Mueshi wa 10

Atue boso tui balombene kukuasha bua’shi bisangilo bia kakongie bikidikie kalolo, pa kukankisha eyi pa tuyimbi pamune na bakuetu, na pa kutusha ngaluulo ilumbuule kalolo. Bua bangi abibelela bukopo bua kuyimba na kutusha ngaluulo mu bisangilo. Abikuelelaa namu bukopo su? Su mbiabia, tutaleyi kikuashe bangi bua kukatusha moo. Pabitale ngono, bangi mbasangane’shi abikuashaa bua kuyimba na mashimba aabo oso. Nsaa yatuyimbi ngono ya Bufumu, abitungu kabingilo ketu ka kumpala kekale ka kutumbisha Yehowa. Biabia nsaa yuelumbuula bua bisangilo, lumbuula nka biodi mulombene kulumbuula bingi bipindi bia bisangilo, na otompe kumona kuipushena kui pankatshi pa bishima bi mu loono na biabakesambila mu bisangilo. Dingi, nsaa yonangushena ku bishima bi mu loono, t’otuulu binangu biobe ku ngobesha yobe ipeela ya kuyimba nya. Kutuusha ngaluulo kui kuikala bukopo bua bangi. Nkinyi kilombene kukuasha? Ekitshishe bua kuibikita misuusa yooso. Tentekiesha’shi, lualuulo lui buwa abitungu luikale luipi, lupeelepeele, na lua muanda w’anuisambila. Abisankishaa Yehowa nsaa yatuikitshisha muetu mooso, bua kutusha ngaluulo, sunga kuyimba bua kumutumbisha mu bisangilo. w22.04 7-8 ¶12-15

Kishima “mukwashi” akilesha muntu e na lukalo lua kukuasha mungi muntu e mu lukalo lua bukuashi. Banda kunangushena bi Yehowa na lukalo lua kukuasha muntu kampanda muinyongole. Okashinkamisha na kukumiina’shi uno muanda aulesha’shi, Yehowa e na lukalo lukata lua kuitukuasha. Nsaa ayitukuasha Yehowa tui balombene kunyingiila nkalakashi yetu na muloo. Mu ingi mishindo kinyi amuitukuashaa Yehowa bua kunyingiila? Bua kualula ku luno lukonko, tubadikieyi mukanda wa Yeeshaya. Buakinyi? Ku muanda matemuki e bungi abaadi Yehowa mufumbuile Yeshaya bua kuiafunda, bakuete kuiatumikila kui bafubi b’Efile Mukulu lelo uno. Na dingi Yeshaya badi muleeshe bi Yehowa mu bishima bipeele-peele biatudi balombene kupusha kalolo. Tubande kuata kileshesho ki mu Yeeshaya shapitre 30. Mu uno shapitre bafubiishe bileshesho bi buwa bukile, bua kulesha mushindo awitukuasha Yehowa bu biatudi muilo waye. Bafundile’shi Yehowa etukuashaa: (1) pa kuteemesha kalolo na kualula ku nteko yetu, (2) pa kuitupa buludiki, na (3) pa kuituelela miabi binobino na mu mafuku aafiki. w22.11 8 ¶2-3

Mu mikandu ya Yesu ibaadi mutumine kakongie ka Simirne na ka Filadelfi, balunguile bena Kidishitu ba mu tuno tukongie’shi ta mbalombene kutshiina kubinguabingua muanda Yehowa akebafutu su babashaala balame lukumiino luabo. (Kibaf. 3:10) Abitungu tuukie’shi atupete kubinguabingua na tuilumbuule buatudia kuikunyingiila. (Mat. 24:​9, 13; 2 Kod. 12:10) Mukanda wa Kibafumbwilwe awitulungula’shi muilo w’Efile Mukulu aupete kubinguabingua mu ano mafuku eetu—“efuku dya Mwanaana.” (Kibaf. 1:10) Mukanda wa Kibafumbwilwe shapitre 12 auteemuna ngoshi muiyilu nk’abo bakiabakatuka mu kutuula Bufumu bu’Efile Mukulu, Mikayele—Yesu Kidishitu mutumbishibue—na biluilo biaye bia ba mikeyilu babaluile ngoshi na Satana na ba demo. (Kibaf. 12:​7, 8) Bu kipeta, babaadi batshokole beshikuanyi booso b’Efile Mukulu na kuibasumbula pa nsenga, na bino mbituadile bantu booso bashaale pa nsenga makienga e bungi.—Kibaf. 12:​9, 12. w22.05 5 ¶12-13

Biimu bia Yehowa abikalaa misuusa yoso nka bilulame na bilombane. Aye t’ekalaa na ntondo. Yehowa t’afuilaa muntu lusa muanda wa’shi amueneka e buwa, mpeta, e na muulo sunga’shi e na ngobesha i bungi nya. (1 Sam. 16:7; Shak. 2:​1-4) Ta kui muntu mulombene kukitshisha Yehowa kintu su nkimune pa bukopo, sunga kumutshiba milomo nya. Bitshibilo biaye t’ebiataa pa muanda wa nsungu, sunga pa muanda wa biepusha nya. (Efi. 34:7) Kushi mpaka, kiukilo kia Yehowa na kapatupatu kaye ngi bimuikashe bu Nsushi mulombane. (Miy. 32:4) Bafundi ba Bifundue bia ki na Ebelu babaadi baukie’shi lusa lua Yehowa lui pabualo. Mu ingi mianda, babaadi bafubishe kishima kia ki na Ebelu ki mu ungi mukanda awamba’shi, “kino kishima akilesha nka penda mushindo wi Efile Mukulu afuila bankitshishi ba miluisho lusa, ta mbekifubishe bua mushindo wi bantu abafuila bantu nabo lusa nya.” Nka penda Yehowa ngi e na matalua a kufuila muntu belanga kuishimba lusa mu binyibinyi. w22.06 4 ¶10-11

Su okuete kukusha bana boobe bupenka sunga obe na mulume oobe ta nui mu lulanguilo lumune, ikala mushinkamishe’shi kileshesho kiobe kia lukumiino akinyingisha booso bakuifunyishe. Bi kuikala naminyi su muana t’alondo biomulungula? Tentekiesha’shi abitungu nsaa ibungi bua kulongiesha muana. Nsaa yokunu lutete we mulombene kuiyipusha ingi nsaa su luikukula bu mutshi na kutuusha bikuba. Sunga tatuuku’shi mutshi aukatuusha bikuba, atutungunuka na kuiwela meema bua kuiwupa mushindo waudia kukula. (Mak. 4:​26-29) Mu mushindo umune, obe nyina bana we mulombene kuiyipusha su mu bioso biokitshi okuete okumu eshimba dia bana boobe. Tue mulombene kukunkusha bitshibilo abiata bana boobe nya. Anka su botungunuka na kukita kioso akitungu bua kuibalongiesha, we bapa mushindo wibuwa wabadia kufika ba kuuku b’Efile Mukulu. w22.04 19-20 ¶16-17

Pabaadi Salomone bu mulanguidi a Yehowa sha lulamato, baadi na nkatshinkatshi pabimutale aye nabene. Pabaadi ki nsongualume, baadi muiwukie mikalo ya kiukilo kiaye na batekiele bua’shi Yehowa amukunkushe. (1 Bf. 3:​7-9) Ku mbangilo kua kumunana kuaye, Salomone baadi muiwukie dingi’shi bi masaku bua kuikadika na kuitatula. Bi malua, muanda kunyima Salomone nabene babofuile bua kutumikila elango diaye’ye nabene. Ingi nsaa mu kumunana kuaye, tabaadi na kuitatula abanga kuluba ku kibaabadi abamutekie kui Efile Mukulu. Bu kileshesho, umune wa ku miya ubaadi awamba’shi: “Mfumu muina Ebelu tee naa kya kwikala dimo na bungi bukile bwa bakashi, bwa kupela kupambul’eshimba dyaaye.” (Miy. 17:17) Salomone baadi mupele kukookiela uno muiya, na bayikeele na bakashi 700 na makupi 300! (1 Bf. 11:​1-3) Pangi Salomone baadi amono’shi: “Tabia kuikala bu masaku kuadi.” Angi mafuku, Salomone tabaadi akiengie pa muanda wa bipeta bi bubi bibaadi abituku mu kuushi kookiela kuaye kua Yehowa.—1 Bf. 11:​9-13. w22.05 23 ¶12

Lelo uno, bantu be na kitshibilo kikata akitungu kuata. Abakakumiina kukuatshishena Yehowa Efile Mukulu bu Mfumu e buwa a eyilu na nsenga, sunga’shi abakashaala kunyima kua uno muishikuanyi mukata, Satana Diabulu? Takui muntu ashaala kushi kuikala ku lupese kampanda nya. Kitshibilo ki’abaata akikala na bukitshishi ku muwa wa ikalayika wi ku mafuku aafiki. (Mat. 25:​31-33, 46) Mu kipungo kia “mpombo ikata,” abakeele bantu bitundwilo bua abakapanda sunga abakabutudibua. (Kibaf. 7:14; 14:​9-11; Es. 9:​4, 6) Su buata kitshibilo kia kukuatshishena bukunkushi bua Yehowa, wata kitshibilo ki buwa ngofu. Binobino okumiina kukuasha bangi buabadia kuata kino kitshibilo ki buwa. Miabi ayikapete bano booso abakuatshishena na lulamato looso bukunkushi bua Yehowa. Atukitshi kalolo nsaa y’atulongo bino bia binyibinyi bi na muulo ukata. Su tubakitshi biabia, abitukuasha buatudia kunyiisha kuikala na kitshibilo kia kufubila Yehowa. Kukatusha biabia, tui balombene kufubisha mianda ibatulongo bua kukuasha bangi bua’shi baate bitshibilo bi buwa na batungunukie na kufubila Yehowa. w22.05 15 ¶1-2

Abitungu tuteemeshe Yehowa, kushi kuteemesha beshikuanyi betu. Yoobo baadi ateemesha kalolo nsaa ibaadi Yehowa akula naye. Efile Mukulu baadi munangushene na Yoobo pa kuamba’shi: ‘Nauuku kalolo kintu kioso kikukitshikile. Onangushena’shi ntshi mulombene kukupasukila?’ Yoobo baadi mualuule na kuiyisha kooso, na atumbula Yehowa bua kalolo kaye. Bambile’shi: “Naapushanga nkumo yoobe kwi babeesambanga, binobino neemwen’ami nabeene.” (Yob. 42:5) Yoobo baadi mushaale mu buto, mbidi yaye ibaadi i na malonda, nsaa ibaakuile ano mayi. Sunga mbiabia, Yehowa baadi mushinkamiishe Yoobo kifulo Kiaye, na kumushinkamiisha’shi mmumukumiine. (Yob. 42:​7, 8) Sunga lelo uno namu, bantu mbalombene kuitukaa na kuitukitshiina mianda nka bu atue bashi na muulo. Mbalombene kutompa kuluisha nkumo yetu’tue banabene, sunga ya ndumbuluilo eetu. Muanda wa Yoobo awitulongiesha’shi, Yehowa mmushinkamishe’shi atushaala nka na lulamato kuadi nsaa y’atufumankana na bitompuanga. w22.06 24 ¶15-16

Sunga biekala’shi muiyilu abakeele tukundakunda tua muloo nsaa y’abakabutula Babilone mukata, akukekadika’nyi kingi kintu akikebatuadila’nyi muloo ukata. (Kibaf. 19:​1-3) Kiakia kintu, mu binyibinyi, ki na muulo ukata ki mu mukanda wa Kibafumbwilwe—nyi “eyibakishi dia muana a mukooko.” Bedibue muimu booso 144000, abakekadika bapue kuenda muiyilu kumpala kua’shi ngoshi ya Armagedone ibangie. Biabia, kino t’akikekadika kipungo kia eyibakishi dia muana a mukooko nya. (Kibaf. 21:​1, 2) Eyibakishi dia muana a mukooko, adikakitshika kunyima kua ngoshi ya Armagedone kukitshika, na booso beshikuanyi b’Efile Mukulu, babaapu kubutudibua. (Mis. 45:​3, 4, 13-17) Eyibakishi dia muana a mukooko, adipushisha kinyi bua booso abakedikitshi? Eyendo, bu bi eyibakishi ndisangie na balume na mukashi pamune, biabia dino eyibakishi dia mu kifuanyi adilesha buumune bua Nfumu, Yesu Kidishitu, na “mukashi aaye,” bedibue muimu 144000. Kino kintu ki na muulo ukata, nyi nkutudibua kua Bufumu bupia abukamunana pa nsenga munda a bipua 1000.—Kibaf. 20:6. w22.05 17 ¶11-13

Yesu batemukile’shi mu kipungo kia mafuku a ku mfudiilo, akatuulu “mpika a lulamato na mudimukie” buadia kutushanga bidibua bia mu kikudi. (Mat. 24:45) Bino abilesha’shi mbia binyibinyi. Mukunkushi eetu kuete afubisha kasaka kapeela ka balume bedibue muimu, buakadia kupa muilo w’Efile Mukulu “bidibwa pa nsaa ikumbane” na kuiwupasukila mu kikudi. Bano balume, ta be na mueneno a bu bakata be panundu pa lukumiino lua bangi nya. (2 Kod. 1:24) Mu kuilekeena na biabia, abauku’shi Yesu Kidishitu ngi ‘mfumu na nsha matalwa’ kui muilo waye. (Yesh. 55:4) Kubanga nka mu kipua kia 1919, mpika a lulamato na mudimukie mmulumbuule mikanda ilekeenelekeene ayipa bantu bapia abakumiina bia binyibinyi bua musuusa wa kumpala, mushindo wabadia kulonga bia binyibinyi bia Muiyi di’Efile Mukulu. Mu kipua kia 1921, mpika baadi mutushe mukanda wa La Harpe de Dieu bua kukuasha bantu abakumiina kulonga malongiesha aatukila mu Bible. Bu bikuete kushintuluka bipungo, kui mikanda i bungi ikuete kutukanga. Mmukanda kinyi ukukuashe bodia kuuka na kufula Nshetu e muiyilu? w22.07 10 ¶9-10

Yehowa mmuntu shaa kalolo kakile. Kintu kioso ki’opa Yehowa aye akakupa bi bungi kukila paapa. (Mak. 10:​29, 30) Akakupasukila ngofu, akakufute, akalombashe nkalo ya mu nshalelo oobe, sunga biatudi bekale mu uno ndumbuluilo e bubi. Uno mpenda mbangilo. We mulombene kufubila Nshobe sha kifulo bua losoo. Kifulo ki pankatshi p’obe na Nshobe akikatungunuka nka na kutama. Bu bi Yehowa nga ikalaika, n’obe namu okeekala na muwa wa ikalaika. Nsaa yuele matabula a kuitshipa na kubatshishibua, we na kineemo kikata kia kupa Nshobe kintu kampanda ki na muulo ukata. Mmukupe kintu kioso ki buwa, na kipungo kia muloo kioshopetele dingi kashaa. Bua kumukitshina namu naaye, we mulombene kupa Mupangi a eyilu na nsenga kintu kampanda kiashi nakio, kiakia kintu nyi nkuitshipa koobe na kuilambula bua kumufubila. (Yob. 1:8; 41:11; Nki. 27:11) Uno nyi mushindo wi buwa odia kufubisha nshalelo oobe! w23.03 6 ¶16-17

Nsaa y’oki nsongua, malaka a kukita lusandi, ngalombene kuikala e bukopo, na ingi nsaa bangi mbalombene nkutakula bua kuilukita. Satana nyi akumiina’shi we bikite. Nkinyi kilombene nkukuasha bua kulama muikeelo wi selele? (1 Tes. 4:​3, 4) Mu nteko y’oobe ya bupenka lungula Yehowa biepusha, na mutekie akupe bukome bua kukambila bianka. (Mat. 6:13) Tentekiesha’shi Yehowa akumiina nkukuasha, na t’akutopeka nya. (Mis. 103:​13, 14) Tokimbanga bia kupudisha mianda obe nabene. Esambe na baledi boobe pabitale lukalakashi loobe. T’abikalaa bi bofule bua kuisamba na muntu pabitale mianda yoobe nya, anka bi na muulo kuibikita. Nsaa y’obadika Bible na kunangushena ku mayi a kulonda e muanka, osangana’shi mbibofule bua kuata bitshibilo abisankisha Yehowa. Osangana’shi t’okekala na lukalo na muiya aukukunkusha pa muanda ooso, muanda okauuku abinangusheena Yehowa pa muanda ooso. w22.08 5 ¶10-12

Mfumu a kifuko muina Kidishitu ataa mashito aaye a kupasukila nkalo ya bintu bia ku mbidi bia kifuko kiaye na muulo. Su we mfumu a kifuko, we kalakasha bua kupeta ka kudia, na mushindo wa kufutshila nshibo bua kifuko kiobe. Pangi we na moo wa’shi su boshimisha mudimo oobe, abikuikeela bukopo boodi mulombene kupeta ungi. We kunangusheena’shi tue koobesha nshalelo na makuta apeela. Satana moobeshe kuimika bafubi be bungi ba Yehowa, baleka kumufubila nka pa muanda wa uno moo. Satana kuete kuitshisha bua’shi atompe kuitukuminyisha’shi Yehowa te tupasukilaa pa bupenka, na’shi ta muitufule na ta mulombene kuitukuasha buatudia kupasukila kifuko kietu. Ngi buakinyi tui balombene kunangusheena’shi, abitungu tukite kioso akitungu bua kulama mudimo wetu. Na tui balombene dingi kukita ingi mianda ilombene kuikala bu masaku ku kipuano kietu n’Efile Mukulu. w22.06 15 ¶5-6

Atuuku’shi Efile Mukulu eetu ‘nsha lusa na kifulo, shyakwatâ nsungu bukidi, muûle ndâ na kifulo ki na lulamato na bînyibînyi.’ (Efi. 34:​6, EEM) Yehowa mmufule kululama. (Yesh. 61:8) Abimutapaa kuishimba p’etumono atukiengie, na ekuanka bua kukatusha makienga ooso, pa nsaa yadi mutshibe. (Yel. 29:11) N’atue namu tukuete kutengiela na kinsukunsuku kioso, kino kipungo ki buwa! Tui bafule Yehowa ngofu! Nkangi kabingilo kinyi ka buakinyi tui bafule bia binyibinyi? Bia binyibinyi bikuete kuitutuadila miabi i bungi. Tubande kutala kileshesho kimune. Mu bia binyibinyi bi mu Bible, mui mpaa na lukulupilo lua mafuku aafiki. Anka bi nyindo mmulombene kuimika buato pamune, lukumiino luetu luimeene mu Bible ndulombene kuituimika pepoo, nsaa y’atufumankana na bitompuanga mu nshalelo eetu. Mu kifundue kietu kia lelo, Mpoolo baadi akuila bena Kidishitu bedibue muimu be na lukulupilo lua kuenda muiyilu. Ano mayi aakuila dingi bena Kidishitu abatengiela kupeta muwa wa ikalayika mu Mpaladiso pa nsenga. (Yo. 3:16) Mu binyibinyi, kulonga pabitale lukulupilo lua muwa wa ikalayika, nkuitupe nshalelo e buwa. w22.08 14-15 ¶3-5

Kifulo ngi kitako kia lukulupilo. 1 Bena-Kodinda shapitre 13 alesha bipindi bi bungi bia kifulo bilombene kuitukuasha buatudia kuinyingisha sunga kunyingisha dingi lukulupilo luetu mui bangi. (1 Kod. 13:​4-8) Bu kileshesho, verse 4 amba’shi: ‘Kifulo kii na lwishiinko lukata na kalolo.’ Yehowa e na luishinko lukata kuatudi, sunga nsaa y’atumuluishiisha. Biabia, ngi abitungu’shi tuikale na luishinko kui bakuetu balume na bakashi su babakula sunga kukita kintu akitufiitshisha munda sunga kuitutapa kuishimba. Verse 5 akumbasha’shi: “[Kifulo] takikitaa mwanda ushiulombane.” Ta tui balombene kulamina bakuetu balume na bakashi sungu mu binangu bietu bua nkatentekiesha biabadi betufiitshishe munda mu mafuku aafiki nya. Mulungudi 7:9 amba’shi: ‘Ta twi balombene kukwata nsuungu bukidi.’ Kuikitshisha bua kumona bakuetu balume na bakashi bu abibamonaa Yehowa. Efile Mukulu mmuibafule na t’alamiinaa bubi bua miluisho yabo nya. Na atue namu tatulamanga yaya nsungu. (Mis. 130:3) Pa mutue pa kuimeena nka pa bilubilo biabo, abitungu kuikitshisha bua kutala ngikashi y’abo i buwa. w22.09 3-4 ¶6-7

Mukanda wa Ndanyele aulesha mianda ikata ayikamueneka mu mafuku a ku mfudiilo. Bu kileshesho, Ndanyele 12:​1, alesha’shi Mikaele, Yesu Kidishitu, “Akemana ku lupese lua muilo w’Efile Mukulu.” Kiakia kipindi kia butemuki, kibabangile kulombana mu 1914, nsaa ibabatudile Yesu bu Mfumu a Bufumu bu’Efile Mukulu muiyilu. Ndanyele baadi mutemukie dingi’shi Yesu “akebwo” mu “enyi aa mafuku, a malwa akata ashyekele kwanka kashaa milo ya bantu yekala kwanka.” Aa “mafuku a malwa akata” nyi mafuku a “mpombo ikata” abadi baleshe mu Mateo 24:21. Yesu akemana sunga’shi akakaluila muilo w’Efile Mukulu ku mfudiilo kua kipungo kia kenyongoshi kakata, kuamba’shi ku Armagedone. Mukanda wa Kibafumbwilwe aulesha bano bantu bu “kibumbu kikata kia baaba abafiki ku mpombo ikata.”—Kibaf. 7:​9, 14, Kilombeeno Kipya 2014. w22.09 21 ¶4-5

Biabia mashina e mu mukanda wa muwa binobino, ngalombene kushimibua sunga kukumunua. Binka bu’shi Yehowa bafundile ano mashina na crayon. (Kibaf. 3:5) Abitungu tushinkamiishe’shi eshina dietu ndishaale mu mukanda wa muwa nka bu bibaabadi bedifunde na Ancre kubanga ku kibangilo. Kisaka kimune kia mashina afundibue mu mukanda wa muwa nkikitshibue na bano babadi basangule bua nkamunana pamune na Yesu muiyilu. Muyile mayi a Mpoolo kui “bena mufubo naye” ba mu Fidipe, mashina a bano bedibue muimu babadi betanyine bua nkamunana pamune na Yesu, ngafundibue mu mukanda wa muwa binobino. (Fid. 4:3) Biabia, bua kulama mashina aabo mu uno mukanda wa mu kifuanyi, abitungu bashaale na lulamato. Kunyima kuabo kuedibua kitampi kia nfudiilo mashina aabo aakafundibua mu uno mukanda bua losoo. Bino abikatshika pangi kumpala ku’abo kufua sunga kumpala kua’shi mpombo ikata ibangie.—Kibaf. 7:3. w22.09 14 ¶3; 15 ¶5-6

Tobomuene namu uno muanda su? Muntu kampanda bakuteekiela bingi bidibua bi’okuminaa. Kadi pa muanda wa’shi okitshi mianda lubilo-lubilo sunga’shi we na bi bungi bia kukita mu binangu biobe, we kuibidia lubilo-lubilo okutua kupusha buinyi buwa buabio. Kunyima obe bapudisha kudia, bomono’shi w’ekidianga lubilo-lubilo na kunyima bokumiina’shi w’ebidie namu bipeela-bipeela bua kupusha buinyi buwa buabio. Bi kuikala bi mumune na nsaa y’atubadika Bible. Ingi nsaa tuikubadika Bible lubilo-lubilo, na tuakutua kusangeela winyi mukandu wi muanka. Ata nsaa ya kusangeela bi’obabadika Muiyi di’Efile Mukulu, emone bu’be baadi pa wawa muanda obadikanga, otompe kupusha diadia eyi mu binangu, na onangusheene pabitale bi’obadikanga. Su bokitshi bino, onyisha kuikala na muloo. Yesu mmutule “mpika a lulamato na mudimukie” buadia kutusha bidibua bia mu kikudi pa nsaa ilombane, na tukuete kudishibua mu kikudi kalolo kakile. (Mat. 24:​45, NWT) Bifundue biyokielue ngi bikadikie kitako kia bintu bioso biabatushaa kui mpika a lulamato na mudimukie.—1 Tes. 2:13. w22.10 7-8 ¶6-8

Bible mmupue kulesha’shi mu mafuku a ku mfudiilo, amuikala bantu be bungi abasepeshenaa. (2 Mp. 3:​3, 4) Bakuete kukita bino, muanda abakumiina kulonda “ngabiabi yabo ibi.” (Yu. 7, 17, 18, Kilombeeno Kipya 2014) Mushindo kinyi watudi balombene kushinkamisha atue banabene’shi t’atulondo bantu abasepeshenaa? Mmushindo umune, nkuleka ba kuuku abalesha kinangu kia kuakula mianda i bubi pabitale ndumbuluilo. (Mis. 1:1) Bino abipushisha’shi, ta tui balombene kuteemesha sunga kubadika kintu kampanda akituukila kui bantu basumbule lukumiino. Na dingi bino abilesha’shi su ta tui bamdimukie, abikala bibofule bua kuikala na kikudi kia kuakula bibubi na kubanga kuikala na mpaka pabitale Yehowa na buludiki buatupete mu ndumbuluilo aaye. Bua kusumbula uno muikeelo, abitungu tuiyipushe atue banabene’shi: ‘Ne mushinkamishe’shi kui muanda kampanda wi bubi wandi mulombene kuakula nsaa yatupete buludiki bupia sunga mpatuluilo mupia? Ne na kinangu kia kumonanga nka bilubilo bia bano booso bakuete kukunkusha?’ Su tubalekie kuikala na kino kinangu musuusa umune, Yehowa asanka neetu.—Nki. 3:​34, 35. w22.10 20 ¶9-10   

Kikudi ki’Efile Mukulu kibaadi kinyingishe Esekyele mu mudimo wa kulungula mukandu wi buwa, kui bantu basha “mitue i bukopo na basha mashimba apape.” Yehowa balunguile Esekyele’shi: “Namfisha naamu lukyebo loobe lupape bii lukyebo lwabo, mpala yoobe naamu ipape bii mpala yaabo. Naapapisha namu mpala yoobe buu ebwe dya dyaàmaà, dipape kukila munoono; twebatshiinyi toosuusu kumpala kwabo.” (Es. 3:​8, 9) Bibaadi nka bu’shi Yehowa baadi alungula Esekyele’shi: ‘Tolekanga mitwe ya bantu i bukopo yakubofusha. Nakakunyingisha.’ Kunyima kua paapa kikudi kiselele ki’Efile Mukulu ki baadi kikunkushe Esekyele munda a mafuku e bungi, bua kulungula mukandu wi buwa mu terituare aaye. Esekyele bafundile’shi: “Anka eyaasa dya Yehowa dibaadi pandi bii bukopo.” Mutemuki Esekyele batshile lubingo lushima bua kulonga na kupusha mukandu ubaadi akalungula. (Es. 3:​14, 15) Akupu, Yehowa bamukunkuishe kuibanda na “kikudi kiselele kibatwele mwadi.” (Es. 3:​23, 24) Esekyele baadi muilumbuule bua kubanga mudimo wa bulungudi. w22.11 4-5 ¶8-9

Mutemuki Abakuke baadi mupete nkalakashi i bukopo ibungi. Angi mafuku, baadi mubangie kuikala na mpaka’shi Yehowa ta mupasukilaa, anka baadi mulungule Yehowa bi’epusha mu luteko. Yehowa baadi mualuule ku luteko alutuukila kuishimba lua mufubi aye sha lulamato. (Aba. 2:​2, 3) Kunyima kua Abakuke kunangushena ngofu pabitale mushindo ubaadi Yehowa mupashe muilo waye, bapatele dingi muloo. Baadi mushinkamishe dingi’shi, Yehowa kuete kumupasukila na amukuasha bua kunyingiila lukalakashi looso lualua. (Aba. 3:​17-19) Bino abitulongiesha kinyi? Nsaa y’opete nkalakashi i bukopo, teka Yehowa na omulungule bi’epusha. Akupu okimbe bukuashi buaye. Su bokitshi bino, okashinkamisha’shi Yehowa akakupa bukome bodi nabo lukalo bua kunyingiila. Na nsaa yomono bia kukuasha, lukumiino lobe muadi alunyisha kunyinga. Su boshaala nka na biubishi bia mu kikudi, noobe namu tokatadiila nkalakashi i bukopo sunga mpaka ikuabuule na Yehowa.—1 Tim. 6:​6-8. w22.11 15 ¶6-7

Yesu na bano bantomboshi babidi babaadi ku lupese luaye, babaadi bakiengie ngofu nsaa ibabapushishe’shi tabadi peepi na kufua. (Luk. 23:​32, 33) Bano bantomboshi booso babidi bababangile na ngakuilo a kukaa Yesu. (Mat. 27:44; Mak. 15:32) Umune a kuabadi baadi mushintuule eshimba diaye, aye nkuamba’shi: ‘Ontentekyeshe naamu p’okekala mu Bufumu boobe.’ Yesu bamualuluile mayi e mu kifuendue kietu kia lelo. (Luk. 23:​39-42) Mayi a Yesu kui uno ntomboshi ngalombene kuitutakula mu kunangushena pabitale abikekala nshalelo etu mu Mpaladiiso. Biabia tuibalombene kulongiela kintu kampanda pabitale Mpaladiiso kukiila ku butaale bubaadi mu bukunkushi bua Solomonyi. Bible akula’shi Yesu mmuikale Solomonyi mukata akafubu pamune na bakunkushi naye, akafuisha nshalelo e buwa pa nsenga. (Mat. 12:42) Bua kuakula kalolo, abitungu “ingi mikooko” ipaane mu kufuba ngofu bua kulombasha ngikashi itekibue buayidia kuikala na muwa wa ikalaika mu Mpaladiiso.—Yo. 10:16. w22.12 8 ¶1; 9 ¶4

Yeshaya etushinkamisha’shi Yehowa akateemesha na kalolo nsaa yatumuididila na etualuula kushi kunyengakana ku nteko yetu. Yeshaya alombasha dingi’shi: “Akualuula nka’ye kyapusha musaase oobe.” Bino bishima abitunkankamisha’shi, Nshetu e muiyilu e na lukalo lukata lua kukuasha baba booso abamutekie bukuashi. Kuuka bino, akuitukuasha buatudia kunyingiila na muloo. Yehowa ateemeshaa nteko ya muntu ooso a kuatudi na kalolo kooso. Buakinyi tui kuamba bino? Mu kipindi kia kumpala kia shapitre 30, a mukanda wa Yeeshaya, kishima “anue” mbekifubishe ku bungi muanda Yehowa baadi alungula muilo waye mu kisaka. Anka mu verse 19, kishima “obe” mbekifubishe bua kulungula muntu pa bupenka. Mukandu wabadi bafunde kui Yeshaya, aulungula muntu pa bupeenka’shi: “Tokadidi dimo nya,” “akakulesha kalolo,” “akakualula.” Pa muanda Yehowa Nshetu sha kifulo, aye amonaa muntu ooso a kuatudi pa bupenka na ateemeshaa nteko ya muntu ooso a kuatudi na kalolo.—Mis. 116:1; Yesh. 57:15. w22.11 9 ¶5-6

Lungula mukandu wibuwa, olongieshe bantu, muanda p’abetubingabinga abitutuadila muloo na butaale. Mu siekele a kumpala pabaadi bakata ba bena Yuda batum’eyi bua’shi bapeleshe batumibua’shi tabalungulanga mukandu wibuwa, baaba bana balume basha lulamato babaadi basangule bua kukookiela Efile Mukulu. Babaadi batungunukie na kulungula mukandu wibuwa, na uno mudimo ubaadi wibape muloo wi bungi. (Bik. 5:​27-29, 41, 42) Binyibinyi, nsaa y’abemika mudimo wetu abitungu tuikale atulungula mukandu wibuwa mu bufiebufie. Biabia su tubekitshisha na muetu mooso atupete butaale abutuukila mu kusankisha Yehowa, na mu kutuusha mukandu aupaasha miuwa ya bantu. Tuikaleyi bashinkamishe’shi sunga tuekala mu kipungo ki bukopo, tui balombene kuikala na butaale. Mu nsaa i bino abitungu tutentekieshe’shi butaale buatudi naabo lukalo nyi mbutaale na nka penda Yehowa nyi etupeeya buanka. Kulupila muadi nsaa y’opete bipupa bia mikumbo, masaku aatukila ku bintu bipangibue, sunga kubinguabingua. Shaala mulamate ku ndumbuluilo aaye. Tala nka kumpala, kui mianda i bungi ayikutengiela mu mafuku aafiki. Nsaa y’anukitshi bino, ‘Efile Mukulu sha-butaale ekale neenu.’—Fid. 4:9. w22.12 21 ¶17-18

Abitungu tuikitshishe ngofu bua kukita bino. Ku mianda yatudi balombene kuikitshisha ngofu bua kuiyikambila, mui butomboshi, nsungu, na bukitekite. (Ef. 4:​31, 32) Buakinyi bino bi kuikala lukalakashi? Muanda ingi ngikashi i bubi ngipue kumena mishi munda muetu. Bu kileshesho, Bible akula’shi bangi bantu be na “bukidi bwa kukwata nsungu” na “kutomboka-tomboka.” (Nki. 29:22) Muntu e na ino ngikashi i bubi, abitungu atungunukie na kuikitshisha buadia kushintuluka sunga kunyima kuaye baapu kubatshishibua. (Lom. 7:​21-23) Teka Yehowa pabitale buikashi bui bubi boodi na lukalakashi lua kushintuluka, oshinkamishe’shi akuteemesha na akukuasha. (1 Yo. 5:​14, 15) Sunga Yehowa t’akukatuisha ino ngikashi i bubi mu kilengieleshi, e nkupa bukome bua’shi ino ngikashi tayikukambilanga dingi. (1 Mp. 5:10) Nsaa y’okiotengiela, kita mianda ipushene na nteko yobe kushi kunangushenanyi ku mianda ilombene nkualusha ku bumuntu bua kala. Na tolekielanga binangu biobe biayimeena nka pa mianda ishii buwa.—Fid. 4:8; Kol. 3:2. w23.01 10 ¶7, 9-10

Mushindo umune watudia kulesha kifulo kietu, mpa kuikala na kisumi mu mudimo wa kulungula mukandu wi buwa. Atuisambaa na bantu booso batufumankana nabo, t’atuikalaa na ntondo bua muntu su ngumune bua ekoba diaye, kabila kaye, bupeta buaye, sunga kilongielo kiaye nya. Su tubakitshi bino, atuikala atufubu bipushene na mpango ya Yehowa ya’shi: “Bantu booso beekale bapaashiibwe na’shi bafikye ku kiwukilo ki’eyendo.” (1 Tim. 2:4) Atulesha dingi kifulo kietu bu’Efile Mukulu na bua Kidishitu pa kulesha kifulo bua bakuetu balume na bakashi. Tui kuiatshila nsaa ya kuibapasukila na kuibakuasha nsaa yabadi mu nkalakashi. Tui kuibasamba nsaa yabadi bashimishe muntu abadi bafule, tui kuibatembela nsaa yabadi na maladi, na kuikitshisha na muetu mooso bua kuibanyingisha nsaa yabadi batshobolokie kuishimba. (2 Kod. 1:​3-7; 1 Tes. 5:​11, 14) Tui kutungunuka na kuibatekiela muanda atuuku’shi: “Luteko lwa kwisendeela lwa [muntu] mululame alufuba na bukome bwi bungi.”—Shak. 5:​16, Kilombeeno Kipya 2014. w23.01 28-29 ¶7-8

Nka abiendaa muntu ayibaka na kulumbuula ngobesha yaye muenda mafuku, na atue namu tui balombene kuilumbuula kalolo bua kunyingisha bakuetu. Tui balombene kukuasha bangi buabadia kunyingiila bitompuanga, pa kuibalesha bileshesho bia bantu babaadi banyingiile bitompuanga mu mafuku a kala. (Eb. 11:​32-35; 12:1) Tui balombeene kulama butaale nsaa y’atuakula mianda i buwa y’atumono kui bangi, na tui balombene kuibulama nsaa y’abutompibua bua’shi buluile, na tui balombene kuibualusha nsaa ayituku kuikutuena. (Ef. 4:3) Tui balombene kutungunuka na kunyingisha lukumiino lua bakuetu balume na bakashi, pa kuibalungula bia binyibinyi bia mu Bible bi na muulo, kuibakuasha na bintu bia ku mbidi, na kukuatshishena ooso yawa babofula mu lukumiino. Tui balombene kuikala na muloo na kusanka na biatudi nabio, nsaa y’atukuasha bakuetu balume na bakashi ba mu kakongie buabadia kunyinga mu lukumiino. Mu kuilekeena na kuibaka kua ku mbidi akuluilaa, mudimo wetu wa kuibaka kua bantu mu kikudi, akushaala bua losoo! w22.08 22 ¶6; 25 ¶17-18

Yesu baadi muleshe eyikashi di na muulo aditungu’shi tuikale nadio, su atukumiina kupusha biatubadika Muiyi di’Efile Mukulu, ndushinguluilo. (Mat. 24:15) Lushinguluilo nkinyi? Nyi ngobesha ya kutundula kuipushena kui pankatshi pa binangu bia bantu babidi, na mushindo wabidi bilekeene na bia ungi bua kumona muanda ushaupushika kalolo mu yaya nsaa. Kukatusha biabia, Yesu balesheshe dingi’shi, tui na lukalo na lushinguluilo bua kutundula mianda ikata ayilombasha matemuki a mu Bible. Tui na dingi lukalo na dino eyikashi, buatudia kumona mushindo wa kukuashibua ngofu ku muanda ooso watubadika mu Bible. Yehowa mmupe bafubi baaye lushinguluilo. Biabia abitungu wele lutelo kui Yehowa, omutekie bukuashi bua kudima dino eyikashi. Mmushindo kinyi oodi mulombene kukita mianda ayipushena na luteko loobe? Taluula mianda y’obadika kalolo, na olamiine mushindo w’ayakula ingi mianda y’ouku. Kimba bua kushinguula akipatuula mukandu wa mu Bible, na kumona mushindo wa kuiutumikila mu nshalelo oobe. (Eb. 5:14) Nsaa y’obadika na lushinguluilo, mpushiisho oobe a Bifundue anyiisha kutama. w23.02 10 ¶7-8

Banda kupuandikisha’shi kuuku obe bakupa kintu ki buwa ngofu kia kala kishingie mpendi, kadi nkipue kutootoka ingi mpendi takidi matoba-matoba na mitantamitanta. Sunga mbiakidi kipue kuluila, kuikishinga ingi mpendi akuikipa muulo wa midiyo ya ndolare. Kushi mpaka osankila kino kintu na kuikilama ngofu. Mu mushindo umune, Yehowa mmuitupe kia buntu ki na muulo ukata, nkia buntu kia muwa. Biabia, Yehowa muituleshe muulo wi nao muwa wetu, pa kuitupa Muana aaye bu nkuulo. (Yo. 3:16) Yehowa ngi Nsulo ya muwa. (Mis. 36:9) Mpoolo mutumibua baukile bino bia binyibinyi nsaa ibakuile’shi: “Mwanda mwadi’ye nyi mwatudi bapetele muuwa, kusaanasaana, na kiikeelo kyeetu.” (Bik. 17:​25, 28) Biabia tui balombene kuamba’shi muwa wetu nkia buntu akifiki kui Efile Mukulu. Bu biadi muitufule, etupeya kiakia kiatudi nakio lukalo buatudia kushaala na muwa. (Bik. 14:​15-17) Anka Yehowa t’akaluilaa muwa wetu mu kilengieleshi nya. Kadi Yehowa etutekie’shi tukite kioso akitungu bua kushaala na mbidi bukome, bua’shi tutungunukie na kumufubila.—2 Kod. 7:1. w23.02 20 ¶1-2

Tui na lutumbu lukata kui Yehowa Efile Mukulu bua Bible! Bible etupa malango e buwa alombene kuitukuasha buatudia koobesha kukambila nkalakashi y’atufumankana nayo lelo uno. Etupa dingi lukulupilo lui buwa bukile bua mafuku aafiki. Muanda wi na muulo, Yehowa mmufubishe Bible bua kuitulesha mishindo i bungi ya bumuntu buaye. Nsaa y’atunangushena pabitale ngikashi yaye i buwa, abikumu mashimba eetu na kuitutakula bua kuifubuila peepi n’Efile Mukulu eetu, na kuikala mu kipuano ki buwa naye. (Mis. 25:14) Yehowa akumiina’shi bantu bamuiwukie. Mu mafuku a kala, Yehowa baadi muileshe ku bukuashi bua bilotua, bimonua, mpaa na ku bukuashi bua ba mikeyilu. (Mb. 12:6; Bik. 10:​3, 4) Ta tui balombene kulonga bino bioso bilotua, bimonua, nsunga mikandu ya ba mikeyilu su ta babaadi beyifunde. Ngi buakinyi, Yehowa baadi mutakule bantu bua ‘kufunda mu mukanda’ mianda ibaadi akumiina’shi tuiwukie. Pa muanda ‘mashinda a Efile Mukulu a biinyibiinyi ngapwidikye,’ tui kushinkamisha’shi uno mushindo wa kuisamba netu wi buwa bukile na awitukuasha.—Mis. 18:31. w23.02 2 ¶1-2

Ata bipatshila abikukuasha. Sangula bipatshila bilombene nkuakuasha bua kunyingisha lukumiino loobe, na kuikadika muina Kidishitu munyingie mu kikudi ngofu. (Ef. 3:16) Bu kileshesho, pangi we mulombene kuata kitshibilo kia kulumbuula kiubishi kiobe kia kulonga na kuibadikila Bible pa bupenka. (Mis. 1:​2, 3) Sunga’shi we mulombene kutompa kuteka misuusa i bungi, na nteko yoobe ayitukila muishimba. Abitungu odimukie ngofu pabitale kukisha kua kapapi kosangula, sunga mushindo ofubisha nsaa yoobe. (Ef. 5:​15, 16) Onyiisha kuikala muina Kidishitu munyingie mu kikudi, nsaa y’okuasha bangi. Bu kileshesho, we kuiatshila kano kepatshila ka kukuasha bakuetu babaapu kukula na balemane ba mu kakongie keenu. Pangi we mulombene kuibakuasha pa kuenda mu kisalue mu nkebaudila bintu, na kuibakuasha buabadia kufubisha tuamo tuabo. We kulesha dingi kifulo kushi penda bantu ba mu kakongie keenu, pa kuibalungula mukandu wi buwa wa Bufumu. (Mat. 9:​36, 37) Su bino bioso bi kukitshika, we mulombene kuibikasha bu kepatshila koobe ka kufubila Yehowa mu mudimo wa nsaa yooso. w22.08 6 ¶16-17