Mweshi wa 3

Kifulo bw’Efile Mukulu n’Eyi dyaaye abitunyingisha bwa kukookyela Yehowa sunga nsaa i bakwetu ba mu kifuko sunga ba kuuku abetutakula bwatudya kukita nabo bipwikwa bikutwene na abyamba bifundwe pabitale bafwe. Mbalombene kukimba kwitukwatshisha buufu, pangi pa kwakula’shi tatwi bafule sunga kunemeka yawa mufwe. Sunga’shi mbalombene kwitulungula’shi byatukitshi mbilombene kutakula mufwe bwa’shi afwishile abatala malwa mu ungi mushindo. Mu Caraïbe, bantu bebungi abambaa’shi, su muntu bafu “mukishi” waye ngulombene kushala na kunyoka boso babadi bamukyengeshe. Muyiile abilesha ungi mukanda, “mukishi” ngulombene mpa na “kufwishila mwilo malwa.” Mu Afrique mwi kipikwa kya kuubika lumweno mu nshibo ya mufwe na kutadiisha ma foto ku lubumbo. Bwakinyi? Bangi abapwandikisha’shi tala bafwe bemona! Bu byatudi bafubi ba Yehowa, tatukumiinaa myanda yooso ya mpwandikishi sunga bipikwa abikwatshishena madimi a Satana!​—1 Kod. 10:21, 22. w19.04 16 ¶11-12

Yesu badi mulongyeshe mayi a kulonda abaadi na kya kukwasha balongi baye bwabadya kukitshina bangi myanda na kululama. Bu kileshesho, banda kungushena pabitale Mwiya Ukata. Atwe boso atukumiina shi betukitshine myanda na kululama. Byabya, abitungu’shi atwe namu tukitshine bangi myanda na kululama. Su twakita byabya, abo namu abetukitshina myanda na kululama. Kadi twi kukita kinyi su abaadi betukitshine myanda na kukutwa kululama? Yesu baadi mulongyeshe balongi baye bwabadya kukumiina shi Yehowa ‘akatshibi biimu bya [baaba] abamwididi kaanya na bufuku.’ (Luk. 18:6, 7) Ano mayi nyi mulayilo aulesha shi: Efile Mukulu eetu auku kalolo nkalakashi yatukwete kufumankana nayo mu ano mafuku a ku nfudilo, na shi pa kipungo kilombane akatshibi biimu bwetu. (2 Tes. 1:6) Nsaa yatulondo mayi a kulonda abaadi Yesu mulongyeshe, atukakitshina bangi myanda na kululama. Na su abaadi betukitshine myanda na kukutwa kululama mu uno ndumbulwilo a Satana, twi kupeta kunyingishibwa pa kuuka’shi Yehowa akumiina kufwishila baaba abetukyengyesha kiimu. w19.05 5 ¶18-19

We nsongwa e ku kalasa? Balongi noobe mbalombene kwikala bakumiine dilongyesha dya bintu bituukile. We kwikala na lukalo lwa kukalwila malongyesha a mu Bible, kadi pangi twemono bu mukumbene koobesha kwibikita. Byabya abitekye’shi wate mpángo ya kwilongyela! We kwikala na bipatshila bibidi: (1) bwa kunyingisha lukumiino loobe’shi Efile Mukulu bapangile bintu byooso na (2) bwa kulonga mushindo wa kupatuula lukumiino loobe. (Lom. 1:20) We kubanda kwiyipusha’shi, ‘Bwakinyi bena kalasa nami abakumina dilongyesha dya bintu bituukile?’ Akupu okimbuule mu mikanda yetu pabitale wawa mwanda. We kupwandikisha’shi, kulesha bi lukumiino loobe ta nkubofule nya. Bantu bebungi mbakumine dilongyesha dya bintu bituukile mwanda, muntu abakwete kunemeka mwibalungule’shi mbya binyi. Su bopete mwanda umune sunga ibidi yodya kwisamba nabo, we mulombene kukwasha ungi muntu akimbi kuuka binyibinyi.​—Kol. 4:6. w19.05 29 ¶13

Pabaadi mutemuki Eliya asuku bwa kupasha muwa waye, baadi mubofule kwishimba mu kipaso kibaadi mutekye lufu. Yehowa batumine mwikeyilu sha bukome, bwa kufika mu kutala uno muntu baadi mubofule kwishimba. Mwikeyilu baadi mukite kintu kampanda bwa kumukwasha. Bapele Eliya kidibwa ki kaalo na amunyingisha bwadya kudya. (1 Bf. 19:5-8) Kino kileshesho akilesha mwanda wa binyibinyi: Ingi nsaa kukita kantu kapela ka kalolo, nkulombene kukwasha muntu. Twi kulesha mukwetu mwina Kidishitu e na twinyongoshi’shi twi bamufule pa kumupa kidibwa, kumupa kintu kampanda sunga kumufundjila bishima bya kumunyingisha. Su atumono’shi tatoobesha kwisamba naye pabitale myanda ayimukalakasha kwishimba, twi kumukitshina byabya bwa kumukwasha. Yehowa baadi mukwashe Eliya mu kilengyeleshi, bwadya kutambuka kipindji kibula bwa kwenda ku Mwengye wa Horebe. Ndilongyesha kinyi dyatudi balombene kwikupetela? Su atukumiina kukwasha muntu abaabadi balwishe na myanda ibutete, abitungu tubande kumukwasha bwashi epushe mu kukalwilwa. Byabikala kwaye ku nshibo sunga ku Nshibo ya Bufumu. w19.05 16 ¶11; 17 ¶13-14

Pwandikisha’shi okwete kubadika shapitre a 12 a mukanda wa butemuki bwa Sekadya abutemuka lufu lwa Mesiya. (Sek. 12:10) Nsaa yofiki mu verse 12, bobadika shi “kifuko kya beena-Natane” akikenyongola mwanda wa lufu lwa Mesiya. Pamutwe pa kukila lubilo kushi kwimana pa twatwa tu myanda tupeela, we mukumbene kwimana na kwiyipusha’shi: ‘Nkwipushena kinyi kwi pankatshi pa nshibo ya Natane na Mesiya? Otompo “kukimbuula” kapeela. Bifundwe byabadi baleshe mu mulongo wa munkatshi abitukunkusha mu 2 Samwele 5:13, 14, mwanka olongo’shi Natane badi mwana a Nfumu Daavide. Kifundwe kya kabidi ki mu wawa mulongo akikutakula mu Luka 3:23, 31, akilesha’shi Natane badi nkambwa a Madiya. Abikusangasha musango umune! Bodi ouku’shi Yesu abadi bambe’shi atukila mu kifuko kya Daavide. (Mat. 22:42) Anka Daavide badi na bana bakile pa 20. Tatwi balombene kukanya pa kumona Sekadya atemuna nshibo ya Natane bwa kulesha’shi e na kabingilo ka kudila lufu lwa Yesu su? w19.05 30 ¶17

Kinyi akitungu’shi tukite? Pa kwilongyela nsaa yoso, atwikala bashinkamishe bya binyibinyi byatudi balongye mu Bible. Atushinkamisha dingi’shi miiya ya Yehowa i buwa. Paapa, nka bi mutshi wi na mishi ibukopo, atukeekala bashimate bibukopo na “banyingye mu lukumiino.” (Kol. 2:6, 7) Uuka’shi takwi muntu mulombene kunyingisha lukumiino lwetu pa mbalo yetu. Byabya, tungunuka na kwiyikasha muntu mupya mu kwalula kwa mpángo ya mu binangu byobe. Ikala otekye nsaa yoso bukwashi bwa kikudi kiselele kya Yehowa. Nangushena ngofu na kutungunuka na kutaluula binangu byobe. Kimba ba kuuku bebuwa, ikala mwifunyishwe na bantu balombene nkukwasha bwa kushintuula ngyelelo oobe a binangu. Su bokitshi byabya, okekalwila ku bukitshishi bwa uno ndumbulwilo a Satana na kuponesha “nangunangu na kwitatula kooso akwikamisha ku kyukilo ki’Efile-Mukulu.”​—2 Kod. 10:5. w19.06 13 ¶17-18

Nka bu bibaadi Luuta mulamate Naomi mukashi kilele, abitungu tutungunukye na kukwatshishena baaba bafwishe bantu babadi bafule. (Lut. 1:16, 17) Paula amba’shi: “Nka mulume ande ky’afu, bantu bebungi abaadi bankwashe na kunkwatshishena bikata. Mwenda mafuku, ababangile kwipana ku mifubo yabo. Anka, nshalelo ande baadi mupwe kushintuluka ngofu. Nyi mbukwashi bukata nsaa i bangi abashinguula’shi, abitungu kukwatshishena muntu e na kinyongwa munda mwa myeshi sunga mwa bipwa mupunda muntu abadi bafwishe.” Eyendo, bantu belekene. Bangi abashintuulaa nshalelo aabo mususa umune muyile myanda ibabafumankana nayo. Bangi namu, nsaa yoso yabakitshi myanda ibabadi abakitshi pamune na muntu abadi bafwishe, abibapa kinyongwa. Bantu abenyongolaa mu bipaso bilekene. Tutentekyesheyi’shi, Yehowa mmwitupe kineemo na bushito bwa kupasukila baaba bafwishe mwina dibaka nabo. w19.06 24 ¶16

Nsaa yabadi bakandjikye mudimo wetu, abitungu tuukye nsaa ya “kuumiina.” (Mul. 3:7) Abitungu tulame myanda yetu ifwame, bu mashina a bakwetu balume na bakashi, mbalo yatutwelela mu bisangilo, mushindo watukwete kukita bulungudi, na byatukwete kupeta bidibwa bya mu kikudi. Tatwi balombene kulungula bakata ba mbulamatadi ino myanda nya; sunga kwiyilungula bakwetu ba mu kifuko batudi nabo mwiumbo dimune sunga bashalele mu angi maumbo. Su twapona mu uno muteo, atutulu muwa wa bakwetu mu masaku. Tatulekyeelanga tu bilumbu tupeela bwatudya kwitutshibuula. Satana auku’shi kifuko kiitshibuule ta nkilombene kunyinga. (Mak. 3:24, 25) Kwete kukimba bya kutwesha kwiabuula munkatshi mwetu. Nsaa y’akitshi byabya, e na lukalo lwa’shi twikale atwikutwena munkatshi mwetu pamutwe pa kulwa naaye. Sunga bena Kidishitu banyingye abitungu badimukye tala ba pona mu uno muteo. Su twetatshisha bwa kupudisha tu bilumbu na bakwetu, atukambila kateo ka kwitshibuula.​—Kol. 3:13, 14. w19.07 11-12 ¶14-16

Misusa ibungi, bantu abatambula mukandu wetu, kushi mwanda wa byabya byatwakula, kadi mwanda wa mushindo watwibyakula. Abasangalaa nsaa yatudi na kalolo, na mayele, na p’atwibapasukila n’eshimba dimune. T’atwibatakula pa bukopo bwa’shi bateemeshe byatwakula nya. Kadi, atukimbi bya kuuka bwakinyi be na mweneno kampanda pabitale kipwilo na ikala wetulu pa mbalo yabo. Bu kileshesho, Pabadi esamba na bena Yuuda, Mpoolo badi anangushena nabo ku bukwashi bwa Bifundwe. Kadi, pabadi mwisambe na basha binangu ba mu Greke ku Aleopashe, tabadi muleshe’shi byakula abitukila mu Bible nya. (Bik. 17:2, 3, 22-31) Twi kulonda kileshesho kya Mpoolo naminyi? Su bofumankana na muntu sh’akumiina Bible, ta bibuwa kutemuna Bible nsaa yokwete kwisamba naye. Su omona’shi muntu wesamba naaye t’akumiina’shi bamumone kwabadika Bible noobe, kimba bya kumulesha bifundwe mu mushindo ushaumono bangi, pangi ku bukwashi bwa telefone sunga tablete. w19.07 21 ¶5-6

Satana baadi mutompe bena Isaleele na budimu boso bwabadya kulangwila ma nkishi. Baadi auku’shi be na lukalo lwa kupeta bidibwa, aye nkufuba na lwalwa lukalo bwa kwibatakula mu kukita kyakumiina. Pabaadi bena Isaleele batwele mu Nsenga ya mulayilo, abaadi na kya kulonga mushindo upya wa kukusha bidibwa. Pababadi mu Ejiipitu, bena Isaleele abaadi abakitshi mikola bwa kukaka mema a mwela wa Nile mu mafuba aabo. Anka, mu Nsenga ya mulayilo tabaadi na kya kubundula mikola bwa kukaka mema nya, kadi mema abaadi aafiki mu bipungo bya mpeshi, na ku lume. (Miy. 11:10-15; Yesh. 18:4, 5) Dingi, bena Isaleele abadi na kya kulonga mayele apya a kudima. Bwakinyi Yehowa baadi ebadimusha pabitale kulangwila b’efile ba madimi, aku namu baadi akula myanda itale kulonga mayele apya a kudima? Yehowa baadi auku’shi, bena Isaleele abakyebe kwenda kwi ba mpangano bebefunyishe bwa kulonga mishindo ya kudima. Eyendo, baaba ba mpangano abaadi abauku kudima kalolo kukila bena Isaleele, na mwilo w’Efile Mukulu ubaadi na kya kulonga mishindo ya kudima kwabadi, kadi kubaadi masaku akata. Binangu bya ba bidime ba mu Kanaana bibadi abikunkushibwa na lulangwilo lwa Baale.​—Mb. 25:3, 5; Bans. 2:13; 1 Bf. 18:18. w19.06 3 ¶4-6

Pabafikile Mpoolo, Silase, Luka na Timotee mu Fidipe kibundji kibaadi ku bupika bwa bena Looma, abasangene bantu bebungi abaadi abakumiina mukandu wa Bufumu. Bano bakwetu bananka basha katshintshi abatushishe kakongye kapya, na bakwetu bapya ababangile kwibunga, pangi nu nshibo ya Lidii mukwetu mukashi sha eyikashi dya kukukila benyi. (Bik. 16:40) Mu mafuku apeela, kano kakongye kapya kabapetele lukalakashi. Satana baadi mutakule beshikwanyi ba bya binyibinyi bwabadya kulwisha mudimo wa bulungudi wa bano bena Kidishitu. Abaadi bakwate Mpoolo na Silase, bebakupila nfimbo na kwibela mu lukano. Kunyima kw’abo kwibatusha mu lukano, abayile mu kutala baba balongi bapya na kwibanyingisha. Akupu Mpoolo, Silase, na Timotee abakatukile mu Fidipe, pangi Luka bashele mwanka. Nkinyi kibaadi kano kakongye kapya kakite? Ku bukwashi bwa kikudi kya Yehowa, kabatungunukile nka na kwenda kumpala na kufubila Yehowa. (Fid. 2:12) Mpoolo baadi na kabingilo ka kwikala na muloo pa mwanda wabo! w19.08 8 ¶1-2

We mufilukye wende mu dingi eumbo su? Kufiluka bwa kwenda ingi mbalo kwi kuteka makuta ebungi, na mbibofule bwa kwiyapula makuta. Bwa kupela kutwela mabasa, leka kwiyapula makuta bwa kuula bintu byoshi nabyo lukalo. (Nki. 22:3) Nsaa yatudi na lukalakashi, sunga nsaa ayikumbu mukwetu a mu kifuko, bi kwikala bukopo bwa kuuka bungi bwa makuta aatungu’shi twiyapule. Mu myanda i byabya, tentekyesha’shi ‘nteko na kwiyaaya’ mbilombene nkukwasha bwa kwata bitshibilo bibuwa. Yehowa mmulombene nkupa butaale ‘abulama eshimba dyobe na binangu byobe,’ bwa nkukwasha onangushene kalolo. (Fid. 4:6, 7; 1 Mp. 5:7) Ikala na ba kuuku bebuwa. Lungula ba kuuku bobe byabya byopusha na myanda yodi nayo, bikishekishe baba bafumankane na myanda i bu yobe. Kukita byabya, akukukwasha bodya kupusha bibuwa. (Mul. 4:9, 10) Ba kuuku bobodi nabo kumpala kwa kufiluka benka ba kuuku boobe. w19.08 22 ¶9-10

Bwakinyi Yehowa badi mupwandikishe ngoshi ikata ya nfudiilo na Megido? Kala, ngoshi ibungi abadi abeyilwila mu Megido na peepi na Kipya kya Izreele. Ingi misusa, Yehowa badi mukwashe mwilo waye bwa kutshokola yaaya ngoshi. Kileshesho, ku “meema a Megido,” Efile Mukulu badi mukwashe Nsushi Barake bwadya kutshokola basalayi ba bena Kanana babadi ku bukunkushi bwa nfumu Sisera. Barake na mutemuki mukashi Debora babadi batumbule Yehowa bwa kyakya kilengyeleshi kya kutshokola. Babayimbile’shi: “Dya mwiyilu nyenyenyi ngilwe ngoshi . . . na Sisera. . . . Balwishi bobe booso Yehowa, beetute, byabya dingi bakuuku boobe bekale bu nguba p’atunduka na mbàdibàdi yaaye.” (Bans. 5:19-21, 31) Mu nsaa ya Armagedone, beshikwanyi b’Efile Mukulu abakabutudibwa, nsaa i boso bafule Efile Mukulu abapashibwa. Anka kwi kwilekena kukata pabitale ino ngoshi ibidi. Mu nsaa ya Armagedone, mwilo w’Efile Mukulu taukalu ngoshi nya. T’abekala sunga na ma mputu nya! “Bukome [bwabo] bwi mu kunyinga kw’eshimba na mu lukulupilo” mwi Yehowa na bilwilo byaye bya mwiyilu.​—Yesh. 30:15; Kibaf. 19:11-15. w19.09 9 ¶4-5

Mushindo wa “kwenda kwi” Yesu nyi kulonga bibungi pabitale myanda ibaadi mwakule na ibaadi mukite. (Luk. 1:1-4) Takwi muntu su ngumune mulombene kukita bino pa mbalo yetu abitungu tulongye ino myanda atwe banabene. Dingi “atwende kwi” Yesu pa kwata kitshibilo kya kubatshishibwa na kwikala bu balongi ba Kidishitu. Ungi mushindo wa “kwenda kwi” Yesu nyi mpa kwenda kwi bakulu ba mu tukongye nsaa yatudi na lukalo lwa bukwashi. Yesu kwete kufubisha bano “bantu bekale bya buntu” bwa kupasukila mikooko yaye. (Ef. 4:7, 8, 11; Yo. 21:16; 1 Mp. 5:1-3) Abitungu twitatshishe bwa kuteka bukwashi bwabo. Tatutengyela’shi bakulu babadikye bi mwatudi bwa kwiuka kyatudi nakyo lukalo nya. Tutaluuleyi bibaadi byakule ungi mukwetu abetamina bu Julian: “Nebatekyele bukwashi, na bukwashi bwa’bo bubaadi bu kya buntu kyanshinaadi mubande kupeta.” Bakulu basha lulamato, bu bano babidi abayile mukutembela Julian, mbalombene kwitukwasha bwa kwiuka bi “kinangu kya Kidishitu” bwa’shi tupushe na kwambula ngyelelo aye a kinangu. (1 Kod. 2:16; 1 Mp. 2:21) Nsaa yabetukwasha mu uno mushindo, nyi kya buntu kikile buwa kya betupa. w19.09 21 ¶4-5

Mu Bible mwi bileshesho bya bena Kidishtu balume na bakashi bashi mu kisaka kya bantu 144 000. Umune a kwabadi nyi Yowano mubatshishi. (Mat. 11:11) A kabidi nyi Daavide. (Bik. 2:34) Abo na bangi abakasanguka bwa kwikala na muwa mu mpaladiso pa nsenga. Boso bwabo pamune na kibumbu kikata abakekala na mushindo wa kulesha lulamato lwabo kwi Yehowa na kukwatshishena Bufumu bwaye. Uno nyi musango wa kumpala aubungu Efile Mukulu midiyo ya bantu ba maumbo oso bwabadya kumulangwila. Byatwikala na lukulupilo lwa kwenda mwiyilu sunga lwa kushala pa nsenga, abitungu tukwashe pakudi mushindo bantu bebungi bwabadya kwikala mu kibumbu kikata kya “ingi mikooko.” Kubashala mafuku apeela bwa’shi Yehowa afwishe mpombo ikata ayikabutula mbulamatadi na bipwilo bikwete kukyengyesha bantu. Boso be mu kibumbu kikata abekala na kineemo kikata kya kufubila Yehowa pa nsenga bwa looso!​—Kibaf. 7:14. w19.09 31 ¶18-19

Bu bi ndubulwilo a Satana taadi peepi na kufudila, atufumakana na nkalakashi ikile bukopo ilombeene kutompa lulamato lwetu kwi Yehowa na ku Bufumu bwaye. Bantu be kutungunuka na kwitusepa. Kangi kabigilo kakata nka’shi tatukwete kukwatshishena kipindji su nkimune kya ndubulwilo a Satana. Abitungu tunyingishe lulamato lwetu kubanga binobino, paapa atukashaala nalo mu mpombo ikata. Mu mpombo ikata, akukamwenaka kushintuluka pabitale bakwetu abakakunkusha pa nsenga. Mu yaya nsaa, boso bedibwe mwimu be pa nsenga abakabungibwa mwiyilu bwa kulwa ngoshi ya Armagedone. (Mat. 24:31; Kibaf. 2:26, 27) Kasaka ka Bakunkushi-Bakulu takakekala netu dingi pano pa nsenga nya. Anka, kibumbu kikata akikala nka kilumbuulwe. Bakwetu balume be na ngobesha ba mu ingi mikooko abakakunkusha. Abitungu tukaleshe lulamto lwetu kwi Yehowa pa kulonda buludiki bwabo abufuki kwadi. Abitungu tulonde bukunkushi bwabo su atukumiina kupanda. w19.10 17 ¶13-14

Naomi baadi mwana mukashi sha lulamato baadi mufule Yehowa. Kadi kunyima kwa lufu lwa mulume aaye na lwa bana baye babidi, baadi mushintule eshina dyaye dya bu Naomi, aata dya bu “Mara,” adipushisha “Buulo.” (Lut. 1:3, 5, 20, 21) Luuta, mukashi a mwan’aye bashele mumulamate mu nkalakashi yaye yoso. Luuta tabaadi penda mukite myanda kampanda bwa kukwasha Naomi nya, kadi baadi dingi amulungula mayi a kumusamba nao. Luuta balesheshe’shi mmufule Naomi na kumukwatshishena mu bishima bipelepele na bibuwa. Nsaa i mwina Kidishitu afwisha mwina dibaka naye, abitungu tumukwatshishene. Bena dibaka abekalaa nka bu mitshi ibidi ayikulu pamune ilamatshishene. Mwenda bipwa, mishi ya yaya mitshi ayitwelena. Su batukula mutshi umune na wafwa, ungi mutshi ngulombene kukyenga ngofu. Mu mushindo umune, nsaa i muntu afwisha mwina dibaka naye, mmulombene kwinyongola bikata munda mwa mafuku ebungi. w19.06 23 ¶12-13

Tabitungu tutale penda mishindo yatusangula bwa kukisha ka paapi nya, anka abituntu tutale dingi bungi bwa nsaa yatukisha. Su tatwibatale kalolo, twi kukisha nsaa ibungi mu kwaasha pe nsaa yatufubila Yehowa. Mwanda wa kumpala ngwa kuuka bungi bwa nsaa yokwete kukisha binobino. We mulobeene kwikala na programe ku lubingo. Nfunda ku kalandrie bungi bwa nsaa yokisha mu kubandjila televizion, ku Internete, kwaasha ku telefone obe. Su bomono’shi okwete kukisha nsaa ikile bungi, kita programe. Tshiba nsaa ya kukita bintu bi na muulo, akupu djo otule nsaa ya kukisha kapapi. Na dingi, teka Yehowa bwa’shi akukwashe olondo programe obe. Kukita bino abikukwasha bodya kwikala na nsaa na bukome bwi bungi bwa kwilongyela Bible, lulangwilo lwa mu kifuko, kutwela bisangilo bya bena Kidishitu, na kufubila Yehowa mu mudimo wa bulungudi. Wekala dingi na muloo wa nsaa yokisha kapapi, mwanda botulu Yehowa pa mbalo ya kumpala. w19.10 30 ¶14, 16; 31 ¶17

Bu mu kipwa kya 55, bino bipungo byetu (B.B.) bena Kodinda abatshile kitshibilo ki na muulo ukata. Abaadi bebalungule’shi bakwabo be mu Yeelusaleme na mu Yuuda bakwete kukyenga abatshile kitshibilo kya kwibakwasha. (1 Kod. 16:1; 2 Kod. 8:6) Myeshi ipeela kunyima, abo nkulungula Mpoolo mutumiibwa’shi bena Kodinda tabakii batushe lwinyi lupungo. Bu kipeta, lupungo lwabo talubaadi lufikye pa nsaa bwa kwenda ku Yeelusaleme pamune na bintu bya tungi tukongye nya. (2 Kod. 9:4, 5) Bena Kodinda abaadi baate kitshibilo kibuwa, na Mpoolo baadi mwibatumbule bwa lukumiino lwabo lunyingye na lukalo lwabo lwa kwikala n’eyikashi dya kupana. Anka baadi dingi mwibanyingishe bwabadya kupudisha kyakya kyababadi bapwe kubanga. (2 Kod. 8:7, 10, 11) Kileshesho kyabo akitulongyesha’shi sunga bena Kidishitu basha lulamato mbalombene kukutwa kulombasha kitshibilo kibuwa. Bwakinyi? Mwanda wa kukutwa kwetu kwa kupwidika, twibalombene kulongyela. Sunga’shi mwanda wa mu kimpulunkamba ngulombene kwitukutshishwa kulombasha kitshibilo kampanda kyatudi baate.​—Mul. 9:11; w19.11 26-27 ¶3-5

Nka bu bibaadi ngabo akalwila kipindji kikata kya mbidi, lukumiino lobe lukwete nkukalwila ku myanda ibubi ya mu uno ndubulwilo, bu mwikelo wi butete, bu ntomboshi, na ingi myanda ikutwene na miiya y’Efile Mukulu. Atwe bena Kidishitu tukwete kulwa ngoshi ya mu kikudi na bikudi bibi. (Ef. 6:10-12) Nkipaso kinyi kyodi mulombene kushinkamisha’shi ngabo obe ebuwa nsaa y’otompibwa? Kya kumpala, abitungu otekye Efile Mukulu bwa’shi akukwashe. Abitungu ofubishe Eyi dy’Efile Mukulu bwa kutaluula su lukumiino lobe lwi mu mushindo aukumiina Yehowa. (Eb. 4:12) Bible amba’shi: “Kulupila kwi Yehowa n’eshimba dyoobe dyooso, olekye kulonda binangu byoobe’be nabeene.” (Nki. 3:5, 6) P’onangushena byabya, twe mulombene kutaluula bingi bitshibilo byobe byodi mwate binobino su? Bu kileshesho, we na lukalakashi lwa makuta su? Okwete kunangushena pabitale mulayilo wa Yehowa wi mu Beena-Ebelu 13:5 awamba’shi: “Ntankakuleka sunga nkakusuumbusheena” su? Uno mulayilo aukupa lukulupilo lwa’shi Yehowa akakukwasha su? Su mbyabya, olesha’shi ngabo oobe a lukumiino ebuwa. w19.11 14 ¶1, 4

Mwana atekaa nsaa na bukome bwa nambutwile oso. Su bena dibaka bekala na bana bebungi babadi batabukile, abibekeela bukopo bwa kupasukila mwana oso. Bangi bena dibaka be na bana bakinga bebungi abamba’shi abikalaa lukalakashi lukata. Nyina bana e kwikala akooko ku mbidi na mu binangu nsaa yoso. Bino mbilombene kumukutshishwa nsaa ya kwilongyela, kuteka na kwenda mu bulungudi. Bi kumwikeela dingi bukopo bwa kulonda bisangilo kalolo. Eyendo, mulume sha kifulo akitshi mwaye moso bwa kukwasha mukashi aaye nsaa ayikalakasha bana, byabikala ku nshibo sunga mu bisangilo. Bu kileshesho, e kumukwasha na mifubo ya ku nshibo. Abitungu etatshishe ngofu bwa kwikala akitshi Lulangwilo lwa mu kifuko na kifuko kyaye. Na dingi abitungu nshe-bana mwina Kidishitu ekale ende na kifuko kyaye mu bulungudi misusa yoso. w19.12 24 ¶8

Mbikunyi bibaadi Jibile akwasha bena Isaleele? Su mwina Isaleele baadi na bishiyo bibungi, baadi apana kipindji kyaye kya nsenga bwa kwibifuta. Mu kipwa kya Jibile, abaadi abamwalwisha kyanka. Byabya, yawa muntu baadi alukiila mu “kipindji kyaye kya nsenga,” yaya nsaa bupyanyi bwa bana baye tabushimina nya. Ku lungi lupese, muntu baadi mu lukalakashi lukilekile baadi mulombene kuudisha mwana sunga aye nabene ku bupika bwa kufuta bishiyo. Mu kipwa kya Jibile yawa mpika baadi ‘alukiila mu kifuko kyabo.’ (Lv. 25:10) Byabya, takwi muntu baadi mulombene kwenda ku bupika bwa loso kushi lukulupilo lwa kwalukiila nya! Yehowa baadi mwakule’shi: ‘Takwikala balanda kwenu nya, pakutala abiikala Yehowa mwinuwushe na myabi mwiumbo adiinupa Yehowa Efile Mukulu eenu buu bupyanyi.’ (Miy. 15:4) Mbilekene bikata na bikwete kukitshika pa nsenga lelo uno, pe ba mpeta abanyisha kufika ba mpeta, balanda abanyisha kwikala balanda. w19.12 8-9 ¶3-4

Nsaa ibaadi afumankana na nkalakashi, Yesu baadi ele nteko ‘na misaase na mpolo ku meso.’ (Eb. 5:7) Nteko ibaadi ele n’eshimba dyaye dyoso ibaadi ayilesha’shi mmululame na bino bibanyishishe kunyingisha kitshibilo kyaye kya kushala mukookyele. Bwa Yehowa, nteko ya Yesu ibaadi bu miishi i mapembwe. Nshalelo oso a Yesu baadi musankishe Nshaye na baadi mwakwile bukunkushi Bwaye. Twi kwambula Yesu pa kukita mwetu moso bwa kukookyela Yehowa na kwikala balulame. Nsaa yatufumankana na nkalakashi, tusambileyi Yehowa bwa’shi etukwashe mwanda atukumiina ku musankisha. Su atukitshi myanda yabadi bashikwe kwi Yehowa, ta temesha nteko yetu. Kadi su atukitshi myanda yadi mufule, atwikala bashinkamishe’shi nteko yatwele n’eshimba dimune ayikala nka bu miishi i mapembwe. Na atwikala bashinkamishe’shi lulamato lwetu na kukookyela, abisankisha Nshetu e mwiyilu. w19.11 21-22 ¶7-8

Mu 1919, Yesu baadi musangule kasaka kapeela ka bakwetu bedibwe mwimu bu “mpika a lulamato na mudimukye.” Uno mpika kwete kukunkusha mudimo wa bulungudi na kupa balongi ba Kidishitu “kya kudya pa nguba akitungibwa.” Satana na ndumbulwilo aaye mbakite mwabo moso bwa kwimika mudimo wa mpika a lulamato na mudimukye. Su mpika tabadya kwikala na bukwashi bwa Yehowa, bibadya kwikala bukopo. Sunga mbibakudi kutuukye ngoshi ibidi ya nsenga ishima, lukalakashi lwa makuta na kukyengyesha bafubi b’Efile Mukulu pashii mwanda, mpika a lulamato na mudimukye baadi mutungunukye nka na kutuusha bidibwa bya mu kikudi bwa bena Kidishitu be pa nsenga. Banda kutala bungi bwa bidibwa bya mu kikudi bi kwanka lelo uno, byatupete buntu mu ndimi ikile pa 900! Bino abilesha patoka’shi Efile Mukulu kwete kukwatshishena mpika. Kingi kitundwilo kya mwabi wa Yehowa nyi mudimo wa bulungudi. Mukandu wibuwa ukwete kulambukishwa ‘mu maumbo oso.’​—Mat. 24:14. w19.11 24 ¶15-16

Ku kipwa kyoso, Efuku dya kushimisha milwisho, tshite-mwakwidi mukata e panundu baadi ashiiki kabanda kumpala kwa kulambula milambu. Pabaadi akitshi byabya, nyi pabaadi Efile Mukulu akumiina milambu yaye. Pabaadi pa nsenga, Yesu baadi na kya kukita kintu kampanda ki na muulo ukata kintu ki na muulo kukila kupasha bantu kumpala kwa’shi alambule muwa waye. Kintu kinyi? Baadi na kya kupa Yehowa mushindo wa kukumiina mulambu waye pa kumukokyela na kumulamata mu muwa waye oso. Yaya nsaa, nyi ibaadi Yesu na kya kulesha’shi bwa kwikala na nshalelo ebuwa, abitungu kukita myanda muyile akikyebe eshimba dya Yehowa. Yesu baadi na kya kulesha’shi bukunkushi bwa Nshaye mbwa kululama. Yesu baadi mukookyele miiya ya Yehowa ya kululama mu muwa waye oso wa pa nsenga. Sunga bibaadi mutompibwe, mupete nkalakashi ibungi, baadi nka na kitshibilo kya kulesha’shi mushindo wa kukunkusha wa Nshaye nyi wibuwa.​—Fid. 2:8. w19.11 21 ¶6-7

Mu mafuku oso abadi Yesu alungula, batumiibwa basha lulamato abamwekyele’shi, mba kuuku ba Yesu ba binyibinyi. (Nki. 18:24) Baba ba kuuku babadi na muulo ku meso a Yesu. Mu mudimo waye wa bulungudi, takwi muntu su ngumune a ku bakwabo ba ku mbidi badi mutule lukulupilo mwadi. (Yo. 7:3-5) Ungi mususa, bakwabo babadi banangushene’shi bakumbu mutwe. (Mak. 3:21) Anka, Yesu balungwile batumiibwa baye mu bufuku bwa muladilo wa lufu lwaye mayi akifundwe kya lelo. Ingi nsaa batumiibwa babadi balwishishe Yesu, kadi tabadi mutale bilubilo byabo, anka bamwene’shi be na lukumiino mwadi. (Mat. 26:40; Mak. 10:13, 14; Yo. 6:66-69) Pabadi nabo bufuku kumpala kwa’shi bamwipee, Yesu balungwile bano batumiibwa basha lulamato’shi: “Neenwitaanyina bu baa kuuku mwanda kyandi mupushe kwi Nshaami nee mwinwiukishe kyanka.” (Yo. 15:15) Kushi mpaka, ba kuuku ba Yesu babadi bamunyingishe ngofu. w19.04 11 ¶11-12

Mushindo kinyi autundulaa muntu’shi betaminyibwa bwa kwenda mwiyilu? Lwalulo alumweneka patooka mu mayi a Mpoolo mutumiibwa kwi bena Looma babaadi ‘betaminwe bwa kwikala beselele.’ Na dingi, mu mayi a kifundwe kyetu kya lelo uno, bebalungwile’shi: ‘Tanwi bapete kikudi kya kwinwikasha bu bapika sunga kya kwinwalusha ku moo nya; anka kikudi nkinwikashe bu bana ba bupyaanyi b’Efile Mukulu, na kummwitaanyina’shi: abba, ngi’shi: Yaaya.’ (Lom. 1:7; 8:15) Kubukwashi bwa kikudi kyakye, Efile Mukulu alesha bedibwe mwimu patoka’shi mbapete lwitamino lwa mwiyilu. (1 Tes. 2:12) Yehowa talekaa mpaka mu binangu na mashimba a bano be na lwitamino lwa kwenda mwiyilu nya. (1 Yo. 2:20, 27) Bena Kidishitu bedibwe mwimu tabe na lukalo lwa’shi muntu kampanda ebashinkamishe’shi mbedibwe mwimu. w20.01 22 ¶7-8

“Mwiya wa Kidishitu” ngwimene pa kitako kibuwa bukile kifulo. (Nga. 6:2) Kifulo nyi kibadi akitakula Yesu bwa kukita myanda yooso. Lusa, sunga kalolo kakile bukata, abilesha kifulo. Lwalwa lusa nyi lubaadi lutakule Yesu bwa kulongyesha bibumbu bya bantu, kubuka basha mikumbo, kudiisha be na nsala, na kubusha bafwe. (Mat. 14:14; 15:32-38; Mak. 6:34; Luk. 7:11-15) Yesu baadi akumiina kutula nkalo ya bangi kumpala kwa yaye. Kukila byoso, balesheshe kifulo kikata pa kutuusha muwa waye bwa kupasha bangi. Twibalombene kwambula Yesu pa kutula nkalo ya bangi kumpala kwa yetu. Twibalombene dingi kumwambula pa kukimba ngikashi bu kalolo kakile bukata kwi bantu ba mu teritware eetu. Nsaa i kalolo kakile bukata aketutakula bwa kulungula na kulongyesha mukandu wibuwa, atulesha shi tukwete kukokyela ku mwiya wa kidishitu. w19.05 4 ¶8-10

Yesu mmupososhe bantu ku malongyesha a bakunkushi ba bipwilo bya madimi. Aa mafuku, bena Yuuda bebungi abaadi ku bupika bwa bipikwa na nkumiino ya madimi. (Mat. 5:31-37; 15:1-11) Baaba abaadi abeamba’shi bakwete kukunkusha bantu mu kikudi, abaadi ba mpofu mu kikudi. Pa mwanda abaadi bapele Mesiya na bya binyibinyi bibaadi alongyesha, ntabaukye Efile Mukulu mbatungunukye na kwikala ba mpofu na tambebafwile lusa. (Yo. 9:1, 14-16, 35-41) Ku bukwashi bwa malongyesha a binyibinyi na kileshesho ki buwa, Yesu baadi muleshe bantu beyishe byabadi balombene kwikala bulungantu ku malongyesha a madimi. (Mak. 1:22; 2:23–3:5) Na dingi, Yesu baadi mwikashe bantu bulungantu bwa milwisho ibabaadi bapyane. Mwanda Yesu baadi mutushe muwa waye bu nkulo, Efile Mukulu mulombene kufwila baba boso abalesha lukumiino mu nkulo yadi mutushe lusa.​—Eb. 10:12-18. w19.12 10 ¶8; 11 ¶10-11

Yehowa afubishaa kikudi kyaye kiselele bwa kulesha bena Kidishitu bedibwe mwimu patooka’shi mmwibasangule. Kikudi kiselele ‘akibashinkamiisha’shi,’ mu mafuku aafiki abakekala na muwa wa looso mwiyilu kushi pa nsenga. (2 Kod. 1:21, 22) Su mwina Kidishitu bedibwa mwimu, apete bwedi bwaye bwa kwenda mwiyilu musango umune su? Nya. Ashinkamisha’shi mmusangudibwe bwa kwenda mwiyilu. Anka, abitungu atentekyeshe dino elango: “Anwe bakwetu, nyishaayi kwikala na nkatshinkatshi bwa kushinkamisha kwitanyinwa kwenu na kusangulwa kwenu; pa byaabya, tanukeekala mu masaku a kupona nguba kampanda nya.” (2 Mp. 1:10) Byabya, sunga mwina Kidishitu mmwitaminwe bwa kwenda mwiyilu, apete bwedi bwaye nka su bashaala na lulamato.​—Fid. 3:12-14; Eb. 3:1; Kibaf. 2:10. w20.01 21-22 ¶5-6

Ba kuuku basatu be bubi ba Yoobo abakutshilwe kumupusha lusa mwanda abaadi abamono penda bi paasha, kushi bi munda. Bu kipeta, abedimbile abo nkutopeka Yoobo. Mbikunyi byatudi balombene kupela kukita kilubilo ki byabya? Abitungu tuukye’shi, nka penda Yehowa nyi auku byoso pabitale nshalelo a muntu. Teemesha abikulungula muntu akyengye. Tompa kupusha bi kinyongwa kyaye na okite kintu kampanda p’amutwe akutemesha bisumanga. Paapa wekala na mushindo wa kwituula pa mbalo ya bakwenu bena Kidishitu. Lusa alwitutakula bwa kupela kwipula bangi pabitale myanda yabakwete kufumankana nayo. Muntu ayipula bangi takwete kwibaka kakongye nya; kwete kwikalwisha. (Nki. 20:19; Lom. 14:19) Dingi bishima byaye mbilombene kukengyesha yawa winyi kwete kukyenga. (Ef. 4:31, 32) Nsaa yatutala penda ngikashi ibuwa ya muntu na kukimba bya kumukwasha bwadya kunyingiila nkalakashi yaye, atukitshi mwanda ukile buwa! w19.06 21-22 ¶8-9