Mweshi wa 11

Lelo uno, bantu bebungi bakwete kwiata bu be na binangu, mbalombene kubepula binangu bya mu Bible pabitale kwiata na muulo. Mbalombene kupwandikisha’shi, su omona mungi muntu bu e kunundu koobe abakumwenenena. Kadi, nkipeta kinyi kitukile ku binangu bya kwitatula bya ndumbulwilo a Satana? Nkinyi kyodi mupwe kumona? Basha kwitatula be na muloo su? Be na muloo mu bifuko byabo na ba kuuku bebuwa su? Be mu kipwano kibuwa n’Efile Mukulu su? Muyiile byodi mumone, nkinyi akitusha bipeta bibuwa​—nkulonda binangu bya uno ndumbulwilo su nkulonda binangu by’Eyi dy’Efile Mukulu? (1 Kod. 3:19) Bantu abalondo binangu bya baba babamono kwi uno ndumbulwilo bu basha binangu, be nka bi bantu be mu mutamba abepusha benabo eshinda dya kwenda aku namu booso bwabo mbapwe kushimina. Yesu bambile pabitale “basha binangu” ba mu mafuku aye’shi: “Ba mpofu abakunkunkusha bampofu, su mpofu akunkusha mpofu, boso babidi abakapono mu bwina.” (Mat. 15:14) Eyendo, binangu bya ba pano nkulotakana ku meso kw’Efile Mukulu. w19.05 24-25 ¶14-16

Mu bipwa bishaale’mu, bungi bwa bantu abadi mukate na kutoma nfinyo ku Kitentekyesho mbukamine ku kipwa na kipwa. Bino mbilombene kwitukalakasha su? Nya. “Yehowa awuku bantu baaye.” (2 Tim. 2:19) Mu kwilekena na Yehowa, bakwetu ababadika bungi bwa bano abadi mukate na kutoma nfinyo ku Kitentekyesho tabauku’shi nnayi bedibwa mwimu binyibinyi nya. Byabya mu bwabwa bungi mwi bantu abapwandikisha’shi, mbedibwe mwimu aku namu ta nabyo. Bu kileshesho, bangi babaadi abadi mbalekye kunyima kwa mafuku. Bangi mbalombene kwikala na maladi a mu mutwe sunga ingi nkalakashi ya mu binangu ayibatakula mu kupwandikisha’shi abakamunana na Kidishitu mwiyilu. Eyendo’shi tatwiuku kalolo bungi bwa bedibwe mwimu bakii pa nsenga nya. Akukekala bedibwe mwimu pa nsenga nsaa ayikafiki Yesu bwa kwibaata bwa’shi bende mwiyilu. Bible amba’shi mu mafuku a ku nfudiilo, akwikala kasaka ka bedibwe mwimu kakii pa nsenga. (Kibaf. 12:17) Anka t’akula bungi bwa bedibwe mwimu abakekala pa nsenga nsaa ayikabanga mpombo ikata nya. w20.01 29-30 ¶11-13

Ku bukwashi bwa lukindji lwa mwana mushimine, Yesu baadi muleshe Yehowa byadi mufule bana baye. (Luk. 15:11-32) Mu lwalwa lukindji, nshe-bana baadi nka na lukulupilo’shi mwan’aye alukiila. Pabalukiile mwana ku nshibo, nshaye baadi mumukukile na muloo oso. Su tubaadi bakatukye kwi Yehowa kadi tubelanga, twikale bashinkamishe’shi Nshetu sha kifulo akumiina kwitukuukila. Nshetu akalumbuula bubi boso bwabadi bafwishe kwi Adame. Kunyima kwa Adame kutomboka, Yehowa batshile kitshibilo kya kusangula bantu 144 000 munkatshi mwa miilo, abakafubu bu ba nfumu na ba tshiite-mwakwidi mwiyilu na Mwan’aye. Mu nsenga ipya, Yesu na boso abakamunana naaye abakakwasha bantu basha kukookyela bwabadya kufika bantu bapwidikye. Kunyima kwa kutompibwa kwa nfudiilo, Efile Mukulu akebapa muwa wa loso. Nshetu akekala na muloo wa kumona nsenga ngiwule na bana baye bakashi na balume bapwidikye. Ayikekala nsaa ya muloo ukata! w20.02 6-7 ¶17-19

Oso a kwatudi e na kya kwiyipusha’shi: ‘Kushintuluka kwande bwa kufika mwina Kidishitu, nkutale penda byamweneka kwi bangi su ne mwina Kidishitu a binyibinyi mwishimba na mu binangu?’ Abitungu tuleshe kwilekeena. Mu mayi abaadi Yesu mwakule mu mukanda wa Mateo 12:43-45, Yesu balesheshe kyatudi balombene kukita. Ano mayi aetupa dilongyesha dikata: T’abitungu penda kukatusha binangu bibubi nya, abitungu tusuukye binangu byoso bishii mu kwipushena na by’Efile Mukulu. Twi balombene kwalula binangu byetu na kushintula bumuntu bwetu bufwame su? Eyi dy’Efile Mukulu adyalula’shi: “Nufwale muntu mupya mupangiibwe ku kifwatulo ky’Efile Mukulu mu bululame na bwiselele bwa mu biinyibiinyi.” (Ef. 4:24) Eyendo’shi, twi balombene kushintuluka, anka ta mbibofule bwa kwibikita nya. Abitungu twitatshishe bikata, kushii penda kukambila binangu bibubi na kuleka kwa kukita bibubi nya. Abitungu tushintuule “mpángo ya mu binangu” byetu. Bino abilesha kushintuula nkalo yetu, mwikeelo wetu na akitutakula mu kukita kintu kampanda. Bino abitekye kwitatshisha nsaa yooso. w19.06 9-10 ¶6-7

Yehowa bapushishe Loota lusa, atuma ba mikeyilu bwabadya kumupasha na kifuko kyaye. Kadi, Loota “banyengakananga.” Mikeyilu nkumukwata ku mboko bwa kumukwasha na kifuko kyaye bwa’shi basuukye mu dyadya eumbo. (Kib. 19:15, 16) Mikeyilu nkumulungula bwadya kusuukila ku myengye. Kadi pamutwe pa kukokyela akyamba Yehowa, Loota batekyele bwa kusuukila ku kibalo ki peepi. (Kib. 19:17-20) Na lwishinko looso, Yehowa baadi mutemeshe Loota na kumutadiila bwa kusuukila ku kyakya kibalo. Mafuku kunyima, Loota bapushishe moo wa kushala mu kyakya kibalo, aye nkwenda ku myengye, mbalo ibaadi Yehowa mumulungule kumpala bwadya kwikusuukila. (Kib. 19:30) Yehowa bamulesheshe lwishinko lukata! Nka bu Loota, mukwetu mwina Kidishitu mmulombene kwata kitshibilo ki bubi na kyamutwadila nkalakashi ibungi. Su byabya byakitshika, twi kukita kinyi? Pangi twi kubanga kwakula’shi kwete kuumbula bibaadi mukune, na nkya binyi. (Nga. 6:7) Kadi, bi kwikala bikile buwa su twamukwasha mu kipaso kibaadi Yehowa mukwashe Loota. w19.06 20-21 ¶3-5

Nsaa i beshikwanyi netu abakandika lulangwilo lwetu, abapwandjikisha’shi be kwitutshinyisha bwa kufubila Yehowa. Kukatusha byabya, abapalakasha myanda ya madimi pabitutale, abatumu basalayi mu mashibo etu, kwitutwala ku tumiladi sunga kwela bangi bakwatudi mu lukano. Abapwandikisa’shi atutshinyi mwanda wa’shi abaadi bele bangi bakwatudi mu lukano. Su twapusha moo bwa myanda yabakwete kwitukitshina, twibalombene kubofula sunga kwimika kufubila Yehowa. Tatukumiina kwikala bu baba bantu babadi bakwile mu mukanda wa Bena-Levi 26:36, 37. Tatulekanga moo bwaudya kwitubofusha sunga kwimika mudimo wetu bwa Yehowa. Atukulupila mwi Yehowa n’eshimba dyoso na kupela kutshina. (Yesh. 28:16) Tukimbe bukunkushi bwa Yehowa mu luteko. Atwiuku bino mwanda Efile Mukulu etukwasha, sunga mbulamatadi ya bantu yekala na bukome tangilombene kwitukutshishwa kulangwila Efile Mukulu etu na lulamato nya. Pamutwe pa kwitutshinyisha, bulwishi mbulombene kwitukwasha bwa kufubila Yehowa bikata. w19.07 9-10 ¶6-7

Sunga omona’shi mudimo obe taukwete kutusha bipeta bibuwa, tokutwanga lukulupilo lwa’shi opete muntu mukumbene kufika bu mulongi. Tentekyesha’shi Yesu badi mupwandikishe mudimo wa kufwisha bantu bu balongi na kuloba mishipa. Balobi ba mishipa mbalombene kukisha nsaa ibungi kumpala kwa kukwata mushipa. Misusa ibungi abalobaa mpa na bufuku sunga nakashika futuu, na ingi nsaa abendaa na bwato ku ma mbalo e kula. (Luk. 5:5) Bi mumune, bangi balungudi abakishaa nsaa ibungi na lwishinko looso bwa “kuloba” mu nsaa na mu ma mbalo elekene. Bwakinyi? Bwabadya kupeta bantu bebungi. Baba abafubu ngofu mu uno mushindo abapetaa bwedi pa kupeta bantu bebungi abakumiina mukandu w’atwibatwadila. We mulombene kutompa kulungula mu nsaa sunga mbalo yodya kupeta bantu su? Bwakinyi kulonga Bible na bantu akutekye kwikala na lwishinko? Kabingilo ka kumpala nka kukwasha bantu batukwete kulonga nabo Bible bwabadya kuuka na kufula malongyesha a mu Bible. Bibuwa twibakwashe bwabadya kuuka na kufula Yehowa, Sha Bible. w19.07 18-19 ¶14-15

Bangi ba kwatudi bakwete kulwa na binangu bya kwitopeka mwanda wa milwisho ibabakitshine kala. Su mbyabya, we kwata kitshibilo kya kwilongyela miisambo ayakwila mulambu wa nkuulo wa Kidishitu. Su atwilongyela, atunangushena na kuteka pabitale yaya miisambo ayinyingisha, twi balombene kukambila kwitopeka kwa bisumanga. Twi balombene kuleka kwinyooka atwe banabene pabitale milwisho yabadi bapwe kwitulekyeela kwi Yehowa. Tutaluuleyi kyatudi balombene kulongyela kwi Mpoolo. Bangi ba kwatudi be kwikala pangi balekye mudimo wabo ubabadi abebafutu bibuwa bwa kukita midimo ya Bufumu. Byabya, twi kuluba bintu bi kumongo pa kupela kunangushena dingi ku bintu bya ku mbidi byatubaadi balombene kupeta. (Mb. 11:4-6; Mul. 7:10) ‘Bintu bi kumongo’ mbitale dingi myanda yatudi bakite mu mufubo wa Yehowa, sunga nkalakashi yatubadi bafumankane nayo kala. Eyendo, kunangushena kipaso kibaadi Yehowa mwitwelele myabi na mwitukwatshishene munda mwa bipwa bibungi, akwitukwasha bwatudya kwifubwila peepi na Nshetu. Nyi bwakinyi, tatukumiina kunangushena’shi tubapu kufubila Yehowa bibungi na bibalombana nya.​—1 Kod. 15:58. w19.08 3 ¶5-6

Twi balombene kwifubwila kwi Efile Mukulu na kaneemo kooso, nsaa yoso yatukumiina sunga twekala mbalo kinyi. Takutwaa nsaa ya kwituteemesha; ateemeshaa nteko yetu nsaa yoso. P’atushinguula’shi Yehowa ateemesha nteko yetu, atumufulu ngofu. Mufundji a misambo bambile’shi: “Ne mufule Yehowa, mwanda ateemesha kwidila kwande.” (Mis. 116:1) Nsheetu t’ateemeshaa penda nteko yetu nya; alulaa ku yanka. Yowano mutumiibwa etushinkamiisha’shi: “Su twamuteka kintu muyiile kukumiina kwaye [Efile Mukulu] aye eetuteemesha.” (1 Yo. 5:14, 15) Eyendo’shi, Yehowa ta mukumbene kwaluula nteko yetu mu mushindo watupwandikisha nya. Auku kyakya ki buwa bwetu, nyi bwakinyi ingi nsaa t’aluulaa sunga akumiina’shi tutengyele. (2 Kod. 12:7-9) Yehowa alombashaa nkalo yetu. Akitaa kyakya kitekibwe kwi nshe-bana ooso. (1 Tim. 5:8) Apeyaa bana baye bintu byabadi nabyo lukalo bwa kwikala na muwa. T’akumiinaa’shi twikalakashe bwa bidibwa, bilamba, sunga mbalo ya kulaala. (Mat. 6:32, 33; 7:11) Bu byadi muledi sha kifulo, Yehowa mwate mpa na mpángo ya kulombasha nkalo yetu mu mafuku e kumpala. w20.02 5 ¶10-12

Ta mbooso bena lukulupilo lwa kwenda mwiyilu bekale “mpika a lulamato na mudimukye” nya. (Mat. 24:45-47) Anka bu byabibaadi mu siekele a kumpala, Yehowa na Yesu lelo uno, bakwete kufuba na ndambo ya bakwetu bwa kudiisha, sunga kulongyesha, bantu bebungi. Anka penda ndambo ipeela ya bena Kidishitu bedibwe mwimu ba mu siekele a kumpala nyi, babaabadi bafube nabo bwa kufunda Bifundwe bya kina Greke bya bena Kidishitu. Lelo uno, nka penda ndambo ya bena Kidishitu bedibwe mwimu, nyi be na bushito bwa kupa mwilo w’Efile Mukulu “bidibwa pa nsaa ilombane.” Yehowa mwate kitshibilo kya kupa bantu bebungi muwa wa ikalaika pa nsenga na kupa bantu bapeela abakamunana na Yesu muwa mwiyilu. Yehowa apa bafubi baaye booso bwedi “mwina Yuuda” mpa na “bantu ekumi” ebatekye dingi bwabadya kukookyela miiya imune na kushaala na lulamato. (Sek. 8:23) Booso bwabo abitungu bekale beyishe. Abitungu’shi booso bamufubile pamune mu buumune. Booso abitungu bakite mwabo mooso bwa kulama butaale mu kakongye. Bu by’atwifubwila peepi na nfudiilo, tutungunukyeyi na kufubila Yehowa na kulonda Kidishitu bu “loombe lumune.” w20.01 31 ¶15-16

Tatwi balombene kukuminyisha bena kifuko netu mukandu wibuwa pa bukopo, anka twibalombene kwibakwasha bwabadya kufungula binangu na mashimba aabo ku mukandu wa mu Bible. (2 Tim. 3:14, 15) Ikala na mwikelo wibuwa. Misusa ibungi, mwina kifuko netu alaminaa byatukitshi pe byatwakula. Tungunuka na kukwasha bena kifuko nobe. Yehowa mwitulekyele kileshesho kibuwa. ‘Kushi kukooka,’ kwete kupa bantu boso mushindo wa kukumiina mukandu wibuwa bwa kupeta muwa. (Yel. 44:4) Mpoolo mutumiibwa balungwile Timote bwadya kutungunuka na kukwasha bangi. Bwakinyi? Mwanda pa kukita byabya, epaasha aye nabene na bantu abamutemesha. (1 Tim. 4:16) Twibafule bena kifuko kyetu, byabya atukumiina’shi bewukye bya binyibinyi bi mu Eyi dy’Efile Mukulu. w19.08 14 ¶2; 16-17 ¶8-9

Bibuwa tushinguule’shi su muntu baata nsaa ya kwitupa elango, pangi twi bakite kilubilo kyatushii batundule. Nsaa y’abetupa elango binangu abitufwilaa bwa mususa wa kumpala mbya kwidipela. Twi balombeene kubanga kutopeka yawa betupa elango sunga kutopeka bibakula. Anka su twibeyishe, atwitatshisha bwa kwikala na mweneno ebuwa. Muntu sha kwiyisha atambulaa elango. Twate kileshesho: Banda kupwandikisha’shi we ku bisangilo bya bena Kidishitu. Kunyima kwa kwisamba na bakwetu bebungi, umune a kwabadi bakukaka ku lupese bwa nkulesha’shi kwi kantu kakupatame mu meno. Kushi mpaka, we mukumbene kupusha buufu. Twe mulombene kusangala mwanda bakulungula byabya su? Eyendo’shi bodya kupusha buwa su kwikele muntu mukuleshe byanka kubanga ku mbangilo! Bi mumune, bibuwa tusangale nsaa ayinyingi mukwetu eshimba bwa kufika mu kwitupa elango nsaa yatudi nadyo lukalo. Yawa muntu atumwata bu kuuku, kushii bu mwishikwanyi netu.​—Nki. 27:6; Nga. 4:16. w19.09 5 ¶11-12

Yehowa mupe nyina bana oso bushito bukata mu kifuko, na mumupe angi matalwa kwi bana. Abikitshi nyina bana na byakula bi na bukitshishi kwi bana baaye munda mwa mafuku abo oso a muwa. (Nki. 22:6) Tala kilombene ba nyina bana kulongyela kwi Maariya, nyinaye na Yesu. Maariya badi auku Bifundwe kalolo. Badi na kanemo kakata kwi Yehowa na bukuuku bwibuwa naaye. Badi akumiina kukita akikyebe Yehowa, sunga mbibadi abitungu kushintuluka kampanda mu nshalelo aaye. (Luk. 1:35-38, 46-55) Anwe ba nyina bana, nwi bakumbeene kwambula Maariya mu mishindo ibungi. Naminyi? Wa kumpala, mpa kulama kipwano kyenu na Yehowa ku bukwashi bwa kwilongyela Bible na kwela kwa nteko pa bupenka. Wa kabidi, pa kukumiina kushintuula ingi myanda mu nshalelo enu bwa kusangasha Yehowa. w19.09 18 ¶17-19

Yowano baadi mumone kimonwa pabitale mafuku aafiki. Mu kyakya kimonwa, mwikeyilu bamulungwile pabitale ba mikeyilu bananka abakakwata mpapi ya mu mpombo ikata mpa na pabakele kisaka kya bapika bitampi. (Kibaf. 7:1-3) Kino kisaka nkya bantu 144 000 abakamunana na Yesu mwiyilu. (Luk. 12:32; Kibaf. 7:4) Akupu Yowano alesha kingi kisaka kikile bukata na kukanya’shi: ‘Talayi!’ nkishima akilesha bibaadi mukanye pa kumona kintu kyashapwadjikishanga. Yowano bamwene kinyi? “Kibumbu kikata kishibaadi bia muntu kubala, ba kwiumbo dioso na kisaamba [kioso] na mwiilo na ndjimi [yoso], nkiimane kumpala kwa lupuna nsulu na kumpala kwa Mwana a mukooko.” (Kibaf. 7:9-14, Kilombeeno kipya 2014) Yowano baadi pangi na muloo wa kumona’shi mu mafuku aafiki, akukekala midiyala ya bantu abalangwila Efile Mukulu mushindo wibuwa. Kushi mpaka, kino kimonwa kibaadi kinyingishe lukumiino lwa Yowano. Kino kimonwa akinyigisha lukumiino lwetu bikishekishe ano mafuku akikwete kulombana. Mu ano mafuku etu, midiyo ya bantu ababanga kulangwila Yehowa na lukulupilo lwa kupanda ku mpombo ikata na kushala loso pa nsenga. w19.09 26 ¶2-3

Banda kunangushena’shi bakunkushi ba pa nsenga abele musase wabatengyelanga ngofu wa “butaale na kwiyikeela.” Abakapwandikisha’shi mu nsenga mubatwele butaale bush’ekele kwanka. Maumbo aakakitshi byashi tunangushene’shi be na ngobesha ya kupudisha myanda ya bantu. Aku namu tabe na ngobesha ya kupudisha kyakya akikyebe kukitshika! “Babilone Mukata” akabutudibwa! (Kibaf. 17:5, 15-18) “Efile Mukulu [akatuulu] mu mashimba aabo bwa kutimikila kinangu kiaye.” Kyakya kinangu akilesha kinyi? Akilesha kabutu ka bipwilo bya madimi. Efile Mukulu akatuulu kinangu kyaye mu mashimba a “nsengwa ekumi” ya “nyema moonga.” Nsengwa ekumi ayilesha mbulamatadi yoso ikwete kukwatshishena “nyema” kwamba’shi Nations Unies. (Kibaf. 17:3, 11-13; 18:8) Nsaa yabakaluulukila bipwilo bya madimi kwi mbulamatadi, nyi kitundwilo kya’shi mpombo ikata ibabanga. Abikekala kabasamushi na mmwanda aukakwatshisha bantu boso ba pa nsenga moo. w19.10 14 ¶1, 3

Mu siekele a kumpala, Dyotrefese badi akwatshila baba abadi abakunkusha kakongye ka bena Kidishitu kyutu. Badi akumiina kwikala pa “mbalo ya kineemo” munkatshi mwa bena kakongye, paapa aye nkupalakasha myanda ya madimi bwa kulwisha nkumo ya Yowano mutumiibwa na bangi bakwetu. (3 Yo. 10) Sunga tatukumiina kukita kibaadi Dyotrefese mukite, twi balombene kukwatshila bena Kidishitu abapete mashito atukulupilanga kupeta kyutu bikishekishe su atupusha’shi atwe nyi balombene kwiukita kalolo kukila ungi muntu sunga akita naminyi. Kyutu kii nka bu mutshi wa bulembe. Su ntete yakyo yamena mwishimba dyetu, bi kwikala bukopo bwa kwiyitukula. Binangu bi bubi, kwitatula, lwabi na kukutwa kwa lwishinko nkulombene kutamisha kyutu. Kyutu nkilombene kukutshishwa muntu kulesha ngikashi ibuwa bu kifulo, lusa, na kalolo. Nsaa yoso yatumono kyutu kibabanga kumena mishi mwatudi, bibuwa twikitukule mu mashimba etu. w20.02 15 ¶6-7

Mpoolo mutumiibwa baadi akyebe kulesha’shi baadi alu na lukalakashi kampanda. Baadi mwitamine luno lukalakashi bu “mukendji utumwe na Satana” ubaadi autungunuka na ‘kumumwesha malwa.’ Pangi Satana sunga ba demo baye tababaadi abafwishila Mpoolo nkalakashi i bu kumutunga mulobo mu mbidi mususa umune nya. Kadi, bino bikudi bibi bibaadi bimone “mulobo,” na abyo nkutungunuka na kwiufiinyika mu mbidi, kwamba’shi kutamisha busungu bwa Mpoolo. Mpoolo bakitshine kinyi? Kya kumpala, Mpoolo baadi akyebe’shi bamukatushe wawa “mulobo.” Amba’shi: “Misusa isatu, ami nkuteka Mwanana [Yehowa] bwa kukatusha wawa mwanda kwandi.” Anka, sunga mbibadi Mpoolo mwele nteko, mulobo ubaadi nka mu mbidi. Bino abilesha’shi Yehowa tabaadi mwaluule ku nteko ya Mpoolo su? Nya. Baadi mwaluule. Yehowa tabaadi mukatushe lukalakashi nya, kadi baadi mupe Mpoolo bukome bwa kwilunyingiila. Yehowa bambile’shi: “Bukome bwande abwileesha mu kubofula.” (2 Kod. 12:8, 9) Ku bukwashi bw’Efile Mukulu, Mpoolo baadi mulame muloo na kufukama kwaye kwa mwishimba!​—Fid. 4:4-7. w19.11 9 ¶4-5

Abitungu tulamate nka kwi Yehowa mwanda aye ngi Mupangi eetu na Etupeyaa muwa. (Kibaf. 4:11) Anka twi na lukalakashi. Sunga byatudi bafule Yehowa na kumunemeka, twi kudimbibwa na kukutwa kumulamata penda aye. Mu Bible, kulamata penda kwi Efile Mukulu akulesha kumufula bikata. Nsaa yatudi balamate nka penda kwi Yehowa, atumulangwila nka penda aye. Tatutadiila muntu su ngumune sunga kintu kampanda kyate mbalo yaye. (Efi. 34:14) Tatwi balamate kwi Yehowa bulamatelamate nya. Bwakinyi? Mwanda lulamato lwetu ndwimene pa myanda yatudi balongye pabimutale. Twibasankile ngikashi yaye. Atuuku myanda yadi mufule na yadi mushikwe. Atuuku na atukwatshishena mpángo yaye bwa bantu. Twi na kineemo kya kwikala bu ba kuuku baye. (Mis. 25:14) Myanda yoso yatudi balongye pabitale Mupangi eetu ayitukwasha bwa kwifubwila peepi naye.​—Shak. 4:8. w19.10 26 ¶1-3

Lelo uno, bakwetu balume na bakashi be na nkalakashi ilekenelekene. Bu kileshesho, bebungi bakwete kukyenga mwanda wa masaku aatukila ku bipangwa sunga kwi bana ba bantu. Nsaa ayituku ino myanda, bangi mbalombene kwikala na ngobesha ya kutula bano ba kuuku ku mashibo aabo. Bangi bekutusha ekuta. Kadi atwe boso twi balombene kuteka Yehowa bwadya kukwasha bakwetu bena Kidishitu. Nsaa yatupusha’shi mukwetu mwina Kidishitu mmubofule kwishimba, twi kukutwa kya kwakula sunga kya kukita. Kadi sunga mbyabya, oso akwatudi mulombene kukita kintu kampanda. Bu kileshesho, Twibalombene kukisha nsaa nabo. Twibalombene kwibateemesha kalolo nsaa y’abakula. Na twibalombene kwibalungula pabitale kifundwe akitukwashaa. (Yesh. 50:4) Mwanda wi na muulo, nkwikala nabo nsaa yabaadi nobe lukalo. Abitungu twikale na kitshibilo kya kunyingisha kipwano kyetu na bakwetu balume na bakashi kubanga binobino. Kino kipwano takitukwasha penda kuno ku nfudiilo kwa nsenga nya, anka bwa looso! w19.11 7 ¶18-19

Abaadi abatusha uno mulambu ku kikyebe ky’eshimba dyabo mwanda abaadi bafule Efile Mukulu, Yehowa. Muntu baadi atusha mulambu bwaye, bwa kifuko kyaye na ba tshite-mwakwidi abaadi abadi mwita wa nyema ababaadi abalambula. Anka bingi bipindji bya nyema abaadi abebipa nka penda Yehowa. Mbipindji kinyi? Yehowa baadi amono’shi kipindji ki mwimu kya nyema nyi ki buwa. Baadi dingi mwambe’shi bingi bipindji bya nyema bu nfiyo, bibaadi na muulo ngofu. (Lv. 3:6, 12, 14-16) Yehowa baadi asangala nsaa ibaadi bena Isaleele abalambula bino bipindji bya nyema. Mwina Isaleele baadi alambula bino bipindji, baadi alesha lukalo lwaye lwa kutusha bi na muulo bwa Yehowa. Mu mushindo umune, Yesu baadi mulambule Yehowa bintu byaye bya muulo pa kumufubila n’eshimba dyaye dyoso, mwanda wa kifulo kibaadi nakyo bwa Nshaye. (Yo. 14:31) Bwa Yesu, kukita kikyebe ky’eshimba dy’Efile Mukulu kubaadi mwanda wa muloo. (Mis. 40:9) Yehowa baadi na muloo pa kumona Yesu amufubila mu kukyeba kwaye. w19.11 22-23 ¶9-10

Eyi dy’Efile Mukulu adyamba’shi kunyima kwa “mafuku” asamombo a bupangi, Efile Mukulu bayikiishe ku mifubo ibaadi akitshi pa nsenga. (Kib. 2:2) Kadi, Yehowa mmufule mudimo, na mu ingi mishindo “kyafubu mpa na lelo uno.” (Yo. 5:17) Yehowa bafubile munda mwa mafuku asamombo, aye nkwikisha p’efuku dya musambo na alungula bena Isaleele namu bwabadya kwikisha mwifuku dya musambo. Efile Mukulu bambile’shi Sabato ibaadi bu kitundwilo pankatshi paye na bena Isaleele. (Efi. 31:12-14) Muntu su ngumune tabaadi mulombene kufuba, mwana, mpika sunga nyema ya kudima nayo. (Efi. 20:10) Bino bibaadi abikwasha bantu bwabadya kutuula binangu byabo ku myanda ya mu kikudi. Efuku dya Sabato dibaadi buwa bukile bwa mwilo wa Yehowa; anka, bakata ba bipwilo be bungi ba mu mafuku a Yesu abaadi bele miiya ikilekile pabitale Sabato. Abaadi abamba’shi bibaadi bubi kupuula ntete ya kudya sunga kubuka muntu e na maladi mwifuku dya Sabato. (Mak. 2:23-27; 3:2-5) Yawa mweneno baadi mwilekene na a Yehowa, dingi Yesu baadi mwibileshe patooka kwi bantu abaadi abamutemesha. w19.12 3-4 ¶8-9

Nsaa yatunyisha kulonga pabitale ngikashi ya Yehowa, atunyisha kwikala na ngobesha ya kwambula ngikashi yaye. Daavide baadi mwiukye Yehowa kalolo, nyi bwakinyi baadi na ngobesha ya Kumwambula mu nsahalelo aye na bangi. Mwanda Daavide baadi mu kipwano kibuwa na Yehowa, bena Isaleele abaadi bamufule ngofu, na Yehowa baadi mu mufubishe bu kileshesho kibuwa bwa bangi ba nfumu ba mu Isaleele. (1 Bf. 15:11; 2 Bf. 14:1-3) Bino abitulongyesha kinyi? Abitungu ‘twambule Efile Mukulu.’ Nsaa yatwambula ngikashi yaaye, atulesha binyibinyi’shi twi bana baye. (Ef. 4:24) Tatwi balombene kwimika kulonga pabitale Yehowa nya. (Mul. 3:11) Kintu ki na muulo ta mbungi bwa myanda yatuuku pabimutale nya, kadi nkyatukitshi na yaya yatuuku. Su twatumikila myanda yatulongo na kwambula Nshetu sha kifulo, atungunuka na kwifubwila peepi netu. (Shak. 4:8) Ku bukwashi bw’Eyi dyaye, etushinkamiisha’shi takasumbushena baaba abamukimbi. w19.12 20 ¶20; 21 ¶21, 23

Yaakobo baadi mufule bana baye balume boso, anka badi mufule Yoosefe mwan’aye badi na bipwa 17 ngofu. Bakwabo na Yoosefe abamwene byanka naminyi? Abambangile kumukwatshila kyutu, kyebatakula mu kumushikwa. Sunga mbyabya, babaadi bapaane Yoosefe mu bupika, abo nkudimba nshaaye’shi nyema a bukyelo bayipaa mwan’aye mulume. Kyutu kibalwishishe kufukama kubadi mu kifuko na abo nkwinyongosha nshaabo. (Kib. 37:3, 4, 27-34) Kyutu mbekiteemune mu “mifubo ya mbidi” ikumbene kukutshishwa muntu kutwela mu Bufumu bw’Efile Mukulu. (Nga. 5:19-21) Kyutu nyi mushi autushaa bikuba bibi bu kwikakena, mushikwa, na nsungu ikile. Kileshesho kya bakwabo na Yoosefe akilesha mushindo ukumbeene kyutu kulwisha kipwano na kufukama mu kifuko. Sunga tatwi bakumbene kukita bibakitshine bakwabo na Yoosefe, atwe boso twi na mashimba akutwe kupwidika na alamalama. Banda kunangushena bwakinyi ingi nsaa twi balombene kukwatshila bangi kyutu. w20.02 14 ¶1-3

Ungi mususa, Yehowa batshile ndambo ya kikudi kiselele kwi Moyiise, aye nkwikipa kisaka kya bakulu ba mu Isalele babadi bemane peepi na nshibo ya kwibungila. Kunyima kwa kapindji kapeela, Moyiise bapushishe’shi bakulu babidi bashibadi ku nshibo ya kwibungila, nnabo namu babapete kikudi kiselele na ababanga kwakula bu batemuki. Bakitshine kinyi pabafikile Yooshwa amuteka bwa kutosha baba bakulu babidi? Moyiise tabadi mwibakwatshile kyutu bwa bukwashi bwa Yehowa bubabapetele nya. Anka, na kwiyisha kooso badi musankye nabo bwa bushito bubabapetele. (Mb. 11:24-29) Ndilongyesha kinyi dyatulongyela kwi Moyiise? Su we mukulu, tababadi bakutekye bwa kulongyesha mungi byadya kukita mudimo odi nao na odi mufule ngofu su? Su we na kwiyisha bu Moyiise, twe mulombene kupusha bubi su bakuteka bwa kulongyesha mungi mukwetu bwashi, ungi mususa ekale na mushindo wa kwiukita. Wekala na muloo wa kukwasha mukwenu. w20.02 15 ¶9; 17 ¶10-11

Mukumbo ngolumbene kulwisha binangu byetu. Mbilombene kwitukalakasha nsaa yatumono’shi bangi abauku mwanda watudi nao na’shi abitungu kukulupila kwabadi bwashi betukwashe. Sunga’shi bangi tabauku mukumbo watudi nao, twi kwikala atupusha bufu mwanda wa’shi tatwi dingi na kya kukita. Yaya nsaa, Yehowa etunyingisha. Mushindo kinyi? Mu Bible, Yehowa mmwimufundjiishe mayi ebuwa aetutentekyesha’shi twi na muulo sunga twekala na mukumbo. (Mis. 31:20; 41:3) Kubukwashi bwa aa mayi ayokyelwe a Efile Mukulu, Yehowa etukwasha bwa kumona bya kukambila binangu bibubi abitutwadila mukumbo. Ikala mushinkamishe’shi Yehowa auku lukalakashi lodi nalo. Mutekye bwashi akukwashe wekale na mweneno ebuwa a nshalelo oobe. Akupu, badika Bible bwa kumona mayi ebuwa abadi bakufundjile kwi Yehowa. Taluula bifundwe abilesha mushindo awataa Yehowa bafubi baye na muulo. Su okita byabya, omono’shi Yehowa e buwa kwi boso abamufubila na lulamato.​—Mis. 84:11. w20.01 15-16 ¶9-10; 17 ¶12

Isaake badi muntu sha bupeta, bena Filistine abadi abamukwatshila kyutu bwa bupeta bwaye. (Kib. 26:12-14) Babaadi mpa na bashikye meena a meema abaadi abundule Isaake bwa kutomesha nyema yaaye. (Kib. 26:15, 16, 27) Anka bu bena Filistine, bangi bantu lelo uno bakwete kukwatshila baba be na bintu bya ku mbidi bikile byabo kyutu. Tabe na penda lukalo lwa bintu bya bangi nya, anka t’abakumiina’shi baba bantu bekale na byabya bintu nya. Bakata ba bipwilo ba bena Yuuda abadi abakwatshila Yesu kyutu mwanda bantu bebungi babadi bamufule ngofu. (Mat. 7:28, 29) Yesu badi alesha mpala y’Efile Mukulu, na badi alongyesha bya binyibinyi. Sunga mbyabya, bano bakata ba bipwilo babadi bapalakashe myanda ya madimi bwa kulwisha eshina dibuwa dya Yesu. (Mak. 15:10; Yo. 11:47, 48; 12:12, 13, 19) Uno mwanda awitulongyesha kinyi? Abitungu tulwe na binangu byoso abitutakula mu kukwatshila bangi kyutu mwanda wa ngikashi yabo yabasangeela mu kakongye. Pamutwe wa kwibakwatshila kyutu, abitungu twambule ngikashi yaabo.​—1 Kod. 11:1. w20.02 15 ¶4-5

Banda kunangushena’shi we mwiumbo dya Perse kubapu kukila bipwa 2 500, na we na lukalo lwa kwisamba na nfumu. Twe na mushindo wa kutwela kwi nfumu kushi’be kupeta matalwa nya. Su otwela kwashi mukupe matalwa, abakwipa! Twi na lutumbu lukata kwi Yehowa mwanda aye te bu nfumu a mu Perse nya! Akumiina’shi twikale atwisamba naye nsaa yoso yatukumiina. Bu kileshesho, sunga mbyadi na myasu ikata ya bu Mupangi mukata, Sha-bukome boso, Mwanana na Mfumu, etutekye bwashi twisambe naye abikalaa bena kifuko, pa kumwitamina bu “Yaya.” (Mat. 6:9) Nyi mwanda wa muloo pa kumona’shi Yehowa akumiina’shi twifubwile peepi naye mu wawa mushindo! Kwitamina Yehowa bu “Yaya” nkulombane mwanda aye ngi mwitupe muwa. (Mis. 36:10) Bu byadi Nshetu, twi na kitungo kya kumukokyela. Nsaa yatumukokyela, etwelela myabi ikile bungi. (Eb. 12:9) Mu yaya myabi, mwi mpa na muwa wa loso, bya bikala mwiyilu sunga pa nsenga. w20.02 2 ¶1-3

Kepatshila ketu nka kukwasha mulongi eetu a Bible bwadya kutama mu kikudi. (Ef. 4:13) Nsaa ayikumiina muntu bwa kulonga Bible, ekwikala eyipusha bukwashi bwapetela mu kwakwa kulonga. Apende na kutama kifulo kyaye bwa Yehowa, e kubanga kunangushena pabitale byadi mulombene kukwasha bangi, mpa na baaba be mu kakongye. (Mat. 22:37-39) Su kwi mushindo, twealashenanga pa kumulungula mwabi wa kukwatshishena mudimo wa Bufumu na makuta. Longyesha mulongi oobe a Bible kyadya kukita nsaa ayituuku myanda. Bu kileshesho, banda kunangushena’shi mulongi oobe, mmulungudi shii mubande kubatshishibwa, bakulungula’shi kwi muntu bamukokosha mu kakongye. Pamutwe pa kulamata ku lupese lwaye, we kumulungula akyamba Bifundwe. E kufwila yawa mukwetu lusa, sunga’shi su amono’shi t’obesha kutadiila wawa mwanda, e kwisamba na yawa mukwetu na kalolo koso na kifulo na kepatshila ka ‘kulombana naye.’ (Tala Mateo 18:15.) Kwasha mulongi oobe bwadya kulumbuula myanda yakakula. w20.01 5-6 ¶14-15

Atulesha’shi atukumiina lusa lwa Yehowa nsaa yatwele nteko, yatukumiina dinyoka, na yatukitshi mwetu moso bwa kupela kukita dingi wawa mulwisho. Su tubakitshi bino, atupetuula butaale bwa kwishimba. Abitunyingisha pa kuuka’shi: “Yehowa ee peepi naa bee na mashimba eenyongole, dingi apaasha bee mu mpombo.” (Mis. 34:19) Bu byatubefubwila ngofu mu mafuku a nfudiilo, myanda ayifwisha twinyongoshi ikwete kufwima. Nsaa yopusha kenyongoshi, ela luteko musango umune kwi Yehowa bwadya nkukwasha. Elongyele Bible ngofu. Longyela ku kileshesho kya Aana, Mpoolo mutumiibwa, na Mfumu Daavide. Teka Nshobe e mwiyilu bwadya nkukwasha otundule nsulo ya kinyongwa kyobe. (Mis. 139:23) Mutadile atwale bushito boobe, bikishekishe bwabwa boshii na mushindo wa kutwala. Su bokitshi byabya, wekala nka bu mufundji a misambo bayimbile pabitale Yehowa shi: “Pabamonanga mpombo iilekeene, naapetanga mulòo wa kunyingisha kwobe.”​—Mis. 94:19. w20.02 24 ¶17; 25 ¶20-21

Kishima ‘kuyokyelwa kwi Efile Mukulu’ kya mu kina Greke akipushisha’shi “Efile Mukulu mmwele.” Efile Mukulu baadi mufubishe kikudi kyaye bwa “kwela” binangu byaye mu mitwe ya bafundji ba Bible. Nsaa yatubadika Bible na ku nangushena pa byatubadika, binangu by’Efile Mukulu abitwele mu binangu byetu na mu mashimba eetu. Bino binangu biyokyelwe abitutakula mu kushintuula nshalelo etu na kukita kikyebe ky’eshimba dy’Efile Mukulu. (Eb. 4:12) Bwa kupeta bukwashi bwa kikudi kiselele, abitungu twate nsaa ya kwilongyela Bible nsaa yoso na kunangushena pa byatubadika. Paapa Eyi dy’Efile Mukulu adikala na bukitshishi mu byoso by’atwakula na by’atukitshi. Abitungu dingi tulangwile Efile Mukulu pamune na bakwetu bena Kidishitu. (Mis. 22:23) Kikudi kya Yehowa akikalaa netu nsaa yatudi mu bisangilo byetu bya bena Kidishitu. (Kibaf. 2:29) Mwanda nsaa yatwibungaa na bakwetu bena Kidishitu, atutekaa bukwashi bwa kikudi kiselele, atuyimbaa ngono yatshibwe mw’Eyi dy’Efile Mukulu, na atutemeshaa malango a mu Bible abatushaa kwi bakwetu balume babaadi basangule kwi kikudi kiselele. Bwa kupeta bukwashi bwa kikudi kiselele, abitungu tulumbuule ngaluulo ya kutusha mu bisangilo. w19.11 11 ¶13-14