Balungudi ba mukandu wibuwa

YEHOWA mmwitupe kileshesho kibuwa kya kulonda​—Mwana aaye, Yesu Kidishitu. (1 Mp. 2:21) Nsaa ayifiki muntu bu mulongi a Yesu, yawa muntu alungula mukandu wibuwa bu umune a ku bafubi b’Efile Mukulu. Pabaadi alesha’shi bino mbilombene kukwasha mu kikudi, Yesu bambile’shi: ‘Fikayi kwandji, anwe booso bafwambukye na bushito. Etentekyeyi kikumbo kyande, nulongyele kwandji mwanda ne mupopeele dingi ne mwiyishe kwishimba, byabya anupete kikiisho.’ (Mat. 11:28, 29) Mulayilo waaye ta ngukutwe kulombana kwi ooso atambula luno lwitamino nya!

² Bu byadi Mufubi mukata a Efile Mukulu, Yesu baadi mwitanyine bangi bantu bwa’shi bekale balondji baaye. (Mat. 9:9; Yo. 1:43) Baadi mwibalongyeshe mu bulungudi na aye nkwibatuma bwabadya kufuba wawa mudimo ubaadi akitshi. (Mat. 10:1–11:1; 20:28; Luk. 4:43) Kunyima, batumine bangi 70 bwabadya kulungula mukandu wibuwa pabitale Bufumu bw’Efile Mukulu. (Luk. 10:1, 8-11) Yesu pabaadi mutume balondji baaye mu bulungudi, bebalungwile’shi: “Yawa enuteemesha anteemesha, mwinupele mmumpele; na mumpele mmupele muntume.” (Luk. 10:16) Pa kukita kwa byabya, Yesu baadi mweele kasele pa muulo wa mudimo ubapeele balondji. Bibaadi abitungu’shi baleshe mpala ya Yesu na y’Efile Mukulu Sha kwiyilu kula! Mbilombene kwikala nka byabya kwi bano booso abatambula lwitamino lwa Yesu lwa’shi: “Ofikye ondonde.” (Luk. 18:22; 2 Kod. 2:17) Booso abakumiina be na mudimo w’Efile Mukulu wa kulungula mukandu wibuwa wa Bufumu na kufwisha bantu bu balondji.​—Mat. 24:14; 28:19, 20.

³ Bu byatudi bakumiine lwitamino lwa Yesu lwa kumulonda, twi bapete mwabi wa ‘kufika mu kuuka’ Yehowa Efile Mukulu na Yesu Kidishitu. (Yo. 17:3, NWT) Twi balongye mashinda a Yehowa. Ku bukwashi bwaye, twi bapete mushindo wa kufungula binangu byetu, na kufwala muntu mupya, na kwikala na mwikeelo wipushene na miiya ilulame ya Yehowa. (Lom. 12:1, 2; Ef. 4:22-24; Kol. 3:9, 10) Kukumiina kwetu na mashimba etu ooso nkwitutakule mu kulambula muwa wetu kwi Yehowa na kulesha kwilambula kwetu kwadi mu kubatshishibwa mu meema. Mu nsaa ya kubatshishibwa kwetu, twi bapete mudimo wa bu balungudi.

⁴ Tulamiine’shi kufubila Efile Mukulu akutekye kwikala na maasa ashii asoole mpaa na mashimba atooka. (Mis. 24:3, 4; Yesh. 52:11; 2 Kod. 6:14–7:1) Twi bapete kondo k’eshimba keselele ku bukwashi bwa lukumiino lwetu mwi Yesu Kidishitu. (Eb. 10:19-23, 35, 36; Kibaf. 7:9, 10, 14) Mpoolo mutumibwa baadi mupe beena Kidishitu elango dya kukita byooso bwa kutumbisha Efile Mukulu kushii kukokosha bangi. Mpyeele mutumibwa baadi mwakule pabitale muulo wa kwikala na mwikelo wibuwa bwa kupeta bantu bashii beena kukumiina ku bukwashi bwa bya binyibinyi. (1 Kod. 10:31, 33; 1 Mp. 3:1) Mushindo kinyi oodi mukumbeene kukwasha muntu bwa’shi alombashe myanda itekibwe bwadya kwikala pamune netu bu mulungudi a mukandu wibuwa?

BALUNGUDI BAPYA

⁵ Nsaa y’obanga kulonga Bible na muntu akumiina bya binyibinyi, mukankamikye bwa’shi alungule bangi myanda yakwete kulonga. Mmulombeene kwisamba na beena kifuko naaye, ba kuuku baaye, beena mudimo naaye, mpaa na bangi apamweka mushindo wa kulungula. Dino nyi etabula dikata mu kulongyesha kwa muntu mupya bwa’shi ekale mulongi a Yesu Kidishitu bu mulungudi a mukandu wibuwa. (Mat. 9:9; Luk. 6:40) Pe mulongi a Bible ende kumpala mu kikudi na babanga kuuka bya kulungula mukandu wibuwa apamweka mushindo wa kulungula, mmukumbene kulesha lukalo lwa kubanga kwenda mu bulungudi na kakongye.

KULOMBASHA MYANDA ITEKIBWE

⁶ Kumpala kwa’shi muntu abangye kwenda mu bulungudi bwa ku nshibo na nshibo bwa musango wa ku mpala, abitungu nushinkamishe’shi mmulombashe ingi myanda iteekibwe. Muntu ende netu mu bulungudi, abamumono kwi bantu booso’shi nyi Temwe a Yehowa. Byabya abipushika kalolo’shi mmushintuule nshalelo aaye na kukita bwa’shi epushene na miiya ilulame ya Yehowa na mmulombeene kwikala mulungudi shy’abandjile kubatshishibwa.

⁷ Nsaa y’okwete kulonga Bible na muntu na kwisamba naaye pabitale miiya ya mu Bible, oshinguula kalolo myanda yaadi nayo. We mulombeene kumona’shi e na nshalelo mwipushene na byakwete kulonga. Anka kwi ingi myanda ya mu nshalelo a muntu alongo Bible ayitungu’shi bakulu bataluule naaye, obe panka.

⁸ Mukunkushi a midimo ya kasaka ka bakulu mmulombene kwata mpángo ya’shi bakulu babidi (umune e mu komite a mudimo) bataluule ino myanda na mulongi a Bible obe panka. Mu tukongye twi na bakulu bapeela, mukulu na mufubi a midimo mulombane, mbalombeene kukita uno mudimo. Abitungu’shi bakwetu babadi basangule bataluule ino myanda kushii kukisha nsaa. Byabya, su abawuku bi lukalo lwa mulongi ku bisangilo bya kakongye, mbalombeene kwisamba noobe na winyi mulongi kunyima kwa bisangilo. Abitungu bikitshikye mu mushindo ushy’awukalakasha muntu. Ku mpala kwa kukumiina mulongi bu mulungudi shabandjile kubatshishibwa, abitungu bataluule su:

1. (1) Akumiina’shi Bible nyi Eyi dy’Efile Mukulu difundjibwe ku bukwashi bwa kikudi kyaaye.​—2 Tim. 3:16.

2. (2) Awuku na akumiina malongyesha a kitako e mu Bifundwe, mu mushindo wa’shi nsaa yabamwele nkonko, mmulombeene kwaluula muyiile abilesha Bible kushii muyiile malongyesha a bipwilo bya madimi, sunga byaye binangu.​—Mat. 7:21-23; 2 Tim. 2:15.

3. (3) Akumiina mwiya wa mu Bible wa kwibunga na mwilo wa Yehowa mu bisangilo bya kakongye su e na bya kwibikita.​—Mis. 122:1; Eb. 10:24, 25.

4. (4) Awuku akilongyesha Bible pabitale kukita myanda ibutete, kutambuka lusandji, kwibakila bakashi bebungi,na kwiatena kwa mulume na mulume sunga mukashi na mukashi, na e na nshalelo mwipushene na ano malongyesha. Su mwiyibakishene na muntu, abitungu’shi bubidi bwabo beyibakishene muyiile miiya ya mbulamatadi.​—Mat. 19:9; 1 Kod. 6:9, 10; 1 Tim. 3:2, 12; Eb. 13:4.

5. (5) Aneemeka mwiya wa mu Bible pabitale kupela kukolwa maalwa na, te ku bupika bwa kutoma bintu abikolwanaa bi kulwisha binangu byaye, kukatusha pabadi bamufundjile kwi munganga.​—2 Kod. 7:1; Ef. 5:18; 1 Mp. 4:3, 4.

6. (6) Awuku muulo wa kusuuka bakuuku bebubi.​—1 Kod. 15:33.

7. (7) Mmupwe kutshiba kipwano na ndumbulwilo ya bipwilo bya madimi mubaadi atwele kala. Mmulekye kutwela mu bisangilo byaayo, kutwela mu midimo yaayo sunga kwiyikwasha.​—2 Kod. 6:14-18; Kibaf. 18:4.

8. (8) T’atwelakanaa mu myanda ya politike ya bya pano.​—Yo. 6:15; 15:19; Shak. 1:27.

9. (9) Akumiina na, e na nshalelo mwipusheene na abilesha mukanda wa Yeeshaya 2:4 pabitale myanda ya bisamba.

10. (10) Akumiina binyibinyi kwikala Temwe a Yehowa.​—Mis. 110:3.

⁹ Su bakulu t’abashinkamisha bi mpushisho a mulongi pabitale umune wa ku ino myanda, mbalombeene kumwipusha, pangi ku bukwashi bwa ma verse abadi baleshe bwa kutaluula. Bi na muulo bwa’shi aukye’shi booso bakwete kwenda mu bulungudi na ba Temwe ba Yehowa abitungu bekale na nshalelo mwipusheene na abitekye bino Bifundwe. Myaluulo yaaye ayikwasha bakulu bwabadya kutundula su awuku kimutekibwe na su mmulombashe mu mushindo kampanda myanda itekibwe bwadya kubanga kwenda mu mudimo wa bulungudi.

¹⁰ Abitungu bakulu beukishe mulongi musango umune su mmulombane bwa kwenda mu bulungudi. Misango ibungi, bino abikitshikaa ku nfudiilo kwa mwisambo. Su mmulombashe myanda itekibwe, bakulu mbalombeene kumukuukila na muloo ooso bu mulungudi a mukandu wibuwa. (Lom. 15:7) Abitungu bamunyingishe bwa’shi abangye kulungula mukandu wibuwa musango umune na atuushe rapore yaaye ku mpwilo kwa mweshi. Abitungu bakulu bamupatulwile’shi nsaa i mulongi a Bible balombasha myanda itekibwe bwa kwikala mulungudi shy’abandile kubatshishibwa na atuusha rapore yaaye bwa musango wa ku mpala, abamukitshina Fishe a rapore ya mulungudi e n’eshina dyaaye na kumwela pa mbalo ya ma fishe a kakongye. Bakulu abaata ino myanda kwadi bwa’shi ndumbulwilo atale midimo ya lulangwilo lwa ba Temwe ba Yehowa mu nsenga ishima, na bwa’shi mulungudi apete mushindo wa kwipaana mu midimo ya mu kikudi na kupeta bukwashi bwa mu kikudi. Dingi bakulu mbalombene kutentekyesha mulungudi mupya’shi, myanda yaaye yooso abeyele mu Internete bwabadya kwiyifubisha mu kwipushena na miiya ya ba Temwe ba Yehowa i mu jw.org.

¹¹ Kwiubidishena kwetu na mulungudi mupya na kwitatshisha bwaye na kutuula binangu ku byooso byakwete kukita nkulombeene kumunyingisha. Nkulombeene kumutakula bwa kutuusha ma rapore a mudimo ku mweshi ooso na kukita bibungi bwa kufubila Yehowa.​—Fid. 2:4; Eb. 13:2.

¹² Su bakulu abamono’shi mulongi a Bible balombana bwa kubanga kwenda mu bulungudi, yaaya nsaa abamulungula’shi mmulombeene kufubisha mukanda wa Belumbuule bwa kukita akikyebe Yehowa. Kunyima kwa’ye kutuusha rapore bwa musango wa ku mpala, mbalombeene kwiukisha kakongye mu kikoso’shi taadi mulungudi mupya shy’abandjile kubatshishibwa.

KUKWASHA BANA BAKINGA

¹³ Mpaa na bana bakinga mbalombeene kulombasha myanda itekibwe bwa kwikala balungudi ba mukandu wibuwa. Yesu baadi mukuukile baana bakinga aye nkwibatenteka maasa. (Mat. 19:13-15; 21:15, 16) Sunga byekala’shi bushito bwa bana bwi kwi baledi baabo, bangi bena kakongye mbalombeene kwikala na lukalo lwa kukwasha bana bakinga abakumiina kwenda mu kulungula mukandu wa Bufumu. Su we nambutwile, kileshesho kyoobe kibuwa mu bulungudi akinyingisha bana boobe ngofu bwa’shi bekale na katshintshi mu mufubo w’Efile Mukulu. Nsaa i mwana e na mwikeelo wibuwa, eshimba dyaaye adimutakula bwa kulesha benaaye bi lukumiino lwaye. Mbungi bukwashi kinyi abutungu kumupa?

¹⁴ Mbilombane bwa’shi baledi besambe na bakulu ba mu Komite a mudimo bwa kutaluula su mwana mmulombashe myanda itekibwe bwa kwikala mulungudi. Mukunkushi a midimo ya kasaka ka bakulu akyebe kwata mpángo ya’shi bakulu babidi (umune e mu komite a mudimo) bemoneene na mwana na baledi baaye, byabikala umune a kwabadi sunga mulami aaye. Su mwana mmulamiine malongyesha a mbangilo pabitale bya binyibinyi bya mu Bible na alesha’shi akumiina kutuuka mu bulungudi, bino abikyebe kulesha’shi kwete kwenda ku mpala kalolo. Kunyima kwa kutaluula bino na ingi myanda i mumune na yabatalulaa na bantu bakulu, bakulu babidi mbakumbene kwata kitshibilo su mwana mulombeene kukuminyibwa bu mulungudi shy’abandjile kubatshishibwa. (Luk. 6:45; Lom. 10:10) P’abesamba na mwana mukinga, t’abitungu’shi bataluule naaye myanda yabatalulaa na bantu bakulu ishii imutale nya.

¹⁵ Pabakwete kwisamba naaye, abitungu bakulu batumbule mwana bwa mushindo wa kwete kwenda ku mpala na kumukankamika bwa’shi aate mpángo ya kubatshishibwa. Bu byabidi’shi banambutwile mbakite bibungi bwa kutwesha bya binyibinyi mwishimba dya mwana, mpa n’abo namu abitungu kwibatumbula. Bwa kukwasha banambutwile bwa’shi bawukye mushindo wa kukwasha mwana aabo, abitungu bakulu bebaleshe pa mbalo ifunde’shi: “Kwi baledi beena Kidishitu,” i mwisaki 179-181.

KWILAMBULA NA KUBATSHISHIBWA

¹⁶ Su bopu kuuka na kufula Yehowa mu kulombasha myanda yaadi mutekye na kwenda mu bulungudi, abitungu onyingishe kipwano kyoobe naaye. Mu mushindo kinyi? Mu kulambula muwa oobe kwadi na kulesha byanka pa kubatshishibwa mu meema.​—Mat. 28:19, 20.

¹⁷ Kwilambula nkwituula ku lupese bwa kukita mudimo wiselele. Bwa kwilambula kwi Efile Mukulu abitungu kwifubwila kwadi mu luteko na kumulaa n’eshimba dimune’shi okumiina kutumika na muwa oobe mu mudimo waaye na kutambukila mu mashinda aaye. Akulesha kumulangwila bwa losoo. (Miy. 5:9) Uno nyi mwanda utale muntu pa bupenka bwaye. Takwi muntu mulombeene nkukitshina byanka.

¹⁸ Anka, we na bibungi bya kukita kukaasha penda kulungula Yehowa’shi okumiina kwikala muntu aaye. Abitungu oleshe bangi’shi, we mwilambule kwi Efile Mukulu. Webawukisha byabya nsaa y’obatshishibwa mu meema bu bibakitshine Yesu. (1 Mp. 2:21; 3:21) Su we mwate kitshibilo kya kufubila Yehowa na, okumiina kubatshishibwa, abitungu’shi okite kinyi? Abitungu owukishe lukalo loobe kwi mukunkushi a midimo ya kasaka ka bakulu. Akyebe kwata mpángo ya’shi bangi bakulu besambe noobe bwa kutala su we mulombashe myanda itekibwe kwi Efile Mukulu bwa kubatshishibwa. Bwa kuuka ingi myanda, taluula mbalo ifunde’shi: “Kwi mulungudi shabandjile kubatshishibwa,” mwisaki 182-184 dya uno mukanda na “Nkonko bwa baaba abakyebe kubatshishibwa,” i mwisaki 185-207.

RAPORE ITALE ABYENDE MUDIMO WA BULUNGUDI

¹⁹ Munda mwa bipwa, rapore itale abyende mudimo wa bulungudi mu nsenga ishima ngikwashe bwa kunyingisha mwilo wa Yehowa. Kubanga nsaa ibaadi Yesu mulungule balondji baaye’shi abitungu mukandu wibuwa ulungulwe mu nsenga ishima, beena Kidishitu ba binyibinyi mbatuule binangu byabo ngofu pabitale mushindo wa kwiulombasha.​—Mat. 28:19, 20; Mak. 13:10; Bik. 1:8.

²⁰ Balongi ba Yesu ba ku mpala abaadi na muloo wa kupusha myanda itale bipeta bya mu mudimo wa bulungudi. (Mak. 6:30) Mu Bible, mukanda wa Bikitshino awitulungula pabitale bantu 120 abaadi panka nsaa ibapongolokyele kikudi kiselele kwi balondji mu Mpantekoote a mu kipwa kya 33 bipungo byetu (B.B.). Musango umune bungi bwa balondji bubafwimine abo nkufika bantu peepi na 3 000 na kunyima bantu peepi 5 000. Rapore ibalesheshe’shi: “Yehowa bakumbashanga efuku dyoso ku kisaka kyaabo, baaba babapetanga kipandjilo” na’shi, “ba tshite-mwakwidi bebungi babakookyeele ku lukumiino.” (Bik. 1:15; 2:5-11, 41, 47; 4:4; 6:7) Mukandu wa kuno kufiima ubaadi ulombeene kunyingisha balongi ngofu! Rapore ibuwa ibaadi ilombeene kwibatakula ngofu bwa kwenda ku mpala mu mudimo wabadi bebape kwi Efile Mukulu, sunga bapeta bitompwanga abituukila kwi bakata ba bipwilo bya beena Yuuda!

²¹ Peepi mu kipwa kya 60-61 B.B., Mpoolo balesheshe mu mukanda ubaadi mutumine beena Kolose’shi mukandu wibuwa ubaadi ‘awupa bikuba na awupalakana pa nsenga pooso’ na ‘nguwukishwe bipangwa byooso bi kuushi kw’eyilu.’ (Kol. 1:5, 6, 23) Beena Kidishitu ba ku mpala abaadi abakookyela kwi Eyi, na kikudi kiselele kibaadi akibapa bukome bwa kulombasha mudimo ukata wa bulungudi ku mpala kwa nfudiilo a ndumbulwilo a beena Yuuda mu kipwa kya 70 B.B. Baaba beena Kidishitu baasha lulamato babaadi banyingishibwe ngofu na ma rapore a bibaadi abikitshibwa!

²² Mu mushindo umune, ndumbulwilo a Yehowa lelo uno mmwate mpángo ya kufunda ma rapore a mudimo ukwete kukitshika mu kulombasha kwa mayi a mu Mateo 24:14, (Kilombeno kipya 2009) aamba’shi: “Na uno mukandu wibuwa wa Bufumu aukalungulwa pa nsenga yoso yishaadibwe, bwa kulesha bu-kamoni kwi maumbo ooso na kunyima nfudilo ayikafiki.” Bu byatudi bafubi belambule kwi Efile Mukulu, twi na mudimo autungu kukita bukidi bukidi. Abitungu tutuule binangu byetu mu kumona mushindo ukwete kulombana mudimo wa bulungudi ku mpala kwa’shi nfudiilo ifikye. Yehowa akyebe kukita bwa’shi mudimo ulombashibwe, na su tukwete kwiufuba, atukyebe kukuminyibwa Naaye.​—Es. 3:18-21.

RAPORE YOOBE YA MUDIMO WA BULUNGUDI

²³ Myanda kinyi ayitungu’shi tufunde mu rapore? Esaki dya Rapore ya mudimo dyabadi batuushe kwi ndumbulwilo adilesha myanda ayitungu kufunda. Anka, ino myanda ayilondo na ungi mpushisho mupya kwete kutuukanga ngilombeene kukwasha.

²⁴ Mu mulongo wa “Mikanda (Ya ku maasa sunga mu kaamo),” funda bungi bwa mikanda yooso, byaikala ya ku maasa sunga ya mu kaamo yoodi mupe bantu bashii ba Temwe batambule. Mu “Video yoodi muleshe bantu,” funda bungi bwa misango yoodi muleeshe umune a ku ma video eetu mu bulungudi.

²⁵ Mu mulongo wa “Kwalukiila bantu,” ofunde bungi bwa misango yoodi mwalukiile mu kutala muntu mukumiine, kadi shy’abandjile kwilambula bu Temwe mubatshishibwe. We mulombeene kwalukiila muntu pa kumufundjila mukanda, kumwitamina ku telefone, kumutumina mesaje mu telefone sunga ku Internet, sunga kukiila kwaye bwa kutuula mikanda. Nsaa yooso y’olongo na muntu Bible, abitungu kubadika kwalukiila muntu. Muledi mmulombene kubadika musango umune wa kwalukiila muntu ku lubingo looso nsaa yakwete kukunkusha lulangwilo lwa mu kifuko na mwana shabandile kubatshishibwa.

²⁶ Sunga byekala shi, okwete kulonga Bible na muntu ku lubingo looso, abitungu kubadika bu muntu umune olongo naaye ku mweshi. Abitungu’shi balungudi bafunde bungi bwa bantu belekeene babadi balongye nabo Bible munda mwa mweshi. Mu rapore ya bantu boodi mulongye nabo Bible mmulombeene kwikala bantu bashy’abandjile kwilambula, bu ba Temwe babatshishibwe. We mulombeene dingi kubadika kulonga kwa Bible nsaa yolongo na mukwetu mulume sunga mukashi mulekye kufuba abadi bakupe kwi mwina Komite a mudimo, sunga na muntu mupya baakatuka mu kubatshishibwa shy’abandjile kupudisha kulonga kwa mukanda wa A nkinyi akitulongyesha Bible? na Bya kushaala mu kifulo ky’Efile Mukulu.

²⁷ Abitungu kutuusha rapore ya “Nsaa” nka byayikeele. Ino nsaa ikale yaaya yoyikalanga mukishe mu mudimo wa ku nshibo na nshibo, kwalukiila bantu, kulonga Bible na bantu, sunga mu bulungudi bwa nsaa yooso sunga bwa apamweka mushindo wa kulungula kwi bantu bashii belambule bu ba Temwe babatshishibwe. Su balungudi babidi bakwete kulungula pamune, booso bwabo mbalombeene kubadika nsaa, kadi nka penda muntu umune ndjo mulombeene kubadika kwalukiila bantu sunga kulonga kwa Bible na bantu. Baledi booso bakwete kukisha nsaa mu kulongyesha bana babo mu Lulangwilo lwa mu kifuko mbalombeene kubadika nsaa umune ku lubingo. Bakwetu balume mbalombeene kubadika bungi bwa nsaa y’abakisha mu kukita kwa mwisambo wa bantu booso. Mpaa na muntu kwete kupatuula mwisambo mulombeene dingi kubadika bungi bwa nsaa. Kwi ingi midimo ya muulo ishy’ayitungu kubadika nsaa ya bulungudi, bu nsaa ya kwilumbuula pa kwenda mu bulungudi, kutwela mu kisangilo kya bulungudi, kwenda na kwaluka mu bulungudi.

²⁸ Abitungu mulungudi ooso alonde akimulesha kondo kaaye k’eshimba kalongyeshibwe na Bible nsaa y’anangushena bungi bwa nsaa ibakisha mu bulungudi. Bangi balungudi abalungulaa pa mbalo i bantu bebungi, bangi naamu abalungulaa mu ma teritware mwi bantu bapeela na aatungu kutambuka kipindji kila. Ma teritware ngelekeene; balungudi naamu mbelekene ku mweneno abadi naaye pabitale bulungudi bwabo. Bakwetu be mu Kasaka ka Bakunkushi-Bakulu t’abatakulaa tukongye twa mu nsenga ishima bwa’shi tukite muyiile kondo k’eshimba kaabo pabitale mushindo wa kubadika nsaa ya mu bulungudi, sunga kutuula muntu a kusambisha bangi pabitale uno mwanda nya.​—Mat. 6:1; 7:1; 1 Tim. 1:5.

²⁹ Nsaa ikishwe mu bulungudi abitungu kwiyitusha yooso ilombane. Kwilekena akumweneka nsaa i mulungudi e na lukalakashi kampanda pamwanda wa bununu, tatuuku mu nshibo, mbamulame kwa munganga, sunga’shi e na lukalakashi kampanda. Yawa mulungudi mulombene kutuusha nsaa yaaye mu bipindji bya minite 15. Sunga p’atuusha bu kamonyi penda munda mwa minite 15 ku mweshi, abitungu atuushe yaaya rapore. Abamubadika bu mulungudi a Bufumu mufube. Ino mpángo ngitale dingi mpaa na mulungudi e na lukalakashi lwa kapindji kapeela, pangi te na mushindo wa kusaana munda mwa mweshi, e na mukumbo kampanda ukata sunga’shi mupete masaku akata. Ino mpángo ngitale penda baaba bafudiile ngofu mu mudimo wabo. Komite a mudimo ndjo aata kitshibilo su ino mpángo ngilombane bwa mulungudi kampanda.

FISHE A RAPORE YA MULUNGUDI MU KAKONGYE

³⁰ Rapore yoobe ya mudimo wa bulungudi ku mweshi ooso abeyelaa mu fishe a Rapore ya mulungudi mu kakongye. Ino rapore ngya kakongye. Su we na mpángo ya kwenda mu kangi kakongye, lungula bakulu ba mu kakongye koodi. Mufundji a mu kakongye koobe akitshi bya’shi atume fishe yoobe mu kakongye koobe kapya. Paapa bakulu ba mu kakongye kapya abekala na disanka dya nkukuukila na nkupa bukwashi bwa mu kikudi abutungibwa. Su we kula na kakongye kenu munda mwa mafuku e muushi mwa myeshi isatu, atukutekye bwa’shi wekale walusha rapore yoobe ya mudimo mu kakongye kenu.

BWAKINYI ATUTUSHAA RAPORE YETU YA MUDIMO?

³¹ Oyilwankanaa ingi nsaa bwa kutuusha rapore yoobe ya mudimo su? Kushii mpaka atwe booso atwikalaa na lukalo lwa’shi betutentekyeshe. Kadi su twi na mweneno ebuwa pabitale kutuusha rapore na su atushinguula bwakinyi bi na muulo, mbilombeene kwitubofwila bwa kutentekyesha kwiyituusha.

³² Bangi mbepushe’shi: “Bu bikale Yehowa awuku’shi nkwete kukita mudimo waaye, bwakinyi abitungu ntuushe rapore mu kakongye?” Eyendo, Yehowa awuku kyatukwete kukita, na awuku su tukwete kukita mufubo wetu na mashimba etu ooso sung’shi tukwete penda kumupa tuntu tupeela twa ku byatudi balombeene kukita. Anka, tutentekyeshe’shi, Yehowa baadi mubadikye bungi bwa mafuku abapwile Nowa mu bwato na bungi bwa bipwa bibatambukile beena Isaleele mu kabaaka. Efile Mukulu baadi mubadikye bungi bwa bantu abaadi baleshe lulamato na bashibaadi bakookyele. Baadi mubadikye mushindo ubaabadi abende na kutshokola maumbo a mu Kanaana na myanda ibuwa ibakitshine bansushi basha lulamato ba mu Isaleele. Eyendo, baadi mutuushe rapore ya myanda ibungi ibaadi itale midimo ya bafubi baye. Baadi mufundjishe ku bukwashi bwa kikudi kiselele ano ma rapore a bibaadi bikitshikye, bwa kwitulesha kalolo bi mweneno aaye pabitale kutuusha kwa rapore nka byayidi.

³³ Myanda ya kala yabadi bafunde mu Bible ayishinkamisha kalolo ma rapore na myanda ya mwilo wa Yehowa. Mbilombeene kwikala bukopo bwa kupusha kalolo myanda ibungi i mu Bible kwabashii batuushe rapore ya bungi bwayo bulombane. Banda kutala bino bileshesho: Kibangilo 46:27; Efilu 12:37; Bansushi 7:7; 2 Banfumu 19:35; 2 Myanda 14:9-13; Yowano 6:10; 21:11; Bikitshino 2:41; 19:19.

³⁴ Sunga byekala’shi mu rapore yetu t’atuleshaa byooso byatukitshi mu lulangwilo lwetu kwi Yehowa, rapore yetu ayikwasha ngofu mu mpángo ya ndumbulwilo a Yehowa. Mu siekele a ku mpala, nsaa ibalukile batumiibwa mu kampanye ka bulungudi, abatuushile rapore yaabo kwi Yesu abo nkumulungula “byooso bibaabadi bakite na byooso bibaabadi balambukishe.” (Mat. 6:30) Ingi nsaa, ma rapore ngalombene kulesha ingi myanda ya mu mudimo wetu wa bulungudi ayitungu kulumbuula. Bungi mbulombeene kulesha mushindo ukamine nfubilo a ingi midimo mu angi ma mbalo, kileshesho bu kufiima kwa balungudi, ku lungi lupese naamu mbulombeene kulesha ma mbalo atshimbe aatungu kufuba ngofu. Mbilombeene kulesha’shi abitungu kunyingisha bantu sunga’shi abitungu kupudisha myanda kampanda. Bakunkushi abatala mudimo abatuulu wawa mwanda mu binangu na kukita mwabo mooso bwa kulumbuula mbalo i lukalo ilombeene kubofusha mulungudi sunga kakongye kashima.

³⁵ Ma rapore e na muulo dingi bwa’shi ndumbulwilo atundule mbalo i lukalo lukata lwa balungudi mu teritware. Mbalo kinyi ayituusha bipeta bibungi? Mbalo kinyi ishii ikambe kwenda kumpala? Mikanda kinyi ayitungu bwa kukwasha baaba bantu bwa’shi balongye bya binyibinyi? Rapore ayikwasha ndumbulwilo bwa kutala lukalo lwa mikanda lwi kwanka mu mudimo wa bulungudi mu ma mbalo elekeene a mu nsenga na kwibakwasha.

³⁶ Rapore ayinyingishaa ooso a kwatudi. Tatwi na muloo wa kupusha bi mudimo ukwete kukita bakwetu mu kulungula kwa mukandu wibuwa mu nsenga ishima su? Ma rapore aalesha kufiima aakwasha bwa kwikala na mweneno ebuwa a mushindo ukwete kwenda ndumbulwilo a Yehowa ku mpala. Myanda yabadi bamone kwi bakwetu ayitusangasha na ayitupa katshintshi, na kwitutakula mu kwipaana ngofu mu mudimo wa bulungudi. (Bik. 15:3) Kukumiina kwetu kwa kutuusha rapore ya mudimo kwi na muulo na akulesha’shi atuneemeka bakwetu be mu angi ma mbalo. Mu uno mushindo upeela, atulesha’shi tukwete kukookyela mpángo ya ndumbulwilo a Yehowa.​—Luk. 16:10; Eb. 13:17.

KWIATSHILA BITSHIBILO

³⁷ Takwi kintu su nkimune kilombeene kwitutakula bwa kupwandikisha mudimo wetu wa bulungudi na wa bangi bantu. (Nga. 5:26; 6:4) Myanda ya mu nshalelo a muntu ngilombeene kushintuluka. Ku lungi lupese, mbilombane bwa’shi twiatshile bitshiblo bilombeene kwitukwasha bwa kutala mushindo watukwete kwenda ku mpala mu bulungudi. Kulombasha kwa bino bitshibilo nkulombeene kwitupa muloo ukata.

³⁸ Abimweneka patooka’shi Yehowa kwete kuyisha lubilolubilo mudimo wa kubunga bantu b’akyebe nkakalwila mu nsaa ya “mpombo ikata.” Twi mu kipungo kya kulombana kwa butemuki bwa Yeeshaya abwamba’shi: ‘Kisaka kipeela akiikala kya bantu kinunu, bee kuushy’a booso abeekala kisamba kii na binunu bya bantu ami Yehowa naakumbasha uno mwanda bukidi apakumbana nguba aawo.’ (Kibaf. 7:9, 14; Yesh. 60:22) Twi na kineemo kikata kya kwikala balungudi ba mukandu wibuwa mu kino kipungo kikata kya mafuku a ku nfudiilo!​—Mat. 24:14.