Mueshi wa 2

Yehowa akuminaa’shi bafubi baye bekale na muloo. E pepi na oso a kwatudi na amonaa nsaa yoso yatudi benyongole sunga babofule kwishimba. (Mis. 145:18, 19) Tala mushindo ubadi Yehowa mupasukile mutemuki Eliya. Uno muntu sha lulamato badi kwanka mu kipungo kibadi Isaleele mu nshalelo e bukopo. Bantu basha matalwa ba mu Isaleele abadi ababingabinga balangwidi b’Efile Mukulu, bikishekishe, abadi abakimbi kwipaa mpa na Eliya. (1 Bf. 19:1, 2) Na dingi, Eliya badi apwandjikisha’shi, naye mutemuki umune bashala afubila Yehowa, na bino bibadi binyishe ku mu bofusha. (1 Bf. 19:10) Musango umune, Yehowa badi mukite kintu kampanda bwa kukwasha Eliya. Yehowa badi mutume mwikeyilu bwa kushinkamisha Eliya’shi t’ebupenka nya. Mwikeyilu bamulungwile’shi, kwi bangi bena Isaleele be bungi baky’abatungunuka na kufubila Yehowa na lulamato! (1 Bf. 19:5, 18) Yesu badi mushinkamiishe balongi baye’shi, abakapete kifuko kikata kya mu kikudi. (Mak. 10:29, 30) Na Yehowa Mfumu a kifuko kyetu kya mu kikudi, mmulee’shi akwasha boso abakumina kumufubila.​—Mis. 9:10. w21.06 8-9 ¶3-4

Bantu be bungi lelo uno, bakwete abakokola mwanda tukwete kufubisha Bible bwa kulesha’shi angi malongyesha a bipwilo, nga madimi. Bakata ba bipwilo, bakwete kulongyesha bena bipwilo byabo’shi, Efile Mukulu kwete anyoko bantu babi mu kaalo. Bakwete abafubisha dino dilongyesha bwa kwikala na matalwa pe bantu. Atwe bafubi ba Yehowa, abafubila Efile Mukulu sha kifulo, tukwete kulesha patoka’shi dino dilongyesha ndya madimi. Bakata ba bipwilo bakwete abalongyesha dingi’shi, anyima t’afwiyaa. Su dino dilongyesha ndya binyi, muntu su ngumune tabadya kwikala na lukalo lwa lusangukilo. Sunga bipwilo bi bungi bikwete abilongyesha’shi kintu kyoso ky’atukitshi lelo uno, Efile Mukulu badi mupwe kwikilumbula kumpala, atwe tukwete atulongyesha’shi, muntu e na bulungantu na mulombene kusangula bwa kufubila Efile Mukulu. Bakata ba bipwilo abakitaa kinyi p’abapusha atulongyesha bino? Ke bungi, abafitaa munda! Su twi bafule bya binyibinyi, abitungu tukumine byoso abyakula Efile Mukulu. (Yo. 8:45, 46) Mu kwilekena na Satana Diabulu, abitungu tushimatshile mu bya binyibinyi. T’atukitshi kintu su nkimune kikutwene na nkumino yetu. (Yo. 8:44) Efile Mukulu atekye bafubi baye’shi, ‘bashikwe bubi’ anka ‘balamate ku myanda ibuwa,’ nka bu bibadi bibikite Yesu.​—Lom. 12:9; Eb. 1:9. w21.05 10 ¶10-11

Nkinyi akitungu’shi tukite su tubapono mu muteo wa kwitatula sunga wa lwabi? Nkwi muposoka! Mpoolo mutumibua bakwile’shi baba boso babadi ‘bakwate’ kwi Diabulu, mbalombene kuposoka mu muteo. (2 Tim. 2:26, EEM) Toyilwanga’shi, Yehowa e bukome kukila Satana. Byabya, su twa kumina bukwashi bwa Yehowa, twi balombene kuposoka mu muteo oso wa Satana. Pa mutwe pa kupona mu miteo ya Satana bwa kwi mu posoka, abitungu twiyidimukile. Twi kwibikita nka penda ku bukwashi bw’Efile Mukulu. Byabya, esendele Yehowa bwa’shi akukwashe otundule nyikashi i bubi nsaa yayibanga kwikala na bukitshi bwi bubi mu ngyelelo obe a binangu, na bikitshino byobe. (Mis. 139:23, 24) Kita mobe moso bwa’shi twetatulanga sunga kwikala na lwabi! Satana mpibwe takudi bipwa binunu. Binobino, abamwanya nkano na akupu abakamubutula. (Kibaf. 20:1-3, 10) Tukwete kutengyela dyadya efuku. Anka binobino, shala mudimukile miteo ya Satana. Kita mobe moso bwa’shi toponanga mu muteo wa kwitatula sunga wa lwabi. Twateyi kitshibilo kya ku ‘kandamena Diabulu na aketusuku.’ w21.06 19 ¶15-17

Yehowa asankaa nsaa aikumina muntu kulonga bia binyibinyi bi mu Bible na p’ebilongiesha bangi. (Nki. 23:15, 16) Yehowa e na muloo wi bungi p’amono abikitshika lelo uno! Bu kileshesho, sunga mu kipua kia mudimo kia 2020 muikele kipupa, tuibalongie Bible na bantu 7 705 765, na tuibakuashe bantu 241 994 buabadia kuilambula kui Yehowa na kubatshishibua. Na bano balongi bapia, abalongo Bible na bantu, na kuikasha bangi balongi. (Luk. 6:40) Kushi mpaka, atusankisha Yehowa nsaa y’atukitshi mudimo wa kuikasha bantu bu balongi. Mudimo wa kuikasha bantu bu balongi ta ngubofule nya, anka na bukuashi bua Yehowa, tui kukita uno mudimo wa kulongiesha bantu bua kufula Nshetu sha kifulo e mwiyilu. Tui kuifundila kepatshila ka kukimba muntu sunga umune a kulonga naye Bible. Tui kukanya ki kukitshika su pa nsaa i buwa tuepusha bantu batufumankana nabo su abakumina’shi tulongie nabo. w21.07 6-7 ¶14-16

Mfumu Davide mutushe bintu biaye’ye nabene bua kukuatshishena kuibaka kua ntempelo. (1 Mya. 22:11-16) Nsaa yatukutua bukome bua kupetekielua ku mudimo wa luibako lua teokrasi, tui balombene kutungunuka na kukuatshishena uno mudimo, pa kutusha bia buntu bietu muyile ngobesha yatudi nayo. Na tui balombene kukuatshishena bansongua, bapete miabi ayitukila ku mianda yatudi bamone. Pabitale kalolo, tutaleyi kileshesho kitulekiele Mpoolo mutumibua. Baadi muitanyine Timote buadia kuenda naye mu mudimo wa bu misionere. Na Mpoolo baadi mupalakashe mukandu wibuwa, na kulesha uno nsongualume mayele a kulongiesha. (Bik. 16:1-3) Mpoolo balongieshe Timote buadia kuikala mulungudi na mulongieshi e buwa. (1 Kod. 4:17) Na Timote namu baadi mufubishe mayele a Mpoolo bua kulongiesha bangi. w21.09 12 ¶14-15

Nkinyi kiatudi balombene kulongiela ku kileshesho kia Apolose na mutumibua Mpoolo? Boso buabo abadi na kiukilo ki bungi kia Bifundue. Abaadi baukibue kalolo na abaadi balongieshi be buwa. Na boso buabo abaadi bakuashe mu kuikasha bantu be bungi bu balongi. Anka ta babadi abepikena. (Bik. 18:24) Nsaa ibadi Apolose afubila mu Kodinda, bangi bakuetu mu kakongye tababadi abalesha’shi mbamufule’ye kukila bangi bakuetu, mpa na Mpoolo. (1 Kod. 16:12) Apolose badi mufubishe ngobesha yaye mu mushindo wi buwa​—kulungula mukandu wi buwa na kunyingisha bena Kidishitu naye. Tubashinkamishe’shi Apolose badi muntu muiyishe. Bu kileshesho, ta kui mbalo su ngimune mu Bible ailesha’shi badi mufitshile Akila na Prisile munda nsaa ibabadi ‘bamupatulwile kalolo [bi] eshinda di’Efile Mukulu.’ (Bik. 18:24-28, Kilombeeno kipya 2014) Mpoolo mutumibua badi auku mudimo wi buwa ubadi ukite Apolose. Anka, Mpoolo ta badi muikalakashe’shi bantu abamono Apolose bu e buwa ku mukila. Elango dibadi Mpoolo mupe bena kakongye ka mu Kodinda, adilesha patoka’shi badi muiyishe, auku mikalo yaya na’shi badi na nkatshinkatshi.​—1 Kod. 3:4-6. w21.07 18-19 ¶15-17

Adama na Eva abadi bapele kukokiela Efile Mukulu mu kukumina kuabo, nyi buakinyi abadi na kia kukatuka mu kifuko kiaye. Nkinyi kibadia kufikila bana baye? Na kifulo kioso, Yehowa badi muate mpango bua’shi bana baye abamukokiela, ebakumine mu kifuko kiaye. Badi mukite bino ku bukuashi bua mulambu wa Muan’aye umune eleka. (Yo. 3:16) Ku bukuashi bua mulambu wa Yesu, Yehowa mmuate bantu 144 000 bua’shi bekale bana baye. (Lom. 8:15-17; Kibaf. 14:1) Na dingi, kui bantu midiyo basha lulamato bakuete kukokiela Efile Mukulu na kukita kikiebe ki’eshimba diaye. Bano bantu boso, abakulupila kuikala bena kifuko kia Yehowa kunyima kua kutompibua kua nfudilo, ku nfudilo kua bipua kinunu. (Mis. 25:14; Lom. 8:20, 21) Binobino bakuete kuitamina Yehowa Mupangi abo bu “Yaaya.” (Mat. 6:9) Na dingi, bantu abakasanguka abakebapa mushindo wa kulonga pabitale bia kuuka Yehowa na kiatengiela kuabadi. Baba abakakokiela ku bukunkushi buaye, abapete nabo namu mushindo wa kuikala mu kifuko kiaye. w21.08 5 ¶10-11

Mpoolo mutumibua, Yehowa baadi mumupe mudimo wa bulungudi na Mpoolo namu baadi aata uno mudimo na muulo ukata. Mpoolo baadi alungula mukandu wibuwa ‘mu ma mbalo awule bantu na ku nshibo na nshibo.’ (Bik. 20:20, EEM) Baadi alungula nka mukandu wibuwa nsaa yooso ayimueka mushindo. Bu kileshesho, pabadi atengiela bakuuku baye ba mu Atene, balunguile mukandu wibuwa kui bisaka bia bantu bilekenelekene. Na kubatuukile bipeta bibuwa. (Bik. 17:16, 17, 34) Sunga ‘pabaadi mu lukano mmuanyibue ndoombo’, Mpoolo baadi alungula mukandu wibuwa kui booso babadi nabo. (Fid. 1:13, 14; Bik. 28:16-24) Mpoolo baadi afubisha nsaa yaye kalolo. Baadi ayitanyina bangi buabadia kuenda naye mu mudimo wa bulungudi. Bu kileshesho, mu luendo luaye lua kumpala lua bu misionere, batshile Yowano Maako, na mu luendo luaye lua kabidi batshile Timote. (Bik. 12:25; 16:1-4) Kushi mpaka, Mpoolo baadi mukite muaye mooso buadia kulongiesha bano bakuetu balume booso mushindo wabadia kutuula mianda mu mulongo mu kakongie, mushindo wabadia kukita mudimo wa bu balami ba mikooko kalolo, na mushindo wabadia kuikala balongieshi bebuwa.​—1 Kod. 4:17. w22.03 27 ¶5-6

Bangi tabakumina mui Mupangi muanda abakumina nka mu kiakia kia bamono. Anka bakuete abakumina mu bingi bintu bia basha bamono bu gravitation, muanda be na bishinkamisho abilesha’shi e kuanka. Lukumino aluakuila Bible nalo namu nduimene pa “bishikamisho bia tushi balombene kumona.” (Eb. 11:1) Abitungu nsaa nakuikitshisha kui bungi bua kuilongiela bino bishinkamisho, anka bantu be bungi tabakumina kukita bino. Muntu shelongiela aye nabene bua kuuka bino bishinkamisho, mulombene kuamba’shi Efile Mukulu te kuanka. Kunyima kuabo kulonga bishinkamisho, bena sianse be bungi mbafikie mu kukumina’shi Efile Mukulu Mupangi a eyilu na nsenga. Ku mbangilo, bangi be kuamba’shi ta kui mupangi muanda’shi ta mbebalongieshi ku Universite. Anka be bungi binobino mbafikie mu kuuka Yehowa na kumufula. Atue boso abitungu’shi tunyingishe lukumino luetu mui Efile Mukulu, biatuikala balongie bi bungi sunga bipela. w21.08 14 ¶1; 15-16 ¶6-7

Yesu badi mufubishe lukindi lua muana mushimine bua kukuma mashimba eetu bua’shi etukuashe mu mushindo aukuminaa Yehowa kulesha bangi lusa. Muana badi mukatukie ku nshibo, na kuakua ‘bapudiishe bupeta bwaye booso ku lukiebanokiebano.’ (Luk. 15:13, Kilombeeno Kipya 2014) Kunyima belangile ku muikelo waye wa lukiebanokiebano, eyisha alukila ku nshibo kuabo. Nshaye namu bakitshine naminyi? Yesu bakuile’shi: “Pabadi yawa muana ki’nka kula na nshibo ya nshee, nshee bamumuene lusa lukata luamukuata, bayile lubilo akafumankana nee, amuibangata kiipa, amufifia ku matama.” Uno nshee bana tabaadi muishe muana aye milongo nya. Biabia, nshee muana badi mufuile muana aye lusa lukata, amukukila aye nkumualusha mu kifuko. Uno muana badi mukite muluisho ukata, anka nshaye pabatadile bi bukata bua kuilanga kuaye, bamufuidile lusa. Uno nshee bana sha lusa a mu lukindi alesha Yehowa. Mu kino kileshesho akikumu kuishimba, Yesu badi muleshe’shi Nshaye akuminaa kufuila ba nkitshishi’a bubi abelanga mu binyibinyi kuishimba lusa.​—Luk. 15:17-24, EEM. w21.10 8 ¶4; 9 ¶6

Lelo uno, bakata ba bipuilo bebungi mbakite muabo moso bua kukimba bia kushimisha eshina di’Efile Mukulu dinabene. Mbedikatushe mu ma Bible abo, na dingi mbapeleshe kuidifubisha mu midimo yoso itale bipuilo biabo. Ta kui muntu su ngumune akupela’shi nka penda ba Temue ba Yehowa nyi abafubisha eshina dia Yehowa, kui dinemeka na kuidipa ntumbo nya. Tukuete kufubisha eshina di’Efile Mukulu dinabene ngofu na kuidiukisha bangi kukila bingi bipuilo bioso! Pa muanda wa bino tukuete kuikitshisha muetu moso, bua kuikala na nshalelo muipushene na eshina dietu dia bu ba Temue ba Yehowa! (Yesh. 43:10-12) Tukuete kutusha ma Bible akile pa midiyo 240 a Traduction du monde nouveau, afunde eshina di’Efile Mukulu mu ma mbalo abadi bedikatushe kui bangi baludi ba Bible. Na dingi tukuete kutusha mikanda ayakuila Bible ina eshina dia Yehowa mu ndimi ikile pa 1 000! w21.10 20-21 ¶9-10

Atulanguila Yehowa nsaa yatukuasha bena Kidishitu netu bena lukalo na bukuashi. Yehowa badi mulee bena Isaleele boso babadi abalesha kalolo pa kukuasha balanda’shi ebapa efuto. (Miy. 15:10) Eyendo’shi, nsaa yoso yatukuasha balanguidi netu bena lukalo na bukuashi, Yehowa kuete kumona’shi naye atukuete kupa biabia bia buuntu. (Nki. 19:17) Bu kileshesho, nsaa ibadi bena Kidishitu ba mu Fidipe batumine Mpoolo bia buuntu mu lukano, badi muibitanyine’shi, “mulambu ukuminyibwe ulumbulukye kwi Efile Mukulu.” (Fid. 4:18, Esambi Dipya 2015) Abitungu onangushene pabitale bakuenu balume na bakashi be mu kakongie, na weyipushe’shi, ‘Kui muntu namu ena lukalo na bukuashi?’ Yehowa asankaa ngofu nsaa yetumono atufubisha nsaa yetu, bukome buetu, kiukilo kietu, na bintu bia ku mbidi bua kukuasha baba boso bena lukalo na bukuashi. Amono biabia bu kipindi kia lulanguilo luetu. (Shak. 1:27) Kulanguila Yehowa akuitutekie nsaa na kuikitshisha. Anka tabibukopo nya. (1 Yo. 5:3) Buakinyi tabi bukopo? Muanda atumulanguilaa pa muanda wa kifulo kiatudi naye, na kiatudi nakio bua bakuetu balume na bakashi. w22.03 24 ¶14-15

Kumpala kua kulesha bakuetu balume na bakashi lusa, abitungu tubande kuiwuka luinyi lukalakashi luabadi nalo. Bu kileshesho, mukuetu mukashi e kuikala na mukumbo wi bukopo. Pangi, t’ediladilaa pabikitale wanka, kadi e kuikala na muloo su muntu amukuasha. E kuata buabua bukuashi bupeela na muulo, bu kumuteekielanga bidibua, sunga kumukombelanga mu nshibo? Mukuetu mulume, e kushimisha mudimo waye. Tui kumukuasha na ndambo ya makuta, kushi kumulungula’shi nnatue babaamupa, na kutungunuka na kumukuasha mpa na p’akapetela ungi mudimo su? T’abitungu’shi tutengiele nka n’apetutekiela bakuetu balume na bakashi bukuashi, bua’shi tuibaleshe lusa nya. Nka bu Yehowa, tui balombene kukita kintu kampanda kumpala kua’shi betutekie. Atundushaa nguba kuifuku n’efuku kushi muntu kumuteka! Na etaata dia nguba adikuashaa muntu oso kushi nka baaba abamutumbula. Ta tui balombene kukumina’shi Yehowa kuete kuitupuila nkalo yetu na kuitulesha kifulo kiaye kikata su? Tui bafule Yehowa ngofu ku muanda, e na kifulo na kalolo! w21.09 22-23 ¶12-13

Kifulo ki na lulamato ki’Efile Mukulu akimutakula mu kufuidishena lusa. Yehowa nsaa y’amono nkitshishi a bubi elanga kuishimba mu binyibinyi na kuleka eshinda diaye dia miluisho, kifulo kiaye ki na lulamato akimusukuma buadia kufuila yawa muntu lusa. Davide kayimba ka misambo akula bino pabitale Yehowa: “Tetukitshina myanda muyile milwisho yetu, tetunyoka muyile bito byetu.” (Mis. 103:8-11) Muyile mianda ibadi Davide mumone, badi muukie bi mitanyo na bushito abuikalanabo kondo keshimba kaluikie. Anka baadi muukie dingi’shi Yehowa “ekuanka bua kumufuila lusa.” Nkinyi akitakulaa Yehowa bua kufuila bantu lusa? Lualulo lui mu kifundwe kietu kia lelo. Oolo, nka bu bibakuile Davide mu luteko, Yehowa afuilana lusa muanda muule ndaa na kifulo ki na lulamato bua boso abamuidiila. Nsaa yatukitshi muluisho bibuwa​—tuinyingole​—bua wawa muluisho ubatukitshi. Bino mbilombene kuitukuasha buatudia kuteka lusa na kushintuluka. w21.11 5 ¶11-12

Yehowa mufule eshina diaye, na akumina’shi muntu oso edinemekie. (Yesh. 42:8) Eshina diaye di buwa, ndisabulue takudi bipua bifikie ku binunu bisamombo. (Mis. 74:10, 18, 23) Bino bibabangile nsaa ibadi Diabulu (eshina adipushisha’shi “muntu adimbilaa bantu myanda”) mudimbile Efile Mukulu’shi t’akumina’shi Adama na Eva bekale na kintu kiabadi nakio lukalo. (Kib. 3:1-5) Kubanga nka paapa, Yehowa bakuete kumudimbila’shi, t’akumina kupa bantu kiakia kiabadi nakio lukalo. Yesu badi akalakashua ngofu, pabitale eshina dia Nshaye. Nka penda Yehowa nyi e na matalua a kumunana muiyilu na pa nsenga, na mushindo waye wa kumunana ngukile buwa. (Kibaf. 4:11) Anka Diabulu badi mutakule ba mikeyilu na bantu mu kuela binangu’shi Efile Mukulu te na aa matalua. Aye nyi e na matalua a kumunana muiyilu na pa nsenga. Yehowa mmukile buwa, na’shi nkapenda Bufumu buaye nyi abukatuesha butale bua binyibinyi na kuiyikela pa nsenga. w21.07 9 ¶5-6

Muyile biabadi betupangie, mfumu a kifuko akuminaa kukimbila ba mu kifuko kiaye bidibua, bilamba mpa na mbalo ya kulaala. We mu lukalalashi lua kukutua kupeta makuta su? Su mbiabia, kiakia ngi kiobe kipungo kibukopo. Anka, sunga nshalelo oobe ekala mu lukalakashi lui naminyi, we kufubisha kino kipungo bua kunyingisha lukumino loobe. Teka Yehowa, obadikie mayi a Yesu e mu Mateo 6:25-34, akupu onangushene ku anka. Nangushena pabitale bileshesho bia ano etu mafuku, abilesha’shi Yehowa apasukilaa baaba boso abepaana bua kumulanguila. (1 Kod. 15:58) Su bokitshi biabia lukumino lobe aluikaala lunyingie’shi Yehowa, akakukuasha nka bu biadi mukuashe namu bangi bapete mianda i mumune na yoobe. Auku kiodi nakio lukalo na auku mushindo wadi mulombene nkupa kianka. Nsaa yomono Yehowa biakukuasha mu nshalelo obe, abinyingisha lukumino lobe ngofu’shi we mulombene kunyingiila bitompuanga bikata bia mu mafuku aafiki. w21.11 20 ¶3; 21 ¶6

Dilongyesha dya nkuulo dibadi dinyingishe lukumino lwa bena Kidishitu be bungi. Abatungunukile na kulungula mukandu wibuwa sunga bibabadi abebabingabinga na kunyingila nkalakashi i bungi mu muwa wabo oso. Tutale kileshesho kya mutumibwa Yowano. Na lulamato loso, badi mulambukishe bya binyibinyi pabitale Kidishitu na nkuulo pangi munda mwa bipwa bikile pa 60. Pa tabadi alombasha bipwa lukama, mbulamatadi a bena Loma bamumwene bu muntu ebalwisha, nyi abo nkumwela mu lukano mu kisangisangi kya Patmose. Badi mukite mwanda wi bubi su? Badi ‘alungula mukandu w’Efile Mukulu na kutusha [bu kamonyi] pabitale Yesu.’ (Kibaf. 1:9) Yowano mwitulekyele kileshesho ki buwa kya lukumino na kunyingila! Yowano badi muleshe’shi mufule Yesu ngofu, na’shi ata nkuulo na muulo mu mikanda yaye iyokyelwe. Mwimwakwile nkuulo sunga bintu bi buwa by’atupete ku bukwashi bwa nkuulo, misusa ikile pa 100. (1 Yo. 2:2) Abimweka patoka’shi, Yowano badi ata nkuulo na muulo. w21.04 17 ¶9-10

Yehowa badi mukumine’shi bafubi baye bakitshine bantu basha bukome bua mbidi bupela mianda na kalolo. Bu kileshesho, bena Isaleele tababadi balombene kuela shikue mulua. Mu uno mulua mui kutula muwa waye mu masaku sunga kumutekiela mianda ibubi bua’shi imukuate. Kukitshina muntu shikue bino kubadi bubi ngofu! Tabadi mulombene kupusha biabakula pabimutale. Na tabadi mulombene kuikala na mushindo wa kuikaluila aye nabene. Na dingi, tuibalongie mu Bena-Levi 19:14’shi bafubi b’Efile Mukulu ta mbalombene ‘kutula kikokoshi kumpala kwa mpofu.’ Ungi mukanda awakula pabitale bantu basha bukome bua mbidi bupela’shi: “Kala mu Proche-Orient [babaadi] abebatumikisha midimo na kuibakiengesha.” Bangi bantu babadi abatuulu kikokoshi kumpala kua ba mpofu, nka penda muanda wa bu ntomboshi bisumanga na pa muanda wa’shi be basengie. Bino bibadi bubi bukile! Muiya wi mu verse 14 ubadi ukuashe muilo w’Efile Mukulu buaudia kulesha lusa kui bano boso bena bukume bua mbidi bupela. w21.12 8-9 ¶3-4

Yakobo baadi mukalakashue muanda anagushena’shi mukuabo ki nka mumulamine ngoo. Biabia, badi mutekie Yehowa n’eshimba diaye dioso pabitale wawa muanda. Kunyima, badi mutumine Esau kia buuntu kia muulo ukata. (Kib. 32:9-15) Ku nfudilo kua bioso, pa babafumankene mpala kua mpala, Yakobo batshile mpango yakulesha Esau kinemo. Badi muele mpala pashi kumpala kua Esau kushi mususa umune sunga ibidi, kadi misusa musambobidi! Pa muanda wa bino bikitshino bia kuiyisha, na kanemo Yakobo bakitshine butaale na mukuabo. (Kib. 33:3, 4) Tui kulongiela mianda ibungi ku mushindo ubadi Yakobo mukite kumpala kua kufumankana na mukuabo, na mushindo ubadi mubangie kuisamba naye. Na kuiyisha koso Yakobo batekiele bukuashi kui Yehowa. Na dingi badi muleshe’shi badi mutumikile bioso bibadi mutekie Yehowa mu luteko luaye paye kuikitshisha bua’shi akakite butaale na mukuabo. Nsaa ibabafumankene, Yakobo tamukimbe bia kulesha Esau’shi aye nyi mupiile sunga’shi nyi mubingie nya. Kepatshila ka Yakobo kabadi ka penda kukita butaale na mukuabo. We kuambula kileshesho kia Yakobo naminyi?​—Mat. 5:23, 24. w21.12 25 ¶11-12

Nsaa y’onangushena pabitale lufu lwa Yesu bwa kubwikila milwisho yobe, we kwamba’shi: ‘Ntshi mulombene kino kya buntu nya.’ Bwakinyi we kwipusha bino? Eshimba dy’etu dikutwe kupwidjika di kwitudimba, dyetutakula bwa kwipusha bu bantu bashi na muulo na bashi bafudibwe. (1 Yo. 3:19) Yaya nsaa, abitungu tutentekyeshe’shi “Efile Mukulu mmukile mashimba eetu ku bukata.” Sunga twapwandjikisha’shi Yehowa ta mulombene kwitufula na kwitufwila lusa, aye atungunuka nka na kwibikita. Abitungu tushinkamishe’shi Yehowa mwitufule. Twi kwibikita pa kwilongyela Eyi dyaye, kumuteka nsaa yoso, na kwibunga pamune na mwilo waye. Bwakinyi kukita ino myanda kwi na muulo? Omono bi bu muntu bwa Yehowa kalolo. Omono byadi mukufule kalolo. Kunangushena ku by’obadika efuku dyoso Mwiyi dy’Efile Mukulu, mbilombene nkukwasha bwa kumona myanda kalolo, “kulumbuula” bi mu binangu byobe na bi mwishima dyobe.​—2 Tim. 3:16. w21.04 23-24 ¶12-13

Biabia bua kunyingisha lukumino t’abitungu nka penda kupeta kiukilo nya, kadi abitungu kuuka mianda ibungi. Abitungu tunangushene ku mianda yatukuete kulonga. Tubande kutala muanda ubadi umone mufundi a Musambo 77. Badi muinyongole muanda badi apusha’shi aye na bena Isaleele naye tabaki bakuminyibue dingi na Yehowa. Tabadi mulombene kulala bufuku muanda badi ekalakasha ngofu. (Verse 2-8) Nkinyi kibakitshine? Badi mulungule Yehowa’shi: “Naatentekyesha byakukanya bikite Yehowa, oolo naatentekyesha bipaso byobe bya kala.” (Verse 12) Kayimba ka misambo badi anangushena ku mianda ibadi Yehowa mukitshine muilo waye mu mafuku a kala anka batungunukile na kuiyongola p’aye kuakula’shi: “Efile Mukulu baalubu bya kwitufuila lusa, nsungu ngyanye eshimba dyaaye su?” (Verse 10) Kayimba ka misambo badi anangushena ku bikitshino bia Yehowa na ku lusa na kulekiela kubadi kuleshe Yehowa mu mafuku a kala. (Verse 11) Kipeta kinyi kibatukile? Kayimba ka misambo bafikile munkashinkamisha’shi Yehowa tamulombene kusumbushena muilo waye. (Verse 15) w22.01 30-31 ¶17-18

Yehowa apushaa naminyi pabitale balume na bakashi ba sha lulamoto bapue kufua? E na lukalo lua kuibamona dingi! (Yob. 14:15) Banda kunangushena lukalo luinalo Yehowa lua kumona dingi kuuku aye Abrahama! (Shak. 2:23) Sunga Moyise, abadi muisambe naye ‘mpala kua mpala’? (Efi. 33:11) Na mushindo w’atengiela kupusha Davide na tungi tuyiba, kuatuyimbi ngono i buwa ya kumutumbisha! (Mis. 104:33) Sunga biabidi’shi bano ba kuuku b’Efile Mukulu mbapue kufua, Yehowa tamuibailue. (Yesh. 49:15) Atentekiesha ka muanda koso pabibatale. Dingi efuku akebasangula, na akapusha dingi nteko yabo aikatukila kuishimba na kukumina lulanguilo luabo. Su wemufuishe muntu odi mufule, ano mayi ngalombene kunyingisha. Nsaa ibadi buntomboshi bubangie mu Edene, Yehowa badi auku’shi mianda ainyisha kuluila kumpala kua’shi ilumbulukie. Yehowa mmushikue bukitekite, kukutua kua kululama, na buntomboshi bi mu nsenga lelo uno. w21.07 10 ¶11; 12 ¶12

Nsaa y’atwibalesha kifulo, atulesha dingi’shi atwata nkuulo na muulo. Bwakinyi? Mwanda Yesu ta mwitufwile penda atwe nya, mufwile dingi bakwetu balume na bakashi. Su badi mukumine kwibafwila, abilesha patoka’shi ebataa na muulo. (1 Yo. 3:16-18) Atulesha’shi twibafule bakwetu balume na bakashi mu mushindo w’atwibakitshina myanda. (Ef. 4:29, 31–5:2) Bu kileshesho, atwibakwasha nsaa yabadi na maladi, sunga nsaa yabadi na nkalakashi i bungi i bukopo, mpa na nsaa y’abapete masaku aatukila ku bintu bipangibwe. Anka twi kukita kinyi nsaa i mukwetu mulume sunga mukashi akula sunga kukita kintu akitutapa kwishimba? Abikwelela bukopo ingi nsaa bwa kufwila bangi lusa su? (Lv. 19:18) Su mbyabya, londa dino elango: “Ikalaayi na lwishinko kwi muntu na muntu, dingi su muntu ee na kilumbu na ungi, efwileneeyi lusa ku muntu na muntu bu biinufwile Yehowa lusa. Biinulekyele Yehowa, kitaayi byaa-mumune anwe naamu.” (Kol. 3:13) Nsaa yoso yatufwila mukwetu mulume sunga mukwetu mukashi lusa, atulesha Nshetu e mwiyilu’shi atwata nkuulo na muulo. w21.04 18 ¶12-13

Tuikufubila Yehowa ngofu, na tuikukuasha bantu be bungi buabadia kuela matabula mpa na ku lubatshisho. Atushingula’shi bino bioso abikitshika nka penda ku bukuashi bua Yehowa. Tubalongo dingi’shi nsaa yatudi na mashito mu kakongye, abitungu tukite muetu moso bua kulama butale mu kakongye. Tui na lutumbu lui bungi nsaa i bakulu na bafubi ba midimo abetukuasha bua kuikala mu buumune na mu butale munkatshi muetu. Abebikitshi nsaa y’abatusha malango emene mu Bible. T’abatompo kulesha bu be na muulo, anka abakuasha boso be mu kakongye bua kukokiela Yesu na kulonda kileshesho kiaye! (1 Kod. 4:6, 7) Muntu oso a kuatudi, e na ngobesha i mupe Efile Mukulu. Tui kumona’shi biatukitshi ta bi na muulo. Anka, sunga tu bikitshino tupela tuatukitshi atulama butale mu kakongye, tui’nka bu etafuadi dioso adikuasha mu kuibaka nshibo. Biabia, oso a kuatudi akite muaye moso bua kukatusha kikudi kia kuipikena. Tuatei kitshibilo kia kukita muetu moso bua kulama butale na buumune mu kakongye.​—Ef. 4:3. w21.07 19 ¶18-19

N’obe namu ikala mushinkamishe’shi, okamono dingi bakuenu babodi mufule bapue kufua. Mpolo ibaabadi banokieshe kui Yesu, nsaa ibaadi anyingisha bakuuku baaye babaadi benyongole, ayilesha’shi Yesu akumiina kusaangula bantu binobino! (Yo. 11:35) Tunyingisheyi baaba boso be na tuinyongoshi. Yesu tabaadi nka penda mudile na Maata na Mariya nya, kadi baadi muibatemeshe na kuibanyingisha. (Yo. 11:25-27) N’atue namu tui balombene kunyingisha baaba boso be na tuinyongoshi. Dan, ungi mukulu mushaale mu Australie bakuile’shi: “Kunyima kua kufuisha mukashi ande, naadi na lukalo lua muntu a kunyingisha. Bakuetu balume bebungi na bakashi baabo, babaadi abafiki nsaa yoso bufuku na kanya mu kunyingisha. Babaadi abandekiela bua’shi mpudishe kenyongoshi kandi nako, na dingi nsaa inadi nadidi, tabibaadi abibakalakasha nya. Babaadi bankuashe ngofu, pa kuntumpila matoka wande, kungudila bintu bia kudia mu kisalue, na kunteekiela nsaa inaadi mukutue mushindo wandia kukita ino midimo yoso ami nabene. Na dingi babaadi abele nami luteko pamune. Babaadi baleshe’shi, nyi mba kuuku ba binyibinyi bakuabo na muntu be kuanka bua ‘kumukuasha mu bishyotshi.’”​—Nki. 17:17, EEM. w22.01 16 ¶8-9

Yehowa, akumiinaa nka kiakia ki buwa buetu. (Nki. 4:20-22) Nsaa y’etulanga, kukiila Kuiyi diaye, mikanda ayipatuula Bible, sunga kui bena Kidishitu banyingie mu kikudi, abilesha bi kifulo kiaye kuatudi. (Eb. 12:9, 10) Tuula binangu biobe nka kuilango, kushi ku mushindo ubaabakupa dianka. Ingi nsaa, tui kupusha’shi elango, ta mbetupe namu dianka mu mushindo wi buwa nya. Eyendo’shi, ya ooso atuusha elango, abitungu akite muaye mooso bua’shi, diikale dibofule bua kuidikumiina. (Nga. 6:1) Kadi, su nnatue baabapa elango, abitungu tuimeene nka ku ki’atulongiela ku diinyi elango​—sunga tuapusha’shi, ta mbetupe dianka mu mushindo wi buwa. Tubande kuiyipusha’shi: ‘Sunga ntankumiina mushindo ubampa elango, mui kuikadika namu mianda ya binyibinyi su? Nekupela kutala bilubilo bia winyi bampa elango bua kulongiela kuilango dibampa su?’ Abilesha’shi tui na binangu, su tuakimba kintu ki buwa muilango dioso di’abetupa. w22.02 12 ¶13-14

Yehowa auku’shi abitungu nsaa na kuikitshisha, buatudia kuleka biubishi bi bubi na binangu bi bubi. (Mis. 103:13, 14) Biabia, kukiila Kuiyi diaye, na kikudi kiaye kiselele, na ndumbuluilo aaye, Yehowa kuete etupa binangu na bukome, na kuitukuatshishena bua’shi tumone bia kushintuluka ku biabia biatudi bekale. Fubisha Bible bodia kuitaluula obe nabene kalolo. Eyi di’Efile Mukulu dinka bu lumueno, ndilombene nkukuasha bodia kuitaluula mu kunangushena kobe, mu ngakuilo oobe, na mu bikitshiino biobe. (Shak. 1:22-25) Na Yehowa e kuanka nsaa yoso buadia nkukuasha. Auku mushindo wibuwa wadia nkukuasha; na auku lukalo lui muishimba diobe. (Nki. 14:10; 15:11) Biabia, ikala na kiubishi kia kumutekanga na kubadikanga Eyi diaye efuku dioso. Ikala mushinkamishe’shi mayi a kulonda a Yehowa e buwa. Kioso ki’abetutekie kui Yehowa bua’shi tukite, mbua buwa buetu. Booso be na nshalelo muipushene na miya yaye, abapete kineemo, nshalelo e buwa, na muloo wa binyibinyi.​—Mis. 19:8-11. w22.03 4 ¶8-10

Atulanguila Yehowa nsaa yatukuatshishena luibako na kulumbula mashibo a Bufumu. Bible akula’shi mudimo wa kuibaka ntempelo na bintu bia muanka ubadi “mudimo wa mbalo iselele.” (Efi. 36:1, 4) Na dingi lelo uno nyi, Yehowa kuete kumona mudimo wa luibako lua mashibo a Bufumu na ingi midimo ya Teokrasi bu mudimo wa kishila. Bangi bakuetu balume na bakashi bakuete kukisha nsaa yabo i bungi bua kuipana mu ino midimo. Tatui balombene kuikala namu na lutumbu bua mushindo wabakuatshishena midimo ya Bufumu su? Sunga mbiabia, bakuete kuipana dingi mu mudimo wa kulungula mukandu wibuwa. Bangi abakumiina mpa na kuikala ba mbala-mashinda ba mieshi yoso. Bakulu mu kakongie mbalombene kulesha’shi abakuatshishena uno mudimo wa luibako, su tabetutuusha bua kutula bano bakuetu balume na bakashi abafubu ngofu bu ba mbala-mashinda ba mieshi yoso su mbalombashe ngikashi itekibue. Sunga tuekala’shi tui na kapatupatu mu mudimo wa luibako, sunga’shi tatuinako tui balombene kukuatshishena kulumbula kua mashibo a Bufumu, na kulama mbalo yetu ya lulanguilo ishale selele. w22.03 22 ¶11-12