Mueshi wa 2

Kifundue kia lelo akipushisha kinyi? Anka bu abiende Yesu na kupatuula, kino nyi nkifulo kia kuipaana, kifulo kilombene kutakula muntu buadia kufuila muina Kidishitu naye su kui mushindo. Eyi di’Efile Mukulu ndishimikie kasele pa ma mbalo e bungi ku kifulo. Bantu be bungi be na ma verse abadi bakumiine ngofu bu ano aalondo: “Efile Mukulu nkifulo.” (1 Yo. 4:8) “Ofule mwinobe kifulo bu’be nabene.” (Mat. 22:​39, Kilombeeno Kipya 2014) “Mwanda kifulo akibwikila mituuto na mituuto ya milwisho.” (1 Mp. 4:​8, Kilombeeno Kipya 2014) ‘Kifulo takifwiya.’ Ano ma verse na angi aalesha patooka’shi, bi na muulo wa kukimba na kulesha dino eyikashi di buwa. Kifulo kia binyibinyi akifiki kui Yehowa, na anka penda baaba booso bena kikudi kiselele kia Yehowa na miabi yaye, ngi balombene kuifulena mu binyibinyi munkatshi muabo. (1 Yo. 4:7) Ngi buakinyi, Yesu bambile’shi nka penda balongi baaye ngi balombene kuikala na kifulo kia binyibinyi munkatshi muabo. Anka bu bibalesheshe Yesu, bantu be bungi mbaukie balongi baaye ba binyibinyi ku kifulo ki’abelesheenaa munkatshi muabo. w23.03 27-28 ¶5-8

We na lukalo na kutamisha eyikashi dia lusa bua kunyiisha kufuila bangi lusa su? We mulombene kubanga kulonga na kunangushena pabitale bileshesho bia bantu ba mu Bible babaadi na bukidi bua kufuila bangi lusa na bia bashi baadi bafuile bangi lusa. Tutaluule kileshesho kia Yesu. Baadi akumiina kufuila bangi lusa. (Luk. 7:47) Dingi, ta baadi emeena pa bilubilo biabo nya, baadi atuulu binangu ku kiabadi balombene kukita. Anka Bafadiseo ba mu mafuku a Yesu “babamonanga bangi bantu bu kushii kintu.” (Luk. 18:​9, Kilombeeno Kipya 2014) Kunyima kua kunangushena ku bino bileshesho eyipushe’shi: ‘Nkinyi kiamonaa mui bangi? Nasangulaa kuimena pa ngikashi kinyi yabadi nayo?’ Su ta mbikubofuile bua’shi ofuile muntu lusa, tompa kufunda mulongo wa ngikashi i buwa ya yawa muntu. Akupu weyipushe’shi: ‘Yesu amonaa uno muntu mushindo kinyi? Mmulombene kumufuila lusa su?’ Kulonga mu uno mushindo, nkulombene nkukuasha bua kushintuula mueneno oobe. Bua musango wa kumpala, mbilombene kuituikeela bukopo bua kufuila muntu ekele muituluishishe lusa. Anka su tu batungunuka na kuitatshisha pabitale uno muanda, mu kuenda kua mafuku atuikala atufuila bangi lusa kushi lukalakashi. w22.04 23 ¶6

Mu mukanda wa Kibafumbwilwe, beshikuanyi b’Efile Mukulu mbebaleshe mu kifuanyi. Atumono nyema i bungi ya bukielo. Bu kileshesho, kubaadi ‘nyema a bukielo baadi atuuku mu meema akata, e na nsengwa ekumi na mitwe musambobidi.’ (Kibaf. 13:​1, Kilombeeno Kipya 2014) Yawa nyema a bukielo babaadi abamulondo kui ‘mungi nyema a bukielo atuuku muushi mwa nsenga.’ Yawa nyema baadi akula bu kinyoka na baadi “ayisha kaalo akakatukila mwiulu.” (Kibaf. 13:​11-13, Kilombeeno Kipya 2014) Na dingi atumono nyema ilekeene ya bukielo, “nyema a bukielo moonga abadi bashaale” mongo kui ndumba mukashi. Ino nyema isatu ayilesha beshikuanyi kubanga kukala ba Yehowa Efile Mukulu na Bufumu buaye. Kia kumpala, bi na muulo tuiyitundule. (Kibaf. 17:​1, 3) Abitungu tubande kupusha akielesha ino nyema ya bukielo na uno mukashi ndumba ba mu kifuanyi. Mushindo watudia kupusha kalolo abitungu kulekiela Bible ebipatuule aye nabene. Bifuanyi bi bungi biatusangana mu mukanda wa Kibafumbwilwe, mbapue kui bipatuula mu ingi mikanda ya mu Bible. w22.05 8-9 ¶3-4

Bangi bakuatudi ta be bia kukita bi bungi mu mudimo wa Yehowa, muanda wa bununu sunga maladi, bino abibatshobolosha ngofu. Su ingi nsaa we pusha’shi we mutshobolokie pa muanda wa kufudiila kampanda, eyipushe’shi ‘nkinyi akintekie Yehowa?’ Yehowa akumiina’shi okite kiakia kiodi mulombene kukita muyile nshalelo oodi naye binobino. Puandikisha uno muanda, mukuetu mukashi e na bipua 80 epusha mutshobolokie pa muanda ta mulombene kukita bi bungi mu mudimo wa bulungudi bu bibaadi akitshi pabaadi na bipua 40. Apuandikisha’shi sunga biakitshi mupunda ngobesha yaye t’abisankisha Yehowa. Bino mbia binyibinyi su? Banda kuela binangu. Su mukuetu mukashi baadi afubu mupunda ngobesha yaye pabaadi na bipua 40, na kuete atungunuka na kufuba mupunda ngobesha yaye patadi na bipua 80 na ta muimikie kutusha kiadi nakio ki buwa nya. Su tubakitshi mupunda ngobesha yetu, yaya nsaa Yehowa etulungula’shi: “Bibuwa!” (Puandikisha na Mateo 25:​20-23, Kilombeeno Kipya 2014) Tui balombene kumona’shi mbibofole bua kupeta muloo nsaa yatutumu binangu bietu ku kiatudi balombene kukita kushi kutuma binangu ku kiatushi balombene kukita. w22.04 10 ¶2; 11 ¶4-6

Mukanda wa Kibafumbwilwe shapitre 21 aupuandikisha bedibue muimu 144000, na kibundi ki selele ki’abetanyina bu “Yeelusaleme mupya.” Kino kibundi ki na bitako 12 bia mabue, biabadi bafunde ‘mashina 12 a batumiibwa ba mwana a mukooko.’ ( Kibaf. 21:​10-14; Ef. 2:20) Kino kibundi kia mu kifuanyi t’akimueka bu bingi nya. Nkishaale n’eshinda dia oòlo e buwa, biibi 12 abipenyapenya, midimba na bitako mbibakibue na mabue a muulo—na ki na kipimo kipuidikie. (Kibaf. 21:​15-21) Dingi, kubaadi kingi kintu kibaadi akimueka bu kishi kuanka! Tala bi’abetulungula dingi kui Yowano: ‘Na ntshinamwene ntempelo mwanka nya; mwanda Yehowa Efile Mukulu sha bukome booso, na mwana a mukooko mbeekale ntempelo a mwanka. Na kibundji takibaadi lukalo na nguba sunga na mweshi nya bwa kwikimunyika, mwanda ntumbo y’Efile Mukulu ngikimunyikye, na mwana a mukooko nyi elampi dia’kio.’ (Kibaf. 21:​22, 23, Kilombeeno Kipya 2014) Baaba booso be mu Yeelusaleme mupia abakekala na Yehowa.—Eb. 7:27; Kibaf. 22:​3, 4. w22.05 17-18 ¶14-15

Bu bi Yehowa Mmupangi eetu, etuelelaa Miya, na Nsushi eetu, muikale dingi Nshetu sha kifulo e muiyilu. (Mis. 100:3; Yesh. 33:22) Nsaa y’atumuluishisha na tubelanga kuishimba mu binyibinyi, te nka penda na mushindo nya, kadi akumiina dingi kuitufuila lusa. (Mis. 86:5) Kukiila kui mutemuki Yeeshaya, Yehowa etushinkamisha’shi: “Sunga miluisho yenu yekala imongie pididi bu nkula, ayikatoko nka soo bu butongo.” (Yesh. 1:​18, NWT) Pa muanda wa’shi tui bantu bashi bapuidikie, atue booso atuakulaa sunga kukita mianda ayikokosha bangi. (Shak. 3:2) Bino t’abipushisha’shi ta tui balombene kuikala n’abo mu kipuano ki buwa nya. Tui balombene kui bikita su tualonga bia kufuila bangi lusa. (Nki. 17:9; 19:11; Mat. 18:​21, 22) Su muntu akula sunga kukita muanda kampanda upeela ubetutapa kuishimba, Yehowa akumiina’shi tu mufuile lusa. Tui na kabingilo ke buwa ka kukita bino. Ku mfudiilo a bioso Yehowa akumiina kuitufuila lusa pa ‘kuitulekyêla byoso.’—Yesh. 55:​7, EEM. w22.06 8 ¶1-2

Sunga ta tui balombene kuipuandikisha na bangi, tui balombene kulongiela kui bangi bafubi ba Yehowa baasha lulamato. Tui balombene kulongiela ku kileshesho kia Yesu. Ta tui bapuidikie bu Yesu nya, anka tui balombene kulongiela bi bungi ku ngikashi yaye i buwa na bintu bi buwa bibaadi mukite. (1 Mp. 2:21) Nsaa yatukitshi muetu mooso bua kulonda kileshesho kia Yesu kalolo, mupunda ngobesha yetu, atuikala bafubi ba Yehowa be buwa, Muiyi di’Efile Mukulu atusangana bileshesho bia balume na bakashi baasha lulamato batudi balombene kuambula sunga mbibabadi bakutue kupuidika. Nangushena pabitale Mfumu Davide ababadi betanyine kui Yehowa’shi: “Muntu muyile eshimba dyande.” (Bik. 13:22) Anka, Davide baadi mukite ingi miluisho ikata. Sunga mbiabia nyi kileshesho ki buwa kuatudi. Buakinyi? Muanda ta baadi mutompe kuibingisha nya. Anka baadi mukumiine elango dibabamupeele di bukopo, na aye nkuinyongola kuishimba bua miluisho ibaadi mukite. Pa muanda wa biabia, Yehowa bamufuidile lusa.—Mis. 51:​3, 4, 10-12. w22.04 13 ¶11-12

Bible apatuula’shi lufu mmuishikuanyi. (1 Kod. 15:​25, 26) Tui balombene kuinyongola nsaa y’atunangushena bua lufu, bikishekishe nsaa yatufuisha mukuetu atudi bafule ngofu. Buakinyi atupushaa moo wa lufu? Muanda Yehowa betupangile na lukalo lua kusankila muwa wa losoo. (Mul. 3:11) Kuikala na moo wi na nkatshinkatshi, nkulombene kuitukuasha bua kukaluila muwa wetu. Mbilombene kuitutakula bua kuata bitshibilo bi buwa pabitale bidibua, kalashishi ketu ka mbidi ka pa kiubishi, na tui kukimba munganga mulombene kuitukuasha na manga su bi na muulo na kuleka kutuula muwa mu masaku. Satana auku’shi tui bafule muwa wetu. Apuandikisha’shi, tui balombene kuleka bioso, na kipuano kietu na Yehowa bua kukaluila muwa wetu. (Yob. 2: 5) Satana e bubi ngofu! Na dingi, aye ngi muikale na “matalwa a lufu,” Satana kuete kutompa kufubisha moo wa lufu watudi nao bua’shi tusumbusheene Yehowa.—Eb. 2:​14, 15. w22.06 18 ¶15-16

Nsaa yabadi bemikie mudimo wetu, tui kupeta lukalakashi lua kuibunga pamune na bakuetu balume na bakashi mu tusaka tuetu tua bulungudi. Kintu ki na muulo ukata kiatudi balombene kukita nkulama butaale munkatsshi muetu. Tulueyi na Satana, kushi kulua na bakuetu. Lekiela bilubilo bia bakuenu balume na bakashi, na su kui muanda tompayi kuiupua bukidibukidi. (Nki. 19:11) Ata mpango ya kukuasha bangi. (Tt. 3:14) Bukuashi bubaabadi batuushe kui bangi ba mu kasaka ka bulungudi kui uno mukuetu mukashi baadi mu lukalo, mbutuushe bukitshishi bui buwa mu kasaka ka bulungudi. Mbekale mu buumune nka bu bena kifuko. (Mis. 133:1) Binunu na binunu bia bakuetu balume na bakashi bena Kidishitu, bikuete kufubila Yehowa sunga biabadi bemikie mudimo wetu kui bena mbulamatadi. Bangi mbebeele mu nkano pa muanda wa lukumiino luabo. Tui balombene kuibatekiela, kutekiela bifuko biabo, na bano booso abatuulu muwa wabo mu masaku be na bulungantu bua kukuasha bano bakuetu balume na bakashi ku nkalo yabo ya mu kikudi, ya ku mbidi, na kuibakuila ku mbulamatadi. (Kol. 4:​3, 18) Tolubanga’shi nteko yoobe ngilombene kukuasha bano bakuetu booso balume na bakashi!—2 Tes. 3:​1, 2; 1 Tim. 2:​1, 2. w22.12 26-27 ¶15-16

Bana ababandilaa baledi baabo ngofu na abebambulaa ke bungi. Sunga mbiabia, ta kui nambutuile mupuikie nya. (Lom. 3:23) Kadi sunga mbiabia, banambutuile be na binangu, abekitshishaa muabo mooso buabadia kulekiela bana baabo kileshesho ki buwa. Ungi nshe bana bambile’shi: “Bana be nka bu enyuka adikakaa kintu kioso.” Bambile dingi’shi: “Abetulungulaa nsaa ish’ayipushena kileshesho kietu na ki’atutompo kuibalongiesha.” Su atukumiina’shi bana betu bafule Yehowa, abitungu kifulo kietu’tue banabene buaye kikale kinyingie na kimuekie patooka. Kui mishindo i bungi ilombene banambutuile kulongiesha bana baabo bua kufula Yehowa. Ungi mukuetu mulume e na bipua 17 abetanyina bu Andrew bakuile’shi: “Baledi bande babaadi abandongiesha nsaa yoso’shi bi na muulo bua kuela nteko. Bufuku booso papa baadi atekie n’ami, sunga ntshinaadi muilumbuule buandia kuela luande luteko. Binobino ntandi natekaa Yehowa kalolo na namumonaa bu Nshami sha kifulo.” Banambutuile, tanukumanga kubepuula bukitshishi bukata bui nabo, kifulo kienu’nue banabene bua Yehowa kui bana benu. w22.05 28 ¶7-8

Bua kubatshishibua, kintu kia kumpala kia ku bintu abitungu’shi tukite, nkuilanga kuishimba mu binyibinyi ku miluisho yetu. (Bik. 2:​37, 38) Kuilanga kua binyibinyi, akuitutakula mu kushintuluka kua binyibinyi. We mupue kuleka kukita mianda yooso ish’ayisankisha Yehowa, bu bukitekite, kutoma mfuanka, madimi na ngakuilo e bubi su? (1 Kod. 6:​9, 10; 2 Kod. 7:1; Ef. 4:29) Tungunuka na kuikitshisha bodia kushintuluka. Ipusha muntu olongaa naye Bible sunga bakulu ba mu kakongie, buabadia nkukuasha na kukuludika. Su oki nsongua mushaale pamune na baledi bobe, tungunuka na kuibayipusha bua’shi bakukuashe biodia kukatusha kiubishi kioso ki bubi kilombene nkukutshishua bodia kubatshishibua. Bi na muulo dingi bua kuikala na biubishi bi buwa bia mianda ya mu kikudi. Mu ino mianda mui, kutuela kua mu bisangilo bia buina Kidishitu na kutuusha ngaluulo muanka. (Eb. 10:​24, 25) Na dingi, su bolombasha ngikashi itekibue bodia kubanga kuenda mu mudimo wa bulungudi, shinkamisha’shi wekala webikitshi pa kiubishi. w23.03 10-11 ¶14-16

Mu bantu babadi bateemune mu buno butemuki bufundibue mu Kibangilo 3:​14, 15, mui “nyoka,” na “bekulu ba nyoka,” Nyoka a binyibinyi, ta mmulombene kupusha kiakia kibaabadi bakule kui Yehowa mu efuba dia edene nya. Biabia kepatshila ka kiimu kia Yehowa, abitungu kekadikie nka kui bipangua bi na binangu. Yehowa baadi akuila bantu kinyi? Mukanda wa Kibafumbuilwe 12:​9, aupatuula kalolo akilesha nyoka. Kubaadi “Kinyoka kia kala” kileeshe patooka bu Satana diabulu. Nsaa ayakula Bible bua bekulu mu ngukuilo a mu kinfuanyi, alesha baaba booso be na binangu na bikitshiino bu nshabo a mu kinfuanyi. Biabia bekulu ba nyoka, nyi mbamikeyilu bashi na lulamato na bantu be bu Satana, abapele kukookiela Yehowa Efile Mukulu na abashikua muilo waye. Mu bano bekulu, mui mpaa na ba mikeyilua babaadi basumbusheene midimo yabo muiyilu mu mafuku a Nowa na bantu babi abakitshi bibi bu nshabo Diabulu.—Kib. 6:​1, 2; Yo. 8:44; 1 Yo. 5:19; Yu. 6. w22.07 14-15 ¶4-5

Mpoolo baadi mufule bakuabo ngofu. Bu bibaadi mupete aye nabene nkalakashi i bukopo, baadi mulombene kulesha lusa na kuituula pa mbalo ya bena Kidishitu naye, nsaa ibaadi bano bena Kidishitu bapete nkalakashi. Ingi nsaa, Mpoolo ta baadi na makuta nya. Anka baadi mupete mudimo wa ku mbidi, ubaadi ulombene kumukuasha aye nabene na kukuasha bakuabo. (Bik. 20:34) Baadi akitshi tushibo tua mapema. Pa bafikile ku Kodinda, mudimo waye wa kumpala ubakitshiine na bakuabo Akila na Prisile nkuibaka tushibo tua mapema. Anka “mwifuku dyoso dya sabaato” baadi alambukisha bena Yuda na bena Greke. Kunyima, nsaa ibafikile Silase na Timote, ‘Mpoolo babangile kwipaana mu bulambukishi bw’Eyi dy’Efile Mukulu.’ (Bik. 18:​2-5) Mpoolo ta mmuilue efuku su ndimune, kepatshila ka mu nshalelo aaye ka kufubila Yehowa. Bu bibaadi Mpoolo afubu ngofu, baadi na mushindo wa kunyingisha bakuabo balume na bakashi. Baadi muibatentekieshe’shi tabakumanga kutadiila mianda ya mu nshalelo, na nkalo ya bifuko biabo biebatakula mu kubepuula “mianda yikilekile buwa,” ya ku bipindi bioso bia mu lulanguilo lua Yehowa. w22.08 20 ¶3

Lelo uno, kikiebe ki’eshimba di’Efile Mukulu nkia’shi mukandu wi buwa wa Bufumu, ulungulue pa nsenga yoso ishima. (1 Tim. 2:​3, 4) Uno mudimo wa Yehowa wi na muulo ukata, na mmuiwupe Muana aaye aadi mufule bua’shi eukunkushe. Tui balombene kushinkamisha’shi, ku muanda’shi tukuete kukunkushibua na Yesu, mudimo wa kulungula mukandu wi buwa aukakitshibua kalolo kakile, nka bu bi’abakumiina kui Yehowa kumpala kua’shi mfudiilo ifikie. (Mat. 24:14) Tui kuibishinkamisha naminyi? Mu kapindi kapeela kumpala kua’shi Yesu ende muiyilu, baadi mufumankane na balongi baye be bungi baasha lulamato ku muengie wa mu Ngalileya. Bebalunguile’shi: “Matalwa ooso, mbeeampe mwiyilu na pa nsenga.” Tala’nyi angi mayi aaye abaadi mukumbashe: “Byabya ndaayi: mu miilo yooso, nwibeekashe buu balondji bande.” (Mat. 28:​18, 19) Biabia, kukatusha ingi mianda, babapeele Yesu matalua a kukunkusha mudimo wa kulungula mukandu wi buwa. Na uno mudimo wa kulungula mukandu wi buwa, ngulombene kutungunuka na kukitshibua kalolo nka ku bukunkushi bua Yesu mpaa na ku ano mafuku eetu. w22.07 8 ¶1, 3; 9 ¶4

Bantu balulame, babaadi bakite mianda i buwa kumpala kua kufua, abapete “lusangukilo lwa kupeta muwa,” muanda mashina aabo mbapue kuiafunda mu mukanda wa muwa. Bino abilesha’shi lusangukilo lua baaba bakite bi bwa luabadi baleshe mu Yowano 5:​29, nalo lumune, lusangukilo lua “bantu balulame” luabadi batemune mu Bikitshino 24:15. Uno mpushisho, muipushene na mayi atusangana mu Bena-Looma 6:​7, aamba’shi: “Mwanda su muntu bafu, bapôsoshwa ku matalwa a milwisho.” (EEM) Biabia, nsaa ayifu muntu mululame, Yehowa amufuila lusa ku miluisho yaaye yooso. Anka akatentekiesha bikitshino biaye bioso bia lulamato bibaadi mukite pabaadi ki na muwa. (Eb. 6:10) Biabia bano bantu balulame p’abakasanguka, abakekala na lukalo lua kulama lulamato luabo buashi mashina aabo ashaale alamiibue mu mukanda wa muwa. w22.09 18 ¶13, 15

Mutemuki Ndanyele, mmulekie kileshesho ki buwa bukile kia kuikala bu muntu a kukulupilua. Sunga bibaabadi bamutuale kui bena Babilone mu bupika, kunyima kua mafuku apeela bapetele nkumo ya bu muntu mulombene kukulupilua. Nkumo yaye ibatamine ngofu ku bukuashi bua Yehowa, nsaa ibaadi mupatuule bilotua bia Nabukodonosore Mfumu a bena Babilone. (Nda. 2:12; 4:​20-22, 25) Kunyima kua bipua bi bungi, Ndanyele baadi muleshe dingi’shi mmuntu a kukulupilua, nsaa ibaadi mupatuule mukandu wa kukaanya ubaadi umuenekie ku mudimba wa ebalasa dia bena Babilone. (Nda. 5:​5, 25-29) Kunyima kua mafuku, Dariuse a mu Mede na bakata babaadi nabo, babaadi bamone dingi’shi munda mua Ndanyele, “mubaadi kikudi ki kashaa.” Babaadi bauukie’shi Ndanyele baadi ‘muntu a kukulupilua muanda baadi muntu mululame, ta baadi na kapungakanyi sunga kalema kapeela.’ (Nda. 6:​3, 5) Bi buwa tuiyipushe atue banabene’shi: ‘Nkumo kinyi yandi nayo kui baaba booso bashii ba Temue ba Yehowa?’ Atutumbisha Yehowa su tui bantu ba kukulupilua. w22.09 8-9 ¶2-4

Abitukuasha bua kushaala balamate, ku mayi a kulonda a Yehowa a ki buwa na ki bubi. Ouku buakinyi? Banda kunangushena nkinyi kilombene kukitshika su kasaka kooso ka bantu abebakaa ke na yako miya pabitale bipimo bia kuibaka nabio. Pe kutuuka masaku. Na su ba muganga babakutua kunemeka, miya y’abo ya ba muganga nsaa y’ababuku muntu, mbalombene kuipa bangi baasha maladi. Mu binyibinyi, miya i kuanka bua kuitukaluila. Mu mushindo umune, miya y’Efile Mukulu ya ki buwa na ki bubi ayitukaluila. Yehowa elelaa baaba booso abekitshisha, bua kuikala na nshalelo muipushene na mayi aye a kulonda miabi. Mmulee’shi: “Balulame [abapyana nsenga, NWT], abemushala looso.” (Mis. 37:29) Banda kunangushena buumune, butaale, na muloo abikekala nabio bantu nsaa ayikalondo muntu ooso mayi a kulonda a Yehowa. Yehowa akumiina’shi wekale na nshalelo a uno mushindo. Mbinyibinyi, atue booso tui na tubingilo tui buwa, tua kufula kiakia akiamba Yehowa’shi nkilulame! w22.08 27-28 ¶6-8

Nsaa yatupete nkalakashi i bukopo, lulamato luetu mui Yehowa na mui ndumbuluilo aaye ndulombene kutompiibua. Mushindo kinyi watudi balombene kukambila ino nkalakashi? Tui na lukalo lua kushala belame na bapasukie, na bemane pepoo mu lukumiino. Atuilama nsaa yatushala baumiine, nsaa yatunangushena kalolo, na nsaa yatuitatshisha bua kumona mianda mu mushindo awiyimono Yehowa. Su tubakitshi biabia, biatukitshi tabikala na bukitshishi ku biatunangushena nya. Pangi nsaa y’atuipusha’shi mukuetu mulume sunga mukashi muitukitshine muanda wi bubi, pangi mmukuetu e na mashito mu kakongie. Pangi, mukuetu ta baadi na lukalo lua nkutapa kuishimba. (Lom. 3:23; Shak. 3:2) Pangi bikitshino biaye bibaadi bikufitshishe munda. We mulombene kuiyipusha’shi: ‘Bino bibakitshi uno mukuetu, mbinyibinyi tui mu ndumbuluilo Efile Mukulu?’ Bino nyi abikumiina Satana’shi tunangushene. (2 Kod. 2:11) Kunangushena mu uno mushindo wi bubi bino, nkulombene kuitutakula mu kuiabulushena na Yehowa na ndumbuluilo aaye. Abitungu tuikale badimukie tala tuekala na bino binangu bi bubi. w22.11 20 ¶1, 3; 21 ¶4

Yehowa mmuitupe lukulupilo lui buwa bukile lua muwa wa ikalayika. Bangi abakulupila nkashaala muiyilu bua looso, bu bipangua bia mu kikudi bishabifu. (1 Kod. 15:​50, 53) Be bungi naamu abakulupila nkashaala pa nsenga bua looso na mbidi ipuidikie na muloo. (Kibaf. 21:​3, 4) Sunga tua tengiela muwa wa looso muiyilu sunga pa nsenga, lukulupilo luetu lui buwa bukile. Tui balombene kushinkamisha’shi lukulupilo luetu lua mafuku aafiki alukalombana muanda alufiki kui Yehowa. (Lom. 15:13) Atuuku kiadi muitule, na atuuku dingi’shi alombashaa misuusa yooso milayilo yaaye. (Mb. 23:19) Tui bashinkamishe’shi Yehowa e na bintu bioso bibidi, lukalo na bukome bua kulombasha kintu kioso kiadi muakule bua kukita. Nshetu e muiyilu muitufule na akumiina’shi tukulupile muadi. Nsaa ainyingi lukulupilo luetu mui Yehowa, atuikala na ngobesha ya kunyingiila nkalakashi yeetu ya kano kabidi na ya mu mafuku aafiki n’eshimba dinyingie na muloo. w22.10 24 ¶1-3

Ku muanda bantu babaadi abapele kumuteemesha, Yeshaya baadi mutemukie’shi Yehowa akebalekiela bakiengie. (Yesh. 30:​5, 17; Yel. 25:​8-11) Na baadi muakule dingi’shi, abakebakuata bende nabo mu bupika mu Babilone. Anka sunga mbiabia, kubaadi bangi babaadi na lulamato munkatshi mua bena Yuda. Na Yeshaya baadi muibalungule’shi dingi efuku, Yehowa akebakumiina na ebalushe bakashale dingi mu Yelusaleme. (Yesh. 30:​18, 19) Bibakitshikile nka bino, Yehowa baadi muibafungushe kui bena Babilone. Anka kubakidile bipua bi bungi kumpala kua’shi Yehowa ebatushe mu bupika. Uno muaku “Yehowa atengiela na luishinko looso bua nkulesha kalolo,” aulesha’shi nkulombene kukila nsaa i bungi kumpala kua’shi Yehowa apaashe bafubi baye basha lulamato. Biabia bena Isaleele babaadi bakishe bipua 70, mu bupika mu Babilone kumpala kuashi balekiele bangi balukile mu Yelusaleme. (Yesh. 10:21; Yel. 29:10) Nsaa ibadi bena Isaleele mu bupika mu Babilone, babaadi abadidi muanda wa makienga. Anka nsaa ibabalukile mu kibundi kiabo, babadidile, muanda babaadi na muloo ukata. w22.11 9 ¶4

Lelo uno, mu bibundi bi bungi bakuetu balume na bakashi bakuete kufumankana na mianda, ibaadi batumibua banyingiile mu siekele a kumpala, nsaa ibaabadi abebabingabinga bua kulambukisha kua mukandu wi buwa pabitale Yesu. Misuusa i bungi, bansushi ba mu kadimbo kakata ka bena Yuda “babebatosheshe bwa’shi tabaakulanga mwishina dya Yesu.” (Bik. 4:18; 5:​27, 28, 40, Kilombeeno Kipya 2014) Anka babaadi abawuku’shi kui muntu kampanda sha matalua e kunundu ‘muibatumine eyi diabadia kulungula mukandu wi buwa kui bantu na kutuula bu kamonyi’ pabitale Kidishitu. (Bik. 10:42) Biabia, bano bana balume babaadi abalesha mpala ya bena Kidishitu, Mpiele na Yowano, babaadi baakule n’eshimba dinyingie’shi abitungu kukookiela Efile Mukulu pe kukookiela bansushi, na babakuile’shi ta mbalombene kuimika kuakula pabitale Yesu. (Bik. 5:29) Kunyima kua’bo kukupilua bua kulama kululama kuabo, batumibua babatukile mu kadimbo ka kunundu ka bena Yuda, na “kusepeela pa mwanda wa kwikala babadikwe bu bakumbeene mpombo ya buufu pa mwanda w’eshina dyaye [Yesu],” na babatungunukile nka na kulungula mukandu wi buwa!—Bik. 5:​41, 42. w22.10 12-13 ¶2-4

Abipushika’shi, nsaa y’atubanga kulonga pabitale Yehowa, atulongo nka penda malongiesha a kitako a mu Bible. Mu mukanda waye kui bena Ebelu, Mpoolo mutumibua bakuile bua malongiesha a kitako bu “myanda ya ku kibangilo.” Ta baadi abepuula “ndambukisho ya ku kibangilo” nya. Anka, baadi eyipuandikisha na mabeele abapeya bana. (Eb. 5:12; 6:​1, EEM) Baadi munyingishe dingi bena Kidishitu booso buabadia kutungunuka na kulonga malongiesha a kitako na kulonga ngofu bia binyibinyi bia Muiyi di’Efile Mukulu. Obe namu we mutamishe lukalo lua kulonga malongiesha a mu Bible a kitako su? Okumiinaa kutungunuka na kutama, bua kutungunuka na kulonga pabitale Yehowa na mpango yaye su? Bua be bungi ba kuatudi, abibekeelaa lukalakashi bua kulonga. Opushaa naminyi pabitale kulonga? Ku kalaasa, we mulongie bia kuibadikila na bia kuilongiela kalolo su? Osankila kulonga na kupusha’shi okuete kuuka mianda i bungi p’olongo? Sunga’shi, we mushinkamishe’shi t’olongaa kalolo mu mikanda? Su mbiabia, tue bupenka’be. Biabia, Yehowa mmulombene nkukuasha. Aye mmupuidikie na mmuikale Mulongieshi e buwa kukila booso. w23.03 9-10 ¶8-10

Su tui bepeeleshe atutadiila Eyi di’Efile Mukulu dimene mishi mu mashimba eetu. Nka su tubalekie kinangu kia kubepuula, kikudi kia kuitatula, ngi patulekie malongiesha a mu Bible pabitale lusa, na kifulo bikale na bukitshishi mu nshalelo eetu. Mushindo w’atukitshiina bangi mianda ngulombene kulesha’shi, tukuete kutadiila Eyi di’Efile Mukulu di tukunkushe. Pa muanda wa’shi Bafadiseo ta babaadi batadiile Eyi di’Efile Mukulu bua’shi dikale na bukitshishi mu mashimba aabo, nyi buakinyi babaadi ‘abatshibila bantu bashii na kilema kiimu.’ (Mat. 12:​7, Kilombeeno Kipya 2014) Mu mushindo umune, mushindo watukitshina bangi mianda aulesha su tukuete kutadiila Eyi di’Efile Mukulu dikale na bukitshishi kuatudi. Bu kileshesho, atuikalaa na bukidi bua kuakula pabitale ngikashi i buwa y’atumono mui bangi, su atuikalaa penda na bukidi bua kuakula bilubilo biabo? Atuikala na bukidi bua kufuidishena lusa, su atuipulaa bangi na kuibalamiina nsungu bua ka kilubilo kabadi betukitshine? Kuitaluula mu uno mushindo nkulombene kulesha su tukuete kutadiila biatubadika bikale na bukitshishi mu binangu bietu, biatuipusha, na mu bikitshino bietu.—1 Tim. 4:​12, 15; Eb. 4:12. w23.02 12 ¶13-14

Tutaleyi kileshesho kia Yosefe a ku Arimatiya. Babaadi abamuneemeka ngofu kui bena Yuda. Baadi muina Sanedrine a ku kadimbo kakata ka bena Yuda. Biabia, mu kipungo kibaadi Yesu alambukisha mukandu wi buwa pa nsenga, Yosefe ta baadi n’eshimba dinyingie nya. Yowano bambile’shi: “Yosefe a ku Arimatiya, baadi mulongi a Yesu, mu bufiefie pa mwanda wa kutshiina beena Yuda.” (Yo. 19:​38, Kilombeeno Kipya 2014) Sunga mbibaadi Yosefe muipaane ngofu ku mukandu wa Bufumu, baadi afuama bangi bua’shi ta bawukanga’shi mmukumiine mui Yesu. Kushi mpaka, baadi na moo wa’shi bantu ta mbalombenenyi kumuneemeka ngofu su babawuku’shi mmulongi a Yesu. Anka, Bible etulungula’shi kunyima kua lufu lua Yesu, Yosefe ‘baapetele eshimba dinyingie naa aye nkutweela kwa Pilaato bwa kuteka kitanda kya Yesu.’ (Mak. 15:​42, 43) Yosefe ta baadi muifuamishe dingi’shi mmulongi a Yesu nya. We na moo wa bantu bu bibaadi nao Yosefe su? w23.01 30 ¶13-14

Mfumu mukashi a ku Sheba baadi mupushe abakula pabitale butaale na bintu bungi bibabaadi abasankila kui muilo wa Isaleele nsaa ibaadi Solomonyi bu Mfumu. Uno mfumu mukashi baadi mukatukie ku nsenga i kula, baadi mukite luendo lui bula enda ku Yelusalema bua nkemuena mianda ibaadi ikitshikie aye nabene. (1 Bf. 10:1) Kunyima kuaye kuimuena mianda ibaadi mu bufumu bua Solomonyi, bakuile mayi e mu kifundue kietu kia lelo. Anka buwa bubaadi nshalelo mu bukunkushi bua Solomonyi, nyi nkileshesho kia mianda yabakitshina bantu kui Yehowa mu bukunkushi bua Muanaye Yesu. Yesu mmukata kukila Solomonyi mu mishindo ibungi. Solomonyi baadi muntu shi mupuidikie, baadi akitshi bilubilo bibungi nsaa ibaadi atshibi biimu. Bino bibaadi bifuishe mpa na lukalakashi munkatshi mua muilo w’Efile Mukulu. Ku lungi lupese, Yesu Mukunkushi mupuidikie, shakitaa bilubilo. (Luk. 1:32; Eb. 4:​14, 15) Yesu baadi muleshe’shi t’anakite muluisho efuku su ndimune. Sunga kukita kingi kintu biadi mulombene kuluishisha bantu baye basha lulamato. Tui na muabi ukata wa kuikala naye bu Mfumuetu. w22.12 11 ¶9-10

Abitungu tukite kinyi nsaa ayituuku kipupa kia luambu kipalakane mbalo yatudi bashaale? Abitungu tukookiele buludiki bua mbulamatadi bu bua kuitumpa meema ku maboko, kuikala kula-kula na bangi bantu, kufuala maske, na kushaala mu nshibo. Su tubakitshi ino mianda, atulesha’shi tui na lutumbu lukata bua kia buntu ki’Efile Mukulu kia muwa. Nsaa ayituuku kipupa, kui mianda ya madimi ayipalakanaa kui ba kuuku betu, bankungishanyi netu, na ku Internete. Pa mutue pa kukumiina ku “byooso byaabamba” bi’atupusha, abitungu tuteemeshe mianda y’eyendo ayitukila kui mbulamatadi na kui ba munganga. (Nki. 14:15) Kasaka ka Bakunkushi-Bakulu na ma biro a filiale, abekitshishaa buabadia kupeta mianda ya binyibinyi kumpala kua kutuusha buludiki pabitale bisangilo bia kakongie na mudimo wetu wa bulungudi. Pa kulonda buno buludiki, atuikaluila atue banabene na kukaluila bangi ku masaku. Tui balombene kunyiisha kutamisha nkumo i buwa ya kakongie kui bangi bantu.—1 Mp. 2:12. w23.02 23 ¶11-12

Nsaa ibatuelele bena Isaleele mu Nsenga ya Mulayilo, babaadi bashaale mu tubibundi tuilekeenelekeene. Bena Isaleele babaadi bashaale mu diadia eumbo dimune, babaadi balombene kuleka midimo yabo mu kudila kulonda bangi bena Isaleele babaadi bashaale mu bingi bipindi bi’eumbo. Anka Yehowa baadi muate mpango ya’shi, bena Isaleele bekale abebungu pamune mu mishindo ilekeenelekeene bua kuteemesha Eyi diaye difundibue, na kuibapatuluila. (Miy. 31:​10-12; Ne. 8:​2, 8, 18) Banda kunangushena bibaadi abipusha bena Isaleele baasha lulamato, pabaabadi abafiki ku Yelusaleme na kumona pangi midiyo ya bangi balanguidi nabo abafiki mu bingi bipindi bia muiwumbo diabo! P’aye kukita bino, Yehowa baadi akuasha muilo waye buawudia kushaala mu buumune. Kunyima, nsaa ibabakitshiine kakongie ka bena Kidishitu, mubaadi bana bakashi na bana balume abakula ndimi ilekeenelekeene, bangi babaadi balongie ngofu, bamo babaadi beyishe, bangi namu babaadi ba mpeta, na bangi babaadi balanda. Anka babaadi mu buumune mu kulanguila ku’Efile Mukulu a binyibinyi. Baaba booso babafikile balanguidi, babaadi balombene kupusha Eyi di’Efile Mukulu ku bukuashi bua balanguidi nabo, na pa kuibunga nabo pamune.—Bik. 2:42; 8:​30, 31. w23.02 3 ¶7   

Yehowa etulaa’shi baba boso abamukokiela abakapete “mmuuwa wa iikalaika.” (Lom. 6:23) Su tubanangushena ku bintu biabakuete kuitupa kui Yehowa, kifulo kietu kuadi akinyisha kutama. Banda kunangushena pabitale uno muanda: Nshetu a muiyilu mmuitufule ngofu, biatushi balombene kuiabuula naaye. Mulayilo w’Efile Mukulu wa muwa wa ikalaika awitukuasha bua kunyingiila nkalakashi yetu i bukopo. Sunga beshikuanyi neetu bakieba kuituipa, tatulekie kufubila Yehowa. Buakinyi? Kabingilo kamune nka’shi, atuuku’shi su tubafu na lulamato kui Yehowa aketusangula ku lufu na kuitupa lukulupilo lua muwa wa losoo, na kushi kufua dingi. (Yo. 5:​28, 29; 1 Kod. 15:​55-58; Eb. 2:15) Atuuku’shi Yehowa mulombene kuitulama na muwa bua losoo, muanda aye nyi Nsulo ya muwa, na e kuanka bua losoo. (Mis. 36:9) Bible etushinkamiisha’shi Yehowa ekalaa nka kuanka bua losoo na akekala kuanka bua losoo.—Mis. 90:2; 102:​12, 24, 27. w22.12 2 ¶1-3

Bu biatudi bafubi ba Yehowa, ta tui balombene kukaanya nsaa y’atufumankana na nkalakashi i bukopo. Atuuku’shi, Bible amba’shi: “Twi na kya kukidila mu mpombo ibungi bwa kutwela mu Bufumu bw’Efile Mukulu.” (Bik. 14:22) Atuuku dingi’shi ingi nkalakashi yetu yooso, ayikapuididiila p’atukatuele mu nsenga ipia y’Efile Mukulu, muamua, “lufu talwanakeekale kwanka nya, na takukeekala su mmaalo, su nkudila, su ndikyenga.” (Kibaf. 21:4) Yehowa, tetukaluilaa ku nkalakashi yooso nya. Anka, etukuashaa bua kunyingiila yanka. Lamiina kibaadi Mpoolo mutumibua mulungule bena Kidishitu babaadi bashaale mu Loma. Kia kumpala, baadi mutemune bungi bua bitompuanga bibaabadi bapete, aye na bakuabo. Bafundile’shi: “Anka mu aa malwa ooso, twi na ngobesha mwi yawa betufuule kifulo.” (Lom. 8:​36, 37) Bino abipushisha’shi Yehowa, mmulombene nkukuasha sunga nsaa yodi munkatshi mua nkalakashi i bukopo bodia koobesha. w23.01 14 ¶1-2