KIPINDJI 8

Tuuka mu kipwilo kya madimi; otwele mu kipwilo kya binyibinyi

1. Pabitale lulangwilo, abitungu shi bantu baate kitshibilo kinyi lelo uno?

YESU bambile shi: “Yawa shii lupese lwande mwina ngo nami.” (Mateo 12:30) Twi kwikala ku lupese lwa Yehowa sunga lwa Satana. Bantu bebungi abapwandikishaa shi bakwete kufubila Efile Mukulu, kadi Bible amba shi Satana “adimbaa ba pano pa nsenga poso.” (Kibafumbwilwe 12:9) Bantu bebungi abambaa shi bakwete kulangwila Efile Mukulu, aku namu, bakwete kufubila Satana Diabulu! Lelo uno, bantu be na kya kusangula su abakumiina kufubila Yehowa, “Efile Mukulu a binyibinyi,” sunga Satana, “nshee madimi.”—Misambo 31:5; Yowano 8:44.

Tuuka mu kipwilo kya madimi

2. Satana akitaa mwaye moso bwa kukutshishwa bantu kulangwila Yehowa mu kipaso kinyi?

² Kwata kitshibilo kya kufubila Yehowa kwi buwa, akitukwasha bwashi etukumiine. Anka, Satana tasankaa nsaa ayikumiina muntu kufubila Efile Mukulu; afwishilaa bantu abafubila Efile Mukulu nkalakashi. Kipaso kimune kyakitaa byabya, mpa kusengyesha muntu sunga kumufwishila bulwishi, abufiki kwi ba kuuku sunga kwi kifuko kyaye. Yesu bakwile shi: “Beshikwanyi ba muntu abakeekala bantu ba mu shibo yaaye”—Mateo 10:36.

3. Su kifuko kyobe sunga ba kuuku boobe t’abakumiina olangwile Efile Mukulu, we kukita naminyi?

³ Su byakukitshikila, we kukita kinyi? Bantu bebungi abauku shi lulangwilo lwabo lwi bubi, kadi bakwete kwialashena pa kwimukatuka. Abapwandikisha shi, kukita byabya nkukutwa kwa lulamato kwi bifuko byabo. Kaaka nkabingilo ke buwa su? Su opusha shi mwina kifuko nobe atomaa bintu bya lulengo, twe kumudimusha shi byabya bintu bi masaku su? We kumulonda mu kutoma kwa byabya bintu su?

4. Nkinyi kibaadi Yooshwa mulungule bena Isaleele ba mu mafuku a kala pabitale lulangwilo?

⁴ Yooshwa baadi munyingishe bena Isaleele bwa kukatuka ku lulangwilo na bipikwa bya ba nkambwa baabo. Bambile shi: ‘Binobino naamu, tshinaayi Yehowa, dingi mufubileeyi n’eshimba dyeenu dyooso, na lulamato. Kaashaayi beefile babaadi ba masheenu bafubile bushiya bwa mweela na mu Ejiipitu, bwa’shi nufubile Yehowa.’ (Yooshwa 24:14) Yooshwa baadi mulamate kwi Efile Mukulu, na Yehowa baadi mumwelele myabi. Su twi na lulamato kwi Yehowa, etwelela namu myabi.—2 Samwele 22:26.

Malongyesha a bipwilo —A binyibinyi na a madimi

Busatu bwiselele: Bipwilo bibungi abilambukisha shi Efile Mukulu nyi Busatu bwiselele. Abyamba shi “Yaya nyi Efile, Mwana [Yesu] nyi Efile, Kikudi kiselele nyi Efile, anka takwi b’Efile basatu nya, kwi nka Efile umune.”

Bible tamutemune kishima “Busatu bwiselele,” sunga kulambukisha shi Yehowa e mu bantu basatu nya. Yehowa nyi Efile Mukulu bupenka bwaye. Mukanda wa 1 Beena-Kodinda 8:6 awamba shi: “Kwi’nka Efile Mukulu umunenka, Nshetu.” Yehowa nyi e kunundu kwa byoso. Yesu t’Efile nya kadi “Mwan’Efile Mukulu.” (1 Yowano 4:15) Dingi kikudi ki selele t’Efile Mukulu nya. Kikudi ki selele ta muntu nya. Nyi mbukome bw’Efile Mukulu.—Bikitshino 1:8; Beena-Efeso 5:18.
Kikudi: Bipwilo bibungi abilambukisha shi kikudi nkintu ki mu mbidi ya muntu akishalaa na muwa su muntu bafu. Bible alongyesha shi kikudi nyi bukome abupa muntu ngobesha ya kusanasana, kadi ta mbulombene kukita kintu sunga nkimune su tabwi mu mbidi. Alongyesha dingi shi, bafwe ta mbalombene kukita kintu sunga nkimune.—Mulungudi 9:10; Shake 2:26.
Eshiba dya kaalo: Bipwilo bya madimi abilambukisha shi, anyima ya bantu babi ayikyengaa mwishiba dya kaalo bwa loso. Bible alongyesha shi bafwe “tabeûku kintu.” (Mulungudi 9:5, EEM) Alongyesha dingi shi: “Efile Mukulu nyi kifulo.” (1 Yowano 4:8) Yehowa, Efile Mukulu sha kifulo, ta mulombene kukyengyesha bantu mu kaalo nya.

Kashibo: Bible alongyesha kinyi pabitale busatu bwiselele, anyima, n’eshiba dya kaalo?

Sumbulayi bintu byoso bipusheene na lulangwilo lwa madimi

Mwana mukashi kwete kushiika bintu byaye bya malenganyi kaalo

5. Bwakinyi abitungu tusumbule bintu byoso bya malenganyi?

⁵ Kutuuka mu kipwilo kya madimi akulesha dingi kulwisha kantu kooso ka malenganyi koodi mulombene kwikala nako, bu tupulu, tukano, na bingi bintu byoso bi byabya. Bino bi na muulo ukata mwanda abilesha shi twi bakulupile nka mwi Yehowa.

6. Bena Kidishitu ba mu siekle a kumpala abakitshine kinyi na mikanda yabo ya malenganyi?

⁶ Banda kutala bibakitshine bangi bena Kidishitu ba mu siekle a kumpala pababatshile kitshibilo kya kutwela mu kipwilo kya binyibinyi. Bible akula shi: “Bantu beebungi babaatwelakeene mu malenganyi babaabungile mikanda yaabo, abo nkwiyiishika kaalo munkatshy’a bantu.”—Bikitshino 19:19.

7. Nkinyi akitungu shi tukite su ba demo betukalakasha?

⁷ Bangi bantu abaadi batwelakane mu kupaka kwa manga, mu bu ndoshi sunga masende, abaadi pangi bebakalakashe kwi ba demon nsaa ibababangile kufubila Yehowa. Su byakukitshikila, itanyina Yehowa mu luteko n’eyi di bukopo, teemuna eshina dyaye. Akukwasha.—Nkindji 18:10; Shake 4:7.

8. Beena Kidishitu abamonaa ma nkishi, na bifwatulo byabalangwila mu bipwilo bya madimi naminyi?

⁸ Baaba abakumiina kufubila Yehowa, tambalombene kulama sunga kufubisha ma nkishi, sunga bifwatulo bipushene na lulangwilo lwa madimi. Bena Kidishitu ba binyibinyi ‘abatambukila pa lukumiino, kushii pa kumona kwa meeso.’—2 Beena-Kodinda 5:7 (Kilombeeno kipya 2014) Abanemekaa mwiya w’Efile Mukulu aukandika kulangwila ma nkishi sunga bifwatulo.—Efilu 20:4, 5.

Ebungye na mwilo wa Yehowa

Nyina mwana na ka nsongwakashi kaye abalumbuula bidibwa

9. Elango kinyi aditupa Bible pabitale kwikala sha binangu?

⁹ Bible amba shi: “Atambuka mu mulongo wa baasha-binangu ekala sha binangu.” (Nkindji 13:20) Su atukumiina kwikala basha binangu, abitungu tutambukye sunga kwibunga na ba Temwe ba Yehowa. Mwanda nyi mbantu abatambukila mwishinda aditwala ku muwa wa loso.—Mateo 7:14.

10. Ba Temwe ba Yehowa be nkukwasha bwa kufubila Efile Mukulu naminyi?

¹⁰ Ba Temwe ba Yehowa abapasukilaa bantu. Mudimo wabo ngwa kukwasha bantu beyishe bwa kupusha bya binyibinyi bya mu Bible abipa bantu muwa wa loso. Abakumiina kulonga nobe Bible buntu bwa nkukwasha. Abakwaluula ku nkonko yobe na nkulesha bya kutumikila myanda yolongo mu Bible mu nshalelo oobe.—Yowano 17:3.

11. Bisangilo bya bena Kidishitu bi nkukwasha naminyi?

¹¹ We kulonga dingi myanda ibungi pabitale Yehowa ku bisangilo byabo, abikitshikilaa ku Nshibo ya Bufumu. Mwanka, we kunyingisha lukalo lobe lwa kwikala mu lulangwilo lwa binyibinyi. Dingi olongyeshibwa bya kukwasha bangi bwabadya kulonga bya binyibinyi bya mu Bible.—Beena-Ebelu 10:24, 25.

Bisangilo bya kakongye mu Nshibo ya Bufumu

12. Luteko lwi nkukwasha bwa kufubila Efile Mukulu naminyi?

¹² Nsaa yolongo myanda ibungi pabitale kikyebe ky’eshimba dya Yehowa na mpàngo yaye, otamisha mpushisho na lutumbu lobe bwa kifulo kyaye. Otamisha dingi lukalo lobe lwa kumusankisha na olekye kukita myanda ishayimusankisha. Tentekyesha shi, we kwifubwila peepi na Yehowa mu luteko bwa kumuteka shi akukwashe okite myanda i buwa na kupela kukita i bubi.—1 Beena-Kodinda 6:9, 10; Beena-Fidipe 4:6.

Bena kifuko ababadika Bible pamune — Mbikunyi bya kulangwila Efile Mukulu mu binyibinyi?

13. Mbikunyi byodya kusankisha eshimba dya Yehowa?

¹³ Mwenda mafuku, pwende na kutama mu kikudi, okapusha lukalo lwa kwikala bu Temwe a Yehowa mwilambule na mubatshishibwe. Su botwele mu mulongo wa bafubi ba Yehowa, okasankisha eshimba dyaye. (Nkindji 27:11) Okekala munkatshi mwa mwilo wi na muloo, ubambile Efile Mukulu shi: “Nanshala munkatshi mwabo, dingi naatambuka nabo; naayikala Efile Mukulu aabo, n’abo abeekala mwilo wande.”—2 Beena-Kodinda 6:16.

Ne mutukye ku bupika bwa ba demo

Dingi efuku naadi mulale bufuku ku lusala na mulume ande, ami nkupusha eyi adingitamina misusa isatu. Namona musaka wa nshibo aubuuluka, na kintu ki bu ndundo kii na kaalo nkutwela munda mwande. Kadi mulume ande tabaadi amono kintu su nkimune. Nabangile kupusha luwa lwi kaalo munda mwa myeshi i bungi.

Kunyima kwa myeshi isamombo, ami nkupusha dingi eyi adingitamina. Mususa umune, ami nkumona nshibo yoso i mu mema ala. Nyoka mukata a moma nkutuuka mu mema, aye nkwianyiina ku mboko yande. Natompele kupuka mboko bwa kumusumbula, kushi koobesha. Napushishe moo ukile. Akupu, mema na nyoka bibashimiine, abo nkunsumbula pashi bibukopo. Ami nkushimisha binangu munda mwa nsaa ibungi. Ndjo ami nkupusha dyadya eyi dingi, adindungula bwa kwalukiila ku ntempelo a bikudi bwabadya ku mbuka. Panepwishe kyakya kikudi eshina dyakyo, kibandungwile eshina adipushisha shi “yawa e na bupeta kushi bana.” Kibandayile shi akimpa bupeta kukiila ku bukome bwa kupasha mikumbo.

Basha mikumbo na be kula, abaadi abafiki kwandi. Kumpala kwabadya kufika kwande, naadi nabadiila kwibamona mu lumweno. Byabya su muntu bafiki, naadi natuulu eyasa dyande mu dyaye, yaya nsaa abaadi abandesha mukumbo waye sunga myanda yadi nayo na akitungu kukita bwa kumubuka mususa umune. Kyakya kikudi kibaadi akindungula bungi bwa makuta aatungu shi muntu afute.

Naadi napete makuta ebungi mwanda bantu abaadi ababukibwa kalolo ngofu. Ami nkufika “yawa e na bupeta,” kadi napushishe binyibinyi akipatuula “kushi bana.” Mususa oso unaadi natanda mwana, mukulu aaye baadi afu. Bibaadi abinginyongosha bikile. Nafwishishe bana basamombo munda mwa bipwa 12 binaadi mufubile kyakya kikudi.

Nabangile kwisendeela Efile Mukulu bwashi ankwashe. Namutekyele n’eshimba dyoso. Dingi efuku, ba Temwe ba Yehowa abakokwele ku kiibi. Sunga shi naadi na kyubishi kya kwibabinga, dyadya efuku nakumiinyine kwibatemesha. Mu miisambo yetu nabo, naadi mutundule shi, nkwete kufubila demo! Ami nkwata kitshibilo kya kukatuka kyakya kikudi.

Panalungwile kyakya kikudi, kibandimwishe pabitale kyakya kitshibilo kyande. Sunga mbyabya, nekilungwile shi: “N’ami n’obe kubapu.”

Nashiikile bintu byoso binaadi nafubisha kaalo. Nalongyele Bible na ba Temwe, ami nkufika mufubi a Yehowa, na nkubatshishibwa mu 1973. Binobino, ne na bana batano. Mulume ande namu nkubatshishibwa bu Temwe a Yehowa.—Mbeyilonde kwi Josephine Ikezu.

Kashibo: Mbikunyi bibaadi ungi mwana mukashi mutshibe kipwano na ba demo?