Mweshi wa 10

Tukwete kumona bishinkamisho bikata abilesha’shi Yehowa kwete kulama bantu baye lelo uno. Banda kunangushena: Tukwete kulongyesha bya binyibinyi mu mbalo yooso pa nsenga. (Mat. 28:19, 20) Atwende na kutuusha midimo yoso ibubi ya Diabulu patoka. Su Satana ekala na bukome, badya kwimika mudimo wetu, kadi ta mwibikite nya. Byabya tatukumanga kutshina bikudi bibi nya. Su twi na lulamato kwi Yehowa, ba demo ta mbalombene kwitukita kintu ki bubi bwa looso nya. Anka, atwe boso abitungu tukambile bikudi bibi na kukulupila mwi Yehowa. Su tubakitshi byabya, atupete myabi ibungi, na atushikwa kupambushibwa na madimi a Satana. Dingi, tatutadila moo wa ba demo witukutshishwe kufubila Yehowa. Kukila byooso, atunyingisha kipwano kyetu na Yehowa. Mulongi Shaake bafundile’shi: “Bwindwilai Kafilefile, ê namu akenusûku kula. Efubwilei pepi n’Efile Mukulu, ê namu akefubwila pepi nenu.”​—Shak. 4:7, 8, EEM. w19.04 24 ¶15; 25 ¶18

Bana nyi nkya buntu kya kishila akifiki kwi Efile Mukulu, “nkya buntu kya Yehowa.” Ba namubutwile nwi na bushito bwa kwibakalwila. Abitungu nukite kinyi bwa kukalwila bana bwashi tabebalwishanga na myanda ibutete? Wa kumpala, Longa myanda itale kulwisha bana na myanda ibutete. Kimba bya kuuka kalolo bantu abalwishaa bana na myanda ibutete na mayele abafubishaa bwa kwibadimba. Ikala mupasukye bwa kutundula bantu babi. (Nki. 22:3; 24:3) Tentekyeshayi’shi, bantu abakambaa kulwisha bana na myanda ibutete, mbantu babauku kwi bana na babadi baubiile. Wa kabidi, Ikala wesamba na bana bobe kalolo. (Miy. 6:6, 7; Shak. 1:19) Uuka shi, mwana abadi balwishe na myanda ibutete takumiinaa kulungula muntu. E kwikala atshinyi’shi takwi muntu e kukumiina shi byakula mbya binyibinyi, sunga’shi muntu mumulwishe e kwikala mumulungule’shi, su alungula muntu amukitshi kintu kibubi. Su opusha bu’shi nkukitshikye mwanda wi bubi, mwele nkonko na kalolo koso na omuteemeshe kalolo kyoso ky’akula. Wa kasatu, Longyesha bana bobe. Ebalungule kyabadi balombene kwakula na kukita su muntu atompa kwibakuma mu kipaso kishii buwa. w19.05 13 ¶19-22

Bwakinyi Yehowa mmushikwe sha-kwitatula? Mwanda baaba basha kwitatula bakwete kwiata na muulo ukilekile aulesha kwitatula kwa Satana. Banda kunangushena, Satana apwandikishanga shi Yesu aye ababadi bafube naye kwi Efile Mukulu bwa kupanga bintu byoso mmulombene kumukunamina na kumulangwila! (Mat. 4:8, 9; Kol. 1:15, 16) Baba bantu abeata na kinemo kikilekile abalesha binyibinyi shi, binangu bya pa nsenga nkulootakana ku meeso kw’Efile Mukulu. (1 Kod. 3:19) Bible etukwasha bwatudya kwikala na nkatshinkatshi pabitale kwifula atwe banabene. Anka, amba shi, kwifula atwe banabene mu kipaso kilombane takwi bubi nya. Yesu bambile shi: ‘Fula muntu noobe buu’be nabene,’ abilesha shi abitungu twikale na nkatshinkatshi pabitale nkalo yetu. (Mat. 19:19) Byabya, Bible t’etulongyesha’shi twikale atwiata na muulo ukilekile nya. Anka amba’shi: “Tanukitanga kintu su nkimune bwa kwipikena, anka mu kwiyisha, ikalayi anumono bangi bu bee kunundu kwenu.”​—Fid. 2:3; Lom. 12:3. w19.05 24 ¶13-14

Banda kutentekyesha myanda ibodi mushintuule pobokumiinyine bya binyibinyi bya mu Eyi dy’Efile Mukulu bwa musango wa kumpala, na kwata kitshibilo kya kufubila Yehowa. Bebungi ba kwatudi abaadi balekye kukita myanda ibubi bwa kufubila Yehowa. (1 Kod. 6:9-11) Twi na lutumbu lukata kwi Yehowa p’aye kwitukwasha bwa kukambila yaya myanda ibubi! Anka, tatupwandikishanga’shi, tatwi na lukalo lwa kushintuluka nya. Sunga byekala’shi twi balekye kukita milwisho ikata ibatudi atukitshi kumpala kwa kubatshishibwa, abitungu twitatshishe bwa kusuuka kintu kyoso ki kwitutakula mu kukita dingi yaya milwisho. Abitungu tukite bintu bibidi. Kya kumpala, abitungu tulekye ‘kwambula mwikêlo wa ba pano’ sunga binangu bya uno ndumbulwilo. Kya kabidi, abitungu “kwalula mwikêlo” pa kushintuula ngelelo eetu a binangu. Kwaluluka nkwilekeene na kushintuluka kwa byatumweka. Nkutale myanda yetu yooso. Abitungu tushintuule binangu byetu byoso, bi mu mashimba eetu na byatupusha. w19.06 9 ¶4-6

Nsaa yatudi benyongole, twi kupetuula dingi bukome pa kutwela mu bisangilo bya kakongye. Nsaa yatudi mu bisangilo, atupa dingi Yehowa mushindo wa ‘kwitukwasha na kwitusamba.’ Mwanka, etunyigisha ku bukwashi bwa kikudi kiselele, Eyi dyaye na bafubi baye. Bisangilo abitupaa mushindo wa ‘kwikankamishêna.’ (Lom. 1:11, 12) Ungi mukwetu mukashi abetamina bu Sophia, amba’shi: “Yehowa na bakwetu bena Kidishitu, mbankwashe bwa kunyingiila. Bisangilo byetu bi na muulo ukata kwandi. Ne mumone’shi nsaa yandungula mukandu wibuwa ngofu na kutwela mu bisangilo, naadi napete bukome bwa kukambila twinyongoshi twande.” Nsaa yatubofula kwishimba, tutentekyeshe’shi, Yehowa tamulee nka penda kukatusha twinyongoshi bwa looso mu mafuku aafiki nya, kadi kwete dingi kwitukwasha bwatudya kwitukambila binobino. Kwete kwitupa “mashimba [lukalo] na bukome” bwa kukambila binangu bya kubofula kwishimba na bya kukutwa lukulupilo.​—Fid. 2:13, EEM. w19.06 19 ¶17-18

Abimweka’shi Yesu baadi na angi mayi e na muulo ukata a kulungula balongi baye, mwanda kintu kya kumpala kibaadi mulumbuule kunyima kwa kusanguka kwaye, nyi kino kisangilo! Ku kisangilo kibaadi Yesu mulumbuule, baadi muleshe mudimo wi na muulo ukata ubaadi balongi baye na kya kukita mu siekele a kumpala mudimo watukwete kukita mpa n’atwe lelo uno. Yesu bambile’shi: “Byaabya ndaayi: mu miilo yooso, . . . nwibalambukishe bya kulama byooso binaadi mwinufundjile.” (Mat. 28:19, 20) Yesu akyebe’shi balongi baye balungule mukandu wibuwa. Dyadya eyi tabaadi mwiditumine penda balongi baye basha lulamato 11 nya. Bwakinyi atushinkamisha byabya? Pabaadi Yesu mutuushe dino eyi dya kwikasha bantu bu balongi, baadi penda na balongi baye 11 ku mwengye wa Ngalileeya su? Tentekyeshayi’shi mwikeyilu balungwile bana bakashi’shi: ‘Anukamumwena [mu Ngalileeya].’ (Mat. 28:7) Byabya, baaba bana bakashi basha lulamato abaadi kwanka. w20.01 2-3 ¶1-4

Yesu baadi muleshe bwakinyi abitungu twikale baukye shi abaketubingabinga. Bakwile shi abaketushikwa mwanda tatwi ba pa nsenga. Kubingwabingwa takulesha’shi tubashimisha myabi ya Yehowa nya. Kadi akulesha’shi tukwete kukita myanda ilulame! Bantu abetulwiisha tabe na ngobesha ya kwimika lulangwilo lwa Yehowa, Efile Mukulu sha bukome boso. Bebungi mbatompe kadi ta mbobeshe. Tutaluuleyi kibakitshikile pa Ngoshi ya kabidi ya nsenga ishima. Aa mafuku, mbulamatadi ya mu maumbo ebungi ibaadi ibingebinge mwilo w’Efile Mukulu. Tababadi bakandjikye mudimo wa ba Temwe ba Yehowa penda kwi bena Nazi, kisaka kya mu Allemagne nya, kadi abaadi beukandjikye dingi mu Australie, mu Canada na mu angi maubo. Nkinyi kibakitshikile? Pababangile ngoshi mu 1939 kubaadi balungudi 72 475 mu nsenga ishima. Rapore ayilesha’shi, ku nfudiilo kwa ngoshi mu 1945, ku bukwashi bwa Yehowa, balungudi abalombene 156 299. Bungi bwa balungudi bubaadi bukamine ngofu! w19.07 9 ¶4-5

Su twe na bantu ba kulonga nabo Bible binobino, we kukwasha mu kwikasha bantu bu balongi mu ingi mishindo. Kileshesho, we mukumbene kukuukila bantu bapya na kwikala nabo bu kuuku nsaa yabafiki ku Nshibo ya Bufumu. Su bokitshi byabya, okwasha mu kwibashinkamisha’shi kifulo nyi kitundwilo kikata kya bena Kidishitu ba binyibinyi. Ngaluulo yotusha mu bisangilo sunga yekala iipi, ngilombene kulongyesha bantu bapya byabadya kulesha bi lukumiino lwabo na mashimba abo ooso mpa na kanemo. We mulombene dingi kwenda na mulungudi mupya mu bulungudi mpa na kumukwasha bwadya kuuka bya kufuba na Bifundwe bwa kunangushena na bantu. Nsaa y’okitshi byabya, omulongyesha byadya kwambula Kidishitu. (Luk. 10:25-28) Bena Kidishitu bebungi be na bibungi bya kukita mwanda be na mashito e na muulo a kulombasha. Anka bakwete kwata nsaa ya kulonga Bible na bantu, na abapete muloo wibungi. w19.07 17 ¶11, 13

Mpoolo mutumiibwa tabaadi mutadiile’shi myanda ibuwa sunga ibubi ibaadi mukite ituule binangu byaye kungi. Nyi bwakinyi bambile’shi ‘kuluba bi ku mongo’ kwi na muulo bwa “kwenda . . .  mutadiile kumpala,” kwamba’shi, kusuuka lubilo lwaye mpa na ku nfudiilo. Mbintu kinyi bibaadi bilombene kutakula Mpoolo mu kutuula binangu byaye kungi? Kya kumpala, myanda ikata ibaadi mukite pabaadi mu myanda ya bwina Yunda. Anka bamwene byabya bintu byoso bu “butshiafu.” (Fid. 3:3-8) Kya kabidi, tabaadi mutadiile’shi kwitopeka pa mwanda wa bibaadi mukengyeshe bena Kidishitu kumwimikye bwa kufubila Yehowa nya. Na kya kasatu, tabaadi anangushena’shi bipwa bibapu kufubila Yehowa bibungi na shi bibapu kulombana. Sunga’shi abaadi bamwele mu lukano, bamukupile, bamwase mabwe, mwiyine mu meema na masuwa, na baadi mukutwe bidibwa na bilamba, Mpoolo baadi nka atusha bipeta bibuwa mu mudimo waye. (2 Kod. 11:23-27) Anka, sunga mbibaadi mufube bibungi na mukengye ngofu, Mpoolo baadi auku’shi abitungu atungunukye na kufubila Yehowa. Atwe namu abitungu tukite nka byabya. w19.08 3 ¶5

Bakwetu balume na bakashi mbashale mu maumbo mwabashii na mushindo wa kulungula patooka sunga ku nshibo na nshibo, abakimbi ingi mishindo ya kulungula mukandu wibuwa. (Mat. 10:17-20) Mu dimune dya ku ano maumbo, mukunkushi a kifunda badi mutushe binangu bya’shi mulungudi oso alungule mu “teritware” aye bupenka mwi bena kifuko naye, bekungishanyi naye, bena kalasa naye, bena mudimo naye, na bantu beukena nabo. Munda mwa bipwa bibidi, bungi bwa tukongye twa mu kyakya kifunda bubafwimine. Pangi twi na bulungantu bwa kulungula mukandu wibuwa. Byabya, twi kupeta dilongyesha dikata ku kileshesho kya bakwetu balume na bakashi: Twikale atukimbi mishindo ya kwipana mu bulungudi, bashinkamishe’shi Yehowa etupa bukome bwatudi nabo lukalo bwa kukambila bitompwanga. (Fid. 2:13) Tutaluleyi bintu bi na muulo, twikale kushi katoba, tushikwe kukokosha bangi, na tupe kikuba kya kululama. Paapa kifulo kyetu akitama na atutumbisha Nshetu a kifulo, Yehowa. w19.08 13 ¶17-18

T’atukumiinaa kwikala na muntu akumiinaa nka’shi bakite byakyebe na shapushishaa ungi muntu. Mu kwilekena na yawa muntu, atwikalaa na muloo wa kwikala na bena Kidishitu netu nsaa ‘y’abekwasheena bu baana na baana, abesambeena, mbeeyishe.’ (1 Mp. 3:8) Bino nyi byatupushaa pabitale bantu beyishe na atwikalaa na muloo wa kwikala pamune nabo. Dingi kwiyisha akubofushaa nshalelo etu. Mu kwakula kwa kalolo, twi bakumbene kufumankana na myanda mu nshalelo etu y’atumono’shi tayibuwa nya. Ingi nsaa baaba be na ngobesha ibungi t’abapetaa kineemo nya. Na bano be na ngobesha ipela, ingi nsaa abapetaa kineemo. Sunga mbyabya, Salomone bamwene’shi bibuwa tukumiine nshalelo nka byabya byadi kushi kwinyongola su myanda tayende kalolo mu nshalelo etu. (Mul. 6:9) Su twibeyishe, abikala bibofule bwatudya kukumiina myanda ya mu nshalelo ish’ayitusangasha. w19.09 4-5 ¶9-10

Bano be na matalwa kampanda, bu ba nshe-bana, be na mushindo wa kukwasha bangi. Yehowa mmutule nshe-bana bu mutwe wa kifuko, na amutekye bwadya kulongyesha, na kunkukusha bana. (1 Kod. 11:3) Anka nshe-bana ta mukumbene kufuba na matalwa aye mooso mwakyebela nya. Yehowa nyi Mupangi a kifuko, byabya kwete kwibatala mushindo oso wabakitshina bifuko byabo myanda. (Ef. 3:14, 15) Ba nshe-bana abalesha’shi abakookyela Yehowa nsaa yabafubisha matalwa aabo mu mushindo ausangasha Yehowa. Tokumanga kufubisha bibubi matalwa abadi bakupe kwi Yehowa. Kumiina bilubilo byobe, kumiina elango dya mu Bible dyabakupa kwi bangi. Su bokitshi byabya, kifuko kyobe akikunemeka bwa kwiyisha koobe. Nsaa yokwete kuteka pamune na kifuko kyoobe, lungula Yehowa bi mwishimba dyobe bena kifuko bapushe mushindo odi mutule lukulupilo loobe mwadi. Na dingi, mudimo ofubila Yehowa wikale na muulo ukata mu nshalelo oobe. (Miy. 6:6-9) Kileshesho kyobe kibuwa nyi nkya buntu kikata kyodya kupa kifuko kyoobe. w19.09 15 ¶8; 17 ¶14; 18 ¶16

Maako baadi na muloo wa kufubila bangi. Bu kileshesho, munda mwa mafuku ebungi, baadi mufube pamune na Mpoolo mutumiibwa na Mpyeele mutumiibwa. Bwabadya kulombasha mashito aabo, Maako baadi alombasha nkalo yabo ya kumbidi. (Bik. 13:2-5; 1 Mp. 5:13) Mpoolo mutumiibwa alesha Maako bu ‘mwina mufubo n’aye ku mwanda wa bufumu bw’Efile Mukulu,’ na’shi baadi ‘asaamba’nyi eshimba diaye.’ (Kol. 4:11) Maako baadi mufikye umune a ku ba kuuku ba p’eshimba ba Mpoolo. Bu kileshesho, nsaa ibaadi Mpoolo mu lukano mu Looma bwa musango wa nfudiilo, pangi mu 65 B.B., baadi mufundjile Timote mukanda. Mu wawa mukanda, Mpoolo baadi mutekye Timote bwadya kwenda ku Looma pamune na Maako. (2 Tim. 4:11) Kushi mpaka, Mpoolo baadi mutentekyeshe mudimo wa lulamato wa Maako, nyi bwakinyi baadi naye lukalo mu yaya nsaa ibukopo. Maako baadi mukwashe Mpoolo mu mishindo ibungi, pangi baadi amuudila bidibwa sunga mifungofungo na encre. Bukwashi na kunyingishibwa kubaadi Mpoolo mupete, kubaadi pangi kumukwashe bwa kunyingiila mafuku aye a nfudjilo kumpala kwa lufu lwaye. w20.01 11 ¶12-13

Twibesumine ingi miloo mu nshalelo, na twi na mudimo wibukopo. Yesu baadi mwitudimushe’shi abaketubingabinga. Anka tushikamisheyi’shi, Yehowa aketupa bukome bwatudya kunyingiila nkalakashi. P’atunyingiila ngofu, atwikala na bukome bwibungi. (Shak. 1:2-4) Tukulupile dingi’shi Yehowa aketupa kyoso kyatudi nakyo lukalo bwa kwikala banyingye, Yesu kwete kwitulama, na bena Kidishitu netu bakwete kwitunyingisha. (Mat. 6:31-33; Yo. 10:14; 1 Tes. 5:11) Mwana mukashi baadi ‘ashimisha mase’ ababaadi bapaashe kwi Yesu baadi mupete kikiisho dyadya efuku dibabadi bamupashe. (Luk. 8:43-48, Kilombeeno kipya 2014) Anka baadi na kya kupete kikiisho bwa mafuku oso su bafikile mulongi sha lulamato a Kidishitu. Onagushena’shi baadi mukite kinyi? Su baadya kukumiina kutwala kiita kya Yesu, banda kutala efuto dibadya kupeta badya kwikala na Yesu mwiyilu! Takwi kintu su nkimune kibadya kukita kya kupwandikisha na ino myabi. Sunga twekala na lukulupilo kinyi lwa kushala bwa loso mwiyilu sunga pa nsenga, twi balombene kwikala na lutumbu bwa lwitamino lwa Yesu: “Fikaayi kwandji!” w19.09 25 ¶21-22

Nsaa ibabaadi na lukalo lwa bukwashi, bantu ba Daavide abatekyele mpeta mwina Isaleele abetamina bu Nabale bwa’shi ebakwashe na ndambo ya bidibwa, mupunda kyoso kyadi nakyo. Tababaadi bealasheene pa kumuteka nya, mwanda abaadi bakwashe Nabale pa kumulamina lombe lwaye lwa mikooko. Kadi, mwanda wa bukonkoto bwaye, Nabale bapelele kwibapa kintu sunga nkimune. Daavide bafitshiile munda na aye nkwata kitshibilo kya kwipa Nabale na bana balume boso ba mu nshibo yaye. (1 Sam. 25:3-13, 22) Anka, mukashi a Nabale, Abigaile, baadi buwa bwa mpala na baadi na binangu, baponene ku ngwa ya Daavide n’eshimba dinyingye. Amuteka bwa’shi taponeshanga mase bwa kwiobwela. Bamupele elango na kanemo koso bwadya kutuula myanda mu maasa mwa Yehowa. Bishima bya kwiyisha bya Abigaile na bikitshino byaye, bibakumine Daavide kwishimba ngofu. Aye nkwamba’shi nyi Yehowa bamutumu. (1 Sam. 25:23-28, 32-34) Abigaile baadi na ngikashi ibaadi imwikashe na muulo ku meso kwa Yehowa. Mu mushindo umune, bakwetu bakashi bena Kidishitu be na binangu na bukalanga, mbalombene kwibafubisha kwi Yehowa bwabadya kunyingisha bifuko byabo na kunyingisha bangi mu kakongye.​—Tt. 2:3-5. w19.10 23 ¶10

Bena Kidishitu boso ba binyibinyi be na kya kulesha kwilekena kwi pankatshi pabo na Babilone Mukata. Kumpala kwa kulonga bya binyibinyi, mulongi oso a Bible baadi mu kipwilo kampanda kya madimi. Baadi atwele mu kyakya kipwilo na kukita myanda yabalambukisha mwanka. Sunga’shi baadi atuusha makuta bwa kukwatshishena kyakya kipwilo. Bwa kukumiina’shi mulongi a Bible ekale bu mulungudi shii mubatshishibwe, abitungu ekale mushinkamishe’shi takii dingi mu kipwano na kipwilo kya madimi. Abitungu afunde mukanda wa kulesha’shi takii dingi mu kipwano na kipwilo kyaye kya kala sunga mu kisaka kampanda ki na myanda ipushene na Babilone Mukata. Abitungu mwina Kidishitu oso ekale mushinkamishe’shi mudimo waye wa ku mbidi tawi na myanda ya mu Babilone Mukata. (2 Kod. 6:14-17) Bwakinyi atwata bitshibilo bi bukopo byabya? Mwanda tatukumiina kwisanga mu mifubo na milwisho ya bisaka bya bipwilo bishii bi selele ku meso kw’Efile Mukulu.​—Yesh. 52:11. w19.10 12 ¶16-17

Yeelemiya bafundjile mukanda wi na eshina dyadye, na abimweneka’shi, bafudjile dingi mukanda wa 1 na 2 wa BaMfumu. Wawa mudimo ubaadi umukwashe bwa kumona mushindo ubaadi Yehowa mufwile bantu bakutwe kupwidjika lusa. Bu kileshesho, baadi auku’shi nsaa ibaadi Mfumu Akabe mwilangye ku bikitshino byaye bi bubi, Yehowa baadi mwambe’shi taafu lufu lwa buufu. (1 Bf. 21:27-29) Mu mushindo umune, Yeelemiya baadi auku’shi Manasee baadi mulwishishe Yehowa kukila mpa na Akabe. Sunga mbyabya, Yehowa baadi mufwile Manasee lusa nsaa ibaadi mwilangye. (2 Bf. 21:16, 17; 2 Mya. 33:10-13) Bino byoso bileshesho bibaadi bikwashe Yeelemiya bwa kwambula lwishinko lw’Efile Mukulu na lusa lwaye. Tala bibaadi Yeelemiya mukwashe Baruke nsaa ibaadi mubagye kwikala na kapungakanyi ku mudimo waye. Pamutwe pa kutshiba bu kuuku naye musango umune, Yeelemiya bakwashishe Baruke pa kumulungula mukandu wa Yehowa.​—Yel. 45:1-5. w19.11 6 ¶14-15

Mukanda wa Bena-Levi, aulesha’shi bena Isaleele abaadi balombene kutusha mulambu wa butaale ‘bu mulambu wa ntumbo.’ (Lv. 7:11-13, 16-18) Tababaadi abatusha uno mulambu mwanda wa’shi abaadi na kitungo kya kwibikita nya, abaadi abatusha mwanda abaadi abakumiina kutusha. Mudimo wetu bwa Yehowa wi nka bu yaya milambu ya butaale, mwanda aulesha mushindo watupusha pabitale Yehowa. Tukwete kupa Yehowa bintu byetu bya muulo, na atwibikitshi mwanda twibamufule n’eshimba dyetu dyoso. Bino abisankisha Yehowa pakumona midiyo ya bantu ayimulangwila mwanda wa kifulo bwaye na bwa miiya yaye! Yehowa kwete kumona na ata na muulo kushi penda byatukitshi, kadi bwakinyi atwibikitshi. Bu kileshesho, su bopu kununupa na twe na mushindo wa kukita bibungi bu byokumiina, ikala mushinkamishe’shi kwete kumona’shi twe na mushindo wa kukita bibungi. We kumona’shi twe kukita bibungi bwa Yehowa, anka aye kwete kumona kifulo kikwete nkutakula bwa kukita kyakya kyodya kukita. E na muloo wa kutambula kyobe ki na muulo kyokwete kumupa. w19.11 22 ¶9; 23 ¶11-12

Pabitale mudimo, kwikala na nkatshinkatshi kwi buwa. Mfumu Salomone bafundjile ku bukwashi bwa kikudi’shi: “Kwi nguba . . . bwa kintu kyooso.” Atemuna kukuna, kwibaka, kudila, kusepa, kusha masha na ingi myanda. (Mul. 3:1-8) Bibamweka patooka’shi, bintu bibidi bikata mu nshalelo a bantu nyi kufuba na kwikisha. Yesu baadi na nkatshinkatshi pabitale mudimo na kwikisha. Ungi mususa, balongi baye abaadi bafube ngofu mu bulungudi. ‘Tababaadi sunga na nguba a kudya.’ Yesu nkwibalungule mayi a kifundwe kya lelo. (Mak. 6:30-34) Sunga’shi tababadi na mushindo wa kwikisha, Yesu baadi auku’shi boso bwabo be na lukalo lwa kwikisha. Ingi nsaa, kungi kwikisha sunga ingi myanda abitungu kwiyishintuula. Twi kwibimwena ku mpángo ya Sabato ibaadi Efile Mukulu mwate bwa mwilo waye kala. Tatwi mu miiya ya Moyiise nya, kadi kutaluula kyayakula pabitale Sabato kwi kwitukwasha. Myanda yatulongo i kwitukwasha bwa kutaluula mweneno eetu pabitale mudimo na kwikisha. w19.12 3 ¶6-7

Yehowa mmwambe’shi apasukila bafubi baye, na auku’shi e na kitungo kya kulombasha mulayilo waye. (Mis. 31:2-4) Dingi, Yehowa auku’shi su akutwa kupasukila ba mu kifuko kyaye, atwinyongola. Mmulee bwa kwitukwasha na bintu bya ku mbidi na bya mu kikudi, na takwi kintu kilombene kumukutshishwa kulombasha wawa mulayilo! (Mat. 6:30-33; 24:45) Nsaa yatutentekyesha bwakinyi Yehowa alombashaa milayilo yaye, atwikala bashinkamishe’shi etukwasha nsaa yatushii na mushindo wa kupeta makuta. Tubande kutaluula kileshesho kya bena Kidishitu ba mu siekele a kumpala. Pababadi babangye kubingabinga kakongye ka mu Yeelusaleme, “boso bantu, kukaasha batumiibwa babaapaasukiile.” (Bik. 8:1) Banda kunangushena nshalelo ababadi naye. Kukutwa kwa makuta! Bena Kidishitu abashimiishe mashibo na busunga bwabo. Kadi, Yehowa tabaadi mwibasumbushene nya; dingi tababaadi bashimishe muloo wabo nya. (Bik. 8:4; Eb. 13:5, 6; Shak. 1:2, 3) Yehowa baadi mukwatshishene bano bena Kidishitu basha lulamato, na etukwatshishena n’atwe namu.​—Mis. 37:18, 19. w20.01 17-18 ¶14-15

Pabaadi Daavide mukalwile mikooko ya nshaye ku ntambwe na ku kimungu, bambile’shi Yehowa nyi bamukwashishe bwa kwipaa yaya nyema i bukyelo. Nsaa ibaadi mwipe Goliate kilobo kya ngoshi, Daavide bamwene patooka’shi Yehowa nyi baadi amukunkusha. (1 Sam. 17:37) Na pabaadi asuuku Mfumu Saule mwanda wa mukao waye, Daavide baadi auku’shi Yehowa nyi baadi amupaasha. (Mis. 18, mayi a ku mbangilo kwa shapitre) Su Daavide baadi na kwitatula, badya kwamba’shi ku bukome bwaye kwadi mukite yaya yoso myanda. Kadi Daavide baadi mwiyishe, mwanda baadi mutundule bukwashi bwa Yehowa mu muwa waye. Bino abitulongyesha kinyi? Abitungu tukite bibungi kukila penda kuteka bukwashi bwa Yehowa. Abitungu dingi twikale na ngobesha ya kutundula nsaa na mushindo awitukwasha Yehowa. Su twekala beyishe, atutundula’shi tatwibalombene kukita myanda yoso atwe banabene, anka Yehowa nyi kwete kwitukwasha bwa kukita byoso byatushi balombene kukita. Nsaa yoso yatumono bukwashi bwa Yehowa, kipwano kyetu naye akinyisha kunyinga ngofu. w19.12 20 ¶18-19

Kwi tubingilo twi bungi atulesha’shi Yehowa etwataa na muulo. Mmwitukakye kwadi na mmumone mushindo watubaadi bakumiine mukandu wibuwa. (Yo. 6:44) Nsaa yatubabangile kwifubwila peepi na Yehowa, aye namu baadi mwifubwile peepi netu. (Shak. 4:8) Dingi, Yehowa ataa nsaa na bukome bwa kwitulongyesha, etulesha’shi twi na muulo kwadi. Auku kyatudi lelo uno na auku kyatudi balombene kwikala. Na etunyokaa mwanda mmwitufule. Kino nyi kishinkamisho kikata akilesha’shi Yehowa mmwitufule! Bangi bantu abaadi abamono Mfumu Daavide bu shii na muulo, kadi aye baadi auku’shi Yehowa baadi mumufule na baadi mumukwatshishene. Byabya binangu bibaadi bikwashe Daavide bwa kwikala na mweneno ebuwa pabitale nshalelo aaye. (2 Sam. 16:5-7) Nsaa yatwipusha bu bashi na muulo sunga yatudi na nkalakashi, Yehowa etukwasha bwa kumona myanda mu ungi mushindo na e kwitukwasha bwa kukambila lukalakashi loso. (Mis. 18:28-30) Nsaa ayitukwatshishena Yehowa, takwi kintu kilombene kwitukutshishwa kumufubila na muloo nya.​—Lom. 8:31. w20.01 15 ¶7-8

Ela luteko kumpala kwa kubanga kulonga Bible na muntu. Kebungi, bibuwa kubanga na kufudisha kulonga kwa Bible na luteko, mbingo ipeela n’anwe kubanga kulonga. Abitungu tukwashe mulongi bwadya kuuka’shi twi kupusha Eyi dy’Efile Mukulu nka na bukwashi bwa kikudi kyaye kiselele. Bangi bakwetu ababangaa kwakwila pabitale luteko pa kubadika mukanda wa Shake 1:5, awamba’shi: “Su umune aa kwanudi mmukutwe binangu, eebitekye kwi Efile Mukulu.” Akupu mulongyeshi epusha mulongi’shi: “Mbikunyi byatudya kuteka Efile Mukulu bwashi etupe kinangu?” Kushi mpaka mulongi aluula’shi abitungu twele luteko kwi Efile Mukulu. Longyesha mulongi oobe bya kusambila. Mushinkamiishe’shi Yehowa akumiina kuteemesha nteko yaye. Mupatulwile’shi patwele nteko pa bupenka, twi kufungwila Yehowa eshimba dyetu twi kumulungula myanda yatusha kulungula ungi muntu. Dingi, Yehowa auku binangu byetu kalolo.​—Mis. 139:2-4. w20.01 2 ¶3; 5 ¶11-12

Yehowa nyi auku nsaa yadya kusangula mwedibwe mwimu. (Lom. 8:28-30) Yehowa babangile kusangula bedibwe mwimu kunyima kwa kusanguka kwa Yesu. Abimweneka’shi mu siekele a kumpala, bena Kidishitu ba binyibinyi booso babaadi bedibwe mwimu. Mu bipwa bibalondele, bebungi ba ku baaba babaadi abeamba bu bena Kidishitu tababaadi abalondo Kidishitu binyibinyi nya. Sunga mbyabya, mu byabya bipwa, Yehowa badi mwele baaba babaadi bena Kidishitu ba binyibinyi mwimu. Babaadi nka bu lubishi lwi buwa lubambile Yesu’shi, alukamene munkatshi mwa lubishi lubi. (Mat. 13:24-30) Mu mafuku a ku nfudiilo, Yehowa mutungunukye na kusangula bantu abakekala munkatshi mwa bantu 144 000. Byabya, su Efile Mukulu baata kitshibilo kya kusangula bangi ba ku bano bantu kumpala kwa nfudiilo, eyendo’shi tatwi balombene kumutopeka nya. (Lom. 9:11) Abitungu twikale badimukye tala twakita bibakitshine bafubi babadi besambile kwi Yesu mu lungi lukindji lwaye. Babaadi abedidi bwa mushindo ubadi mukata aabo mukitshine bafubi abafikile kunyima kwa nsaa myanda.​—Mat. 20:8-15. w20.01 30 ¶14

Yehowa akumiina’shi kifuko kyaaye kikale na muloo. Twi na tubingilo twibungi twa kwikala na muloo binobino, sunga twekala na nkalakashi. Kileshesho, twi bashinkamishe’shi Nshetu e mwiyilu mwitufule ngofu. Twi na kyukilo kya binyibinyi ky’Eyi dy’Efile Mukulu, Bible. (Yel. 15:16) Na twi mu kifuko ki na bantu bafule Yehowa, bafule miiya yaaye, na befulene. (Mis. 106:4, 5) Twi balombene kushala na muloo mwanda atwiuku’shi nshalelo akalongama mu mafuku e kumpala. Atushinguula’shi kubashala mafuku apeela, bwa’shi Yehowa akatushe bubi boso na’shi ku bukunkushi bwa Bufumu bwaye, nsenga ayikalukiila Mpaladiiso. Twi na dingi lukulupilo lwibuwa lwa’shi boso bafwe abakasanguka bwa’shi bakekale pamune na bakwabo bebafule. (Yo. 5:28, 29) Abikekala mwanda wa muloo! Na kii na muulo ukata, twibashinkamishe’shi, kubashala mafuku apela bwa’shi boso be mwiyilu, na be pa nsenga bape Nshetu sha kifulo kineemo, ntumbo na lulangwilo bimulombene. w20.02 13 ¶15-16

Su bokitshi mulwisho ukata, tokumanga kukimba kwiufwamisha. Anka, tonda mulwisho oobe kwi Yehowa. Yaaya nsaa wekala na mushindo wa kupeta eshimba difukame na twekala wetopeka dingi nya. Kadi su okumiina kwalusha kipwano kyobe na Yehowa, twe mulombene kwimena penda pa kwela luteko nya. Kumiina dinyooka. Pabadi Yehowa mutume mutemuki Natane bwa kulungula Mfumu Daavide mulwisho waaye na Betsabee, Daavide tabadi mukimbe kwibingisha sunga kubepuula mulwisho nya. Badi mukumiine musango umune’shi, bakitshiine mulwisho kushii penda kwiukitshina mulume a Betsabee, kadi badi mwiukitshine bikishekishe Yehowa. Daavide bakuminyine dinyoka dya Yehowa, na Yehowa badi mumufwile lusa. (2 Sam. 12:10-14) Su twi bakite mulwisho ukata, abitungu twiulungule baaba babadi batuule kwi Yehowa bwa kwitulama. (Shak. 5:14, 15) Na t’abitungu’shi tukimbe kwibingisha nya. Su tubakumiina luntuluntu na kulonda dinyoka dyoso dyabetupa, atupetuula butaale na muloo musango umune. w20.02 24-25 ¶17-18

“Bantu ekumi” abalesha bano be na lukulupilo lwa kwikala na muwa wa looso pa nsenga. Abauku’shi Yehowa mwelele kisaka kya bedibwe mwimu mwabi akilesha “mwina Yunda” na, abashinguula’shi kumulangwila pamune nabo nyi nkinemo kikata. Sunga ta mbibofule bwa kuuka mashina a booso bedibwe mwimu be pa nsenga lelo uno, boso be na lukulupilo lwa kwikala na muwa pa nsenga abitungu “bende na” bedibwe mwimu. Naminyi? Kifundwe kya lelo akituusha lwaluulo. Verse alesha mwina Yuuda umune. Kadi ku nfudiilo kwa verse mbateemune mwaku “neenu” ku bungi. Bino abipatuula’shi uno mwina Yuuda ta mpenda muntu umune nya anka alesha kisaka kyooso kya bedibwe mwimu. Bano bashi bedibwe mwimu abafubila Yehowa pamune na bedibwe mwimu. Anka, tabamonaa bedibwe mwimu bu bakunkushi baabo nya, mwanda abauku’shi Yesu nyi Mukunkushi aabo.​—Mat. 23:10. w20.01 26 ¶1-2

Yesu bambile’shi abakatundula balongi baye nka su mbefulene bu bibaadi mwibafule’ye nabene. Ano mayi abaadi na muulo mu siekele a kumpala, dingi e na muulo lelo uno. Nyi bwakinyi bi na muulo bwatudya kwifulena sunga twekala na nkalakashi i naminyi. Eyipushe’shi: ‘Nkinyi kyandya kulongyela ku kileshesho kya bakwetu bena Kidishitu abaadi batungunukye na kwileshena kifulo sunga mbibabadi na nkalakashi?’ Bu byatudi boso bakutwe kupwidika, mbilombene kwitwikela bukopo bwa kwifulena. Sunga mbyabya, abitungu tutompe kwambula Kidishitu. Yesu mmwitulongyeshe muulo wa kukimba butaale na mukwetu mwitukitshine mwanda wi bubi. (Mat. 5:23, 24) Baadi mushimikye kasele pa kulesha’shi su atukumiina kusankisha Efile Mukulu, abitungu twikale mu kipwano kibuwa na bangi. Nsaa yatukitshi mwetu moso bwa kukimba butaale na bangi, Yehowa asankaa. Ta mmulombene kukumiina lulangwilo lwetu su tukwete kulamina bangi ngô na kupela kukimba nabo butaale.​—1 Yo. 4:20. w20.03 24 ¶1-4

Satana, “nshee madimi” mmudimbe bantu kubanga mu mafuku a Adame na Eeva. (Yo. 8:44) Angi madimi aye ngatale malongyesha a madimi pabitale lufu na abikalaa muntu kunyima kwa lufu. Aa malongyesha aasanganyibwa mu bipikwa bibungi na nkumino ya madimi. Bwakinyi bantu bebungi mbadimbibwe? Satana auku abipushaa bantu pabitale lufu, nyi atumika na byabya binangu bwa kwibadimba. Mwanda twi bapangibwe bwa kwikala na muwa wa looso, t’atukuminaa kufwa nya. (Mul. 3:11) Atwataa lufu bu mwishikwanyi. (1 Kod. 15:26) Sunga Satana kwete kukita byabya, bya binyibinyi pabitale lufu ta mbifwame nya. Byabya, bantu bakile bungi lelo uno abauku na abaukisha akilongyesha Bible pabitale abikalaa bafwe na lukulupilo lwi kwanka bwa bafwe. (Mul. 9:5, 10; Bik. 24:15) Bino bya binyibinyi abitunyingisha na kwitukwasha bwa kupela kutshina na kwikala na mpaka pabitale akifikilaa muntu su bafu. w19.04 14 ¶1; 15 ¶5-6

Yehowa Efile Mukulu mmufule balangwidi baye. Mmwibafule na ekala nka mwibafule. Na mmufule dingi kululama. (Mis. 33:5) Byabya, abitungu twikale baukye ino myanda ibidi: (1) Nsaa yabakitshina bafubi baye myanda ya kukutwa kululama, Yehowa enyongolaa. (2) Mmulee shi tabakakitshina dingi bafubi baye myanda na kukutwa kululama nya. Mwiya ubaadi Efile Mukulu mwelele bena Isaleele ku bukwashi bwa Moyiise, ubaadi wimene pa kifulo. Ubaadi autekye mwilo bwaudya kukitshina bantu boso myanda na kululama bikishekishe kwi baaba bashibadi na a kwibakwila. (Miy. 10:18) Mwiya ubaadi alesha shi Yehowa kwete kupasukila balangwidi baye ngofu. Mwiya wa Moyiise ubapwile mu 33 B.B. pabaadi kakongye ka bena Kidishitu katuukye. Bena Kidishitu abadya kwikala kwanka kushi mwiya awibakalwila, wimene pa kifulo na aukwatshishena kululama su? Nya! Bena Kidishitu abapetele mwiya upya “mwiya wa Kidishitu.” Yesu ta mufunde mulongolongo wa miiya bwa balongi baye nya, kadi baadi mwibape malango, mikamiko, na mayi a kulonda bwa kwibakunkusha. “Mwiya wa Kidishitu” ngutale myanda yoso ibaadi Yesu mulongyeshe. w19.05 2 ¶1-3

Bantu abekalaa na lukalo lwa kunyingishibwa na be na ngobesha ya kunyingisha bangi. Bu kileshesho, su mwana mukinga apona nsaa yakwete kwasha, epoola mu manwi, endaa lubilo na kudila kwi Nshaye sunga Nyinaye. Baledi tambalombene kubuka elonda nya, kadi mbalombene kumusamba. Be kwipusha mwana kibakitshika, kumukumuna mpolo, kumuumiisha na bishima bya kifulo, na kumwela bwanga sunga kumwanya kalamba. Kapindji kapeela mwana e kuumiina na pangi e kubanga dingi kwasha. Mwenda mafuku, elonda adyumu. Ingi nsaa, bana abebakyengyeshaa mu kipaso kikile bubi. Bangi abebalwishaa na myanda ibutete. Be kwikala balwishe mwana na myanda ibutete mususa umune, sunga misusa ibungi munda mwa bipwa bibungi. Mu mishindo yoso, kulwisha mwana nkulombene kumuleka na kinyongwa kishy’akipu. Pangi, muntu baadi mumulwishe abaadi bamukwate bamunyooka. Pangi namu, tambamukwate bwa kumunyoka nya. Sunga’shi abaadi bakwate muntu baadi mulwishe mwana kushi kunyengakana, mwana e kwikala nka akalakashwa kwishimba mpa na p’akulu. w19.05 14 ¶1-2