Mueshi wa 7

Abitungu twikale ba kuuku ba Yesu bwa’shi tupete ngaluulo ku nteko yetu. Bino abilesha’shi abitungu tukite bibungi kukila penda kwakula’shi: “Mwishina dya Yesu” kunfudjilo kwa nteko yetu. Abitungu twiukye’shi Yehowa afubishaa Yesu bwa kwaluula nteko yetu. Yesu balungwile balongi baye’shi: “Kyooso kyaanutekye mwishina dyande, neenukitshina.” (Yo. 14:13) Yehowa nyi apushaa na kwaluula nteko yetu, anka, mmupe Yesu matalwa akukumbasha bitshibilo Byaye. Kumpala kwa’shi Efile Mukulu aluule nteko yetu, abaanda kutala su tukwete kutumikila elango dya Yesu. Bu kileshesho, Yesu bakwile’shi: “Su anulekyela bantu bito byaabo, nsheenu ee mwiyilu eenulekyela namu; anka su nwapela kulekyela bantu bito byaabo, Nsheenu naamu teenulekyela byeenu bito nya.” (Mat. 6:14, 15) Byabya, mushindo watukitshina bangi myanda wi na muulo, mwanda nyi mushindo wabetukitshina namu myanda kwi Yehowa na Yesu. w20.04 22 ¶6

Mpoolo mutumiibwa baadi atundula akisankisha bantu abamutemesha na kushintuula mishindo ya kubanga mwisambo. Bu kileshesho, kisaka kya bantu kibaadi mwisambe nakyo mu Listre takibaadi akiuku bifundwe nya. Mpoolo baadi mwisambe nabo mu mushindo wabadya kupusha. Badi mwakwile byumbulwanga na bya kwikala na muloo. Baadi mwakule myanda na kutusha bileshesho bibaabadi abeuku kalolo kwi bantu abaadi abamuteemesha. Ikala na kapatupatu bwa kutundula akisankisha bantu ba mu teritware na kushintula mushindo wa kubanga mwisambo. Nsaa yofiki kwi muntu sunga yotwele mu lupango lwaye, we kutundula myanda ayimusankisha naminyi? Ikala na kabekyeleshi. Pangi kwete ku lumbula mu lupango, abadika mukanda, alumbula nkinga, sunga’shi kwete kukita ungi mudimo. Byabya byakitshi, bi nkukwasha bwa kubanga naye mwisambo. (Yo. 4:7) Sunga bilamba byadi mufwale, bi nkulesha kyadi​—pangi abilesha eumbo dyaye, mudimo wakitaa, sunga kisaka kya maasha kyadi mufule. w20.04 11 ¶11-12

Mwanda wa kenyongoshi kakilekile, bangi bakwetu balume na bakashi abepushaa bi bubi nsaa yabaadi na bantu. Abibelelaa bukopo bwa kwikala mu kisaka kya bantu, anka bakwete kutungunuka na kutwela mu bisangilo sunga mu bikongeno. Abibelela bukopo bwa kwisamba na bantu benyi, kadi abesambaa na bantu mu bulungudi. Su we na luno lukalakashi, ikala mushinkamishe’shi twe bupenka nya. Bangi bakwete kwipusha nka bu’be. Tentekyesha’shi Yehowa asangeela kwitatshisha k’obe koso. Bubyodi nka munyigiile, abilesha’shi Yehowa kwete nkwelela myabi nankupa bukome bodi n’abo lukalo. (Fid. 4:6, 7) Su okwete kufubila Yehowa na kunyingiila nkalakashi sunga kubofula kwa mu binangu, ikala mu shinkamishe’shi okwete kusankisha Yehowa. Bebungi bakwatudi tabenkala na mbidi bukome nya, kadi bakwete kunyingiila. (2 Kod. 4:16) Na bukwashi bwa Yehowa, atusuuku lubilo mpaana kufudilo! w20.04 31 ¶20-21

Patutala kipaso kyadi mupangye nsenga, abilesha patooka’shi Efile Mukulu nyi sha binangu. (Eb. 3:4) Planète eetu mmwilekene na angi, mwanda e na bintu byoso abikwasha muntu bwa’shi ekale na muwa. Ku lungi lupese, nsenga i nka bu mashuwa e pa meema a kalunga. Kadi kwi kwilekena kukata pankatshi pa mashuwa a meema abadi bakite kwi bana ba bantu, na nsenga yetu. Bu kileshesho, su bibadya kwikala’shi bantu be mu mashuwa a meema abetuushishaa oxygène, bidibwa, na meema, na’shi tabakwete kusumbula butshaafu mu mashuwa, abadya kwikala na muwa munda mwa mafuku anga? Bantu be mu aa mashuwa be kufwa kushii kwisha. Mu kwilekena na byabya, nsenga ngitwale midiyo na midiyo ya bipangwa bi na muwa. Ikwete kutuusha oxygène, bidibwa, na meema, na tabikwete kupwa nya. Sunga’shi butshafu boso bwi nka pa nsenga; ikii nka buwa bwa’shi bantu bemushala. Bwa kinyi byabya? Yehowa mmupangye nsenga na ngobesha ya kwisuula. w20.05 20 ¶3-4

Satana baadi alungula Eeva shi Yehowa nsha madimi. Paapa Satana nkufika bu diabulu, sunga sha madimi. Eeva baadi mudimbibwe; aye nkukumiina bibaadi bimulungule Satana. (1 Tim. 2:14) Aye kukulupila Satana kukila Yehowa. Bino bibadi bifwishe Eeva mu kwata kitshibilo kikile bubi. Batshile kitshibilo kya kupela kukookyela Yehowa. Aye nkudya kikuba kibaabadi bamutoshe kwi Yehowa. Kunyima bapeele Adame kipese kibashadile. (Kib. 3:6) Banda kunangushena bibaadi bilombene Eeva kulungula Satana. Pwandikisha’shi bamulungwile bino: “Ntankwiuku’mi, anka nauku Nshami, Yehowa, ne mumufule na kumukulupila. Mmupwe kwitupa bintu byooso. Bwakinyi ofiki mu kumwamba bibubi kwandi? Katuka paapa!” Yehowa badi mulombene kupusha muloo ukata pa kupusha aa mayi a mwan’aaye mukashi sha lulamato! (Nki. 27:11) Anka Eeva tabaadi na kifulo ki na lulamato kwi Yehowa nya; mpa na Adame dingi. Kukutwa kwa kifulo ki byabya bwa Nshaabo, Adame na Eeva babakutshilwe kukalwila eshina dyaaye kwi muntu edisabuula. w20.06 4 ¶10-11

Bakwetu bakashi mbalombene lutumbu bwa byooso bya bakwete kukita mu mudimo wa Yehowa. Wawa mudimo ngutale kwibaka na kulumbula Mashibo a Bufumu, kukwatshishena tusaka twa ndimi yenyi, na kukwasha ku Betele. Bakwete dingi kukwasha mu ma mbalo aatuku masaku, kwaluula mikanda yetu, kufuba bu mbala-mashinda na bu misionere. Na dingi, bakwete kukwasha balume baabo bwabadya kukumbasha mashito abaadi nao mu kakongye na mu ndubulwilo a Yehowa. Bano bakwetu balume abafubu bu “bantu [bekale] bya buntu,” bakwete kukwasha bangi ngofu. Anka kushii bukwashi bwa bakashi baabo, mbilombene kwibekela bukopo bwa kwibikita. (Ef. 4:8) Bakulu basha binangu abaukaa’shi bakwetu bakashi nyi “kilwilo kikata” kya bantu abakumiina kufuba, na ke bungi abauku kukita mudimo wa bulungudi kalolo. Na dingi, bakulu abashingula’shi bakwetu bakashi basha lulamato abaapu kukula, mbalombene kukwasha ba nsongwakashi kalolo nsaa y’abapete nkalakashi. (Tt. 2:3-5) Kushii mpaka, abitungu tufule bakwetu bakashi na kwibalesha lutumbu! w20.09 23-24 ¶13-14

Yehowa tayilwankana baaba boso bamufubile kadi babande kwimika kutwela mu bisangilo na mwilo waye nya, sunga kuluba mudimo wabadi bamukitshine. (Eb. 6:10) Mutemuki Yeeshaya mufunde kileshesho ki buwa akilesha mushindo aupasukilaa Yehowa mwilo waye. Bafundjile’shi: “Ee buu mulami a mikooko adiisha lombe lwaye lwa nyema; eeyibungu na mboko yaaye; atwala twana twa mikooko mu kyaadi kyaaye.” (Yesh. 40:11) Yehowa, Mulami a mikooko Mukata apushaa naminyi nsaa i umune wa ku mikooko yaaye awende kula na lombe? Yesu baadi muleshe byapushaa nsaa ibaadi mwipushe balongi baye’shi: “Anumono naminyi? Su muntu ee na mikooko lukama, dingi su umune wa ku yanka wapambuka, taakalekye ingi makumi kitema na kitema mu mwengye, bwa kwenda mu kukimba wawa upambukye su? Byabya, su akeusangana, eyendo neenushikwila’shi eeusangeela kukila yaaya makumi kitema na kitema ishii-ipambukye.”​—Mat. 18:12, 13. w20.06 19-20 ¶8-9

Nyi nkineemo kikata kya kufubila Yehowa mu mushindo ooso watudi balombene kumufubila. (Mis. 27:4; 84:11) Su mukwetu mulume akumiina kukita bibungi mu mufubo wa Yehowa, nyi mwanda wibuwa. Byabya, nsaa y’apete bushito kampanda, tabitungu eate na kineemo kikilekile. (Luk. 17:7-10) Kepatshila kaye akatungu kekale ka kufubila bangi na kwiyisha kooso. (2 Kod. 12:15) Mu Bible mwi bileshesho abitudimusha bya bantu abaadi abeata na kineemo kikilekile. Kushi kwiyisha, Dyotrefese baadi akimbi “kwikala pa nundu pa boso” mu kakongye. (3 Yo. 9, EEM) Na kwitatula kooso, Ozyase baadi akyebe kukita mudimo wabashi bamupe kwi Yehowa. (2 Mya. 26:16-21) Absalome baadi akimbi mbufyefye’shi bantu bamulonde, mwanda baadi akimbi kwikala bu nfumu. (2 Sam. 15:2-6) Nka bu abilesha ino miisambo ya mu Bible, Yehowa takumiinaa bantu abakimbi nkumo yabo’bo banabeene. (Nki. 25:27) Na dingi, bantu basha kwitatula na abakimbi’shi bantu bebatumbishe, abapetaa nkalakashi.​—Nki. 16:18. w20.07 4 ¶7-8

Bingi bifuko bya bena Kidishitu mbifilukye kwabo byenda mu dingi eumbo mu kushaala sunga kukimba mudimo. Byabya, bana babo abalongo kalaasa mu ludimi lwa dyadya eumbo. Baledi baabo abakumiina kulonga ludimi lwa dyadya eumbo bwabadya kupeta mudimo. Byabya, bekukita kinyi su mwekala kakongye sunga kasaka ka mu ludimi lwabo? Bena kifuko be kutwela bisangilo mu kakongye nkinyi? Bekutwela mu kakongye ka ludimi lwa dyadya eumbo, su nka ludimi lwabo? Nfumu a kifuko mmulombene kwata kitshibilo pabitale kakongye kabadya kutwela na kifuko kyaye. Mwanda, uno mmwanda wibatale abo banabene, abitungu aate kitshibilo kibuwa bwa kifuko kyaye. Abitungu tuneemekye kitshibilo kya nfumu a kifuko. Kyoso kitshibilo kyata, twikikumineyi na tukukile kifuko na twikileshe kifulo mu kakongye.​—Lom. 15:7. w20.08 30 ¶17-18

Su atukumiina kupeta bukome bwa Yehowa, t’abitungu tupwandjikishe’shi bukome, tulasa twatudi balongye, eumbo dyetu, sunga bupeta bwatudi n’aabo nyi abwitwikasha na muulo nya. Bino bintu ta nyi abitakula Yehowa bwa kwitufubisha. Bafubi ba Yehowa bebungi lelo uno ta “baa-sha-binangu ku meeso a bantu, sunga baa-sha bukome beebungi, sunga bantu ba mu bifuko bineeme.” (1 Kod. 1:26) Sunga twe na bino bintu byatudi bateemune ku mbangilo kwa kino kikoso, we kutungunuka na kufubila Yehowa. Anka mona nshalelo oobe mu mushindo wibuwa, wakumona bukome bwa Yehowa. Bu kileshesho, su opusha moo wa bantu abakimbi kutwesha mpaka mwishimba dyobe pabitale myanda yodi mukumiine, teka Yehowa bwa’shi akupe eshimba dinyingye nsaa ywakwila myanda yodi mukumiine. (Ef. 6:19, 20) Su okwete kulwa na mukumbo ush’aupu, teka Yehowa bwa’shi akupe bukome bodya kutungunuka na ku mufubila muyile ngobesha yoobe. Nsaa yooso yomono abikukwasha Yehowa, lukumiino loobe alutama, na byabya abikupa bukome. w20.07 16 ¶9

Su twatula Bufumu bw’Efile Mukulu pa mbalo ya kumpala mu muwa wetu, atwikala nka bu Abrahame baadi mukumiine kwisumina ingi myanda bwa kusankisha Efile Mukulu. (Mak. 10:28-30; Eb. 11:8-10) Topwandikishanga’shi topete nkalakashi. Sunga booso abafubila Yehowa mu muwa w’abo ooso abapete nkalakashi. (Shak. 1:2; 1 Mp. 5:9) Lelo uno, twi na tubingilo twi bungi twa kutuula binangu byetu ku myanda i kumpala. Myanda ikwete kukitshika lelo uno, ayilesha patoka’shi twi ku nfudiilo kwa mafuku a ku nfudiilo kwa uno ndumbulwilo. Kimune kya ku bintu byatutengyela akitwikasha na muloo mu Bukunkushi bw’Efile Mukulu, nyi nkukemonena na bakwetu batudi bafule p’abakasanguka. Mu aa mafuku, Yehowa akafutu Abrahame bwa lukumiino na lwishinko lwaye, pa kumusangula na kifuko kyaaye. Okekala panka bwa kwibakukila su? Oolo, we mulombene nka su okumiina kwisumina ingi myanda bwa Bufumu bwa Yehowa, oshaala na lukumiino sunga opeta nkalakashi, na su olonga bya kwindjila Yehowa na lwishinko bu Abrahame.​—Mik. 7:7. w20.08 5-6 ¶13-14; 7 ¶17

Atuuku’shi sunga beshikwanyi netu betwipaa, Yehowa aketusangula. Twi bashinkamishe’shi, takwi kintu sunga nkimune kyabadya kukita kilombene kulwisha kipwano kyetu na Yehowa. (Lom. 8:35-39) Yehowa mmuleshe’shi e na binangu pa kwitupa lukulupilo lwa lusangukilo! Ku bukwashi bwa lusangukilo, mmulwishe kimune kya ku bina ngoshi bikata bya Satana na kwitupa eshimba dinyingye ngofu. Su beshikwanyi ba Yehowa bakulungula’shi abakyebe nkwipaa, wekala na lukulupilo’shi Yehowa akakusangula su? We kuuka naminyi’shi okulupila mwi Yehowa yaya nsaa? Kya kumpala, eyipushe’shi: ‘Bitshibilo byangataa efuku dyoso sunga byekala bipeela, abilesha’shi ne mukulupile mwi Yehowa su?’ (Luk. 16:10) We kwiyipusha dingi’shi: ‘Nshalelo aande alesha’shi ne mukulupile mu mulayilo wa Yehowa wa kulombasha nkalo yande ya ku mbidi su natuula Bufumu bwaye pa mbalo ya kumpala su?’ (Mat. 6:31-33) Su lwaluulo ku ino nkonko lwi’shi oolo, byabya abilesha’shi we mukulupile mwi Yehowa, na wekala mwilumbuule bwa kukambila lukalakashi looso lofumankana nalo.​—Nki. 3:5, 6. w20.08 17-18 ¶15-16

Abitungu musalayi ekale alongo bwa kwiubidishena na bina ngoshi byaye. Bwa kwiuka bya kwibifubisha kalolo, abitungu ebilongye efuku dyooso. Natwe namu, abitungu tuukye bya kufubisha Eyi dy’Efile Mukulu kalolo. Twi balombene kulonga ingi mishindo ya kufubisha Eyi dy’Efile Mukulu mu bisangilo byetu. Bwa kushinkamisha bangi’shi bya binyibinyi bi mu Bible bii na muulo, abitungu twikale na kyubishi kya kwilongyela Bible efuku dyooso. Abitungu tufubishe Eyi dy’Efile Mukulu, bwa kunyingisha lukumiino lwetu. Bino t’abitekye nka penda kubadika Bible bisumanga nya. Bino abitutekye kunangushena pa bya tubadika, na kukimbuula mu mikanda yetu bwa’shi tupushe bifundwe kalolo na kwibitumikila. (1 Tim. 4:13-15) Paapa atwikala na mushindo wa kufubisha Eyi dy’Efile Mukulu bwa kulongyesha bangi. Na dingi, bino t’abipushisha nka penda kwibabadikila bifundwe nya. Abitungu kwibakwasha bwabadya kwibipusha kalolo, na kwibalesha mushindo wabidi bibatale. Nsaa y’atwilongyela Bible efuku dyooso, atufiki balongyeshi b’Eyi dy’Efile Mukulu bebuwa.​—2 Tim. 3:16, 17. w20.09 28 ¶12

Twi balombene kutuula mudimo wa bulungudi pa mbalo ya kumpala, nka su atunangushena pabitale kipaso kikwete Yehowa kwitukwasha. Bu kileshesho, kwete kwitupa byakudya bya mu kikudi bibungi bi mu mikanda, bya kwela mu ma telefone sunga mu ma tablette etu, misambo, ma video na Televizion a JW. Banda kunangushena pabitale site etu mukata a jw.org, mbintu bi mwanka bi mu ndimi ikile pa 1 000! (Mat. 24:45-47) Ungi mushindo watudya kutuula mudimo wa bulungudi pa mbalo ya kumpala, nyi pa kwambula kileshesho kya Yesu. Tabaadi mutadile kintu su nkimune bwakidya kumukutshisha kulungula mukandu wibuwa. (Yo. 18:37) Tabaadi mukumine nsaa ibaadi Satana akyebe kumupa “mafumu ooso a pa nsenga ishima na ntumbo yaao,” sunga kukumiina nsaa ibaadi bangi abakyebe kumwikasha bu nfumu. (Mat. 4:8, 9; Yo. 6:15) Tabaadi mutadiile lwabi lwa kupeta bupeta bwi bungi sunga kubingwabingwa kwi bukopo bwakudya kumukutshishwa kulungula mukandu wibuwa. (Luk. 9:58; Yo. 8:59) Nsaa ayitompibwa lukumiino lwetu, bibuwa tutentekyeshe elango dya Mpoolo mutumiibwa di mu kifundwe kyetu kya lelo. w20.09 9-10 ¶6-7

Twi na muloo wi bungi wa kwikala na bakwetu bakashi abafubu ngofu mu kakongye! Abatusha ngaluulo ibuwa mu bisangilo, na kulungula mukandu wibuwa. Bangi abakwasha mu kulumbuula Mashibo a Bufumu na kupasukila bakwetu balume na bakashi. Kushi mpaka, bakwete kupeta nkalakashi. Bangi bakwete kupasukila baledi baabo abapu kukula. Bangi naamu abanyingila mushikwa wa bena kifuko naabo. Bangi bakwetu bakashi abakusha bana baabo abo banabene, na bakwete kufuba ngofu bwa kulombasha nkalo yabo. Bwakinyi abitungu tunyingishe bakwetu bakashi? Mwanda mu uno ndumbulwilo tabakwete kwibapa kineemo kibalombene nya. Anka, Bible etunyingisha bwa kwi bakwasha. Bu kileshesho, Mpoolo mutumiibwa baadi mutekye kakongye ka mu Looma bwa kadya kukukila Febee na ‘kumukwasha mu myanda yooso.’ (Lom. 16:1, 2) Mpoolo baadi mu kisaka kya bantu bashi baadi abaata bana bakashi na muulo. Anka, kunyima kwaye kufika mwina Kidishitu, Mpoolo baadi mwambule Yesu, na kubanga kuneemeka bana bakashi na kwibakitshina myanda na kalolo. w20.09 20 ¶1-2

Tukwashe balongi betu ba Bible bwa’shi bekale na lukalo lwa kulungula mukandu wibuwa we mulombene kwela mulongi obe a Bible nkonko bu ino: “Kukumiina mukandu wa Bufumu, nkulumbuule nshalelo obe naminyi? Wele binangu’shi kwi bangi be na lukalo lwa kupusha uno mukandu? Nkinyi kyodya kukita bwa kwibakwasha?” (Nki. 3:27; Mat. 9:37, 38) Tentekyesha’shi, Yesu baadi mwitutumine eyi dya kulongyesha bangi bwa “kulama [kukookyela] byooso” byadi mwitulambukishe. Kushi mpaka, mwanka mwi miiya ibidi ikata kufula Efile Mukulu na kufula muntu nobe yoso ngipushe na mudimo wa kulungula mukandu wibuwa na kwikasha bantu bu balongi. (Mat. 22:37-39) Kabingilo kakata aketutakula bwa kulungula mukandu wibuwa nyi kifulo​—kifulo kyetu bwa Yehowa na bwa bantu. Eyendo’shi, bwa bangi balongi ba Bible, kulungula mukandu wibuwa kwi kwibapushisha moo. Anka abitungu kwi bashinkamisha’shi Yehowa akebakwasha ku kapelekapela bwa kukambila moo wa bantu.​—Mis. 18:2-4; Nki. 29:25. w20.11 3 ¶6-8

Nsaa yw’elumbuula, teka Yehowa pabitale mulongi obe a Bible na pabitale nkalo yaye. Teka Yehowa bwa’shi akukwashe olongyeshe Bible mu mushindo aukumu eshimba dya muntu. Uuka’shi kabingilo kobe nka kumukwasha bwa’shi abatshishibwe. Abitungu mulongi a Bible ekale esamba na Yehowa. Naminyi? Pa kumuteemesha na pa kwisamba naye. Ateemesha Efile Mukulu pa kwibadikila Bible efuku dyoso. (Yos. 1:8; Mis. 1:1-3) Mulombene kwisamba na Yehowa pa kumuteka efuku dyoso. Ku mbangilo na ku nfudiilo kwa kulonga koso, ekala otekye n’eshimba dyobe dyoso na ekala otemuna mulongi obe a Bible mu yaya nteko. P’apusha nteko yobe, alongo byadya kwikala atekye Yehowa n’eshimba dyoso mwishina dya Yesu Kidishitu. (Mat. 6:9; Bik. 15:16) Banda kunangushena kubadika Bible efuku dyoso (kuteemesha Yehowa) na kuteka (kwisamba naye) byabidi bilombene kukwasha mulongi a Bible bwa kwifubwila peepi na Yehowa!​—Shak. 4:8. w20.10 8 ¶8; 9 ¶10-11

Ndumbulwilo a Yehowa kwete kufuba ngofu lelo uno bwa’shi tukongye twa bena Kidishitu twikale mu butaale kushii mu kafutakanyi nka bibaadi bena Kidishitu ba mu siekele a kumpala. (Bik. 16:4, 5) Bu kileshesho, su okatwela mu kangi kakongye bwa kulonda kulonga kwa Kitenta kya Mulami​—byabikala mwiumbo dyobe sunga mu dingi eumbo, ouku mushindo wabe kikunkusha na mwisambo wa kulonga lwalwa lubingo. Yaya nsaa wepusha nka bu e mu kakongye kenu! Nka penda kikudi ky’Efile Mukulu nyi kilombene kwikasha buno buumune! (Sef. 3:9) Kyodya kukita. Eyipushe’shi: ‘Nakwatshishenaa buumune na butaale bwa kakongye su? Nakookyelaa baba bakwete kwikakunkusha? Bangi mbalombene kunkulupila, bikishekishe su ne na mashito mu kakongye? Nekadikaa pa nsaa, kukwasha bangi, na kwikala na bukidi bwa kufuba su?’ (Shak. 3:17) Su omono’shi kwi mbalo yodi mulombene kulumbuula, teka bukwashi bwa kikudi kiselele. P’onyisha kutadila kikudi kiselele bwakidya kwikala na bukitshishi mu nshalelo na mu bikitshino byobe, bakwetu balume na bakashi abanyisha nkufula na nkwata na muulo. w20.10 23 ¶12-13

Eyi dy’Efile Mukulu di nka bu lumweno. (Shak. 1:23-25) Be bungi bakwatudi, abetalaa mu lumweno kumpala kwabadya kutuka. Bino abitukwasha bwa kumona su kwi mbalo ayitungu’shi tulumbuule kumpala kwa’shi bangi beyimone. Mu mushindo umune, nsaa yatubadika Bible efuku dyoso, twi kumona mishindo i bungi yatudi balombene kushintula ngyelelo etu a binangu na bikitshino byetu. Be bungi abamonaa’shi, bi buwa kubadika kifundwe kya kwifuku nakashika oso kumpala kwa kuutuka. Abatadila bibabadika bwabidya kwikala na bukitshishi mu ngyelelo abo a binangu. Paapa, munkatshi mwa dyadya efuku dyoso, abakimbi mishindo yabadi balombene kufubisha dyadya elango dya mu Bible. Na dingi, abitungu twikale na programe akwibadikila efuku dyoso na kunangushena byabya bibatubadika Mwiyi dy’Efile Mukulu. Bino ta mbibofule nya, anka kino nyi kimune kya ku bintu abintungu’shi tukite bwa kutambukila mu kashinda kapela akatwala ku muwa wa loso. Eyi dy’Efile Mukulu di nka bu kyamo kya Échographie, mwanda aditukwasha bwa kutala bi munda. Anka abitungu twikale beyishe bwa kutumikila malango e mu Bible na abetupa kwi baba abetukunkusha. w20.11 18 ¶3; 20 ¶8

Sunga bibaabadi abakamba kubingabinga bena Kidishitu ba mu siekele a kumpala, abaadi namu bapete kipungo kya butaale. Mushindo kinyi ubaabadi bafubishe kyakya kipungo? Bano balume na bakashi basha lulamato, abaadi abalungula mukandu wibuwa na kisumi. Mwisambo wi mu Bikitshino aulesha’shi: ‘Abendanga mu kutshiina kwa Yehowa.’ Abatungunukile na kulungula mukandu wibuwa na kisumi, nyi bwakinyi ‘abendanga na kutama [ku fwima].’ Kushii mpaka, Yehowa baadi mwibelele myabi bwa kisumi kyabo mu bulungudi mu kipungo kya butaale. (Bik. 9:26-31) Bena Kidishitu ba mu siekele a kumpala, abaadi abapalakasha mukandu wibuwa nsaa yooso ibakudi mushindo. Bu kileshesho, pabaadi Mpoolo mutumiibwa mumone’shi mulombene kulungula mukandu wibuwa ngofu mu Efeso, baadi mwi mushaale bwa kwi mulungula mukandu wibuwa. (1 Kod. 16:8, 9) Balongi abaadi bafube ngofu bwa kuukisha “mukandu wibuwa w’eyi dya Yehowa.” (Bik. 15:30-35) Mbipeta kinyi bibatukile? Bi mu kifungwe kyetu kya lelo. w20.09 16 ¶6-8

Nsaa ibadi Adame mulwishe badi mwitwadile lufu aye nabene mpa na kwi lutandwa lwaye. Tukwete kutungunuka na kukyenga pa mwanda wa kukutwa kukookyela kwaye. Pa mwanda Efile Mukulu badi musangule Mwana aye, “twi balombene kwikala na lukulupilo lwi buwa bwa mafuku aafiki kwi muntu umune, [Yesu] akutuukila kusanguka kwa bafwe.” Mpoolo mutumiibwa amba dingi’shi, ‘abifu bantu boso ku mwanda wa Adame, boso abapete muwa mwi Kidishitu.’ (1 Kod. 15:22) Mpoolo badi akyebe kwakula kinyi nsaa ibakwile’shi “bantu boso abafu ku mwanda wa Adame”? Mpoolo badi akwila bantu boso bapyane milwisho na kukutwa kupwidika kwi Adame na bakwete kufwa. (Lom. 5:12) Adame te munkatshi mwa bano “bantu abakasanguka.” Mulambu wa nkuulo wa Kidishitu ta umubwikile mwanda Adame badi muntu mupwidikye badi musangule bwa kukutwa kukookyela Efile Mukulu. Kyakya akikakitshikila Adame kimumune na kyakya akikakitshikila baba boso babakatshibila kiimu kwi “Mwana a Muntu” bu “mbushi,” kwamba shi “lufu lwa ikalayika.”​—Mat. 25:31-33, 46; Eb. 5:9. w20.12 5 ¶13-14

Su tatwibapete mashito atukulupila, tunangushene ku bileshesho byaba mikeyilu ba sha lulamato. Mu kumunana kwa Mfumu Akabe, Yehowa badi mutekye ba mikeyilu pabitale bya kudimba yawa mfumu e bubi. Ba mikeyilu be bungi abatushishe binangu byabyo. Anka Yehowa basangwile mwikeyilu umune na amulungula’shi binangu byaye bi buwa. (1 Bf. 22:19-22) Ba mikeyilu basha lulamato, abadi babofule ku mashimba pa kwiyipusha’shi ‘Bwakinyi nalwisha nsaa yande?’ Ta kwi kabingilo su nkamune ka kwibishinkamisha. Ba mikeyilu mbeyishe ngofu na abakumiina’shi ntumbo yoso yende kwi Yehowa. (Bans. 13:16-18; Kibaf. 19:10) Tutentekyeshe’shi kinemo kikata kyatudi nakyo, nkya kwila ba Temwe ba Yehowa na kulungula pabitale Bufumu bwaye. Mashito ta nao aetwikasha na muulo kumpala kw’Efile Mukulu. Kadi, nsaa yatudi beyishe, atwikala na muulo ku meso kwa Yehowa na kwa bakwetu balume. Byabya esendele Yehowa bwa’shi akukwashe wekale nka mwiyishe. Nangushena ngofu pabitale bileshesho byoso bi buwa bi mu Bible bya bafubi ba Yehowa. Kita mobe moso bwa kukwasha bakwenu bena Kidishitu.​—1 Mp. 5:5. w20.12 26 ¶16-17

Kifulu kya kipandjilo nyi ndukulupilo lwitupe Yehowa, lukulupilo lwa’shi etupasha ku lufu na kupa boso abakitshi akikyebe eshimba dyaye bwedi. (1 Tes. 5:8; 1 Tim. 4:10; Tt. 1:1, 2) Lukulupilo lwa kipandjilo namu alukalwila ngyelelo etu a binangu. Alwitukwasha bwa kutula binangu byetu ku milayilo y’Efile Mukulu, na kwikala na mweneno e buwa pabitale nkalakashi yatudi nayo. Atufwala kino kifulu pa kumona myanda mu mushindo awiyimonaa Efile Mukulu. Bu kileshesho, t’atutulu lukulupilo lwetu ku bupeta bwa bisumanga nya, anka atwilutulu mwi Efile Mukulu. (Mis. 26:2; 104:34; 1 Tim. 6:17) Kimpulu kya kikudi nyi Eyi dy’Efile Mukulu, Bible. Kino kimpulu ki na bukome bwa kutshiba madimi a kukatusha bantu ku bupika bwa malongyesha a madimi na byubishi bi bubi. (2 Kod. 10:4, 5; 2 Tim. 3:16, 17; Eb. 4:12) Atulongo bya kufuba na kino kimpulu, nsaa y’atwilongyela na p’atupete malongyesha aafiki kwi ndumbulwilo a Efile Mukulu.​—2 Tim. 2:15. w21.03 27 ¶4; 29 ¶10-11

Sunga pabadi mu lukano mwanda wa kulungula mukandu wibuwa pabitale Yesu, Yowano mutumibua badi muleshe’shi mufule bakwabo bena Kidishitu. Bu kileshesho, bafundjile mukanda wa Kibafumbwilwe, na aye nkwiutumina tukongye bwa’shi tuukye “byabya abitungu kufika binobino.” (Kibaf. 1:1, EEM) Abimweka’shi nsaa ibabadi bamufungule ku Patmose, Yowano badi mufunde evanjile aye alondo nshalelo a Yesu na mudimo waye. Badi dingi mufunde mikanda isatu bwa kunyingisha bakwabo balume na bakashi. Mushindo kinyi odya kwambula kwipana kwa Yowano na Bintu byosangula bwa kukita mu nshalelo, mbilombene kulesha’shi we mufule bantu. Ndumbulwilo a Satana akumiina’shi okishe nsaa yobe yoso na otushe bukome bobe penda mu kwikimbila makuta na kukimba nkumo. Anka balungudi ba Bufumu ba mu nsenga ishima, bakwete kukisha nsaa yabo bwa kulungula mukandu wibuwa na kukwasha bantu bwabadya kwifubwila peepi na Yehowa. w21.01 10 ¶9-10

Yonatane badya kukwatshila Davide kyutu. Bu bibadi mwana a Mfumu Saule, badya kwamba’shi naye e na matalwa akupyana nshaye bu mfumu. (1 Sam. 20:31) Anka, Yonatane badi muntu mwiyishe na badi na lulamato kwi Yehowa. Nyi bwakinyi badi mukwatshishene mpángo ya Yehowa ya kutula Davide bu mfumu. Badi dingi na lulamato kwi Davide sunga bibabidi abifiitshisha Saule munda. (1 Sam. 20:32-34) Yonatane badi mufule Davide ngofu, nyi bwakinyi ta badi mumukwatshile kyutu. Badi kilobo kya ngoshi kinyingye eshimba na badi auku kwela buta kalolo. Bantu abadi abamba’shi aye na nshaye “mbakile bilèngalènga [koonyi ka mumba] ku lubilo” na’shi ‘mbakile ntambwe bukome.’ (2 Sam. 1:22, 23) Bino bibadya kutakula Yonatane bwa kwitumbisha bu kilobo. Mu kwilekena na byabya, Yonatane badi mukumiine Davide bwa kunyinga kwaye kw’eshimba na kukulupila kwaye mwi Yehowa. Dingi, kunyima kwa Davide kwipaa Golyate, Yonatane babangile ku mufula nka bu’ye nabane. w21.01 21 ¶6; 22 ¶8-9

Boso bena Kidishitu be ku bukunkushi bupwidjikye bwa Yesu Kidishitu. Anka nsaa ayibakilwa mukashi mwina Kidishitu, afiki ku bukunkushi bwa mulume shi mupwidjikye. Bino bi kwikala lukalakashi. Nyi bwakinyi kumpala kwa kukumina mulume, abitungu eyipushe’shi: ‘Nkinyi akilesha’shi uno mukwetu akekala mfumu a kifuko e buwa? Atulaa myanda ya mu kikudi pa mbalo ya kumpala mu muwa waye su? Su ta mbyabya, nkinyi akinshikamisha’shi akankwasha bwa kulama kipwano ki buwa na Yehowa kunyima kw’atwe kwiyibakishena?’ Anka, abitungu mukwetu mukashi eyipushe dingi’shi: ‘Ngikashi kinyi i buwa yandi nayo ayiketukwasha mwiyibakishi? Ne na lwishinko na kalolo ka kupana su? Ne na kipwano ki bukopo na Yehowa su?’ (Mul. 4:9, 12) Su mukwetu mukashi ata bitshibilo bi buwa kumpala kwa kutwela mwiyibakishi, bino abikwasha bwa’shi eyibakishi dyaye dikale na muloo. Midiyo ya bakwetu bakashi bena Kidishitu, ngikale bileshesho bi buwa pabitale kukokyela na kunemeka balume babo. Mbalombene lutumbu! w21.02 8 ¶1-2

Mu bipwa bishale’bi, balungudi bebungi bekeele baate mpángo ya kulonga lungi ludimi bwabadya kutamisha mudimo wabo wa bulungudi na kufuba mu kakongye mwabadi na lukalo lukata lwa balungudi. Kino nyi kitshibilo kyabadi baate abo banabene bwa kuyisha myanda ya Bufumu kumpala. Sunga byekala’shi abitekye bipwa bibungi bwa kwakula lwalwa ludimi kalolo, bakwete kukwasha kakongye ngofu. Ngikashi y’abo ibuwa na myanda y’abauku ikwete kunyingisha bakwetu balume na bakashi mu tukongye. Twi na muloo wibungi bwa bano bakwetu balume na bakashi bepaane! Kasaka ka bakulu ta nkalombene kupela kupa muntu mashito a bukulu sunga bu mufubi a midimo penda mwanda wa’shi t’akula kalolo ludimi lwa kakongye nya. Bakulu abataluula ngikashi ya muntu muyile abyakula bifundwe pabitale kwikala bu mukulu sunga bu mufubi a midimo kushii muyile byakula ludimi lwa kakongye.​—1 Tim. 3:1-10, 12, 13; Tt. 1:5-9. w20.08 30 ¶15-16

Bantu abapwandjikisha’shi mbalombene kwikala na muloo nka su be na mbidi bukome, makuta e bungi na muloo mu kifuko. Anka muloo ubadi Shake akwila nyi kipindji kya ku kikuba kya kikudi ky’Efile Mukulu na tautalaa nshalelo a muntu. (Nga. 5:22) Mwina Kidishitu mulombene kwikala na muloo wa binyibinyi, pa kuuka’shi asankisha Yehowa na kulonda kileshesho kya Kidishitu. (Luk. 6:22, 23; Kol. 1:10, 11) Twi kupwandjikisha muloo wetu na ludimi lwa kaalo lwi mwilampi. Ludimi lwa kaalo ndulamibwe ku lupapi sunga ku mpeshi bwa’shi lutungunukye na kutemba. Natwe namu twi kutungunuka na kwikala na muloo sunga twapeta nkalakashi i naminyi mu nshalelo etu. T’atwiushimisha nsaa yatudi na maladi sunga makuta apela. Na atwikala nka nao nsaa yabetuka kwi bantu sunga kwitukyengyesha kwi kifuko kyetu. Pamutwe pa kubofula, atwikala nka na muloo wi bungi nsaa ayikyebe beshikwanyi betu kwitushimishisha wanka. Nkalakashi yatukwete kupeta pa mwanda wa lukumino lwetu ayilesha’shi twi balongi ba Kidishitu ba binyibinyi. (Mat. 10:22; 24:9; Yo. 15:20) Nyi bwakinyi Shake bafundjile mayi a kifundwe kyetu kya lelo. w21.02 28 ¶6

Su bopete bifundwe bya mu Bible abilesha muulo wa kunying’eshimba na kukulupila mwi Yehowa, kita mobe moso bwa kwibilamiina. Bwa kwibilamiina, ebibadikye n’eyi di bukopo na kwibifunda mbalo kampanda bwa kwibitaluula nsaa yoso. Yehowa badi mulungule Yoshwa bwa kubadika mukanda wa Miiya efuku dyoso n’eyi diikye bwa kukita myanda na kinangu. Byabya bibadi abadika mu mukanda wa Miiya, bibadya dingi kumukwasha bwa’shi t’ekalanga na moo, anka bwa’shi akunkushe mwilo wa Yehowa n’eshimba dinyingye. (Yos. 1:8, 9) Mwiyi dy’Efile Mukulu, mwi ma verse e bungi alombene nkukwasha bwa kunying’eshimba mu myanda i nkwinyongosha sunga nkutshinyisha. (Mis. 27:1-3; Nki. 3:25, 26) Mu bisangilo byetu, atupete malongyesha aatukila ku miisambo y’abele, myaluulo ayitusha bakwetu na miisambo ayinyingisha y’atwisamba nabo. (Eb. 10:24, 25) Twi balombene dingi kunyingishibwa ngofu nsaa y’atulungula kuuku etu a p’eshimba a mu kakongye by’atwipusha. w21.01 6 ¶15-16

Ikala nka mwiyishe na otungunukye nka na kukulupila mwi Yehowa. P’obatshishibwa, olesha’shi we na lukumino lwi bukopo na we mukulupile mwi Yehowa. Na Yehowa e na muloo wa nkutwesha mu kifuko kyaye. Kyodi mulombene kukita binobino, nyi nkutungunuka na kumukulupila. Bi kumweka’shi mbibofule bwa kukulupila Yehowa nsaa ywata bitshibilo bi na muulo, anka we kukita kinyi ingi nsaa? Bi na muulo kukulupila mwi Yehowa nsaa yokyebe kwata bitshibilo, mpa na bitshibilo bitale bintu bya kukisha nabyo kapapi, mudimo wa ku mbidi na bingi bitshibilo bya mu nshalelo. Tokulupilanga binangu byobe’be nabene. Anka, kimba mayi a kulonda a mu Bible bwa kwata bitshibilo bi buwa, na w’eatumikile. (Nki. 3:5, 6) Su bokitshi byabya, osankisha Yehowa na bena kakongye abakunemeka. Eyendo’shi, nka’bu atwe boso, nobe namu we mukutwe kupwidjika, na ingi nsaa we mulombene kukita bilubilo. Anka, bino ta mbilombene nkukutshishwa bwa’shi w’epane ku mufubo wa Yehowa. w21.03 6 ¶14-15

Kifuko kyobe kikwete nkubingabinga mwanda okwete kufubila Yehowa su? Sunga’shi okwete kufubila Yehowa mwiumbo dyabadi bemikye ingi midimo yetu, sunga dyabadi bakandjikye yoso su? Su mbyabya, mayi e mu 2 Timote 1:12-16 na 4:6-11, 17-22, e nkunyingisha. Mpoolo mutumibwa badi mufunde ino verse pabadi mu lukano. Kumpala kodya kubadika ino verse, lungula Yehowa mwanda obe, na by’opusha pabitale wanka. Mulungule mwanda oso. Otekye’nyi Yehowa akukwashe otundule mayi a kulonda e mu mwanda ubadi ufikile Mpoolo, alombene nkukwasha bwa kumona byodya kukila na lukalakashi lodi nalo. Yehowa baadi mudimushe Mpoolo’shi abitungu kunyingiila kubinguabingua bua kuikala muina Kidishitu. (Bik. 21:11-13) Yehowa baakuashishe Mpoolo mushindo kinyi? Baadi mualuule ku nteko ya Mpoolo amupa mpa na bukome. Mpoolo baadi mushinkamishe’shi akapete efuto dia mufubo wakuete kukita. Dingi Yehowa baadi mutakule ba kuuku ba Mpoolo be na lulamato buabadia kumukuasha. w21.03 17-18 ¶14-15, 19