Mueshi wa 12

Muntu mukata a mu Etshopi baadi muilumbuule bua kubatshishibua su? Banda kunangushena: Muana mulume muin’Etshopi “bádi mufikye ku Yelusalema mu kulangwila Efile Mukulu.” (Bik. 8:​27, EEM) Kumpala baadi muntu a ingi miilo; ngi aye nkushintuluka nkufika muina Yuda. Kushi mpaka, baadi mulongie pabitale Yehowa mu Bifundue bi selele bia kina Ebelu. Biabia, baadi muilumbuule bua kulonga bi bungi. Biabia, Fidipe basangeene uno muntu mu kilayi baadi abadika mufungofungo ufundue butemuki bua Yeshaya. (Bik. 8:28) Baadi akumiina kutungunuka na kulonga mianda i bungi. Baadi akatuka mu Etshopi endanga mu kulanguila Yehowa ku ntempelo mu Yelusaleme. Muin’Etshopi baadi mulongie bingi bia binyibinyi bi na muulo kui Fidipe, mu biabia bia binyibinyi mubaadi mpaa na mushindo wa kutundula Mesiya. (Bik. 8:​34, 35) Kifulo kiaye bua Yehowa na bua Muana aaye kibatamine. Kifulo kiaye kibaadi kimutakule bua kuata kitshibilo ki na muulo mu nshalelo aaye, kia kubatshishibua bu mulongi a Yesu Kidishitu. Fidipe bamuene’shi uno muntu baadi muilumbuule bua kubatshishibua, na aye nkumubatshisha. w23.03 8-9 ¶3-6

Ta tui balombene kusankisha Yehowa su t’atuakula bia binyibinyi. (Nki. 6:​16, 17) Sunga bantu be bungi lelo uno abapuandikisha’shi madimi e buwa, atue tui beashikue muanda Yehowa amba’shi e bubi. (Mis. 15:​1, 2) Eyondo’shi t’atukumiina kuakula mianda ya madimi, anka dingi atupelaa kulungula bangi mianda ilombene kuibatakula bua kuikala na mueneno e bubi. Abitungu oshikue mianda ya tuipu. (Nki. 25:23; 2 Tes. 3:11) Su bomono’shi muisambo wenu ubashintuluka taudi bu tuipu, akula ungi muanda aunyingisha. Bu biatudi mu nsenga mui ngakuilo e bubi mupalakane, abitungu tuikitshishe bua kuikala na ngakuilo atumbisha Yehowa. Etuelela miabi nsaa yatuikitshisha bua kuikala na ngakuilo amutumbisha mu bulungudi, mu bisangilo, na mu miisambo yetu y’efuku dioso. Nsaa ayikafudiila bukitshishi bua uno ndumbuuilo a bantu bash’abafubila Yehowa, abikekala bibofule bua kutumbisha Yehowa na ngakuilo eetu.—Yu. 15. w22.04 9 ¶18-20

P’atutaluula mushindo witufule Yehowa na Yesu, abitutakula bua kuibafula namu n’abo. (1 Yo. 4:10) Atuibafulu ngofu nsaa y’atutundula’shi Yesu baadi mufue pa muanda wetu pa bupenka. Mpoolo mutumibua baadi auku uno muanda na baadi muleshe lutumbu luaye, nsaa ibaadi mufundile bena Ngalatea, amba’shi: “Mwan’Efile Mukulu, banfuule kifulo na bepeene aye nabene pa mwanda wande.” (Nga. 2:​20, Kilombeeno Kipya 2014) Pa muanda Yesu mmuitufuile, Yehowa mmulombene nkukaka kuadi bua kuikala kuuku aaye. (Yo. 6:44) T’opushaa muloo ukata muishimba diobe, pa kuuka’shi Yehowa amonaa mianda i buwa i moodi na eyataa na muulo biadi mulombene nkubadika bu kuuku aaye? T’abinyingishaa namu kifulo kiobe bua Yehowa na Yesu su? We kuiyipusha obe nabene’shi: ‘Kifulo akintakulaa bua kukita kinyi?’ Kifulo bu’Efile Mukulu na Kidishitu akitutakulaa bua kufula namu bangi.—2 Kod. 5:​14, 15; 6:​1, 2. w23.01 28 ¶6-7

Bible nyi nkiina mudimo ki na muulo akifubishaa Yehowa bua kukuasha muilo waye buawudia “kumufubila epampa n’epampa.” Yehowa baadi mufundishe bipindi bi bungi bia Bifundue mu uno mushindo, bua’shi bantu beyishe abebibadika bebipushe. (Luk. 10:21) Bantu be mbalo yooso bakuete kubadika Bible. Anka bantu beyishe ngi abamupushaa kalolo na kutumikila biamba. (2 Kod. 3:​15, 16) Tukuete kulonga bi binangu bia Yehowa mu Bible. Yehowa afubishaa Bifundue kushi penda bua kuitulongiesha mu kisaka, anka bua kuitulongiesha na kuitunyingisha pa bupenka. Atue booso tui balombene kupusha abitupasukilaa Yehowa pa bupenka, p’atubadika Eyi diaye. (Yesh. 30:21) Mmushindo kinyi aukukuashaa Bifundue nsaa y’obadika ma verse aamueneka bu akufundilue penda obe? Biabia, Bible kuete akumu mashimba a bantu midiyo. Mmushindo kinyi wi mianda ya mu Bible ayikukuasha ku nkalo yobe ya pa bupenka? Bino bi kukitshika muanda Mutuushe Bible mmuntu sha binangu kukila bantu booso muiyilu na pa nsenga.—2 Tim. 3:​16, 17. w23.02 4-5 ¶8-10

Atue bena Kidishitu ba binyibinyi tui bafule Yehowa ngofu. Atukumiina kupa Yehowa ki buwa kiatudi nakio mu mudimo waye. Anka bua kukita kioso akitungu mu mudimo wa Yehowa, abitungu tuate bipatshila, bu kuikala na ngikashi ya buina Kidishitu, kulonga mayele aakuasha, na kukimba mishindo ya kukuasha bangi. Buakinyi abitungu tuikale na lukalo lua kuenda kumpala mu kikudi? Kia kumpala, atukumiina kusangasha Nshetu sha kifulo e muiyilu. Yehowa ekala na muloo nsaa yamono atufubisha ngobesha yetu ngofu mu mudimo waye. Kia kabidi, atukumiina kuenda kumpala mu kikudi bua kumona mushindo wa kukuasha bakuetu balume na bakashi kalolo. (1 Tes. 4:​9, 10) Sunga tatudi na bipua bi bungi mu bia binyibinyi, abitungu’shi atue boso tuende kumpala mu kikudi. w22.04 22 ¶1-2

Bena politike booso ba mu ino nsenga abakalulukila uno Babilone Mukata, ampire a nsenga ishima a lulanguilo lua madimi. Bino bikitshiino abilesha mbangilo a mpombo ikata. Bino abikiebe kulesha’shi bantu be bungi abakafiki, buabadia kuata kitshibilo kia kubanga kufubila Yehowa su? Nya. Mu kuilekeena na biabia, mukanda wa Kibafumbwilwe shapitre 6 aulesha’shi mu kiakia kipungo ki bukopo, baaba booso bantu bash’abafubila Yehowa, abakakimbi kukaluilua kui bakata ba mbulamatadi na bakata ba busunga ba mu ino ndumbuluilo, babadi bapuandikishe na miengie. Bu bano booso bantu biabash’abakakuatshishena Bufumu bu’Efile Mukulu, Yehowa akebamono bu beshikuanyi n’aye. (Luk. 11:23; Kibaf. 6:​15-17) Eyendo’shi, bafubi ba Yehowa baasha lulamato, abakashaala bu bantu belekeene na bangi mu kipungo ki bukopo kia mpombo ikata. Nka penda abo, ngi abakashaala kisaka kia muilo wi pa nsenga aufubila Yehowa Efile Mukulu, na aupele kukuatshishena ‘nyema a bukielo.’—Kibaf. 13:​14-17. w22.05 16-17 ¶8-9

Ta nka penda “mukandu wibuwa wa Bufumu” ngi mukandu umune wabakuete kulungula kui muilo w’Efile Mukulu nya. (Mat. 24:14) Bakuete kukuatshishena dingi mudimo wa ba mikeyilu wabadi baleshe mu Kibafumbwilwe shapitre 8 na mu shapitre a 10. Bano ba mikeyilu abalesha mulongo wa malua aakuata bano booso abapele mukandu wibuwa wa Bufumu bu’Efile Mukulu. Nyi buakinyi ba Temue ba Yehowa bakuete kulungula mukandu wa kiimu, wi bu “mabwe a kaalo” abilesha mukandu wa kiimu ki’Efile Mukulu kui bintu bilekeenelekeene bia mu ndubuluilo e bubi a Satana. (Kibaf. 8:​7, 13) Bantu be na lukalo lua kuuka’shi mfudiilo tayidi peepi buabadia kumona bua kushintuula nshalelo aabo bamone biabadia kupanda kuifuku dia nsungu ya Yehowa. (Sef. 2:​2, 3) Anka uno mukandu ta mbantu booso bakuete kuiukumiina nya. Muanda abitungu tuikale n’eshimba dinyingie buatudia kumona bia kulungula bangi pabitale uno mukandu. Mu kipungo kia mpombo ikata mukandu wa kiimu kia mfudiilo aukapa bantu nsungu i bungi.—Kibaf. 16:21. w22.05 7 ¶18-19

Bi mumune nsaa ayifiki bena Kidishitu beyibakishene, bu ba nambutuile. Munda a bipua bi bungi, abapushaa miisambo i bungi ayakuila bia kukusha bana. Anka binobino, aa ooso malango abafiki na muulo ukile kuabadi. Abakealungula muana aabo’bo banabene. Nyi mbushito bukata! Mu binyibinyi, nshalelo mupia ashintulaa mpushisho eetu a kiukilo ki buwa kia mayi a kulonda a mu Bible. Kano ngi kabingilo kamune ka bua kinyi balanguidi ba Yehowa ababadikaa Bifundue, na nka bu bibaabadi balungule bamfumu ba mu Isaleele bua kuibikita, na kunangushena ku bianka “mafuku ooso” a miuwa yabo. (Miy. 17:19) Ba nambutuile, nui na kingi kineemo kia ku bineemo bikata bi nabio bena Kidishitu, nyi nkineemo kia kulongiesha bana benu pabitale Yehowa. Anukumiina kuibikita ngofu nsaa y’anuibalongiesha mianda kampanda pabitale Efile Mukulu eetu. Anukumiina kukuasha bana benu buabadia kumufula ngofu. w22.05 26 ¶2-3

T’abitungu penda’shi tupushe kenyongoshi ka muanda sunga ka muluisho watuikalanga bakite nya. Abitungu dingi kushintuulaa muikeelo wetu. Ntentekieshi, ngi muanda wi na muulo ukata wabataluulaa kui Yehowa nsaa y’aata kitshibilo kia kuitufuila lusa. Ntentekieshi ayipushisha “kualukiila.” Mu ungi ngakuilo, abitungu muntu alekie kukita mianda i bubi, na ekale na nshalelo abakumiina kui Yehowa bua muilo waye. (Yesh. 55:7) Muntu mmulombene kushintula binangu biaye, nsaa y’akumiina kukunkushibua na binangu bia Yehowa. (Lom. 12:2; Ef. 4:23) Abitungu alekie bikitshino biaye bi bubi, na binangu biaye bi bubi. (Kol. 3:​7-9) Oolo, lukumiino luetu mu mulambu wa Kidishitu, ngi akikalaa bu kitako kia binyibinyi akikuasha Yehowa, bua’shi etufuile lusa na’shi etutooshe ku miluisho yeetu. Yehowa, aketufuila lusa ku miluisho yeetu ku bukuashi bua kineemo kia mulambu wa nkuulo, nsaa yetumono atuikitshisha ngofu buatudia kushintuluka mu muikeelo wetu.—1 Yo. 1:7. w22.06 6 ¶16-17

Kashaa nka Adame na Eeva babatombokiele Yehowa, bantu bakuete kukitshina bakuabo nka mianda i bubi. (Mul. 8:9) Bu kileshesho, bantu abafubisha matalua aabo bi bubi bua kukiengiesha bangi, abakitshi mianda ya buntomboshi na ya bibeshi, abatshinyisha, abakaa bena kalasa naabo na kuibatuuka ngoshi. Bangi bantu abakiengiesha bena kifuko naabo. Ta mbilombene kuitukaanyisha nsaa y’atumono bantu abatshinyi bantu naabo! Mmushindo kinyi ukuete kutompa Satana kufubisha moo wa bantu kuatudi? Satana kuete atompo kuitupa moo wa bantu bua’shi tuimikie mudimo wa bulungudi. Sunga kuleka kukita mianda y’abetulungula kui Yehowa’shi tuiyikite. Mu bukitshishi bua Satana ma guvernema ngemikie mudimo wetu wa bulungudi na akuete aetukiengiesha. (Luk. 21:12) Bintu bi bungi bia mu ndumbuluilo a Satana bikuete kupalakasha mianda ya madimi, abipalakashaa mianda ya madimi pabitale ba Temue ba Yehowa. Bantu bakuete kukumiina ku ino mianda ya madimi, bakuete kuitusepa, sunga kulua neetu ku mbidi. (Mat. 10:36) Ano mayele a Satana aetukaanyisha su? Nya. Baadi muiafubishe mu siekele a kumpala.—Bik. 5:​27, 28, 40. w22.06 16 ¶10-11

Mba nnanyi abakekala munkatshi mua “bebungi” babakatuala mu kululama? Nyi mbaaba booso abasanguka, mpaa na baaba booso abapanda ku ngoshi ya Armagedone, pamune na baana bakinga abakatandikua mu nsenga ipia. Ku mfudiilo kua bipua 1000, booso bashaale pa nsenga abakekala bapuidikie. Abitungu tutentekieshe’shi kuikala bantu bapuidikie t’akulesha’shi muntu bapate muwa wa ikalayika musuusa umune nya. Tunangushene bua Adama na Eva, babaadi bapuidikie, anka bibaadi abitungu baleshe’shi mbakokiele Yehowa Efile Mukulu kumpala kua kupeta muwa wa ikalayika. Anka bi malua, muanda babakutshilue kumukokiela. (Lom. 5:12) Atue booso abakashaala pa nsenga atukapuidika ku mfudiilo kua bipua 1000, bantu booso abakekala bapuidikie, abakakumiina kukuatshishena bukunkushi bua Yehowa losoo su? Su bangi abakekala bibaadi Adama na Eva sunga bibaabadi bapuidikie ntabashaale na lulamato? Abitungu kualuula ino nkooko yooso. w22.09 22-23 ¶12-14

Nsaa y’otala mianda ayikitshika mu nsenga, bi kuikadika bibofule bodia kushaala na mueneno e buwa su? Be na bifuko ta ba ki befulenenyi bibabidi kumpala nya. Bantu be bungi bakuete kunyishanga nka kufika bantomboshi, bekumiine abo banabene, na be bukielo. Bantu be bungi mbasangane’shi bino mbibekeele bukopo buabadia kukulupila mu baasha matalua. Anka, ino mianda yoso ngilombene nkupa kishinkamiisho. Buakinyi? Ku muanda bantu bakuete kukita nka bibaabadi bapue kuibitemuka ku matemuki atale “mafuku a kunfudiilo.” (2 Tim. 3:​1-5, Kilombeeno Kipya 2014) Bi bukopo bua muntu ooso mululame kuelesha mpaka’shi ano matemuki ooso ta ngalombane, muanda akuete kutuusha bishinkamiisho abilesha’shi, Yesu Kidishitu tababangile kumunana bu Mfumu a Bufumu bu’Efile Mukulu. Biabia, buno nyi mbutemuki bumune bua ku matemuki e bungi pabitale Bufumu bu’Efile Mukulu. Atukamono’shi ano matemuki e pamune, nka bu tupese tua foto tuabadi balungie bua kutuusha kinfuanyi kalolo, kia mianda ikata yabadi bapue kutshibila nsaa kui Yehowa. w22.07 2 ¶1-2   

Mu kipungo kia Corona-Virus, tuikeele bapete dingi buludiki abupushika kalolo pabitale bia kutuela mu bisangilo bia tukongie, na biakukita mudimo wa kulungula mukandu wi buwa. Kushi kunyengakana, tui babangie kutuela mu bisangilo bia bena Kidishitu, mu bikongeeno bi’efuku dimune, na mu bikongeeno bia mafuku asatu, ku bukuashi bua Internete. Tui babangie dingi kukita bulungudi ku bukuashi bua mikanda kufunda na bua telefone. Yehowa mmuelele kuikitshisha kuetu miabi. Ma filiale e bungi, ngatushe luapoolo alulesha kufuima kua bungi bua balungudi. Na dingi, be bungi mbapete kukankamishibua mu kino kipungo. Bangi mbafikie mpaa na mu kumona’shi, ndumbuluilo mmudimukie bikile pabitale kino kipupa. Ku nsaa na nsaa, tui bafikie mu kushinkamisha’shi buludiki buabadi betupe bui buwa bukile. Na p’atunangushena ku kifulo kiabadi baleshe kui Yesu kuete akunkusha muilo waye, abinyiisha kuitushinkamiisha’shi muanda ooso wa kuitukitshikila mu mafuku aafiki, Yehowa na Muana aaye a kifulo abakekala netu.—Eb. 13:​5, 6. w22.07 13 ¶15-16

Kukatusha kutumbisha Yehowa mu nteko yetu, abitutakula bua kumutumbula, bua bintu bi buwa biakuete etupa. Bu kileshesho, tui balombene kumutumbula, bua malangi e buwa atumonaa ku bilongo, na bua bidibua bilekeenelekeene bietupeyaa, na bua muloo w’atudi nao bua ba kuuku batudi bafule. Nshetu sha kifulo muitupe bino bintu, na bingi bi bungi bua nka penda’shi tuikale na muloo. (Mis. 104:​12-15, 24) Kintu ki na muulo ukata, atutumbulaa Yehowa bua bidibua bi bungi bia mu kikudi bia kuete etupa, na bua lukulupilo lui buwa bukile luatudi nalo bua mafuku aafiki. Mbilombene kuikadika bibofule buatudia kuiluankana kutumbula Yehowa, bua bioso bia kuete kuitukishina. Nkinyi kilombene kukuasha bua kutentekiesha? We mulombene kufunda milongo ya bintu biodi mutekie Yehowa, na kuiyitaluula ingi nsaa bua kumona mushindo ukualuule Yehowa ku yanka. Dingi ela luteko bua kumutumbula bua bukuashi buaye.—Kol. 3:15. w22.07 22 ¶8-9

Atuuku’shi t’abikalaa bibofule bua kuilongiela bia binyibinyi. Bua’shi bitukuashe ngofu, abitungu nshalelo eetu epushene na bia binyibinyi, kuamba’shi kutumikila bi’atulongo mu nshalelo eetu. Nka penda bia binyibinyi, ngi bilombene kuitutuadila muloo w’eyendo. (Shak. 1:25) Mmushindo kinyi watudi balombene kushinkamisha’shi nshalelo eetu mmuipushene na bia binyibinyi? Ungi mukuetu mulume atusha binangu biatudia kuitaluula atue banabene, bua kumona mbalo y’atukitshi mianda i buwa, na yatush’atukitshi mianda i buwa ayitungu kulumbuula. Mpoolo mutumibua bambile’shi: “Sunga tuekadika bapue kuenda kumpala, tutungunukieyi na kutambuka mu kipaso kilulame mu dino eshinda dimune.” (Fid. 3:​16, NWT) Banda kunangushena miabi y’atupetela mu kuikitshisha bua “kutambuka mu bya bînyibînyi”! T’abitungu tulumbuule penda ngikashi ya mu nshalelo eetu’tue banabene nya, anka abitungu dingi tusankishe Yehowa na bena Kidishitu netu. (Nki. 27:11; 3 Yo. 4, EEM) Mu binyibinyi, tui na tubingilo tui buwa tua kufula bia binyibinyi na kuikala na nshalelo muipushene nabio. w22.08 18-19 ¶16-18

Mmushindo kinyi ulombene kulesha bakulu’shi mbafule Yehowa na Yesu? Mushindo umune wi na muulo mpabapasukila mikooko ya Yesu i mu lukalo. (1 Mp. 5:​1, 2) Yesu baadi muleshe uno muanda kalolo kui Mpiele mutumibua. Kunyima kuaye kupela Yesu misuusa isatu, Mpiele bashadile na lukalo lukata lua kulesha’shi mmufule Yesu. Kunyima kua kusanguka kuaye, Yesu bayipuishe Mpiele’shi: “Simone mwana a Yowano, we mumfule su?” Tui balombene kushinkamisha’shi, Mpiele baadi mulombene kukita kintu kampanda bua kushinkamisha’shi mmufule Mfumu aaye. Yesu balunguile Mpiele’shi: “Diisha baana ba mikooko yande.” (Yo. 21:​15-17) Na mu muwa waye ooso, Mpiele baadi mupasukile mikooko ya Muanana na kalolo kooso, na kulesha’shi baadi mufule Yesu. Bakulu, mmushindo kinyi wanudi balombene kulesha’shi mayi a Yesu abalunguile Mpiele e na muulo kuanudi? Nui balombene kulesha’shi nui bafule Yehowa na Yesu ngofu, pa kuipaana mu kukunka mikooko, na kuikitshisha bua kukuasha babofule bua’shi balukiile kui Yehowa.—Es. 34:​11, 12. w23.01 29 ¶10-11

Kunangushena’shi ungi muntu ta mmulombene kupusha bukopo bua nkalakashi yankuete kufumankana nayo kui masaku. Kunangushena mu uno mushindo nkulombene nkutakula mu kunangushena’shi muanda oobe t’aupu, sunga’shi tue na bukome bua kukambila nkalo i bubi. Anka Bible t’amba biabia nya. Kadi amba’shi: “Ku kutompiibwa akalumbuula nfudiilo [aako] bianudia kumona bia kwikukambila.” Biabia, sunga lukalo lui bubi luamueneka bu lui bukopo ta tui balombene koobesha kuilukambila. Ku bukuashi bua Yehowa tui balombene kutungunuka na kunyingiila ino nkalo i bubi. Ikala otentekiesha efuku dioso’shi: Bu biodi muntu shi mupuidikie, tue mulombene kusuuka nkalo i bubi nya. Anka nsaa yatudi na nkalo i bubi, abitungu tuiyilekie kushi kunyengakana nka bibaadi bisuukie Yosefe kumpala kua mukashi a Potifare. (Kib. 39:12) T’abitungu’shi okookiele nkalo yobe i bubi bua kukita muanda wi bubi nya! w23.01 12-13 ¶16-17

Kululama nyi ndingi eyikashi dikata dia Yehowa. (Miy. 32:4) Kululama nkuipushene ngofu na kukutua kua ntondo, na Yehowa te na ntondo. (Bik. 10:​34, 35) Kukutua kuaye kua ntondo akumuekaa kalolo mu ndimi yaadi mufubishe bua kufundishisha Bible. Yehowa baadi mulee’shi mu kipungo kia mfudiilo, “kiukilo kya biinyibiinyi” akisanganyibua mu Bible “akitama.” Be bungi mbalombene kuikipusha. (Nda. 12:4) Mushindo umune aunyiisha kutama kiukilo mpa kualuula mikanda, kuiyituusha ku masaki, na kuabila Bible na mikanda ayipatuula Bible. Muilo wa Yehowa ngupue kukita mudimo ukata wa kualuula Eyi di’Efile Mukulu mu bushima sunga kipindi mu ndimi ikile pa 240, na muntu ooso mmulombene kumupeta kushii kutuusha makuta. Ngi buakinyi bantu ba miilo yooso bakuete kukumiina “mukandu wi buwa wa Bufumu” kumpala kua’shi mfudiilo ifikie. (Mat. 24:14) Efile Mukulu eetu sha kululama, akumiina’shi tukuashe bantu be bungi pa kuibapa mushindo wa kumuiwuka pa kubadika Eyi diaye. Ngi buakinyi mmuitufule atue booso ngofu. w23.02 5 ¶11-12

We mufule kululama su? Kushi mpaka we muikufule. Anka atue booso tui bakutue kupuidika, na su tatuibadimukie, mueneno a uno ndumbuluilo e bubi pabitale bululame, mbibofule bua’shi ekale na bukitshishi kuatudi. (Yesh. 5:20) Nsaa ayinangushena bantu pabitale muntu mululame, be bungi abapuandikisha’shi, yawa muntu e na nfiedi ikilekile, atshibilaa bangi biimu, na anangushena’shi aye nyi e buwa kukila bangi. Anka Efile Mukulu ta mufule ino ngikashi yooso nya. Nsaa ibaadi Yesu pa nsenga baadi mutopekie ngofu bakata ba bipuilo ba aa mafuku, muanda babaadi beele yabo miya pabitale kululama. (Mul. 7:16; Luk. 16:15) Muntu akitshi kiakia akiamba Yehowa’shi nkilulame, t’emonaa bu mukile bangi nya. Kululama nyi eyikashi di buwa bukile. Mu kuakula kua kalolo, akupushisha kukita, kiakia ki buwa ku meso kua Yehowa Efile Mukulu. Mu Bible, kishima kululama mbekiele na kinangu kia muntu e na nshalelo, muipushene na mayi a kulonda, mayi a kulonda a Yehowa. w22.08 27 ¶3-5

Yesu baadi mukulupile mui balongie baaye sunga mbibaabadi abakitshi bilubilo. (Yo. 15:16) Nsaa ibaadi Shake na Yowano batekie Yesu buabadia kuikala na mbalo ikata mu Bufumu, Yesu ta baadi muibepushe kibaadi kibatume bua kufubila Yehowa, sunga kuibakatusha bu batumibua nya. (Mak. 10:​35-40) Kunyima kua mafuku, balongi ba Yesu booso babaadi bamusumbushene bufuku nsaa ibaabadi bamukuate. (Mat. 26:56) Biabia, Yesu ta mushimishe lukulupilo muabadi. Baadi muukie kalolo kuushipuidika kuabo, baadi ‘mwibafule nyaa na ku nfudiilo.’ (Yo. 13:1) Yesu pabasangukile baadi mupe batumibua baaye 11 baasha lulamato, mudimo wi na muulo ukata wa kukunkusha mudimo wa kuikasha bantu bu balongi na kupasukila mikooko yaaye i na muulo. (Mat. 28:​19, 20; Yo. 21:​15-17) Baadi na tubingilo tui buwa, tua kukulupila bano bantu bashi bapuidikie. Booso buabo, babaadi bafube na lulamato mpaa na ku mfudiilo kua muwa wabo pa nsenga. Mu binyibinyi, Yesu, mmulekie kileshesho ki buwa kia kukulupila bantu bashi bapuidikie. w22.09 6 ¶12

Nsaa yatuikala bashinkamishe’shi Yehowa mmuitufule na kuete kuitukuatshisheena, Satana t’etukuatshisha moo nya. Bu kileshesho, mufundi a musambo wa 118 baadi mupete ingi mianda i bukopo. Baadi na beshikuanyi be bungi, mpaa na bangi bantu bakata (verse 9, 10). Ingi nsaa bino bioso bibaadi abimukalakasha ngofu (verse 13). Na dingi baadi mupete dinyooka dikata adifiki kui Yehowa (verse 18). Ngi buakinyi bibaadi bitakule kayimba ka misambo buadia kuyimba’shi: “Tantshiinyi kintu.” Baadi muukie’shi sunga mbibamunyokiele Yehowa, bu biadi Nshaye e muiyilu. Kayimba ka misambo kabaadi kashinkamishe’shi sunga apeta muanda kinyi, Efile Mukulu aaye sha kifulo e kuanka bua kumukuasha nsaa yoso. (Mis. 118:29) Abitungu tushinkamishe’shi, Yehowa mmuitufule pa bupenka. P’atuikala na kino kishinkamiisho, akiketukuasha buatudia kukambila ino mishindo isatu ya moo, (1) moo wa kukutua mushindo wa kupasukila nkalo ya mu kifuko kietu, (2) moo wa bantu, na (3) moo wa lufu. w22.06 15 ¶3-4

Abitungu tuikale bashinkamishe’shi kulanguila Yehowa kui pa mbalo ya kumpala mu nshalelo eetu. Yehowa ngi Muitupangie, ngi buakinyi abitungu tumulanguile. (Kibaf. 4:11; 14:​6, 7) Biabia abitungu tumulanguile mu mushindo waadi mukumiine “mu kikudi na mu binyibinyi.” (Yo. 4:​23, 24) Atukumiina’shi kikudi kiselele ki’Efile Mukulu, kitukunkushe mu lulanguilo luetu, bua’shi bikale bipushene na bia binyibinyi abisanganyibua Muiyi diaye. Lulanguilo luetu, abitungu luikadikie pa mbalo ya kumpala, sunga tuekala bashaale muiumbo muabadi bemikie mudimo wetu sunga kuiupela. Lelo uno bakuetu balume na bakashi bakile pa 100, bakuete kuedibua mu nkano penda muanda wa’shi Ntumonyi tua Yehowa. Sunga mbiabia, be na muloo, muanda be na mushindo wabadi balombene kuteka, kuilongiela, na kulungula bangi pabitale Efile Mukulu na Bufumu buaye! Nsaa yabetukiengiesha sunga kuitubingabinga, tui balombene kuikala na muloo wa kuuka’shi Yehowa e neetu na’shi aketufutu.—1 Mp. 4:14. w22.10 9 ¶13

Mu mukanda wa Nkindji, Yehowa etupeya malango aalumbuula nshalelo eetu p’atuiatumikila. Tutaleyi penda bileshesho bibidi bi’elango dia binangu. Kia kumpala, Sanka na biodi nabio. Nkindji 23:​4, 5 etupa dino elango adiamba’shi: ‘Tofumbakananga bwa kwikala na bupeta. Pa muanda mbumene mbaba, abupaapama kuiyilu buu kyonyi kya muumba.’ Anka ba mpeta be bungi, na balanda be bungi bakuete kuikalakasha ngofu bua kupeta makuta e bungi. Bino bikuete kuibatuadila nkalakashi ku nkumo yaabo, ku bipuano biabo, mpaa na ku mbidi yaabo. (Nki. 28:20; 1 Tim. 6:​9, 10) Kia kabidi, nangusheena kumpala a kuakula. Su ta tui badimukie tui balombene kukitshisha bubi bukata na bishima bietu. Nkindji 12:18 amba’shi: “Mbalo i mbalakashi i bu i mwele wa ngoshi. Anka ludjimi lwa baasha binangu nyi ndubuko lukata.” Atulama bipuano bibuwa nsaa yatulekie kuakula bangi mianda i bubi na bangi.—Nki. 20:19. w22.10 21 ¶14; 22 ¶16-17

Esekyele baadi na lukalo lua kupusha uno mukandu kalolo buadia kumona bia nkeulungula bangi. Baadi mulombene kukumiina uno mukandu, na ubadia kumutakula bua nkeulungula bangi. Na dingi kubadia kukitshika muanda wa kukaanya. Esekyele baadi mutundule’shi mufungofungo ‘ubaadi nsâsa mukanua nka bu bûki.’ (Es. 3:​3, EEM) Buakinyi? Muanda kulesha mpala ya Yehowa kubaadi bu kineemo kikata, bua Esekyele kibaadi bu nsaasa, akimusankisha sunga muanda ukata wadi mumone. (Mis. 19:​8-11) Baadi na lutumbu lukata muanda Yehowa baadi mumukumiine na kumufubisha bu mutemuki aaye. Kunyima Yehowa balunguile Esekyele’shi: “Tambula mwishimba dyoobe, teemesha na matwi oobe miaku yooso yankulungula.” (Es. 3:10) Ano malango abaabadi bape Esekyele kui Yehowa abaadi amukuashe, buadia kutentekiesha mianda yooso ibaadi ifunde mu mufungofungo na kunangushena pa yanka. Nsaa ibaadi Esekyele mukite bino, lukumiino luaye lubanyingile. Na dingi, bino bibamupeele bukome buadia nkalungula bantu uno mukandu. (Es. 3:11) Bu bibaadi na uno mukandu w’Efile Mukulu muishimba diaye na mukanua muaye, Esekyele baadi muilumbuule bua kubanga uno mudimo na kuiulombasha. w22.11 6 ¶12-14

Su kushintuluka kua mu ndumbuluilo kubatompo lulamato lobe, we kukita kinyi? Kuatshishena kushintuluka ku bamueka mu ndumbuluilo n’eshimba diobe dioso. Musango oso ubadi bena Isaleele abafiluka, bangi bena Kehate babaadi abatuala mushete wa kilombeno kumpala kua bantu boso. (Mb. 3:​29, 31; 10:33; Yos. 3:​2-4) Babaadi na kineemo kikata! Anka mianda ibaadi ibashintulukile nsaa ibaadi ifikie bena Isaleele mu Nsenga ya Mulayilo. Mushete wa kilombeno taubadi dingi na lukalo lua kuiufilusha nsaa yooso nya. Anka, bena Kehate babapetele ingi midimo. (1 Mya. 6:​31-33; 26:​1, 24) Takui mbalo su ngimune ayilesha’shi bena Kehate babaadi na kuidiladila, sunga kuteka’shi bebakumbashile ungi mudimo wi na muulo, muanda’shi babaadi na mudimo wi pa buawo kumpala. Bino abitulongiesha kinyi? Kuatshishena kushintuluka kua mu ndumbuluilo a Yehowa n’eshimba diobe dioso, mpa na kushintuluka kui na bukitshishi ku mudimo oobe. Ikala na muloo bua mudimo ooso wabadi bakupe. Tentekiesha’shi nta mudimo oobe aukuikasha na muulo kui Yehowa. Yehowa aata na muulo kukookiela koobe, kukila mudimo ooso wabadi bakupe. w22.11 23 ¶10-11

Biabia Onesifore bakimbile Mpoolo mutumibua, na nsaa ibamupetele bamukuashishe na biabia bibaadi nabio lukalo. Nsaa ibakitshine Onesifore bino, baadi mutuule muwa waye aye nabene mu masaku. Bino abitulongiesha kinyi? T’abitungu tutadiile moo wa bantu wabakuete kuitutshinyisha nao witukutshishue bua kukuatshishena bakuetu ba bakuete kubingabinga nya. Pamutue pa biabia, tuibakaluileyi na kuibakuasha. (Nki. 17:17) Be na lukalo na kifulo na bukuashi buetu. Tutaleyi bakuetu balume na bakashi ba mu Russie biabakuete kukuasha bakuabo abakuatshibua mu nkano. Nsaa i bangi mu nkalakashi, bakuetu balume na bakashi be bungi bakuete kuenda ku tumiladi bua nkebakuatshishena. Bino abitulongiesha kinyi? Nsaa y’abakuete kudimbiila, sunga kubingabinga bakuetu be na mashito, bino t’abitutshinyishanga. Ebatekiele, opasukile bifuko biabo, na okimbe ungi mushindo wa kuibalesha’shi webakuatshishena.—Bik. 12:5; 2 Kod. 1:​10, 11. w22.11 17 ¶11-12

Bakulu be na bushito bua kunyingisha bakuabo, na mianda ayitukila mu Bible, na kukuasha baaba booso be na tuinyongoshi. (1 Mp. 5:2) Nsaa yakudi masaku aatukila ku bintu bipangibue, kia kumpala abitungu bakulu bekale bashinkamishe’shi bakuetu balume na bakashi booso be na muwa, na’shi be na bidibua, bilamba, na mbalo ya kulaala. Anka mieshi i bungi kunyima kua masaku aatukila ku bintu bipangibue, baaba booso bapande mbalombene kuikala na lukalo lua bukuashi bua mu kikudi na bua mu binangu. (Yo. 21:15) Ungi mukuetu mulume afubaa mu Komite a Filiale, na mmufumankane na bakuetu be bungi balume na bakashi babaadi bapete masaku aatukila ku bintu bipangibue abetanyina bu Harold amba’shi: “Mbilombene kuata nsaa i bungi bua kulombasha ino nkalo yooso.” “Puebatembela mbalombene kubanga kuluba pabitale bakuabo babadi bashimishe, anka, p’abatentekiesha bakuabo bafue na bintu bi na muulo biabadi bashimishe, tuno tuinyongoshi ntulombene kuibalukiila dingi. Nsaa y’abatentekiesha bianka mbilombene kuibenyongosha dingi. Bino t’abilesha’shi muntu bashimisha lukumiino nya, muanda abifikilaa muntu ooso.” Bakulu abakokielaa dino elango adiamba’shi, “nudile na baaba bakwete kudila.”—Lom. 12:​15, Kilombeeno Kipya 2014. w22.12 22 ¶1; 24-25 ¶10-11

Bua kuitukuasha bua’shi tutshokole ngoshi bua kukita bi buwa, Yehowa etupeyaa kikudi kiaye kiselele na kalolo kooso. Nsaa y’atulongo Eyi di’Efile Mukulu, atukumiina’shi kikudi ki’Efile Mukulu kikale na bukitshishi kuatudi. Atupete dingi kikudi kiselele nsaa y’atutuele mu bisangilo bia kakongie. Nsaa y’atuibungu pamune na bano bakuetu bena Kidishitu, atukisha nsaa na bakuetu balume na bakashi be bu atue, na abekitshisha bua kukita mianda i buwa, na bino abitunyingisha. (Eb. 10:​24, 25; 13:7) Na dingi, nsaa y’atuifubuila kui Yehowa mu luteko alutukila muishimba dietu, na kumuisendeela bua’shi etukuashe bua kulua na kuno kubofula, aketupa kikudi kiaye kiselele akitunyingisha buatudia kutungunuka na kulua ngoshi na kuno kubofula. Sunga mbiabidi’shi kukita ino mianda yooso t’akukatusha ino nkalo i bubi, anka ayiketukuasha buatudia kukambila lukalo lua kuiyikita. Nsaa y’atubanga kukita mianda i buwa, ayitukuasha bua kuikala mu kipuano ki buwa na Yehowa, na dingi bi na muulo buatudia kulama biubishi bietu bi buwa na kutungunuka na kuikala na nkalo i buwa. w23.01 11 ¶13-14

Sunga Bible nta mukanda awakuila bia kupasukila mbidi yetu, sunga pabitale bidibua, awitulungula mianda i bungi pabitale mushindo aunangushenaa Yehowa pabitale bino bintu. Bu kileshesho, etupa elango adiamba’shi ‘twekakilanga kinyongwa’ bino mbilombene kuluisha mbidi yetu. (Mul. 11:​10, EEM) Bible amba’shi, ta tui balombene kudia bintu bikile bungi, sunga kutoma maalua e bungi muanda bino bintu mbilombene kuluisha mbidi yetu, sunga kuituipaa. (Nki. 23:20) Yehowa etutekie bua’shi tuikale na butontshi bua mbidi nsaa y’atuata bitshibilo pabitale mushindo w’atudi na w’atutomo. (1 Kod. 9:25) Tui kuata bitshibilo abilesha’shi tui na lutumbu bua kia buntu ki’Efile Mukulu kia muwa, pa kufubisha ngielelo eetu a binangu kalolo. (Mis. 119:​99, 100; Nki. 2:11) Bu kileshesho, tui balombene kulesha’shi atunangushena kalolo ku bi’atudi. Su tui bafule bingi bidibua, kadi atuuku’shi bi kuitupa maladi nsaa y’atuibidi, tui kufubisha binangu bimune biabia bua kupela kuibidia. Atulesha dingi’shi tukuete kupusha bi mu binangu bietu, nsaa y’atulaala tulo tui bungi, kukita kalashishi ka mbidi, kuikala na biubishi bi buwa bia mankenda, na kulama nshibo yetu itookie. w23.02 21 ¶6-7

Mushindo kinyi odia kupeta mabue a muulo a mu kikudi nsaa y’obadika Bible? Tala abiamba mukanda wa 2 Timote 3:​16, 17. Ino verse ayamba’shi: “bifundwe byooso, . . . mufubo wabyo ngwa kukwasha” bua (1)kulambukisha, (2)kukalashena bilubilo, (3)kulumbuula, na (4)kuyiyisha bantu mu bululame. Ino mianda inanka ayituukila mu Bible, ta ngilombene nkukuasha su tokuete kuiyifubisha. Taluula muanda bua’shi omone ki’aukulongiesha pabitale Yehowa, pabitale mpango yaye, na pabitale mayi a kulonda a Efile Mukulu. Taluula mushindo ulombene nkukuasha kukalashena bilubilo. Kita bino bua kumona mushindo aukukuasha ino verse bua kutundula na kusumbula bikitshino bi bubi sunga muikelo, na kushaala na lulamato kui Yehowa. Tala mushindo odi mulombene kufubisha Bifundue bua kulumbuula sunga kutopeka mueneno e bubi, pangi kui muntu kampanda opete mu mudimo wa bulungudi. Kimba ma verse aakulongiesha kululama, bodia kuikala na kinangu kia Yehowa. Su bolamina ino mianda inanka, ngilombene nkukuasha mu binangu, okapete mabue a mu kikudi alombene nkukuasha mu kuibadikila koobe kua Bible. w23.02 11 ¶11

Butemuki bui mu mukanda wa Ndanyele, bubapuile kutemuka’shi Yesu akabanga kumunana mu Bufumu buaye, ku mfudiilo kua bipungo musambobidi. Nyi mbibofule buatudia kuiwuka nsaa ibayikeele Yesu bu Mfumu. (Nda. 4:​10-17) “Bipungo musambobidi” abilesha kipungo kia bipua 2520. Kiakia kipungo kibaadi kibangie mu kipua kia 607 K.B.B., nsaa ibaadi bena Babilone bakatushe mfumu a mfudiilo abaabadi batuule kui Yehowa mu Yelusalema. Na kibaadi kifudiile mu kipua kia 1914 B.B., nsaa ibaadi Yehowa mutuule Yesu bu Mfumu sha “matalua,” a Bufumu bu’Efile Mukulu. (Es. 21:​25-27, NWT) Buno butemuki mbulombene kuitukuasha mushindo kinyi? Kuiwuka pabitale “bipungo musambobidi” akuitushinkamiisha’shi, Yehowa alombashaa milayilo yaye, pa nsaa ilombane. Nka bu bibaadi Yehowa muate kitshibilo kia kutuula Yesu bu Mfumu pa kipindi kilombane, yaya nsaa pabayilombene baadi muibikite. Biabia, atuukunyi’shi akalombasha angi matemuki ooso, pa kipindi kilombane kiadi mupue kutshiba. Eyondo, efuku dia Yehowa ‘tadiyisha nya!’—Aba. 2:​3, EEM. w22.07 3 ¶3-5