Mueshi wa 9

Ku bukwashi bwa kikudi, Mpyeele baadi mufubishe ngakwilo mwilekene nsaa ibaadi akula myanda ya mu butemuki bwa Yowele. (Bik. 2:16, 17) Pamutwe pa kubanga’shi “kunyima kwa byabya,” Mpyeele bambile’shi: “Mu mafuku a nfudiilo”​—mu kwakula kwaye, mu mafuku a nfudiilo a myanda ya bena Yunda​—Efile Mukulu baadi na kya kupongoola kikudi “pa bipangwa byooso.” Bino abilesha’shi nkukile mafuku ebungi kumpala kwa’shi butemuki bwa Yowele bulombane. Kunyima kwa kupongoolwa kwa kikudi ky’Efile Mukulu mu siekele a kumpala, nyi kubaadi mudimo wa bulungudi ubangye kupalakana mu nsenga ishima. Pabaadi Mpoolo mutumibwa mutumine bena Kolose mukanda, pangi mu 61 B.B., baadi muleshe’shi mukandu wibuwa ukwete kulungulwa kwi “bipangwa byooso bii kuushi kw’eyilu.” (Kol. 1:23) Mu mafuku a Mpoolo, “bipangwa byooso” bibaadi abilesha bipindji bya nsenga byauku na byabauku kwi bangi. Ku bukwashi bwa kikudi kya Yehowa, mudimo wa bulungudi ngupalakane ngofu mu ano eetu mafuku​—mpaa “na kufudiile nsenga”!​—Bik. 13:47. w20.04 6-7 ¶15-16

Yehowa mufule oso akwatudi, mpa na mukooko oso wende kula na lombe. (Mat. 18:12-14) Efile Mukulu baadi mulee’shi akakimbi mikooko yaye ishimine na kwiyikwasha bwayidya kupetuula kipwano kyayo n’aye. Na baadi muleshe myanda yakitshi​—myanda imumune na ibaadi ayikitshi mulami mwina Isaleele nsaa ibaadi ayishimina mukooko. (Es. 34:12-16) Wa kumpala, mulami baadi ende mu kukimba mukooko. Bino bibaadi abimutekye nsaa na bukome bwibungi. Wa kabidi, su beumono, aluka nao mu kikutu. Wa kasatu, su ngutapikye sunga’shi wi na nsala, na kifulo kyoso, mulami aanya p’elonda na kwiudiisha. Abitungu bakulu, balami ba “mikooko y’Efile Mukulu,” bakite nka bino bwa kukwasha baba boso balekye kutwela mu bisangilo. (1 Mp. 5:2, 3) Bakulu bende mu kwibakimba, bebakwashe bwa kwalukiila mu kakongye, na bebaleshe kifulo pa kwibakwasha bwabadya kwalusha bu kuuku bw’abo na Yehowa. w20.06 20 ¶10

Yesu bakwile’shi mabala abapu kumonga bwa kuwumbula mwanda, baadi akulupila’shi bantu bebungi abamulondo su? Nya. Bifundwe bibaadi bipwe kwakula’shi, bantu bapeela nyi abakekala na lukumiino mwadi. (Yo. 12:37, 38) Yesu baadi na ngobesha ya kuuka bi mwishimba dya muntu. (Mat. 9:4) Sunga’shi baadi mutuule binangu kwi baaba bapeela abaadi na kya ku mukumiina, Yesu baadi alungula mukandu wibuwa kwi bantu boso. Atwe namu abitungu tukite nka byabya, bu byatushi na ngobesha ya kumona bi mwishimba dya muntu, t’abitungu tutshibile bantu ba mu teritware eetu kiimu! Kadi, abitungu twibamone bu bantu abakekala bu balongi ba Yesu. Tentekyesha kibaadi Yesu mulungule balongi baye. Mabala abapu kumonga bwa kuwumbula, nkwamba’shi, bintu bibapu kukoma bwa kuumbula. Bantu mbalombene kushintuluka na kufika bu balongi ba Kidishitu. Yehowa amonaa baaba bantu bu “bintu bineme.” (Ag. 2:7, EEM) Su atumono bantu mu mushindo awibamono Yehowa na Yesu, atukimbi bya kwiuka kalolo kabila k’abo na akibasankishaa. Ta twibamono bu benyi nya, kadi bu bantu abakekala bakwetu bena Kidishitu. w20.04 13 ¶18-19

Eyi dy’Efile Mukulu adilesha patooka’shi, abitungu tufule na kulama kifulo bwa Yesu bwa kusankisha Yehowa. Kintu akitukwasha bwa kwikala ba kuuku ba Yesu nyi kumuuka kalolo. Twi kumuuka kalolo pa kubadika mukanda wa Mateo, Maako, Luka na Yowano. Nsaa yatunangushena ku miisambo ya mu Bible pabitale nshalelo a Yesu, atumufulu na kumunemeka bwa kipaso kibaadi akitshina bantu myanda. Bu kileshesho, sunga bibaadi Nfumwabo, tabaadi amono balongi baye bu ba mpika nya. Anka baadi ebalungula bya nangushena na byapusha. Nsaa ibaabadi benyongole, Yesu baadi enyongola n’abo, nsaa ibaabadi abadidi baadi adidi n’abo. (Yo. 11:32-36) Sunga beshikwanyi baye, abaadi abamono’shi boso abakumiina mukandu waye abaadi abafiki ba kuuku baye. (Mat. 11:19) Su twambula Yesu mu mushindo ubaadi na balongi baye, kipwano kyetu na bangi akilumbuluka, atwikala na muloo na atunyisha kwibafula na kwibanemeka ngofu. w20.04 22 ¶9-10

Mu kipwa kya 1870, Grande-Bretagne bafikile bu bufumu bukata bwa nsenga ishima, na baadi na basalayi be bukome bukile. Bwabwa bufumu abaadi bebuleshe bu lusengwa lupeela lubaadi lutshokole ingi nsengwa isatu​—nkwamba’shi France, Espagne, na Pays-Bas. (Nda. 7:7, 8) Na bubaadi bu nfumu a kuushi mpa na mu ngoshi ya kumpala ya nsenga ishima. Nka mu kino kipungo kimune, bena États-Unis abekele na bupeta bwibungi na abaadi bakite kipwano kikata na Grande-Bretagne. Mu Ngoshi ya kumpala ya nsenga ishima, basalayi ba bena États-Unis na ba bena Grande-Bretagne, abaadi mu kipwano kibukopo. Aa mafuku, bena Grande-Bretagne na bena États-Unis, abekele kintu kimune na abo nkufika bu bufumu bwa nsenga ishima bwa Angleterre na Bena Amérique. Nka bu byabadi batemukye kwi Ndanyele, uno nfumu baadi na “kilwilo kikata kii-kashaa naa kiibukome bwi moo.” Mu kino kipungo kya mafuku a ku nfudiilo, bena Angleterre na bena Amérique ngi bekale bu nfumu a kuushi. w20.05 4 ¶7-8

Meema ngasungulukye pa nsenga mwanda nsenga mbeyituule pa bula bulombane na nguba. Su nsenga ibadya kwikala ifubwile peepi na nguba kapeela, meema abadya kuuma, mubadya kwikala kibobo kikile na tamubadya kwikala kipangwa kii na muwa. Su nsenga ibadya kwifubwila kula kapeela na nguba, meema oso abadya kukwatakana nka bu ebwe, na kwikasha nsenga yoso nka bu ebwe. Kwifunya kwa meema kukwete kukwasha bipangwa mwanda Yehowa mmutuule nsenga pa bula bulombane. Nsaa aikupila nsembwe ya ngumba mu meema na pa nsenga, meema aakamina mwiyilu bu miishi na aakitshi makumbi. Ku kipwa kyoso, meema aendaa mwiyilu bu miishi e midiyo na midiyo ya milangi. Ano meema aakitaa mafuku pangi ekumi kumpala kwa’shi anokye bu mpeshi sunga bu milemba. Meema aefunyaa, kwamba’shi aende mwiyilu, akupu aaluka dingi pa nsenga mu tulunga na mmyela. Yehowa mmukite kwifunya kwa meema bwa’shi nsenga ikale nka na meema na bino abilesha kinangu na bukome bwaye.​—Yob. 36:27, 28. w20.05 22 ¶6

Yesu etunyingisha bwa kutungunuka na kuteka bukwashi bwa kikudi kiselele. (Luk. 11:9, 13) Kubukwashi bwa kikudi kyaye, Yehowa kwete kwitupa bukome​—“bukome bushii bwa kupwandjikisha nabo kintu.” (2 Kod. 4:7) Kubukwashi bwa kikudi ky’Efile Mukulu, twi balombene kunyingiila lukalakashi loso lwatudya kufumankana nalo. Kikudi kiselele nkilombene dingi kwitukwasha bwa kukumbasha mudimo w’Efile Mukulu. na nkilombene kwitukwasha bwa kuluumbula ngobesha yetu. Atuuku’shi bipeta bibuwa byatupete mu mudimo w’Efile, nyi nkubukwashi bwa kikudi kiselele. Twi kulesha’shi atwata kikudi kiselele na muulo, pa kwela luteko bwa’shi kitukwashe tutundule binangu bibubi sunga nkalo ibubi i mwishimba dyetu. (Mis. 139:23, 24) Su twateka bwa bino bintu, kubukwashi bwa kikudi kyaye, Yehowa mulombene kwitukwasha bwa kutundula binangu sunga nkalo ibubi. Abitungu tutekye bukwashi bwa kikudi ky’Efile Mukulu bwa’shi tupete bukome bwa kukambila byabya binangu sunga nkalo ibubi. Paapa atulesha’shi twi na kitshibilo kya kusuuka kintu kyoso kilombene kukita bya’shi Yehowa apele kwitukwasha ku bukwashi bwa kikudi kyaye kiselele.​—Ef. 4:30. w20.05 28-29 ¶10-12

Nsaa y’atukalwila eshina dy’Efile Mukulu, atwambula kileshesho kya Yesu Kidishitu. Yesu tabaadi penda aukisha eshina dya Nshaye nya, baadi dingi akalwila nkumo yadyo. Bu kileshesho, batopekyele Bafadisee, babaadi abakimbi kulesha mu mishindo ibungi’shi Yehowa e na myanda ibukopo, e kula, na’shi te na lusa. Yesu badi mukwashe bantu bwabadya kumona Nshaye bu sha binangu bibuwa, lwishinko, kifulo na afwilaa bantu lusa. Baadi mukwashe dingi bantu bwabadya kushinguula bi Yehowa mu mushindo ubaadi mwambule ngikashi ya Nshaaye mu nshalelo aaye a kwifuku n’efuku mu kipaso kipwidikye. (Yo. 14:9) Anka bu Yesu, twi balombene kulungula bantu pabitale Yehowa, kulongyesha bantu’shi Efile Mukulu nsha kifulo na kalolo. Nsaa y’atukitshi byabya, atukalwila Yehowa ku madimi ooso abamudimbiila. Atutumbisha eshina dya Yehowa, kwidiikasha diselele mu binangu na mu mashimba a bantu. Bishima na bikitshino byetu abilesha bantu bi Yehowa binyibinyi. Atukalwila dyadya eshina pa kukwasha bantu bwabadya kuuka bya binyibinyi pabitale Efile Mukulu. w20.06 6 ¶17-18

Eyendo’shi, twi kufubisha Internete bwa kepatshila kebuwa​—bu kileshesho, twi kwisamba na kifuko kyetu na ba kuuku beetu. To kwete kumona’shi ma komantere, ma foto, na ma video abeele kwi bantu mu Internete, mbwa’shi bangi bebalakile su? Be nka bu abamba’shi: “Ntaleyi, nami uno.” Bangi abafubisha bishima bi butete nsaa y’abele komantere ku foto y’abo’bo banabeene, sunga pabitale ma foto abangi bantu. Anka, atwe bena Kidishitu twi banyingishibwe bwa kwikala na kwiyisha na kifulo, nyi bwakinyi tatwi balombene kufubisha Internete mu uno mushindo nya. (1 Mp. 3:8) Su ofubishaa Internete, eyipushe’shi: ‘Komantere ya ngyele, foto sunga video ayilesha’shi nkwete kwitumbisha su? Nkwete kukwatshisha bangi kyuutu su? Ta bitungu’shi bena Kidishitu beate na kineemo kikilekile sunga kukumiina’shi bangi bebalakile nya. Abalondo elango dya mu Bible di mu kifundwe kyetu kya lelo. Su twibeyishe, tatwikala bu bantu ba uno ndumbulwilo basha kwitatula na abakumiina’shi bangi bebamone bu be na muulo ukilekile.​—1 Yo. 2:16. w20.07 6 ¶14-15

Kumpala kwa’shi Mpoolo afikye mulongi a Kidishitu, baadi nsogwaluume shii na kaneemo baadi abingabinga balongi ba Kidishitu. (Bik. 7:58) Yesu aye nabeene baadi mwimikye Mpoolo, aa mafuku baadi aukibwa bu Saule baadi abingabinga kakongye ka bena Kidishitu. Yesu besambile na Mpoolo kukatukila mwiyilu na aye nkumwikasha bu mpofu. Bwa kumubuula meeso, bibaadi abitungu’shi Mpoolo akimbe bukwashi bwa bantu babaadi abingabinga. Na kwiyisha kooso, baadi mukumiine bukwashi bwa mulongi a Yesu a betaminaa bu Ananii, baadi mumubuule meeso. (Bik. 9:3-9, 17, 18) Kunyima, Mpoolo bafikile mwina Kidishitu muukibwe kalolo mu kakongye, anka tabaadi mwilwe dilongyesha dibaadi mupete kwi Yesu mwishinda dya ku Damase. Mpoolo baadi mushaale mwiyishe, na baadi akumiina bukwashi bwa bakwabo balume na bakashi. Baadi mushinguule’shi abaadi ‘bamukankamikye bikata.’​—Kol. 4:10, 11, EEM. w20.07 18-19 ¶16-17

Sunga ekala sha bukome booso, Yehowa apeyaa bangi mashito. Bu kileshesho, mmusangule Yesu bwa kwikala bu Nfumu a Bufumu bwaye, na mmupe bantu 144 000 bushito bwa kwikala bu bakunkushi pamune na Yesu. Kushi mpaka, Yehowa mulongyeshe Yesu mushindo wa kwikala bu Nfumu na bu Tshite-mwakwidi mukata e panundu. (Eb. 5:8, 9) Mulongyeshe dingi baba abakakunkusha pamune na Yesu mushindo wabadi balombene kulombasha mudimo wabo, anka ta mwibemane mmongo bwa kulondesha byooso byabeukitshi nya. Kadi, mmukulupile’shi abakitshi kikyebe ky’eshimba dy’aaye. (Kibaf. 5:10) Su Nshetu e mwiyilu​—shii na lukalo lwa bukwashi bwa muntu su ngumune​—apa bangi mashito, bi na muulo ngofu bwa’shi tukite namu nka byabya. Bu kileshesho, we nfumu a kifuko, su we mukulu mu kakongye? Ambula kileshesho kya Yehowa pa kupa bangi mashito na kuleka kwibemana mmongo bwa kuuka byabeukumbasha. Nsaa yw’ambula kileshesho kya Yehowa, t’anka penda mudimo aukitshika kalolo nya, kadi webakwasha dingi bwabadya kukita bibungi.​—Yesh. 41:10. w20.08 9 ¶5-6

Yehowa akumiina’shi tupushe naminyi pabitale mikooko yaaye ishimine? Yesu mwitulekyele kileshesho kibuwa. Baadi auku’shi mikooko ya Yehowa yoso i na muulo ku meso kwaye, byabya Yesu baadi etatshisha bwa kukwasha “mikooko ishimine ya mu nshibo ya Isalele” bwa’shi yalukiile kwi Yehowa. (Mat. 15:24) Bu byadi mulami a mikooko ebuwa, Yesu baadi akitshi mwaye mooso bwa kupela kushimisha mikooko ya Yehowa. (Yo. 6:39) Mpoolo mutumibwa baadi munyingishe bakulu ba mu kakongye ka Efeso bwa kwambula kileshesho kya Yesu. ‘Abitungu nukwashe babofule, na kutentekyesha mayi a Nfumu Yesu, aye nabene bambile’shi: Muloo wa kupaana ngukile wa kupebwa.’ (Bik. 20:17, 35) Abipushika kalolo’shi, lelo uno bakulu be na bushito bukata pabitale uno mwanda. Salvador, mungi mukulu a mu Espagne amba’shi: “Nsaa yanangushena pabitale mushindo aupasukilaa Yehowa mikooko yaaye ishimine, nepusha’shi abitungu nkite mwande mooso bwa kwiyikwasha. Nashinkamisha’shi Yehowa akumina’shi nneyikwashe.” w20.06 23 ¶15-16

Yehowa atengyela na lwishinko looso mpa na apafudiila Bipwa kinunu, kumpala kwa’shi tufikye bapwidikye. Mu kyakya kyooso kipungo, Yehowa ekala nka etufwila lusa ku milwisho yetu. Byabya, abitungu twambule kileshesho kyaaye pa kukimba ngikashi ibuwa ya bangi na kwibalesha lwishinko. Banda kunangushena muloo wabakekala nao apakekala bantu booso bapwidjikye mu nsenga ishima, bafule Yehowa na abamufubila. Nangushena muloo aukekala nao booso abakende mwiyilu nsaa yabamono bantu abapetela myabi mu mudimo waabo. (Kibaf. 4:4, 9-11; 5:9, 10) Na, nangushena nsaa ayikekala ayituuku mpolo ya muloo, pamutwe pa ya makyenga, nsaa ishayikekala dingi mikumbo, twinyongoshi na lufu. Kubanga binobino, ikala na kitshibilo kya kwambula Nshobe sha kifulo, kinangu, na lwishinko. Su bokitshi byabya, olama muloo oobe sunga ofumankana na nkalakashi i naminyi. (Shak. 1:2-4) Twi na lutumbu lukata bwa mulayilo wa Yehowa wa’shi: “Akukekala lusangukilo”!​—Bik. 24:15, Kilombeeno Kipya 2014. w20.08 19 ¶18-19

Bible nyi kyabuntu kyabadi betupe kwi Efile Mukulu sha kifulo. Nshetu e mwiyilu baadi mupe bantu bukome bwa kikudi bwabadya kumufunda, mwanda kwete kupasukila bana baye be pa nsenga ngofu. Ku bukwashi bwa Bible, Yehowa kwete kwaluula ku nkonko ya mu nshalelo i na muulo ukata yatudi balombene kwiyipusha, bu: Twi batuukye kunyi? Bwakinyi ne na muwa? Na mmyanda kinyi ayitutengyela mu mafuku aafiki? Yehowa akumiina’shi bana baye boso bapete ngaluulo ku ino nkonko, nyi bwakinyi munda mwa bipwa bibungi, baadi mutakule bantu bwabadya kwaluula Bible mu ndjimi ibungi. Lelo uno, Bible mushima sunga bipese e mu ndjimi ikile pa 3000! Bible nyi mukanda wabadi baluule na kumwabila bantu kukila mikanda yoso. Atulesha’shi twi na lutumbu bwa Bible nsaa yatumubadika na kunangushena ku byalongyesha efuku dyoso, na kukita mwetu moso bwa kutumikila byatubadika. Dingi, atulesha lutumbu kwi Efile Mukulu pa kwitatshisha bwa kulungula bantu bebungi mukandu wibuwa.​—Mis. 1:1-3; Mat. 28:19, 20. w20.05 24-25 ¶15-16

Mutemuki Yelemiya, abadi bamupe teritware e bukopo bukile. Badi mubofule kwishimba ngofu mu mushindo ubadi mupushe mpa na bya kuleka kulungula mukandu wibuwa. Anka tabadi mwibikite. Bwakinyi? “Eyi dya Yehowa” dibadi nka bu kaalo akatembe munda mwa Yelemiya, nyi bwakinyi tabadi bya kuleka kwakula! (Yel. 20:9) Twi kwikala bu Yelemiya, nka su atubadika Eyi dy’Efile Mukulu na kwidinangushena ngofu efuku dyoso. Bu kipeta, muloo wetu autama na mudimo wetu wa bulungudi autusha bipeta bi buwa. (Yel. 15:16) Byabya nsaa yodi mubofule kwishimba, esendele Yehowa bwa’shi akunyingishe. Akukwasha bodya kunyingiila kukutwa kwa kupwidika na kubofula kobe. Akunyingiisha nsaa yodi na maladi. Akukwasha bodya kwikala na nkatshinkatshi pabitale mashito mu ndumbulwilo aaye. Na akukwasha bodya kwikala na mweneno e buwa pabitale mudimo wa bulungudi. Byabya, teka Nshobe sha kifulo e mwiyilu na omulungule byoso byopusha. Na bukwashi bwaye obesha kukambila kubofula kwishimba. w20.12 27 ¶20-21

Bwa bangi bakwetu bakashi, ku bisangilo nkwabemonenaa na bakwabo bena Kidishitu. Nyi bwakinyi abitungu tushinkamishe’shi tubebakukila, tubesamba nabo, bwabadya kumona mushindo wa twibapasukila mu bisangilo. Nka bu Yesu, twibalombene kukisha nsaa na bakwetu bakashi. (Luk. 10:38-42) Pangi twikwibetamina kwetu ku nshibo bwa kudya nabo sunga bwa kukisha nabo kapapi. Nsaa yatukitshi byabya, abitungu tushinkamishe’shi miisambo yetu aibanyingisha. (Lom. 1:11, 12) Abitungu bakulu bekale na binangu bu bya Yesu. Baadi auku’shi bukupi mbulombene kwikeela bangi bukopo, anka baadi muleshe kalolo’shi, kwibakila na kutanda bana, ta ndyo akupeya muntu muloo wa losoo. (Luk. 11:27, 28) Anka, atwikala na muloo wa losoo nka su atutulu mufubo wa Yehowa pa mbalo ya kumpala mu muwa wetu. (Mat. 19:12) Bikishekishe bakulu, abitungu bamone bakwetu bakashi bena Kidishitu bu bakwabo bakashi na bu ba nyina’bo. Bibuwa su bakulu abata nsaa ya kwisamba na bakwetu bakashi kumpala sunga kunyima kwa bisangilo. w20.09 21-22 ¶7-9

Mudimi mwina Isaleele baadi akunu ntete mu mpeshi mbedi mu kipungo kya automne, kipungo kipushene na mweshi w’ekumi, na baadi ebikuula mu mpeshi a nfudilo mu kipungo kya printemps, kipungo kipushene na mweshi wa kananka. (Mak. 4:28) Atulesha’shi twi na binangu nsaa y’atwambula mudimi sha lwishinko. Anka bino nta bibofule nya. Bantu bakutwe kupwidika abakumiinaa kumona bipeta bya mudimo nka musango umune. Byabya, su atukumiina’shi bikunwanga byetu bitushe bipeta bi buwa, abitungu twibipasukile. Mudimo wa kwikasha bantu bu balongi autekye kwitatshisha ngofu. Abitutekye nsaa i bungi bwatudya kukwasha balongi betu ba Bible bwa’shi balekye ntondo, kadi bekale na kifulo. Lwishinko alwitukwasha bwatudya kupela kubofula kwishimba nsaa yabash’abetutemesha kwi bantu. Abitungu twikale na lwishinko nsaa ayikumiina bantu kwitutemesha na kulonga Bible. T’abitungu tukitshishe mulongi a Bible bwadya kunyingisha lukumiino lwaye. Ingi nsaa balongi ba Yesu ta babaadi abapusha byooso bibaadi alongyesha. (Yo. 14:9) Tutentekyesheyi’shi atwe atulungula mukandu wibuwa na kulongyesha, anka Efile Mukulu nyi akwasha bantu bwabadya kwikala na lukumiino.​—1 Kod. 3:6. w20.09 11 ¶10-11

Atwe boso atukumiinaa’shi balongi betu ba Bible, bele matabula mpa na ku lubatshisho. Ungi mushindo wi na muulo watudya kwibakwasha, nyi kwibanyingisha bwabadya kutwela mu bisangilo. Balongi ba Bible ababanga kutwela mu bisangilo kushii kunyengakana, abelaa matabula bukidibukidi. Bangi balongyeshi abalungula balongi babo ba Bible’shi mbalombene kulonga myanda ibungi mu bisangilo kukila nsaa y’abalongo Bible ku nshibo. Badika Bena-Ebelu 10:24, 25, na mulongi obe a Bible na omupushishe bwakinyi bi buwa ekale afiki ku bisangilo. Na muloo oso, mulungule mwanda wa nulongyele mu bisangilo binobino. Nsaa y’amono byw’epusha bwa bisangilo, abimupa malaka akufika kwanka. Myanda y’amono na kupusha mu bisangilo byaye bya kumpala, ayimusankisha ngofu kukila bitaadi mupushe na mumone ku bingi bipwilo. (1 Kod. 14:24, 25) Akafumankana na bantu be buwa baadi mulombene kwambula na abamukwasha bwa kwela matabula mpa na ku lubatshisho. w20.10 10-11 ¶14-15

Kikudi ky’Efile Mukulu akikukwasha bwodya kufubila byokwete kubadika na kulonga Mwiyi dyaye. Teka nka bu mufundji a misambo’shi: ‘Yehowa ndambukishe eshinda dyoobe, bwashi ntambukile mu biinyibiinyi byoobe. Fukamisha eshimba dyande bwa’shi ditshine eshina dyoobe.’ (Mis. 86:11) Byabya, tungunuka na kubadika na kulonga Bible na ingi mikanda yoso ikwete kutusha ndumbulwilo a Yehowa. Kabingilo kobe t’akekalanga penda ka kupeta kiukilo nya. Kekale ka kushinkamisha’shi we na bya binyibinyi na kwibifubila mu nshalelo obe. Kikudi kya Yehowa nkilombene nkukwasha bodya kwibikita. Na dingi abitungu wekale onyingisha bakwetu balume na bakashi. (Eb. 10:24, 25) Bwakinyi? Mwanda bena kifuko kyobe ba mu kikudi. Teka bwa’shi kikudi ky’Efile Mukulu kikwashe bodya kwikala otusha ngaluulo ayitukila kwishimba mu bisangilo na bwa kukita mobe moso midimo yabakupa. P’okitshi byabya, olesha Yehowa na Mwan’aye’shi we mufule “mikooko” yabo i na muulo. (Yo. 21:15-17) Byabya, temesha Mulongyeshi obe Mukata kubukwashi bwa bidibwa bya mu kikudi bya kwete nkupa. w20.10 24-25 ¶15-17

Nkinyi kibaadi kikite Yesu nsaa ibadi batumiibwa baye babofule ku mashimba? Nkaye kyasanguka, Yesu balungwile bangi balongi baye’shi: “Lekaayi kutshiina! Ndaayi nukawukishe bakwetu balume’shi [nasanguka].” (Mat. 28:10a) Yesu tabadi mupele batumiibwa baye nya. Sunga byababadi bapalakane bamuleka, badi mutungunukye na kwibetamina bu ‘bakwabo balume.’ Nka bu Yehowa, Yesu afwidishena lusa. (2 Bf. 13:23) Atupasukila baba boso balekye kulungula mukandu wibuwa. Baki’nka bakwetu balume na bakashi na twi bebafule! Tuky’atutentekyesha mudimo wi bukopo wabadi bafubile Yehowa. Pangi, bangi basha balungula lelo uno, babadi bamufubile munda mwa bipwa bi bungi. (Eb. 6:10) Tukii nabo lukalo! (Luk. 15:4-7) Twi kunyingisha balungudi balekye kulungula mukandu wibuwa bwa kutwela mu bisangilo. Abitungu twate mpángo ya kwenda mu kumukukila na muloo oso. w20.11 6 ¶14-17

Shake, Yowano na nyinabo abatekyele Yesu kintu kyashibaadi na matalwa a kwibapa. Kushii kunyengakana, baadi mwibaluule’shi nka penda Nshaye e mwiyilu nyi mulombene kutuula muntu ku mboko ibalume na ku ibakashi ya Yesu mu Bufumu bwaaye. (Mat. 20:20-23) Yesu baadi muleshe’shi auku mikalo yaaye. Baadi mwiyishe. Tabaadi akitshi kintu su nkimune kishibadi Yehowa mumulungule bwa kukita nya. (Yo. 12:49) Mushindo kinyi watudi balombene kwambula kileshesho ki buwa kya Yesu? Twi balombene kwambula kileshesho kya Yesu kya kuuka mikalo yetu pa kutumikila elango di mu kifundwe kyetu kya lelo. Byabya, nsaa yabetutekye elango, tatukumanga kwakula mweneno eetu’twe banabene sunga kwakula kyooso akitufwila mu binangu. Abitungu elango dyetu ditukile mu Bible na mu mikanda ya mpika. Su tubakitshi bino, twi bashingule mikalo yetu. Na kwiyisha kooso, atutumbisha ‘mayi . . . alulame’ a Sha bukome booso.​—Kibaf. 15:3, 4. w20.08 11-12 ¶14-15

Su okyebe kupa kuuku obe elango, myanda kinyi ayitungu’shi otentekyeshe? Kumpala kwa kwisamba naye eyipushe’shi: ‘Nee “mululame bikishekishe” su?’ Muntu mululame bikishekishe atshibilaa bangi biimu kushii muyile miya ya Yehowa, kadi muyile yaye’ye nabene na t’ekalaa na lusa. Su kunyima kobe kwitaluula bomono’shi abitungu wesambe na kuuku obe, uuka mwanda kalolo na omwele nkonko ayimukwasha bwa kutundula kilema kyaye. Ikala mushinkamishe’shi byabya byokula, mbimene mu bifundwe, na ntentekyesha’shi twe na bushito bwa kutshibila kuuku obe kiimu nya, anka mukwashe bwadya kuuka bi mweneno a Yehowa pabitale kyakwete kukita. (Lom. 14:10) Fubisha Eyi dy’Efile Mukulu, na ambula lusa lwa Yesu nsaa y’olanga muntu. (Nki. 3:5; Mat. 12:20) Bwakinyi? Mwanda Yehowa etukitshina myanda mu mushindo watukitshinaa bangi.​—Shak. 2:13. w20.11 21 ¶13

Okumiinaa’shi bantu bakwelele binangu bibubi mwanda w’ekoba dyobe, mpala yobe, sunga bula na bukata bobe? Nya. Kuuka’shi Yehowa t’etwelela binangu muyile abitumono bantu, akwitunyingisha! Bu kileshesho, nsaa ibaadi Samwele atala bana ba Yeese, tabaadi mumone kibaadi Yehowa amono nya. Yehowa bamulungwile’shi umune a ku bana ba Yeese akekala nfumu a Isalele. Kadi mmwana kinyi? Pabaadi Samwele mumone Eliabe mwana a kumpala a Yeese, bambile’shi: “Mbiinyibiinyi, uno ngi musangulwe a Yehowa.” Eliabe baadi amweneka nka bu nfumu. “Anka Yehowa baalungwile Samwele’shi: ‘Totalanga lukyebo lwaye sunga kishiisa kyaaye kila. Naamupele.’” Bino abitulongyesha kinyi? Yehowa batungunukile na kwamba’shi: “Bantu abamonaa àkììleèsha ku meeso aabo, ank’Efile Mukulu atalaa eshimba.” (1 Sam. 16:1, 6, 7) Bi buwa twambule Yehowa nsaa yatukitshiina bakwetu bena Kidishitu myanda. w20.04 14 ¶1; 15 ¶3

Pabaadi Yesu ende nyendo, baadi akidila mu mafuba, pangi pabaadi bikunwanga tabyabandile kukula. (Yo. 4:3-6) Bino bikunwanga bibaadi na kya kukita myeshi pangi inanka bwa’shi bebyumbule. Kadi, Yesu bakwile kintu kampanda kibaadi akipushika bu kipya, bambile’shi: “Ebwesheyi meeso eenu na talayi mabala: mwanda abapu mpaa na kumonga bwa kuwumbula.” (Yo. 4:35, 36) Baadi akyebe kwamba kinyi? Abimweka’shi Yesu baadi akwila bantu bekale bu byumbulwanga bya mu kifwanyi. Tala kibaadi kikitshikye. Sunga’shi bena Yuuda tababaadi abepushena na bena Samadiya, Yesu baadi mukalambukishe mwana mukashi mwina Samadiya​—yawa mwana mukashi nkumutemesha! Na dingi, nsaa ibaadi esamba pabitale mabala abapu “kumonga bwa kuwumbula,” kibumbu kya bena Samadiya kibapushiishe nkumo ya Yesu kwi yawa mwana mukashi, kibaadi mwishinda, akifiki bwa kupusha malongyesha a Yesu. (Yo. 4:9, 39-42) Ungi muntu ataluula myanda ya mu Bible mmwakule pabitale uno mwanda’shi: “Kipaso kibaadi bantu bafikye bukidibukidi mu kuteemesha Yesu . . . akilesha’shi abaadi nka bu byumbulwanga bipwe kukoma.” w20.04 8 ¶1-2

Bisangilo byetu abitukwasha dingi mu ingi mishindo. Abilongamisha mayele etu, twi kwamba’shi abitukwasha bwa kwikala balungudi na balongyeshi be buwa. Bu kileshesho, atulongo bya kufubisha bina mudimo bi mu kashete ketu kalolo. Byabya, lumbula bisangilo kalolo. P’odi mu bisangilo, temesha kalolo. Kunyima kwa bisangilo, tumikila myanda ibolongo. Su bokitshi byabya, wekala “musalaayi ebuwa a Kidishitu Yesu.” (2 Tim. 2:3) Atupete dingi bukwashi bwa midiyala ya ba mikeyilu be bukome. Banda kunangushena ku kilombene kukita penda mwikeyilu umune! (Yesh. 37:36) Binobino banda kunangushena kilombene kukita kilwilo kya ba mikeyilu. Ta kwi muntu sunga demo mulombene kutshokola kilwilo kya Yehowa ki bukome. Yehowa sha bukome boso padi ku lupese lwetu, atwikala na bukome bwi bungi kukila beshikwanyi netu sunga bekala bungi bwi naminyi. (Bans. 6:16) Eyendo’shi bino mbya binyibinyi! Tentekyesha ino myanda nsaa y’obofula kwishimba, pa mwanda wa byabakwamba sunga nkukitshina kwi mwina mudimo nobe, mwina kalasa nobe sunga mwina kifuko nobe. Tentekyesha’shi twe bupenka mu ino ngoshi nya. Okwete kulonda bukunkushi bwa Yehowa, na kwete nkukwasha. w21.03 29 ¶13-14

Mpoolo badi pangi akwia mayi e mu Yeeshaya 22:13, aakwila mweneno a bena Isaleele. Pamutwe pa ku nyingisha kifulo kyabo bw’Efile Mukulu, abadi bepane nka mu miloo. Mweneno a bena Isaleele badi’shi: “lelo lelo, maloba,” mweneno ekwanka mpa na lelo uno. Atuuku’shi Yehowa akasangula bafwe, nyi bwakinyi abitungu bino bitutakule mu kusangula ba kuuku be buwa. Bakwetu ba mu Kodinda abadi na lukalo lwa kwibadimusha pabitale kwikala na ba kuuku ababepula lusangukilo. Bino abitulongyesha’shi: Su twi na ba kuuku ababepula abikakitshika mafuku aafiki, na bafule nka penda maasha, mbalombene kwikala na bukitshishi bwi bubi kwatudi. Na kwikala na bantu be bino, kwi kulwisha mweneno etu e buwa a bena Kidishitu na bikitshino byetu. Dingi bano bantu be kwitutakula bwa kwikala na nshalelo mushikwe Efile Mukulu. Nyi bwakinyi Mpoolo mutumiibwa bakwile’shi: “Pasukayi [na kukita] kwa mianda yilulame na tanukitanga milwisho nya.”​—1 Kod. 15:33, 34, Kilombeeno Kipya 2014. w20.12 9 ¶3, 5-6

Uno verse, akwila mushindo wi Yehowa mulumbule kifuko kyaye ki mwiyilu na ki pa nsenga. Bu byadi “mfumu,” aye nyi e na matalwa oso, anka mmupe bangi bantu ndambo ya matalwa. Nyi bwakinyi ba mfumu ba bifuko abakamulubwila mushindo w’abafubisha matalwa adi mwibape. (Lom. 14:10; Ef. 3:14, 15) Yehowa mmupe Yesu matalwa pa kakongye, nyi bwakinyi Yesu akamulubwila mushindo wa kwete kwitukitshina myanda. (1 Kod. 15:27) Yehowa mupe dingi mulume matalwa pe mukashi aye na bana baye. Mmushindo kinyi wadi mulombene kulonga buadia kuikala mfumu a kifuko ebuwa? Kia kumpala abitungu aukie akimutekie Yehowa. Abitungu aukie dingi buakinyi Yehowa mmutuule myanda mu mulongo, bikishekishe mushindo wadia kuambula kileshesho kiabadi balekie kui Yehowa na Yesu. Buakinyi bino bi na muulo? Mwanda Yehowa mmupe ba mfumu ba bifuko ndambo ya matalwa na akumina’shi beifubishe kalolo.​—Luk. 12:48b. w21.02 2 ¶1-3

Abitungu twambule Yehowa, pa kwikala atukatusha ingi myanda ku mashimba. Bu kileshesho, Yehowa alamiinaa myanda mu kipaso kipwidikye, kadi su twelanga kwishimba, etufwilaa lusa na kuluba milwisho yetu. (Mis. 25:7; 130:3, 4) Byabya, akumiina’shi tukitshine namu bangi’nka byabya nsaa yabetutekye lusa bwa bilubilo byabetukitshina. (Mat. 6:14; Luk. 17:3, 4) Twi kulesha lutumbu bwa bongo, kya buntu kya kukaanya kyabadi betupe, pa kufuba nabo bwa kutumbisha Yawa mwitupe bwanka. Bangi mbasangule bwa kufubisha bongo bwabo nka penda bwa kulombasha nkalo yabo’bo banabene​—bwa kwiatshila bitshibilo pabitale kii buwa na kii bubi. Kadi, mwanda Yehowa ngi mwitupangye, abitungu tuukye’shi nka penda miiya yaye nyi ibuwa kukila ingi miiya yoso yatudi balombene kwielela. (Lom. 12:1, 2) Nsaa yatulondo miiya yaye, atwikala na kufukama mu nshalelo. (Yesh. 48:18) Na atwikala baukye akikumiina Yehowa’shi tukite patukii na muwa​—bwa kutumbisha na kusangasha Mupangi eetu na Nshetu.​—Nki. 27:11. w20.05 23-24 ¶13-14

Lelo uno, twi kulesha bakwetu balume na bakashi kifulo kya bu bana na bana naminyi? Nsaa y’atwibauku kalolo, abitubofwila bwa kwibapushiisha na kutamisha kifulo kya bu bana na bana bwabo. Bipwa byetu na mbalo yatudi bakudile, tabitukutshishanga bwa kwikala ba kuuku babo. Tentekyesha’shi Yonatane badi mukudile Davide pangi na bipwa 30; sunga mbyabya, badi munyingishe bu kuuku bwaye naye. Mu kakongye kenu, mwi muntu mukukudile sunga mwina oobe odi mulombene kwikala naye bu kuuku su? Su bokitshi byabya, olesha’shi ‘wemufule bakwetu boso.’ (1 Mp. 2:17, Kilombeeno Kipya 2014) Kulesha bakwetu bena Kidishitu kifulo kya bu bana na bana, akupushisha’shi atwikala ba kuuku ba kakongye kashima? Nya, bi kwikala bukopo. Ta bi bubi kwipusha peepi ngofu na bangi bantu kukila bangi, mwanda twibafule bintu bi mumune nabo. Yesu ayitamina batumiibwa baye boso bu “ba kuuku,” anka badi mufule Yowano ngofu. (Yo. 13:23; 15:15; 20:2) Kadi, Yesu ta badi akitshina Yowano myanda i buwa kukila bangi nya.​—Mak. 10:35-40. w21.01 23 ¶12-13

Mushindo ubaadi Mpoolo mutumiibwa mulambukishe bantu ba bingi bisamba mu Ateene, ubaadi wilekene na ubaadi esamba na bena Yunda mu kitumbwilo. Baadi abekyela kalolo bintu bimwifunyishe na kutundula bipikwa bya mu bipwilo byabo. (Bik. 17:23) Akupu, baadi asangula myanda yabadi bakumiine ipusheene na bya binyibinyi bya mu Bifundwe bwa kwibalambukisha. Byabya Mpoolo baadi ashintuula mishindo ya kubanga mwisambo. Baadi alungula bena Ateene’shi mukandu waye aufiki kwi “Efile shyaawukiibwa” yawa ababaadi abatompo kulangwila. Sunga’shi bantu ba ingi miilo tababaadi abauku Bifundwe, Mpoolo tabaadi mubofule kwishimba nya. Kadi, baadi ebamono bu mabala abapu kumonga bwa kuwumbula, na baadi ashintuula mishindo ya kubanga mwisambo bwa kwibalungula mukandu wibuwa. Nka bu Mpoolo, ikala obekyela. Tala bitundwilo abikulesha nkumiino ya bantu ba mu teritware oobe. Sha nshibo mulengyeshe nshibo sunga motoka waye na bintu kinyi? Eshina, nfwadilo, ntshibisho a nyene sunga ngakwilo aaye abilesha bi kipwilo kyaye su? w20.04 9-10 ¶7-8