Mueshi wa 1

Yesu badi mutopekye bu nsesa bwa bakata ba bipwilo ba mu mafuku aaye. Bu kileshesho, badi mutopekye bu nsesa bwa Bafadisee abadi abakalakashwa pabitale mushindo wa kwiyosha mema ku masa, pamutwe pa kupasukila baledi babo. (Mat. 15:1-11) Sunga bibadi bakata ba bipwilo bafitshile Yesu munda mwanda wa bibadi mwakule, Yesu ta badi mulekye kwakula bya binyibinyi. Yesu badi dingi muleshe patooka malongyesha a madimi a bipwilo. Badi mwambe’shi, ta mbipwilo byoso byabadi bakumine kwi Efile Mukulu. Na dingi, badi mwakule’shi be bungi abakekala mu kilayi kikata akitwala ku kabuto, anka bantu bapela nyi abakekala mu kashinda kapela akatwala ku muwa. (Mat. 7:13, 14) Badi muleshe’shi, be bungi abakamweka bu abafubila Efile Mukulu, anka ta bakwete kumufubila. Bakwile’shi: “Dimukaayi na batemuki ba-madimi, abafiki kwanudi bafwale buu mikooko, anka munda nyi mmiseu ayidiiyanaa. Ku bikitshino byaabo nyi nkwanukeebatundwila.”​—Mat. 7:15-20. w21.05 9 ¶7-8

Ana abadi bamuibakile kui muina Levi abetamina bu Elkana, badi mumufule ngofu. Anka, Elkana badi na ungi mukashi, Penina. Elkana badi mufule Ana kukila Penina; kadi, “Penina badi na bana, anka Aana tàbaadi nabo.” Pa muanda wa bino, Penina ta badi “apungila [akooko] na kukaa Aana bwa kumukwatshisha buufu.” Ana bibadi bimuinyongoshe ngofu! “Babangile kudila, aye nkupela kudia.” Sunga mbiabia, Bible t’alesha mbalo su ngimune’shi, Ana badi mukite namu bia kukuatshishabuufu. Anka, badi mufunguile Yehowa eshimba diaye na badi mukulupile’shi amukuasha. (1 Sam. 1:2, 6, 7) Tuikulongiela kinyi ku kileshesho kia Ana? Su muntu akiebe kuipikena nobe, tentekiesha’shi we na kia kukita. Tokuminanga kuipikena na yawa muntu. Pamutue pa kualusha bubi ku bubi, tompa kutuesha butaale na yawa muntu. (Lom. 12:17-21) Sunga ta mukumine, olama butaale b’obe. w21.07 17 ¶13-14

Lwabi lubadi lutakule Yudase Isakaryiote bwadya kupana Yesu. Ku mbangilo, ta badi bino nya. (Luk. 6:13, 16) Abimweka patoka’shi, Yudase badi na ngobesha na badi muntu akukulupilwa mwanda abadi bamupe bushito bwa kulama makuta. Kunyima kwa mafuku, babangile kwiba sunga bibadi mupushe Yesu adimusha bantu pabitale lwabi. (Mak. 7:22, 23; Luk. 11:39) Lwabi lwa Yudase lubadi lumwekye patoka, mafuku apela kumpala kwa’shi bayipe Yesu. Yesu na balongi baye, mpa na Mariya na mukwabo Maata, abadi bebetamine kwi Simone sha nsudi. Nsaa ibabadi abadi, Mariya bebwele na apongolwela Yesu mwimu wa malashi mmutwe, ubadi muulo ukile. Bino tabibadi bisankishe Yudase na bangi balongi. Bangi balongi abadi pangi bamone’shi, bi buwa kufubisha aa makuta mu mudimo wa bulungudi. Anka, Yudase badi mufite munda bwa kangi kabingilo. “Badi ngifi,” badi akyebe kwiba aa makuta mu kashete.​—Yo. 12:2-6; Mat. 26:6-16; Luk. 22:3-6. w21.06 18 ¶12-13

Tobopushishe bu’shi mashito abakukidi bungi, na’shi twe na mushindo wa kwialombasha? Su mbyabya, kileshesho kya Mpoolo ki nkukwasha. Badi enyongola, kushi penda bwa kakongye kamune, anka “bwa tukongye toso.” (2 Kod. 11:23-28, Kilombeeno kipya 2014) We na mukumbo ushaupu, aukushimishisha muloo obe? Mpoolo badi na mwanda ubadi aumukyengyesha ngofu. Ubadi pangi mukumbo ubadi akyebe’shi umulekyele mbalo. (2 Kod. 12:7-10) We mubofule kwishimba bwa bilubilo byobe su? Ingi nsaa bibadi bifwile Mpoolo. Badi mwiambe bu “muntu a malwa,” mwanda badi atungunuka na kulwa bwa kukita bi buwa. (Lom. 7:21-24) Sunga bibadi Mpoolo mupete ino yoso nkalakashi, batungunukile nka na kufubila Yehowa. Nkinyi kibadi kimupe bukome bwa kukita bino? Sunga bibadi ekalakasha ngofu bwa bilubilo byaye, badi na lukumino lwi bukopo mu nkuulo. w21.04 22 ¶7-8

Nsaa ibadi Adame muntu mupwidjikye mukite mulwisho, badi mushimishe muwa wa ikalayika, kushi penda bwaye, kadi mpa na bwa bana baye. Adame ta badi na kabingilo ka kukita byabya bibadi mukite. Badi musangule bwa kukita mulwisho. Twi kwamba naminyi bwa bana baye? T’abadi bakite kintu su nkimune ki bubi, sunga kumutakula bwa kwiukita. (Lom. 5:12, 14) Adame badi mulombene lufu bwa kibadi mukite, anka Yehowa badi mulombene kukita kintu kampanda bwa’shi bana ba Adame bapete mushindo wa kwikala na muwa wa loso su? Oolo! Nkaye kyakatuka mukulwisha, Yehowa babangile kulesha kapelakapela bya kafungusha bana ba Adame ku bupika bwa mulwisho na lufu. (Kib. 3:15) Ku bukwashi bwa nkuulo, twi balombene kwikala mu kipwano ki buwa na Yehowa sunga twekala bantu bakutwe kupwidjika. Pa mwanda wa nkuulo, mifubo ya Diabulu ayikabutulwa. (1 Yo. 3:8) Pa mwanda wa nkuulo, mpángo ya Yehowa ya ku mbangilo pabitale nsenga ayikakumbana. Nsenga ishima ayikekala mpaladiso. w21.04 14 ¶1; 19 ¶17

Kibumbu kya bantu be bungi; balume na bakashi ba mu maumbo e bungi na abakula ndjimi ilekene kibadi kibungye. Dyadya efuku kubakitshikile mwanda wa kukanya. Bangi bena Yuda abadi na ngobesha ya kwisamba mu ndjimi ya baba bantu benyi! Bino bibadi bikanyishe kino kibumbu ngofu, mwanda myanda ibabadi abebalongyesha na bibadi mutumibwa Mpyele mwakule bibadi buwa ngofu. Kino kibumbu kibadi kilongye dingi’shi, nkilombene kupashibwa su kyalesha lukumino mwi Yesu Kidishitu. Uno mukandu ubadi ukume kino kibumbu ngofu. Bantu abadi bakumwe ku mashimba ngofu mu mushindo ubabadi bayipushe’shi: “Twi kukita kinyi?” Mpyele bebalulwile’shi: “Muntu oso a kwanudi abatshishiibwe.” (Bik. 2:37, 38, Esambi Dipya 2015) Kintu kibadi kikitshikye kunyima, kibadi kya kukanya. Bantu pepi 3 000 abadi babatshishibwe dyadya efuku, abo nkufika balongi ba Kidishitu. Uno, nyi mbangilo a mudimo ukata wa kwikasha bantu bu balongi, ubadi Yesu mulungule balongi baye bwabadya kukita. Balongi ba Yesu baky’abatungunuka na kukita uno mudimo mpa na lelo uno. w21.06 2 ¶1-2

Pangi tuibashale mu terituare e bukopo kubanga kulonga Bible na bantu. Bangi bantu t’abasankilaa mukandu wetu sunga’shi abetubingabinga. Nkinyi kikuitukuasha bua kulama mueneno e buwa mu terituare e bino? Tentekiesha’shi nshalelo a bantu e kushintuluka bukidibukidi mu uno ndumbuluilo e bukopo; na bantu bash’abasankilanga mukandu wetu be kumona’shi be na lukalo lua bukunkushi bu’Efile Mukulu. (Mat. 5:3) Bangi abadi abapele mikanda yetu kala, mbafikie binobino mu kukumina kulonga Bible. Dingi, atuku’shi Yehowa nyi Mukata a mudimo wa kumbula. (Mat. 9:38) Akumina’shi tutungunukie na kukuna na kumiamina mema, anka Aye nyi e na bushito bua kukusha. Bi buwa kutentekiesha’shi, sunga tatukuete kulonga Bible na muntu binobino, Yehowa aketufutu kushi muyile bipeta bietu, kadi muyile kuikitshisha kuetu! w21.07 6 ¶14

Yehowa mmupe bantu ngobesha ya kupeta bana, na muibape bushito bua kuibalongiesha bia kumufula na kumufubila. Sunga biabidi’shi ba mikeyilu be na ngobesha i bungi, ta mbebape kino kinemo nya. Biabia, su we muledi, ikala na lutumbu bua kinemo kia kukusha bana. Baledi mbebape bushito bui na muulo bua kukusha bana babo pa “kwibalongyesha na kwibanyôka muîle abikyebe Yehowa.” (Ef. 6:4; Miy. 6:5-7) Bua kukuasha baledi, ndumbuluilo a Efile Mukulu mmutushe bintu bi bungi abiakuila pabitale Bible bu ma video, miisambo, na bintu bi mu Internete. Kushi mpaka, Nshetu e muyilu na Muan’aye mbafule bana betu. (Luk. 18:15-17) Nsaa i baledi abakulupila mui Yehowa, na kukita muabo moso bua kupasukila bana b’abo, bino abisankisha Yehowa. Na bano baledi abapa bana b’abo lukulupilo lua kuikala mu kifuko kia Yehowa bua loso! w21.08 5 ¶9

Bangi bantu abapuandjikishaa’shi kuikala na lukumino, nkukumina kintu kioshi na bishinkamisho. Anka muyile Bible, lualua nta ndukumino lua binyi nya. Bible apatuula’shi lukumino nduimene pa bishinkamisho, sunga ta tui balombene kumona Yehowa, Yesu, na Bufumu, tui na bishinkamisho abilesha’shi be kuanka binyibinyi. (Eb. 11:3) Ungi biochimiste mufikie Temue a Yehowa akula’shi: “Ba Temue ba Yehowa be na bishinkamisho bi mu Bible bia mianda yabadi bakumine ta mbayilue mianda ya sianse.” Tui kuiyipusha’shi su kui bishinkamisho abilesha’shi kui Mupangi binyibinyi, buakinyi bantu be bungi t’abakuminaa’shi Efile Mukulu mmupangie bintu bioso? Bangi bantu ta babangile kukimba bishinkamisho abo banabene nya. Robert, tadi binobino Temue a Yehowa amba’shi: “Biabashabakulaa muanda wa mupangi mu kalasa, nadi namono’shi mmuanda wa madimi. Panalombeshe bipua 20 abampele bishikamisho bia mu Bible pabitale Mupangi.” w21.08 15 ¶4-5

Tui kulonga mianda kampanda pabitale buwa bua Yehowa, patubadika Bible na pa kupusha miisambo ya bangi bakuetu bapete miabi. Biabia atupete mpushisho e buwa, a mushindo wi buwa bua Yehowa, nsaa ya ‘tutompo’ atue banabene bi buwa buaye. Bu kileshesho, tupuandikishe’shi atukumina kutuela mu mudimo wa nsaa yoso, anka bwa kukumbasha kano kepatshila abitungu tuikale na nshalelo mupelepele. Atuuku’shi mulayilo wa Yesu awamba’shi, su tubatulu Bufumu pa mbalo ya kumpala, Yehowa aketupa kintu kioso kiatudi nakio lukalo, anka atue banabene tatuamuene uno mulayilo kuaulombana. (Mat. 6:33) Biabia bu biatudi na lukumino ku mulayilo wa Yesu, atupeelesha kutusha kua makuta, atushintula programe etu a mudimo wa ku mbidi, bua kumona bia kukita mudimo wa bulungudi. Su tubakitshi bino atuimuena atue banabene’shi Yehowa apasukilaa nkalo yetu binyibinyi. Biabia ‘atutompo’ bi buwa bua Yehowa atue banabene. w21.08 26 ¶2

Okwete kumona uno mwanda lelo uno su? Oolo. Nsaa ayifiki bantu bakata, ba sha makuta na babamono bu ba sha binangu mu bipwilo byabo, bakata ba bipwilo abekalaa na muloo. Abakuminaa bano bantu sunga bekala abakitshi myanda ikutwene na miya y’Efile Mukulu. Bano bakata ba bipwilo ababepulaa bafubi ba Yehowa ba sha kisumi, ba sha mwikelo wi buwa mwanda bantu be bungi lelo uno, abapwandjikisha’shi ta be na muulo. Nka’bu abyakula Mpoolo, Efile Mukulu musangule bantu babamono bu ‘balotakane.’ (1 Kod. 1:26-29) Kadi, bwa Yehowa, bafubi baye boso ba sha lulamato be na muulo. Twi kukita kinyi bwa kupela kukita bilubilo bya mu ino nsenga na ngelelo abo a binangu? (Mat. 11:25, 26) Totadilanga binangu bi bubi bya uno ndumbulwilo pabitale mwilo w’Efile Mukulu bwabidya kwikala na bukitshishi kodi. Uuka’shi Yehowa afubishaa nka penda bantu beyishe bwabadya kukita kikyebe ky’eshimba dyaye. (Mis. 138:6) Na nangushena bintu bungi bibapu kukita Yehowa p’aye kufubisha bano bantu babamono kwi ba pa nsenga bu ba shi na binangu na bu ba shi balongye. w21.05 8 ¶1; 9 ¶5-6

Mpoolo mutumibua baadi na lutumbu bua bukuashi bubaadi apete. Biabia, ta baadi na kuitatula bua kuenda mu kukuatshishena bakuabo balume na bakashi nya. (Fid. 2:19-22) Bantu banunu, nui balombene kulesha bansongua be mu kakongye kenu lutumbu mu mishindo i bungi. Su bakumina kuinukuasha na kuinutuala, sunga kuenda nenu mu kisalue sunga kuinukuasha na bungi bukuashi bua ku mbidi, ebalesheyi lutumbu p’anukumina bukuashi buabo. Monayi buno bukuashi bu Yehowa enulesha kifulo. Nui kukaanya bi’anupete ba kuuku be bungi abenukuasha. Efuku dioso pasukilayi ba kuuku benu bansongua buabadia kutama mu kikudi, na ebalunguleyi mushindo wanukuete kupusha muloo p’anumono bansongua be mu kakongye, abakitshi midimo i bungi bua kukuasha kakongye. Na kuminayi kukisha nabo nsaa pamune, bua kuibalungula mianda yanudi bamone mu nshalelo enu. Su nubakitshi bino, anuikala “anutumbula” Yehowa bua bansongua baadi mutueshe mu kakongye.​—Kol. 3:15; Yo. 6:44; 1 Tes. 5:18. w21.09 11-12 ¶12-13

Yehowa mmufule bakuetu balume na bakashi. Anka, nta mbibofule bua kufula bakuetu be mu kifuko kia mu kikudi nsaa yoso nya. Muanda, tui batuukile mu bipikua bilekenelekene, na tui bakudile mu ma mbalo elekene. Na atue boso atukitaa bilubilo, na tui balombene kukokosha na kuinyongosha bangi. Dingi, tui balombene kukuatshishena bua kunyingisha kifulo kia mu kifuko kietu kia mu kikudi. Tui kuibikita mushindo kinyi? Pa kuambula Nshetu mu kulesha kua bakuetu balume na bakashi kifulo. (Ef. 5:1, 2; 1 Yo. 4:19) Muntu sha lusa, akitaa muaye moso bua kuibakuasha na kuibanyingisha. Mushindo ubaadi Yesu mukitshine bantu mianda, nguleshe abituulaa Yehowa pa mbalo ya bangi na kuibapasukila. (Yo. 5:19) Nsaa ibamuene kibumbu kia bantu, Yesu “nkupusha lusa, mwanda babaadi bakookye, na bafwambukye bu mikooko ishii na mulami.” (Mat. 9:36) Bibaadi bipushe Yesu, bibaadi bikile mpa na kifulo. Na aye nkukita mpa na kingi kintu bua kuibakuasha, baadi mupashe baasha mikumbo na boso “babaadi bafwambukye na bushito.”​—Mat. 11:28-30; 14:14. w21.09 22 ¶10-11

Yehowa mmufule kuikala na lusa. Mpoolo mutumibua badi muyokielue bua kufunda’shi Efile Mukulu “sha lusa lungi.” Mu uno muanda, Mpoolo apatuula’shi Efile Mukulu e na lusa muanda apa bafubi baye bedibua muimu bashii bapuidikie lukulupilo lua kupeta muwa wa losoo muiyilu. (Ef. 2:4-7) Anka Yehowa t’alesha nka penda bafubi baye bidibue muimu lusa nya. Kayimba ka misambo Davide bafundile’shi: ‘Yehowa akitshinaa bantu boso bibuwa, afwilaa bioso bibapangile lusa.’ (Mis. 145:9, EEM) Muanda’shi Yehowa mmufule bantu, ebaleshaa lusa nsaa yoso yapete kabingilo ka kuibikita. Yesu auku bi kifulo na lusa lua Yehowa kalolo kukila bantu boso. Yehowa na Yesu babaadi pamune munda mua bipua bibungi, kumpala kua’shi Yesu afikie pano pa nsenga. (Nki. 8:30, 31) Misusa ibungi, Yesu badi amono mushindo wi Nshaye, afuila bantu lusa ku miluisho yabo. (Mis. 78:37-42) Mu malongiesha aye, Yesu badi akamba kushimika kasele pa dino eyikashi dia Nshaye di buwa. w21.10 8-9 ¶4-5

Yehowa baluluile luno luteko na eyi dibukopo adifiki muiyilu, alaa’shi atumbisha eshina diaye. Kukiila ku mudimo wa bulungudi, Yesu badi mutumbishe eshina dia Nshaye. (Yo. 17:26) Bena Kidishitu ba binyibinyi abamona’shi nyi nkinemo kikata kia kufubisha eshina di’Efile Mukulu na kuidiukisha bangi. Mu siekele a kumpala B.B., kunyima kuabo kutula kakongie ka bena Kidishitu, Yehowa Efile Mukulu badi “mutadishe binangu biaye kwi bena maumbo bwa kusangula mwanka mwilo bua kinemo kia eshina dyaye.” (Bik. 15:14, NWT) Bano bena Kidishitu boso ba mu siekele a kumpala babaadi na kinemo kia kufubisha eshina di’Efile Mukulu na kuidiukisha bangi. Batumibua na balongi babadi bafubishe eshina di’Efile Mukulu pa kulungula mukandu wi buwa na pa kufunda mikanda ya mu Bible. Abalesheshe abo banabene’shi mbekale muilo bua eshina di’Efile Mukulu. (Bik. 2:14, 21) Mu mushindo umune ba Temue Yehowa mbekale muilo bu’Eshina dia Yehowa. w21.10 20-21 ¶8-10

Kifulo ki na lulamato ki’Efile Mukulu nkia loso. Dino eyikashi di na muulo kifulo ki na lulamato mbeditemune misusa 26 mu Misambo 136. Mu verse a kumpala atubadika’shi: ‘Tumbulayi Yehowa, mwanda e buwa kifulo ki na lulamato kyadi netu nkya ikalaika.’ (Mis. 136:1, Ñono na malango) Mu verse a 2 na ku verse 26 mbambuule kino kishima akiamba’shi; “Kifulo ki na lulamato nkya looso.” Atubadika ingi verse i mu uno musambo, ta mbilombene nka penda kuitukuasha nya, kadi abitukanyisha bungi bua misusa abuitulesha Yehowa kifulo ki na lulamato kushi kukooka. Kino kishima kiabadi bambuule’shi “kifulo ki na lulamato nkya looso” akitushinkamisha’shi kifulo ki na lulamato ki’Efile Mukulu kui bantu baye nta nkishintulukie nya. Abitukumu ku mashimba ngofu pa kuuka’shi kifulo kia Yehowa kui bafubi baye nkia loso! Yehowa ekala na lulamato kui bafubi baye, bikishekishe nsaa ya badi mu tuinyingoshi. Kuuka’shi Yehowa tetulekiela aketupa muloo na bukome biatudi nabo lukalo buatudia kukambila tuinyingoshi na kutungunuka na ku mufubila mu nshalelo etu oso.​—Mis. 31:7. w21.11 4 ¶9-10

Ingi nsaa tui balombene kupampakana p’atunangushena pabitale mianda ayifiki kumpala bu kuluishibua kua lulanguilo lua madimi, ngoshi ya Goge a ku Magoge, na ngoshi ya Armagedone su? Tobueyipuishe obe nabene’shi: ‘Su kiakia kipungo ki na mianda ayitshinyisha kibafiki, nakekala na mushindo wa kushaala na lulamato luande loso su?’ Su we na ino mianda mu binangu, mayi a Yesu atupete mu kifundue kietu kia lelo ngalombene nkukuasha ngofu. Yesu balunguile balongi baaye’shi: ‘Mashimba eenu taapampakananga. Kuminayi mui Efile Mukulu, nkumineyi naami namu.’ Lukumino lui bukopo, aluketukuasha buatudia kunyingiila sunga kuatuuka muanda kinyi mu mafuku aafiki. Tui balombene kunyingisha lukumino luetu, bua kunyingiila bitompuanga bia mafuku aafiki pa kutala mushindo watunyingiila mianda ikuete kutompa lukumino luetu binobino. Tui balombene kutundula mianda kampanda ayitungu’shi tunyingishe lukumino luetu. Nsaa yoso y’atunyingiila kitompuanga, lukumino luetu alunyisha kunyinga. Bino abitukuasha buatudia kunyingiila bitompuanga bia mafuku aafiki. w21.11 20 ¶1-2

Mpoolo mutumibwa badi munyingishe Timote, mpa na bena Kidishitu boso bwabadya kukumbasha mudimo wabo kalolo. (2 Tim. 4:5) Anka kwi nkalakashi. Bu kileshesho, banda kunangushena bakwetu bashale mu maumbo mwabadi bapele ingi midimo yetu sunga kukandjika yoso. Mwilo wa Yehowa ukwete aupete nkalakashi ilombene kwibabofusha. Bu kileshesho, be bungi bakwete abafubu ngofu bwa kulombasha nkalo ya bifuko byabo. Abakumina kukita bi bungi mu bulungudi, anka ku nfudilo a lubingo, mbakokye. Bangi, ta be bya kukita bi bungi mwanda wa mukumbo usha’upu sunga bununu; pangi, bangi be nka mu mashibo aabo ta be bya kutuka. Bangi namu abepusha nka bu bashi na muulo ku meso kwa Yehowa. Sunga twekala na myanda inaminyi, Yehowa mulombene kwitupa bukome bwatudi nabo lukalo bwakutungunuka na kumufubila. w21.05 20 ¶1-3

Ingi nsaa bangi mbalombene kuitutakula pa bukopo bua kukita ingi midimo ayitukutshishua kulanguila Yehowa mu mushindo wadi mukumiine. Nsaa yabakitshi bino, abitungu tuate kitshibilo ki na muulo. Tutaleyi mayi a kulonga ena muulo ukata atupete mu Beena-Levi 19:19 aakula’shi: “Tofwalanga kilamba kii na bipese bya bilamba biilekeelene bitele na mpeko ibidi iilekeene.” Uno muiya ubatuesheshe kuilekena pankatshi pa bena Isaleele na ingi miilo ibadi ibefunyishe. Lelo uno, su muina Kidishitu afuala kilamba ki na buanda builekene ta bi bubi nya, bu bilamba bina butongo poliestere na bingi bintu. Anka, tatui balombene kuikala bu bangi bantu abalanguila na kukita bikitshino bishikuene na abilongiesha Bible sunga bekala bena kalasa netu, bena mudimo netu, sunga bena kifuko netu bashi ba Temue ba Yehowa. Tui bafule bena kifuko netu na tui bafule bakungishanyi netu. Anka, bitshibilo biatuata mu nshalelo etu abilesha’shi atukokiela Yehowa sunga bino bitshibilo biekala abitufuishisha nkalakashi kui bantu betuifunyishe. Tutentekieshe’shi bua kuikala ku lupese lu’Efile Mukulu. Abitungu kuikala beselele sunga bantu bepa buabo, muanda bino bina muulo ukata.​—2 Kod. 6:14-16; 1 Mp. 4:3, 4. w21.12 5 ¶14; 6 ¶16

Aku namu dino eshinda mbalombene kuidipeta. Yesu bakuile’shi: ‘Su nwalama eyi dyande, nwi balondi bande eyendo anukauku binyibinyi, na binyibinyi abinwikasha bantu balungantu.’ (Yo. 8:31, 32) Biabia, tanui balonde kisaka nya, anka nui bakimbe bia binyibinyi. Nubabangile kuilongiela eyi di’Efile Mukulu ngofu bua kuuka kienutekie na nubadi batemeshe malongiesha a Yesu. Na nuibalongie’shi Yehowa akumina tusumbule malongiesha oso a bipuilo bia madimi, na misangelo na bipikua bioso biabadi batushe kui ba mpagano. Na nuibalongie dingi’shi kukita mianda ya benutekie kui Yehowa na kuleka bikitshino bioso biadi mushikue, nkulombene kuikala bukopo. (Mat. 10:34-36) Kushi mpaka okuete kuikitshisha ngofu bodia kushintula ingi mianda mu nshalelo obe. Anka, okuete kunyingila muanda we mufule Nshobe a muiyilu. Ena nfiedi pa muanda obe!​—Nki. 27:11. w21.12 22 ¶3; 23 ¶5

Moyise, nyi nkileshesho ki buwa bukile kia muntu baadi mukumiine baamuludika, kunyima kuaye kukita kilubilo kikata. Dingi efuku, baadi mufiite munda, akutua kutumbisha Yehowa. Pa muanda wa biabia, Moyise baadi mushimishe kineemo kia kutuela mu Nsenga ya Mulayilo. (Mb. 20:1-13) Pa baadi Moyise mutekie Yehowa buadia kushituula kitshibilo kiaye, Yehowa baamulunguile’shi: “Tshiba kwakula naami pa uno mwanda.” (Miy. 3:23-27) Moyise ta baafiitshile munda nya. Anka, baadi mukumiine kitshibilo kia Yehowa, Yehowa namu baatungunukile na kumufubisha, bua kukunkusha muilo wa Isaleele. (Miy. 4:1) Moyise, muitulekiele kileshesho bi buwa biatudia kuambula pakumiina elango. Bua Moyise, sunga mbibaadi auku’shi t’akapete kintu kibaadi aata na muulo ngofu, baadi mushaale nka na lulamato kui Yehowa. Bino abilesha’shi baadi mukumiine malango. Atupete bukuashi nsaa y’atuambula bileshesho biabadi balekie kui bano bantu baasha lulamato, bu Moyise. (Nki. 4:11-13) Bakuetu balume na bakashi be bungi, mbakite n’abo namu bino. w22.02 11 ¶9-10

Mu kipungo kia mashika mu 32 B.B., kuuku a Yesu ebuwa Lazare bakumbile maladi aye nkufua. (Yo. 11:3, 14) Lazare baadi na bakuabo bakashi babidi Mariya na Maata na Yesu namu baadi mufule kino kifuko ngofu. Nsaa ibapushiishe Maata’shi Yesu kuete kufika kuabadi, bayile lubilo mu kufumankana naaye. Banda kunangushena kenyongoshi kabaadi nako nsaa ibakuile’shi: “Mwanaana, su bodya kwikala panka, mukwetu tabadya kufwa nya.” (Yo. 11:21, 32-33) Yesu baadi munokieshe mpolo nsaa ibamuene mushindo ubaadi Mariya na Maata benyongole bua lufu lua mukuabo mulume. Su we mufuishe kuuku oobe, Yehowa apusha biokuete kupusha. Yesu nyi “aleesha mpala” ya Nshaye. (Eb. 1:3, NWT) Nsaa ibadidile Yesu, baadi muleshe abipushaa Nshaaye. (Yo. 14:9) Su we mufuishe umune a ku bantu boodi mufule, ikala mushinkamishe’shi Yehowa, takuete nka penda kumona nya, kadi kuete kupusha biopusha. Yehowa akumina kupaasha eshimba diobe ditapikie.​—Mis. 34:18; 147:3. w22.01 15 ¶5-7

Su buata nsaa ya kuisamba, kutemesha, na kunangushena pabitale Yehowa, okapete miabi ibungi. Kia kumpala atuata bitshibilo bibuwa. Bible etushinkamisha’shi: “Atambuka mu mulongo wa ba sha binangu eekala sha binangu.” (Nki. 13:20) Kia kabidi, atuikala balongieshi bebuwa. Su atulongo na muntu Bible, kamune ka kutuipatshila tuina muulo nkakukuasha mulongie a Bible bua’shi efubuile kui Yehowa. Su tubanyisha kuisamba na Nshetu e muiyilu, na kifulo kietu muadi akinyisha kutama na atuikala na mushindo wa kukuasha mulondi etu a Bible buadia kumufula. Banda kunangushena ku kileshesho kia Yesu. Badi muakule pabitale Yehowa, mu mushindo aulesha muloo, aulesha kifulo, biabidia kukuasha balongi baye bua’shi nabo namu bafule Yehowa. (Yo. 17:25, 26) Kia kasatu, lukumino lobe alunyingi. Banda kunangushena kilombene kukitshika nsaa yotekie Efile Mukulu bukunkushi, bukome, sunga bukuashi. Nsaa yoso ayaluula Yehowa ku ino nteko yoso lukumino lobe alunyisha kutama muadi.​—1 Yo. 5:15. w22.01 30 ¶15-17

Yehowa etutekie’shi tukatushe binangu bioso bi bubi, na biubishi bi bubi kumuanda mmuitufule ngofu, na akumiina’shi tuikadikie na muloo mu nshalelo eetu. (Yesh. 48:17, 18) Yehowa auku’shi baaba booso be na ngabiabi ibi, abeluishisha abo banabene na kuluishisha bangi. Abimuinyongoshaa pa kumona atuiluishisha na kuluishisha bangi. Bangi ba kuuku betu, na bena kifuko be bungi be kubanga kuitusepa, p’atuikitshisha bua’shi tushintule bumuntu buetu. (1 Mp. 4:3, 4) Be kuamba’shi tui na matalua a kukita kioso kiatukumiina, na ta tui bia kutengiela’shi bangi betulungule kiatudia kukita nya. Anka baaba booso abasumbushena mayi a kulonda a Yehowa, ta be mu bulungantu nya. Mu binyibinyi, be nka mu bukitshishi bua ndumbuluilo a Satana. (Lom. 12:1, 2) Atue booso tui kumpala kua kino kitshibilo: Tui kuata kitshibilo kia’shi tushaale na muntu eetu a kala, mumunyibue na miluisho na ndumbuluilo a Satana, sunga kuata kitshibilo kia kutadiila’shi Yehowa, eetualuule buatudia kuikadika bantu be buwa kubanga binobino.​—Yesh. 64:8. w22.03 3 ¶6-7

Nsaa y’atubadika Eyi dy’Efile Mukulu na kwidinangushena, abitukwasha bwa kwikala na mweneno e buwa pabitale nkalakashi yetu. Tala mushindo ubadi Bible mukwashe mukashi a mu lufwila. Ungi mukulu bamulungwile’shi, mulombene kupeta bukwashi su abadika malongyesha e mu mukanda wa Yoobo. Pabebikitshine, musango umune babangile kutopeka Yoobo bwa binangu byaye bi bubi. Mu binangu byaye badi alungula Yoobo’shi: “Yoobo! Twekalanga nk’onangushena pabitale myanda yobe!” Anka kunyima batundwile’shi, n’aye enka na binangu bu bya Yoobo. Bino bibamukwashishe bwa kulumbula mweneno aye na kunyingila kinyongwa kya lufu lwa mulume aye. Ungi mushindo ukwete Yehowa kwitunyingisha, nyi ku bukwashi bwa bakwetu bena Kidishitu. Mpoolo bafundjile’shi, badi na lukalo lwi bukopo lwa “kwinyingishena” na bakwabo balume na bakashi.​—Lom. 1:11, 12. w21.05 22 ¶10-11; 24 ¶12

Mu mafuku a kala Yehowa balunguile bena Isaleele’shi: ‘Misusa isatu ku kipwa bantu booso bekale abende kumpala kua Yehowa Efile Mukulu oobe ku mbalo yekala musangule.’ (Miy. 16:16) Abitungu balekie mashibo abo na mafuba abo kushi muntu ealama. Anka Yehowa badi muibale’shi: “Muntu tayikala na meeso pa nsenga yobe nguba ofiki bwa kumona lukyebo lwa Yehowa Efile Mukulu oobe.” (Efi. 34:24) Bena Isaleele boso babadi batule lukulupilo luabo loso mui Yehowa na babadi abamutshinyi, babatuelele mu uno musangelo wa ku kipua na dingi babadi papete miabi mu mishindo i bungi. Bu kileshesho, babalongiele bi bungi pabitale miya y’Efile Mukulu, banangushena mushindo wi buwa bua Yehowa kuabadi, babadi basangele kushala pamune na balanguidi naabo bua kuinyingishena. Babapetele miabi i mumune na yatupetaa patuisumina ingi miloo bua kutuela mu bisangilo bia bena Kidishitu. Banda kunangushena mushindo aupusha Yehowa muloo nsaa yuelumbula bua nkatusha ngaluulo ayikuasha mu bisangilo. w22.03 22 ¶9

Yehowa badi alongyesha Mwan’aye bya nkekala Tshite-mwakwidi etu mukata. Yesu badi mumone byabidi bukopo ku kokyela Efile Mukulu mu nkalakashi i bukopo. Badi mukyengye ngofu mu mushindo ubadi atekye na “kwela musaase na mpolo ku meeso” bwa’shi apete bukwashi. Kushi mpaka, pa mwanda Yesu mmupushe kano kenyongoshi ke bino, mulombene kupusha nkalo yetu na ‘kwitukwasha’ nsaa ‘yatudi mu kutompibwa.’ Twina lutumbu lukata mwanda Yehowa mmutule Tshite-mwakwidi mukata etu sha lusa mulombene “kufwambuka neetu mu kubofula kwetu”! (Eb. 2:17, 18; 4:14-16; 5:7-10) Yehowa badi mutadile’shi Yesu akyengye bwa kwalula lukonko lwi na muulo: Muntu mulombene kushaala na lulamato kwi Yehowa mu bitompwanga bi bukopo su? Satana amba’shi nya! Amba’shi bantu abafubila Efile Mukulu penda mwanda wa’shi ebape bintu, ashinkamisha’shi ta mbafule Yehowa. (Yob. 1:9-11; 2:4, 5) Yesu badi mulame lulamato lwaye, aye nkulesha’shi Satana sha madimi. w21.04 16-17 ¶7-8

Nkumpala kwa’shi mulongi a Bible abatshishibwe, abitungu atumikile malongyesha e mu Bible. Nsaa ayitumikila mulongi a Bible byabya by’alongo, afiki bu “muntu mudimukye” a mu kileshesho kya Yesu badi mubundule bwina bula bwa kwibakila nshibo yaye pa mabwe. (Mat. 7:24, 25; Luk. 6:47, 48) Kwasha mulongi obe a Bible bwadya kushintula nshalelo aye. (Mak. 10:17-22) Yesu badi auku’shi, bi bukopo bwa’shi muntu mpeta audishe bintu byoso by’adi nabyo. (Mak. 10:23) Anka, Yesu badi mulungule uno muntu bwadya kukita uno mwanda wi bukopo mu nshalelo aye. Bwakinyi? Mwanda Yesu badi mumufule. Ingi nsaa, twi kwikoka bwa kunyingisha mulongi a Bible bwadya kutumikila myanda y’alongo, mwanda atupwandjikisha’shi talombene kushintula myanda itekibwe. (Kol. 3:9, 10) Anka, su ku mbangilo w’esamba na mulongi a Bible myanda ayitungu’shi ashitule pakuki nsaa, mmulombene kubanga kushintuluka. Pa kwisamba naye bino, olesha’shi omupasukila.​—Mis. 141:5; Nki. 27:17. w21.06 3 ¶3, 5

Mpyele mutumibwa esambila pabitale kileshesho ki buwa kitulekyele Yesu, mwanda badi munyingile makyenga; anka twikumwambula mu ingi myanda i bungi. (1 Mp. 2:18-25) Eyendo, Yesu mmwitulekyele kileshesho kya kulonda mu myanda ibadi mwakule na mukite mu nshalelo aye oso. Sunga byatudi bakutwe kupwidjika, twikwambula kileshesho kya Yesu su? Olo, twikwikyambula. Tentekyesha’shi Mpyele etukankamika bwatudya “kulonda mu matabula a [Yesu]”​—kushi mu mushindo upwidjikye. Su twalonda mu matabula aye kalolo, na kukita mwetu moso sunga byatudi bantu bakutwe kupwidjika, atukokyela elango dya mutumibwa Yowano adyamba’shi: “Tungunukayi na kutambuka . . . nka bu bibaadi’ye [Yesu] mutambukye.” (1 Yo. 2:6) Kulonda mu matabula a Yesu akwitukwasha bwa kwifubwila pepi na Yehowa. Bwakinyi atwamba byabya? Yesu mmwitulekyele kileshesho kikilekile buwa akilesha mushindo watudya kwikala na nshalelo asankisha Efile Mukulu. (Yo. 8:29) Byabya, pa kulonda mu matabula a Yesu, atusankisha Yehowa. Na twikale bashinkamishe’shi, Nshetu e mwiyilu efubwila pepi na baba boso abakitshi mwabo moso bwa kwikala ba kuuku baye.​—Shak. 4:8. w21.04 3 ¶4-6

Yehowa amonaa nyikashi yetu i buwa; amonaa’shi atukela bantu be buwa na etukakaa kwadi. Su twashaala na lulamato kwadi, ekala kuuku etu bwa loso! (Yo. 6:44) Nsaa yatudi bashinkamishe’shi Yehowa mwitufule, atukitshi mwetu moso bwa kumufubila sunga twekala mu nkalakashi. Ku lungi lupese, su twina mpaka’shi Yehowa mwitufule, ‘bukome [bwetu] bwi kupela.’ (Nki. 24:10) Na nsaa y’atubofula kwishimba na kushimisha lukumino’shi Efile Mukulu mwitufule, t’atobesha kukambila bulwishi bwa Satana. (Ef. 6:16) Bangi bena Kidishitu mbabofule mu kikudi, mwanda wa ino mpaka. Nkinyi akitungu’shi tukite su tubabanga kwikala na mpaka pabitale kifulo ky’Efile Mukulu? Musango umune, abitungu tukatushe byabya binangu. Teka Yehowa akukwashe bwa’shi opyanyikishe “myalashêno” na ‘butaale bw’Efile Mukulu, abo butabukile binangu byooso, abulama eshimba dyoobe na binangu byoobe.’ (Mis. 139:23, EEM; Fid. 4:6, 7) Tentekyesha’shi twe bupenka. w21.04 20 ¶1; 21 ¶4-6

Bodi mufikie Temwe a Yehowa naminyi? Kia kumpala, bodi mupushe “mukandu wi buwa” pangi kui baledi bobe, bena mudimo nobe, bena kalasa nobe, sunga mu bulungudi bua ku nshibo na nshibo. (Mak. 13:10) Akupu, kubadi muntu badi mukishe nobe nsaa i bungi na muikitshishe bua kulonga n’obe Bible. Mu kulonga k’obe, bobangile kufula Yehowa na ouka’shi mukufule. Yehowa mmukukakie mu bia binyibinyi, na binobino, bu bitodi mulongi a Yesu Kidishitu, todi na lukulupilo lua kuikala na muwa wa loso. (Yo. 6:44) Kushi mpaka, we na lutumbu bua Yehowa muanda Mmutakule muntu buadia nkulongiesha bia binyibinyi, na’shi Mukukumine bu mufubi Aye. Bu bibatupu kuuka bia binyibinyi, tui na kinemo kia kukuasha bangi bua kutuela muishinda adituala ku muwa. Bi kuikala bibofule bua kulungula mukandu wi buwa ku nshibo na nshibo, anka biekala bukopo bua kubanga kulonga Bible na muntu. w21.07 2 ¶1-2