Mueshi wa 4

Wena lukalakashi lwi bukopo su? Pangi, mwina kakongye mmukutape kwishimba. (Shak. 3:2) Sunga’shi pangi, bena mudimo nobe sunga bena kalasa nobe, bakwete abakusepe mwanda wa’shi okwete kufubila Yehowa. (1 Mp. 4:3, 4) Sunga’shi bena kifuko nobe bakwete abakitshi mwabo moso bwa’shi olekye kutwela mu bisangilo, na kulungula mukandu wibuwa. (Mat. 10:35, 36) Su lukalakashi ndukile bukopo, we kupwandjikisha’shi bi buwa su oleka kufubila Yehowa. Anka ikala mushinkamishe’shi sunga opeta lukalakashi lwi naminyi, Yehowa akupa kinangu bwa’shi wate kitshibilo ki buwa na bukome bwa kwilunyingila. Mwiyi dyaye, Yehowa mmufundjishe bileshesho bya bantu bakutwe kupwidjika, abaadi banyingile nkalakashi. Bwakinyi? Bwa’shi tulongyele ku bileshesho byabo. Nyi kibadi Yehowa mutakule Mpoolo mutumibwa bwadya kufunda. Kubadika ino miisambo nkulombene kwitunyingisha na kwitupa lukulupilo. Anka, t’abitungu penda’shi tubadikye Bible nya. Abitungu tutadile Bifundwe, bishintule ngyelelo etu a binangu, na bikume mashimba etu. w21.03 14 ¶1-2

Okwete kumona bantu bolungula mukandu wibuwa bu mabala abapu kumonga bwa kuwumbula? Su mbyabya, okitshi ino myanda isatu: Wa kumpala, olungula mukandu wibuwa kushi kunyengakana. Kipungo kya kuumbula nkiipi; tabitungu tushimishe nsaa. Kya kabidi, wekala na muloo nsaa yomono byabatambula mukandu wibuwa kwi bantu. Bible amba’shi bantu “Abasepêlâ’nka bu by’abasepêlâ pa byumbulwa.” (Yesh. 9:2, EEM) Na kya kasatu, wekala omono muntu ooso bu akekala mulongi a Yesu, yaya nsaa, okimbi bya kubanga mwisambo na myanda ayimukumu kwishimba. Yesu tabaadi anangushena bu bibaadi abinangushena balongi baye’shi, bena Samadiya tambalombene kufika bu balongi ba Yesu. Kadi, baadi ebamono bu bantu abakekala balongi baye. Atwe namu abitungu tumone bantu ba mu teritware etu bu abakekala bu balongi ba Kidishitu. Mpoolo mutumiibwa mwitulekyele kileshesho kyatudya kulonda. Badi auku myanda kampanda pabitale nkumiino ya bantu babaadi alambukisha, baadi atundula myanda ayibakumu ku mashimba na baadi ebamono bu bantu abakekala balongi ba Yesu. w20.04 8-9 ¶3-4

P’amutwe pa kwelela muntu binangu bibubi mwanda wa bikitshino byaye, kita moobe mooso bwa kwitula pa mbalo yaye. Nka penda Yehowa nyi etupushaa kalolo. Byabya mutekye bwa’shi akukwashe wekale omono bangi by’ebamonaa na bwashi opete mushindo wa kwibapusha lusa. Tatwi balombene kusangula bakwetu batudya kulesha lusa nya. Bangi ba kwabadi mbapete nkalakashi nka bu Yoona, Eliya, Hagaare, na Lota babaadi abanyingiila nkalakashi ibabaadi bekakile abo banabeene. Mu kwakula kwa kalolo, atwe boso tatubekakiile myanda ingi nsaa. Nyi bwakinyi Yehowa etutekye bwa’shi twikale atwikwasheena. (1 Mp. 3:8) Nsaa yatumukokyela, atunyigisha buumune bwa kifuko kyetu ki mu nsenga ishima. Byabya nsaa yatukutwa kwipusheena na bangi, twikaleyi na kitshibilo kya kuteemesha, kuuka, na kwibalesha lusa. w20.04 18-19 ¶15-17

Yesu mmwitulekyele kileshesho kipwidikye kya kukokyela Yehowa. Byabya, mushindo umune wi na muulo watukokyela Yehowa, mpa kulonda kileshesho kya Yesu. (Yo. 8:29) Bwa kutungunuka na kutambukila mu bya binyibinyi, abitungu tushinkamishe’shi Yehowa nyi Efile Mukulu a binyibinyi, na’shi myanda yooso yetulungula i Mwiyi dyaye Bible ngya binyibinyi. Na abitungu dingi tushinkamishe’shi Yesu nyi Mesiya baadi mulayibwe. Bantu bebungi abeleshaa mpaka’shi Yesu ta mbamusangule bu Nfumu a Bufumu bw’Efile Mukulu. Yowano baadi mudimushe’shi akukekala “balendwishi beebungi,” abakadimbi baaba boso bash’abakumiina bya binyibinyi pabitale Yehowa na Yesu. (2 Yo. 7-11) Yowano bafundjile’shi: “Sha-madimi naanyi? Yawa atunu’shi Yesu nyi Kidishito.” (1 Yo. 2:22) Mushindo umune awitukwasha bwa kupela kudimbibwa nyi kulonga Eyi dy’Efile Mukulu. Paapa, atwiuku Yehowa na Yesu kalolo. (Yo. 17:3) Su tubakitshi bino, Atwikala bashinkamishe’shi twi na bya binyibinyi. w20.07 21 ¶4-5

Mushindo watudi balombene kupela kwikala bu “kikokoshi” bwa bakwetu, pa kuleka kwibakamika nka byetu byatwamba. (Lom. 14:19-21; 1 Kod. 8:9, 13) Mu uno mushindo, tatwikala bu muntu asukaa lubilo nya. Epikenaa, na ekitshishaa bwa kupeta efuto nka penda bw’ayeeye nabene. Bano bantu abasukaa lubilo abakimbaa nka penda buwa bw’abo. Abasukumishenaa bwa kwikilena. Mukwilekena n’abo, atwe tatwipikenaa na bangi nya. (Nga. 5:26; 6:4) Kepatshila ketu nka kukwasha bantu bebungi bwabadya kusuka mpaa na ku nfudilo bwa kupeta muwa wa ikalaika. Paapa, atutumikila elango diyokyelwe adyamba’shi “muntu takimbanga’nka penda buwa bwe nabene, ooo akimbe namu na bwa bangi.” (Fid. 2:4, EEM) Mu lubilo lwatukwete kusuuka, Yehowa mulee baba boso abasuku mpaa na ku nfudilo​—mmuwa wa loso byabikala mwiyilu sunga mu paladiso pa nsenga. w20.04 28 ¶10; 29 ¶12

Midiyo ya bena Kidishitu balume na bakashi ayikatwele mu nsenga ipya. Bano abakapanda ku mpombo ikata abakemwena kungi kukambila kwa lufu nsaa aikasanguka binunu na binunu bya bantu abaadi bafwe. Banda kunangushena muloo aukekala kwanka yaya nsaa! (Bik. 24:15) Na bano boso abakalesha lulamato lwabo kwi Yehowa, abakakambila lufu lwabadi bapyane kwi Adame. Abakekala na muwa wa ikalaika. Bena Kidishitu be na muwa lelo uno, abitungu bekale na lutumbu bwa mayi aanyingisha abadi Mpoolo mufundjile bena Kodinda pabitale lusangukilo. Twi na kabingilo ka kukookyela elango dya Mpoolo dya kukita bi bungi mu “mufubo wa Mwanaana.” (1 Kod. 15:58) Su twi na lulamato na kukita uno mudimo na kisumi, atutwele mmulongo wa bantu abakapete miloo mu mafuku aafiki. Aa mafuku aakekala buwa bukile kukila kintu kyoso kyatudi balombene kupwandjikisha. Bino abikalesha binyibinyi’shi mudimo wa Mwanana watudi bakite ta ngwa bisumanga nya. w20.12 13 ¶16-17

Abimweka’shi butemuki bwa Esekyele 38:10-23; Ndanyele 2:43-45; 11:44–12:1; na bwi mu Kibafumbwilwe 16:13-16, 21, abwisambila myanda imune. Su mbyabya, ino myanda ayilondo ayikakitshika. Mafuku apeela kunyima kwa mpombo ikata kubanga, “banfumu ba pa nsega poso” abakebungu. (Kibaf. 16:13, 14, EEM) Bible etamina kuno kwibunga bu “Goge a kwiumbo dyaa Magoge.” (Es. 38:2) Ano maumbo ebungye aakalwisha mwilo w’Efile Mukulu ngoshi. P’akula pabitale kyakya kipungo, Yowano mutumibwa bamwene mpeshi a kasangu na kipapi kikata anokyela beshikwanyi b’Efile Mukulu. Yawa mpeshi a mu kifwanyi alesha mukandu wi bukopo wa kiimu, wabakwete kulungula kwi bafubi ba Yehowa, na aukatakula Goge a kwiumbo dya Magoge bwa kutuuka bafubi b’Efile Mukulu ngoshi na kepatshila ka kwibapudisha pa nsenga.​—Kibaf. 16:21. w20.05 15 ¶13-14

Kikudi kiselele ky’Efile Mukulu nyi kya buntu akitungu’shi twate na muulo. Twi balombene kunyisha kulesha lutumbu lwetu bwa kikudi kiselele nsaa yatunangushena pa myanda yakitukwasha bwa kukita lelo uno. Kumpala kwa’shi ende mwiyilu, Yesu baadi mulungule balongi baye’shi: “Anka anukatambula bukome apakafiki kikudi kiselele panudi; na anukeekala tumonyi twande . . . mpaa na ku nfudiilo a nsenga.” (Bik. 1:8, Esambi Dipya 2015) Ku bukwashi bwa kikudi kiselele, bantu bafikye ku midiyo mwanda na kipindji bakwete kulangwila Yehowa. Na dingi, atusangela mpaladiso a mu kikudi, mwanda kikudi ky’Efile Mukulu akitukwasha bwa kwikala na ngikashi ibuwa bu kifulo, muloo, butaale, lwishinko, kalolo, buuwa, lukumiino, kupopeela, na butontshi bwa mbidi. Ino ngikashi nyi ayikitshi “kikuba kya kikudi kiselele.” (Nga. 5:22, 23, Esambi Dipya 2015) Kikudi kiselele nyi kya buntu kikile buwa! w20.05 28 ¶10; 29 ¶13

Kwi tubingilo twi bungi atwitutakula bwa kushinkamisha’shi, baba abakakukila bantu abakasanguka, abakekala na ngobesha ya kwibatundula. Bu kileshesho, nka bu bibabidi bikitshikye bwa bantu babaabadi basangule kala, abimweka’shi mpala, ngakwilo na kipaso kya kunangushena kya bantu babakasangula kwi Yehowa, abikala’nka byabikalanga nsaa ipeela kumpala kwa’shi bafwe. Tentekyesha’shi Yesu baadi mupwandikishe lufu na tulo, na kusanguka bu kubuka ku tulo. (Mat. 9:18, 24; Yo. 11:11-13) Nsaa ayibukaa bantu ku tulo, abamwenekaa na kupushika nka bu byabekalanga kumpala kw’abo kulaala, na abalamiinaa nka myanda yabaukanga kumpala kwa kulaala. Tubandeyi kutaluula kileshesho kya Lazare. Baadi mufwe takubaadi mafuku ananka, na mbidi yaye ibaadi ibangye kunyanga. Kadi pabaadi Yesu mumusangule, ba nkashanaye abaadi bamutundule mususa umune, na Lazare namu baadi mwibatundule.​—Yo. 11:38-44; 12:1, 2. w20.08 14 ¶3; 16 ¶8

Mu myanda i bungi, bena Kidishitu bedibwe mwimu na ingi mikooko, be mumune. Yehowa ta mufule kisaka kimune kukila kingi nya, boso be na muulo ku meso aaye. Mwanda wi na muulo, badi mwibaule boso ku muulo umune, kwamba’shi muwa wa Mwan’aye. Kwilekena kwi pankatshi pa bino bisaka bibidi nkwa’shi, be na lukulupilo lwilekene. Abitungu bino byoso bisaka bibidi, bishale na lulamato kwi Efile Mukulu na kwi Kidishitu (Mis. 31:24) Na, tentekyesha’shi Efile Mukulu t’apeya bangi kikudi ki bungi, aba namu kipeela; etupeyaa boso ki mumune. Bino abipushisha’shi Yehowa apeyaa muntu oso kikudi kyaye kiselele mupunda lukalo lwaye; Yehowa mupe oso a ku bafubi baye belambule kwadi lukulupilo lwi buwa bwa mafuku aafiki. (Yel. 29:11) Kitentekyesho kya lufu lwa Kidishitu nyi kisangilo ki pabwakyo akipa muntu oso a kwatudi mushindo wa kutumbisha Efile Mukulu na Kidishitu, bwa byoso byabadi betukitshine bwa’shi twikale na muwa ushi na mpwilo. Kitentekyesho kya lufu lwa Yesu nyi nkisangilo ki na muulo akikitaa bena Kidishitu ba binyibinyi kipwa kyoso. w21.01 18 ¶16; 19 ¶19

Bantu be bungi abatwelaa mu Kitentenkyesho be na lukulupilo lwa kwikala na muwa pa nsenga. Kadi, bwakinyi bakwete kutwela mu Kitentekyesho? Bwa kabingilo kamune akatakulaa bantu bwa kwenda kw’eyibakishi dya kuuku abo. Bantu abenda ku eyibakishi bwa kulesha kifulo kyabo na kukwatshishena bano abeyibakishena. Mu mushindo umune, bano be mu ingi mikooko abatwelaa mu Kitentekyesho mwanda abakumiina kulesha’shi mbafule na abakwatshishena Kidishitu na bedibwe mwimu. Ingi mikooko ayitwelaa dingi mu Kitentekyesho bwa kulesha’shi i na lutumbu bwa mulambu wa Yesu, awo awibakwasha bwa kwikala na muwa wa loso pa nsenga. Kangi kabingilo ke na muulo akatakulaa ingi mikooko bwa kutwela mu Kitentekyesho, nyi kukokyela eyi dya Yesu. Nsaa ibadi Yesu mukite Kidibwa kya Mwanana bwa musango wa kumpala na batumiibwa baye basha lulamato, bebalungwile’shi: “Ikalai anukitshi bino mwanda wa kuntentekyeshanga.” (1 Kod. 11:23-26, EEM) Byabya ingi mikooko ayitungunuka na kukita Kitentekyesho kya lufu lwa Yesu paki bena Kidishitu bedibwe mwimu pa nsenga. w21.01 17-18 ¶13-14

Anka bwa’shi kifulo kikale kya binyibinyi, abitungu twikileshe ku bikitshino. (Pwandjikisha na Shake 2:17, 26.) Bu kileshesho, Yehowa mmwitufule. (1 Yo. 4:19) Na alesha’shi mwitufule mu mayi e buwa atusangana mu Bible. (Mis. 25:10; Lom. 8:38, 39) Anka, twibashinkamishe’shi, Yehowa mwitufule kushi penda mu byakula, anka mpa na mu bya kwete kukita. Yehowa badi mutadile Mwan’aye adi mufule bwa’shi akyengye na etufwile. (Yo. 3:16) Bino abitushinkamisha’shi Yehowa mmwitufule binyibinyi. Atulesha’shi twibafule Yehowa na Yesu pa kwibakokyela. (Yo. 14:15; 1 Yo. 5:3) Na dingi, Yesu mmwitwelele mwiya wa kwifulena. (Yo. 13:34, 35) T’abitungu tulungule penda bakwetu balume na bakashi’shi twibebafule, anka abitungu twibileshe mu byatukitshi.​—1 Yo. 3:18. w21.01 9 ¶6; 10 ¶8

Baba boso bedibwe mwimu ku bukwashi bwa kikudi ki selele, be na lukulupilo lwa kwikala na Yesu bwa looso, na kumunana naye bu ba mpyanyi mu Bufumu bw’Efile Mukulu. Binobino abekala na Kidishitu​—bamumone, besambe n’aye na bakishe n’aye nsaa pamune. (Yo. 14:2, 3) Baba boso be na lukulupilo lwa kushala pa nsenga, Yesu akebalesha kifulo na kwibapasukila. Sunga tabakamumono, bu kuuku bw’abo abukanyisha kunyinga nsaa y’abakekala na shalelo ebuwa abakekasha kwi Yehowa na Yesu. (Yesh. 9:6, 7) Nsaa yatukumiina lwitamino lwa Yesu lwa kwikala bu ba kuuku baye, atupete myabi ibungi. Bu kileshesho, etufulu na kwitukwatshishena kubanga binobino. Twi na lukulupilo lwa kwikala na muwa bwa loso. Na mwanda wi na muulo, bu kuuku na Yesu abutwala kwi kuuku mukile boso​—bu kuuku na Nshaye na Yesu, Yehowa. Nyi kineemo kikata kyatudi nakyo kya kwitaminyibwa bu ba kuuku ba Yesu! w20.04 25 ¶15-16

Uno mukanda Mpoolo mutumiibwa badi mwiunfundile bena Kidishitu bedibwe mwimu ba mu Kodinda abadi na kya kusanguka bwa kwikala na muwa mwiyilu. Bano bena Kidishitu “abadi bekashwe bakishila mu buumune na Kidishitu Yesu, bayitanyinwe bwa kwikala beselele.” Na Mpoolo atemuna “baba bafwe mu buumune na Kidishitu.” (1 Kod. 1:2; 15:18; 2 Kod. 5:17) Mu ungi mukanda uyokyelwe Mpoolo bafundile’shi, baba “bekumbashe n’aye [Yesu] mwifwanyika dya lufu lwaye, abakebikalanyi mwifwanyika dya lusaangukilo lwaye.” (Lom. 6:3-5, Kilombeeno Kipya 2014) Yesu badi musangukye na mbidi ya mu kikudi na aye nkwenda mwiyilu. Byabya nyi abikakitshikila boso be mu “buumune na Kidishitu,” kwamba’shi bena Kidishitu boso bedibwe mwimu. Mpoolo bafundile’shi Kidishitu badi “muntu a kwibedi kusanguka ku lufu.” (1 Kod. 15:20) Yesu badi a kumpala kusanguka na mbidi ya mu kikudi na kupeta muwa wa ikalaika. w20.12 5-6 ¶15-16

Lelo uno, bena Kidishitu bedibwe mwimu abafudisha muwa wabo pa nsenga, abasanguka mususa umune bwa nkekala na muwa mwiyilu. Bino mbebishinkamishe kwi Mpoolo mutumiibwa mu 1 Bena-Kodinda 15:51, 52. Apasanguka bakwabo na Kidishitu abekala na muloo wi bungi, mwanda Bible etulungula mudimo w’abakakitshi mwiyilu kwi baba abakaluulwa mu “kupopola kw’eiso.” Yesu ebalungula’shi: ‘Yawa akoobesha, na yawa akalama mifubo yande mpaa na ku nfudiilo, nankamupa matalwa panundu pa [beena] maumbo; n’aye akebakunkusha na mukoombo wa kilonda, na abakeasooso nka biabia abisooswa bipulu bia ema, muyiile biandji namu’nyi mutambule kwi Nshami.’​—Kibaf. 2:26, 27. w20.12 12 ¶14-15

Na pa kwitamina Yesu bu “muntu a kwibedi,” Mpoolo mutumiibwa badi akyebe kulesha’shi, kwi bangi bantu abakasanguka kunyima kwa Yesu bwa nkashala mwiyilu. Batumiibwa na bangi be mu “buumune na Kidishitu” abakalondo Yesu. (1 Kod. 15:18) Pa nsaa ilombane, abakebasangula bwa nkashala mwiyilu nka bu Yesu. Lusangukilo bwa kwenda mwiyilu bwa baba be mu “buumune na Kidishitu,” talubadi lubande kubanga mu aa mafuku abadi Mpoolo mufundjile bena Kodinda. Anka Mpoolo badi muleshe’shi alukakitshika mu mafuku aafiki. Bafundjile’shi: ‘Muntu na muntu a kasanguka mu wê mulongo: Kidishitu nyi a kwibedi kwa boso, kunyima, pakafiki mu ntumbo, baba bantu bê abakasanguka.’ (1 Kod. 15:23, EEM; 1 Tes. 4:15, 16) Lelo uno, twi mu kyakya kipungo kya ‘kufika’ kwa Kidishitu kibabadi batemukye. Batumiibwa na boso bena Kidishitu bedibwe mwimu babadi bafwe, abadi na kya kutengyela kwakwa kufika bwa’shi bapete efuto dyabo dya kwenda mwiyilu na ‘kwibunga na [Yesu] mwifwanyika dya lusangukilo lwaye.’​—Lom. 6:5. w20.12 5 ¶12; 6 ¶16-17

Mpoolo mutumibwa badi akwila bwa bantu abasanguka na mbidi bwa kwenda mwiyilu, ‘mbidi ya mu kikudi.’ (1 Kod. 15:43, 44) Nsaa ibadi Yesu pa nsenga, badi na mbidi ya musamba na mase. Anka nsaa ibabadi bamusangule, “bekêle kikudi akipâna mûwa” na aye nkwalukîla mwiyilu. Mu mushindo umune, bena Kidishitu bedibwe mwimu, abakebasangula na mbidi ya mu kikudi. Mpoolo apatuula’shi: “Anka bu byatudi befwane yawa bakitshînwe ku nsenga, nyi by’atukefwana yawa bafikile mwiilu.” (1 Kod. 15:45-49, EEM) Uuka’shi Yesu ta badi musangukye na mbidi ya musamba na mase. Mpoolo bakwile’shi: “Mbidi na mase ta mbilomene kupyaana Bufumu bw’Efile Mukulu” mwiyilu nya. (1 Kod. 15:50) Batumiibwa na bangi bena Kidishitu bedibwe mwimu tabakasanguka na mbidi ayilwilaa ya musamba na mase. w20.12 10-11 ¶10-12

Efile Mukulu badi muyokyele bangi ba ku balongi ba Kidishitu ba mu siekele a kumpala bwabadya kufunda ingi myanda pabitale lukulupilo lwa mwiyilu. Yowano mutumiibwa apatuula’shi: “Twi baana b’Efile Mukulu, anka byaatukeekala ta mbibande kusokolwa. Atuwuku’shi, pakeeleesha, atwikala bamwifwane.” (1 Yo. 3:2) Byabya, bena Kidishitu bedibwe mwimu, tabauku byabakekala nsaa yabakebasangula bwa kwikala na mbidi ya mu kikudi bwa kwenda mwiyilu. Anka, abakamono Yehowa na meso nsaa yabapete efuto dyabo. Bible akula ingi myanda pa bilutale. Bena Kidishitu bedibwe mwimu abakekala na Yesu nsaa ‘y’akatuutu mafumu ooso, makata ooso na makome ooso.’ Mpa na “mwishikwanyi a nfudiilo, . . . Lufu.” Ku nfudilo a byoso, Yesu​—na baba bakunkusha nabo na bintu byoso, abakookyela Yehowa. (1 Kod. 15:24-28) Ino ayikekala nsaa ya muloo! w20.12 8 ¶2

Bena Kidishitu boso ba sha lulamato bashi na lukulupilo lwa nkashala mwiyilu, n’abo namu be na lukulupilo lwa lusangukilo. Bible amba’shi Mpoolo mutumiibwa na bangi abakende mwiyilu, “abakasanguka kumpala.” (Fid. 3:11, NWT) Bino abilesha’shi akukekala lungi lusangukilo. Na mbipushena na bibadi abishinkamisha Yoobo’shi abikamukitshikila mafuku aafiki. (Yob. 14:15) “Pakafiki mu ntumbo, baba bantu bê,” abakekala mwiyilu na Yesu nsaa ya katshokola mafumu oso, makata na makome. Mpa na “mwishikwanyi a nfudîlo akasôswa, ndufu.” Kushi mpaka, baba boso abakasanguka bwa kwenda mwiyilu abakekala na muwa wa ikalaika. (1 Kod. 15:23-26) Bano be na lukulupilo lwa kushala pa nsenga mbalombene kukulupila mu mayi a Mpoolo e mu kifundwe kyetu kya lelo. Abimweka patoka’shi muntu shii mululame ta mulombene kwenda mwiyilu nya. Ano mayi aakwila lukulupilo lwa kushala pa nsenga. w20.12 6-7 ¶18-19

Anka twi kwiyipusha’shi, ‘Nkinyi akishinkamisha’shi Yehowa mupwe kunfwila lusa?’ Su weyele luno lukonko, abilesha’shi Yehowa e nkufwila lusa. Bipwa bi bungi kumpala, kingi Kitenta kya Mulami kibakwile’shi: “Twi kutungunuka na kukita nka yaya milwisho imune na bikumweneka’shi ta twibobeshe kwiyikambila. . . . Topwandjikishanga’shi we mukite mulwisho ushi ulombene Yehowa nkufwila lusa.” Nyi akikyebe Satana’shi onangushene. Bodi mwinyongole nsaa ibodi mukite uno mulwisho, bino abilesha’shi twe nka muntu e bubi na’shi Yehowa e nkufwila lusa. Shala mwiyishe na otungunukye na kuteka Yehowa’shi akufwile lusa, na akukwashe opete dingi kondo k’eshimba katokane. Kumpala kwadya kufika mwina Kidishitu, Mpoolo mutumiibwa badi mukite milwisho i bungi. Mpoolo baadi atentekyesha bibadi mukite. (1 Tim. 1:12-15) Badi amono’shi mulambu wa nkulo nyi kya buntu kimupebwe. Mpoolo badi mudimukile muteo wa kupela kwitopeka kukilekile pabitale milwisho yaye ya kala, kadi aye nkutuma binangu byaye mu kufubila Yehowa. w20.11 27 ¶14; 29 ¶17

Satana kwete kufubisha mishindo i bungi bwa kwitutakula mu kukita milwisho. Nkinyi kyatudya kukita? Twi kupwandjikisha’shi ta mbikambe nka bubi nya. Bu kileshesho, twi kupwandjikisha’shi: ‘Bino ta mbikile bubi mwanda ta mbalombene kuntushila byanka mu kakongye nya.’ Kunangushena bino kwi bubi bukile. Bibuwa twiyipushe ino nkonko: ‘Satana nyi kwete kufubisha uno muteo bwa kwabuula eshimba dyande su? Su naleka ano malaka ebubi, nasabulusha eshina dy’Efile Mukulu su? Kino kikitshino akinkaka peepi n’Efile Mukulu, su akingisha kula n’aye?’ Nangushena ku ino nkonko. Teka kinangu bwa kwaluula bya binyibinyi ku ino nkonko. Kukita bino akwitukalwila ngofu. Akukukwasha bwa kusuuka kitompwanga nka bu bibakitshine Yesu nsaa ibakwile’shi: “Katuka, Satana!” (Mat. 4:10) Tentekyesha’shi, kwikala na mashimba abidi takwi buwa nya. w20.06 12-13 ¶16-17

Twi balamate ku miiya ya Yehowa mwanda atuuku’shi nka pend’aye nyi euku ki buwa bwetu. (Ef. 4:22-24) Kwiyisha akwitukwasha bwa kutuula kikyebe ky’eshimba dya Yehowa pa mbalo ya kumpala na kumona bangi bu betukile. Paapa, atwikala mu kipwano kibuwa na Yehowa mpa na bakwetu bena Kidishitu. (Fid. 2:3) Su ta twibadimukye, twi kwambula bantu ba mu uno ndumbulwilo a Satana basha kwitatula na abakimbi penda buwa bw’abo. Abimweka’shi bangi bena Kidishitu ba mu siekele a kumpala bino bipungo byetu B.B., abaadi bambule uno mwikelo. Nyi bwa kinyi Mpoolo mutumiibwa baadi mufundjile bena Looma’shi: “Nenulungula’shi: muntu na muntu a kwanudi tekalanga eata bu e na kinêmo kikile kînyi kyadi n’akyo. Bi buwa emone mu kipaso kikumbane.” Mpoolo baadi auku’shi atwe boso twi na lukalo lwa kwiata na kineemo. Anka, kwiyisha akwitukwasha bwa kwikala na nkatshinkatshi bwa kupela kwiata na kineemo kikilekile. w20.07 2 ¶1-2

Mu mafuku a Mfumu Asa, kipungo kya butaale kibafikile ku nfudiilo. Kilwilo kikata kya bena Etshopii kibaadi na basalayi bakile pa mudiyo umune, kibafikile mu kwibatuka ngoshi. Mukata abo Zera baadi mushinkamishe’shi aye na kilwilo kyaye, balombene kutshokola Yunda. Anka Asa baadi mukulupile mwi Yehowa. Batekyele Yehowa’shi: “Etukwashe Yehowa Efile Mukulu eetu! Mwanda koodi ngi kwatudi bakulupile, dingi mwishina dyoobe ngi mwatudi bafikye mu kulwa naa kino kibumbu.” (2 Mya. 14:10) Sunga bibaadi kilwilo kya bena Etshopii kikile kya Asa misusa ibidi, Asa baadi auku’shi Yehowa e na bukome na mulombene kwibakwasha. Na Yehowa baadi mwibakwashe, abo nkutshokola kilwilo kya bena Etshopii. (2 Mya. 14:7-12) T’atuku kilombene kukitshikila ooso akwatudi mu mafuku aafiki nya, anka atuuku’shi butaale bwinabo mwilo wa Yehowa lelo uno, t’abukayididila nya. Tentekyesha bibaadi Yesu mutemukye pabitale mafuku a ku nfudiilo’shi balongi baye “abakebashikwa kwi miilo yoso.”​—Mat. 24:9, Kilombeeno Kipya 2014. w20.09 17-18 ¶14-16

Takwi muntu su ngumune akumiina’shi bamuke nya. Byabya, nsaa yatwinyongola pa mwanda wa’shi abetukaa kwi beshikwanyi beetu, twi balombene kubofula kwishimba. (Nki. 24:10) Nsaa yabetukaa, mushindo kinyi watudya kwikumona? Nka bu Mpoolo mutumiibwa, twi balombene ‘kusangeela . . . mu kukayiibwa.’ Bwakinyi? Mwanda kukayibwa na mushikwa nyi kitundwilo akilesha’shi twi balongi ba Kidishitu ba binyibinyi. (1 Mp. 4:14) Yesu baadi mwakule’shi balongi baye abakabigwabingwa. (Yo. 15:18-20) Bino bibaadi bikitshikye mu siekele a kumpala. Aa mafuku, booso abaadi ku bukitshishi bwa bipikwa bya bena Greke, abaadi abamono bena Kidishitu bu bantu bashii na binangu na babofule. Bena Yunda, abaadi abamono bena Kidishitu bu “bantu bashii balongye mukanda, na bee bu bantu booso,” bu Mpyeele na Yowano. (Bik. 4:13) Bena Kidishitu abebamonaa bu babofule mwanda t’abatwelakanaa mu myanda ya politike na ta be kubukitshishi bwa mbulamatadi ya bana ba bantu nya. Na dingi, t’abatwelaa busalayi, na ta be na bukome bwa kulwa ngoshi sunga bwa kwikalwila abo banabene nya. Bano bena Kidishitu ba kumpala, abaadi batadiile mweneno ebubi abeshikwanyi b’aabo bwabadya kwibemika bwa kufubila Yehowa su? Nya. w20.07 14-15 ¶3-4

Yowano mutumiibwa baadi mufule bakwabo bena Kidishitu ngofu, na baadi akumiina’shi bekale na lukumiino lwi bukopo. Bino mbimwenekye patooka mu malango abaadi mwibape mu mikanda yaye isatu. Kuuka’shi kwi balume na bakashi bedibwe mwimu abakamunana na Kidishitu nka bu Yowano, akwitunyingisha. (1 Yo. 2:27) Bibuwa tutumikile dino elango dibetupa. Tutungunukyeyi na kutambukila mu bya binyibinyi, tukokyele Yehowa mu myanda yoso ya mu nshalelo eetu. Tulongyeyi Eyi dyaye na twidikulupile. Twikaleyi na lukumiino lwi bukopo mwi Yesu. Tusumbuleyi binangu na ndambukisho ya bantu basumbule lukumiino. Tukambile bukitshishi bwa bantu abetulungula’shi twikufubila Yehowa sunga twekala atukitshi myanda ibutete. Twikale na nshalelo mwipushene na miiya ya Yehowa. Na tukwasheyi bakwetu bena Kidishitu bwabadya kwikala banyingye pa kufwila baaba abetulwishisha lusa, na kukwasha baaba be na lukalo lwa bukwashi. Su twakita byabya, sunga twafumankana na nkalakashi inaminyi, atutungunuka na kutambukila mu bya binyibinyi. w20.07 24-25 ¶15-17

Yehowa mmupe bana baye booso ba sha lulamato mbalo mu kakongye. Sunga twekala na midimo ilekene, atwe booso twi na muulo, na twi na lukalo lwa bangi. Mpoolo mutumiibwa ashimika kasele’shi, muntu su ngumune akwatudi ta mulombene kulungula ungi mufubi a Yehowa’shi: “Ntshii noobe lukalo.” (1 Kod. 12:21) Su atukumina’shi mu kakongye mwikale buumune, abitungu tuneemekye muntu ooso na tufube pamune. (Ef. 4:16) Nsaa y’atufubu pamune mu buumune, muntu ooso epusha bu mufudibwe, na bino abinyingisha kakongye. Bakulu booso ba mu kakongye mbasangudibwe na kikudi kiselele kya Yehowa. Anka, mukulu ooso e na kyaaye kya buntu. (1 Kod. 12:17) Bangi mbafikye bakulu binobino na tabeuku myanda ibungi bu bangi bakulu abapu kwiisha. Bangi ta be na ngobesha ya kukita bibungi mwanda wa bununu sunga maladi. Sunga mbyabya, mukulu su ngumune, ta mulombene kubepula bangi bakulu, na kwakula’shi: “Ntshii noobe lukalo.” Anka, abitungu mukulu ooso alonde elango dya Mpoolo di mu Beena-Looma 12:10. w20.08 26 ¶1-2; 27 ¶4

Yehowa kwete kwitukunkusha mwishinda aditwala ku muwa, ku bukwashi bwa ndumbulwilo aye e pa nsenga. Kushi mpaka, nsaa i ndumbulwilo a Yehowa etupatulwila mpushisho mupya a malongyesha a mu Bible sunga kwitupa mayi a kulonda pabitale mwikelo, atwiakumiina na kwiatumikila. Byabya, twikukita kinyi nsaa i ndumbulwilo a Yehowa ashintula myanda i na bukitshishi mu nshalelo etu, bu kupana kwa Mashibo a Bufumu. Atulama muloo wetu nka su atutentekyesha’shi tukwete kufubila Yehowa na’shi kwete kukunkusha ndumbulwilo aye. (Kol. 3:23, 24) Mfumu Daavide mwitulekyele kileshesho ki buwa nsaa ibadi mutushe makuta bwa kwibaka kwa ntempelo. Bakwile’shi: “Ami na mwilo wande twi banyi naamu bwatudy’a kwikala na matalwa a kulambula bintu bino? Byooso abifiki koodi, dingi kyooso kyatudi bakupe akifiki kwiyaasa dyoobe.” (1 Mya. 29:14) Natwe namu, atwalwisha Yehowa bintu byadi mwitupe. Sunga mbyabya, Yehowa asankilaa nsaa, bukome, na bintu byatutusha bwa kukwatshishena mudimo waye.​—2 Kod. 9:7. w20.11 22-23 ¶14-16

Bu byatudi ba Temwe ba Yehowa, kobesha kwetu mu mudimo wa bulungudi nta nkutale bungi bwa bantu babatukwasha bwa kwikala ba Temwe ba Yehowa. (Luk. 8:11-15) Su twa tungunuka na kulungula mukandu wibuwa na kulongyesha bangi, Yehowa etumono’shi tubobesha. Bwakinyi? Mwanda tubamukookyela aye na Mwan’aye. (Mak. 13:10; Bik. 5:28, 29) Twi na kangi kabingilo aketutakula bwa kukita bukidibukidi mudimo wa bulungudi kubanga binobino, mwanda: Nfudiilo auno ndumbulwilo kwete kunyisha kwifubwila peepi! Nsaa yibashala ngipela bwa kukita uno mudino aupasha myuwa. Totengyela nka’shi nshalelo obe ekale mupwidikye bwa kukita uno mudimo wi na muulo nya. Kita mobe mooso bwa kubanga kunyingisha lukalo lobe lwa kulungula mukandu wibuwa, kutamisha kyukilo kyobe kya Bible, kunyisha kunyinga eshimba na kwikitshisha. Fuba pamune na balobi ba bantu bakile pa midiyo mwanda, na okamono muloo wa Yehowa. (Ne. 8:10; Luk. 5:10) Ikala na kitshibilo kya kulungula mukandu wibuwa muyile ngobesha yobe, na kutungunuka na kwiukita mpa na nsaa ayikamba Yehowa’shi ubalombana. w20.09 7 ¶18-20

T’abitungu tuumbakwashwe na lukalo lwa kukimba bintu bibungi bya ku mbidi. “Madimi a mapeta” ngalombene kwitutakula mu kushimisha kifulo kyetu bwa Yehowa, lutumbu bw’Eyi dyaye, na lukalo lwetu lwa kulungula bangi mukandu wibuwa. (Mat. 13:22) Su atukumiina kulama bintu bitupe Yehowa, abitungu twate mpángo bukidibukidi nsaa yatumono masaku. Abitungu twikale belumbuule bwa’shi, nsaa y’atumono bifwatulo bya bantu be muswa, myanda ya buntomboshi, sunga malongyesha a bantu basumbule lukumiino lwabo abituuku ku Televizion, nsaa y’atutala ma video sunga nsaa yatudi mu Internete, twibikatushe musango umune sunga kushima televizion sunga kamo ketu. Su twekala belumbuule bwa kilombene kukitshika, twi kukita bukidibukidi bwa kukalwila kipwano kyetu na Yehowa na kushaala beselele ku meeso aye. (Mis. 101:3; 1 Tim. 4:12) Abitungu tulame bintu bi na muulo bitupe Yehowa​—bya binyibinyi bi mu Bible na kineemo kya kwibilongyesha bangi. Su twakita byabya, atwikala na kondo k’eshimba katoka, muloo mu nshalelo etu, na dingi atwikala na muloo wa kukwasha bangi bwabaadya kuuka Yehowa. w20.09 30 ¶16-19

We mupwe kubatshishibwa su? Su mbyabya, we muleshe patoka’shi we na lukumiino mwi Yehowa na okumiina kufuba pamune na ndumbulwilo aye. Lelo uno, Yehowa kwete akunkusha ndumbulwilo aye mu mushindo aulesha ngikashi yaye, mpángo na miiya yaye. Tala ngikashi isatu ya Yehowa ayimweneka mu ndumbulwilo aye. Kya kumpala, “Efile Mukulu tee na ntondo.” (Bik. 10:34) Kifulo kibaadi kitakule Yehowa bwa kutusha Mwan’aye bu “nkuulo ku mwanda wa bantu booso.” (1 Tim. 2:6, Kilombeeno Kipya 2014; Yo. 3:16) Yehowa kwet’afubu na mwilo waye bwa kulungula mukandu wibuwa kwi baba abakumiina kwiuteemesha. Mu wawa mushindo, akwasha bantu boso bwabadya kupeta myabi ya nkuulo. Kya kabidi, Yehowa t’Efile Mukulu akafutakanyi, anka nga butaale. (1 Kod. 14:33, 40) Nyi bwakinyi, tukwete kumona bafubi baye abamufubila kushii kafutakanyi, kadi mu butaale. Kya kasatu, Yehowa nyi “Mulongyeshi Mukata.” (Yesh. 30:21, NWT) Nyi bwakinyi, ndumbulwilo aye kwete ekitshisha bwa kulongyesha bantu Bible byabikala mu kakongye sunga mu bulungudi. w20.10 20 ¶1-3