Mueshi wa 3

Mpyele mutumibua baadi munyingishe bakuetu bua kufubisha kia buntu na ngobesha yoso yabaadi nayo bua kunyingisha bena Kidishitu naabo. Mpyele bafundile’shi: “Bu bikale’shi ese akwanudi mmutambule bya buntu kui Efile Mukulu, bibuwa akwashe bena Kidishitu nê byabya anukekala balondi bebuwa bwa bya buntu bilekenelekene binupe Efile Mukulu.” (1 Mp. 4:​10, EEM) Abitungu tukite muetu moso bua kufubisha bia buntu bietu kushi kuikalakasha’shi tala bangi bakuata kiutu sunga kutshoboloka. Anka abitungu tudimukie, bua kupela kuitatula pa muanda wabio. (1 Kod. 4:6) Tutentekiesheyi’shi ngobesha yoso yatudi balombene kuikala nayo, mbia buntu abifiki kui Efile Mukulu. Abitungu tufubishe bino bia buntu bua kunyingisha kakongie kushi bua buwa buetu’tue banabene. (Fid. 2:3) Nsaa yatufubisha bukome buetu na ngobesha bua kukita kikiebe ki’eshimba di’Efile Mukulu, atuikala na kabingilo ka kuikala na muloo kushi pa muanda wa’shi atukitshi bi bungi kukila bangi sunga’shi tui buwa kuibakila, kadi mpa muanda wa’shi atukumiina kufubisha bia buntu bietu bua kutumbisha Yehowa. w22.04 11-12 ¶7-9

Yesu baadi mufule Bifundue Biselele, na bibaadi epusha mbebileshe mu mayi a butemuki atupete mu Misambo 40:9 aamba’shi: ‘Efile ande, nasangala kukita byabya byokyebe, miiya yoobe ii mwishimba dyande.’ Pa muanda wa’shi Yesu baadi mufule Bifundue, baadi na muloo na baadi moobeshe kufubila Yehowa. N’atue namu tui kuikala na muloo na koobesha su atuikitshisha bua kulekiela Eyi di’Efile Mukulu dituele mu mashimba eetu. (Mis. 1:​1-3) Mu kuipushena na mayi a Yesu na bileshesho, tutaleeyi bia kulumbuula mayele eetu a kubadika Bible. Tui kulumbuula mpushiisho eetu a Bifundue bia mu Bible pa kuela luteko, kubadika n’eyi diikie, kuiela nkonko, na kufunda mianda i na muulo. Tui kufubisha lushinguluilo pa kutaluula kalolo mianda y’atubadika, na bukuashi bua mikanda yeetu ayakuila Bible. Na tui balombene kutadiila Eyi di’Efile Mukulu bua’shi dikale na bukitshishi kuatudi, pa kulama kinangu ki buwa nsaa y’atuidibadika. Su tubekitshisha bua kukita ino mianda yooso, atukapete bukuashi bua mu kuibadikila kua Bible, na atukefubuila peepi na Yehowa.—Mis. 119:17; Shak. 4:8. w23.02 13 ¶15-16

Sangula mayele kampanda okumiina kulonga na kita mianda kampanda bodia kulombasha kepatshila koobe. We kuibikita mushindo kinyi? Puandikisha’shi okumiina kulongamisha ngobesha yoobe ya kulongiesha. We mulombene kuilongiela broshire a Epaane mu kubadika na kulongyesha. Su abakupa muisambo mu bisangilo munkatshi mua lubingo, we mulombene kuipusha mukuetu auku kulongiesha kalolo, bua’shi akutemeshe kumpala kodia nkakita wawa muisambo mu bisangilo, na akulungule ma mbalo aatungushi olumbuule. Lumbuula muisambo obe kumpala kua nsaa bilombene’shi bantu bamona biokuete kuitatshisha na’shi we muntu akukulupila. (2 Kod. 8:22) We mulombene kukita naminyi su kepatshila koobe nkakukita mayele kampanda aamuekaa bu e bukopo koodi? Tokookanga! Timote baadi mufikie muntu auku kukita miisambo kalolo na kulongiesha kalolo naminyi? Bible te biakula nya. Anka, kushi mpaka Timote baadi muende kumpala ngofu mu kulombasha kua mashito aye, pa kulonda elango dia Mpoolo.—2 Tim. 3:10. w22.04 24-25 ¶8-11

Mitue musambobidi ya nyema a bukielo nkinyi? Atumono’shi uno nyema a bukielo, kebungi akambaa kumueneka bu ngye, mikoolo yaye bu urse, na kukanua kuaye bu ntambue, na e na nsengua ekumi. Nyema yoso inanka yabadi baleshe mu mukanda ya Ndanyele shapitre 7 i nka na bino bintu bimune bifuaneene. Mu mukanda wa Kibafumbwilwe bino bintu bioso atuibipete ku nyema umune kushi ku nyema ya bukielo inanka ilekeene. Uno nyema umune a bukielo, t’alesha penda guvernema umune sunga penda ampire umune a mu nsenga nya. Na dingi Yowano baadi muleshe’shi, abamupeele matalua a kumunana “pa bisaamba bioso na miilo na ndjimi na maumbo.” Biabia mmulombene kuikala bukata kukila ma guvernema ooso a maumbo. (Kibaf. 13:​7, Kilombeeno Kipya 2014) Uno nyema a bukielo dingi, mmulombene kulesha makome ooso a politike abaadi amunane kubanga kasha muntu bekeele kuanka mpaa na bu lelo. (Mul. 8:9) Kui bishinkamiisho bi bungi abilesha’shi kishima ekumi, abekifubisha mu Bible bua kulesha kintu kilombane. w22.05 9 ¶6

Mbanyi abakapete ino miabi yoso i buno buwa? Ba kumpala, nyi nkibumbu kikata akikapanda ku ngoshi ya Armagedone, na muana ooso akatandikua mu nsenga ipia. Anka mukanda wa Kibafumbwilwe shapitre 20 ngule dingi’shi bafue, abakasanguka. (Kibaf. 20:​11-13) Bantu “balulame” batababafuile kubanga ku kala, na bantu “bashii balulame”—bashibapetele mushindo wabadia kulonga pabitale Yehowa—booso abakapete dingi muwa pano pa nsenga. (Bik. 24:15; Yo. 5:​28, 29) Bino, abilesha’shi mmuntu ooso abakasangula mu kumunana kua bipua kinunu su? Nya. Baaba booso bantu babi babaadi bapele mushindo ubaabadi bebape bua kufubila Yehowa kumpala kua’shi bafue, t’abakebasangula bua’shi bapete dingi muwa nya. Tabaki na mushindo’nyi na mbaleshe’shi ta mbalombene’nyi kupeta muwa mu mpaladiiso pa nsenga nya.—Mat. 25:46; 2 Tes. 1:9; Kibaf. 17:8; 20:15. w22.05 18 ¶16-17

Ku bukuashi bua “mpika a lulamato na mudimukie,” Yesu Kidishitu mmukite ndumbuluilo amueka na meeso pano pa nsenga bua kukuatshishena lulanguilo lui selele. (Mat. 24:45) Opushaa namu naminyi pabitale uno ndumbuluilo? Mu kualuula, pangi we kunangushena ku mayi a Mpiele mutumibua abaadi mulungule Yesu, mayi e mu kifundue kietu kia lelo. Nkunyi kubaadia kuikadika ooso a kuatudi lelo uno su ta tui bafikie mu kutuela mu ndumbuluilo a Yehowa? Kukiila kuadi, Kidishitu mmushinkamishe’shi tukuete kudishibua mu kikudi kalolo. Dingi kuete etulongiesha biatudia kukita mudimo wetu wa mukandu wi buwa kalolo. Biabia, kuete etukuasha buatudia kufuala “muntu mupia,” yawa asankisha Yehowa. (Ef. 4:24) Yesu kuete atusha buludiki bui buwa mu bipungo bi na nkalakashi. Bukuashi bua buno buludiki, mbumuekie patooka mu kipungo kia kipupa kia Corona-Virus. Sunga be bungi mu ino nsenga t’abaukanga kiabadi balombene kukita, Yesu mmushinkamishe’shi tui bapete malango e buwa bukile bua kuikaluila ku mbidi yetu. w22.07 12 ¶13-14

Yehowa baadi mulungule bakulu ba mu Isaleele, buabadia kulongiesha bana baabo pabimutale nsaa yoso. (Miy. 6:​6, 7) Baaba ba nambutuile, abaadi na mishindo i bungi kuifuku yabadia kuisamba na bana baabo, na kuibakuasha buabadia kufula Yehowa mu mashimba aabo. Bu kileshesho, nsongualume a mu Isaleele, baadi mulombene kukisha nsaa i bungi na nshaye mu kuwumbula kua biumbuluanga na kuibituala. Nsonguakashi namu, baadi mulombene kukisha nsaa i bungi na nyinaye kuifuku, mu kutela bilamba, mu kuanya nyene, na mu kukita ingi midimo ya mu nshibo. Bu bibaadi ba nambutuile abafubu pamune na bana, abaadi balombene kuisamba miisambo i bungi i na muulo. Bu kileshesho, abaadi balombene kuisambila pabitale ngikashi ya Yehowa ya kalolo na kutaluula mushindo wa kuete kukuashanga kifuko. Mu maumbo e bungi, ba nambutuile na bana ta mbalombene kukisha nsaa pamune muifuku nya. Ba nambutuile be kuikadika pangi ku mudimo, na bana namu be kuikadika pangi ku kalasa. Biabia, abitungu ba nambutuile bekitshishe bua kupeta nsaa, yabadi balombene kuisamba na bana baabo.—Ef. 5:​15, 16. w22.05 28 ¶10-11

Kukita miluisho ikata, kuimumune na kuipaa miya y’Efile Mukulu. Su muina Kidishitu bakitshi muluisho wi biabia, abitungu atekie Yehowa lusa mu luteko, kubaapu ende akalungule bakulu ba mu kakongie. (Mis. 32:5; Shak. 5:14) Mbushito kinyi buinabo bakulu? Nka penda Yehowa ngi e na matalua a kuitufuila lusa ku miluisho mu mushindo upuidikie, na bino ebikitaa ku bukuashi bua mulambu wa nkuulo. Anka Yehowa, ngi mupe bakulu bushito bua kuata kitshibilo akimeena mu Bifundue pabitale yawa nkitshishi a bubi su mulombene kushaala mu kakongie. (1 Kod. 5:12) Bua kulombasha uno mudimo, abekitshisha bua kupeta ngaluulo ku ino nkonko ayilondo: Ekeele muate mpango kumpala bua kukita uno muluisho su? Ta bakitshine dingi uno muluisho wadi mukite takudi mafuku e bungi su? Muanda wi na muulo ukata, kui kishinkamiisho akileesha’shi muilangie kuishimba mu binyibinyi su? Kui mianda ayilesha’shi Yehowa mupue kumufuila lusa su?—Bik. 3:19. w22.06 9 ¶4

Yesu baadi mulungule balongi baaye buabadia kukimba kululama. (Mat. 5:6) Bino abipushisha’shi abitungu muntu ekale na lukalo lukata lua kukita kiakia kilulame, ki buwa, na kitookane ku meeso ku’Efile Mukulu. We mufule bia binyibinyi na kululama su? Tui bashinkamishe’shi we muibifule. We mushikue madimi na mianda yooso i bubi na buntomboshi. (Mis. 119:​128, 163) Madimi aalesha bumuntu bua Satana mukunkushi a ino nsenga. (Yo. 8:44; 12:31) Kamune ka ku tuipatshila tua Satana nka kusabulusha eshina dia kishila dia Yehowa Efile Mukulu. Satana tababangile kupalakasha madimi pabitale Efile Mukulu kubanga nka pa batombokiele muifuba dia Edene. Aleshaa Yehowa, bu muikumiine aye nabene, na bu Mukunkushi shii mululame, mufie bantu ki buwa. (Kib. 3:​1, 4, 5) Madimi a Satana pabitale Yehowa, akuete kutungunuka na kuluisha binangu bia bantu na mashimba aabo. Nsaa ayisangula bantu bua kupela ‘kufula bya binyibinyi,’ Satana ngi kuete kuibakunkusha mu binangu biabo bioso bua kukutua kululama na kuikala na muikeelo wi bubi.—Lom. 1:​25-31. w23.03 2 ¶3

Pangi okuete kuikitshisha ngofu, bua kuimika kukita ingi mianda y’ouku’shi i bubi, anka ingi nsaa otungunukaa nka na kuiyikita. Pangi we kubanga kukutua luishinko na kuinyongola pa muanda wa’shi omono’shi kepatshila koobe t’akalombana. Nkinyi akikakukuasha bua kunyingiila? Nyi eyikashi di na muulo ukata, kifulo bua Yehowa. Kifulo kiobe bua Yehowa nyi eyikashi di buwa bukile, bi buwa wekale nadio. (Nki. 3:​3-6) Kunyingisha kifulo bu’Efile Mukulu nkulombene nkukuasha bodia koobesha kunyingiila nkalakashi y’ofumankana naayo mu nshalelo oobe. Bible alesha dingi bi Yehowa na kifulo ki na lulamato bua bafubi baye. Kifulo ki na lulamato akipushisha’shi, tanaasumbushene bafubi baye sunga kuleka kuibafula. Tui bapangibue ku kimfuanyi ki’Efile. (Kib. 1:26) Mbikunyi biodi mulombene kulesha kino kifulo. Tubangie na lutumbu. (1 Tes. 5:18) Efuku dioso, eyipushe obe nabene’shi: ‘Yehowa mmundeshe kifulo mushindo kinyi?’ Na dingi, ikala mushinkamishe’shi otumbulaa Yehowa mu nteko yobe, na kuteemuna bintu kampanda biadi mupue nkukitshiina. Uuka’shi Yehowa mmukukitshiine mianda i bungi i buwa pa bupenka muanda mmukufule. w23.03 12 ¶17-19

Yesu baadi akitshiina batumibua booso ekumi na babidi, mianda na kalolo na kifulo. Bino abitulongiesha kinyi? Abitulongiesha’shi, ki na muulo ukata, ta mbiabia abikitshi bangi nya, kadi mmushindo w’atukitshi pabitale bilubilo biabo na kukutua kuabo kua kupuidika. Nsaa ayituluishisha muina Kidishitu netu, abitungu tuiyipushe atue banabene’shi: ‘Buakinyi biabia bibakitshi bi bamfiitshisha munda ngofu? Bino abilesha kubofula kampanda kuandi nako akutungu’shi ndumbuule su? Uno muntu bamfiitshisha munda, e na mianda ayimukalakasha su? Su ne na kabingilo ke buwa ka kumufiitshila munda, ne kumulesha kifulo na kumufuila lusa su?’ Biabia su tubanyisha kukitshina bangi mianda na kifulo, atunyisha kulesha’shi tui balongi ba Yesu ba binyibinyi. Kileshesho kia Yesu akitulongiesha dingi buatudia kuikitshisha bua kuuka bakuetu bena Kidishitu kalolo. (Nki. 20:5) Anka Yesu auku bi mu mashimba. Anka atue t’atuuku bi mu mashimba nya. Ngi buakinyi abitungu tuikale na luishinko kui bakuetu balume na bakashi nsaa ya betuluishisha. (Ef. 4:​1, 2; 1 Mp. 3:8) Abikala bitubofuile su tubalongo pabitale ma mbalo abadi bakudile. w23.03 30 ¶14-16

Munganga sunga mungi muina kifuko shii mulanguidi a Yehowa, mmulombene kuitukitshisha pa bukopo buatudia kukumiina’shi betuele mase, aku bino nkuipa muiya w’Efile Mukulu. Mungi muntu, mmulombene kutompa kuitukuminyisha ungi mushindo wa kubukiibua wikutuene na mayi a kulonda a mu Bible. Sunga biatush’atukumiinaa lufu, atuuku’shi Yehowa t’analekie kuitufula nya sunga tuafua. (Lom. 8:​37-39) Nsaa ayifu bakuuku ba Yehowa, abashaalaa mu binangu biaye nka bu bakii na muwa. (Luk. 20:37) Akumiina kebabusha dingi bua kuibapa muwa. (Yob. 14:15) Yehowa baadi mutuushe kintu ki na muulo ukata bua’shi tuikale “na muwa wa iikalayika.” (Yo. 3:16) Atuuku mushindo wi bukata bui kifulo kia Yehowa kuatudi na bi’etupasukilaa. Pamutue pa kusumbusheena Yehowa nsaa yatudi na mukumbo sunga yabakiebe kuituipaa, tui balombene kukulupila kuadi buatudia kupeta kunyingishibua, binangu, na bukome.—Mis. 41:3. w22.06 18 ¶16-17

Bible amba’shi: “Kutshina Yehowa, mbangilo a binangu. Na kuuka Eselele akupaanaa lushinguluilo.” (Nki. 9:​10, NWT) Biabia, nsaa yatukiebe kuata kitshibilo ki na muulo, abitungu tunangushene bi binangu bia Yehowa. “Na kuuka Eselele mukile booso” akuitukuasha bua kuata bitshibilo bibuwa. Tui balombene kuibikita p’atuilongiela Bible na mikanda yetu ayipatuula Bible. Patuibikitshi atulesha binangu bia binyibinyi. (Nki. 2:​5-7) Nka penda Yehowa ngi mulombene kuitupa binangu bia binyibinyi. (Lom. 16:27) Buakinyi aye ngi Nsulo ya binangu? Kia kumpala, bu biadi Mupangi, e na kiukilo kishi na mfudiilo na auku bipangua biaye bioso. (Mis. 104:24) Kia kabidi, bikitshino bioso bia Yehowa, abilesha bi binangu biaye. (Lom. 11:33) Kia kasatu, elango dia binangu bia Yehowa adikuashaa misuusa yooso booso abeditumikila. (Nki. 2:​10-12) Su atukumiina kuikala na binangu bia binyibinyi, abitungu tukumiine bia binyibinyi bia kitako, na kuibitadiila bua’shi bitukunkushe mu bitshibilo na mu bikitshiino bietu. w22.10 19 ¶3-4

Satana baadi mutshokolue, bu bibaabadi bapue kutemuka mu mukanda wa Kibafumbwilwe 12, aye na ba Demo baye, babaadi basumbulue pano pa nsenga. Bu kipeta, “malwa pa nsenga.” Muanda Satana e na nsungu i bungi, na kuete alu na bantu ngoshi. (Kibaf. 12:​7-12, Kilombeeno Kipya 2014) Ano matemuki ooso ngalombene kuitukuasha naminyi? Kui mianda i bungi ikata ikuete kukitshika mu nsenga ishintule binangu bia bantu ilombene kuitukuasha buatudia kutundula’shi, Yesu bayikeele Mfumu. Biabia kasha bayikeele bu Mfumu atumono bikitshino bia bantu bia butomboshi na biakuikumiina abo banabene, bino abitutentekiesha’shi bikitshino biabo bikuete kulombasha butemuki bua mu Bible. Eyondo Bufumu bukuete kumunana! (Mis. 37:1) Na atumono bantu biabanyinsha kuinyongola mu uno ndumbuluilo bu bikuete kuifubuila Armagedone peepi. (Mak. 13:8; 2 Tim. 3:13) Tui na lutumbo lukata lua’shi Nshetu e muiyilu sha kifulo mmuitukuashe buatudia kupusha buakinyi kui nkalakashi i bungi mu uno ndumbuluilo. w22.07 3-4 ¶7-8

Tui balombene kuteka Yehowa bua balanguidi neetu bua’shi ebakuashe bamone bia kunyingiila mikumbo, masaku aatukila ku bintu bipangibue, ngoshi, kubinguabingua, na ingi nkalakashi. Tui balombene kuteka dingi, bua bakuetu balume na bakashi bakuete kufuba ngofu bua kukuasha bantu be mu lukalo. Pangi we mulombene kuiwuka bangi bakuetu bakuete kufumankananga na ingi nkalakashi. Nsaa y’otekie obe nabene, we mulombene kutemuna mashina aabo mu luteko loobe. Atulesha kifulo kikata bua bakuetu p’atutekie Yehowa bua’shi ebakuashe bua kunyingiila. Baaba booso bakuete kukunkusha mu tukongie, be na lutumbu lukata bua nteko ya bangi, na ikuete kuibakuasha. Mpoolo mutumibua baadi muukie’shi e mu lukalo lua’shi bangi namu bamutekiele. Bafundile’shi: “Ikalai anuntekyela ami namu bilombêne Efile Mukulu ampa bya kwakula, nsâ yankyebe kwakula byandja kwiûkisha bantu kushi mô mukandu wi buwa ubádi mwanda ufibwe.” (Ef. 6:​19, EEM) Na lelo uno namu, tui na bakuetu balume be bungi bakuete kufuba ngofu abakunkusha munkatshi muetu. Atuibalesha kifulo p’atutekie Yehowa bua’shi ebeelele miabi ku mifubo yabo. w22.07 23-24 ¶14-16

Musalayi baadi afuala kifulu. Mu ngoshi yetu ya mu kikudi, abitungu tukaluile binangu bietu ku buluishi bua Satana. Kuete kuitutumina bitompuanga na binangu bi bubi, bua kuluisha binangu bietu. Anka bibaadi kifulu akilama mutue wa musalayi, lukulupilo luetu lukuete kulama binangu bietu, buatudia kushaala na lulamato kui Yehowa. Su lukulupilo luetu luabofula, tui kubanga kunangushena nka penda pabitale nkalo yetu, na tui kuiluankana kepatshila keetu ka muwa wa ikalayika. Tubandeyi kutala ungi muanda pabitale bangi bena Kidishitu, babaadi bashaale mu kibundi kia mu Kodinda. Babaadi bashimishe lukumiino luabo, lubaadi na muulo mu milayilo y’Efile Mukulu, lukulupilo lua lusangukilo. (1 Kod. 15:12) Mpoolo baadi mufunde’shi baaba booso bashina lukulupilo mu lusangukilo, be na nshalelo a penda kusankisha nkalo yabo. (1 Kod. 15:32) Lelo uno, bantu be bungi bashina lukulupilo mu milayilo y’Efile Mukulu, nshalelo aabo e nka ku kiakia kiabamono na meeso, na abakisha nsaa i bungi nka ku bisepeelua. Anka atue tui belekeene naabo, muanda tui batuule lukulupilo luetu mu milayilo y’Efile Mukulu bua mafuku aafiki. w22.10 25-26 ¶8-9

Yehowa akumiina’shi omutekie. Yehowa kuete amono mianda yokuete kunyingiila, na akushinkamiisha’shi ateemesha nteko yoobe nsaa yoso. Ekalaa na muloo p’ateemesha bafubi baye. (Nki. 15:8) Nkinyi kiodi mulombene kuteka nsaa yuepusha bu e bupenka? Funguila Yehowa eshimba diobe. (Mis. 62:8) Mulungule mianda yoobe na mushindo wayikukalakasha. Teka Yehowa akukuashe, bua’shi oukie kiodi mulombene kukita pu’epusha bu e bupenka na akupe eshimba dinyingie diodi nadio lukalo bua kuakula. We mulombene kuteka Yehowa, binangu bua’shi opatuule bi lukumiino loobe na kaneemo. (Luk. 21:​14, 15) Su okuete kulua na binangu bi bubi, teka Yehowa akukuashe bodia kulungula muina Kidishitu munyingie mu kikudi pabitale uno muanda. Teka Yehowa akukuashe opete muntu odia kulungula, akuteemesha. Na omone mushindo waluula ku nteko yoobe na okumiine bukuashi bua bangi, biabia tokamba kuipusha bu be e bupenka nya. w22.08 10 ¶6

Kakongie kapia ka mu Tesalonika kabapetele buluishi bui bukopo. Kisaka kia bantu babaadi abebabingabinga kibayile na ‘bangi bakuetu kui bamfumu ba kibundji.’ (Bik. 17:6) We mulombene kunangushena moo ubaadi bano bena Kidishitu baki bapia bapushe? Kisumi kiabo kia kufubila Yehowa kibaadi kilombene kupeela, anka Mpoolo mutumibua ta baadi akumiina’shi bino bikitshikie nya. Babaadi bashinkamishe’shi abapasukila bena kakongie baki bapia kalolo. Mpoolo baadi mutentekieshe bena Tesalonika’shi: “Atwe atwinutumina Timote, aye mukwetu, . . . bwa kwinukankamika na kwinunyingisha kwishimba mu lukumiino lwenu, bwa’shi muntu su ngumune tabofulanga munkatshy’a bitompwanga.” (1 Tes. 3:​2, 3) Timote baadi mumone mushindo ubaadi Mpoolo munyingishe bakuabo mu Listre. Bu bibaadi mumone bipeta bibaadi Yehowa mutushe, Timote baadi mushinkamiishe bakuabo balume na bakashi bapia’shi n’abo namu mianda ayibayila kalolo.—Bik. 14:​8, 19-22; Eb. 12:2. w22.08 21 ¶4

Ku mfudiilo kua siekele a 19, kasaka ka balongi ba Bible kabaadi akakunkushibua na mukuetu Charles Taze Russell, kababangile kutamisha kulonga kuabo kua Bifundue. Babaadi abakumiina kuuka bia binyibinyi pabitale akipushisha mulambu wa nkuulo ya Yesu na mushindo wa kutentekiesha lufu lua Yesu. Lelo uno tukuete kupeta bukuashi bua mianda ibaabadi bakimbuule. Mu mushindo kinyi? Tui na mushindo wa kupusha akilesha mulambu wa nkuulo ya Yesu na ki’auketukitshina na ki’aukakitshina bangi bantu booso. (1 Yo. 2:​1, 2) Tui balongie dingi’shi, Bible etupa nkulupilo ibidi bua bantu abasankisha Efile Mukulu, bashaabakafu dingi abakashaala muiyilu. Na bua bangi bantu abakapete muwa wa ikalaika pa nsenga. Atuifubuila kui Yehowa nsaa y’atutaluula mushindo wadi muitufule na mushindo w’atupete miabi pa bupenka ku bukuashi bua mulambu wa nkuulo ya Yesu. (1 Mp. 3:18) Biabia nka bu bangi bakuetu baasha lulamato ba mu mafuku a kala, atuitanyinaa bangi bantu buabadia kuibunga neetu bua kukita Kitentekiesho kia lufu lua Yesu muyile bibakuile Yesu. w23.01 21 ¶6-7

Yesu baadi alongiesha bantu pabitale miabi y’abakafuisha kui Bufumu bu’Efile Mukulu. Tui na lutumbu lukata bua nkuulo muanda ibetufunguila eshinda dia kuikala mu kipuano ki buwa na Yehowa na Yesu. Baaba booso abalesha lukumiino mui Yesu, abekala na lukulupilo lua kushaala bua losoo na kumona dingi bakuabo babadi bafule babafuile. (Yo. 5:​28, 29; Lom. 6:23) Ta tui bakite kintu su nkimune buatudia kupeta ino miabi. Ta tui na kintu su nkimune kiatudia kufuta Efile Mukulu na Kidishitu, bua bioso biabadi betukitshiine. (Lom. 5:​8, 20, 21) Anka kietu kiatudia kuibaluisha mpenda lutumbu. Mushindo kinyi? Pa kufubisha nsaa yetu, bukome buetu, na makuta eetu bua kukuatshishena mudimo wa Bufumu. Bu kileshesho tui kuipaana bua kukuasha ku mudimo wa luibako na wa kulumbuula mashibo a lulanguilo luiselele. w23.01 26 ¶3; 28 ¶5

Bano bakunkushi, ba Bufumu bw’Efile Mukulu abakakuasha bua kukaluila bantu midiyala abakashala mu nsenga ishima. Nka bu Yesu, bantu 144000, abakafubu bu ba mfumu na bu batshite-muakuidi. (Kibaf. 5:10) Nsaa ibaadi bena Isaleele abakokiela muiya wa Moyise, kia kumpala, batshite-muakuidi babaadi abebakuasha buabadia kushaala na mbidi bukome, na kushaala mu kipuano kibuwa na Yehowa. Muiya ubaadi bu ‘muesheshe wa bintu bibuwa abikafiki.’ Abipushika kalolo’shi, baaba abakamunana pamune na Yesu abakekala na mudimo wi pabuao wa kukaluila bantu ku mbidi na ku nkalo ya mu kikudi ya muilo w’Efile Mukulu. (Eb. 10:1) Atutengiela bua kumona mushindo aukekala bano ba mfumu na batshite-muakuidi abepushena na bena Bufumu bw’Efile Mukulu be pa nsenga. Biabia muyile mpango ya Yehowa, tui balombene kushinkamisha’shi mu Mpaladiiso afiki, boso be pa Nsenga abakapete bukunkushi buabadi nabo lukalo.—Kibaf. 21:​3, 4. w22.12 11 ¶11-13

Kabingilo kamune ka buakinyi atuitanyinaa bangi buabadia kufika batuela neetu ku Kitentekiesho nka’shi, atukumiina booso abatuele neetu bua musuusa wa kumpala, balongie bia binyibinyi pabitale Yehowa na Yesu bua biabadi betukitshine booso buetu. (Yo. 3:16) Tui bakulupile’shi biabia bi’abamono na bi’abapusha ku Kitentekiesho abibatakula bua kulonga bi bungi bua’shi bafikie namu nabo bafubi ba Yehowa. Atuitanyinaa dingi baaba balekie kufubila Yehowa takudi mafuku e bungi. Atukitaa bino pa kuibatentekiesha’shi Efile Mukulu ki nka muibafule. Be bungi abakumiinaa ku luitamino luetu, atuikalaa na muloo bua kuibamona dingi. Kutuela mu Kitentekiesho akuibatentekieshaa mushindo ubaabadi basankile kufubila Yehowa mu mafuku a kala. (Mis. 103:​1-4) Biabia, sunga bantu bakumiina ku luitamino luetu sunga kukutua kukumiina, atuikitshishaa na muetu mooso bua kuitanyina bangi ku Kitentekiesho, atuiwuku’shi Yehowa ekalakashaa bua muntu ooso emutuele, pa bupenka.—Luk. 15:7; 1 Tim. 2:​3, 4. w23.01 20 ¶1; 22-23 ¶9-11

Bufuku kumpala kua’shi afue, Yesu baadi muele luteko lui pabualo kui Nshaye e muiyilu. Batekiele Yehowa bua’shi alame balongi baaye. (Yo. 17:​15, 20) Biabia, Yehowa atalaa, apasukilaa na kulama muilo waye. Biabia Yesu baadi muukie’shi balongi baaye abakafumankana na buluishi bukata, abutukila kui Satana. Yesu baadi muukie dingi’shi, be na lukalo na bukuashi bua Yehowa buabadia kukambila buluishi bui bubi bua Diabulu. Mu ino nsenga yabakuete kukunkusha kui Satana, mui nkalakashi i bungi ikuete kufuila bena Kidishitu ba binyibinyi lelo uno. Tukuete kupeta nkalakashi ilekeenelekeene ilombene kuitutshobolosha na kutompa lulamato luetu kui Yehowa. Anka, t’atutshinyi kintu su nkimune, Yehowa kuete kuitumona atue booso. Amonaa nkalakashi yatukuete kufumankana nayo, na akumiina kuitukuasha buatudia kuiyinyingiila. Binyibinyi, Yehowa “atalaa baaba booso abamutshinyi . . . na kuibapaasha.”—Mis. 33:​18-20, NWT. w22.08 8 ¶1-2

Ku kipua kioso, mu kipungo kia Kitentekiesho atuleshaa lutumbu luetu bua bioso biabadi bakite kui Yesu, pa kuata nsaa ya kunangushena mu luteko ku akipushisha lufu luaye kuatudi. Atunyingisha dingi bantu be bungi pakudi mushindo, buabadia kuibunga neetu mu diadia efuku di pabuadio. Tui na kitshibilo kia kupela kulekiela kintu su nkimune kietukitshishua kutuela mu Kitentekiesho. Ku Kitentekiesho, atulongaa buakinyi bantu be na lukalo na nkuulo na mushindo wi lufu lua muntu umune ndushimishe miluisho ya bantu be bungi. Na atutentekieshaa akilesha mukate na nfinyo na benyi balombene kudia na kutoma. (Luk. 22:​19, 20) Na atunangushenaa ku lukulupilo lui buwa bukile, lui kuanka bua baaba booso be na lukulupilo lua kushaala pa nsenga bua losoo. (Yesh. 35:​5, 6; 65:​17, 21-23) Ta tui balombene kuata bino bia binyibinyi bu kitungo ki na Efile Mukulu kuatudi. w23.01 20 ¶2; 21 ¶4

P’aye kutuusha Muana aye a kifulo, bu nkuulo bua kubuikiila miluisho yetu, Efile Mukulu baadi muitupe dingi mushindo wa kupeta muwa wa ikalaika. (Mat. 20:28) Mpoolo mutumibua bafundile’shi: “Mwanda, bu bii lufu lutuukile kwi muntu umune, kwi muntu umune akutuukila kusanguka kwa bafwe. Abifu bantu booso ku mwanda wa Adame, booso abapetela muuwa mwi Kidishitu.” (1 Kod. 15:​21, 22) Yesu balunguile balongi baaye’shi batekie bua’shi Bufumu bu’Efile Mukulu bufikie, na’shi kikiebe ki’eshimba di’Efile Mukulu kikitshikie pa nsenga. (Mat. 6:​9, 10) Imune ya ku mpango y’Efile Mukulu ngia’shi bantu bashaale pa nsenga bua losoo. Bua kulombasha ino mpango, Yehowa baadi mutuule Muana aye Mesiya bu Mfumu a Bufumu buaye. Efile Mukulu mmusangule bantu 144000 pa nsenga, buabadia nkafuba pamune na Yesu, bua kulombasha kikiebe ki’eshimba ki’Efile Mukulu.—Kibaf. 5:​9, 10. w22.12 5 ¶11-12

Nsaa ayifu muntu atudi bafule, atupushaa bushiye bukile! Ku mbangilo tui kupusha kenyongoshi ngofu bikishekishe su yawa mukuetu atudi bafule akienganga kumpala kua kufua. Kunyima, tui kupusha dingi muloo nsaa y’atunangushena pabitale kintu kampanda kibaadi mukite, sunga muakule bua kuitunyingisha sunga bua kuitusepesha. Mu mushindo umune, atupushaa bi bubi ngofu nsaa y’atunangushena pabitale mushindo ubaadi Yesu mukiengie na kufua. Mu kipungo kia Kitentekiesho, atuataa nsaa bikishekishe ya kunangushena pabitale akipatuula mulambu wa nkuulo ya Yesu. (1 Kod. 11:​24, 25) Biabia, atupetaa muloo ukata p’atunangushena pabitale bioso bibaadi Yesu muakule na mukite pabaadi pa nsenga. Mbilombene dingi kuitunyingisha nsaa y’atunangushena pabitale ki’akuete kukita kubanga binobino na ki’akakitshi mu mafuku aafiki. w23.01 26 ¶1-2

Balongi babaadi bapushe bubi ngofu nsaa ibafuile Yesu. Ta babaadi abapusha penda bi bubi muanda wa’shi babashimisha kuuku aabo abadi bafule nya, anka babaadi abepusha dingi bi bubi muanda babashimisha lukulupilo luabo. (Luk. 24:​17-21) Biabia, nsaa ibaadi Yesu muibamuekiele, baadi mukimbe nsaa ya kuibakuasha buabadia kupusha mudimo waye mu kulombasha kua matemuki a mu Bible. Baadi muibape dingi mudimo wi na muulo wa kukita. (Luk. 24:​26, 27, 45-48) Nsaa ibaadi Yesu mukaamine muiyilu, balongi baye babaadi abapusha bi bubi, babaadi bapetuule dingi muloo ukata. Babaadi na muloo ukata muanda babaadi abawuku’shi, Yesu e na muwa na’shi ebakuasha buabadia kulombasha mudimo wadi muibape. Muloo wabo ubaadi wibatakule bua kutumbisha Yehowa kushi kukooka. (Luk. 24:​52, 53; Bik. 5:42) Bua kuambula balongi ba Yesu abitutekie bua kutuula Bufumu bu’Efile Mukulu pa mbalo ya kumpala mu nshalelo eetu. Ngi buakinyi abitungu tutungunukie na kunyingiila bua kufuba. Yehowa mmuitulee miabi i bungi su tubatungunuka na kuibikita.—Nki. 10:22. w23.01 30-31 ¶15-16

T’atukumiina kukita kilubilo ki mumune na kibaabadi bakite kui Adame na Eva nya. Tui balombene kukutua kukita kino kilubilo, su tubatungunuka na kulonga pabitale Yehowa, kulesha lutumbu bua ngikashi yaye, na kuikitshisha bua kupusha mushindo waye wa nangushenaa. Su tubakitshi bino, kifulo kietu bua Yehowa akinyisha kutama. Nangushena pabitale Abrahame. Baadi mufule Yehowa ngofu. Sunga nsaa ibaabidi bukopo buaye bua kupusha bi bitshibilo bia Yehowa, Abrahame ta baadi mutombokie. Pa mutue a biabia, baadi ekitshisha bua kuuka Yehowa kalolo. Bu kileshesho, nsaa ibaukile bi kitshibilo kia Yehowa kia kubutula Sodome na Gomoore, Abrahame bapushiishe kia kumpala moo wa’shi, “nsushi a boso ba pa nsenga” ta mulombene kubutula balulame na bantu be bubi. Bua Abrahame, baadi mumone bu bishi bilombene kukitshika, na kuiyisha kooso belele Yehowa nkonko i bungi. Yehowa bamualuluile na kuiyisha kooso. Ku mfudiilo, Abrahame bafikile mu kumona’shi, Yehowa atalaa mashimba a bantu booso, na ta mulombene kubutula bantu bashi basole muanda, nsaa y’abutula bantu be bubi.—Kib. 18:​20-32, EEM. w22.08 28 ¶9-10

Mu kipua kia 455 K.B.B., kunyima kua Guvernere Neemiya kuibakuula mudimba wa Yelusaleeme, baadi mukimbe bantu bakukulupila balombene kukaluila kibundi kalolo. Neemiya basanguile bantu, munkatshi mua baaba bantu batudile Hanania bu mfumu a kibundi kinyingishue. Bible alesha Hanania bu “muntu akukulupilua anêmeka Efile Mukulu kukila bangi be bungi.” (Ne. 7:​2, EEM) Kifulo bua Yehowa na kutshiina’shi tala akutua kumusankisha, kubaadi kutakule Hanania buadia kuata mudimo ooso w’abamupa wawa na muulo. Ino ngikashi yoso ayitukuasha buatudia kuikala bantu ba kukulupilua mu mudimo w’Efile Mukulu eetu. Tala kileshesho kia Tishike, kuuku a Mpoolo mutumibua abaadi mukulupile. Mpoolo baadi mululupile mui Tishike, baadi muleshe’shi Tishike nyi “mufubi e kishima.” (Ef. 6:​21, 22, Kilombeeno Kipya 2014) Mpoolo baadi mukulupile muandi, kushi penda pa muanda wa’shi baadi atuadila bakuabo ba mu Efeso na mu Kolose mikanda, kadi baadi dingi ebanyingisha na kuibasamba. Tishike etutentekiesha bana balume be na kishima na ba kukulupila, bakuete kuitupasukila mu nkalo ya mu kikudi lelo uno.—Kol. 4:​7-9. w22.09 9-10 ¶5-6

Yosefe bapetele nkalakashi i bukopo pabalombeshe bipua 13. Yosefe baadi mulombene kuiyipusha su Yehowa mumufule binyibinyi. Na baadi mulombene kuiyipusha su Yehowa mumusumbushene nsaa ibaadi lukalo na bukuashi. Anka Yosefe tabaadi muibalamine nsungu. Anka, baadi muilame mu bintu bioso pa kushaala muumine. Nsaa ibaadi mupete mushindo wa kualuisha bakuabo bubi ku bubi, ntamuibikite nya baadi muibaleshe kifulo na aye nkuibafuila lusa. (Kib. 45:​4, 5) Yosefe baadi mukite bino muanda baadi na mushindo wa kunangushena kalolo. Anka pamutue pakutuula binangu biaye ku yaaya mianda, baadi munangushene pabitale akikumiina Yehowa. (Kib. 50:​19-21) Bino abitulongiesha kinyi? Su mbakuluishishe, tolaminga Yehowa nsungu, sunga kunangushena’shi mukusumbushene. Pamutue pa biabia, nangushena ku mushindo wadi mukukuashe bua kunyingiila lukalakashi. Dingi, nsaa ayikuluishisha bangi, ekitshishe bua kuibabuikidila bilubilo biabo na kifulo. w22.11 21 ¶4

Mutemuki Ndanyele bamuene bimonua bibamulesheshe’shi, Yehowa nsha matalua e kunundu a matalua ooso. Kimonua kia kumpala, Ndanyele bamuene nyema inanka ya bukielo, ayilesha mafumu a kala na a binobino a mu nsenga ishima. Aa mafumu ngano: Babilone, Mede na Perse, Bena Grèce, Bena Looma, na bukome bua nsenga ishima bukuete kumunana binobino bua Anglo-Américaine. (Nda. 7:​1-3, 17) Ndanyele bamuene dingi Yehowa Efile Mukulu, mmushaale pa lupuna-nsulu lua muiyilu. (Nda. 7:​9, 10) Efile Mukulu akaata matalua ooso a kumunana a bana ba bantu, akeape bangi be na matalua kuibakila. Mba nnanyi bakeapa? “Muntu umune e bu mwana a muntu” Yesu Kidishitu, na “beselele ba Efile Mukulu mukile boso” 144000 abakamunana “mafuku oso mpâ na ku ikalayika.” (Nda. 7:​13, 14, 18, EEM) Abimueka patooka’shi Yehowa ngi “Efile Mukulu mukile booso.” Muanda ubabamuene kui Ndanyele mu kimonua, aushinkamisha muanda ubaadi muakule kumpala’shi: ‘Efile Mukulu ee mwiyilu, akatushaa bamfumu na kutuula bangi.’—Nda. 2:​19-21, NWT. w22.10 14-15 ¶9-11