Mweshi wa 5

Myanda kinyi ayitungu ba nambutwile bakite bwa kukwasha bana babo bwabadya kulonga bya kufula Yehowa? Tekayi Yehowa bwashi enukwashe bu bibaadi bitekye Manowa na mukashi aaye. Longyesha dingi ku kileshesho kyobe. Myanda ywakula i na muulo, anka yokitshi ina bukitshi bwi bukopo kwi mwana obe. Yoosefe na Maariya abaadi balekyele bana babo kileshesho kii buwa, mpa na Yesu. Yoosefe baadi afubu ngofu bwa kudisha kifuko kyaye. Dingi Yoosefe baadi anyingisha kifuko kyaye bwakidya kufubila Yehowa. (Miy. 4:9, 10) Badi ende na kifuko kyaye ku Yeelusaleme “kipwa kyooso” ku musangelo wa Pasaka. (Luk. 2:41, 42) Bangi ba nshe-bana ba mu mafuku aye abaadi abanangushena’shi kwenda na kifuko kyoso lwalwa lwendo kubaadi bukopo, akwata nsaa ibungi, na makuta akile bungi. Anka Yoosefe baadi ata myanda ya mu kikudi na muulo na baadi alongyesha bana baye bwabadya kukita namu byabya. Dingi Maariya baadi auku Bifundwe kalolo. Ku bibaadi akula na akitshi, baadi mulongyeshe bana baye bya kufula Eyi dy’Efile Mukulu. w19.12 24-25 ¶9-12

Twi na kishinkamiisho kya mushindo witufule Yehowa, nsaa yatunangushena pabitale bibakitshine nsaa ibakutshile Adame na Eeva kumukookyela. Pabaadi Adame mupele kukookyela Nshaaye e mwiyilu, badi mushimishe mbalo yaaye mu kifuko kya Yehowa ki na muloo, bwaye’ye nabene mpa na bwa bana baaye. (Lom. 5:12) Yehowa bakitshine kintu kampanda bwa kukwasha bana ba Adame. Yehowa baadi munyokye Adame, kadi tabaadi mulekye bekulu ba Adame kushi lukulupilo nya. Mususa umune, baadi mulee’shi bantu basha kukokyela abakalukila dingi mu kifuko kyaye. (Kib. 3:15; Lom. 8:20, 21) Yehowa baadi mwibilombashe ku bukwashi bwa mulambu wa nkuulo wa Yesu, Mwana aaye aadi mufule. P’aye kwitutumina Mwanaye, Yehowa baadi muleshe’shi mmwitufule ngofu. (Yo. 3:16) Nyi Nshe-bana ebuwa. Apushaa nteko yetu na kwitupa bintu byatudi nabyo lukalo, bya ku mbidi na bya mu kikudi. Etulongyesha na kwitukwasha. Aketukitshina dingi myanda ikile buwa mu mafuku e kumpala. Twi na muloo wa kuuka’shi Nshetu sha kifulo etupasukilaa! w20.02 6 ¶16-17; 7 ¶20

Kasha topushishe kinyongwa bwa mwanda kampanda? Pangi mwanda mbakulwishishe kwi bangi bwa byabadi baakule sunga kukita. Sunga’shi pabitale mwanda odi mwakule sunga kukita. Bu kileshesho, pangi bodi mukite mulwisho na wekalakasha’shi Yehowa t’akufwila lusa su nkapeela nya. Pangi we mulombene kupwandikisha’shi pa mwanda okwete kwikalakasha bwa kintu kampanda ngofu, twe na lukumiino na’shi we muntu ebubi. Banda kutala bileshesho bipela bi mu Bible. Aana, badi mukashi sha lukumiino nyinaaye na mutemuki Samwele. Anka badi mukalakashwe nsaa ibabadi bamukitshine myanda ibubi kwi muntu a mu kifuko kyaye. (1 Sam. 1:7) Mpoolo mutumiibwa badi na lukumiino lwi bukopo, anka baadi ‘ekalakasha . . . bwa tukongye.’ (2 Kod. 11:28) Nfumu Daavide badi na lukumiino lwi bukopo mwi Yehowa, na Yehowa bamufudile ngofu. (Bik. 13:22) Sunga mbyabya, Daavide bakitshine bilubilo bibadi bimwinyongoshe ngofu. (Mis. 38:5) Yehowa badi musambe na kupa oso a kwabadi butaale. w20.02 20 ¶1-2

Nsaa ywelambula, wele luteko kwi Yehowa n’eshimba dyoso na kumulungula’shi, ofubisha muwa obe bwa kumufubila bwa loso. Nsaa ywelambula kwi Efile Mukulu, ‘w’eepele.’ Binobino, todi mufubi a Yehowa, nyi mwabi ukata. (Lom. 14:8) Bomulungula’shi kubanga binobino, wepana mu mufubo waye kushi ku miloo yobe nya. Kwilambula kobe nyi mutshipo mutshipo okitshi kwi Efile Mukulu. Yehowa tetutakulaa bwa kukita wawa mutshipo pa bukopo nya. Kadi nsaa yatwele wawa mutshipo, akumiina’shi twiulombashe. (Mis. 116:12, 14) Muntu elambulaa kwi Yehowa aye nabene, pa bupenka; nyi mwanda winutale bubidi bwenu na Yehowa. Lubatshisho alukitshikaa mbalo i bantu bebungi; kebungi ku bikongeno. Nsaa yobatshishibwa, olesha bangi’shi wemupwe kwilambula kwi Yehowa. Byabya, kubatshishibwa kobe akulesha bangi’shi we mufule Yehowa Efile Mukulu oobe n’eshimba, muwa, binangu na bukome bobe boso na’shi bwata kitshibilo kya kumufubila bwa loso.​—Mak. 12:30. w20.03 9 ¶4-5

Satana kwete kubulakasha mweneno a bantu pabitale Yehowa. Kunyima kwa lufu lwa balongi ba Yesu, bantu abaadi abeamba bu bena Kidishitu ababangile kulongyesha myanda ya madimi. (Bik. 20:29, 30) Bano bantu basumbule lukumiino, ababangile kubulakasha mweneno a bantu pabitale Efile Mukulu a binyibinyi. Bu kileshesho, abalekyele kufubisha eshina dy’Efile Mukulu mu ma Bible aabo, na kwidipyanyisha na mwasu wa bu “Mwanana” sunga ingi myasu. Pa kukatusha eshina dy’Efile Mukulu na kwidipyanyisha na mwasu wa bu “Mwanana,” bibekele bukopo bwa muntu abadika Bible kumona kwilekena kwi pankatshi pa Yehowa na bangi ba “mwanana” babadi batemune mu Bifundwe. (1 Kod. 8:5) Abaadi bafubishe uno mwasu umune wa bu “Mwanana” kwi Yehowa na kwi Yesu, na byabya bibelele bukopo bwa kushinguula’shi Yehowa na Mwan’aye mbantu babidi be na midimo ilekene. (Yo. 17:3) Kano kabulakanyi nkatakule bantu mu kukwatshishena dilongyesha dya busatu bwiselele bushii mu Eyi dy’ Efile Mukulu. Pa mwanda wa byabya, bantu bebungi bakwete kumona’shi bi bukopo bwa kuuka Efile Mukulu. Aku namu mmadimi akata!​—Bik. 17:27. w19.06 5 ¶11

Mushindo umune wa kulombasha bulungudi bwetu kalolo mpa kulongamisha ndongyesho na ndambukisho etu. (Nki. 1:5; 1 Tim. 4:13, 15) Twi na kinemo kikata kya kumona’shi Yehowa akumina “kufuba pamune” netu! (1 Kod. 3:9) Nsaa ‘yoshinguula kikile byooso ku buwa’ na kutula mudimo wa bwina Kidishtiu pa mbalo ya kumpala, wekala ‘ofubila Yehowa na muloo.’ (Fid. 1:10; Mis. 100:2) Bu byodi mufubi a Efile Mukulu, we mukumbene kushinguula’shi, akupa bukome bodi nabo lukalo bwa kulombasha bulungudi bobe sunga wekala na nkalakashi i naminyi. (2 Kod. 4:1, 7; 6:4) Sunga byekala’shi nshalelo oobe akupa mushindo wa kulungula nsaa ibungi sunga ipeela, we mukumbene “kwitumbisha [kusepeela, NWT]” nsaa yodi mwipane mu bulungudi n’eshimba dyobe dyoso. (Nga. 6:4) Nsaa yolombasha mudimo oobe wa bulungudi kalolo, olesha Yehowa byodi mumufule na byodi mufule bantu nobe. “Pa kukita byaabya biinyibiinyi, ngi pookeepaasha obe nabeene mpaa naa bano abakuteemesha.”​—1 Tim. 4:16. w19.04 6 ¶15; 7 ¶17

Mushindo ukata ukwete Satana na ba demo kukimba kupambusha bantu nyi mmalenganyi. Basha malenganyi abeambaa bu abauku bya kukita myanda yabashii balombene kukita kwi mungi muntu. Kileshesho, bangi abeamba’shi mbalombene kumona abifiki kumpala ku bukwashi bwa lumonyi sunga lubuko lwa nyenyenyi. Bangi mbalombene kukita bu bakwete kwisamba na bafwe. Bangi be na butshi sunga maji, na mbalombene kutompa kulwaa mungi muntu. Muyile nkonko yabadi beele bantu mu maumbo 18 a mu Amérique Latine na mu maumbo a mu Caraïbe, mbasangane’shi muntu umune pa basatu mbatule lukumiino lwabo mu maji na mu butshi, dingi peepi bantu boso ba kwabadi abakumina’shi mbibofule kwisamba na bikudi bibi. Mbakimbuule dingi mu angi maumbo 18 a mu Afrique. Bebungi ba ku bantu babekalanga bayipushe, kukila kya pankatshi mbaleshe’shi mbakumine’shi butshi bwi kwanka. Eyendo sunga twekala mbalo kinyi, abitungu twilame ku malenganyi. w19.04 20-21 ¶3-4

Yehowa Efile Mukulu mmushikwe bubi boso. (Mis. 5:5-7) Mmushikwe bikishekishe kulwisha bana na myanda ibutete mwanda nyi kibeshi kikile bukata! Mwanda tukwete kwambula Yehowa, atwe ba Temwe ba Yehowa twibashikwe kulwisha bana na myanda ibutete na tatutadiilaa sunga kukalwila muntu akitshi uno mwanda mu kakongye ka bena Kidishitu nya. (Lom. 12:9) Kulwisha bana na myanda ibutete mu bipaso byayo byoso, nkwikutwene na “mwiya wa Kidishitu”! (Nga. 6:2) Byoso bibaadi Yesu mulongyeshe mu bishima na mu bikitshino na ngwimene pa kifulo na kululama. Mwanda bakwete kutumikila uno mwiya, bena Kidishitu ba binyibinyi bakwete kukitshina bana myanda mu kipaso akilesha shi, bakwete kwibakalwila na mbebafule ngofu. Kadi, kulwisha bana na myanda ibutete nkukimba penda kwisangasha na, kwi bubi. Bya malwa, bena Kidishitu ba binyibinyi mbafumankane na uno mwanda. Bwakinyi? Mwanda “bantu beebubi na bansesa” bakwete kufwima, na bangi be mpa na mu kakongye. (2 Tim. 3:13) Dingi, bangi bena kakongye mbapone mu luno lwabi lwa mbidi, abo nkulwisha bana bakinga na myanda ibutete. w19.05 8 ¶1-3

Muntu mmukumbene kwipusha bu’shi na mushindo wa kwifubwila peepi na Yehowa mu luteko. Su atukumina kunyingisha muntu e byabya, twi balombene kuteka pamune naaye, tutemune eshina dyaaye mu luteko. Twi balombene kulungula Yehowa bukata bwa kifulo kyatudi nakyo bwa yawa muntu. Twi bakumbene kuteka Yehowa akwashe yawa mufubi aaye bwa’shi ekale n’eshimba difukame na anyingye. Nteko ya wawa mushindo ngilombene kunyingisha muntu ngofu. Ela binangu kumpala kwa kwakula. Bishima byoshi mwelele binangu mbilombene kutapa muntu kwishimba. Bishima bibuwa mbilombene kupaasha muntu. (Nki. 12:18) Byabya, teka Yehowa akukwashe opete bishima bya kalolo, abinyingisha, abibatamisha eshimba. Tentekyesha’shi bishima bi na bukwashi bwibungi, mbino abisanganyibwa mu Bible eyi dya Yehowa. (Eb. 4:12) Nsaa yatunyingisha bangi, atwibatentekyesha’shi Yehowa mwibafule. Na tatulubanga’shi, Yehowa dingi nyi Efile Mukulu sha kululama. Yehowa auku muntu oso abadi balwishe, sunga byekala’shi takwi muntu mumumone. Yehowa amono byooso, na takutwa kunyoka muntu mukite mulwisho sh’elanga kwishimba.​—Mb. 14:18. w19.05 18 ¶18; 19 ¶19, 21

Satana akumiina’shi tulekye kufula Yehowa. Bwa kulombasha mpángo yaye, kwete kutompa kwitutakula mu kushintuula binangu byetu bwa’shi, etukwate ku bupika na tunangushene bu’ye. Kwete kutompa kwitukuminyisha sunga kwitudimba bwashi tumulonde pa kufuba na malaka eetu a mbidi. (Kol. 2:4) Twi mu masaku akata a kudimbibwa na Satana su? Oolo, twi mu masaku! Tentekyesha’shi, Mpoolo tabaadi mufunde ano mayi a kudimusha e mu Bena-Kolose 2:8 bwa bantu bashii bena Kidishitu nya. Baadi mwiafundjile bena Kidishitu abaadi bedibwe mwimu ku bukwashi bwa kikudi kiselele. (Kol. 1:2, 5) Mu aa mafuku, bena Kidishitu abaadi mu masaku a kudimbibwa, mpa n’atwe namu lelo uno, twi mu masaku akata a kudimbibwa. (1 Kod. 10:12) Bwakinyi? Mwanda Satana mbamusumbule pa nsenga, na kwete kukita mwaye moso bwa kudimba bafubi b’Efile Mukulu basha lulamato. (Kibaf. 12:9, 12, 17) Kukatusha byabya, twi mu kipungo ki bantu babi na ba nsesa “abaiididiila mu bubi.”​—2 Tim. 3:1, 13. w19.06 2 ¶1-2

Eliya bapushishe moo ukile nsaa ibaadi Ndalamumba Yesabele akyebe kumwipaa. Aye nkusuukila ku Beer-Sheba. Mwanda baadi mubofule kwishimba ngofu, Eliya “batekyele lufu.” Nkinyi kibaadi kimubofushe kwishimba byabya? Eliya baadi muntu mukutwe kupwidika, baadi “muntu anka bu’twe.” (Shak. 5:17) Pangi baadi na twinyongoshi tukilekile na baadi mukokye. Pangi Eliya baadi mupwandikishe’shi byoso bibaadi akitshi bwa kukwatshishena lulangwilo lwiselele tabibadi na muulo, na’shi takubaadi kulumbulukye kintu sunga nkimune mu Isaleele, nka penda aye nyi bashele afubila Yehowa. (1 Bf. 18:3, 4, 13; 19:10, 14) Yehowa bapushishe bi mu binangu bya Eliya na tabadi mutopekye mwanda balesha bi mwishimba dyaye nya. Anka, bamukwashishe bwadya kupetuula bukome. (1 Bf. 19:5-7) Kunyima Yehowa badi muludikye binangu bya Eliya pa kumulesha bukome Bwaye bwa kukanya. Yehowa bamulungwile dingi’shi kubadi kushaale bantu 7 000 mu Isaleele bashibadi balangwile Baale. (1 Bf. 19:11-18) Pabadi mumupe kino kileshesho, Yehowa balesheshe Eliya’shi Mmumufule. w19.06 15-16 ¶5-6

Ikala olondo bukunkushi. Bwa kusuuka nkalakashi, bibuwa tulonde bukunkushi bwatupete kwi bantu batudi bakulupile, bakwetu abetukunkusha. Kileshesho, mu maumbo abaabadi bakandjikye mudimo wetu, bakwetu abakunkusha babadi baate mpángo ya’shi balungudi tabekalanga abaabila mikanda mu bulungudi. Anka, mungi mukwetu mbala-mashinda bapelele kulonda bwabwa bukunkushi aye nkubanga kwabila mikanda. Nkinyi kibakitshikile? Kapindji kapeela kunyima kwa’ye na bangi bakwetu kukita bulungudi bwa mu mpukapuka, babadi bebemikye kwi ba mpulushi. Abimweneka’shi bakata ba mbulamatadi babadi abebalondo na babamwene mikanda ibabadi abaabila. Bino abitulongyesha kinyi? Bibuwa tulonde bukunkushi sunga nsaa y’atumono’shi byatukitshi bibuwa. Yehowa asangalaa nsaa yatukwatshishena bakwetu baadi mutuule bwa kwitukunkusha.​—Eb. 13:7, 17. w19.07 12 ¶17

Bufuku bwa muladilo wa lufu lwaye, Nfumwetu Yesu baadi mulungule boso abakumiina kwikala bu balongi baye’shi abakebashikwa. (Yo. 17:14) Kubanga aa mafuku mpa na lelo uno, ba Temwe ba Yehowa basha lulamato bakwete kwibabingabinga kwi bantu bash’abalangwila Yehowa. Bu bitabidi nfudiilo a uno ndumbulwilo peepi, atuuku shi abakyebe kunyisha kwitulwiisha. (Mat. 24:9) Nkinyi akitungu shi tukite kubanga binobino bwa kukambila kubingwabingwa? Tabi na muulo kunangushene ku myanda ibubi ayiketukitshikila nya. Su twanangushena byabya, atukwatshibwa na moo na twinyongoshi. Twi kwimika kulangwila Yehowa mpa na kumpala kwa’shi kubingwabingwa kufikye. (Nki. 12:25; 17:22) Moo nyi nkina ngoshi kikata kyabakwete kufuba nakyo kwi ‘mwishikwanyi neetu, Kafilefile’ bwa kwitulwiisha. (1 Mp. 5:8, 9) Bi na muulo bwatudya kubanga kunyingisha kipwano kyetu na Yehowa. w19.07 2 ¶1-3

Batumiibwa babaadi na muloo nsaa ibabadi bebungye ku mwengye. Kunyima kwa kusanguka kwaye, Yesu bebalungwile bwabadya nkafumankana kwakwa. (Mat. 28:16) Pangi wawa ndjo mususa ubadi ‘mumwekyele bakwetu bakile pa 500.’ (1 Kod. 15:6) Bwakinyi Yesu badi mwitamine balondji baaye ku kino kisangilo? Mbwa kwibapa mudimo ukile buwa. Bebatumine’shi: “Ndaayi mu miilo yooso nwibeekashe buu balondji bande.” (Mat. 28:18-20) Balondji babadi bapushe mayi a Yesu, babafikile bena kakongye ka bena Kidishitu ba mu siekele a kumpala. Mudimo wa kumpala wa kaka kakongye ubadi wa kwikasha bantu bu balondji ba Kidishitu. Lelo uno, kwi tukongye twi bungi twa bena Kidishitu ba binyibinyi mu nsenga ishima, na twi nka na wawa mudimo umune. w19.07 14 ¶1-2

Ungi mukunkushi a kifunda a mu Norvège amba’shi bantu bashabakuminaa kwisamba myanda itale Efile Mukulu, abakuminaa kwisamba myanda ayikitshika mu nsenga. Kunyima kwa kusema muntu, amwipushaa bino: “Opwandikisha naminyi pabitale lukulupilo lwetu lwa kwikala biya mu mafuku e kumpala? Kwikala kwetu kwa biya akutukila kwi bena politike, bena sianse, su kwi ungi muntu?” Kunyima kwa kuteemesha kalolo, abadikila muntu sunga kwakula mayi e mu kifundwe akisambila nshalelo ebuwa mu mafuku aafiki. Bangi abasankaa pabupusha mulayilo wi mu Bible wa’shi nsenga ayikala kwanka bwa looso na’shi bantu bebuwa abekashala pa nsenga bwa looso. (Mis. 37:29) Twi balombene kubanga mwisambo na bantu mu bipaso bilekene. Bwakinyi? Mwanda kyakya akisangasha muntu pangi t’akisangasha mungi. Bangi be kukumiina kwisamba pabitale Efile Mukulu na Bible, bangi namu mbalombene kukumiina kubanda kwisambila ingi myanda. Mu mishindo yoso, bibuwa tukimbe bya kwisamba na bantu ba bipaso byoso. (Lom. 1:14-16) Yehowa nyi atamishaa bya binyibinyi mu mashimba a baaba bafule myanda ibuwa.​—1 Kod. 3:6, 7. w19.07 22-23 ¶10-11

Kifulo kikata ky’Efile Mukulu akitutakula bwa kufula bakwetu. (1 Yo. 4:20, 21) Pangi twi kupwandikisha’shi kufula bakwetu bena Kidishitu nkubofule. Anka, twibafule bakwetu bena Kidishitu mwanda tukwete kulangwila Yehowa na tukwete kwitatshisha bwa kumwambula. Tukwete kwambula kileshesho kya Yesu, aye baadi mutushe mpa na muwa waye mwanda wa kifulo kyaye kikile bukata. Kadi, ingi nsaa bikwitwikela bukopo bwa kukokyela mwiya wa kwifulena. Efodi na Sentishe abaadi abafubu na kisumi “pamune” na Mpoolo mutumiibwa. Anka, abaadi pangi bekutwene na bu loole bwabo nkutshibika. Mu mukanda ubaadi mutumine kakongye kaabadi bano bakwetu bakashi, Mpoolo badi mutemune Efodi na Sentishe na kwibapa elango bwa’shi “bepushene.” (Fid. 4:2, 3) Mpoolo baadi dingi mupe kakongye kashima dino elango’shi: “Kitaayi byooso kushii kuunûna sunga kwela mpaka.”​—Fid. 2:14. w19.08 9 ¶6-7

Mwanda wa muloo, mu tukongye twibungi mpa na bangi bakwetu bebungi, bakwete kwitatshisha bwa kukwasha baaba be mu mudimo wa nsaa yoso bwabadya kutungunuka na mudimo wabo. Bakwete kukita byabya pa kwibanyingisha bwabadya kutungunuka na mudimo wabo, kwibapa ekuta sunga kukwasha bifuko byabo bii kula nabo. Su mukwetu baadi mu mudimo wa nsaa yoso afika mu kakongye kenu, tokumanga kumwamba’shi taakitanga mudimo kalolo sunga’shi mukite kintu ki bubi. Kadi abitungu omukwashe, bwadya kwiubidishena na nshalelo mupya. Museme na muloo oso na omutumbule bwa mudimo waye wadi mukite, sunga ekala na mukumbo aumukutshishwa kukita bibungi. Kimba bya kwiukena naye. Longyela ku kyukilo kyabo, myanda yabadi balongye na yabadi bamone. Baaba bakyabakatuka mu mudimo wa nsaa yoso, be kwikala na lukalo lwa’shi webakwashe bwabadya kupeta nshibo ya kufutshila, mudimo, na bingi bintu bya kwibakwasha. w19.08 23-24 ¶12-13

Goge akakulupila mu “bukome bwa bantu” nyi nkwamba’shi bisaka byaye bya basalayi. (2 Mya. 32:8) Atukakulupila mwi Yehowa Efile Mukulu etu miilo ayikamono byanka bu kukutwa kwa binangu. Mwanda efile abo Babilone Mukata ayikalanga na bukome, kadi tamwibapashe ku “nyema” na “nsengwa ekumi” nya. (Kibaf. 17:16) Paapa Goge akapwandikisha’shi mbibofule bwadya kwitutshokola. “Bwikumbi dibwikile [nsenga],” akalu na mwilo wa Yehowa. Anka paapa, Goge akamono’shi bakwatshika ku muteo. Mumune na Faraone mu Kalunga Kamonga, Goge akatundula’shi kwete kulwa na Yehowa. (Efi. 14:1-4; Es. 38:3, 4, 18, 21-23) Kidishitu na bilwilo byaye bya mwiyilu abakakalwila mwilo w’Efile Mukulu na kubutula Goge na basalayi baye. (Kibaf. 19:11, 14, 15) Nkinyi akikafikila Satana mwishikwanyi mukata a Yehowa, kwete kudimba miilo na kwiyitakula mu kulwa na mwilo w’Efile Mukulu? Yesu akamusumbula na ba demo baye mu bwina, mwamwa abakamushikila mwanka munda mwa bipwa kinunu.​—Kibaf. 20:1-3. w19.09 11-12 ¶14-15

Atwe boso twibakulupile myanda ibuwa yabadi betulee kwi Yehowa. Byabya, nsaa ayimweka myanda yabadi betulee kwi Yehowa bu aiyisha, mbilombene kwitubofusha. Twi balombene kubofula ku mashimba. (Nki. 13:12) Bino bibaadi bikitshikye ku mbangilo kwa siekele a 20. Aa mafuku, bena Kidishitu bedibwe mwimu bebungi abaadi abatengyela’shi abende mwiyilu mu kipwa kya 1914. Nsaa yabishibaadi bikitshikye, mbikunyi bibaadi basha lulamato bakile na uno mwanda wa lukulupilo lwabo lushibaadi lulombane? Tababaadi babofule ku mashimba nya, mwanda abaadi bantuule binangu byabo mu kufubila Yehowa na lulamato, kushi ku efuto dyabo. Abaadi na kitshibilo kya kusuuka lubilo lwabo na mufwaka. Kushi mpaka, okwete kutengyela bwa kumona Yehowa p’akakwila eshina dyaye, Bufumu bwaye, na pakalombasha milalayilo yaye yoso. Shinkamishayi’shi ino myanda yoso ayikalombana mu kipungo kyabadi batshibe kwi Yehowa. Patukyatutengyela, tutungunukyeyi na kufubila Efile Mukulu, tatutadiilanga kukutwa kulombana kwa myanda y’atutengyela kwitubofushe ku mashimba nya. w19.08 4-5 ¶9-10

Eyipushe’shi: “Bangi bakwete nkumona bu muntu sha kalolo na mwiyishe su? Nkwete kukita midimo ishadile bwa kukwasha bangi su? Nekalaa na kalolo kwi bantu su?” Yesu baadi mwikashe butaale munkatshi mwa bantu babaadi afubu nabo, na baadi na muloo wa kwibalongyesha. (Luk. 10:1, 19-21) Baadi munyingishe balongi baye bwabadya kwela nkonko, na baadi akumiina kupusha mweneno abo. (Mat. 16:13-16) Nka bu abikulaa mutshi wabakalwila kalolo mu lupango, balongi ba Yesu abaadi abende na kukula. Abaadi abatumikila bibaadi Yesu mulongyeshe na kupa bikuba mu midimo ibuwa. We na matalwa su? Su mbyabya, eyipushe’shi: ‘Eyikashi kinyi dyankwete kutwesha ku nshibo na ku mudimo? Nkwete kwikasha butaale su? Nkwete kunyingisha bangi bwadya kwela nkonko su? Napusha mweneno abo su?’ T’atukumiina kwikala bu Bafadisee, abaadi abashikwa bantu abaadi abebele nkonko na kubingabinga baba boso abaadi abatusha mweneno mwilekene na abo.​—Mak. 3:1-6; Yo. 9:29-34. w19.09 20 ¶1; 23 ¶9-11

Bakata ba nsenga abakulaa kino kishima nsaa yabesambila kulumbuula kwa kipwano kyabo munkatshi mwa maumbo. Anka, musaase wa “kufukama na kwiyikeela” wabesambila mu Bible ngwilekene. Bwakinyi? Nsaa yabele uno musaase, bantu mbalombene kupwandikisha’shi bakata ba nsenga aboobesha kutuula butaale pa nsenga, na butaale bwibungi. “Mpombo ikata” ayikabanga na “kabutu akafiki mususa umune.” (Mat. 24:21) Tatwiuku myanda ayikatakula bakunkushi bwa kwela musaase wa kufukama na kwiyikeela sunga mushindo wabakewele. Na tatwiuku su akukela penda musaase umune sunga’shi akukekala misaase ibungi. Sunga byekala naminyi, atushinguula bino: Tatwi balombene kudimbibwa na binangu bya’shi bakunkushi ba nsenga mbakumbene kutwesha butale mu nsenga nya. Anka, nyi nkitundwilo nkya’shi “efuku dya Yehowa” tadidi pa kubanga!​—1 Tes. 5:2. w19.10 8-9 ¶3-4

Ngoshi ya Armagedone ayifudisha uno ndubulwilo. Byabya, tatwina kya kupusha moo. Bwakinyi? Mwanda nyi ngoshi ya Yehowa, tatukalu nya. (Nki. 1:33; Es. 38:18-20; Sek. 14:3) Nsaa ayikatuusha Yehowa matalwa, Yesu Kidishitu akakunkusha kilwilo ky’Efile Mukulu ku ngoshi. Akekala na bena Kidishitu bedibwe mwimu baasangukye na midiyala ya ba mikeyilu. Abakalu na Satana, ba demo baye na makome aye a pa nsenga. (Kibaf. 6:2; 17:14) Yehowa etushinkamisha’shi: “Kilonda kyooso kifushiibwe bwa kulwa noobe ngoshi taakikitshi kintu’kyo.” (Yesh. 54:17) “Kibumbu kikata” kya balangwidi ba Yehowa basha lulamato “abafiki ku mpombo ikata.” Abakatungunuka na kufubila Yehowa. (Kibaf. 7:9, 13-17) Bible etupa tubingilo twibungi twa kwikala bashinkamishe’shi atukapanda mu mafuku aafiki! Atuuku’shi “Yehowa alama baa sha lukumiino.” (Mis. 31:24) Boso bafule Yehowa na abamutumbisha abakamono kwatoosha eshina dyaye dya kishila.​—Es. 38:23. w19.10 18-19 ¶17-18

Bu byatukwete kwifubwila ku “mafuku a nfudiilo,” twibalombeene kupeta nkalakashi ikile bungi. (2 Tim. 3:1) Bu kileshesho, kunyima kwa kampanye mu dingi eumbo dya mu Afrique a kupona nguba, mu batukile ngoshi ikile bukopo. Munda mwa myeshi isamombo, nshalelo baadi bukopo bukile bwa bakwetu balume na bakashi, mwanda ngoshi ibaadi nka kwanka. Nkinyi kibaadi kibakwashe bwabadya kukambila yaya nkalakashi? Bangi abaadi bakafwamine ku mashibo a bakwabo bena Kidishitu abaadi mbalo ibuwa. Ungi mukwetu amba’shi: “Mu luno lukalakashi, nadi na muloo mwanda nadi na ba kuuku. Tubaadi atwinyingishena.” Nsaa aikabanga “mpombo ikata,” atukekala na muloo nka su twi na ba kuuku be buwa. (Kibaf. 7:14, Kilombeeno kipya 2014) Byabya, tunyingisheyi bukidibukidi kipwano kyetu na bakwetu bena Kidishitu kubanga binobino. (1 Mp. 4:7, 8) Bwakinyi? Mwanda beshikwanyi netu abatungunuka nka na kutompa kwitutshibuula na myanda ya madimi. Abatungunuka na kutompa kwitutakula mu kupela kukulupila bakwetu na kwibakwasha. Anka taboobesha nya. Tabekala na ngobesha ya kutshiba kifulo kyetu bwa bakwetu nya. w19.11 2 ¶1-2; 7 ¶19

Satana “nshaye na madimi,” kwete kufubisha boso be ku matalwa aye bwa kupalakasha madimi pabitale Yehowa na bakwetu bena Kidishitu. (Yo. 8:44, Kilombeeno kipya 2014) Bu kileshesho, bantu basumbule lukumiino bakwete kwakula myanda ya madimi pabitale ndubulwilo a Yehowa ku Internete, ku televizion, ku bisashi na mu ma jurnale. Ano oso madimi e bu “kaalo ka mikyetwe” ya Satana. Twi kukita kinyi su muntu abanga kwitulungula ano madimi? Abitungu tupele kumutemesha! Bwakinyi? Mwanda twi na lukumiino mwi Yehowa na twi bakulupile bakwetu bena Kidishitu. Na dingi abitungu twikale kula na bantu basumbule lukumiino. Tatutadiilanga muntu sunga kintu kampanda, mpa na kukimba kuuka myanda ya bantu basumbule lukumino bwashi bitukakye kwabadi sunga kubofusha lukumiino lwetu. Wekele mupele kutemesha na kukwatshishena bantu basumbule lukumiino pabitale madimi abakwete kupalakasha su? Su mbyabya, lukumiino lobe lwibuwa. Anka abitungu twikale badimukye mwanda Satana kwete kufubisha ingi miteo. w19.11 15 ¶8; 16 ¶11

Nsaa ywata bitshibilo, taluula akikutakula. Yehowa akumina’shi twikale balulame mu myanda yoso. Byabya nsaa yatwata kitshibilo, abitungu twikale balulame kwatudi’twe banabene mpa na kwi bangi pabitale akitutakula bwa kwikyata. Su tatwi balulame abikala bukopo bwa kukumbasha byatudi bapwe kwakula. Bu kileshesho, ungi nsongwalume ekwata kitshibilo kya kwikala mbala-mashinda a myeshi yoso. Kunyima kwa mafuku, bibamwikela bukopo bwa kulombasha nsaa itekibwe bwa ba mbala-mashinda, mwanda wa byabya, baata kitshibilo kya kwiwimika. Ekwikala mupwandikishe pangi’shi kibamutakula bwa kwiwata nyi ndukalo lwa kusankisha Yehowa. Aku namu, pangi kabingilo kaye kakata nka kusankisha baledi baye sunga ungi muntu. Nangushena pa uno mwanda wa uno mulongi a Bible bata kitshibilo kya kuleka kutoma nfwanka. Dya kumpala, betatshisha bwa kuleka kutoma munda mwa lubingo lumune sunga ibidi, kadi babanga dingi kutoma. Na nfudilo a byoso, balekye kutoma! Kifulo kyaye bwa Yehowa na lukalo lwaye lwa kumusankisha, bibamukwasha bwa kukambila kyakya kyubishi.​—Kol. 1:10; 3:23. w19.11 27 ¶9; 29 ¶10

Mpoolo mutumiibwa baadi mushinkamishe’shi afudiisha lubilo lwaye na akumbasha kepatshila kaye. “Mu uno verse kishima ‘mwikelo’ akilesha ‘kukita myanda bu mwina eumbo’” Bu bibaadi mwina Kidishitu mwedibwe mwimu, baadi atengyela bwa kupeta “efuto dya lwitanyino lwa kwiulu lu’Efile Mukulu.” Anka bwa kukumbasha kaka kepatshila, badi mumone’shi abitungu atungunukye na ‘kusuuka lubilo.’ (Fid. 3:14, Esambi dipya 2015) Mpoolo baadi mufubishe kileshesho ki buwa bwa kukwasha bena Fidipe bwabadya kutuula binangu byabo ku kepatshila kaabo. Mpoolo baadi mutentekyeshe bena Fidipe bwa kibundji kyabo kya mwiyilu. (Fid. 3:20) Bwakinyi bibaadi abitungu’shi batentekyeshe byanka? Mu aa mafuku, bantu bebungi abaadi abakumiina kwikala bena Looma mwanda bibaadi na muulo kwabadi. Kadi, bena Kidishitu bedibwe mwimu abaadi na kyabo kibundji kikile buwa, akibapa myabi ikile bungi. Patupwandikisha kwikala mu mbulamatadi a mwiyilu na bwina Looma, kwikala mu mbulamata a mwiyilu nkukile! Lelo uno bena Kidishitu bedibwe mwimu mbekale kileshesho kibuwa, mwanda bakwete kusuuka batadiile ku kepatshila kabo ka kupeta muwa wa loso mwiyilu. w19.08 6 ¶14-15

Bwabwa bulungantu bubaadi buwa kukila bwabwa bubaadi mwina Isaleele apete mwifuku dya jibile! (Lv. 25:8-12) Bu kileshesho, muntu baadi apete bulungantu mwifuku dya jibile baadi mulombene kwikala dingi mpika, na baadi nka na kya kufwa. Mu kipwa kya 33 bino bipungo byetu (B.B.) mwifuku dya Pantekote, Yehowa baadi mwele batumiibwa na bangi balume na bakashi basha lulamato mwimu na kikudi kyaye. Baadi mwibakumiine bu bana baye bwashi pabasanguka bakamunane na Yesu mwiyilu. (Lom. 8:2, 15-17) Bano nyi bantu ba kumpala kwikasha bulungantu bubaadi Yesu mwakule mu kitumbwilo mu Nazarete. (Luk. 4:16-19, 21) Bano balume na bakashi tababaadi dingi ku bupika bwa malongyesha a madimi na miiya ya bakata ba bipwilo bya bena Yuuda ishii baadi Mwiyi dy’Efile Mukulu. Efile Mukulu tabaadi dingi ebamono bu balungantu ba mulwisho. Uno jibile a mu kifwanyi baadi mubangye na kwedibwa mwimu kwa balongi ba Kidishitu mu 33 B.B., akafudjila ku nfudilo kwa Bipwa Kinunu bya Kumunana kwa Yesu. w19.12 11 ¶11-12

Ba nambutwele, kwashayi bana benu bwabadya kusangula ba kuuku bebuwa. Abitungu’shi ba nambutwile baukye ba kuuku ba bana baabo na kyabakwete kukita. Kwamba’shi beukye babakwete kwisamba nabo ku Internete sunga ku telefone yabo. Mwanda ba kuuku mbalombene kwikala na bukitshishi bwibubi mu binangu na mu bikitshino bya bana. Baledi bebungi abakwashaa bana babo bwabadya kwikala abakisha nsaa na baaba be bu bileshesho bibuwa mu mufubo w’Efile Mukulu. Bu kileshesho, N’Déni na Bomine, ba mulume na mukashi ba mu Côte d’Ivoire, abaadi abetamina mukunkushi a kifunda bwadya kushala kwabo ku nshibo. N’Déni amba’shi: “Bibaadi na bukitshishi bwibuwa kwi mwan’etu mulume. Babangile kufuba bu mbala-mashinda na binobino kwete kufuba bu mukunkushi a kifunda mukwashi.” Su ba nambutwile babanga kulongyesha bana babo pabakii bakinga, nyi mwanda wi buwa bukile. (Nki. 22:6) Tubandeyi kutaluula kileshesho kya Timotee. Nyinaye Enise, na nyinaye kulu Loise abaadi bamulongyeshe “kubanga ku bukinga bwaye.”​—2 Tim. 1:5; 3:15. w19.12 25 ¶14; 26 ¶16-17

Twi kwambula Tishike pa kwikala kuuku a kukulupilwa. Bu kileshesho, pamutwe pa kulaa bakwetu balume na bakashi bwa kwibakitshina kintu kampanda nsaa yabadi mu lukalo, twikikite nka musango umune bwa kwibakwasha. (Mat. 5:37; Luk. 16:10) Nsaa ayiuku baaba be na lukalo lwa bukwashi’shi twi balombene kwibakwasha, abanyingishibwa ngofu. Ungi mukwetu mukashi amba’shi: “Twe mulombene kwikalakasha mwanda weuku’shi muntu akumiina nkukwasha ekala panka nsaa yadi mulee.” Baba boso abanyingiila lukalakashi kampanda abapetaa kusambibwa mwi ba kuuku ba kukulupilwa. Bwa kwikala kuuku a kukulupilwa, abitungu twikale na lwishinko. Nsaa ibabadi basukye Zhanna kwi mulume aye, baadi mupete kusambibwa pa kulungula lole aye a p’eshimba bibaadi apusha. Amba’shi: “Baadi antemesha na lwishinko loso, sunga mbinadi nakula mwanda umune misusa ibungi.” Nobe namu we kwikala kuuku ebuwa pa kwikala otemesha kalolo. w20.01 10-11 ¶9-11

Mu Bible, mwi bileshesho bibungi bya balume basha lukumiino babaadi bapete kikudi kiselele; anka, bashibadi bapete lukulupilo lwa kwenda mwiyilu. Daavide badi mukunkushibwe na kikudi kiselele. (1 Sam. 16:13) Kikudi kiselele kibadi kimukwashe bwa kupusha myanda ifwame ya Yehowa na kumukunkusha bwa kufunda mikanda ya mu Bible. (Mak. 12:36) Sunga mbyabya, Mpyeele mutumiibwa bakwile pabitale Daavide shi “taa mmukamine kwiyilu.” (Bik 2:34) Yowano mubatshishi baadi “muwule na kikudi kiselele.” (Luk. 1:13-16) Yesu bambile’shi takubadi muntu mukile Yowano, akupu bambile’shi Yowano t’ekala mu Bufumu bwa mwiyilu nya. (Mat. 11:10, 11) Yehowa badi mufube na kikudi kyaaye bwa kwibapa bukome bwa kukita bintu bya kukanya, anka tabadi mufube na kyakya kikudi bwa kwibasangula bwa’shi bekale na muwa mwiyilu. Nyi nkwamba’shi abadi na lukumiino lushaadile? Nya. Abilesha penda’shi Yehowa akebasangula bwa kwikala na muwa mu Mpaladiiso pa nsenga.​—Yo. 5:28, 29; Bik. 24:15. w20.01 25 ¶15

Yehowa mwitwitamine bwa kwikala mu kifuko kya balangwidi baaye. Mu kino kifuko mwi bantu belambule kwi Efile Mukulu be na lukumiino mu mulambu wa nkuulo wa Mwan’aye. Twi kifuko ki na muloo. Twi na nshalelo ebuwa binobino, na twi na muloo mwanda twibakulupile’shi atukekala na muwa wa looso byabikala mwiyilu, sunga mu Mpaladiiso pa nsenga. Yehowa bakitshine bya’shi twikale mu kifuko kyaye mwanda wa kifulo kyadi mwitufule ngofu. Anka bwa kwibikita badi mutushe kintu kikile bukata. (Yo. 3:16) Mbetuwule ku “muulo wi bukopo.” (1 Kod. 6:20) Ku bukwashi bwa nkuulo, Yehowa mwitupe mushindo wa kwikala mu kipwano kibuwa naaye. Twi na kineemo kya kwitamina Muntu mukile bantu boso mwiyilu na pa nsenga bu Nshetu. Na, Yehowa nyi Nshe-bana ebuwa. Anka bu bibadi byambe ungi mufundji a Bible, twi kwipusha’shi: “A kinyi kyankâlwisha Yehowa ku byabya byoso bi buwa byadi munkitshîne?” (Mis. 116:12, EEM) Lwalulo lwi’shi tatwi balombene kwalwisha Nshetu e mwiyilu kintu. Anka, kifulo kyadi mwitufule akitutakula mu kumufula namu. w20.02 8 ¶1-3