Mueshi wa 11

Muina Kidishitu ta mulombene kuikala na kasaabu. Anka kui mishindo ifuame ya kukaana mulomo ayitungu’shi tudimukile. Bu kileshesho, abitungu tuikale badimukie bua kupela kuakula bi bubi pabitale bantu be na bipikua kampanda, ba kabila kampanda, sunga ba mu eumbo kampanda. Dingi t’atukumiinaa kutapa bangi ku mashimba pa kuibakula mianda ayibasabulusha. Akula mu mushindo aunyigisha bangi. Ikala na bukidi bua kutumbulanga bangi pamutue wa kuibatopekanga na kuidiladila. Bena Isaleele babaadi na mianda i bungi ya kuibatakula mu kulesha lutumbu. Anka babaadi na kiubishi kia kuidiladilanga. Kikudi kia kuidiladila nkilombene kuambukila bangi, otentekiesha’shi luapolo lui bubi lubaadi bampuupa ekumi batushe lubaadi lutakule “bena Isaleele boso . . . bua kuunauuna Moyise.” (Mb. 13:31–14:​4, NWT) Ku lungi lupese, kutumbula bangi nkulombene kukuasha bua’shi muntu oso ekale na muloo. Biabia kimba mishindo ya kutumbula bakuetu balume na bakashi. w22.04 8 ¶16-17

Kubanga mu mafuku a kala, Yehowa baadi mukuashe ba nsongua be bungi buabadia kufika ba kuuku baye. Mmulombene dingi kukuasha bana boobe buabadia kukula mu kikudi su abakumiina. (1 Kod. 3:​6, 7) Sunga bana boobe bamueka’shi abakiebe kupambuka, Eyiso dia kifulo dia Yehowa adikala nka pabaadi. (Mis. 11:4) Nsaa yabalesha kitunduilo kiashi “abakumiina kufubila” Yehowa, Aye naamu ekala nka peepi bua kuibakuasha bua’shi bafikie ba kuuku baye. (Bik. 13:48; 2 Mya. 16:9) Yehowa mulombene nkukuasha bua kuakula bishima bibuwa pa nsaa ilombane, nsaa ayikala bana boobe na lukalo lua kuibipusha ngofu. (Nki. 15:23) Sunga’shi mmulombene kutakula mukuetu mulume sunga mukashi a mu kakongie buadia kuibapasukila. Sunga kunyima kua’shi bana boobe babapu kukula, Yehowa mmulombene kuibatentekiesha mianda ibodi we balongiesha kala. (Yo. 14:26) Su botungunuka na kulongiesha bana mu ngakuilo na kileshesho kiobe, Yehowa akakuelela miabi. w22.04 21 ¶18

Satana taki na bulungantu dingi bua kualuka muiyilu, mmutuule nsungu yaye kui bedibue muimu ba ki pa nsenga abalesha mpala ya Bufumu bu’Efile Mukulu “be na mudimo wa kutusha bukamonyi pabitale Yesu.” (2 Kod. 5:20; Ef. 6:​19, 20, NWT) Bakuetu balume muanda babaadi abakunkusha ndumbuluilo, babaadi badimbilue madimi bebafunda, abo nkuibatshibila kiimu na kuibeela mu lukano munda mua mafuku e bungi. Mudimo wa bano bedibue muimu ubaadi “ufue.” (Kibaf. 11:​3, 7-11) Ku mbangilo kua kipua kia 1919 bano bakuetu bedibue muimu babaadi batushibue mu lukano na kunyima babalekiele kuibadimbiila. Nka paapa bakuetu ababangile dingi kukunkusha mudimo wa kulungula mukandu wibuwa na wa kulongiesha. Anka bino ta mbimikie Satana buadia kuleka kutuuka muilo w’Efile Mukulu ngoshi nya. Kubanga nka kiakia kipungo, Satana mmutuushe “mweela” wa kubinguabingua kui muilo ooso w’Efile Mukulu. (Kibaf. 12:15) Mu binyibinyi, ‘pano ngi apatuungu kunyingiila na lukumiino’ kui ooso akuatudi.—Kibaf. 13:​10, Kilombeeno Kipya 2014. w22.05 5-6 ¶14-16

Mu kimonua, Yowano mutumibua bamuene bisaka bibidi bia bantu, abakuatshishena bukunkushi bua Yehowa na abakapete miabi ya muwa wa ikalayika. Kisaka kia kumpala nkia bantu 144000. Mbatshiibue pa nsenga buabadia kukita guvernema sunga Bufumu, pamune na Yesu muiyilu bua’shi bakakunkushe booso abakashaala pa nsenga ishima. (Kibaf. 5:​9, 10; 14:​3, 4) Yowano bebamuene mu kifuanyi, mbemane pamune na Yesu muiyilu ku muengie wa Siyona. (Kibaf. 14:1) Munda mua bipua bi bungi, mbasangule binunu bia bantu buabadia kuikala ku kisaka kia bantu 144000. (Luk. 12:32; Lom. 8:17) Yowano akula’shi nka penda ndambo ipeela ya ku baaba abende muiyilu, ngi iki na muwa pano pa nsenga mu ano mafuku a ku mfudiilo. (Kibaf. 12:17) Nsaa kampanda kumpala kua mpombo ikata, ino ndambo ipeela ya ku bantu 144000, ishaale pa nsenga abakeyata bua’shi yende muiyilu buayidia nkesanga na baaba bangi babapuile kufua na lulamato basanguka benda muiyilu. Muiyilu, abakamunana pamune na Yesu mu Bufumu bu’Efile Mukulu.—Mat. 24:31; Kibaf. 5:​9, 10. w22.05 16 ¶4-5

Yesu balongieshe balongi baye, buabadia kuikala na mueneno e buwa buabo’bo banabene. Yesu baadi muibashinkamiishe’shi: “Bwenu’nwe, mpaa na nyeene ya ku mitwe yeenu mbeeyibadikye yooso.” (Mat. 10:30) Kuno kuakula akuitunyingisha, bikishekishe su atuikalaa na mueneno e bubi pabitutale atue banabene. Bino abilesha’shi Nshetu e muiyilu ngi etupasukilaa ngofu—na’shi tui na muulo ku meeso kuaye. Su Yehowa betutadiila bua’shi tumulanguile, na banangushena’shi tui balombene kupeta muwa wa ikalayika mu nsenga yaye ipia, ta tui balombene kunangushena’shi bakitshi bi bubi nya. Kubaapu kukila bipua 15, Kitenta kia Mulami kibaadi akiamba’shi bi buwa kuikadika na nkatshinkatshi pabitale mueneno eetu’tue banabene: “Mu binyibinyi, t’abitungu tunangushene’shi tui na muulo ukilekile nya, tala tuekadika na kuitatula; sunga’shi t’abitungu tunangushene’shi tatui kintu, tala tuepusha bi bubi. Biabia, abitungu atue banabene tukimbe bia kuikadika na mueneno e buwa buetu’tue banabene, mushindo umune wa kuibikita mpatuiwuku bi bukome buetu na bi kubofula kuetu.” w22.05 24-25 ¶14-16

Muntu ooso a kuatudi e kutungunuka na kukita kinyi bua kulama buumune bua kakongie? Mpa kuikala bantu abafuishaa butaale. (Mat. 5:9; Lom. 12:18) Nsaa yooso yatuata mpango ya kutuesha butaale mu kipuano kietu na bangi mu kakongie, atukuatshishena ku buwa bua mpaladiiso a mu kikudi. Atutuulu na kulamiina mu binangu bietu’shi Yehowa akakaa muntu ooso mushaale mu mpaladiiso a mu kikudi mu lulanguilo luiselele. (Yo. 6:44) Banda kunangushena muloo winao Yehowa nsaa y’etumono atuikitshisha bua kunyingisha butaale na buumune munkatshi mua bafubi baaye be na muulo kuadi! (Yesh. 26:3; Ang. 2:7) Yehowa kuete apa bafubi baaye bintu bi bungi bibuwa. Biabia, mmushindo kinyi wabidi bilombene kuitukuasha? Abitungu tunangushene ngofu pabitale biatubadika muiyi di’Efile Mukulu. Nsaa yoso y’atuibadikila na kunangushena abitukuasha bua kudima ngikashi ya buina Kidishitu ayitutakula mu kuileshena “kifulo kia bu baana na baana” na “kwileleena muntu na mwinaye” mu kakongie.—Lom. 12:​10, Kilombeeno Kipya 2014. w22.11 12-13 ¶16-18

Nsaa y’atukumiina’shi Yehowa betufuila lusa, atukasangeela “kipungo kia kuikisha,” mpaa na butaale bua mu binangu na kondo k’eshimba katokane. Luno lusa ta ndulombene kufika kui bantu nya, anka ndulombene kufika kui “Yehowa aye nabene.” (Bik. 3:​19, NWT) Nsaa ayitufuila, Yehowa lusa alusha dingi netu kipuano naye, anka bu’tue bashakitshine dingi muluisho. Biabia, su Yehowa betufuila lusa t’etutopekaa dingi sunga kuitupa kibawe bua muluisho watudi bakite nya. (Yesh. 43:25) Yehowa asumbulaa miluisho yeetu kula “nka bi bula bwi pankatshi pa kutunduka nguba na kupona.” (Mis. 103:​12, Ñono na malango) Nsaa y’atunangushena mushindo wi bukata bua kifulo kia Yehowa, atuikala na lutumbu lui bungi na kumutshina. (Mis. 130:4) Yehowa bua kufuila muntu lusa, ta mbimeene ku bukata bua muluisho sunga bupeela nya. Yehowa afubishaa kinangu kiaye kia bu Mupangi, na etuelelaa Miya, na bu Nsushi, nsaa y’akiebe kuata kitshibilo kia kufuila muntu mukite muluisho lusa. w22.06 5 ¶12-14

Yehowa mmupe baaba booso bamufule lukulupilo lui buwa bukile. Mu kapindi kapeela amu afuisha nfudiilo a buntomboshi, a kinyongua, na a lufu. (Kibaf. 21:​3, 4) Akakuasha bantu “beyishe” bamukulupile, buabadia kualuula nsenga bu mpaladiso. (Mis. 37:​9-11) Na dingi, mukite bia’shi muntu ooso akuatudi ekadikie n’aye mu kipuano ki bukopo na ki buwa ngofu kubanga binobino. Luno nyi ndukulupilo lui buwa bukile! Anka nkinyi kiatudia kukita bua kukumiina’shi milayilo y’Efile Mukulu ayikekadika ya binyibinyi? Yehowa t’akutuaa kulombasha milayilo yaye. Tui na kabingilo ke buwa katudia “kukulupila mwi Yehowa.” (Mis. 27:14) Atuibilesha p’atutengiela na luishinko looso na muloo Efile Mukulu eetu p’akalombasha milayilo yaye yoso. (Yesh. 55:​10,11) Tui balombene na atue namu kushaala na lulamato kui Yehowa, bashinkamishe’shi aye ngi “afutaa baaba abamukimbi.” w22.06 20 ¶1; 25 ¶18

Tui balombene kushinkamiisha’shi akalombasha mu mushindo upuidikie kiakia kiadi mulungule ba mfumu booso ba bifuko bua kukita ki mu 1 Timote 5:8. Su tuashinkamisha’shi Yehowa mmuitufule, na’shi mmufule kifuko kietu, ta tukekala na mpaka ya kukumiina’shi etupa bintu bioso biatudi nabio lukalo. (Mat. 6:​31-33) Bu biadi Nshetu sha kifulo, sha kalolo na apaanaa buntu, Yehowa akumiina kuitupasukila ku nkalo yeetu! Yehowa pa bapangile nsenga, beyipangile na bingi bintu bi bungi kukaasha penda biabia biatudi nabio lukalo buatudia kuikala na muwa. Na kifulo kioso muushe nsenga na bintu bilombene kuitupa muloo wi bungi. (Kib. 2:9) Su ingi nsaa tui na penda bintu bipeela biatudi nabio lukalo kadi bishi bungi, tui balombene kutentekiesha’shi, su tui na biabia bintu, muanda Yehowa kuete kuitupasukila. Yehowa ta mulombene kukambilua bua kuitulombeesha nkalo yeetu nya. (Mat. 6:11) Abitungu tuikale atutentekiesha’shi biabia bi’abaketupa kui Yehowa bi bungi kukila bintu bioso bia tukuete kutuusha binobino. Na mu mafuku aafiki aketupa muwa wa ikalayika.—Yesh. 65:​21, 22. w22.06 15 ¶7-8

Bantu bapia abakiebe kuiwuka bia binyibinyi, t’abekalaa nka na penda lukalo lua biakudia binyingie nya. Sunga atue booso. Mpoolo mutumibua bafundile’shi kutumikila mianda y’atulongo ya mu Bible nkulombene kuitukuasha bua “kushinguula ki buwa na ki bubi.” Bi kuikala bukopo bua kukookiela mayi a kulonda a Yehowa lelo uno, ku muanda bantu be bungi tabadi na bukitekite. Anka Yesu mmushinkamishe’shi tukuete kulonga mianda yatudi nayo lukalo, buatudia kulama lukumiino luetu lunyingie. Nsulo ya bino bidibua, nyi Eyi di’Efile Mukulu diyokielue, Bible. Nka bu Yesu, tukuete kupa eshina di’Efile Mukulu kineemo kidilombene. (Yo. 17:​6, 26) Bu kileshesho, mu kipua kia 1931 tubaadi baate dino eshina dia mu Bifundue bu ba Temue ba Yehowa ku muanda, ndituikashe mu mushindo wi pabuawo kui Nshetu e muiyilu. (Yesh. 43:​10-12) Kukatusha biabia, Bible a Les Saintes Écritures Traduction du monde nouveau, e n’eshina di’Efile Mukulu difundibue pa mbalo yadio Muiyi diaye. w22.07 11 ¶11-12

Mu bia binyibinyi bia mu Bible, mui mpaa na mukandu wa Bufumu bu’Efile Mukulu. Yesu baadi mupuandikishe bia binyibinyi pabitale Bufumu na bupeta. Anka bu biabadi bebileshe mu Mateo 13:​44, Yesu bambile’shi: “Bufumu bwa mwiyilu mbwifwaneene na bupeta bufiibwe mwibala, bubabapetele kwi muntu ebufia; na pa mwanda wa muloo ubaadi nao, enda na akaudisha bioso bibaadi nabio, aula diadia efuba.” Lamiina’shi yawa muntu ta baadi akimbi bupeta nya. Anka nsaa ibebumuene, baadi muipaane ngofu bua kuibupeta. Pa muanda wa biabia, baadi mupaane bingi bintu bioso bibaadi nabio. Buakinyi? Baadi auku muulo wi nao buabua bupeta. Atuuku’shi ta kui kintu su nkimune kiatudi balombene kutusha mu ino nsenga, kiatudia kupuandikisha na muloo w’atupete patufubila Yehowa binobino, na lukulupilo lua muwa wa ikalayika mu mafuku aafiki ku bukunkushi bua Bufumu bu’Efile Mukulu. Kineemo kiatudi nakio kia kuikala mu kipuano kia pa bupenka na Yehowa, nkikile kuipaana kooso kuatudi balombene kukita. Muloo wetu ukata ngua “kumusangasha mbipaso bioso.”—Kol. 1:​10, Kilombeeno Kipya 2014. w22.08 15 ¶8-9; 17 ¶12

Yosefe baadi muukie naminyi’shi, Efile Mukulu mulombene kumona lusandi bu kikitshino ki “bubi bwi bino bukata”? Mu muiya wa Moyise mubaadi mpaa na ungi muiya aupushika kalolo awamba’shi, “Totambukanga lusandji,” ubaabadi bafunde kunyima kua bipua nkama ibidi. (Efi. 20:14) Biabia, Yosefe baadi auku bi binangu bia Yehowa kalolo, na mushindo wadi mulombene kupusha pabitale uno muikeelo wi butete. Bu kileshesho, Yosefe baadi auku’shi Yehowa, baadi mutule eyibakishi pankatshi pa bantu babidi mulume na mukashi. Na baadi mupushe mushindo ubaadi Yehowa, muate nyinaye kulu Sara na kineemo na kumukaluila, misuusa ibidi nsaa ibaadi mu masaku ibaabadi abakiebe kulaala naye pa bukopo kui ungi mulume. (Kib. 2:24; 12:​14-20; 20:​2-7) Nsaa ibaadi Yosefe munangushene pabitale uno muanda, baadi mushinguule ki buwa na ki bubi ku meso ku’Efile Mukulu. Pa muanda Yosefe baadi mufule Efile Mukulu aaye, baadi mufule dingi na mayi aaye a kulonda a kululama, na aye nkuata kitshibilo kia kuialonda. w22.08 26 ¶1-2

Buno butemuki t’abulesha lusangukilo lua mu kifuanyi bua bafubi b’Efile Mukulu lua mu kikudi alumueka mu mafuku a ku mfudiilo bu bibatudi atupusha kumpala nya. Ano mayi aalesha lusangukilo lua bantu bafue alukatshika mu nsenga ipia. Buakinyi atuakula biabia? Kishima “lufufi lua nsenga” mbekifubishe dingi mu Yoobo 17:​16, na ki mumune na kishima “mashaama.” Uno muanda wi mu Ndanyele 12:​2, aulesha lusangukilo lua binyibinyi alukakitshika kunyima kua ano mafuku a ku mfudiilo, na kunyima kua ngoshi ya Armagedone. Nkinyi akilesha Ndanyele 12:​2, nsaa yakula’shi bangi abakasanguka bua “muwa wa ikalayika”? Bino abilesha’shi baaba booso abakasanguka, abakalongo na abakatungunuka na kulonga na kukokiela Yehowa na Yesu munda mua bipua 1000, ku mfudiilo a bioso abakatambula muwa wa ikalayika.—Yo. 17:3. w22.09 21 ¶6-7

Uno muanda t’aulesha’shi Yehowa atengiela’shi tukulupile bangi mu kipaso ki bubi nya; akumiina’shi tui bakulupile su banabene babelesha bu bantu balombene kukulupilua. Kukulupilua na kaneemo abebikimbaa kui muntu nabeene, anka abiataa mafuku e bungi. We kutamisha lukulupilo loobe mui bakuenu naminyi? Kimba bia kuibauuka kalolo. Esambe nabo panudi ku bisangilo. Ata mpango ya kuenda nabo mu mudimo wa bulungudi. Ikala na luishinko kuabadi, ebape mushindo wabadia kulesha’shi mbantu ba kukulupila. Ku mbangilo, pangi tue mulombene kutuusha mianda ya mu nshalelo oobe ooso bua kulungula muntu okiokatuka mu kuiwukeena naye nka binobino nya. Bu abiende kipuano kienu na kutama, we mulombene kuipusha bulungantu, na kumufunguila eshimba diobe bua’shi omulungule biopusha. (Luk. 16:10) Biabia, we kukita naminyi su mukuetu oodi mufule akuluishiisha? Tuekalanga na bukidi bua kumusumbushena, kuilekena na biabia, tadiila wawa muanda mafuku abande kukila. Tolekielanga bikitshiino bia bantu bapeela, biakukutshishua kukulupila bakuenu. w22.09 4 ¶7-8

Mukuetu mukulu mu kakongie abetanyina bu Miqueas, atentekiesha angi mafuku nsaa ibabadi bamuluishishe kui bangi bakuetu babaadi na mashito e bungi mu ndumbuluilo a Yehowa. Batungunukile na kuilama mu mianda yoso na kuikitshisha bua kuleka kudila. Baadi atekie nsaa yoso, bua’shi Yehowa amupe kikudi kiaye kiselele na bukome bua kunyingiila. Baadi akimbi ingi mianda mu mikanda yetu ilombene kumukuasha. Bino abitulongiesha kinyi? Su mukuetu mulume sunga mukuetu mukashi bakuluishisha, shaala muumine na wekitshishe bua kukatusha binangu bioso bibubi bilombene nkufuila. Tue mulombene kuuka muanda kampanda ulombene kutakula muntu bua kuakula sunga kukita kintu kampanda. Biabia, eulungule Yehowa mu luteko na omutekie bua’shi akukuashe bua kumona bi mueneno a yawa muntu. Su bonangushena’shi mukuetu mulume sunga mukuetu mukashi t’ekeele na lukalo lua kukita muanda kampanda wi bubi, omono mushindo wa kumufuila lusa. (Nki. 19:11) Ntentekiesha’shi, Yehowa kuete amono lukalakashi lodi nalo na akakupa bukome bodi nabo lukalo bua kunyingiila.—Mul. 5:8. w22.11 21 ¶5

Sangula ba kuuku bafule Yehowa. Kusangula koobe kua ba kuuku kui na bukitshishi bukata mu kutama koobe kua mu kikudi, bu biodi muina Kidishitu. (Nki. 13:20) Julien kuete kufuba bu mukulu lelo uno, amba’shi: “Nsaa inaadi nsongua naadi musangule ba kuuku be buwa, banaadi nandungula naabo mukandu wi buwa. Bano ba kuuku basha kisumi babaadi bankuashe, bua kumona mushindo wa kusankila mudimo wa bulungudi. . . . Naadi mumone’shi, ne mushimishe ba kuuku be buwa penda muanda wa’shi, naadi nakimbi penda ba kuuku ba mulongo wande.” We mulombene kukita kinyi su bomono’shi, kukisha nsaa na ungi muntu a mu kakongie, nkulombene kuluisha kipuano kiobe na Yehowa? Mpoolo baadi auku’shi bangi bantu ba mu kakongie ka mu siekele a kumpala, ta babaadi na mueneno e buwa a mianda ya mu kikudi, nyi buakinyi balunguile Timote bua kuikala naabo kula. (2 Tim. 2:​20-22) Kipuano kietu na Yehowa ki na muulo. Tukuete kuikitshisha ngofu bua kuifubuila peepi na Yehowa, biabia t’abitungu’shi ba kuuku beetu baluishe ki no kipuano nya. w22.08 5-6 ¶13-15

Mu kuilekeena na bano bashikue malango a Efile Mukulu, atue tui bafule mashinda a Efile Mukulu. Mu ano mashinda mui mayi aaye a kulonda alulame. Tui balombene kunyingisha kifulo kietu, pa kupuandikisha bipeta bia baaba abakokiela na bash’abakokiela mayi a kulonda. Atumono kua befuishisha nkalakashi abo banabene muanda mbabulakane, na’shi bakuete kusumbushena malango a binangu a Yehowa. Biabia tala mushindo wi nshalelo eetu buwa muanda tukuete kukokiela Efile Mukulu. (Mis. 32:​8, 10) Yehowa mmutuule binangu biaye bua bantu booso. Anka t’akitshisha muntu su ngumune bua kuibikumiina. Anka alesha bipeta abifikila bantu booso abapele kuteemesha binangu biaye. (Nki. 1:​29-32, EEM) Booso abakamono ‘malua mupunda bikitshino biabo.’ Kunyima nshalelo aabo t’akebatuadila kintu, anka penda tuinyongoshi, nkalakashi, na ku mfudiilo Yehowa akebabutula. Ku lungi lupese, baaba booso abateemesha elango dia binangu dia Yehowa na kutumikila bioso bi’akula, Yehowa ebalaa’shi: “Ooso akanteemesha, ekala ku matwi talala, mwikishe ku’shi moo wa mpoombo.”—Nki. 1:33. w22.10 21 ¶11-13

Kutshiina Yehowa akupushisha kumuneemeka ngofu, na kuleka kukita kintu kioso akimuinyongosha. (Nki. 16:6) Biabia, abitungu tutungunukie na kuikitshisha, buatudia kulonda mayi a kulonda a Efile Mukulu a ki buwa na ki bubi nka bu biabadi bapatuule mu Bible. (2 Kod. 7:1) Atukekala na muloo su tubakitshi mianda yabadi bafule kui Yehowa na kuleka mianda yaadi mushikue. (Mis. 37:27; 97:10; Lom. 12:9) Muntu mulombene kuuka’shi Yehowa ngi e na matalua a kuata kitshibilo kii buwa na’shi kino kii bubi, biabia abitungu yawa muntu akumiine mayi a kulonda a Efile Mukulu aye nabeene. (Lom. 12:2) Atulesha mu muikeelo wetu’shi tui bakumiine binyibinyi kulonda mayi a kulonda Yehowa ngi eshinda dibuwa bua kuikala na muwa. (Nki. 12:28) Davide bapushiishe nka mu uno mushindo, ngi buakinyi bambile pabitale Yehowa’shi: “Okanyiûkisha eshinda adyende ku mûwa. Kwakwa kodi nakaûlwa ndâ na mulô, pa kwikala pepi n’obe nakasepêla ikalaika.”—Mis. 16:​11, EEM. w22.10 8 ¶9-10

Yesu baadi mulame nkatshinkatshi na kuiyisha pabimutale aye nabene. Kumpala kua’shi afikie pano pa nsenga, Yesu bakitshiine bintu bi bungi bukile bi buwa, mu kufubila Yehowa. Mui Yesu, “ngi mubaapangiilwe byooso, bii mwiyilu na pa nsenga.” (Kol. 1:16) Ku lubatshisho luaye ngi kubaadi Yesu mutentekieshe mianda yoso ibaadi mukite, pa baadi na Nshaye. (Mat. 3:16; Yo. 17:5) Anka Yesu ta bayikeele na kuitatula nsaa ibaadi mutentekieshe yaya yoso mianda ibaadi mukite nya. Mu kuilekeena na biabia, Yesu ta baadi etumbisha bua muanda su ngumune. Balunguile balongi baye’shi, mmufikie pa nsenga “kushii bwa kufubilwa, anka bwa kufubila bantu, na kupaana muuwa waye bwa kukuula mwilo wa bantu.” (Mat. 20:28) Baadi dingi muukie mikalo yaye ya’shi ta mulombene kuikitshiina kintu mu mpango yaye’ye nabene. Yesu baadi muiyishe bikile! Yesu mmuitulekiele kileshesho ki buwa bukile kiatudia kulonda. w22.05 24 ¶13

Nsaa y’aata kitshibilo kia kuitufuila lusa, Yehowa, auka’shi kitshishi a bubi batundula’shi kiadi mukite ki bubi. Yesu baadi mupatuule uno muanda kalolo mu Luka 12:​47, 48. Nsaa ayata muntu mpango ya kukita kintu kampanda ki’auku’shi Efile Mukulu mmuikipele, kadi bekikitshi yawa muntu, bakitshi muluisho ukata. Yawa muntu, e mu masaku a kukutua kufuidibua lusa. (Mak. 3:29; Yo. 9:41) Tui kuikala na lukulupilo’shi abetufuila lusa su? Oolo! Yehowa atalaa dingi nkitshishi a bubi belanga kuishimba mu binyibinyi. Kuilanga kuishimba akupushisha “kushintuluka mu binangu, ku muikeelo, na ku bipatshila.” Akulesha kinangu kia muntu etopeka, enyongola bua mianda ibi yekalanga mukite, sunga pabitale mianda i buwa ibadia kukita, kadi yashi mukite. Muntu elanga kuishimba ta mulombene nka penda kuinyongola kuishimba bua mianda i bubi yadi mukite nya, anka mmulombene dingi kuinyongola bua kipuano kiaye na Yehowa kiluikie na akikalanga kimutakule bua kukita yaya mianda yoso i bubi. w22.06 5-6 ¶15-17

Beshikuanyi betu bakuete kupalakasha mianda ya madimi pabitale bakuetu bena mashito mu ndumbuluilo a Yehowa. (Mis. 31:13) Bangi bakuetu bakuete kuibakuata na kuibadimbiila mianda’shi mbatomboshi. Bena Kidishitu ba mu Siekele a kumpala, babaadi bapete namu mianda nka i biabia nsaa ibaabadi bakuate Mpoolo mutumibua na kumudimbiila mianda ibubi. Bangi, babaadi balekie kukuatshishena Mpoolo mutumibua nsaa ibaadi mu lukano ku Loma. (2 Tim. 1:​8, 15; 2:​8, 9) Nangushena mushindo ubaadi ulombene kupusha Mpoolo. Baadi munyingiile nkalakashi i bukopo na kutuula mpa na muwa waye mu masaku pa muanda wabo. (Bik. 20:​18-21; 2 Kod. 1:8) Ta tuikalanga bu bano bantu abaadi basumbushene Mpoolo. Ta tui balombene kukaanya’shi Satana, nyi kuete kuluisha bano bakuetu be na mashito. Kepatshila kaye nka’shi, yaaya ngoshi yaaye ibofushe lulamato luetu, na etutshinyishe. (1 Mp. 5:8) Tungunuka na kukuatshishena bakuetu balume na kushaala na lulamato kuabadi.—2 Tim. 1:​16-18. w22.11 16-17 ¶8-11

Uno ntomboshi baadi muilangie kuishimba kapindi kapeela kumpala kua Yesu, abimueka’shi baadi muina Yuda. Bena Yuda babaadi abalanguila Efile Mukulu umune, anka bantu ba ingi miilo, babaadi abalanguila b’efile bebungi. (Efi. 20:​2, 3; 1 Kod. 8:​5, 6) Su uno ntomboshi ta baadi mui Yuda, lukonko lui mu kifundue kietu kia lelo lubadia kuikala luedibue’shi, buakinyi “t’otshinyi b’efile?” Yesu babamutumine kadi, kushi kui bantu ba ingi miilo, anka kui “mikooko ishimine ya mu nshibo ya Isaleele.” (Mat. 15:​24, Kilombeeno Kipya 2014) Na Efile Mukulu baadi mufumbuile bena Isaleele’shi, Yesu akasanguka. Uno ntomboshi baadi muilangie kuishimba baadi mulombene kuuka uno muanda. Na ngakuilo aye baadi muleshe’shi baadi auku’shi Yehowa mmulombene kusangula Yesu bua’shi akekale mukunkushi mu Bufumu bu’Efile Mukulu. Uno ntomboshi pangi baadi mukulupile’shi Efile Mukulu mmulombene nkamusangula naye. Bu bibaadi muina Yuda, uno ntomboshi baadi mmulombene kuuka pabitale Adame na Eeva, na Mpaladiiso mu babaadi batuule Adame na Eeva kui Yehowa. Biabia yawa ntomboshi badi mulombene kushinkamisha’shi Mpaladiiso ababadi bakule kui Yesu mulombene kuikala efuba dibuwa pano pa nsenga.—Kib. 2:15. w22.12 8-9 ¶2-3

Tui balombene kukita mudimo wa bulungudi nka penda ku bukuashi bua kikudi kiselele ki’Efile Mukulu. Buakinyi? Muanda Satana kuete kulua neetu bua’shi emikie mudimo wetu wa bulungudi. (Kibaf. 12:17) Bantu be bungi abanangushena’shi Satana mukile bukome, na’shi tatui kulua naaye ngoshi na kumukambila. Anka ku bukuashi bua mudimo wetu wa bulungudi tukuete kumukambila! (Kibaf. 12:​9-11) Mu mushindo kinyi? Nsaa y’atulungula mukandu wi buwa atulesha’shi tatui na moo, ku abitutshinyisha Satana. Nsaa yooso y’atulungula mukandu wi buwa, Satana kuete kukienga muanda bapanga. Bino abimueka patooka’shi Yehowa kuete etupa bukome buaye ku bukuashi bua kikudi kiselele, na abilesha’shi tui bakuminyibue naaye. (Mat. 5:​10-12; 1 Mp. 4:14) Kikudi kiselele ki’Efile Mukulu, nkilombene kuitupa bukome buatudi naabo lukalo bua kukambila lukalakashi looso luatudi balombene kufumankana naalo mu mudimo wetu wa bulungudi. (2 Kod. 4:​7-9) Nkinyi dingi kiatudi balombene kukita bua kuikala na kishinkamiisho’shi atutungunuka na kupeta kikudi kiselele ki’Efile Mukulu? Abitungu tutekie nsaa yooso bua kuikipeta, na bashinkamishe’shi, Yehowa apusha nteko yeetu. w22.11 5 ¶10-11

Tui kulesha kifulo bua bakuetu balume na bakashi, p’atuikitshisha ngofu bua kulama butaale nabo. Atuikitshisha bua kuambula kileshesho kia Yehowa kia kufuila bangi lusa. Su Yehowa mmukumiine kutadiila muana aaye bua’shi afue bua miluisho yetu, ta tua kukumiina kufuila namu bakuetu balume na bakashi lusa nsaa y’abetukitshiina bilubilo su? T’atukumiina kuikadika bu mpika e bubi abadi baleshe mu lukindi lua Yesu nya. Kunyima kua mukata aaye kumufuila lusa bua elenyi dikata dia makuta e bungi abaadi nao, yawa mpika bapelele kufuila mpika naye lusa baadi na elenyi diaye dipeela dia tumakuta tupeela. (Mat. 18:​23-35) Su we na muntu oshuepushenaa naye mu kakongie, tue mulombene namu kukita etabula dia kumpala bua kukimba butaale kumpala kua kutuela mu Kitentekiesho kia lufu lua Yesu su? (Mat. 5:​23, 24) Kukita bino akulesha bukata bua kifulo kiobe bua Yehowa na bua Yesu. w23.01 29 ¶8-9

Mushindo umune odi mulombene kuuka mianda i nayo bakuenu balume na bakashi, mpa kuifubuila kuabadi na kuibela nkonko isha ibayisha milongo. (Nki. 20:5) Be na biakudia bilombane, na manga, sunga bingi bintu? Abimueneka’shi mudimo wabo aukiebe kupua sunga’shi ta be na makuta alombane akufutshila nshibo ya kushala? Be netu lukalo bua’shi tui bakuashe bua nkebatekiela bukuashi ku mbulamatadi su kui mushindo? Anka Yehowa akumiina’shi booso buetu tunyingishe bangi na kuibakuasha. (Nga. 6:10) Sunga tuakita kantu kapeela bua kukuasha mukuetu e na maladi, mbilombene kumunyingisha ngofu. Muana mukinga e kufundila mukuetu e na maladi tu mayi atunyingisha sunga kuenda kuadi. Nsongua namu e kuenda mu kisalue munkaudila mukuetu mukashi bintu sunga kumukitshina ungi mudimo. Bangi mu kakongie mbalombene kuikala na mushindo wa kuteekiela muntu akumbu biakudia su? Bangi ba Tumonyi ba Yehowa mbatumine bakulu mikanda ya lutumbu, muanda abafubu ngofu bua kukuasha bakuetu balume na bakashi aku be na bi bungi bia kukita mu kipungo kia kipupa sunga maladi. Bi muloo ukata nsaa y’atuikitshisha bua ‘kwikankamisheena ku muntu na mwinaye na kwinyingisheena muntu na mwinaye’!—1 Tes. 5:​11, Kilombeeno Kipya 2014. w22.12 22 ¶2; 23 ¶5-6

Basaduseo babaadi beubidishene ngofu na mikanda itano ya kumpala ya mu Bifundue bia ki na Ebelu, anka ta babaadi abakumiina bia binyibinyi bi na muulo bibaadi mu mikanda yooso iyokielue nya. Bu kileshesho, tala mushindo ubaadi Yesu mualuule nsaa ibaadi Basaduseo bamuipushe pabitale lusangukilo. Bebaluluile’shi: “Tanwabandjile kubala mu mukanda wa Moyise, pa mwanda wa: ‘mwibuula’, kipaso kibesambile n’aye Efile Mukulu, nkwamba’shi: ‘Ami n’Efile Mukulu a Abalahama, n’Efile Mukulu a Isake, n’Efile Mukulu a Yakobo’?” (Mak. 12:​18, 26, Kilombeene Kipya 2014) Sunga bibaadi Basaduseo bashinkamishe’shi mbabadikie kiakia kifundue misuusa i bungi, lukonko lua Yesu lubalesheshe’shi, ta babaadi abakumiina bia binyibinyi bia mu Bifundue, kuamba’shi malongiesha a lusangukilo. (Luk. 20:38) Ndilongiesha kinyi dia tupete pano? Nsaa y’atubadika atukumiina kutuula binangu bietu bioso ku ma verse, sunga ku mianda y’abetulongiesha mu Bible. Tatukumiina kupusha penda malongiesha abofule nya, anka atukumiina dingi bia binyibinyi bi na muulo ukata na mayi a kulonda afuame. w23.02 11 ¶9-10

Tumonyi tooso tua Yehowa tuabadi baleshe mu kifundue kietu kia lelo tubaadi tufumankane na bintompuanga bi bukopo; anka sunga mbiabia, mbashaale nka na lulamato kui Yehowa mu nshalelo aabo. (Eb. 11:​36-40) Kunyingiila kuabo na kuikitshisha kuabo, kubaadi kua bisumanga su? Nya! Sunga mu mafuku abaabadi baki na muwa, ta mbamone kulombana kua milayilo yoso y’Efile Mukulu, babatungunukile nka na kulupila mui Yehowa. Na pa muanda babaadi bashinkamishe’shi mbakuminyibue na Yehowa, babaadi bashinkamishe’shi abakamona kulombana kua milayilo yaye. (Eb. 11:​4, 5) Bileshesho biabo, mbilombene kunyingisha kitshibilo kietu kia kutungunuka na kukulupila mui Yehowa. Lelo uno, tui bashaale mu nsenga ikuete kuenda na kuluila ngofu kuifuku n’efuku. (2 Tim. 3:13) Satana t’alekiele kutompa muilo w’Efile Mukulu nya. Sunga tuapeta nkalakashi i naminyi, tui kaleyi nka na kitshibilo kia kufubila Yehowa ngofu, bashinkamishe’shi, “atukulupila mwi Efile Mukulu e na muwa.”—1 Tim. 4:10. w22.06 25 ¶17-18

Kabingilo kamune ka buakinyi tui balombene kuikitshisha bua kulama mbidi yetu nka’shi, tui balombene kufubila Yehowa kalolo muyile ngobesha yetu. (Mak. 12:30) Biabia tulekieyi kukita kintu kioso kiakia ki’atuuku’shi akiluisha mbidi yetu. (Lom. 12:1) Anka, ta kui kintu kiatudi balombene kukita bua kukaluila muwa wetu’shi tatukumbanga. Biabia, atukumiina kukita muyile ngobesha yetu, bua kulesha Nshetu e muiyilu’shi tui na lutumbu bua kia buntu kia muwa. Kukumba na bununu, mbilombene kuitukutshishua bua kukita mianda i bungi bu bibaatudi atukitshi kumpala. Ngi buakinyi tui kuinyongola na kupusha bi bubi. Tui balombene kutungunuka na kuikitshisha bua kuikaluila atue abanabene. Buakinyi? Muanda sunga tuekala banunu sunga na mukumbo, tui balombene kutungunuka na kutumbisha Yehowa nka bu bibebikitshiine Mfumu Davide. Abitunyingisha ngofu pa kuuka’shi tui na muulo ku meeso ku’Efile Mukulu eetu, sunga nsaa yatudi na maladi sunga bununu! (Mat. 10:​29-31) Sunga tuekala’shi tui bapue kufua, aketusangula. (Yob. 14:​14, 15) Bu biatuki na muwa tukite muetu mooso bua kukaluila mbidi yetu na muwa wetu. w23.02 20-21 ¶3-5

Mashina a bantu ba mu kisaka kikata kia ingi mikooko, aakatungunuka nka na kushaala mu mukanda wa muwa kunyima kua kupanda ku Armagedone su? Oolo. (Kibaf. 7:14) Yesu bakuile’shi baaba booso be bu mikooko, abakeende mu “muwa wa ikalayika.” (Mat. 25:​46, Kilombeeno Kipya 2014) Anka baaba abakapanda ku Armagedone, tabakapete muwa wa ikalayika nka musuusa umune nya. Mu bipua 1000, bia kumunana kua Yesu, “Akekala mulami aabo akebakunkusha ku nsulo ya meema a muwa.” Baaba booso abakakokiela ku bukunkushi bua Kidishitu, na kunyima bakebatshibile kiimu kui Yehowa bu bantu be na lulamato, mashina aabo aakekadika afundibue bua losoo mu mukanda wa muwa. (Kibaf. 7:​16, 17) Biabia, na kisaka kia mbushi, akikaluishibua ku Armagedone. Yesu bakuile’shi: “Abakayipaibua bua losoo.” (Mat. 25:​46, NWT) Mpoolo mutumibua baadi muyokielue na kikudi kiselele etulungula’shi: “Dinyooka dyaabo adiikala dya kabutu ka looso.”—2 Tes. 1:9; 2 Mp. 2:9. w22.09 16 ¶7-8

Nsaa ayisangeela bena kifuko bintu biabadi bapangie kui Yehowa mbalombene kukisha kapapi na kuasha nabio pamune. Bino abibakuasha buabadia kuifuleena ngofu. Yehowa mmupangie ma mbalo e buwa bukile pano pa nsenga, muatudi balombene kukita bintu biatudi bafule. Bifuko bi bungi abikumiinaa nkabandila bipangua pamune, kuenda mu kibundi ki peepi naabo, ku miengie sunga ku biese bia meema akata. Mu nsenga ipia y’Efile Mukulu, ba nambutuile na bana baabo, abakasangeela bipangua bia Yehowa kukila mushindo wabebisangeela lelo uno. Mu kuilekeena na lelo uno, t’atukekala na kabingilo ka kutshina nyema, na ayo namu t’ayiketutshinyi nya. (Yesh. 11:​6-9) Atukeekala na kipungo kishi na mpuilo kia kusangeela bintu biabadi bapangie kui Yehowa. (Mis. 22:27) Baledi tanutengielanga nka kiakia kipungo buanudia kukuasha bana beenu bua’shi babangie kusangeela bipangua nya. Bu bi’ofubisha bipangua bua kulongiesha bana boobe pabitale Yehowa, be nkakumiina kibakuile Mfumu Davide pabitale Yehowa’shi: “Yehowa byookitshi tabii kupwandikishwa.”—Mis. 86:8. w23.03 25 ¶16-17