Mueshi wa 1

Lukumiino lwa Timote lubaadi lunyingishibwe na malongyesha a mu Bible abaadi amukwashe bwa kwikala bu kuuku a Yehowa. N’obe namu abitungu olongye Bible na oshinkamishe’shi malongyesha e mwanka pabitale Yehowa nga binyibinyi. Bwa kwibikita, abitungu oshinkamishe ano malongyesha asatu. Dya kumpala, abitungu wekale mushinkamishe’shi Yehowa Efile Mukulu nyi mupangi a bintu byooso. (Efi. 3:14, 15; Eb. 3:4; Kibaf. 4:11) Dya kabidi, abitungu oshinkamishe’shi mukandu wi mu Bible pabitale bantu nguyokyelwe n’Efile Mukulu. (2 Tim. 3:16, 17) Na dya kasatu, abitungu oshinkamishe’shi Yehowa e na kisaka kya bantu kilumbulwe, kikwete kumulangwila ku bukunkushi bwa Kidishitu na’shi ba Temwe ba Yehowa nyi kyakya kisaka. (Yesh. 43:10-12; Yo. 14:6; Bik. 15:14) T’abitungu nka’shi oukye byooso bi mu Bible nya. Abitungu kepatshila koobe kekale ka ‘kufubisha kinangu’ kyobe bwa kushinkamisha’shi nkumiino yobe ngya binyibinyi.​—Lom. 12:1. w20.07 10 ¶8-9

Buno butemuki abwakwila mukaba wa mpasu i na mapala bu a bantu na ikale na ‘bifulu bi bu bya òolo’ ku mitwe yayo. (Kibaf. 9:7) Ikwete kukyengyesha “bantu [beshikwanyi b’Efile Mukulu] bashii na kitampi ky’Efile Mukulu pa mpala” munda mwa myeshi itano, mafuku a muwa a mpasu. (Kibaf. 9:4) Buno butemuki abwakwila bafubi ba Yehowa bedibwe mwimu. Bakwete kulungula mukandu wa kiimu w’Efile Mukulu utale uno ndumbulwilo e bubi n’eshimba dinyingye, na bino bikwete kukalakasha bano boso balamate ku uno ndumbulwilo a Satana. Tukwete kwamba’shi mpasu yabadi baleshe mu Yowele 2:7-9 ta ngyaya imune yabadi baleshe mu mukanda wa Kibafumbwilwe su? Oolo. Mu Bible, kitundwilo kimune ki kwikala na mpushiisho ilekene nsaa yabekifubisha mu myanda ilekene. Bu kileshesho, mu Kibafumbwilwe 5:5, Yesu mbamwitamine bu “Ntambwe a mu kisamba kya Yuuda,” anka mu mukanda wa 1 Mpyeele 5:8, mbetamine dingi Diabulu bu “ntambwe akuumbu.” w20.04 3 ¶8; 5 ¶10

Hagaare mwina mudimo a Sara, baadi mukite myanda bu muntu shii na binangu kunyima kwa Sara kumupa Abrahame bu mukashi. Nsaa ibapetele eyimi, babangile kukutwa kaneemo kwi Sara, mwanda Sara tabaadi na mwana nya. Myanda ibaadi ilwile bikile mu kipaso kibaadi Sara mwate kitshibilo kya kubinga Hagaare. (Kib. 16:4-6) Mwanda wa kukutwa kwetu kwa kupwidika, twi kwela binangu’shi Hagaare baadi mwana mukashi ebubi baadi mulombeene kunyokiibwa. Anka Yehowa tabaadi munangusheene byabya nya. Baadi mutumine Hagaare mwikeyilu. Nsaa ibafikile mwikeyilu kwadi, baadi mumukwashe bwa kulumbuula binangu byaye na aye nkumwelela myabi. Hagaare bamwene’shi Yehowa baadi amumono na auku lukalakashi lwaye loso. Byabya bi bamutakwile bwa kwamba’shi ‘Obe we’Efile mummone’mi, . . . bammono kumpala.’ (Kib. 16:7-13) Yehowa bamwene kinyi mwi Hagaare? Baadi auku nshaleelo abaadi naye kumpala na nkalakashi ibaadi munyingiile. Sunga’shi kukutwa kwa kaneemo kwa Hagaare kwi Sara takubaadi kusankishe Yehowa, kadi baadi mupushe bi binangu byaye na nshaleelo abaadi naye. w20.04 16 ¶8-9

Mpoolo mutumiibwa bakwile’shi boso bena Kidishitu ba binyibinyi be mu lubilo. (Eb. 12:1) Byabya, atwe boso, be na mbidi bukome, na bashi na mbidi bukome, banunu, ba nsongwa, abitungu tunyingiile mpaa na ku nfudilo su atukumiina kupeta efuto ditulee Yehowa. (Mat. 24:13) Mpoolo mutumiibwa baadi na bulungantu bwa kwakula mwanda baadi ‘mupudishe kusuuka kwa lubilo.’ (2 Tim. 4:7, 8) Kadi, ndubilo kinyi lubaadi Mpoolo akwila? Ingi nsaa Mpoolo baadi akwila pabitale maasha abaabadi abaasha mu Grece a kala bwa kutusha dilongyesha di na muulo. (1 Kod. 9:25-27; 2 Tim. 2:5) Misusa ibungi, mmupwandikishe nshalelo a bena Kidishitu na kusuka kwa lubilo. (1 Kod. 9:24; Nga. 2:2; Fid. 2:16) Muntu abanga “kusuuka lubilo” nsaa ya lambula muwa waye kwi Yehowa na kubatshishibwa. (1 Mp. 3:21) Akafiki ku mufunda wa nfudilo nsaa ayimupa Yehowa efuto dya muwa wa ikalayika.​—Mat. 25:31-34, 46; 2 Tim. 4:8. w20.04 26 ¶1-3

‘Mwanana sha lulamato, aye enukankamika dingi enulama kwi mubi.’ (2 Tes. 3:3) Mushindo kinyi ukwete kwitukalwila Yehowa? Yehowa mmwitupe bina ngoshi abitukalwila ku ngoshi ya Satana. (Ef. 6:13-17) Bino bina ngoshi bya mu kikudi, bi bukopo na bi buwa! Kadi, abitungu’shi twibifwale byoso bwa’shi bitukalwile. Bu kileshesho, kufwala bya binyibinyi bu mukaba akulesha bya binyibinyi abisanganyibwa mu Bible, Eyi dy’Efile Mukulu. Bwakinyi abitungu tufwale uno mukaba? Mwanda Satana, “nshee madimi.” (Yo. 8:44) Bapu kudimba munda mwa bipwa binunu na kulendwisha “ba pa nsenga boso”! (Kibaf. 12:9, EEM) Anka, bya binyibinyi bya mu Bible abitukalwila ku kudimbibwa. Mmushindo kinyi watufwalaa uno mukaba wa mu kifwanyi? Atukitshi bino p’atulongo bya binyibinyi pabitale Yehowa, p’atumulangwila “mu kikudi na mu binyibinyi,” na p’atwikala na kululama mu myanda yoso.​—Yo. 4:24; Ef. 4:25; Eb. 13:18. w21.03 26-27 ¶3-5

Dyadya eumbo dibaadi bu di pabwadyo mwanda nyi mubaadi lulangwilo lwa binyibinyi. Kubanga mu Pantekote a mu 33 bino bipungo byetu (B.B.), dyadya “eumbo” tadibaadi dingi eumbo di mbalo nkampanda nya, mwanda bafubi ba Yehowa babaadi bapalakane mu nsenga ishima. Lelo uno, “eumbo diibuwa bwi moo” adilesha mpaladiso a mu kikudi. Mu ano mafuku a ku nfudiilo, nfumu a kuunundu kwete kutwela mu “eumbo di buwa bwi moo,” misuusa ibungi. Bu kileshesho, pabaadi bena Nazi ba mu Allemagne bu nfumu a kuunundu, bikishekishe mu Ngoshi ya kabidi ya nsenga ishima, yawa nfumu baadi mutwele mu “eumbo di buwa bwi moo” pa kubingabinga na kwipa bafubi b’Efile Mukulu. Kunyima kwa Ngoshi ya kabidi ya Nsenga ishima, pabaadi Union Soviétique bu nfumu a kuunundu, baadi n’aye namu mutwele mu “eumbo di buwa bwi moo” pa kubingabinga mwilo w’Efile Mukulu, na kwiufilusha. w20.05 13 ¶7-8

Banda kutala bantu abaadi badye bu kuuku n’Efile Mukulu kumpala kwa’shi Kidishitu afikye. Abrahame baadi na lukumiino lunyingiye ngofu. Bipwa bikile pa 1 000 kunyima kwa lufu lwa Abrahame, Yehowa bamwitamiine bu “kuukw’ande.” (Yesh. 41:8) Byabya, sunga lufu ta ndulombene kutshiba bu kuuku bwetu n’Efile Mukulu. Mu binangu bya Yehowa, Abrahame e na muwa. (Luk. 20:37, 38) Kingi kileshesho nkya Yoobo. Kumpala kwa’shi Yehowa abangye kisangilo na miikeyilu mwiyilu, baadi mwisambe pabitale Yoobo kushii Yoobo kuuka. Yehowa baadi mumwitamine bu ‘muntu sha lulamato na mululame, atshinyi Efile Mukulu, dingi eekumbaa bubi.’ (Yob. 1:6-8) Na mushindo kinyi ubaadi upushe Yehowa pabitale Ndanyele, baadi mumufubile na lulamato loso munda mwa bipwa 80 mu kibundji kya ba mpangano? Misango isatu ishima, miikeyilu ibaadi ishinkamiishe uno muntu mununu’shi “mmufudibwe” n’Efile Mukulu. (Nda. 9:23; 10:11, 19) Twikale bashinkamishe’shi Yehowa akumiina kusaangula ba kuuku baye baadi mufule.​—Yob. 14:15. w20.05 26-27 ¶3-4

Mulongi ebuwa mulombene kulonga pabitale miiya y’Efile Mukulu, mpa na kwiyisangeela. Anka mulongi mulombene kukookyela Yehowa penda mwanda wa’shi mumufule su? Tentekyesha’shi, Eeva badi auku mwiya w’Efile Mukulu, anka aye na Adame tababaadi bafule Efile Mukulu nya. (Kib. 3:1-6) Byabya t’abitungu twimene penda pa kulongyesha bangi pabitale miiya ilulame y’Efile Mukulu nya. Miiya ya Yehowa ayikalaa buwa. (Mis. 119:97, 111, 112) Kadi balongi betu ta mbalombeene kunangushena mu wawa mushindo su tambapushe’shi ino miiya ayilesha kifulo kya Yehowa. Byabya, twi kwipusha balongi betu ba Bible’shi: “Bwakinyi Efile Mukulu atekye bafubi baye bwabadya kukita bino sunga kupela kukita byabya? Bino abitulesha kinyi pabitale bu Muntu bwaye?” Su twakwasha balongi betu ba Bible bwabadya kunangushena pabitale Yehowa na bwa kutamisha kifulo kyabo bw’eshina dyaye, paapa atukumu ku mashimba aabo. Balongi betu abafulu kushi penda miiya kadi mpa na winyi Mwiyele. Lukumiino lwabo alunyingi na atwibakwasha bwabadya kunyingiila bitompwanga abikebafwila.​—1 Kod. 3:12-15. w20.06 10 ¶10-11

Abitungu’shi twikale na lwishinko, mwanda bwa’shi muntu alukiile kwi Yehowa abyata nsaa ibungi. Bangi bashibaadi abalungula dingi abashinkamisha’shi bwabadya kwalukiila, bakulu na bangi bena kakongye abadi bafikye mu kwibatala misusa ikile bungi. Mungi mukwetu mukashi abetamina bu Nancy a mu Asie amba’shi: “Loole ande a p’eshimba a mu kakongye ketu baadi munkwashe ngofu. Badi mu nfule nka bu taata ande. Baadi muntentekyeshe nsaa ikile buwa ibatudi atukisha naaye kumpala. Baadi anteemesha na lwishinko looso panaadi nalesha bi mwishimba dyande, na tabaadi ekaka bwa kumpa malango nya. Baadi muleshe’shi loole ebuwa ngofu, e kwanka bwa kunkwasha nsaa yandi na lukalo lwa bukwashi.” Kwituula pa mbalo ya muntu kwi nka bi bwanga bwi bukopo; nkulombene kupasha muntu mukalakashwe. Bangi bash’abafubaa dingi na balekye kutwela mu bisangilo, babaadi bebatape ku mashimba munda mwa bipwa kwi bangi bena kakongye na bakyabapusha nka byabya. Pa mwanda wa byabya, ta be na lukalo lwa kwalukiila kwi Yehowa. Mbalombene kupusha’shi mbebakitshine myanda ibubi. Lukalo lwabo ndwa muntu a kuteemesha bi mwishimba dyabo. w20.06 26 ¶10-11

Nsaa yooso yokambila kitompwanga, abikubofwila bwa kukita kibuwa. Tentekyesha’shi, yawa mmweneno ebubi pabitale lusandji e naye bantu, akatukila kwi Satana. Byabya, nsaa y’opele kwikala na uno mweneno e n’aye bantu ba pa nsenga, ‘otshokola mubi.’ Atukumiina’shi Yehowa nyi mulombene kwakula’shi kukita kintu kapanda mmulwisho. Na atukitshi mwetu mooso bwa kupela kukita mulwisho. Kadi su twakita mulwisho, abitungu twiulungule Yehowa mu luteko. (1 Yo. 1:9) Su bokitshi mulwisho ukata, kimba bukwashi bwa bakulu babadi batule kwi Yehowa bwa kwitupasukila. (Shak. 5:14-16) Anka t’abitungu otungunukye na kwikalakasha pabitale mulwisho wa kala. Bwakinyi? Mwanda Nshetu sha kifulo mmutushe mulambu wa nkulo wa Mwan’aye, bwa kwitufwila lusa ku milwisho yetu. Nsaa ayamba Yehowa’shi afwila baasha milwisho abelanga kwishimba lusa, nkya binyi. Byabya, ta kwi kintu kilombene kwitwimika bwa kufubila Yehowa na kondo k’eshimba kash’aketutopeka.​—1 Yo. 2:1, 2, 12; 3:19, 20. w20.07 22-23 ¶9-10

Kingi kipungo, Yehowa baadi bupenka. Anka bino tabibaadi abimwinyongosha nya. Mwanda tabaadi na lukalo lwa kwikala na ungi muntu bwa kwikala na muloo. Kadi baadi mukumiine’shi bangi bekale na muwa na muloo. Pa mwanda wa kifulo, Yehowa babangile mudimo wa kupanga. (1 Yo. 4:19) Kumpala, Yehowa baadi mupangye Mwan’aye Yesu. Kubukwashi bwa Mwana aye mbedi, “bintu bioso bibapangilwe,” mpa na binunu bya ba mikeyilu. (Kol. 1:16) Yesu baadi na muloo wa kufuba pamune na Nshaye. (Nki. 8:30) Na ba mikeyilu naamu abaadi na muloo. Abaadi panka nsaa ibaadi Yehowa na Mukata aabo Yesu abapanga eyilu na nsenga. Mushindo kinyi ubabaadi baleshe muloo? Abaadi abeele “musaase wa kusepeela” nsaa ibaadi nsenga ipangibwe, na abaadi batungunukye na kukupila bikashi bwa kantu kooso kabaadi Yehowa apanga, bikishekishe bantu. (Yob. 38:7; Nki. 8:31) Kyoso kipangwa kya Yehowa akilesha kifulo na kinangu kyaaye.​—Mis. 104:24; Lom. 1:20. w20.08 14 ¶1-2

Yehowa mwitupangye bwatudya kwifulena. Nyi bwakinyi, su muntu mwitushikwe, atupushaa bi bubi byabya, mpa na kupusha moo. Ungi mukwetu mulume abetaminaa bu Danylo bafundjile’shi: “Pabadi basalayi abankupila, abankaa, abankyengyesha mwanda ne Temwe a Yehowa, nadi napusha moo na bu mwishibwe milongo.” Uno mushikwa awitwinyongosha, anka t’awitukanyisha. Yesu bambile’shi abaketushikwa. Bwakinyi ba pa nsenga mbashikwe balongi ba Yesu? Mwanda nka bu Yesu ‘tatwi ba pa nsenga.’ (Yo. 15:17-19) Sunga atunemekaa bakata ba mbulamatadi, t’atwibalangwila, kuyimba loono lw’eumbo, sunga kutshibila ebendela mpala. Atulangwila nka penda Yehowa bupenka bwaye. Atukwatshishena matalwa a Yehowa a kukunkusha bantu. Anka Satana na bena dyaye, ababepula’shi Yehowa t’ena ano matalwa. (Kib. 3:1-5, 15) Tukwete kulambukisha’shi Bufumu bw’Efile Mukulu nyi abupu myanda yoso ya bantu, na’shi abubutula binobino boso bash’abebukumina. (Nda. 2:44; Kibaf. 19:19-21) Uno nyi mukandu wi buwa bwa bantu b’eyishe, anka mukandu wi bubi bwa ba ntomboshi. w21.03 20 ¶1-2

Yehowa mmupe bakwetu bakashi mbalo ya kineemo mu kakongye. Mbekale bu bileshesho bibuwa mwanda abaadi na binangu, lukumiino, katshintshi, eshimba dinyingye, kalolo, na mifubo ibuwa. (Luk. 8:2, 3; Bik. 16:14, 15; Lom. 16:3, 6; Fid. 4:3; Eb. 11:11, 31, 35) Dingi twi na mwabi wa kwikala na bantu banunu mu kakongye. Bano bakwetu banunu be na nkalakashi ya mbidi mwanda wa bununu. Anka, bakwete kwitatshisha bwa kulungula mukandu wibuwa, na kukita mwabo mooso bwa kunyingisha na kulongyesha bangi! Na tukwete kulonga bi bungi kwabadi. Be na muulo ku meso kwa Yehowa mpa na kwetu. (Nki. 16:31) Nangushena dingi pabitale ba nsongwa. Bakwete kupeta nkalakashi ibungi, mwanda abakudila mu uno ndubulwilo kwete kukunkusha Satana Diabulu na bukitshishi bwaye bwi bubi. Twi na muloo patumono ba nsongwa abaluula mu bisangilo, kulungula mukandu wibuwa n’eshimba dinyigye. Ba nsongwa, nwi na mbalo ikata mu kakongye ka Yehowa!​—Mis. 8:3. w20.08 21-22 ¶9-11

Nsaa yatubanga kulungula na kuukibwa bu Temwe a Yehowa, twi balombene kufumankana na “bipapi” kwamba’shi mushikwa wa bena kifuko netu, kumonyibwa ku bisumanga kwi bena mudimo netu, na nsaa ibangi abapele kutemesha mukandu wetu. Mushindo kinyi odi mulombene kunyisha kunyinga eshimba? Kya kumpala, ikala mushinkamishe’shi, Yesu kwete kutugunguka na kukunkusha mudimo wa kulungula mukandu wibuwa kukatukila mwiyilu. (Yo. 16:33; Kibaf. 14:14-16) Akupu, nyingisha lukumiino lobe mu mulayilo wa Yehowa wa’shi akupasukila. (Mat. 6:32-34) Apanyisha kunyinga lukumiino lobe, onyisha kunyinga eshimba. Bodi muleshe lukumiino lwi bukopo nsaa ibodi mulungule bena mudimo nobe na be na kifuko kyobe’shi, bobanga kulonga Bible na ba ba Temwe ba Yehowa na kutwela mu bisangilo byabo! Kushii mpaka, we mushintule nshalelo obe bwadya kwipushena na miiya ya Yehowa. Bino bibaadi abitekye lukumiino, n’eshimba dinyingye. P’okwete kutungunuka na kunyisha kunyinga eshimba, ekala mushinkamishe’shi: “Yehowa Efile Mukulu oobe, eekala noobe kooso kwende.”​—Yos. 1:7-9. w20.09 5 ¶11-12

Mfumu Asa nyi kileshesho kya muntu baadi mufubishe kipungo kya butaale kalolo pa kukulupila mwi Yehowa n’eshimba dyaye dyooso. Baadi mufubile Yehowa kushii penda mu bipungo bya nkalakashi, kadi mpa na mu bipungo bya butaale. Kubanga ku bukinga bwaye ‘eshimba dyaa Asa dibaasheele dilamate kwi . . . Yehowa mund’a muuwa waye ooso.’ (1 Bf. 15:14) Asa baadi muleshe’shi mmufubile Yehowa n’eshimba dyaye dyoso, pa kukatusha lulangwilo lwa madimi mu Yunda. Bible amba’shi: “Bakatwishe bilambwilo bya beefile beenyi na bilangwilo bya mu myengye, batshokwele bibumba na misungu ishidilwe.” (2 Mya. 14:2, 4) Baadi mpa na mukatushe nyinaye-kulu Maaka bu ndalamumba. Bwakinyi? Mwanda baadi anyingisha bantu bwabadya kulangwila nkishi. (1 Bf. 15:11-13) Asa t’abaadi penda mukatushe lulangwilo lwa madimi nya. Baadi dingi mukwashe mwilo wa Yunda bwaudya kubangula kulangwila Yehowa. Yehowa baadi mwelele Asa na mwilo wa Yunda mwabi, abo nkwikala mu kipungo kya butaale. Munda mwa bipwa ekumi mu bukunkushi bwa Asa, “eumbo dibaadi mu butaale.”​—2 Mya. 14:1, 3, 5. w20.09 14 ¶2-3

Kebungi atupeya bantu bintu byetu bya muulo bwa’shi betulamine. Bu kileshesho, atukatulaa makuta etu ku Banque. Patukitshi bino, atukumiina’shi betulamine makuta etu kalolo kushii kwiayiba sunga kwiashimisha. Mpoolo mutumiibwa baadi mutentekyeshe Timote’shi mmupete kintu kii na muulo​—kiukilo kilombane pabitale mpángo y’Efile Mukulu bwa bantu. Yehowa baadi dingi mupe Timote bushito bwa “kulungula eyi” na bwa “kufuba mudimo wa bulungudi.” (2 Tim. 4:2, 5, Kilombeeno Kipya 2014) Mpoolo baadi munyingishe Timote bwadya kulama kyakya kibaadi kimupeebwe. Nka bu Timote, n’atwe namu mbetupe bintu bi na muulo. Na kalolo kooso, Yehowa mmwitupe kiukilo kya binyibinyi kyatusangana mu Bible. Bino bya binyibinyi, bii na muulo ngofu mwanda abitulongyesha mushindo watudi balombene kwikala mu kipwano ki buwa na Yehowa, na abilesha myanda yatudi balombene kukita bwa kwikala na muloo mu muwa wetu. Patukumiina bino bya binyibinyi na kwibifubila mu nshalelo etu, atwikalwila ku malongyesha a madimi na ku bikitshino bii bubi.​—1 Kod. 6:9-11. w20.09 26 ¶1-3

Mulongi a Bible e na lukalo lwa kumona’shi we mufule na we mukumiine byabya binyibinyi by’olongyesha. Paapa, anyisha kusankila by’alongo. Su kwi mushindo, we kumulungula bikukwashe mayi a kulonda a mu Bible mu muwa oobe. Paapa, ashingula’shi Bible e na malango alombene kumukwasha naye namu. Nsaa y’anulongo, pa mulongi obe a Bible bileshesho by’eyendo bya bantu abaadi bapete nkalakashi i mumune na yaye, kadi beyikambile. Pwende mu kulonga naye Bible, we kutwala mulungudi a mu kakongye kenu mwikale kileshesho ki buwa kilombene kumukwasha. Kwasha mulongi obe a Bible bwadya kumona’shi, Bible e kumukwasha bwa kushintuula nshalelo aye. Su mulongi obe a Bible mwibakile, mwina kwaye kwete naye kulonga Bible su? Su ta mbyabya, mwitamine bwadya kulonga namu naye. Nyingisha mulongi obe a Bible bwadya kulungula bena kifuko na ba kuuku baye byakwete kulonga.​—Yo. 1:40-45. w20.10 16 ¶7-9

Baledi ba Yesu abaadi bamukwasha bwadya kukumiinyibwa n’Efile Mukulu, pa kulonda malango abaadi Yehowa mupe ba nambutwile. (Miy. 6:6, 7) Yoosefe na Maariya abaadi bafule Yehowa ngofu, na kibaadi na muulo kwabadi nyi kulongyesha bana baabo bwabadya kwikala na kifulo ki byabya bwa Yehowa. Yoosefe na Maariya abaadi bakumiine kulangwila Yehowa na bana babo. Kushi mpaka abaadi abatwele bisangilo lubingo loso mu kitumbwilo kya Nazarete, nka bu bibaabadi abende kipwa kyoso ku musangelo wa Kidibwa kya lukilo ku Yeelusaleme. (Luk. 2:41; 4:16) Abimweka’shi pabaabadi abende ku Yeelusaleme, abaadi abalongyesha Yesu mwishinda, na kumulondela kibaadi kikitshikile mwilo wa Yehowa mafuku a kala, pangi pabaabadi abende mukutala ma mbalo abadi bakwile mu bifundwe. Pabaadi bana abafwimi, ta bibaadi bibofwile Yoosefe na Maariya bwabadya kulama byubishi bya mu kikudi. Anka abaadi bapete muloo pabo kwibikita! Pa mwanda abaadi batule lulangwilo lwa Yehowa pa mbalo ya kumpala, abaadi bashale nka peepi na Yehowa. w20.10 28 ¶8-9

Mulungudi etuteka bwa kumushindjikila mu kulonga Bible na muntu, mbikilekile buwa tulumbule mwisambo w’atukalongo. Dorin, mukwetu mulume mbala-mashinda a nsaa yoso amba’shi: “Nasanka nsaa i mulungudi anshindjikila mu kulonga Bible na muntu elumbula, mwanda mulombene kwakula myanda ayinyingisha.” Na dingi mulongi a Bible amono’shi anwe boso nwi b’elumbule kalolo na bi kwikala kileshesho ki buwa kwadi. Na su twena nsaa ya kulumbula mwisambo kantu pa kantu, ata nsaa ya kulumbula myanda ina muulo ya mu mwisambo. Luteko lwi na muulo ukata nsaa y’anulongo na muntu, byabya nangushena myanda yodya kwakula, nsaa y’abakutekye bwa kwela luteko. Yaya nsaa luteko lobe alwikala na bukwashi ngofu. (Mis. 141:2) Hanae mushale mu Japon, atentekyesha luteko lubadi lwele ungi mukwetu mukashi badi mushindjikile mulongyeshi aye a Bible. Amba’shi: “Nadi mumone’shi e mu kipwano ki buwa na Yehowa, na nadi nakumina kumwambula. Nadi mumone dingi’shi munfule nsaa ibadi mutemune eshina dyande mu luteko lwaye.” w21.03 9-10 ¶7-8

Yesu badi mushinkamishe Mpoolo mutumiibwa’shi akafiki mu Looma. Anka, bangi bena Yunda ba mu Yeelusame abadi bamudile lukuku bwa kumwipa. Nsaa ibadi Klodyuse Lisiyase mukata a basalayi ba bena Looma mupushe luno lukuku, badi mukwashe Mpoolo. Kushi kunyengakana, Klodyuse badi mutumine kisaka kya basalayi eyi bwakidya kulama Mpoolo mpa na ku Kezaree. Kwakwa, Mukunkushi Felixe batumine eyi dya “kumulama mwibalasa dya Eroode.” Mwamwa, bena Yunda abaadi abakyebe kwipa Mpoolo, tababadi dingi na bya kumukitshina bi bubi. (Bik. 23:12-35) Anka, Felixe abadi bamupyane kwi mukunkushi Festuse. Bu bibadi akumiina “kwipushena [kusangasha] bena Yuda.” Bepwishe Mpoolo’shi: ‘Okyebe kwenda ku Yelusalema munkakusambisha kumpala kwande pabitale ino myanda su?’ Mpoolo badi auku’shi mbalombene nkamwipa ku Yeelusaleme. Balulwile’shi: “Nakyebe kwenda kwi Kesaala!” Festuse bamwalulwile’shi: “Botekye kwenda kwa Kesaala, wende kwa Kesaala.” Mu kapindji kapela, Mpoolo bayile ku Looma​—kula na bena Yunda abadi abakyebe kumwipa.​—Bik. 25:6-12, Esambi Dipya 2015. w20.11 13 ¶4; 14 ¶8-10

Ingi nsaa atwitopekaa bwa milwisho yatubadi bakite. Bu kileshesho, bangi abetopekaa bwa milwisho ibabadi bakite kumpala kwa kulonga bya binyibinyi. Bangi namu abetopekaa bwa milwisho yabadi bakite kunyima kwa lubatshisho. (Lom. 3:23) Eyondo, atukumiinaa kukita bi buwa. Anka “atukokolaa atwe booso mu bipaso bi bungi.” (Shak. 3:2, Kilombeeno Kipya 2014; Lom. 7:21-23) Sunga t’atukumiinaa kwitopeka bwa milwisho ibatudi bakite, kwibikita a kwitukwasha. Mushindo kinyi? Akwitukwasha bwa kushintuula nshalelo etu, na kwata kitshibilo kya kupela kukita dingi yaya milwisho. (Eb. 12:12, 13) Ku lungi lupese, twi balombene kwitopeka bikishekishe bwa milwisho yatubadi bakite, bino bikutungunuka mpa na kunyima kwa Yehowa kwitufwila lusa, atwe bapwe kwilanga. Kwitopeka kwa mu uno mushindo kwi masaku. (Mis. 31:10; 38:3, 4) Ndjo bwakinyi abitungu tudimukile kwitopeka kukilekile bwa milwisho ikile. Banda kupwandjikisha muloo wi kwikala nao Satana su twaleka kufubila Yehowa​—sunga Yehowa ekala mupwe kwitufwila lusa!​—Pwandjikisha na 2 Beena-Kodinda 2:5-7, 11. w20.11 27 ¶12-13

Mwina Levi babangile kulakila bantu be bubi, na basha kwitatula; kushi mwanda wa’shi badi akyebe kukita myanda i bubi, anka badi ebamono bu be na nshalelo e buwa kukila aaye. (Mis. 73:2-9, 11-14) Abadi abamweneka bu be na bintu byoso​—bupeta, nshalelo e buwa na bu’shi ta be na nkalakashi. Mwina Levi badi na kya kumona myanda mu mushindo awiyimonaa Yehowa. Pakukita bino bapetele dingi butaale na bekele na muloo. Bakwile’shi: ‘Pandji nobe Yehowa, ta ndakila kintu su nkimune pa nsenga.’ (Mis. 73:25) Mu mushindo umune, tatukumanga kulakila bantu babi abamweka bu be na nshalelo e buwa kwitukila. Muloo wabo ngwa kinundunundu na gwa kapindji kapeela. (Mul. 8:12, 13) Su twebalakila, twi balombene kubofula kwishimba mpa na kushimisha kipwano kyetu na Yehowa. Byabya su bobanga kwipusha bu mwina Levi, kita nka byabya bibadi mukite. Kookyela Efile Mukulu na w’ebungye pamune na baba abakitshi kikyebe ky’eshimba dyaye. Nsaa y’ofulu Yehowa ngofu kukila kingi kintu kyoso, opete muloo wa binyibinyi. Na oshala mwishinda aditwala ku “muuwa wa biinyibiinyi.”​—1 Tim. 6:19. w20.12 19 ¶14-16

Nsaa y’atulungula Yehowa kinyongwa kyetu mu luteko, tatulubanga kumutumbula. Bi buwa tunangushene ku myabi yadi mwitwelele sunga nsaa yatudi na myanda. Ingi nsaa, su twakutwa bishima bwa kumulungula bukata bwa kinyongwa kyetu, tutentekyeshe’shi su twa muteka nka penda’shi ‘nkwashe namu,’ Yehowa etwaluula.’ (2 Mya. 18:31) Kulupila mu binangu bya Yehowa, kushi kwikulupila. Mu mafuku a mutemuki Yeshaya, mu siekele a mwanda kumpala kwa bino bipungo byetu (K.B.B.) bena Yuuda abadi abatshinyi bena Asirii’shi abafiki mu kulwa nabo ngoshi. Bu bibabadi abapele kwikala ku bupika bwa bena Asirii, abatekyele bena Ejipitu bukwashi. (Yesh. 30:1, 2) Yehowa badi mwibadimushe’shi, kukulupila bena Ejipitu kwi kwibatwadila masaku. (Yesh. 30:7, 12, 13) Ku bukwashi bwa Yeshaya, Yehowa badi mulungule mwilo mushindo waudya kupeta kukalwilwa. Bambile’shi: ‘Bukome bwenu bwi mu kunyinga kw’eshimba na mu kukulupila’ Yehowa.​—Yesh. 30:15b. w21.01 3-4 ¶8-9

Pa mwanda wa lulamato lwabo, bakwabo na Kidishitu bedibwe mwimu abakekala ba mfumu na ba tshite-mwakwidi mwiyilu. (Kibaf. 20:6) Yehowa, Yesu na ba mikeyilu, abakekala na muloo pa kumona bena Kidishitu bedibwe mwimu 144 000 abapete efuto dyabo dya kwenda mwiyilu. Kunyima kwaye kwakwila bantu 144 000 bekale ba mfumu na ba tshite-mwakwidi, Yowano mutumibua bamwene kingi kintu akikanyisha: “Kibumbu kikata” kya bantu kipande ku Armagedone. Mu kwilekena na kisaka kya kumpala, kino kisaka kya kabidi ki na bantu bakile bungi bashi bya kubadika. (Kibaf. 7:9, 10) “Bafwale nkandjo itooka” bwa kulesha’shi mbelame ‘kushi kato’ mu uno ndumbulwilo a Satana na’shi mbashale na lulamato kwi Efile Mukulu na kwi Kidishitu. (Shak. 1:27) Abele musaase n’eyi dibukopo’shi, mbapashibwe mwanda wabikite Yehowa na Yesu, Mukooko w’Efile Mukulu. Dingi be na malala mu masa abo, bwa kukumiina’shi Yesu nyi Mfumu mutudiibwe na Yehowa.​—Pwandjikisha na Yowano 12:12, 13. w21.01 15-16 ¶6-7

Mulume e kulonga bya kwikala mfumu e buwa a kifuko, pa kwambula mushindo ukwete Yehowa na Yesu kufubisha matalwa aabo. Bu kileshesho, tubande kutala eyikashi dya kwiyisha. Yehowa nyi muntu sha binangu kukila muntu oso; anka atemeshaa mweneno a bafubi baye. (Kib. 18:23, 24, 32) Yehowa mmupwidjikye, anka t’atengyelaa’shi tukite myanda mu kipaso kipwidjikye. Kadi, akwashaa bantu bakutwe kupwidjika abamufubila bwabadya kobesha. (Mis. 113:6, 7) Bible alesha Yehowa mpa na bu “mukwashi.” (Mis. 27:9; Eb. 13:6) Mfumu Davide badi auku’shi, mulombene kulombasha mudimo ukata ubabadi bamupe, penda mwanda wa’shi Yehowa e na kwiyisha na’shi amukwasha. Banda kutala kileshesho kya Yesu. Sunga bibadi bu Mwanana na Mukunkushi a balongi baye, Yesu badi mwibatumpe ngwa. Yesu bambile aye nabene’shi: “Nénulêsha kilêshêsho bilombêne anwe namu nwakita bu byabya bi nákitshi kwanudi.” (Yo. 13:12-17, EEM) Sunga bibadi na matalwa e bungi, Yesu ta badi atengyela’shi bantu bamufubile. Anka badi afubila bangi.​—Mat. 20:28. w21.02 3-4 ¶8-10

Bakwetu bansongwalume, nwina bi bungi bya kukita mu kakongye. Be bungi ba kwanudi, be na bukome bwi bungi Nukwete kukwasha bakwenu balume na bakashi ngofu. Pangi anukumina kwikala bu bafubi ba midimo. Anka, anupwandjikisha’shi bangi abenumono bu’shi nuki bakinga na tanwalombene bya kupeta mashito e na muulo. Sunga nwekala ba nsongwa, kwi myanda yanudya kukita kubanga binobino, bwa’shi bena kakongye benukulupile na kwinunemeka. Ba nsongwalume be bungi be na ngobesha ya kukwasha bangi mu kakongye su? Be bungi be nayo. Bu kileshesho, we kumona pangi’shi, muntu mununu kampanda e na lukalo lwa muntu a kumulesha mushindo wa kufubisha kalolo tablete sunga kangi kamo bwa kwilongyela, na bwa kulumbuula bisangilo. Kiukilo kyobe kya tuno twamo, kikukwasha bano bantu banunu. Sankisha Nshobe e mwiyilu. w21.03 2 ¶1, 3; 7 ¶18

Sunga mukashi ekala mulongye kalolo kukila mulume, mulume ndyo sha bushito bwa kukunkusha lulangwilo lwa mu kifuko, na ingi midimo ya teokrasi. (Ef. 6:4) Abitungu mukashi akokyele na kunemeka mulume aye, anka ena bushito bwa kunyingisha lukumino lwaye’ye nabene. Bwa kwibikita, abitungu ekale ebadikila Bible efuku dyoso na kunangushena ku by’abadika. Bino abimukwasha bwa kulama kifulo na kanemo kaye bwa Yehowa na abimupa muloo wa kutungunuka na kukokyela na kunemeka mulume aye. Bakashi abatungunuka na kukokyela na kunemeka balume babo mwanda wa kifulo kyabo bwa Yehowa, abekala na muloo wi bungi kukila baba boso abapele kukokyela mpángo ya Yehowa aye mutuule mfumu a kifuko. Abekala bileshesho bi buwa bwa ba nsongwalume na ba nsongwakashi. Na abekasha mbalo yabadi bashale butaale na kifulo kushi penda mu kifuko, anka na mu kakongye. (Tt. 2:3-5) Lelo uno, mu bafubi be bungi ba Yehowa basha lulamato, mwi bakwetu bakashi.​—Mis. 68:11. w21.02 13 ¶21-23

Mpoolo mutumiibwa mwitulekyele kileshesho ki buwa kya kunying’eshimba na kunyingila. Ingi nsaa badi epusha mubofule. Anka badi bya kunyingila mwanda badi mukulupile’shi Yehowa amupa bukome bubadi nabo lukalo. (2 Kod. 12:8-10; Fid. 4:13) Twi kupeta natwe bukome na kunying’eshimba nka su twakulupila na kwiyisha koso’shi Yehowa nyi etukwasha. (Shak. 4:10) Tushinkamishe’shi nkalakashi y’atupete ta ndinyoka adifiki kwi Yehowa. Shake mutumiibwa etushinkamisha’shi: “Muntu su ngumune paabamutompo, tambanga’shi ‘kitompwanga kyande akifiki kwi Efile Mukulu.’ Mwanda Efile Mukulu tammulombeene kunangusheena kukita bubi na taatompaa muntu su ngumune.” (Shak. 1:13) Su twibashinkamishe bino, atwifubwila pepi na Nshetu sha kifulo e mwiyilu. Yehowa “taalulukaa . . . sunga kushintuluka.” (Shak. 1:17) Badi mukwatshishene bena Kidishitu ba kumpala mu nkalakashi yabo, na akwasha oso akwatudi lelo uno. Mutekye n’eshimba dyobe dyoso bwa’shi akupe kinangu, lukumino, n’eshimba dinyingye. Aalula ku nteko yobe. w21.02 31 ¶19-21

We kunyingisha mulongi oobe a Bible bwadya kutwela mu bisangilo na kumupasukila. (Fid. 2:4) Pamutwe a kumulungula myanda ayimutulu kafu lupese, mutumbule bwa myanda ya kwete kushintula mu nshalelo aye, we kumwipusha pabitale kulonga kwaye kwa Bible, mudimo waye na kifuko kyaye. Miisambo bu yaya, ngilombene kunyingisha kipwano kyenu. Nsaa y’ofiki kuuku a mulongi, we mulombene kumukwasha mpa na ku lubatshisho.Nsaa ayitungunuka mulongi a Bible na kwela matabula na kushintula nshalelo aye, mukwashe bwadya kwipusha bu mwina kakongye. Pakwikala omwitamina bwa kukisha naye nsaa pamune. (Eb. 13:2) Su mulongi a Bible afika mulungudi sha batshishibwe, we mulombene kumuteka bwadya nkushindikila mu bulungudi. Diego mulungudi a mukandu wibuwa a mu Brésil amba’shi: “Bakwetu balume be bungi abadi abantyekye bwa kwi bashindjikila mu bulungudi. Bino bibadi mushindo wi buwa wa kwibauka kalolo. Panadi nebikitshi, nadi mulongye bi bungi nadi mwipushe mu kipwano ki buwa na Yehowa na Yesu.” w21.03 12 ¶15-16

Yesu balungwile balongi baye bwabadya kufula beshikwanyi babo. (Mat. 5:44, 45) Mbibofule su? Nya! Anka mbibofule ku bukwashi bwa kikudi kiselele ky’Efile Mukulu. Mu bipindji bya kikuba kya kikudi kiselele ky’Efile Mukulu mwi kifulo, lwishinko, kalolo, kupopela na butontshi bwa mbidi. (Nga. 5:22, 23) Ino nyikashi ayitukwasha bwa kunyingila mushikwa. Beshikwanyi be bungi mbalekye kwitukyengyesha pa mwanda wa’shi, mulume, mukashi, mwana sunga nkungishanyi nabo mmuleshe ino nyikashi ya bwina Kidishitu. Bangi abadi beshikwanyi, tabadi binobino mpa na bena Kidishitu netu. Byabya su omono’shi bi bukopo bwa kufula baba bakushikwe mwanda okwete kufubila Yehowa, mutekye akupe kikudi kiselele. (Luk. 11:13) Na ikala mushinkamishe’shi, kukokyela Efile Mukulu nsaa yoso nyi kwi na muulo. (Nki. 3:5-7) Mushikwa ngulombene kwikala bukopo, anka kifulo ki na bukome bukile. Akishintula mashimba. Na akisankishaa Yehowa. Anka sunga beshikwanyi batungunuka nka na kwitushikwa, twi kwikala nka na muloo. w21.03 23 ¶13; 24 ¶15, 17

Mutemuki Yowele baadi mutemukye ngoshi ya basalayi. (Yow. 2:1, 8, 11) Yehowa baadi akula’shi akafubisha ‘kilwilo kyaye kikata’ kya (basalayi ba mu Babilone) bwa kunyooka bena Isaleele bashabakookyela. (Yow. 2:25) Kyakya kilwilo mbekitamine bu kya “dya kuunundu” mwanda beena Babilone abaadi na kya kutwela na ngoshi mu Isaleele kubanga dya kuunundu. (Yow. 2:20) Kyakya kilwilo mbekipwandikishe na mukaba wa mpasu ilumbuule kalolo. Yowele akula pabibatale’shi: “Lushiye na lushiye loso [musalayi] alulondo’nka dyalo eshinda. . . . P’aîtshikila mu kibalo, aikamina . . . ku mashibo, ayitwelela ku madidishi’nka bu ba ngifi.” (Yow. 2:8, 9, EEM) Banda kumona mu binangu byabikitshika. Basalayi be mbalo yoso. Takwi mbalo ya kufwama. Takwi muntu mulombene kusuuka basalayi ba bena Babilone! Nka bu mpasu ya nshiye, bena Babilone (sunga beena-Kaldeya) abaadi babutule kibundji kya Yeelusaleme mu 607 bino bipungo byetu (K.B.B.). Bible amba’shi: ‘Mulopwe a beena-Kaldeya, . . . ta baadi mufwile nsongwalume sunga nsongwakashi lusa, sunga muntu mununu.’​—2 Mya. 36:17. w20.04 5 ¶11-12