Mueshi wa 8

Nka penda baba be mu bu kuuku na Yesu, nyi balombene kupeta myabi ya mulambu wa nkulo. Yesu bakwile’shi mmulombene ‘kupana muwa we pa mwanda wa bakuku bee.’ (Yo. 15:13, Kilombeeno Kipya 2014) Bantu abaadi bafubile Yehowa kumpala kwa’shi Yesu afikye pa nsenga, abakalongo pabimutale na abakamufulu. Baaba balume na bakashi abakebasangula, sunga mbyabya, abitungu bakadye bu kuuku na Yesu bwa kupeta muwa wa ikalayika. (Yo. 17:3; Bik. 24:15; Eb. 11:8-12, 24-26, 31) Twi na muloo wakufuba pamune na Yesu mu mudimo wa kulungula na kulongyesha mukandu wibuwa wa Bufumu. Pa baadi pa nsenga, Yesu baadi mulongyeshi. Kashaa aluka mwiyilu bu mutwe wa kakongye, Yesu kwete kutungunuka na kukunkusha mudimo wa kulungula na kulongyesha. Kwete kumona na kusankila byokwete kwitatshisha bwa kukwasha bantu bwabadya kumuuka na kuuka Nshaye. Byabya, nka penda kubukwashi bwa Yehowa na Yesu nyi kwatudi balombene kukumbansha uno mudimo.​—Yo. 15:4. w20.04 22 ¶7-8

Ino myasu “nfumu a kuunundu” na “nfumu a kuushi” abaadi beyipe mafumu a myanda ya politike abaadi kuunundu na kuushi kw’eumbo dya Isaleele. (Nda. 10:14) Isaleele a ku mbidi kibaadi nka bu mwilo w’Efile Mukulu mpa na mu Pantekote a mu 33 bino bipungo byetu (B.B.) Kubanga nka paapa, Yehowa baadi muleshe patooka’shi balongi ba Yesu nyi batabadi bu mwilo waye. Byabya, myanda ibungi ya mu butemuki bwa Ndanyele shapitre 11 tangitale Isaleele a ku mbidi nya, kadi ngitale balongi ba Kidishitu. (Bik. 2:1-4; Lom. 9:6-8; Nga. 6:15, 16) Na myanda itale nfumu a kuunundu na a kuushi ngyende na kushintuluka mu kukila kwa bipwa. Sunga mbyabya, kwi myanda ibungi ishii ishintulukye. Wa kumpala, ba nfumu boso babidi bakwete kukyengyesha mwilo w’Efile Mukulu ngofu. Wa kabidi, kipaso kyabakyengyesha mwilo w’Efile Mukulu akilesha’shi mbashikwe Yehowa. Na wa kasatu, ba nfumu boso babidi bakwete kwipikena makome aabo. w20.05 3 ¶3-4

Yehowa akitaa bya’shi myanda ikitshikye pa kwiyikasha kyoso akitungu bwa kulombasha mpàngo yaye. Yehowa mulombene kufwisha bafubi baaye bakutwe kupwidika kyakyebe bwa kumufubila na kulombasha mpàngo yaaye. (Yesh. 64:8) Mu uno mushindo, Yehowa akumbasha mpàngo yaaye. Takwi kintu kilombene kukutshisha mpàngo yaaye bwayidya kulombana nya. (Yesh. 46:10, 11) Twi kunyisha kwikala na lutumbu bwa Nshetu e mwiyilu, pa kunangushena pabitale bintu byadi mukite na byadi mwitupe ngobesha ya kukita. Bu kileshesho, nsaa yatunangushena ku bintu bya kukanya byadi mupangye, atunyisha kutshiina Yehowa bwa midimo yaaye. (Mis. 8:4, 5) Na p’atunangushena ku bitwikashe Yehowa bwatudya kulombasha mpàngo yaaye, atutamisha kaneemo ketu bwaye. Eyendo’shi eshina Yehowa ndya kutshina ngofu! Bino mbitale mushindo wi Nshetu, byooso byadi mukite, na byooso byakakitshi.​—Mis. 89:8, 9. w20.06 9-10 ¶6-7

Oxygène nyi ndupapi lwi buwa alukwashaa bingi bipwangwa bi na muwa, mpa n’atwe bantu. Mbaleshe’shi bipangwa bii na muwa abikakaa midiyo nkama ya tone ya oxygène ku kipwa nsaa yabikwete kupuwa. Kadi, abituusha lupapi lwi butshaafu lwabetamina bu Dioxyde de carbone. Anka, bino bipangwa bi na muwa tabikwete kobesha kupwa oxygène oso nya, na atmosphère tamulwile mwanda wa lwalwa lupapi “lwibubi” lwa dioxyde de carbone nya. Bwakinyi? Mwanda Yehowa mmupangye mitshi ilekenelekene ayata dioxyde de carbone na kutuusha oxygène. Mu kwakula kwa kalolo, kwisuula kwa oxygène akushinkamisha mayi a kifundwe kyetu kya lelo. Mushindo kinyi watudi balombene kulesha lutumbu bwa nsenga na bintu byoso bi mwanka? (Mis. 115:16) Mushindo umune, ngwa kunangushena pa bintu bikite Yehowa. Kukita bino, akwitutakula mu kumutumbula efuku dyoso bwa bintu byoso byadi mwitupe. Dingi atulesha’shi twi na lutumbu bwa nsenga pa kulama mbalo yatudi i mankenda. w20.05 22 ¶5, 7

Yehowa kwete kupudisha uno mwanda wa Satana na binangu, na lwishinko, na kululama. Mmuleshe bukome bwaye bukile booso mu mishindo ikile bungi. Kifulo kyaaye nkimwenekye mu byoso byakwete kukita. (1 Yo. 4:8) Yehowa ta mukookye kutumbisha eshina dyaaye nya. Satana kwete kutungunuka na kusabuula eshina dy’Efile Mukulu lelo uno. Atakula bantu mu kwelesha mpaka’shi Efile Mukulu te na bukome, ta mululame, te na binangu, na’shi te na kifulo. Kileshesho, Satana kwete kutompa kushinkamiisha bantu’shi Yehowa ta Mupangi. Na su bantu abakumina’shi Efile Mukulu e kwanka, Satana atompo kwibatakula mu kukumina’shi Efile Mukulu na miiya Yaaye ibukopo na tayibuwa. Alongyesha mpa na bantu’shi Yehowa e na eshimba dibubi na’shi Efile Mukulu ntomboshi elaa bantu mwishiba dya kaalo. Nsaa yabakumiina aa madimi, be nka bu abakitshi kintu kya kabidi​—kupela kukumina bukunkushi bululame bwa Yehowa. Bu byabashi babande kubutala Satana, atungunuka nka na kupalakasha madimi bwa’shi olekye kufubila Yehowa. Oobesha su? w20.06 5 ¶13-15

Mu tukongye twi bungi, mwi bakwetu balume na bakashi bakwete kwitatshisha bwa kulonga ludimi lupya. Abibelela bukopo bwa kwakula byabapusha. Su twaleka kunangushena penda mu mushindo wabakula ludimi lwabalongo, atumono kifulo kyabo bwa Yehowa na lukalo lwabo lwa kumufubila. Su twamona ngikashi yabo ibuwa, atwibaneemeka ngofu. Tatwakula’shi “ntshii noobe lukalo” penda mwanda wa’shi t’abakula ludimi lwetu kalolo nya. (1 Kod. 12:21) Twi na lutumbu lukata kwi Yehowa mwanda mmupe ooso a kwatudi mbalo mu kakongye. Byatwikala bana balume sunga bana bakashi, bebakile sunga be bukupi, bakinga sunga banunu, sunga twekala atwakula ludimi kampanda kalolo sunga bibubi, twi na muulo ku meso kwa Yehowa na kwi bakwetu bena Kidishitu. (Lom. 12:4, 5; Kol. 3:10) Tutungunukyeyi na kukimbi mishindo ya kusanka na mbalo yetu mpa na ya bangi mu kakongye ka Yehowa. w20.08 31 ¶20-22

Mpoolo mutumiibwa tabaadi mulekye kulambukisha bena Ateene, sunga mbibaabadi baushe kibundji kyabo na lulangwilo lwa ma nkishi, myanda ibutete, na malongyesha a ba mpangano; dingi sunga mbibaabadi abamukaa, baadi nka ebalambukisha. Mpoolo nabene baadi mufikye mwina Kidishitu, sunga mbibaadi ‘asabuula [Efile Mukulu] kumpala, abingabinga na akayisheena.’ (1 Tim. 1:13) Nka bu bibaadi Yesu amumono bu muntu akekala mulongi aye, Mpoolo namu baadi amono bena Ateene bu bantu abakekala balongi ba Yesu. Lukulupilo lwaye talubaadi lwa bisumanga nya. (Bik. 9:13-15) Mu siekele a kumpala, bantu ba mishindo yoso abafikile balongi ba Kidishitu. Nsaa ibaadi Mpoolo mutumine bena Kidishitu ba mu Greke abaadi mu Kodinda mukanda, bambile’shi, kumpala, bangi bena kakongye abaadi ba ntomboshi sunga’shi abaadi na nshalelo ebubi bukile. Akupu balombeshe’shi: “Byaya nyi bibaadi bangi baa kwanudi. Anka, mbenusuule.” (1 Kod. 6:9-11) Bomono’shi baba bantu abaadi bashintulukye na kufika balongi ba Kidishitu su? w20.04 12 ¶15-16

T’abitungu’shi bakulu bekale na bukidi bwa kutopeka baaba abeyipusha su kufubila Yehowa kwi na muulo. Pamutwe pa kwibatopeka, bakulu abitungu betatshishe bwa kupusha bwakinyi abakula na kukita byabya. Kukita byabya akwibakwasha bwabadya kuuka Kifundwe kyabadi balombene kunyingisha nakyo yawa muntu. Mutemuki Eliya basukile Ndalamumba Yesabele. (1 Bf. 19:1-3) Baadi mupwandjikishe’shi mudimo waaye ngwa bisumanga, na aye nkuteka mpa na lufu. (1 Bf. 19:10) Pamutwe pa kutopeka Eliya, Yehowa baadi mumushinkamiishe’shi te bupenka nya, na’shi abitungu atuule lukulupilo lwaye mu bukome bw’Efile Mukulu, na kumulesha dingi’shi kukii mudimo wibungi wadya kukita. Yehowa baadi muteemeshe binangu bya Eliya na kalolo kooso aye nkumupa midimo ipya. (1 Bf. 19:11-16, 18) Bino abitulongyesha kinyi? Atwe booso, bikishekishe bakulu, abitungu bekale abakitshina mikooko myanda na kalolo kooso. Su muntu akula myanda ibubi sunga kwipusha bu abashii balombene kufwila lusa kwi Yehowa, bakulu abamuteemesha nsaa yakwete kwakula byoso bi mwishimba dyaaye. Akupu abakimbi bya kushinkamiisha mukooko ushimine’shi wi na muulo ku meso a Yehowa. w20.06 22 ¶13-14

Yehowa akumiinaa’shi twikale na muloo wa kukisha nsaa na bena kifuko n’etu na ba kuuku beetu. (Mis. 133:1) Yesu baadi na ba kuuku be buwa. (Yo. 15:15) Bible alesha myabi yatudya kupeta su twi na ba kuuku be buwa. (Nki. 18:24) Na dingi Bible etulungula’shi kwitola takwi buwa. (Nki. 18:1) Bangi abapwandjikishaa’shi Internete nyi mushindo wa kwikala na ba kuuku bebungi na wa kupela kwikala bupenka. Anka, abitungu twikale na mayele nsaa yatufubisha Internete. Bantu abakimbuula myanda mbapete’shi, bantu abakishaa nsaa ibungi mu kutala ma foto na ma komantere mu Internete, abafudiilaa mu kwinyongola na kwipusha bupenka. Bwakinyi? Kabingilo nka’shi bantu abakambaa kwela ma foto mu Internete aalesha nshaleelo aabo ebuwa, ma foto aabo ebuwa, a ba kuuku baabo, na a mbalo ebuwa abekalanga. Nsaa i muntu apwandjikisha nshalelo aaye p’amono byabya bifwatulo, mmulombene kwamba’shi nshalelo aaye mmushadile. w20.07 5-6 ¶12-13

Pusha bibaadi bileshe Kitenta kya Mulami kya 1/10/1988: “Abitungu bakulu bakumiine’shi Yesu kwete kufubisha kikudi kiselele bwa kukwasha mukulu ooso yawa, bwadya kunangushena pabitale mushindo wa kufubisha mayi a kulonda a mu Bible bwa kukwasha bakulu naaye bwabadya kwata kitshibilo ki na muulo. (Bik. 15:7-15) Kikudi kiselele akikwashaa bakulu booso, kushii penda mukulu umune.” Mukulu aneemeka bangi bakulu, t’akulaa nka nsaa yooso mu kisangilo kya bakulu nya, na kupwandjikisha’shi nka aaye mweneno nyi ebuwa. Anka, na kwiyisha kooso, atusha aaye mweneno. Atemesha kalolo ap’akula bangi bakulu. Na kii na muulo nkya’shi, atusha mayi a kulonda a mu Bible na kulonda bukunkushi bwa “mpika a lulamato na mudimukye.” (Mat. 24:45-47, NWT) Nsaa ayileshena bakulu kifulo na kineemo p’abesamba, kikudi kiselele ky’Efile Mukulu akikala n’abo, akibakunkusha bwabadya kwata bitshibilobi buwa.​—Shak. 3:17, 18. w20.08 27 ¶5-6

Beshikwanyi ba Mpoolo mutumiibwa abaadi bukome kumukila. Misango ibungi, abaadi abamukupila na kumwela mu nkano. Abaadi bakitshine Mpoolo myanda ibubi kwi bantu abaadi ba kuuku baye. Bangi bantu mu kakongye ka bena Kidishitu abaadi bamushikwe. (2 Kod. 12:11; Fid. 3:18) Mpoolo baadi mutshimune booso abaadi abalu naye. Mushindo kinyi? Baadi mutungunukye na kulungula sunga mbibaabadi abamulwisha. Baadi mutungunukye na kwikala na lulamato kwi bakwabo bena Kidishitu sunga mbibaadi bangi bamushikwe. Na mwanda wi na muulo, baadi mushaale na lulamato kwi Yehowa mpa na ku lufu lwaye. (2 Tim. 4:8) Baadi na ngobesha ya kukita bino, kushii mwanda wa’shi baadi mukulupile mu bukome bwaye nya, anka mwanda baadi mukulupile mwi Yehowa. Okwete kunyingiila mulomo, sunga mushikwa su? Kepatshila kobe ta nka kwasa muntu kampanda munôno mu mpala nya, anka nka kutwesha Eyi dy’Efile Mukulu mu binangu na mu mashimba aabo. We kulombasha kaaka kepatshila pa kukulupila Bible bwa kwaluula ku nkonko ya bantu, pa kwikala na kaneemo na kalolo kwi baba booso abakukitshina myanda ibubi, na kukitshina bantu booso bibuwa, sunga bekala beshikwanyi b’oobe.​—Mat. 5:44; 1 Mp. 3:15-17. w20.07 17-18 ¶14-15

Twi kwakula na kushinkamisha kooso’shi Yehowa mmwiyishe su? Oolo, Twibalombene kupeta kiukilo nka bibakitshine. (Mis. 18:36) Nsaa ibaadi Daavide mufunde ano mayi, abimweka’shi baadi pangi atentekyesha pabaadi Samuele mufikye kw’aabo bwa kumwela mwimu, aye baadi na kya kufika bu nfumu a Isaleele. Daavide baadi ka nsongwalume ka nfudiilo mu bana balume 8; kadi Yehowa baadi mu musangule bwa kupyana Nfumu Saule. (1 Sam. 16:1, 10-13) Daavide baadi musangeele mayi a ungi mufundji a misambo bakwile pabitale Yehowa’shi: “Ailamina muushi, bwa kumon’eyilu na nsenga. Eebwesha mubofule mupone mu nsenga, atuusha mulanda mu butete . . . bwa kumutuula pamune na baana-buwa.” (Mis. 113:6-8) Yehowa aleshaa’shi mmwiyishe mu mushindo wakitshinaa balangwidi baye bakutwe kupwidika myanda. T’akumiina penda lulangwilo lwetu nya, kadi etumonaa bu ba kuuku b’aaye. (Mis. 25:14, EEM) Bwa kwitukwasha’shi twikale n’aaye mu bu kuuku, Yehowa baadi mwate mpángo ya kutusha Mwana’aye bu mulambu bwa milwisho yetu. Yehowa nyi Efile sha lusa! w20.08 8 ¶1-3

Yehowa mmutshibe efuku na nsaa y’akabutula uno ndumbulwilo ebubi. (Mat. 24:36) Atengyela na lwishinko mpa na apakalombana yaya nsaa. E na lukalo lwa kusangula bantu, byabya e na lwishinko. (Yob. 14:14, 15) Atengyela mpa na apalombana kipungo kya kwibasangula. (Yo. 5:28) Abitungu twikale na lutumbu bwa lwishinko lwa Yehowa. Banda kunangushena: Pa mwanda wa lwishinko lwaye, bantu bebungi, mpa n’atwe, ‘twibafikye mu kwilanga.’ Yehowa akumiina’shi bantu bebungi bapete mushindo wa kwikala na muwa wa losoo. Byabya, tulesheyi’shi twi na lutumbu bwa lwishinko lwa Yehowa. Mushindo kinyi? Pa kukita mwetu moso bwa kukimba baba “be na mashimba alombane bwa muwa wa looso,” na kwibakwasha bwabadya kufula Yehowa na kumufubila. (Bik. 13:48, NWT) Paapa, abapetela bukwashi ku lwishinko lwa Yehowa nka bu’twe. w20.08 18 ¶17

Myanda ayilongo mulongi a Bible t’ayikumu penda mu binangu byaye nya, ayimukumu mpa na mwishimba dyaye. Bwakinyi? Mwanda eshimba dyetu​—adibungu nkalo yetu, byatwipusha na byatunangushena​—na aditutakula bwa kukita kintu kapanda. Yesu baadi alongyesha bantu myanda ibungi, na abaadi abakumiina kulongyela myanda kwadi. Nyi bwakinyi bantu abaadi abamulondo mwanda baadi akumu mashimba aabo. (Luk. 24:15, 27, 32) Abitungu mulongi obe a Bible amone Yehowa bu muntu a binyibinyi, na bu muntu akudya naye kipwano, amumone bu Nshaye, Efile aye na bu kuuku aye. (Mis. 25:5) Nsaa yanulongo, shimika kasele pa ngikashi y’Efile Mukulu. (Efi. 34:5, 6; 1 Mp. 5:6, 7) Mu mitwe ya mwanda yoso yanulongo, shimika kasele pa bu muntu bwa Yehowa. Kwasha mulongi obe a Bible bwadya kusankila ngikashi ya Yehowa bu kifulo, kalolo na lusa. Yesu bambile’shi: “mwiiya ukata na wa kumpala” nyi ‘nkufula Yehowa Efile Mukulu oobe.’ (Mat. 22:37, 38, Kilombeeno Kipya 2014) Kwasha mulongi obe a Bible bwadya kufula Yehowa n’eshimba dyaye dyoso. w20.10 10 ¶12

Yesu baadi aneemeka bana bakashi booso. (Yo. 4:27) Yesu baadi aneemeka ngofu bana bakashi booso babaadi abakitshi kikyebe ky’eshimba dya Nshaye. Baadi ebamono bu bakwabo bakashi na kwibaata bu ba mu kifuko kyaye kya mu kikudi nka bu bibaadi amono bana balume. (Mat. 12:50) Yesu baadi dingi kuuku abo ebuwa. Banda kutala bu kuuku bwabo na Maariya na Maata, booso bwabo abaadi pangi bukupi. (Luk. 10:38-42) Bishima na bikitshino bya Yesu bibaadi abikitshi bwa’shi bepushe kalolo. Maariya baadi mwipushe kalolo nsaa ibaadi mushale ku ngwa ya Yesu atemesha bibaadi alongyesha. Nsaa ibaadi mufiite munda mwanda Maariya tabaadi amukwasha bwa kuteeka, Maata baadi mwipushe kalolo bwa kulungula Yesu bibaadi mu binangu byaye. Yaya nsaa Yesu baadi mukwashe bano bana bakashi bwabadya kulonga myanda i na muulo. Na baadi muleshe’shi apasukila bano bana bakashi na mukwabo Laazare pa kwibatembelanga. (Yo. 12:1-3) Nyi bwakinyi, nsaa ibaadi Laazare mukumbe ngofu, Maariya na Maata abaadi abauku’shi mbalombene kuteka Yesu bukwashi.​—Yo. 11:3. w20.09 20 ¶3; 21 ¶6

Balongi ba Yesu abaadi abakulupila’shi Bufumu bw’Efile Mukulu abukyebe “kumweka binobino” bwabudya kwibekasha mu bulungatu ku bukunkushi bwa bena Looma. Atukumiina’shi Bufumu bw’Efile Mukulu bukatushe buntomboshi booso, na’shi butuule ndumbulwilo mupya a bantu abakookyela Efile Mukulu. (2 Mp. 3:13) Anka abitungu twikale na lwishinko bwa kutengyela mpa na efuku ditshibe Yehowa bwa kwibikita. Yehowa badi mupe Nowa nsaa ibungi ya kupwa bwato na ya kwikala bu “mulungudi a kululama.” (2 Mp. 2:5, Kilombeeno Kipya 2014; 1 Mp. 3:20) Yehowa baadi muteemeshe Abrahame nsaa ibaadi amweluula nkonko pabitale kitshibilo kyaye kya kubutula bantu bebubi abaadi mu Sodome na Gomoore. (Kib. 18:20-33) Munda mwa bipwa bibungi, Yehowa baadi muleshe mwilo wa Isaleele ubaadi ukutwe lulamato lwishinko mu mushindo wa kukanya. (Ne. 9:30, 31) Lelo uno, lwishinko lwa Yehowa lukwete kumweneka patoka nsaa ya kwete kupa booso abakumiina kwikala ba kuuku baye nsaa ilombane bwa’shi ‘bafikye mu kwilanga.’ (2 Mp. 3:9; Yo. 6:44; 1 Tim. 2:3, 4) Kileshesho kya Yehowa akitupa kabingilo ka kwikala na lwishinko patutungunuka na kulungula mukandu wibuwa na kulongyesha. w20.09 10 ¶8-9

Nsaa ayikasangula Yehowa bantu, akebalwisha binangu byabo, na abakamweneka’nka byabekalanga kumpala kwa kufwa. Banda kunangushena pabitale byabilesha. Yehowa mmukufule ngofu mu kipaso kyadi mulamiine na kutentekyesha mushindo oobe wa kunangushena, byopusha, ngakwilo na bikitshino byobe. Byabya nsaa yakusangula, akwalusha nka byabya bibodi kumpala. Nfumu Daavide baadi auku’shi Yehowa auku ooso a kwatudi kalolo. (Mis. 139:1-4) Atupusha naminyi nsaa yatuuku’shi Yehowa etuuku kalolo? Nsaa yatunangushena ku kipaso akituuku Yehowa kalolo, tatwi balombene kwikalakasha nya. Bwakinyi? Tentekyesha’shi Yehowa etupasukilaa. Ataa ooso a kwatudi na muulo. Auku kalolo myanda yoso yatukwete kufumankana nayo mu nshalelo eetu. Bino abitunyingisha ngofu! Tatwi balombene kupusha’shi twi bupenka nya. Nsaa yoso, Yehowa e’nka netu, na e peepi bwa kwitukwasha.​—2 Mya. 16:9. w20.08 17 ¶13-14

Yehowa ekalaa na muloo wi bungi wa kulongyesha mwilo waye. Akumiina’shi bamwiukye, ba mufule, na bekale na muwa wa loso bu bana baye ba kifulo. Bino byoso nta mbilombene kukitashika su ta kwete kwibalongyesha. (Yo. 17:3) Yehowa baadi mufubishe kakongye ka bena Kidishitu ka mu siekele a kumpala bwa kulongyesha mwilo waye. (Kol. 1:9, 10) Kikudi kiselele, akyo kikale bu “mukwashi”​—kibalayile Yesu, kibaadi dingi kikwashe balongi bikata. (Yo. 14:16) Kikudi kiselele kibakwashile balongi bwabadya kupusha Eyi dy’Efile Mukulu, na kutentekyesha myanda yoso ibambile na ibakitshine Yesu, ibabaadi bafunde kunyima mu ma Evanjile. Kino kiukilo kibaadi kinyingishe lukumiino lwa bena Kidishitu ba kumpala pamune na kifulo kyabo bw’Efile Mukulu, bwa Mwan’aye na kwifulena munkatshi mwabo. Yehowa baadi mutemukye’shi “mu mafuku a ku nfudîlo,” bantu ba bisamba byoso abakafiki ku mwengye waye wa mu kifwanyi bwa’shi ebalongyeshe mashinda aye. (Yesh. 2:2, 3) Tukwete kumona kulombana kwa bwawa butemuki. w20.10 24 ¶14-15

Nkinyi kilombene kutakula muntu bwa kupela kupusha elango di buwa dya kuuku aye? Nkwitatula. Bantu ba sha kwitatula abakumiina kupusha myanda ‘ayibasangasha ku matwi. . . . Abapele kuteemesha bya-biinyibiinyi.’ (2 Tim. 4:3, 4) Abapwandjikisha’shi ta be na lukalo lwa malango na’shi abo be na binangu na mbakile bangi bantu. Mpoolo mutumiibwa bafundjile’shi: “Su muntu kapanda eeata bu muntu mukata, aye shii kintu, eedimbi aye nabeene.” (Nga. 6:3) Mfumu Salomone badi mupushishe uno mwanda kalolo. Bafundjile’shi: “Nsongwalume e na binangu sunga ekala mulanda, mukile mfumu tádi mununu, mupatakane, shakyebânyi kupusha malango.” (Mul. 4:13, Ñono na malango) Tala kileshesho kitulekyele Mpyeele mutumiibwa nsaa ibadi Mpoolo mumupe elango munkatshi mwa bantu. (Nga. 2:11-14) Mpyele badya kukwatshila Mpoolo nsungu bwa elango dibadi mumupe na mbalo ibadi mumupele dyanka. Anka Mpyeele badi na kinangu. Tabadi mukwatshile Mpoolo nsungu sunga kutungunuka na kwibinangushena, anka badi muteemeshe elango dyaye. Mafuku kunyima, atemuna Mpoolo bu “mukwetu a kifulo.”​—2 Mp. 3:15, EEM. w20.11 21 ¶9, 11-12

Nkinyi akikamba kukwasha balongi ba Bible bwabadya kunyinga mu kikudi? Nyi nkutwela mu bisangilo byetu. Byabya byabakalongo mu bisangilo, mbilombene kwibakwasha bwa kutamisha kiukilo kyabo, lukumiino na kifulo kyabo bwa Yehowa. (Bik. 15:30-32) Dingi, mulungudi amulungula bimutakule kifulo kyaye bwa Yehowa, bwa kukookyela miiya yaye. (2 Kod. 7:1; Fid. 4:13) Nsaa y’abeukena na balungudi ba sha lulamato belekenelekene, balongi ba Bible abalongyela ku bileshesho byabo bya kutumikila mwiya wa Yesu wa kufula Efile Mukulu na muntu nabo. (Yo. 13:35; 1 Tim. 4:12) Mbalombene kumona’shi balungudi abanyingila nkalakashi imumune na yabo, nabo namu mbalombene kushintuula nshalelo abo bwa kwikala balongi ba Kidishitu. (Miy. 30:11) Muntu oso mu kakongye, e kukwasha mulongi a Bible mu mishindo ilekene bwadya kunyinga mu kikudi.​—Mat. 5:16. w20.11 5 ¶10-12

Pangi Mpoolo mutumiibwa akwila nyema ibadi mulwe nayo ku kibalo kya Efeso. (2 Kod. 1:8; 4:10; 11:23) Sunga’shi badi akwila beshikwanyi naye bena Yunda na bangi abadi nka bu “nyema i bukyelo.” (Bik. 19:26-34; 1 Kod. 16:9) Sunga byekala’shi Mpoolo badi mukyengye ngofu, batungunukile na kukulupila’shi akekala na muloo mu mafuku aafiki. (1 Kod. 15:30, 31; 2 Kod. 4:16-18) Twi mu mafuku e bubi. Bangi bena Kidishitu bakwete kwibakyengyesha kwi ba ntomboshi. Bangi mbashale mu maumbo mwi ngoshi na muwa wabo wi mmasaku. Bangi namu mbashale mu maumbo mwabadi bakandjikye mudimo wetu, sunga mbyabya, bakwete kutungunuka na kutula muwa wabo mmasaku bwa kufubila Yehowa. Byabya, bano bakwetu balume na bakashi bakwete kutungunuka na kufubila Yehowa, mbileshesho bi buwa kwatudi. Ta be na moo, mwanda abauku’shi sunga bashimisha muwa wabo binobino, Yehowa mmwibale kintu ki na muulo ukata mu mafuku aafiki. w20.12 9 ¶3-4

Todi mubofule kwishimba mwanda wa’shi bantu ba mu teritware obe tabakumiina mukandu wibuwa sunga’shi t’okwete kwibapeta ku nshibo? Su bi byabya, nkinyi kyodi mulombene kukita bwa kulama sunga kufwimisha muloo oobe? Bi na muulo kwikala na mweneno e buwa pabitale mudimo wa bulungudi. Bino abipushisha kinyi? Epaane mu kuwukisha eshina dy’Efile Mukulu na Bufumu bwaye. Yesu badi muleshe’shi bantu bapeela’nyi abakapete eshinda aditwala ku muwa. (Mat. 7:13, 14) Nsaa yatudi mu bulungudi, twi na kinemo kya kufuba pamune na Yehowa, Yesu na ba mikeyilu. (Mat. 28:19, 20; Kibaf. 14:6, 7) Yehowa akakaa bantu abakumiina kumufubila kwadi. (Yo. 6:44) Byabya, su muntu ta mukumiine mukandu wetu bwa musango wa kumpala, pangi e kwiukumiina bwa musango wa kabidi. Deborah atatupwile kutemuna amba’shi: “Kubofula kwishimba nyi muteo wi bukopo wa bakwete kufubisha kwi Satana.” Anka Yehowa e bukome kukila Satana na miteo yaye. w20.12 26 ¶18-19; 27 ¶21

Bena Kidishitu be bungi basha lulamato, abitungu bafube ngofu bwa’shi bamone bya kwikwasha na kukwasha bifuko byabo. Sunga mbyabya, bano balungudi basha lulamato bakwete kukwatshishena ndumbulwilo a Efile Mukulu mu mushindo oso wabadi balombene kwibikita. Bu kileshesho, bangi bakwete kukwasha mbalo ayituku masaku, bangi mu lwibako, na muntu oso e bya kutusha bya buntu byaye bwa kukwatshishena mudimo wa mu nsenga ishima. Abakitshi bino byoso mwanda mbafule Efile Mukulu na bantu nabo. Lubingo loso, atulesha’shi twibafule bakwetu balume na bakashi pa kutwela mu bisangilo na kwimutusha myalulo. Sunga twekala bakookye, bi buwa twende ku bisangilo. Sunga twekala bakalakashwe, bi buwa tutushe myaluulo. Na sunga twekala na myanda yetu’twe banabene, atunyingisha bangi kumpala sunga kunyima kwa bisangilo. (Eb. 10:24, 25) Twi na lutumbu lukata bwa mudimo wa bakwete kukita kwi bakwetu balume na bakashi! w21.01 10 ¶11

Bantu basha kwitatula t’abatumbulaa bangi, abakumiinaa nka’shi abo bebatumbishe. Abepwandjikisha na bangi na mbakumiine kikudi kya kwipikena. Pamutwe pa kulongyesha bangi na kwibapa mashito, muntu sha kwitatula amba’shi: “Abitungu nkite nkami nabeene, mwanda bangi tabekikitshi kalolo nya.” Muntu sha kwitatula akumiinaa kwilesha bu e na muulo kukila bangi na ekalaa na kyuutu nsaa ibangi abakitshi kintu kalolo ku mukila. Su twa tundula’shi twi na kwitatula, abitungu tutekye Yehowa n’eshimba dyetu dyooso bwa’shi ‘etupe binangu bipya’ bwa’shi tatwikalanga na kwitatula. (Lom. 12:2, EEM) Twi na lutumbu ngofu bwa kileshesho kya Yehowa! (Mis. 18:35) Tubamono mushindo wadi mukitshine bafubi baaye myanda, na atukumiina kumwambula. Na dingi, twambuleyi bileshesho bi buwa bi mu Bible bya bantu beyishe abaadi bapete kineemo kya kutambuka n’Efile Mukulu. Tutungunukyeyi na kuneemeka na kutumbisha Yehowa mwanda mbimulombene.​—Kibaf. 4:11. w20.08 13 ¶19-20

Eyibakishi, nyi kya buntu kipwidjikye ky’Efile Mukulu, anka bantu mbakutwe kupwidjika. (1 Yo. 1:8) Nyi bwakinyi Bible amba’shi bantu beyibakishene abakekala na “nkalakasho iibungi.” Yehowa akumina’shi balume bena Kidishitu bakumbashe nkalo ya mu kikudi na ya ku mbidi ya bifuko byabo. (1 Tim. 5:8) Anka sunga byabadi na bi bungi bya kukita, abitungu bakashi bena Kidishitu bebakilwe, bekale ababadika Bible efuku dyoso na kunangushena ku by’ababadika, na kuteka Yehowa n’eshimba dyabo dyoso. Bino bi kwikala bukopo. Bakashi be na bi bungi bya kukita, ta be na bukome bwa kukita ino myanda. Bwakinyi? Mwanda Yehowa akumina’shi muntu oso akwatudi atamishe na alame kipwano ki buwa naye. (Bik. 17:27) Mu kwakula kwa kalolo, abitungu mukashi akite mwaye moso bwa kukokyela na kunemeka mulume aye shi mupwidjikye. Anka, bwadya kukumbasha kalolo mudimo wabadi bamupe kwi Yehowa, abitungu mukashi apushe na akumine tubingilo twi mu Bible atulesha bwakinyi abitungu akokyele na kunemeka mulume aye. w21.02 9 ¶3, 6-7

Nkalakashi inka bu kaalo k’abafubisha bwa kupwa kyamo ki mashi. Nsaa y’abekyele mu kaalo ke bukopo akupu abekyele mu mema, kyamo akifiki bukopo ngofu. Mushindo umune, nsaa y’atunyingila nkalakashi, lukumino lwetu alunyingi ngofu. Nyi bwakinyi Shake bafundjile’shi: “Katshintshi naamu keekale kanyingye mu mifubo yeenu bwa’shi nwikale . . . bakumbane bashii kakyeshi sunga nkamune.” (Shak. 1:4) Nsaa y’atumono’shi nkalakashi anyingisha lukumino lwetu, twi balombene kwiyingila na muloo. Lumune lwa lukalakashi kukutwa kuuka kya kukita. Nsaa yatudi mu nkalakashi, bi buwa tukimbe bukwashi bwa Yehowa bwa’shi twate bitshibilo abimusankisha, abikwasha bakwetu balume na bakashi na abitukwasha bwa kulama lulamato lwetu. (Yel. 10:23) Twi na lukalo lwa kinangu bwa kuuka kya kukita na kya kwakula nsaa y’abetubingabinga. Su t’atwiuku kya kukita twi kwipusha bu ba shi na bukwashi, na twi kushimisha muloo wetu bukidibukidi. w21.02 28 ¶7-9

Yehowa mwitulekyele kileshesho. Su twa shala bamulamate, etufulu ngofu na ta kwi kintu kilombene kutshiba kino kipwano. (Lom. 8:38, 39) Kishima kya mu kina Greke kyabadi baluule bu “bikata” akilesha muntu etatshisha ngofu bwa kulesha kifulo. Ingi nsaa, abitungu “twitatshishe” bwa kulesha bakwetu balume na bakashi kifulo kya bu bana na bana. Nsaa y’abetufiitshisha munda kwi bangi, abitungu tutungunukye na ‘kwifwilena lusa ku muntu na muntu, mu kifulo; twifumbakashene sunga’shi twikitshishe bwa kulama buumune bwa kikudi abwitubungu pamune mu butaale.’ (Ef. 4:1-3) T’atukamba kumona bilubilo bya bakwetu. Anka, atukitshi mwetu moso bwa kwibamona nka abibamonaa Yehowa. (1 Sam. 16:7; Mis. 130:3) Ta mbibofule bwa kulesha bakwetu balume na bakashi kifulo kya bu bana na bana, bikishekishe nsaa y’atumono bilubilo byabo. Abimweka’shi, luno lubadi bu lukalakashi kwi bangi bena Kidishitu ba mu siekele a kumpala. Nka bu muanda wa Evodi na Syntishe. Nyi bwakinyi Mpoolo mutumibua badi mwibatekye bwabadya ‘kwipushena mu Mwanana.’​—Fid. 4:2, 3. w21.01 22-23 ¶10-11

Bantu banunu abekalaa na muloo p’abenumono anwe ba nsongwa, anufubila Yehowa na katshintshi “kaamumune” nabo! (Sef. 3:9) Mbafule katshintshi k’anufubu nako mudimo wabadi benupe. Nwi na muulo ku meso kwabo. Anwe ba nsongwalume, tanulubanga’shi Yehowa mwinufule na mwinukulupile. Badi mutemukye’shi mu mafuku a ku nfudilo, akukekala kisaka kya ba nsongwa akiketukila bwa kumufubila. (Mis. 110:1-3) Auku’shi we mumufule, na’shi okumina kumufubila mupunda ngobesha yobe. Ikala na lwishinko kodi obe nabene, na kwi bangi. Nsaa yokitshi bilubilo, kumina dilongyesha na dinyoka dy’abakupa, w’edyate bu adifiki kwi Yehowa. (Eb. 12:6) Kita mobe moso bwa kulombasha mudimo wabadi bakupe. Na dingi, mu byoso byokitshi, sankisha Nshobe e mwiyilu.​—Nki. 27:11. w21.03 7 ¶17-18

Kwi bintu bi bungi bilombene kwitubofusha kwishimba​—bingi abimweka, na bingi tabimweka. Mu bintu bilombene kwitubofusha kwishimba mwi, kukutwa kwa kupwidjika, kubofula na mukumbo. Twi balombene dingi kubofula kwishimba pa mwanda wa kukutwa kupeta mashito kampanda atukumiinanga kupeta mu ndumbulwilo a Yehowa, sunga’shi atulungula mukandu wibuwa mu teritware e bantu bash’abeukumiina. Mbibofule bwatudya kukutwa nkatshinkatshi pabitale kukutwa kwetu kwa kupwidjika na kubofula kwetu. Pa mwanda wa bino, twi kumona’shi mwanda wa milwisho yetu, Yehowa ta mulombene kwitutwesha mu nsenga ipya. Uno mweneno e bubi. Bible alesha’shi kukatusha nka Yesu, bantu boso “mbakite milwisho.” (Lom. 3:23) Anka, Yehowa t’akimbaa bilubilo byetu sunga kutengyela’shi tukite myanda mu mushindo upwidikye. Kadi nyi Nshetu sha kifulo akumiina kwitukwasha. Dingi e na lwishinko. Kwete kumona byatwitatshisha bwa kulwa na kubofula kwetu na kukambila mweneno e bubi atudi naye pabitutale, na e peepi bwa kwitukwasha.​—Lom. 7:18, 19. w20.12 22 ¶1-3

Atwe boso twi mu lwendo. Atwende na kepatshila ka kukatwela mu nsenga ipya mu bukunkushi bwa Yehowa. Efuku dyoso, tukwete kwitatshisha bwa ku twela mwishinda aditwala ku muwa. Anka bu bibaadi bibyakule Yesu, dino eshinda ndipela na ingi nsaa bi bukopo kwimutambukila. (Mat. 7:13, 14) Bu byatudi bakutwe kupwidika, mbibofule bwatudya kutuuka mu dino eshinda. (Nga. 6:1) Su atukumiina kutambukila mu kashinda kapela akatwala ku muwa, abitungu tushintule ngyelelo etu a binangu, bintu byatudi bafule na byatu’shi bafule, na bikitshino byetu. Mpoolo mutumiibwa baadi munyingishe bena Kidishitu ba mu Kodinda bwabadya kutungunuka na “kukumiina malango.” Ta mbibofule bwatudya kutaluula binangu byetu na byatupusha. Bwakinyi? Mwanda eshimba dyetu ndilamalama na mbilombene kwitwikela bukopo bwa kutundula kyaditutakula mu kukita. (Yel. 17:9) Mbibofule bwatudya kwidimba na “binangu bi bubi.” (Shak. 1:22, NWT) Nyi bwakinyi abitungu tufubishe Eyi dy’Efile Mukulu bwa kwitaluula. Eyi dy’Efile Mukulu ndilombene nkwitukwasha bwa kutundula ki munda mwetu, kwamba’shi ‘kusokola nkalo na mitentekyesho bifwame’ mu mashimba etu.​—Eb. 4:12, 13. w20.11 18 ¶1-3

Su twi beyishe na kuuka mikalo yetu, atwikala na muloo wi bungi. Bwakinyi? Su atuuku mikalo yetu, atwikala na lutumbu na muloo bwa bukwashi bwatupete kwi bangi. Tentekyesha musango ubaadi Yesu mupaashe ba shaa nsudi ekumi. Penda umune akwabadi, nyi balukile mu kutumbula Yesu mwanda baadi mumupaashe ku wawa mukumbo wibukopo​—washibaadi mulombene kwipasha. Uno muntu sha kwiyisha, baadi na lutumbu bwa bukwashi bubaadi mupete, na aye nkutumbisha Efile Mukulu. (Luk. 17:11-19) Bantu beyishe na abauku mikalo yaabo abakumiinaa kwikala pamune na bangi bantu, na kwikala n’abo bu kuuku. Bwakinyi? Abatundulaa’shi bangi bantu be na ngikashi ibuwa na abebakulupilaa. Dingi, abekalaa na muloo nsaa ibangi abakitshi mudimo wabaadi bebape kalolo, abebatumbulaa na kwi ba neemeka. w20.08 12 ¶17-18