Lulangwilo lwabadi bakumine kwi Efile Mukulu

1. Su tukwete kulangwila Efile Mukulu mu kipaso kibuwa, twi balombeene kupeta kinyi?

YEHOWA EFILE MUKULU etatshishaa bwetu ngofu na akumina shi miiya yaaye itukwashe. Su atumulangwila mu kipaso kibuwa, atukyebe kwikala na muloo na tatwikala na myanda ibungi mu nshalelo etu nya. Atukyebe kupeta myabi na bukwashi bwaye. (Yeeshaya 48:17) Byabya, kwi bipwilo nkama na nkama abyamba shi bikwete kulongyesha bya binyibinyi pabitale Efile Mukulu. Aku namu bikwete kulongyesha myanda ilekeene pabitale Efile Mukulu na pabitale kyakwete kwituteka.

2. Mushindo kinyi watudi balombeene kushinguula kipaso kibuwa kya kulangwila Yehowa, na nkileshesho kinyi akitukwasha bwa kwibipusha?

² Mushindo kinyi oodi mulombeene kuuka kipaso kibuwa kya kulangwila Yehowa? Tabitungu shi olongye na kutalula malongyesha a bipwilo byooso bwa kumona mushindo wabidi bilekeene nya. We mukumbeene penda kulonga akilongyesha Bible menemene pabitale lulangwilo lwa binyibinyi. Tubande kwata kileshesho: Mu maumbo ebungi, bantu bakwete kukita makuta a madimi. Su bakuteka bwa kutundula makuta a binyibinyi, mushindo kinyi oodi mulombeene kutundula makuta a madimi? Abitungu shi okwatshiile makuta a madimi ooso su? Nya. We mulombeene kukisha nsaa ibungi mu kulonga bya kuuka makuta a binyibinyi pamutwe pa kukisha nsaa mu kulonga makuta a madimi. Bi mumune na nsaa yatulongo bwa kutundula kipwilo kya binyibinyi, atukyebe kuuka byabya bipwilo bya madimi.

3. Muyiile mayi a Yesu, abitungu shi tukite kinyi bwashi Efile Mukulu etukumine?

³ Abitungu tulangwile Yehowa mu kipaso kya kumiina. Bantu bebungi abakumiina shi bipwilo byooso abisankisha Efile Mukulu, anka Bible talongyesha byabya nya. Muntu ta mulombeene penda kwiamba bu mwina Kidishitu nya. Yesu bakwile shi: “Ta nkwamba shi baaba booso abanyitamina’shi: ‘Mwanana, Mwanana,’ abakatwele mu Bufumu bwa mwiilu ooo, anka baaba abakitshi abikyebe Yaya e mwiilu.” Bwashi Efile Mukulu etukumine, abitungu tulongye na kukita myanda yetutekye. Yesu baadi mwitamine baaba bash’abakitshi akikyeb’Efile Mukulu bu “bakitshi ba bubi.” (Mateo 7:21-23, Kilombeno kipya) Anka bi makuta a madimi, kipwilo kya madimi ta ki na muulo nya. Na dingi, kyakya kipwilo ki kwitufwishila masaku.

4. Bishima bibakwile Yesu pabitale mashinda abidi abilesha kinyi, na eshinda dyooso adifisha bantu ku kinyi?

⁴ Yehowa mupe muntu ooso e pa nsenga mushindo wa kupeta muwa wa looso. Byabya, bwa kupeta muwa wa looso mu Mpaladiiso, abitungu tulangwile Efile Mukulu mu kipaso kyakumina na kwikala na nshalelo aadi mukumine. Bi malwa mwanda bebungi bakwete kupela kukita byabya. Nyi bwakinyi Yesu bakwile shi: “Twelelayi ku kibelo kipeela; mwanda kikata nyi nkibelo, n’eshinda dyangabale aditwaala bantu mu kushimina na bebungi mbaaba abatwelela ku kianka mwanda kipeela nyi nkibelo, na dibuungye nyi eshinda aditwala bantu ku muwa, na bantu bapeela mbaaba abedipete.” (Mateo 7:13, 14, Kilombeeno kipya 2009) Kipwilo kya binyibinyi akitwala bantu ku muwa wa looso. kipwilo kya madimi akitwala bantu ku kabutu. Yehowa takumina shi bantu babutudibwe nya, nyi bwakinyi mupe bantu ba mbalo yooso mushindo wabadya kulonga myanda imutale. (2 Mpyeele 3:9) Eyendo, mushindo watulangwila Efile Mukulu ngukumbeene kwitupa muwa sunga kwitufwisha ku lufu.

MUSHINDO WA KUTUNDULA KIPWILO KYA BINYIBINYI

5. Mushindo kinyi watudi balombeene kutundula balangwidi ba binyibinyi?

⁵ Mushindo kinyi odi mulombeene kutundula “eshinda aditwala bantu ku muwa”? Yesu bakwile shi kipwilo kya binyibinyi akikala akimweneka mu nshalelo a bantu bakwete kwimutwela. Bambile shi: “Ku bikitshino byaabo nkwanukeebatundwila. . . . Mutshi ooso wi buuwa autuushaa bikuba bii buuwa.” (Mateo 7:16, 17) Mu angi mayi twi kwamba shi, twi bakumbeene kutundula baaba be mu kipwilo kya binyibinyi ku malongyesha aabo na mwikelo wabo. Sunga abakitaa milwisho mwanda ta mbapwidikye, kakongye ka balangwidi ba binyibinyi abetashishaa bwa kukita akikyeb’Efile Mukulu. Tubande kutaluula myanda isamombo ayilesha baaba be mu lulangwilo lwa binyibinyi.

6, 7. Bafubi b’Efile Mukulu abamonaa Bible naminyi, na mushindo kinyi ulekye Yesu kileshesho kibuwa pabitale uno mwanda?

⁶ Balangwidi ba binyibinyi abataa malongyesha aabo mu Bible. Bible aye nabeene amba shi: “Kifundwwe kyoso nkifundibwe ku bukome bwa kukidi ky’Efile Mukulu, na akikwasha mu kulambukisha, mu kulanga, mu kutuula myanda mu mulongo, na mu kunyoka na kululama, bwashi muntu a Efile Mukulu [mulume sunga mukashi] ekala mulombane, na mulumbuulwe kalolo bwa kukita mufubo ooso wibuwa. (2 Timotee 3:16, 17, NWT) Mpoolo baadi mufundjile bakwabo beena Kidishitu shi: “Pabaanudi batambule Eyi dy’Efile Mukulu dibaatudi beenulambukishe, nubaadi beedipokyeele, ta mbu eyi dya bantu, kadi anka bu byadidi biinyibiinyi Eyi dy’Efile Mukulu.” (1 Beena-Tesalonika 2:13) Byabya, malongyesha na myanda yabakitshi mu kipwilo kya binyibinyi ta ngatale bipikwa bya bantu nya. Aafiki mu Bible Eyi dipeebwe n’Efile Mukulu.

⁷ Yesu Kidishitu baadi mulekye kileshesho kibuwa kya kulongyesha bantu myanda ayitukila Mwiyi dy’Efile Mukulu. Mu luteko lubelele kwi Nshaaye e mwiyilu Yesu bakwile shi: “Eyi dyoobe ndya biinyibiinyi.” (Yowano 17:17) Yesu baadi mukumiine Eyi dy’Efile Mukulu, na myanda yooso ibaadi alongyesha ibaadi ipushene na Bifundwe. Misusa ibungi Yesu baadi akula shi: “Mbafunde’shi.” (Mateo 4:4, 7, 10) Akupu, Yesu baadi atemuna verse. Bi mumune na bafubi b’Efile Mukulu lelo uno, tabalongyeshaa myanda i mu binangu byabo nya. Abakumiina shi Bible nyi Eyi dy’Efile Mukulu, na abalongyesha myanda ayisamba Bible.

8. Nkinyi akitungu kukita pabitale kulangwila Yehowa?

⁸ Balangwidi ba binyibinyi abalangwilaa nkapenda Yehowa na abaukishaa eshina dyaye. Yesu bakwile shi: “Yehowa Efile Mukulu oobe, ngi akulangwila, dingi nnaaye bupenka oody’a kufubila.” (Mateo 4:10, NWT) Byabya, bafubi b’Efile Mukulu abalangwilaa nkapenda Yehowa. Mu kuno kulangwila bakwete kuukisha bantu bi eshina dy’Efile Mukulu a binyibinyi na byaadi. Mukanda wa Misambo 83:18 (NWT) awamba shi: “Bawukye’shi eshina dyoobe mbuu Yehowa, obe buupenka, Sha-kwiyilu kula pa nsenga ishima!” Yesu baadi kileshesho mu kukwasha bantu bwashi bawukye Efile Mukulu, nka bu bibaadi mwibyakule mu luteko lwaye shi: “Nee muwukishe bantu baboodi mumpe eshina dyoobe, baaba boboolamwine ku byaa-pano.” (Yowano 17:6) Bi mumune lelo uno, balangwidi ba binyibinyi bakwete kulongyesha bangi pabitale eshina dy’Efile Mukulu, pabitale mpàngo yaaye na nyikashi yaaye.

9, 10. Balangwidi ba binyibinyi abeleshenaa kifulo mu myanda kinyi?

⁹ Bafubi b’Efile Mukulu be na kifulo kya binyibinyi munkatshi mwabo, kushi muntu kukimba buwa bwaye aye nabeene. Yesu bakwile shi: “Abakatundula’shi nwi balondji bande anka ku kifulo kyaanwifuleena.” (Yowano 13:35) Beena Kidishitu ba kumpala abaadi na kyakya kifulo munkatshi mwabo. Kifulo akitutekye Efile Mukulu bwa kwikala nakyo takitalaa ekoba, kabila sunga lupese lwa tutuukila nya, kadi akibungu bantu mu kifulo kya basha kwitshibeena mu bukuuku bwabo bwa binyibinyi. (Badika Beena-Kolose 3:14.) Bantu ba mu bipwilo bya madimi ta be na kyakya kifulo munkatshi mwabo nya. Atuuku wawa mwanda naminyi? Mwanda bakwete kwiyipayishena mwanda abatukila mu maumbo sunga mu bisamba bilekeene. Beena Kidishitu ba binyibinyi ta batwalaa ma mputu bwa kwipaa bakwabo beena Kidishitu sunga bangi bantu nya. Bible amba shi: “Kwilekena kwa bana b’Efile Mukulu na bana ba Kafilefile akumweka bino patooka’shi yawa shakitshi kululama, sunga shafulu mwin’e kifulo, ta mwan’Efile Mukulu ooo. . . . Twifulenei kifulo; tambipwandjikil’twe twekala pamune bu Kaina ooo, e baadi muntu a yawa Mubi, byabya bayipayile mwin’e.”​—1 Yowano 3:10-12; 4:20, 21, Kilombeno kipya.

¹⁰ Mbinyibinyi, kifulo kya binyibinyi ta nkimeene penda mu kupela kwipaa bangi bantu nya. Beena Kidishitu ba binyibinyi abatumikaa na nsaa yaabo, na bukome bwabo, mpa na bupeta bwabo bwa kwikwashena na kwinyingishena munkatshi mwabo. (Beena-Ebreeyi 10:24, 25) Abekwashenaa mu nsaa ya masaku, na abekitshishenaa myanda ya kululama. Byabya, mu muwa wabo abalondaa malango a mu Bible a ‘kukitshiina bantu booso myanda iibuwa.’​—Beena-Galate 6:10.

11. Bwakinyi abitungu kukumina shi Yesu Kidishitu ndjo kya buntu kitupe Efile Mukulu bwa kwitupaasha?

¹¹ Beena Kidishitu ba binyibinyi abakumiina shi Yesu ndjo kya buntu kitupe Efile Mukulu bwa kwitupaasha. Bible amba shi: “Takwi kipandjilo kampanda ingi mbalo, anka mwadi’ye; mwanda takwi dingi eshina su ndimune muno mu nsenga dipeebwe bantu dilombeene kwitupa kipandjilo.” (Bikitshino 4:12) Anka bu byatwikalanga bamone mu Shapitre 5, Yesu bapeene muwa waye bwa kukuula bantu basha kukokyela. (Mateo 20:28) Na dingi Yesu nyi abadi basangule kwi Efile Mukulu bwashi ekale Nfumu mu Bufumu bwaye bwa mwiyilu abukyebe kukunkusha nsenga yooso ishima. Efile Mukulu etutekye shi tukokyele na kulonda malongyesha a Yesu bwa kupeta muwa wa looso. Nyi bwakinyi Bible alesha shi: “Akumiina Mwana ee na muuwa wa ikalaika; apele kukumiina mwana, taapete muuwa anka nsungu y’Efile Mukulu ayishaala paadi.”​—Yowano 3:36.

12. Kupela kutwelakana mu myanda ya pano pa nsenga akupatuula kinyi?

¹² Balangwidi ba binyibinyi tabatwelakanaa mu myanda ya pano pa nsenga nya. Pababadi abamukyengyesha kumpala kwa Pilato, nfumu a Beena Looma, Yesu bakwile shi: “Bufumu bwande ta mbwa pano pa nsenga ooo.” (Yowano 18:36, Kilombeno kipya) Sunga bekala mwiumbo kinyi, balondji ba Yesu abakokyelaa Bufumu bwaaye bwa mwiyilu na kupela kutwelakana mu myanda ya politike. Tabalamataa ku lupese kampanda apatuuku kafutakanyi munkatshi mwa beena politike nya. Byabya, balangwidi ba Yehowa tabatwelakana mu myanda yabakwete kukita kwi bangi pabitale kutwela mu bisaka bya beena politike, kutuusha eshina bwashi bebasangule bwa kupeta mwasu, sunga kusangula muntu kampanda nya. Sunga bi balangwidi ba binyibinyi b’Efile Mukulu tabatwelakanaa mu myanda ya politike, nsaa yooso abakokyelaa miiya y’eumbo. Bwakinyi? Mwanda Eyi dy’Efile Mukulu adibatekye shi ‘bakokyele’ ba nfumu “bee na matalwa.” (Beena-Looma 13:1) Pakudi kwikutwena pankatshi pa miiya y’Efile Mukulu na abitekye myanda ya politike, balangwidi ba binyibinyi abalondaa kileshesho kya batumibwa, abakwile shi: “Bii buwa kukookyela Efile Mukulu pee kukookyela bantu.”​—Bikitshino 5:29; Maako 12:17.

13. Balondji ba binyibinyi ba Yesu abamonaa Bufumu bw’Efile Mukulu naminyi, na dingi nkinyi kyabakwete kukita?

¹³ Balondji ba binyibinyi ba Yesu abalambukishaa shi Bufumu bw’Efile Mukulu ndjo lukulupilo penda lumune lwa bantu. Yesu baadi mutemukye shi: “Na uno mukandu wi buwa wa Bufumu aukalungulwa pa nsenga yooso yishaadibwe, bwa kulesha bu-kamoni kwi maumbo ooso na kunyima nfudilo ayikafiki.” (Mateo 24:14, Kilombeno kipya 2009) Pamutwe wa kutakula bantu mu kukimba banfumu ba baana ba bantu bwashi bebakwashe bwa kupudisha myanda yabadi nayo, balondji ba Yesu Kidishitu ba binyibinyi bakwete kulungula mukandu wa Bufumu bw’Efile Mukulu bwa mwiyilu shi abo ndjo lukulupilo penda lumune lwa bantu. (Misambo 146:3) Yesu mwitulongyeshe’shi tutekye bwa yawa guvernema mupwidikye pabambile shi: “Bufumu bwobe bufikye, kyookyebe kikitshikye pa nsenga, mumune na mwiyilu.” (Mateo 6:10) Eyi dy’Efile Mukulu aditemuka shi bwabwa Bufumu “abufingi, naa abutuutu aa mafumu ooso [ano e kwanka], naa abushaala looso.”​—Danyele 2:44.

14. Nkipwilo kinyi kiowuku kikwete kulombasha ino myanda ayilesha balangwidi ba binyibinyi?

¹⁴ Ku bukwashi bwa bino byatubakatuka mu kulonga, banda kwiyela ino nkonko: ‘Nkipwilo kinyi akyataa malongyesha akyo mu Bible na kwiukisha eshina dya Yehowa kwi bantu? Nkisaka kinyi kya bantu be na lukumiino mwi Yesu, kisha kitwelakanaa mu myanda ya pa nsenga, na akilungulaa bantu shi Bufumu bw’Efile Mukulu ndjo lukulupilo penda lumune lwa bantu? Ku bipwilo byooso bi pa nsenga, nkipwilo kinyi kikwete kulombasha ino myanda?’ Myanda yooso ayilesha patooka shi nyi Mbatemwe ba Yehowa.​—Badika Yeeshaya 43:10-12.

OKYEBE KUKITA KINYI?

15. Kukaasha kukumiina shi Efile Mukulu e kwanka nkinyi akitungu kukita?

¹⁵ Ta mpenda kukumina mwi Efile Mukulu ndjo akumusangasha nya. Kadi, Bible alesha shi mpa na bademo abakuminaa shi Efile Mukulu e kwanka. (Jaake 2:19) Sunga mbyabya tabakwete kukita akikyeb’Efile Mukulu, na dingi tamwibakumine nya. Bwashi Efile Mukulu etukumiine, taabitungu shi twikale penda atukumiina shi e kwanka nya, kadi abitungu tukite kyakyebe. Abitungu tutuukye mu kipwilo kya madimi na tutwele mu kya binyibinyi.

16. Abitungu kukita kinyi pabitale kipwilo kya madimi?

¹⁶ Mpoolo mutumibwa baadi muleshe shi tatwibalombeene kutwela mu lulangwilo lwa madimi nya. Bafundjile shi: “Yehowa amba shi: ‘Katukaayi munkatshi mwa baaba bantu, etuuleeyi ku mpengwa . . . tanukumanga kintu kii butete su nkimune’; ‘byabya ami nenupokyeela.’” (2 Beena-Kodinto 6:17; Yeeshaya 52:11) Byabya beena Kidishitu ba binyibinyi mbashikwe kintu kyooso kipushene na lulangwilo lwa madimi.

17, 18. “Babilone Mukata nkinyi,” na bwakinyi abitungu kukita bukidi bwa ‘kutuuka mwanka’?

¹⁷ Bible alesha shi bipwilo byooso bya madimi bi mu “Babilone mukata.”a (Bifumbulwe 17:5) Dino eshina aditutentekyesha lupata lwa kala lwa Babilone, mubaadi mubangye kipwilo kya madimi kunyima kwa Mpeshi a kabutu mu mafuku a Nowa. Malongyesha na bikitshino byoso abimweneka mu bipwilo bya madimi lelo uno abaadi abangye kala mu Babilone. Kileshesho, beena Babilone abaadi abalangwila b’efile basatu. Lelo uno bulambukishi bwa kumpala bwa bipwilo bya madimi nyi mbwa b’efile basatu. Kadi Bible alongyesha kalolo shi kwi nka penda Efile Mukulu umune, Yehowa, na shi Yesu Kidishitu nyi Mwan’aaye. (Yowano 17:3) Beena Babilone abaadi abakumina shi bantu be na kikudi kisha kifwiyaa na akishalaa kunyima kwa lufu na kilombeene kwenda mu kaalo ka looso. Lelo uno bantu abakumiina shi muwa wa muntu taufwiyaa na dingi bipwilo bibungi abilongyesha shi bantu bebubi abendaa mu kaalo ka looso.

¹⁸ Bu bibaadi lulangwilo lwa beena Babilone lubaadi lupalakane pa nsenga, twi balombeene kutundula Babilone Mukata bu nsangilo a bipwilo byooso bya madimi. Na dingi Efile Mukulu baadi mutemukye shi bipwilo bya madimi byooso abikyebe kufudiila mususa umune. (Badika Bifumbulwe 18:8) Bomono bwakinyi abitungu otukye mu myanda yooso ya Babilone Mukata su? Yehowa Efile Mukulu akyebe shi ‘otukye mu lwalwa lupata’ pakukii nsaa.​—Badika Bifumbulwe 18:4, 8.

19. Su bobanga kufubila Yehowa okapete kinyi?

¹⁹ Su bwata kitshibilo kya kutuuka mu kipwilo kya madimi, bangi mbalombeene kupela kwisesela pepi noobe. Kadi su bofubila Yehowa pamune na bafubi baaye, okyebe kupeta bibungi kukila byodi mukumbeene kushimisha. Anka bu bibaadi balondji ba Yesu ba kumpala abaadi balekye bingi bintu byooso bwa kumulonda, okyebe kupeta bakuuku na balole bebungu ba mu kikudi. Okekala munkatshi mwa kifuko kikata kya midiyo ya beena Kidishitu ba binyibinyi, be na kifulo kya binyibinyi munkatshi mwabo. Na opete lukulupilo lwi buwa lwa muwa wa looso “mu kipindji akikafiki.” (Badika Maako 10:28-30, Kilombeno kipya.) Pangi kunyima, baaba abakusumbushena mwanda wa lukumino loobe mbalombeene kutala abilongyesha Bible na kufika bu balangwidi ba binyibinyi ba Yehowa.

20. Balangwidi ba binyibinyi booso abakapete kinyi?

²⁰ Bible alongyesha shi kubashala mafuku apeela bwashi Efile Mukulu afudiishe uno ndumbulwilo a myanda na kutuula bukunkushi bwa Bufumu bwaye mu ndumbulwilo mupya a kululama. (2 Mpyeele 3:9, 13) Yawa ndumbulwilo ebuwa bwikashaa! Na dingi mu yawa ndumubulwilo mupya a kululama, amukekala penda kipwilo kimune, penda lulangwilo lumune lwa binyibinyi. Tomono shi bibuwa bwashi wetatshishe bwa kwibunga na balangwidi ba binyibinyi kubanga binobino su?