Langwilaayi Yehowa mu kifuko

Anka bu bibolongo mu uno broshire, mu Bible mwi mayi akata a kulonda ebungi alombeene nkukwasha obe nabeene mpa na kifuko kyoobe. Yehowa akumiina shi wekale na muloo. Mmulee shi su otuula lulangwilo lwaye pa mbalo ya kumpala, “byooso byabya abenupa byanka bu ntenteko.” (Mateo 6:33) Akumina binyibinyi shi n’oobe namu wekadikye kuuku aaye. Kita bukopo bwa kwikala mu kipwano kibuwa na Efile Mukulu. Uno nyi mwanda wibuwa bukile ulombeene muntu kwikala nawo.​—Mateo 22:37, 38.

1 NYINGISHAYI KIPWANO KYENU NA YEHOWA

AKYAMBA BIBLE: Yehowa amba shi: “Nekala nsheenu, n’anwe anwikala bana bande balume na bakashi.” (2 Beena-Kodinto 6:18) Efile Mukulu akumiina shi n’oobe namu wekale kuuku aaye a p’eshimba. Luteko nyi mushindo umune wa kwibilombasha. Yehowa akutekye bwa ‘kuteka kushii kukooka.’ (1 Beena-Tesalonika 5:17) Akumiina kupusha nkalo yoobe na myanda ikutale. (Beena-Fidipe 4:6) Su otekye Yehowa na kifuko kyoobe, omono mushindo wi Efile Mukulu bu muntu a binyibinyi b’oobe.

Kukasha kuteka Efile Mukulu, abitungu numuteemeshe. Nwi kwibikita p’anulongo Eyi dyaaye na mikanda ayilongyesha myanda ya mu Bible. (Misambo 1:1, 2) Nangusheenayi myanda ibanulongo. (Misambo 77:11, 12) Kuteemesha Efile Mukulu akuleesha dingi kutwela mu bisango misusa yooso.​—Misambo 122:1-4.

Kulungula kwa bangi myanda itale Yehowa nyi ngumo mushindo ukata wa kunyingisha kipwano kyenu naye. Su bokitshi bino, w’êpusha peepi naaye.​—Mateo 28:19, 20.

KYODI MULOMBEENE KUKITA:

• Efuku dyooso ata nsaa yakubadika Bible na kusambila

• Mu kifuko, tuula myanda ya mu kikudi kumpala kwa maasha na kukisha kwa kapapi

2 IKALA OKITSHI LULANGWILO LWA MU KIFUKO

AKYAMBA BIBLE: “Efubwileyi kwi Efile Mukulu, byabya aye namu efubwila peepi neenu.” (Jaake 4:8) Abitungu okite programe a lulangwilo lwa mu kifuko na omulonde kalolo. (Kibangilo 18:19) Kadi abitungu myanda ibungi. Abitungu otuule Efile Mukulu pa mbalo ya kumpala mu nshalelo oobe a kwifuku n’efuku. Nyingisha kipwano ki pankatshi pa kifuko kyoobe n’Efile Mukulu kwifuku n’efuku nsaa ywakula myanda imutale “pooshaala kwobe na pootambuka mwishinda, pooyikala mulaale sunga bwimane.” (Miiya Ikituulwe 6:6, 7) Ata kitshibilo pabitale ino myanda anka bu Yooshwa bambile shi: “Ami na kifuko kyande, atufubila Yehowa.”​—Yooshwa 24:15.

KYODI MULOMBEENE KUKITA:

• Bibuwa kwikala na programe a kulonga ebuwa alombasha nkalo ya mwina kifuko ooso