Mueshi wa 8

We mulombene kunangushena’shi mbua kabingilo kinyi kabaadi Yehowa mufunde mu “mukanda wa kitentekiesho” mashina a baaba babaadi na ngakuilo alesha’shi abamutshinyi na abanagushena pabitale eshina diaye? Ngakuilo eetu alesha bi muishimba dietu. Yesu bambile’shi: “Akiamba mukanwa nkino akituukila mwishimba.” (Mat. 12:34) Yehowa akumiina’shi baaba bamufule bakapete muwa wa ikalayika mu nsenga ipia. Ngakuilo eetu e na bukitshishi ku lulanguilo luetu bua Yehowa. (Shak. 1:26) Bangi bashi bafule Efile Mukulu abakulaa mu mushindo aulesha etombo ushaulesha kalolo na wa kuitatula. (2 Tim. 3:​1-5) T’atukumiina kuibefuana nya. Atukumiina kusankisha Yehowa mu ngakuilo eetu. Kadi, Yehowa mmulombene kusanka netu patufubisha ngakuilo e buwa patudi mu bisangilo bia bena Kidishitu sunga mu mudimo wa bulungudi anka tui na ngakuilo e bubi patuisamba na bena kifuko netu pa bash’abetumono kui bangi bantu su?—1 Mp. 3:7. w22.04 5 ¶4-5

Efile Mukulu atuulu kinangu kiaye mu mashimba a nsengwa ekumi, na nyema bwa kubutula Babilone mukata. Oolo Yehowa akatakula miilo buayidia kufubisha nyema a bukielo moonga pididi sunga Nations unies buadia kualulukila uno ampire mukata a nsenga ishima a luluanguilo lua madimi bua kumubutula bua losoo. (Kibaf. 18:​21-24, Kilombeeno Kipya 2014) Bino abipushisha kinyi kuatudi? Abitungu tulame mufubo wa bu “balangwidi wi selele na ushii katoba kumpala kw’Efile Mukulu Nshetu.” (Shak. 1:​27, Kilombeeno Kipya 2014) Biabia t’abitungu’shi tulekiele malongiesha a madimi, misangeelo ya ba mpangaano, miya, na bikitshiino bia bikudi bibi bia mu Babilone mukata bikale na bukitshishi kuatudi nya! Biabia abitungu tutungunukie na kuitanyina bantu bua’shi ‘batuukie munkatshi muaye’ tala bamukuatshishena ku miluisho yaye kumpala ku’Efile Mukulu.—Kibaf. 18:​4, Kilombeeno Kipya 2014. w22.05 11 ¶17; 14 ¶18

Baledi, kimbayi mishindo ilekeenelekeene yanudia kulongiesha bana beenu pabitale Yehowa, na mianda ibuwa yadi muinukitshine. (Miy. 6:​6, 7) Bino bina muulo bikishekishe su booso buenu mu kifuko ta nui mu lulanguilo lumune, tanuina mushindo wa kulonga misuusa yooso na bana beenu ku nshibo. Mukuetu mukashi abetanyinaa bu Christine amba’shi: “Naadi na nsaa ipeela ya kuisamba pabitale Yehowa, anka pooso panaadi napete mushindo wa kuisamba nabo, naadi nebikitshi. Dingi nesambaa mianda ibuwa pabitale ndumbuluilo a Yehowa na pabitale bakuetu balume na bakashi. Toyipulanga bakulu. Mianda yuesamba nabo pabitale bakulu, ngilombene kukuasha bana boobe bua’shi besambe nabo nsaa yabadi na lukalo lua bukuashi. Tuesha butaale ku nshibo. Misuusa yooso lesha mulume oobe na bana boobe’shi we muibafule. Esambe pabitale mulume oobe na kalolo na kaneemo koso na olongieshe bana boobe buabadia kukita nka biabia. Bino bibaadi bituushe butaale bubakuashiishe bua kulonga pabitale Yehowa.—Shak. 3:18. w22.04 18 ¶10-11

Mukandu wa Yesu kui bano booso babaadi mu kakongie ka bena Efeso ubaadi uleshe’shi, babaadi banyingiile na batungunukie kushi kukooka na kufubila Yehowa mpa na munkatshi mua nkalakashi ilekeenelekeene. Sunga mbiabia, babaadi bashimishe kifulo kiabo kia ku mbangilo. Bibaadi abitungu’shi balushuule kifulo kiabo kia ku mbangilo bisumanga lulanguilo luabo t’alukuminyibua nya. Bi mumune lelo uno, tui na lukalo lua kukita bi bungi kukila kunyingiila. Tui na lukalo na kunyingiila bua tubingilo tui buwa. Efile Mukulu eetu t’atalaa nka penda biatukitshi nya, kadi atalaa buakinyi atuibikitshi, akitutumu bua kuibikita ki na muulo ukata kuadi, muanda akumiina’shi lulanguilo luetu luikale luimeene pa kifulo kikata na lutumbu luetu kuadi. (Nki. 16:2; Mak. 12:​29, 30) Abitungu tutungunukie na kuikala bapasukie. Bena kakongie ka mu Sarde babaadi na muanda wilekeene na wa tungi tukongie. Kala babaadi banyingie mu kikudi, anka binobino t’abakiabafubila’nyi Efile Mukulu nya. Kumpala Yesu baadi muibalungule buabadia “kubuula meeso.” (Kibaf. 3:​1-3) Oolo, Yehowa t’analube mudimo wetu.—Eb. 6:10. w22.05 3 ¶6-7

Salomone bambile’shi mudimo, ngulombene kutuadila muntu miloo i bungi, bayitanyine bino bu “kia buntu ki’Efile Mukulu.” (Mul. 5:​18, 19) Salomone baadi auuku’shi ano ooso mayi abaadi a binyibinyi. Baadi mufubi! Baadi muibakie bashibo, akuna mitshi ya mfinyo, adima mafuba, na bishiba bia meema a kuitumpa. Baadi dingi muibakie mpata. (1 Bf. 9:19; Mul. 2:​4-6) Ino ibaadi midimo i bukopo, na kushi mpaka ibaadi imuikashe na muloo. Anka Salomone baadi muukie’shi tanka penda ino yoso midimo, ngi ilombene kumuikasha na muloo wa binyibinyi nya. Baadi dingi mukite mianda i bungi bua Yehowa. Bu kileshesho, baadi mukunkushe luibako lua ntempelo e buwa bukile bua lulanguilo lua Yehowa munda a bipua musambo bia kuibaka! (1 Bf. 6:38; 9:1) Kunyima kua Salomone kukita ino yoso midimo ilekeenelekeene, baadi mushinkamishe’shi kintu ki na muulo ukata kilombene muntu kukita, nyi nkufubila Yehowa. Bafundile’shi: ‘Pusha mfudîlo ya ino myanda yoso: ‘Tshîna Efile Mukulu a bînyibînyi na olame mîya yaye.’—Mul. 12:​13, EEM. w22.05 22 ¶8

Mu Bible mui bileshesho bi bungi bia bantu babaabadi bafuile lusa kui Yehowa. Muntu kinyi akufikila mu binangu biobe? Pangi bonangushena Mfumu Manasee. Uno muntu e bubi baadi muluishishe Yehowa mu mishindo i bungi bukile, babangile kulanguila b’efile ba madimi, na kunyingisha bangi buabadia kuibalanguila. Bayipayile bana baye’ye nabene e balambula kui b’efile baba mpagano. Baadi mukatuule mpaa na nkishi ya b’efile ba madimi mu ntempelo a kishila a Yehowa. Bible akula bino pa muanda waye: ‘Baakitshiine myanda ibi ku meeso kwa Yehowa, bamwinyongweshe.’ (2 Mya. 33:​2-7) Manasee pabaadi muleshe’shi belanga kuishimba, Yehowa bamufuidiile lusa. (2 Mya. 33:​12, 13) Pangi we mulombene kunangushena dingi Mfumu Davide baadi mukitshine Yehowa miluisho, aye nkukita lusandi mpaa na kuipayishena. Biabia, nsaa ibaadi ilangie Davide kuishimba mu binyibinyi na kutundula bilubilo biaye, Yehowa baadi mu mufuile lusa. (2 Sam. 12:​9, 10, 13, 14) Oolo, tui balombene kushinkamisha’shi Yehowa e kuanka bua kufuidishena lusa. w22.06 3 ¶7

Ta mbibofole misuusa yooso bua kulama lukulupilo luetu lunyingie nya. Tui kukutua luishinko nsaa y’atutengiela’shi milayilo y’Efile Mukulu ilombane. Biabia Yehowa nga ikalayika, na kipungo ki’atumono tue bu kila, aye ekimono bu kiipi. (2 Mp. 3:​8, 9) Yehowa akalombasha milayilo yaaye mu mushindo wi buwa, anka ta mulombene kuibikita nsaa y’atutengiela’shi ebikite nya. Nkinyi kilombene kuitukuasha bua kulama lukulupilo lunyingie, bu biatutengiela na luishinko looso’shi Efile Mukulu alombashe milayilo yaaye? (Shak. 5:7) Abitungu tushaale mu kipuano na Yehowa, muanda aye nyi akakitshi bia’shi lukulupilo luetu lulombane. Biabia Bible aleesha kuipusheena kui pankatshi pa lukulupilo na lukumiino’shi Yehowa e kuanka na’shi, “apeeyaa abamukimbi bwedi.” (Eb. 11:​1, 6) P’atunyiisha kumona Yehowa bu muntu a binyibinyi kuatudi, atunyiisha kushinkamisha’shi akalombasha milayilo yaaye yooso. Bua kulama lukulupilo luetu lunyingie, abitungu kuteka Yehowa, na kubadika Eyi diaye. Sunga biatushi balombene kumona Yehowa, tui balombene kuifubuila peepi naaye. Tui balombene kuakula naaye mu luteko, bakulupile’shi etuteemesha.—Yel. 29:​11, 12. w22.10 26-27 ¶11-13

Tubandeyi kutala uno muanda. Yoobo baadi ashaala mu buto, muanda wa kenyongoshi kakata. (Yob. 2:8) Bakuuku baaye, babaadi abatungunuka na kumuakula’shi nta muntu e buwa, ta kui kintu su nkimune kiadi mukite ki na muulo, bua kuluisha nkumo yaye. Bitompuanga biaye bi bushito kuadi nka bu mabue, mpaa na kinyongua kia kushimisha bana baye, kikuete kumuluisha eshimba. Kumpala, Yoobo baadi muumiine. (Yob. 2:13) Su bakuuku ba Yoobo babaadi baluule kuumiina kuaye’shi nyi nkitunduilo kia’shi Yoobo bakatuka kui Mupangi aaye, babaadi bedimbe. Ingi nsaa, Yoobo baadi abusha mutue waye atalanga bakuuku baye ba madimi na kuamba’shi: “Mpaa na pa nkafuila, ntaanandekie kululama kuande!” (Yob. 27:​5, NWT) Nkinyi kibaadi kikuashe Yoobo buadia kuikala n’eshimba dinyingie na bukome munkatshi mua makienga aaye ooso? Sunga nsaa ibaadi Yoobo mutshobolokie, ta baadi mushimishe lukulupilo luaye lua’shi Efile Mukulu aaye sha kifulo, atungunuka na kumukuasha nya. Baadi auku’shi sunga afua, Yehowa akamusangula.—Yob. 14:​13-15. w22.06 22 ¶9

Tui na kineemo kikata kiabadi betupe, kui Mupangi a eyilu na nsenga, kiabuntu ki buwa, kineemo kia kumuteka. Tubande kunangushena: Tui balombene kufunguila Yehowa mashimba eetu nsaa yoso, na mu ludimi looso lu’atukumiina. Tui balombene kumuteka patudi na maladi mu lupitalo, patudi mu lukano, bashinkamishe’shi Nshetu sha kifulo etuteemesha. Tui na lutumbu lukata bua kino kiabuntu. Mfumu Davide baadi muate kineemo kia kuteka na muulo. Baadi muyimbile Yehowa’shi: “Luteko luande, luikale bu kabanda kalumbuulue kumpala koobe.” (Mis. 141:​1, 2, NWT) Mu mafuku a Davide, kabanda kabaadi kintu kia kishila, muanda babaadi abekafubisha mu lulanguilo lua binyibinyi kui ba tshite-muankuidi, na babaadi abekalumbuula na kuikalama kalolo. (Efi. 30:​34, 35) Davide baadi akumiina kunangushena kalolo kiakiebe nkakula nsaa y’akatekie Yehowa, nka bu bibaabadi abalumbuula kabanda kalolo, kumpala kua kuikafubisha. N’atue namu ngi biatudi balombene kukita kumpala kua kuteka. Atukumiina’shi nteko yetu isankishe Yehowa. w22.07 20 ¶1-2; 21 ¶4

Koobola nkua Yehowa. Yehowa ta muitupe matalua a kuiobuela atue banabene nsaa ayituluishisha muntu nya. (Lom. 12:​20, 21) Bu biatudi na mikalo na mueneno a kukutua kupuidika, ta tui na ngobesha ya kutshiba kiimu mu muanda kalolo, bilombene kuikitshiba Efile Mukulu nya. (Eb. 4:13) Ingi nsaa su tuatadiila nsungu’shi itukunkushe bi kuituelela bukopo buatudia kuuka ki buwa kiatudia kukita. Yehowa baadi muyokiele Shake buadia kufunda’shi: “Mwanda nsungu ya muntu ta ngilombene kukita kilulame kumpala kw’Efile Mukulu.” (Shak. 1:20) Tui balombene kushinkamisha’shi Yehowa akakitshi mianda ilulame na kuikala bashinkamishe’shi kiimu kiaye kipuidikie akikakitshika. P’atufuilana lusa atulesha’shi tui bakulupile kululama kua Yehowa. P’atutuulu mianda yoso mu maasa a Yehowa, atulesha’shi tui bakulupile kikiebe ki’eshimba diaye bua’shi akatushe ino mianda yoso i bubi yabakuete kufuisha kui miluisho. Mu nsenga yaye ipia yadi muitulee, mianda yoso ibi ayitukiengesha mu binangu ‘taatukeyitentekyesha dimo nya, taayiiketufwila dimo ku mashimba nya’ bua losoo.—Yesh. 65:17. w22.06 10-11 ¶11-12

Pa muanda tukuete kumona ino mianda yoso ya mushikua, abilesha’shi tui bakuminyibue na Yehowa. (Mat. 5:​11, 12) Diabulu ngi e kunyima kua buno buluishi. Anka Yesu mmumukile bukome! Ku bukuashi bua Yesu, mukandu wi buwa ukuete kulunguluanga kui bantu ba miilo yoso. Tutaleyi kino kishinkamiisho. Bu biatudi balungudi ba Bufumu, tukuete kufumankana na lungi lukalakashi lua bantu abakula ingi ndimi yatush’atuuku, ilekeene na yetu. Mu kimonua kibaadi Yesu muleshe Yowano mutumibua, Yesu baadi mutemukie’shi mukandu wi buwa aukakambila lulo lukalakashi. (Kibaf. 14:​6, 7) Mu mushindo kinyi? Tukuete kupa bantu be bungi mushindo wabadia kukumiina mukandu wa Bufumu. Lelo uno, bantu bashaale mu nsenga ishima mbalombene kubadika bintu abiakuila mianda imeene mu Bible, bi mu site eetu a jw.org ku muanda bi na mianda i bungi i mu ndimi ikile pa 1000! Kasaka ka Bakunkushi-Bakulu nkakumiine bua’shi baluule mukanda wa We kuikala na muloo bua loso! Mmukanda wetu awitukuasha, mu mudimo wa kuikasha bantu bu balongi mu ndimi ikile pa 700! w22.07 9 ¶6-7   

Yesu baadi apusha bantu lusa. Mateo mutumibua balesheshe’shi: “Pa kumona kibumbu kya bantu, aye nkupusha lusa, mwanda babaadi bakookye, na bafwambukye buu mikooko ishii na mulami.” (Mat. 9:36) Na Yehowa epushaa naminyi? Yesu bambile’shi: ‘Biabia, tankikyebe ki’eshimba dia Nshami e mwiulu, bwa’shi umune a ku bano bakinga ashimine.’ (Mat. 18:​14, Kilombeeno Kipya 2014) Ano mayi aetuikasha na muloo, muanda aetulesha’shi Yehowa muitufule ngofu! P’atunyisha kuuka Yesu kalolo, kifulo kietu bua Yehowa akitama. We mulombene dingi kulonga bia kuikala na kifulo na kuenda kumpala mu kikudi, pa kukisha nsaa na bakuetu balume na bakashi banyingie mu kikudi ba mu kakongie keenu. Tala mushindo wabadi na muloo. T’abenyongolaa pabitale kitshibilo kiabo kia kufubila Yehowa nya. Ebayipushe bakulungule pabitale, ingi mianda yabadi bamone mu mudimo wa Yehowa. Nsaa yokiebe kuata kitshibilo kikata, ebatekie binangu. Na kunyima a bioso, “mianda ayiyiyaa kalolo, su kui bantu be bungi abatuusha malango.” w22.08 3 ¶6-7

Atue booso tukuete kufumankana na nkalakashi ilekeenelekeene. Anka, nsaa y’atupete nkalakashi, ta tui balombene kuipusha bu be bupenka nya. Nka bu Nshe baana sha kifulo, Yehowa misuusa yooso etumonaa. E ku lupese luetu, e kuanka bua kuitupusha p’atumutekie bukuashi, na e kuanka bua kuitukuatshisheena. (Yesh. 43:2) Atushinkamisha’shi tui balombene kukambila ino nkalakashi yooso, muanda kuete etupa bintu bioso biatudi nabio lukalo na kalolo kooso bua kunyingiila. Mmuitupe kia buntu kia luteko, Bible, na bidibua bia mu kikudi bi bungi, na bakuetu baasha kifulo be mu nsenga ishima buabadia kuitukuasha nsaa yatudi na lukalo. Tui na lutumbu lukata, p’atue kuikala na Nshetu e muiyilu kuete kuitutala! ‘Mashimba etu e na mulô muadi.’ (Mis. 33:​21, EEM) Tui balombene kulesha Yehowa lutumbu luetu bua mushindo w’etupasukila na kifulo kioso, pa kufubisha bintu bioso biakuete kuitupa bua kuitukuasha kalolo. Na tui na dingi lukalo lua kukita muetu mooso bua kushaala mu bulami bu’Efile Mukulu. Mu ungi ngakuilo, su tubakitshi muetu mooso, bua kukookiela Yehowa na kukita mianda i buwa ku meeso kuaye, Atungunuka na kuitutala bua losoo! w22.08 13 ¶15-16

Bantu be bungi lelo uno, bakuete kukienga muanda mbakutue lukulupilo. T’abauku muntu abadia kukulupila nya. Bakuete kuiyipusha su bantu babataa na muulo bu bena politike, bena siyanse na ba nsunga, bakuete kuibapasukila namu binyibinyi. Kukatusha biabia, tabaki’abanemekaa nyi bakata ba bipuilo, bakuete kuiyitanyina bu bena Kidishitu. T’abakulupila mu abiamba Bible, muanda bakata ba bipuilo abamueneka bu abatumikila Bible, t’abakitshi mianda i buwa. Bu biatudi bafubi ba Yehowa, tui bashinkamishe’shi aye nyi “Efile Mukulu a biinyibiinyi,” na misuusa yooso akumiinaa kuitukitshina nka mianda i buwa. (Mis. 31:5; Yesh. 48:17) Atuuku’shi tui balombene kukulupila mu biatubadika mu Bible. Atukumiina bibakuile mungi muntu mulongie mianda ya mu Bible bafundile’shi: “Takui kintu su nkimune kiabadi baakule kui Efile Mukulu kia madimi, sunga kishakikalombana. Muilo w’Efile Mukulu ngulombene kukulupila ku biabia biakula, muanda mbakulupile Efile Mukulu winyi mui biakule.” w23.01 2 ¶1-2

Atuibaka lukumiino lua bakuetu balume na bakashi, nsaa y’atunyingisha lukumiino luabo mui Yehowa. Bangi bakuete kuibamona ku bisumanga, kui bena kifuko nabo bashi ba Temue ba Yehowa. Bangi bakuete kunyingiila mukumbo wi bukopo, sunga kuikitshisha bua kukambila tuinyongoshi, na bakuete kutengiela mund’a mafuku e bungi mfudiilo a uno ndumbuluilo a mianda. Ino mianda ngilombene kutompa lukumiino lua bena Kidishitu lelo uno. Bena Kidishitu ba mu kakongie ka mu siekele a kumpala, babaadi bafumankane na ino nkalakashi i mumune. Mpoolo mutumibua baadi mufubishe Bifundue bua kunyingisha lukumiino lua bakuabo balume na bakashi. Bu kileshesho, pangi bena Kidishitu bena Yuda, ta babaadi abauuku kia kuakula pabaadi bakuabo ba mu kifuko bashi balanguidi, abamba’shi buina Yuda mbukile buina Kidishitu. Kushi mpaka, mukanda wa Mpoolo kui bena Ebelu, ubaadi unyingishe bano bena Kidishitu booso ngofu. (Eb. 1:​5, 6; 2:​2, 3; 9:​24, 25) Bukome buabo bua kunangushena, bubaadi bulombene kuibakuasha bua kuuka kiabadia kualuula beshikuanyi baabo. w22.08 23-24 ¶12-14

Bantu ba mu uno ndumbuluilo a Satana, t’abauku muntu abadia kukulupila nya. Muanda muikeelo wa bakata ba mianda ya busunga, bakata ba bena politike, na bakata ba bipuilo nguibenyongoshe. Ta baki’abapushanyi su mbiakukulupila ba kuuku baabo, bankungishanyi nabo, sunga bena kifuko nabo nya. Bino t’abitukaanyisha nya. Bible tabapuile kutemuka’shi: “Mu mafuku a kunfudiilo, . . . bantu abakeekala . . . bashii na bwin’Efile Mukulu, . . . abadimbiila bantu mianda, . . . baasha kiipuko.” Bino abilesha’shi, bantu abakekala bu Satana efile a uno ndumbuluilo e bubi abashi balombene kukulupila. (2 Tim. 3:​1-4, Kilombeeno Kipya 2014; 2 Kod. 4:4) Biabia, bu biatudi bena Kidishitu, atuuku’shi tui balombene kutuula lukulupilo luetu looso nka mui Yehowa. Tui bashinkamishe’shi mmuitufule na ‘t’asumbushenaa’ba kuuku baaye. (Mis. 9:11) Tui balombene dingi kukulupila mui Yesu Kidishitu, muanda mmutuushe muwa waye pa muanda wetu. (1 Mp. 3:18) Kukiila ku mianda yatudi bamone atue banabene, tui balongie’shi Bible atushaa malango e buwa.—2 Tim. 3:​16, 17. w22.09 2 ¶1-2

Muloo wa binyibinyi, ta ndisanka diatupushaa bua kapindi kapeela, akupu ditukatukie nya. Ngulombene kushadidiila mu nshalelo ooso a muntu. Mmushindo kinyi? Yesu baadi mupatuule mu muisambo waye wa pa muengie’shi: ‘Basha mulô, mbaba abashinguula lukalo luabo lua kuuka Efile Mukulu.’ (Mat. 5:​3, EEM) Yesu baadi muukie’shi bantu abekala na lukalo lukata lua kuiuka na kulanguila Mupangi aabo Yehowa Efile Mukulu. Nyi nkuamba’shi, “lukalo luetu lua mu kikudi.” Na bu bi Yehowa mmuikale Efile Mukulu a muloo, na booso abamulanguila namu, mbalombene’nyi kuikala nao. (1 Tim. 1:​11, Kilombeeno Kipya 2014) Tui balombene kuikala na muloo nka penda nsaa yatushi na muanda su ngumune mu nshalelo eetu? Nya. Mu muisambo waye wa pa muengie, Yesu bakuile’shi: “Baaba bakuete kudila mbalombene kuikala na muloo. Yesu bakuile uno mmuanda umune bua “baaba ababingwabingwa pa muanda wa kululama.” (Mat. 5:​4, 10, 11, Kilombeeno Kipya 2014) Yesu baadi muitulongieshe’shi muloo wa binyibinyi t’autukilaa ku mianda i buwa y’atumono mu nshalelo eetu nya, anka autukaa p’atulombasha lukalo luetu lua mu kikudi na p’atuifubuila peepi n’Efile Mukulu.—Shak. 4:8. w22.10 6 ¶1-3

Kapatupatu, akakuasha muina Kidishitu bua kuuka kuilekeena kui pankatshi pa ino mianda ibidi, “kipungo kya kuumiina na kipungo bwa kwakula.” (Mul. 3:7) Kuakula kui nka bu ebue dia argent, na kuumiina kui nka bu ebue dia olò, ino miaku ibidi, mu bingi bipikua ayilesha kishima kimune. Mu ungi ngakuilo, kui nsaa ayitungu kushaala muumiine pa mutue pa kuakula. Tuateyi kileshesho. Babatumine ungi mukulu mupue kumona mianda i bungi, buadia nkakuasha tungi tukongie tubaadi na nkalakashi i bungi. Ungi mukulu namu, aakula pabitale uno mukulu mumone mianda i bungi amba’shi: “Misuusa yooso ibaadi ende ku tungi tukongie, tabaadi aakula pabitale mianda ifuame ya tungi tukongie nya.” Pa muanda wa’shi uno mukulu baadi na binangu bi bungi, bangi bakulu ba mu tungi tukongie babaadi afubu nabo babaadi abamuneemeka nka bu a mu kakongie kaabo. Babaadi bashinkamishe’shi t’akalungula bangi bantu mianda ifuame ya mu kakongie kaabo nya. Kululama, nkingi kintu ki’atudi nakio lukalo buabadia kuitukulupila kui bangi. Atukulupilaa muntu mululame muanda atuuku’shi, misuusa yooso akulaa nka bia binyibinyi.—Ef. 4:25; Eb. 13:18. w22.09 12 ¶14-15

Bantu be bungi ta bakuete kutemeesha nsaa i binangu bia binyibinyi “abiele misaase mu kilayi.” (Nki. 1:20) Muyile Bible, kui bisaka bia bantu abapele kutemeesha binangu: “Bapatakane, abasepesheenaa, na babulakane.” (Nki. 1:​22-25) “Bapatakane” nyi mbantu abakumiina muanda ooso wabapusha, na mbibofule bua kuibadimba. (Nki. 14:15) Banda kunangushena, bu kileshesho, kui midiyo ya bantu ba bakuete kudimba kui bakata ba bipuilo na bakata ba politike. Bangi bikuete kuibenyongosha nsaa yabakauku’shi bano bakata mbebadimbe. Anka bano babadi baleshe mu Nkindji 1:​22, mbasangule bua kushaala bapatakane muanda abakumiina yaya mianda. (Yel. 5:31) Bangi abapele kulonda abiamba Bible, sunga kupela kukokiela mayi a kulonda. Ta tukumiina kuambula uno ngielelo a binangu mupatakane nya.—Nki. 1:32; 27:12. w22.10 19 ¶5-7

Ndumbuluilo a Yehowa kuete etupa dingi buludiki abuitukuasha bua kupaasha miuwa yetu. Bakuete kuituteka nsaa yooso kui ndumbuluilo buatudia kupa bakulu ma nimero eetu a ma telefone, na kuibalungula ingi mianda itutale, bua’shi nsaa ya muanda wa mu kimpulunkamba bamone bia kuitukimba. Tui kupeta buludiki pabitale mbalo ya kusuukila, kukatuka, sunga kupeta bulungantu bua kupeta bintu bia kuitukuasha, sunga mushindo watudi balombene kukuasha bangi. Su tuakutua kukokiela, tui balombene kutuula muwa wetu na muwa wa bakulu mu masaku. Bana balume basha lulamato bakuete kuinulama. (Eb. 13:17) Bakuetu be bungi balume na bakashi balekie mashibo aabo na bapete ino mianda ya masaku aatukila ku bintu bipangibue, sunga ya ngoshi mbekitshishe na muabo mooso buabadia kuiubidishena na nshalelo aabo mupia na kukita bi bungi mu mudimo wa Yehowa. Anka bu bena Kidishitu ba kumpala babaadi bapete kubinguabingua kui bukopo babaadi batungunukie “abend’awukishanga mukandu wibuuwa” w’Eyi di’Efile Mukulu. (Bik. 8:4) Kulungula mukandu wi buwa kubaadi kuibakuashe bua kutuula binangu biabo ku Bufumu na kuleka kutuula binangu ku nkalakashi ya mu nshaleelo. Bu kipeta babaadi balame muloo wabo na butaale buabo. w22.12 19 ¶12-13

Yehowa etuataa na muulo pa bupenka. Kumpala kuadia kutuma balongi baaye mu mudimo wa bulungudi, Yesu baadi muibakuashe buabadia kukambila moo wa kubinguabingua. (Mat. 10:​29-31) Baadi mukite bino p’aye kuibapa kileshesho kia toonyi tubaabadi abauku kalolo kui bantu mu Isaleele: “Biimusodya.” Tuno toonyi tubaadi na muulo upeela mu mafuku a Yesu. Yesu balunguile balongi baaye’shi: ‘Sunga kimune kyaa kwabidi t’akiponaa paashi kushii nshenu kuuka.’ Balombeshe dingi’shi: “Nwi na muulo ukile wa biimusodya byooso.” Yesu baadi mushinkamiishe balongi baaye’shi, Yehowa ebataa na muulo pa bupenka, biabia ta be na kabingilo ka kutshiina kubinguabingua. Balongi babaadi abatentekiesha mayi a Yesu nsaa ibaabadi abamono bimusodia mu mudimo wa bulungudi mu bibundi bikata na mu tubibundi tupeela. Biabia nsaa y’omono toonyi tupeela, tentekiesha’shi Yehowa akuataa na muulo pa bupenka muanda noobe namu we na “muulo ukile wa biimusodya byooso.” Ku bukuashi buaye t’abitungu’shi nutshine nsaa ya benubingabinga kui bangi. w23.03 18 ¶12

Ingi nsaa, atupetaa nkalakashi i bukopo, bu kubinguabingua kua mu kifuko sunga kushimisha mudimo wetu. Nsaa y’atunyingiila nkalakashi munda mua kipungo kibula, tui balombene kupusha bu lukulupilo luetu lubabofola na bu babakalakashua mu binangu. Satana afubishaa kino kipungo ki bino, bua’shi tunangushene’shi Yehowa ta mmuitufule. Satana akumina’shi tunangushe’shi Yehowa na ndumbuluilo Aaye, nyi bakuete kuitufuishisha makienga. Uno muanda wi mumune ubaadi ufikile bena Isaleele abaadi mu Ejipitu. Ku mbangilo, babaadi bakumiine’shi Yehowa baadi mutume Moyise na Aarone buadia kuibapoososha mu bupika. (Efi. 4:​29-31) Anka kunyima, nsaa ibebakiengeshele Faraone, babaadi batopekie Moyise na Aarone’shi nnabo abebafuishisha nkalakashi yaabo. (Efi. 5:​19-20, EEM) Babatopekiele bafubi b’Efile Mukulu baasha lulamato. Uno muanda ubaadi bubi ngofu! Su okuete kunyingiila lukalakashi luibukopo, munda mua kipungo kibula, mmushindo kinyi oodi mulombene kufunguila Yehowa eshimba mu luteko na kukimba bukuashi buaye? w22.11 15 ¶5-6

Yehowa ngi apaana muuwa, na e na bukome bua kualuisha bantu bafue muuwa. Baadi mupe mutemuki Eliya bukome bua kusangula ka nsongualume ka mukashi kilele a ku Sarepta. (1 Bf. 17:​21-23) Kunyima na bukuashi bu’Efile Mukulu, mutemuki Elisha baadi musangule ka nsongualume ka muana mukashi muina Shuneme. (2 Bf. 4:​18-20, 34-37) Ino nsangukilo yooso na ingi, ayishinkamisha’shi Yehowa e na bukome bua kualuisha bantu bafue muwa dingi. Pa baadi ki pa nsenga Yesu baadi muleshe’shi Nshaye baadi mumupe buno bukome bumune. (Yo. 11:​23-25, 43, 44) Binobino Yesu e muiyilu na “matalwa ooso . . . mbamupe mwiyilu na pa nsenga.” Na e na matalua a kulombasha uno mulayilo wa baaba ‘booso be mu manyembo a kitentekiesho,’ abakasanguka dingi bua kupeta dingi muwa na lukulupilo lua kushaala dingi bua losoo.—Mat. 28:18; Yo. 5:​26-29. w22.12 5 ¶10

P’abo kusumbushena Esekyele, babaadi basumbushene Yehowa. Ano mayi e mu kifundue kietu kia lelo abaadi ashinkamiishe Esekyele’shi, su bantu babamusumbushena t’abilesha’shi bakutua kukita mudimo waye wa butemuki kalolo nya. Yehowa baadi mushinkamishe dingi Esekyele’shi nsaa ayikalombana uno mukandu wa kiimu okebalungula, bantu ‘bakashingûla’shi mutemuki baadi munkatshi mwabo bînyibînyi.’ (Es. 2:5; 33:​33, EEM) Kushi mpaka, kuno kukankamika kubaadi kupe Esekyele bukome bubaadi naabo lukalo, bua kulombasha mudimo waye wa bulungudi. N’atue namu tui n’eshimba dinyingie, muanda atuuku’shi Yehowa nyi muitutume bua kulungula mukandu wi buwa. Muitupe kineemo pa kuituitanyina bu “Tumonyi tuaye.” (Yesh. 43:10) Nyi muabi ukata! Anka bu bibaadi Yehowa mulungule Esekyele’shi: “Tootshinanga,” Yehowa kuete etulungula namu’shi: “Tanutshinanga.” (Es. 2:6) Buakinyi ta tui na kabingilo ka kutshina beshikuanyi neetu? Anka bu Esekyele, Yehowa ngi muitutume, na tuina bukuashi buaye.—Yesh. 44:8. w22.11 3-4 ¶4-5

Lelo uno, tui na lutumbu lukata p’atue kuikala na bakulu, na bafubi ba midimo ba kukulupila. Bakuete kuitupasukila kalolo, kui bano bakuetu baasha lulamato, na atutumbula Yehowa pa muanda wabo! Mu ingi mishindo kinyi muatudi balombene kulesha’shi tui bantu ba kukulupilua? Tui bafule bakuetu balume na bakashi, na atuibapasukilaa bua buwa buabo. Biabia abitungu kuikala na nkatshinkatshi, na kuneemeka mianda ifuame ya bangi. Bangi bena Kidishitu ba mu kakongie ka mu siekele a kumpala, babaadi ‘ababalakana na kutwela mu myanda ishi îbatale, na kuakula myanda ishi ilombêne kuakulwa.’ (1 Tim. 5:​13, EEM) T’abitungu’shi tuikadikie bu baaba bantu nya. Biabia, tupuandikishe’shi muntu kampanda bafiki mu kuitulungula muanda waye ufuame, na mmushinkamishe’shi ta tuiulungula bangi. Bu kileshesho, mukuetu mulume mmulombene kuitulungula pabitale mukumbo wadi nao, sunga lungi lukalakashi luakuete kufumankana nalo, na etuteka’shi tulame uno muanda nka atue banabene. Abitungu tuneemekie nka biabia bibetulungula. w22.09 10 ¶7-8

Kishima kia mu kina Greke kiabadi baluule bu “kukimba binangu bipya” nkilombene kupatuulua bu “kulumbuula binangu biobe.” T’abitungu’shi tulengieshe nshalelo eetu na tubikitshiino tupeela tui buwa nya. Abitungu tunangushene pabitale biatudi munda muetu’tue banabene, na kushintuula mianda ayitungu, buatudia kukookiela mayi a kulonda a Yehowa bu biabidi bitekibue. Abitungu tukite bino kushi bua kapindi kapeela, kadi tutungunukie na kuibikita. Nsaa y’atukekala bapuidikie, atukekala misuusa yooso na mushindo wa kusankisha Yehowa ku kintu kioso ki’atukakitshi. Abitungu nsaa yooso tutungunukie na kuikitshisha buatudia kusankisha Yehowa. Tutale kuipushena kui mayi abakuile Mpoolo atupete pankatshi pa kukimba binangu bipia na kutundula kikiebe ki’eshimba di’Efile Mukulu, bu abilesha mukanda wa Bena-Looma 12:2. Pa mutue pa kutadiila uno ndumbuluilo e bubi etuludikie, abitungu kia kumpala tuitaluule atue banabene bua kuikala na kitshibilo kia mushindo watudi balombene kutadiila binangu bi’Efile Mukulu bietuludika, kushi kutadiila uno ndumbuluilo e bubi ekala na bukitshishi ku bipatshila bietu na ku bitshibilo bietu. w23.01 8-9 ¶3-4

Yehowa etukuatshishenaa mu lukalakashi looso luatupete su? Akatushaa mianda yooso ya mu nshalelo eetu, sunga mianda yooso i bubi ayikitshikaa bua kabingilo ke buwa? Nya, Bible t’akuatshishena uno mueneno nya. (Mul. 8:9; 9:11) Biabia, tuiwukie bino’shi, nsaa y’atupete nkalakashi Yehowa eyiwuku kalolo, na kuete kuteemesha ku nkalo yeetu bua kuitukuasha. (Mis. 34:15; Yesh. 59:1) Kukatusha biabia, Yehowa mmulombene kuitukuasha na kuitupa ngobesha ya kukambila nkalakashi yeetu i bukopo. Mu mushindo kinyi? Mushindo umune awitukuashaa Yehowa mpa kuitusamba na kuitunyingisha pa nsaa ilombane. (2 Kod. 1:​3, 4) Okionangushena mu kipungo kibaadi Yehowa mukukuashe mu nshalelo oobe pa nkusamba na nkunyingisha mu nsaa iboodi nabio lukalo lukata? Ke bungi, nka kunyima ku’atue kukila mu kitompuanga, nyi patumonaa mushindo awikalanga witukuashe Yehowa bua kuikinyingiila. w23.01 17-18 ¶13-15

Uno nyema muifuanene na nyema a mitue musambobidi, anka ngilekeene ku elangi, uno nyema monga pididi, abamuitanyina bu ‘kifwanyi kia nyema a bukielo’ mbamuleshe bu “mfumu a muanda.” (Kibaf. 13:​14, 15; 17:​3, 8) Yawa “mfumu” abamba’shi baadi kuanka anka taki kuanka’nyi, anka kunyima akamueneka dimo. Mu binyibinyi bino abilesha Organisation de Nations unies baadi mukuatshishene mianda ya politike ya mu nsenga ishima! Kumpala babaadi abamuitanyina bu Société des Nations. Na dingi baadi mushimine mu ngoshi ya kabidi ya Nsenga Ishima. Kunyima mmumuekie dingi bu Nations unies mbiadi binobino. Kukidila ku madimi aabo abakuete kupalakasha, nyema a bukielo sunga mbulamatadi kuete kunyingisha bantu buabadia kutombokiela Yehowa na muilo waye. Mu ngakuilo a mu kifuanyi, be nka bu “bamfumu bakata ba pa nsenga yishadiibwe yoso yishima” bua kuibabunga muanda wa ngoshi ya Armagedone ya “dino efuku dikata di’Efile Mukulu Sha bukome booso.”—Kibaf. 16:​13, 14, 16, Kilombeeno Kipya 2014. w22.05 10 ¶10-11

Yesu pabauukile bia kubadika Bifundue Biselele aye nabene, ta baadi penda muukie Bifundue kalolo nya, anka baadi muibifule na kuibitadiila bua’shi bikale na bukitshishi mu bikitshino biaye. Bu kileshesho, tentekiesha muanda ubakitshikile mu tempelo nsaa ibaadi Yesu na bipua 12. Balongieshi babaadi baukie bifundue bia mu Muiya wa Moyise kalolo, ‘babaadi abakaanya [Yesu] bwa ngaaluulo ibaatuushanga.’ (Luk. 2:​46, 47, 52) N’atue namu tui kuuka na kufula Eyi di’Efile Mukulu, p’atuidibadika efuku dioso. Tui balombene kulongiela ku bibakuile Yesu pabitale bano babaadi baukie Muiya kalolo, mpaa na Bafundi ba miya, Bafadiseo, na Basaduseo. Bano bakata ba bipuilo babaadi ababadika Bifundue misuusa i bungi, anka ta babaadi abakuashibua na biinyi bibaabadi ababadika nya. Yesu baadi mushimikie kasele ku mianda isatu ibaadi ayikitshi’shi bano bantu tabapetanga bukuashi mu Bifundue. Mayi aaye kuabadi aetukuasha buatudia kulumbuula ngobesha yetu (1)ya kupusha mianda yatubadika, (2)ya kupeta mabue a muulo a mu kikudi, na (3)ya kutadiila Eyi di’Efile Mukulu ditukunkushe mu muwa wetu. w23.02 8-9 ¶2-3

Mu angi masaku aatungu’shi tusuukie, mui kukisha nsaa ibungi pamune na muntu shi mulume sunga shi mukashi nobe, kutoma kukishekishe, budiafi, kuakula mianda ayitapa bangi ku mashimba, kutala mianda ya buntomboshi, kubandila Pornografi, na ingi mianda i biabia. (Mis. 101:3) Diabulu mmuipaane ngofu bua kupeta mushindo wa kuluisha kipuano kietu na Yehowa. (1 Mp. 5:8) Su ta tui badimukie, Satana mmulombene kukuna mu binangu bietu na muishimba dietu ntete ya luabi, bulandue, mushikua, kuitatula, na ngo. (Nga. 5:​19-21) Su tuakutua kuibikatusha nka musuusa umune, mbilombene kutungunuka na kutama nka bu mutshi wi na nsumu ulombene kufuisha masaku. (Shak. 1:​14, 15) Masaku amune akata mba kuuku be bubi. Abitungu tutentekieshe’shi, atukekala nka bu bano batusangula bua kukisha nabo nsaa. (1 Kod. 15:33) Su tubadimuka atue banabene, atukalekie ba kuuku be bubi bashi na nshalelo muipushene na mayi a kulonda a Yehowa. (Luk. 21:34; 2 Kod. 6:15) Atukamono masaku na kukimba bia kuiasuka. w23.02 16 ¶7; 17 ¶10-11

Kifulo kiobe bua Yehowa akinyisha kutama muanda okuete kulonga bi bungi pa bimutale. Mu binyibinyi abitungu wefubuile kuadi ngofu kubanga binobino mpaa na bua losoo. Nyi biodi mulombene kukita. Akunyingisha na kalolo kooso bua kusankisha eshimba diaye. (Nki. 23:​15, 16) We mulombene kuibikita kushi penda mu ngakuilo oobe, anka na mu bikitshino biobe. Mu nshalelo oobe na mu muwa oobe olesha’shi we mufule Yehowa binyibinyi. Kano nyi kepatshila kakile buwa koodi mulombene kusangula mu nshalelo oobe. We kuleesha’shi we mufule Yehowa naminyi? Kia kumpala, wele luteko lui pabualo bua kuitshipa obe nabene kui Efile Mukulu a binyibinyi. (Mis. 40:8) Dingi, oleesha’shi we muitshipe pa bupenka pa kubatshishibua. Lubatshisho loobe nkipungo kia muloo na ki na muulo mu muwa oobe. Obanga nshalelo mupia kushi boobe’be nabene, anka bua Yehowa. (Lom. 14:8; 1 Mp. 4:​1, 2) Kino nkilombene kuikala bu kitshibilo kikata kiboota, na nnaakio. Na dingi, akikupa mushindo wa kuikala na nshalelo e buwa. w23.03 5-6 ¶14-15