Mueshi wa 6

Abitungu balongyeshi bapasukile balongi babo ba Bible. Banga kwibamona bu bakwetu balume na bakashi ba mu kakongye. Ta mbibabofwile bwa kuleka ba kuuku babo ba mu uno ndumbulwilo na kushintuula myanda bwa kubanga kufubila Yehowa. Balongyeshi be buwa abakwasha balongi babo bwabadya kwiukena na bangi mu kakongye, be kwibakwasha bwa kwifubwila peepi na Yehowa. Balongi ba Bible mbalombene kusangeela kwikala pamune na mwilo w’Efile Mukulu, ulombene kwibanyingisha mu kikudi nsaa yabapete nkalakashi. Atukumiina’shi mulongi oso a Bible epushe bu mwina kakongye na bu mwina kifuko kyetu kya mu kikudi. Kifulo kyetu kya bu bana na bana kibakakye kwatudi. Paapa, abibabofwila bwabadya kutshiba kipwano na bantu bashii balombene kwibakwasha bwa kufula Yehowa. (Nki. 13:20) Sunga bebasumbushena kwi ba kuuku babo, abauku’shi be kupeta ba kuuku be buwa mu ndumbulwilo a Yehowa.​—Mak. 10:29, 30; 1 Mp. 4:4. w20.10 17 ¶10-11

Su atukumiina kwikala mu kipwano kibuwa na Yehowa abitungu twikala mu bu kuuku na Yesu. Bwakinyi? Tubaande kutaluula penda tubingilo tubidi. Kakumpala, Yesu baadi mulungule balongi baye’shi: “Yehowa nabeene mmwinufule bwa panudi bamfule.” (Yo. 16:27) Bakwile dingi’shi: “Muntu su ngumune taakwenda kwi Yaaya, kushii kukiila kwandji.” (Yo. 14:6) Kukimba bya kwikala mu bu kuuku na Yehowa kushii kwikala mu bu kuuku na Yesu kwi nka bu kutompa kutwela mu nshibo ishii kiibi. Yesu baadi mufubishe kino kileshesho pa baadi eamba bu “kiibi kya mikooko.” (Yo. 10:7) Ka kabidi, Yesu mmwambule ngikashi ya Nshaye. Balungwile balongi baye’shi: “Mummone mmumone Yaaya.” (Yo. 14:9) Mushindo upelepele watudya kuuka Yehowa, nyi pa kulonga nshalelo a Yesu. Nsaa yatulongo pabimutale, atunyisha kumufula ngofu. Nsaa yatunyisha kumufula, kifulo kyetu bwa Yehowa akinyisha kutama. w20.04 21-22 ¶5-6

We na mukumbo aukuntugu’shi wekale nka mulaale sunga’shi we mu ka nkwasa ka bishetshi? We na mukumbo ukwete nkubofusha mmanwi sunga’shi meso taakwete kumona kalolo? Su mbyabya, we mulombene kufubila Yehowa pamune na ba nsongwa be na mbidi bukome su? Oolo! Bantu banunu na balemane be bungi bakwete kusuuka lubilo lwa ku muwa. Ntambalombene kukita uno mudimo ku bukome bw’abo nya. Bakwete kupeta bukome bwa Yehowa ku bukwashi bwa bisangilo. Na bakwete kulambukisha ba doktere, ba minganga, sunga bena kifuko nabo. Su tokii na ngobesha ya kufubila Yehowa bu byokumiina, tobofulanga kwishimba na kupwandikisha’shi twe mulombene kunyingiila mpaa na ku nfudilo. Yehowa mmukufule mwanda wa lukumiino lobe mwadi na bwa byoso byodi mupwe kukita bwaye munda bwa bipwa. Bwa binobino, we na lukalo lwa bukwashi bwaye kukila kumpala, anka takusumbusheena nya. (Mis. 9:11) Paapa, anyisha kwifubwila peepi n’obe. w20.04 29 ¶16-17

Myanda kinyi yodi mulombene kwisamba na muntu alangwilaa? Tompa kupeta mwanda wadi mukumiine wipushene na Bifundwe. Mulombene kwikala alangwila penda Efile Mukulu umune, akumiina’shi Yesu nyi mupashi a bantu, na’shi twi mu mafuku e bubi aakyebe kufudiila binobino. Ku bukwashi bwa yaya myanda yanudi bakumiine boso, we kumulungula mukandu wa mu Bible mu kipaso akisankisha yawa muntu. Lamiina’shi bantu tabakumiinaa nka myanda yoso yabebalongyesha mu kipwilo kyabo nya. Byabya, kunyima kwa kuuka kipwilo kya muntu, kimba bya kuuka myanda yadi mukumiine. Na ungi misionere a mu Argentine amba’shi, bangi bantu abambaa’shi mbakumiine dilongyesha dya’shi Efile Mukulu e mu bantu basatu, kadi tabakumiina’shi Yaaya, Mwana, na kikudi ki selele nyi Efile Mukulu umune nya. Amba’shi: “Kuuka byabya akukukwasha bwa nudya kwipusheena na muntu.” Byabya, kimba bya kuuka myanda yabadi bakumiine kwi bantu. Paapa, nka bu Mpoolo mutumiibwa we mulombene ‘kwiyikasha kwi bantu boso’nka bu byabadi.’​—1 Kod. 9:19-22. w20.04 10 ¶9-10

Abitungu twikale na lukulupilo bwa myanda ayifiki kumpala, mwanda Ndanyele na Yowano, boso bwabo abashinkamisha’shi baaba boso abafubila Yehowa na Yesu, abakapashibwa mu kipungo kya mpombo. Ndanyele amba’shi mashina a boso abakapashibwa aakekala “afundwe mu mukanda.” Nkinyi kyatudi balombene kukita bwa’shi mashina eetu ekale afundwe mu mukanda? Abitungu tuleshe patoka’shi twi na lulamato mwi Yesu, mwana a mukooko a Efile Mukulu. (Yo. 1:29) Abitungu twilambule kwi Yehowa na kubatshishibwa. (1 Mp. 3:21) Abitungu tukwatshishene Bufumu bw’Efile Mukulu pa kukwasha bangi bwa’shi beukye Yehowa. Ino nyi nsaa ayitungu’shi tunyingishe lukulupilo lwetu mwi Yehowa na kwi ndumbulwilo aye na lulamato loso. Ino nyi nsaa ayitungu’shi tukwatshishene Bufumu bw’Efile Mukulu. Su twakita byabya, atukapashibwa nsaa yabakabutula nfumu a kuunundu na a kuushi kwi Bufumu bw’Efile Mukulu. w20.05 16 ¶18-19

Adame na Eeva abaadi abauku eshina dya Yehowa, abaadi abauku mpa na ingi myanda i na muulo imutale. Abaadi abamwiuku bu Mupangi, Yawa mwibape muwa, Mpaladiso mbalo yabo ya kushaala, na mwina dibaka mupwidikye. (Kib. 1:26-28; 2:18) Abaadi batungunukye na kunangushena pabitale bintu byoso bibaadi Yehowa mwibakitshine su? Babaadi batungunukye na kunyingisha kifulo na lutumbu lwabo bwa Muntu sha dyadya eshina su? Bibaadi bimwenekye kalolo nsaa ibaabadi bebatompe kwi mwishikwanyi. Pabakitshine bwa’shi bimwenekye bu nyoka kwete kwakula, Satana bayipwishe Eeva’shi: “Eyendo, Efile mwinulungule’shi: ‘tanudyanga bikuba bya ku mitshi yooso ii mu lupango?’” (Kib. 2:16, 17; 3:1) Mu lwalwa lukonko mubadi mufwame madimi pabitale Efile Mukulu, na Eeva babangile kwelela Efile Mukulu binangu bibubi. Efile baadi mwibalungule’shi mbalombeene kudya bikuba bya mitshi ibungi, kukaasha penda mutshi umune. (Kib. 2:9) Satana baadi akyebe kulesha’shi Efile Mukulu ta nsha kalolo. Eeva baadi pangi mwiyipushe’shi, ‘Efile mwitufwamishe kintu kibuwa su?’ w20.06 3-4 ¶8-9

Bangi bafubi ba Yehowa mbafite munda mwanda wa bibakitshine ungi mwina Kidishitu. Mpoolo mutumiibwa baadi auuku’shi ingi nsaa twi kwikala na ‘kabingilo ka kwidila pabitale bibabetukitshina’ kwi mukwetu mulume sunga mukashi. Mbalombene kwitukitshina myanda kushi kululama. Byabya, su tatwi badimukye twi kwibafitshila munda. Nsaa i muntu na nsungu, mmulombene kuleka kutwela mu bisangilo. Pablo, mukwetu mulume a mu Amérique du sud, abaadi bamudimbile’shi bakitshi kintu ki bubi, pa mwanda wa byabya, Pablo baadi mushimishe mashito mu kakongye. Baadi mukite kinyi? Amba’shi: “Naadi mufite munda ngofu, kapela-kapela ami nkuleka kutwela mu bisangilo.” Su muntu baadi mukite mulwisho ukata, mmulombene kwikalakasha pa kupwandjikisha’shi te na muulo ku meeso kw’Efile Mukulu. Sunga baadi mwilangye bamufwila lusa, mulombene kwimona bu shii na muulo wa kwikala umune a ku bafubi b’Efile Mukulu. Opushaa naminyi pa bitale bakwetu balume na bakashi be mu nkalakashi bu penda ino ibatwisambila? w20.06 19 ¶6-7

Abitungu tulongye bya kutundula myanda ilombene kwitutwadila masaku na kukimba bya kwiasuka. (Eb. 5:14) Bu kileshesho, abitungu tukishe kapapi na kusangula bintu byatukisha nabyo kapapi na binangu. Mu bintu by’abakambaa kulesha ku Televizion na mu ma video, mwi myanda i butete. Abitungu tusukye yaya mishindo ya kukisha kapapi, mwanda ngilombene kubofusha kapelakapela kifulo kyetu bwa Yehowa. Atuuku’shi Yehowa mushikwe bantu be na mwikelo wi butete, na bantu be na wawa mwikelo abelwishishaa abo banabene na kulwishisha bangi. (Ef. 5:5, 6) Abitungu twikale na kapatupatu ka kutundula masaku e nao myanda ya madimi yabapalakasha kwi bantu basumbule lukumiino. Mbalombene kupalakasha myanda ya madimi pabitale bakwetu bena Kidishitu, sunga kwitutakula mu kukutwa kukulupila ndumbulwilo a Yehowa. (1 Tim. 4:1, 7; 2 Tim. 2:16) Ino myanda ya madimi ilombene kubofusha lukumiino lwetu. T’abitungu tukumiine ino myanda ya madimi nya. Bwakinyi? Mwanda ino myanda i bino, bakwete kwiyipalakasha kwi “bantu basha binangu bilwile abápu kushimisha kiûkilo kya bya bînyibînyi.” Kepatshila kabo ka kutusha “mpaka ishyaipu.” (1 Tim. 6:4, 5, EEM) Abakyebe’shi tukumiine ano madimi na tulekye kukulupila bakwetu bena Kidishitu. w20.09 29 ¶13, 15

Mulume na mukashi abitungu bekitshishene myanda na kifulo na kaneemo. (Ef. 5:33) Bible etulongyesha’shi, abitungu twikale atupaana ngofu pe kupebwa. (Bik. 20:35) Eyikashi kinyi adikwasha bena eyibakishi bwa kwileshena kifulo na kaneemo? Nyi kwiyisha. Kwiyisha nkukwashe mayibakishi ebungi a bena Kidishitu bwa kupeta muloo mu mayibakishi aabo. Bu kileshesho, ungi mulume abetaminaa bu Steven amba’shi: “Su nwi kintu kimune, anwikala anufubu pamune bikishekishe nsaa yanudi na nkalakashi. Pamutwe pa kunangushena’shi ‘nkinyi ki buwa bwande,’ onangushena’shi ‘nkinyi ki buwa bwetu?’” Mukashi aaye, Stephanie e na mweneno e mumune. Amba’shi: “Muntu su ngumune takumiina kwikale na muntu atontola naye nsaa yooso. Byabya, nsaa ayituku mwanda, atukimbaa nsulo yao. Musango umune, atwele luteko, atukimbuula, na atwiwisamba mu kalolo. Atukimbaa bya kupwa wawa mwanda kushii kwilwishena.” Ba mulume na mukashi abekala na muloo su tabeata na kineemo kikilekile. w20.07 3-4 ¶5-6

Tokulupilanga mu bukome boobe’be nabeene sunga mu ngobesha yobe nsaa y’ofubila Yehowa. Mpoolo mutumiibwa baadi mulongye bilongyelo bikata​—abaadi bamulongyeshe kwi Gamaliyele, umune a ku bakata ba bena Yunda ababaadi abanemeka ngofu mu aa mafuku. (Bik. 5:34; 22:3) Mpoolo baadi na muulo ngofu munkatshi mwa bakwabo bena Yunda. (Bik. 26:4) Anka Mpoolo tabaadi mwikulupile nya. Mpoolo baadi na muloo wakuleka byooso bibaadi bimwikashe na muulo ukata pa nsenga. (Fid. 3:8) Mpoolo baadi mupete nkalakashi ibungi p’aaye kufika mwina Kidishitu. Abaadi bamushikwe kwi mwilo waye. (Bik. 23:12-14) Abaadi bamukupile na kumwela mu lukano kwi bakwabo bena Looma. (Bik. 16:19-24, 37) Baadi dingi mumone’shi kukutwa kwaye kwa kupwidika kubaadi akumukutshishwa kukita bibuwa. (Lom. 7:21-25) Sunga mbyabya, tabaadi mulekye kulonda Kidishitu, kadi baadi ‘asangeela mu kubofula.’ Bwakinyi? Mwanda nsaa ibaadi mubofule, nyi ibaadi amono bukwashi bw’Efile Mukulu mu muwa waye.​—2 Kod. 4:7; 12:10. w20.07 16 ¶7-8

Lelo uno, abitungu tutuule binangu byetu ku mudimo wa kulungula mukandu wibuwa wa Bufumu. Yesu baadi mutemukye’shi uno mudimo, balongi baye abakatungunuka na kwiukita kunyima kwa lufu lwaye kukila bibaadi mwiukite. Aye basanguka, Yesu baadi mukite kilengyeleshi na aye nkunkwasha bamo ba ku balongi baye bwabadya kukwata mishipa ibungi. Kunyima kwaye kukita kyakya kilengyeleshi, Yesu baadi mushimikye kasele’shi mudimo wa kulungula na kwikasha bantu bu balongi wi na muulo kukila ingi midimo. (Yo. 21:15-17) Kumpala kwa’shi Yesu ende mwiyilu, balungwile balongi baye’shi wawa mudimo wa bu kamonyi ubababanga mu Isaleele, aukapalakana mpa na kufudile nsenga. (Bik. 1:6-8) Bipwa kunyima, Yesu baadi muleshe Yowano mutumiibwa mu kimonwa myanda aikakitshika “mwifuku dya Mwanaana.” Mu kino kimonwsa, Yowano baabi mumone mwanda wa kukanya: Ku bukunkushi bwa mwikeyilu, “mukandu wibuuwa wa looso,” ubabangile kulungulwa kwi “eumbo dyooso, kisamba, mwakulo na mwilo ooso.” (Kibaf. 1:10; 14:6) Abimweka patoka’shi, Yehowa akumiina’shi tutungunukye na kulungula mukandu wibuwa mu nsenga ishima mpa na pa ukafudila. w20.09 9 ¶5

Nshalelo a Abrahame baadi bukopo. Mukashi aaye Sara abaadi mufule, baadi nkunga. Munda mwa bipwa bibungi, abaadi abenyongola bwa uno mwanda. Nyi bwa kinyi Sara baadi mupe Abrahame mufubi aaye mukashi Hagaare, bwa’shi su bekupeta mwana. Kadi pabapetele Hagaare eyimi dya Ismaele, babangile kubepuula Sara. Mwanda ubafikile bukopo mu mushindo ubaadi Sara mubingye Hagaare. (Kib. 16:1-6) Ku nfudiilo abyooso, Sara bayimiite, na aaye nkutanda mwana, na Abrahame nkumudika bu Isaake. Abrahame baadi mufule bana baaye booso babidi, Ismaele na Isaake. Bu bibaadi Ismaele asengye Isaake, abaadi balungule Abrahame bwadya kumubinga na nyinaye. (Kib. 21:9-14) Kunyima, Yehowa baadi mutekye Abrahame bwa’shi amulambule Isaake. (Kib. 22:1, 2; Eb. 11:17-19) Mu ino myanda yooso, Abrahame baadi na kya kukulupila’shi Yehowa alombasha milayilo y’aye pabitale bana b’aye. w20.08 4 ¶9-10

Banda kunangushena muloo aukekala nao baaba abakasanguka nsaa yabalekye bu muntu bwa kala na kwikala na nshalelo mwipushene na miiya ilulame y’Efile Mukulu. Baaba abashintuluka mu wawa mushindo, abakasanguka bwa kwikala na muwa wa looso. Ku lungi lupese, baaba abakatombokyela Efile Mukulu, tabakebatadiila bwabadya kutwela na kafutakanyi mu Mpaladiiso na kulwisha butaale nya. (Yesh. 65:20; Yo. 5:28, 29) Mu Bufumu bw’Efile Mukulu, bafubi baye boso abakamono kulombana kwa mayi e mu Nkindji 10:22 aamba’shi: “Mwabi wa Yehowa nyi aupeyâ muntu bupeta, tawikalaa na twinyongoshi.” Ku bukwashi bwa kikudi kya Yehowa, bafubi baye abakekala ba mpeta mu kikudi, kwamba’shi, abakafiki nka bu Kidishitu na abende na kupwidika. (Yo. 13:15-17; Ef. 4:23) Efuku dyooso, mbidi yaabo ayinyingi, na kufika bantu be buwa. Nshalelo akekala buwa bukile!​—Yob. 33:25. w20.08 17 ¶11-12

Abitungu tutentekyeshe’shi bangi bena Kidishitu mbeatshile kitshibilo kya kwikala bukupi. Bangi bena Kidishitu be bukupi abakumiina kwibakila, anka ta mbapete muntu mulombane abadya kwiyibakishena n’aye. Bangi namu mbafwishe mwina dibaka n’abo. Sunga byekala naminyi, t’abitungu’shi bangi bena kakongye bepushe bena Kidishitu be bukupi bwakinyi ta mbebakile, sunga kwibalombwela muntu abadi balombene kwiyibakishena naaye. Byabya, su t’abatekye bukwashi, mushindo kinyi ulombene kwipusha mukwetu mulume sunga mukashi e bukupi p’abamulombwela muntu adya kwiyibakishena naaye? (1 Tim. 5:13) Bakwetu balume na bakashi be bukupi, abekala na muloo nsaa yatwibaneemeka mwanda wa ngikashi yabo ibuwa, kushi kwibapusha lusa mwanda’shi be bukupi. Pamutwe pa kwibapusha lusa, bibuwa twibatumbule bwa lulamato lwabo. Paapa, bakwetu balume na bakashi bakii bukupi, tabapusha bu’twe bakwete kwibamba’shi: ‘Ntshii neenu lukalo.’ (1 Kod. 12:21) Kadi, pamutwe pa byabya, abamono’shi tukwete kwibaneemeka na twi na muloo wa kwikala nabo mu kakongye. w20.08 29 ¶10, 14

Kunyima, Yesu badi mumwenekyele Mpoolo mutumiibwa. (1 Kod. 15:8) Mpoolo (Soolo) badi mwishinda dya ku Damase nsaa ibapushishe eyi dya Yesu kunyima kwaye kusanguka na kumumona mu kimonwa mu ntumbo mwiyilu. (Bik. 9:3-5) Mwanda wa Mpoolo aushinkamisha dingi’shi lusangukilo lwa Yesu ta mwanda wa madimi. (Bik. 26:12-15) Bangi bantu abadi baate na muulo bibadi Mpoolo mwakule, mwanda kumpala kwa’shi Yesu amumwenekyele, badi abingabinga bena Kidishitu. Kunyima kwaye kushinkamisha’shi badi musangukye, Mpoolo badi mukite mwaye moso bwa kushinkamiisha bangi bino bya binyibinyi. Badi munyingile kukupilwa, kwedibwa mu nkano na kupona na bwato, nsaa ibadi apalakasha bya binyibinyi’shi, Yesu badi mufwe, kadi asanguka. (1 Kod. 15:9-11; 2 Kod. 11:23-27) Mpoolo badi mushinkamishe’shi Yesu badi musangukye mu mushindo ubadi akyebe mpa na kufwa bwa kwakwila lukumiino lwaye. Tuno tumonyi twa kumpala t’atukukwasha bwa kushinkamisha’shi Yesu badi musangukye su? Na t’akuyingisha lukumiino lobe’shi akwikala lusangukilo? w20.12 3 ¶8-10

Twiyipushe’shi: ‘Nekalaa na kyubishi kya kutwela mu bisangilo su?’ Mu bisangilo, atupetaa bukome bwatudi n’abo lukalo bwa kutungunuka na kufubila Yehowa, na atupetaa kunyingishibwa kwi bakwetu bena Kidishitu. (Mat. 11:28) Twi kwiyipusha dingi’shi: ‘Nelongyelaa Bible efuku dyooso su?’ Su weena kifuko kyobe, wekalaa na nsaa ya kukita lulangwilo lwa mu kifuko lubingo looso su? Su tokii mushaale na kifuko kyobe, wemutule nsaa ya kwilongyela nka bu pwekalanga na kifuko kyobe su? Na dingi, okwete kukita mobe mooso bwa kulungula mukandu wibuwa na kwikasha bantu bu balongi su? Bwakinyi abintungu twiyipushe ino nkonko yooso? Bible alesha’shi, Yehowa aukaa bi mu binangu na mu mashimba etu, nyi bwakinyi abitungu twitaluule atwe banabene. (1 Mya. 28:9) Su twamona’shi kwi myanda kampanda ayitungu tushintule, abitungu tutekye Yehowa bwa’shi etukwashe twiyishintule. Ino nyi nsaa ayitungu’shi tubangye kwilumbuula bwa bitompwanga abifiki kumpala. w20.09 19 ¶19-20

Yesu baadi mutushe kileshesho bwa kulesha kilombene kukita muntu akumiina kwikala mulongi aye. Baadi mwakule pabitale muntu akyebe kwibaka nshibo na mfumu akyebe kwenda mu ngoshi. Bwa muntu akyebe kwibaka, Yesu bakwile’shi: ‘Abaadila kushaala bwa kubadika mfwalanga aitungiibwa’ bwa kutala su mulombene kupudisha lwibako; na bwa mfumu bakwile’shi: ‘abanda kushaala bwa kushingula’ su e na kilwilo kya basalayi kilombene kulwa na kutshimuna. (Luk. 14:27-32) Bi mumune, Yesu auku’shi muntu oso akyebe kwikala mulongi aye, abitungu etaluule bwa kuuka kalolo akipushisha kulonda Yesu. Bwa kano kabingilo, abitungu tunyingishe mulongi a Bible bwatudya kulonga naye lubingo loso. Bu byodi Mulongyeshi, abitungu wekale welumbuula kalolo bwa kulonga koso. Nangushena pabitale mulongi oobe a Bible na mushindo odi mulombene kumupatulwila myanda mu mushindo utookane, upelepele bwa’shi eyipushe kalolo na eyitumikile.​—Ne. 8:8; Nki. 15:28a. w20.10 7 ¶5; 8 ¶7

Mayi a Yesu ngatokane. Abitungu tulongyeshe bantu myanda ibaadi Yesu mulambukishe. Anka, tabitungu twilwankane mmwanda wi na muulo. Yesu tamwambe’shi: ‘Nwibalambukishe byooso binadi mwinufundile.’ Kadi bakwile’shi: nwibalambukishe “bya kulama [kukookyela] byooso binaadi mwinufundjile.” Bwa kukookyela eyi dya Yesu abitungu tulongyeshe mulongi etu a Bible kya kukita na bya kwibikita. (Bik. 8:31) Mushindo kinyi watudi balombene kulongyesha muntu bwa kukookyela mayi a Yesu? Nsaa yatulongo Bible na bantu, atwibalongyesha bya kukita kyakya akitutekye Efile Mukulu. Kadi, abitungu tukite bikile paapa. Abitungu tulongyeshe balongi betu ba Bible bya kutumikila byabya byabalongo mu muwa wabo. (Yo. 14:15; 1 Yo. 2:3) Ku bikitshino byetu, twi kulesha balongi ba Bible bya kutumikila bya binyibinyi byabalongo, ku kalasa na ku mudimo. Nsaa yatulongo Bible na bantu, twi balombene kuteka Yehowa bwa’shi kikudi kyaye kiselele kibakunkushe.​—Yo. 16:13. w20.11 2-3 ¶3-5

Balongi ba Yesu abafumankene na nkalakashi. Bu kileshesho, mifungofungo ya bifundwe tayibaadi ibungi nya. Ta kubaadi mikanda ayipatuula Bible bu byatudi nayo lelo uno nya. Na balongi abaadi abalambukisha bantu abakula ndimi ilekene. Sunga bibaabadi bafumanakane na ino yoso nkalakashi, bano balongi ba sha kisumi, abaadi bakite kintu kibaadi akimweka bu kishaa kukitshika. Mund’a bipwa 30, abaadi balungule mukandu wibuwa “munkatshi abipangwa byoso bii mushi mu’eyilu.” (Kol. 1:6, 23, Esambi Dipya 2015) Lelo uno, Yehowa kyatungunuka na kukunkusha mwilo waye na kwiupa bukome bwa kukita kikyebe ky’eshimba dyaye. Bwabwa bunkunkushi, abukambaa kutukila Mwiyi dyaye diyokyelwe. Mwanka, atupete mudimo wa Yesu na mudimo ubaadi mutumine balongi baye eyi’shi batungunukye na kukita. (Mat. 28:19, 20) Yehowa te na ntondo nya; baadi mupwe kutemuka’shi, uno mukandu wibuwa aukalungulwa “kwi eumbo dyoso, kisamba, mwakulo na mwilo ooso.” (Kibaf. 14:6, 7) Akumiina’shi muntu oso, apushe mukandu wibuwa wa Bufumu. w20.10 21 ¶6-8

Mfumu Daavide badi mufule “eyi dya Yehowa.” (Mis. 1:1-3) Daavide badi auku’shi Yehowa apashaa bantu beyishe, anka mushikwe basha kwitatula. Nyi bwakinyi, Daavide badi atadila Eyi dy’Efile Mukulu bwadidya kushintuula ngyelelo aye a binangu. Bafundjile’shi: “Natumbula Yehowa mwanda kwete kumpa elango. Sunga mbufuku, nnangunangu yande aindjimunâ.” (Mis. 16:7, EEM) Su twibeyishe, atutadila Eyi dy’Efile Mukulu bwadidya kushintuula binangu bi bubi kumpala kwatudya kukita myanda i bubi. Eyi dy’Efile Mukulu adikala nka bu aditulungula’shi: “Talai eshinda dyanudya kulonda. Ndjîdi.” Aditudimusha nsaa yatukyebe kupambuka bwa kwenda ku mboko ibalume sunga ku ibakashi. (Yesh. 30:21, EEM) P’atutemeesha Yehowa atupete myabi i bungi. (Yesh. 48:17) Bu kileshesho, takwi muntu afiki mu kwitupa malango bwa’shi bitukalakashe. Na atunyisha kwifubwila peepi na Yehowa mwanda atuuku’shi etwata bu bana baye badi mufule.​—Eb. 12:7. w20.11 20 ¶6-7

Bino binangu bibadi na bukitshi kwi bangi bena Kodinda. (1 Kod. 15:12) Dingi, bangi abadi abamba’shi lusangukilo ta ndwabinyi. Abadi abapwandjikisha’shi bantu balombene kwitaminyibwa bu “bafwe” mwanda wa’shi be na milwisho, sunga’shi bantu mbalombene kwibetamina bu “be na muuwa” mwanda abebafwila lusa ku milwisho yabo. Sunga bekala na kabingilo kinyi, kubepula lusangukilo akulesha’shi, lukulupilo lwa bano bantu ndwa bisumanga. Su Efile Mukulu ta badi musangule Yesu, mulambu wa nkuulo taubadya kufutshibwa na bantu abadya kwikala nka bena milwisho. Boso bashi na lukumiino mu lusangukilo, lukulupilo lwabo ndwa bisumanga. (1 Kod. 15:13-19; Eb. 9:12, 14) Mpoolo mutumiibwa badi mushikamishe’shi “Yesu badi musangukye ku lufu.” Luno lusangukilo lubadi lukile lwa bantu abadi basangukye mwanda abadi bafwe dingi. Mpoolo bakwile’shi Yesu nyi “muntu akwibedi kusanguka ku lufu.” Badi muntu a kumpala kusangulwa na mbidi ya mu kikudi na naye a kumpala kwenda mwiyilu.​—1 Kod. 15:20; Bik. 26:23; 1 Mp. 3:18, 22. w20.12 5 ¶11-12

Mu siekele a kumpala, kasaka ka bakunkushi-bakulu kabaadi ku Yeelusaleme, kabaadi akafubu mu buumune bwa’shi ta kwikalanga kafutakanyi munkatshi mwa mwilo wa Yehowa, kadi mwikale butaale. (Bik. 2:42) Bu kileshesho, pabaadi patukye mwanda wa kusadibwa pangi mu kipwa kya 49 B.B., kasaka ka bakunkushi-bakulu kabaadi kataluule uno mwanda ku bukwashi bwa kikudi kiselele. Su kakongye kabaadya kutungunuka na kwikala ketshibuule, mudimo wa kulungula mukandu wibuwa ta ubadya kwenda kalolo nya. Sunga byabaadi bena Yunda, batumiibwa na bakulu t’abaadi batadile bipikwa byabo bya bwina Yunda by’ebatakula bwa kwata bitshibilo nya. Anka abaadi bakimbuule Mwiyi dy’Efile Mukulu na kuteka bukwashi bwa kikudi kiselele bwa’shi baate kitshibilo ki buwa. (Bik. 15:1, 2, 5-20, 28) Mbipeta kinyi bibatukile? Yehowa baadi mwelele kitshibilo kyabo mwabi, kakongye nkutungunuka na kushala mu butaale na mu buumune, na mudimo wa kulungula mukandu wibuwa wayididila kumpala. (Bik. 15:30, 31; 16:5) Lelo uno, ndumbulwilo a Yehowa kwete akitshi mwaye moso bwa’shi kwikale butaale, kushi kafutakanyi mu mwilo wa Yehowa. w20.10 22-23 ¶11-12

Pa mwanda wa bununu, maladi, sunga ingi myanda, twi kukutwa kupeta mashito atukulupila. Su we mu lumune lwa ku ino nkalakashi, kileshesho kya Mfumu Davide nkilombene nkukwasha. Nsaa ibabadi ba mulungule’shi ta naye abadi basangule bwa kwibaka ntempelo a Efile Mukulu​—kintu kibadi akulupila kukita​—badi mukwatshishene n’eshimba dyoso yawa ababadi basangule bwa kukita wawa mudimo. Davide badi mpa na mutushe bya buntu bwa kukwatshishena uno mudimo. Nyi kileshesho kikile buwa kyatudya kulonda! (2 Sam. 7:12, 13; 1 Mya. 29:3-5) Pa mwanda wa maladi, ungi mukwetu abetaminaa bu Hugues a mu France, balekyele kufuba bu mukulu na tabadi sunga na bukome bwa kukita tungi tu midimo ku nshibo. Amba’shi: “Nabangile kubofula kwishimba ngofu na kwipusha bu shi na muulo. Mwenda mafuku, nabangile kumona’shi bi na muulo ndekye kwinyongola pabitale myanda ya nshi bya kukita dingi. Bino bibankwashishe bwa kwikala na muloo pabitale kyandi na mushindo wa kukita bwa kufubila Yehowa. Nka bu Gedeone na bantu baye nkama isatu abadi bapwe kukooka​—Natungunguka na kunyingila.”​—Bans. 8:4. w20.12 25 ¶14-15

Mu mukanda wadi mulonde nshalelo a Yesu, Yowano mmufubishe kishima “kufula” na “kifulo” misango ibungi kukila mu angi ma evanjile asatu. Ino mikanda ayilesha’shi abitungu kifulo kikale na bukitshishi mu byoso abikitshi bena Kidishitu. (1 Yo. 4:10, 11) Sunga byabya, bibadi byate mafuku e bungi bwa’shi Yowano alongye dino dilongyesha. Sunga pabadi mupwe kukila kipungo kya bu nsongwa, Yowano tabadi alesha kifulo nsaa yoso nya. Bu kileshesho, ungi musango, Yesu na balongi baye abadi abakatuka ku Yelusaleme, abende ku Samariya. Anka bantu ba mu kangi ka kibundji ka mu Samariya t’abadi bebakukile nya. Abalungwile Yesu su abatekye bwa’shi kaalo ka mwiyilu, kafikye kabutule ka kibundji kashima! (Luk. 9:52-56) Ungi musango, Yowano Aye na mukwabo Shake, abadi batume nyinabo bwadya nkebatekyela mbalo i na muulo mu Bufumu bwa Yesu. Nsaa ibadi bangi batumiibwa baukye kibadi Shake na Yowano bakite, abadi bafiite munda! (Mat. 20:20, 21, 24) Sunga bibadi Yowano mukite bino byoso bilubilo, Yesu badi mumufule.​—Yo. 21:7. w21.01 8-9 ¶3-4

Yehowa ataa bitshibilo bwa buwa bwa bangi. Bu kileshesho, batshile kitshibilo kya kupanga muwa, kushi bwa buwa bwaye’ye nabene nya, kadi bwa’shi atwe namu tusankye nao. Ta kwi muntu badi mutakule Yehowa bwadya kutuma Mwan’aye bwa’shi etufwile. Bebikitshine mwanda badi akumina kwitukwasha. Mpa na Yesu namu, badi aata bitshibilo bwa buwa bwa bangi. Bu kileshesho, pabadi mukokye badi mulongyeshe kibumbu kya bantu pamutw’a kwikisha. (Mak. 6:31-34) Mfumu a kifuko e buwa, auku’shi kintu ki bukopo kukita, nyi kwata bitshibilo bi buwa bwa kifuko kyaye; nyi bwakinyi abitungu ate buno bushito na muulo. Abitungu adimukile kwata bitshibilo bwat’ate. Anka atadile Yehowa bwa’shi amulongyeshe bwadya kwata bitshibilo bi buwa. (Nki. 2:6, 7) Mu uno mushindo, anangushena bya kusankisha bangi, kushi penda aye nabene. (Fid. 2:4) Su mfumu kifuko ekitshisha bwa kwambula Yehowa na Yesu Kidishitu, ekala mfumu a kifuko e buwa. w21.02 7 ¶19-21

Pabadi ki nsongwa, Mfumu Asa badi mwiyishe na munyingye eshimba. Bu kileshesho, kunyima kwaye kupyana nshaye Abiya, babangile kampanye ka kulwisha lulangwilo lwa ma nkishi. Dingi, “baalungwile beena-Yuuda bwabady’a kukimba Yehowa Efile Mukulu a baamashaabo, naa bwa kukumbasha bishila na mayi.” (2 Mya. 14:1-6) Na nsaa ibadi Zera mwina Etshopi mufikye na basalayi 1 000 000, bwa kulwa na bena Yuda, Asa balesheshe binangu pa kuteka Yehowa bukwashi. Beyayile kwi Yehowa Efile Mukulu, aye nkwamba’shi: “Yehowa, kukaash’obe takwi muntu sunga umune mulombeene kutshiba kiimu pankatshi paa eebukome na mubofule. Etukwashe, Yehowa Efile Mukulu eetu! Mwanda koodi ngi kwatudi bakulupile.” Ano mayi e buwa aalesha mushindo ubadi Asa mukulupile mu ngobesha ya Yehowa ya kwibapasha. Asa badi mukulupile mwi Nshaye e mwiyilu na, “Yehowa baatshyokwele bena Etshopi.” (2 Mya. 14:7-11) Kulwa na kino kilwilo kya basalayi 1 000 000, kubadi akutshinyisha, anka bu bibadi mukulupile mwi Yehowa, Asa badi mwi kitshimune. w21.03 5 ¶12-13

Mu Bible mwi bileshesho bya bantu bakutwe kupwidjika abadi beleshene kifulo kya bu bana na bana. Tubande kutala kileshesho kya Yonatane na Davide. Bible amba’shi: ‘Yonatane belamatshishene naa Daavide, aye nkumufula buu bi beefulanga’ye nabeene.’ (1 Sam. 18:1) Yehowa badi musangule Davide bwa kupyana mfumu Saule. Kunyima kwa byabya, Saule badi mukwatshile Davide kyutu na badi akimbi kumwipaa. Anka, Yonatane mwana a Saule tabadi mukwatshishene nshaye nsaa ibadi akyebe kwipaa Davide. Yonatane na Davide abadi belayishene’shi abalama bu kuuku bwabo, na nsaa yoso abatungunuka na kwikwashena. (1 Sam. 20:42) Kifulo kya bu bana na bana kibadi pankatshi pa Yonatane na Davide kibadi kya kukanya, mwanda kubadi myanda i bungi ibadya kwibakutshishwa kwikala ba kuuku. Bu kileshesho, Yonatane badi mukudile Davide pangi na bipwa 30. Yonatane badya kwamba’shi te na myanda i mumune na uno nsongwalume shaukile myanda i bungi. Anka, Yonatane ta badi amono Davide bu mushadile. w21.01 21-22 ¶6-7

Yesu badi mulee batumiibwa baye’shi abakekala na muloo wi bungi. Badi dingi mulungule boso bamufule’shi abakapete nkalakashi. (Mat. 10:22, 23; Luk. 6:20-23) Atupete muloo wa kwikala balongi ba Kidishitu. Anka, atupushaa naminyi nsaa y’abakyebe kwitukutshisha kufubila Yehowa kwi bena kifuko netu sunga nsaa y’abetubingabinga kwi mbulamatadi, nsaa i bena mudimo sunga bena kalasa netu abetutakula mu kukita kintu ki bubi? Kushi mpaka, ino myanda ngilombene kwitwinyongosha. Bantu be bungi t’abamonaa kubingwabingwa bu kabingilo ka kwikala na muloo. Anka, nyi akitutekye Bible’shi tukite. Bu kileshesho, mulongi Shake bafundjile’shi pamutwe pa kwikalakasha bikilekile nsaa yatudi mu nkalakashi, abitungu twikale na muloo. (Shak. 1:2, 12) Yesu bambile’shi abitungu twikale na muloo sunga bekala abetubingabinga. (Mat. 5:11) Yehowa badi muyokyele Shake bwa dya kufundila bena Kidishitu na kwi bapa malongo a ebakwasha nsaa yabapete nkalakashii. w21.02 26 ¶1-2; 27 ¶5

Mu mafuku a Timote, bangi bena Kidishitu t’abaadi abata na muulo kineemo kyabo kya kufuba pamune n’Efile Mukulu. Munkatshi mwabo mwi Demase, Figele na Elemogene, Himene, Aleksandre na Filete. (1 Tim. 1:19, 20; 2 Tim. 1:15; 2:16-18; 4:10) Bano bantu booso abaadi bafule Yehowa kumpala, anka abaadi balekye kwata na muulo bintu byabaadi bebape. Mushindo kinyi ukwete Satana kutompa kwitukutshisha kwaata na muulo bintu bitupe Yehowa? Tala imo ya ku miteo yaye. Satana kwete kufubisha bintu bya kukisha nabyo kapapi bu Televizion, ma video, Internete, bisashi, mikanda na ma jurnale mwi bintu bilombene kapelakapela kwitukutshisha bwa kufubila Yehowa na kutumikila miiya yaye. Kwete kutompa kwitutshinyisha na myanda ibubi ayitwakula bantu na kubingwabingwa bwashi tulekye kulungula mukandu wibuwa. Na dingi, kwete kwitutakula bwa’shi tulonde “kyuukilo kya-madimi” kya bantu basumbule lukumiino bwa’shi tulekye kufubila Efile Mukulu. Su ta twibadimukye, twi balombene kwenda na kuleka kufubila Yehowa kapelakapela.​—1 Tim. 6:21. w20.09 27 ¶6-8

Kwi kuuku sunga mwina kifuko mu kutape kwishimba su? Su mbyabya, kintu kilombene nkukwasha, nkulonga bibakitshine Mfumu Davide nsaa ibadi mwan’aye Absalome. (2 Sam. 15:5-14, 31; 18:6-14) Na mwisambo mu binangu, lungula Yehowa mushindo opusha pabitale byabadi bakulwishishe. (Mis. 6:6-8) Binobino, pwandjikisha mushindo ubadi ulombene kupusha Davide bwa bino byoso bibadi bimufikile. Badi mufule Absalome na mukulupile Ayitofele. Anka, boso abadi bamulwishishe. Abadi benyongoshe Davide ngofu, abo nkukimba mpa na kumwipaa. Davide badi mulombene kupela kukulupila bangi ba kuuku baye na kupwandjikisha’shi, nabo namu mbekwatene na Absalome. Badya kukimba kwipasha nka aye nabene na kukimba kusuka bupenka bwaye. Sunga kubofula kwishimba mususa umune. Anka, batekyele bukwashi kwi Yehowa. Na dingi, batekyele mpa na bukwashi kwi ba kuuku baye. Na musango umune, aye nkutumikila bitshibilo bibadi mwate. Batungunukile na kukulupila mwi Yehowa na kukulupila ba kuuku baye. w21.03 15 ¶7-8; 17 ¶10-11