Koko kokanela lá nkambo djɛ nkete mɔtshi djɛnaso, ndjɔmbɔmba tɔɔtɔ, etamba, anyama, edjinge winaso anto. Lako onto wokoka ndjila ehamo ante nkete nkfumɔ djɛsɔ mpalekɔ nsɔsɔlɔ, kaanga nkete djɛkɔ yotayalaki ntondo. Ntsha djelekɔ lɔɔko kɛnɛ nde, ladjikɛnde Yehova ndeke lotongisa. (Ewa. 1:1, 26, 27) Ndjambe kɛso ambotolaka lonkina andja wa bango. Nde angokotshɛ daka djɛsɔ. L’andja wa bango, anto wangosasanga la lowiko l’ipa l’ekomo, l’alemba wa djɔ. Lá winá wɔ Ndjambe ndashikikɛ, andja wa bango wangɛnama nsɔsɔlɔ etengo ɛnaso nkete djetodjinga lɔɔko kɛnɛ.—Iza. 65:17; Ndj. 21:3, 4.

19. Wopo wɔkɔnge w’okokɛ nkembɛ djawo djɛko?

¹⁹ Winá wokongelɛ andja wasɔ, nangha kenkfumɔ k’okokɛ nangha djɛ nkembɛ djawo djɛko. Yalaka winá enkfumɔ la djedjɛ tá oshinga wɔ mbendo. Tɔnɔlaka lá nkfulu kelekɔ́ la Yehova. Nanghaka akambo wangokokotshɛ́ djɛ wɛ ndjala entshupa la Yehova. Má nanghaká nghɔsɔ, okoka ndjala l’anteyi kɛ ‘wanɛ wakita alaka lá wopo w’oyɛwɔ la djawo edjinge la balentshitshi.’—Heb. 6:11, 12; Ɔrɔ. 5:5.