Mweshi wa 7

Nsaa y’abetwakula bibubi sunga kwitukitshina myanda ya kukutwa kululama, twi balombene kwinyongola. Bikishekishe su betutapa kwishimba nkuuku etu, sunga muntu a mu kifuko. P’atunyingila kenyongoshi, twi balombene kulonga bi bungi ku kileshesho ki Mwiyi dy’Efile Mukulu kya Aana, ababaadi abasepe kwi mukwan’aye. (1 Sam. 1:12) Anka bu Aana, atwe booso twi balombene kwisamba kipindji kikata na Yehowa na kumulungula twiyongoshi twatudi nato, na pabitale kubofula kwetu. Tatwi balombene kwakula mu kipaso kipwidikye na kikile buwa nya. Ingi nsaa twi balombene mpa na kudila nsaa yatulungula Yehowa pabitale nkalakashi yetu. Sunga mbyabya, Yehowa ta mulombene kukooka kwituteemesha. Kukatusha kwela nteko pabitale myanda yetu, twi na lukalo lwa kutentekyesha elango di mu Bena-Fidipe 4:6, 7. Mpoolo mutumiibwa etulungula’shi abitungu tutumbule Yehowa mu luteko. Twi na tubingilo twi bungi twa kutumbula Yehowa, mpa na bwa kya buntu kya muwa, bintu byaye bibuwa byadi mukite, kifulo kyaye ki na lulamato, na bwa lukulupilo lwi buwa lwadi mwitupe. w20.02 21 ¶3; 22 ¶6

Kwakula nyi kya buntu akifiki kwi Yehowa. (Efi. 4:10, 11; Kibaf. 4:11) Mmwitukwashe n’Eyi dyaye bwa kuuka bya kufubisha kino kya buntu kalolo. Abitu twikale belumbuule bwa kwakula pabitale Yehowa na Bufumu bwaye. (Mat. 24:14; Lom. 10:14) Su twakita byabya, atwambula Yesu. Kamune ka ku tubingilo tukata tubaadi Yesu mufikile pa nsenga nka kulungula bangi bya binyibinyi pabitale Nshaye. (Yo. 18:37) Kadi abitungu tutentekyeshe’shi kipaso kyatwisamba ki na muulo. Byabya, nsaa yatwisamba na bangi pabitale Yehowa, abitungu twibikite “mu kufukama na kineemo,” na abitungu twikale atunemeka mweneno na nkumiino ya bangi. (1 Mp. 3:15) Yaya nsaa twi balombene kwakula kalolo; twi balombene kulongyesha bangi mpa na kukuma pangi mashimba aabo. Nsaa yabamono’shi mukwetu mwina Kidishitu e na lukalo lwa malango, bakulu tambalombene kwikaka bwa kwakula nya. Anka abitungu basangule nsaa ibuwa ya kwakula bwa kupela kumukalakasha. w20.03 18-19 ¶2-4

Abitungu tutekye kinyi? Twi bakumbene kuteka Yehowa bwa ‘kutamisha lukumino lwetu.’ (Luk. 17:5; Yo. 14:1) Twi na lukalo lwa lukumiino mwanda Satana akatompo muntu oso alondo Yesu. (Luk. 22:31) Mushindo kinyi ulombene kwitukwasha lukumiino bwa kushala mu butaale sunga patudi na nkalakashi ilekenelekene? Su tubapu kukita kyakya kyatudi balombene kukita bwa kukambila bitompwanga, lukumiino alwitukwasha bwa kutula myanda yoso mu masa mwa Yehowa. Mwanda twi bakulupile’shi mmukumbene kupudisha myanda kwitukila, twi na kufukama mu binangu na mu mashimba. (1 Mp. 5:6, 7) Luteko alwitukwasha bwa kulama butaale bwa mwishimba sunga twekala na nkalakashi i naminyi. Banda kutala kileshesho kya Robert, mukulu sha lulamato taadi binobino na bipwa bikile pa 80. Amba’shi: “Elango dya mu Bena-Fidipe 4:6, 7 ndinkwashe bwa kumona bya kukila na nkalakashi ya mu nshalelo ande. Ne mupete nkalakashi ya kukutwa makuta. Na, nadi mushimishe mashito ande a bu mukulu mu kakongye munda mwa mafuku.” Nkinyi kibadi kikwashe Robert bwa kulama butaale bwa mwishimba? Amba’shi: “Natekaa nsaa yoso yambanga kupusha kenyongoshi, nashinguula’shi nsaa yoso yantekye ngofu, napete butaale bwa mwishimba.” w19.04 9-10 ¶5-7

Kulwisha mwana na myanda ibutete nyi nkukitshina bikishekishe Efile Mukulu mulwisho. Su muntu bakitshina mungi mulwisho, balwishisha Yehowa dingi. Banda kutala kileshesho kya Mwiya ubadi Efile Mukulu mupe Isaleele. Mwiya ubadi awamba’shi muntu ayibi sunga kudimba mwinaaye, badi mukutwe ‘kululama kumpala kwa Yehowa.’ (Mb. 5:6) Eyendo’shi, mwina kakongye alwisha mwana na myanda ibutete akutshishwa mwana kwikala mu bulungantu mmukutwe kululama ku meso kw’Efile Mukulu. Muntu aukibwa’shi mmulangwidi a Yehowa na alwisha mwana na myanda ibutete, alwisha nkumo ya Yehowa. Nyi bwakinyi, abitungu kumunyoka bwa kyakya kibakitshi mulwisho ukata ku meso kw’Efile Mukulu. Miisambo ya mu Kitenta kya Mulami na mu Réveillez-vous ! mbaleshe kilombene kukita baaba babadi balwishe na myanda ibutete, bwa kukambila kenyongoshi akatukila ku wawa mwanda, bilombene bangi kwibakwasha na kwibanyingisha, na bilombene ba nambutwile kukalwila bana babo. Bakulu mbebalongyeshe myanda yoso itale bya kukila na mulwisho wa muntu mulwishe mwana na myanda ibutete. Ndumbulwilo kikwete nka kutaluula mushindo ulombene bena kakongye kukila na mulwisho wa muntu mulwishe mwana na myanda ibutete. w19.05 9 ¶8-9

Eyi dy’Efile Mukulu di nka bi lupete lwa maashi kubidi dilombene kulesha madimi a Satana patooka. (Ef. 6:17) Kileshesho, Eyi dy’Efile Mukulu adilesha madimi a Satana a’shi, bafwe mbalombene kwisamba na abatala. (Mis. 146:4) Aditutentekyesha’shi nka penda Yehowa nyi mukumbeene kulesha abifiki kumpala. (Yesh. 45:21; 46:10) Su atubadika Eyi dy’Efile Mukulu na kunangushena ku byatubadika nsaa yoso, atwikala belumbuule bwa kusuuka na kushikwa madimi aetutakula bikudi bibi bwa’shi tukumiine. Byabya tokitanga kintu kyoso kipushene na malenganyi. Pa mwanda twi bena Kidishitu, tatukitaa malenganyi a mishindo yoso. Kileshesho, tatwendaa mu kubuka sunga kukimba kwisamba na bafwe mu mushindo kampanda. Atupelaa bipikwa bya pa kushiika kitanda abitukila mu lukumiino lwa’shi bafwe be na muwa mu mbalo kampanda. Tatukimbaa lubuko lwa nyenyenyi sunga kubadika mifunda ya mu masa bwa kuuka myanda i kumpala. Atushinguula’shi bino bipikwa byoso bi na masaku na mbilombene kwitwikasha mu kipwano na Satana na ba demo. w19.04 21-22 ¶8-9

Bantu abakumiina binangu bya uno ndumbulwilo bakwete kubepuula miiya ya mu Bible itale mwikelo wibuwa, abeamba’shi be na nkatshinkatshi. Bantu be byabya mbalombene kwiyipusha’shi: ‘Bwakinyi Efile Mukulu betupangile na malaka a kwifikena peepi akupu etulungula’shi twilame?’ Bakwete kwela ino nkonko mwanda abedimbi pa kupwandikisha’shi su bantu abakumiina kukita kintu kampanda mbalombene kwikita. Anka Bible akula bilekene na byabya. Etulungula’shi t’abitungu tukookyele abitutumu malaka atudi nao, anka twi na ngobesha ya kulwa na binangu bya kukita bibubi. (Kol. 3:5) Dingi, Yehowa mmupe bantu kya buntu kya dibaka, mbalo ilombane bwa kupudisha malaka a kwifikena peepi. (1 Kod. 7:8, 9) Mu kwilekena na binangu bya ba pa nsenga, Bible etupa mweneno ebuwa pabitale kwifikena peepi kwa mulume na mukashi. Amba’shi kwifikena peepi kwa mulume na mukashi akupeyaa bantu muloo. (Nki. 5:18, 19) Dingi, Bible amba’shi: “Ooso a kwatudi ayibakile aaye mukashi bwa kushaala mu bwiselele na mu kinemo, kushii kwikala na malaka bu ee nao bantu bisumanga bashabauku Efile Mukulu.”​—1 Tes. 4:4, 5. w19.05 22-23 ¶7-9

Efile Mukulu takatadiila bwashi bena nsenga babutule mwilo waye nya. Mwilo waye wi na muloo wa kutwala eshina dyaye, na mbakokyele ku mwiya waye wa kutuka mu Babilone Mukata. (Bik. 15:16, 17; Kibaf. 18:4) Mbafube ngofu bwa kukwasha bangi bwabadya kukatuka mu Babilone Mukata. Byabya, sunga’shi abakakalwila bafubi ba Yehowa nsaa yakabutudibwa, abekala nka na lukalo lwa lukumiino lwi bukopo bwa byoso abikakitshika kunyima. (Es. 38:2, 8) Kunyima kwa kabutu ka ndumbulwilo a bipwilo bya madimi, mwilo w’Efile Mukulu aukashala bupenka nka abikalaa mutshi ubapanda ku kipapi kikata. Eyendo, Satana ekala na nsungu. Akalesha yaaya nsungu ku bukwashi bwa “bikudi bi butete,” abyo nyi mmyanda ya madimi ayitukila kwi ba demo abikatakula kisaka kya miilo bwa kulwa na bafubi ba Yehowa. (Kibaf. 16:13, 14) Byabya bisaka bya miilo abebitamina bu “Goge a kwiumbo dyaa Magoge.” Miilo p’ayikabanga ngoshi, ayikafiki ku mbalo ya mu kifwanyi yabetamina bu Armagedone.​—Kibaf. 16:16. w19.09 11 ¶12-13

Mu mafuku a Isaleele a kala, Satana baadi mufubishe lulangwilo lwa madimi bwa kukwatshishena myanda i butete. Lelo uno, kwete kukita nka byabya. Mu lulangwilo lwa madimi bakwete kutadiila na kukwatshishena mwikelo wi butete. Bantu bebungi bakwete kwiamba’shi mbafubi b’Efile Mukulu, tabakwete kukokyela miiya yaye itale mwikelo wibuwa. Mpoolo mutumiibwa balesheshe bipeta abitukila ku wawa mwikelo mu mukanda ubaadi mutumine bena Looma. (Lom. 1:28-31) Mu “myanda ishii mwishinda” mwi mishindo yoso ya myanda i butete, mpa na kutambuka kwa balume na balume sunga bakashi na bakashi. (Lom. 1:24-27, 32; Kibaf. 2:20) Bi na muulo ukata bwatudya kukookyela ku malongyesha a binyibinyi a mu Bible! Binangu bya bantu abipele miiya ya Yehowa na kwiyitombokyela. T’abikwasha muntu bwa kwikala na kikuba kya kikudi ky’ Efile Mukulu nya, anka abitakula muntu ku “mifubo ya mbidi.” (Nga. 5:19-23) Abitakula bantu mu kwitatula na bino abibatakula bwabadya kwikala “bekumiine’bo banabene.” (2 Tim. 3:2-4, Kilombeno kipya 2014) Ino ngikashi ngikutwene na kikudi kya kwiyisha kyabatekye bafubi b’Efile Mukulu bwabadya kwikala nakyo.​—2 Sam. 22:28. w19.06 5-6 ¶12-14

Eliya baadi mufubile Yehowa mu mafuku ebukopo na baadi mupete nkalakashi ibungi. Yehowa balungwile Eliya bwadya kupa Elisha angi mashito abadi nao. Mu uno mushindo, Yehowa badi mupe Eliya muntu ebuwa badi mukumbene kumukwasha bwa kumona bya kukila na nkalakashi ibadi ayimubofusha kwishimba. Mu mushindo umune, nsaa yatulungula kuuku etu byatupusha, aye etukwasha bwa kumona bya kukila na nkalakashi yatudi nayo. (2 Bf. 2:2) Su opusha’shi twe na muntu odya kulungula byopusha, teka Yehowa akukwashe opete mwina Kidishitu munyingye mukumbene nkunyingisha. Yehowa badi mukwashe Eliya bwadya kumona bya kukila na nkalakashi yaaye, na bwa kumufubila na lulamato looso munda mwa bipwa bibungi. Myanda ibadi ifumankane nayo Eliya ayitupa lukulupilo’shi twi kunyingiila natwe namu. Twi balombene kwikala mu bipungo bya nkalakashi ibukopo ikumbene kwitukyengyesha na kwitubofusha ku mbidi na mu binangu. Anka, su atukulupila mwi Yehowa, etupa bukome bwatudi nabo lukalo bwa kumufubila.​—Yesh. 40:28, 29. w19.06 15 ¶4; 16 ¶9-10

Twikunyisha kwikala n’eshimba dinyingye binobino, pa kulungula mukandu wibuwa wa Bufumu bw’Efile Mukulu. Bwakinyi? Mwanda kulungula mukandu wibuwa akwitulongyesha bya kukulupila mwi Yehowa na kunyingiila moo wa bantu. Nka bu abinyigaa misamba yetu nsaa yatukitshi kalashishi, atupete mashimba anyingye nsaa yatulungula ku nshibo na nshibo, pa ma mbalo e bantu bebugi, a pa mweka nsaa, na mu bisalwe. Su twekala n’eshimba dinyingye dya kulungula mukandu wibuwa kubanga binobino, atwikala beluumbule bwa kutungunuka na kulungula sunga mudimo wetu wakandikibwa. (1 Tes. 2:1, 2) Twikulonga bibungi pa bileshesho bya mukwetu mukashi baadi muleshe eshimba dinyingye. Nancy Yuen baadi penda bula bwa 1.5 m, kadi tabaadi atshinyi kintu. Bapelele kwimika kulungula mukandu wibuwa wa Bufumu bw’Efile Mukulu. Nyi bwakinyi abamwelele mu lukano munda mwa bipwa bikile pa 20 mu Chine. Mwina mbulamatadi badi mu musambishe amba’shi: “Badi muntu e na mutwe wi bukopo bukile” mwiumbo dyabo! w19.07 5 ¶13-14

Bangi bantu abakumiinaa kulonga bya binyibinyi bya mu Bible, anka bebungi batufumankana nabo bwa musango wa kumpala be kumweneka bu bash’abakumiina. Abitungu twi banyingishe bwabadya kulonga bibungi. Bwa kukita mudimo wetu kalolo, abitungu twilumbuule. Sangula miisambo ikumbene kusangasha bantu bofumankana nabo. Akupu olumbuule byodya kubanga mwisambo. Bu kileshesho, we kwisamba na sha nshibo bino: “Nakyebe nkwipusha namu kano ka lukonko. Myanda yatudi nayo lelo uno ikwete kukwata bantu ba mu nsenga ishima. Opwandikisha’shi mbulamatadi a pano pa nsenga e kwiyipudisha su?” Akupu, we mulombene kwisambila Ndanyele 2:44. Sunga’shi we mulombene kwipusha’shi: “Mushindo kinyi wibuwa wa kulongyesha bana bwabadya kwikala na ngikashi ibuwa?” Obe omono naminyi? Akupu nwisambile Miiya Ikituulwe 6:6, 7. Kushi mpaka, atupushaa muloo wi bungi nsaa aifiki muntu atukwashanga bu mulongi a Kidishitu. w19.07 15 ¶4, 6-7

Ungi mukwetu mulume bapu kulungula munda mwa bipwa bibungi kwi bantu bashi balangwidi ba mu Extrême-Orient amba’shi: “Kebungi, kuno su muntu bamba’shi ‘ntshi mukumiine mwi Efile Mukulu,’ abipatuula’shi t’akumiinaa kulangwila b’efile babalangwilaa kwi bantu ba mu kibundji. Byabya nakumiinaa’shi b’efile boso mbebakite kwi bantu na ta mba binyibinyi. Nebabadikilaa Yeelemiya 16:20 na nepushaa shi: ‘Mbikunyi byatudya kutundula’shi uno nyi Efile Mukulu a binyibinyi, na uno nyi efile abadi bakite kwi bana ba bantu?’ Nateemesha lwaluulo kalolo, akupu nabadika Yeeshaya 41:23: ‘Etutemukilei byabya abikakitshika ku nfudîlo, byabya, atukeûku bînyibînyi’shi nwi befile.’ Akupu natusha kileshesho kya mushindo ubadi Yehowa mwakule myanda akyikakitshika kumpala.” Ungi mukwetu a Kutunduka kwa Asie akitaa bino nsaa y’alukiila mu kutala bantu. Amba’shi: “Nebapeyaa kileshesho kya binangu bi mu Bible, matemuki a mu Bible abaadi alombane, na miiya ayikunkusha bipangwa. Akupu nebalungula mushindo wi bino byoso abilesha’shi, kwi Mupangi e na muwa na sha binangu. Nsaa ayibanga muntu kunangushena’shi Efile Mukulu e kwanka, nabanga kumulesha akyamba Bible pabitale Yehowa.” w19.07 23-24 ¶14-15

Mu bino bintu bikile ku buwa mwi kwikasha eshina dya Yehowa diselele, kukumbana kwa milayilo yaye, butaale na buumune mu kakongye. (Mat. 6:9, 10; Yo. 13:35) Su bino bintu byekala na muulo mu nshalelo etu, atulesha’shi twibafule Yehowa. Mpoolo mutumiibwa baadi dingi mwakule’shi abitungu twikale “batookye selele.” Bino tabilesha’shi abitungu twikale bapwidikye nya. Tatwibalombene kwikala batookye selele bu Yehowa nya. Anka, Yehowa aketumono bu batookye selele su atukitshi mwetu moso bwa kutamisha kifulo kyetu na patukitshi bintu bi na muulo. Kipaso kyatudya kulesha kifulo kyetu mpa kupela kukokosha bakwetu. Eyi dya kulonda dya kupela kukokosha bangi di na muulo ukata. Twi kukokosha bangi naminyi? Twi kukokosha bangi mu mushindo wetu wa kukisha kapapi, nfwadilo etu, sunga patusangula mudimo. Pangi kyatukitshi takii bubi nya. Kadi, su byatukitshi abikokosha kondo k’eshimba ka ungi mukwetu, mmwanda wibubi.​—Mat. 18:6. w19.08 10 ¶9-11

Kubanga mu 1935, ba Temwe ba Yehowa mbapushe’shi mu kibumbu kikata kya mu kimonwa kya Yowano mwi kisaka kya bena Kidishitu basha lulamato be na lukulupilo lwa kwikala na muwa wa looso pa nsenga. (Kibaf. 7:9, 10) Bwa kupanda ku mpombo ikata, kibumbu kikata akikala na lukalo lwa kulonga myanda ya Yehowa na kubanga kumulangwila kumpala kwa’shi bukunkushi bwa Bipwa Kinunu bubangye. Abitungu’shi bekale na lukumiino lwi bukopo bwabadya “kwikala bapashiibwe ku yaaya myanda yooso ayikafiki” kumpala kwa Bukunkushi bwa Bipwa Kinunu bwa Kidishitu. (Luk. 21:34-36) Bano be mu kibumbu kikata bena muloo wa lukulupilo lwabo. Abapusha’shi Yehowa nyi asangula mbalo ikumbene kumufubila balangwidi baye basha lulamato, byabikala pa nsenga sunga mwiyilu. Booso bedibwe mwimu na kibumbu kikata abashinguula’shi, abapete bwedi bwabo nka penda kukidila ku kalolo kakata ka Yehowa bu byakadi kamwenekyele ku mulambu wa nkuulo wa Yesu Kidishitu.​—Lom. 3:24. w19.09 28 ¶10; 29 ¶12-13

Mudimo oobe ngupwe su? We mulombene kobesha. Topwandikishanga’shi tobodi okitshi mudimo oobe kalolo, sunga’shi tokii na muulo nya. Nangushena mushindo ukwete Yehowa nkukwasha na tungunuka na kulangula mukandu wibuwa. Ambula lukumiino lwa bena Kidishitu ba mu siekele a kumpala. Mbalo yoso ibaabadi abende, ‘abaukishanga mukandu wibuwa.’ (Bik. 8:1, 4) Su otungunuka na kulungula mukandu wibuwa, opete bipeta bibuwa. Bu kileshesho, ba mbala-mashinda bababadi babingye mu dingi eumbo, abayile mwiumbo di peepi, mubaadi lukalo lukata lwa balungudi ba mu ludimi lwabo. Myeshi ipeela kunyima, abaadi batushe tusaka mu lwalwa ludimi. Atupete muloo wetu mwi Yehowa, kushi mu mudimo wetu sunga twekala beufule. Su atukyebe kwikala na muloo, abitungu tushale peepi na Yehowa na kutungunuka na kukulupila mwadi. Uka’shi wekalanga mufule mudimo obe mwanda okitanga mobe moso bwa kukwasha bantu ba yaya mbalo. Tula eshimba dyobe dyoso ku mudimo odi nao binobino na omono abikukwasha Yehowa bodya kwiufula.​—Mul. 7:10. w19.08 24-25 ¶15-16

Abitungu tukookyele Yehowa mwanda mmupangi etu. Nyi bwakinyi, aye nyi mulombene kwitulungula kyakukita. (Kibaf. 4:11) Anka kangi kabingilo kakumukookyela nka’shii, mushindo waye wa kunkunkusha wibuwa. Kubanga kala, bantu bebungi abaadi na bukome na matalwa pe bangi. Anka patupwadjikisha kukunkusha kwabo na kwa Yehowa, atumono’shi, Yehowa nyi mukunkushi sha binangu, kifulo, na lusa. (Efi. 34:6; Lom. 16:27; 1 Yo. 4:8) Atukookyela Yehowa patukitshi mwetu moso na kupela kwikulupila nsaa yatwata bitshibilo. (Nki. 3:5) Abitubofwila bwa kukookyela Yehowa nsaa yatulongo pabitale ngikashi yaye yakukanya. Bwakinyi? Mwanda nyikashi yaye ayimwenekyela mu byoso byakwete kukita. (Mis. 145:9) Su atulongo bibungi pabitale Yehowa, kifulo kyetu akinyisha kutama. Su twibafule Yehowa, tatwikala na lukalo lwa mulongo wa miiya ayitulungula kya kukita na kishii kya kukita. w19.09 14 ¶1, 3

Satana kwete kubofusha bantu na madimi bwa’shi bepushe bu bashi na lukulupilo. Bu kileshesho, akyebe tukumiine’shi Yehowa tetufwila lusa bwa milwisho yetu na’shi tamwitufule. Ano mmadimi akilekile mwanda akwete kubofusha bantu. (Yo. 8:44) Nsaa ‘y’atwende kwi’ Yesu, abetufwila lusa bwa milwisho yetu. (Mat. 11:28) Na Yehowa mwitufule ngofu. (Lom. 8:32, 38, 39) Bushito abwitutekye Yesu bwa kutwala, mbwilekene na bushito boso bwatudi balombene kutwala. Bu kileshesho, ku nfudilo kw’efuku dya mudimo wa ku mbidi, bebungi abekalaa bakokye na tabekalaa na muloo nya. Anka, kunyima kwa kukisha nsaa ibungi mu kufubila Yehowa na Yesu, atwikalaa na muloo wi bungi. Twi kwikala bakookye kukyolwa atwe abapu mudimo, kadi patwalukaa ku bisangilo, atwikalaa banyingishibwe. Bino bi mumune na nsaa yatwitatshishaa bwa kulungula mukandu wibuwa na kwilongyela Bible. Efuto dyatupetaa ndikile bukome bubatutusha. w19.09 20 ¶1; 23-24 ¶15-16

Mu ano mafuku apeela abashala kumpala kwa’shi “efuku” dyaye dibangye, Yehowa etutekye bwatudya kufuba ngofu mu mudimo wa bulungudi. Abitungu twikale bashinkamishe’shi twi na “katshintshi ku mufubo wa mwanana.” (1 Kod. 15:58) Nsaa ibaadi Yesu akula myanda yoso ibaadi na kya kufika mu mafuku a ku nfudiilo, balombeshe dingi’shi: “Mwanda, abikyebe kubanda kupalakasha mukandu wibuwa mu bisamba byoso.” (Mak. 13:4, 8, 10; Mat. 24:14) Banda kunangushena: Efuku dyoso dyokwete kwenda mu bulungudi, okwete kukwasha mu kulombana kwa buno butemuki bwa mu Bible! Mudimo wa kulungula mukandu wa Bufumu ukwete kwenda kumpala. Bu kileshesho, banda kunangushena pabitale kufwima kwa balungudi ba Bufumu mu ano mafuku a ku nfudiilo. Mu 1914, kubaadi penda balungudi 5 155 mu maumbo 43. Lelo uno, kwi balungudi bakile pa midiyo 8 na kipindji mu maumbo 240! Sunga mbyabya, mudimo wetu ta ngupwe nya. Abitungu tutungunukye na kulungula’shi nka penda Bufumu bw’Efile Mukulu, nyi abukapudisha makyenga a bantu.​—Mis. 145:11-13. w19.10 8 ¶3; 9-10 ¶7-8

Yehowa baadi mufubishe Barziilaayi bwa kukwasha Nfumu Daavide. Daavide na mwilo waye abaadi ‘bakôkye bikata, dingi abaadi na nsala na nyôta’ nsaa ibaabadi abasuuku mwana a Daavide, Absalome. Barziilaayi muntu mununu na bangi babaadi nabo, babaadi batule myuwa yaabo mu masaku bwa kukwasha Daavide na bantu babaadi nabo. Barziilaayi tabaadi mupwandikishe’shi pa mwanda wa bununu, Yehowa ta mulombeene kumufubisha nya. Na kalolo kooso, baadi mukite mwaye moso bwa kukwasha bafubi baye abaadi mu lukalo. (2 Sam. 17:27-29) Bino abitulongyesha kinyi? Sunga twekala banunu, Yehowa mulombeene kufuba netu bwa kulombasha nkalo ya bakwetu bena Kididishitu, yaya mbalo yatudi sunga mu dingi eumbo mushii bidibwa. (Nki. 3:27, 28; 19:17) Sunga byekala’shi tatwibalombeene kwibakwasha atwe banabene, twi kutusha bya buntu bwa mudimo wa mu nsenga ishima bwa kukwasha bakwetu balume na bakashi nsaa yakudi lukalo.​—2 Kod. 8:14, 15. w19.10 21 ¶6

Bi kwitwelela bukopo bwa kulungula bangi byatupusha mwanda abaadi betufitshishe munda kala kwi muntu. (Nki. 18:19) Sunga’shi twi kupwandikisha’shi tatwi na nsaa na bukome bwa kukimba ba kuuku. Anka, tatukookanga. Su atukumiina’shi bakwetu betukwashe nsaa yatupete nkalakashi, abitungu twikale atwibalungula bi mu binangu byetu na byatupusha kubanga binobino. Wawa ndjo mwanda wi na muulo bwa kubanga bu kuuku bwibuwa. (1 Mp. 1:22) Yesu baadi muleshe’shi mmukulupile bakuuku baye pa kwisamba nabo myanda yoso patoka. (Yo. 15:15) Twi kumwambula pa kulungula ba kuuku betu nkalakashi yatudi nayo, myanda ayitusankishaa na ayitufitshishaa munda. Nsaa ayikulungula muntu mwanda, muteemeshe kalolo, okamono’shi nwi na nkalakashi, binangu na bipatshila bi mumune. Su wata mpángo ya kwisamba na bangi myanda patoka na muloo, bu kuuku bwenu abwende na kunyinga.​—Nki. 27:9. w19.11 4 ¶8-9

Mu mpombo ikata, mukandu watukalambukisha aukamweneka bu ubashintuluka. Bwa binobino, tukwete kulungula mukandu wibuwa wa Bufumu na tukwete kukita mwetu moso bwa kwikasha bantu bu balongi. Kadi mu yaya nsaa, mukandu watukalambukisha aukekala bukopo bukile. Bible eupwadjikisha bu mabwe a kasangu. (Kibaf. 16:21) Atukalambukisha pangi’shi ndumbulwilo a Satana abutudibwa binobino. Mu aa mafuku, atukauku mukandu watukalambukisha na mushindo wa kwiulambukisha. Atukafubisha mayele amune abatufubisha munda mwa bipwa nkama su’shi atukafubisha angi mayele? Tatwiuku nya. Sunga twakalambukisha mushindo kinyi, atukekala na kineemo kya kulambukisha mukandu wa kiimu wa Yehowa! (Es. 2:3-5) Mwanda wi na muulo, mukandu wetu aukatakula be na maumbo bwabadya kwimika mudimo wetu wa bulungudi. Nka bu byatukwete kukulupila mwi Yehowa lelo uno, twi na lukalo lwa nka mukulupila. Abitungu tushinkamishe’shi Efile Mukulu aketupa bukome bwatudya kulombasha kikyebe ky’eshimba dyaye.​—Mik. 3:8. w19.10 16 ¶8-9

Kishima ‘kwenda kula’ akilesha’shi twi balombene kutwela mu kapungakanyi pa kukimba bya kupeta bintu bishi na muulo. Twi balombene kwikala na “ndakalaka ingi-ingi ishii na kinangu naa ii bubi.” (1 Tim. 6:9) Byabya abitungu tutentekyeshe’shi Satana kwete kufubisha yaya ndakalaka bu muteo bwa kubofusha lukumiino lwetu. Pwandjikisha’shi wena makuta alombane bwa kuula bintu bi bungi. Su twaula bintu byatukumiina kadi byatushi nabyo lukalo binobino, bibubi su? Nya, tabi bubi. Kadi banda kunangushena ku ino nkonko: Su naula kino kintu, nekala na nsaa na bukome bwa kwikifubisha na kwikilumbuula su? Ne kubanga kufula bintu byande bya ku mbidi ngofu su? Kifulo kyande kya bintu bya ku mbidi ki ku ntakula mu kukita bu bibakitshine yawa nsongwalume bapelele lwitamino lwa Yesu lwa kukita bibungi mu mufubo w’Efile Mukulu? (Mak. 10:17-22) Su twekala na nshalelo mupelepele bwa kukisha nsaa na bukome bwetu mu mufubo w’Efile Mukulu, nyi mmwanda wibuwa bukile! w19.11 17-18 ¶15-16

Efile Mukulu mmulombene nkupa “bukome bwa kukita” na kukumbasha kitshibilo. (Fid. 2:13, NWT) Teka bwa’shi opete bukome bwa kufuba. Teka Yehowa kikudi kyaye kiselele bwa’shi kikupe bukome bodi nabo lukalo. Tungunuka na kuteka Yehowa nsunga opwandjikisha’shi takwete nkwaluula. Yesu bakwile’shi: ‘[tungunukayi] na kuteka, anukapebwa [kikudi kiselele].’ (Luk. 11:9, 13) Na dingi funda myanda ayitungu kukita. Bwa kupudisha ka mudimo koso kodi mupwe kubanga, abitungu wekale na myanda yodya kukita. Akupu abitungu weyilonde. Mu mushindo umune, nsaa ywata kitshibilo, funda myanda ayitungushi okite bwa kwiyilombasha. Su kwi mudimo aukukalakasha, eutshibuule mu tupindjitupindji. Nsaa yoso y’opu kamudimo, wekala na ngobesha ya kupudisha oso mu mushindo upelepele. Mpoolo mutumiibwa baadi munyingishe bena Kodinda bwabadya kutula ku lupese bya buntu byabo “efuku dya kumpala dya lubingo looso” pamutwe pa kwibikongola nsaa y’afiki. (1 Kod. 16:2) Nsaa y’otshibuula mudimo ukata mu tupindjitupindji, abikubofwila bwa kwiulombasha. w19.11 29 ¶13-14

Twi kwamba’shi muntu auku eshina dy’Efile Mukulu na ndambo ya myanda yadi mwakule sunga yadi mukite auku Yehowa. Kadi, kuuka Yehowa kalolo akutekye myanda ibungi. Abitungu twate nsaa ya kulonga pabitale Yehowa na ngikashi yaye ya kukanya. Nka penda kukita bino nyi kulombene kwitukwasha bwa kupusha kibaadi akimutakula bwa kwakula sunga kukita ingi myanda. Byabya abitukwasha bwa kutundula su akumiina mweneno eetu a myanda, bitshibilo na bikitshino byetu. Nsaa yatutundula akikyebe Yehowa bwetu, byabya abitutakula bwa kutumikila byabya byatubalongo. Bangi bantu be kwitubepuula mwanda tubakumiina kufubila Yehowa, na be kwitulwisha nsaa yatubanga kwibunga na bafubi baye. Kadi, su twekala bakulupila mwi Yehowa, taketulekyeela nya. Atukekala mu kipwano kibukopo n’Efile Mukulu mu muwa wetu oso. Twi balombene kuuka Yehowa kalolo su? Oolo, twi kumuuka kalolo! w19.12 16-17 ¶3-4

Ingi nsaa ba nambutwile be kupusha bu bi bukopo kulongyesha bana babo, kadi bana mbya buntu abifiki kwi Yehowa. Ekwanka nsaa yoso bwa kukwasha ba nambutwile. Akumiinaa kupusha nteko yabo. Na aluulaa ku nteko yabo ku bukwashi bwa Bible, mikanda yetu, na ku kileshesho na malango bya bangi ba nambutwile ba mu kakongye banyingye mu kikudi. Bangi bantu abambaa’shi kukusha bana nyi mufubo wa bipwa 20, kadi ba nambutwile tabakookaa kwikala bu ba nambutwile. Ku bintu bikile buwa byabadi balombene kupa bana babo, kwi kifulo, nsaa na malongyesha a mu Bible. Mwana oso e na waye mushindo wa kukumiina aa malongyesha. Anka, bana bebungi babadi bakushe kwi baledi bafule Yehowa, abapushaa nka bu bibapushishe Joanna Mae, mukwetu mukashi a mu Asie amba’shi: “ Ne na lutumbu lukata pa kumona’shi baledi bande mbandangye na ku ndongyesha bya kufula Yehowa. Ta mbantande bisumanga nya, kadi mbandongyeshe bya kwikala na nshalelo e buwa.” (Nki. 23:24, 25) Midiyo ya bena Kidishitu be na mweneno e mumune. w19.12 27 ¶21-22

Bakwetu balume na bakashi be na lukalo lwa kunyingishibwa, twi nabo nka mbalo yatudi yaaya. Abitungu twate mpángo ya kusamba bangi sunga twekala atutshinyi. Bu kileshesho, twi kutshina mwanda wa’shi tatwiuku kya kwakula sunga kya kukitshiina muntu kampanda e na lukalo lwa kusambibwa. Twi balombene kobesha kusamba bangi su atulesha’shi atwibapasukila. Bu bikwete kwifubwila nfudilo a uno ndumbulwilo, nshalelo anyisha kwikala bukopo. (2 Tim. 3:13) Atwikala nka na lukalo lwa kusambibwa, mwanda twibakutwe kupwidika na tukwete kutungunuka nka na kukita bilubilo. Mpoolo mutumiibwa baadi munyingiile na lulamato mpa na ku lufu lwaye, mwanda wa kunyingishibwa kubaadi mupete kwi bakwabo bena Kidishitu. Su tubakitshi byabya, atukwasha bakwetu balume na bakashi bwabadya kutungunuka na kufubila Yehowa na lulamato.​—1 Tes. 3:2, 3. w20.01 12-13 ¶17-19

Bedibwe mwimu tabatekaa bangi bwabadya kwibakitshina myanda mu mushindo wi pabwao nya. (Fid. 2:2, 3) Abauku’shi Yehowa nsaa yele bantu mwimu, taukishaa bangi bantu byanka nya. Muntu mwedibwe mwimu auku akyamba Bible’shi tatwi balombene kukumiina bukidibukidi muntu amba’shi Efile Mukulu bamupa mashito e pabwao. Mwina Kidishitu mwedibwe mwimu takumiina’shi bantu bamupe kineemo kikilekile nya, nyi bwakinyi ta lungulaa bantu bafumankana nabo’shi mmwedibwe mwimu. Na ta mulombeene kwitatula bwa wawa mwanda nya. (1 Kod. 4:7, 8) Bena Kidishitu bedibwe mwimu t’abakimbaa bangi bedibwe mwimu bwa kwisamba nabo pabitale kwedibwa kwabo kwa mwimu sunga bwa kukita kisaka bwa kulonga Bible. (Nga. 1:15-17) Kakongye ta nkalombene kwikala mu buumune su bena Kidishitu bedibwe mwimu bakita byabya. Be kwikala abakitshi bikutwene na kikudi kiseleele, kikwete kukwasha bafubi ba Yehowa bwa kwikala mu butaale na mu buumune.​—Lom. 16:17, 18. w20.01 28 ¶6-7

Yaya nsaa, pabakabutula bingi bipwilo, bantu abakapusha nsungu pa kumona’shi nka penda ba Temwe ba Yehowa nyi abashala. Eyendo, abakakimbi kulesha bangi bi bukopo bwa nsungu yabo, mpa na ku Internete. Maumbo na mukunkushi aao, Satana, abaketushikwa pa kumona’shi nka penda lulangwilo lwetu nyi lwabashii babutule. Tabakalombasha mpángo yabo ya kubutula bipwilo byoso bya pa nsenga nya. Abakatulu binangu byabo kwatudi. Paapa, bena maumbo aabafiki Goge a ku Magoge. Abakebungu bwa kulwa na mwilo wa Yehowa. (Es. 38:2, 14-16) Twi kubanga kwikalakasha pabitale akikatshika mu mpombo ikata, bikishekishe mwanda tatwiuku myanda yoso kalolo. Anka tushinkamishe’shi: Tabitungu tutshine mpombo ikata nya. Yehowa aketupa mayi a kulonda aaketupaasha.​—Mis. 34:20. w19.10 16-17 ¶10-11

T’atwimena penda pa kwakula’shi twi na lutumbu; atuleesha lutumbu lwetu kwi Yehowa mu ngakwilo na mu bikitshino byetu. Bino abilesha’shi twi belekene na bantu bebungi lelo uno. Twi mu nsenga mwi bantu bashi na lutumbu bwa byoso abibakitshina Efile Mukulu. Byabya kitundwilo kimune akilesha’shi twi mu “mafuku a nfudiilo,” nkumona bantu bashi na lutumbu. (2 Tim. 3:1, 2) Tatukumanga kwikala na bino binangu nya! Yehowa akumiina’shi bana baye bekale mu kwipushena munkatshi mwabo. Byabya, kifulo kyatudi befulene akilesha’shi twi bena Kidishitu ba binyibinyi. (Yo. 13:35) Atushinkamisha mayi a mufundji a misambo bafundjile’shi: “Mmulô kinyi wina bantu p’abashâla na bakwabo mu buumune! Bi buwa bwi mô!” (Mis. 133:1, EEM) Nsaa y’atufulu bakwetu bena Kidishitu, atulesha Yehowa’shi twi bamufule. (1 Yo. 4:20) Nyi mwanda wa muloo pa kwikala mu kifuko kya bakwetu be na ‘kalolo ku muntu na mutu, basha lusa’!​—Ef. 4:32. w20.02 9 ¶6-7

Myanda ibadi Aana mupete tayibadi ipwe musango umune nya. Badi nka na kya kushaala mu yaaya nshibo imune na Penina. Bible ta muleshe’shi mweneno a Penina bashintulukile. Byabya Aana badi na kya kunyingiila bishima bi bubi bya Penina. Kadi Aana badi na mushindo wa kupetuula na kulama butaale bwa mwishimba. Kunyima kwa’ye kutuula mwanda waye mu maasa a Yehowa, Aana tabadi dingi ekalakasha nya. Badi mutadiile Yehowa bwadya kumusamba na kumupa butaale. Kunyima kwa mafuku apeela, Yehowa badi mwalule ku luteko lwa Aana aye nkutanda bana! (1 Sam. 1:2, 6, 7, 17-20) Twi kupetuula butaale sunga nkalakashi yekala ayitungunuka. Sunga twela nteko ngofu na kutwela mu bisangilo lubingo looso, ingi nkalakashi ngilombene kutungunuka. Anka mu kileshesho kya Aana, atulongo’shi takwi kintu su nkimune kikumbene kukutshisha Yehowa kwitukwasha bwa kwikala na butaale bwa mwishimba. Yehowa ta mulombene kwituluba nya, lelo sunga maloba etupa bwedi mwanda wa kululama kwetu.​—Eb. 11:6. w20.02 22 ¶9-10

Bakulu abaleshaa bangi mayi a kulonda a mu Bible alombene kwibakwasha bwa kwikala na binangu. Bwakinyi bi na muulo bwa’shi twikale atwakula n’eshimba dinyingye nsaa ayitungu kwakula? Tubandeyi kutaluula kileshesho kya Eliya: Tshite mwakwidi mukata Eliya baadi na bana babidi balume na baadi mwibafule ngofu. Bano bana, tababadi abanemeka Yehowa nya. Abaadi na mudimo ukata wa kufuba bu ba tshite mwakwidi ku tabernakele. Anka abaadi abafubisha matalwa aabo bibubi, tababadi abanemeka milambu ibaadi ayifiki nayo bantu bwa kulambula kwi Yehowa, na babaadi abatambuka lusandi patoka. (1 Sam. 2:12-17, 22) Muyile Mwiya wa Moyiise, bana ba Eliya abaadi na kya kufwa, kadi Eliya baadi ebasashila na kwibengeleka, na baadi ebatadiila abatungunuka na kufuba mu tabernakele. (Miy. 21:18-21) Yehowa baadi mumone kipaso kibaadi Eliya mukile na uno mwanda naminyi? Balungwile Eliya’shi: “Bwakinyi we mupe baana boobe balume kineemo kunkila’mi?” Akupu, Yehowa batshile kitshibilo kya kwipaa bano bana babidi babi.​—1 Sam. 2:29, 34. w20.03 19 ¶4-5