Mueshi wa 9

Nsaa yatufubisha kia buntu kitupe Yehowa mu mushindo wi buwa atulesha bangi’shi tui bafubi ba Yehowa. Atukuasha bantu betuifunyishe bua kumona patooka kuilekena kui “pankatshi pa afubila Efile Mukulu na sha mufubila.” (Mal. 3:18) Bino mbimuenekie’shi mbia binyibinyi mu kileshesho kia mukuetu mukashi abetanyina bu Kimberly. Babamupeele mudimo wa kukita ku kalasa na ungi muina kalasa naye. Kunyima kua’bo kufuba pamune yawa muina kalasa naye bamuene’shi Kimberly mmuilekene na bangi bena kalasa naye. Ta baadi ayipula bantu, na baadi akula mu mushindo wi buwa, na ta baadi akula mu mushindo wi bubi nya. Muina kalasa naye baadi mukanye na kunyima aye nkubanga kulonga Bible na Kimberly. Yehowa asankaa nsaa yatuisamba na bantu mu mushindo awibakaka ku bia binyibinyi! Atue boso atukumiina kuakula mu mushindo autumbisha Yehowa na awitukaka peepi na bakuetu. w22.04 5-6 ¶5-7

Yesu baadi mumufungushe Mariya a ku Magdala baadi ku bukitshishi bua ba demo musambobidi! Lutumbu luaye lubaadi lumutakule bua kuikala mulongi a Yesu, na kukuatshishena Yesu mu mudimo wa bulungudi. (Luk. 8:​1-3) Sunga bibaadi Mariya na lutumbu lukata bua bibaadi Yesu mumukitshiine, ta baadi awuku’shi Yesu mmulombene nkamukitshiina bi bungi mu mafuku aafiki nya. Baadi mulombene kutuusha muwa waye, “bwa’shi ooso akumiina mwadi” akapete muwa wa ikalaika. (Yo. 3:​16, Kilombeeno Kipya 2014) Mariya baadi mutungunukie na kulesha lutumbu luaye kui Yesu pa kushaala na lulamato. Nsaa ibaadi Yesu akiengie ku mutshi wa makienga, Mariya baadi muimane mbuipi muaye muanda baadi akumiina kupasukila Yesu, na baadi akumiina kunyingisha baaba booso babaadi paapa. (Yo. 19:25) Kunyima kua Yesu kufua, Mariya na bangi bana bakashi babidi babaadi batuale bintu ku mashama buabadia kushiika Yesu. (Mak. 16:​1, 2) Yehowa baadi mupe Mariya baadi na muloo wa kufumankana na Yesu, na kuisamba naye kunyima kua kusanguka kuaye, na kino kibaadi kineemo kikata kishibaadi kipete bangi balongi.—Yo. 20:​11-18. w23.01 27 ¶4

Ta tui balombene kukulupila nka penda mu mianda ibatudi bakitshiine Yehowa mu mafuku a kala nya. Sunga pangi tuekala na bukome bupeela kukila bibaatudi kumpala, abitungu tuipaane “mu mufubo wa Muanana,” na bashale bapasukie mpa na ku nfudiilo. (1 Kod. 15:58; Mat. 24:13; Mak. 13:33) Abitungu tuikadikie na kisumi n’eshimba dietu dioso mu lulanguilo luetu. Mukandu wa Yesu kui booso babaadi mu kakongie ka Laodisee ubaadi ushimikie kasele bua pa muanda ubabadi nao wilekeene na tungi tukongie. Babaadi “kifuufu” mu lulanguilo luabo. Bu bibaadi Yesu muituule pa mbalo yabo bebalunguile’shi, nui “baasha malwa na baasha makyenga.” Bibaadi abitungu bekale na katshintshi kakata bua Yehowa na bua lulanguilo luaye. (Kibaf. 3:​16, 17, 19) Ndilongiesha kinyi dibatupete pano? Su boshimisha kisumi kiobe, abitungu obanguule kuikala na lutumbu bua mianda yoso i buwa yabakuete kukukitshiina kui Yehowa na ndumbuluilo aaye. (Kibaf. 3:18) Ta tui balombene kutadiila kukimba kua bintu bia ku mbidi kuakumba binangu bietu, na kutuula mianda ya mu kikudi pa mbalo ya kabidi nya. w22.05 3-4 ¶7-8

Munda mua bipua binunu, Yehowa mmufundishe mukanda wi pabuawo. Mu uno mukanda mui mulongo wa mashina, ubangie n’eshina dia Temue a kumpala sha lulamato Abele. (Luk. 11:​50, 51) Munda mua siekele ibungi Yehowa mmutentekie angi mashina mu wawa mukanda, na lelo uno wi na mashina midiyo. Mu Bible uno mukanda abewitanyina bu “mukanda wa kitentekiesho,” na “mukanda wa muwa.” (Mal. 3:16; Kibaf. 3:5; 17:8) Uno mukanda wi pa buawo, wi na mashina a baaba booso bakuete kulanguila Yehowa na kumutshina sunga’shi be na kanemo kakata na bafule eshina diaye. Be na mushindo wa kupeta muwa wa ikalayika. Lelo uno tui balombene kuikala n’eshina dietu difundibue mu wawa mukanda su atutamisha kipuano kietu na Yehowa kimeene mu mulambu wa nkuulo ya Muana aaye Yesu Kidishitu. (Yo. 3:​16, 36) Booso buetu atukumiina’shi mashina eetu asanganyibue mu wawa mukanda, sunga tuekala na lukulupilo lua kuenda muiyilu sunga lua kushaala pa nsenga. w22.09 14 ¶1-2

Mukanda wa Kibafumbwilwe aulesha “kinyoka kikata kimongolokye.” (Kibaf. 12:​3, Kilombeeno Kipya 2014) Kino kinyoka kikata akilu na Yesu na ba mikeyilu baye. (Kibaf. 12:​7-9) Akituuku muilo w’Efile Mukulu ngoshi, na akipa uno nyema a bukielo sunga guvernema a bena politike bukome. (Kibaf. 12:17; 13:4) Kino kinyoka kikata nanyi? Nyi “nyoka a kala, uno abetanyina bu Diabulu na bu Satana.” (Kibaf. 12:9; 20:​2, Kilombeeno Kipya 2014) Aye nyi kuete kukuatshishena baaba beshikuanyi booso ba Yehowa. Nkinyi akikakitshikila kinyoka kikata? Mukanda wa Kibafumbwilwe 20:​1-3 aupatuula’shi muikeyilu akeele Satana mu lupongo lula, luikale bu luaye lukano sunga mbalo yashi mulombene kukita kintu. Muamua mu lupongo lula, Satana ‘t’akalubisha dingi miilo mpaa na apakalombana bipua 1000.’ Ku mfudiilo a bioso, Satana na ba demo baye na booso abamukuatshishena abakaluishibua na belue “mwishiba dia kaalo na suufule.” Nangushena kapeela apakekala mu nsenga tamuki Satana na ba demo baye. Kiakia kipungo akikekala buwa bukile! w22.05 14 ¶19-20

Yesu baadi mufubi. Mu bipua biaye bia kumpala pano pa nsenga, Yesu baadi mufube bu nseeshi a mabaya. (Mak. 6:3) Kushi mpaka, baledi baye babaadi na lutumbu bua bukuashi buaye bubaadi ekitshisha bua kutusha, bua kupudisha nkalo ya kifuko kiabo kikata. Yesu baadi mupuidikie na mudimo ubaadi akitshi, ubaadi upuidikie! Biabia, bantu be bungi babaadi abakumiina bintu bibaadi akitshi. Yesu, baadi mukumiine mudimo waye ngofu, biabia sunga mbibaadi Yesu etumikila ku mudimo waye, baadi ekitshisha bua kupeta nsaa ya kufubila Yehowa. (Yo. 7:15) Kunyima, nsaa ibaabangile kulungula mukandu wi buwa nsaa yoso, baadi mulangie babaadi abamuteemesha’shi: “Tanufubanga’nka penda pa mwanda wa kwikala na bidibwa abilwilâ, ooo. Bi buwa nufube pa mwanda wa kwikala na bidibwa bishyabilwilâ, dingi, abipânâ mûwa wa ikalaika.” (Yo. 6:​27, EEM) Na mu muisambo waye wa ku muengie, Yesu bambile’shi: “Anka ekongweleeyi bupeta mwiulu.” (Mat. 6:​20, Kilombeeno Kipya 2014) Binangu bi’Efile Mukulu abitukuasha buatudia kuikadika na nkatshinkatshi, pabitale mudimo wetu wa ku mbidi. Bu biatudi bena Kidishitu, tuibalongie bia ‘kufuba . . . , na kukitanga kiakia kii buwa.’ w22.05 22 ¶9-10

Enise mulekiele Timote kileshesho kibuwa. Kushi mpaka, Timote baadi mulombene kumona’shi bikitshino bia nyinaye abitukila ku kifulo kikata kiadi nakio bua Yehowa. Timote bamuene’shi kufubila Yehowa akuikasha nyinami na muloo. Mu mushindo umune banyina bana be bungi mbakuashe bifuko biabo buabidia kufubila Yehowa “kushii Eyi.” (1 Mp. 3:​1, 2, Kilombeeno Kipya 2014) Noobe namu we kukita nka biabia. Mushindo kinyi? Tuula kipuano kiobe na Yehowa pa mbalo ya kumpala. (Miy. 6:​5, 6) Anka bu ba nyina bana be bungi, okuete kuisumina miloo ibungi. Oshimisha nsaa yobe, makuta, tulo na bingi bintu, bua kupasukila nkalo ya ku mbidi ya bana boobe. Anka t’abitungu’shi okishe nsaa ikile bungi ku ino mianda na kukutua nsaa ya kunyingisha kipuano kiobe na Yehowa. Ikala wata nsaa misuusa yooso ya kuela luteko, kuibadikila Bible pa bupenka, na kutuela mu bisangilo bia kakongie. Su bokitshi bino onyingisha kipuano kiobe na Yehowa, na olekiela kifuko kiobe kileshesho ki buwa mpaa na bangi. w22.04 16 ¶1; 19 ¶12-13

Kintu akitunyingisha pa kuuka’shi ta tui na bushito bua kuata kitshibilo kia mushindo wa kutshibila bantu biimu! Bu bikale Yehowa bu Nsushi Mukata mukile booso, akapasukila uno mudimo wi na muulo ukata. (Lom. 14:​10-12) Abitungu tuikale na lukulupilo lukata’shi Yehowa akatshibi biimu mu kuipushena na mayi aye a kulonda apuidikie a ki buwa na ki bubi. (Kib. 18:25) T’ana kakite kintu su nkimune kishi kilulame! Atutengiela na luishinko looso, nsaa yabakakatusha kui Yehowa mianda yoso ibi i na bukitshishi bui bubi, bua bantu bashi bapuidikie na miluisho. Mu kiakia kipungo makienga ooso a ku mbidi na a mu binangu atudi nao aakapuishibua. (Mis. 72:​12-14; Kibaf. 21:​3, 4) T’atukeatentekiesha dingi nya. Bu bia tukuete kutengiela kiakia kipungo ki buwa bukile bua’shi kifikie. Tui na lutumbu lukata muanda Yehowa mmuitupe mushindo wa kumuambula pa kufuilana lusa. w22.06 13 ¶18-19

Nsushi e buwa abitungu ekale apusha miya kalolo. Yehowa auku ki buwa na ki bubi kalolo. Nsushi e buwa abitungu aukie kinyi? Nsushi e buwa abitungu aukie mianda yoso kalolo kumpala kua’shi atshibe kiimu. Biabia Yehowa nyi Nsushi mukile buwa muanda misuusa yoso aukaa mianda yoso kalolo. Kuilekeena na ba nsushi ba bana ba bantu, Yehowa ekalaa na mpushisho mupuidikie a mianda yoso, na mu muanda ooso w’abamulungula. (Kib. 18:​20, 21; Mis. 90:8) Aye t’ayimenaa pa kiakia akimono bana ba bantu sunga kiabapusha nya. Apushaa mu mushindo upuidikie bi bikitshino bia muntu, bi’abikalaa na bukitshishi kueyikashi diadi mupiane kui bamutande, na biabadi bamulongieshe, mbalo yadi mushaale mpaa na biapuandikisha mu binangu. Na dingi, Yehowa auku bi mu mashimba a bantu. Auku kalolo buakinyi muntu bakitshi muanda kampanda. Ta kui kintu kifuame kumpala kua Yehowa su nkimune. (Eb. 4:13) Biabia, Yehowa afuilaa muntu lusa muanda auku mianda yoso kalolo. w22.06 4 ¶8-9

Abitungu tudimukile mayele abaadi Satana mufubishe kui Yoobo, muanda kuete afubisha aa mayele amune kuatudi lelo uno. Satana amonaa’shi ta tui balombene kufula Yehowa Efile Mukulu binyibinyi nya, na’shi tui balombene Kumutombokiela su abitungu’shi tupaashe muwa wetu. Satana apuandikishaa’shi Efile Mukulu ta muitufule, na’shi t’amonaa kuikitshisha kuetu kuatukitaa bua kumusankisha nya. Ku muanda atuuku’shi Satana kuete ekitshisha buadia kuitukambila, ta tui balombene kukumiina ano madimi aaye nya. Abitungu tumone bitompuanga bu mushindo watudia kuiwuka kiatudi bekale atue banabene kalolo. Bitompuanga bibaadi Yoobo mufumankane nabio, bibamukuashiishe buadia kutundula kungi kubofula kui muadi na bua kuikulumbuula. Bu kileshesho, bauukile’shi e na lukalo lua kukimba eyikashi dia kuiyisha ngofu. (Yob. 42:3) Na atue namu tui balombene kulonga bi bungi pa bitutale atue banabene, nsaa y’atunyingiila bitompuanga. Su tubatundula kubofula kuetu, tui balombene kuikitshisha bua kuikulumbuula. w22.06 23 ¶13-14

Yehowa etushinkamiisha’shi etukuasha. Bu kileshesho, anka bu bibaadi Yehowa muakule kumpala’shi nui “Tumonyi twande’mi” akula dingi’shi: “Su okìila mu meema, neekala noobe, pookiila mu myeela, twemwiyinyi’be. Su otambukila munkatshi’a kaalo, taakakushiiki, na ndimi ya kaalo taayikupiisha sunga wekala munkatshi mwako.” (Yesh. 43:2) Bu bi’atuende mu mudimo wa bulungudi tui kupeta ingi nkalakashi i bu meema na bu kaalo. Sunga mbiabia na bukuashi bua Yehowa atutungunuka na kulungula mukandu wi buwa. (Yesh. 41:13) Bantu be bungi lelo uno bakuete kupela mukandu wi buwa. Atuuku’shi p’abasumbushena mukandu wi buwa ta nkuamba’shi tatukuete kulungula mukandu wi buwa kalolo. Atuipusha’shi tui banyinginshibue muanda atuuku’shi Yehowa asanka nsaa y’atutungunuka na kulungula mukandu waye na lulamato looso. Mpoolo mutumibua bambile’shi “muntu ooso akapete bweedi bwaye mupuunda mufubo waye’ye nabene.”—1 Kod. 3:8; 4:​1, 2, Kilombeeno Kipya 2014. w22.11 4 ¶5-6

Lelo uno, tukuete kumona kulombana kua matemuki a mu Bible. Bantu ba ‘bisamba abiakula ndimi yoso,’ bakuete kulonganga bia kuakula “ludimi lui selele” lua bia binyibinyi bia mu Bible. (Sek. 8:23; Sef. 3:​9, NWT) Bantu bakile pa 8000000, ba mu maumbo 240 bakuete kutuelanga mu ndumbuluilo a Yehowa, na ku kipua kioso bantu binunu makumi, bakuete kubatshishibuanga! Kintu ki na muulo kukila buno bungi, nyi ngikashi ya buina Kidishitu na “bumuntu bupia,” biabakuete kukimbanga kui bano balongi bapia bua kuikala nabio. (Kol. 3:​8-10) Be bungi mbalekie bukitekite, baleka etombo, na kuleka ntondo ya tubila. Butemuki bui mu mukanda wa Yeeshaya 2:​4, mbupue kulombana; ‘taabayiyi dimo bya kulwa ngoshi.’ Bu bi’atuikitshisha bua kufuala bumuntu bupia, atukuasha bantu buabadia kutuela mu ndumbuluilo a Efile Mukulu, na atulesha’shi tukuete kulonda Mukunkushi eetu Yesu Kidishitu. (Yo. 13:35) Bino bioso t’abikitshikilaa nya. Yesu ngi kuete kuitupa bukuashi buatudi nabo lukalo. w22.07 9 ¶7-8

Nsaa y’atutekie Yehowa, abitungu tulekie kutenkanga nka luteko luatudi bawubiile. Pamutue pa kuteka biabia, abitungu tutekie Yehowa na kaneemo kakata. Nangushena pabitale bimonua bia kukanya bibabamuene kui Yeeshaya, Esekyele, Ndanyele, na Yowano. Bino bioso bimonua mbileshe Yehowa bu Mfumu mukata. Yeeshaya ‘bamuene Yehowa mmushaale pa lupuna-nsulu lukile bula.’ (Yesh. 6:​1-3) Esekyele bamuene Yehowa mmushaale ku etempu diaye dia muyilu, muifunyishwe ‘n’etâta . . . adipenyapenya bu nkongolo.’ (Es. 1:​26-28, EEM) Ndanyele bamuene “Mukulu a Mafuku” bilamba biaye bibaadi bitooka soo bu mulemba, na ndimi ya kaalo ibaadi ayituukila ku lupuna-nsulu Luaye. (Nda. 7:​9, 10, EEM) Na Yowano namu, bamuene Yehowa mmushaale ku lupuna-nsulu muifunyishue na kingi kintu ki buwa bukile nka bu ebue dia émeraude. (Kibaf. 4:​2-4) Nsaa y’atunangushena bua ntumbo wa Yehowa ishi ya kunangushena, atutentekiesha bukata bua kineemo kia kuifubuila kuadi mu luteko, na muulo wa kukita luteko na kaneemo. w22.07 20 ¶3

Nsongua, Satana atompo bua’shi akukutshishe kuenda koobe kua kumpala mu kikudi. Mushindo umune wadi mulombene kui bikita, mpa kukuikasha na mpaka pabitale angi malongiesha a mu Bible. Bu kileshesho, lelo uno sunga ku kala bangi bantu balombene nkukuminyisha’shi Efile Mukulu ta muitupangie, tui kuanka muanda tui betuukile. Nsaa iboodi muana mukinga, pangi toboodi onangusheena pabitale uno muanda, anka puende na kukula okuete kuibimuena p’abebilongiesha ku kalasa. Abiakula balongieshi boobe bua kukuatshishena uno muanda wa bintu bitukile, we kuibimona’shi nyi biabidi, mbia binyibinyi. Anka tabaatshile namu nsaa ya kutaluula, bua kuuka su kui Mupangi. Tentekiesha eyi dia kulonda di mu Nkindji 18:17 adiamba’shi: “Ku kilumbu, muntu asamba kumpala amwekaa buu mululame; apakafiki aasamba naaya, abanga kumwelesha mpaka.” Pamutue pakuikadika bu mpofu akumiina binangu bioso bibapusha ku kalasa, abitungu tutaluule kalolo bia binyibinyi biatupete mu’Eyi di’Efile Mukulu, Bible, na mu mikanda weetu. w22.08 2 ¶2; 4 ¶8

Atukumiina kupusha akipatuula mianda y’atubadika mu Eyi di’Efile Mukulu. Kadi, kubadika kuetu pangi kui kukutua kuitukuasha. Bu kileshesho, tala muisambo wa Yesu na “mulambukishi a mwiiya.” (Luk. 10:​25-29) Nsaa ibaadi yawa muntu muipushe Yesu akitungu kukita buadia kupeta muwa wa ikalaika, Yesu baadi mumukuashe buadia kupeta lualuulo Muiyi di’Efile Mukulu pa kumuipusha’shi: ‘Nkinyi kifundjibwe mu mwiiya? Obadikaa naminyi?’ Yawa muntu bapetele mushindo wa kutuusha lualuulo lui buwa pakuteemuna bifundue bitale kufula Efile Mukulu, na kufula mukuenu. (Lv. 19:18; Miy. 6:5) Tala bino bibaadi muakule abilondo: “A nnanyi e bu mukwetu?” Uno muntu baadi muleshe’shi ta baadi apusha biabia bibaadi abadika nya. Nyi buakinyi, ta baadi muukie bia kutumikila Bifundue kalolo mu nshalelo aaye. Tui na lukalo lua bukuashi bua Yehowa bua kupusha Bifundue. Biabia, mutekie kikudi kiaye kiselele bua’shi oshaale mutuule binangu ku biobadika, na omutekie akukuashe otumikile mianda yobadika. w23.02 9 ¶4-5

“Bofikile mu kutuela mu bia binyibinyi naminyi?” Kushi mpaka, we mupue kualuula ku luno lukonko misuusa i bungi. Luno nyi ndumune lua ku nkonko y’abakambaa nkuipusha kui bena Kidishitu nobe, nsaa y’abakumiina kukuiwuka kalolo. Atukumiinaa kupusha bakuetu balume na bakashi mushindo wabadi bafikie mu kuiwuka Yehowa na kumufula, na atusangeelaa kuibalungula akipushisha bia binyibinyi kuatudi. (Lom. 1:11) Ino yoso miisambo ayitukuasha dingi, bua kunangushena pabitale bukata bua kifulo kiatudi bafule Temue ooso a Yehowa. Tui bafikie dingi mu kuata kitshibilo, kia “kutambuka mu bya bînyibînyi,” na kia kutungunuka na kuikala na nshalelo etutuadila miabi ya Yehowa na kukuminyibua naye. Tui bafule bia binyibinyi bua tubingilo tui bungi. Kabingilo ke na muulo ukata, tui bafule Yehowa Efile Mukulu, aye Nsulo a bia binyibinyi. Ku bukuashi bu’Eyi diaye Bible, tui bafikie mu kumuiwuka kushi penda bu Nsha bukome booso na Mupangi a eyilu na nsenga, anka tui bamuiwukie bu Nshetu sha kifulo e muiyilu, etupasukilaa na kifulo kioso.—1 Mp. 5:7. w22.08 14 ¶1, 3

Mpoolo mutumibua baadi munyingishe bakuabo balume na bakashi buabadia kulesha kifulo mu “mifubo ibuuwa.” (Eb. 10:24) Baadi mukuashe bakuabo balume na bakashi, kushi penda ku bibaadi akula, anka dingi na ku bibaadi akitshi. Bu kileshesho, nsaa ibatuelele nsala mu Yudeya Mpoolo baadi mukuashe bakuabo pa kuibabila bidibua. (Bik. 11:​27-30) Biabia, sunga mbibaadi Mpoolo muipaane mu mudimo wa kulongiesha na wa kulungula mukandu wi buwa, baadi dingi akimbi mishindo ya kukuasha baaba babaadi mu lukalo lua bintu bia ku mbidi. P’aye kukita bino, baadi munyingishe kishinkamiisho kia balanguidi naye’shi Yehowa ebapasukila. Lelo uno, su tubatusha nsaa yetu, kuikitshisha kuetu, na ngobesha yetu bua kukuasha bapete masaku aatukila ku bintu bipangibue, na atue namu atunyingisha lukumiino lua bakuetu balume na bakashi. Tui kukita’nyi bino nsaa y’atuikala atutusha bia buntu bietu, bua kukuatshishena mudimo wa mu nsenga ishima. Mu ino mishindo na mu ingi, atukuasha bakuetu balume na bakashi buabadia kushinkamisha’shi Yehowa taa n’ebasumbushene. w22.08 24 ¶14

Bible e na matemuki e bungi apue kulombana, angi a ku ano matemuki abaabadi bafunde bipua nkama kumpala ngapue kulombana. Mianda ya kala, ayishinkamisha’shi ano matemuki ngalombane. Bino t’abitukaanyisha nya, muanda atuuku’shi sha matemuki a mu Bible nyi Yehowa. Banda kunangushena pabitale matemuki atale kupona kua Babilone a kala. Angi mafuku pankatshi pa kipua kia 778 na 732 kumpala kua bino bipungo bietu, (K.B.B.,) mutemuki Yeshaya baadi muyokielue, baatemukile’shi kibundi ki bukome kia Babilone akikakuatshibua. Baadi muteemune mpaa n’eshina dia winyi akakuata kiakia kibundi bu Siruse, na baadi mutemukie na ashinkamisha mushindo w’akekikuata. (Yesh. 44:27–45:2) Yeshaya baadi mutemukie dingi’shi Babilone akabutudibua na ashaale kabaaka. (Yesh. 13:​19, 20) Biabia Babilone baadi mupone ku maboko kua bena Mede na bena Perse mu kipua kia 539 (K.B.B.,) na mbalo ibaadi kiakia kibundi kikata, binobino i kabaaka kabadi basumbushene. w23.01 4 ¶10

Yehowa mmuitusangule buatudia kuikala munkatshi mua kifuko kia balanguidi baaye be mu nsenga ishima. Banda kunangushena kineemo kiatudi nakio, na miabi y’akitutuadila! (Mak. 10:​29, 30) Mu nsenga ishima, tui na bakuetu balume na bakashi bafule namu nabo Yehowa, na bakuete kuikitshisha bua kuikala na nshalelo muipushene na mayi aaye a kulonda. Ludimi luetu, kipikua, na fuadilo eetu, mbilombene kuilekeena na biabo, anka atupusha’shi tui bebafule sunga nsaa y’atufumankana nabo bua musuusa wa kumpala. Tui bafule bikishekishe kushaala nabo bua kutumbisha na kulanguila Nshetu sha kifulo e muiyilu! Na abitungu’shi tushaale mu buumune na bakuetu balume na bakashi kukila kumpala. (Mis. 133:1) Ingi nsaa, bakuete kuitukuasha bua kutuala bushito buetu. (Lom. 15:1; Nga. 6:2) Bakuete kuitunyingisha dingi bua kuikala atufubu na katshintshi mu mudimo wa Yehowa, na kushaala banyingie mu kikudi. (Eb. 10:​23-25) Banda kunangushena mushindo watudi balombene kupusha su ta tui na bulami bua kakongie, abuitukuasha bua kuikala banyingie kumpala kua beshikuanyi beetu, Satana Diabulu, na ndumbuluilo aaye e bubi. w22.09 2-3 ¶3-4

Tui balombene kusangana’shi butontshi buetu bua mbidi, bubatudibua mu kitompuanga nsaa y’atufubisha internete. Su ta tui badimukie, tui kuasamuka tubapu kulungula bantu be bungi mianda ifuame ya bangi kushi tue kuiuka. Biabia, tuapua kupalakasha mianda mu internete, ta tui balombene kuuka mushindo wabakeyifubisha nya, sunga masaku ayidi ilombene kufuisha. Butontshi bua mbidi abuitukuasha dingi buatudia kushaala baumiine, nsaa i baluishi neetu abatompo kui tukitshisha bua’shi tuakule mianda ifuame ya bakuetu, ilombene kutuula bakuetu balume na bakashi mu masaku. Bino bi ku mueneka nsaa y’abetuele nkonko kui ba mpulushi mu ma mbolo abadi bemikie mudimo wetu, sunga abadi bakandikie ingi midimo yetu. Tui balombene kutumikila eyi dia kulonda adiamba’shi, “neele kishiko kukanwa” mu mianda i bino sunga mu ingi mianda. (Mis. 39:1) Tui na lukalo lua’shi bantu booso betukulupile, biabikala mu kifuko kietu, kui ba kuuku beetu, kui bakuetu balume na bakashi, mpaa na kui bangi bantu. Na dingi su atukiebe’shi bantu betukulupile, abitungu tuikale na butonshi bua mbidi. w22.09 13 ¶16

Bua kuikala na muloo wa binyibinyi, abitungu tudie bidibua bia mu kikudi. Na tui nabio lukalo. Ngi buakinyi Yesu bakuile’shi: “Muntu takeekala na muwa peenda ku mukate nya, anka ku eyi dioso adituuku kukanwa kwa Yehowa.” (Mat. 4:​4, Kilombeeno Kipya 2014) Biabia, t’abitungu’shi tutadiile efuku su ndimune diatush’abadi bidibua bia mu kikudi abituuku muiyi di’Efile Mukulu di na muulo ukata Bible. Pa muanda Yehowa mmuitufule, muituleshe mu Bible akitungu’shi tukite buatudia kuikala na muloo wa binyibinyi mu nshalelo eetu. Atulongo kikale kepatshila kaaye bua muwa wetu. Atulongo mushindo watudi balombene kuifubuila kuadi na biadia kuitufuila lusa ku miluisho yetu. Na atulongo’nyi pabitale lukulupilo lui buwa bukile luadi muitulee bua mafuku aafiki. (Yel. 29:11) Bino bia binyibinyi bi’atulongo p’atuibadikila Bible, abiwusha mashimba eetu na muloo! Sunga wekala na mianda ayikuinyongosha mu nshalelo oobe, kisha nsaa i bungi mu kubadika Eyi dia Yehowa na kunangushena ku biobadika. w22.10 7 ¶4-6

Tui na kabingilo ke buwa, muanda Bible etunyingisha biatusha kushaala bapatakane. Atupete binangu pa kutumikila mayi a kolonda mu nshalelo eetu. Ku kapeela-kapeela su tubakitshi biabia atukamono abitukuasha Bible bua kusuuka mianda na kuata bitshibilo bibuwa. Abitungu tuitaluule bua kumona biatuende kumpala mu uno muanda. Bu kileshesho, su buelongiela Bible na kutuela mu bisangilo bioso, anka t’obandile kulambula muwa oobe kui Yehowa na kubatshishibua. Abitungu onangushene pabitale kiodi mulombene kukita bua kulombasha kano kepatshila. Su tui bapue kubatshishibua, tukuete kuenda kumpala mu kulongiesha na kulungula mukandu wibuwa su? Bitshibilo bietu bikuete kulesha’shi tukuete kukunkushibua na mayi a kulonda a mu Bible su? Okitshinaa naamu bangi mianda mu mushindo ulombene Yesu kuibakitshina su? Su bomono’shi kui mbalo ayitungu’shi oshintuule, tuula binangu biobe ku ntentekieshi ya Yehowa ayamba’shi ‘Apeya bashi na lushingulwilo binangu.’—Mis. 19:​8, EEM. w22.10 20 ¶8

Esekyele bamuene mushindo wi bukome bua kikudi kiselele ki’Efile Mukulu. Mu kimonua, bamuene mudimo wa kikudi kiselele ku bukome kua bipangua bia mu kikudi, na ku bipombo bikata bia ku etempu dia muiyilu. (Es. 1:21) Esekyele bakitshine naminyi? Atentekiesha kibaadi kikitshie’shi, “Ami pakumona byabya nakupîle mpala mu nsenga.” Esekyele p’aye kumona biabia, bapushiishe moo ukata n’aye kupona mu nsenga. (Es. 1:​28, EEM) Kunyima nsaa ibaadi Esekyele munangushene pabitale kiakia kimonua kia kukaanya, bibaadi bilombene kunyingisha kishinkamiisho kiaye’shi, na bukuashi bua kikudi kiselele ki’Efile Mukulu, mulombene kulombasha mudimo waye wa bulungudi. Yehowa balunguile Esekyele’shi: “Mwana a muntu, ebwe wemane nyi na wakukulungula.” Dino Eyi pamune na kikudi kiʼEfile Mukulu, bibaadi bipe Esekyele bukome, bubaadi naabo lukalo bua kuibua mu nsenga mubaadi mupone. (Es. 2:​1, 2, EEM) Kunyima pabaadi mu bulungudi, Esekyele baadi mukunkushibue na “mboko” y’Efile Mukulu kuamba’shi kikudi kiselele ki’Efile Mukulu.—Es. 3:22; 8:1; 33:22; 37:1; 40:1. w22.11 4 ¶7-8

Mutemuki Yeshaya alesha Yehowa pano bu mulongieshi e buwa atambuka kunyima kua balongi baaye ebaludika eshinda diabadia kutambukila. Lelo uno tukuete kupusha Eyi di’Efile Mukulu kumongo kuetu. Mushindo kinyi? Eyi di’Efile Mukulu diyokielue dibaadi difundibue mu Bible bipua bi bungi bipue kukila. Biabia nsaa y’atubadika Bible, bi nka butue abateemesha Eyi di’Efile Mukulu. Aditukila kumongo kuetu. (Yesh. 51:4) Buludiki bua betupa kui Yehowa mbulombene kuitukuasha naminyi? Lamina’shi Yeshaya akula bua mianda ibidi. Wa kumpala, ‘Talayi eshinda.’ Wa kabidi, ‘Edilondeyi.’ Ta bi bukopo bua kuuka “eshinda,” tui na lukalo lua kuidilonda. Ku bukuashi bu’Eyi dia Yehowa, na bi’abetupatuluila kui ndumbuluilo aye, tukuete kulonda ki’abetutekie kui Yehowa. Tukuete kulonga dingi mushindo wakutumikila mianda yatulongo. Buatudia kunyingiila na muloo mu mudimo wetu watufubila Yehowa, abitungu tukite ino mianda yooso ibidi. Biabia su tubalongo na kutumikila biabia biatulongo tui balombene kushinkamisha’shi Yehowa aketufutu. w22.11 11 ¶10-11

Mafuku apeela kunyima kua lufu lua balongi ba Yesu, be na Kidishitu basumbule kulumiino babatuelele mu kakongie. (Mat. 13:​24-27, 37-39) Babaadi abalambukisha “[ndambukisho] yilube bwa’shi balongi be balonde mu mongo.” (Bik. 20:​30, Kilombeeno Kipya 2014) Lumune lua ku “ndambukiisho ilube” lua bena Kidishitu basumbule kulumiino, ndulambukisho lua ba mpagano lua’shi, Yesu ta baadi mulambule mbidi yaye “mususa umune bwa kusemuna milwisho ya be bungi,” bu abibiamba Bible, anka abitungu kuakula pabitale mulambu wa nkuulo ya Yesu musuusa na musuusa. (Eb. 9:​27, 28, Kilombeeno Kipya 2014) Lelo uno bantu be bungi, bakuete kukumiina ano malongiesha a madimi. Abendaa mu kipuilo kiabo lubingo looso, ingi nsaa abendaa efuku dioso bua kukita Kitentekiesho kia mulambu wa nkuulo ya Yesu, wabakitaa bikishekishe kui bena katolike, wabetanyinaa bu “Mulambu wa Misa.” Bingi bipuilo abakitaa Kitentekiesho kia lufu lua Yesu nka binyi biabia, anka t’abauku akipushisha kalolo mulambu wa nkuulo ya Yesu. w23.01 21 ¶5

Mu Bipua Kinunu bia kumunana kua Yesu, bafue abakasanguka na bantu abakakookiela abakebekasha bapuidikie. Kunyima kua kitompuanga kia mfudiilo, baaba booso babakatshibila kiimu kui Yehowa bu balulame “abapyaana nsenga, na abeemushaala looso.” (Mis. 37:​10, 11, 29) Bi muloo ukata muanda, “mwishikwanyi a nfudiilo akashimishwa, nyi ndufu.” (1 Kod. 15:​26, Kilombeeno Kipya 2014) Lukulupilo luetu luakuikala na muwa wa losoo nduimeene muiyi di’Efile Mukulu. Lualua lukulupilo ndulombene kuitukuasha buatudia kushaala na lulamato mu ino nkalakashi ya mu mafuku a ku mfudiilo. Anka bua kusankisha Yehowa, abitungu tukite mianda i bungi kushi penda kuikala na lukalo lua kushaala na muwa. Kabingilo ka kumpala aketutakula bua kushaala na lulamato kui Yehowa na Yesu, nka’shi muanda tui be bafule ngofu. (2 Kod. 5:​14, 15) Kino kifulo akitutakula buatudia kui bambula, pa kulungula bangi lukulupilo luatudi nalo. (Lom. 10:​13-15) P’atulongo bua kuleka kuifula nka atue banabene na kuikala na kalolo, atuikala bantu babakumiina kui Yehowa buabadia kuikala bu ba kuuku baaye bua losoo. w22.12 6-7 ¶15-16

Kubinguabingua nkulombene kuitukutshishua bintu bi bungi bilombene kuitutuadila butaale. Tui kubanga kuinyongola ngofu na kuikala na moo wa kilombene kukitshika kunyima. Kupusha bino ta kui bubi nya. Anka abitungu kuikala na budimu. Yesu balesheshe’shi kubinguabingua nkulombene kukokosha balongi baaye. (Yo. 16:​1, 2) Nsaa ibaadi Yesu etulungula’shi atukapete kubinguabingua, baadi dingi muitushinkamishe’shi, tui balombene kulama lulamato luetu. (Yo. 15:20; 16:33) Su bayimika mudimo wetu sunga kuiukandika, tui balombene kupeta buludiki abufiki kui komite a filiale, na kui bakulu. Muanda bano bakuetu mbebatuule buabadia kuitukaluila na kushinkamisha’shi atutungunuka na kapeta bidibua bia mu kikudi, na abitukuasha buatudia kutungunuka na kulungula mukandu wibuwa, muyile ngobesha yeetu. Biabia ekitshishe bua kukookiela buludiki boopete. (Shak. 3:17) Na dingi tolungulanga bangi bantu mianda ya bakuetu balume na bakashi, yabashi balombene kuiuka.—Mul. 3:7. w22.12 20-21 ¶14-16

Lelo uno, Yesu ki’atungunuka na kupa balongi baye buludiki bu biabaki’abalungula mukandu wibuwa pabitale Bufumu bu’Efile Mukulu mu nsenga ishima. Kuete alombasha mulayilo waye. Kukiila kui ndumbuluilo a Yehowa, Yesu kuete etulongiesha mushindo wa kulungula mukandu wibuwa, na kuitupa bina mudimo biatudi nabio lukalo bua kupalakasha mukandu wibuwa. (Mat. 28:​18-20) Tukuete kukita akitutekie Yesu, pa kuikitshisha na muetu mooso bua kulungula bangi mukandu wibuwa na kuibalongiesha, na kushaala bapasukie patuki’atutengiela’shi Yehowa afuishe mfudiilo a uno ndumbuluilo e bubi. P’atutumikila elango di mu Bena-Ebelu 6:​11, 12, atukalama lukulupilo luetu lunyingie “mpaa na ku mfudiilo.” Yehowa mmupue kutshiba efuku na nsaa y’akafuisha mfudiilo a ndumbuluilo a Satana. Apakafiki diadia efuku, Yehowa t’akakutua kulombasha matemuki afundibue Muiyi diaye. Anka ingi nsaa tui kubanga kunangushena’shi mfudiilo a uno ndumbuluilo e bubi tayifiki bukidi. Anka efuku dia Yehowa ‘t’adiisha nya.’ (Aba. 2:​3, EEM) Biabia, tuateyi kitshibilo kia kutungunuka na “kutengiela Yehowa,” bua kulesha’shi “tui na kinangu kia kutengiela Efile Mukulu eetu, Mupaashi eetu.”—Mik. 7:​7, NWT. w23.02 19 ¶15-16

Bantu abakaminaa miengie kepatshila kaabo nkakafika ku nsongo. Biabia, kui mianda i bungi i buwa nsaa y’atutambuka muishinda ilombene kuituimika tuabanga kuiyibandila. Mu mushindo umune, ikala wata nsaa ya kuimana na kunangushena pabitale mushindo ukukuashe Yehowa bodia koobesha nsaa y’onyingiila nkalakashi i bukopo. Ku mfudiilo kuefu dioso eyipushe obe nabene’shi: ‘Mu mushindo kinyi unamono bi miabi ya Yehowa lelo uno? Sunga mianda iki nka kuanka, mmushindo kinyi aunkuashaa Yehowa buandia kunyingiila?’ Tala su we mulombene kutundula muabi umune wabadi bakuelele kui Yehowa ubaadi ukukuashe bodia koobesha. Mu binyibinyi, we mulombene kuela nteko ku mfudiilo kua nkalakashi yoobe. (Fid. 4:6) Anka tui balombene dingi kuikala na lutumbu bua miabi yatukuete kupeta lelo uno. Ku mfudiilo a bioso, Yehowa etulaa’shi etunyingisha na kuitukuasha buatudia kunyingiila. Biabia ikadika nsaa yooso otumbula Yehowa bua mianda yadi mukukitshine. Dingi okamono mushindo aukukuasha Yehowa bodia koobesha, mu kipungo kia nkalakashi i bukopo.—Kib. 41:​51, 52. w23.01 19 ¶17-18

Eyipushe obe nabene’shi: ‘Nshalelo ande alesha’shi napusha kalolo’shi tukuete kuifubuila peepi na mfudiilo a uno ndumbuluilo e bubi su? Bitshibilo biande pabitale tulaasa na mudimo, abilesha’shi kufubila Yehowa ngi kintu ki na muulo ukata mu nshalelo ande su? Ne na lukumiino’shi Yehowa akampuila nkalo yande ya ku mbidi mpaa na ya kifuko kiande?’ Biabia, nangushena muloo awupushaa Yehowa nsaa y’etumono atuikitshisha bua kukita kioso akitungu bua’shi tuikale na nshalelo muipushene na kikiebe ki’eshimba diaye. (Mat. 6:​25-27, 33; Fid. 4:​12, 13) Abitungu tuikale atutaluula mushindo w’atunangushena nsaa yooso na tukimbe mushindo wa kushintuula ingi mianda ayitungu. Mpoolo balunguile bena Kodinda’shi: ‘Tungunukaayi na kwitaluula anwe banabeene; nutale su nwi mu lukumiino.’ (2 Kod. 13:5) Abitungu tutungunukie na kunangushena pa kubadika Eyi di’Efile Mukulu, na pa kumbanga kunangushena ngofu bu abinangushenaa Yehowa, na kukita kioso akitungu bua’shi nshalelo eetu ekale muipushene na kikiebe ki’eshimba dia Yehowa.—1 Kod. 2:​14-16. w23.01 9 ¶5-6