Mueshi wa 12

Ingi nsaa, bikwitwelela bukopo bwa kupusha myanda i Mwiyi dy’Efile Mukulu. Sunga’shi Yehowa ta mwalule nteko yetu mu mushindo w’atukuminanga. Bino bilombene kwibwesha mpaka. Su twalengula, ino mpaka ngilombene kubofusha lukumino lwetu na kulwisha kipwano kyetu na Yehowa. (Shak. 1:7, 8) Na ngilombene mpa kwitushimishisha lukulupilo lwetu bwa mafuku aafiki. Mpoolo mutumiibwa apwandjikisha lukulupilo bwa mafuku aafiki na nyindo a mashuwa a mema. (Eb. 6:19) Nyindo alamaa mashuwa a mema nsaa i kipapi ki bukopo sunga kwi emika nsaa y’aakyebe nkekupila kwibwe. Anka nyindo ekalaa na muulo nka su lukano lwabadi bamwanye ku mashuwa lwi buwa. Nka bu by’ababofushaa lukano lwa nyindo a mashuwa kwi nkutu, byabya mpaka ishi ipwe ayibofushaa lukumino. Nsaa y’atompibwa, muntu sha mpaka mulombene kushimisha lukulupilo lwa’shi, Yehowa alombasha milayilo yaye. Su twashimisha lukumino, atushimish’anyi mpa na lukulupilo. Muntu e bino, ta mulombene kwikala na muloo su ngupela! w21.02 30 ¶14-15

Abrahame baadi pangi na bipwa bikile pa 70 nsaa ibaadi mukatukye na kifuko kyaaye mu Ure. (Kib. 11:31–12:4) Pangi munda mwa bipwa lukama, Abrahame baadi mushaale mu tushibo twa mapema, na kufiluka mu bibundji bya mu Kanaana. Abrahame mmufwe na bipwa 175. (Kib. 25:7) Kadi, tamumone Yehowa kwadi mulombashe mulayilo Waye wakutusha eumbo dibaadi mumulee aye na bekulu baaye nya. Na ta mushaale mafuku ebungi bwa kumona apatudibwa kibundji, sunga’shi Bufumu bw’Efile Mukulu nya. Sunga mbyabya, bifundwe abilesha’shi Abrahame mmufwe “mu bununu bwa mwabi.” (Kib. 25:8) Sunga mbibaadi mupete nkalakashi ibungi, Abrahame baadi mushaale nka na lukumiino lwi bukopo na baadi na muloo wa kutengyela Yehowa. Bwakinyi baadi na ngobesha ya kunyingila? Mwanda, mu muwa waye ooso, Yehowa baadi amukalwila na kumumona bu kuuku aye. (Kib. 15:1; Yesh. 41:8; Shak. 2:22) Nka bu Abrahame, tukwete kutengyela kibundji ki na bibangilo bibukopo. (Eb. 11:10) Tatukwete kutengyela’shi kino kibalo kibakibwe nya. Bufumu bw’Efile Mukulu tabubatudilwe mu 1914 na tabubabangile kumunana mwiyilu. (Kibaf. 12:7-10) Kadi tukwete kwibutengyela bwa’shi bukunkushe nsenga. w20.08 4-5 ¶11-12

Bwa kuteemesha bangi kalolo, abitungu twikale na kwiyisha na lwishinko. Bi na muulo bwa tubingilo tusatu. Ka kumpala, tatwikala atwelela bangi binangu bi bubi. Ka kabidi, twi kutundula bi binangu bya bakwetu na akibatakula bwa kukita mwanda kampada, na bino abitukwasha bwa kwituula pa mbalo yabo. Ka kasatu, twi kukwasha muntu bwa’shi aukye kyadi. Ingi nsaa tatwiuka bi mwishimba dyetu kalolo mpa na pa twibyakula. Kwi bangi bakwetu balume na bakashi, be na lukalakashi lwa kwakula bya bapusha mwanda wa kabila kaabo, bipikwa sunga bu muntu bwabo. Mbalombene kwisha mafuku ebungi kumpala kwa’shi bapushe bya kwitulungula myanda yabadi nayo, anka su betulungula atwikala na mushindo wa kutundula byabapusha. Su twekala na lwishinko bu Yehowa, mbalombeene kwitulungula byabapusha. Byabya, nsaa yabetulungula byabapusha, abitungu twibateemeshe kalolo. w20.04 15-16 ¶6-7

Mishipa ayikamba kushala mbalo i mema ataale na ibyakudya bibungi. Nsaa ayisangula muntu bwa kwenda mu kuloba, i na muulo. Pabitale nsaa ibuwa ya kuloba, lamiina kibaadi kyakule ungi Temwe a Yehowa a mu ka kisangisangi ka mu Pacifique, pabayitamine ungi misionere bwabadya kwenda mu kuloba. Yawa misionere bamulungwile’shi, “Nafiki maloba ku namashika mu nsaa ya kitema.” Yawa mukwetu mulume bamwalulwile’shi, “Yaya nsaa tayibuwa. Atuyiya nsaa yatudi balombene kukwata mishipa, kushii nsaa yatukumiin’atwe banabene.” Mu mushindo umune, balongi ba Yesu abaadi bafikye balobi ba bantu mu siekele a kumpala, abaadi abende mbalo na nsaa yabaadi balombene kwibapeta. Bu kileshesho, balongi ba Yesu abaadi abalambukisha mu ntempelo, mu bitumbwilo, ku nshibo na nshibo na pa mbalo ya kisalwe. (Bik. 5:42; 17:17; 18:4) Natwe namu, abitungu twiukye mbalo na nsaa yatudi balombene kupeta bantu ba mu teritware etu bwa kwibalungula mukandu wibuwa. Twikitshishe bwa kushintuula programe etu, bwa’shi bitukwashe bwa kwenda mu bulungudi mu nsaa na mu mbalo yatudi balombene kupeta bantu.​—1 Kod. 9:19-23. w20.09 4 ¶8-9

Mushindo watunyisha kunyingisha bu kuuku bwetu na Yesu nyi pa kukwatshishena mpàngo ya kakongye ka bena Kidishitu. Atunyisha kunyingisha bu kuuku bwetu na Yesu mwikale mutwe wa kakongye, nsaa yatwipusheena na baadi mutule bwa’shi betupasukile. (Ef. 4:16) Bu kileshesho, abitungu twikale atufibisha kalolo Nshibo ya bufumu. Nyi bwakinyi tungi tukongye tubaadi tusangibwe. Bino mbikwashe ndubulwilo bwa kulama bya buntu kalolo. Anka mu aa mafuku, bibaadi abitungu’shi bangi balungudi bashintule kakongye. Bano balungudi ba sha lulamato mbafube munda mwa bipwa bi bungi mu kakongye mutababaadi beubidishene na bakwabo balume na bakashi. Anka abekalanga bebatume mu kangi kakongye. Bino abisankisha Yesu ngofu nsaa y’amono bano bena Kidishitu ba sha lulamato kwabakwatshishena ino mpàngo! w20.04 24 ¶14

Nfumu a kuunundu na a kuushi bakwete kutungunuka na kulwa ngoshi mwanda oso akwabadi akyebe kwikala bu nfumu a nsenga ishima. Bu kileshesho, tutaluuleyi kibaadi kikitshikye kunyima kwa Ngoshi ya kabidi ya nsenga ishima, bena Union soviétique ababangile kumunana mu maumbo ebungi a mu Europe. Bikitshino bya nfumu a kuunundu bibaadi bitakule nfumu a kuushi bwadya kwipushena na angi maumbo bwa’shi basangye bilwilo byabo, bwa kukita ndumbulwilo abetamina bu OTAN (Organisation du traité de l’Atlantique Nord). Nfumu a kuunundu na nfumu a kuushi bakwete kutungunuka na kwipikena pa kutuusha makuta ebungi bwa kuula ma mputu. Bano ba nfumu babidi bakwete kulwa dingi pa kukwatshishena angi maumbo a mu Afrique, Asie, na mu Amérique latine. Ano mafuku, Russie na maumbo akwete kumukwatshishena, mbekale na bukome bukile angi maumbo mu nsenga ishima. Dingi bakwete kulwa na nfumu a kuushi ku Internete. Bano ba nfumu babidi bakwete kwifundena, nfumu a kuunundu amba’shi nfumu a kuushi kwete kufubisha ma programe a informatike ku ma ordinatere aaye bwa kulwisha myanda yaye itale bupeta na myanda ya politike, nfumu a kuushi namu afundu a kuunundu nka byabya. Dingi nka bu bibaadi Ndanyele mutemukye, nfumu a kuunundu kwete kutungunuka na kulwa ngoshi na mwilo w’Efile Mukulu.​—Nda. 11:41. w20.05 13 ¶5-6

“Nyina mwana mmulombêne ailwankana mwan’ê akyomesha su?” Luno lukonko, Yehowa baadi mwilwele mu mafuku a mutemuki Yeeshaya. Efile Mukulu balungwile mwilo waye’shi: “Sunga nambutwile ailwa mwan’ê, ami tankenwila, ooo.” (Yesh. 49:15, EEM) Yehowa takambaa kwipwandjikisha na nyina mwana nya. Anka pano mwibikite. Yehowa mmupwandjikishe byapusha bwa bafubi baye na kifulo kibukopo ki pankatshi pa nyina mwana na mwan’aye, mwanda akumiina’shi bafubi baye baukye’shi mmwibafule ngofu. Ba nyina bana bebungi abapushaa nka bu uno mukwetu mukashi abetaminaa bu Jasmin, amba’shi: “Nsaa yomesha mwan’obe, onyingisha kifulo akishala bwa looso.” Yehowa auuka nsaa ayilekye umune a ku bafubi baye kutwela mu bisangilo na kukita mudimo wa bulungudi. Bebungi ba ku bano bakwetu balume na bakashi bash’abafubu dingi na kutwela mu bisangilo mbaalukye mu kakongye, na atwikalaa na muloo ngofu wa kwibamona! Yehowa akumiina’shi baalukye, mpa n’atwe naamu.​—1 Mp. 2:25. w20.06 18 ¶1-3

Twi balombene kumona bya buntu byoso. Kadi, bya buntu bi na muulo ukata, tatwibimonaa nya. Mu mwisambo waye wa pa mwengye, Yesu baadi mwakwile pabitale bya buntu bi na muulo ukata kukila bupeta. Akupu bakwile bino’shi: “Mwanda kwakwa kwi bupeta bwobe, ngi akukeekala n’eshimba diobe.” (Mat. 6:19-21) Eshimba dyetu ndilombene kwitutakula bwa kukimba bintu byatumono’shi bi na muulo ukata kwatudi. Twi balombene kuungwisha “bupeta mwiyilu” pa kwikala na nkumo ibuwa kwi Efile Mukulu. Yesu baadi muleshe’shi bwabwa bupeta tambalombene kwibulwisha sunga kwibwiba. Mpoolo mutumiibwa etutekye bwatudya ‘kushimika meeso [eetu] pa . . . bintu bishaabimweneka.’ (2 Kod. 4:17, 18) Bino bintu bishabimweneka, nyi mbupeta, kwamba’shi myabi yatukapete mu ndumbulwilo mupya a Efile Mukulu. Tu kwete kulesha’shi twi na lutumbu bwa bino bya buntu bish’abimweneka? w20.05 26 ¶1-2

Myanda ibaadi Moyiise mulongyeshe bena Isalele, ibaadi inyingishe lukumiino lwabo na kwi ba nyingisha mashimba, nka abikalaa mpeshi akwasha mitshi bwashi ikule. Twi balombene kushinkamisha naminyi’shi malongyesha etu e nka byabya? Patudi mu bulungudi bwa ku nshibo na nshibo sunga pa mbalo i bantu bebungi, twi balombene kufubisha Bible etu bwa kulesha bantu’shi Yehowa nyi eshina dy’Efile Mukulu. Twi balombene kwibapa mukanda, kwibalesha ma video, na bintu bi mu site etu abitumbisha Yehowa. Ku mudimo, ku kalasa, sunga patudi mu lwendo, twi balombene kupeta mishindo ya kwisamba na bantu pabitale Efile Mukulu etu mpa na kyadi. Nsaa yatulungula bantu pabitale mpàngo ibuwa ya Yehowa bwa bantu na nsenga, atwibakwasha bwabadya kwikala na mweneno ebuwa pabitale Yehowa. P’atulungula bangi bya binyibinyi pabitale Nshetu a kifulo, atukwasha mu kutumbisha kw’eshina dy’Efile Mukulu. Atukwasha bantu bwabadya kupusha’shi myanda yabadi bebalongyesha pabitale Yehowa ngya madimi. Myanda i mu Bible y’atulongyesha bantu nyi malongyesha e na muulo.​—Yesh. 65:13, 14. w20.06 10 ¶8-9

Abitungu twikale na ngikashi kinyi bwa kukwasha baaba abakumiina kwalukiila kwi Yehowa? Pusha angi malongyesha atupete mu lukindji lwa Yesu lwa mwana mushimine. (Luk. 15:17-24) Mwana nkwata kitshibilo kya kwalukiila ku nshibo. Nshaye nkwenda lubilo mu kumukuukila na nkumukama kiipa, nkushinkamiisha mwana aaye’shi mmumufule. Kondo k’eshimba ka mwana kabaadi akamutopeka na tabaadi epusha bu abadi balombeene kukitshina myanda kwi nshaaye bu mwana aaye nya. Nshe-mwana badi mwituule pa mbalo ya mwana nsaa ibaadi amulungula bibaadi mwishimba dyaaye. Nshe-mwana bakitshine myanda kampanda bwa’shi mwana epushe’shi balukiila kwabo, bu mwina kifuko sha kinemo. Bwa kumulesha’shi mumufule na’shi akumiina kumwalusha ku nshibo, nshe mwana batshile mpàngo ya kukita musangeelo na aye nkufwadika mwan’aaye belanga kwishimba bilamba bibuwa. Yehowa e nka bi nshe-mwana a mu luno lukindji. Mmufule bakwetu bashikwete kulungula dingi na akumina’shi balukiile kwadi. Mu kwambula kileshesho kya Yehowa, abitungu twibakwashe bwa’shi balukiile kwadi. Bino abitekye kwikala na lwishinko, kwituula pa mbalo yaabo, na kwibalesha kifulo. w20.06 25-26 ¶8-9

Yesu bakwile’shi bangi abakatambula bya binyibinyi na “muloo,” anka lukumiino lwabo alukabofula nsaa yabapete myanda. (Mat. 13:3-6, 20, 21) Tababaadi pangi abauku’shi kwikala mulongi a Kidishitu akwibatwadila nkalakashi ibungi. (Mat. 16:24) Sunga’shi abaadi abapwandjikisha’shi tabakapete nkalakashi na’shi Efile Mukulu ebakatwisha yanka. Kadi, mu ino nsenga nkalakashi ayikala nka kwanka. Myanda ngilombene kushintuluka, na yetukutshishwa muloo. (Mis. 6:7; Mul. 9:11) Bakwetu bebungi balume na bakashi bakwete kulesha byabadi bashinkamishe’shi be na bya binyibinyi. Mu mushindo kinyi? Lukumiino lwabo talukwete kubofula nsaa ayibatapa mwina Kidishitu nabo ku mashimba sunga kulesha mwikelo ushii wa bena Kidishitu. (Mis. 119:165) Nsaa yooso yabapete nkalakashi, lukumiino lwabo alunyisha kunyinga. (Shak. 1:2-4) Abitungu twikale na lukumiino lunyingye lwi bino. w20.07 8 ¶1; 9 ¶4-5

Kumpala kodya kubanga kubadika Bible, teka Yehowa bwa’shi byobadika, bikukwashe. Bu kileshesho, su okimbi elango bwa kukila na mwanda kampanda, teka Yehowa bwa’shi opete mayi a kulonda Mwiyi dyaye aakukwasha bwa kwata bitshibilo bi buwa. (Fid. 4:6, 7) Kupwandjikisha nyi ngobesha ipabwayo itupe Yehowa. Bwa’shi omone mwanda wa mu Bible bu aukitshika yaya nsaa yobadika, tompa kwiupwandjikisha, na wetule pa mbalo ya yawa muntu abesambila. Tompa kumona myanda ibadi ayimono yawa muntu na bibadi epusha. Na dingi, kunagushena. Kunangushena akupushisha kwela binangu ngofu ku byobadika na, byodi mulombene kwibitumikila. Akukukwasha bwa kubunga binangu na bodya kupusha kalolo mwisambo obadika. Kubadika Bible kushi kunangunshena, kwi nka bu muntu mutule tupese twa foto yabadi batshibe pa mesa kushi kwitulunga. Kunangushena kwi bu kulunga twatwa tupese twa foto pamune, bwa kumona foto yoso ishima. Kunangushena akuitukuasha bua kumona foto yoso ishima. w21.03 15 ¶3-5

Mpoolo mutumibwa badya kwalusha binangu ku mongo, apwandjikisha’shi su ta badi mwate kitshibilo kya kwikala mwina Kidishitu, ta babadya kumukwata. Badi mulombene kufiitshila bantu ba mu Asie nsungu, mwanda abadi bamusumbushene, na dingi badi mulombene kukutwa kukulupila bangi ba kuuku baye. Anka, Mpoolo ta mukite byabya nya. Sunga mbibadi Mpoolo auku’shi tadi pepi na kufwa, tabadi mulube’shi kintu ki na muulo ukata kwadi nkutumbisha Yehowa. Na batungunukile na kunangushena ku mushindo wadya kunyingisha bangi. Badi mukulupile mwi Yehowa pa kumuteka nsaa na nsaa. Mpoolo ta badi mutungunukye na kunangushena pabitale bakwabo bena Kidishitu babadi bamusumbushene nya. Anka amba’shi, badi na lutumbu kwi ba kuuku baye abadi bamukwashe na kifulo kyoso. Na dingi Mpoolo batungunukile na kulonga Eyi dy’Efile Mukulu. (2 Tim. 3:16, 17; 4:13) Mwanda wi na muulo, badi mushinkamishe’shi Yehowa na Yesu mbamufule. w21.03 18 ¶17-18

Mu siekele a kabidi B.B., bena Kidishitu ba madimi abaadi batwele mu kakongye ka bena Kidishitu ba binyibinyi na malongyesha a ba mpangano, na abaadi afwamishe bya binyibinyi bya mwiyi dy’Efile Mukulu. Kubanga aa mafuku mpa na peepi na ku nfudiilo kwa siekele a 19, takubaadi ndumbulwilo a bafubi ba Efile Mukulu pa nsenga nya. Bena Kidishitu ba madimi abaadi bafwime nka bu mbyo mwifuba. Pamwanda wa byabya, takubaadi mushindo wa kutundula bena Kidishitu ba binyibinyi. (Mat. 13:36-43) Bwakinyi kuuka bino kwi na muulo? Byatubadika mu Ndanyele shapitre 11 abilesha’shi nfumu a kuunundu na nfumu a kuushi tababaadi na kya kwikala dingi bu ba nfumu kubanga mu siekele a 2 na peepi na ku nfudiilo kwa siekele a 19. Mwanda takubaadi ndumbulwilo a bafubi ba Yehowa ababadya kulwisha nya. Anka, nfumu a kuunundu na nfumu a kuushi abaadi na kya kutuuka dingi peepi na ku nfudiilo kwa siekele a 19. w20.05 3 ¶5

Yowele baadi mutemukye’shi kipupa kya mpasu akikalwisha nsenga ya bena Isaleele, ayikadi mitshi yoso mu nsenga ya Isaleele! (Yow. 1:4) Munda mwa bipwa bibungi, tubaadi atwamba’shi buno butemuki abulesha mwilo wa Yehowa ukwete kukita mudimo wa bulungudi bu mpasu ya mu kinfwanyi ishii bya kwimikwa. Tubaadi atwamba’shi uno mudimo wa bulungudi ukwete kubutula “nsenga” sunga bantu be ku matalwa a bakata ba bipwilo. Kadi, su twataluula butemuki boso muyile kyabwakwila, atumono’shi kwi lukalo lwa’shi tushintuule mpushiisho eetu. Tala mulayilo ubaadi Yehowa mukite pabitale kipupa kya mpasu: ‘Nakenubingila yaya nshiye ifikye dya kunundu. Nkeyitule kula nenu.’ (Yow. 2:20, EEM) Su mpasu ayilesha ba Temwe ba Yehowa abatumikila mwiya wa Yesu wa kwikasha bantu bu balongi, bwakinyi Yehowa amba’shi akebabingi? (Es. 33:7-9; Mat. 28:19, 20) Abimweka patooka’shi, Yehowa tabingi bafubi baye basha lulamato nya, kadi abingi kintu kampanda sunga muntu kampanda kwete kukyengyesha mwilo waye. w20.04 3 ¶3-5

Twi kukita naminyi su twamona’shi Yehowa t’alula nteko yetu bukidibukidi? Shake amba’shi abitungu “tutungunukye na kwibiteka” kwi Efile Mukulu. T’abitondaa Yehowa nsaa y’atutungunuka na kumuteka kinangu. Na t’etutopekaa nya. Nshetu e mwiyilu etupa byanka “n’eshimba dya kalolo” nsaa y’atumutekye bwa kupeta binangu abitukwasha bwa kunyingila nkalakashi. (Mis. 25:12, 13) Amonaa nkalakashi yatudi nayo na apushaa bi bubi nsaa y’etumono atukyengye, na ena lukalo lwa kwitukwasha. Kushi mpaka, bino abitupa muloo! Mushindo kinyi awitupeyaa Yehowa muloo? Ku bukwashi bw’Eyi dyaye. (Nki. 2:6) Bwa kupeta kino kinangu, abitungu tulongye Eyi dyaye na mikanda ayipatula Bible. Anka, t’abitungu twikale penda na kiukilo nya. Abitungu tukite byabya abitutekye Efile Mukulu. Shake bafundjile’shi: “Tumikilayi eyi, tanwikalanga’nka peenda anwiditeemesha.” (Shak. 1:22) Nsaa y’atutumikila elango dy’Efile Mukulu, atunyisha kwikala na butaale, nkatshinkatshi na lusa. (Shak. 3:17) Ino nyikashi, ayitukwasha bwatudya kunyingila lukalakashi loso lulombene kwitushimishisha muloo. w21.02 29 ¶10-11

Mulongi a Bible mulombene kwela matabula mpa na ku lubatshisho nsaa yapete bukwashi bwa bangi mu kakongye. Mulungudi oso mulombene kukwasha muntu mupya bwadya kwikala mwina kakongye. Ungi mukwetu mukashi mbala-mashinda amba bino: “Kwi mwele awamba’shi, mwana nga mwilo. Kakongye kashima nkalombene kukwasha muntu bwadya kufika mu bya binyibinyi.” Bena kifuko, ba kuuku na balongyeshi mbalombene kukwasha mwana bwadya kukula na kunyinga. Bi mumune, balongyeshi mbalombene kutusha malango, kunyingisha na kwikala kileshesho ki buwa kwi balongi ba Bible, su abakitshi bino abakwasha balongi ba Bible bwabadya kwenda kumpala na kubatshishibwa. (Nki. 15:22) Bwakinyi mulungudi kwete kulonga Bible na muntu abitungu apushe muloo nsaa y’amono bena kakongye abakwasha mulongi aye a Bible? Muanda boso abakuasha bua’shi mulongi a Bible atame mu kikudi. w21.03 8 ¶1-3

Bena Kidishitu, ba nsongwa sunga bantu bakulu, abitungu badimukye pa kupela kulesha bu abafubila Yehowa akunamu lungi lupese abakitshi myanda i bubi. Yowano mutumiibwa baadi muleshe’shi ta twibalombene kutambukila mu bya binyibinyi aku namu twi na nshalelo e butete. (1 Yo. 1:6) Su atukumiina kusangasha Yehowa kubanga binobino na mu mafuku aafiki, abitungu tutentekyeshe nsaa yooso’shi Yehowa kwete kumona byooso byatukitshi. Sunga bantu t’abamono byatukitshi mu mbalo ifwame, Yehowa amonaa kyooso kyatukitshi. (Eb. 4:13) Abitungu tusumbule Mweneno a bantu pabitale mulwisho. Mu mafuku a Yowano, bantu basumbule lukumiino abaadi abamba’shi muntu mulombene kukita kintu akyamba Efile Mukulu’shi kii bubi, kadi a tungunuka na kwikala kuuku aye. Lelo uno, twi bashale munkatshi mwa bantu be na mweneno ebino. Bantu bebungi abamba’shi be na lukumiino mwi Efile Mukulu, kadi ta be na mweneno a Yehowa pabitale mulwisho, bikishekishe pabitale lusandji. Kwi myanda ibungi ibutete ishikwe Yehowa, anka bano bantu abamba’shi ta kwi mwanda su muntu eyikita. w20.07 22 ¶7-8

Wakwila bakwetu bakashi bena Kidishitu pakudi mushindo su? Bangi balungudi abamonaa ungi mukwetu mukashi sha mulume shi Temwe a Yehowa, afiki misuusa ibungi nka kunyima mu bisangilo, na kukatuka nka’byo bikyabipu. Abamono dingi’shi t’akambaa kufika na bana ku bisangilo. Nyi bwakinyi abamwakula bi bubi’shi, bwakinyi ta mulombene kuteka mulume aye bwa’shi ekalanga afiki na bana ku bisangilo. Aku namu t’abauku’shi yawa mukwetu mukashi kwete kwikitshisha ngofu. Te na bulungantu bwa kwikitshina myanda; sunga kwata kitshibilo kya nfudiilo pabitale bana baye. Su wekala na lutumbu bwa abikitshi mukwetu mukashi, we kwimika wawa mwisambo pa kwibalungula myanda yaye i buwa. Abitungu bakulu bapasukile nkalo ya bakwetu bakashi. Abauku mushindo aukumiina Yehowa’shi bebakitshine myanda. (Shak. 1:27) Abitungu bakulu bambule Yesu na bekale na nkatshi-nkatshi. Pamutwe pa kwela miiya pa mbalo ishii ya kwiyela, abitungu bekale na kalolo na mpushisho e buwa. (Mat. 15:22-28) Nsaa i bakulu abetatshisha bwa kupasukila bakwetu bakashi, bino abibakwasha bwabadya kumona’shi Yehowa na ndumbulwilo aye, mwibafule. w20.09 24-25 ¶17-19

Mutemuki Ndanyele baadi mufubi a Efile Mukulu mwiyishe na baadi auku mikalo yaaye. Bu kileshesho, pabaadi Yehowa mumufubishe bwa kupatuula kilotwa kya Nabukodonosore, Ndanyele ta baadi mwitumbishe nya. Na kwiyisha kooso, baadi mutumbishe Yehowa. (Nda. 2:26-28) Bino abitulongyesha kinyi? Su bakwetu abasangeela mwisambo ubatukitshi, sunga’shi atwiuku kulungula mukandu wibuwa kalolo, abitungu tutumbishe Yehowa. Abitungu tushingule’shi ta twi balombene kukita kintu kapanda kushii bukwashi bwa Yehowa. (Fid. 4:13) Su twi na uno mweneno, atwambula kileshesho ki buwa kya Yesu. Yesu baadi mukulupile nka mwi Nshaye Yehowa. (Yo. 5:19, 30) Tabaadi efuku su ndimune mutompe kwata matalwa a Nshaye e mwiyilu. Mukanda wa Beena-Fidipe 2:6 awamba’shi: Yesu ‘ta mupwandjikishe kwikala lutshi lumune n’Efile Mukulu nya.’ Bu bibaadi Mwana mukookyele, Yesu baadi auku mikalo yaaye na kuneemeka matalwa a Nshaye. w20.08 11 ¶12-13

Bangi bakwete kusuka lubilo batadile ku muwa bakwete kupeta nkalakashi isha imweneka na yabashii balombene kupusha kwi bangi bantu. Su we na lukalakashi na omono’shi bantu tabakupusha, we mulombene kunyingiishibwa ku kileshesho kya Mefiboshete. (2 Sam. 4:4) Baadi na kilema, na abaadi bamubepuule kwi Nfumu Daavide. Sunga mbyabya, tabaadi na binangu bi bubi; baadi asankila bibaadi mukite. Baadi na lutumbu bwa bibaadi Daavide mumukitshine. (2 Sam. 9:6-10) Nsaa ibaadi Daavide mumutopekye, Mefiboshete baadi mwate mwanda oso mubushima bwao. Tabaadi mufiite munda mwanda wa mulwisho wa Daavide. Na tabaadi mutopekye Yehowa bwa kibaadi Daavide mukite. Mefiboshete baadi akitshi mwaye moso bwa kukwatshishena nfumu abaabadi basangule kwi Yehowa. (2 Sam. 16:1-4; 19:24-30) Yehowa mufundishe kileshesho kibuwa kya Mefiboshete mu Eyi Dyaye bwa’shi kitulongyeshe.​—Lom. 15:4. w20.04 26 ¶3; 30 ¶18-19

Mbalombene kusangula bangi mu kakongye bwabadya kufuba bu ba misionere, ba mbala-mashinda ba nsaa yooso sunga ba myeshi yooso. Mbate kitshibilo kya kulungula mukandu wibuwa na kwikasha bangi bu balongi bu mufubo wabo. Sunga’shi bano bakwetu abafubu nsaa yooso be na bintu bipeela bya ku mbidi, Yehowa kwete kwibelela myabi mu muwa wabo. (Mak. 10:29, 30) Twi bafule bano bakwetu balume na bakashi ngofu, na twi na muloo wa kwikala nabo mu kakongye! Nka penda bakwetu be na mashito na baaba be mu mudimo wa nsaa yooso nyi be na mbalo mu kakongye su? Nya! Balungudi booso ba mukandu wibuwa be na muulo kwi Efile Mukulu na mu kakongye. (Lom. 10:15; 1 Kod. 3:6-8) Kadi, kamune ka ku bipatshila bikata mu kakongye nka kwikasha bantu bu balongi ba Nfumw’etu Yesu Kidishitu. (Mat. 28:19, 20; 1 Tim. 2:4) Booso be mu kakongye, balungudi babatshishibwe na bashi babatshishibwe, bakwete kwitatshisha bwa kutuula uno mudimo pa mbalo ya kumpala.​—Mat. 24:14. w20.08 21 ¶7-8

Nka bu abibilesha mayi e mu kifundwe kya lelo, nsaa yatudi na nkalakashi, Yesu etukwasha. Kushi mpaka, mayi a Yesu aetunyingisha. Bwakinyi? Mwanda, angi mafuku bi kwitwelela bukopo bwatudya kunyingila. Bu kileshesho, nsaa yatufwisha muntu atudi bafule, twi balombene kunyingila kinyongwa kushi penda munda mwa mafuku apela, anka pangi munda mwa bipwa bi bungi. Bangi abanyingila nkalakashi ya bununu. Bangi namu be na kenyongoshi kakilekile. Sunga mbyabya, twi na bukome bwa kunyingila, mwanda atuuku’shi Yesu e netu “mafuku oso” mpa na aa e bubi bukile. (Mat. 11:28-30) Eyi dy’Efile Mukulu aditushinkamisha’shi Yehowa kwete kwitukwasha kukiila kwi ba mikeyilu. (Eb. 1:7, 14) Bu kileshesho, ba mikeyilu bakwete kwitukwasha na kwituludika nsaa yatulungula “mukandu wibuwa wa Bufumu” kwi “eumbo dyooso, kisamba, mwakulo na mwilo ooso.”​—Mat. 24:13, 14; Kibaf. 14:6. w20.11 13-14 ¶6-7

Atukumiinashi mulongi etu a Bible aukye’shi, byabya byatulongo abitukila Mwiyi diyokyelwe dy’Efile Mukulu. (1 Tes. 2:13) Twi kwibikita naminyi? Nyingisha mulongi a Bible bwadya kwikala alungula bangi bya kwete kulonga. Pamutwe pakwikalanga nk’omupatulwila bifundwe, mutekye namu bwadya nkupatulwila byanka. Mukwashe bwadya kumona mushindo umutale Eyi dy’Efile Mukulu pa bupenka bwaye. Mwele nkonko ayimukwasha bwadya kwakula byanangushena na byapusha pabitale bifundwe byabadika. (Luk. 10:25-28) Bu kileshesho, mwipushe’shi: “Kino kifundwe akikukwasha naminyi bwa kumona dimune dya ku ngikashi ya Yehowa?” “Kino kifundwe kilombene nkukwasha naminyi?” “Opusha naminyi pabitale bino bibokatuka mu kulonga?” Ki na muulo, ta mbungi bwa myanda ayiuku munlongi a Bible, anka mushindo wadi mwiyifule na w’eyitumikila. Fubisha Bible bwa kulongyesha. Su okumiina kwikala mulongyeshi e buwa, abitungu wekale mwiyishe. w20.10 15 ¶5-6

Tushinkamishe’shi, mudimo wa kulungula mukandu wa Bufumu aukapu pa nsaa ilombane. Tala kibaadi kikitshikye mu mafuku a Nowa. Yehowa baadi muleshe’shi akitaa myanda yooso pa nsaa ilombane. Bipwa peepi na 120 kumpala, Yehowa baadi mupwe kutshiba kipungo akikanoko mpeshi a kabutu. Bipwa bibungi kunyima, Yehowa baadi mulungule Nowa bwadya kupwa bwato. Pangi munda mwa bipwa 40 sunga 50 kumpala kwa’shi mpeshi a kabutu abangye, Nowa baadi nka atungunuka na kufuba ngofu. Sunga bishi’baadi bantu abamutemesha, batungunukile na kwibadimusha mpa na nsaa ibamulungwile Yehowa’shi, nsaa ibalombana ya kutwela mu bwato. Na pa nsaa ilombane, “Yehowa nkumukangila kiibi.” (Kib. 6:3; 7:1, 2, 16) Mu mafuku apela’mu, Yehowa emika mudimo wa kulungula mukandu wa Bufumu. Paapa akabutula ndumbulwilo a Satana na kufwisha ndumbulwilo mupya a bantu abamukookyela. Kubanga binobino, twambuleyi Nowa, na bangi bashii batadile’shi eyaasa dyabo dikishe. Tutuleyi mudimo wa bulungudi pa mbalo ya kumpala, twikale na lwishinko, na tulame lukumiino lunyingye mwi Yehowa na mu milayilo yaaye. w20.09 13 ¶18-19

Su ta kubadya kwikala bangi be na matalwa, kifuko kya Yehowa kibadya kwikala mu kafutakanyi na ki shi na muloo. Bu kileshesho, muntu su ngumune ta badya kuuka aata kitshibilo kya nfudilo na alondesha bwa’shi kyakya kitshibilo kilombane. Su mpángo ya Yehowa ya kupa bangi matalwa i buwa, bwakinyi bana bakashi be bungi bakwete kumona’shi balume babo abebakyengyesha, Pa Mwanda balume be bungi, tabauku miiya ya Yehowa pabitale kifuko na bakwete kusangula bwa kulonda bipikwa byabo. Mbalombene kukyengyesha bakashi babo, mwanda wa kudila kwisankisha. Bu kileshesho, mulume e kufubisha matalwa aye bi bubi kwi mukashi aye bwa kutompa kukamisha kinemo kyaye, sunga bwa kulesha bangi’shi aye nyi “mwana mulume.” Ekunangushena’shi, ta mulombene kukitshisha mukashi aye bwadya ku mufula nya, anka e kumutshinyisha. Ekufubisha uno moo bwa kulondalonda mukashi aye. Uno mweneno e bino na uno mwikelo wi bino t’aupa bana bakashi kinemo ki balombene, na mbikutwene bi bukopo na kikyebe ky’eshimba dya Yehowa.​—Ef. 5:25, 28. w21.02 3 ¶6-7

Sambila nsaa yoso. Nsaa yodi mukalakashwe bwa mwanda kampanda, teka Yehowa bukwashi. Yehowa mulombene kwalula nteko yobe pa nkupa “butaale bw’Efile Mukulu, abo butabukile binangu byooso bya [bantu].” (Fid. 4:6, 7) Yehowa akupa bwabwa butaale ku bukwashi bwa kikudi kyaye kiselele. (Nga. 5:22) Nsaa ywele luteko kwi Yehowa, mufungwile eshimba dyobe. Mulungule bi mwanda obe na omupatulwile bywepusha pabiutale. Su kwi mushindo wa kwiupwa, mutekye akupe kinangu na bukome bwa kwiukita. Su ta kwi bya kwiupwa, teka Yehowa bwa’shi akukwashe tokambanga kwinyongola. Nsaa y’olungula Yehowa myanda yobe patoka mu nteko, omono kalolo myaluulo yayo. Su kunyima k’obe kuteka ta kwi lwaluulo bukidibukidi, tokookanga. Yehowa t’akumiinaa penda’shi tumulungule myanda yetu patoka nsaa y’atumutekye nya, kadi akumiina’shi tutungunukye na kuteka.​—Luk. 11:8-10. w21.01 3 ¶6-7

Mu tukongye twi bungi lelo uno, mwi bantu beyibakishene, na mwi bifuko. Kadi mwi dingi bakwetu balume na bakashi be bukupi. Mushindo kinyi watumonaa bano bakwetu? Tala mushindo ubaadi Yesu amono bantu be bukupi. Pabaadi pa nsenga, Yesu ta mwibakile nya. Baadi mushaale bukupi bwa kukisha nsaa ibungi na kutula binangu byaaye ku mudimo waaye. Yesu ta mulongyeshe’shi abitungu mwina Kidishitu ebakile sunga kushaala bukupi. Anka, bakwile’shi bangi bena Kidishitu mbalombene kusangula bwa kushaala bukupi. (Tala abyakula Mateo 19:12.) Yesu baadi aneemeka baba abaadi bukupi. Tabaadi ebamono bu bashaadile sunga bu bakutwe kintu kampanda mwanda wa’shi be bukupi nya. Nka bu Yesu, Mpoolo mutumiibwa baadi mulombashe mudimo waye kalolo bu bibaadi bukupi. Mpoolo ta mulongyeshe’shi su mwina Kidishitu bebakila bakitshi bibubi nya. Baadi auku’shi nyi kitshibilo kya muntu nabeene. w20.08 28 ¶7-8

Yowano mmushale bipwa bi bungi na mupete myanda i bungi i buwa. Mupete dingi nkalakashi ibadya kubofusha lukumiino lwaye. Anka nsaa yoso, Yowano badi akitshi mwaye moso bwa kukokyela miiya ya Yesu mpa na wa kufula bakwabo balume na bakashi. Nyi bwakinyi Yowano badi mushinkamishe’shi Yehowa na Yesu mbamufule, na bino bibadi abimunyingisha bwa kukambila lukalakashi loso lubadi apete. (Yo. 14:15-17; 15:10) Satana na ndumbulwilo aye, ta babadi balombene kwimika Yowano bwadya kufula bakwabo balume na bakashi na kwibalesha mu ngakwilo na mu bikitshino byaye’shi mwibafule. Nka bu Yowano, twibashale mu nsenga y’abakunkusha kwi Satana, shi mufule muntu su ngumune. (1 Yo. 3:1, 10) Sunga by’akumiina’shi tulekye kufula bakwetu balume na bakashi, te na ngobesha ya kwibikita, nka su twamulekyela. Byabya, twikaleyi na kitshibilo kya kufula bakwetu balume na bakashi, na kwibalesha’shi twibebafule mu byatwakula na byatukitshi. Paapa, atwikala na muloo wa kwikala mu kifuko kya Yehowa. Atwikala na muloo wi bungi.​—1 Yo. 4:7. w21.01 13 ¶18-19

Nshalelo mu uno ndumbulwilo akunkushibwa na Satana, mmulombene kwikala bukopo, na ingi nsaa, twi balombene mpa na kukutwa kya kukita. (2 Tim. 3:1) Anka tatukumanga kwinyongola sunga kwikala na moo nya. Yehowa auku lukalakashi lwatudi nalo. Su twapona, mmulee’shi, etwibwesha na mboko yaye ilume i bukome. (Yesh. 41:10, 13) Na lukulupilo loso mu bukwashi bwaye, atupete bukome mu Bifundwe na kukambila lukalakashi loso lwatudya kufumankana nalo. Ma video, ma drame atupusha penda mayi na mwisambo awamba’shi: “Ambulayi lukumino lwabo,” abikwasha bwa kumona myanda ya mu Bible nka byayibadi ikidikye. Kumpala kwa kutala, kutemesha sunga kubadika miisambo yabadi bakimbule kalolo, teka Yehowa bwadya nkukwasha, opete malongyesha e na muulo odi mulombene kutumikila. Emone bu yawa muntu abakwila. Nangushena bibadi bikite bano bafubi ba Yehowa basha lulamato na, bibadi Yehowa mwibakwashe bwabadya kunyingila nkalakashi ibabadi nayo. Akupu otumikile aa malongyesha mu nshalelo obe. Tumbula Yehowa bwa bukwashi bwa kwete nkupa. Na lesha’shi, we na lutumbu bwa bwabwa bukwashi pa kukimba mishindo ya kunyingisha na kukwatshishena bangi. w21.03 19 ¶22-23

Su nwibeyibakishene na anukyebe kutanda bana, eyipusheyi’shi: ‘Twi bantu beyishe, bafule Yehowa na Eyi dyaye su? Yehowa mmwitusangule bwa kupasukila mwana atandjikwa su?’ (Mis. 127:4) Su we nambutwile, eyipushe’shi: ‘Nkwete kulongyesha bana bande bwabadya kwaata mudimo wa maasa na muulo su? (Mul. 3:12, 13) Nkwete kukita mwande moso bwa kukalwila bana bande ku mbidi na mu binangu ku masaku oso abadi balombene kufumankana nao su?’ (Nki. 22:3) Twe mulombene kukalwila bana bobe ku myanda yoso ya baadi balombene kupeta. Anka na kifulo kyoso, we kubanga kwi balumbuula kapelakapela ku nkalakashi yabadya kupeta mu nshalelo, pa kutungunuka na kwibalongyesha byabadya kupeta malango Mwiyi dy’Efile Mukulu. (Nki. 2:1-6) Bu kileshesho, su mwina kifuko basumbula lulangwilo lwa binyibinyi, kwasha bana bobe bwabadya kulonga Mwiyi dy’Efile Mukulu, bwakinyi bi na muulo bwabadya kushala na lulamato kwi Yehowa. (Mis. 31:24) Su muntu anudi bafule baafu, badikila bana bobe bifundwe bilombene kwibakwasha bwa kukambila kyakya kinyongwa na kupeta butaale.​—2 Kod. 1:3, 4; 2 Tim. 3:16. w20.10 27 ¶7