Mweshi wa 2

“Kululama,” bu byabadi bekufubishe mu Bible, akulesha kukita kyakya kyabamono kwi Yehowa shi nkilulame na kwikikita kushi ntondo. Tubande kunangushena bibaadi bikitshino bya Yesu bileshe shi e na kululama. Mu mafuku aaye, bakata ba bipwilo bya bena Yunda abaadi bashikwe bantu ba bingi bisamba mpa na bena Yunda bashibadi balongye, dingi tababaadi abanemeka bana bakashi. Kadi Yesu, baadi akitshina bantu boso myanda na kululama na tabaadi na ntondo nya. Baadi mukumiine bantu bashibaadi bena Yunda bwabadya kumulonda. (Mat. 8:5-10, 13) Baadi alungula mukadu wi buwa kwi bantu boso kushi ntondo, balanda na ba mpeta. (Mat. 11:5; Luk. 19:2, 9) Tabaadi atapa bana bakashi ku mashimba sunga kwibalwishisha. Anka baadi ebanemeka, baadi ebakitshina myanda na kalolo, mpa na baaba bababadi ababepula kwi bangi. (Luk. 7:37-39, 44-50) Twi kwambula Yesu pa kukitshina bangi myanda kushi ntondo na kulungula mukandu wibuwa kwi baaba abakumiina kuteemesha​—kushi kutala nshalelo abadi naye sunga kipwilo kyabo. Bana balume bena Kidishitu abalondo kileshesho kyaye p’abo kunemeka bana bakashi. w19.05 2 ¶1; 5 ¶15-17

Bakulu basha lulamato lelo uno, mbalombene kufubisha bishima bya kalolo, nsaa yabafubisha Bifundwe bwa kunyingisha bangi. Mpenda bakulu nyi be na bushito bwa kunyingisha bangi su? Nya. Atwe boso twi na bushito bwa ‘kwikankamishena ku muntu na muntu.’ (1 Tes. 4:18) Bakwetu bakashi banyingye mu kikudi mbalombene kunyingisha bakwetu bakashi be na lukalo lwa kunyingishibwa. Yehowa Efile Mukulu baadi mwipwandjikishe na nyina mwana anyingisha mwan’aye. (Yesh. 66:13) Mu Bible mwi bileshesho bya bana bakashi abaadi abanyingisha bantu be na twinyongoshi. (Yob. 42:11) Yehowa amonaa byoso abitatshisha bakashi bena Kidishitu lelo uno bwa kunyingisha bakwabo bakashi be na twinyongoshi! Dingi, mukulu umune sunga babidi mbalombene kwipusha mukwetu mukashi pa bu penka, su mulombene kukwasha ungi mukwetu mukashi ena kenyongoshi. Eyendo’shi, tatukumiina kwipusha mukwetu mwina Kidishitu pabitale myanda yakumiina kulama bwaye’ye.​—1 Tes. 4:11. w19.05 16-17 ¶10-12

Bwakinyi abitungu kwikale tumonyi tubidi sunga twibungi kumpala kwa’shi bakulu basambishe muntu mukite mulwisho ukata? Bino nyi byabadi baleshe mu Bible’shi mbibuwa kukita. Nsaa yabamba’shi muntu bakitshi mulwisho ukata, anka apele kwiukumina, bibuwa kwikale tumonyi tubidi sunga twibungi kumpala kwa’shi bakulu bakite komite a kusambisha. (Miy. 19:15; 1 Tim. 5:19) Su muntu bapele kukumina mulwisho waye, bakulu abatala abyamba tumonyi tubidi. Su kubamweka bantu babidi yawa afundu kilumbu, na mungi muntu mbakumbene kushinkamisha mwanda, paapa bakulu be na bishinkamisho abibapa matalwa a kukita komite a kusambisha. Kukutwa kwa kamonyi ka kabidi t’akulesha’shi yawa ebalungula mwanda badimbi. Sunga takwi tumonyi tubidi, bakulu abauku’shi yawa muntu abadi bafunde mukumbene kwikala mukite mulwisho. Bakulu abatungunuka na kukwasha na kunyingisha yawa abekalanga balwishe. Abashala bapasukye bwa’shi, tala yawa muntu abekalanga bafunde alwisha mungi mwana mu kakongye.​—Bik. 20:28. w19.05 11 ¶15-16

Bi na muulo kulongyesha bana bwabadya kuuka bya kwilongyela. Bu kileshesho bibuwa balongye bya kulumbuula bisangilo, sunga mushindo wa kukimbuula bwa kupeta lwalulo ku lukonko lwabadi bamwele ku kalasa. (Eb. 5:14) Su abakisha nsaa ya kulonga mwanda kampanda ku nshibo, abibakwasha bwabadya kutuula binangu ku myanda ya kulonga mu bisangilo bya kakongye, ku bikongeno bya kifunda, na bya mafuku asatu. Eyendo’shi, bungi bwa myanda ya kulonga mbutale bungi bwa bipwa bya bana na bu muntu bwabo. Balongi betu ba Bible dingi bibuwa balongye byabadya kwilongyela. Pabakii bapya, twi na muloo wa kwibamona bakwete kwela mifunda mu ngaluulo yabapete mu mukanda wa kulonga nao Bible sunga ku bisangilo bya kakongye. Anka twi na lukalo lwa kulongyesha balongi betu ba Bible mushindo wabadya kukimbuula mu mikanda na byabadya kulonga kalolo bupenka bwabo. Mu wawa mushindo, su kubatuku myanda, pamutwe pa kukimba bukwashi kwi bangi bena kakongye, abauku byabadya kupeta malango ebuwa mu’bo banabene nsaa yabakimbuula mu mikanda yetu. w19.05 26 ¶2; 28 ¶10-11

Satana e na kitshibilo kya kushintuula ngyelelo eetu a binangu. Kwete kufubisha bintu byoso bwa kukatusha mweno e buwa a mu Eyi dy’Efile Mukulu atudi naye. Satana kwete kutungunuka na kwipusha lukonko lumune lubayipwishe Eeva mu lupango lwa Edene’shi: “Eyendo Efile Mukulu mwinulungule shi . . . ?” (Kib. 3:1) Mu ndumbulwilo akunkushiibwa na Satana, atukambaa kupusha nkonko ayitusha mpaka ku byatukumiina bu’shi: ‘Eyendo shi Efile Mukulu t’akumiina eyibakishi dya balume na balume sunga bakashi na bakashi? Eyendo shi Efile Mukulu t’akumiina osankila Nowele sunga efuku dyobe dya kutandjika? Eyendo shi Efile Mukulu akumiina bwashi opele kwedibwa mase? Eyendo shi Efile Mukulu akumiina bodya kutshiba kipwano na muntu odi mufule abadi batushe mu kakongye?’ Abitungu twikale bashinkamishe myanda yatukumiina. Mwanda su t’atupete ngaluulo ku nkonko i na muulo pabitale nkumiino yetu, twi balombene kwelesha mpaka ku myanda yatukumiina. Yaaya mpaka i kubanga kulwisha ngyelelo eetu a binangu na lukumiino lwetu. w19.06 12-13 ¶15-17

Yehowa mmwitufule bikata. (Yo. 3:16) Atukumiina kwambula Nshetu sha kifulo. Byabya, atwitatshisha bwa kulesha binangu bya ‘kwikwasheena, bu baana na baana, abesambeena’ na bantu boso, kadi bikishekishe na “bakwetu mu lukumiino.” (Nga. 6:10) Nsaa i bakwetu bena Kidishitu na nkalakashi ayibenyongosha, atukumiina kwibakwasha. Mbikunyi byatudya kusamba muntu mufwishe mwina dibaka naye? Mwanda wa kumpala wi na muulo, nkwisamba naye, sunga wekala mukutwe kya kwakula. Paula, sha mulume bafwile lufu lwa kibatu, amba’shi: “Napusha’shi lufu alubofushaa bantu ku mashimba. Be kumona’shi pangi myanda yabadi balombene kwakula i kutapa muntu kwishimba. Aku namu bi bubi bukile su bantu bapela kwakula.” Pangi muntu e na kinyongwa, tatengyela’shi twakule nka kintu kampanda akikumu kwishimba nya. Paula amba’shi: “Bibaadi abinsankisha bikata nsaa ibaadi ba loole bande abamba penda shi, ‘nenyongola byabya b’obe.’” w19.06 20 ¶1; 23 ¶14

Su mudimo wetu ngukadikibwe, bakulu abakata mpángo ya’shi otwele mu bisangilo mu mushindo wabasha kumona kwi baaba abakubingabinga. Mbalombene nkulesha bwa’shi otwele mu bisangilo bya kasaka kapeela, mbakumbene mpa na kushintuula nsaa na mbalo ya kukitshina bisangilo. Pabitale mudimo wa bulungudi, myanda ngikumbene kushintuluka mupunda ma mbalo. Anka twi bafule Yehowa na atukumiina kulungula bangi pabitale Bufumu bwaye, byabya, atukapete mushindo wa kulungula mukandu wibuwa. (Luk. 8:1) Pabaadi akula pabitale mudimo wa bulungudi bwa ba Temwe ba Yehowa mu Union Soviétique, Emily Baran mufundji a myanda ya kala bambile’shi: “Pabaadi mbulamatadi mulungule ba Temwe ba Yehowa’shi balekye kulungula bangi bantu mukandu wibuwa, ba Temwe abatungunukile na kulungula bena mudimo nabo, bekungishanyi nabo, na ba kuuku babo mukandu wibuwa. Mwanda wa byabya, abaadi bebele mu lukano, kadi ba Temwe nkutunguka na kulungula bena lukano nabo.” Sunga pabaabadi bemikye mudimo wabo wa kulambukisha, tababaadi balekye kulungula mukandu wibuwa nya. Su mudimo wa bulungudi mbeukandjikye mbalo yoodi, ambula kileshesho kyabo! w19.07 11 ¶12-13

Mbikunyi byatudya kukwasha bantu bashi balangwidi, bwabadya kufula Efile Mukulu na kwikala bu balongi ba Kidishitu? Abitungu tulamiine’shi, abikitshi muntu nsaa yatumulambukisha mbitale mbalo yadi mukudile. Bu kileshesho, muntu mukudile mu Europe ta mulombene kukumiina mukandu wetu mu mushindo umune na muntu a mu Asie nya. Bwakinyi? Mu Europe, bantu bebungi abauku myanda ya mu Bible na abauku’shi Efile Mukulu bapangile bintu byooso. Anka, mu Asie mwi bantu bapeela abauku myanda ipeela pabitale Bible, bebungi tabauku kintu pabitale Bible na pangi ta mbalombene kukumiina mwi Mupangi. Byabya ikala na mweneno ebuwa. Ku kipwa kyoso, kwi bantu bebungi bashi balangwidi bakwete kufika bu ba Temwe ba Yehowa. Bebungi abadi na shalelo ebuwa na babadi babofule ku mashimba mwanda wa bu nsesa bwa bakata ba bipwilo. Bangi tababadi na nshalelo ebuwa na bebungi ba kwabadi abadi na byubishi bibubi abitunganga’shi balekye. Ku bukwashi bwa Yehowa, twi balombene kukita mwetu moso bwa kupeta baba “be na mashimba alombane bwa muwa wa looso.”​—Bik. 13:48, NWT; 1 Tim. 2:3, 4. w19.07 20-21 ¶3-4

Sunga twekala na lukulupilo lwa kwikala na muwa wa loso mwiyilu sunga mu mpaladiiso pa nsenga, abitungu tutungunukye na kusuuka lubilo bwa kupeta efuto. Sunga twekala na nshalelo kinyi, tabitungu tutale bintu bi kunyima; sunga kutadiila kintu kampanda bwakidya kwitwimika bwa kufubila Yehowa. (Fid. 3:16) Kulombana kwa myanda yatutengyela kwi kumweka bu akuyisha, sunga bukome bwetu bwa mbidi bwi kupeela. Pangi tukwete kunyingiila nkalakashi na kubingwabingwa munda mwa bipwa bibungi. Sunga nshalelo ekala naminyi, “tanukalakashwanga pa mwanda wa kintu su nkimune.” Kadi, ewukishe Efile Mukulu myanda yoso mu nteko na kumusendeela, byabya, akakupa kufukama kukile byoso bilombene muntu kunangushena. (Fid. 4:6, 7) Nka abitatshishaa muntu asuukaa lubilo nsaa yakidila mbalo i makashinyi, abitungu twikale batule binangu byetu ku kepatshila ka kusuuka lubilo lwetu mpa na ku nfudiilo. Twikitshisheyi mupunda bukome na nshalelo eetu, bwa kusuuka batadiile ku milayilo ikile buwa i kumpala. w19.08 7 ¶16-17

Mbilombene kwitwikela bukopo bwa kuuka kya kulungula muntu e mu maalo. Sunga tatuuku kya kwakula, su abetumono atudidi, abashinguula’shi atwitulu pa mbalo yabo. Pabafwile Lazaare kuuku a Yesu, Mariya, Maata, na bangi babadidile mukwabo mulume a kifulo. Kunyima kwa mafuku ananka pabafikile Yesu, aye namu “nkudila,” sunga mbibadi auku’shi asangula Lazaare. (Yo. 11:17, 33-35) Mpolo ya Yesu ibalesheshe abipushaa Nshaaye. Ibalesheshe dingi bi kifulo kibadi nakyo Yesu bwa kyakya kifuko, kushi mpaka bibadi binyingishe Mariya na Maata. Bimumune, nsaa i bakwetu abamono bi kifulo kyetu na byatwibapasukila, abashingula’shi tabe bupenka nya mbebefunyishe kwi bakwabo abetulu pa mbalo yabo. Ingi nsaa abitungu kumuteemesha kalolo. Lekyela mukwenu nsaa yadya nkulesha bi mwishimba dyaye, na kupela kukalakashwa na “bwakulakule” bwaye. (Yob. 6:2, 3, EEM) Mmulombene dingi kwikala mukalakashwe ngofu na bakwete kumukumbakasha kwi bena kifuko naye bashi ba Temwe. Byabya ela luteko naaye. Teka ‘Yawa apushaa nteko’ bwa’shi amupe bukome na binangu bifukame.​—Mis. 65:2. w19.04 18-19 ¶18-19

Sunga twekala atufubila mu teritware sunga ku Betele, twibalombene kutamisha kifulo kyetu bwa bantu ba mbalo yatufubila. Su mudimo wetu wapwa bwa kabingilo kampanda, twikupusha bubi mu mashimba. Atupusha bushiye bwa baaba abashala, na atwikalakasha bwabo, bikishekishe su atukatuka mwanda wa kubingwabingwa. (Mat. 10:23; 2 Kod. 11:28, 29) Dingi, twi kupusha bibubi pa kwenda mu kufubila ku ingi mbalo, sunga pa kwalukiila kwetu mwanda abitungu tushintuule bipikwa. Bangi bakwete kupeta lukalakashi lwa makuta nsaa ayipu mudimo wabo. Byabya mbilombene kwibabofusha ku mashimba. Nkinyi kilombene kwibakwasha? Shaala peepi na Yehowa. (Shak. 4:8) Mbikunyi byatudya kushala peepi na Yehowa? Mpa kukulupila mwadi ‘aye apushaa nteko yetu.’ (Mis. 65:3, EEM) Yehowa mmulombene kukita “bikile pa byaabya byaatutekye naa byaatupwandjikisha.” (Ef. 3:20) Yehowa tetupeyaa nka penda byatumutekye nya. Mmulombene kwitukitshina bikile byatupwandikishanga bwa kupudisha myanda yetu. w19.08 21 ¶5-6

Bangi bantu abakula kishima “Armagedone” nsaa y’abesambila ngoshi ya nikleere sunga masaku aatukila ku bintu bipangibwe su? Anka, Bible akula’shi Armagedone nyi mukandu wibuwa, aupa bantu muloo! (Kibaf. 1:3) Ngoshi ya Armagedone t’ayikabutula bantu anka ayikebapasha! Naminyi? Pa kufudiisha bukunkushi bwa bana ba bantu. Yaaya ngoshi ayikapasha bantu pa kukatusha bantu babi na kulama basha kululama. Ayikapasha dingi bantu pa kukalwila nsenga yetu ku kulwila. (Kibaf. 11:18) Mwaku “Armagedone” ausanganyibwa penda mususa umune mu Bible, na autukila mu mwaku wa mu kina Ebelu aupatuula “Mwengye wa Megido.” (Kibaf. 16:16) Megido kibaadi kibundji kya mu Isaleele a kala. (Yos. 17:11) Kadi Armagedone t’esambila mbalo kampanda i pa nsenga nya. Mu kwakula kwa kalolo, alesha nsaa ayikala “ba nfumu ba pa nsenga na basalayi babo” abebungu pamune bwa kulwa na Yehowa.​—Kibaf. 16:14. w19.09 8 ¶1-3

Uno mwana mukashi shikibaadi na lukulupilo, baadi na lukalo lwa bukwashi. Baadi mwende kwi ba doktere bebungi, na lukulupilo lwa’shi apanda. Baadi mukumbe munda mwa bipwa 12, anka takubaadi muntu su ngumune baadi mumupashe. Muyile mwiya ubaadi Yehowa mupe Moyiise, uno mwana mukashi baadi bu e butete. (Lv. 15:25) Pabapushishe’shi Yesu kwete kupasha basha mikumbo, bayile kwadi. Pabafikile kwadi, bakumine lwembe lwa kilamba kyaye, na mususa umune baadi mupashibwe! Yesu tabaadi penda mumupashe nya, mwanda mushindo ubaadi mumukitshine myanda, baadi mwipushe’shi mbamufule na abamunemeka. Bu kileshesho, baadi muleshe’shi mumufule na kumunemeka pa kumwitamina bu “mwan’ade mukashi.” Kushi mpaka, uno mwana mukashi baadi mupete kikiisho na baadi munyingishibwe! (Luk. 8:44-48) Lamiina’shi uno mwana mukashi baadi mwende kwi Yesu. Baadi mwitatshishe bwa kwenda kwi Yesu. Bimumune na lelo uno, abitungu twitatshishe bwa “kwenda kwi” Yesu. Mu ano etu mafuku, Yesu takwete kupasha bantu “abafiki” kwadi mukilengyeleshi nya. Anka kwete kutungunuka na kwitwitamina. Amba’shi: “Fikaayi kwandji, . . . neenupa kikiisho.”​—Mat. 11:28. w19.09 20 ¶2-3

Kumpala kwa byabya, mutemuki Sekadya baadi mutekye mwanda wi byabya. Baadi mufunde’shi: “Mu aa mafuku bantu ekumi ba ndjimi ilekene na ba miilo ilekene abakakwata mwina Yunda umune ku nsongo ya musapi na kumulungula’shi: ‘Atukende n’obe, mwanda tubapusha’shi, Efile Mukulu e nenu.’” (Sek. 8:23, EEM) Ba Temwe ba Yehowa mbamone’shi bwa kubunga bantu ba ndjimi yoso, abitungu kulungula mukandu wibuwa mu ndjimi ibungi. Binobino tukwete kukita mudimo ukata wa kwaluula mikanda mu ndjimi ikile pa 900. Abimweneka patoka’shi Yehowa kwete kukita kilengyeleshi lelo uno bwa kubunga kibumbu kikata kya bantu ba mu maumbo ooso. Bu bi Bible na ingi mikanda ayakwila Bible ikwanka mu ndjimi ibungi, kino kisaka kikwete kulangwila Yehowa mu buumune, sunga mbyakitukila mu ma mbalo elekene a pa nsenga. Na mwilo wa Yehowa awiukibwa kalolo bwa kisumi kyabo mu bulungudi, na kifulo kyabo kya bana na bana. Bino abinyigisha lukumiino ngofu!​—Mat. 24:14; Yo. 13:35. w19.09 30-31 ¶16-17

Mu mpombo ikata, bantu abakakalakashwa ngofu pa kumona abilwila bintu byoso byabakulupilanga’shi abikala kwanka bwa looso. Abekala mu “mpombo ikata,” na abakedidi bwa myuwa yabo mu kyakya kipungo ki bukopo. (Sef. 1:14, 15) Mu aa mafuku, nshalelo akekala bukopo bukile mpa na bwa bafubi ba Yehowa. Bu byatushii ba pa nsenga, atukapete nkalakashi kampanda. Pangi atukakutwa bingi bintu byatudi nabyo lukalo. “Mpika a lulamato na mudimukye” mmwitulumbuule bwatudya kushala na lulamato mu mpombo ikata. (Mat. 24:45) Mmukite bino mu mishindo ibungi, kadi tubande kutaluula mushindo umune: Bikongeno byetu bya kubanga mu 2016-2018. Mu bino bikongeno, abaadi betunyingishe bwa kutamisha ngikashi yatudi nayo lukalo bu byatukwete kwifubwila kwifuku dya Yehowa. w19.10 14 ¶2; 16 ¶10; 17 ¶12

Nsaa y’atudi, atutaluulaa kalolo bintu byatwele mukanwa. Nsaa yatuminyi byatudi, tatwi dingi na matalwa a kusangula kyabikakitshi mu mbidi yetu nya. Bidibwa bibuwa abitwikasha na mbidi bukome; bidibwa bibubi bi kwitukumbisha. Bipeta ta mbilombene kutuuka nka dyadya efuku dyatudi nya, kadi abikatuuku mwenda mafuku. Mu mushindo umune, nsaa yatusangula mushindo wa kukisha kapapi, twi na matalwa a kusangula byatwele mu binangu byetu. Kunyima kwa byabya, myanda yatudi basangule ayibanga kwitwelela mu binangu na mu mashimba eetu. Kukisha kapapi kwibuwa kwi kwitupa muloo; kadi kwibubi kwi kwitwinyongosha. (Shak. 1:14, 15) Bukitshishi bwinabo mushindo wibubi wa kukisha kapapi, tambulombene kutuuka nka mususa umune nya, kadi abukatuuku mwenda mafuku. Nyi bwakinyi Bible etudimusha’shi: “Tanudimbibwanga: Efile Mukulu taasepiibwa nya; mwanda akikunu muntu, ngi kyaawumbula. Akunyina mbidi yaaye awumbula akituusha mbidi: nyi ndufu.” (Nga. 6:7, 8) Bi na muulo ukata bwashi tusumbule mishindo yoso ya kukisha kapapi ayikwatshishena byabya byabadi bashikwe kwi Yehowa!​—Mis. 97:10. w19.10 30 ¶12-14

Yehowa baadi mwituleshe kifulo kyaye pa kwitupa Mwan’aye bu mulambu wa nkuulo bwa kwitupasha. (Yo. 3:16) Mbikunyi byatudi balombene kwambula kifulo kya Yehowa? P’atumono bakwetu boso bu be na muulo na p’atukukila “mukooko ushimine” ubalukiila kwi Yehowa na muloo oso. (Mis. 119:176; Luk. 15:7, 10) Atulesha shi twi bafule bakwetu pa kutusha nsaa na bukome bwetu bwa kwibakwasha. (1 Yo. 3:17) Yesu balungwile balongi baye bwabadya kwikala na kifulo kya kwipana. (Yo. 13:34, 35) Mwiya wa Kidishitu ngupya mwanda awitutekye bwa kulesha kifulo mu kipaso kyabashibadi batekye mu Mwiya ubaadi Efile Mukulu mupe bena Isaleele. Awitutekye bwa kufula bakwetu bena Kidishitu bu byabadi betufule kwi Yesu. Byabya abitekye kifulo kya kwipana. Abitungu tufule bakwetu bena Kidishitu kukila byatudi befule atwe banabene. Abitungu twibafule mu kipaso kyatudi balombene kutusha muwa wetu bwabo, bu bibakitshine Yesu. w19.05 4 ¶11-13

Bwa kupeta bukwashi bwa kikudi kiselele, abitungu tutekye na mufwaka. (Luk. 11:13) Kileshesho kya Yesu ki mu Luka 11:5-9 akitukwasha bwa kumona bwakinyi Yehowa aketupa kikudi kiselele. Muntu a mu kileshesho baadi akumiina kukukila benyi baye bibuwa. Baadi akumiina kupa benyi baye abafikile bufuku kya kudya, kadi tabaadi na kintu nya. Yesu amba’shi kuuku aaye baadi mubuukye mwanda wa mufwaka waye wa kuteka kya kudya. Yesu baadi akyebe kulongyesha kinyi? Su muntu mukutwe kupwidika bakumiina kukwasha kuuku aaye mwanda wa mufwaka waye, mbikunyi bilombene Nshetu e mwiyilu kukutwa kukwasha baaba abatungunuka na kumuteka kikudi kyaye kiselele na mufwaka! Tutekyeyi, bakulupile’shi, Yehowa aluula ku nteko yatwele bwa kumuteka kikudi kyaye kiselele. (Mis. 10:17; 66:19) Abitungu twikale bashinkamishe’shi, sunga mbikwete kwitulwisha Satana kushii kukooka, atutshokola. w19.11 13 ¶17-19

Yesu baadi auku shi, aye na balongi baye abaadi na lukalo lwa kwikisha ingi nsaa. Kadi, bantu bebungi ba aa mafuku na ba lelo uno, twi kwibapwandikisha na mpeta a mu lukindji lwa Yesu. Yawa muntu baadi mwambe’shi: “Ikisha, odye, otome, otunkume.” (Luk. 12:19; 2 Tim. 3:4) Baadi anangushena’shi bintu bi na muulo ukata nyi nkwikisha na kusanka. Kadi, mu kwilekena na byabya, Yesu na balongi baye tababaadi batuule binangu byabo ku miloo yabo’bo banabene nya. Lelo uno, tukwete kwitatshisha bwa kwambula Yesu pa kufubisha nsaa yetu yatushi na mudimo, kushi penda bwa kwikisha nya kadi bwa kukita myanda ibuwa bu kulungula bangi mukandu wibuwa na kutwela mu bisangilo. Byabya, mudimo wa bulungudi na kutwela mu bisangilo bi na muulo ukata kwatudi, nyi bwakinyi atukitaa mwetu moso bwa kukita ino midimo i selele misusa yoso. (Eb. 10:24, 25) Sunga nsaa yatudi mu konje, atutungunukaa na kyubishi kyetu kya myanda ya mu kikudi bu kutwela mu bisangilo mbalo yoso yatudi, na kukimba mishindo yoso ayimweka bwa kwisamba na bantu batufumankana nabo myanda ya mu Bible.​—2 Tim. 4:2. w19.12 7 ¶16-17

Yehowa etutadiila bwatudya kusangula nshalelo atukumiina kwikala naye. Kwete etulongyesha bya kwata bitshibilo bibuwa na kwitukwasha bwa kwikala na nshalelo ebuwa nsaa yatwata bitshibilo abimusankisha. (Mis. 119:173) Nsaa yatutumikila binangu bya mu Eyi dy’Efile Mukulu, atwikala atwata bitshibilo bibuwa. (Eb. 5:14) Sunga nsaa yatwata kitshibilo kibuwa, mbilombeene kwitwikela bukopo bwa kwikilombasha. Tubandeyi kutaluula bino bileshesho: Ungi mukwetu nsongwa bata kitshibilo kya kubadika Bible oso mushima. Balondo programe aaye a kubadika munda mwa mbingo ipeela, akupu bemika. Ungi mukwetu mukashi baata kitshibilo kya kufuba bu mbala-mashinda a myeshi yoso, kadi kikwete nka kulongyela bwa kwibwata. Bakulu abata kitshibilo kya kwikala abende mu kutala bakwetu ba mu kakongye kabo, takudi myeshi ibungi tambebikite. Ino myanda ngilekene, kadi i mumune mu mushindo kampanda. Bano bantu abata bitshibilo kadi ta mbebilombashe. w19.11 26 ¶1-2.

Yesu baadi mupwandikishe ano mafuku eetu na “mafuku a Nowa,” kushi mpaka twi mu “bipungo biibukopo.” (Mat. 24:37; 2 Tim. 3:1) Nyi bwakinyi, bangi bena dibaka mbabande kupela kutanda bwabadya kupeta nsaa ya kwipana ngofu mu mudimo wa bena Kidishitu. Nsaa yabesamba pabitale kutanda bana sunga kupela kutanda, bena dibaka basha binangu mbalombe ‘kwela makumi.’ (Luk. 14:28, 29) Bena dibaka bapwe kutanda bana abauku’shi kutanda na kukusha bana takutekaa penda makuta ebungi nya, kadi akutekaa dingi nsaa na bukome bwibungi. Byabya, bi na muulo bwashi bena dibaka beyipushe ino nkonko: ‘Atwe boso atwikala na mudimo bwa kulombasha nkalo ya kifuko su? Twi bepushene pabitale “bintu bi na muulo” mu kifuko kyetu su? Su atwikala atufubu atwe boso, nanyi apasukila bana? Nanyi ekala na bukitshishi kwabadi?’ Nsaa i bena dibaka abesambila pabitale ino myanda na kalolo koso, bakwete kutumikila mayi e mu kifundwe kya lelo. w19.12 23-24 ¶6-7

Mpoolo mutumiibwa baadi mufumankane na kalakashi ilondene. (2 Kod. 11:23-28) Baadi na kya kunyingiila ‘mulobo umutungye mu mbidi,’ ubaadi pangi mukumbo kampanda. (2 Kod. 12:7, EEM) Dingi baadi mukalakashwe nsaa ibaadi Demase, abaabadi abafubu naye mumulekye “pamwanda wa kifulo kya byaa pano pa nsenga.” (2 Tim. 4:10) Mpoolo baadi mwina Kidishitu mwedibwe mwimu sh’eshimba dinyingye, baadi mukwashe bangi, anka ingi nsaa myanda ibaadi ayimubofusha kwishimba. (Lom. 9:1, 2) Mpoolo bapetele kunyingishibwa na bukwashi bubaadi nabo lukalo. Mushindo kinyi? Ku bukwashi bwa kikudi kiselele, Yehowa baadi mumunyingishe. (2 Kod. 4:7; Fid. 4:13) Yehowa baadi dingi mumunyingishe ku bukwashi bwa bakwabo bena Kidishitu. Mpoolo alesha’shi bakwabo bena Kidishitu abaadi ‘bamusambe.’ (Kol. 4:11) Mu bano baadi muteemune, mwi Aristarkuse, Tishike na Maako. Abaadi banyingishe Mpoolo, na kumukwasha bwa kunyingiila. w20.01 8 ¶2-3

Yesu badi muleshe’shi, bi bukopo kupatulwila muntu shi mmwedibwe mwimu, abipushaa muntu ‘mutandjikwe dya kabidi,’ sunga ‘kutandjikwa ku kikudi.’ (Yo. 3:3-8) Mushindo kinyi aubangaa mwina Kidishitu kunangushena mu kingi kipaso aye bapu kwedibwa mwimu? Kumpala kwa’shi bano bena Kidishitu bedibwe mwimu, abasangelanga lukulupilo lwabo lwa kwikala na muwa wa looso pa nsenga. Abatengyelanga na muloo oso kipungo akikakatusha Yehowa bubi boso na kwikasha nsenga bu mpaladiiso. Pangi babadi abamono mu binangu byabo, byabakakukila bena kifuko nabo sunga ba kuuku babo abadi bafwe. Anka kunyima kw’abo kwedibwe mwimu, ababanga kunangushena ungi mushindo. Bwakinyi? Ta nkwamba’shi ababanga kubepuula lukulupilo lwabo lwa muwa wa looso pa nsenga nya. Ta mbashintuule binangu byabo mwanda wa’shi abekalanga bapwe kukooka na makyenga abapetanga nya. Musango umune tabapwandikisha’shi kwikala na muwa wa looso akwibakalakasha nya. Anka, Yehowa afubu na kikudi kyaye kiselele bwa kushintuula mweneno abo na lukulupilo lwabasangelanga. w20.01 22 ¶9-11

Mu mwiya ubaadi Efile Mukulu mwelele bena Isaleele, bantu bababadi basangule tababaadi abataluula penda myanda ya mu kikudi nya kadi abaadi abasambisha mpa na myanda itale bibeshi. Kadi, mu “mwiya wa Kidishitu,” mudimo wa bakulu ngwa kutala penda myanda ya mu kikudi itale milwisho. (Nga. 6:2) Abauku shi, Efile Mukulu, mmulekyele bena mbulamatadi matalwa a kusambisha bilumbu bitale bibeshi na ingi myanda. Bino mbitale na matalwa a kutshibila bantu bibawe na kwibela mu lukano. (Lom. 13:2-4) Bakulu abataluulaa myanda ya mu kikudi itale mulwisho ukata naminyi? Ababadikaa Bifundwe bwa kutaluula mwanda na kwata bitshibilo. Abatentekyeshaa shi kifulo nyi nkitako kya mwiya wa Kidishitu. Kifulo akitakula bakulu bwa kutaluula: Akitungu kukita bwa kukwasha muntu oso e mu kakongye ababadi balwishishe. Pabitale muntu mukite mulwisho, kifulo akitakula bakulu bwa kutaluula su yawa muntu belanga kwishimba na su kwi mushindo wa kumukwasha bwadya kwalusha kipwano kyaye na Yehowa. w19.05 7 ¶23-24

Yesu badi mushinkamishe’shi, Nshaaye nyi Nsulo na mulami a muwa waye. Yesu badi mutule lukulupilo lwaye loso mwi Nshaaye, na Yehowa namu bamupele kyoso kibadi nakyo lukalo bwa kushaala na muwa. Kintu ki na muulo ukata, Yehowa badi mukwashe Yesu bwadya kushaala na lulamato kwadi. (Mat. 4:4) Na dingi, Yehowa kwete kulombasha nkalo yetu ya mu kikudi. Ku bukwashi bw’Eyi dyaaye, mwitufumbwile bya binyibinyi byaaye, mpángo yaaye, nshalelo ebuwa, na myanda ayifiki mu mafuku e kumpala. Mmwitupasukile nsaa ibatudi atulongo bya binyibinyi bwa musango wa kumpala, afuba na baledi betu sunga bangi bantu bwa kwitulongyesha myanda yaaye. Kwete kwitukwasha dingi bwatudya kwikala ba kuuku baaye, pa kwitulesha kalolo kaaye kukidila kwi bakulu ba mu kakongye basha kifulo, na bangi bakwetu banyingye mu kikudi. Na dingi, Yehowa kwete kwitulongyesha ku bukwashi bwa bisangilo bya kakongye, mwatulongo pamune na bakwetu ba mu kikudi. Mu ino mishindo mpa na ingi, Yehowa kwete kulesha byadi nshe-bana etupasukilaa atwe boso​—Mis. 32:8. w20.02 3 ¶8; 5 ¶13

Su twekala atukwatshila bangi kyutu sunga betukwatshila kyutu kwi bangi, tatwi balombene kwikala mu kufukama. Abitungu tukatushe kyutu mu mashimba etu na kupela kutakula bangi mu kwikala nakyo. Nkinyi kyatudi balombene kukita menemene bwa kukwasha bangi bwa’shi bakambile kyutu, na kutwala butaale? Mweneno etu na bikitshino byetu mbilombene kwikala na bukitshishi bwi bukopo kwi bangi. Uno ndumbulwilo akumiina’shi twikale na “kwisadika” bwa bintu byatudi nabyo. (1 Yo. 2:16) Anka bino binangu mbilombene kupa bantu kyutu. Twi balombene kukita bya’shi bangi tabetukwatshilanga kyutu nsaa y’atupele kwakula nsaa yoso bwa bintu byatudi nabyo sunga byatukyebe kuula. Ungi mushindo wa kukwasha bwa’shi kyutu takikalanga kwanka mpa kwikala na kipopeelo nsaa yatudi na mashito mu kakongye. Su tukwete kwisamba nka pabitale mashito atudi nao, atutakula bangi bwabadya kwitukwatshila kyutu. Pamutwe pa byabya, nsaa y’atupasukila bangi na kusankila myanda ibuwa yabakitshi, atwibakwasha bwabadya kusanka na byabadi nabyo na kutwesha buumune na butaale mu kakongye. w20.02 18 ¶15-16

We kulonga pabitale Yehowa kukiila ku bipangwa. (Kibaf. 4:11) Banda kunangushena pabitale mitshi na nyema byabadi bapangye kwi Yehowa na kipaso kyabilesha’shi e na binangu. Nangushena ku kipaso kyabadi bapangye mbidi yetu. (Mis. 139:14) Nangushena dingi pabitale bukome bwabadi bele mu nguba kwi Yehowa, aku namu nguba nyi mpenda lumune lwa ku midiyo ya nyenyenyi. (Yesh. 40:26) Su okita byabya, kanemo kobe bwa Yehowa akatama ngofu. Anka kuuka’shi Yehowa e na binangu na bukome nyi ngimune ya ku myanda ilombene kunyingisha kipwano kyobe naye. Bwa kufula Yehowa ngofu, abitungu oukye myanda ibungi pabimutale. Ikala mushinkamishe’shi Yehowa mmukufule. Tentekyesha’shi “su omukimba, omumono.” (1 Mya. 28:9, EEM) Byabya, Yehowa akulungula’shi: “Naakukakila kwandi.” (Yel. 31:3) Ponyisha kwikala na lutumbu bwa byoso bikukitshine Yehowa, onyisha kumufula ngofu. w20.03 4 ¶6-7

Mpoolo mutumiibwa mmulekye kileshesho kibuwa pabaadi aata mudimo wa bulungudi na muulo ukata mu nshalelo aaye. Pabaadi mu Kodinda mu lwendo lwaye lwa kabidi lwa bu misionere, baadi na makuta apeela na baadi na kya kufuba ingi nsaa bwa kukita mapema. Baadi akitshi uno mudimo bwadya kwikwasha, bwa kumona bya kulungula bena Kodinda mukandu wibuwa “bisumanga.” (2 Kod. 11:7) Sunga bibadi abitungu’shi Mpoolo akite mudimo wa maasa, badi mutungunukye na kutuula mudimo wa bulungudi pa mbalo ya kumpala, na baadi alungula mu mafuku oso a Sabato. Pabashintulukile myanda ibadi nayo, Mpoolo badi na mushindo wa kutuula binangu byaye byoso ku bulungudi. “Beepaanyine aye ooso ku bulambukishi bw’Eyi dy’Efile pa kushinkamisha kumpala kwa bena Yuuda’shi: Mesiya nyi Yesu.” (Bik. 18:3-5; 2 Kod. 11:9) Kunyima, pabadi mu lukano mu Looma munda mwa bipwa bibidi, Mpoolo badi mutushe bu kamonyi kwi bantu babadi abafiki mu kumutala na, badi dingi afundila bantu mikanda. (Bik. 28:16, 30, 31) Mpoolo badi mwate kitshibilo kya kupela’shi kintu sunga nkimune takikalanga na muulo kukila mudimo wa bulungudi. w19.04 4 ¶9