Mueshi wa 2

Kimba bya kuuka bakwenu bena kidishitu kalolo. Esambe nabo kumpala na kunyima kwa bisangilo, tuka nabo mu bulungudi, na su kwi mushindo, ebetamine bwa kudya nabo koobe. Nsaa yokitshi byabya, okamono’shi, mukwetu mukashi omonanga bu shakumiinaa kwikala peepi na bantu, e na buufu, mukwetu mulume e na bintu bibungi bya ku mbidi omonanga bu sha kukisheenaa, akukila bantu, sunga’shi bena kifuko abakambaa kufika mu bisangilo nka kunyima kwa nsaa, bakwete kunyingiila bulwishi. (Yob. 6:29) Oolo, tabitungu twikale ‘atutwela mu myanda ishi itutale.’ (1 Tim. 5:13) Sunga mbyabya, kuuka ingi myanda ya bakwetu, na myanda yabadi bafumankane nayo mu nshaleelo kwi buwa mwanda akwitukwasha bwa kwibeuka kalolo. Nsaa yokimbi bwa kuuka nshaleelo e naye bakwenu bena Kidishitu bomono bu bashingile, we kwibapushiisha mpa na lusa. Banda kutala kino kileshesho. Abitungu kwitatshisha bodya kwiuka bakwenu kalolo. Anka, nsaa y’olondo elango dya mu Bible dya kufungula eshimba dyobe, wambula Yehowa mwanda mmufule “bantu booso.”​—1 Tim. 2:3, 4; 2 Kod. 6:11-13. w20.04 16-17 ¶10-12

Bufuku bwa muladilo wa lufu lwaye, Yesu batentekyeshe balongi baye bwabadya kwifulena. Badi muukye’shi kyakya kifulo kya kwipana, akibakwasha bwa kushala mu buumune na kunyingila mushikwa wa uno ndumbulwilo. Banda kutala kileshesho kya kakongye ka mu Tesalonika. Kubanga nka pakabadi kakitshibwe, bena kakongye abapetele kubingwabingwa. Anka bakwetu balume na bakashi ba mwanka mbafikye bileshesho bya lulamato na kifulo. (1 Tes. 1:3, 6, 7) Mpoolo badi mwibanyigishe bwabadya kutungunuka na kwifulena, mpa na ‘kukisha paapa.’ (1 Tes. 4:9, 10, Kilombeeno Kipya) Kifulo kibadi kibatakule bwa kusamba abakyengye na kunyingisha babofule. (1 Tes. 5:14) Abaadi batumikile malango a Mpoolo, mwanda mu mukanda wa kabidi ubadi mwibafundjile kunyima kwa kipwa kimune, Mpoolo bambile’shi: “Kifulo kyanudi nakyo munkatshi mwenu kikwete kutama kwi ooso aa kwanudi.” (2 Tes. 1:3-5) Kifulo kyabo kibadi kibakwashe bwa kunyingila mushikwa na kubingwabingwa. w21.03 22 ¶11

Su atukumiina kupeta efuto dya muwa wa ikalaika, abitungu twikale na nshalelo a bena Kidishitu. (Bik. 20:24; 1 Mp. 2:21) Anka, Satana na boso bakwete kulonda kileshesho kyaye, tabakumina’shi twikale na nshalelo a bena Kidishitu; abakumiina’shi “twibungye n’abo pamune.” (1 Mp. 4:4) Abasepe nshalelo atudi naye na abamba’shi nshalelo aabo nyi ebuwa mwanda ebapa bulungantu. Kadi uno mweneno nga madimi. (2 Mp. 2:19) Twi na mwabi ukata mwanda twibansangule dino eshinda dyatudi! Satana akumiina’shi tulekye kulonda dino eshinda “adifishana ku muwa,” bwa’shi tutwele mwishinda dikata di bantu bebungi ba mu uno ndubulwilo. Dino eshinda di bantu bebungi na mbibofule bwa kwimutwela. Akunamu, ‘adifishana ku lufu.’ (Mat. 7:13, 14) Bwatudya kushaala mudino eshinda na kupela kulonda baba basha balonda miiya ya Yehowa, abitungu tukulupile Yehowa na ku mutemesha. w20.04 26 ¶1; 27 ¶5, 7

Lelo uno, Russie na maumbo aamukwatshishena mbatwele mu “eumbo di buwa bwi moo.” (Nda. 11:41) Mu mushindo kinyi? Mu 2017, Russie mukandjikye mudimo wa ba Temwe ba Yehowa na kwela bangi bakwetu balume na bakashi mu lukano. Mmukandjikye dingi mikanda yetu, mpaa na Bible a Traduction du monde nouveau. Akupu, mmunyengye mashibo a Betele a mu Russie, mashibo a Bufumu na mashibo a Bikongeno. Kunyima kwa kutaluula ino myanda yoso, mu 2018 Kasaka ka Bakunkushi-Bakulu nkafikye mukwakula’shi Russie na maumbo aamukwatshishena nyi nfumu a kuunundu. Byabya, sunga bafubi ba Yehowa bakwete kubingwabingwa, tabakwete kutompa kulwa sunga kukimba kushintuula myanda ya mbulamatadi ya bana ba bantu. Kadi bakwete kulonda elango dya mu Bible pabitale kutekyela “booso bee na matalwa,” bikishekishe nsaa y’abata bitshibilo bya’shi tatwikalanga na bulungatu bwa kulangwila. w20.05 14 ¶9

Ba nambutwile, su bana benu bashinkamishe’shi be na bya binyibinyi, abitungu bekale mu kipwano kibuwa n’Efile Mukulu na kushinkamisha’shi malongyesha a mu Bible nga binyibinyi. Su anulongyesha bana benu bya binyibinyi pabitale Efile Mukulu kalolo, abitungu anwe banabeene nutuushe kileshesho kibuwa pa kwikala balongi bebuwa ba Bible. Abitungu nwaate nsaa ya kunangushena pa byabya byanulongo. Paapa, anumono bya kulongyesha bana benu bwa kukita namu nka byabya. Abitungu nulongyeshe dingi bana benu bya kufubisha bintu abitukwasha bwa kulonga Bible. Su nubakitshi bino, anukwasha bana benu bwabadya kufula Yehowa na “mpika a kishima na mupatulukye.” (Mat. 24:45-47) Tanwimeenanga nka penda pa kulongyesha bana benu bya binyibinyi bya mbangilo bya mu Bible nya. Ebakwasheyi bwabadya kwikala na lukumiino lwibukopo pa kwibalongyesha ‘mianda yifwame . . . y’Efile Mukulu’ muyile kipimo kyabo.​—1 Kod. 2:10. w20.07 11 ¶10, 12-13

Mbantu bungi kinyi bakutwe kupwidika be mu bu kuuku na Yehowa lelo uno? Be midiyo. Mbibofule bwabadya kudya bu kuuku n’Efile Mukulu mwanda be na lukumiino mu mulambu wa nkuulo wa Yesu. Ku bukwashi bwa wawa mulambu, nyi kwatudi balombene kwikala ba kuuku ba Yehowa, kwilambula kwadi na kubatshishibwa. Nsaa yatwele ino ntaba i na muulo, atwisanga pamune na midiyo ya bena Kidishitu belambule na babatshishibwe be mu ‘bu kuuku’ na Muntu mukile bukata mwiyilu na pa nsenga! Mbikunyi byatudya kulesha’shi tukwete kwata bu kuuku bwetu n’Efile Mukulu na muulo? Nka bu Abrahame na Yoobo abaadi bashale na lulamato kwi Efile Mukulu munda mwa bipwa nkama, abitungu tushale na lulamato​—sunga twekala bapwe kukita bipwa bibungi na kufubila Yehowa mu uno ndumbulwilo. Nka bu Ndanyele, abitungu twate bu kuuku bwetu n’Efile Mukulu na muulo kukila muwa wetu. (Nda. 6:7, 10, 16, 22) Na bukwashi bwa Yehowa, twi balombene kunyingiila nkalakashi yatupete na kulama kipwano kyetu naye ki bukopo.​—Fid. 4:13. w20.05 27 ¶5-6

Nfumu Daavide baadi mumone mukashi a muntu kwetumpu meema. Baadi auku kalolo mwiya wa Yehowa awamba’shi: “Tolakilanga mukashy’a muntu-noobe.” (Efi. 20:17) Batungunukile na kubandjila yawa mwana mukashi. Bino bibamufwishiishe mu kwikala na mashimba abidi, dimune adimutumu kwi yawa mwana mukashi Betsabee, dingi namu adimutakula bwadya kusangasha Yehowa. Sunga mbibaadi mufule Yehowa munda mwa mafuku na kumutshina, baadi mulombashe nkalo yaye i bubi. Pamwanda wa byabya, Daavide bakitshine kintu ki bubi. Baadi mukayishe eshina dya Yehowa. Daavide baadi dingi mufwishile bantu bashi na mwanda nkalakashi, mpa na kifuko kyaye. (2 Sam. 11:1-5, 14-17; 12:7-12) Yehowa baadi munyokye Daavide, na Daavide nkwalusha kipwano kyaye na Yehowa. (2 Sam. 12:13; Mis. 51:4-6, 18) Daavide baadi mutentekyeshe makyenga abaadi mupete nsaa ibaadi mutadiile eshimba dyaye adiabuula. Mwaku wi na muulo ukata mu Misambo 86:11 nguno awamba’shi: “Mpe eshimba dimune.” Yehowa baadi mukwashe Daavide bwadya kwikala n’eshimba dimune su? Oolo, mwanda mayi abaadi Yehowa mwakule kunyima, abaadi aalesha’shi Daavide “beekeele . . . mulamate kwi Yehowa, Efile Mukulu aaye.”​—1 Bf. 11:4; 15:3. w20.06 11 ¶12-13

Bible alesha kifulo kya Yehowa bwa bantu baaye bu mooshi. Kifulo ky’Efile Mukulu ki bu mooshi naminyi? Banda kutala kino kileshesho: Banda kunangushena’shi bopono mu mwela ukata na muntu kampanda bakwele bidon bwashi tala otoma tupulu. Eyendo’shi osangeela bukwashi bwaye mwanda mbilombene nkupa mushindo odya kushaala mulengame kuunundu. Kadi penda bidon ta mbilombene nkukwasha bodya kupanda nya. Meema e mashika, na twe kwamba’shi bopanda su tobandjile kufika kwi bwato abufiki mu nkupaasha. Abitungu’shi muntu akutambikye mooshi bwadya nkwabula mu mema. Nka bu abyakula Yehowa mu mayi a kifundwe kyetu kya lelo, na kifulo kyoso, baadi ‘mukakye’ bena Isalele abaadi bapambukye. Efile Mukulu kwete kupusha nka byabya lelo uno pabitale baaba balekye kumufubila na bakalakashwe na myanda na twinyongoshi. Akumiina baukye’shi mmwibafule, na’shi lukalo lwaye ndwa kwibakaka kwadi. Yehowa mukumbene kufuba noobe bwa kwibalesha kyakya kifulo. Bi na muulo bwa kushinkamiisha muntu shikwete kulungula dingi’shi Yehowa mmumufule na’shi mpa n’atwe twibamufule. w20.06 27 ¶12-13

Nsaa ibabadi baase mulongi Etshyene mabwe, bena Kidishitu be bungi ba mu Yelusaleme abasukile, na “babaapaasukiile mu bipindji bya nsenga bya Yuudeya naa Samariya,” kula na Yelusaleme bu ku Shipre na ku Antyoshe. (Bik. 7:58–8:1; 11:19) Twi kupwandjikisha bungi bwa nkalakashi ibadi ipete balongi. Anka abatungunukile na kulungula mukandu wibuwa ma mbalo oso ababadi abende, na abo nkukwasha bwa kutula tukongye ma mbalo e bungi. (1 Mp. 1:1) Kadi kubadi nkalakashi i bungi ibadi aitengyela bena Kidishitu ba kumpala. Bu kileshesho, pangi mu kipwa kya 50 B.B., Amperere a mu Loma Kloode badi mutume eyi dya’shi bena Yuuda boso bakatukye mu Loma. Nyi bwakinyi bena Yuuda abadi bafikye bena Kidishitu, abadi balekye mashibo aabo bwa kwenda angi ma mbalo. (Bik. 18:1-3) Pangi mu kipwa kya 61 B.B., Mpoolo badi mufunde’shi bakwabo bena Kidishitu, abadi abakayibwa, kwedibwa mu nkano na kunyengibwa bintu. (Eb. 10:32-34) Na nka bu bangi bantu, bena Kidishitu abadi na kya kunyingila bulanda na maladi.​—Lom. 15:26; Fid. 2:25-27. w21.02 26-27 ¶2-4

Abikelela Satana na booso abamukwatshishena bukopo bwabadya kwitwimika bwa kutambukila mu bya binyibinyi. (2 Yo. 8, 9) Tutengyeleyi’shi bantu ba pa nsenga abetushikwa. (1 Yo. 3:13) Yowano etutentekyesha’shi: “Bya pano byoso mbishaale ku matalwa a mubi.” (1 Yo. 5:19) Bu abyende uno ndumbulwilo mu kufudiila, Satana anyisha kufita munda. Anyisha kulwa netu mu bufyefye, bwa kwitutakula mu kutambuka lusandji sunga kukumiina madimi a bantu basumbule lukumiino. T’alu n’etu penda mu bufyefye nya. Satana awuku’shi bashaala na kapindji kapeela bwa kutompa kwimika mudimo wa kulungula mukandu wibuwa na kubofusha lukumiino lwetu. Bino t’abitukanyisha nsaa yabakandjika midimo yetu yooso sunga kupela ingi mu maumbo ebungi. Sunga mbyabya, bakwetu balume na bakashi be mu ano maumbo bakwete kunyingiila. Bakwete kulesha’shi sunga Satana akita bafubi ba Yehowa kintu kinyi, twi balombene kushaala na lulamato! w20.07 24 ¶12-13

Yehowa baadi akumiina’shi bantu bekale kwanka bwa looso na muloo mu mbalo ibuwa ibaadi mupangye. Anka, nsaa ibaadi Adame na Eeva batombokyele Nshabo sha kifulo, mulwisho na lufu bibatwelele pa nsenga pooso. (Lom. 5:12) Yehowa bakitshine kinyi? Musango umune, bakimbile bya kukuula bantu. (Kib. 3:15) Yehowa baadi na kya kutusha mulambu wa Yesu bwa kukuula bana ba Adame na Eeva ku mulwisho na lufu. Pa kukita byabya, mmupe muntu ooso bulungantu bwa kumufubila na kupeta muwa wa ikalayika. (Yo. 3:16; 1 Kod. 15:21, 22) Nsaa ayikasangula Yehowa midiyo ya bantu ku bukwashi bwa Yesu, tutengyeleyi’shi, ta mboso abakasanguka musango umune nya. Bwakinyi? Mwanda kwakwa kufwima kwi byabya kwa bantu, akukatwesha kafutakanyi. Yehowa t’akitaa kintu su nkimune mu kafutakanyi nya. Auku’shi bwa’shi bantu bekale mu kufukama, abitungu bintu byooso bikale mmulongo.​—1 Kod. 14:33. w20.08 14 ¶3; 15 ¶5

Abitungu mulongi a Bible apushe’shi atukumiina kumukwasha bwadya kwikala Temwe Yehowa. Kwi myanda ibungi ayitungu’shi mulongi a Bible akite bwadya kubatshishibwa! Kya kumpala, abitungu’shi aukye, afule na ekale na lukumiino mwi Yehowa. (Yo. 3:16; 17:3) Paapa, ekala bu kuuku na Yehowa mpa na bakwetu balume na bakashi mu kakongye. (Eb. 10:24, 25; Shak. 4:8) Akupu, alekye bikitshino byaye bi bubi na kwilanga kwishimba bwa milwisho yaye. (Bik. 3:19) Na dingi, lukumiino lwaye alumutakula bwa kulungula bangi bya binyibinyi. (2 Kod. 4:13) Kufundilo a byoso, elambula kwi Yehowa na kubatshishibwa. (1 Mp. 3:21; 4:2) Dino ny’efuku dya muloo bwa bantu boso! Nsaa i mulongi a Bible akitshi ino yoso myanda itekibwe bwadya kubatshishibwa, mutumbule ngofu na omunyingishe bwadya kuyididila na kukita myanda i buwa. w20.10 17-18 ¶12-13

Su wekala wepwandikisha na bangi mu kakongye, we kubanga kwimona bu’be shii na muulo mwanka. Mu kakongye, bangi mbalombene kwikala abalongyesha kalolo, abalumbuula myanda kalolo, sunga be na ngobesha ya kunyingisha bangi. Pangi omono’shi twe byabadi nya. Byabya abilesha’shi we mwiyishe na ouku mikalo yobe. (Fid. 2:3) Kadi abitungu wekale mudimukye. Mwanda su otungunuka nka na kwipwandjikisha na baaba be na ngobesha nkukila, we kubofula kwishimba bisumanga. We kwimona’nka bu’be shi na mbalo mu kakongye bu bibakwile Mpoolo mutumiibwa. Yehowa baadi mupe bangi ba ku bena Kidishitu ba mu siekele a kumpala bya buntu bya kukita bilengyeleshi na bukome bwa kikudi kiselele, kadi ta mbena Kidishitu booso babaadi bapete nka kyakya kya buntu nya. (1 Kod. 12:4-11) Kadi mwina Kidishitu ooso baadi na muulo. Lelo uno, tatwi na kya buntu kya kukita bilengyeleshi nya. Kadi, bi nka bu bibabidi mu siekele a kumpala. Tatwi na ngobesha i mumune, kadi atwe booso twi na muulo ku meso kwa Yehowa. w20.08 23 ¶13-15

Nsaa y’otekye bwa’shi wekale mukankamane na munyingye eshimba, Yehowa akaluula nteko yobe na t’akakusumbushena nya. (Bik. 4:29, 31) Ekala kwanka nsaa yooso bwa nkukwatshishena. Nangushena pabitale mushindo ubaadi mu kukwashe bwa kunyingiila nkalakashi kampanda na mukupe bukome bwa kushintula nshalelo obe. Kushii mpaka, yawa baadi mukwashe mwilo waye bwa kusabuka Kalunga kamonga, mulombene nkukwasha bwa kwikala mulongi a Kidishitu. (Efi. 14:13) Ikala na kushinkamisha bu mufundji a misambo bambile mayi e mu kifundwe kyetu kya lelo. Yehowa mulombene dingi kukwasha balungudi bapya bwabadya kwikala ‘banyingye mashimba.’ Banda kutala mwanda wa mukwetu mukashi abetaminaa bu Tomoyo. Pa babangile kulungula mukandu wibuwa ku nshibo na nshibo, mwana mukashi abasangene ku nshibo ya kumpala ku bakokwele, bamusashiile amulungula’shi: “Ntankumiinaa kwisamba na ba Temwe ba Yehowa!” Na aye nkushita kiibi musango umune. Tomoyo tabaadi mutshine nya, baadi mulungule mukwetu mukashi abaadi naye mu bulungudi’shi: “Bopusha bibamba? Ntshi mwakule mwanda su ngumune nya. Ne na muloo ngofu mwanda bantundula’shi ne Temwe a Yehowa!” Binobino, Tomoyo taadi mbala-mashinda a myeshi yoso. w20.09 6 ¶13-14

Asa baadi mulungule mwilo’shi: “Yehowa nyi mwibape butaàle mpese yooso.” (2 Mya. 14:5, 6) Asa t’abaadi mupwandikishe’shi kyakya kipungo kya butaale kibaadi kya kwikisha bisumanga nya. Anka, baadi mubangye kwibaka midimba ya lupata, bitenta, na kupwa biibi. Balungwile mwilo wa Yunda’shi: “Eumbo dii mu maasa eetu.” Asa baadi akyebe kwakula kinyi? Baadi akyebe kulesha’shi mwilo ngulombene kwikala mu bulungantu na kwibaka kushii mwishikwanyi ebakalakasha. Baadi munyingishe mwilo bwaudya kufubisha kalolo kyakya kipungo kya butaale. Asa baadi dingi mufubishe kipungo kya butaale bwa kunyingisha kilwilo kyaye. (2 Mya. 14:7) Bino abilesha t’abaadi mukulupile mwi Yehowa su? Nya. Asa baadi auku’shi bu byadi nfumu, abitungu alumbuule mwilo bwa nkalakashi ya baadi balombene kupeta mu mafuku aafiki. Na baadi auku dingi’shi, eumbo tadilombene kwikala nka mu butaale efuku dyooso, na bino bibaadi by’eyendo. w20.09 15 ¶4-5

Bu bi mukulu apasukila naye namu ena matalwa akwela miiya bwa kukalwila mikooko y’Efile Mukulu. Anka, kwi kwilekena kukata pankatshi pa mudimo wi nao bakulu na ba mfumu ba bifuko. Bu kileshesho, Yehowa mupe bakulu mudimo wa bu nsushi, na dingi mwibape matalwa akutusha ba nkitshishi ba bubi bash’abelanga mu kakongye. (1 Kod. 5:11-13) Ku lungi lupese, Yehowa mupe ba mfumu ba bifuko matalwa a shi mupe bakulu. Bu kileshesho, mwi bape matalwa a kwelela bena bifuko byabo miiya na kushinkamisha’shi abeyitumikila. (Lom. 7:2) Bu kileshesho, mfumu a kifuko ena matalwa akutshibila bana baye nsaa yabadya kwalukila ku nshibo. Na dingi, ena matalwa a kwibanyoka su bapela kukokyela ku wawa mwiya. (Ef. 6:1) Eyondo’shi mfumu a kifuko sha kifulo esamba na mukashi aye kumpala kwa kwelela kifuko kyaye mwiya, mwanda bubidi bwabo be “mbidi imunenka.”​—Mat. 19:6. w21.02 16-18 ¶10-13

Kangi kabingilo akalesha’shi bya binyibinyi bi mwiyi dy’Efile Mukulu bi na muulo nka’shi, Yehowa ebifumbwila nka ba sha kwiyisha na “baba ba sha mashimba alombane.” (Bik. 13:48, NWT) Bantu beyishe abakumiina’shi, mpika a lulamato na mudimukye nyi kwete kwitulongyesha bya binyibinyi bi mu Bible ano mafuku etu. (Mat. 11:25; 24:45) Tatwibalombene kupusha bya binyibinyi bi mu Bible mu’twe banabene nya, na kwibipusha kwi na muulo. (Nki. 3:13) Yehowa mwitupe dingi kineemo kya kulongyesha bangi pabimutale, na pabitale mpángo yaye. (Mat. 24:14) Mukandu watulungula wi na muulo, mwanda aukwasha bantu bwadya kutwela mu kifuko kya Yehowa, na awibapa mushindo wa kupeta muwa wa ikalayika. (1 Tim. 4:16) Sunga tukwete kulungula mukandu wibuwa ngofu sunga bipela, tukwete kukwatshishena mudimo ukata ukwete kukitshika ano mafuku. (1 Tim. 2:3, 4) Nyi kineemo kikata kya kufuba pamune n’Efile Mukulu!​—1 Kod. 3:9. w20.09 26-27 ¶4-5

Pabadi ende ku Looma, Mpoolo badi mupete bukwashi bwa Yehowa nsaa yoso kukiila kwi bakwabo bena Kidishitu. Ba kuuku babidi ba Mpoolo mutumiibwa ba sha lulamato, Aristarke na Luka, abadi bakumiine kwenda naye ku Looma. Bible ta lesha mbalo su ngimune’shi, Yesu badi mulee Aristarke na Luka’shi abakafiki ku Looma na muwa. Sunga mbyabya, abadi bakumiine kushimisha muwa wabo nsaa ibabadi bende lwalwa lwendo lwi masaku. Anka abadi bakumiine kwibikita bwa kukwasha Mpoolo. Kunyima abo be mu lwendo, abaukukile’shi abakafiki na muwa. Pababafikile ku Sidone, Juliuse bamupele bulungatu bwa “kwenda kwi bakuku bê mu kumukwasha ku byoso byadi nabyo lukalo.” (Bik. 27:1-3) Kunyima, mu kibundji kya Puteoli, Mpoolo na benaye ‘abasangene bakwetu babebatekyele’shi bashale nabo lubingo lushima.’ Nsaa ibadi bano bakwetu bena Kidishitu ba mu ano ma mbalo abakumbasha nkalo ya Mpoolo na ya benaye, Mpoolo badi ebalondela myanda ibadi ayibasankisha na ibadi ayibanyingisha.​—Pwandjikisha na Bikitshino 15:2, 3. w20.11 15-16 ¶15-17

Nambutwile, longyesha bana bobe’shi we mufule Yehowa mu ngakwilo na mu bikitshino byobe. Uuka’shi kya buntu kikile bukata kyodya kwibapa, nyi kwibakwasha bwabadya kufubila Yehowa. Na kingi kintu ki na muulo, nyi kwibalongyesha byabadi balombene kulama byubishi bi buwa bya mu kikudi bu kwibadikila Bible, kusambila, kutwela mu bisangilo na kulungula mukandu wibuwa. (1 Tim. 6:6) Eyendo, abitungu ope bana bobe bintu bya ku mbidi byabadi nabyo lukalo. (1 Tim. 5:8) Tentekyesha’shi, kilombene kukwasha bana bobe bwabadya kupanda ku nfudiilo a uno ndumbulwilo a Satana na kutwela mu ndumbulwilo mupya a Efile Mukulu, ta makuta sunga bintu bi bungi bya ku mbidi nya, anka nyi kipwano kyabo na Yehowa. (Es. 7:19) Bi muloo wikashaa pa kumona ba nambutwile bena Kidishitu abaata bitshibilo bi buwa bwa kukwasha bana babo bwa’shi bekale peepi na Yehowa! Bana bakule mu bino bifuko, bakwete kutungunuka na kukita ino myanda p’abakulu na be na muloo mwanda baledi babo mbebakushe mu uno mushindo!​—Nki. 10:22. w20.10 28-29 ¶10-11

Ingi nsaa badi akula na kukita myanda kushi kwela binangu, na kunyima badi etopeka. Bu kileshesho, nsaa ibadi Yesu mulungule batumiibwa’shi abitungu akyengye na kufwa, Mpyele badi mumwaluule mayi e mu kifundwe kya lelo. (Mat. 16:21-23) Yesu badi mulumbuule mweneno a Mpyele. Nsaa ibadi kibumbu kya bantu kifikye bwa kukwata Yesu, Mpyele badi mukite myanda kushi kwela binangu; pakutshiba etwi dya mwina mudimo a tshite-mwakwidi mukata. (Yo. 18:10, 11) Dingi, Yesu badi mulumbuule mweneno a Mpyele. Mpyele badi dingi mwitatule pa kwamba’shi sunga bangi batumiibwa baleka Kidishitu, aye t’ebikitshi! (Mat. 26:33) Kuno kwitatula kwa Mpyele, kubadi kumutakule bwa kutshina bantu, aye nkutuna Mfumw’aye misango isatu. Bu bibadi mwinyongole ngofu, Mpyele ‘batukile [pasha] aye nkudila ngofu.’ (Mat. 26:69-75) Badi eyipushe su Yesu badi mulombene kumufwila lusa. Anka Mpyele tabadi mubofule kwishimba mu mushindo wa kuleka kufubila Yehowa nya. Sunga kunyima kwaye kukita kino kilubilo, badi mutungunukye na kufubila Yehowa pamune na bangi batumiibwa.​—Yo. 21:1-3; Bik. 1:15, 16. w20.12 20 ¶17-18

Mfumu a kifuko mulombene kulesha kwiyisha mu mishindo i bungi. Bu kileshesho, t’atengyela’shi mukashi aye sunga bana baye bakite myanda bu bantu bapwidjikye. Atemesha mweneno abo na kumufubisha sunga ekala mwikutwene na aye. Na dingi, mulume sha kwiyisha akitaa midimo ya mu nshibo, sunga bantu ba mbalo yadi mushale beyimona bu ya bana bakashi. Bino bi kwikala bukopo. Bwakinyi? Ungi mukwetu mukashi abetaminaa bu Rachel amba’shi: “Mbalo yandi mutandjikilwe, su mulume akwasha mukashi aye bwa kusula malonga sunga kukomba mu nshibo, bankungishanyi netu sunga bena kifuko naye, abamwipusha su ‘mwana mulume binyibinyi.’ Be kupwandjikisha’shi te na matalwa kwi mukashi aye.” Su uno mweneno e mbalo yodi mushale, tentekyesha’shi Yesu badi mutumpe ngwa ya balongi baye, sunga bibabadi abeumono bu mudimo wa bapika. Mfumu a kifuko e buwa, t’akumina’shi bangi bapwandjikishe’shi aye e bukome na’shi e na muulo, anka akumina’shi mukashi na bana baye bekale na muloo. w21.02 2 ¶3; 4 ¶11

Kutentekyesha myanda ikile nyi kya buntu kya Yehowa; anka sunga tubadi na nshalelo e buwa bwi naminyi, atukekala naye mu nsenga ipya akekala buwa bukilekile. Bangi mbalombene kwitutapa kwishimba, kadi su twata kitshibilo kya kwibafwila lusa, atutumu binangu byetu mu kufubila Yehowa. Kwitopeka kukilekile pabitale milwisho yetu ya kala, nkulombene kwitukutshisha kufubila Yehowa na muloo. Anka bu Mpoolo mutumiibwa, abitungu tushinkamishe’shi Yehowa mwitufwile lusa. (1 Tim. 1:12-15) Twi na lukulupilo lwa kwikala na muwa wa loso. Patukekala mu nsenga ipya, t’atukatentekyesha dingi kintu akitwinyongosha. Pabitale aa mafuku, Bible amba’shi: “Bantu taabakatentekyesha dingi myanda ya-kala.” (Yesh. 65:17) Banda kunangushena, be bungi ba kwatudi mbanunupile mu mudimo wa Yehowa, anka mu nsenga ipya, abakela dingi ba nsongwa. (Yob. 33:25) Byabya, twateyi kitshibilo kya kupela kutula binangu byetu ku myanda ipwe kukila. Anka twimone mu nsenga ipya na tukite kyoso akitungu bwa nkemutwela! w20.11 24 ¶4; 29 ¶18-19

Nkinyi akikakitshika mu mafuku e kumpala? Mu mpombo ikata, Yehowa aketupasha mu mishindo ibidi ya kukanya. Wa kumpala, akapasha bafubi baye basha lulamato nsaa y’akatakula ba mfumu ba pa nsenga bwa kubutula Babilone Mukata, nsangilo a bipwilo bya madimi. (Kibaf. 17:16-18; 18:2, 4) Wa kabidi, akapasha mwilo waye nsaa y’akabutula bingi bipindji bya ndumbulwilo a Satana ku Armagedone. (Kibaf. 16:14, 16) Su twashaala nka ku lupese lwa Yehowa, Satana ta mukumbene kwitukyengyesha bwa loso nya. Anka, aye nyi abakabutula bwa loso. (Lom. 16:20) Byabya, fwala bina ngoshi byoso​—kushi kwibifuula! Tokumanga kulwa ngoshi na Satana na ndumbulwilo aye bupenka bobe nya. Kwatshishena bakwenu balume na bakashi. Na olonde bukunkushi bwa Yehowa. Su bokitshi byabya, shinkamisha’shi Nshobe a kifulo e mwiyilu, akunyingisha na nkukalwila.​—Yesh. 41:10. w21.03 30 ¶16-17

Mmushindo kinyi watudi balombene kulesha’shi twi bakulupile mui Yehowa? Nsaa yatulondo buludiki buaye buetupa. Bible e na bileshesho bi bungi abilesha’shi kunying’eshimba na kukulupila Yehowa kwi na muulo ngofu. Nsaa y’olongo ino myanda, lamiina kibadi kikwashe bafubi ba Yehowa bwa kunying’eshimba kumpala kwa mushikwa. Bu kileshesho, nsaa ibadi tumiladi tukata twa mu Yuuda tulungule batumiibwa bwabadya kwimika kulungula mukandu wibuwa, batumiibwa tababadi batshine. N’eshimba dinyingye, abakwile’shi: ‘Abitungu tukôkyele Efile Mukulu pê bantu.’ (Bik. 5:29) Sunga kunyima kwabo kwibakupila, batumiibwa tababadi bapangayikye. Bwakinyi? Mwanda abadi abauku’shi Yehowa e nabo. Na’shi badi na muloo pa mwanda wabo. Nyi bwakinyi abatungunukile na kulungula mukandu wibuwa. (Bik. 5:40-42) Mu mushindo umune, nsaa ibadi mulongi Etshene kumpala kwa lufu, badi mushale munyingye eshimba mu mushindo ubadi lukyebo lwaye “alumweka bu lwa ba mikeyilu.” (Bik. 6:12-15) Bwakinyi? Mwanda badi mushinkamishe’shi kwete asankisha Yehowa. w21.01 4 ¶10-11

Bino abipushisha’shi be na kondo k’eshimba katokane na abasankisha eshimba dya Yehowa. (Yesh. 1:18) Nyi bena Kidishitu belambule na babatshishibwe, be na lukumiino lwi bukopo mu mulambu wa Yesu na be mu kipwano ki buwa na Yehowa. (Yo. 3:36; 1 Mp. 3:21) Mbekileshe kimane kumpala kwa lupuna nsulu lw’Efile Mukulu “akimulangwila kaanya na bufuku” pano pa nsenga. (Kibaf. 7:15) Sunga mbinobino, bakwete abakitshi mudimo ukata wa kulungula mukandu wa Bufumu na kwikasha bantu bu balongi, pa kutula myanda ya Bufumu bw’Efile Mukulu kumpala kwa yabo. (Mat. 6:33; 24:14; 28:19, 20) Kibumbu kikata kipande ku mpombo ikata, akishinkamisha’shi Efile Mukulu atungunuka na kwikilama mwanda yawa ‘mushale pa lupuna nsulu ebalama mwipema dyaye.’ Mulayilo autengyelanga ingi mikooko wa’shi: “[Efile Mukulu] akumuna mpolo yooso ku meeso aabo.”​—Kibaf. 21:3, 4. w21.01 16 ¶9-10

Twi na muloo wa kwikala mu kifuko kya Yehowa, oso akwatudi akitshi mwaye moso bwa kunemeka baba babadi bape matalwa kwi Yehowa. Bible alesha’shi Yehowa ataa bana bakashi na muulo nka bu bana balume. Bu kileshesho, Bible alesha’shi mu siekele a kumpala, Yehowa badi mupe balume na bakashi kikudi kiselele na kwibapa bukome bwa kukita bilengyeleshi bu: kwakula ingi ndimi. (Bik. 2:1-4, 15-18) Boso bwabo, abadi bedibwe mwimu ku bukwashi bwa kikudi kiselele na abakamunana na Kidishitu. (Nga. 3:26-29) Balume na bakashi, abakapete efuto dya kwikala na muwa wa loso pa nsenga. (Kibaf. 7:9, 10, 13-15) Na boso bwabo mbapebwe mudimo wa kulungula na kulongyesha mukandu wibuwa. (Mat. 28:19, 20) Bu kileshesho, mukanda wa Bikitshino awisambila mukwetu mukashi abetamina bu Prisile. Aye na mulume aye Akila abadi bapatulwile Apolose bya binyinyi mu mushindo utokane, aye muntu badi mulongye kalolo.​—Bik. 18:24-26. w21.02 14 ¶1; 15 ¶4

Bakulu, nwina bushito bukata pabitale kukwasha bakwetu, bwabadya kwikala balungudi na balongyeshi be buwa. Su mulungudi apusha buufu bwa kukunkusha kulonga kwa Bible p’odi, muteky’obe bodya kukunkusha. Bakulu mbalombene kukita bi bungi bwa kunyingisha balongyeshi ba Bible. (1 Tes. 5:11) Su t’okwete kulonga Bible na muntu binobino, we kukwasha mulongi a Bible bwa kwela matabula mpa na ku lubatshisho. Su we mwilumbule kalolo, we kukwatshishena mulongyeshi, pa kutusha binangu abikwasha mulongi kushi kwakula bi bungi. Twikale ba kuuku ba balongi ba Bible nsaa y’abafiki ku Nshibo ya Bufumu, na twikale kileshesho ki buwa bwabo. Bakulu, mbalombene kunyingisha balongi ba Bible pa kwaata nsaa ya kwisamba nabo, na dingi mbalombene kunyingisha balungudi pa kwibalongyesha na kwibatumbula. Su tubakitshi bino, atupete muloo wi bungi, nsaa y’atukitshi kintu kampanda sunga kyekala kipela bwa kukwasha muntu bwa’shi afule na afubile Yehowa. w21.03 13 ¶18-19

Mu nshalelo aaye, Davide badi muleshe’shi mmuntu a kukulupila. Bu kileshesho, pabadi ki nsongwa, Davide badi mufube ngofu bwa kupasukila mikooko ya nshaye. Uno mudimo ubadi masaku. Davide balungwile Mfumu Saule’shi: “Mufubi oobe baadi mulami a mikooko kwa nshaaye. Pabaafikanga ntambwe, sunga urse bwa kukwata mikooko mu kisaka kyaa nyema, neendanga mu kwibingena naaye, namwipaa, sunga naamumaana nyema ku lubanga.” (1 Sam. 17:34, 35) Davide badi auku’shi ena kya kupasukila mikooko. Ba nsongwalume mbalombene kwambula Davide, pa kukumbasha n’eshimba dyoso mudimo oso w’abebapa. Pabadi ki nsongwa, Davide badi munyingishe kipwano kyaye na Yehowa. Kyakya kipwano kibadi na muulo kukila kunyinga kwaye kw’eshimba na ngobesha yaye ya kwimba kindala. Yehowa ta badi penda Efile a Davide, badi dingi kuuku aye​—kuuku aye a p’eshimba. Bakwetu balume ba nsongwa, mwanda wi na muulo wanudya kukita, nyi nkunyingisha kipwano kyenu na Nshenu e mwiyilu. w21.03 3 ¶4-5