Mueshi wa 11

Muyile mweneno eetu a bu muntu, twi kwamba Yoona bu muntu shii a kukulupila, na mukutwe lulamato. Yehowa bamupele mudimo wa kulungula mukandu wa kiimu kwi bena Ninive. Kadi pamutwe pa kukokyela, Yoona batwelele mu bwato enda ku ingi mbalo, “kula na Yehowa,” (Yon. 1:1-3, EEM) Su nnobe, bodya kumupa dingi ungi mudimo bwa kutala su akokyela? Nya. Kadi, Yehowa bebikitshine. (Yon. 3:1, 2) Mu luteko lwaye, Yoona balesheshe kyadi. (Yon. 2:2, 3, 10) Lumune lwa ku nteko​—ibaadi Yoona mwele​—alwitukwasha bwa kumuuka kalolo, kushi penda bu muntu baadi musuukye mudimo ubabamupele. Mayi aaye aalesha’shi baadi na kwiyisha, lutumbu, na baadi mwate kitshibilo kya kukokyela Yehowa. Kushi mpaka, Yehowa tabaadi mutale bilubilo bya Yoona, nyi bwakinyi baadi mwaluule ku luteko lwaye, na atungunuka na kumufubisha bu mutemuki! Bi na muulo ukata bwa’shi mukulu ooso ‘apushe kalolo’ kumpala kwa kutuusha elango! w20.04 15 ¶4-6

Bena Kidishitu ba mu siekele a kumpala abaadi bakumiine ano malongyesha, na kukulupila bukwashi bwa kikudi kiselele bwa’shi bapushe Eyi dy’Efile Mukulu. Abaadi bakimbuule bwa kushinkamisha’shi ano malongyesha abaadi emene mu Bifundwe. (Bik. 17:11, 12; Eb. 5:14) Lukumiino lwabo talubaadi lunyingye pa mwanda wa byabapusha, na tababaadi abafubila Yehowa penda mwanda wa’shi abaadi na muloo wa kwibunga na bakwabo bena Kidishitu nya. Anka, lukumiino lwabo lubaadi lunyingye mwanda wa ‘kyukilo kya binyibinyi ki’Efile Mukulu.’ (Kol. 1:9, 10) Bya binyibinyi bi mu Bible t’abishintulukaa. (Mis. 119:160) Bu kileshesho, t’abishintulukaa su mwina Kidishitu netu betulwishisha sunga kukita mulwisho ukata. Na t’abishintulukaa nsaa yatupete nkalakashi. Byabya, abitungu twiukye malongyesha a mu Bible kalolo na kushinkamisha’shi nga binyibinyi. Su twekala bashinkamishe bino, atukekala na lulamato mu nsaa ya nkalakashi. w20.07 9 ¶6-7

Yesu amonaa byabya byatukishina bakwabo bedibwe mwimu bu’ye atukitshina. (Mat. 25:34-40) Mushindo wi na muulo watukwatshishena bedibwe mwimu, nyi nkwikasha bantu bu balongi bu bibaadi bitulungule Yesu. (Mat. 28:19, 20) Ku bukwashi bwa “ingi mikooko,” bakwabo na Yesu mbalombene kulombasha mudimo wa bulungudi ukwete kukitshika lelo uno. (Yo. 10:16) Su we ungi mukooko, nsaa yoso yodi mu bulungudi, olesha kifulo kyobe bwa bakwabo na Yesu mpaa n’aye nabene. Atwikala dingi ba kuuku ba Yehowa na Yesu pa kutusha makuta etu bwa kukwatshishena mudimo wabakunkusha. (Luk. 16:9) Bu kileshesho, twi kutusha bya buntu bwa kukwatshishena mudimo wa nsenga ishima, bu kukwasha baba abapete masaku aatukila ku bintu bipangibwe. Twibalombene dingi kutusha makuta bwa kupudisha nkalo ya kakongye na kukwasha yawa oso atuuku’shi e mu lukalo.​—Nki. 19:17. w20.04 24 ¶12-13

Bwa kulombasha bwabwa butemuki, nfumu a kuunundu tabaadi ‘muneemekye Efile a ba nshaye’ su nkapeela. Mu mushindo kinyi? Bena Union soviétique, abaadi na kepatshila ka kushimisha bipwilo pa nsenga, abatompele kutshiba ndumbulwilo yoso ya myanda ya bipwilo. Bwa kulombasha yaya mpàngo yabo, mu 1918 abaadi batume eyi bwa’shi babangye kulongyesha myanda ya bantu bashabakumiinaa’shi Efile Mukulu e kwanka mu tulaasa. Mbikunyi bibaadi uno nfumu a kuunundu “aneemeka beefile ba bupeta”? Bena Union soviétique abaadi batushe makuta ebungi bwa kunyingisha bilwilo byabo na bwa kupwa ma bombe nucléaire e bungi. Ano mafuku, nfumu a kuunundu na a kuushi bakwete kukita ma mputu ebungi bwa kwipaa bantu! Nfumu a kuunundu na nfumu a kuushi mbafube pamune bwa kukita mwanda kampanda ukata; ‘mbatûle . . . kintu kya kubendwa akilwishakana bi kashâ.’​—kwambashi: Organisation des Nations unies.​—Nda. 11:31, EEM. w20.05 6-7 ¶16-17

Nanyi mulombene kukwasha mu uno mudimo wa kukimba balungudi bash’abafubu dingi na balekye kutwela mu bisangilo? Nnatwe booso​—bakulu, ba mbala-mashinda, bena kifuko, na balungudi ba mu kakongye. We na kuuku sunga mukwenu a mu kifuko mupwe kuleka kulungula na kutwela mu bisangilo su? We mufumankane na muntu shikwete kulungula dingi na kutwela mu bisangilo mu bulungudi boobe bwa ku nshibo na nshibo sunga poodi mu bulungudi bwa mbalo i bantu be bungi? Su yawa muntu akumiina nkulesha mbalo yadi mushaale sunga nkupa nimero yaye ya telefone, we mulombene kwibilungula bakulu ba mu kakongye kenu. Ungi mukulu abetaminaa bu Thomas amba’shi: “Kumpala, nayipushaa bakwetu belekene su abauuku ma mbalo ashale balungudi bash’abafubaa dingi na balekye kutwela mu bisangilo. Sunga kwipusha balungudi su abauku muntu kampanda shikwete kutwela dingi mu bisangilo. Kunyima, panende mu kutala mukwetu shikwete kulungula dingi, namwipusha pabitale bana baye na bangi bena kifuko naaye. Bangi babaadi abafiki na bana babo mu bisangilo, na bano bana babaadi babangye kukita bulungudi mu angi mafuku. Mpa n’abo dingi abitungu kwibakwasha bwabadya kwalukiila kwi Yehowa.” w20.06 24 ¶1; 25 ¶6-7

Mukantshi mwa bipangwa byooso bi pa nsenga, penda bantu mbekale na ngobesha ya kulonga myanda itale mwikeelo wibuwa, pa kutentekyesha na kutaluula myanda ipwe kukila. Bu kipeta, twi kulonga miiya kalolo na kushintula nshaleelo na mushindo wetu wa kunangusheena. (1 Kod. 6:9-11; Kol. 3:9, 10) Byabya, atulongyesha kondo keetu k’eshimba bya kutundula ki buwa na ki bubi. (Eb. 5:14) Twi balombeene kulonga bya kulesha kifulo, na lusa. Na kulonga bya kwambula kululama kwa Yehowa. Kipaso kimune kyatulesha’shi twi na lutumbu bwa kyabuntu kitupe Yehowa kya ngobesha ya kulamiina myanda, mpa kwikala atutentekyesha nsaa yoso mushindo ubaadi mwitukwashe na kwitunyingisha kala. Paapa atwikala bashinkamishe’shi aketukwasha mu mafuku aafiki. (Mis. 77:12; 78:4, 7) Kingi kipaso kyatudya kwikala na lutumbu, mpa kutentekyesha myanda ibuwa yabadi betukitshine kwi bangi. Bantu abakimbuulaa myanda abamba’shi, muntu e na lutumbu ekalaa na muloo. w20.05 23 ¶12-13

Banda kunangushena bibaadi bipushe Moyiise nsaa ibaadi mwiname pa lubwebwe na kumona mu kimonwa ntumbo ya Yehowa ayikidi. Abimweka’shi takubaadi ungi muntu mumone kimonwa kibino kumpala kwa’shi Yesu afikye pano pa nsenga. Moyiise baadi mupushe mayi ababadi bakule kwi mwikeyilu’shi: ‘Yehowa! Yehowa! Efile sha lusa na kalolo, shyaakwataa nsungu bukidi, muule na kifulo na boolokye sunga bya binyibinyi; ashaala mulamate binunu bya ntandwa, alekyelaa bilema, [bilubilo] na milwisho.’ (Efi. 33:17-23; 34:5-7) Abimweka’shi kyakya kimonwa kibaadi akimufwila mbinangu pabaadi atemuna eshina Yehowa, mu mayi a kifundwe kyetu kya lelo. P’atunangushena pabitale eshina Yehowa, bibuwa twele binangu kwi winyi sha dyadya eshina. Abitungu tutentekyeshe ngikashi yaaye, bu bukome bwaye, binangu byaye, kululama kwaye, na kifulo kyaaye. Kunangushena ku ino ngikashi na ingi nkulombene kwitutakula mu kumunemeka ngofu.​—Mis. 77:11-15. w20.06 8-9 ¶3-4

Yesu bakwile’shi abakatundula balongi baye ku kifulo kyabeleshena. (Yo. 13:34, 35) Kadi abitungu tukite kingi kintu su atukumiina kwikala na lukumiino lunyingye. Lukumiino lwetu tabitungu lwimeene penda pa kifulo ki munkatshi mwa mwilo w’Efile Mukulu nya. Bwakinyi? Pwandjikisha’shi mwina Kidishitu​—byekala mukulu sunga mbala-mashinda​—bakitshi mulwisho ukata. Sunga’shi ungi mukwetu mulume sunga mukashi e kukutapa kwishimba sunga kusumbula lukumiino na kwakula’shi tatwi na bya binyibinyi. Su bino byakitshika, we kuleka kufubila Yehowa su? Bino abitulongyesha’shi: Su lukumiino loobe mwi Efile Mukulu ndwimene pa bikitshino bya bantu, pamutwe p’odya kwikala obe nabene mu kipwano na Yehowa, lukumiino loobe talwikala lunyingye. Mushindo w’opusha pabitale Yehowa na mwilo waye ngulombene nkukwasha bwa kwikala na lukumiino. Kimbuula ngofu bwa kushinkamisha’shi byolongo pabitale Yehowa mbya binyibinyi. Abitungu oshinkamishe obe nabeene’shi malongyesha e mu Bible pabitale Yehowa nga binyi.​—Lom. 12:2. w20.07 8 ¶2-3

Myanda ibungi ikitshikye ayilesha’shi ba mwikeyilu bakwete kufuba pamune netu bwa kwitukwasha tupete balungudi bash’abafubu dingi na balekye kutwela mu bisangilo be na lukalo lwa kwalukiila kwi Yehowa. (Kibaf. 14:6) Bu kileshesho, Silvio, a mu Equateur, badi mwele luteko ngofu bwadya kwalukiila mu kakongye. Pabaadi kyele luteko, bakulu babidi abakokwele ku kibelo kyaaye. Nsaa ibabafikile kwadi, babaadi na muloo wa kubanga kumupa bukwashi bubaadi nabo lukalo. Atupete muloo wibungi mu kukwasha kwa bantu babofule mu kikudi bwa kwalukiila kwi Yehowa. Pusha abyakula Salvador, mbala-mashinda apasukilaa bantu bashikwete kulungula dingi, amba’shi: “Ingi nsaa, abinyikelaa bukopo bwa kukutwa kudila. Napushaa muloo wa kunangushena’shi Yehowa mmwabule mukooko waaye wibuwa mu ndumbulwilo a Satana na ne mupete kinemo kya kufuba pamune Naaye mu uno mudimo.” Su boodi mulekye kwibunga na mwilo wa Yehowa, shinkamisha’shi enka mukufule. Yehowa atengyela’shi walukiile kwadi, na ekala na muloo ukata wa nkukuukila. w20.06 29 ¶16-18

Bu byaadi ‘Mulongyeshi eetu Mukata,’ Yehowa mmutushe bileshesho bi bungi Mwiyi dyaaye bwa kwitulongyesha. (Yesh. 30:21) Atulongo nsaa yatunangushena pabitale bileshesho bya bantu be mu Bible abaadi baleshe ngikashi ayisankisha Efile Mukulu. Atulongo dingi pa kutaluula bibaadi bikitshikile booso bashibaadi baleshe ino ngikashi i buwa. (Mis. 37:37; 1 Kod. 10:11) Banda kunangushena pa bibaadi bikitshikile Nfumu Saule. Pabaadi nsongwalume, baadi auku mikalo yaaye, baadi mpa na akyebe kupela mashito ebungi. (1 Sam. 9:21; 10:20-22) Kadi mwenda mafuku, babangile kwitatula na nkukita bintu byashibaadi na matalwa a kukita. Baadi muleshe uno mwikelo wi bubi nk’aye kyafiki bu nfumu. Dingi efuku, baadi mukutwe lwishinko nsaa ibaadi atengyela mutemuki Samwele na aye nkalambula mulambu, aku tabaadi na matalwa a kwibikita. Nyi bwakinyi baadi mushimishe kipwano kyaye na Yehowa mpa na bufumu. (1 Sam. 13:8-14) Bibuwa tulongyele ku kino kileshesho akitudimusha na kupela kukita kintu kyatushii na matalwa a kukita. w20.08 10 ¶10-11

Eyendo’shi kukiila kwi Kidishitu, Yehowa mmwitupe “bantu [bekale] bya buntu” mu kakongye. (Ef. 4:8) Mu bano “bantu [bekale] bya buntu” mwi Kasaka ka Bakunkushi Bakulu, bakwashi baabo, bena Komite a filiale, bakunkushi ba bifunda, balongyeshi ba ku tulaasa twa teokrasi, bakulu mu tukongye, na bafubi ba midimo. Bano bakwetu booso mbebasangule kwi kikudi kiselele, bwa kupasukila mikooko ya Yehowa na kunyingisha kakongye. (1 Mp. 5:2, 3) Kikudi kiselele kikwete kusangula bakwetu balume bwabadya kutwala mashito elekenelekene. Nka bu abifubaa bingi bipindji bya mbidi bu maboko na mikoolo bwa kukwasha mbidi ishima, bakwetu balume babadi basangule kwi kikudi kiselele bakwete kufuba ngofu bwa kukwasha kakongye kashima. Tabakwete kukimba nkumo yabo nya. Anka, bakwete kwitatshisha bwa kunyingisha bakwetu bena Kidishitu. (1 Tes. 2:6-8) Atutumbula Yehowa bwa bano bantu banyingye mu kikudi, bashabatala penda nkalo yabo baadi mwitupe! w20.08 21 ¶5-6

Kabingilo kamune aketutakula mu kulungula mukandu wibuwa nka’shi bantu ‘mbakookye na mbafwambukye,’ na be na lukalo lwa kuuka bya binyibinyi pabitale Bufumu bw’Efile Mukulu. (Mat. 9:36) Yehowa akumiina’shi bantu ba mishindo yooso bapete kiukilo kya binyibinyi na bapashibwe. (1 Tim. 2:4) Patunangushena ku mushindo ulombene mudimo wetu wa bulungudi kupasha bantu, bino abitupa muloo wa kwiulungula. Atupasha myuwa ya bantu. (Lom. 10:13-15; 1 Tim. 4:16) Twi na lukalo na bina mudimo bibuwa mu mudimo wa bulungudi na kuuka bya kwibifubisha kalolo. Yesu baadi mulungule balongi baye mushindo ubabadya kulungula mukandu wibuwa. Badi mwibalungule kyabadya kwata, mbalo yabadya kulambukisha na kyabadya kwakula. (Mat. 10:5-7; Luk. 10:1-11) Lelo uno, ndumbulwilo a Yehowa mmutushe kashete ka bina mudimo ke na bintu byooso bilombene kwitukwasha bwa kukita mudimo kalolo. Na kwete kwitulongyesha mushindo wa kwibifubisha. Aa malongyesha aetukwasha bwa kwikala bashinkamishe bya binyibinyi byatulambukisha na kupeta ngobesha yatudi nayo lukalo bwa kwikala balongyeshi bebuwa.​—2 Tim. 2:15. w20.09 4 ¶6-7, 10

Banda kunangushena bibaadi bipushe Yowano mutumiibwa nsaa ibaadi mupushe’shi, baaba babaadi mukwashe bwa kulonga bya binyibinyi bakwete kutungunuka na kufubila Yehowa na lulamato! Abaadi bafumankane na nkalakashi ibungi, na Yowano baadi mufube ngofu bwa kunyingisha lukumiino lwa bano bena Kidishitu basha lulamato, babaadi amono bu bana baye ba mu kikudi. Mu mushindo umune, atwikalaa na muloo nsaa yatumono bana betu, byabekala ba ku mbidi sunga ba mu kikudi, abelambula kwi Yehowa na kutungunuka na kumufubila. (3 Yo. 3) Pangi mu kipwa kya 98 B.B., kikudi kiselele kya Yehowa kibaadi kikwashe Yowano bwa kufunda mikanda isatu. Kepatshila ka ino mikanda kabaadi ka kunyingisha bena Kidishitu basha lulamato bwabadya kulama lukumiino lwabo mwi Yesu, na kutungunuka na kutambukila mu bya binyibinyi. Yowano baadi akalakashwa mwanda wa bukitshishi bwa malongyesha a madimi mu kakongye. (1 Yo. 2:18, 19, 26) Bano bantu basumbule lukumiino abaadi abeamba’shi abauuku Efile Mukulu, kadi tababaadi abatumikila miiya ya Yehowa. w20.07 20 ¶1-3

Twi na lukumiino mu mukandu watulungula, nyi bwakinyi atukumiina kwiulungula bantu bebungi. Twi bakulupile milayilo i Mwiyi dy’Efile Mukulu. (Mis. 119:42; Yesh. 40:8) Lelo uno, tukwete kumona mushindo aulombana matemuki a mu Bible. Tukwete kumona abilumbuluka nshalelo a bantu nsaa y’ababanga kutumikila malongo e mu Bible. Bino abitushinkamisha’shi mukandu wibuwa wa Bufumu, nyi mukandu autungu’shi muntu ooso apushe. Twi na dingi lukulupilo mwi Yehowa, sha mukandu watukwete kulambukisha na mwi Yesu Nfumu a Bufumu bw’Efile Mukulu. Sunga twafumankana na lukalakashi kinyi, Yehowa ekala kwanka nsaa yooso bu kifwamino kyetu na bukome bwetu. (Mis. 46:2-4) Na dingi, twibashinkamishe’shi Yesu kwete kukunkusha mudimo wa bulungudi kukatukila mwiyilu, na kufubisha bukome na matalwa byabadi bamupe kwi Yehowa. (Mat. 28:18-20) Lukumiino alwitukwasha bwa kushinkamisha’shi Yehowa etwelela myabi bwa kwitatshisha kwetu. w20.09 12 ¶15-17

Ingi nsaa bakwetu bakashi abekalaa na lukalo lwa muntu a kwibakwila nsaa y’abapete lukalakashi kampanda. (Yesh. 1:17) Bu kileshesho, mukashi kilele sunga mukwetu mukashi mwipelene na mulume aye, mbalombene kwikala na lukalo lwa muntu akwibakwasha bwa kukita tungi tu midimo tubaadi balume baabo abakitshi. Mukwetu mukashi baapu kununupa ekwikala na lukalo lwa muntu mulombene kwisamba na doktere. Sunga’shi mukwetu mukashi mbala-mashinda kwete kufuba ingi midimo ya teokrasi, mulombene kwikala na lukalo lwa muntu akumwakwila nsaa i bangi abamwakula bi bubi pabitale bya sha lombasha kalolo mudimo waye wa bu mbala-mashinda. Tutaluuleyi dingi kileshesho kya Yesu. Yesu baadi akwikala bakwabo bena Kidishitu bakashi bukidibukidi nsaa ishii baadi bantu abebapushisha. Bu kileshesho, baadi mwakwile Maariya nsaa ibabaadi abamwakula bi bubi kwi Maata. (Luk. 10:38-42) Baadi dingi mu mwakwile nsaa ibaadi bangi abamwakula bi bubi pabitale kitshibilo kyaye. (Mak. 14:3-9) Yesu baadi mutundule kibaadi kitakule Maariya bwa kukita byabya na aye nkumutumbula. Baadi mpa na mutemukye’shi “kooso kwana lungudibwe uno mukandu wibuwa pa nsenga poso,” ba n’akule namu pabitale kaka kalolo kaye. w20.09 24 ¶15-16

Mulami ebuwa atundula’shi, mukooko ubashimina. Na su mukooko ubakatuka munkatshi mwa ikwabo, mulami tabaadi eunyooko nya. Tala kileshesho kitulekyele Yehowa nsaa ibaadi mukwashe bangi ba ku bafubi baye bashibaadi bakite bibaadi mwibatekye bwa kukita. Mutemuki Yoona baadi mupele kwenda ku Ninive kubaadi Yehowa mumutume. Sunga mbyabya, Yehowa tabaadi mumusumbushene nya. Nka bu mulami ebuwa, Yehowa baadi mukwashe Yoona na kumupa bukome bubaadi nabo lukalo bwa kulombasha mudimo waye. (Yon. 2:7; 3:1, 2) Kunyima, Yehowa baadi mufubishe mulundo bwa kumupushiisha kalolo muulo winao muntu oso yawa. (Yon. 4:10, 11) Bino abitulongyesha kinyi? Tabitungu’shi bakulu basumbushene bukidi-bukidi baba boso balekye kulungula mukandu wibuwa na kutwela mu bisangilo nya. Anka, bibuwa baukye bwakinyi mukooko ngulekye kufubila Yehowa. Nsaa y’awaluka kwi Yehowa, bakulu abatugunuka na kwiulesha kifulo na kwiupasukila. w20.06 20-21 ¶10-12

Kunyima kwa kupona kwa bufumu bwa Union soviétique mu 1991, bafubi b’Efile abaadi mu yaya mbalo abapetele “ndambw’a bukwashi”​—nkwamba’shi abapetele kwiyikela. Nyi bwakinyi, abaadi na mushindo wa kulungula mukandu wibuwa mu bulungantu, na mu mafuku apeela, bungi bwa balungudi bubakamiine ngofu mu aa maumbo a bena Union soviétique. Kadi, ndambo ya bipwa kunyima, Russie na angi maumbo akwete kumukwatshishena, mbafikye bu nfumu a kuunundu. Bwashi bufumu kampanda bwikale bu nfumu a kuunundu sunga a kuushi, abitungu bukite myanda isatu: (1) bukyengyeshe mwilo w’Efile Mukulu, (2) buleshe ku bikitshino byabo’shi mbushikwe Yehowa na mwilo waye, na (3) bulwe na bungi bufumu. Russie na maumbo aamukwatshishena bakwete kukyengyesha mwilo w’Efile Mukulu, pa kukandjika mudimo wa bulungudi na kubingabinga bakwetu. Bino bikitshino abilesha’shi mbashikwe Yehowa na mwilo waye. Na bakwete kulwa na nfumu a kuushi, kwamba’shi, bena bufumu bwa nsenga ishima bwa Angleterre na bena Amérique. w20.05 12-13 ¶3-4

Bu bii kulongyesha akwikasha bantu bu balongi, abitungu twikale balongyeshi be buwa. Tukwete kulonga Bible na bantu midiyo mu nsenga ishima. Twi bafule myanda i mu Bible y’atulongyesha. Byabya twibalombene kwiyakwila mund’a kipindji kii bula. Anka, t’abitungu muntu akunkusha Kitenta kya Mulami, Kulonga kwa Bible mu kakongye, sunga Kulonga Bible na muntu ku nshibo kwê ekala akuula ngofu. Bwa kufubisha Bible kalolo nsaa yalongyesha, abitungu mulongyeshi adimukile kukamba kwakula na kutompa kupatuula kantu koso kauku pabitale kifundwe kampanda sunga mwanda kampanda. (Yo. 16:12) Pwandikisha kiukilo kya Bible kiboodi nakyo nsaa iboodi mubatshishibwe na kitodi nakyo binobino. Nsaa iboodi mubatshishibwe, boodi pangi ouku penda malongyesha akata a mu Bible. (Eb. 6:1) Bibaadi bikwaate bipwa bi bungi bwa kwikala na kiukilo kyodi nakyo lelo uno, nyi bwakinyi tokumanga kutompa kulongyesha mulongi mupya myanda yoso musango umune. w20.10 14-15 ¶2-4

Yehowa badi musangwile Yesu baledi be buwa. (Mat. 1:18-23; Luk. 1:26-38) Mayi a Maariya e mu Bible aalesha mushindo ubaadi mufule Yehowa, n’Eyi dyaye n’eshimba dyoso. (Luk. 1:46-55) Na mushindo ubaadi Yoosefe mukookyele bukunkushi bwa Yehowa, ubaadi uleshe’shi mmufule Efile Mukulu na akumiina ku musankisha. (Mat. 1:24) Lamiina’shi Yehowa ta baadi musangwile Mwan’aye baledi ba mpeta. Mulambu ubaadi Yoosefe na Maariya batushe kunyima kwa kutandjikwa kwa Yesu, aulesha’shi abaadi balanda. (Luk. 2:24) Abimweka’shi t’abaadi na makuta sunga bintu bya ku mbidi bi bungi, bikishekishe mwanda wa bana musambo sunga kukila paapa bataabadi nabo. (Mat. 13:55, 56) Yehowa baadi mukalwile Yesu ku angi masaku, anka Ta baadi Mumukalwile ku nkalakashi yoso ibaadi mupete. (Mat. 2:13-15) Bu kileshesho, Yesu baadi na bena kifuko ba’shi baadi bamukumiine musango umune’shi Mesiya. (Mak. 3:21; Yo. 7:5) Dingi, abimweka’shi Yosefe bafwile pabaadi Yesu ki nsongwa, na bino bibaadi bimukalakashe ngofu. w20.10 26-27 ¶4-6

Tobwepushishe bu e bupenka, na’shi ta kwi muntu su ngumune mulombene nkukwasha bwa kunyingila lukalakashi su? Be bungi tababepushishe namu nka byabya, mpa na bafubi ba sha lulamato ba Yehowa. (1 Bf. 19:14) Su bino byakukitshikila, ntentekyesha mulayilo wa Yehowa awamba’shi: “Ami ntankakuleka sunga nkukusuumbusheena nya.” Twi kwakula na kushinkamisha koso’shi: “Yehowa nyi mukwashi ande dingi ntankeekala na moo.” (Eb. 13:5, 6, Kilombeeno Kipya 2014) Mpoolo badi mufundjile bena Kidishitu abadi mu Yudeya ano mayi pangi mu kipwa kya 61 bino bipungo byetu (B.B.) Mayi aye aetutentekyesha e mu Mis. 118:5-7 Nka bu mufundji a Misambo, Mpoolo badi auku’shi Yehowa nyi mukwashi aye mwanda tabadi mupwe kumukwasha kumpala. Bu kileshesho, bipwa bibidi kumpala kwa’shi afundjile bena Ebelu mukanda, Mpoolo badi mwende lwendo lwa masaku mwanda wa bipapi bi bukopo bibadi mu kalunga ka mema. (Bik. 27:4, 15, 20) Kipwa kimune kumpala kwa luno lwendo, Yehowa badi muleshe’shi nyi mukwashi a Mpoolo mu mishindo ilekene. w20.11 12 ¶1-2

Bwakinyi ta bi buwa kunangushena nsaa yoso’shi nshalelo atubadi naye badi mukile buwa? Mwanda bino bilombene kwitutakula nka penda ku myanda i buwa ya kala. Banda kutala kileshesho kya bena Isaleele. Kunyima kwabo kutuka mu Ejiipitu, abadi balube bukidibukidi nshalelo e bubi ababadi naye mwanka. Anka abo nkutuma binangu byabo penda ku byakudya bi buwa. Babadi abamba’shi: “Tubatentekyesha bya kudya byetu bya tubedîlanga buntu mu Eshipitu: mishipa na makâka na melô na pwalo na tutungulu mpâ na ai.” (Mb. 11:5, EEM) Binyibinyi shi ‘abebidîlanga buntu?’ Nya. Bena Isaleele abadi abakyengye ngofu; ingi nsaa abadi abebakyengyesha mu Ejiipitu mwanda’shi abadi ba mpika. (Efi. 1:13, 14; 3:6-9) Anka, abadi bayilwankane ino yoso nkalakashi, na abo nkubanga kulakila myanda ya kala. Abadi basangule bwa kutuma binangu byabo ku myanda ya kala ibadi ayibasankisha, pamutw’a ku nangushena ku myanda ibadi Yehowa mu katukye mu kwibakitshina. Yehowa ta badi musangale bwa uno mweneno abo nya.​—Mb. 11:10. w20.11 25 ¶5-6

Ingi nsaa twi kunangushena pabitale bwipi bwa muwa wetu na’shi mafuku etu “[ngaule] na nkalakashi ingi.” (Yob. 14:1) Nyi bwakinyi atubofulaa ku mashimba. Kala, bafubi ba Yehowa be bungi abadi abepusha nka bino. Bangi abadi abatekye mpa na lufu. (1 Bf. 19:2-4; Yob. 3:1-3, 11; 7:15, 16) Anka misuusa yoso, Yehowa​—Efile Mukulu ababadi bakulupile,​—badi nk’ebasamba nakwibanyingisha. Miisambo yabo mbeyifunde bwa kwitusamba na kwitunyingisha. (Lom. 15:4) Tutaluuleyi kileshesho kya Yosefe mwana a Yakobo. Mu kapindji kapeela, Yosefe ababadi bafule kwi nshaye, bafikile mpika, shi na muulo mu Ejiipitu, afubila muntu shauku Yehowa. (Kib. 37:3, 4, 21-28; 39:1) Akupu, mukashi a Potifare badi mumudimbile’shi, bakyebe kutambuka naye pa bukopo. Potifare kwashabandile kukimba bwa kuuka su mbya binyi, badi mumweleshe mu lukano, na abo nkumwanya myoshi ya byamo. (Kib. 39:14-20; Mis. 105:17, 18) Binyibinyi’shi Yosefe badi na kabingilo ka kubofula kwishimba! w20.12 16-17 ¶1-4

Nyi mwanda ubaadi Yesu mutemune kumpala mu luteko. Kadi mayi a Yesu aalesha kinyi? Kutumbisha kintu kampanda akulesha kukita bya’shi tabekisabuulanga. Bangi mbalombene kwiyipusha’shi, ‘eshina dya Yehowa di na muulo kukila angi mashina oso su?’ Bwa kupeta lwalulo, bibuwa tutale akipatuulaa eshina. Eshina ta mpenda mwaku wa kufunda kwisaki sunga kuteemuna nya. Pusha abyamba Bible: “Nkumo [eshina NWT] iibuuwa ngikile bupeta ku muulo.” (Nki. 22:1; Mul. 7:1) Bwakinyi eshina di na muulo wi byabya? Pa mwanda nditale nkumo, mushindo aupwandikisha bangi pabitale yawa e na dyadya eshina. Byabya, nkumo y’eshina ntangitale mushindo wabedifundu​—sunga wabedibadika nya, ngitale mushindo aunangushena bantu nsaa yabamono sunga kupusha dyadya eshina. Nsaa i bantu abadimbiila Yehowa, abalwisha nkumo yaaye. Nsaa yabalwisha nkumo. w20.06 3 ¶5-7

Twi balombene kwikalakasha pabitale myanda kampanda mu mushindo watushi balombene kunangushena pabitale kingi kintu. Bu kileshesho, twi kwikalakasha’shi ta tupete makuta e kulombasha nkalo yetu, na’shi twi kukumba, kukutwa mudimo sunga kwiushimisha. Twi balombene kwikalakasha dingi’shi nsaa y’atupete myanda ayitompo lukumiino lwetu, twi kukutwa kukokyela miiya y’Efile Mukulu. Binobino, Satana akatakula baba be ku matalwa aaye, bwa kulwa na mwilo wa Yehowa, nyi bwakinyi twi balombene kwikalakasha pabitale byatukakitshi yaya nsaa. We kwiyipusha’shi, ‘bi bubi n’ekalakashe pabitale ino myanda su?’ Atuuku bi badi Yesu mulungule balongi baye’shi: ‘Tanwikalakashanga.’ (Mat. 6:25, EEM) Yesu badi akyebe kwamba’shi tatwikalakashanga bwa kintu su nkimune? Nya! Bangi ba ku bafubi ba Yehowa ba sha lulamato ba kala, abadi bakalakashwe na twinyongoshi, anka Yehowa tabadi mwibasumbushene. (1 Bf. 19:4) Yesu kwete etukankamika. T’akumiina’shi twinyongole bwa kupeta bintu bya uno nshalelo na kwibyata na muulo kukila kufubila Yehowa. w21.01 3 ¶4-5

Nyi bwakinyi mulume akalubwila Yehowa na Yesu mushindo wakitshina kifuko kyaye myanda. (1 Mp. 3:7) Bu byadi Mfumu a kifuko ki mwiyilu na ki pa nsenga, Yehowa e na matalwa a kwela miiya pabitale mwikelo autungu’shi bana baye bekale nao, na kukamika bwa’shi bakokyele ino miiya. (Yesh. 33:22) Mu mushindo umune, bu byadi mfumu a kakongye ka bena Kidishitu, Yesu e na matalwa a kwela miiya na kwiyikamika. (Nga. 6:2; Kol. 1:18-20) Nka bu Yehowa na Yesu, mfumu a kifuko e na matalwa a kwata bitshibilo pabitale kifuko kyaye. (Lom. 7:2; Ef. 6:4) Anka matalwa aye e na mikalo. Bu kileshesho, abitungu miiya yaye imene pa mayi a kulonda e Mwiyi dy’Efile Mukulu. (Nki. 3:5, 6) Na mfumu a kifuko, te na matalwa a kwelela bantu ba shi mu kifuko kyaye miiya. (Lom. 14:4) Na dingi, nsaa i bana baye abakulu na kukatuka ku nshibo, abatungunuka nka na ku mu nemeka, anka ta baki dingi ku matalwa aye nya.​—Mat. 19:5. w21.02 2-3 ¶3-5

Mwanda wi na muulo aulesha mfumu a kifuko’shi mufule kifuko kyaye, nyi kulombasha nkalo yabo ya ku mbidi. Anka, abitungu atentekyeshe’shi kintu ki na muulo ngofu, nyi kukwasha kifuko kyaye bwakidya kwikala mu kipwano ki buwa na Yehowa. (Mat. 5:3) pabadi Yesu ku mutshi wa makyenga. Sunga bi tabadi pa kufwa, Yesu badi mulungule Yowano mutumibua bwadya kupasukila Mariya. (Yo. 19:26, 27) Mfumu a kifuko mulombene kwikala na mashito e bungi, e kwikala na kisumi ku mudimo waye wa ku mbidi, na bino abitumbisha Yehowa. (Ef. 6:5, 6; Tt. 2:9, 10) Na mulombene kwikala dingi na mashito e bungi mu kakongye bu: kwenda mu kunyingisha na kupasukila bakwetu bena Kidishitu, na kwikala na kisumi mu bulungudi. Na dingi bi na muulo bwa’shi ekale alongo Bible na kifuko kyaye. Kifuko kyaye akikala na lutumbu lwi bungi bwa byoso bya kwete kukita bwa’shi bekale na mbidi bukome na muloo, mpa na kulama kipwano kyabo na Yehowa.​—Ef. 5:28, 29; 6:4. w21.01 12 ¶15, 17

P’akwila mudimo wa mukashi sha kinangu, Bible amba’shi mulombene kukunkusha midimo ya mu nshibo, kuula na kuudisha bintu. (Nki. 31:15, 16, 18) Ta mpika shi mulombene kutusha aye mweneno. Anka mulume aye mu mukulupile na ateemesha bi binanagu byaye. (Nki. 31:11, 26) Nsaa i mulume anemeka mukashi aye mu kino kipaso, mukashi apete muloo wa kumunemeka na kumukokyela. Sunga bikwete Yesu kukita myanda ikata, ta kwete kumone kukokyela na kunemeka Yehowa bu kwishibwa kwa milongo. (1 Kod. 15:28; Fid. 2:5, 6) Mu mushindo umune, mukashi sha binangu alondo kileshesho kya Yesu, t’amono kukokyela na kunemeka mulume aye bu kwishibwa kwa milongo. T’akwatshishena mulume aye penda mwanda’shi mumufule, anka mwanda’shi mubadile kufula Yehowa na kumunemeka. Anka mukashi sha kanemo na akokyela mulume aye, t’amukwatshishena nsaa y’amutekye bwa kukita kintu kikutwene na miiya ya mu Bible. w21.02 11 ¶14-15; 12 ¶19

Kifulo kya Yehowa akikwasha bafubi baye bwabadya kunyingila kubingwabingwa. Bu kileshesho, nsaa ibadi tumiladi tukata kwa bena Yuda tutoshe batumibwa bwabadya kulungula mukandu wibuwa, kifulo bw’Efile Mukulu kibadi kibatakule bwabadya ‘kukokyela Efile Mukulu pe kukokyela bantu.’ (Bik. 5:29; 1 Yo. 5:3) Kino kifulo ki bino, kikwete dingi kunyingisha bakwetu lelo uno, mwanda be bungi bakwete abashala banyingye kumpala kwa bu ntomboshi na kwa mbulamatadi. Nsaa y’abetushikwa kwi bantu ba pano, t’atubofula kwishimba nya, anka twi na muloo. (Bik. 5:41; Lom. 5:4, 5) Pangi lukalakashi lukata alufiki kwi bena kifuko netu. Nsaa y’atubanga kufula bya binyibinyi, bena kifuko netu be kupwandjikisha’shi tubadimbibwa. Bangi be kupwandjikisha’shi, tubapauka mombe. (Pwandjikisha na Maako 3:21.) Mbalombene mpa na kwitunkyengyesha ngofu. Uno mushikwa ta ngulombene kwitukanyisha nya. Yesu bambile’shi: “Beshikwanyi ba muntu banekale ba mu nshibo yaye.”​—Mat. 10:36. w21.03 21 ¶6-7

Teemesha kalolo nsaa ayisamba mulongyeshi na mulongi aaye a Bible. Paapa, we mulombene kuuka nsaa i buwa yodya kwakula. Anka, abitungu onangushene kumpala kodya kwakula. Bu kileshesho, t’abitungu kwakula bi bungi, kutshiba mulongyeshi ku mayi sunga kutwesha ungi mwisambo. Anka, kutusha binangu bitshintshikile, kileshesho, sunga kwela lukonko, nkulombene kukwasha sunga kutosha mwanda wanukwete kulonga. Ingi nsaa we kumona’shi tw’ena bi bungi bya kwakula pa mwanda w’anwisamba. Kadi su otumbula mulongi na kulesha by’omupasukila, okitshi bi bungi bwa ku mukwasha bwadya kwela matabula. Su kwi mushindo, we kulungula mulongi a Bible mu kitshibo byodi mulongye bya binyibinyi, byodi mukambile lukalakashi, na byodi mumone bukwashi bwa Yehowa mu muwa obe. (Mis. 78:4, 7) Pangi myanda yodi mupete nyi inayo mulongi lukalo bwa kuteemesha. Mbilombene kunyinginsha lukumino lwaye na kwela matabula mpa na ku lubatshisho. w21.03 10 ¶9-10

Nnanyi atudya kutumbisha bwa bipeta bibuwa byatukwete kupeta mu bulungudi? Mpoolo baadi mutushe lwaluulo nsaa ibaadi mufundjile kakongye ka mu Kodinda ano mayi: “Ami nee mukune; Apolose mmumyaamine meema; anka Efile nabeene ngi baakushanga bintu. Byaabya akunu tee kintu, amyaamina meema tee kintu bwaye; Efile buupenka ngi ee na muulo aye akusha.” (1 Kod. 3:6, 7) Nka bu Mpoolo, abitungu tutumbishe Yehowa bwa bipeta byoso byatupete mu bulungudi. Mushindo kinyi watudya kulesha lutumbu bwa kya buntu kya “kufuba pamune” n’Efile Mukulu, Kidishitu na ba mikeyilu? (2 Kod. 6:1) Twi kukita bino pa kulungula mukandu wi buwa na kisumi nsaa yoso yakudi mushindo. T’abitungu penda’shi tukune mbyo ya bya binyibinyi nya, anka abitungu twiyimyamine meema. Nsaa ayikumiina muntu, abitungu tukite mwetu moso bwa kumwalukiila bwadya kubanga kulonga Bible. Atwikala na muloo nsaa yatumono’shi Yehowa kwete kukwasha mulongi a Bible bwadya kushintula binangu byabye na byapusha. w20.05 30 ¶14, 16-18