Mweshi wa 4

Aristarkuse mwina Kidishitu a mu Tesalonike, baadi kuuku sha lulamato a Mpoolo. Musango wa kumpala wa tubadika mu Bible pabitale Aristarkuse nyi nsaa ibaadi Mpoolo mu katembele bena Efeso mu lwendo lwaye lwa kasatu lwa bu misionere. Nsaa ibaadi ashindjikila Mpoolo, Aristarkuse abaadi bamukwate. (Bik. 19:29) Pababaadi bamupoosole, tabaadi mukatukye musango umune bwa kusuka masaku nya, anka baadi mushaale na Mpoolo. Myeshi ipeela kunyima, mu Grese, Aristarkuse batungunukile nka na kwikala ku lupese lwa Mpoolo sunga bibaadi abikimbi beshikwanyi naye kumwipa. (Bik. 20:2-4) Nsaa ibabaadi batume Mpoolo mu lukano pangi mu kipwa kya 58 bipungo byetu (B.B.), Aristarkuse baadi mumushindjikile mu lwalwa lwendo lwi bula, boso bwabo abaadi bapande nsaa ibaadi bwato bwiyine. (Bik. 27:1, 2, 41) Abimweka’shi nsaa ibabafikile ku Looma, Aristarkuse baadi mu lukano na Mpoolo munda mwa mafuku. (Kol. 4:10) Nyi bwakinyi, tabitukaanyisha pakumona’shi Mpoolo baadi munyingishibwe na kusambibwa na yawa kuuku sha lulamato! Nka bu Aristarkuse, twi kwikala bu ba kuuku basha lulamato pa kulamata kwi bakwetu bena Kidishitu kushii penda mu bipungo bibuwa, kadi mpa na mu ‘nguba a mpombo.’ w20.01 9 ¶4-5

Muntu abadi beele mwimu mulombene kupwandikisha’shi buno bushito ta mbumulombene nya. Anka te na nsaa ya kwela mpaka’shi Yehowa mmumusangule. E na muloo ukata na lutumbu bwa lukulupilo lwaye lwa kwikala na muwa mwiyilu. (1 Mp. 1:3, 4) Byabya nkwamba’shi bedibwe mwimu abakumiinaa kufwa? Mpoolo mutumiibwa aluula ku luno lukonko. Apwandikisha mbidi ya muntu n’epema’shi: “Mwanda, atwe be mu dino epema, tukwete kwidila, twibapoombe; eyendo: taatukyebe kufuula, anka kufwala imo mbidi pa ingi, bwa’shi mbidi ya lufu ishimine mu muuwa.” (2 Kod. 5:4) Bano bena Kidishitu tabakutwaa kwata uno muwa na muulo, na kukimba kufwa budikidi. Pamutwe pa byabya, abasangeela muwa na abakumina kufuba nao efuku dyooso bwa kufubila Yehowa na bifuko byabo na ba kuuku babo. Anka, sunga bekala abakitshi kinyi, abatentekyeshaa lukulupilo lwabo lwa ntumbo lwabadi nalo bwa mafuku e kumpala.​—1 Kod. 15:53; 2 Mp. 1:4; 1 Yo. 3:2, 3. w20.01 23 ¶12-13

Bwa kwitulongyesha, Nshetu e mwiyilu etunyokaa pakudi mushindo. Etunyokaa mu mishindo ibungi. Kileshesho, twi kubadika mwanda kampanda Mwiyi dyaaye, sunga kupusha mwanda kampanda ku bisangilo ulombeene kwitukwasha, bwa kushintuula mweneno eetu. Pangi namu bukwashi bwatudi nabo lukalo abutuukila kwi bakulu. Sunga Yehowa etunyoka mu mushindo wi naminyi, etunyoko mwanda mwitufule. (Yel. 30:11) Yehowa etukwashaa bwa kunyingiila nkalakashi. Anka abikalaa nshe-bana sha kifulo akwasha bana baye pabadi mu nkalakashi, Nshetu e mwiyilu etukwashaa nsaa yatudi mu nkalakashi. Etupa kikudi kyaaye, bwa kwitukalwila ku bintu bikumbene kulwisha kipwano kyetu naaye. (Luk. 11:13) Yehowa etukwashaa dingi patudi na twinyongoshi. Kileshesho, etupa lukulupilo lwibuwa. Lwalwa lukulupilo bwa myanda i kumpala alwitukwasha bwa kunyingiila nkalakashi. Banda kutala uno mwanda: Sunga twafumankana na mwanda wi naminyi, Nshetu sha kifulo akakatusha myanda yoso ibubi yabadi betukitshine. Nkalakashi yoso yatudya kupeta, i kwanka bwa kapindji kapeela, anka myabi ayitupa Yehowa nyi ngya loso.​—2 Kod. 4:16-18. w20.02 5 ¶14-15

Twi kukambila kyutu! Banda kutala kileshesho kya bakwabo na Yoosefe. Bipwa bibungi kunyima kwa’bo kukyengesha Yoosefe, abaadi bemoneene naaye mu Ejiipitu. Kumpala kwa’shi Yoosefe elubule kwi bakwabo, bebatompele bwa kumona su mbapwe kushintuluka. Badi mulumbuule kya kudya aye nkupa mwin’aye Benyamine bidibwa bibungi kukila bakwabo boso. (Kib. 43:33, 34) Kadi, takwi mbalo su ngimune yabadi baleshe’shi bakwabo abakwatshiile Benyamine kyutu. Anka, abadi betuule ngofu pa mbalo ya mukwabo mpa na ya nshabo, Yaakobo. (Kib. 44:30-34) Pa mwanda bakwabo na Yoosefe abalekyele kumukwatshila kyutu, babadi na mushindo wa kwalusha butaale mu kifuko kyabo. (Kib. 45:4, 15) Bi mumune, su tubakatusha kyutu kyoso mwatudi, atukwasha bwa’shi kifuko kyetu na kakongye ketu kekale mu butaale. Yehowa akumiina’shi tukambile kyutu na kutwesha butaale. Su twekala na kwiyisha, atusanka na byatudi nabyo, na kusankila bangi, tatulekyela kyutu mbalo nya. w20.02 19 ¶17-18

Mushindo umune odya kulesha’shi we na lutumbu bwa kifulo kya Yehowa mpa kwisamba naye mu luteko. Nsaa yolungula Efile Mukulu myanda yobe na kumutumbula bwa byoso byakwete nkukitshina, kifulo kyobe bwaye akitama. Na nsaa yomono kipaso kyaluula ku nteko yobe, kipwano kyobe naye akinyingi. Wekala mushinkamishe’shi akuteemeshaa. Kadi bwa kwifubwila peepi na Yehowa, abitungu opushe bi binangu byaye. Abitungu dingi oukye kyakyebe kodi. Kintu kimune kilombene nkukwasha bwa kupeta kyakya kiukilo, nkulonga Bible, Eyi dyaye. Byabya, longa bya kwikala na lutumbu bw’Eyi dy’Efile Mukulu, Bible. Nka penda mu Bible nyi mwi bya binyibinyi pabitale Yehowa na mpángo yaye bobe. Bwa kulesha’shi we na lutumbu bwa Bible, abitungu omubadikye efuku dyoso, welumbuule kumpala kwa kulonga na mulongyeshi oobe na kutumikila myanda yolongo. (Mis. 119:97, 99; Yo. 17:17) We na programe a kwibadikila Bible su? Okwete kulonda yawa programe kalolo, na kushinkamisha’shi okwete kubadika Bible efuku dyoso su? w20.03 5 ¶8-9

Su twe na mushindo wa kutambuka ngofu, we mulombene kwikala na mushindo wa kushala pa mbalo i bantu bebungi yodi mulombene kwisamba na boso abakidi. Sunga’shi we mulombene kulungula mu mpukapuka, kufundila bantu mikanda, sunga kukita bulungudi bwa ku telefone. Balungudi bebungi bashi na mushindo wa kukita buno bulungudi mwanda wa mikumbo, bakwete kusangeela kukita bulungudi mu ingi mishindo. Sunga wekala na mikumbo, we mulombene kulombasha mudimo oobe kalolo. Mpoolo mutumiibwa bakwile shi: “Ne mulombeene kukita bioso [ku bukwashi bwa] yawa ankankamika.” (Fid. 4:13, Kilombeeno kipya 2014) Mpoolo baadi na lukalo lwa bwabwa bukome nsaa ibaadi mukumbe pabaadi mu lumune lwa ku nyendo yaaye ya bu misionere. Baadi mupatulwile bena Ngalatea shi: “Anuwuku kalolo’shi: naadi na mukumbo, nguba anaadi mwinuwukishe, bwa musuusa wa kumpala, mukandu wibuuwa.” (Nga. 4:13) Mu mushindo umune, mikumbo ngilombene nkupa mushindo wa kulambukisha bangi, bu ba doktere, ba munganga, na bantu abalamaa basha mikumbo. Bano bantu bebungi abekalaa ku mudimo nsaa ayifiki balungudi ku mashibo abo. w19.04 4-5 ¶10-11

Mu 2018, balungudi ba mukandu wibuwa bakile pa 223 000 abaadi bashale mu maumbo mwababadi bakandjikye ingi midimo yetu sunga kukandika yoso. Bino tabitukaanyisha nya. Nka bu byatwikele bamone mu mwisambo ushale, bena Kidishitu ba Binyibinyi abauku’shi abebabingabinga. Sunga twekala bashalele mbalo kinyi, bakata ba mbulamatadi be kushintuluka mususa umune na kukandjika lulangwilo lwetu lwa Yehowa. Su mbulamatadi akandjika mudimo wetu, twi kupwandjikisha shi tatuki na myabi y’Efile Mukulu. Kadi, ukayi shi kubingwabingwa takulesha shi tatukwete kusankisha Yehowa. Tubande kwata kileshesho kya Mpoolo mutumiibwa. Efile Mukulu baadi mumukumiine. Baadi mupete mwabi wa kufunda mikanda 14 ya Bifundwe bya mu kina Greke bya bena Kidishitu, na mmutumibwa a bena maumbo. Anka, abaadi bamubingebinge ngofu. (2 Kod. 11:23-27) Myanda ibafumankene nayo Mpoolo mutumiibwa ayitulesha’shi, Yehowa atadiilaa shi babingebinge bafubi baye. w19.07 8 ¶1, 3

Umune wa ku mishindo ikile buwa ayileshaa Yehowa’shi kwete kwitatshisha bwa bafubi baye, mpa kwibakwasha bwa kukambila beshikwanyi. Beshikwanyi betu bakata nyi Satana na ba demo baye. Yehowa etudimusha pabitale bano beshikwanyi, na etupa kyakya kyatudi nakyo lukalo bwa kwibakambila. (Ef. 6:10-13) Nsaa yatukumina bukwashi bwa Yehowa na kukulupila mwadi na mashimba eetu ooso, atoobesha kukambila Diabulu. Twi balombene kwikala na lukulupilo lwi mumune na lubadi nalo Mpoolo mutumiibwa. Bafundjile’shi: “Su Efile Mukulu e lupese lwetu, nnanyi e kwikala netu mushikwa?” (Lom. 8:31) Bu byatudi bena Kidishitu ba binyibinyi, tatutulaa binangu byetu byoso kwi Satana na ba demo nya. Atutulaa binangu byetu byoso mu kulonga pabitale Yehowa na kumufubila. (Mis. 25:5) Anka, bibuwa tuukye myanda ayikitaa Satana. Bwakinyi? Bwa’shi takumanga kwitupambusha.​—2 Kod. 2:11. w19.04 20 ¶1-2

Nsaa i muntu mmukalakashwe, atumutemesha kalolo? Kuteemesha kalolo akutekye myanda ibungi. Twi kulesha bi binangu byetu na bishima bya kalolo, na kanemo. We kwamba mayi bu: “Napusha bibubi bukile bwa byabya bikufikile!” Pangi okumiina kwela lukonko bwashi opushe kalolo abikulungula kuuku sunga loole oobe. We kumwipusha’shi: “We kunkwasha namu bwandya kupusha kalolo kyokyebe kwakula?” sunga’shi: “Nsaa ibwakula byabya, napwandikisha shi . . . Nnabyo su?” Byabya bishima bya kifulo abimushinkamisha’shi okwete kumuteemesha, tompa kukita mobe moso bwashi omuteemeshe. (1 Kod. 13:4, 7) Ikala mudimukye bwa kupela kwikala na “bukidi bwa kwakula.” Tomutshibanga mwisambo bwa kumupa malango sunga kulumbuula binangu byaye. Na ikala na lwishinko! Pamutwe pa kumulungula bya kupudisha myanda yaye, abitungu twitule pa mbalo yaya na kumupushisha lusa.​—1 Mp. 3:8. w19.05 17-18 ¶15-17

Mu kifuko, abitungu mulume afule mukashi aaye “buu abikitshina Kidishito kipwilo kyaaye.” (Ef. 5:28, 29) Abitungu mulume ambule kifulo kya kwipana kya Kidishitu pa kutula nkalo ya mukashi aaye pa mbalo ya kumpala. Bangi bantu bekumona bu bibukopo bwa kulesha kyakya kifulo, pangi mwanda mbakudile mbalo i bantu bashi’abataa na muulo kukitshina bangi myanda na kifulo na kululama. Bi kwikala bukopo bwabadya kushintuula yawa mweneno, kadi abitungu bamushintuule bwa kukokyela mwiya wa Kidishitu. Mulume alesha kifulo kya kwipana, abamunemeka kwi mukashi aaye. Nshe-bana mufule bana baye, tamulombene kwibatapa ku mashimba mu ngakwilo sunga mu bikitshino byaye. (Ef. 4:31) Kadi, alesha bana baye shi mmwibafule na kwibakumiina bwashi bepushe bu be mu kukalwilwa. Nshe-bana e byabya, abamukulupila na kumufula kwi bana. w19.05 6 ¶21

Bwa ma Maariya, bishima bya Gabriele bibaadi abikyebe kwamba kinyi? Badi akyebe kupwandikisha’shi bishima bya Gabriele abilesha’shi Yesu akapyana Nfumu Erode sunga umune a ku ba nfumu ba mu Isaleele? Su Yesu bekeele nfumu, Maariya badya kwikala nyinaye na nfumu, na kifuko kyaye kibadya kushala mwipata dya nfumu. Kadi, takwi mbalo yatubadika’shi Maariya badi mutekye kwikala na mwasu kampanda mu Bufumu. Maariya badi mukashi sha kwiyisha kukata! Atukumina dingi kumona kalolo “byatudi” na myanda ayitungu’shi tushintuule bwa kusangasha Efile Mukulu. (Shak. 1:22-25; 4:8) Nsaa yoso yatubanga kwilongyela, abitungu tutekye Yehowa etupe kikudi kyaaye. Tumutekye etukwasha tupete bukwashi mu myanda yatwilongyela na bwa’shi twimone mumushindo wetumonaa. w19.05 31 ¶18-19

Ingi nsaa myanda ibungi ayitukalakashaa, ngilombene kwitufwila mu nsaa imune. Banda kutala bino bileshesho. Mungi Temwe abetamina bu John, baadi na mukumbo wa mu binangu, baadi mukalakashwe ngofu, mwanda abamupelele kwi mukashi abaadi mwibakile takudi bipwa 19. Akupu bana baye babidi bakashi nkuleka kufubila Yehowa. Bob na Linda bangi ba mulume na mukashi abaadi bapete nkalakashi ya ungi mushindo. Abo boso babadi bashimishe midimo yaabo, tababadi dingi na mushindo wa kufutshila nshibo nya. Kukatusha wawa mwanda, babadi bakwate Linda na mukumbo w’eshimba wi bukopo, na ungi mukumbo ubadi aumukokyesha. Twi na kya kushingula’shi Mupangi na Nshetu sha kifulo, Yehowa kwete kumona nkalakashi yatudi nayo. Na akumina kwitukwasha bwatudya kumona bya kukila na nkalakashi yatupete. (Fid. 4:6, 7) Eyi dy’Efile Mukulu adilesha nkalakashi ibaabadi abanyingiila kwi bafubi baaye. Adilesha dingi mushindo ubadi Yehowa mwibakwasha bwa kukila na yaaya nkalakashi. w19.06 14 ¶2-3

Nsaa yatukitshina baaba bashi dingi na bena dibaka nabo tu myanda twa kalolo, atwibalesha’shi twibebafule. Bu bitabadi bupenka, be na lukalo lwa ba kuuku na ba loole bebuwa. Mbikunyi byodya kulesha shi we kuuku sunga loole aabo ebuwa? We kwibetamina ku nshibo koobe bwa kudya nabo pamune. We kukisha nabo nsaa pamune, mu kukisha kapapi sunga kutuuka nabo mu bulungudi. We kwibetamina ingi misusa mu lulangwilo lwenu lwa mu kifuko. Su okita byabya, osankisha Yehowa, mwanda “ee peepi naa bee na mashimba eenyongole” na “àsàmbiilaa bakashi-kilele.” (Mis. 34:19; 68:6) Mu mafuku apeela’mu, nsaa ayikamunana Bufumu bw’Efile Mukulu pa nsenga, “mpombo ya kala ailubiibwa.” Tukwete kutengyela na mashimba kwiyilu nsaa ayikekala “bantu taabakatentekyesha dimo myanda ya-kala, taayibafwila dimo ku mashimba nyaa.” (Yesh. 65:16, 17) Tutungunukyeyi na kwikwashena, na kulesha mu ngakwilo na mu bikitshino byetu’shi, twibafule bena Kidishitu netu boso, mpa na apakafiki dyady’efuku.​—1 Mp. 3:8. w19.06 25 ¶18-19

Takudi bipwa bibungi, Kitenta kya Mulami kibalesheshe’shi: “Muntu auku Efile Mukulu kalolo, akamukulupila ngofu mu kipungo kya kubingwabingwa.” Nkyeyendo! Bwa kukambila kubingwabingwa, abitungu tufule Yehowa na kumukulupila ngofu. (Mat. 22:36-38; Shak. 5:11) Badika Bible efuku dyoso na kepatshila ka kwifubwila peepi na Yehowa. (Shak. 4:8) Nsaa yobadika, tuula binangu ku ngikashi ibuwa ya Yehowa. Nsaa yobadika pabitale myanda yakwete kwakula na kukita, tompa kupusha byadi mukufule. (Efi. 34:6) Bangi be kumona’shi bi bukopo bwabadya kukumiina shi Efile Mukulu mmwibafule, mwanda takwi muntu mubande kwibalesha kifulo. Su opusha byabya, tompa kufunda myanda itale kipaso kyabakwete nkulesha lusa na kalolo kwi Yehowa. (Mis. 78:38, 39; Lom. 8:32) Nsaa yotaluula myanda yodi mumone na kunangushena ku myanda ibobadika Mwiyi dy’Efile Mukulu, omono bya kufunda myanda ibungi yabadi bakukitshine kwi Yehowa. Su wekala na lutumbu bwa byabakwete nkukitshina kwi Yehowa, kipwano kyobe n’aye akinyingi.​—Mis. 116:1, 2. w19.07 2-3 ¶4-5

Yehowa tamwitupe matalwa a kwatshila bangi bitshibilo nya. Muntu eele miiya ishi na muulo t’akalwila bakwabo nya ekala nka bu mukunkushi a lukumiino lwa bakwabo. Satana Diabulu, t’akalekye kubingabinga bafubi ba Yehowa basha lulamato nya. (1 Mp. 5:8; Kibaf. 2:10) Satana na bantu boso bakwete kumukwatshishena abakakimbi bya kukandjika lulangwilo lwetu bwa Yehowa. Anka tatwi na kya kupusha moo nya! (Miy. 7:21) Yehowa e kulupese lwetu, na atungunuka na kwitukwatshishena sunga nsaa yabadi bakandjikye mudimo wetu. (2 Mya. 32:7, 8) Twikaleyi na kitshibilo bu kibaadi nakyo bakwetu ba mu siekele a kumpala, babadi balungule bakunkushi baabo’shi: “Sangulayi su mbikumbane ku meeso kw’Efile Mukulu kwinupushiisha’nwe, pe kupushiisha Efile Mukulu. Mwanda bw’atwe, tatwibalombeene kukutwa kwakula bwa bintu biatudi bamone na biatudi bapushe.”​—Bik. 4:19, 20, Kilombeeno kipya 2014. w19.07 13 ¶18-20

Nsaa yatudi mu bulungudi, abitungu tutompe kupusha bi binangu bya bantu batufumankana nabo. Mpoolo mutumiibwa badi mukudile munkatshi mwa bena Yuuda. Badi na kya kushintula mushindo waye wa kulambukisha nsaa ibadi na bantu bashi bena Yuuda bashibaadi abauku bibungi sunga kukutwa kuuka myanda ya Yehowa sunga Bifundwe. Twi balombene kukimbuula ingi myanda bwatudya kuuka kalolo abipusha na abinangushena bantu ba mu teritware. (1 Kod. 9:20-23) Lukalo lwetu ndwa kupeta bantu “balombeene kwitutambula.” (Mat. 10:11) Bwa koobesha, abitungu twikale atwipusha bantu bi mweneno aabo na kwibateemesha kalolo. Ungi mukwetu a mu Angletere ayipushaa bantu byabapwandikisha pabitale bya kwikala na muloo mu dibaka, bya kukusha bana, sunga bya kunyingiila kukutwa kwa kululama. Kunyima kwa kupusha ngaluulo yabo, epusha dingi muntu’shi: “Opwandikisha naminyi pabitale dino elango dyabadi bafunde takudi bipwa peepi 2 000?” Akupu, kushi kutemuna kishima “Bible,” ebalesha bifundwe byadi mupwe kusangula ku bukwashi bwa telefone. w19.07 21-22 ¶7-8

Mushindo kinyi autungu’shi tufule Efile Mukulu? Yesu balulwile luno lukonko pabalungwile Mufadisee’shi: “Fula Yehowa Efile Mukulu oobe n’eshimba dyoobe dyooso, na kikudi kyoobe kyooso mpaa na kinangu kyoobe kyooso.” (Mat. 22:36, 37) Tatukumiina shi tufule Yehowa na mashimba abidi nya. Kadi atukumiina’shi kifulo kyetu bwaye kikale akitama efuku dyoso. Bwa kufula Efile Mukulu abitungu tubande kumuuka. Bible amba’shi: “Yawa shyaafulu mukwabo taauku Efile Mukulu, mwanda Efile Mukulu nyi nkifulo.” (1 Yo. 4:8) Mpoolo mutumiibwa bakwile’shi, kifulo kyetu bw’Efile Mukulu akikatama nsaa yatupete ‘kiwukilo na kapatupatu kooso.’ (Fid. 1:9) Pabatubangile kulonga Bible, tubabangile kufula Efile Mukulu sunga byatushibaadi babande kuuka myanda ibungi pabimutale. Patubatungunukile na kulonga pabimutale, kifulo kyetu bwaye kibaadi akyende na kutama. Nyi bwakinyi bi na muulo bwa’shi twikale atwilongyela Eyi dy’Efile Mukulu efuku dyoso na kunangushena ku myanda yatubadika!​—Fid. 2:16. w19.08 9 ¶4-5

Kadi binobino, pabapu mudimo oobe, abitungu’shi opete ba kuuku bapya. Tentekyesha’shi, bwa kupeta kuuku abitungu obe nabene wekale na kalolo. Ebalungule myanda ibuwa yabadi bakukitshine kwi Yehowa, bwa’shi bangi bapushe namu miloo yodi mupete mu mufubo waye. Su nwakatuka mu mudimo wenu pa mwanda wa maladi a mwina dibaka nobe, twekalanga omusumbwila kilumbu. Su nobe nabeene e na maladi, twekalanga wetopeka, na kunangushena’shi bolwishisha mwina dibaka nobe. Tentekyesha’shi nwi “mbidi imune” na’shi botshipile kumpala kwa Yehowa’shi okamupasukila mu bipungo bya miloo sunga bya makyenga. (Mat. 19:5, 6) Su mudimo obe ubapwile mwanda w’eyimi dyanush’anwikalanga batengyele, uukayi’shi, mwan’enu auku’shi e na muulo ukata kwanudi kukila mudimo wenu. Byabya, mulunguleyi’shi nukwete kumumona bu “kya-buntu” akifiki kwi Efile Mukulu. (Mis. 127:3-5) Dingi, mulunguleyi myanda ibuwa yanudi bapete mu mudimo wenu. Kukita byabya, kwi kumukwasha bwadya kwipana mu mufubo wa Yehowa nka bu’nwe. w19.08 22 ¶10-11

Babilone Mukata mmusabulushe eshina dy’Efile Mukulu ngofu. Mmulongyeshe madimi pabitale Efile Mukulu. Anka abikalaa ndumba mukashi, kipwilo kya madimi nkikutwe lulamato kwi Yehowa pa kukwatshishena mbulamatadi ya bana ba bantu. Kipwilo kya madimi nkikengyeshe bantu bakyo na kwibanyenga makuta. Na dingi kipwilo kya madimi nkiipee bantu bebungi mpa na bafubi b’Efile Mukulu. (Kibaf. 18:24; 19:2) Yehowa akabutula “ndumba mukata” kubukwashi bwa “nsengwa ekumi” ya “nyema monga.” Yawa nyema a mu kifwanyi alesha ndumbulwilo a Nations unis. Nsengwa ekumi ayilesha mbulamatadi ikwete kukwatshishena uno ndumbulwilo. Apakakumbana nsaa y’Efile Mukulu, ano makome ooso a politike aakalu na Babylone mukata. “Abikapaula kyoso kyadi n’akyo, bimulekye muswa” pakumwata mapeta aye na kulesha bantu milwisho yaye. (Kibaf. 17:3, 16, EEM) Kwakwa kulwishibwa kwa bukidibukidi mwifuku dimune akukakalakasha boso abaadi abamukwatshishena, mwanda baadi etatula na kwamba’shi: “Nee pa lupuna nsulu bu ndalamumba, ntshi mukashi kilele’mi nya, ntammono maalo nya.”​—Kibaf. 18:7, 8. w19.09 10 ¶10-11

Yesu mmwitamine bantu boso bwabadya kwenda kwadi, na tapele muntu su ngumune akumiina kufubila Efile Mukulu. (Yo. 6:37, 38) Balongi boso ba Kidishitu be na kineemo kya kukita mudimo ubaadi Yehowa mupe Yesu bwa kukita. Tushinkamisheyi’shi Yesu akekala nka kwanka bwa kwitukwasha bwa’shi tukite uno mudimo. (Mat. 28:18-20) Bantu boso beyishe abayile kwi Yesu. (Mat. 19:13, 14; Luk. 7:37, 38) Bwakinyi? Tutaleyi kwilekena kwi pankatshi pa Yesu na Bafadisee. Bano bakata ba bipwilo taabaadi na kifulo nya, dingi abaadi na kwitatuula. (Mat. 12:9-14) Yesu baadi na kifulo na baadi mwiyishe. Bafadisee abaadi abakumiina kwenda nkumo na abaadi abetatula mwanda wa mwasu wabo. Yesu baadi mutoshe balongi baye buno bwikashi. Baadi mwibalongyeshe bwabadya kwikala beyishe na abafubila bangi. (Mat. 23:2, 6-11) Bafadisee abaadi abakitshisha bantu myanda pabukopo, mwanda bantu abaadi abebatshinyi’shi tabeuku kikwibakitshikila su bapela kwibakookyela. (Yo. 9:13, 22) Yesu baadi anyingisha bangi na bikitshino byaye bya kifulo na mayi aye a kalolo. Bolongyela ino myanda kwi Yesu su? w19.09 20 ¶1; 21 ¶7-8; 23 ¶9

Bisangilo abitukwashaa bwa kwifubwila peepi na Yehowa. Mweneno atudi naye pabitale kutwela mu bisangilo, alesha’shi atukekala na ngobesha ya kunyingiila kubingwabingwa mu mafuku aafiki. (Eb. 10:24, 25) Bwakinyi atwamba byabya? Su lelo uno, tu myanda tupeela atwitukutshishwa kutwela mu bisangilo, nkinyi akikakitshika mu mafuku aafiki, apakekala kutwela mu bisangilo akutuulu muuwa wetu mu masaku? Kadi, su twekala bate kitshibilo kya kutwelanga mu bisangilo, tatukalekye kwibitwela sunga beshikwanyi batompa kwitwimika pa bukopo. Ino ndjo nsaa ya kutamisha kifulo kyetu bwa bisangilo. Su twekala bafule kutwela mu bisangilo, sunga mbulamatadi etukandjika kwibitwela, atukakokyela Efile Mukulu pe kukokyela bantu. (Bik. 5:29) Lamiina ma verse odi mufule. (Mat. 13:52) Binangu byobe ta mbipwidikye nya, kadi Yehowa e nkukwasha na bukome bwa kikudi kyaye bwa’shi kikutentekyeshe aa ma verse. (Yo. 14:26) Byabya bifundwe abikakukwashe bwa kushaala peepi na Yehowa na kunyingiila na lulamato. w19.07 3 ¶5; 4 ¶8-9

Boodi mutandjikwe kunyima kwa kipwa kya 1914 su? Su mbyabya mafuku obe oso a muwa we akisha mu “mafuku a nfudiilo” a uno ndumbulwilo. Oso a kwatudi mupushe myanda ibaabadi batemune kwi Yesu bwa kino kipungo. Baadi muteemune ngoshi, nsala, kutshinkatshinka kwa nsenga, bipupa, kufiima kwa myanda ya kukutwa kululama, na kubingwabingwa kwa bafubi ba Yehowa. (Mat. 24:3, 7-9, 12; Luk. 21:10-12) Twi bamone dingi bantu be na mwikelo ubabadi batemukye kwi Mpoolo mutumiibwa. Bu byatudi balangwidi ba Yehowa atushinkamisha’shi twi mu “mafuku a ku nfundîlo.” (Mik. 4:1, EEM) Bu bitakudi mafuku ebungi kubanga mu 1914, twi bapwe kwikala ku nfudiilo a “mafuku a ku nfudiilo.” Bu bi nfudiilo ibefubwila peepi, twi na lukalo lwa kupeta ngaluulo ku nkonko i na muulo: Myanda kinyi akikakitshika ku nfudiilo kwa “mafuku a ku nfudiilo”? Na Yehowa etutekye’shi tukite kinyi pano patukwete kutengyela yaaya myanda? w19.10 8 ¶1-2

Kunyingiila kwetu ta nka penda nsaa yatudi mu nshalelo ebuwa nya. Twi kunyingiila pa kukulupila Yehowa. (Lom. 12:12) Mulayilo wa Yesu wi mu kifundwe kya lelo aupushisha’shi abitungu twikale na lulamato sunga twapeta nkalakashi inaminyi. Su atunyingiila nkalakashi kubanga binobino, lukumiino lwetu alunyingi ngofu kumpala kwa’shi mpombo ikata ibangye. Nka bu kunyingiila, bwa kwikala n’eshimba dinyingye abitungu tukulupile mwi Yehowa. Mushindo kinyi watudi balombeene kukulupila mwi Yehowa? Pa kubadika Eyi dyaye efuku dyoso na kunangushena mushindo ubaadi Yehowa mupashe mwilo waye kala. (Mis. 68:21; 2 Mp. 2:9) Nsaa yabakalu netu kwi bena maumbo mu mpombo ikata, abiketutungu eshimba dinyingye na kunyisha kukulupila mwi Yehowa kukila kumpala. (Mis. 112:7, 8; Eb. 13:6) Su twekala bakulupile mwi Yehowa kubanga binobino, atukekala banyigy’eshimba nsaa yabakalu netu kwi Goge. Tushinkamiishe’shi twibalombeene kushala looso mu kifulo kya kukalwilwa na Yehowa.​—1 Kod. 13:8. w19.10 18 ¶15-16

Satana kwete kukunkusha uno ndumbulwilo, na kwete amufubisha bwa kwikasha bintu byabasankila kwi bantu, bu bi na muulo ukata mu nshalelo eetu na kukita bya’shi tumone bu bibukopo kwibikambila. (Ef. 2:1-3) Kepatshila kaye nka’shi tatwikalanga balamate penda kwi Yehowa. Nkunyima kwaye kufunda pabitale ndubulwilo a Satana na pabitale nsenga ipya, Mpyeele mutumiibwa bafundjile’shi: “Anwe baa kuuku bande, mu kuno kutengyela, ekalakasheyi bwa’shi eenusangane mu kufukama, bapwidikye, dingi bashii kato.” (2 Mp. 3:14) Nsaa yatukookyela dino elango na kukita mwetu moso bwa kulangwila Yehowa mu kipaso kya kumiina, atulesha’shi twibamulamate nka penda aye. Satana na ndubulwilo aye atungunuka nka bwa’shi tutule bingi bintu kumpla kwa Yehowa. (Luk. 4:13) Byabya sunga twekala na nkalakashi kinyi, tatutadiila muntu sunga kintu kampanda kyate mbalo ya Yehowa mu mashimba etu. Twi na kitshibilo kya kupa Yehowa kyakya ki mulombeene​—kumulamata nka penda aye! w19.10 27 ¶4; 31 ¶18-19

Bibuwa kwikalakasha pabitale ingi myanda. Bu kileshesho, abitungu twikalakashe bwa kusankisha Yehowa na Yesu. (1 Kod. 7:32) Su twakita mulwisho, abitungu twikalakashe bwa kwalusha kipwano kyetu n’Efile Mukulu. Twi kwikalakasha dingi bwa kusankisha mwina dibaka netu, kupasukila kifuko kyetu na bakwetu bena Kidishitu. (1 Kod. 7:33; 2 Kod. 11:28) Twi balombene kwikalakasha ngofu pabitale kwikala na byakudya na bilamba bibungi. (Mat. 6:31, 32) Bwa kupelesha kwakwa kwikalakasha, twi kupwandikisha’shi abitungu twipaane mu kukimba bintu bya ku mbidi. Su twalekyela’shi bino bitukitshikile, lukumiino lwetu mwi Yehowa alubofula na kipwano kyetu naye akilwila. (Mak. 4:19; 1 Tim. 6:10) Sunga’shi twi balombene kwikalakasha bikilekile pabitale akinangushena bantu bwetu. Twi balombene kupusha moo wa kwishibwa milongo sunga wa kubingwabingwa kukila byatutshinyi Yehowa. Bwa kwikalwila ku ano masaku, abitungu twisendele Yehowa bwa’shi etupe lukumiino n’eshimba dinyingye bwa kukambila moo wa bantu.​—Nki. 29:25; Luk. 17:5. w19.11 15 ¶6-7

Kwi bitshibilo bi na muulo byatushi balombene kushintula. Bu kileshesho, abitungu tulamate ku kitshibilo kyetu kya kufubila Yehowa, na kya kwikala na lulamato kwi mwina dibaka netu. (Mat. 16:24; 19:6) Anka bingi bitshibilo abitungu twibishintuule. Bwakinyi? Mwanda myanda ikwete kushintuluka. Nkinyi kilombene kwitukwasha bwa kwata bitshibilo bibuwa? Teka bwa’shi opete binangu. Mu ingi myanda, atwe boso ‘twi bakutwe binangu.’ Byabya teka Yehowa bukwashi nsaa yw’ata kitshibilo na nsaa yokyebe kushintuula kitshibilo kyodi mupwe kwata. Yehowa akukwasha bwa kwata kitshibilo ki buwa. Kimbuula kalolo. Badika Eyi dy’Efile Mukulu, mikanda ya ndubulwilo a Yehowa, na esambe na muntu mulombene nkupa elango dibuwa. (Nki. 20:18) Kuno kukimbuula kwi na muulo kumpala kwa kwata kitshibilo kya kushintula mudimo, kufiluka, sunga nsaa yw’ata kitshibilo kya kulonga mudimo kampanda aukukwasha bwa kupudisha nkalo yobe na kutungunuka na kufubila Yehowa. w19.11 27 ¶6-8

Mwanda wa muloo, Yehowa mmwate mpángo ya kwitupasha, sunga kwitupososha ku mulwisho. Yesu ndjo mwitupososhe. Mu siekele a mwanda, kumpala kwa Bipungo byetu, mutemuki Yeeshaya batemukile pabitale kupososhwa kukata kwa mu mafuku aafiki kupososhwa akukakitshika mu mafuku aafiki kumpala, nkwilekene na kwa mu kipwa kya Jibile a bena Isaleele. Bafundile’shi: “Kikudi kya Mwanana Yehowa kii pandji, mwanda Yehowa mmungyele mwimu bu musangulwe aaye, mmuntume mu kutwadila balanda mukandu wa muloo, bwa kubuka batapikye ku mashimba, kuukisha bakwatshibwe ku bupika kufika kwa bulungantu.” (Yesh. 61:1) Bwabwa butemuki bubaadi butale nanyi? Bwabwa butemuki bwi na muulo ukata, bubabangile kulombana kunyima kwa Yesu kubanga mudimo waye wa bulungudi. Pabayile ku kitumbwilo kwabo ku Nazarete, Yesu babadikile ano mayi a Yeeshaya kwi bena Yuuda abaadi bebungye kwakwa. Yesu balesheshe’shi ano mayi ngamutale.​—Luk. 4:16-19. w19.12 9-10 ¶6-8

Bwashi oyingile kubingwabingwa, abintugu wekale n’eshimba dinyingye. Su omono’shi twena eshimba dinyingye, nkinyi kyodi mulombene kukita? Uka’shi kwikala n’eshimba dinyigye takutala bula, bukome sunga ngobesha yobe. Tala kileshesho kya Daavide balwile na Golyate pabaadi ka nsongwalume. Patumupwandjikisha na kyakya kipambe, Daavide baadi peela, shii bukome, na tabaadi na bina ngoshi. Daavide tabadi sunga na lupete nya. Anka, Badi n’eshimba dinyingye. Daavide bayile lubilo bwa kulwa na kyakya kipambe. Bwakinyi Daavide baadi n’eshimba dinyingye? Badi mushinkamishe’shi Yehowa e naye. (1 Sam. 17:37, 45-47) Daavide tabaadi mutule binangu byaye bwa kwipwandikisha na kino kipambe nya. Kadi, badi anangushena bi bupeela bwa Golyate p’akumupwandikisha na Yehowa. Nkinyi kyatulongyela ku uno mwanda? We kunyinga eshimba su we mukulupile’shi Yehowa e nobe na su we mushinkamishe’shi beshikwanyi netu mbapela pa kwibapwandikisha n’Efile Mukulu sha bukome boso.​—2 Mya. 20:15; Mis. 16:8. w19.07 5 ¶11-13

Tishike, mwina Kidishitu baadi kuuku a kukulupilwa a Mpoolo mutumiibwa. (Bik. 20:4) Pangi mu kipwa kya 55 B.B., Mpoolo baadi mulumbuule lupungo lwa makuta bwa kukwasha bena Kidishitu ba mu Yuuda, na abimweka’shi baadi mupe Tishike uno mudimo wi na muulo. (2 Kod. 8:18-20) Kunyima, pabaadi mu lukano mu Looma bwa musango wa kumpala, Tishike nyi baadi amukwasha bwa kutwala mikandu. Baadi atwadila tukongye twa mu Asie mikanda na mikandu anyingisha. (Kol. 4:7-9) Tishike baadi mushale kuuku a kukulupilwa a Mpoolo. (Tt. 3:12) Takubaadi mwina Kidishitu su ngumune mu aa mafuku baadi a kukulupilwa bu Tishike nya. Nsaa ibaadi mu lukano bwa musango wa kabidi, pangi mu 65 B.B., Mpoolo baadi mufunde’shi bena Kidishitu be bungi ba mu Asie, tababaadi abakumiina kukisha nsaa pamune naye nya, mwanda abaadi abapusha moo wa bulwishi. (2 Tim. 1:15) Mu kwilekena na bano bantu, Mpoolo baadi mukulupile Tishike na baadi mumupe bungi bushito. (2 Tim. 4:12) Kushi mpaka, Mpoolo baadi asangeela kwikala na kuuku ebuwa bu Tishike. w20.01 10 ¶7-8

Pangi okwete kwiyipusha su we mwedibwe mwimu ku bukwashi bwa kikudi kiselele. Su mbyabya, banda kunangushena ku ino nkonko: We na lukalo lukata lwa kukita akikyebe Yehowa su? W’epushaa’shi we na katshintshi ngofu mu bulungudi? We mulongi a Eyi dy’Efile Mukulu mufule kulonga pabitale ‘myanda ifwame y’Efile Mukulu’? Opwandikishaa’shi Yehowa mmukupe bipeta bikile buwa mu bulungudi? Opushaa’shi we na bushito bukata bwa kulongyesha bangi pabitale Yehowa su? We na bishinkamisho abikulesha’shi Yehowa mmukukwashe mu mishindo ibungi mu nshalelo oobe su? Su bokumiina ku ino nkonko, bino abishinkamisha’shi we mwitaminyibwe bwa kwenda mwiyilu su? Nya ta nabyo. Bwakinyi? Mwanda bafubi b’Efile Mukulu booso mbalombene kupusha nka byabya. Anka, su okwete kwiyipusha su we mwedibwe mwimu, penda nka yaaya mpaka ngilombeene kulesha’shi twe mwedibwe mwimu nya. Bano babadi betamine kwi Yehowa tabealashenaa bwa kuuka su mbedibwe mwimu sunga’shi ta mbebeele mwimu! Abauku! w20.01 23 ¶14