Mueshi wa 1

Nkinyi kibaadi kikashe Timote bu mufubi a Yehowa e na muulo? Nyi ngikashi yaye wa buina Kidishitu ibaadi ayimueneka. (Fid. 2:​19-​22) Muyile abilesha Mpoolo mutumiibua, bua Timote atumono’shi baadi na kuiyisha, lulamato, kishima, na akukulupila. Baadi apasukila bakuetu ngofu. Bu kipeta, Mpoolo baadi mufule Timote na ta baadi ekoko bua kumupa mashito e bukopo nya. Mu mushindo umune Yehowa etufulu na atuikala na muulo mu kakongie nsaa yatudi na ngikashi yadi mufule. (Mis. 25:⁠9; 138:⁠6) Biabia, ela nteko na onangushene pa kipindi kampanda kia mu bumuntu bobe akitungu’shi olumbuule. Sangula eyikashi dimune aditungu’shi olumbuule. We mulombene kuata kitshibilo kia kulonga bia kuikala wetuulu pa mbalo ya bangi su? Okumiina kuikala mu butaale na bangi na kuibafuilanga lusa su? We mulombene kupeta bukuashi pa kuipushanga kuuku odi mukulupile bua nkulungula kiodi mulombene kukita bua kulumbuula.​—⁠Nki. 27:⁠6. w22.04 23 ¶4-⁠5

Yehowa akumiina’shi tuikale na muloo. Atuuku bino muanda muloo nyi nkipindi kia kikuba kia kikudi kiaye kiselele. (Nga. 5:​22) Bu bi muloo wa kupaana ngukile wa kupeebua, atupushaa muloo wi bungi nsaa yatuipaana mu mudimo wa buina Kidishitu na aukuasha bakuetu mu mishindo ilekeenelekeene. (Bik. 20:⁠35) Anka bu biabadi bebileshe mu kifundue kietu kia lelo, Mpoolo mutumibua mmuleshe mianda ibidi ilombene kuitukuasha bua kulama muloo wetu. Wa kumpala, abitungu’shi kepatshila ketu kekale ka kupa Yehowa bintu bietu bia muulo. Su tubamupa bintu bietu bia muulo atuikala na muloo. (Mat. 22:​36-​38) Wa kabidi, t’abitungu tuikale atuipuandikisha na bangi. Kintu kioso kiatudi balombene kukita pa muanda wa bukome buetu bua mbidi, tulaasa tuatudi balongie, sunga ngobesha yetu ya butandua yatudi nayo, abitungu tutumbishe Yehowa. Ku lungi lupese, su bangi bena ngobesha ikile yetu mu mushindo kampanda wa bulungudi, abitungu tuikale na muloo, muanda bakuete kufubisha ngobesha yabo bua kutumbisha Yehowa. w22.04 10 ¶1-⁠2

Mfudiilo a bipuilo bia madimi akekadika bu kabasamushi kui miilo, na bino abikakaanyisha bantu be bungi. (Kibaf. 18:​8-​10) Kuluishibua kua Babilone Mukata, akukatshinkisha nsenga na nkulombene nkafuisha nkalakashi i bungi, anka muilo w’Efile Mukulu aukekadika na tubingilo tubidi tua kuikala na muloo. Uno muishikuanyi a kala a Yehowa Efile Mukulu t’akela kuanka dimo, na mu kapindi kapeela atukapashibua mu ino nsenga i bubi! Ndanyele batemukile’shi “kiwukilo kia binyibinyi” nkilombene “kutama.” Na nkipue kutama! Binobino tukuete kupusha matemuki pabitale kipingo kietu. (Nda. 12:​4, 9, 10) Kuipushena kua ano ooso matemuki akuitutakula mu kutshina Yehowa, na kunemeka Eyi diaye diyokielue. (Yesh. 46:​10; 55:​11) Tungunuka na kunyingisha lukumiino loobe pa kuibadikilanga Bible efuku dioso, na kukuasha bangi bua’shi, batamishe lukumiino luabo bua’shi bakuminyibue na Yehowa na kuikala naye mu kipuano. Yehowa akapaasha baaba booso bakulupile muadi na akebapa “butaale bushina mpuilo.”​—⁠Yesh. 26:​3, NWT. w22.07 6-⁠7 ¶16-​17

Mukanda wa Kibafumbwilwe aulesha’shi Bufumu bu’Efile Mukulu bukuete kumunana muiyilu, na’shi Satana baadi mubingibue muanka. (Kibaf. 12:​1-9) Kuakua kubingibua nkufuishe butaale kui baaba booso be muiyilu, anka kuetufuishiisha lukalakashi kui atue be pa nsenga. Buakinyi? Muanda nsungu ya Satana ngimeene kui baaba booso be na lulamato abafubila Yehowa pano pa nsenga. (Kibaf. 12:​12, 15, 17) Mmushindo kinyi watudi balombene kushaala na lulamato kui Yehowa sunga biabakuete kuituluisha kui Satana? (Kibaf. 13:​10) Muanda umune ulombene kuitukuasha, nkuuka akikakitshika mu mafuku aafiki. Bu kileshesho, mu mukanda wa Kibafumbwilwe, Yowano mutumibua baadi muleshe ingi miabi yatukapete mu mafuku apeela e kumpala aku. Umune wa ku ino miabi nyi nkubutudibua kua beshikuanyi b’Efile Mukulu. Mu verse a kumpala a Kibafumbwilwe, etulesha’shi mianda yatukiebe kubadika binobino, ngileshibue mu “bitunduilo” uno nyi ngakuilo a mu kifuanyi.​—⁠Kibaf. 1:⁠1. w22.05 8 ¶1-⁠3

Ku muanda bafubi ba Yehowa abashaala na lulamato kuadi, baaba booso batombokiele Yehowa abakekala na nsungu ikile kuabadi. Bu kipeta, miilo isangie ayikatuku muilo w’Efile Mukulu ngoshi pa nsenga yoso ishima. Kino kikitshiino ngi ki’abayitanyina mu Bible bu buluishi bua Goge a kuiumbo dia ku Magoge. (Es. 38:​14, 15) Yehowa akakita kinyi bua buno buluishi? Etulungula’shi: “Nakakwata nsungu ikata.” (Es. 38:​18, 21-​23, EEM) Mukanda wa Kibafumbwilwe shapitre 19 aulesha akikakitshika kunyima. Yehowa akatumu Muana Aaye, bua kukaluila muilo waye na bua kubutula beshikuanyi baabo. Yesu akafiki mu kulua ino ngoshi na “bilwilo bya mwiyilu”​—⁠⁠ba mikeyilu baasha lulamato pamune na bedibue muimu 144 000. (Kibaf. 17:​14; 19:​11-​15) Ino ngoshi ayikafudiila naminyi? Abakabutula bantu booso na ndumbuluilo yoso itombokiele Yehowa!​—⁠Kibaf. 19:​19-​21. w22.05 17 ¶9-​10

Kapindi kapeela kunyima kua Adame na Eva kukita muluisho, Yehowa bapeele bekulu baabo lukulupilo ku bukuashi bua buno butemuki bui na muulo. Kibaadi muakule, nkifundibue mu mukanda wa Kibangilo 3:​15: ‘Nakekasha mushikwa pankatshi pobe na mwana mukashi, pankatshi pa bekulu boobe na bekulu baaye. Uno akakusooso mutwe, obe naamu okamusumu ku kisuulu.’ Buabua butemuki, bui mu mukanda wa kumpala wa mu Bible. Anka ingi mikanda yoso ya mu Bible, ayakuila nka buno butemuki kadi mu ingi mishindo. Nka bu abikadikaa ku kitako kia mukanda, ki’abalamika mapupua e bungi bua’shi atushe mukanda umune, ngi bi ano mayi abadi bafunde mu Kibangilo 3:​15, ngabungie mukanda ooso wa mu Bible na mukandu umune aulesha’shi ban’akatume mupaashi anakabutule Diabulu na bantu baye booso be bubi abamulondo. Nyi muabi ukata bua bano booso bafule Yehowa! Kuilongiela Bible akukukuasha bodia kumona mushindo aulombana matemuki na mushindo waadi alombene kuitukuasha. w22.07 14 ¶1-⁠3

Teka Yehowa akupe binangu biodi nabio lukalo, bua kukuasha bana boobe bua’shi batamishe kifulo kuadi. (Shak. 1:⁠5) Aye ngi Muntu mulombane bua kutusha malango. Kui tubingilo tui bungi tua bua kinyi atuakula bino. Tubandeyi kutala tubidi. Ka kumpala, Yehowa e na kiukilo kikata kia kuikadika bu nambutuile. (Mis. 36:⁠9) Ka kabidi, elango dia binangu di’etupeyaa aditukuashaa nsaa yoso. (Yesh. 48:​17) Kukiila kuiyi diaye na ndumbuluilo aaye, Yehowa kuete atusha bidibua bi bungi bia mu kikudi abitukila mu Bible, bilombene kuinukuasha bua kukusha bana benu na buabadia kufula Yehowa. (Mat. 24:​45) Bu kileshesho, nui balombene kupeta malango e buwa e mu miisambo ayamba’shi: “Bukwashi bwa bifuko,” itayibapuile kutuka munda a bipua bi bungi mu ma Réveillez-vous! Na mu Kitenta kia Mulami, bikuete kutuka lelo uno na mu site eetu a jw.org. Dingi, ma video e bungi e mu jw.org a kuela bantu nkonko na a drame, ngalombene kukuasha banambutuile buabadia kutumikila elango dia Yehowa, bu biabakuete kukusha bana baabo.​—⁠⁠Nki. 2:​4-⁠5. w22.05 27 ¶4-⁠5

Yehowa ngi afuidishenaa Lusa lukata kukila booso muiyilu na pa nsenga. Kia kumpala, e kuanka misuusa yoso bua kufuidishena lusa. Kia kabidi, auku mianda yoso pa bitutale. Auku mu mushindo upuidikie bi muikeelo wetu, na aye ngi e na ngobesha ya kuuka su tui belangie kuishimba mu binyibinyi. Kia kasatu, nsaa ayitufuila Yehowa lusa, ayiluankanaa nka bu atue bashakitshine dingi muluisho efuku su ndimune. Na bino abitukuasha buatudia kuikala na kondo k’eshimba katookane na buatudia kuikala bakuminyibue naye. Mu binyibinyi, bu biatudi bantu bakutue kupuidika, atutungunuka nka na kukita miluisho. Nyi buakinyi, tui balombene kupeta mayi aakankamika e mu mukanda wa Étude perspicace des Écritures, volime 2, esak. 765’shi: “Bu bi Yehowa e na lusa ataa bafubi baye na muulo sunga mbiabadi na kubofula akutuukila ku mbidi, na mbalombene kuinyongola muanda wa bilubilo biabo abifiki ku kukutua kuabo kua kupuidika, kuabadi bapiane. (Mis 103:​8-​14; 130:⁠3) Su abekitshisha muabo mooso buabadia kuikala na nshalelo muipushena na mashinda a Efile Mukulu, mbalombene kuikala na muloo. (Fid. 4:​4-⁠6; 1 Yo. 3:​19-​22).” w22.06 7 ¶18-​19

Moo wa kubinguabingua aufiki kui mbulamatadi wa bakuete kufubisha kui Satana, ta ngi nka penda kina ngoshi kimune nya. Bangi be na moo wa bilombene kunangusheena bena kifuko naabo nsaa yabafiki ba Temue ba Yehowa, ingi nsaa abatshinyi ngofu’shi tala bebakitshina mianda i bubi. Bu biabadi bafule bakuabo ba mu kifuko ngofu, abakumiina’shi na bakuabo naamu beukie Yehowa na bamufule. Abapushaa bi bubi nsaa y’abapusha bakuabo ba mu kifuko abakula bi bubi kushi kaneemo bua bia binyibinyi bi’Efile Mukulu na balanguidi baaye. Ingi nsaa bena kifuko abatombokielaa bia binyibinyi, ngi abafikaa mu kuibikumiina kunyima. Biabia, bi kuikala naminyi su muina kifuko neetu bepeelena neetu pa muanda wa lulanguilo luetu lupia? Atukitshi naminyi? Tui balombene kunyingishibua ngofu na bino bia binyibinyi bi buwa ngofu biatupete mu Misambo 27:​10. Nsaa y’atutentekiesha nka penda mushindo witufule Yehowa, atuipusha mu bulami p’abetubingabinga. Na tui bashinkamiishe’shi Yehowa etupa efuto bua kunyingiila kuetu. Yehowa etupasukila ku nkalo yetu ya ku mbidi, ya mu binangu, na ya mu kikudi biabashi balombene kuitukitshina kui ungi muntu su ngumune! w22.06 16-​17 ¶11-​13

Mu mudimo waye wa bulungudi, bantu babaadi abamba Yesu’shi mmuntu nkodi a maalua, mudiafi, mufubi a Diabulu, t’anemekaa Sabaato, na asabuula Efile Mukulu. (Mat. 11:​19; 26:​65; Luk. 11:​15; Yo. 9:​16) Kadi, Yesu ta baadi muibaluule na bishima bia nsungu. Nsaa yabetuakula mianda i bubi kui bantu, anka bu Yesu ta tui balombene kuibaluula mu mushindo wi bubi. (1 Mp. 2:​22-​23) Anka, t’abikalaa bibofule bua kuikala na bishima bia kalolo nsaa i bangi abetuakula bishima bi bubi. (Shak. 3:⁠2) Nkinyi kilombene kuitukuasha? Nsaa yodi mu bulungudi su muntu bakuakula bi bubi tokumanga kufiita munda. Mungi mukuetu mulume abetanyina bu Sam amba’shi: “Natuulaa binangu biande pa lukalo lui nalo yawa muntu bua kuuka bia binyibinyi pabitale Efile Mukulu, na kutentekiesha’shi mmulombene kushintuluka.” Ingi nsaa muina nshibo mmulombene kufiita munda penda muanda’shi tubafiki nsaa i bubi. Nsaa yatufumankana na muntu mufiite munda, tui balombene kuela luteko mu kikoso bua kuteka Yehowa etukuashe bua kushaala baumiine na’shi tatuakulanga muanda mu mushindo wi bubi na ushaulesha kaneemo. w22.04 6 ¶8-⁠9

Mushindo umune wi na muulo wa kukuasha bana baabo bua’shi befubuile kui Yehowa, mpa kulonga naabo Bible. (2 Tim. 3:​14-​17) Biabia, Bible alesha ungi mushindo ulombene bana kulonga pabitale Yehowa. Mu mukanda wa Nkindji, nshe muana atentekiesha muana aaye biasha kuleka kulonga ngikashi ya Yehowa, y’abamulesha mu bipangua. (Nki. 3:​19-​21) Ba nambutuile, anusangelaa kukisha nsaa paasha na bana beenu. Fubishayi yaya nsaa bua kukuasha bana beenu buabadia kumona kuipushena kui pankatshi pa “bintu biabadi bapangie,” na ngikashi i buwa ya Yehowa. (Lom. 1:​20) Tala mushindo ubaadi Yesu mufubishe bipangua bua kulongiesha. Dingi efuku, balunguile balongi baaye buabadia kubandila toonyi tua manganga na bilongo. (Luk. 12:​24, 27-​30) Baadi mulongieshe balongi baaye dilongiesha di na muulo, pabitale kalolo ka Nshaye e muiyilu adiamba’shi: Yehowa adishaa na kufuadika bafubi baaye baasha lulamato, anka bu manganga na bilongo bi muifuba. w23.03 20-​21 ¶1-⁠4

Atutumbulaa Yehowa, muanda tui balombene kumuteka muishina dia Muana aaye. Yehowa afubishaa Muana aaye bua kuitupa kiakia kiatumutekie. Yehowa ateemeshaa na alulaa nteko y’abamutekie muishina dia Yesu na etufuilaa lusa ku miluisho yetu, kukiila ku mulambu wa nkuulo ya Yesu. (Lom. 5:⁠1) Bifundue abilesha Yesu bu “tshite-mwakwidi e pa nundu e byabya mushâle mwiilu ku mboko ibalume ku lupuna-nsulu lw’Efile Mukulu sha ntumbo yoso.” (Eb. 8:​1, EEM) Yesu nyi ‘muakuidi eetu kumpala kua Nshetu a muiyilu.’ (1 Yo. 2:​1, EEM) Tui na lutumbu lukata kui Yehowa bua biadi muitupe Tshite-muakuidi Mukata, etuula pa mbalo yetu, apushaa bi kubofula kuetu, na “etwakwilaa”! (Lom. 8:​34; Eb. 4:​15) Biabia, kushi mulambu wa Yesu ta tui balombene kupeta mushindo wa kuifubuila kui Yehowa mu luteko nya. Kushi mpaka, we mulombene kukumiina’shi lutumbu luetu taluanalombane na kiabuntu ki buwa kiabadi betupe kui Yehowa nya, kiabuntu kia Muana aaye a kifulo! w22.07 23 ¶10-​12

Muntu akukulupilua, ekitshishaa bua kulombasha mulayilo waye na kuakula bia binyibinyi. (Mis. 15:⁠4) Bantu abauku’shi mbalombene kumukulupila. Atukumiina’shi bakuetu balume na bakashi bepushe namu mu uno mushindo pa bitutale. Ta tui balombene kukitshisha bangi pa bukopo, bua’shi betukulupile nya. Tui balombene kulesha bangi’shi mbalombene kuitukulupila ku bi’atukitshi. Bino, nkuamba’shi lukulupilo lui nka bu makuta. Biabia, bi bukopo bua kuilupeta, kadi mbibofule bua kuilushimisha. Yehowa auku binyibinyi’shi tui bapue kumukulupila. “Byoso biadi mukite mbiakukulupilua.” (Mis. 33:​4, EEM) Na etutekie buatudia kumuambula. (Ef. 5:⁠1) Tui na lutumbu lukata bu bitukakie Yehowa etutuesha mu kifuko kia bakuetu balume na bakashi ki mu nsenga ishima, mui bantu be na kifulo na bakukulupila! Atue booso tui na bushito bua’shi tukimbe bilombene bakuetu balume na bakashi betukulupila. Su tubekitshisha pa bupenka bua kulesha kifulo, kuiyisha, kapatupatu, kululama, na butontshi bua mbidi, atukuashishena kikudi kia kukulupila bangi mu kakongie keetu. Tui balombene kuambula Yehowa Efile Mukulu eetu, na kutungunuka na kulesha’shi tui bantu ba kukulupilua. w22.09 8 ¶1-⁠2; 13 ¶17

Sunga tuekala mu kifuko kikata kia balanguidi neetu, ingi nsaa tui kuipusha bu be bupenka na kulua bua kukambila binangu bi bubi na kunangushena’shi tui bupenka bakuete kunyingiila binangu bi bubi. Yehowa takumiina’shi tuipushe mu uno mushindo nya. Tutaluule mushindo ubaadi mukitshiine mutemuki Eliya mianda. Yehowa baadi munyingishe Eliya pa kuisamba naaye. Bayipuishe Eliya misuusa ibidi’shi: “Bwakinyi we pano?” (1 Bf. 19:​9, 13) Nsaa yooso Yehowa baadi ateemesha Eliya pabaadi amufunguila eshimba diaye. Baadi dingi mushinkamiishe Eliya’shi, kukii bena Isaleele be bungi baki’abamulanguila. (1 Bf. 19:​11, 12, 18) Kushi mpaka, Eliya baadi mupushe butaale kunyima kua kufunguila Yehowa eshimba na kupusha biamualuula. Yehowa bapeele Eliya midimo i bungi i na muulo ukata. Baadi mu mulungule buadia kuela Azaele muimu bu mfumu a mu Siiri, Yehu namu bu mfumu a Isaleele mushima, na Elisha bu mutemuki. (1 Bf. 19:​15, 16) P’aye kupa Eliya ino midimo, Yehowa baadi mumukuashe bua kutuma binangu biaye ku mianda i buwa. Efile Mukulu baadi mumupe dingi kuuku aaye e buwa, Elisha. w22.08 8 ¶3; 9 ¶5

Kakongie kenu mbapue kuikebakila Nshibo ya Bufumu sunga kuiyilumbuula su? Su mbiabia, kushi mpaka otentekiesha musuusa wa kumpala ubanutuelele mu bisangilo mu yaya mbalo ipia. Boodi na lutumbu lukata bua Yehowa. Pangi, boodi mudile muanda wa muloo ukata, pabanuyimbile loono lua ku mbangilo kua bisangilo. P’atuibaka Mashibo eetu a Bufumu kalolo, aatumbisha Yehowa. Anka atunyiisha kumutumbisha ngofu, nsaa y’atuipaana mu ingi mishindo ya mudimo wa luibako. Mu uno mudimo, mui kingi kintu ki na muulo kukila kuibaka kua binyibinyi. Nyi ngutale kuibaka kua bantu abafiki mu ma mbalo elekeenelekeene bua kulanguila. Mpoolo mutumibua baadi na ino mpango ya luibako lua mu kimfuanyi, mu binangu biaye nsaa ibafundile bishima bi’atupete mu kifundue kietu kia lelo. Mpoolo mutumibua, nkileshesho ki buwa bukile kia muntu baadi auku bia kunyingisha bakuabo bena Kidishitu. Baadi etuulu pa mbalo yabo. Tui balombene kumuambula, na mushindo wa kunyingisha bakuetu balume na bakashi lelo uno.​—⁠1 Kod. 11:⁠1. w22.08 20 ¶1-⁠2

Muina Kidishitu akumiina kuikala mululame ku meso ku’Efile Mukulu, abitungu ekale mululame mu mianda yaye yooso ya busunga. Muntu afulaa kukita mianda ilulame, ashikuaa kumona muntu akitshi mianda ishi ilulame. Mu kudila ‘kusankisha [Yehowa] mbipaso bioso,’ muntu mululame anangushenaa bi mueneno a Yehowa pabitale bitshibilo biata. Bible alesha Yehowa bu Nsulo ya kululama. Bua kano kabingilo, nyi abumuitanyina Bible bu “shaa bululame.” (Yel. 50:⁠7) Bu biadi Mupangi, Yehowa bupenka buaye nyi e na matalua, a kuituelela miya pabitale ki buwa na ki bubi. Yehowa auku mu mushindo upuidikie ki buwa na ki bubi. (Nki. 14:​12; Yesh. 55:​8, 9) Kadi, ku muanda tui bapangibue ku kinfuanyi ki’Efile Mukulu, tui na mushindo wa kuikala na nshalelo muipushene na mayi a kulonda alulame. (Kib. 1:​27) Na tui bafule kuibikita. Kifulo kietu bua Nshetu akitutakula mu kumuanbula, p’atuikitshisha muiyile ngobesha yetu.​—⁠Ef. 5:⁠1. w22.08 27 ¶5-⁠6

Nsaa y’atuikalaa na mianda ayitukalakasha sunga kuipusha bu batshobolokie, tui balombene kuikala na lukalo lua kukita kintu kampanda akitukuasha buatudia kuleka kuinyongola pabitale yaaya mianda ayitukalakasha. Bino abipushisha’shi, abitungu tudimukie bua kupela kukita kintu kampanda kiabadi bashikue kui Yehowa. (Ef. 5:​10-​12, 15, 16) Mu mukanda waye kui Bena-Fidipe, Mpoolo baadi mulangie bena Kidishitu buabadia kutungunuka na kutaluula kintu kioso kia “kiineemo, . . . kilulame, . . . kiiselele, . . . kyakya kilombene kufudiibwa.” (Fid. 4:⁠8) Sunga Mpoolo ta baadi mufunde mianda yooso pabitale kukisha kua kapapi, bino bibaadi mufunde mbilombene kuikala na bukitshishi, ku mianda yatudi balombene kusangula bua kukisha kapapi. Banda kutompa bino “bintu” abimueka mu uno verse ebipianyikishe na mayi a “ngono, ma filme, bintu bifundibue mu mikanda, sunga na maasha a video.” Kukita bino nkulombene nkukuasha bodia kutundula kiabadi balombene kukumiina ku meeso ku’Efile Mukulu na kiabashii balombene kukumiina. Atukumiina’shi nshalelo eetu ekale muipusheene na mayi a kulonda a Yehowa.​—⁠Mis. 119:​1-3. w22.10 9 ¶11-​12

Mu nshaleelo aabo a kala, bangi “bashi-balulame” babaadi abakitshi mianda i bubi na ya bibeshi. Kia kumpala, abitungu kui balongiesha biabadia kuikala na nshaleelo muipushene na mayi a kulonda a Yehowa a kululama. Bua kuibalongiesha kiabadi balombene kukita, Bufumu bu’Efile Mukulu abukakunkusha mpango ikata ya kulongiesha bantu be bungi ishekeele dingi kashaa bantu bekala kuanka. Nnanyi akalongiesha bantu “bashi-balulame”? Kibumbu kikata na baaba balulame abakasanguka. Buashi bantu bashi-balulame bekale na mashina mu mukanda wa muwa, abitungu batamishe kipuano kiabo na Yehowa na kuilambula kuadi. Kukatukila muiyilu, Yesu na bedibue muimu abakatala mushindo aukakokiela bano bashi balulame ku bi’abebalongiesha. (Kibaf. 20:⁠4) Yawa ooso apele kukokiela ku buno bukuashi akafu, sunga bekala pangi na bipua lukama. (Yesh. 65:​20) Yehowa na Yesu balombene kubadika mashimba, tabakatadiila muntu su ngumune mulombene kuluisha nsenga ipia nya.​—⁠Yesh. 11:⁠9; 60:​18; 65:​25. w22.09 17 ¶11-​12

Mu uno verse kishima “baasha matalwa be kunundu,” akilesha bantu bakuete kumunana be na matalua, sunga be na matalua kui bangi. Sunga bena Kidishitu, abitungu bakookiele bano bakunkushi baasha matalua. Bakuete kulama butaale, na bakuete kukita bia’shi bantu bakookiele miya, na ingi nsaa bakuete kukaluila mpaa na muilo wa Yehowa. (Kibaf. 12:​16) Biabia, tui batekibue buatudia kuibaula bitadi, kuibaneemeka, kuibatshiina na kuibapa kineemo ki’abatekie. (Lom. 13:⁠7) Eyendo, bano bena mbulamatadi booso be na matalua, be nao penda ku muanda wa’shi Yehowa ngi muibatadiile bua’shi bekadikie nao. Yesu baadi mupushishe dino eyi dia kulonda kalolo, nsaa ibaabadi abamuele nkonko kui Guvernere a mu Looma Ponse Pilaato. Nsaa ibaadi Pilaato muakule’shi mmulombene kuata kitshibilo kia kupaasha Yesu sunga kumuipayisha, Yesu bamulunguile’shi: “Tobodya kwikadika na matalwa su ngapeela su ta ngakupebwe mwiyilu.” (Yo. 19:​11) Nka bu bibaadi matalua a Pilaato, bantu booso baasha matalua bakuete kukunkusha na bakata ba politike be lelo uno, be na mikalo. w22.10 14 ¶6

Mfumu Davide baadi muyokielue, bafundile pabitale abikekala nshalelo buwa mu mafuku aafiki nsaa ayikashaala Mfumu sha lulamato ku lupuna-nsulu. (Mis. 37:​10, 11, 29) Atukambaa kubadikila bantu Misambo 37:​11, nsaa yatuisambila pabitale kufika kua Mpaladiiso. Tui na kabingilo ke buwa muanda Yesu bateemuine kino kifundue mu Muisambo waye wende nkumo wa pa Muengie, bua kulesha’shi uno mulayilo aukalombana mu mafuku aafiki. (Mat. 5:⁠5) Mayi a Davide abaadi aleshe dingi mushindo aukekala nshalelo mu bufumu bua Solomonyi. Nsaa ibaadi Solomonyi akunkusha mu Isaleele, muilo w’Efile Mukulu ubaadi ausankila bikishekishe butaale na kupeta kintu kioso kibabadi nakio lukalo mu nsenga, “bu mabeele, na buuki.” Efile Mukulu bakuile’shi: “Su nuatungunuka na kulonda miiya yande, . . . Natuesha butaale muiumbo, anulala kushii kintu akifiki mu kuinutshinyisha.” (Lv. 20:​24; 26:​3, 6, NWT) Ino milayilo yooso ibalombene mu bukunkushi bua Solomonyi. (1 Mya. 22:⁠9; 29:​26-​28) Mayi atupete mu Misambo 37:​10, 11, 29. Abaadi alombane mu mafuku a kala, na dingi aakalombana mu mafuku aafiki. w22.12 10 ¶8

Bu biatudi bena Kidishitu ba binyibinyi, abitungu tulonde buludiki bua ndumbuluilo. Bible etupa dino elango dia kutumikila bua koobesha adiamba’shi: “Tuendanga mu ngoshi koshi mubande kupusha malango e buwa, ngobesha yâyo ayitûkâ mu malango a bantu be bungi.” (Nki. 24:​6, EEM) Uno verse etukuasha naminyi buatudia kuikala balungudi na balongieshi be buwa? Pamutue pa kulungula na kulongiesha mu mushindo wetu atue banabene, abitungu tuikitshishe bua kulonda buludiki bu’abetupa. Atupetaa buludiki bua binangu mu bisangilo bietu bia buina Kidishitu kui bantu bamonemone mianda, abele misambo ayitukila mu Bible na ku bipindi bia bena kalasa biabakitaa bua kuitulongiesha. Dingi nyi, ndumbuluilo a Yehowa, etupeyaa bina mudimo bibuwa, mikanda yetu na ma video bilombene kukuasha bantu bua kupusha Bible. Tui na lutumbu lukata bua malango e buwa atukuete kupeta Muiyi di’Efile Mukulu! Tubadia kuikala kunyi su ta tui nao? Ngi buakinyi tuateyi kitshibilo kia kutumikila malango aaye mu muwa wetu ooso ushima.​—⁠Nki. 3:​13-​17. w22.10 23 ¶18-​19

Nsaa y’atudi bidibua bia ku mbidi na abifubu, mbidi yeetu ayinyingaa, na nsaa y’atubadika Eyi di’Efile Mukulu na kunangushena ku dianka, lukumiino luetu alunyingi. Yehowa akumiina’shi tupushe Eyi diaye kalolo. Tui kuibikita ku bukuashi bua luteko, kuibadikila, na kunangushena. Bua kubanga, atutekie bua kulumbuula eshimba dietu buatudia kutambula binangu bi’Efile Mukulu. Akupu, atubadika kifundue kia mu Bible. Ku mfudiilo, atuikisha na kunangushena na kupusha kalolo pabitale bibatubadika. Nkinyi akikitshika dimo? P’atunyinsha kupusha Eyi di’Efile Mukulu kalolo, lukumiino luetu namu alunyinsha kunyinga. Buakinyi bi na muulo bua kubadika Bible na kunangushena ku bibatubadika? Kukita bino akuitupa bukome buatudi naabo lukalo bua kulungula mukandu wi buwa wa Bufumu kubanga binobino, na nkalungula mukandu wa kiimu autapa kuishimba mu mafuku e kumpala aku. Na dingi, nsaa y’atunangushena pa ngikashi ikata ya Yehowa, kipuano kietu naye akinyinsha kutama, na atunyinsha kuifubuila kuadi. w22.11 6-⁠7 ¶16-​17

Yesu baadi muleshe’shi, kukaasha balongi baaye mpa na bano boso be paasha pa kakongie ka bena Kidishitu abakatundula balongi baaye ba binyibinyi ku kifulo kiabadi nakio munkatshi muabo. Na, kifulo ki munkatshi mua kakongie ka bena Kidishitu nkilekeene na kia bangi bantu. Sunga mbiabia, Tumonyi tua Yehowa ta ntupuidikie nya. (1 Yo. 1:⁠8) Biabia, p’atunyisha kuuka bantu booso mu kakongie, atunyisha kuuka tu bilubilo tuabo. (Lom. 3:​23) Bi malua, muanda bangi abatadilaa kushipuidika kua bangi ku’ebakokosha, Yesu balesheshe batumibua baye kifulo mu mushindo kinyi? Na mmushindo kinyi wabidi bibofule bua kuambula kileshesho kia Yesu lelo uno? Tumonyi tua Yehowa atukitshi kalolo pa kunangushena ku ngaluulo ya ino nkonko. Kukita bino nkulombene kuitukuasha bua kunyisha kulesha kifulo bikishekishe nsaa yatunyingiila kukutua kua kupuidika kua bangi.​—⁠Ef. 5:⁠2. w23.03 26-​27 ¶2-⁠4

Bu biatukuete kuifubuila ku mfudiilo kua uno ndumbuluilo e bubi a mianda, tui balombene kutengiela kupeta nkalakashi ayitukila mu kakongie. Ino nkalakashi ngilombene kutompa lulamato luetu kui Yehowa. Biabia, abitungu tuilame mu bintu bioso. Su mbakuluishishe kui muina Kidishitu noobe, tolekielanga’shi mianda ikuluikile nya. Su bopete dinyoka, totuulanga binangu biobe ku bubi buepusha, kumiina elango, na oshintuule mianda ayitungu. Na nsaa ayituusha ndumbuluilo a Yehowa kushintuluka kampanda kui na bukitshishi ku nshalelo oobe, ekukumiine n’eshimba diobe dioso na okookiele buludiki. Shaala mukulupile kui Yehowa na ndumbuluilo aaye nsaa ayitompiibua lulamato loobe. Shaala muumiine, onangushene kalolo, na kumona mianda mu mushindo awinyimono Yehowa. Teka Yehowa bukuashi. Na tuelamuunanga mu kakongie. Na dingi, sunga kuakitshika muanda kinyi, Satana tekalanga na ngobesha ya kukuabuula kui Yehowa na ndumbuluilo aaye.​—⁠Shak. 4:⁠7. w22.11 24-​25 ¶14-​16   

Bakulu kuashayi bakuenu buabadia kuilumbuula kumpala kua’shi, masaku aatukila ku bintu bipangibue taamuekiele. Nuikale bashinkamishe’shi bantu booso mu kakongie abauku kiabadia kukita bua badia kupanda, na buabadia kuikala abesamba na bakulu. We kukita kinyi pa bupenka? Su masaku aatukila ku bintu bipangibue akitshikila peepi na mbalo yatudi bashalele, abitungu tuipushe bakulu kiatudi balombene kukita bua kukuasha baaba bantu. Tui balombene kuibapa mbalo ya kushaala pangi bua mafuku apeela su mbafilukie baleka mashibo aabo. Sunga kukuasha baaba booso abakuasha bantu bapete masaku aatukila ku bintu bipangibue, buabadia kushaala ku nshibo yoobe nsaa yabakiabakitshi uno mudimo. We kupa balungudi be mu lukalo bidibua na bingi bintu su we na mushindo wa kuibikita. Su masaku aatukila ku bintu bipangibue abatukila kula na mbalo yodi mushale, we mulombene nka kuibakuasha. Mushindo kinyi? Pakuela luteko bua baaba booso bakuatshibue na ano masaku aatukila ku bintu bipangibue. (2 Kod. 1:​8-​11) We kuikala na mushindo wa kukuatshishena mudimo wetu wa kukuasha bantu bapete masaku wa mu nsenga ishima na bia buntu biobe. (2 Kod. 8:​2-5) Su we na mushindo wa kuenda ku yaya mbalo itukie aa masaku bua nkakuasha, ipusha bakulu bakulungule kiodia kukita bua nkakuasha. Su babakutekie bua’shi wende bua nkakuasha abitungu bakupe bungi buludiki boodi mulombene nkafubisha ku yaya mbalo na mu nsaa yabadi na lukalo lukata. w22.12 24 ¶8; 25 ¶11-⁠12

Muibuku di’Efile namu mbapatuule kifundue kia lelo bino: “Kutompibwa kôso kwinufikile nyi nka kwakwa akufikilâ bantu boso.” Uno muanda babaadi beufundile bakuetu balume na bakashi babaadi bashaale mu kibundi dia Kodinda. Bangi babaadi bantambushi a masandi babadi baukie kalolo, bana balume abakitaa masandi na bana balume nabo, sunga bakashi abakitshi lusandi na bakashi nabo, mpaa na bankodi a maalua. (1 Kod. 6:​9-​11) Onangushena’shi kunyima kua lubatshisho luabo, ta mbapete dingi lukalo lui bubi munda muabo su? Ta mbiabia nya. Booso buabo babaadi bena Kidishitu bedibue muimu ba binyibinyi, anka babatungunukile na kuikala nka bakutue kupuidika. Kushi mpaka, babatungunukile nka na kulua na ino nkalo i bubi ku nsaa na nsaa. Bino mbilombene kuitunyingisha. Buakinyi? Muanda abilesha’shi bi’okuete kulua na lukalo lui bubi, na ungi muntu namu kuete kulua nalo. Na dingi abitungu’shi ‘nwikale bakankamane mu lukumiino lwenu mwi Kidishitu. Eûkyei’shi, pano pa nsenga poso bakwenu mu Kidishitu, bakwete kufwambuka’nka bu bya nukwete kufwambuka.’​—⁠1 Mp. 5:​9, EEM. w23.01 12 ¶15

Yesu baadi mutekie Yehowa buadia kupasukila balongi baaye. (Yo. 17:​11) Buakinyi bino mbitupe eshimba dinyingie? Muanda Yehowa e na bukome kukila muishikuanyi ooso a ku beshikuanyi betu. (1 Yo. 4:⁠4) Yehowa amonaa kintu kioso. Tui bashinkamishe’shi su tuakulupila mui Yehowa, tui balombene kukambila moo wetu na kulesha eshimba dinyingie. Opushaa namu buufu ingi nsaa bua kuilesha’shi we umune a ku Tumonyi tua Yehowa su? Wekalaa na kuituutusha bua kubanga mudimo wa bulungudi sunga kubatshishibua pa muanda wa bilombene bangi kunangushena bobe su? Totadiilanga ino mianda yakuimika bua kukita ki’ouku’shi ki buwa. Teka Yehowa n’eshimba diobe dioso. Mutekie bua’shi akupe eshimba dinyingie bodia kukita kiakia ki’akumiina. Nsaa y’omono mushindo awaluula Yehowa ku nteko yobe, okekala na bukome n’eshimba dinyingie ngofu.​—⁠Yesh. 41:​10, 13. w23.01 29 ¶12; 30 ¶14

Yesu bebayipuishe’shi: “A tanwibabadikye?” bua kulesha’shi Bafadiseo babaadi na mueneno e bubi pabitale Bifundue. (Mat. 12:​1-7) Mu ungi musuusa Bafadiseo babaadi abamba’shi balongi ba Yesu t’abanemekaa Sabaato. Mu kuibaluula, Yesu baadi muteemune bileshesho bibidi abituukila mu Bifundue, ateemuna ma verse aatukila mu mukanda wa Osea bua kulesha’shi, Bafadiseo babaadi na mueneno e bubi pabitale muiya wa Sabaato, na ta babaadi na lusa. Buakinyi bano bantu ta babaadi abatadiila biababadika Muiyi di’Efile bikunkushe nshalelo aabo? Muanda babaadi abebibadika na kinangu kia kubepuula, na kikudi kia kuitatula. Biabia binangu biabo bi bubi bibaadi bibakutshishue bua’shi tabapushanga biababadika. (Mat. 23:​23; Yo. 5:​39, 40) Tala dingi Mateo 19:​4-⁠6, mubaadi Yesu muipushe Bafadiseo luno lukonko lumune lua’shi: “A tanwibabadikye?” Sunga bibaabadi ababadika mianda pabitale bupangi, babaadi abapele ki’ayilongiesha pabitale mueneno a Efile Mukulu bu’eyibakishi. Atulongiela ku mayi a Yesu’shi abitungu tubadikie Bible na kinangu ki buwa. Mu kuilekeena na Bafadiseo, tumubadikie n’eshimba dietu dioso na kuiyisha na kukumiina kulonga. w23.02 12 ¶12-​13

Mu Muiya wa Yehowa pabitale muilo wa Isaleele, mubaadi mpaa na bukunkushi bubaadi bulombene kuibakuasha bua kudimukila masaku akata, alombene kutukila ku nshibo sunga ku mudimo. (Efi. 21:​28, 29; Miy. 22:⁠8) Su muntu kampanda ayipaa ungi ku masaku, bibaadi bilombene kufuisha lukalakashi lui bukopo. (Miy. 19:​4, 5) Muiya ubaadi aulesha’shi, sunga baaba booso babaadi abayipaa bana pa kutanda kushi kukumiina kuabo, babaadi abapete kibawe. (Efi. 21:​22, 23) Bifundue abilesha kalolo’shi, Yehowa akumiina’shi tuikale bantu abadimukila masaku. Atulesha’shi tui na lutumbu bua kia buntu ki’Efile Mukulu kia muwa, pa kuata mpango ya kudimukila masaku ku nshibo yetu na ku mudimo wetu. Tui na kintu ki na nsumu, sunga buanga abuipayishenaa, abitungu tushinkamishe’shi bi mbalo ishi ilombene bana kukuma. Nsaa y’atutembesha kaalo sunga yatudi na meema e kaalo, sunga nsaa y’atufubisha bingi bintu bi masaku, abitungu tudimukie nsaa y’atutambuka sunga y’atufubisha bino bintu. Ta tui balombene kutambusha mootoka su buanga mbuitukuate, tui batome maalua, sunga atupusha tulo, sunga kutuula binangu bietu ku ingi mianda nsaa y’atutambusha mootoka. w23.02 21-​22 ¶7-⁠9

Yehowa Mmulongieshi e na luishinko, na kalolo, na apushiishaa bangi. Atalaa mianda i buwa i mui balongi baye. (Mis. 130:⁠3) Na t’etutekaa bintu bi bungi biatushi balombene kukita nya. Tentekiesha mushindo wadi mupangie bongo bobe, kia buntu ki buwa bukile. (Mis. 139:​14) Mupangi eetu akumiina’shi tutungunukie na kulonga bua losoo, na tusangeele biinyi bi’atulongo. Biabia, bi buwa “kulakila” bia binyibinyi bia mu Bible lelo uno. (1 Mp. 2:⁠2) Eatshile bipatshila biodia kulombasha, na w’ekitshishe bodia kuikala na programe a kuibadikila Bible na kuilongiela. (Yos. 1:⁠8) Ku bukuashi bua Yehowa, okasangeela kubadika na kulonga pa bimutale ngofu. Kuikala na penda kiukilo ta ndio kupua kua muanda nya. Kintu kia kumpala ki na muulo, nyi mushindo aukukuasha kiukilo bua kulonga mianda i bungi pabitale Yehowa, na kutamisha ngikashi bu ino, kifulo, na lukumiino muadi. (1 Kod. 8:​1-3) Nsaa y’otungunuka na kulonga, teka Yehowa bua’shi akukuashe bua kunyiisha kutamisha lukumiino loobe. (Luk. 17:⁠5) Aluulaa na kalolo kooso ku nteko i bino. w23.03 10 ¶11, 13

Yesu baadi akumiina’shi balongi baye bekale na bi bungi bia kukita, sunga mbibaabadi abatengiela’shi mfudiilo a mianda afikie. Yesu bebapeele mudimo wa kukita. Bebapeele mudimo wa kulungula mukandu wibuwa mu “Yeelusaleme, mu Yuudeya mushima, na mu Samariya, mpaa na kufudiile nsenga.” (Bik. 1:​6-8) Uno ngi mudimo ukata ubaadi balongi ba Yesu bapete. Pa kuikitshisha na muabo mooso bua kulungula bangi mukandu wibuwa, babaadi bafubishe nsaa yabo kalolo. Bua’shi tuikale badimukie atue banabene, abitungu tutale mushindo watufubisha nsaa yetu. “Mianda ya mu kimpulunkamba” ngilombene kukitshikila muntu ooso a kuatudi. (Mul. 9:​11) Tui balombene kufua mu kabasamushi. Tui kufubisha nsaa yetu kalolo pa kukita kikiebe ki’eshimba dia Yehowa na kunyingisha kipuano kietu naye. (Yo. 14:​21) Abitungu ‘twikale banyingye, bashii kusaanyishwa, twikale na katshintshi ku mufubo wa Mwanana.’ (1 Kod. 15:​58) Na dingi nsaa ayikafiki mfudiilo, bi’ekala a muwa wetu sunga a uno ndumbuluilo e bubi, t’abiketukemesha nya.​—⁠Mat. 24:​13; Lom. 14:⁠8. w23.02 18 ¶12-​14