Mueshi wa 3

T’atukumina bwa’shi betushikwe nya. T’atukumina bwa’shi betubingyebingye pa mwanda wa lukumino lwetu nya. Byabya bwakinyi twi balombene kwikala na muloo nsaa y’abetushikwa? Tala tuno tubingilo tusatu. Ka kumpala, nsaa y’atunyingila, atusankisha Efile Mukulu. (1 Mp. 4:13, 14) Ka kabidi, lukumino lwetu alunyisha kunyinga. (1 Mp. 1:7) Ka kasatu, atukapete bwedi bukata, muwa wa loso. (Lom. 2:6, 7) Mafuku apela kunyima kwa Yesu kusanguka, batumibwa abapetele muloo ubadi Yesu mwakwile. Kunyima kwabo kwibakupila na kwibatosha bwabadya kulungula mukandu wibuwa, abadi na muloo. Bwakinyi? “Mwanda baabatundwilwe bu balombeene kukayiibwa bw’Eshina dya Yesu.” (Bik. 5:40-42) Kifulo kyabo bwa Mfumu abo kibadi kikile mushikwa wa beshikwanyi babo. Na babadi baleshe kifulo kyabo pa kulungula mukandu wibuwa “kushi kuleka.” Lelo uno, bakwetu be bungi bakwete kutungunuka na kufuba na lulamato loso sunga mu nkalakashi. Abashingula’shi Yehowa ta mulombene kwilwankana mudimo wabo na kifulo ky’abalesha bw’eshina dyaye. w21.03 25 ¶18-19

Bena Kidishitu bedibwe mwimu t’abatandikwaa na lukulupilo lwa kwenda mwiyilu nya. Efile Mukulu nyi ebapeyaa lwanka. Bakwete kunangushena bwa lukulupilo lwabo, kuteka na abatengyela na muloo efuto dyabo dya kwenda mwiyilu. T’abauku abikekala mbidi yabo nya. (Fid. 3:20, 21; 1 Yo. 3:2) Sunga mbyabya. Abakekala nabo mu Bufumu bwa mwiyilu. Ingi mikooko ayitengyela bwa kwikala na muwa wa loso pa nsenga, nyi ndukalo alutandikwaa nalo muntu oso. Bakwete kutengyela efuku dy’abakakwasha bwa’shi baluule nsenga ishima ikale mpaladiso. Abatengyela na muloo oso efuku dy’abakebaka mashibo aabo, kukuna mitshi na kukusha bana be na mbidi ipwidjikiye. (Yesh. 65:21-23) Abatengyela bwa nkenda ma mbalo elekenelekene pa nsenga, nkabadila myengye, mitamba, myela ikata na kulonga bintu byoso bipangye Yehowa. Nfudilo a byoso, abakekala na muloo wa kuuka’shi, bu kuuku bwabo na Yehowa abukayididila na kutama. w21.01 18-19 ¶17-18

Nsaa ibaadi bena Babilone bapudishe kubutula Yeelusaleme, bantu abaadi na kya kwamba nka’shi: “Dinw’eumbo . . . ndibutudiibwe, tadii muntu sunga nyema, ndipaanwe ku matalwa a beena-Kaldeya.” (Yel. 32:43) Bipwa 200 kunyima kwa butemuki bwa Yowele, Yehowa baadi mufube na Yeelemiya bwadya kutemuka mwanda kampanda pabitale ngoshi. Bakwile’shi abakakimbuula kalolo baaba bena Isaleele abaadi bepane mu kukita myanda ibubi​—bwa kwibakwata boso. Bambile’shi: “‘Yehowa amba’shi; Naakatumu balòbi beebungi bwa’shi beebasubule; akupu dimo naatumu bampibwe beebungi, beebingeene nabo mu myengye yooso, pa twengye tupeela mpaa na mu mpako ya mbwebwe. Naakyebe binobino kwibanyooka bwa bubi bwabo bwi pabidi, na kito kyaabo.’” Sunga kalunga sunga mitamba tayikakwasha bena Isaleele bwabadya kufwama bena Babilone nya.​—Yel. 16:16, 18. w20.04 5 ¶12-13

Pabaadi mu kipungo ki bukopo, Lota baadi munyengakane pa kukokyela mayi a Yehowa. Twi balombene kupwandikisha’shi Lota tabaadi mukokyele Yehowa. Anka Yehowa baadi mutungunukye na kukimba bya kumupasha. Pa “mwanda Yehowa bamufwilanga lusa,” ba mikeyilu abakwatshile kifuko kyaye ku maboko bwa kwibatusha kibundji. (Kib. 19:15, 16) Yehowa baadi mupushe Lota lusa bwa tubingilo twi bungi. Lota baadi pangi apele kukatuka kwaye ku nshibo mwanda baadi atshinyi bantu ba mu kibundji, nyi bwakinyi baadi anyengakana bwa kutuuka mu nshibo. Kubaadi dingi angi masaku. Lota baadi pangi mupushe mwanda wa ba nfumu babidi babaadi bapone mu meena a kaabudimbo peepi n’ebanda. (Kib. 14:8-12) Bu bibaadi mwibakile na nshe-bana, Lota baadi ekalakasha bwa kifuko kyaye. Na dingi, Lota baadi mpeta, baadi pangi na nshibo ibuwa mu Sodome. (Kib. 13:5, 6) Eyendo’shi, tuno tubingilo toso tatubadya kukutshishwa Lota bwa kukokyela Yehowa musango umune nya. Anka Yehowa tabaadi mwimene pa bilubilo byaye nya, kadi baadi mumumone bu muntu “mululame.”​—2 Mp. 2:7, 8. w20.04 18 ¶13-14

Abitungu nsaa i bungi bwa’shi bantu abadi abakumono bu mwana mukinga, babangye nkumona bu nsongwalume bapu kunyinga. Anka, ikala mushinkamishe’shi, Yehowa t’atalaa penda mpala nya. Akuuku kalolo na auku’shi we na ngobesha ya kukita kintu kampanda. (1 Sam. 16:7) Nyingisha kipwano kyobe n’Efile Mukulu. Davide badi mwibikite pa kunangushena ku bintu bipangye Yehowa. Badi munangushene pa kyabidi bilombene kumulongyesha pabitale Mupangi. (Mis. 8:4, 5; 139:14; Lom. 1:20) Kingi kintu kyodya kukita, nyi nkuteka Yehowa bwa’shi akupe bukome. Bu kileshesho, bena kalasa nobe, bakwete nkusepa mwanda wa’shi we Temwe a Yehowa? Su nabyo, teka Yehowa akukwashe bwa’shi onyingile luno lukalakashi. Na otumikile malango opete Mwiyi dyaye, mu mikanda ayipatula Bible, na mu ma video. Nsaa yoso y’omono abikukwasha Yehowa bwa kunyingila lukalakashi, onyisha kumukulupila. Na dingi, nsaa ayimono bangi’shi we mukulupile mwi Yehowa, abakukulupila namu. w21.03 4 ¶7

Ba kuuku befulene, abakumiinaa kwilungushena bi mu binangu byabo. Bi kukitshika namu byabya mu bu kuuku bwetu na Yehowa su? Oolo! Yehowa esambaa netu kukiila ku Eyi dyaye, na mwanka etulungula bi mu binangu byaye, na byapushaa. Atwisambaa naye mu luteko, na kumulungula myanda i mu binangu byetu mpaa na yaya ifwame i mwishimba dyetu. Bu byadi Kuuku eetu sha kifulo, Yehowa tatemeshaa penda nteko yetu nya, aluulaa ku yanka. Ingi nsaa e kwitwaluula kushii kunyengakana. Ingi nsaa namu, abitungu’shi tutungunukye na kwela nteko pabitale mwanda kampanda. Sunga mbyabya, twikale bashinkamishe’shi lwaluulo alufiki nka kufika pa nsaa na mu kipaso kibuwa. Eyendo, lwaluulo lw’Efile Mukulu lwi kwikala lwilekene na byatukulupilanga. Bu kileshesho, pamutwe pa kukatusha lukalakashi, e kwitupa kinangu na bukome bwa ‘kwilukambila.’ (1 Kod. 10:13, Kilombeeno Kipya 2014) Mushindo kinyi watudi balombene kulesha lutumbu lwetu bwa kya buntu kya luteko? Atulesha’shi twi na lutumbu pa kulonda elango dy’Efile Mukulu dya ‘kuteka kushi kukôka.’​—1 Tes. 5:17. w20.05 27-28 ¶7-8

Bantu abakamba kusuuka lubilo, abatumaa meeso kumpala bwa’shi tala ba kokola. Su apona, abuuku bukidibukidi bwa kutugunuka na kusuuka lubilo. T’atuulu binangu ku kibamuponesha nya, kadi ku mufunda wa nfudilo na ku efuto dyakyebe kupeta. Mu lubilo lwetu, twi balombene kupona misango ibungi, kukita bilema mu byatwakula na byatukitshi. Sunga’shi bakwetu batusuuku n’abo lubilo mbalombene kukita kintu akitutapa kwishimba. Bino ntabilombene kwitukanyisha su byakitshika. Twi bantu bakutwe kupwidika, na atwe boso twi mu kashinda kebungye akatwala ku muwa. Byabya, twibalombene “kwikokosheena,” na bino mbilombene kutakula muntu mu “kwidila.” (Kol. 3:13) Anka, pa mutwe pa kutula binangu ku kibatukokola, tutuleyi bingangu ku efuto di kumpala na kutungunuka na kusuka lubilo. Su tubakwata sungu, tubapele kwibwaa, tatukafiki ku mufunda wa nfudilo bwa kupeta efuto nya. Na dingi, atwikala bu kikokoshi kwi benetu bakwete kusuuka lubilo mu kashinda kebungye akatwala ku muwa. w20.04 26 ¶1; 28 ¶8-9

Mutemuki Ndanyele akwila mbulamatadi ilekenelekene ya bana ba bantu i na matalwa pe mwilo w’Efile Mukulu. Akwila bipindji bilekene bya nkishi mukata a kyamo. Mbulamatadi a nfudilo a bana ba bantu mbamuleshe bu ngwaa ya nkishi isangye kyamo na ema. Ngwa ayilesha bufumu bwa nsenga ishima bwa Angleterre na bena Amérique. Bwabwa butemuki abulesha’shi buno bufumu abukekala nka kwanka nsaa yabakabutula mbulamatadi ya bana ba bantu kwi Bufumu bw’Efile Mukulu. Yowano mutumiibwa baadi dingi mwakwile mafumu a nsenga ishima e na matalwa pe bafubi ba Yehowa. Mu buno butemuki bwa Yowano, ano mafumu aalesha nyema e na mitwe musambo. Mutwe wa musambo wa yawa nyema aulesha bufumu bwa nsenga ishima bwa Angleterre na bena Amérique. Bino bi na muulo mwanda nyema tamutushe ungi mutwe nya. Mutwe wa musambo wa uno nyema autungunuka na kukunkusha mpa na nsaa ayikafiki Kidishitu na bilwilo byaye bya mwiyilu mu kwiubutula mpaa na ingi mitwe ya nyema yoso.​—Kibaf. 13:1, 2; 17:13, 14. w20.05 14 ¶11-12

Penda ano mayi aetutentekyesha bya binyibinyi bi na muulo. Aetutentekyesha’shi Efile Mukulu nsulo ya muwa, mwikale dingi nsulo ya kifulo. Yehowa mmwitufule! Kifulo kyaye akitukwasha bwatudya kwipusha mu kukalwilwa na be na muloo. Bena Kidishitu, ta mbalombene kusangula abadya kufula na’shi akufula, mwanda kufula nyi mwiya. (Mat. 22:37-40) Nsaa y’atuuku Yehowa kalolo, mbilombene kwikala bibofule bwa kukokyela mwiya wa kumpala. Mwanda’shi Yehowa mmupwidjikye, etupasukilaa na etukitshinaa myanda na kalolo. Anka bi kwitwikela bukopo bwa kukokyela mwiya wa kabidi. Bwakinyi? Mwanda bakwetu balume na bakashi mbakutwe kupwidjika. Ingi nsaa mbalombene kwakula sunga kwitukitshina myanda ishi buwa. Yehowa auku’shi mbilombene kwitwikela bukopo bwa kukokyela uno mwiya, nyi bwakinyi badi muyokyele bangi bafundji ba Bible bwabadya kwitulongyesha bwakinyi abitungu twifulene na mushindo watudya kwifulena. Mu bano bafundji mwi Yowano.​—1 Yo. 3:11, 12. w21.01 8 ¶1-2

Sunga twabanga kufubila Yehowa binobino sunga kubanga kala, abitungu twiyipushe’shi: ‘Nkwete kukambila bitompwanga bya Satana abintakula bwa kwikala na mashimba abidi su? Bu kileshesho, su omona kifwatulo ku TV sunga ku Internete kilombene kwibwesha lukalo lwa kutambuka lusandji, we kukita kinyi? We kupwandjikisha’shi kyakya kifwatulo sunga yawa video ta pornografi nya. Anka, nkilombene kwikala bu kintu kyabafubisha kwi Satana bwa’shi wekale na mashimba abidi? Kyakya kifwatulo kikwikala bu ka kyamo kapela akafubisha muntu bwa kutonkola mutshi. Bwa musango wa kumpala kipoko takikamba kumweneka nya. Mwenda kupokola, kipoko akyende na kumweneka. Kutala bifwatulo bya bantu be muswa ku TV sunga ku Internete nkulombene kwikala bu kano ka kyamo su? Kutala bintu bi bino na kumona’shi tabii masaku, nkulombene kutakula muntu mu kukita mulwisho luntuluntu ku meso kwa Yehowa na kukutwa kulama lulamato. Byabya, totweshanga kintu su nkimune kishii buwa mwishimba dyobe! Ekala nka n’eshimba dimune bwa kutshiina eshina dy’Efile Mukulu! w20.06 11-12 ¶14-15

Abitungu tutungunukye na kukwasha na kunyingisha bakwetu bashikwete kulungula dingi na balekye kutwela mu bisangilo kunyima kwa kwimonena nabo. Anka bi mwana mushimine a mu lukindji lwa Yesu, mbalombene kwikala batapikye ku mashimba. (Luk. 15:17-24) Mbabofule mu kikudi bwa myanda yabadi bamone mu ndumbulwilo a Satana. Abitungu twibakwashe banyingishe lukumiino lwabo kwi Yehowa. Mu lukindji lwa mukooko ushimine, Yesu badi muleshe bibaadi mulami a mikooko mutwale mukooko kwipampa na kwiwalusha munkatshi mwa loombe. Mulami a mikooko mmupwe kukisha nsaa na bukome bwaye mu kukimba mukooko ushimine. Anka ashinkamisha’shi abitungu eutwale bwa kwenda nao mu kikutu, mwanda tawi na bukome bwaudya kwalukiila ao unabene nya. (Luk. 15:4, 5) Abitungu tutuushe nsaa na bukome bwetu bwa kukwasha baaba bashikwete kulungula dingi bwabadya kukambila kubofula kwabo. Anka ku bukwashi bwa kikudi kya Yehowa, Eyi dyaaye, na mikanda yatupete mu kakongye, twi balombene kwibakwasha bwabadya kupetuula bukome bwa mu kikudi. Byabya, su bakuteka bwa kulonga Bible na muntu ayikalanga mulekye kulungula, we mulombene kukumina na muloo oso su we na mushindo wa kwibikita. w20.06 28 ¶14-15

Abitungu’shi ooso a kwatudi aleshe kifulo​—kitundwilo kya bena Kidishitu ba binyibinyi. Anka abitungu twikale na ‘kiukilo kya binyibinyi na lushingulwilo lulombane.’ (Fid. 1:9) Su tatwi na kino kyukilo atwikala ‘atuwumbakashiibwa na kukakiibwa aku n’aku kwi lupapi looso lwa ndambukiisho ya madimi ya bantu,’ mpa na bantu basumbule lukumiino. (Ef. 4:14) Nsaa ibaadi balongi bebungi ba mu siekele a kumpala bino bipungo byetu B.B. balekye kulonda Yesu, Mpyeele mutumiibwa baadi mushinkamiishe Yesu lukumiino lwaye pa kwakula’shi e na ‘bishima bya muuwa wa looso.’ (Yo. 6:67, 68) Sunga’shi Mpyeele t’abaadi mupushe byooso bibaadi Yesu mwakule, baadi mushaale na lulamato mwanda baadi mushinkamishe bya binyibinyi pabitale Kidishitu. N’oobe namu we mulombene kunyingisha lukumiino l’oobe mu malongyesha a Bible. Su bokitshi byabya, lukumiino l’oobe alwikala nka lunyingye sunga ofumankana na lukalakashi kinyi, na okwasha bangi bantu bwa badya kunyingisha namu lwabo.​—2 Yo. 1, 2. w20.07 8 ¶2; 13 ¶18

Bwa kukwasha bakwetu balume na bakashi bwabadya kushaala mu bya binyibinyi, abitungu twibaleshe lusa. (1 Yo. 3:10, 11, 16, 17) Abitungu’shi twifulene, kushii penda nsaa i myanda kalolo, kadi mpa na apatuuku nkalakashi. Bu kileshesho, ouuku muntu mufwishe mukwabo adi mufule, na e na lukalo lwa kunyingishibwa sunga bukwashi mu mushindo kapanda su? Sunga’shi, we mupushe’shi bangi bakwetu mbashimishe bintu byaabo mu masaku aatukaa ku bintu bipangibwe, na be na lukalo lwa kwibakuula Mashibo aabo a Bufumu sunga ma nshibo aabo? Atwibalesha kifulo na lusa kushii penda mu byatwakula nya, kadi na mu bikitshino byetu. Atwambula Nshetu sha kifulo e mwiyilu nsaa yatwileshena kifulo. (1 Yo. 4: 7, 8) Mushindo wi na muulo watwileshena kifulo nyi mpa kwifwileena lusa. Bu kileshesho, muntu e kwitufitshisha munda, akupu etuteka lusa. Atulesha kifulo pa kumufwila lusa na kwilwankana kyakya kilubilo.​—Kol. 3:13. w20.07 24 ¶14-15

Banda kunangushena bungi bwa mudimo aukatungu bwa kulongyesha byabya byooso binunu bya bantu bya binyibinyi pabitale Yehowa. Muntu ooso abakamulongyesha Bible pa bupenka bu byabikwete kukitshika lelo uno su? Bano abakasanguka abakebatumu mu tukongye na kwibalongyesha bwabadya kulongyesha namu baaba abasanguka kunyima kw’aabo su? Tutengyeleyi, atukamono akikakitshika. Atuuku’shi kumpala kwa’shi Bipwa kinunu bya kumunana kwa Yesu bipwe, “eumbo [nsenga] adikala dyuule na kuuka kwa Yehowa.” (Yesh. 11:9) Atukekala na mudino wi bungi wa kukita mu bipwa kinunu! Mu Bipwa kinunu bya kumunana kwa Kidishitu, abitungu bana booso ba Yehowa be pa nsenga batungunukye na kushintuluka bwa kumusankisha. Byabya, abitungu bekale na kifulo kya bu bana na bana, bwa’shi bakwashe baba abasanguka bwabadya kukambila binangu bya mulwisho na kutumikila miiya ya Yehowa. (1 Mp. 3:8) Kushi mpaka, baba abakasanguka abalamata bafubi ba Yehowa basha kwiyisha, na ‘abafubu bwa kipandjilo [kyaabo.]’​—Fid. 2:12. w20.08 16 ¶6-7

Su twatumikila elango dituushe Mpoolo mutumiibwa ku bukwashi bwa kikudi kiselele na kutaluula bikitshino byetu, twi kumona’shi twi na kya buntu kibuwa na ngobesha. Bu kileshesho, mukulu kampanda e kukutwa kwikala mulongyeshi ebuwa pakitshi mwisambo, kadi ekala mulongyeshi e buwa ngofu mu bulungundi. Sunga’shi e kukutwa kwikala alumbuula myanda kalolo bu abikitaa ungi mukulu a mu kakongye, kadi e na ngobesha ya kunyingisha bangi na balungudi abakumiinaa kumuteka malango. Sunga’shi e kwikala na nkumo ya muntu akukila benyi. (Eb. 13:2, 16) Su twauka ngobesha yetu, atwikala na muloo wa kukita kyakya kilombene kunyingisha kakongye. Na t’atwikala atukwatshila bangi kyuutu mwanda wa ngobesha yabadi n’ayo kadi yatushii n’ayo. Sunga twekala na mashito e naminyi mu kakongye, abitungu atwe booso twikale na lukalo lwa kulumbula ngobesha yetu mu mudimo wetu wa bulungudi na mu nfubilo etu. w20.08 24 ¶16-18

“Kibumbu kikata.” Uno mwisambo abadi bewele kwi Joseph Rutherford mu kipwa kya 1935 ku kikongeno kibadi kikitshikye mu Washington, D.C. (District de Columbie), mu États-Unis. Mu mwisambo waye, mukwetu Rutherford badi mutundule boso be mu “kibumbu kikata” kyabadi baleshe mu Kibafumbwilwe 7:9. Kubanga kala, balongi ba Bible abadi abapwandjikisha’shi, kino kibumbu kikata nyi kisaka kya bantu basha lukumiino lupela akikende mwiyilu. Mukwetu Rutherford badi mufubishe bifundwe bwa kupushisha’shi, kibumbu kikata ta nkisangulwe bwa kwenda mwiyilu nya, kadi nyi ingi mikooko ya Kidishitu ayikapanda ku “mpombo ikata” na ayikashala pano pa nsenga bwa loso. (Kibaf. 7:14, Kilombeeno Kipya 2014) Yesu balayile’shi: “Nee na ingi mikooko ishii ya mu kino kikùtu; dingi yaaya dimo, abitungu neeyikunkushe; aiteemesha eyi dyande, byabya akukeekala lombe lumunenka na mulami.” (Yo. 10:16) Bano babapwandjikisha bu ingi mikooko, nyi ba Temwe ba Yehowa basha lulamato, na be na lukulupilo lwa kushala bwa loso mu mpaladiso pa nsenga.​—Mat. 25:31-33, 46. w21.01 14 ¶1-2

Su atukumiina kunyingiila na kukumbasha mudimo wetu wa bulungudi, abitungu twikitshishe. (Mat. 28:19, 20) Kebungi, atukumiinaa kukita nka myanda ibofule. Anka, ingi nsaa, myanda i na muulo tayi nka ibofule kukita nya. Byabya abitungu twikitshishe. Nyi bwakinyi twi na lukalo lwa bukwashi bwa kukita myanda ayitwelelaa bukopo kukita. Kubukwashi bwa kikudi kiselele, Yehowa etupa bwabwa bukwashi. (Nga. 5:22, 23) Mpoolo mutumiibwa baadi ekitshisha. Nyi bwakinyi alesha’shi ingi nsaa baadi ‘afwambusha mbidi yaye na kwiyitonta’ bwa kukita kyakya kii buwa. (1 Kod. 9:25-27) Mpoolo baadi munyingishe bangi bwabadya kwikitshisha, na bwa kukita byooso “mu kipaso kilombâne na kwilondêna kalolo.” (1 Kod. 14:40, EEM) Abitungu twikitshishe bwa kulama byubishi bya mu kikudi mpa na kukita mudimo wa bulungudi.​—Bik. 2:46. w20.09 6-7 ¶15-17

Mu maumbo ebungi lelo uno, twi balombene kulungula mukandu wibuwa kushii kubingwabingwa. We mu dimune dya ku ano maumbo su? Su mbyabya, eyipushe’shi, ‘Mushindo kinyi wa nkwete kufubisha buno bulungantu?’ Ano mafuku a nfudiilo e buwa bwa mwilo wa Yehowa, mwanda ukwete kukita bibungi mu mudimo ukata wa kulungula na kulongyesha mukandu wibuwa bishakitshikile dingi mu nsenga ishima. Kwi myanda ibungi yatudi balombene kukita mu uno mudimo. Mushindo kinyi odya kufubisha kalolo kipungo kya butale? (2 Tim. 4:2) We kutaluula nshalelo obe, na kumona su obe sunga mwina kifuko nobe nwi kutamisha mudimo wa bulungudi, pangi kwikala bu mbala-mashinda. Kino nta nkipungo kya kukimba mapeta na bintu bibungi bya ku mbidi, mwanda t’abiketukwasha mu mpombo ikata. (Nki. 11:4; Mat. 6:31-33; 1 Yo. 2:15-17) Balungudi bebungi mbalongye ludimi lupya bwa’shi bakwashe bantu bwa kulonga pabitale Yehowa. Ndumbulwilo a Yehowa kwete kutusha mikanda ibungi ilombene kwitukwasha bwa kulungula mukandu wibuwa mu ndimi ikile pa 1 000! w20.09 16 ¶9-11

Musalayi ebuwa ekalaa na lulamato. Alwiyaa n’eshimba dimune bwa kukalwila muntu adi mufule sunga kintu kyataa na muulo. Mpoolo baadi munyingishe Timote bwa kunyisha kulamata Efile Mukulu​—kwamba’shi kwikala mulamate kwi Efile Mukulu na lulamato looso. (1 Tim. 4:7) Patunyisha kutamisha kifulo na lulamato lwetu bw’Efile Mukulu, atwikala na lukalo lwa kulama bya binyibinyi. (1 Tim. 4:8-10; 6:6) Abitungu’shi musalayi etatshishe bwa kwikala mwilumbuule bwa ngoshi. Timote baadi mobeshe kukambila bukitshishi bwi bubi bwa Satana, mwanda baadi mulonde elango dya Mpoolo na kukita mwaye mooso bwa kukambila binangu bi bubi, kudima ngikashi ibuwa na kukisha nsaa pamune na bakwabo bena Kidishitu. (2 Tim. 2:22) Bino bibaadi abitungu kwikitshisha. Abitungu twikitshishe bwa kukambila binangu bi bubi. (Lom. 7:21-25) Na dingi, abitungu twikitshishe bwa kushintuula bu muntu bwetu, na kudima ngikashi ibuwa. (Ef. 4:22, 24) Sunga twekala bakookye ku nfudiilo kw’efuku, abitungu twikitshishe bwa kutwela mu bisangilo.​—Eb. 10:24, 25. w20.09 28 ¶9-11

Abitungu twikale na lwishinko nsaa y’atukwasha mulongi a Bible bwadya kwilambula na kubatshishibwa. Anka ingi nsaa abitungu twiukye su e na lukalo lwa kufubila Yehowa Efile Mukulu. Okwete kumona bitundwilo abilesha’shi mulongi obe a Bible kwete kukookyela miiya ya Yesu su? Su lukalo lwaye ndwa kulonga penda myanda ya mu Bible? Taluula nsaa yoso matabula akwete kwela mulongi a Bible. Bu kileshesho, kwete kulesha’shi mmufule Yehowa su? Kwete kumuteka su? (Mis. 116:1, 2) Kwete kusangeela kubadika Bible su? (Mis. 119:97) Kwete kutwela mu bisangilo lubingo loso su? (Mis. 22:23) Kwete kushintula nshalelo aye bwa kulesha’shi atumikila byalongo su? Tabangile kulungula bena kifuko naye na ba kuuku baye bya kwete kulonga su? (Mis. 9:2) Na mwanda wi na muulo, akumiina kwikala Temwe a Yehowa su? (Mis. 40:9) Su mulongi t’eele etabula su ndimune, kimba kuuka bwakinyi, na esambe naye kushii kudya mukanwe kadi na kalolo koso. w20.10 18 ¶14-15

Yehowa baadi nk’atshila Yesu bitshibilo bi buwa, na baledi baye ba pa nsenga abaadi nabo abamwatshila bitshibilo bi buwa. Anka, pabaadi Yesu mukule, bibaadi abitungu eatshile bitshibilo. (Nga. 6:5) Nka bu’twe boso, Yesu baadi na bulungantu bwa kusangula kyoso kyakyebe kukita. Baadi mulombene kusangula bwa kwisankisha. Anka basangwile bwa kulama kipwano kyaye na Yehowa. Nsaa ibaadi Yesu mulongye pabitale akimutekye Yehowa’shi akite, baadi mwaate kitshibilo kya kwikikita. (Yo. 6:38) Baadi auku’shi bantu be bungi abamushikwa. Anka ta mubofule pa mwanda wa bino nya, batungunukile na kukookyela Yehowa. Nsaa ibaadi Yesu mubatshishibwe mu kipwa kya 29 B.B., kintu kibaadi na muulo kwadi nyi kukita kikyebe ky’eshimba dya Yehowa. (Eb. 10:5-7) Sunga nsaa ibaadi afu ku mutshi wa makyenga, batungunukile nka kukita kikyebe ky’eshimba dya Yehowa.​—Yo. 19:30. w20.10 29 ¶12; 30 ¶15

Ouku bakwetu balume sunga bakashi be na kinyongwa mwanda wa maladi sunga ingi nkalakashi? Pangi mbafwishe muntu abadi bafule. Su twapusha’shi kwi muntu e na lukalo lwa bukwashi, twi balombene kuteka Yehowa bwa’shi etukwashe twakule sunga kumukitshina kintu kampanda ki buwa. Mukwetu mulume sunga mukashi mulombene kwikala na penda lukalo lwa mayi etu sunga byatumukitshina bwa kunyingila. (1 Mp. 4:10) Atuuku’shi twi kunying’eshimba mwanda Yehowa e netu. Etukwasha kukiila kwi Yesu na kwi ba mikeyilu. Na dingi, su bi mukwipushena na kikyebe ky’eshimba dyaye, Yehowa mulombene kwitukwasha kukiila kwi bakata ba mbulamatadi. Nka bu bipwe kwibimona be bungi ba kwatudi, Yehowa kwete kufubisha kikudi kyaye kiselele bwa kutakula bafubi baye bwabadya kukwasha bakwabo bena Kidishitu. Byabya, nka bu Mpoolo mutumiibwa, twi na kabingilo ke buwa ka kwakula na kushinkamisha’shi: ‘Yehowa nyi mukwashi ande dingi ntankeekala na moo: akikaankitshi muntu nkinyi?’​—Eb. 13:6, Kilombeeno Kipya 2014. w20.11 17 ¶19-20

Batumiibwa abadi na bishinkamisho abilesha’shi Yehowa badi n’abo. Badi mwibape bukome bwa kukita bilengyeleshi. (Bik. 5:12-16; 6:8) Lelo uno, Yehowa ta kwete kwitupa bukome bwa kukita bilengyeleshi nya. Sunga mbyabya, Yehowa kwete kwitushinkamisha Mwiyi dyaye’shi, sunga betubingabinga mwanda wa kululama atumusankisha na kikudi kyaye ki netu. (1 Mp. 3:14; 4:14) Sunga mbyabya, t’abitungu tutshine pabitale ky’atukakitshi su betubingabinga mu mafuku aafiki. Anka abitungu tukite mwetu moso bwa kunyingisha lukulupilo lwetu mwi Yehowa’shi aketukwasha na kwitupasha. Abitungu tukulupile mu mulayilo wa Yesu wa’shi: “Mwanda’mi nakenupa binangu bya kwakula bishyabikamono sunga ngumune a ku baba benushikwe bya kushidîla sunga kwela mpaka.” Yesu bambile’shi: ‘Ikalayi banyingamane mwanda mu kyakya kipaso anukalama myuwa yenu.’ (Luk. 21:12-19) Na toyilwanga’shi Yehowa auku ka mwanda koso pabitale bafubi baye bafwe na lulamato. Kino kiukilo akimukwasha bwa nkebasangula. w21.01 4 ¶12

Mpoolo mutumiibwa ta badi muntu a kumpala kwakwila lusangukilo. Yoobo, badi naye namu mwilwakwile. Badi mushinkamishe’shi Efile Mukulu amutentekyesha na amusangula. (Yob. 14:7-10, 12-15) “Kusanguka kwa bafwe” nyi ndumune lwa ku ndambukisho ya “mbangilo” ya bena Kidishitu boso. (Eb. 6:1, 2) Myanda ayisambila Mpoolo pabitale lusangukilo, i mu 1 Bena-Kodinda shapitre 15. Myanda ibadi mufunde, ibadi inyingishe bena Kidishitu ba mu siekele a kumpala. Na uno shapitre mulombene kunyingisha lukulupilo lwetu lwa’shi lusangukilo alukekala kwanka. Lusangukilo lwa Yesu alwitushinkamisha’shi su muntu atudi bafule afwa, akukekala lusangukilo. Lusangukilo lwa Yesu nyi ngumune wa ku “mukandu wibuuwa” ubadi Mpoolo mulungule bena Kodinda. (1 Kod. 15:1, 2) Anka, bakwile’shi su mwina Kidishitu akutwa lukulupilo mu luno lusangukilo, lukumiino lwaye talwina muulo.​—1 Kod. 15:17. w20.12 2 ¶2-4

Nkinyi kibadi kikwashe mutumiibwa Mpyeele bwa kupusha na kunangushena dingi kalolo? Badi mutentekyeshe’shi Yesu badi mupwe kuteka bwa’shi lukumiino lwaye talubofulanga. Yehowa badi mwaluule luno luteko lubadi Yesu mwele n’eshimba dyoso. Kunyima kwa Yesu kusanguka, bamwenekyele Mpyele na abimweka’shi mbwa kumunyingisha. (Luk. 22:32; 24:33, 34; 1 Kod. 15:5) Yesu badi mumwenekyele batumiibwa kunyima kwabo kuloba bufuku bushima kushi’bo kukwata kantu. Mu yaya nsaa, Mpyele badi mupete mushindo wakulesha’shi mmufule Yesu. Yesu badi mufwile kuuku’aye lusa na aye nkumupa angi mashito. (Yo. 21:15-17) Mushindo ubadi Yesu mukitshine Mpyele myanda ubadi aulesha’shi Yesu e na lusa lukata nka bu Nshaye. Byabya, nsaa y’atukitshi bilubilo tatupwandjikishanga’shi Yehowa ta n’etufwile lusa. Tutentekyeshe’shi Satana akumiina’shi twikale atunangushena bino. Kadi pamutwe pa byabya, abitungu tunangushene ngofu pabitale mushindo awituleshaa Yehowa kifulo na kuwuka mikalo yetu na’shi akumiina kwitufwila lusa. Na abitungu namu tumwambule nsaa i bangi abakitshi myanda ayitutapa ku mashimba.​—Mis. 103:13, 14. w20.12 20-21 ¶17-19

Twi kulongyela ku bileshesho bya baba abadi bakutwe kunying’eshimba na kukulupila mwi Yehowa. Kulonga bino bileshesho bi bubi, akwitukwasha bwa kupela kukita bilubilo bibabadi bakite. Bu kileshesho, ku mbangilo kwa bufumu bwaye, Mfumu Asa badi akulupila kwi Yehowa pabadi apete nkalakashi. Anka, kunyima bakutshilwe kukulupila mwi Yehowa na aye nkubanga kwikitshina myanda. (2 Mya. 16:1-3, 12) Na, Asa badi mupete binangu bya kuteka bukwashi kwi bena Sirii bwa kulwa na bena Isaleele, bibadi abimweka bu bi buwa. Anka, butaale bwa bena Yuuda bu badi bwa kapindji kapeela. Ku bukwashi bwa mutemuki, Yehowa balungwile Asa’shi: “Pamwanda bopele kwema kwi Yehowa Efile Mukulu ôbe, bwema kwi mfumu a bena Sirii, byabya, bwekutshisha ku kambila bena ngoshi bê.” (2 Mya. 16:7, EEM) Abitungu twikale badimukye tala twanangushena’shi, twi kwipwila myanda yetu atwe banabene kushii kukimba bukunkushi bwa Yehowa bwi Mwiyi dyaye. Sunga byatunga’shi twate bitshibilo bukidibukidi, abitungu tukulupile mwi Yehowa, na aye etukwasha bwa kwata bitshibilo bi buwa. w21.01 6 ¶13-15

Lelo uno, bangi bafubi ba Yehowa bakwete kukyenga na nsala pa mwanda wa bulanda sunga mwanda wa ingi nkalakashi ayitukila ku ngoshi. Bangi mbedibwe mu lukano mwanda wa lukumiino lwabo. Sunga mbyabya, baba be mu kibumbu kikata be na muloo wa kuuka’shi kunyima kwa kupashibwa ku kabutu ka uno ndumbulwilo e bubi, abakekala na bidibwa bi bungi bya ku mbidi na bya mu kikudi bwa loso. Nsaa ayikabutula Yehowa ndumbulwilo a Satana e bubi, akakalwila kibumbu kikata ku nsungu yaye ikata i bu “kibobo [kia kaalo].” Kunyima kwa mpombo ikata, Yesu akakunkusha bano abakapanda ku “meema a muwa wa ikalayika.” (Kibaf. 7:17) Banda kwela binangu: Kibumbu kikata akikapete lukulupilo lukile buwa. Na ino midiyala yoso ya bantu t’ayikafu dingi nya! (Yo. 11:26) Ingi mikooko i na lukulupilo luibuwa bukile muanda bakuete kutumbula Yehowa na Yesu! w21.01 16-17 ¶11-12

Bufuku bwaye bwa nfudilo pano pa nsenga, Yesu badi anangushena pabitale nkalakashi ayikapete balongi baye. Bwa kifulo kibadi nakyo bwa ba kuuku baye, Yesu batekyele Nshaye bwa “kwibakalwila kwi mubi.” (Yo. 17:14, 15) Yesu badi muukye’shi kunyima kwaye kwenda mwiyilu, Satana Diabulu atungunuka na kulwisha boso abakumina kufubila Yehowa. Eyendo’shi, mwilo wa Yehowa wi na lukalo lwa kukalwilwa. Lelo uno twi na lukalo lwa’shi Yehowa etukalwile kukila kumpala. Satana mbamubingye mwiyilu, nyi bwakinyi “mmukwate nsungu ikile.” (Kibaf. 12:12, EEM) Mmukite mwaye moso bwa kushinkamisha boso abetubingabinga’shi ‘bakwete kufubila Efile Mukulu.’ (Yo. 16:2, EEM) Bangi bashi balangwidi b’Efile Mukulu, bakwete kwitubingabinga mwanda twibelekene na uno ndumbulwilo. Sunga byekala naminyi, tatwi balombene kutshina nya. Bwakinyi? Lualulo atuilupete mu kifundwe kietu kya lelo. w21.03 26 ¶1, 3

Nyi akitakulaa Yehowa bwa kukita kintu kyoso. Na kifulo kyoso, kwete kulombasha nkalo ya mu kikudi nsaa y’atukitshi milwisho, etunyokaa, anka t’akokaa kwitufula. Bu byadi muule ndaa na kifulo, Yehowa batshile mpángo ya kwitukuula. Na Yesu, mmwitufule ngofu mwanda batushishe muwa waye bwetu. (Yo. 3:16; 15:13) Ta kwi kintu kilombene kukutshisha Yehowa na Yesu kufula baba bebalamate. (Yo. 13:1; Lom. 8:35) Abitungu kifulo kitakule mfumu a kifuko bwa kukita kintu kyoso. Bwakinyi bino bi na muulo ngofu? Mutumiibwa Yowano aluula’shi: “Shyaafulu mukwabo aamono [sunga kifuko kyaye] ta mulombeene kufula Efile Mukulu aashyaamono nya.” (1 Yo. 4:11, 20) Bikishekishe mulume mufule kifuko kyaye na akumina kwambula Yehowa na Yesu, akumbasha nkalo ya mu kikudi ya kifuko kyaye, kwikikwasha bwakidya kwipusha mu kukalwilwa, na kukumbasha nkalo yakyo ya ku mbidi. (1 Tim. 5:8) Alongyesha na kunyoka bana baye. Atungunuka dingi na kulonga bya kwata bitshibilo abitumbisha Yehowa na bi buwa bwa kifuko kyaye. w21.02 5 ¶12-13

Nshetu e mwiyilu auku’shi myanda yetu ya kala ngilombene kwitubofusha. Na amonaa ngikashi i buwa yatudi nayo​—sunga yatushi bya kutundula atwe banabene. (1 Yo. 3:19, 20) Muntu mulombene kukita mwaye moso bwa kuleka kukita kintu kampanda ki bubi. Anka mulombene kwibikita dingi na bino bi kumubofusha kwishimba. Eyendo’shi, bi buwa twipushe bi bubi nsaa ya tukitshi mulwisho. (2 Kod. 7:10) Anka, t’abitungu twinyongole bikilekile pabitale milwisho yatudi bapwe kukita na kupwandjikisha’shi: ‘Ntshi na muulo. Yehowa ta mulombene kunfwila lusa.’ Bino binangu ta bi buwa mwanda mbilombene kwitutakula mu kuleka kufubila Yehowa. Pamutw’a byabya, ‘esambe’ na Yehowa mu luteko na omutekye lusa. (Yesh. 1:18) Nsaa ayimono Yehowa’shi bwelanga binyibinyi na’shi okumiina kushintuluka, akufwila lusa. Na dingi, mona bakulu. Abakukwasha bwa’shi walushuule kipwano kyobe n’Efile Mukulu.​—Shak. 5:14, 15. w20.12 23 ¶5-6

Yesu badi anemeka bana bakashi. Ta badi mwambule kileshesho kya bafadise, abadi abapwandikisha’shi bana bakashi mbashadile, na’shi ta be kwisamba nabo pe bantu be bungi sunga kwisamba nabo myanda i mu bifundwe. Anka, Yesu badi esamba na bana bakashi myanda ya mu kikudi nka bu bi badi esamba na bana balume. (Luk. 10:38, 39, 42) Badi ende na bangi bana bakashi mu kulungula mukandu wibuwa. (Luk. 8:1-3) Badi mwibape kinemo kya nkalungula batumiibwa baye’shi, basanguka. (Yo. 20:16-18) Mpoolo mutumiibwa badi mutentekyeshe Timote bwadya kunemeka bana bakashi. Mpoolo badi mukite mwaye moso bwa kukwasha Timote bwa’shi ekale munyingye mu kikudi, anka badi auku’shi, nyin’aye na Timote na nyina’aye-kulu nyi ababadidile kumulongyesha bifundwe biselele. (2 Tim. 1:5; 3:14, 15) Mu mukanda ubadi mufundile kakongye ka mu Loma, Mpoolo badi mwimune na mutemune bakwetu bakashi mu mashina abo. Mpoolo badi mumone bibadi bikite bano bakwetu bakashi na badi muleshe lutumbu bwa mudimo wabo wi buwa ubabadi bakite.​—Lom. 16:1-4, 6, 12; Fid. 4:3. w21.02 15 ¶5-6