MYALUULO KU NKONKO YA MU BIBLE
Bipwilo byooso abitumbishaa Efile Mukulu su?
Nsaa yotemesha myanda ikwete kukitshika mu nsenga, pangi wemupwe kumona shi bantu bakwete kufuba na bipwilo bwa kukita myanda ibubi. Byabya, Efile Mukulu a binyibinyi ta nnaye mutuule bipwilo byooso nya. (Mateo 7:15) Eyendo bantu bebungi mbebadimbe.—Badika 1 Yowano 5:19.
Anka, Efile Mukulu awuku bantu bebuwa na bafule myanda ibuwa na y’eyendo. (Yowano 4:23) Efile Mukulu kwete kuteka bano bantu bwashi balongye bya binyibinyi abitukila mwiyi dyaye, Bible.—Badika 1 Timotee 2:3-5.
Mushindo kinyi oodi mulombene kushinguula kipwilo kya binyibinyi?
Yehowa kwete kusangisha bantu abafiki mu bipwilo bilekenelekene pakwibalongyesha bya binyibinyi na kwibalambukisha bwa kwifulena. (Mika 4:2, 3) Ngi bwakinyi, we mukumbene kushingula bantu be mu kipwilo kya binyibinyi kukiila ku mushindo wabekitshishena myanda.—Badika Yowano 13:35.
Yehowa Efile Mukulu kwete kubunga bantu ba mishindo yooso ku bukwashi bwa lulangwilo lwa binyibinyi.—Misambo 133:1
Balangwidi ba binyibinyi mbatshile lukumiino lwabo na nshalelo aabo mu Bible. (2 Timotee 3:16) Na dingi, bakwete kunemeka eshina dy’Efile Mukulu. (Misambo 83:18) Bakwete kukwatshishena Bufumu bw’Efile Mukulu na kulesha shi mbwikale lukulupilo penda lumune bwa miilo ya bantu. (Danyele 2:44) Bakwete kwambula Yesu nsaa yabakitshi bwashi “etaata dyabo dimunyikye,” pakukitshina bantu booso myanda ibuwa. (Mateo 5:16, Kilombeeno kipya 2009.) Byabya, beena Kidishitu ba binyibinyi, twibalombene kwibashingula nsaa yabafiki ku bibelo bya bantu bwa kwibalungula mukandu wibuwa wa Bufumu bw’Efile Mukulu.—Badika Mateo 24:14; Bikitshino 5:42; 20:20.