Mueshi wa 10

Nsaa y’atuuku Yesu na kwambula mushindo waye wa kunangushena, atunyisha kunyingisha bu kuuku bwetu n’aye. Twi kwambula Yesu naminyi? Nangushena penda pa kino kileshesho kimune. Yesu baadi akumiina kukwasha bangi pe kwisankisha aye nabene. (Mat. 20:28; Lom. 15:1-3) Pa mwanda baadi anangushena mu kino kipaso, baadi esumina ingi miloo na kufwila bangi lusa. Tabaadi afitshi munda bwa bibabadi abamwamba kwi bantu nya. (Yo. 1:46, 47) Tabaadi atentekyesha myanda ibabaadi bamukitshine kala kwi bantu bwa kwalusha bubi ku bubi nya. (1 Tim. 1:12-14) Yesu bakwile’shi: “Abakatundula’shi nwi balondji bande anka ku kifulo kyaanwifuleena.” (Yo. 13:35) Bibuwa weyipushe’shi: “Nkwete kulonda kileshesho kya Yesu pa kukita mwande mooso bwa kulama butaale na bakwetu bena Kidishitu su?” w20.04 24 ¶11

Sunga wekala mu nsenga iwule bantu abadimbiila na kusabuula eshina dya Yehowa, we na mushindo wa kukalwila eshina dya Yehowa na kulungula bantu’shi​—Yehowa eselele, mululame, ebuwa na nsha kifulo. We mulombene kulesha’shi okwete kukwatshishena bukunkushi bwaye. We mulombene kukwasha bantu bwabadya kuuka’shi nka penda Yehowa nyi mululame na’shi akafwisha butaale na muloo kwi bipangwa byooso. (Mis. 37:9, 37; 146:5, 6, 10) Nsaa yatulongyesha bangi bya binyibinyi bya mu Bible, atushimikaa kasele pa bukunkushi bw’Efile Mukulu, atwamba’shi Yehowa e na matalwa a kukunkusha eyilu na nsenga, na bino mbya binyi. Anka, bu byabidi’shi abitungu tulongyeshe bantu miiya y’Efile Mukulu, kepatshila ketu kakata nka kwibakwasha bwa kufula Yehowa Nshetu e mwiyilu, na kumulamata. Abitungu dingi twibalongyeshe ngikashi yaye ikata, na kushimika kasele pa kulesha’shi eshina Yehowa adilesha Kyadi. (Yesh. 63:7) Su twalongyesha byabya, atukwasha bangi bwabadya kufula Yehowa na kumukokyela mwanda abakumiina kumulamata. w20.06 6 ¶16; 7 ¶19

Mushindo wabadi bakite bongo bwa bantu aukanyisha. Nsaa iboodi munda mwa nyinobe, bongo b’obe bubaadi abwende na kukula muyile bibabaadi bebukite, na midiyo ya ma cellule apya abaadi aatandikwa ku munite oso wawa! Bantu abakimbuulaa myanda abapwandikisha’shi bongo bwa muntu mukulu bwi na midiyala peepi 100 ya ma cellule e pa bwao abetaminaa bu neurone​—e na bushito bwa 1.5 kg. Imune ya ku ngobesha ya bongo bwetu ya kukaanya nyi kwakula. Kishima kyooso kywakula, bongo boobe abutakula misamba ifikye ku 100 ya ludimi, mudibu, milomo, mbangambanga na kyadi kyoobe bwayidya kusanasana. Bwashi wakule bishima kalolo, ino misamba ayisanaa mu kipaso kya’shi kishima kipushikye. Mu 2019 bantu abakimbuulaa myanda mbaleshe’shi mwana kyatandikwa mmulombene kuuka na kukita bishima byaye nabeene. Kuno kukimbuula akunyingisha nkumiino ya bantu bebungi abakimbuula​—ayileesha’shi twi batandjikwe na ngobesha ya kutundula na kulonga ndjimi. Eyendo’shi, ngobesha yeetu ya kwakula nyi kya buntu kitupe Efile Mukulu. w20.05 22-23 ¶8-9

Abrahame baadi mukumiine kukatuka mu kibundji kya Ure mubaadi na nshalelo ebuwa. Bwakinyi? Mwanda baadi atengyela “kibalo ki na bibangilo bi bukopo.” (Eb. 11:8-10, 16) Kibalo sunga kibundji kibaadi Abrahame atengyela nyi Bufumu bw’Efile Mukulu. Yesu na bedibwe mwimu 144 000 nyi abamunana mu bwabwa Bufumu. Mpoolo etamina bwabwa Bufumu bu “lupata lw’Efile Mukulu atala, Yeelusaleme a mwiyilu.” (Eb. 12:22; Kibaf. 5:8-10; 14:1) Yesu baadi mulungule balongi baaye bwabadya kuteka pabitale bwabwa Bufumu bumune, na kuteka bwa’shi kikyebe ky’eshimba ky’Efile Mukulu kikitshikye pa nsenga bu mwiyilu. (Mat. 6:10) Abrahame baadi auku myanda yooso pabitale abikekala Bufumu bw’Efile Mukulu su? Nya. Munda mwa bipwa bibungi, ino myanda ibaadi bu “bifwame bya kishila.” (Ef. 1:8-10; Kol. 1:26, 27) Anka Abrahame baadi auku’shi bangi ba ku twikulu twaye atukekala ba nfumu. Yehowa baadi mu mulee byanka.​—Kib. 17:1, 2, 6. w20.08 2-3 ¶2-4

Abitungu tusumbule ndambukisho ya bantu basumbule lukumiino. Kubanga nka pabaadi patuukye kakongye ka bena Kidishitu, Diabulu kwete kufubisha bantu babi bebungi bwabadya kutwesha mpaka mu mashimba a bafubi b’Efile Mukulu basha lulamato. Nyi bwakinyi, abitungu tuukye bya kutundula kwilekena kwi pankatshi pa bya binyibinyi na madimi. Beshikwanyi netu be kufubisha Internete bwa kubofusha lukulupilo lwetu mwi Yehowa na kifulo kyetu kwi bakwetu bena Kidishitu. Tokumiinanga aa madimi, mwanda aafiki kwi Satana! (1 Yo. 4:1, 6; Kibaf. 12:9) Bwa kukambila bulwishi bwa Satana, abitungu tutamishe lukulupilo lwetu mwi Yesu na mu mudimo wadi nao mu kulombasha kwa mpángo y’Efile Mukulu. Abitungu dingi tukulupile mwi baaba babakwete kufubisha kwi Yehowa bwa kukunkusha ndumbulwilo aaye lelo uno. (Mat. 24:45-47) Atutamisha lukulupilo lwetu pa kwilongyelanga Eyi dy’Efile Mukulu. Paapa lukumiino lwetu alwikala nka bu mutshi wele mishii mushii mwa nsenga. Mpoolo baadi mwakule mwanda wi mumune nsaa ibaadi mufunde mayi e mu kifundwe ky’efuku dya lelo. w20.07 23-24 ¶11-12

Pa mwanda wa kukutwa kwetu kwa kupwidika, atukamba kupwandikiisha bangi myanda muyile byatumono na meso. (Yo. 7:24) Anka twi kuuka myanda ipeela pabitale muntu kukiila ku byatumono penda na meso. Kileshesho, sunga doktere ekala na binangu, ta mulombene kuuka myanda i bungi penda mu kutala muntu e na maladi. Abitungu’shi atemeshe kalolo su akumiina kuuka maladi abaadi yawa muntu mukumbe, bya kwete kwipusha, sunga bitundwilo abilesha’shi e na maladi kampanda. Doktere mulombene kulungula muntu e na maladi bwa’shi bamukite radiographie bwa kumona bi munda. Su akutwa kukita byabya, doktere mulombene kumulungula myanda ya madimi. Mu mushindo umune, tatwibalombene kuuka bakwetu bena Kidishitu kalolo penda pabitale byatumono. Abitungu tutompe kuuka ki mwishimba dya muntu. Binyibinyi’shi, tatwibalombene kumona bi mwishimba dya muntu. Kadi twi kukita mwetu moso bwa kwambula Yehowa. Baadi ateemesha bafubi baye. Baadi amono bi nshalelo abo na kibaadi akibatakula mu kukita kintu kampanda. Baadi ebapushiisha lusa. w20.04 14-15 ¶1-3

Twi na lukalo lwa kwikala na kwiyisha mwanda booso basha kwitatula ‘tabemonaa mu kipaso kikumbane.’ Bantu basha kwitatula abekalaa bakumiine kutontola na mbakumiine nka penda buwa bwabo’bo banabeene. Binangu na bikitshino byabo abibatakula mu kwikitshina bibubi mpa na kukitshana bangi bibubi. Su bakutwa kushintuula mushindo wabo wa kunangushena, Satana ebekasha ba mpofu mu binangu. (2 Kod. 4:4; 11:3) Muntu mwiyishe emonaa mu kipaso kikumbane. E na nkatshinkatshi pabitale byemono aye nabeene, na auku’shi bangi mbamukile. (Fid. 2:3) Auku dingi’shi: “Efile Mukulu mmushikwe baa-sha-kwitatula, anka eelela beeyishe mwabi.” (1 Mp. 5:5) Bantu abemono mu kipaso kikumbane tabakumiinaa’shi Yehowa ekale mwishikwanyi aabo. Bwa kushaala beyishe, abitungu tutumikile elango dya mu Bible aditunyingisha bwa ‘kufuula muntu a kala na bikitshiino biaye, na kufwala [muntu] mupya.’ Abitungu tulongye kileshesho kya Yesu na kutompa ku mwambula.​—Kol. 3:9, 10, Kilombeeno Kipya 2014; 1 Mp. 2:21. w20.07 7 ¶16-17

Twi na mwabi ukata wa kwikala mu kakongye ka Yehowa! Twi mu mpaladiiso a mu kikudi, mwi bantu be na kufukama na muloo. We na mudimo kinyi mu kakongye? Mpoolo mutumiibwa mmupwandikishe kakongye na mbidi ya muntu. Mmupwandikishe dingi bantu be mu kakongye na bipindji bya mbidi. (Lom. 12:4-8; 1 Kod. 12:12-27; Ef. 4:16) Dilongyesha dya kumpala dyatulongyela ku kileshesho kya Mpoolo ndya’shi, ooso a kwatudi e na mbalo ikata mu kifuko kya Yehowa. Mpoolo abanga kileshesho kyaye na kwakula’shi: “Mwanda, sunga byatudi na bipindji bibungi mu mbidi imune, bipindji byooso byaabya tabii na mufubo umune nya, byabya atwe bebungi twi’nka mbidi imune mu Kidishitu, beekale booso ku muntu na muntu bu bipindji bya mbidi imune.” (Lom. 12:4, 5) Mpoolo baadi akyebe kwakula kinyi? Sunga byatudi na midimo ilekene mu kakongye, ooso a kwatudi e na muulo. w20.08 20 ¶1-2; 21 ¶4

Ba nambutwile, mushindo kinyi wanudya kwambula kileshesho kya kwiyisha kya Yehowa? Nwi kwipusha bana benu bi mweneno aabo na bilombene kukitshika mudimo kampanda. Su mweneno abo ebuwa, mukumiineyi. Yehowa aleshaa lwishinko nsaa i bafubi baaye abapele kukumiina bitshibilo byaaye. Baadi mutemeshe Abrahame nsaa ibaadi amba’shi tabaadi apwandikisha’shi Yehowa e kubutula Sodome na Gomoore. (Kib. 18:22-33) Tentekyesha bibaadi bikite Yehowa pabaadi Sara musepe. Tabaadi mufite munda nsaa ibaadi Sara musepe pabitale bibaadi mwakule’shi akemita ku bununu. (Kib. 18:10-14) Anka, baadi mumukitshine myanda na kaneemo kooso. Ba nambutwile na bakulu, nkinyi kyanudi balombene kulongyela ku kileshesho kya Yehowa? Okitaa naminyi nsaa i bana b’oobe sunga bangi bantu mu kakongye abapele bitshibilo byobe. Okimbaa bya kukalwila kitshibilo kyobe musango umune su? Su otompaa kukumiina mweneno aabo? Bifuko na tukongye abikalaa kalolo nsaa i bano be na matalwa abambula Yehowa. w20.08 10 ¶7-9

Pabatubangile kwibunga na mwilo w’Efile Mukulu, tubaadi atukumiina bukwashi bwa bangi, mwanda tubaadi atuuku’shi twi na bibungi bya kulonga. (1 Kod. 3:1, 2) Kadi twi kwamba naminyi bwa lelo uno? Su tubapu kufubila Yehowa munda mwa bipwa bibungi, na’shi tatudi na kyukilo kibungi, twi kubanga kupela kukumiina bukwashi bwa bangi, bikishekishe su bubatukila kwi muntu ki mupya mu bya binyibinyi. Akunamu, Yehowa kwete kufubisha bakwetu balume na bakashi bwa kwitunyingisha. (Lom. 1:11, 12) Abitungu tuukye’shi su atukyebe kupeta bukome bwa Yehowa, abitungu tukumiine bukwashi bwa bakwetu balume na bakashi. Muntu ta mulombene koobesha mwanda wa bukome bwaye, tulasa twadi mulongye, bupeta sunga mbalo yadi mukudiile, anka mulombene koobesha mwanda wa kwiyisha na kukulupila mwi Yehowa. Atwe booso tutungunukyeyi (1) na kukulupila mwi Yehowa, (2) kulonga bileshesho bya mu Bible, na (3) kukumiina bukwashi bwa bakwetu bena Kidishitu. Paapa, sunga twekala babofule bwa mwanda kinyi, Yehowa etupa bukome! w20.07 14 ¶2; 19 ¶18-19

Mbilombene kwitwikeela bukopo bwa kwikala na lwishinko nsaa yatulambukisha bena kifuko netu bashi ba Temwe ba Yehowa. Mayi a kulonda e mu Mulungudi 3:1, 7 ngalombene kwitukwasha. Aamba’shi: “Kwi . . . kipungo bwa kuumiina na kipungo bwa kwakula.” Mwikeelo wetu wi buwa ngulombene kukwasha be na kifuko bwabadya kutemesha mukandu wetu. Abitungu dingi twikale belumbuule bwa kwibalungula pabitale Yehowa nsaa yooso yakudi mushindo. (1 Mp. 3:1, 2) Abitungu tulungule na kulongyesha mukandu wibuwa na kisumi. Anka abitungu twikale na lwishinko kwi bantu booso, mpa na kwi bena kifuko kyetu. Bileshesho bi mu Bible bya bantu ba sha lulamato na bya bantu ba lelo uno, mbilombene kwitulongyesha bya kwikala na lwishinko. Abakuke baadi akumiina’shi butomboshi bupwe, anka baadi muleshe lwishinko nsaa ibakwile’shi: “Neekala mushaale pa mbalo yande ya bu-nsààmò.” (Aba. 2:1) Mpoolo mutumiibwa bambile’shi akumiina “kulombasha” mudimo waye. Anka baadi mutungunukye na lwishinko looso “kutuula bukamoni ku mukandu wibuwa.”​—Bik. 20:24, Esambi Dipya 2015. w20.09 11-12 ¶12-14

Sunga’shi nka penda Yehowa nyi mumukile bukome, Yesu t’eataa na kineemo kikilekile nya. Kufuba na ba mbala-mashinda, bafubi ba midimo, bakulu na bakunkushi ba bifunda beyishe bu Yesu, nyi mwabi ukata! Su we mwiyishe, onyisha kufula bangi. Bafubi b’eyishe b’Efile Mukulu, abakefulena. (Luk. 9:48, Kilombeeno Kipya 2014; Yo. 13:35) We kukita kinyi su omona’shi kwi myanda mu kakongye, kadi bakulu tabakwete kwiyilondesha? Pamutwe pa kuunauna, we kulesha kwiyisha pa kukwatshishena baba bakwete kukunkusha kakongye. (Eb. 13:17) Bwa kukita byabya, eyipushe’shi: ‘Ino myanda ya nkwete kumona, inka na muulo bwa’shi beyilumbule su? Kwi nsaa ibuwa ya kwiyiluumbula su? Nnami mulombene kwiyilumbuula su? Nkwete kutompa kutwesha buumune mu kakongye, su nkwete kwiata na kineemo kikilekile?’ Yehowa ataa kwiyisha na muulo kukila ngobesha ya kukita kintu kampanda, na buumune kukila mushindo wetu wibuwa wa kufuba. Byabya, kita moobe mooso bwa kufubila Yehowa na kwiyisha. Su bokitshi byabya, okwatshishena buumune mu kakongye.​—Ef. 4:2, 3. w20.07 4-5 ¶9-11

Yesu baadi asankila bukwashi bwa bana bakashi abaadi abatshinyi Efile Mukulu, na abaadi abamukwasha na “bintu byaabo.” (Luk. 8:1-3) Badimwibalongyeshe bya binyibinyi bi na muulo pabitale kikyebe ky’eshimba dy’Efile Mukulu. Bu kileshesho, baadi mwibaukishe’shi abitungu afwe na kusanguka. (Luk. 24:5-8) Baadi mulumbuule bano bana bakashi, nka bu bibaadi mwibikite na batumiibwa bwa nkalakashi ibabadya kupeta. (Mak. 9:30-32; 10:32-34) Sunga bibaadi batumiibwa basuukye nsaa ibabaadi bakwate Yesu, bangi ba ku bano bana bakashi, abaadi kulupese lwaye nsaa ibaadi afu ku mutshi wa makyenga. (Mat. 26:56; Mak. 15:40, 41) Bana bakashi abaadi abatshinyi Efile Mukulu, nyi abaadi ba kumpala kumumona kunyima kwaye kusanguka. Baadi mutekye baaba bana bakashi bwabadya kwenda mu nkalungula batumiibwa’shi basanguka. (Mat. 28:5, 9, 10) Abimweka’shi, nsaa ibabaadi beele balongi mwimu ku bukwashi bwa kikudi kiselele mwifuku dya Pentekote mu kipwa kya 33 bino bipungo byetu (B.B.), bana bakashi abaadi munkatshi mwaabo, na abaadi bapete ngobesha ya kwakula mu ndimi na kulungula bangi bantu “myanda ya-kukaanya y’Efile Mukulu.”​—Bik. 1:14; 2:2-4, 11. w20.09 23 ¶11-12

Mudimo wa kwikasha bantu bu balongi, nyi mudimo aupasha myuwa! Atwibyuku naminyi? Atwibyuku nsaa ibaadi Yesu mutume eyi di mu Mateo 28:19, 20, adyamba’shi: “Ndaayi, . . . nwibeekashe buu balondji . . . , nwi babatshishe.” Atuuku naminyi’shi kubatshishibwa kwi na muulo? Abitungu tubatshishibwe su atukumiina kupashibwa. Muntu akyebe kubatshishibwa abitungu ashikamishe’shi lufu na lusangukilo lwa Yesu, nyi alwitukwasha bwa kupeta muwa wa ikalayika. Nyi kibaadi mpa na Mpyeele mutumiibwa mulungule bena Kidishitu’shi: “Lubatshisho alwinupaasha [binobino] pa mwanda wa lusangukilo lwa Yesu Kidishitu.” (1 Mp. 3:21) Byabya, nsaa ayibatshishibwa muntu, mulombene kukulupila muwa wa loso. Bwa kwikasha bantu bu balongi, abitungu twikale balongyeshi be buwa. (2 Tim. 4:1, 2) Bwakinyi? Mwanda Yesu etulungula’shi: “Ndaayi, . . . nwibeekashe buu balondji, . . . , nwibalambukishe.” Mpoolo mutumiibwa amba’shi, “nyingiila” mu wawa mudimo, mwanda “pa kukita byaabya biinyibiinyi, ngi pokepasha obe nabeene mpaa naa bano abakuteemesha.” w20.10 14 ¶1-2

Mpyele mutumiibwa badi mulongye bya kufula mudimo wa kwikala mulobi a bantu. Na bukwashi bwa Yehowa, Mpyele baadi mufikye mulungudi ebuwa. (Bik. 2:14, 41) Atulungula mukandu wibuwa mwanda twi bafule Yehowa; kano nyi kabingilo kakata aketutakula bwa kukita uno mudimo. Kifulo kyetu bwa Yehowa akitukwasha bwa kulungula myanda imutale sunga atumono’shi tatwibakumbanyine uno mudimo. Nsaa ibaadi Yesu mwitamine Mpyeele bwadya kwikala mulobi a bantu, bamulungwile’shi: “Totshinanga.” (Luk. 5:8-11) Mpyeele t’abaadi na moo pakibaadi kilombene kukitshika su afika mulongi a Yesu. Kadi baadi mwipushe bu shii mulombene kufuba naye, p’aye kumona bungi bwa mishipa ibaadi Yesu mwibakwashe bwa kukwata mu kilengyeleshi. Nka bu Mpyeele, we kupusha moo p’onangushena myanda itekibwe bwakwikala mulongi a Kidishitu. Su mbyabya, nyingisha kifulo kyobe bwa Yehowa, bwa Yesu na bwa bantu n’obe, bino abikukwasha bwa kukumiina lwitamino lwa Yesu lwa kwikala mulobi a bantu.​—Mat. 22:37, 39; Yo. 14:15. w20.09 3 ¶4-5

Twi na muloo wa kutusha nsaa yetu, bukome na bintu byetu bwa kukimba baba “be na mashimba alombane bwa muwa wa looso.” (Bik. 13:48, NWT) Su twakita byabya, atulondo kileshesho kya Yesu bambile’shi: “Kyakudya kyande, nkukita akikyebe muntume, na kukumbasha mufubo waye.” (Yo. 4:34; 17:4) Nyi bi lukalo lwetu. Atukumiina kupudisha mudimo wabadi betupe. (Yo. 20:21) Na atukumiina’shi bangi, kusanga na baba balekye kulungula mukandu wibuwa, banyingile netu mu uno mudimo. (Mat. 24:13) Eyendo’shi, kukumbasha mudimo wabadi betupe kwi Yesu, ta nkubofule. Anka, tatwiukitshi bupenka. Yesu balayile’shi, ekala netu. Atukumbasha mudimo wa kwikasha bantu bu balongi bu “beena mufubo umune n’Efile Mukulu,” “pamune na Kidishitu.” (1 Kod. 3:9, Kilombeeno Kipya 2014; 2 Kod. 2:17, NWT) Byabya, twikwiukumbasha. Twi na kinemo kikata kya kukita uno mudimo na kukwasha bangi bwabadya kwiukita!​—Fid. 4:13. w20.11 7 ¶19-20

Kebungi, bitshibilo abyataa ba nambutwile abikalaa na bukitshi kwi bana babo mu mafuku aafiki. Su ba nambutwile baata bitshibilo bi bubi, mbilombene nkapetesha bana babo nkalakashi. Anka, su baata bitshibilo bi buwa, mbalombene kukwasha bana babo bwabadya kwikala na nshalelo e buwa. Kadi abitungu bana beatshile bitshibilo bi buwa. Kitshibilo kibuwa kyabadi balombene kwaata, nyi kufubila Nshetu sha kifulo, Yehowa. (Mis. 73:28) Baledi ba Yesu abaadi na kitshibilo kya kukwasha bana babo bwabadya kufubila Yehowa, na bitshibilo bibaabadi abaata bibaadi abilesha’shi, kufubila Yehowa kwi na muulo mu nshalelo abo. (Luk. 2:40, 41, 52) Na Yesu namu, baadi mwaate bitshibilo bibaadi bimukwashe bwa kukumbasha mpángo ya Yehowa. (Mat. 4:1-10) Yesu bafikile muntu e buwa, sha lulamato na munyingye eshimba. Boso ba nambutwile bafule Yehowa abekala na muloo wa kwikala na mwana e byabya. w20.10 26 ¶1-2

Banda kunangushena ku bino bileshesho bisatu. Mukwetu mukashi bapu kukula atentekyesha mafuku e buwa abadi mukishe ku bu nsongwa. Sunga ekala na nkalakashi binobino kwete akitshi mwaye moso bwa kufubila Yehowa. (1 Kod. 15:58) Efuku dyoso emonaa na bakwabo badi mufule mu nsenga ipya. Ungi mukwetu mukashi atentekyesha bibadi ungi mukwetu mukashi mu kakongye mumutape kwishimba, anka batshile kitshibilo kya kwibilwankana. (Kol. 3:13) Mukwetu mulume atentekyesha milwisho ibadi mukite, anka akitshi mwaye moso bwa kushala mulamate kwi Yehowa binobino. (Mis. 51:12) Mwanda kinyi wi mumune ukite bano bakwetu basatu? Oso akwabadi atentenkyesha myanda ya kala, anka t’abatumu binangu byabo ku yanka nya. Kadi meso abo ‘ngatadile kalolo kumpala.’ Bwakinyi bi na muulo? Nka bubi’shi bilombene muntu atala kunyima kwenda kumpala kalolo, n’atwe namu takwi balombene kufubila Yehowa su atunangushena nsaa yoso ku myanda ipwe kukila.​—Luk. 9:62. w20.11 24 ¶1-3

Babaadi bamone Daavide bu shii bukome kwi kimankinda kya ngoshi kya betamina bu Golyate. Golyate baadi kipambe, ki na biina ngoshi bikumbane, mmulongye bya kulwa ngoshi kalolo. Ku lungi lupese, Daavide baadi kii ka nsongwalume kashii kalongye ngoshi na kashii na biina ngoshi. Kadi Daavide baadi mukulupile mu bukome bwa Yehowa, anye nkwipa mwishikwanyi aaye. (1 Sam. 17:41-45, 50) Daavide baadi na kya kunyingiila lungi lukalakashi lubaadi alumubofusha. Daavide baadi mufubile Saule abaabadi basangule kwi Yehowa bwa kunkunkusha Isaleele. Kumpala, Nfumu Saule baadi aneemeka Daavide. Kunyima kwa mafuku, Saule babangile kukwatshila Daavide kyuutu. Babangile kumukitshina myanda ibubi, mpa na kukimba bya ku mwipaa. (1 Sam. 18:6-9, 29; 19:9-11) Sunga bibaabadi bamukitshine myanda kushii kululama kwi Nfumu Saule, Daavide baadi mutungunukye na kuneemeka nfumu abaabadi basangule kwi Yehowa. (1 Sam. 24:6) Anka, baadi mukulupile mwi Yehowa bwadya kumupa bukome bwadi nabo lukalo bwa kunyingiila lwalwa lukalakashi.​—Mis. 18:1, mayi a ku mbangilo kwa shapitre. w20.07 17 ¶11-13

Kipindji kikata kya butemuki pabitale nfumu a kuunundu na nfumu a kuushi nkipwe kulombana, byabya, tushinkamisheyi’shi kipindji kishale, akilombana n’aakyo namu. Bwa kupusha butemuki bwi mu Ndanyele shapitre 11 kalolo, abitungu tulamiine’shi, bukwete kulesha penda mafumu e na bukitshishi kampanda kwi mwilo w’Efile Mukulu. Sunga’shi bungi bwa bafubi b’Efile Mukulu mbupela ngofu patwibupwandikisha na bungi bwa bantu be mu nsenga ishima, myanda ibungi ikwete kukitshika mu nsenga ngibatale. Bwakinyi? Mwanda Satana na ndumbulwilo aaye be na kepatshila kamune​—ka kubutula baaba boso abafubila Yehowa na Yesu. (Kib. 3:15; Kibaf. 11:7; 12:17) Dingi, butemuki bwi mu mukanda wa Ndanyele mbwipushene na angi matemuki e mu Bible. Anka, bwatudya kwibupusha kalolo abitungu tutaluule bingi bipindji bya mu butemuki bwa Ndanyele. w20.05 2 ¶1-2

Bantu be bungi lelo uno be na mweneno ilekene pabitale abikalaa muntu kunyima kwa lufu. Anka Bible alongyesha kinyi? Nsaa ayifu muntu, mbidi yaye ayinyanga. Anka Yawa bapangile eyilu na nsenga, mulombene kusangula muntu na kumupa mbidi yoso yakumiina kumupa. (Kib. 1:1; 2:7) Mpoolo mutumiibwa badi mufubishe kileshesho bwa kuleshe’shi, Efile Mukulu te na lukalo lwa kusangula muntu na yaya mbidi imune. Banda kunangushena pabitale “lutete” kampanda. Nsaa y’abelukunu, alumene na alutuuku ka mutshi. Kaaka ka mutshi akamene, nkelekene ngofu na lutete lwabekalanga bakune. Mpoolo badi mufubishe kino kilesheho bwa kulesha’shi, Efile Mukulu mulombene kupa muntu “mbidi bu byaakyebe.” Mpoolo amba dingi’shi: “Kwi mbidi ya mwiyilu na mbidi ya pa nsenga.” Bino abilesha kinyi? Pa nsenga pe mbidi ya musamba na mase, anka mwiyilu mwi mbidi ya mu kikudi, bu yaya inayo ba mikeyilu.​—1 Kod. 15:36-41. w20.12 9-10 ¶7-9

Atue boso atukumiinaa kwikala na butaale mu nshalelo etu. Na muntu su ngumune t’akumiinaa kwikala na twinyongoshi. Sunga mbyabya, ingi nsaa twi kukalakashwa. Na kwiyipusha nka bibadi Mfumu Davide muiyiipushe Yehowa bu abibilesha mu kifundue kietu kya lelo. Kwi myanda i bungi ilombene kwitwinyongosha, anka ta twi na bukome bwa kwiyimika. Bu kileshesho, ta twi balombene kwimika myulo ya bintu ayikamina bu bya kudya, bilamba, na kufutshila kwa nshibo; sunga kuuka nsaa ilombene bena mudimo, sunga bena kalasa netu, kwitutompa bwa kudimba sunga bwa kukita myanda i butete. Na ta twi balombene kwimika buntomboshi bukwete kukitshika ma mbalo atudi. Tukwete kupeta ino nkalakashi, mwanda twibashale mu nsenga mwi bantu bash’abele binangu muyile miiya ya mu Bible. Satana, efile a ino nsenga auku’shi bantu be bungi mbalombene kwimika kufubila Yehowa mwanda wa ‘nkalakashi ya mûwa wa pano pa nsenga. (Mat. 13:22, EEM; 1 Yo. 5:19) Nyi bwakinyi t’abitukanyisha pa kumona’shi nsenga ngyule na myanda ayitwinyongosha! w21.01 2 ¶1, 3

Yowano mutumibua etutosha bwa kupela kushikwa bakwetu balume na bakashi. Su twakutwa kukokyela dingo elango, atwikala ku matalwa a Satana. (1 Yo. 2:11) Bino bibadi bikitshikile bangi ku nfudilo kwa siekele a kumpala B.B. Satana badi mukite mwaye moso bwa’shi kwikale mushikwa na kwiabulushena munkastshi a mwilo w’Efile Mukulu. Mu mafuku abadi Yowano mufunde uno mukanda, mu kakongye mu badi mupwe kwikala bangi bantu abalesha kikudi kya Satana. Bu kileshesho, Dyotrefese badi atwesha kwiabulushena mu kakongye. (3 Yo. 9, 10) Ta badi anemeka bakulu bababadi abatumu kwi kasaka ka bakunkushi-bakulu. Badi mpa na akyebe kubinga boso abadi abakukila bantu babadi mushikwe. Kuno nyi kwitatula kwi kashaa! Satana kwete akitshi mwaye moso lelo uno bwa’shi abuule mwilo w’Efile Mukulu. Tatukumanga kushikwa bakwetu balume na bakashi na kuleka kwibakwasha. w21.01 11 ¶14

Mu ngoshi ya kumpala ya nsenga ishima, bena Allemagne na bena Grande-Bretagne abaadi babingyebingye bafubi b’Efile Mukulu abaadi bapele kutwela busalayi. Na États-Unis baadi mwele baaba abaadi abakunkusha ndumbulwilo a Yehowa mu lukano. Kuno kubingwabingwa kubaadi kukumbashe butemuki bwi mu Kibafumbwilwe 11:7-10. Akupu, mu 1930 bikishekishe mu ngoshi ya kabidi ya nsenga ishima, nfumu a kuunundu baadi mukyengyeshe mwilo w’Efile Mukulu ngofu. Hitler na bantu baye abaadi bakandikye mudimo wa mwilo w’Efile Mukulu. Nfumu a kuunundu baadi mwipe bafubi ba Yehowa bafikye ku 1500 na kutuma binunu mu nkano mwabaadi abebafubisha midimo ibukopo. Nfumu a kuunundu baadi ‘musaabule mbalo i selele’ na ‘kutshibisha mulambo  . . . wa looso’ pa kwimika mudimo wa bulungudi. (Nda. 11:30b, 31a) Hitler Nfumu a Allemagne baadi mutshipe’shi ayipaa bafubi ba Yehowa boso be mu Allemagne. w20.05 6 ¶12-13

Patulesha bangi kifulo kya bu bana na bana, atulama kakongye ku kikudi kya kwipikena. Tentekyesha’shi Yonatane ta badi mutompe kwipikena na Davide, sunga kwikala bu mfumu pa mbalo yaye. (1 Sam. 20:42) Atwe boso twambuleyi kileshesho kya Yonatane. Tokwatshilanga bakwenu kyutu pa mwanda wa ngobesha yabo, ‘anka mu kwiyisha ikala omono bangi bu be kunuundu koobe.’ (Fid. 2:3) Uuka’shi oso muntu e mu kakongye e na muulo. Patwikala beyishe, atumono nyikashi i buwa ya bakwetu balume na bakashi na atulongyela ku bileshesho byabo bya lulamato. (1 Kod. 12:21-25) P’atwileshena kifulo kya bu bana na bana, atunyingisha buumune bwi munkatshi mwa mwilo w’Efile Mukulu. Atulesha’shi twi balongi ba Yesu na atukaka bantu basha mashimba alulame mu lulangwilo lwa binyibinyi. Na mwanda wi na muulo atutumbisha “Yaaya a lusa n’Efile Mukulu sha kusambana mu byooso,” Yehowa.​—2 Kod. 1:3. w21.01 24 ¶14; 25 ¶16

Lelo uno, atwe ba Temwe ba Yehowa bakwete kwitumona bisumanga na’shi ta twi na binangu na’shi twi babofule. Bwakinyi? Mwanda ta twi na mweneno umune na a bantu betwifunyishe nya. Atutompo kulesha kwiyisha, na kukookyela. Anka, bantu lelo uno mbakumiine ntumbo, kwitatula, na butomboshi. Na dingi, t’atutwelakanaa mu myanda ya politique, sunga kutwela busalayi mwiumbo su ndimune nya. Twi belekene ngofu na bantu ba pa nsenga lelo uno, nyi bwakinyi abetumonaa bu bashaadile. (Lom. 12:2) Sunga bantu ba pa nsenga ba pwandjikisha’shi twi babofule, Yehowa kwete kwitufubisha bwa kukita bintu bikata. Kwete kukumbasha mudimo wa kulungula mukandu wibuwa mu kipaso kishakitshikile pa nsenga. Bafubi baye bakwete kukita mudimo ukata wa kwaluula na kwabila mikanda mu nsenga ishima, na bakwete kufubisha Bible bwa kukwasha midiyo ya bantu bwabadya kulongamisha nshalelo aabo. Ntumbo yooso ya uno mudimo yende kwi Yehowa. w20.07 15 ¶5-6

Yesu akokyelaa na kunemeka Yehowa, kushi mwanda wa’shi mukutwe binangu sunga mayele. Malongyesha aye atokane na apelepele aalesha’shi badi na binangu bi bungi. (Yo. 7:45, 46) Yehowa auku’shi Yesu ena ngobesha i bungi, nyi bwakinyi Badi mukumine bwa’shi Yesu afube ku lupese Lwaye nsaa ibadi apanga bintu byoso bi mwiyilu na bi pa nsenga. (Nki. 8:30; Eb. 1:2-4) Kunyima kwa Yesu kusanguka Yehowa bamupele ‘matalwa oso mwiyilu na pa nsenga.’ (Mat. 28:18) Sunga byadi na ino yoso ngobesha, Yesu ky’atungunuka na kukulupila Yehowa bwa kupeta bukunkushi. Bwakinyi? Mwanda mufule Nshaye. Abitungu balume baukye bino Su Yehowa atekye mukashi bwa kukokyela na kunemeka mulume aye, ta nkwamba’shi amonaa bakashi bu bashadile kwi balume nya. Yehowa aye nabene mwibileshe pa kusangula bakashi na balume bwabadya nkamunana na Yesu. (Nga. 3:26-29) Yehowa muleshe’shi mukulupile Mwan’aye, pa ku mupa matalwa. Mu mushindo umune, mulume sha binangu apa mukash’aye ndambo ya matalwa. w21.02 11 ¶13-14

Eyi dy’Efile Mukulu di nka bu lumweno aditukwasha bwa kumona akitungu’shi tulumbule na mushindo wa kwibikita. (Shak. 1:23-25) Bu kileshesho, kunyima kwa kulonga Eyi dy’Efile Mukulu, twi kutundula’shi abitungu nkambile nsungu. Na bukwashi bwa Yehowa, twi balongye bya kwikala na kupopela nsaa i bantu sunga ingi myanda aitufiitshisha munda. Paapa atwikala na ngobesha ya kunangushena kalolo na kwata bitshibilo bi buwa. (Shak. 3:13) Nyi bwakinyi kuuka Bible kalolo kwi na muulo ngofu! Ingi nsaa atulongaa kyatusha kukita nka penda kunyima kwatwe kukita bilubilo. Mushindo wi buwa wa kupeta kinangu nyi kulonga bileshesho bi mu Bible bya bantu abadi bakite bi buwa na bi bubi. Nyi bwakinyi Shake etunyingisha bwa kulonga bileshesho bya bantu bu Abrahame, Rahabe, Yoobo na Eliya. (Shak. 2:21-26; 5:10, 11, 17, 18) Bano bafubi ba Yehowa ba sha lulamato, abadi na bya kunyingila nkalakashi ibadya kwibashimishisha muloo wabo. Bileshesho byabo bya kunyingila abileesha’shi, na bukwashi bwa Yehowa twi kukita namu nka bu’bo. w21.02 29-30 ¶12-13

Nsaa y’atushindjikila mulungudi mu kulonga Bible na muntu, aye nyi ena bushito bwa kukwasha mulongi aye a Bible bwa kupusha Eyi dy’Efile Mukulu kalolo. Lukalo lwetu ndwa kumukwatshishena. (Mul. 4:9, 10) Nkinyi kyodi mulombene kukita bwa’shi kwakwa kulonga kukitshikye kalolo? Elumbule bwa kulonga kwa Bible. Epusha mulongyeshi akulungule ingi myanda pabitale mulongi a Bible. Ouku kinyi pabitale mulongi obe a Bible? Mwisambo kinyi w’anukalongo? Okumina’shi mulongi obe a Bible alamine kinyi mu kino kipindji? Kwi myanda kampanda yandji mulombene kwakula sunga kukutwa kwakula nsaa y’atulongo su? Mushindo kinyi wandji mulombene kumunyingisha bwa kwela matabula? Anka, t’abitungu’shi mulongyeshi aye akule myanda itale mulongi ishi ilombene kuuka ungi muntu, kadi amulungule myanda ilombene kukwasha. Ungi mukwetu misionere abetaminaa bu Joy amba’shi: “Mwisambo bu uno aukwasha bakwetu ambashindjikila mu kulonga Bible na bantu bwa kuuka kyabadi balombene kwakula nsaa y’atulongo.” w21.03 9 ¶5-6

Ingi nsaa mbetushikwe mwanda atukokyela miya ilulame y’Efile Mukulu. Mweneno a Yehowa pabitale ki buwa na ki bubi mwilekene ngofu na mweneno a bantu pabitale ki buwa na ki bubi. Bu kileshesho, bantu be bungi lelo uno abapwandjikisha’shi kwikala na mwikelo wi butete, bu uno ubadi utakule Efile Mukulu bwa kubutula kibundji kya Sodome na Gomore, ta kwi bubi nya! (Yu. 7) Mwanda atukokyela miiya ya mu Bible pabitale uno mwikelo wi butete, bantu be bungi bakwete kwitusepa na kwitumona bu batshimbakane. (1 Mp. 4:3, 4) Nkinyi ki kwitukwasha bwa kunyingila nsaa ayitushikwa bantu na kwitukaa? Abitungu twikale na lukumino lwi bukopo’shi Yehowa etukwasha. Anka bu ngabo, lukumino lwetu ndulombene “kushima kaalo ka mikyetwe ya Mubi.” (Ef. 6:16) Anka ta twi na penda lukalo na lukumino nya. Twi na dingi lukalo na kifulo. Bwakinyi? Mwanda kifulo “taakikwata nsungu.” Akikumina na kunyigila myanda yoso i bubi. (1 Kod. 13:4-7, 13) Kifulo bwa Yehowa, bwa bakwetu bena Kidishitu mpa na bwa beshikwanyi netu ki kwitukwasha bwa kunyingila mushikwa. w21.03 20-21 ¶3-4

Ingi nsaa atulesha’shi twibafule bakwetu balume na bakashi, pa kupela kukita ingi myanda. Bu kilesheho, t’atufiitshi munda bukidibukidi pabitale by’abakula. Banda kunangushena pabibadi bikitshikile Yesu ku nfudilo kwa muwa waye pa nsenga. Balungwile balongi baye’shi, bwa kupeta muwa abitungu badye mbidi na kutoma mase aye. (Yo. 6:53-57) Uno ngakwilo badi mukalakashe balongi be bungi, abo nkuleka Yesu. Anka ba kuuku baye ba binyibinyi t’abadi bamulekye. Abadi bashale bamulamate. Kadi, bano balongi t’abadi bapushe kibadi akikyebe kwakula Yesu na abadi bakanye pa kwibipusha. Anka ba kuuku ba Yesu basha lulamato, t’abadi bapwandjikishe’shi byabya bibakula bi bubi na kumufiitshila munda nya. Anka, abadi bamukulupile baukye’shi bakula bya binyibinyi. (Yo. 6:60, 66-69) Kupela kufiita munda bukidibukidi pabitale bibakula ba kuuku betu, kwi na muulo ngofu! Pamutwe pa kufiita munda, twibalekye betupatulwile kyabakyebe kwakula.​—Nki. 18:13. w21.01 11 ¶13