Mueshi wa 7

Ngobesha yetu ya kuakula nkia buntu akifiki kui Efile Mukulu etu sha kifulo. Anka, kia buntu kia kuakula babaadi bekifubishe mu mushindo wi bubi. Satana Diabulu badimbile Eva, na ano madimi abatakuile muntu ku muluisho na kukutua kupuidika. (Kib. 3:​1-4) Adame baadi mufubishe kia buntu kiaye kia kuakula mu mushindo wi bubi, nsaa ibaadi mutopekie Eva na nsaa ibaadi mutopekie Yehowa bua bilubilo biaye aaye nabene. (Kib. 3:12) Kayina badimbile Yehowa kunyima kuaye kuipa mukuabo Abele. (Kib. 4:9) Lelo uno, bi bukopo bua kumona filme shi na ngakuilo e bubi. Balongi abapusha ngakuilo e bubi ku kalasa, na bantu bakulu namu ku mbalo ya mudimo. Su ta tui badimukie, tui balombene kubanga kufubisha ngakuilo e bubi atukuete kupushanga na atue banabene namu. Eyendo’shi bu biatudi bena Kidishitu atukumiina kusankisha Yehowa, nyi buakinyi t’atufubisha ngakuilo e bubi. Abitungu tufubishe dingi kino kia buntu kia kuakula mu mushindo wi buwa autumbisha Efile Mukulu eetu. w22.04 4 ¶1-3   

Yesu baadi na nkatshinkatshi pabitale bintu bia ku mbidi. Aku namu baadi adi na kutoma. (Luk. 19:​2, 6, 7) Dingi efuku, baadi mukite maalua a mfinyo e buwa bukile kilengieleshi kia kumpala kia ku bilengieleshi biaye. (Yo. 2:​10, 11) Na efuku dibafuile, baadi mufuale kilamba kia muulo. (Yo. 19:​23, 24) Anka Yesu ta baadi mutadiile’shi atume binangu ku bintu bia ku mbidi mu nshalelo aaye nya. Yesu balongieshe’shi su tuatuula Bufumu pa mbalo ya kumpala, Yehowa aketupa kiakia kiatudi nakio lukalo. (Mat. 6:​31-33) Be bungi mbakuashibue ngofu p’abo kutumikila Elango dia Yehowa dia binangu pabitale makuta. Tubandeyi kutaluula kileshesho kia mukuetu nsongualume abetanyina bu Daniel. Bambile’shi: “Panaadi nki nsongua, natshile kitshibilo kia’shi ntuule mianda ya mu kikudi pa mbalo ya kumpala mu nshalelo ande.” Ku muanda baadi muikadikie na nshalelo mupeelepeele, Daniel bapetele mushindo wadia kufubisha nsaa yaye na mayele aaye mu midimo i bungi ya teokrasi. Amba dingi’shi: “Yehowa mmumpe muloo wi bungi ushibadia kumpa makuta.” w22.05 21-22 ¶6-7

Tui balombene kulesha’shi tui bafule bia binyibinyi, pa kuilongiela Bible na mikanda ayakuila pabitale Bible nsaa yoso. Kukatusha biabia, sunga tuekala bapue kukisha bipua bi bungi mu bia binyibinyi, tui na lukalo lua kulonga mianda i bungi. Kuilongiela mmudimo wi bukopo, anka kintu ki na muulo ukata nkuikitshisha. Ta kui muntu su ngumuna a kuatudi, mufule kubadika na kulonga. Anka Yehowa etutekie buatudia “kutungunuka na kukimba,” na “kutungunuka na kukimbuula” bua kutamisha mpushisho eetu a bia binyibinyi. (Nki. 2:​4-6) Su tubekitshisha mu uno mushindo, abitukuasha misuusa yoso. Pabitale kuibadikila kuaye kua Bible kua pa bupenka, Corey amba’shi: “Natuulaa binangu ku verse umune ingi nsaa.” Apatuula’shi: “Nakumiinaa kubadika mayi ooso e kuushi ku’esaki, na kutaluula mu mikanda yoso yabadi balayile, na kukimbuula dingi. . . . Ano mayele aankuashaa bua kuuka mianda i bungi!” Su tuafubisha ano mayele sunga angi, atulesha lutumbu luetu bua bia binyibinyi p’atuata nsaa ya kuikitshisha bua kuibilonga.—Mis. 1:​1-3. w22.08 17 ¶13; 18 ¶15-16

Yesu pa baadi pa nsenga, baadi mufubishe bipangua bua kulongiesha balongi baaye pabitale Nshaye. Tubandeyi kutala malongiesha apeela abaadi mulongieshe. Yehowa aleshaa kifulo kui muntu ooso. Mu muisambo waye wa ku Muengie, Yesu baadi mukakie binangu bia balongi baaye ku bipangua bibidi biabauku kui bantu be bungi: kaanya na mpeshi. Bino bipangua bibidi bi na muulo ukata, abitukuasha bua kuikala na muwa. Su Yehowa badia kupela kupa bantu bino bipangua, ta tubadia kumufubila nya. Biabia e na kifulo kikata p’aye kupa bantu booso nguba na mpeshi. (Mat. 5:​43-45) Yesu bafubiishe dino dilongiesha, bua kulongiesha balongi baaye’shi Yehowa akumiina’shi tuleshe muntu ooso kifulo. P’atusankila kupona kua nguba sunga kumona mpeshi mutaale p’anoko, abitungu tunangushene ku kifulo kia Yehowa kishi na ntondo. Kileshesho kiaye, nkilombene kuitutakula bua kulesha kifulo kimumune p’atulungula mukandu wi buwa kui bantu booso. w23.03 17 ¶9-10

Nkinyi kibaadi kikaanyishe Yowano mutumibua? Mmuana mukashi mushaale panundu pa ino nyema yooso ya bukielo. Baadi muilengieshe bu “ndumba mukata” na abamuitanyina bu “Babilone mukata.” Mukite “lukyebanokyebano” na “bamfumu bakata ba pa nsenga.” (Kibaf. 17:​1-5) “Babilone mukata” nnanyi? Uno muana mukashi ta mulombene kulesha ndumbuluilo ya politike nya, muanda abamuakula’shi kuete kukita lusandi na bakunkushi ba politike ba mu ino nsenga. (Kibaf. 18:9) Kuete ekitshisha buadia kukunkusha bano bakata ba politike mu ngakuilo a mu kifuanyi mmuibashaale mu mongo. Na dingi, ta naye aleesha ndumbuluilo a mianda ya busunga bua luabi ya mu uno ndumbuluilo a Satana nya. Bano booso babadi baleshe mu Kibafumbwilwe bu “bansuunga ba pa nsenga.” (Kibaf. 18:​11, 15, 16, Kilombeeno Kipya 2014) Babilone a kala nyi baadi mbalo ikata ya lulanguilo lua madimi. Babilone mukata, mmulombene kulesha ndanguilo yoso ya madimi. Biabia, nnaye ampire mukata a lulanguilo lua madimi mu nsenga ishima.—Kibaf. 17:​5, 18. w22.05 11 ¶14-16

Nyina bana mulombene kuiyipusha pabitale bana baye su abakaata kitshibilo kia kufubila Yehowa. Sunga mbiabia banambutuile abauku bungi bua nkalakashi yabakuete kufuishisha bana baabo kui uno ndumbuluilo a Satana. Na dingi ba nyina bana be bungi, bakuete abapete lukalakashi lua kukusha bana bupenka sunga na mulume shii mulanguidi a Yehowa. Ta nka penda muledi afubila Yehowa bupenka mulombene kupeta lukalakashi lua kukuasha bua’shi bafubile Yehowa na lulamato nya. Mpaa na baledi be mu bia binyibinyi booso babidi, be kupeta lukalakashi lua kukuma mashimba a bana baabo bua’shi bafikie balanguidi ba Yehowa basha lulamato. Mu mushindo umune, tokambanga kuikalakasha bikilekile. Yehowa akakukuasha. We mulombene kuipusha bangi baledi bapue kufubisha biina mudimo bi kuanka bakuleshe mushindo wa kuibifubisha mu lulanguilo lua mu kifuko. (Nki. 11:14) Yehowa mmulombene nkukuasha nsaa yuesamba na bana boobe. We kuteka Yehowa bua’shi akukuashe ofubishe nkonko bibuwa bua kuuka abipuandikisha bana boobe na biabepusha.—Nki. 20:5. w22.04 17 ¶4, 7; 18 ¶9

Yesu baadi muambule bumuntu bua Yehowa mu mushindo upuidikie? Biabia nsaa y’atuuku Yesu kalolo, atunyisha kufula Yehowa ngofu. (Eb. 1:3) Biabia mushindo wi buwa wa kuuka Yesu kalolo, mpa kulonga ma Evanjile ananka, pabitale nshalelo aaye. Su tuena kiubishi kia kuibadikilanga Bible efuku dioso, buakinyi tue mulombene kubanga binobino? Nsaa y’obadika pabitale nshalelo a Yesu, shimika kasele pa ngikashi yaye. Bantu babaadi abakumiina kushaala naye na kuakula naye, na baadi asemuna bana bakinga mu maboko aaye. (Mak. 10:​13-16) Yesu baadi na kalolo, na baadi dingi kuuku balongi baaye, na balongi baaye tababaadi na moo wa kumulungula bi’abepusha. (Mat. 16:22) Pabitale uno muanda, Yesu baadi muambule Nshaye e muiyilu. Na Yehowa namu bantu abepushaa bulungantu bua kumulungula mianda. Tui balombene ku mulungula mianda mu luteko. Nsaa y’atutekie, tui balombene kumufunguila eshimba dietu. Tui bashinkamishe’shi t’etutopekaa. Muitufule na etupasukilaa.—1 Mp. 5:7. w22.08 3 ¶4-5

Bu biadi Mupangi eetu, Yehowa auku mianda yoso pa bitutale. Banda kunangushena! Auku muanda ooso pabitale muntu ooso e pano pa nsenga. (Mis. 139:​15-17) Biabia mmulombene kumona kukutua kooso kua kupuidika kuatudi bapiane kui baledi beetu. Auku mianda ayitufikilaa mu nshalelo eetu, kikashe bumuntu buetu bino biatudi beekale. Bu abituwuku Yehowa kalolo, abimutakulaa bua kuitukitshina mianda naminyi? Bino abimutakulaa bua’shi etukitshine mianda na lusa. (Mis. 78:39; 103:​13, 14) Yehowa mmuleshe’shi e kuanka bua kuitufuila lusa. Yehowa auku’shi pa muanda wa bikitshino bia muntu a kumpala Adame, atue booso tui mu mulua wa muluisho na lufu. (Lom. 5:12) Takubaadi kintu su nkimune kibatudi balombene kukita, kilombene kuituikasha bulungantu atue banabene, sunga muntu su ngumune mulombene kuitupoososha ku muluisho wa ku lufu nya. (Mis. 49:​7-9) Anka, Efile Mukulu eetu sha kifulo balesheshe lusa na aye nkuata mpango ya kuituikasha bulungantu. Yowano 3:16 alesha’shi, Yehowa batumine Muana’ye umunenka eleka buadia kufua pa muanda wetu.—Mat. 20:28; Lom. 5:19. w22.06 3 ¶5-6

Atulongo dilongiesha ku muanda wi mumune na uno ubakuile Yehowa pabitale mufubi aye Yoobo. Uno muntu sha lulamato baadi mutapikie kuishimba ngofu na bishima bibaabadi bakule kui bakuuku baye basatu Elifaze, Bildade, na Zofare. Yehowa baadi mulungule Yoobo buadia kuibatekiela. Kunyima kua Yoobo kuibatekiela, Yehowa baadi mumuelele miabi. (Yob. 42:​8-10) Nsaa yatushaala na nsungu atuiluishisha atue banabene. Yehowa akumiina’shi tupete butaale abutukila mu kusumbula sunga kupela kutuula kua nsungu kuishimba. (Ef. 4:​31, 32) Yehowa etulungula’shi, “leka nsungu sumbula etombo.” (Mis. 37:8) Su tu balondo dino elango adiketukuasha. Kulama nsungu kulombene kuluisha mbidi yetu na binangu bietu. (Nki. 14:30) Su tubalamina muntu nsungu, yaya nsungu t’ayimukalakasha, tui nka bu muntu mutome nsumu ishi ilombene kukita yawa muntu atudi balamine nsungu kintu. Nsaa yatufuila bangi lusa, tui nka bu babapete atue banabene kiabuntu. Atupete butaale bua mu binangu na bua muishimba na atuikala na mushindo wa kuenda kumpala mu mudimo watufubila Yehowa. w22.06 10 ¶9-10

Bikitshino bia lukulupilo luetu bi nka bu kifulu kia mu kinfuanyi akikaluila binangu bietu, na kuitukuasha bua kupela kunangushena penda ku atue banabeene, bilombene kutuusha masaku akutshiba kipuano kietu na Yehowa. (1 Kod. 15:​33, 34) Kifulu kietu kia lukulupilo nkilombene kuitukaluila, ku binangu bishi bilombene kuitupa mushindo wa kusankisha Yehowa. Tentekiesha’shi kuuku a madimi a Yoobo Elifaze baadi mufubishe bino binangu bimune kui Yoobo. Elifaze bambile’shi: “Byaabya muntu afwiyaa naamu nnaanyi bwa kwileesha buu mululame?” Bino nyi bibaadi mwakule pabitale Efile Mukulu’shi: “Sunga kwi beeselele baaye, Efile tee nakwo lukulupilo, na diiny’eyilu ta ndilongame ku meeso aaye.” (Yob. 15:​14, 15) Ano nyi madimi akata! Tentekiesha’shi, e kunyima kua bino binangu Satana. Auku’shi su botungunuka na kunangushena mu uno mushindo, okabanga kushimisha lukulupilo loobe. Pa mutue a biabia pela ano madimi. Kushi mpaka Yehowa akumiina’shi opete muwa wa looso, na akakukuasha bua kulombasha kano kepatshila.—1 Tim. 2:​3, 4. w22.10 25-26 ¶8-10

Satana baadi akimbi bia’shi Yoobo akumiine’shi, kuete akiengie ku muanda’shi Yehowa mmumufiitshile munda. Bu kileshesho, Satana baadi mufubishe kipapi ki bukopo bua kuipaa bana ba Yoobo ekumi babaadi mu nshibo abadi biakudia pamune. (Yob. 1:​18, 19) Satana baadi mufubishe dingi kaalo, kabaadi akayiki muiyilu bua kuipaa nyema yoso ya Yoobo, anka bafubi baye babaadi bakaluilue ku kaaka kaalo. (Yob. 1:16) Pa muanda kipapi na kaalo bibaadi abifiki muiyilu, anka paapa, Yoobo baadi munangushene’shi abifiki kui Yehowa. Bu kipeta, Yoobo baadi mukumiine’shi Yehowa ngi mumufiitshile munda. Sunga mbiabia, Yoobo baadi mupele kusumbushena Nshaye a muiyilu. Yoobo baadi auku’shi munda a bipua bi bungi, baadi apete bintu bi bungi bukile abifiki kui Yehowa. Baadi munangushene’shi su e na muloo wa kukumiina bintu bi buwa, abitungu akumiine dingi bintu bi bubi. Biabia, Yoobo bambile’shi: “Eshina dya Yehowa dyende ntumbo.”—Yob. 1:​20, 21. w22.06 21 ¶7

Yesu badimuishe balongi baaye mu uno mushindo wi mumune wabadi baleshe mu Yowano 17:14. Tuibamone kulombana kua buno butemuki bikishekishe mu bipua lukama bipue kukila. Mushindo kinyi? Kapindi kapeela kunyima kua Yesu kutudibua bu Mesiya Mfumu mu kipua kia 1914, Satana baadi mubingibue muiyilu. Binobino mmuedibue mu lukano pano pa nsenga, kuete atengiela kabutu kaye. (Kibaf. 12:​9, 12) Kasha nka afika pano pa nsenga kuete afubu ngofu, Satana mmuinyongole ngofu, na e na nsungu i bungi, na kuete kulua na muilo w’Efile Mukulu. (Kibaf. 12:​13, 17) Kano ngi kabingilo ka buakinyi ndumbuluilo a Satana banyiisha kushikua muilo w’Efile Mukulu. Sunga mbiabia, ta tui na kabingilo ka kutshina Satana na bantu baye nya. Na dingi pamutue pa kumutshina, tui balombene kuikadika na kishinkamisho ki mumune na kibaadi nakio Mpoolo mutumibua pa bafundile’shi: “Su Efile Mukulu e lwetu lupese, a nnanyi aketukambila?” (Lom. 8:​31, EEM) Tui balombene kutuula lukulupilo luetu looso mui Yehowa. w22.07 18 ¶14-15

Yesu ta baadi ekalakasha bua’shi, nkulombene kukutshikua bafubi ba uno mudimo wa mukandu wi buwa, mu mafuku a ku mfudiilo kua uno ndumbuluilo a bia pano nya. Baadi muukie’shi mayi a butemuki a kayimba ka misambo abaadi alombene kulombana bino: ‘Mwilo ôbe aukepâna kodi, p’efuku dy’okebebwela ngoshi.’ (Mis. 110:​3, EEM) Su okuete kukitanga mudimo wa kulungula mukandu wi buwa, okuete kukuatshishena Yesu na mpika a lulamato na mudimukie, na okuete kukuasha bua’shi buno butemuki bulombane. Mudimo, ukuete kuenda kumpala, anka kui nkalakashi. Lukalakashi lumune luabakuete kufumankana nalo kui balungudi ba Bufumu, nyi mbuluishi. Bantu basumbule lukumiino, bakata ba bipuilo, na bakata ba mianda ya politike, mbalungule bantu be bungi mianda ya madimi pabitale mudimo wetu. Bena kifuko netu, bantu abetuuku kalolo, na bena mudimo netu, be kuitupalakesha mianda ya madimi na mbalombene kuitukitshisha bia’shi tulekie kufubila Yehowa na’shi tulekie kulungula mukandu wi buwa. Mu angi maumbo, beshikuanyi betu bakuete kuitukuatshisha moo, kuitukitshiina mianda bi bubi, na kuitukuata sunga kuituela mu nkano. w22.07 8 ¶1; 9 ¶5-6

Yehowa atengiela’shi tuikale atuiatshila nsaa ya kuibadikila Bible pa kiubishi, na kunangusheena ngofu pabitale biatubadika. Nsaa yatutumikila biabia biatulongo, lukumiino luetu alunyiisha kunyinga, na atunyiisha kuifubuila peepi na Nshetu e muiyilu. Bu kipeta, atuikala na bukome bua kunyingiila nkalakashi. Yehowa apa dingi baaba bakulupile Muiyi dyaye kikudi kiaye ki selele. Na kino kikudi kiaye akitupa “bukome bushii bwa kupwandjikisha nabo kintu” bua kunyingiila lukalakashi looso lualua. (2 Kod. 4:​7-10) Ku bukuashi bua Yehowa, “mpika a lulamato na mudimukie,” kuete kutusha miisambo i bungi, ma video, ngono ilombene kuitukuasha bua kunyingisha lukumiino luetu na kushaala bapasukie mu kikudi. (Mat. 24:​45, NWT) Yehowa kuete kulongiesha muilo waye bua kuifuleena na kuinyingisheena ku muntu na muntu mu kipungo kia nkalakashi. (2 Kod. 1:​3, 4; 1 Tes. 4:9) Bakuetu balume na bakashi be kuanka bua kuitukuasha, bua’shi tushale na lulamato nsaa y’atupete nkalakashi i bukopo. w22.08 12 ¶12-14

Pa kulungula bakuetu balume na bakashi ngikashi i buwa yabadi nayo. Atuibapa kabingilo ka kuikala mu kipuano ki buwa ku muntu na muntu, na kunyingisha kakongie mu kifulo. Ingi nsaa, sunga bena Kidishitu banyingie mu kikudi mbalombene kupeta ingi mianda sunga kulee munkatshi muabo. Bino ngi bibakitshikile bua Mpoolo mutumibua na kuuku aaye a p’eshimba Barnabase. Bano bantu babidi, ta babaadi na mueneno umune pabitale kutuala Maako bua kuenda naye mu luendo luabo lua bu misionere nya. “Babaadi balee” munkatshi muabo na abo nkuiabuula. (Bik. 15:​37-39, NWT) Anka Mpoolo, Barnabase, na Maako, babaadi balushuule butaale munkatshi muabo. Kunyima kua mafuku, Mpoolo bakuile mianda i buwa pabitale Barnabase na Maako. (1 Kod. 9:6; Kol. 4:10) Na atue namu abitungu tupudishe kuikutuena kooso kuatudi nako na bakuetu mu kakongie, na tutungunukie na kutuula binangu ku ngikashi yabo i buwa. Mu uno mushindo, atulama butaale na buumune. w22.08 23 ¶10-11

Bu biatukuete kuikitshisha bua kuikala na nshalelo muipushene na mayi a kulonda alulame a Yehowa, tulekie kutshibila bangi kiimu, na kuimona bu balulame. Abitungu tulamiine mu binangu’shi Yehowa nyi “nsushi a boso ba pa nsenga.” (Kib. 18:​25, EEM) Yehowa ta muitupe matalua a kutshibila bangi biimu nya. Tutaluuleyi dingi kileshesho kia Yosefe baadi muntu mululame. Baadi mupele kutshibila bangi kiimu, sunga kui baaba babaadi abamukitshina mianda i bubi. Bakuabo balume babaadi bamutombokiele, bamupaana bu mpika, na abo kuenda mu nkalungula nshaabo’shi Yosefe baafu. Kunyima kua bipua bi bungi, Yosefe baadi mufumankane na kifuko kiaye. Yosefe baadi mupue kuikala mfumu e na bukome, baadi mulombene kutshibila bakuabo kiimu ki bukopo na kuiobuela. Bakuabo na Yosefe babaadi na moo’shi, mmulombene kuiobuela sunga bibaabadi bapue kuteka lusa bua kilubilo kibaabadi bakite. Anka Yosefe baadi muibashinkamishe’shi: “Tanutshinanga nya. Ami ne pa mbalo y’Efile Mukulu nyi?” (Kib. 37:​18-20, 27, 28, 31-35; 50:​15-21) Na kuiyisha kooso Yosefe baukile’shi, nka penda Yehowa nyi e na matalua akutshibila bakuabo kiimu. w22.08 30 ¶18-19

Ouku’shi Yehowa mmulombene nkufubisha bodia kuikala bu lualuulo ku nteko ya muntu kampanda su? Bino mbia binyibinyi su we muikale mukulu, mufubi a midimo, mbala-mashinda, sunga mulungudi a mukandu wi buwa mu kakongie. Bino dingi mbia binyibinyi su we muikale nsongua, muntu mununu, mukuetu mulume sunga mukuetu mukashi. Su muntu kampanda mufule Yehowa amutekie bukuashi, Efile Mukulu eetu mulombene kufubisha bakulu, sunga bangi bafubi baaye baasha lulamato be kuanka bua “kuikala bu nsulo ya kusambibua kukata” kui yawa muntu. (Kol. 4:​11, NWT) Nyi kineemo kikata kia kufubila Yehowa na bakuetu mu uno mushindo! Tui kupeta mushindo wa kukuasha na kusamba bakuetu, nsaa ayituuku bipupa bia mikumbo, masaku aatukila ku bintu bipangibue, na kubinguabingua. Tui kukumiina kukuasha bangi anka biekala lukalakashi su be na kifuko neetu bakuete kukienga. Sunga mbiabia, atukumiina kukuasha bakuetu, na Yehowa kuete kusanka nsaa y’atuikitshisha mupunda ngobesha yeetu bua’shi tumone bia kuibakuasha.—Nki. 19:17. w22.12 22 ¶1-2

Kifulo, ngi nsulo ya lukulupilo. Yesu bakuile’shi miya ibidi ikata ngino; kufula Yehowa na kufula bantu netu. (Mat. 22:​37-39) Kifulo kietu bua Yehowa, akitutakula buatudia kuambula kileshesho kiaye kipuidikie kia bu muntu akukulupilua. Bu kileshesho, kifulo bua bakuetu balume na bakashi, akitutakula mu kulama mianda yabo ifuame. Ta tui balombene kukumiina kuakula mianda ya bangi ifuame, ilombene kuibakuatshisha buufu, kuibayisha milongo, na kuibatapa ku mashimba nya. Kuiyisha, akuitukuasha buatudia kuikala bantu bakukulupilua. Muina Kidishitu muiyishe t’akimbaa bia kukaanyisha bangi, pa kuikala bu muntu a kumpala a kulungula bangi mianda ifuame ya bangi. (Fid. 2:3) Teataa na muulo ukilekile pa kuamba’shi, nauuku mianda yoso, kadi ntshi na matalua a kuiyakula. Kuiyisha akuitukuasha bua kuleka kulungula bantu be bungi mueneno eetu atue banabene pabitale mianda yabashi baakule mu Bible sunga mu mikanda yeetu ayipatuula Bible. w22.09 12 ¶12-13

Muikeyilu balunguile Ndanyele, mayi a butemuki e mu mukanda wa Ndanyele, babaadi balombene kuiapusha kalolo kui muilo w’Efile Mukulu. Anka ano mayi “mubi su ngumune t’akeapusha.” (Nda. 12:​10, NWT) Binobino tui mu kipungo akitungu tuleshe mu muikeelo wetu’shi ta tui munkatshi mua bantu babi. (Mal. 3:​16-18) Yehowa kuete abungu baaba bamono bu “bantu baye aye nabene” sunga baaba baadi muate na muulo. Abitungu tushinkamiishe’shi atukumiina kuikala munkatshi muabo. Mu biinyibiinyi, tui mu kipongo ki bukopo. Anka, kui ingi mianda ya kukaanya ayikiebe kukitshika binobino. Mu kapindi kapeela’mu atukamono kuluishibua kua bubi booso. Na dingi atukamono kulombana kua mulayilo wa Yehowa wi mu Ndanyele awamba’shi: “Okeebwo bwa kupeta bwobe bwedi ku mfudiilw’a mafuku.” (Nda. 12:13) Okuete kutengiela na kinsukunsuku kioso efuku “adikebwo” Ndanyele na baaba booso bodi mufule buabadia kuikala dimo na muwa su? Su mbiabia kita mobe mooso binobino bodia kushaala na lulamato, na we mulombene kushinkamisha’shi eshina diobe adikashaala difundibue mu mukanda wa muwa wa Yehowa. w22.09 24 ¶17; 25 ¶19-20

Ano mayi abaadi alombene kunyingisha Esekyele. Buakinyi? Kushi mpaka, baadi mutentekieshe’shi Yehowa baadi mufubishe ano mayi amune nsaa ibaadi mutume Moyise na Yeeshaya mutemuki Aaye. (Efi. 3:10; Yesh. 6:8) Esekyele baadi muukie dingi, mushindo ubaadi Yehowa mukuashe bano batemuki babidi bua kulombasha mudimo wabo wi bukopo. Ngi buakinyi nsaa ibaadi Yehowa mulungule Esekyele misuusa ibidi’shi: “Naakutumu,” mutemuki baadi na kabingilo ke buwa kakukulupila mu bukuashi bua Yehowa. Ngi buakinyi mu mukanda wa Esekyele atusangana kishima: “Yehowa bandungwile uno mwanda’shi,” misuusa i bungi. (Es. 3:​16, EEM) Na dingi baadi mufunde dingi kishima “Yehowa bandugwile dingi’shi” mu ma mbalo e bungi. (Es. 6:1) Kushi mpaka Esekyele baadi mushinkamishe dingi’shi Yehowa baadi mumutume. Na dingi, Esekyele baadi muana a tshite-muakuidi, na babaadi pangi bamulongieshe kui nshaye mushindo ubaadi Yehowa mukitshine batemuki baaye mianda mu mafuku a kala. Yehowa balunguile Isaake, Yaakobo, na Yeelemiya bino bishima’shi: “Nee noobe.”—Kib. 26:24; 28:15; Yel. 1:8. w22.11 2 ¶3

Sunga biekala’shi Adame na Eeva abaluishiishe na balekiela bana baabo lufu, Yehowa ta mushintuule binangu biaye pabitale mpango yaye nya. (Yesh. 55:11) Mpango yaye ikiaipa bantu basha lulamato mushindo wa kuikala na muwa wa ikalaika. Mianda yabadi baakule kui Yehowa na bintu biadi mukite abilombasha mpango yaye. Yehowa balayile’shi akasangula bafue na kuibapa mushindo wa kupeta muwa wa ikalaika. (Bik. 24:15; Tt. 1:​1, 2) Yobo muntu sha lulamato baadi na kishinkamiisho’shi Yehowa akumiina kusangula baaba booso bafue. (Yob. 14:​14, 15) Mutemuki Ndanyele baadi muukieshi bantu abakasanguka, abakekala na mushindo wa kupeta muwa wa losoo. (Mis. 37:29; Nda. 12:​2, 13) Bena Yuda ba mu mafuku a Yesu, babaadi baukie’shi Yehowa akapa bafubi baaye basha lulamato “mmuuwa wa iikalaika.” (Luk. 10:25; 18:18) Yesu baadi muakule misuusa i bungi pabitale uno mulayilo, n’aye nabeene babaadi bamusangule kui Nshaye.—Mat. 19:29; 22:​31, 32; Luk. 18:30; Yo. 11:25. w22.12 4-5 ¶8-9

Yehowa etuitamina, buatudia kuifubuila kuadi. (Shak. 4:8) Akumiina kuikala Efile etu, Nshetu na kuuku etu. Alulaa ku nteko yetu na kuitukuasha mu kipungo ki bukopo. Na afubishaa ndumbuluilo aaye bua kuitulongiesha na kuitukaluila. Tui balombene kuifubuila kui Yehowa p’atuele luteko, p’atubadika Eyi diaye, na p’atunangushena ku dianka. Su tubakitshi biabia atulesha’shi tui bamufule na, tukuete kumutumbula. Bino abitutakula mu kumukookiela, na kumupa ntumbo yadi mulombene. (Kibaf. 4:11) Patunyiisha kuuka Yehowa, atunyiisha kumukulupila na kukulupila ndumbuluilo aadi muitupe bua kuitukuasha. Diabulu kuete kutompa kubofusha lukulupilo luetu mui Yehowa bipeelabipeela na mui ndumbuluilo aaye. Anka tui kukambila ano mayele aaye. Su lukumiino luetu ndunyingie na lukulupilo luetu namu mui Yehowa alunyingi, na t’atukasumbusheena Efile Mukulu eetu na ndumbuluilo aaye.—Mis. 31:​13, 14. w22.11 14 ¶1-3

Bena Kidishitu be bungi ba binyibinyi ta mbashaale mu bulungantu buabo nya, sunga mbiabadi na nshalelo aabo alesha’shi mbafule Yehowa bu Mukunkushi aabo. Bena Kidishitu ba binyibinyi, be na kitshibilo kia kushaala na lulamato kui Yehowa, ngi bibaabidi bimuekie kui bena Ebelu basatu babaadi bashaale na lulamato kui e Kunundu a Booso, baadi muibapaashe mu mfuulo a kaalo. Kayimba ka misambo Davide, bafundile pabitale muulo wa kulama kululama kui Efile Mukulu bino: ‘Yehowa asambishaa bisamba, nsambishe Yehowa, muyile bululame, na kululama kwande.’ (Mis. 7:8) Davide bafundile dingi’shi: “Ondame’mi muntu mululame shi na matope.” (Mis. 25:​21, EEM) Nshalelo e buwa nyi nkushaala na lulamato kui Yehowa, na kulama lulamato luetu kuadi! Dingi, atupusha nka bu bibapushiishe kayimba ka misambo bafundile’shi: ‘Baasha muloo mbano be na mwikeelo ululame, . . . abalondo miiya ya Yehowa.’—Mis. 119:1. w22.10 17 ¶18-19

Yobo baadi muisambe na bantu be bungi mu nshalelo aaye. Anka muisambo wi na muulo ukata nguno ubaadi muisambe na Yehowa Efile Mukulu aaye. Bino bibaadi bilombene kukuasha Yobo buadia kuuka bi binangu bia Yehowa, na kunyingisha lukulupilo luaye mui Yehowa’shi mmulombene kupa bafubi baaye bintu biabadi nabio lukalo. Bu kileshesho, Yobo baadi mutentekieshe’shi Efile Mukulu apasukilaa nyema, mmulombene kumupasukila namu naaye. (Yob. 38:​39-41; 39:​1, 5, 13-16) P’aye kutala bileshesho bia bipangua, Yobo baadi mulongie bi bungi pabitale ngikashi y’Efile Mukulu aaye. N’atue namu, tui balombene kulonga bi bungi pabitale Efile Mukulu eetu nsaa y’atutaluula kalolo bintu biadi mupangie. Anka, ingi nsaa abituelelaa bukopo bua kukita bino. Su tui basheleele mu kibundi tui balombene kukutua kumona bishinkamiisho bipeela bia bipangua mu nshalelo eetu a kuifuku n’efuku. Sunga tuekala bashaleele peepi na bipangua, tui balombene kuipusha bu bashi na nsaa ya kulongiela kui bipangua. Biabia, Anka bi buwa kuata nsaa na kuikitshisha bua kubandila bipangua. w23.03 15 ¶1-2

Yesu bambile’shi, “kutshinkakana kukata kwa nsenga,” na angi masaku aatukila ku bintu bipangibue abikamueneka kumpala kua’shi mfudiilo ifikie. (Luk. 21:11) Yesu batemukile dingi’shi, “t’abakaneemeka dingi miya,” bino mbia binyibinyi muanda atumono bibeshi, buntomboshi, na ngoshi ya ba teroriste. (Mat. 24:​12, NWT) Na Yesu ta muakule’shi ino mpombo yoso ayikafikila nka bantu babadi basumbushene kui Yehowa nyaa. Mu kuilekeena na biabia, bafubi be bungi ba Yehowa baasha lulamato nabo namu mbapete masaku aatukila ku bintu bipangibue. (Yesh. 57:1; 2 Kod. 11:25) Yehowa ta mulombene kuitukaluila mu kilengieleshi ku masaku ooso aatukila ku bintu bipangibue nyaa, anka etupa kioso kiatudi nakio lukalo buatudia kushaala bawumiine na mu butaale. Abiketubofuila bua kushaala baumiine su tuibaate mpango kumpala ya kuilumbuula bua kuuka kia kukita. Biabia kuno kuilumbuula akulesha’shi tubashimisha lukumiino mui Yehowa su? Nya ta mbiabia nya. Mu kuilekeena na biabia, kuilumbuula ku masaku aatukila ku bintu bipangibue, akulesha’shi tui na lukumiino na tuibakulupile mu ngobesha yaye ya kuitukaluila. Mu mushindo kinyi? Eyi di’Efile Mukulu aditukuasha buatudia kuilumbuula bua masaku aatukila ku bintu bipangibue. w22.12 18 ¶9-10

Pabaadi Yosefe mu lukano, Yehowa baadi mukite bia’shi mfumu a bena Ejipitu apete bilotua bibidi abimukalakasha. Nsaa ibaukile mfumu’shi Yosefe e na ngobesha yadia kupatuula bino bilotua, batumine eyi bua’shi bafikie naaye. Ku bukuashi bua Yehowa, Yosefe baadi mupatuule bino bilotua na bibaadi bikaanyishe Faraone, na malango e buwa abaadi mumupe. Faraone batunduile’shi Yehowa baadi na Yosefe, nyi buakinyi Faraone batudile Yosefe bu mukata atalaa mashibo a bidibua ooso a mu Ejipitu. (Kib. 41:​38, 41-44) Kunyima, nsala i bukopo ibatuelele ta ibaadi na bukitshishi nka penda mu Ejipitu nya, ibaadi na bukitshishi dingi mpaa na mu Kanaana, muiwumbo dibaadi dishalele kifuko kia Yosefe. Yosefe binobino bapetele muasu wadi mulombene kupaasha kifuko kiaye, na kulama lutandua lubaadi lulombene kutuala mpaa na ku Mesiya. Abimueneka kalolo’shi, Yehowa, baadi na Yosefe, bioso bibaadi abikitshi Yosefe baadi oobesha. Sunga bibaadi ba tuutu ba Yosefe abakiebe kumuipaa, Yehowa baadi mushintuule uno muanda waaye bua’shi alombashe mpango Yaaye. w23.01 17 ¶11-12

Muntu mudimukie aye nabene, ekalaa mupasukie ku masaku ooso alombene kutshiba kipuano kiaye na Yehowa, na elaa matabula buadia kuibileka. Mu uno mushindo, ashaala aye nabene mu kifulo ki’Efile Mukulu. (Nki. 22:3; Yu. 20, 21) Mpoolo mutumibua badimuishe bena Kidishitu buabadia kudimuka abo banabene. Bu kileshesho, balunguile bena Kidishitu ba mu Efeso’shi: “Abitungu nudimukye mu mwikêlo wenu: ikalai anutambuka bu bantu basha binangu, kushi bu bashi na binangu.” (Ef. 5:​15, 16, EEM) Satana kuete ekitshisha bua kuluisha kipuano kietu na Yehowa. Anka Bible etulanga’shi: ‘Shingulayi kalolo’shi nkinyi akikiebe Yehowa kuanudi,’ bino ngi biatudi balombene kuikaluila ku buluishi booso bua Satana. (Ef. 5:17) Buatudia kuata bitshibilo bibuwa, abitungu tushinguule sunga kuuka “akikumiina Yehowa’shi tukite.” Tui kukita bino patuikala atuilongiela Eyi di’Efile Mukulu nsaa yoso na kunangushena ku dianka. P’atunyisha kupusha kikiebe ki’eshimba dia Yehowa na kuikala na “binangu bia Kidishitu,” atunyisha kutambuka bu “bantu basha binangu” sunga tuakutua kuikala na buludiki kampanda abuitulesha kiatudia kukita na kiatushi balombene kukita.—1 Kod. 2:​14-16. w23.02 16-17 ¶7-9

Mushindo kinyi obangaa kukomba mu nshibo yobe? Pangi kumpala obangaa kukaasha bintu bi muanka, bua’shi omone bia kukomba kalolo. Biabia, bi kukitshika naminyi su tue muimukombe dimo? Nka bu biowuku kalolo, lufuufi na nsenga bi kualuka dingi lubilolubilo. Bua’shi nshibo yobe ikale ayimueka kalolo kumpala kua bantu, abitungu kuimukomba nsaa yooso. Mu mushindo umune, abitungu tutungunukie na kutaluula bi binangu bietu na bumuntu buetu. Biabia, kumpala ku’atue kubatshishibua tubaadi bekitshishe ngofu bua kushintula muikeelo wetu mu muwa wetu bua’shi: ‘Twikale betooshe atwe banabeene ku mako ooso a mbidi na a kikudi.’ (2 Kod. 7:​1, Kilombeeno Kipya 2014) Biabia, abitungu tukookiele elango dia Mpoolo adiamba’shi: ‘Tungunukaayi na kwikala bapya.’ (Ef. 4:23) Lufuufi na nsenga bia uno ndumbuluilo mbilombene kutuela muatudi bukidibukidi. Buatudia kusankisha Yehowa, abitungu nsaa yooso tuikale atutaluula binangu bietu, bumuntu buetu, na nkalo yetu. w23.01 8 ¶1-2

Puandikisha’shi bodi oteemesha Yesu pabaadi alongiesha. Mushindo ubaadi ateemuna Bifundue Biselele, na mushindo ubaadi muibilamiine mu binangu! Bibaadi mu nsaa ya lubatshisho luaye na kuedibua kuaye kua muimu wa kikudi kiselele nyi pabaadi pamuenekie patooka’shi Yesu bapetuula binangu biaye bibaadi nabio kumpala kua kufika bu muntu. Mu mayi aaye a kumpala abaadi muakule kunyima kua lubatshisho luaye, na mu angi mayi aaye a mfudiilo abaadi muakule kumpala kua lufu luaye, abaadi aatukila nka mu Bifundue. (Miy. 8:3; Mis. 31:5; Luk. 4:4; 23:46) Munda a bipua bisatu na kipindi pankatshi pa ino mianda ikata ibidi, Yesu baadi abadikila bantu Bifundue na kuibatemuina bianka, na kuibapatuluila bianka. (Mat. 5:​17, 18, 21, 22, 27, 28; Luk. 4:​16-20) Bipua bi bungi kumpala kuadia kubanga mudimo wa bulungudi, Yesu baadi abadika na kupusha Eyi di’Efile Mukulu misuusa yooso. Kushi mpaka, ku nshibo kuabo, Yesu baadi apusha Mariya na Yosefe abatemuna Bifundue. (Miy. 6:​6, 7) Dingi Yesu baadi atuele mu kitumbuilo efuku dioso dia Sabaato na kifuko kiabo. (Luk. 4:16) Nsaa ibabadi muamua baadi ateemesha na kalolo kooso nsaa ibaabadi ababadika Bifundue. w23.02 8 ¶1-2

Kui tubingilo tui bungi tua kufula Yehowa. Bu kileshesho, we mupue kupusha’shi aye nyi “nsulo ya muuwa” na’shi etupeyaa “kya-buntu kyooso kya muulo na bwedi booso bupwidikye.” (Mis. 36:9; Shak. 1:17) Kintu kioso ki buwa ki’atusangalaa nakio akituukilaa kui Efile Mukulu eetu shaa kifulo na kalolo. Buakinyi nkuulo nkia buntu ki buwa? Nkuulo nkia buntu ki buwa kitupe Yehowa. Buakinyi atuamba biabia? Nangushena pabitale kipuano ki pankatshi pa Yehowa na Muana aaye. Yesu bambile’shi: “Yaaya mmumfule” na “nee mufule Yaaya.” (Yo. 10:17; 14:31) Kipuano ki pankatshi p’aabo kibatamine pabaabadi pamune munda a bipua midiyala. (Nki. 8:​22, 23, 30) Binobino, nangushena mushindo ubaadi Efile Mukulu mupushe kenyongoshi, pa kutadiila Muana aaye akiengie na kufua. Yehowa mmufule bantu, mpaa n’obe, baadi mukumiine kutuusha Muana aaye a kifulo bu mulambu bua’shi obe na bangi nupete muwa wa ikalaika. (Yo. 3:16; Nga. 2:20) Kano nyi nkabingilo kakata katudi naako ka kufula Efile Mukulu. w23.03 4-5 ¶11-13

Abitungu tusumbule malongiesha a bantu basumbule lukumiino. Yesu baadi mulangie bangi babaadi batueshe kuiabuula na tusakatusaka mu kakongie ka mu Peregame. (Kibaf. 2:​14-16) Baadi mutumbule baaba booso babaadi mu kakongie ka Tyatire bashi “batwelakane mu myanda ya Satana” na be balunguile’shi, “shalayi balamate” ku bia binyibinyi. (Kibaf. 2:​24-26, NWT) Bena Kidishitu babofule na babaadi belekiele abo banabene na kulubishua na ano malongiesha a madimi, babaadi abatungu’shi belangie kuishimba. Uno muanda nguitutale naminyi lelo uno? Abitungu tusumbule dilongiesha dioso dikutuene na binangu bia Yehowa. Bantu basumbule lukumiino mbalombene kumueneka bu be na “mwikeelo wa bwin’Efile Mukulu, anka bakwete kutuna bukome bwa’bo.” (2 Tim. 3:​5, Kilombeeno Kipya 2014) Mbibofule buatudia kutundula na kusumbula malongiesha a madimi, nsaa yatuibadikila Eyi di’Efile Mukulu kalolo. (2 Tim. 3:​14-17; Yu. 3, 4) Abitungu tushinkamishe’shi lulanguilo luetu, ndukuminyibue na Yehowa. Su tukuete kukita kintu kampanda kilombene kukutshishua lulanguilo luetu bua’shi belukumiine, abitungu tushintuule nka paapa tukite mianda i buwa.—Kibaf. 2:​5, 16; 3:​3, 16. w22.05 4 ¶9; 5 ¶11