Mueshi wa 6

Yoobo baadi asangeela kipuano kiaye na Yehowa. Baadi na muloo wi bungi mu kifuko kiaye, na baadi na bupeta bui bungi. (Yob. 1:​1-5) Anka dingi efuku, Yoobo baadi mushimishe bintu bioso. Kumpala bashimiishe bupeta buaye. (Yob. 1:​13-17) Dingi bana baye booso baadi mufule babafuile. Banda kunangushena bukata bua kenyongoshi, bubaadi bupushe Yoobo na mukashi aaye pababaukile’shi bana baabo booso ekumi babaafu. Tatua kukaanya, Yoobo baadi musaane bilamba biaye adila maalo, ashaala mpaa na mu nsenga! (Yob. 1:​18-20) Satana baadi dingi mukiengieshe Yoobo ngofu na maladi. (Yob. 2:​6-8) Kumpala kua ano makienga, bantu babaadi abaneemeka Yoobo ngofu. Bantu babaadi abafiki kuadi mu kuteka malango. (Yob. 31:18) Binobino, bantu abamusumbushena. Babaadi bamusumbushene kui bakuabo, ba kuuku baye ba kifulo, mpaa na kui bafubi baye ba mu nshibo yaye’ye nabene!—Yob. 19:​13, 14, 16. w22.06 21 ¶5-6

Kunyima kua lubatshisho, atue booso atuikalaa na lukalo lua kulonda elango dia Mpoolo mutumibua di bapeele bena Kidishitu neetu ba mu Efeso. Baadi muibanyingishe buabadia kufika bena Kidishitu “balombanyinyîne.” (Ef. 4:​13, EEM) Uno nyi ungi mushindo ubebalunguile, bua ‘kutungunuka na kuenda kumpala.’ We mupue kubadiila kufula Yehowa ngofu. Anka abitungu kifulo kiobe kinyishe kutama kuadi. Mushindo kinyi? Mpoolo mutumibua baadi muakule mushindo umune, w’atupete mu Bena-Fidipe 1:9. Mpoolo baadi mutekiele bena Kidishitu ba mu Fidipe’shi, “kifulo kyeenu kitame anka kutama.” Biabia kifulo kietu nkilombene kutama. Tui balombene kukita bino pa kukimba “kiukilo na mu kapatupatu kooso.” P’atunyisha kuuka Yehowa, atunyisha kumufula na kusankila bumuntu buaye, na mushindo w’akita mianda. Nsaa ayitama lukalo luetu lua kumusankisha, t’atukumiina kukita kintu su nkimune akimuinyongosha. Atuikitshisha bua kuuka ki’akiebe’shi tukite, na mushindo wa kuikikita. w22.08 2-3 ¶3-4

Mianda yabadi bafunde mu mukanda wa Kibafumbwilwe ta mbafundile bantu booso mu kibungi nya. Anka mbetufundile atue bafubi b’Efile Mukulu belambule. Pa muanda wa’shi tui muilo w’Efile Mukulu, ta tui balombene kukaanya nsaa yatusangana’shi, tu kuete kukuatshishena kulombana kua ano matemuki atusangana mu uno mukanda aukaanyisha wa Kibafumbwilwe. Yowano mutumibua baadi muleshe kipungo akilombana ano matemuki. Nsaa ibakuile’shi: “Kikudi kibangikiile mu efuku dya Mwanaana.” (Kibaf. 1:​10, Kilombeeno Kipya 2014) Nsaa ibafundile Yowano ano mayi mu kipua kia 96 bino bipungo bietu (B.B.,) “efuku dya Mwanaana” dibaadi diki kula ngofu. (Mat. 25:​14, 19; Luk. 19:12) Anka muyile butemuki bui mu Bible, diadia efuku dibabangile mu 1914 nsaa ibaabadi batuule Yesu bu Mfumu muiyilu. Kubanga nka mu kiakia kipua matemuki a mu Kibafumbwilwe atale muilo w’Efile Mukulu, ababangile kulombana. Oolo, binobino tui mu “efuku dia Mwanaana”!—Kibaf. 1:3. w22.05 2 ¶2-3

Abaadi n’aye, booso bubidi nyema na mutemuki a madimi babeebelele mwishiba dia kaalo aditeembe suufule. Sunga mbiabaki’abatungunuka na kufuba, bano bena politike booso beshikuanyi b’Efile Mukulu abakaluishibua bua looso. Bino abipushisha kinyi kuatudi? Bu biatudi bena Kidishitu, abitungu tulamate kui Efile Mukulu na Bufumu buaye. (Yo. 18:36) Abitungu kuleka kutuelakana mu mianda ya politike ya ino nsenga iluile. Bua kushaala kushi kutuelakana mu mianda ya ino nsenga bi bukopo, muanda mbulamatadi ya ino nsenga ayitutekie bua’shi tuibakuatshishene mu ngakuilo sunga mu bikitshiino. Baaba booso abakuatshika ku bukitshishi bua uno nyema, abakapete kitampi. (Kibaf. 13:​16, 17) Yawa ooso akedibua kitampi na uno nyema a bukielo, t’akakuminyibua dingi na Yehowa nya na dingi akashimisha mpaa na muwa wa ikalayika. (Kibaf. 14:​9, 10; 20:4) Bi na muulo bua’shi tushaale kushi kutuelakana mu mianda ya ino nsenga, sunga mbulamatadi ya ino nsenga ayitukitshisha pa bukopo bua’shi tuiyikuatshishene mu mishindo yoso yaya! w22.05 10-11 ¶12-13

Kangi kepatshila akatungu’shi wekale nako nka kulonga mayele aakuasha. Su tubapete mayele kampanda, atuikala na ngobesha ya kukita bi bungi mu mudimo watufubila Yehowa. Banda kutala bungi bua bafubi abutungu bua kufuba ku mashibo a Betele, mashibo a Bikongeno, na mashibo a Bufumu. Be bungi ba kuabadi mbalongie bia kuikala na ino ngobesha pa kufuba pamune na bakuetu balume na bakashi abauku bia kukita ino midimo kalolo. Lelo uno, bakuetu boso balume na bakashi bakuete kulonga mayele ena muulo aakuasha bua kubamba mashibo a bikongeno na mashibo a Bufumu. Mu ino mishindo na mu ingi, Yehowa Efile Mukulu, ‘Mfumu a ikalayika,’ na Kidishitu Yesu, ‘Mfumu a ba . . . mfumu,’ bakuete kukita midimo ya kukanya ku bukuashi bua bantu abauku kufuba kalolo. (1 Tim. 1:17; 6:15) Atukumiina kukita muetu mooso na kufubisha ngobesha yetu bua kutumibisha Yehowa, kushi bua kuitumbisha atue banabene.—Yo. 8:54. w22.04 24 ¶7; 25¶11

Salomone baadi na bupeta bui bungi, na baadi na nshalelo e buwa bukile na nshibo i buwa. (1 Bf. 10:​7, 14, 15) Yesu namu ku luaye lupese, baadi na tu bintu tupeela na ta baadi su na yaye nshibo ya kushaala. (Mat. 8:20) Biabia, bano booso bantu babidi babaadi na nkatshinkatshi pabitale bintu bia ku mbidi, ku muanda binangu biabo bibaadi na nsulo imune, Yehowa Efile Mukulu. Salomone baadi muukie’shi na makuta, tui balombene kupeta bintu biatudi nabio lukalo, na kupeta bingi bintu bi’atukumiinaa. Biabia, sunga mbibaadi na bupeta bui bungi, Salomone baadi mushinkamishe’shi kui kintu ki na muulo kukila makuta. Bu kileshesho, bafundile’shi: “Nkumo iibuuwa ngikile bupeta ku muulo.” (Nki. 22:1) Salomone baadi dingi mumone’shi bantu be na kifulo na mfualanga, t’abakambaa kupeta muloo wabadi nao lukalo nya. (Mul. 5:​10, 12) Na baadi mudimushe dingi’shi baaba booso batuule lukulupilo mu makuta, baukie’shi makuta aashiminaa lubilolubilo.—Nki. 23:​4, 5. w22.05 21 ¶4-5

Nsaa y’atunangushena pa miabi yatukuete kupeta, atunyingisha kipuano kietu na Yehowa. Na nsaa y’atunangushena pabitale mianda ibuwa itulee Yehowa bua kuitupa mu mafuku aafiki, atulama lukulupilo luetu lua kumufubila bua looso bu lua binyibinyi kuatudi. Bino bioso abitukuasha bua kufubila Yehowa na muloo binobino. Yehowa, “akeboo” bua kuikala ku lupese luetu nsaa y’akafuisha mfudiilo a uno ndumbuluilo ebubi. Tui bashinkamishe’shi Yehowa, “Efile Mukulu a kululama,” t’akalekiela ndumbuluilo a Satana bua kutungunuka na kuikadika kuanka bua looso. (Yesh. 25:9) Atutengiela Yehowa na luishinko looso bua kufika kua diadia efuku dia kupoososhibua kuetu. Patuki’atutengiela, tuikaleyi na kitshibilo kia kutungunuka na kusangeela kinemo kia luteko, kia kulonga na kutumikila Eyi di’Efile Mukulu, na kia kunangushena ku miabi yetu. Su tubakitshi biabia, Yehowa aketukuasha buatudia kunyingiila na muloo patukuete kumulanguila. w22.11 13 ¶18-19

Sunga Bible ta muitulungule pabitale lubatshisho lua Timote, tui balombene kupuandikisha muloo ubaadi nao Enise nyinaye diadia efuku. (Nki. 23:25) Sunga ta bibaadi bibofule, Enise baadi mulongieshe Timote bia kufula Yehowa na Muana aaye Yesu Kidishitu. Baledi ba Timote ta babaadi booso na lulanguilo lumune nya. Nshaaye baadi muina Greke, na nyinaye na nyinaye kulu babaadi bena Yuda. (Bik. 16:1) Timote baadi ka nsongualume nsaa ibafikile Enise na Loise bu bena Kidishitu. Anka nshaye ta mufikie muina Kidishitu nya. Timote badia kuenda lupese kinyi? Mu mushindo umune ba nyina bana bena Kidishitu lelo uno mbafule bifuko biabo kukila kintu kioso, be na lukalo lua kukuasha bana baabo buabadia kuikala mu kipuano kibuuwa na Yehowa kukila bingi bintu bioso. Na Efile Mukulu eetu ataa kuikitshisha kuabo na muulo ukata. (Nki. 1:​8, 9) Yehowa mmukuashe ba nyina bana be bungi bua kulongiesha bana baabo bia ku mufula na kumufubila. w22.04 16 ¶1-3

Mu kapindi kapeela’mu, Yehowa ‘akeele mu mashimba’ a bena politike ‘kinangu kiaye.’ Abikatuusha kipeta kinyi? Ano ooso makome a politike ekadikie “mfumu ekumi,” aakalulukila bipuilo bioso bia madimi na kuibibutula. (Kibaf. 17:​1, 2, 12, 16) Mmushindo kinyi w’atuuku’shi, mfudiilo a Babilone Mukata taadi peepi? Buatudia kualuula ku luno lukonko, abitukuasha buatudia kutentekiesha’shi kibundi kia kala kia Babilone, kibaadi kikaluilue na mema a muela ukata wa Efrate. Mukanda wa Kibafumbwilwe aupuandikisha midiyo ya bantu bakuete kukuatshishena Babilone Mukata bua kumukaluila na “meema.” (Kibaf. 17:15) Anka abilesha dingi’shi mema ngalombene ‘kukama,’ abilesha’shi ampire mukata abipuilo bia madimi bi mu nsenga ishima, mmulombene kushimisha bantu be bungi abamukuatshishena. (Kibaf. 16:12) Lelo uno, buno butemuki bukuete kulombana, muanda bantu be bungi t’abakiabatuelenyi mu bipuilo biabo, tabakimbi angi ma mbalo bua kupudisha mianda yabo. w22.07 5-6 ¶14-15

Kufuidishena lusa nkulesha lutumbu. Mu lungi lukindi, Yesu apuandikisha Yehowa na mukata a mudimo, baadi mufuile lusa mpika aye baadi na ebasa diaye dia makuta e bungi dibaadi nadio, diashibaadi mulombene kumualuisha. Anka, yawa mpika abaabadi bafuile lusa bakutshile kulesha namu lusa kui mpika naye baadi n’ebasa diaye dia makuta apeela. (Mat. 18:​23-35) Yesu baadi muitulongieshe kinyi pano? Su mu binyibinyi tui na lutumbu bua lusa lukata lua Yehowa kuatudi, abiketutakula namu n’atue bua kufuila bangi lusa. (Mis. 103:9) Kitenta kia Mulami kibakuile ino miaku takudi bipua bi bungi’shi: “Sunga tuafuila bipangua netu lusa misuusa bungi kinyi, ta ya kulombana na lusa luabetufuila kui Efile Mukulu, lusa luadi neetu kukiila kui Kidishitu.” Su tubafuila bangi lusa, Yehowa aketufuila namu lusa. Yehowa aleshaa lusa luaye kui baaba booso abalesha namu bangi lusa. (Mat. 5:7) Yesu baadi mupatuule uno muanda kalolo nsaa ibaadi mulongieshe balongi baaye mushindo wa kuteka.—Mat. 6:​14, 15. w22.06 10 ¶8-9

Yesu bafikile pa nsenga bu muntu. Baadi muleshe bi bu muntu bua Nshaye mu mushindo upuidikie. (Yo. 14:9) Kukiila kuadi, ngi kuatudi bafikie mu kuiwuka na mu kufula Yehowa Efile Mukulu. Tukuete kupeta dingi bukuashi ku malongiesha a Yesu na ku bukunkushi buaye, bu biakuete kukunkusha tukongie tua bena Kidishitu lelo uno. Kuete kuitulongiesha mushindo watudia kuikadika na nshalelo etukuasha buatudia kukuminyibua na Yehowa. Na atue booso tui balombene kukuashibua na lufu lua Yesu. Pa basangukile Yesu, batushiishe mase aaye e na muulo ukata bu mulambu upuidikie bua “kuitutoosha ku bubi booso.” (1 Yo. 1:​7, Kilombeeno Kipya 2014) Binobino e na ntumbo, Nfumu sh’anaafue. Mu kapindi kapeela’mu, Yesu akasooso mutue wa nyoka. (Kib. 3:15) Bafubi b’Efile Mukulu abakekadika na muloo ukata nsaa y’abakabutula Satana! Ngi buakinyi ta tukookanga. Efile Mukulu eetu nga kukulupila. Kukiila kui muikulu a mukashi akekadika nsulo a “mîlo yoso i pa nsenga.” w22.07 18 ¶13; 19 ¶19

Nsaa yatuata kepatshila abitungu dingi tuikale na katshinkantshi. Buakinyi? Muanda ta tui na matalua ku mianda ilombene kuitufuila mu nshalelo etu nya. Tuate kileshesho: Mpoolo mutumibua baadi mukuashe bua kutuula kakongie kapia mu kibundi kia Tesalonika. Anka beshikuanyi abakitshiine muabo mooso bua kutusha Mpoolo mu lupata. (Bik. 17:​1-5, 10) Su Mpoolo baadi mushaale muanka, baadi mulombene kutuula bakuabo mu masaku. Anka Mpoolo tamukokie nya. Baadi mukumiine kuakua kushintuluka kua mianda mu nshalelo aye. Kunyima batumine Timote buadia nkakuasha baaba bena Kidishitu ba mu Tesalonika, bua kuibakuasha bua’shi bapete lukumiino lui bukopo. (1 Tes. 3:​1, 2) Kushi mpaka, bena Tesalonika babaadi na muloo. Tui kulongiela ku kileshesho kia Mpoolo mu Tesalonika. Tui balombene kuikala na kepatshila ka kupeta mashito anka mianda ya mu nshalelo eetu ngilombene kushintuluka, na yetukutshishua kulombasha kepatshila keetu. (Mul. 9:11) Su bino bia kukitshikila, kumiina kushintuula kepatshila na kuata kepatshila koodi mulombene kulombasha. w22.04 25-26 ¶14-15

Yehowa etunyingisha pa kuitupa lukulupilo lua mafuku aafiki. Tubandeyi kutala binangu bipeela abituukila mu Bible bilombene kuitunyingisha nsaa yatudi mu nkalakashi. Mu Bifundue Yehowa etushinkamiisha’shi ta kui kintu sunga nkalakashi i bukopo ‘kilombene kuituabuula ku kifulo [kyaye].’ (Lom. 8:​38, 39) Etushinkamiisha dingi’shi: “E peepi na baaba booso abamuididi,” mu nteko. (Mis. 145:18) Yehowa etulungula’shi su tubakulupila muadi, tui balombene kunyingiila lukalakashi looso lualua, na kuikala na muloo sunga tuakienga. (1 Kod. 10:13; Shak. 1:2) Eyi di’Efile Mukulu aditushinkamiisha dingi’shi nkalakashi yatudi nayo ngia kapindi kapeela, nsaa y’atuiyipuandikisha na miabi ya losoo y’aketupa. (2 Kod. 4:​16-18) Yehowa akabutula baaba booso bakuete kuitufuishisha nkalakashi i bukopo, mu baaba booso mui Satana diabulu, na baaba bantu be bubi be buye. (Mis. 37:10) Bolamiina angi ma verse a mu Bible aa kukankamika, na alombene nkukuasha bua kunyingiila nkalakashi ya mu mafuku aafiki su? w22.08 11 ¶11

Todi namu muikalakashe pabitale mushindo odia kutungunuka na kuikala na nshalelo muipushene na mayi a kulonda a kululama a Yehowa, kuifuku n’efuku, na ku kipua na kipua su? Yehowa mmulee’shi kululama kuetu akuikala “nka bu mbunda mbunda ya mema akata.” (Yesh. 48:18) Banda kunagushena we muimane ku kiese kia mema akata, na okuete kubandila abikupila mbunda mbunda ya mema. Mu yaya mbalo itaale yoodi, we mulombene kuikalakasha’shi, dingi efuku yaya mbunda mbunda ya mema ayilekie kuikupila-kuikupila su? Nya! Ouku’shi ayitungunuka na kuikupila mu mafuku aafiki. Kululama koobe nkulombene kuikala, nka bu mbunda mbunda ya mema akata! Mushindo kinyi? Nsaa yodi na kitshibilo kia kuata, banda kutala akikiebe Yehowa’shi okite. Akupu webilonde. Sunga kitshibilo kiekala bukopo bui naminyi, Nshobe sha kifulo e muiyilu, ekala nka kuanka bua nkukuasha, bua’shi oshale mushimate na kuikala na nshalelo a kuifuku n’efuku muipushene na mayi Aaye a kulonda a kululama.—Yesh. 40:​29-31. w22.08 30 ¶15-17

Ku mfudiilo kua bipua 1000, Satana akatushibua mu lukano. Akatompo dingi kulubisha bapuidikie. Mu kino kitompuanga, bantu booso bapuidikie be pa nsenga, abakapete mushindo wa kulesha patooka’shi abatumbisha eshina di’Efile Mukulu na kukuatshishena bukunkushi buaye. (Kibaf. 20:​8-10) Kiakia ki’abakakitshi mu kiakia kipungo, ngi akikalesha su mashina aabo ngalombene kufundibua mu mukanda wa muwa bua losoo. Bible etulungula’shi bangi bantu abakakutua lulamato nka bu Adama na Eva, basumbusheene bukunkushi bua Yehowa. Nkinyi akikebafikila? Kibafumbwilwe 20:​15, etulungula’shi: “Su muntu tamusanganwe mufundwe [eshina] mu mukanda wa muwa, baadi mwedibue mwishiba dia kaalo,” (Kilombeeno Kipya 2014.) Eyendo, baaba bantomboshi booso abakabutudibua bua losoo. Anka bantu bebungi bapuidikie abakakambila kino kitompuanga. w22.09 23-24 ¶15-16

Bangi bena Kidishitu ba mu kakongie ka mu siekele a kumpala, babaadi abashiishikila bena Kidishitu bashi bena Yuda buabadia kusadibua, pangi mu kupela kua’shi tala bebakula bi bubi kui bantu bashi bena Kidishitu. (Nga. 6:12) Mpoolo mutumibua baadi mupele uno mueneno bikata, anka pa mutue a kushiishikila bua’shi balonde mueneno aaye, na kuiyisha kooso baadi mutume uno muanda kui bakulu ba ku Yelusaleme. (Bik. 15:2) Bu kipeta, muikeelo waye ubaadi ukuashe bena Kidishitu buabadia kushaala na muloo na butaale mu kakongie. (Bik. 15:​30, 31) Su kuikakeena kukata kuatuka, tui balombene kulama butaale pa kukimba buludiki, kui baaba booso babadi batuule kui Yehowa bua kupasukila kakongie. Kebungi buludiki bua mu Bible, tui balombene kuibusangana mu mikanda yetu sunga mu buludiki buabatusha kui ndumbuluilo. Su tuatuula binangu bietu mu kuneemeka kua buno buludiki, pa mutue a kulama nka mueneno eetu a pa bupenka, atukuatshishena butaale bua kakongie. w22.08 22 ¶8-9

Mu nshalelo eetu, akukafiki nsaa yatudi na lukalo lua kulungula kuuku eetu a p’eshimba, biatukuete kupusha. Ingi nsaa bino bi kuikala bukopo. Pangi ta tui baubiile kulungula bangi bantu mianda ifuame i mu binangu bietu, muanda abituinyongosha nsaa y’atukauuku kunyima’shi, muanda watuikalanga balungule kuuku eetu mmuiulungule namu bangi. Ku lungi lupese, atukumiinaa kutumbula muntu kampanda alamaa mianda ya bantu ifuame! Bakulu abauuku kulama mianda ifuame ya bangi mbekale bu “kifwamino nguba a kipunga, na bu kisuukilo ku kipapi kya mpeshi” kui bakuabo balume na bakashi. (Yesh. 32:2) Atuuku’shi tui balombene kuikala na bulungantu bua kulungula bakuetu balume na bakashi mianda, bashinkamishe’shi yaya mianda y’atuibalungula ayishaala ifuame. Ta tuibatakulanga pa bukopo bua’shi betulungule mianda y’abo yabadi balame ifuame. Nyi buakinyi, atutumbula bakashi ba bakulu, muanda ta bakuete kuikitshisha bua kuuka mianda ifuame kui balume baabo pabitale bangi nya. Nyi muabi ukata muanda, bakashi ba bakulu t’abaukaa mianda ifuame ya bakuabo balume na bakashi nya. w22.09 11 ¶10-11

Tui balombene kushinkamisha’shi, Yehowa akakaluila bafubi baye baasha lulamato mu kipungo akikafiki “mpombo ikata.” (Mat. 24:21; Nda. 12:1) Akakita bino nsaa ayikesanga miilo, y’atuuku bu Goge a kwiumbo dyaa Magoge bua kulua ngoshi na baaba be na lulamato kui Yehowa, be mu nsenga yooso ishima. Sunga ano maumbo esangie bekulombasha maumbo ooso 193 a ba Nations unies, ta be bungi kumpala kua e kunundu a bioso na bukome buaye bua muiyilu nya! Yehowa balayile’shi: “Nakalesha bukata bwande na bwiselele bwande, nkeuukishe ku meeso a bisamba bi bungi; paapa abakauuku’shi nee Yehowa.” (Es. 38:​14-16, 23) Ino ngoshi ya Goge ayikende nka na kuifuku dia ngoshi ya mfudiilo y’Armagedone, nsaa y’abakabutula “bamfumu bakata ba pa nsenga ishadibue yooso ishima” kui Yehowa. (Kibaf. 16:​14, 16; 19:​19-21, Kilombeeno Kipya 2014) Mu kuilekeena na biabia, ‘nkapenda bantu balulame ngi abakashaala pa nsenga, na baaba abalama kululama kwabo ngi abakepashaala.’—Nki. 2:21. w22.10 16-17 ¶16-17

Ta tui kubadika mu mashimba a bangi, nka penda “Yehowa nyi atalûlâ ki mwishimba akimukitshisha.” (Nki. 16:​2, EEM) Mufule bantu ba mishindo ilekeene, bakudile mu ma mbalo elekeene, na be na bipikua bilekeene. Na Yehowa etunyingisha buatudia ‘kushitula mashimba eetu bikata.’ (2 Kod. 6:13) Tufule bakuetu booso balume na bakashi na ta tuibatshibilanga kiimu. Bino abipushisha dingi’shi, ta tui balombene kutshibila baaba be pasha pa kakongie kiimu. We mulombene kutshibila muina kifuko noobe shi Temue a Yehowa kiimu pa kuakula’shi, “Uno muntu t’anatuele mu bia binyibinyi su”? Nya, bino bi kumueka bu kuitatula, na kuimona bu mululame kukila bangi. Yehowa kia tungunuka na kupa “bantu be mu mbalo yooso” mushindo wa kuilanga. (Bik. 17:30) Biabia, tentekiesha’shi kuimona bu mululame kukila bangi, nyi kukutua kua kululama. Kifulo kietu bua akiamba Yehowa’shi nkilulame, nkilombene kuituikasha na muloo, na kilombene kuitukuasha bua kuikala kileshesho ki buwa kui bangi, na abaketufulu na kufula Efile Mukulu ngofu. w22.08 31 ¶20-22

Tui balombene kushinkamisha’shi, bangi bantu abaketubingabinga nsaa yatudi mu mudimo wa bulungudi. Kuno kubinguabingua nkulombene nkatama mu mafuku aafiki. (Nda. 11:44; 2 Tim. 3:12; Kibaf. 16:21) Anka tuikaleyi bashinkamishe’shi, Yehowa aketupa bukome buatudi naabo lukalo. Buakinyi? Yehowa akuashaa bafubi baaye misuusa yooso bua kulombasha mudimo wadi muibape, sunga kuatuuka lukalakashi lui bukopo bui naminyi. Tubandeyi kutala mutemuki Esekyele, baadi alungula mukandu wi buwa kui bena Yuda babaadi mu bupika mu Babilone. Mbantu ba mushindo kinyi babaadi Esekyele ende mu kulungula mukandu wi buwa? Yehowa muibaleshe bu “bantu batombokye,” “basha eshimba dipape,” na “bantu babi.” Babaadi bubi bu milobo, na masaku bu tuminu. Ngi buakinyi Yehowa baadi mulungule Esekyele misuusa i bungi’shi: “Twekalanga na moo.” (Es. 2:​3-6) Esekyele baadi na mushindo wa kulombasha mudimo waye ubaabadi bamupe wa kulungula mukandu wi buwa muanda: (1) Yehowa baadi mumutume, (2) Efile Mukulu baadi mumupe kikudi kiaye kiselele bua kumunyingisha nsaa yadi mu lukalo, na (3) mayi Efile Mukulu abaadi aanyingisha lukulupilo luaye. w22.11 2 ¶1-2

Yehowa bapangile bintu bioso bi pa nsenga buabidia kuikala na muwa wi na mfudiilo, kukatusha nka penda bantu. Baadi muibape lukulupilo lui pabualo luabasha kufua. Yehowa betupangile dingi na lukalo lua kutungunuka na kuikala na muwa. Bible akula bapitale bantu’shi Efile Mukulu ‘bapeele eshimba dyabo kiwukilo kya byayikalayika.’ (Mul. 3:11) Kano nyi kabingilo kamune aketutakulaa bua kumona lufu bu muishikuanyi. (1 Kod. 15:26) Su mukumbo wetu wanyisha kutama tui kukutua kukita kintu su nkimune bua kutengiela nka penda lufu su? Nya. Mu binyibinyi atukimbi munganga, pangi na kukimba manga atudia kufudiisha wawa mukumbo. Biabia atukitshi kioso akitungu bua kupela kufua. Nsaa ayifu muntu atudi bafule, biekala mununu sunga nsongua, atupushaa kenyongoshi kakata munda a mafuku e bungi. (Yo. 11:​32, 33) Mupangi eetu sha kifulo ta muitupe lukalo na ngobesha yatudia kutungunuka na kuikala na muwa mu’tue banabene, su aye ta mulombashe mpango yaye bua bantu buabadia kutungunuka na kuikala na muwa. w22.12 3 ¶5; 4 ¶7

Bakuetu balume na kabashi be na Nkidishitu be bungi, pangi be na mikumbo, moo, sunga’shi be bupenka mu kino kipungo ki bukopo. Ekitshishe bua kuikala wesamba na bakuenu balume na bakashi. Kipupa ki bukopo ki kuteka’shi tuikale atushaala kula na bakuetu sunga bekala balanguidi netu. Mu nsaa i bino, we mulombene kuipusha nka bu bibaadi abipusha Yowano mutumibua. Baadi akumiina kumona kuuku aaye Gayuse mpala kua mpala. (3 Yo. 13, 14) Anka ingi nsaa, Yowano baadi musangane’shi ta baadi mulombene kumona Gayuse. Ngi buakinyi Yowano baadi mukite muyile ngobesha yaye, paye kufundila Gayuse mukanda. Su osangana’shi misuusa yoso ta mbibofule biodia kutembela bakuenu balume na bakashi mpala kua mpala, tompa ingi mishindo. Su buekala wesamba na bakuenu bena Kidishitu, wepusha mu bulami na mu butaale. Esambe na bakulu su opusha tuinyongoshi, na okumiine kunyingishibua kuabo kua kifulo.—Yesh. 32:​1, 2. w22.12 17-18 ¶6-7

Bible akula’shi, ingi nsaa mikoolo ya Yosefe abaadi beyanye ma ndombo, na nshingo yaaye beyela mu kilonda. (Mis. 105:​17, 18) Muanda wa Yosefe ubaadi aunyisha kuluila ngofu. Bakatukile bu mpika abadi bakulupile aye nkufika bu muina lukano. Toodi mupete namu muanda aukuinyongosha na aunyisha kuluila ngofu sunga okuete kukita nteko i bungi su? Bino, mbilombene kukitshika. Yehowa tetukaluilaa ku bitompuanga bioso mu uno ndumbuluilo akunkushibua na Satana nya. (1 Yo. 5:19) Anka, we mulombene kushinkamisha bino: Yehowa auku mianda yoso ikuete nkufikila, na dingi kuete nkupasukila. (Mat. 10:​29-31; 1 Mp. 5:​6, 7) Kukatusha biabia, mmulee’shi: “Ami ntankakulekyeela sunga kukusumbushena nya.” (Eb. 13:​5, Kilombeeno Kipya 2014) Yehowa mmulombene nkukuasha bua kunyingiila sunga nsaa ayimueka’shi tue na dingi lukulupilo mu nshalelo oobe. w23.01 16 ¶7-8

Bifundue abitushinkamiisha’shi Efile Mukulu eetu t’anetusumbushene nsaa y’atukitshi bilubilo. Bena Isaleele babaadi baluishiishe Yehowa misuusa na misuusa; anka nsaa ibaabadi abelanga kuishimba mu binyibinyi, Efile Mukulu baadi ebafuila lusa. Bena Kidishitu ba mu siekele a kumpala, babaadi bawukie’shi Efile Mukulu mmuibafule ngofu. Mpoolo mutumibua baadi muyokielue, balunguile bena kukumiina naye’shi, ‘fwilayi lusa na kusaamba’ muntu mukite mulwisho ukata anka muilangie kuishimba. (2 Kod. 2:​6, 7 Kilombeeno Kipya 2014; 1 Kod. 5:​1-5) Tubamono’shi Yehowa t’asumbushenaa balanguidi baye penda pa muanda wa’shi abakitshi bilubilo nya! Na kifulo kioso, Yehowa ebakuashaa, ebatopekaa, na kuibetanyina buabadia kualukiila dingi kuadi na kalolo kooso. Mmulee bua kukita bino kui bankitshishi a bubi booso abelanga kuishimba mu ano eetu mafuku. (Shak. 4:​8-10) Bible alesha bi binangu bi’Efile Mukulu, kululama kuaye, na kifulo kiaye. Uno mukanda aulesha’shi Yehowa akumiina’shi tumuukie. Akumiina tuikale ba kuuku baye. w23.02 7 ¶16-17

Mbua kabingilo ke buwa, buatukuete kutuula binangu ku mushindo w’atumono mianda ikata ayikitshika mu nsenga ayilombasha matemuki a mu Bible. Bu kileshesho, Yesu baadi muitulungule mianda ayikakitshika ayiketukuasha bua kuuka’shi mfudiilo a ndumbuluilo a Satana taadi peepi. (Mat. 24:​3-14) Mpoolo mutumibua baadi muitunyingishe bua’shi tuikale bapasukie apalombana matemuki bua’shi lukumiino luetu lushaale lunyingie. (2 Mp. 1:​20, 21) Akumiina’shi tutungunukie na kuikala na nkatshinkashi nsaa y’atutaluula matemuki a mu Bible. Mpiele etulungula buatudia “kuikala batengiele kufika kw’efuku dia Yehowa.” (2 Mp. 3:​11-13) Buakinyi? Ta mpa muanda atukumiina kuuka “efuku na nsaa” yabakafuisha Armagedone kui Yehowa nya. Kadi mpa muanda atukumiina kufubisha nsaa yetu mu mushindo wi buwa pa kuikala bantu baasha ‘mwikeelo wa kalolo na kineemo ki’Efile Mukulu.’ (Mat. 24:36; Luk. 12:40) Atukumiina kulama muikelo wetu wa kalolo na kushinkamisha’shi kuikitshisha kuetu bua kufubila Yehowa, akulesha’shi tui bamufule ngofu. Bua’shi tukite bino abitungu tuikale badimukie atue banabene. w23.02 16 ¶4, 6

Anka kui ingi mianda ayitungu’shi “ingi mikooko” ikite kubanga binobino buayidia kulombasha mianda itekibue bua nkashaala mu Mpaladiiso. Tui na mishindo ibungi binobino ya kulesha biatupusha pabitale Kidishitu. Bu kileshesho, atulesha’shi tuibamufule, mu mushindo watukitshina bakuabo bedibue muimu mianda. Yesu bakuile’shi akatshibila mukooko ooso kiimu mu mushindo waukitshina bakuabo mianda. (Mat. 25:​31-40) Tui balombene kukuatshishena mudimo wa bulungudi na wa kuikasha bantu bu balongi. (Mat. 28:​18-20) T’abitungu’shi tutengiele nka na pa tukashala mu Mpaladiiso buatudia kuikala bantu be na muikeelo w’abakumiina kui Yehowa bua kuikala muanka nya. Kubanga binobino tui balombene kukita muetu moso buatudia kuikala na nshalelo e na nkatshinkatshi mu ngakuilo etu na mu bikitshino bietu bioso. Na dingi abitungu tuikale na lulamato kui Yehowa, kui muina dibaka netu, na kui bena Kidishitu netu. Su tubakokiela Yehowa binobino mu uno ndumbuluilo e bubi, abikekala bibofule bua kumukokiela mu Mpaladiiso. Abitungu dingi tutamishe mayele etu na ngikashi yetu ayilesha’shi tukuete kuilumbula bua nkemushaala. w22.12 11-12 ¶14-16

Tui bafule Yesu bu Mfumu eetu, muanda nyi Mukunkushi e buwa. Yehowa aye nabene nyi balongieshe Muana aaye na kumutuula bu mukunkushi. (Yesh. 50:​4, 5) Banda kunangushena namu mushindo ubaadi Yesu muleshe kifulo kia kuipaana aye nabene. (Yo. 13:1) Bu biadi Mfumu oobe, Yesu mmulombene kifulo kiobe. Mmupatuule’shi baaba booso bamufule mu binyibinyi, nyi baaba bayitanyina bu ba kuuku baaye, abalesha kifulo kiabo pa kukookiela ku miiya yaaye. (Yo. 14:15; 15:​14, 15) Kino nyi nkineemo kikata kia kuikadika kuuku a Muana a Yehowa. Ouku’shi Yesu mmuiyishe na kuete kuambula Nshaye na kupuidika kooso. We mulongie’shi Yesu badishiishe babaadi na nsala, asamba babaadi batshobolokie ku mashimba, na kupaasha babaadi na mikumbo. (Mat. 14:​14-21) Na okuete kumona bia kuete kukunkusha kakongie kaaye lelo uno. (Mat. 23:10) Bu biadi Mfumu eetu, Bufumu bi’Efile Mukulu abuketukitshina mianda ikile buwa mu mafuku aafiki. We kulesha’shi we mumufule mushindo kinyi? Pa kulonda kileshesho kiaye. We mulombene kubanga kukita bino pa kuitshipa kui Yehowa obe nabene na kubatshishibua. w23.03 4 ¶8, 10

Yehowa bapangile bioso bi muiyilu na bi pa nsenga na tulunga tua meema. Na bino bintu bioso abitulongiesha pa bimutale. (Mis. 104:​24, 25) Nangushena mushindo wabadi betupangie kui Efile Mukulu. Mmuitupangie na mushindo wa kusankila bintu bi buwa bi’atumono biadi mupangie. Mmuitupangie dingi na mushindo wa kusankila bipangua bilekeenelekeene ku bukuashi bua bintu bitaano biadi muitupangie naabio bu, kumona, kupusha, kukuma, kupusha muenyi, na kupusha eshiko. Bible alesha kangi kabingilo ke na muulo ka buakinyi tui balombene kutaluula bipangua. Etulongiesha pabitale ngikashi ya Yehowa. (Lom. 1:20) Bu kileshesho, tala bintu biabadi bapangie kui Yehowa na omone biabidi buwa. Bipangua abitulongiesha’shi, Efile Mukulu e na binangu bikile. Banda kunangushena pabitale bidibua bilekeenelekeene bi’atusangeelaa. Bino abitulesha patooka bi bukata bua kifulo kiaye kuatudi. Nsaa y’atumono bi bumuntu bua Yehowa ku bintu biadi mupangie, atunyiisha kumuuka kalolo na abitutakula buatudia kuifubuila kuadi. w23.03 16 ¶4-5

Bu bikuete kuenda nshalelo a ino nsenga na kunyiisha kuluila, mbilombene kuikala lukalakashi ngofu bua kukulupila muiyi di’Efile Mukulu. Bantu be kubanga kutuesha mpaka mu binangu bietu pabitale bia binyibinyi bia mu Bible, sunga pabitale bantu baasha lulamato babadi basangule kui Yehowa, na mpika a lulamato na mudimukie, kuete kuitukunkusha lelo uno. Anka, su tui bashinkamishe’shi Eyi dia Yehowa misuusa yooso adikalaa nka dia binyibinyi, atukekala na mushindo wa kukambila buluishi booso ku lukumiino luetu. Atukekala na ‘kitshibilo kia kukôkyela [Yehowa] mafuku oso mpâ na ku mfudiilo.’ (Mis. 119:​112, EEM) ‘T’atukekala na bûfu’ bua kulungula bangi pabitale bia binyibinyi na kuibanyingisha buabadia kuikala na nshalelo muipushene naabio. (Mis. 119:​46, EEM) Na dingi atukekala na mushindo wa kunyingiila nkalakashi i bukopo, mpaa na kubinguabingua, “na luishinko na muloo.” (Kol. 1:11; Mis. 119:​143, 157) Bia binyibinyi abitunyingisha, abitupa kabingilo ka binyibinyi na bukunkushi butookane. Abitupa lukulupilo lua nshalelo ebuwa mu mafuku aafiki ku bukunkushi bua Bufumu bu’Efile Mukulu. w23.01 7 ¶16-17

Bufuku kumpala kua lufu luaye, Yesu batekiele kipindi ki bula bua balongi baaye, batekanga Nshaye “bwa kwibakalwila kwi mubi.” (Yo. 17:15) Bino, bibalesheshe bi kifulo kia Yesu kuabadi! Sunga mbibaadi muukie’shi mu kapindi kapeela akiengie ngofu, baadi mutungunukie nka na kuikalakasha bua batumibua baaye. P’atuambula Yesu, t’atutuulu binangu bietu nka penda mu kuteka bintu bietu bia ku mbidi, biatudi nabio lukalo nya. Mu kuilekeena na biabia, abitungu tuikale atutekie nsaa yoso bua bakuetu balume na bakashi. Nsaa y’atukitshi bino atukokiela ku muiya wa Yesu, wa kuifulena ku muntu na muntu, na atulesha Yehowa mushindo wi bukata bua kifulo kiatudi nakio bua bakuetu bena Kidishitu. P’atutekiela bakuetu balume na bakashi abibakuasha. Eyi di’Efile Mukulu aditulungula’shi “luteko lwa mululame alufubaa na bukome bwibungi.” (Shak. 5:16) Balanguidi neetu bena lukalo na nteko yetu, ku muanda bakuete kunyingiila nkalakashi i bungi. w22.07 23-24 ¶13-15