Mueshi wa 5

Pa baadi ki nsongwa, Yesu baadi nka akookyela baledi baye. Ta baadi efuku su ndimu mukutwe kukookyela baledi baye mwanda wa’shi euku bi bungi kwibakila. Bu bibaadi mwana mbedi, Yesu baadi ekitshisha bwa kukumbasha buno bushito. Baadi akitshi mwaye moso bwa kulongyela kwi Yoosefe mudimo wa kusee mabaya bwa’shi amone bya kukwasha kifuko kyabo. Abimweka’shi baledi ba Yesu abaadi bamulondele pabitale kutandjikwa kwaye kwa mu kilengyeleshi na myanda ibaadi yakule mikyendji y’Efile Mukulu pabimutale. (Luk. 2:8-19, 25-38) Yesu ta baadi penda mwimene pa bibaabadi abamulungula nya, baadi dingi elongyela Eyi dy’Efile Mukulu. Atuuku naminyi’shi Yesu baadi mulongi e buwa a Eyi dy’Efile Mukulu? Mwanda pabaadi nka ki ka nsongwalume, balongyeshi ba mu ntempelo mu Yeelusaleme, “babaadi abakaanya bwa kinangu kyaaye na bwa myaaluulo ibatuushanga.” (Luk. 2:46, 47) Na nsaa ibaadi na bipwa 12, Yesu baadi mushinkamishe’shi Yehowa nyi Nshaye.​—Luk. 2:42, 43, 49. w20.10 29-30 ¶13-14

Kwikala na lukulupilo mu lusangukilo lwa Yesu nyi kabingilo aketushinkamisha’shi, bantu abakasanguka. Pababangile Mpoolo kufunda pabitale lusangukilo, bakwile myanda isatu: (1) “Kidishitu baafwile bwa milwisho yeetu.” (2) “Babaamushiikile.” (3) ‘Basangukile mwifuku dya kasatu, muyiile bifundwe. (1 Kod. 15:3, 4) Lufu lwa Yesu, kushiikibwa kwaye na kusanguka kwaye akupushisha kinyi bwetu? Mutemuki Yeeshaya badi mutemukye’shi Mesiya ‘akakatushibwa mu nsenga yaa abatala,’ na ‘abakamushiiki pamune na bantu babi.’ Anka badi mukite kingi kintu. Yeeshaya alombasha’shi ‘akasemuna bito bya bibumbu.’ Yesu badi mukite bino pakutusha muwa waye bu nkuulo. (Yesh. 53:8, 9, 12; Mat. 20:28; Lom. 5:8) Byabya lufu, kushiikibwa na kusanguka kwa Yesu, akunyisha kunyingisha lukulupilo lwetu lwa’shi atukekala bulungantu bwa mulwisho na lufu, na’shi atukemonena na bakwetu batudi bafule bapwe kufwa. w20.12 2-3 ¶4-6; 5 ¶11

Mpoolo mutumiibwa baadi akamba kulambukisha mu bitumbwilo bya bena Yunda. Bu kileshesho, mu kitumbwilo kya mu Tesalonika, ‘munda mwa sabato isatu baadi atentekyesha na [beena Yuuda] muyiile bifundwe.’ (Bik. 17:1, 2, Kilombeeno Kipya 2014) Mpoolo baadi pangi epusha kalolo mu kitumbwilo. Mwanda mmukule na bipikwa bya beena Yuuda. (Bik. 26:4, 5) Mpoolo baadi mwina Yuuda, byabya, baadi na mushindo wa kwibalambukisha n’eshimba dinyingye. (Fid. 3:5) Kunyima kw’abo kubinga Mpoolo mu Tesalonika na mu Beree kwi beshikwanyi, bafikile mu Ateene. Kwakwa dingi, “baadi atentekyesha na beena-Yuuda na bantu babaadi abalangwila Efile Mukulu.” (Bik. 17:17) Anka, pa baadi mu kisalwe, baadi esamba na bantu ba ungi mushindo. Mu baaba bantu mubaadi ba sha binangu [ba filosofe] na bantu ba bingi bisamba abaadi abamono mukandu wa Mpoolo bu “bulambukishi bupya.” Abaadi abamwamba’shi: “Okwete kwitulungula myanda ibungi yenyi.”​—Bik. 17:18-20, EEM. w20.04 9 ¶5-6

Atwe boso atukitaa milwisho, nyi bwakinyi twi na lukalo lwa buntu bwa Yehowa, bwetupa ku bukwashi bwa nkuulo. (Ef. 1:7; 1 Yo. 4:10) Bakwetu bena Kidishitu mbalombene kwitunyingisha! Be kwituteemesha nsaa y’atwisamba nabo na kwitunyingisha. (Nki. 12:25; 1 Tes. 5:14) Joy ungi mukwetu mukashi a mu Nigeria badi alu na kubofula kwishimba amba’shi: “Nadya kwikala naminyi su tshi na bakwetu bena Kidishitu? Bakwetu balume na bakashi, nyi kishinkamisho akilesha’shi Yehowa kwet’aluula ku nteko yande. Ne mulongye mpa na bya kunyingisha baba babofule kwishimba.” Anka, abitungu tutentekyeshe’shi, bakwetu balume na bakashi ta mbalombene kuuka nsaa yoso’shi twi na lukalo lwa kunyingishibwa. Nyi bwakinyi abitungu twende kwi bena Kidishitu banyingye mu kikudi bwa kwibateka bukwashi. w20.12 23-24 ¶7-8

Misuusa ibungi, kintu kya kumpala kyatukitaa bwa kunyingisha bu kuuku na muntu kampanda, nyi nkukisha naye nsaa. Nsaa yanwisamba na kwilungushena byanunangushena na kupusha, anwikala ba kuuku. Anka, nsaa yatukyebe kudya bu kuuku na Yesu, atupete nkalakashi. Lumune lwa ku yanka ndwa’shi tatwamwene Yesu. Mu siekele a kumpala, bena Kidishitu babaadi bapete luno lukalakashi. Sunga mbyabya, Mpyeele mutumiibwa bakwile’shi: “Wiinyi anudi bafule kifulo, sunga tanwambandjile kumumona; na nukwete kukumiina mwadi, sunga binobino tanukwete kumumona.” (1 Mp. 1:8, Kilombeeno Kipya 2014) Anka mbibofule bwatudya kudya na Yesu bu kuuku sunga byatushii ba mumone na meso etu. Na dingi, tatwibalombene kwisamba na Yesu. Nsaa yatwele luteko, atwisambaa na Yehowa. Binyibinyi’shi atusambilaa mwishina dya Yesu, anka ta n’aye atwisamba nee. Na dingi, Yesu nabene t’akumiinaa’shi tumusambile. Bwakinyi? Mwanda luteko nyi ungi mushindo wa kulangwila, akunamu nka penda Yehowa nyi atungu’shi tulangwile. (Mat. 4:10) Sunga byabya, twibalombene kulesha kifulo kyetu bwa Yesu. w20.04 20 ¶1-3

Bantu abaadi abasuuku lubilo mu bena Greke a kala abaadi na kya kukambila nkalakashi bu kukooka na mitanyo. Boso bw’abo abaadi bakulupile mu bibaabadi balongye na mu bukome bw’abo. Nka bu bano bantu abasukaa lubilo, tukwete kupeta malongyesha aetukwasha bwa kusuuka lubilo lwatudi. Anka twi na mwabi kukila bantu abasukaa lubilo. Twibalombene kwifubwila peepi na nsulo ya bukome busha bupwiyaa. Su tubakulupila mwi Yehowa, mmwitule’shi t‘emena penda pa kwitulongyesha nya, kadi etupa bukome! Mpoolo mutumiibwa baadi na kya kunyingila nkalakashi ibungi. Kukatusha kukayibwa na kubingwabingwa, ingi nsaa baadi apusha kubofula na kunyingila “mulobo mu mbidi.” (2 Kod. 12:7, Esambi Dipya 2015) Pamutwe wa kuleka kufubila Yehowa mwanda wa ino nkalakashi, beyimwene bu mushindo wa kukulupila mwi Yehowa. (2 Kod. 12:9, 10) Bu bibaadi Mpoolo na uno mweneno, Yehowa baadi mumukwashe mu yaya nkalakashi. w20.04 29 ¶13-14

Twi na kya buntu ki na muulo ukata kishakimweneka kya “kufuba pamune” na Yehowa mpa na kipindji kya ndumbulwilo aaye ki mwiyilu. (2 Kod. 6:1) Atufubaa nabo nsaa yoso yatukitshi mudimo wa bulungudi. Mpoolo bakwile bwaye na bwa baaba boso abalungulaa mukandu wibuwa’shi: “Tukwete kufuba pamune n’Efile Mukulu.” (1 Kod. 3:9) Nsaa ya twende mu bulungudi, tukwete dingi kufuba pamune na Yesu. Tentekyesha’shi kunyima kw’aye kulungula balongi baye bwabadya ‘kwenda mu miilo yoso na kwikasha bantu bu balondji,’ Yesu bakwile’shi: “Nee neenu.” (Mat. 28:19, 20) Kadi twi kwamba kinyi bwa ba miikeyilu? Twi na lutumbu lukata pa kuuka’shi ba mikeyilu abetukunkushaa nsaa yatulungula “mukandu wibuuwa wa looso wa kuukisha kwi bano bashaale pa nsenga”! (Kibaf. 14:6) Buno bukwashi bwatupete abufiki mwiyilu, bukwete kwitukwasha bwa kukita kinyi? Bu byatukwete kukuna mukandu wa Bufumu, ingi mbyo ikwete kupona mu mashimba ebuwa na ayikulu. (Mat. 13:18, 23) Nnanyi kwete kukusha ino mbyo ya bya binyibinyi na kutuusha bikuba? Yesu mwibipatuule mu kifundwe kya lelo. w20.05 30 ¶14-15

Lelo uno bifuko bibungi mbiabule muanda wa mabaka akuete kutshibika sunga bano bashi batshibe dibaka mbalombene kukutwa kwipushena. Ungi muntu alangaa bifuko amba’shi: “Nshe-bana, nyina bana na bana, be kukutwa kwikala abesamba, anka muntu oso e kwikala akisha nsaa ku ordinatere, ku tablete, telefone, sunga kwasha maasha a video. Sunga bekala mu nshibo imune be kukutwa kwiukena kalolo.” T’atukumiina kukutwa kifulo bu bantu be bungi ba mu ino nsenga. Anka, atukumiina kwileshena kifulo kya bu bana na bana kushi penda mu kifuko kyetu, kadi na kwi bena Kidishitu netu. (Lom. 12:10) Kifulo kya bu bana na bana nkinyi? Nyi kipwano ki bukopo ki pankatshi pa bena kifuko bepushene. Kino kifulo ki bino ngi akitungu’shi tuleshe kifuko kyetu kya mu kikudi, nkwamba’shi bakwetu bena Kidishitu balume na bakashi. Nsaa y’atulesha kifulo kya bu bana na bana, atukwasha bwa kulama buumune bwa mu kakongye, abo bwikale eyikashi di na muulo mu lulangwilo lwa binyibinyi.​—Mik. 2:12. w21.01 20 ¶1-2

Kisaka kya maasha ki mu buumune nkilombene kuwina kukila kyakya kiitshibuule. Eshimba dyobe ndilombene kuwina bu kino kisaka nka su binangu byobe, nkalo yobe, na byopusha mbibungye bwa kufubila Yehowa. Tentekyesha’shi, Satana akumiina’shi twikale na mashimba abidi. Akumiina’shi mu binangu byobe, nkalo yobe na byopusha mwikale mpaka pabitale miiya ya Yehowa. Byabya, obe ikala na lukalo lwa kufubila Yehowa n’eshimba dimune. (Mat. 22:36-38) Totadiilanga Satana su nkapela bwa’shi abuule eshimba dyobe! Teka Yehowa nka bu bibatekyele Daavide’shi: “Mpe eshimba dimune byandja kukutshîna.” Kita moobe moso bwa kutumikila luno luteko mu nshalelo obe oso. Efuku dyoso, bitshibilo bywata, bipeela sunga bikata bileshe’shi okwete kutshina eshina Yehowa dya kishila ngofu. Pa kukita bino bu Temwe a Yehowa, otumbisha dino eshina. (Nki. 27:11) Na oso a kwatudi ekala na kitshibilo ki mumune na mutemuki Mika bakwile’shi: “Atwe, atutambuka mwishina dya Yehowa Efile Mukulu eetu bwa looso.”​—Mik. 4:5. w20.06 13 ¶17-18

Buno bulwishi bwa nfumu a kuunundu, pamune na mafumu oso a pa nsenga, aakakolomona sungu ya Sha bukome boso na kufwisha ngoshi ya Armagedone. (Kibaf. 16:14, 16) Mu aa mafuku, nfumu a kuunundu na bangi bena maumbo bekale bu Goge a kwiumbo dya Magoge abakabutudibwa, na takwikala ‘muntu afiki mu kumukwasha.’ (Nda. 11:45) Shapitre alondo Ndanyele akwila mushindo aukabutudibwa nfumu a kuunundu na angi mafumu a bana ba bantu, na mushindo watukapashiibwa. (Nda. 12:1) Uno verse alesha kinyi? Mikaele nyi dingi eshina dya nfumwetu Yesu Kidishitu. ‘Mwimane’ ku lupese lwa mwilo w’Efile Mukulu kubanga mu kipwa kya 1914, mubaadi mufikye bu Nfumu a Bufumu bw’Efile Mukulu. Binobino, “akeemana” sunga’shi akabutula beshikwanyi baye mu ngoshi ya Armagedone. Yaya ngoshi ya nfudilo, Ndanyele eyitamina bu “nguba a mpombo” ishaakitshikile dingi kashaa.​—Kibaf. 6:2; 7:14. w20.05 15-16 ¶15-17

Pabadi Yosefe bu mpika na pabadi ki mu lukano, tabadi na kya kukita bwa kushintula nshalelo aye nya. Nkinyi kibadi kimukwashe bwa’shi alame mweneno e buwa? Pamutwe pa kutula binangu byaye ku kyakya kya’shi bya kukita, badi mukite mwaye moso bwa kukita mudimo ubabamupele. Yosefe badi akimbi bya kusankisha Yehowa efuku dyoso. Pa mwanda wa byabya, Yehowa badi mumwelele myabi ku kyoso kibadi akitshi. (Kib. 39:21-23) Mwanda wa Yosefe awituntekyesha’shi, mu ino nsenga mwi bu ntomboshi na bantu abetukitshina myanda na kukutwa kululama. Sunga bena Kidishitu netu be kwitulwishisha. Kadi su atutulu Yehowa bu Lubwebwe, sunga bu Kifwamino kyetu, t’atubofula ku mashimba na t’atulekye kumufubila nya. (Mis. 62:6, 7; 1 Mp. 5:10) Tentekyesha’shi, Yosefe badi pangi na bipwa 17 nsaa ibadi Yehowa mumuloteshe. Yehowa mmukulupile bafubi baye ba nsongwa. Lelo uno, ba nsongwa be bungi be nka bu Yosefe. N’abo namu, be na lukumiino mwi Yehowa. Be bungi bakwabadi mbedibwe mu nkano kushii mwanda, nka penda bwa kukookyela kwabo kwa Yehowa.​—Mis. 110:3. w20.12 16 ¶3; 17 ¶5, 7

Mpyeele na Yowano, abaadi abamono kubingwabingwa pa mwanda wa kulonda Yesu na kulongyesha bangi pabimutale bu kineemo. (Bik. 4:18-21; 5:27-29, 41, 42) Balongi ba Yesu ta babaadi na kabingilo ka kupusha buufu. Bano bena Kidishitu abaadi bakwashe mwilo, sunga byabashibaadi abebaneemeka. Bu kileshesho, mikanda iyokyelwe yabadi bafunde kwi bamo ba ku bano bena Kidishitu, ikwete kukwasha na kupa binunu bya bantu lukulupilo. Na Bufumu bubaabadi abalambukisha, bukwete kukunkusha mwiyilu na binobino abubanga kukunkusha bantu. (Mat. 24:14) Anka mbulamatadi a bena Looma baadi abingabinga bena Kidishitu tamwishe mafuku ebungi. Kadi, bano bena Kidishitu basha lulamato, lelo uno bakwete kumunana mwiyilu. Beshikwanyi b’aabo mbapwe kufwa; na su bebasangula, abebakunkusha kwi Bufumu bwa ba kunkusha kwi bena Kidishitu ba baabadi bashikwe.​—Kibaf. 5:10. w20.07 15 ¶4

Abrahame baadi na lukumiino lwi bukopo mu milayilo y’Efile Mukulu nka bu baadi amono Mesiya, baadi na kya kufika bu Nfumu a Bufumu bw’Efile Mukulu. Nyi bwakinyi Yesu baadi mulungule bena Yunda ba mu mafuku aaye’shi: “Nshenu Abrahame baadi na kusepeela pabaakulupilanga kumona efuku dyande, beedimwene aye nkupusha muloo.” (Yo. 8:56) Abimweka patooka’shi, Abrahame baadi auku’shi bangi ba ku twikulu twaye atukukekala bu bakunkushi ba Bufumu bwabakatulu kwi Yehowa, na baadi akumiina kutengyela bwa’shi Yehowa akumbashe wawa mulayilo. Mushindo kinyi ubaadi Abrahame muleshe’shi baadi atengyela “kibalo,” ky’abelele mufunda kwi Efile Mukulu? Kya kumpala, Abrahame tabaadi mulamate ku myanda ya mafumu a pano pa nsenga nya. Baadi nk’afiluka, kushii kwibaka yaaye nshibo mbalo kampanda, na tabaadi akwatshishena nfumu su ngumune a pa nsenga. Na dingi, Abrahame tabaadi mutompe efuku su ndimune kukita bwaye bufumu. Anka, baadi atungunuka na kukookyela Yehowa na kutengyela kulombana kwa mulayilo waye. Pa kukita byabya, Abrahame baadi muleshe lukumiino lwi pabwalo. w20.08 3 ¶4-5

Yehowa mmulee’shi mu Mpaladiiso, muntu sunga ngumune t’akamba’shi: “nee na mukumbo.” (Yesh. 33:24) Dingi, baaba abakasanguka, abakekala na mbidi ibuwa. Kadi, tabakekala bapwidikye mususa umune nya. Bisumanga, bakwabo ba mu kifuko t’abakebatundula nya. Abimweka’shi, bantu booso abakafiki bapwidikye kapelakapela mu Bipwa kinunu bya kumunana kwa Kidishitu. Ku nfudilo kwabyo, Yesu akalusha Bufumu kwi Nshaye. Paapa, Bufumu abukekala bulombashe mpángo ya Yehowa, mpa na mudimo wa kwikasha bantu bapwidikye. (1 Kod. 15:24-28; Kibaf. 20:1-3) Banda kunangushena muloo okekala nao pokakukila bantu boodi mufule abakasanguka. Okasepe su okadidi mwanda wa muloo? Okayimbila Yehowa misambo ya kumutumbisha nayo mwanda wa muloo su? Kushi mpaka, okekala na kifulo kikata bwa Nshobe sha kifulo na Mwan’aye mwanda wa kya buntu kya kukaanya kya lusangukilo. w20.08 16-17 ¶9-10

Mpoolo mutumiibwa baadi anyingisha bena Kidishitu su mbalombene kufubila Yehowa bukupi. (1 Kod. 7:8-9) Mpoolo ta baadi abepuula bantu be bukupi nya. Byabya, baadi musangule nsongwalume Timote, baadi bukupi bwadya kukita bibungi mu mudimo wa Yehowa. (Fid. 2:19-22) Abipushika’shi, bibubi kupwandjikisha’shi mukwetu mulume mmulombene kupeta mashito sunga kwiakutwa penda mwanda wa’shi mwibakile sunga’shi ebukupi. (1 Kod. 7:32-35, 38) Byabikala Yesu sunga Mpoolo, ta kwi muntu mulongyeshe’shi abitungu bena Kidishitu bebakile sunga’shi bashale bukupi. Byabya, twi kwamba kinyi pabitale kwibakila sunga kushala bukupi? Kitenta kya Mulami kya 1/10/2012 mu fwalanse, nkyaluule luno lukonko kalolo. Akyamba’shi: “Byoso bibidi, [kwibakila na kushala bukupi] nyi bya buntu abifiki kwi Efile Mukulu . . . Yehowa t’apwandjikishaa’shi [bukupi] nyi mwanda wa buufu sunga wa kwinyongola.” Byabya, abitungu tuneemekye bakwetu balume na bakashi be bukupi mu kakongye. w20.08 28 ¶8-9

Mu angi maumbo, bantu bebungi abakuminaa kulonga bibungi nsaa yabapusha mukandu wibuwa. Abekala na muloo wa kulonga bya binyibinyi. Mu angi namu, bantu t’abeusankilaa. Bi naminyi mbalo yodi mushale? Sunga bantu beusankila sunga bapela kwiusankila, Yehowa akumina’shi tutungunukye na kwiulungula mpa na nsaa yakamba’shi kubapu. Apakalombana kipungo kitshibe Yehowa, mudimo wa bulungudi aukemana na kunyima “nfudîlo aikafiki.” (Mat. 24:14, EEM) Yesu balungwile balongi baye abikekala bantu na abikakitshika mu mafuku a nfundiilo. Baadi auku’shi ino myanda ngilombene kukutshishwa balongi baye bwabadya kutuula mudimo wa bulungudi pa mbalo ya kumpala. Nyi bwakinyi, baadi mwibadimushe bwabadya kwikala “bapasukye.” (Mat. 24:42, EEM) Mu mafuku a Nowa, kubaadi myanda ibungi ibaadi ikutshishe bantu kutemeesha kudimusha kwaye. Lelo uno, yaya myanda ngilombene kwituumbakasha. (Mat. 24:37-39; 2 Mp. 2:5) Nyi bwakinyi abitungu tutuule binangu byetu ku mudimo witupe Yehowa. w20.09 8 ¶1-2, 4

Satana “mmukwate nsungu ikile,” byabya su twanangushena’shi yaya nsungu t’ayikala na bukitshishi kwatudi, atwidimbi. (Kibaf. 12:12, EEM) Mu mafuku apela’mu, lukumiino lwa ooso akwatudi alukatompibwa. Binobino akwikala “mpombo ikata byaisheekeele dimo byatshiile ku mbangilo aa byaa-pano nyaa na ku binobino.” (Mat. 24:21) Mu aa mafuku, bena kifuko netu mbalombene nketutombokyela na mudimo wetu ngulombene kukandjikibwa. (Mat. 10:35, 36) Atukekala bakulupile’shi Yehowa etukwasha na kwitukalwila bu Mfumu Asa su? (2 Mya. 14:10) Yehowa kwete kwitulumbuula kubanga binobino bwa’shi tukekale na lukumiino lunyingye. Kwete kukunkusha “mpika a lulamato na mudimukye” bwadya kwitupa “kya-kudya pa nguba atungiibwa” bwa’shi twikale nka banyingye mu kikudi. (Mat. 24:45) Anka, abitungu ooso akwatudi akite mwaye mooso bwa kwikala na lukumiino lunyingye mwi Yehowa.​—Eb. 10:38, 39. w20.09 18 ¶16-18

Nsaa y’abipushena na mpángo yaye, Yehowa mulombene kufubisha kikudi kyaye kiselele bwa’shi, bakata ba mbulamatadi bakite kikyebe ky’eshimba dyaye. Bantu mbalombene kubundula mikola bwa kuyisha mema koso kwabakyebe. Mu mushindo umune, Yehowa mulombene kufubisha kikudi kyaye bwa kukunkusha binangu bya bakata ba mbulamatadi muyile mpángo yaye. Nsaa ayikitshika bino, bakata ba mbulamatadi abatakulwa bwa kwata bitshibilo bi buwa bwa mwilo w’Efile Mukulu. (Pwandjikisha na Esela 7:21, 25, 26.) Nkinyi kyatudi balombene kukita? Twi kutekyela “milopwe na booso bee na matalwa” nsaa y’abata bitshibilo bi kwikala na bukitshishi bwi bubi mu nshalelo etu a bwina Kidishitu. (1 Tim. 2:1, 2; Ne. 1:11) Nka bu bibadi bibikite bena Kidishitu ba mu siekele a kumpala, natwe namu abitungu tutekyele bakwetu balume na bakashi be mu nkano n’eshimba dyetu dyoso.​—Bik. 12:5; Eb. 13:3. w20.11 15 ¶13-14

Bikishekishe su noobe alonganga na yawa muntu, wekala na muulo ngofu nsaa yomono yawa muntu abatshishibwa. (1 Tes. 2:19, 20) Mulongi mupya bakatuka mu kubatshishibwa e bu mukanda wibuwa ufundjibwe, kushii penda kwi yawa alonganga naye Bible, kadi kwi kakongye koso. (2 Kod. 3:1-3) Bi muloo pa kumona’shi, mu bipwa binanka, twi balongye na bantu 10 000 000 mweshi oso mu nsenga ishima. Nka mu byabya bipwa bimune, bantu 280 000 abaadi ababatshishibwa kipwa kyoso na kufika bu ba Temwe ba Yehowa na balongi bapya ba Yesu Kidishitu. Mushindo kinyi watudya kukwasha ino midiyo ya balongi ba Bible bwayidya kubatshishibwa? Paki’nka Yehowa na lwishinko na kupa bantu mushindo wa kwikala balongi ba Kidishitu, tukite mwetu moso bwa kwibakwasha bwashi babatshishibwe bukidibukidi. Nsaa ibashala ngipela!​—1 Kod. 7:29a; 1 Mp. 4:7. w20.10 6 ¶1-2

Mfumu Saule bapelele kukumiina kilubilo kyaye. Pamutwe pa kukumiina kilubilo kyakye, Saule bakwile’shi ka mwanda kapela na dingi bantu nyi abekalanga bantakule bwa kwibikita. (1 Sam. 15:13-24) Saule tabadi mupwe kukita ungi mwanda wi bino kumpala. (1 Sam. 13:10-14) Bi malwa, mwanda balekyele kwitatula mwishimba dyaye. Tabadi mushintule ngyelelo aye a binangu, nyi bwakinyi Yehowa badi mumusumbushene. Su tatukumiina kwikala bu Saule, abitungu twiyipushe ino nkonko: ‘Nsaa yambadika malango e Mwiyi dy’Efile Mukulu, na kimbaa kwibingisha bwa kupela kwiatumikila su? Napwandjikisha’shi bino bya nkwete kukita tambikambe kwikala bubi su? Nasumbwila bangi kilumbu bwa bya nkwete kukita su?’ Su lwaluulo lwi’shi oolo, sunga ku lumune lwa ku ino nkonko, abitungu tushintule ngyelelo etu a binangu na bikitshino byetu. Su tatwibebikite, eshimba dyetu adiitatula na Yehowa etupele bu ba kuuku baye. w20.11 20 ¶4-5

Abitungu nsongwa asangule adya kufubila. Abitungu obe nabene oukye Yehowa, kikyebe ky’eshimba dyaye, na mushindo odya kwikikita mu muwa oobe. (Lom. 12:2) Paapa, wekala na ngobesha ya kwaata kitshibilo ki na muulo mu muwa oobe, kitshibilo kya kufubila Yehowa. (Yos. 24:15) Su wekala na programe a kubadika na kwilongyela Eyi dy’Efile Mukulu, kifulo kyobe bwa Yehowa akitama na lukumiino lobe mwadi alunyisha kunyinga. Ata kitshibilo kya kutula kikyebe ky’eshimba dya Yehowa pa mbalo ya kumpala mu muwa obe. Ndumbulwilo a Satana amba’shi su muntu afubisha ngobesha yaye bwa buwa bwaye’ye nabene, ekala na muloo. Anka, atuuku’shi boso batule binangu byabo mu kukimba kwa mapeta, mbekakile abo ba nabene “makyenga e bungi.” (1 Tim. 6:9, 10, Kilombeno Kipya 2014) Kadi su oteemesha Yehowa na kutula kikyebe ky’eshimba dyaye pa mbalo ya kumpala mu muwa obe, wekala na muloo mu nshalelo obe na dingi ‘oobesha.’​—Yos. 1:8. w20.10 30-31 ¶17-18

Mu siekele a kumpala. Mukandu ubaadi Yesu alungula, ubaadi aupa bantu boso lukulupilo. Baadi mulungule balongi baye bwabadya kutungunuka na kukita uno mudimo “mpaa na kufudiile nsenga.” (Bik. 1:8) Binyibinyi’shi, t’abaadi balombene kukita uno mudimo na bukome bwabo’bo banabene. Abaadi na lukalo na “mukwashi”​—kwamba’shi kikudi kiselele kibaadi Yesu mwibalee. (Yo. 14:26; Sek. 4:6) Balongi ba Yesu abaadi bapete kikudi kiselele mwifuku dya Pentekote a kipwa kya 33 B.B. Na bukwashi bwa kyakya kikudi, ababangile nka paapa kulungula mukandu wibuwa, na mu mafuku apela bantu binunu abaadi bakumiine mukandu wibuwa. (Bik. 2:41; 4:4) Nsaa ibababangile kwibabingabinga, balongi t’abaadi bakookye nya, anka abaadi batekye Yehowa bukwashi. Abatekyele’shi: ‘Pa bafubi boobe bukome bwa kuukisha Eyi dyoobe na mashimba anyingye.’ Ku bukwashi bwa kikudi kiselele, abatungunukile na ‘kuukisha na mashimba anyingye Eyi dy’Efile Mukulu.’​—Bik. 4:18-20, 29, 31. w20.10 21 ¶4-5

Nkinyi akitushinkamisha’shi Yehowa badi musangule Yesu? Kwi bantu be bungi abadi bamone Yesu kunyima kwaye kusanguka na abadi bebilungule bangi. (1 Kod. 15:5-7) Kamonyi ka kumpala akatemuna Mpoolo mutumiibwa nyi Mpyele (Kefase). Kisaka kya balongi kibadi kishinkamishe Mpyele badi mumone Yesu kunyima kwaye kusanguka. (Luk. 24:33, 34) Na dingi, batumiibwa “Ekumi naa babidi” abadi bamone Yesu kunyima kwaye kusanguka. Akupu, Kidishitu ‘bamwenekyele mpaa na bakwetu bakile pa nkama itano,’ pangi ku kisangilo ki buwa kibadi kikitshikye mu Ngalileeya ki mu Mateo 28:16-20. Yesu badi dingi “mumwenekyele Shaake” pangi mwina aye shibadi mumukumiine kumpala bu Mesiya. (Yo. 7:5) Kunyima kwaye kumona Yesu aye basanguka, Shaake badi mwibishinkamishe. Bi muloo pakumona’shi, pangi mu kipwa kya 55 bino bipungo byetu B.B., nsaa ibadi Mpoolo mufunde uno mukanda, bantu be bungi abadi bamone Yesu kunyima kwaye kusanguka, abadi bakii na muwa, byabya oso badi na mpaka badi bya nkebepusha. w20.12 3 ¶5, 7-8

Nsaa yatudi na maladi, bikishekishe maladi asha apu, mbilombene kwitwikela bukopo bwa kwikala na binangu bi buwa. Teka Yehowa bukwashi. Yehowa ta mulombene kwitupasha mu kilengyeleshi binobino nya, kwete kwitupa bukome bwatudi nabo lukalo bwa kunyingiila. (Mis. 94:19) Bu kileshesho, mulombene kutakula bakwetu bena Kidishitu bwabadya kufika mu kwitukwasha pa kwitukitshina tungi tu midimo twa ku nshibo. Mulombene kwibatakula bwabadya kuteka netu. Sunga’shi mulombene kwituntentekyesha bifundwe abinyingisha bi Mwiyiyi dyaye bu, lukulupilo lwi buwa lwa kwikala na nshalelo mupwidikye ku shi mikumbo na mitanyo mu nsenga ipya. (Lom. 15:4) Anka, twibalombene kubofula kwishimba mwanda wa’shi ta tukitshi bi bungi mu mudimo wa bulungudi bu byakumiina. Ungi mukwetu ababadi abetamina bu Laurel, badi mulale peepi na kyamo akimukwasha bwa kupuuka munda mwa bipwa 37! Na dingi badi na cancer, mbamubale misango i bungi, na badi na mukumbo wa mu kikoba. Tabadi muleke kulungula mukandu wibuwa nya, badi alungula ba munganga na bangi be na lupitalo abadi abafiki kwaye ku nshibo. Badi mukwashe bantu 17 bwabadya kupeta kiukilo kya binyibinyi pabitale Yehowa! w20.12 24 ¶9; 25 ¶12

Mpoolo mutumiibwa badi na lukalo lwa bukwashi. Pangi mu kipwa kya 56 B.B., kibumbu kya bantu kibadi kimukakile pasha pa ntempelo mu Yeelusaleme bwa kumwipaa. Efuku dibalondele, nsaa ibabadi bamutwale kwi bena Sanedrine, abadi bamwifunyishe nka kwi beshikwanyi naye. (Bik. 21:30-32; 22:30; 23:6-10) Yaya nsaa, Mpoolo badi pangi eyipusha’shi, ‘Nanyingila mushikwa mpa na mafuku kinyi?’ Bukwashi kinyi bu badi Mpoolo mupete? Bufuku kunyima kwabo kukwata Mpoolo, “Mfumu,” Yesu bayimene kulupese lwê amulungula’shi: “Nyinga eshimba! Bopu kwakula bu kamonyi pa mwanda wande muno mu Yelusalema, abitungu nyi okebwakule mpâ na ku kibalo kya Loma.” (Bik. 23:11, EEM) Uno mulayilo ubadi unyingishe Mpoolo ngofu! Yesu baadi mutumbule Mpoolo bwa bukamonyi bubadi mutushe mu Yeelusaleme. Na ba mulayile’shi akafiki na muwa ku Looma bwa kukemutusha dingi bukamonyi. Kunyima kwaye kupeta uno mulayilo, Mpoolo badi mwipushe mu kukalwilwa nka bu mwana e mu maboko a nshaye. w20.11 12 ¶1, 3; 13 ¶4

Lukulupilo lwetu lwa Bufumu lwi nka bu ‘nyindo a mashuwa bwa myuwa yetu, etukwasha bwa kwikala banyingye mu nkalakashi. Nangushena pabitale milayilo ya Yehowa bwa mafuku aafiki. Mu aa mafuku, t’akukekala kintu su nkimune akiketwinyongosha. (Yesh. 65:17) Emone mu nsenga ipya mwi butaale, mush’amukekala mwanda su ngumune wi bubi. (Mik. 4:4) We mulombene dingi kunyingisha lukulupilo lobe, nsaa ywesamba na bangi pabitale nsenga ipya. Epaane mu mudimo wa bulungudi na wa kwikasha bantu bu balongi. Su bokitshi bino, we mulombene kwikala na “kishinkamisho kya lukulupilo mpaa na ku nfudiilo.” (Eb. 6:11) Bu bi tatudi ku nfudilo kwa uno ndumbulwilo, myanda aitutwadila nkalakashi ikwete ayende na kufwima. Ayikala kuanka, bua kuitukuasha bwa kukambila ino yoso nkalakashi na kunying’eshimba kushi mu bukome bwetu’twe banabene, anka mu kukulupila Yehowa. Munda mwa kino kyoso kipwa, tuleshe ku bikitshino byetu’shi, twi na lukumiino mu mulayilo wa Yehowa awamba’shi: “Bukome bwenu bwi mu kunyinga kw’eshimba na mu lukulupilo.”​—Yesh. 30:15. w21.01 7 ¶17-18

Lamiina’shi, Shake 5:11 atemuna kifulo kya Yehowa pamune na dingi eyikashi aditukakaa kwadi​—lusa lwaye. (Efi. 34:6) Mushindo umune awitulesha Yehowa lusa, mpa kwitubwikila milwisho yetu. (Mis. 51:3) Mu Bible, kishima lusa akipushisha myanda i bungi, kushi penda kubwikila muntu milwisho yaye. Lusa nyi ndukalo lwi bukopo lwi mwishimba dyetu alwitutakulaa bwa kukwasha muntu e mu lukalakashi. Yehowa akula’shi e na lukalo lwi bukopo lwa kwitukwasha kukila mpa na lwa nyina bana bwa bana baye. (Yesh. 49:15) Nsaa yatudi bakalakashwe, lusa lwa Yehowa alumutakula bwa kwitukwasha. (Mis. 37:39; 1 Kod. 10:13) Twi kulesha bakwetu bena Kidishitu lusa pa kwibalekyela bilubilo byabo na kupela kulama ngo nsaa y’abetulwishisha. (Ef. 4:32) Mushindo watudya kulesha bakwetu lusa, mpa kwibakwatshishena nsaa yabadi mu nkalakashi. Biabia atwambula Yehowa aye muule ndaa na kifulo.​—Ef. 5:1. w21.01 21 ¶5

Abitungu Mfumu a kifuku ekale na nkatshinkatshi. T’abitungu ekale akisha nsaa i bungi ku mudimo mu mushindo wa’shi mulombene kulombasha nkalo ya mu kikudi ya kifuko kyaye na kwikikwasha bwakidya kwipusha mu kukalwilwa. Alongyeshe kifuko kyobe. Yehowa etulongyeshaa na kwitunyoka, mwanda akumina kwitukwasha. (Eb. 12:7-9) Anka bu Nshaye, Yesu alongyesha boso be ku matalwa aye na kifulo kyoso. (Yo. 15:14, 15) Atusha malango e bukopo kadi na kalolo koso. (Mat. 20:24-28) Ashingula’shi twi bakutwe kupwidjika na’shi atukitaa milwisho. (Mat. 26:41) Mfumu a kifuko ambula Yehowa na Yesu atentekyesha’shi, mukashi na bana baye ta mbapwidikye. Tekalaa na “bukyelo” kwi mukashi sunga kwi bana baye. (Kol. 3:19, Kilombeeno Kipya 2014) Anka, atumikila Eyi dya kulonda di mu Bena-Ngalatea 6:1 na kukimba bya kwibaludika na “kikudi kya kupopeela.” Atentekyesha’shi aye namu mmukutwe kupwidjika. Anka bu Yesu, ashingula’shi mushindo wi buwa wa kulongyesha, nkwikala bu kileshesho bwabo. w21.02 6-7 ¶16-18

Ku bukwashi bwa nkuulo, Yehowa mmule muwa wa muntu oso mu kakongye, mpa na wa yawa oso alesha lukumino mwi Yesu. (Mak. 10:45; Bik. 20:28; 1 Kod. 15:21, 22) Nyi bwakinyi badi musangule Yesu bu mfumu a kakongye, aye badi mutushe muwa waye bu nkuulo. Bu byadi mfumu, Yesu ena matalwa akwela miiya na kulondesha’shi muntu oso, kifuko kyoso mpa na kakongye koso, abeyitumikila. (Nga. 6:2) Yesu ta mwimene nka penda pakwela miiya nya. Kwete kwitudisha na mufule oso a kwatudi. (Ef. 5:29) Bakwetu bakashi abalesha’shi abanemeka Kidishitu, pa kulonda bukunkushi bwa bantu badi mutule bwa kwibapasukila. Bakwetu balume abalesha’shi abapusha kalolo matalwa abadi bebape pa kunemeka bakwetu bakashi. Nsaa i boso mu kakongye abapusha kalolo na kutumikila mayi a kulonda pabitale matalwa, kakongye koso akekala mu butaale. Na kintu ki na muulo ngofu, atutumbisha Nshetu sha kifulo e mwiyilu, Yehowa. w21.02 18-19 ¶14-17

Pabadi ende na kusuka Saule, aye na bantu baye abalekyele bifuko byabo benda mu kulwa ngoshi. Pabakatukile bana balume boso, beshikwanyi abatwelele mu mashibo aabo, nkupaula bintu na nkukwata bifuko byabo, nkwenda nabyo mu bupika. Bu bibadi kilobo kya ngoshi, Davide badi na mayele e bungi abadya kufubisha bwa nkafungusha bifuko byabo ku bupika. Anka, Davide badi mukimbe bukunkushi bwa Yehowa. Davide bepwishe Yehowa’shi: “Ne kwilondena na bano bantu su?” Yehowa balungwile Davide’shi, elondene nabo na amushinkamisha’shi okafungusha baba babadi bende nabo. (1 Sam. 30:7-10) Nkinyi kyodya kulongyela ku uno mwanda? Teka malango kumpala kwa kwata bitshibilo. Ba nsongua, esambeyi na baledi benu. We kupeta dingi malango e buwa kwi bakulu mu kakongye. Yehowa mwibakulupile, nobe namu ebakulupile. Yehowa kwete kwibamona bu “bya buntu” mu kakongye. (Ef. 4:8) Bi nkukwasha su wambula lukumino lwabo na kutemesha malango aabo e buwa. w21.03 4-5 ¶10-11

Yesu bakwile’shi su t’atutumikila byatulongo, twi nka bu muntu bayibaka nshibo yaye mu lusenga. Mmufube ngofu, anka mmukite mudimo wa bisumanga. Bwakinyi? Mwanda nsaa ayele kipapi ki bukopo na mpeshi, abiponesha nshibo yaye sunga kwiyilwisha. (Mat. 7:24-27) Mu mushindo umune, su tatwibatumikile byatulongo, tukwete atushimisha nsaa yetu. Nsaa ayitompibwa lukumino lwetu pa mwanda wa lukalakashi sunga kubingwabingwa, t’atwikala na bukome bwa kunyingila. Anka, su twalonga Bible na kutumikila byabya by’atulongo, atwata bitshibilo bi buwa, atupete butaale, na atunyingisha lukumino lwetu. (Yesh. 48:17, 18) Bwa kulama lulamato lwetu kwi Yehowa nsaa yatudi na nkalakashi, abitungu tutungunukye na kumuteka, na kulonga Eyi dyaye nsaa yoso. Na abitungu twikale atutentekyesha’shi kintu ki na muulo kyatudya kukita, nkutumbisha Yehowa. Abitungu twikale bashinkamishe’shi, Yehowa ta mulombene kwitusumbushena nya, na takwi kintu su nkimune kilombene kumukutshishwa kwitufula.​—Eb. 13:5, 6. w21.03 15 ¶6; 18 ¶20