DILONGYESHA 10
Mushindo kinyi oodi mulombeene kutundula lulangwilo lw’eyendo?
1. Kwi kipwilo nkapenda kimune ky’eyendo su?
“Dimukaayi na batemuki ba madimi.”—MATEO 7:15.
Yesu balongyeshe balondji baaye penda lulangwilo lumune, lulangwilo lw’eyendo. Lwi bu eshinda adifwisha ku muwa wa looso. Yesu bambile shi: “Mbapeela abeeditundula.” (Mateo 7:14) Efile Mukulu mukumine nkapenda lulangwilo lwipusheene na Bible, Eyi dyaye. Balangwidi booso ba binyibinyi mbebungye mu lukumino lumune.—Badika Yowano 4:23, 24; 14:6; Beena-Efeeze 4:4, 5.
Tala video Efile Mukulu akuminaa Bipwilo byooso su?
2. Yesu bambile kinyi pabitale beena Kidishitu ba madimi?
“Abaleesha patooka bu abawuku Efile Mukulu, anka mu bikitshiino byaabo abamutunu.”—TITE 1:16.
Yesu baadi mudimushe balondji baaye shi batemuki ba madimi abakalwisha bwina Kidishitu bwa binyibinyi. Beena Kidishitu ba madimi abamweka ku meso nka bu balangwidi ba binyibinyi. Bipwilo byabo bikwete kwamba shi mbya bwina Kidishitu. Kadi we mukumbeene kwibatundula muyile mushindo wabadi. Mushindo kinyi? Nkapenda lulangwilo lw’eyendo ndjo alutuusha beena Kidishitu ba binyibinyi abamweka ku ngikashi yabo.—Badika Mateo 7:13-23.
3. Mushindo kinyi oodi mukumbeene kutundula balangwidi ba binyibinyi?
Tubande kutala ino myanda itano ikumbeene kwitukwasha bwa kwibatundula:
Balangwidi ba binyibinyi abanemekaa Bible bu Eyi dy’Efile Mukulu. Abakitaa mwabo mooso bwa kwikala na nshalelo mwipusheene na abyamba Bible. Byabya lulangwilo lw’eyendo ndwilekene na lulangwilo alulondo nangunangu ya bantu. (Mateo 15:7-9) Balangwidi ba binyibinyi ta bakitaa myanda ikutwene na yabakwete kulambukisha nya.—Badika Yowano 17:17; 2 Timotee 3:16, 17.
Balondji ba Yesu b’eyendo abanemekaa eshina dy’Efile Mukulu, Yehowa. Yesu baadi mutumbishe eshina dy’Efile Mukulu pa’ye kwidiukisha kwi bantu. Baadi mukwashe bantu bwashi baukye Efile Mukulu na bebalongyeshe bwa kusambila bwashi eshina dy’Efile Mukulu ditumbishibwe. (Mateo 6:9) Mbalo yoodi mushaale, nkipwilo kinyi akikwashaa bantu bwashi baukye eshina dy’Efile Mukulu?—Badika Yowano 17:26; Beena-Looma 10:13, 14.
Beena Kidishitu b’eyendo abalungulaa bantu mukandu wibuwa wa Bufumu bw’Efile Mukulu. Efile Mukulu baadi mutume Yesu bwashi alungule mukandu wibuwa wa Bufumu. Lukulupilo lwa bantu lwi penda kwi Bufumu bw’Efile Mukulu. Yesu batungunukile na kwisamba pabitale Bufumu mpa na pabafwile. (Luuka 4:43; 8:1; 23:42, 43) Bambile shi balondji baaye abakalambukisha bantu pabitale Bufumu. Su muntu bafiki koodi bwa kwisamba noobe pabitale Bufumu bw’Efile Mukulu, opwandisha shi uno muntu e mu kipwilo kinyi?—Badika Mateo 24:14.
Balondji ba Yesu tabatwelaa mu myanda ya uno ndumbulwilo ebubi nya. We mukumbeene kwibatundula mwanda tabakwete kutwela mu myanda ya politike sunga mu ngoshi ya maumbo. (Yowano 17:16; 18:36) Na dingi, ta be na ngikashi na nangunangu ibubi ya pano pa nsenga.—Badika Jaake 4:4.
Beena Kidishitu b’eyendo mbefulene ngofu. Mbalongye mu Eyi dy’Efile Mukulu bwa kunemeka bantu ba tubila tooso. Bipwilo bya madimi bibungi bikwete kutwela mu ngoshi ya maumbo, kadi balangwidi b’eyendo mbapele kwimutwela. (Mika 4:1-3) Pamutwe pa byabya, beena Kidishitu b’eyendo bakwete kukisha nsaa yabo na kutuusha bupeta bwabo bwa kukwasha na kunyingisha bangi ku mashimba.—Badika Yowano 13:34, 35; 1 Yowano 4:20.
4. We mukumbeene binobino kutundula kipwilo ky’eyendo su?
Nkipwilo kinyi akyata malongyesha akyo mu Bible, akinemeka eshina dy’Efile Mukulu, akilambukusha shi Bufumu bw’Efile Mukulu ndjo lukulupilo penda lumune lwa bantu? Nkisaka kinyi ki na kifulo na kishikwe ngoshi? Omono shi nkipwilo kinyi?—Badika 1 Yowano 3:10-12.