Mweshi wa 9

Kileshesho kyabadi betulekyele kwi Yehowa na Yesu pabitale kufuba ngofu akilesha’shi kwikisha takwi na muulo su? Nya. Yehowa takookaa, byabya te na lukalo lwa kwikisha ku mbidi nya. Anka, Bible amba’shi kunyima kwa Yehowa kupanga eyilu na nsenga “baayikiishe.” (Efi. 31:17) Byabya abilesha’shi Yehowa bayikiishe na kusanka na bibaadi mukite. Dingi, sunga’shi Yesu baadi afubu ngofu pabaadi pa nsenga, baadi aata nsaa ya kwikisha na kudya kantu na ba kuuku baye. (Mat. 14:13; Luk. 7:34) Bible atekye bafubi b’Efile Mukulu bwabadya kwikala abafubu. Bafubi baye be na kya kufuba, kushi kwikala bu balofwa. (Nki. 15:19) Pangi okita mufubo wa ku mbidi bwa kukwasha kifuko kyobe. Balongi ba Kidishitu boso be na bushito bwa kulungula mukandu wibuwa. Kadi, abitungu wekale na nsaa ilombane ya kwikisha. w19.12 2 ¶2; 3 ¶4-5

Shikwa kulondela bantu miisambo ya bikudi bibi. Pabitale uno mwanda, abitungu twambule kileshesho kya Yesu. Kumpala kwadya kufika pa nsenga, Yesu badi mwiyilu, na badi auku myanda ibungi pabitale Satana na ba demo. Anka tabadi esamba myanda itale bibadi bikite bino bikudi bibi nya. Yesu badi akumiina kwikala bu kamonyi ka Yehowa, kushi bu muntu mutule binangu byaye penda kwi Satana. Twi balombene kwambula Yesu pa kupela kupalakasha miisambo itale ba demo. Anka, atulesha mu ngakwilo etu’shi: ‘Mashimba etu aatusha bishima bilongame,’ nyi nkwamba’shi, bya binyibinyi. (Mis. 45:2) Tokumanga kutshina bikudi bibi. Pa nsenga lelo uno, myanda ibubi ikwete kwitukitshikila. Masaku, mikumbo, sunga lufu mbilombene kwitufwila mu kimpulunkamba. Kadi tatwi balombene kupwandikisha’shi bikudi bibi nyi bibebifwisha. Bible apatuula’shi: “Nsaa na myanda ya kimpulunkamba” ngilombene kufwila muntu. (Mul. 9:11) Pabitale ba demo, Yehowa muleshe’shi, e na bukome butabukile bwabo. w19.04 23-24 ¶13-14

Bakulu abanemekaa mwiya w’eumbo pabitale kuukisha mbulamatadi kilumbu kya muntu mulwishe mwana su? Oolo. Mu maumbo mwabafubisha yaya miiya, bakulu mbalombene kwiyikokyela. Yaya miiya ta ngitupishene na mwiya w’Efile Mukulu nya. (Bik. 5:28, 29) Byabya, nsaa yabebalungula kilumbu kya muntu balwisha mwana, abitungu bakulu bakimbe bukunkushi pabitale byabadi balombene kuukisha kilumbu ku mbulamatadi. Abitungu bakulu balungule mwana abadi balwishe, baledi baye na bangi abauku wawa mwanda’shi, be na matalwa a kuukisha kilumbu kya muntu mulwishe mwana na myanda ibutete ku mbulamatadi. Kadi be kukita kinyi su muntu mulwishe mwana mmwina kakongye na su mwanda ubapalakana mbalo yadi mushale? Mwina Kidishitu mwakule uno mwanda mmulombene kwamba shi balwisha nkumo y’eshina dy’Efile Mukulu su? Nya. Yawa mulwishe mwana nyi balwisha nkumo y’eshina dy’Efile Mukulu. w19.05 10 ¶13-14

Bible atekye balume na bakashi bwabadya kwinemekyeshena na kulombasha mitshipo yabo ya dibaka. Kwete kunyingisha ba mulume na mukashi bwabadya kushala pamune, p’amba shi: “Mulume akalekye nshaaye naa nyinaaye, bwa kulamata mukashi aaye, abo booso abakeekala mbidi imune.” (Kib. 2:24) Kadi, baba be ku bukitshishi bwa binangu bya pa nsenga be na mweneno mwilekene, bakwete kwamba shi mulume atale nkalo yaye mukashi namu atale yaye. Ungi mukanda awakwila pabitale kwipaa kwa dibaka awamba shi: “Mu angi maumbo, nsaa ayiyibakishena bantu, abelaa mitshipo kumpala kwa bantu shi, abashala pamune bwa muwa wabo ooso. Kadi bantu bebungi mbashituule wawa mutshipo, bela ungi wa shi, atushala pamune nka su twibefulene.” Yawa mweneno e naye bantu pabitale dibaka mmufishe bangi mu kutshiba bifuko na kutapa bangi ku mashimba. Kushi mpaka, mweneno a bantu ba mu uno ndumbulwilo pabitale dibaka mmulwile. w19.05 23 ¶12

Mpoolo baadi ekalakasha mwanda bangi bena Kidishitu, abaadi abalondo binangu bibubi na malongyesha a bantu a mu ndumbulwilo a Satana. (Ef. 4:17-19) Bino bi kufwila oso a kwatudi. Satana nfumu a uno ndumbulwilo, kwete kufubisha mayele elekene bwa kwitwikasha kula na Yehowa. Bu kileshesho, su atukumiina kwiata na muulo ukilekile sunga kwenda nkumo, e kufuba na byabya binangu bwa kwitwikasha kula na Yehowa. E kufuba dingi na myanda yatudi balongye kwetu ku nshibo, ku kalasa, na kwi bantu betwifunyishe bwa kwitutakula mu kunangushena mu kipaso kya kumiina’shi tunangushene. Mbibofule bwatudya kukatusha myanda “ishimate ngofu” mu binangu byetu su? (2 Kod. 10:4, NWT) Pusha bibalulwile Mpoolo: “Atuponesha nangunangu na kwitatula kooso akwikamisha ku kyukilo ki’Efile-Mukulu. Atutonto binangu byooso bwa kwibifisha ku kukokyela Kidishitu.” (2 Kod. 10:5) Eyendo, ku bukwashi bwa Yehowa, twi balombene kutonta binangu byoso bibubi. w19.06 8 ¶1-3

Sunga bibabadi na twinyongoshi tukilekile, Aana, Daavide, na mufundji a misambo, abaadi bakulupile mwi Yehowa bwa kupeta bukwashi. Babamulungwile twinyongoshi twabo mu nteko ibukopo. Babamulungwile patooka bwakinyi abaadi benyongole. Na babatungunukile na kwenda ku mbalo ya lulangwilo lwa Yehowa. (1 Sam. 1:9, 10; Mis. 55:23; 73:17; 122:1) Na lusa looso, Yehowa badi mwaluule nteko ya oso a kwabadi. Aana bapetele butaale bwa mu binangu. (1 Sam. 1:18) Daavide bafundjile’shi: “Mululame sunga eekala na malwa misuusa yooso Yehowa amupaasha.” (Mis. 34:20) Kunyima mufundji a misambo bapushishe’shi, Yehowa ‘mmumukwate kwiyaasa [dyaaye] dibalume,’ amukunkusha na malango a kifulo. (Mis. 73:23) Bino bileshesho abitulongyesha kinyi? Kwi nsaa yatudi balombene kupeta myanda ibukopo ayitufwishila twinyongoshi. Anka twi bakumbene koobesha su atunangushena mushindo ubadi Yehowa mukwashe bangi, atukulupila kwadi mu luteko, na kumukookyela nsaa y’atukitshi kyakya ky’etutekye bwa kukita.​—Mis. 143:1, 4-8. w19.06 17 ¶14-15

Tatutadiilanga myanda ishi na muulo ayakula bantu sunga yabakitshi itupushishe buufu bwakwikala Temwe a Yehowa. (Mik. 4:5) Tutaleyi kileshesho kya batumiibwa pabaabadi mu Yeelusaleme mafuku apeela kunyima kwa lufu lwa Yesu. Abadi abauku bibabadi bebashikwe kwi bakata ba bipwilo bya bena Yuuda. (Bik. 5:17, 18, 27, 28) Kadi, abatungunukile na kwenda ku ntempelo efuku dyoso na kulesha patoka’shi mbalongi ba Yesu pa kulungula mukandu wibuwa. (Bik. 5:42) Tabaabadi batadiile moo bwaudya kwibemika. Atwe namu twibalombene kukambila moo wa bantu pa kwilesha kwi bantu boso’shi twi ba Temwe ba Yehowa ku mudimo, ku kalasa, na kwi bankungishanyi netu. (Bik. 4:29; Lom. 1:16) Bwakinyi batumiibwa abadi na muloo? Abadi abauku bwakinyi mbebashikwe, na babadi abamono kukengyeshibwa mwanda wa kukita kikyebe ky’eshimba dya Yehowa bu kineemo kikata. (Luk. 6:23; Bik. 5:41; 1 Mp. 2:19-21) Nsaa yabetushikwa pa mwanda wa bibuwa byatukitshi, ta twibalombene kuleka kufubila Yehowa mwanda wa mushikwa wa bantu. w19.07 7 ¶19-20

Yesu na balondji baaye bena Yuuda abaadi abakokyela Sabato mwanda abaadi mu Mwiya wa Moyiise. Kadi mu ngakwilo na bikitshino byaye, Yesu balesheshe’shi abitungu kwikala na nkatshinkatshi mu kufubisha kwa mwiya utale Sabato, na’shi kukitshina bangi myanda ibuwa bwa kwibakwasha mwifuku dya Sabato takubaadi bubi nya. (Mat. 12:9-11) Tabaadi amono kukitshina bangi myanda ibuwa bwa kwibakwasha bu kwipaa kwa mwiya wa Sabato nya. Bikitshino bya Yesu bibalesheshe’shi baadi mupushe kabingilo kabaadi Efile Mukulu mulungule mwilo waye bwa kwikisha. Bu bibaadi bafubi b’Efile Mukulu abekisha ku mifubo yabo, abaadi na mushindo wa kutuula binangu byabo ku myanda ya mu kikudi. Yesu baadi mukudile mu kifuko kibaadi akyata efuku dya Sabato bu efuku dya kulangwila Efile Mukulu. Atuuku byabya mwanda wa byatubadika pabitale Yesu pabaadi kwabo ku Naazarete’shi: “Batwelele mu kitumbwilo mwifuku dya sabato, muyiile kipikwa kiaye, na bebweele bwa kubala.” (Luk. 4:15-19, Kilombeeno kipya 2014) Dingi Balongi baye abaadi na kanemo kakata bwa mwiya wa Sabato mu kipaso kibabadi bemikye byoso bibabadi abakitshi bwa kushiika Yesu mpa na pabaadi efuku dya Sabato dikile.​—Luk. 23:55, 56. w19.12 4 ¶10

Mulungudi oso mwina Kidishitu etatshishaa bwa kukwasha bantu basha mashimba ebuwa. Uno mudimo twi kwiupwandikisha na kukimba mwana mushimine. Naminyi? Banda kutala kibadi kikitshikile mungi mwana a bipwa bisatu badi mushimine. Peepi bantu 500 babadi bepaane mu kumukimba. Nsaa peepi 20 na mwana kushimina, mungi muntu bamusangwile mu kisuku. Yawa muntu bapelele bwa’shi bamutumbishe mwanda basangana kaka ka nsongwalume. Bambile’shi: “Tubapete mwana mwanda tubafubu pamune.” Bantu bebungi mbashimine nka bu kano kana. Tabe na lukulupilo nya, be na lukalo lwa bukwashi. Atwe boso bantu bakile pa midiyo mwanda, tukwete kufuba pamune bwa kupeta bano bantu. We kukutwa kupeta muntu odya kulonga naye Bible. Kadi, bangi balungudi banulungula nabo mu teritware umune, be kupeta muntu akumiina kulonga bya binyibinyi bya mu Eyi dy’Efile Mukulu. Nsaa i mukwetu ekasha muntu bu mulongi a Kidishitu, boso abakwasha mu kukimba be na kya kusanka. w19.07 16-17 ¶9-10

Mpoolo baadi mutentekyeshe bena Kidishitu ba mu Fidipe’shi abitungu batungunukye nka na kusuuka na mufwaka. Mwanda abaadi babingyebingye kaka kakongye nka’ko kaky’akabanga. Bulwishi bubabangile pabaadi Mpoolo na Silase bafikye ku Fidipe bwa kukokyela Eyi dy’Efile Mukulu dya ‘kukidila ku Masedwane’ pangi mu 50 B.B. (Bik. 16:9) Kwakwa, abapetele mwana mukashi abetamina bu Lidii, ‘baadi kwete’nka kuteemesha; mwanda Yehowa baadi mufungule eshimba dyaaye’ bwa kuteemesha mukandu wibuwa. (Bik. 16:14) Mususa umune, aye nkubatshishibwa pamune na kifuko kyaye. Anka, Diabulu tabaadi mutadiile nya. Bantu ba mu kibundji, abadi bakwate Mpoolo na Silase benda nabo kwi bakata ba mbulamatadi, na bebadimbila myanda ya madimi’shi bakwete kutombosha bantu. Nyi bwakinyi, abaadi bakupile Mpoolo na Silase, abo nkwibela mu lukano na kunyima nkwibabinga mu kibundji. (Bik. 16:16-40) Abaadi bakookye su? Nya! Kadi, nkinyi kibakitshine bakwetu ba mu kaka kakongye kakibaadi kapya? Abo namu, abaadi banyingiile! Kushi mpaka, kileshesho kibuwa kya Mpoolo na Silase kibaadi kibanyingishe. w19.08 2 ¶1-2

Eyendo’shi mu kino ‘kikuba kya kululama’ mwi kifulo bwa Yehowa na mwilo waye. Bino mbitale dingi mpa na kulungula bangi pabitale lukumiino lwetu mwi Yesu mpa na lukulupilo lwetu lukile buwa. Tukwete kupa “kikuba kya bululame” nsaa yatukitshi mudimo wi na muulo wa kwikasha bantu bu balongi. (Mat. 28:18-20) Sunga twekala na nshalelo e naminyi, twi balombene kutemba bu bimunyi. Ingi nsaa, kyakya akimweneka bu kilombene kwitukutshishwa kulungula mukandu wibuwa, ki kwitupa mushindo wa kwiulungula. Bu kileshesho, Mpoolo mutumiibwa baadi mu lukano mu Looma pabadi mufundjile bena Fidipe mukanda. Kadi, nkano ibabadi bamwanye tayibadi imukutshishwe kulungula mukandu wibuwa kwi basalayi abaadi abamulama na bantu babadi abafiki kwadi nya. Mpoolo badi alungula na kisumi mu luno lukalakashi, na bino bibadi binyingishe bakwetu na kwibapa bukome bwa “kulungula mukandu w’Efile Mukulu kushi mô.”​—Fid. 1:12-14, EEM; 4:22. w19.08 12 ¶15-16

Kabingilo kakata aketutakula bwa kwikala beyishe nyi mwanda wa kusangasha Yehowa. Mpyeele mutumiibwa badi muleshe byanka patoka nsaa ibafundjile mayi a kifudwe kya lelo. Mu shapitre 3, kikoso 23 a mukanda wa “Viens suis moi” awakula pabitale mayi a Mpyeele’shi: “Kwitatula kwi nka bu lulengo. Nkulombene kutusha bipeta bikile bubi. Muntu sha kwitatula mukumbene kukutwa kwikala na muulo ku meso a Efile Mukulu. Anka, sunga muntu shi na ngobesha ibungi mukumbene kwikala na muulo ku meso a Yehowa su e na kwiyisha. Yehowa akupa bwedi nka su we mwiyishe.” Eyendo, kintu ki na muulo kyatudya kukita nkusangasha Yehowa! (Nki. 23:15) Kukaasha kusangasha Yehowa, atupete myabi ibungi nsaa yatudi na kwiyisha. Su twi beyishe bangi bantu abefubwila peepi netu. Etule pa mbalo ya bantu bokumiina kwikala nabo.​—Mat. 7:12. w19.09 4 ¶8-9

Bakulu abafubu ngofu bwa kukwasha bakwabo. Anka tabeata na muulo ukilekile mwanda wa matalwa abadi nao nya. Kadi, abakwasha bakwabo na kalolo kooso. (1 Tes. 2:7, 8) Kifulo kyabo na kwiyisha kwabo abimweneka mu mushindo w’abesamba na bangi. Andrew mungi mukulu bapu kukisha bipwa bibungi, amba’shi: “Ne mumone’shi nsaa i mukulu e na kalolo na muloo, bino abikumaa mashimba a bakwetu ngofu. Ino ngikashi ayitakula kakongye bwakadya kufuba pamune na bakulu.” Mungi mukwetu abetamina bu Tony bapu kupwa bipwa bibungi bu mukulu mu kakongye, amba’shi: “Natompaa kutumikila elango di mu Bena-Fidipe 2:3 na netatshisha ngofu bwa kumona bangi bu bankile. Bino abinkwasha bwa kupela kukitshisha bantu myanda pa bukopo.” Abitungu bakulu bekale beyishe, anka bi Yehowa mmwiyishe. Sunga Yehowa nyi Mukunkushi mukata a eyilu na nsenga, “ayinama muushi” bwa ‘kwibwesha mubofule mupone mu nsenga.’ (Mis. 18:36; 113:6, 7) Anka, Yehowa mushikwe baba basha kwitatula. w19.09 16-17 ¶11-12

Bwa kupeta kikiisho ku bukwashi bwa kiita kya Yesu, abitungu tulame mweneno ebuwa. Tukwete kukita mudimo wa Yehowa, nyi bwakinyi abitungu tukite abikyebe Yehowa. Atwe twi be na mudimo, Yehowa dyo mukata. (Luk. 17:10) Su twakita mudimo waye bu byatukyebe, abitwikela bukopo bwa kusemuna kiita. Na dingi su twalonda buludiki bwa Yehowa twi balombene kukambila kitompwanga kyoso sunga kyekala naminyi. Tentekyesha’shi muntu su ngumune ta mulombene kwimika mpángo yaye yakyebe kubanga kulombasha! (Lom. 8:31; 1 Yo. 4:4) Kabingilo ketu nka kutumbisha Yehowa, Nshetu sha kifulo. Mu mafuku a kala, bantu be bungi abaadi na lwabi, abaadi abakumiina kupeta bintu kwi Yesu, abaadi bakutwe muloo na abo nkusumbula kiita kya Yesu. (Yo. 6:25-27, 51, 60, 66; Fid. 3:18, 19) Mu kwilekena na bano bantu, bano babaadi bafule Efile Mukulu na bakwabo, abaadi na muloo wa kutwala kiita munda mwa mafuku aabo a muwa pa nsenga, na lukulupilo lwa nkafuba mwiyilu na Yesu. Atutungunuka na kwikala na muloo b’ubo pa kutwala kiita kya Yesu na binangu bibuwa. w19.09 20 ¶1; 24-25 ¶19-20

Banda kunangushena ku myabi yodi mupete mwanda’shi we mukuudibwe ku malongyesha a madimi. Twi na muloo ukata wa kupeta bwabwa bulungantu! Kulupilayi’shi bulungantu abufiki. Mu mafuku apeela’mu, Yesu aata kitshibilo kya kubutula bipwilo bya madimi na bukunkushi bwa bana ba bantu. Efile mukulu akakalwila “kibumbu kikata” kya bafubi baye, akupu ebekashe na muloo pa kwibelela myabi mu mpaladiiso. (Kibaf. 7:9, 14) Bantu bebungi abakasanguka na bakapososhibwe ku makyenga ooso aatukila ku mulwisho wa Adame. (Bik. 24:15) Mu Bukunkushi bwa Bipwa kinunu, Yesu na bantu abakamunana pamune naye abakakwasha bantu bwabadya kwikala bapwidikye ku mbidi na kwikala mu kipwano kibuwa n’Efile Mukulu. Kino kipungo kya kwalushuula bulungantu na kupososha bantu akukekala nka bu kipwa kya Jibile mu Isaleele. Boso abafubila Yehowa pa nsenga na lulamato abakekala bapwidikye, na kupososhwa ku mulwisho. w19.12 12-13 ¶14-16

Mu siekele a kumpala bino bipungo byetu (B.B.), Yoosefe (abetamina bu Barnabase) baadi akumiina’shi Yehowa afube naye. (Bik. 4:36, 37) Kunyima kwa Soolo kwikala mwina Kidishitu, bena Kidishitu bebungi abaadi abatshinyi kwifubwila peepi naye mwanda wa nkumo yaye ya bu muntu abingabingaa tukongye. Anka, Barnabase baadi munyingishe Soolo na kumukwasha. (Bik. 9:21, 26-28) Kunyima, nsaa ibaadi bakulu abaadi ku Yeelusaleme na lukalo lwa kunyingisha bena Kidishitu abaadi kula mu Antyoshe a mu Sirii, nnanyi abaabadi batume? Barnabase! Abaadi basangule kalolo kakile. Barnabase baadi ‘akankamika booso bwabadya kushaala balamate kwi Mwanana n’eshimba dyabo dyooso.’ (Bik. 11:22-24) Bi mumune na lelo uno, Yehowa mulombeene kwitwikasha ‘bantu abakankamikaa’ bakwetu bena Kidishitu. Bu kileshesho, mulombeene kwitufubisha bwa kunyingisha muntu bafwisha mukwabo aadi mufule. Sunga’shi mulombeene kwitutakula bwa kwenda mu nkatala sunga kwitamina muntu e na maladi ku telefone na tubishima twa kalolo. Okumiina kutadiila Yehowa akufubishe bu bibaadi mufubishe Barnabase su?​—1 Tes. 5:14. w19.10 22 ¶8

Nsaa yatufubu pamune na ba kuuku betu, tatwiuku penda ngikashi yabo ibuwa nya, atwiuku dingi bilubilo byabo. Mushindo kinyi watudya kukila na luno lukalakashi? Mu kwakula kwa kalolo, tatutengyelanga myanda ipwidikye kwi bakwetu bena Kidishitu nya. Su tubapu kwikala bu kuuku na muntu kampanda, abitungu tukite mwetu moso bwa kwibulama. Su ba kuuku betu abakitshi bi bubi, twibalombene kwibapa elango na mayi a kalolo a mw’Eyi dy’Efile Mukulu. (Mis. 141:5) Na su betulwishisha, abitungu twibafwile lusa. Su tubapu kwibafwila lusa, abitungu tulekye kwibalungula wawa mwanda ubaadi witufiitshishe munda sunga kwiulungula bangi. Bi na muulo mu ano mafuku ebukopo kutula binangu byetu ku ngikashi ibuwa ya bakwetu bena Kidishitu pe ku kubofula kwabo. Su tubakitshi bino atunyingisha kipwano kyetu nabo. Bi na muulo kwibikita kubanga binobino, mwanda atukekala na lukalo lwa ba kuuku mu mpombo ikata. w19.11 6 ¶13, 16

Nsaa yatulongo Bible na bantu, abitungu tukite mwetu moso bwa ‘kwikasha bantu bu balongi . . . , twibalambukishe bya kulama byoso bibaadi [Yesu] mwitufundjile.’ Atukumiina kukwasha bantu bwabadya kupusha muulo wi nao kwata mpángo ya kufubila Yehowa na kukwatshishena Bufumu bwaye. Bino abilesha’shi abitungu tupe bantu malaka a kusankila bya binyibinyi pa kutumikila byabalongo, kwilambula kwi Yehowa, na kubatshishibwa. Su bakita byabya, abakapanda kwifuku dya Yehowa. (1 Mp. 3:21) Kubashala mafuku apeela ngofu pankatshi pa lelo uno na nfudiilo ya uno ndumbulwilo. Nyi bwakinyi, tatwi na nsaa ibungi ya kutungunuka na kulonga Bible na muntu sh’akumiina kufika mulongi a Kidishitu nya. (1 Kod. 9:26) Mudimo wetu ngwa kukita luntuluntu! Kwi bantu bebungi abakumiina kuteemesha mukandu wa Bufumu kumpala kwa’shi nfudiilo ifikye. w19.10 11-12 ¶14-15

Ku kipwa kyoso, Efuku dya kushimisha milwisho, mwilo wa Isaleele ubaadi awibungu na tshite-mwakwidi mukata e panundu baadi alambula nyema. Ino milambu ibaadi ayikwasha bena Isaleele bwa kutentekyesha’shi abaadi na lukalo lwa kutoshibwa ku milwisho. Kya kumpala, tshite-mwakwidi mukata e panundu baadi apongoola musengo wa kabanda wi na mapembwe mu kintu ki na makala e kaalo, paapa miishi i mapembwe ibaadi ayiwulu mu kadimbo koso. Bino abitulongyesha kinyi? Bible amba’shi, nteko yabele kwi bafubi ba Yehowa basha lulamato inka bu kabanda. (Mis. 141:3; Kibaf. 5:8) Tshite-mwakwidi mukata e panundu baadi alambula kabanda kumpala kwa Yehowa na kanemo koso. Mu mushindo umune, nsaa yatwifubwila kwi Yehowa mu luteko, abitungu twikale na kanemo kakata. Abitungu tumutshine. Twi na lutumbu lukata pa kumona’shi mupangi etu, mmwitutadiile bwatudya kumuteka na kwifubwila peepi naye, nka bu abikitaa mwana kwi nshaye. (Shak. 4:8) Mmukumiine’shi twikale ba kuuku baye! (Mis. 25:14) Twi na lutumbu bwa uno mwabi na tatukumiina kukita kintu kampanda kilombene kumwinyongosha. w19.11 20-21 ¶3-5

Bantu bebungi abamonaa mudimo naminyi? Mu maumbo ebungi, bantu bebungi bakwete kufuba ngofu na abakishaa nsaa ibungi kukila kumpala. Bantu abafubaa ngofu, mbakutwe mpa na nsaa ya kwikisha, ya kushala na bifuko byabo, sunga ya kulombasha nkalo yabo ya mu kikudi. (Mul. 2:23) Ku lungi lupese, bangi bantu namu tabakumiinaa kufuba na abakimbaa tubingilo bwa kupela kufuba. (Nki. 26:13, 14) Mu kwilekena na bantu ba mu uno ndumbulwilo bashi na nkatshinkatshi, tala mweneno e naye Yehowa na Yesu pabitale mudimo. Atuuku shi Yehowa mmukumiine kufuba. Yesu bebilesheshe patoka’shi: “Yayà kyafubu mpâ na lelo uno, byabya ami namu nafubu.” (Yo. 5:17, EEM) Banda kunangushena ku mudimo oso ubaadi Efile Mukulu mukite pabadi mupangye ba mikeyilu na eyilu na nsenga. Tukwete kumona dingi bishinkamisho bya mufubo w’Efile Mukulu wa bupangi pa nsenga patudi bashale. w19.12 2 ¶1-2

Mushindo kinyi ubaadi Daavide munyingishe bu kuuku bwaye na Yehowa? Daavide baadi mulongye pabitale Yehowa ku bintu bipangibwe. Nsaa ibaadi nsongwa, Daavide baadi akisha nsaa ibungi mu mapya bwa kulama mikooko ya nshaye. Pangi nyi nsaa ibabangile kunangushena ku bintu bipangye Yehowa. Bu kileshesho nsaa ibaadi atala mwiyilu bufuku, tabaadi amono penda binunu bya nyenyenyi nya, baadi dingi amono ngikashi ya Yawa mwiyipangye. (Mis. 19:2, 3, EEM) Nsaa ibaadi munagagushene mushindo ubabaadi bapangye bantu, bamwene bi kinangu kya Yehowa. (Mis. 139:14) Nsaa ibadi Daavide munangushene kubintu bibaadi Yehowa mupangye, bamwene’shi mmupela ngofu pa kwipwandjikisha na Yehowa. (Mis. 139:6) Bino abitulongyesha kinyi? Ata nsaa ya kubandjila buwa bwi bintu byabadi bapangye kwi Yehowa pano pa nsenga; bikukaanyishe! Efuku dyoso ikala onangushena ku akikulongyesha bintu bipangibwe byomono mbalo yodi pabitale Yehowa mitshi, nyema, na bantu. Paapa, efuku dyoso wekala olongo myanda ipya pabitale Nshobe sha kifulo. (Lom. 1:20) Dingi, efuku dyoso kifulo kyobe bwaye akyende na kutama. w19.12 19-20 ¶15-17

Moyiise basangwile bwa kufubila Efile Mukulu. Pabaadi na bipwa 40, Moyiise bakumiinyine kwikala ku lupese lwa mwilo w’Efile Mukulu, bena Ebelu, pamutwe pa kwikala muukibwe bu “mwana a mwana mukashi a Faraone.” Moyiise bapelele mwasu ukata. P’aye kwikala ku lupese lwa bena Ebelu abaadi ku bupika mu Ejiipitu, Faraone nfumu mukata ababadi abamono bu efile, baadi mumufiitshile munda ngofu. Moyiise baadi na lukumiino lukata! Baadi mukulupile mwi Yehowa. Lwalwa lukulupilo nyi lubaadi lumukwashe bwa kwikala mu kipwano na Yehowa bwa loso. (Nki. 3:5) Bwakinyi bino bi bu dilongyesha kwatudi? Nka bu Moyiise, atwe boso twi na bitshibilo bya kwata: atukumiina kufubila Efile Mukulu na kwikala pamune na mwilo waye? Abitungu kwikutshishwa ingi myanda bwa kufubila Efile Mukulu, na be kwitulwisha kwi bantu bashabauku Yehowa. Kadi su twekala bakulupile mwi Nshetu e mwiyilu, aketukwatshishena. w19.12 17 ¶5-6

Sunga mbyatudi bapangibwe ku nsenga, twi na muulo ukata kukila eyasa dya nsenga. Tubandeyi kutaluula tubingilo atulesha’shi twi na muulo ku meso kwa Yehowa. Mmupangye bantu na ngobesha ya kulesha bi ngikashi yaye. (Kib. 1:27) P’aye kukita byabya, mmwitutuule ku nundu kwa bingi bipangwa byoso, etupa bushito bwa kupasukila nsenga na nyema. (Mis. 8:4-8) Kunyima kwa Adama na Eeva kukita mulwisho, Yehowa baadi mutungunukye’nka na kwata bantu na muulo. Etwataa na muulo ngofu, nyi mbwakinyi betupeele Mwana aaye eleka, Yesu bu nkuulo bwa milwisho yetu. (1 Yo. 4:9, 10) Ku bukwashi bwa yawa nkuulo, Yehowa akasangula baaba abafwile mwanda wa mulwisho wa Adama, “balulame na bashi balulame.” (Bik. 24:15) Eyi dyaye adilesha’shi twi na muulo kwadi sunga twekala na mukumbo, bulanda sunga bununu.​—Bik. 10:34, 35. w20.01 15 ¶5-6

Muntu tamulombene kupyana lukulupilo lwaye lwa kwenda mwiyilu. Elupetaa kwi Efile Mukulu. (1 Tes. 2:12) Tatwelanga nkonko ilombene kulwisha bangi ku mashimba. Bu kileshesho, tatwi balombene kwipusha mukashi a mukwetu mwedibwe mwimu byapusha pabitale lukulupilo lwaye lwa kushala bwa looso pa nsenga kushii mulume aye. Tushinkamisheyi’shi, mu nsenga ipya, Yehowa ‘akekutshisha bii na muwa byoso.’ (Mis. 145:16) Su twamona bena Kidishitu bedibwe mwimu nka bu bantu boso, atwikalwila atwe banabene. Mu mushindo kinyi? Bible etulungula’shi bangi bena Kidishitu bedibwe mwimu mbalombene kukutwa kushaala na lulamato. (Mat. 25:10-12; 2 Mp. 2:20, 21) Anka su twaleka ‘kukaanya bangi’ bikishekishe, tatukebalondo byabekala bedibwe mwimu sunga bantu batwiuku’shi abapu kufubila Yehowa munda mwa mafuku ebungi. (Yu. 16, Kilombeeno kipya 2014) Byabya su bakutwa lulamato sunga’shi betuukila abo ba nabene mu kakongye, tatushimisha lukumiino lwetu mwi Yehowa sunga kuleka kumufubila. w20.01 29 ¶9-10

Bu byatudi “baana [ba Yehowa] baadi mufule,” atukitshi mwetu mooso bwa kumwambula. Atwambula ngikashi yaaye pa kwikala na kifulo, kalolo, na kufwila bangi lusa. Nsaa i bangi bash’abauku Efile Mukulu abamono mwikelo wetu wibuwa, mbilombene kwibatakula mu kulonga bya kumwiuka ngofu. (1 Mp. 2:12) Baledi bena Kidishitu abitungu bakitshine bana babo myanda mu mushindo wabetukitshinaa myanda kwi Yehowa. Su abakitshi byabya, bana namu mbalombene kukumiina kudya bu kuuku na Nshetu sha kifuko. Atusankilaa Nshetu e mwiyilu Yehowa, na atukumiinaa’shi bangi bamwiukye. Atupushaa mu mashimba etu nka bibadi bipushe Mfumu Daavide, bafundjile’shi: “Naketumbîsha mwadi [Yehowa].” (Mis. 34:3, EEM) Mbilombene kwikala naminyi su atwikalaa na buufu? Twi kunying’eshimba naminyi? Atunyingi mashimba nsaa y’atwiuku’shi Yehowa asankaa p’atulongyesha bangi bwa kumwiuka. Yehowa etupa bukome bwatudi nabo lukalo. Badi mukwashe bakwetu ba mu siekele a kumpala bwabadya kwikala na mashimba anyingye, etukwasha dingi n’atwe.​—1 Tes. 2:2. w20.02 11 ¶12-13

Bantu bebungi bakwete kulonga Bible bakwete kwenda kumpala mpa na kubatshishibwa. Anka, abimweka’shi bangi namu bakwete kwikaka bwa kufika balongi. Abakumiina penda kulonga kadi tabakumiina kubatshishibwa. Su okwete kulonga Bible na muntu, atuuku’shi okumiina kumukwasha bwa kutumikila byabya byalongo na bwadya kufika mulongi a Kidishitu. Yehowa akumiina’shi bantu bamufubile mwanda mbamufule. Byabya, kepatshila ketu nka kukwasha balongi bwabadya kupusha’shi Yehowa kwete kwibapasukila na mmwibafule ngofu. Atukumiina kwibakwasha bwabadya kumona Yehowa bu “Nshe-baana ba nshiye, naa àsàmbiilaa bakashi-kilele.” (Mis. 68:6) Su balongi bobe ba Bible bekala na lutumbu bwa kifulo ki nakyo Efile Mukulu bwabo, byabya abikumu mashimba aabo, na kifulo kyabo bwaye akitama. Byabya, kwasha balongi bobe bwabadya kupusha’shi Efile Mukulu eetu sha kifulo akumiina’shi bakapete muwa wa looso, na’shi akumiina kwibakwasha bwabadya kwiupeta. w20.01 3 ¶7-8

Mpoolo mutumiibwa badi na kwiyisha, badi auku’shi e na lukalo lwa kunyingishibwa na bakwabo. Tabadi atshinyi’shi bangi be kumumona bu muntu shii kapu mwanda bakwabo abamunyingisha mu nkalakashi. (Kol. 4:7-11) P’atukumiina na kwiyisha kooso’shi twi na lukalo lwa kunyingishibwa, bakwetu abekala na muloo wa kwitukwasha nsaa yatudi na lukalo. Mpoolo badi auku’shi Bifundwe abimunyingisha. (Lom. 15:4) Abimupa dingi binangu bya kumona bya kukila na lukalakashi. (2 Tim. 3:15, 16) Pabaadi mu lukano mu Looma bwa musango wa kabidi, Mpoolo bapushishe’shi lufu lwaye taludi peepi. Batekyele Timote bwadya kufika luntuluntu na amutwadile “mifungofungo.” (2 Tim. 4:6, 7, 9, 13) Bwakinyi? Pa mwanda mu mifungofungo mubadi kipindji kya Bifundwe bya kina Ebelu bibadi Mpoolo abadika mu kwilongyela kwaye kwa Bible. Su atwambula Mpoolo pa kwilongyela Eyi dy’Efile Mukulu, Yehowa afubisha Bifundwe byaye bwabidya kwitupa butaale sunga twekala na nkalakashi i naminyi. w20.02 23-24 ¶14-15

Elifaze, Bildade na Sofare t’ababaadi bakishe mafuku bwakunangushena pabitale mushindo wabadi balombene kukwasha Yoobo nya. Kadi, abaadi abanangushena byakushinkamiisha Yoobo’shi mmukite mulwisho. Abakwile ndambo a myanda ibuwa, kadi bibungi bibabadi bakule pabitale Yoobo na Yehowa bibaadi bibubi na bya madimi. Abaadi badimbiile Yoobo’shi mmuntu e bubi. (Yob. 32:1-3) Yehowa bakitshine kinyi? Bebafitshiile munda ngofu. Bebambile’shi mba sha-mombe, na bebalungwile bwabadya kwenda kwi Yoobo bwa’shi ebatekyele. (Yob. 42:7-9) Kileshesho kibubi kya Elifaze, Bildade, na Sofare akitulongyesha myanda ibungi. Wa kumpala, tabitungu tutshibile bakwetu kiimu nya. (Mat. 7:2-5) Pamutwe pa kwibatshibila kiimu, abitungu twibateemeshe kalolo kumpala kwa kwakula. Paapa, atwikala na mushindo wa kupusha lukalakashi lwabo. (1 Mp. 3:8) Wa kabidi, nsaa yatwakula, abitungu twikale bashinkamishe’shi bishima byetu bibuwa na myanda yatwakula ngya binyi. (Ef. 4:25) Wa kasatu, Yehowa ataa myanda yatwakula bwa bangi na muulo ukata. w20.03 22-23 ¶15-16

Kebungi, nsaa yatulongyesha bangi pabitale Yehowa atunyisha ku mwiuka kalolo. Kileshesho, atumonaa lusa lwa Yehowa nsaa y’etukwasha bwa kupeta bantu abakumiina kwikala ba kuuku baye. (Yo. 6:44; Bik. 13:48) Atumono bukome bw’Eyi dy’Efile Mukulu, mwanda adikwasha bantu batulongo nabo Bible bwabadya kuleka bikitshino bibubi na kushintuula nshalelo aabo. (Kol. 3:9, 10) Atumono lwishinko lwaye bwa bantu ba mu teritware etu mishindo ibungi bwabadya kulonga pabimutale na kupashibwa. (Lom. 10:13-15) Byabya, sunga twekala bapwe kufubila Yehowa munda mwa bipwa bungi kinyi, tatukumanga kwakula’shi bu kuuku bwatudi bapwe kwikala naye mbulombane. Mushindo umune watudi balombene kulesha’shi atwata bu kuuku bwetu naye na muulo nyi pa kwisamba naye mu luteko. Bwakwikala mu bu kuuku bwi bukopo na muntu kampanda, abitungu wesambe naye nsaa yoso. Byabya, bwa kwikala mu bu kuuku bwi bukopo n’Efile Mukulu, mutekye nsaa yoso na totshinanga kumulunga byopusha na bi mu bingangu byobe. w19.12 19 ¶11, 13-14

Nsaa yatunangushena ku uno mwanda atunyingishibwa ngofu! Bu byadi Mfumu a Bufumu bw’Efile Mukulu, akakatusha kafutakanyi koso ketufwishile ndumbulwilo a Satana. (Yesh. 65:17; 1 Yo. 3:8; Kibaf. 21:3, 4) Bino abitupa lukulupilo lukile buwa! Na sunga Yesu mmwitupe mudimo wibukopo, e netu, etukwasha mu ano mafuku a ku nfudiilo kwa uno ndumbulwilo. (Mat. 28:19, 20) Byabya abitunyingisha ngofu! Kusambibwa, lukulupilo, na kunyinga nyi mbintu byatudi nabyo lukalo bwa kwikala na butaale. Mushindo kinyi dingi odya kulama butaale mu binangu nsaa yodi mukalakashwe na bitompwanga? We kwibikita nsaa ywambula myanda ibakitshine Yesu. Wa kumpala, ela luteko na otungunukye na kuteka. Wa kabidi, kookyela Yehowa, na olungule na kisumi sunga nsaa yabikwikela bukopo bwa kwibikita. Na wa kasatu, kulupila mwi ba kuuku bobe balombene nkukwasha poodi mu bitompwanga. Paapa, butaale bw’Efile Mukulu abulama binangu n’eshimba dyobe. (Fid. 4:6, 7) Anka bu Yesu, okambila bitompwanga byoso.​—Yo. 16:33. w19.04 13 ¶16-17