Mweshi wa 8

Sunga nsaa ibadi abingwabingwa, Yesu badi na butaale bwa mwishimba mwanda badi auku’shi kwete kusangasha Nshaaye. Badi mushaale na kukokyela nsaa yabibadi bukopo bwadya kukookyela. Badi mufule Nshaaye aye nkutuula kufubila Yehowa pa mbalo ya kumpala mu muwa waye. Kumpala kwa kufika pa nsenga, badi bu “mukwashi” a Efile Mukulu. (Nki. 8:30) Na pabadi pa nsenga, badi alungula bangi na katshintshi kooso pabitale Nshaaye. (Mat. 6:9; Yo. 5:17) Wawa mudimo ubadi upe Yesu muloo wibungi. (Yo. 4:34-36) Twi balombene kwambula Yesu pa kukokyela Yehowa na “kufwimisha [nsaa yooso] mufubo wa Nfumu.” (1 Kod. 15:58) Nsaa yatudi “bepaane ngofu” mu mudimo wa bulungudi, atupete mushindo wa kwikala na mweneno ebuwa a myanda yetu. (Bik. 18:5) Kileshesho, baba batufumankana nabo mu bulungudi bakwete kupeta myanda ikile mpa na yetu. Anka, nsaa yabalongo bya kufula Yehowa na kutumikila elango dyaye, nshalelo abo alumbuluka na abapete muloo wibungi. Nsaa yoso yatumono byabya, atushinkamisha’shi Yehowa etupasukila. w19.04 10-11 ¶8-9

Bano bantu abakitshine mwabo mooso bwa kukambila bikudi bibi. Mikanda yabo ya maji ibadi muulo ukile. Kadi pamutwe pa kwiyipa bangi bantu sunga kwiyiudisha, babadi beyishiikye kaalo. Babadi na lukalo lukata lwa kusangasha Yehowa kukila bungi bwa makuta ababadya kupeta. Twi balombene kwambula kileshesho kya baba bena Kidishitu ba mu siekele a kumpala naminyi? Bibuwa tukatushe bintu byoso bilombene kwikala mu kwipushena na myanda ya manga. Mwanka mwi myoshi, bikanu sunga bingi bintu byabafwalaa kwi bantu sunga kutula bwa kwikalwila ku bikudi bibi. (1 Kod. 10:21) Taluula mushindo obe wa kukisha kapapi kalolo. Eyipushe’shi: ‘Nabadikaa mikanda, ma jurnale, sunga bingi bintu byabadi bafunde ku Internete pabitale manga? Ata kitshibilo kya kusangula bintu bikumbene nkukwasha bwa kwikala kula na bintu byoso byabadi bashikwe kwi Yehowa. Abitungu tukite mwetu moso bwa kwikala “mwishimba mushi kintu kya kutopekwa” n’Efile Mukulu eetu.​—Bik. 24:16, EEM. w19.04 22-23 ¶10-12

Byabya, nsaa yabalungula bakulu’shi muntu bakitshi mulwisho ukata, abitungu bataluule myanda ibungi. Kepatshila ka kumpala ke nako bakulu, nka kwikasha eshina dy’Efile Mukulu di selele. (Lv. 22:31, 32; Mat. 6:9) Kangi kepatshila ke na muulo ukata, nka kukwasha bakwabo bena Kidishitu mu kakongye, bwabadya kwifubwila peepi na Yehowa, kunyingisha na kukwatshishena baaba babadi balwishishe. Dingi, bakulu mbalombene kutaluula su muntu mukite mulwisho ukata belanga kwishimba, na kukimba byabadya kumukwasha bwa’shi alushe kipwano kyaye na Yehowa. (Shak. 5:14, 15) Mwina Kidishitu akitshi mulwisho ukata penda bwa kupudisha malaka aaye a mbidi, kwete kukumba mu kikudi. Bino abilesha shi, te mu kipwano kibuwa na Yehowa nya. Bakulu be nka bu ba munganga. Bakwete kwitatshisha bwa ‘kupasha e na mukumbo [sunga yawa mukite mulwisho].’ Malango aabo aatukila mu Bifundwe ngalombene kumukwasha bwadya kulumbuula kipwano kyaye n’Efile Mukulu, kadi bi kukitshika byabya nka su belanga kwishimba ngofu.​—Bik. 3:19; 2 Kod. 2:5-10. w19.05 10 ¶10-11

Yehowa mulombeene kwitupa lukalo lwa kufuba. Bu kileshesho, twikumona’shi mu kakongye sunga pasha pa kakongye mwi muntu e na lukalo lwa bukwashi sunga’shi kwi mudimo kampanda awukyebe kukita. Yaya nsaa twibalombeene kwiyipusha’shi: ‘Nkinyi kyadya kukita bwa kukwasha?’ Pangi twi na lukalakashi lwa kufuba mudimo kampanda na tatuku kya kukita bwa kwiukita kalolo. Pangi kunyima kwa kubadika bifundwe kampanda bya mu Bible, we kwiyipusha’shi: ‘Ne kufuba na kino kifundwe bwa kukwasha bangi naminyi?’ Nsaa aimono Yehowa atunangushena mushindo watudya kukwasha, paapa mulombeene kwitupa lukalo lwa kufuba. Yehowa mulombeene dingi kwitupa bukome bwa kufuba. (Yesh. 40:29) Ekwitupa kikudi kiselele bwa’shi tunyishe kwikala na ngobesha ibungi. (Efi. 35:30-35) Kubukwashi bwa ndubulwilo aye, Yehowa ekwitulongyesha mushindo watudya kufuba midimo ilekenelekene. Su omono’shi twe bya kulombasha mudino kampanda, teka bukwashi. Na dingi epushe bulungantu bwa kuteka Nshetu e mwiyilu sha kalolo na “bukome bushii bwa kupwandjikisha.”​—2 Kod. 4:7; Luk. 11:13. w19.10 21 ¶3-4

T’abitukanyisha pa kumona ba pa nsenga abanyingisha kwikala na binangu bya kwifula nya. Ungi mukanda aulesha’shi, mu bipwa bya 1970 na kukila paapa “kubadi mikanda ibungi ibaadi ayikwatshishena binangu bya kwifula.” Ingi mikanda “ayitakula abeyibadika bwa kuuka na kukumina binangu bya kwifula na kwitatula muyile byabadi.” Banda kutala kileshesho kya mwanda ubabadi baleshe mu wawa mukanda: “Efule obe nabene mwanda we buwa kukila bangi bantu boso.” Wawa mukanda aulesha’shi, “muntu mmulombene kwiatshila kitshibilo kya kukita kyakya kyakumina kwikala, na kukita kyakya kyamono’shi kibuwa na kilombane.” Tobopushishe bino binangu su? Satana balungwile Eeva bwashi akite kintu ki byabya. Bambile’shi: “Ekala buu Efile, na mulombene kushinguula buuwa na bubi.” (Kib. 3:5) Lelo uno, bantu bebungi abetatulaa mu kipaso kyabapwandjikisha shi takwi muntu sunga Efile Mukulu, mulombene kwibalungula kibubi na kibuwa. Bu kileshesho, bino binangu abimwenekaa bikishekishe mu kipaso kyabamonaa dibaka kwi bantu. w19.05 23 ¶10-11

Kwi nsaa ibadi Nfumu Daavide na twinyongoshi. Banda kutala nkalakashi ibadi mupete. Badi etopeka mwanda wa milwisho ibadi mukite kala. (Mis. 40:12) Absalome mwan’aye a kifulo badi mumutombokyele, dingi babadi bayipee Absalome. (2 Sam. 15:13, 14; 18:33) Na umune a ku ba kuuku ba p’eshimba ba Daavide badi mumulwishishe. (2 Sam. 16:23–17:2; Mis. 55:12-14) Misambo ibungi ibadi Daavide mufunde, ayilesha bibadi mubofule kwishimba mpa na lukulupilo lwi bukopo lubadi nalo mwi Yehowa. (Mis. 38:6-11; 94:17-19) Kunyima mufundji a misambo babangile kulakila nshalelo a bantu bebubi. Pangi badi mwana a Asafe mwina Leevi, badi afubu ku ‘mbalo-iiselele y’Efile Mukulu.’ Uno mufundji a misambo badi na nkalakashi ya mu binangu, bibadi bimukutshishwe muloo. Babangile mpa na kumona’shi myabi yapete mu kufubila Efile Mukulu ta ngilombane.​—Mis. 73:2-5, 7, 12-14, 16, 17, 21. w19.06 17 ¶12-13

Satana afubaa na nkalo yetu ya ku mbidi. Twi bantadjikwe na lukalo lwa kulonga mudimo ulombene kwitukwasha bwa kulombasha nkalo yetu na ya kifuko kyetu. (1 Tim. 5:8) Twi balombene kuuka wawa mudimo pa kutwela mu kalasa na kwikala balongi be na kishima. Anka abitungu twikale na budimu. Mu maumbo ebungi, bilongyelo bikwete kulongyesha balongi kushii penda mudimo nya, kadi bikwete kwibalongyesha dingi binangu bya bantu. Bu kileshesho, bakwete kunyingisha balongi bwa kupela kukumiina’shi Efile Mukulu e kwanka na kubepuula Bible. Abalungula balongi shi muntu ooso e na kinangu akumiina’shi bintu mbiitukile. (Lom. 1:21-23) Aa malongyesha ta e mu kwipushena na “binangu by’Efile Mukulu.” (1 Kod. 1:19-21; 3:18-20) Ikala na kitshibilo kya kupela kukwatshibwa ku bupika bwa “madimi aatukila ku byuubishi bya bantu” ba mu ndumbulwilo a Satana. (Kol. 2:8) T’okumanga kutadiila Satana bwadya nkudimba. (1 Kod. 3:18) T’otadilanga Satana bwadya kubulakasha mmweneno oobe bwa Yehowa. Ikala na nshalelo mwipushene na miiya ya Yehowa. Akupu t’otadilanga Satana bwadya nkulubisha bwa kukutwa kukookyela miiya ya Yehowa. w19.06 5 ¶13; 7 ¶17

Sunga osangula kwisambila mwanda kinyi, tula binangu kwi bantu abakakuteemesha. Nangushena pabitale byabidi bikumbene kwibakwasha su abalongo akilongyesha Bible. Nsaa ywesamba nabo, bi na muulo bwashi webateemeshe na kunemeka mweneno aabo. Su bokitshi byabya okebapusha kalolo, na abakakumiina nkuteemesha. Kumpala kwa’shi muntu ate kitshibilo kya kulonga Bible, we mulombene kukisha nsaa ibungi na kwitatshisha bwa kwalukiila mu kwibatala. Bwakinyi? Mwanda bantu mbalombene kukutwa kwikala kwanka nsaa yatwibalukiila. Dingi, we mulombene kwalukiila misusa ibungi mu kwibatala kumpala kwa’shi bakumiine kulonga Bible. Tentekyesha’shi mutshi aukulaa kalolo su bakwete kwiwela mema nsaa yooso. Bi mumune, kifulo kya muntu bwa Yehowa na Kidishitu, nkilombene kutama nsaa yatukwete kwisamba myanda ya Mwiyi dy’Efile Mukulu misango ibungi. w19.07 14 ¶1; 15-16 ¶7-8

Nkinyi kibadi akikyebe kwamba Yesu? Yesu tabaadi akyebe kwamba’shi bena Kidishitu abakasanka pabebashikwa nya. Kadi baadi etudimusha pabitale abiketufikila. Tatwi ba pano pa nsenga nya, mwanda tukwetu kutumikila malongyesha a Yesu mu muwa wetu na kulungula mukandu ubaadi alungula. Nyi bwakinyi, bantu ba pa nsenga mbetushikwe. (Yo. 15:18-21) Atukumiina kusankisha Yehowa. Su bantu betushikwa mwanda wa’shi twibafule Nshetu, wawa mmwanda wabo. Tatunangushenanga’shi tatwina muulo su bantu tambetufule. Ta twiuku nsaa ayikabanga kubingwabingwa sunga kukandikibwa kwa lulangwilo lwetu bwa Yehowa nya. Anka, atwiuku’shi twi kubanga kwilumbuula binobino pa kunyingisha kipwano kyetu na Yehowa, kunyinga eshimba, na pa kulonga bya kunyingiila mushikwa wa bantu. Su twelumbuula kubanga binobino, abiketukwasha bwa kutungunuka na kufubila Yehowa mu mafuku aafiki. w19.07 6 ¶17-18; 7 ¶21

Nsaa yatulongo Bible na muntu shi mulangwidi, bibuwa tutungunukye na kumukwasha bwadya kunyisha kukumiina’shi Efile Mukulu e kwanka. Abitungu dingi tumukwashe bwadya kunyingisha lukumiino lwaye mu Bible. Bino mbilombene kuteka’shi twibambulwile ingi myanda misusa ibungi. Nsaa yoso yatulongo naye, abitungu tumutushiishe bishinkamisho abilesha’shi Bible nyi Eyi dy’Efile Mukulu pa kwisamba naye mu kikoso pabitale matemuki a mu Bible abaadi alombane, abyakula Bible myanda ya sianse na ya kala nka byayidi, na abitukwasha Bible mu nshalelo a kwifuku n’efuku. Atukwasha bantu bwabadya kwikala balongi ba Kidishitu pa kwibafula, byabekala balangwidi sunga bashi balangwidi. (1 Kod. 13:1) Nsaa yatwibalongyesha, lukalo lwetu ndwa kulesha’shi Efile Mukulu mwitufule na akumiina’shi tumufule namu. Ku kipwa kyoso, binunu bya bantu abaadi abatompo kukumiina myanda ya bipwilo sunga bashibaadi abeyikumiina, bakwete kubatshishibwa mwanda bakwete kulonga bya kufula Efile Mukulu. Byabya, ikala na mwemeno ebuwa, na oleshe kifulo na kupasukila bantu ba mishindo yoso. Ebateemeshe. Tompa kunangushena byabapusha. Ebalongyeshe byabadya kwikala balongi ba Kidishitu ku kileshesho kyobe. w19.07 24 ¶16-17

Bana bakashi ba Shalume, babaadi munkatshi mwa baaba babaadi Yehowa mufubishe bwa kulumbuula bimano bya Yeelusaleme. (Ne. 2:20; 3:12) Sunga’shi nshabo baadi mwana a nfumu, bana ba Shalume abaadi bakumiine kukita mudimo wi bukopo na wi masaku. (Ne. 4:15-18) Lelo uno, bakwetu bakashi bebungi bakwete kukumiina kukwasha na muloo oso mu mifubo i selele i pabwayo ya nsaa yoso​—bu mudimo wa lwibako na wa kubamba mashibo abadi balambule kwi Yehowa. Ngobesha, muloo, na lulamato bi na muulo bwa kukita uno mudimo. Yehowa bakwashile Tabita bwadya kukita “myanda iibungi iibuuwa na kupeesheena bya-pa-lusa.” (Bik. 9:36) Mwanda w’eyikashi dyaye dya kupaana na kalolo, bantu bebungi abamudidile ngofu pabafwile. Kadi, babasangele bikata pabaadi Mpyeele mumusangule. (Bik. 9:39-41) Nkinyi kibatulongyela kwi Tabita? Byatwikala bantu bakulu sunga bana bakinga, balume sunga bakashi, twi balombene kukita myanda kampanda bwa kukwasha bakwetu bena Kidishitu. w19.10 23 ¶11-12

Mushindo kinyi watudi balombene kukokosha mukwetu? Mulongi a Bible baadi etatshisha bwa kuleka kutoma malwa, mpa na bibobeesha kuleka kwiatoma. Bamono’shi abitungu alekye kwiatoma bwa loso. Bashintuula myanda ibungi mu muwa waye na babatshishibwa. Mwenda mafuku, ungi mwina Kidishitu bamwitamina ku musangeelo na ba mupa malwa na kumulungula’shi: “Binobino todi mwina Kidishitu; we na kikudi kya Yehowa. Kimune kya ku kikuba kya kikudi kiselele nyi mbutontshi bwa mbidi. Su wekala na butontshi bwa mbidi, wekala na ngobesha ya kutoma tupela.” Nangushena kilombene kukitshika su uno mukwetu alonda dino elango dibubi! Bisangilo byetu abitukwasha bwa kutumikila elango di mu kifundwe kya lelo. Akitutentekyesha bintu bi na muulo ku meso kwa Yehowa na bya kutumikila byatulongo bwa kwikala batookye selele. Naabitunyingisha dingi bwa kufula Yehowa na bakwetu n’eshimba dyetu dyoso, atukakitshi mwetu moso bwa kupela kukokosha bakwetu. w19.08 10 ¶9; 11 ¶13-14

Bantu abamweneka bu bekulupile na abalesha byabapwandikisha tabekalaa nka na kwitatula nya. (Yo. 1:46, 47) Anka, Byatwikala atuuku kwakula kalolo sunga na ngobesha kampanda, boso bwetu abitungu twitatshishe bwa kwikala beyishe. Banda kutala kileshesho kya Mpoolo mutumibwa. Yehowa badi mufube naaye ngofu bwa kutula tukongye mu bibundji bilekene. Pangi aye mmukite midimo ibungi kukila bangi batumiibwa ba Yesu Kidishitu booso. Anka Mpoolo tabadi na kwitatula munkatshi mwa bakwabo nya. Baadi mwakulule kalolo’shi badi na kipwano kibuwa na Yehowa penda mwanda Yehowa badi mumuleshe kalolo kakata, kushii mwanda wa ngikashi yaaye sunga bwa bintu bibadi mukite nya. (1 Kod. 15:10) Dino nyi elango dikata dya kwiyisha dibadi Mpoolo mutushe mu mukanda ubadi mutumine bena Kodinda​—bikishekishe nsaa yatutentekyesha’shi bangi balume ba mu kakongye babadi abakimbi kwilesha bu be kunundu kwa Mpoolo!​—2 Kod. 10:10. w19.09 3 ¶5-6

Kabingilo kakata aketukutshishwa kukookyela Yehowa nyi mwanda wa mulwisho na kukutwa kwa kupwidjika kwatudi bapyane. Nyi bwakinyi nsaa yoso tatukwete kukookyela Yehowa. Nsaa ibaadi Adame na Eeva bakutwe kukookyela Yehowa pa kudya kikuba, abaadi baate kitshibilo pabitale kibuwa na ki bubi. (Kib. 3:22) Lelo uno, bantu bebungi bakwete kwilwankana Efile Mukulu nka bu bibakitshine Adame na Eeva. Sunga tatwi bu baaba bantu mwanda atwiuku na twi bafule Yehowa, mbilombene kwitwikela bukopo bwa kukita kyakyebe. Mpoolo mutumiibwa badi mufumankane na uno mwanda. (Lom. 7:21-23) Anka bu Mpoolo, atukumiina kukita bibuwa ku meso kwa Yehowa. Kadi abitungu tulwe na kyoso akitutakula mu kukita myanda ibubi. Kabingilo ka kabidi akalesha bwakinyi bi kwikala bukopo bwa kukookyela Yehowa mpa mwanda wa bipikwa na mweneno a bantu ba mbalo yatudi bakudile. Mweneno a bantu bebungi mwikutwene na akikyebe eshimba dya Yehowa, na mbilombene kwikala bu ngoshi y’efuku dyoso bwa kupela kulonda mweneno aabo. w19.09 15 ¶4-6

Oso a kwatudi abitungu ekale na nkatshinkatshi bwa kusangula bya kukita na bukome bwaye. Byabya, abitungu tudimukye pabitale kyatukyebe kukita. Bu kileshesho, twi kulwisha bukome bwetu pa kukimba bintu bya ku mbidi. Tentekyesha kibaadi Yesu mulungule ungi nsongwalume mpeta baadi mumwipushe’shi: “Nkite kinyi bwa kupeta muuwa wa looso?” Baadi muntu ebuwa mwanda evanjile a Maako alesha’shi Yesu baadi ‘mumufule.’ Yesu baadi mwitamine uno nfumu mukinga. Uno muntu baadi akumiina kulonda Yesu, anka tabaadi akumiina kuleka bupeta bwaye. (Mak. 10:17-22) Nyi bwakinyi bapelele kiita kibaadi Yesu mumulungule bwa kutwala, aye nkutungunuka na kwikala bu mpika a “fwalanga.” (Mat. 6:24) Obe okumiina kusangula kinyi? Efuku dyoso abitungu tunangushene pabitale kyatudi batuule kumpala mu muwa wetu. Bwakinyi? Bwashi tushinkamishe su tukwete kufubisha bukome bwetu kalolo. w19.09 24 ¶17-18

Mudimo wetu wa bulungudi awikala nka kwanka mpa na apakamba Yehowa’shi kubapu. Kubashala mafuku bungi kinyi bwa’shi bantu bakimbe bya kuuka Yehowa Efile Mukulu na Yesu Kidishitu? (Yo. 17:3) T’atuuku nya. Atuuku’shi mpa na apakabanga mpombo ikata, baba boso “be na mashimba alombane bwa muwa wa looso” abatungunuka na kukumiina mukandu wibuwa. (Bik. 13:48) Mbikunyi byatudi balombene kukwasha bano bantu kumpala kwa’shi dyadya efuku difikye? Ku bukwashi bwa ndumbulwilo aye, Yehowa kwete kwitupa kyoso kyatudi nakyo lukalo bwa kulambukisha bantu bya binyibinyi. Bu kileshesho, atulongyeshibwaa ku lubingo loso mu bisangilo bya munkatshi mwa lubingo. Bino bisangilo bikwete kwitukwasha bwa kubanga mwisambo mu bulungudi na bya kwalukiila bantu. Na su wesamba kalolo na muntu asankila bya binyibinyi, omulekyela trakte sunga jurnale, apete nsaa ya kumubadika mpa na nsaa yokalukiila bwa kumutala dingi. Kufuba ngofu mu mudimo wa bulungudi mweshi oso nyi mbushito bwetu. w19.10 9 ¶7; 10 ¶9-10

Yehowa baadi mulee Simeone, muntu mununu sha lulamato baadi mu Yeelushaleme’shi taafu kumpala kwa kumona Mesiya. Uno mulayilo ubaadi unyingishe Simeone ngofu, sunga baadi mutengyele bipwa bibungi bwa kumona Mesiya. Yehowa baadi mwelele Simeone mwabi mwanda wa lukumiino na lulamato lwaye. Dingi efuku “ku bukome bwa kikudi,” bayile ku ntempelo. Kwakwa bakamwene Yesu pa kii kyalaala, na Yehowa nkufuba na Simeone bwa kutemuka pabitale uno mwana akekala Kidishitu. (Luk. 2:25-35) Sunga bibaadi Simeone mufwe kumpala kwa’shi Yesu abangye mudimo waye wa pa nsenga, baadi na lutumbu bwa bibaadi Yehowa mufube naye mu kino kipaso. Na ingi myanda ibuwa ibungi ayimutengyela mu mafuku aafiki. (Kib. 22:18) Twibalombeene natwe namu kulesha lutumbu bwa bipaso byoso bikwete abitufubisha Yehowa mu mudimo waye. w19.10 22 ¶7; 23 ¶12

Byatwikala na makuta e bungi sunga apeela, abitungu tulame mashimba eetu. Mushindo kinyi? Tulekye kufula mapeta. Dingi tatutuulanga midimo ya ku mbidi kumpala kwa mufubo wa Yehowa. Mbikunyi byodya kutundula’shi bino bikwete nkukitshikila? Tala ingi nkoonko yodya kwiyipusha: ‘Nsaa yandi mu bisangilo sunga mu bulungudi, nanangushenaa ku mudimo wande wa ku mbidi su? Nekalakashaa pabitale makuta ankekala nao mu mafuku aafiki su? Ami na mwina dibaka naami twi na bilumbu mwanda wa makuta na bintu bya ku mbidi su? Ne kukumiina kukita mudimo wa ku mbidi wabamonaa kwi bangi bu ushadile, kadi ukwete kundekyela nsaa ibungi ya kufubila Yehowa su?’ (1 Tim. 6:9-12) Nsaa yatutaluula ino nkoonko, tutentekyesheyi’shi Yehowa mmwitufule na alombashaa uno mulayilo kwi baaba bamulamate: “Nya, ntankupoosola, ntankusumbusheena.” Nyi bwakinyi Mpoolo mutumiibwa bafundile’shi: “Lwabi lwa mfwalanga talwinumunanga mu nshaaleelo eenu.”​—Eb. 13:5, 6. w19.10 29 ¶10

Nsaa yatufubu pamune na bakwetu bena Kidishitu na kutala ngikashi yabo ibuwa, atulongyela ingi myanda kwabaadi, na atwifubwila peepi nabo. Bu kileshesho, opushaa naminyi nsaa yanudi mu bulungudi na kuuku oobe, opusha kwakwete kwakula n’eshimba dinyingye pabitale Yehowa na mpángo yaye na kushinkamisha kooso? Kushi mpaka, onyisha kumufula ngofu. Ungi mukwetu mukashi abetaminaa bu Adeline e na bipwa 23, baadi mulungule umune a ku ba lole baye abetaminaa bu Candice, bwabadya kwenda mu kulungula mu mbalo yabasha bakambaa kulungula mukandu wibuwa. Adeline amba’shi: “Atukumiinaa kulungula na kisumi na kwikala na muloo. Atukumiinaa’shi betunyingishe bwa kumona bya kutungunuka na kupa Yehowa bintu byetu bya muulo.” Kufuba pamune nkwibakwashe naminyi? Adeline amba’shi: “ku nfudiilo kw’efuku, atwisambaa pabitale byatupusha, pabitale kibetunyingisha mu miisambo yetu na bantu mu bulungudi, na mushindo watumonanga bukunkushi bwa Yehowa. Ino miisambo ayitukwasha bwa kwiukena kalolo.” w19.11 5 ¶10-11

Kala, musalayi baadi aluka ku nshibo kushi ngabo aye, bibaadi mwanda wi bufu bukile. Muntu auku myanda ya kala a mu Looma abetamina bu Tacite bafundile’shi: “Su musalayi aleka ngabo yaye, bibaadi mwanda wi bufu bukata.” Nyi bwakinyi bibaadi abitungu’shi musalayi alame ngabo aaye bibukopo. Atushaala bakwate ku ngabo eetu a lukumiino bibukopo pa kutwela misusa yoso mu bisangilo na kwakula pabitale eshina dya Yehowa na Bufumu bwaye kwi bangi bantu. (Eb. 10:23-25) Na dingi, pa kubadika Eyi dy’Efile Mukulu efuku dyoso na kuteka Yehowa bwadya kwitukwasha tutumikile byadyamba mu byoso byatukitshi. (2 Tim. 3:16, 17) Yaya nsaa, kina ngoshi kyoso akifubisha Satana bwa kwitulwisha takitukitshi kintu nya. (Yesh. 54:17) “Ngabo a lukumiino” etukalwila. Atushala banyingye, na atutungunuka na kufuba pamune na bakwetu bena Kidishitu. Atupete bibungi kukila penda kutshokola ngoshi atwikala na mwabi wa kwikala ku lupese lwa Yesu nsaa yakatshokola Satana na bantu baye.​—Kibaf. 17:14; 20:10. w19.11 19 ¶18-19

Su we mufunde myanda yokyebe kukita, abikubofwila bwa kwiyilombasha. (1 Kod. 14:40) Kileshesho, tusaka twa bakulu mbetulungule’shi abitungu kusangula mukulu mukumbene kufunda kitshibilo kyoso kya kasaka ka bakulu, mpa na kusangula mukulu akwikilombasha na nsaa ya kwikilombasha. Su bakulu abakitshi bino, abibabofwila bwabadya kulombasha bitshibilo byabo. We kwibikita namu n’obe mu myanda yobe. Bu kileshesho, we kufunda myanda ya kukita efuku dyoso, na kufunda mwanda okyebe kukita pa mbalo ya kumpala. Su bokitshi bino, abikubofwila bodya kupudisha kyakya kitobangile mu nsaa ipeela. Anka abitungu wetatshishe. Abitungu kwitatshisha bwa kulonda myanda yodi mufunde, na kupudisha kyakya kyodi mupwe kubanga. (Lom. 12:11) Mpoolo mutumiibwa balungwile Timote’shi: “Epaane” na ekala na “katshintshi” bwa kwikala mulongyeshi ebuwa. Twi kufubisha dino elango dya Mpoolo mu kyoso kyatukitshi bwa Yehowa.​—1 Tim. 4:13, 16. w19.11 29-30 ¶15-16

Pabadi Yehowa mutekye Moyiise bwa kutuusha mwilo wa Isaleele ku bupika mu Ejiipitu na bwa kwiukunkusha, tabaadi emono bu mulombane nya, nyi bwakinyi baadi alungula Yehowa misusa yoso’shi ntshimulombane. Efile Mukulu baadi amwalula na kalolo koso, na baadi amukwasha. (Efi. 4:10-16) Bu kipeta, Moyiise baadi na ngobesha ya kulungula mukandu wa kiimu kwi Faraone. Akupu, Moyiise bamwene bibaadi Yehowa mufubishe bukome Bwaye mu mushindo wa kukanya p’Aye kupasha bena Isaleele na kubutula Faraone na bilwilo byaye mu Kalunga kamonga. (Efi. 14:26-31; Mis. 136:15) Kunyima kwa Moyiise kwibatusha mu Ejiipitu, bena Isaleele abaadi nka abedidi misusa yoso. Sunga mbyabya, Moyiise bamwene bibaadi Yehowa na lwishinko bwa mwilo ubaadi mutuushe mu bupika. (Mis. 78:40-43) Moyiise bamwene dingi bibaadi Yehowa muleshe kwiyisha kukata nsaa Ibaadi mushintuule binangu Byaye pabaadi Moyiise mumutekye’shi tabutulanga bena Isaleele. (Efi. 32:9-14) Kunyima kw’abo kutuka mu Ejiipitu, kipwano kya Moyiise na Yehowa kibafikile bukopo nka bu’shi baadi amono Nshaye e mwiyilu.​—Eb. 11:27. w19.12 17 ¶7-9

Balongi ba Yesu bebungi abaadi bena Ngalileeya. Kukitshina kisangilo ku mwengye wa Ngalileeya​—pamutwe pa ku nshibo ya muntu mu Yeelusaleme kubaadi mushindo wibuwa wa kubunga bantu bebungi. Na dingi, Yesu baadi mupwe kufumankana na balongi baye 11 mu nshibo ku Yeelusaleme kunyima kw’aye kusanguka. Su Yesu baadi na lukalo lwa kwibapa’nka’abo dino eyi dya kulungula mukandu wibuwa na kwikasha bantu bu balongi, badya kwikala mwibikitshine’nka kwakwa ku Yeelusaleme pamutwe pa kwibalungula dingi’shi bende ku mwengye wa Ngalileeya na baaba bana bakashi na bangi bantu. (Luk. 24:33, 36) Eyi dya Yesu dya kwikasha bantu bu balongi tadibaadi dimeene’nka kwi bena Kidishitu ba mu siekele a kumpala nya. Bwakinyi atwamba byabya? Mu mayi aaye a nfudilo kwi balongi baye, Yesu bambile’shi: “Nee neenu mafuku ooso, nyaa na ku nfudiilo aa byaa-pano.” (Mat 28:19, 20) Lelo uno bantu bebungi bakwete kwikasha bantu bu balongi. Banda kunangushena! Kipwa kyoso, bantu peepi na 300 000 bakwete kubatshishibwa bu ba Temwe ba Yehowa na kufika balongi ba Yesu Kidishitu! w20.01 2 ¶1; 3 ¶5-6

Doktere balungula mukwetu mulume kii nsongwa’shi e na mukumbo aukyebe kumubofusha. Mukwetu mukashi te na dingi mushindo wa kukita bibungi mu mufubo wa Yehowa mwanda wa bununu. Su wekala na mwanda wi bu umune wa ku ino ibatuteemuna pano, we kwipusha bu’be shii na muulo dingi. Yaya nkalakashi i nkukutshishwa kwikala na muloo, we kwipusha bu’be bashimisha kinemo kyobe, na i kulwisha kipwano kyobe na bangi. Bantu ba mu uno ndumbulwilo be na mweneno a Satana pabitale nshalelo a bantu. Satana amonaa bantu boso bu bashii na muulo. Baadi mulungule Eeva’shi ekala bulungantu, aku aukanga kalolo’shi kukutwa kukokyela Efile Mukulu akutwala ku lufu. Satana nyi akunkushaa uno ndumbulwilo. Byabya, tabitukanyisha p’atumono’shi ba nsunga, bena politike na bakata ba bipwilo bakwete kwambula Satana pa kukutwa kwata bangi na muulo na kwibanemeka. Kadi, Yehowa akumiina’shi twikale atwiata na muulo, na kwete kwitukwatshishena nsaa yatupete myanda ayitutakula mu kwipusha bu bashii na muulo.​—Lom. 12:3. w20.01 14 ¶1-4

Yeelemiya baadi mushaale munda mwa bipwa bifikye ku 40 munkatshi mwa bantu babi mpa na bankungishanyi na pangi bakwabo ba ku kibundji kyabo kya Anatote. (Yel. 12:6) Anka, tabadi mwitole nya. Kadi, balungwile sekretere aaye sha lulamato Baruke pabitale byapusha, mpa n’atwe lelo uno tubauku byanka mwanda mbebifunde. (Yel. 8:21; 9:1; 20:14-18; 45:1) Bino abilesha’shi, bu bibadi Baruke mufunde myanda ya Yeelemiya, abimweka’shi bubidi bwabo abaadi befulene na abenemekyeshena ngofu. (Yel. 20:1, 2; 26:7-11) Aa mafuku, Yeelemiya baadi mudimushe bena Isaleele n’eshimba dinyingye pabitale myanda ibaadi na kya kukitshika mu Yeelusaleme. (Yel. 25:3) Mususa wa nfudiilo ubaadi Yehowa atompo kulungula bena Isaleele bwabadya kwilanga kwishimba, Batekyele Yeelemiya bwadya kufunda kwakwa kudimusha mu mufungofungo. (Yel. 36:1-4) Bu bibaadi Yeelemiya na Baruke bakite wawa mudimo ubabadi bebape kwi Efile Mukulu ubaadi ukite myeshi ibungi pamune, kushii mpaka, abaadi abesamba miisambo ibaadi ayinyingisha lukumiino lwabo. w19.11 2-3 ¶3-4

Mushindo kinyi autungu’shi tumone bakwetu bedibwe mwimu? Bi bubi su atulakila muntu ngofu, sunga byekala’shi mmwedibwe mwimu. (Mat. 23:8-11) Nsaa i Bible akwila bakulu, etunyingisha bwatudya ‘kwambula lukumiino lwabo,’ anka tetunyingisha bwa kwikasha muntu su ngumune bu mukata etu nya. (Eb. 13:7) Eyendo’shi, Bible amba’shi bangi “mbalombeene kineemo misuusa ibidi.” Anka, mpa mwanda “abakitshi kalolo mufubo wa buludiki” na “abafwambuka ku mufubo wa bulungudi naa wa bulambukishi,” kushii mwanda wa’shi mbedibwe mwimu. (1 Tim. 5:17) Su twapa bedibwe mwimu kineemo kikilekile na kwibatumbisha, ta mbalombeene kwipusha biya nya. Sunga’shi kikile bubi, mbilombene kwibatakula mu kwitatula. (Lom. 12:3) Takwi muntu su ngumune a kwatudi mulombeene kukumiina kukitshisha mwina Kidishitu mwedibwe mwimu uno mulwisho ukata nya!​—Luk. 17:2. w20.01 29 ¶8

Mpoolo mutumiibwa badi na tubingilo twi bungi twa kwikala na kinyongwa. Myanda ibadi bakwabo bena Kidishitu abafumankana nayo ibadi ayimwinyongosha. (2 Kod. 2:4) Beshikwanyi baye abaadi bamukupile mpa na kumwela mu lukano. Na dingi badi na kya kunyingiila nkalakashi ibadi ayimupa kenyongoshi, bu “kwikala na nsala.” (Fid. 4:12) P’atutala’shi babadi bapone na bwato misusa isatu ishima, eyendo’shi badi mulombene kwikalakasha nsaa ibadi ende mu bwato. (2 Kod. 11:23-27) Nkinyi kibadi kikwashe Mpoolo pabadi na kenyongoshi? Mpoolo badi ekalakasha bwa bakwabo bena Kidishitu nsaa ibabadi na myanda, anka tabadi ata myanda yabo yoso mu kyadi nya. Mpoolo badi auku’shi ta mulombene kupudisha myanda yoso bupenka bwaye nya. Batekyele bangi bwabadya kukwasha tukongye, badi mupe balume ba kukulupila bu Timote na Tite mashito ebungi. Mudimo ubakitshine baba bakwetu, kushi mpaka ubadi ukwashe Mpoolo bwadya kupeelesha kinyongwa kyaye.​—Fid. 2:19, 20; Tt. 1:1, 4, 5. w20.02 23 ¶11-12

Yehowa etutekye bwatudya kumukookyela. Aye nyi atudya kukookyela mwanda nyi Mupangi etu, Mulami a muwa wetu na muledi sha binangu kukila baledi boso. Byabya, kabingilo ka kumpala katukookyela Yehowa, mpa mwanda mwitufule. (1 Yo. 5:3) Sunga kwekala tubingilo twibungi twa kukookyela Yehowa, aye tetutakulaa bwa kumukookyela pa bukopo nya. Yehowa mmwitupe bulungantu bwa kwisangwila, aye e na muloo wa kwitumona atwata kitshibilo kya kumukookyela mwanda twi bamufule. Baledi abakumiinaa’shi bana babo bekale mu kwiyikela. Nyi bwakinyi abelelaa bana miiya ya mu nshalelo. Nsaa i bana abakookyela ku yaaya miiya, abalesha’shi mbakulupile mwi baledi babo na abebanemeka. Bi na muulo ukata bwa’shi tuukye na tukookyele miiya ya Nshetu e mwiyilu. Su tubakitshi byabya, atulesha’shi twi bafule Yehowa na atumunemeka; bino abikala bwa buwa bwetu. (Yesh. 48:17, 18) Anka, boso abapele Yehowa na kulonda miiya yaaye abekakilaa malwa.​—Nga. 6:7, 8. w20.02 9-10 ¶8-9

Nka bu Abigaile, abitungu twikale n’eshimba dinyingye bwa kwakula su atumono’shi muntu kwete kukita kintu kampanda kilombene kumufisha mu kukita mulwisho ukata. (Mis. 141:5) Abitungu twikale na kaneemo, anka abitungu twikale dingi n’eshimba dinyingye. Nsaa yatupa muntu malango na kifulo kyoso, atulesha’shi twi ba kuuku ba binyibinyi. (Nki. 27:17) Bikishekishe bakulu, abitungu bekale n’eshimba dinyingye dya kwakula nsaa i muntu a mu kakongye akyebe kutupilwa ku mwiya. (Nga. 6:1) Bakulu abauku’shi n’abo namu mbakutwe kupwidika na’shi be kwibapa namu malango. Anka byabya ta mbilombene kwibakutshishwa kulanga baaba be na lukalo lwa malango. (2 Tim. 4:2; Tt. 1:9) Nsaa yabalanga muntu, abetatshishaa bwa kufubisha kya buntu kyabo kya kwakula bwa kumulongyesha kalolo na lwishinko. Mbafule bakwabo bena Kidishitu, na kino kifulo nyi akibatakula bwa kutusha bubwashi. (Nki. 13:24) Kadi kintu ki na muulo ukata bwabo nyi kutumbisha eshina dya Yehowa pa kukwatshishena miiya yaye na kukalwila kakongye ku kafutakanyi.​—Bik. 20:28. w20.03 20 ¶8-9

Yehowa baadi mwikashe Moyiise bu mukuudi bwadya kukuula mwilo wa Isaleele. Nsaa kinyi ibaadi mufube naye? Nkunyima kwaye “kulonga myanda yooso ya binangu bya bena Ejiipitu su”? (Bik. 7:22-25) Nya, Yehowa baadi mufube na Moyiise kunyima kwaye kumukwasha bwa kwikala muntu mwiyishe, na sha butaale. (Bik. 7:30, 34-36) Yehowa baadi mupe Moyiise eshimba dinyingye dya kwimana kumpala kwa nfumu sha bukome a mu Ejiipitu. (Efi. 9:13-19) Yehowa afubisha baba boso abatompo kwambula ngikashi yaye na bakulupile mwadi bwa kupeta bukome. Kubanga kala, Yehowa mufubishe bafubi baye mu mishindo ilekenelekene. Yehowa mmulombeene nkwikasha kinyi? Byoso mbitale mushindo okumiina kufuba. (Kol. 1:29) Su okumiina kufuba na Yehowa, mmulombeene nkwikasha mulungudi a kishima, mulongyeshi ebuwa, nkupa ngobesha ya kunyingisha bangi, nkupa ngobesha ya kufuba, nkwikasha kuuku ebuwa, sunga nkwikasha kyoso kyakumiina bwa kulombasha akikyebe eshimba dyaye. w19.10 21 ¶5; 25 ¶14

Ba kuuku bebuwa abetukwasha bwa kwikala na lulamato kwi Yehowa. Mushindo ukile buwa wa kupeta ba kuuku bebuwa nkwikala obe nabene kuuku ebuwa. (Mat. 7:12) Kileshesho, Bible etunyingisha bwa kwata nsaa na bukome bwetu bwa kukwasha bangi, bikishekishe ‘be mu dikyenga.’ (Ef. 4:28) Nsaa yatwipana mu kukwasha bangi atupete muloo wa binyibinyi. (Bik. 20:35) Ba kuuku betu abetukwasha patudi na nkalakashi mpa na kwitukwasha bwa kulama butaale mwishimba. Anka bu bibakitshine Eliwu badi muteemeshe Yoobo pabadi akula pabitale bitompwanga byaye, ba kuuku betu abetukwasha nsaa yabetuteemesha na lwishinko looso p’atwibalungula byatupusha. (Yob. 32:4) Tatwi balombene kukulupila’shi ba kuuku betu abetwatshila bitshibilo nya, anka bibuwa tuteemeshe nsaa yabetupa malango aabo aatukila mu Bible. (Nki. 15:22) Anka bu bibadi Nfumu Daavide mukumiine bukwashi bwa ba kuuku baaye na kwiyisha kooso, tatwi balombene kwikala na kwitatula nsaa yabetukwasha kwi ba kuuku betu patudi na lukalo lwa bukwashi. (2 Sam. 17:27-29) Eyendo, bano ba kuuku bebuwa nyi nkya buntu kya Yehowa.​—Shak. 1:17. w19.04 11 ¶12; 12 ¶14-15