Mueshi wa 4

Bafubi ba Yehowa ba kala babaadi bapete nkalakashi i bungi yabashibaadi abatengiela. Tubandeyi kutala muanda wa Yakobo. Nshaye baadi mumulungule’shi ende akebakile mukashi mu ba nsonguakashi ba Labane, mulanguidi naaye a mu kifuko na baadi mushinkamishe’shi Yehowa mmulombene ku muelela miabi i bungi. (Kib. 28:1-4) Biabia, Yakobo bakitshiine mianda ilulame. Bakatukile mu nsenga ya Kanaana enda ku nshibo kua Labane baadi na ba nsonguakashi babidi, Lea na Rashele. Yakobo baadi mufule Rashele nsonguakashi a Labane ngofu, na baadi mukumiine kufubila Labane munda mua bipua musambobidi kumpala kua’shi ayibakile Rashele. (Kib. 29:18) Anka mianda taibaadi ikitshikie binyi bibaadi abikulupila Yakobo nya. Labane baadi mubelekie Yakobo muteo bua’shi ebakile taata a bantu Lea. Kunyima kua lubingo Labane baadi mutadiile bua’shi Yakobo eyibakile Rashele, anka su Yakobo bafubu munda a bingi bipua musambobidi. (Kib. 29:26, 27) Labane baadi dingi muntu mukutue kululama mu muanda wabo na Yakobo. Mu bino bioso, Labane baadi mufubishe Yakobo munda a bipua 20!​—Kib. 31:41, 42. w23.04 15 ¶5

Nnanyi atudi balombene kuteka nsaa yatudi na lukalo na kunyingishibua na buludiki? Atuuku lualuulo ku lualua lunkonko. Tui balombene kuifubuila kui Yehowa Efile Mukulu mu luteko. Yehowa akumiina’shi tukite nka bino. Akumiina dingi’shi tumutekie nsaa yooso, ‘kuteka kushi kukôka.’ (1 Tes. 5:17, EEM) Tui na bulungantu bua kuifubuila kuadi mu luteko, na kukimba buludiki kuadi mu nshalelo eetu ooso. (Nki. 3:5, 6) Bu biadi Efile Mukulu sha kalolo, Yehowa ta muitutshibile bungi bua misuusa yatudi balombene kumuteka nya. Yesu baadi auku’shi Yehowa aata nteko na muulo. Bipua bi bungi kumpala kuaye kufika pano pa nsenga, baadi amono Nshaye aluula ku nteko ya bana balume na bana bakashi baasha lulamato. Bu kileshesho, Yesu baadi ku lupese lua Nshaye, nsaa ibaadi Nshaye aaluula nteko ibaabadi abatekie na lulamato looso kui Aana, Davide, na Eliya, atutemuna nka penda ano mashina apeela. (1 Sam. 1:10, 11, 20; 1 Bf. 19:4-6; Mis. 32:5) Ngi buakinyi, Yesu balunguile balongi baaye buabadia kuteka na kishinkamiisho kioso!​—Mat. 7:7-11. w23.05 2 ¶1, 3

Tshite-muakuidi Yekoyada baadi atshiinyi Yehowa. Bino bibaadi bikale bia binyibinyi nsaa ibaadi Ataliya nsonguakashi a Yezabele mubangie kumunana mu Yuda kuashi na matalua a kuibikita. Baadi ntomboshi na baadi akumiina kuikala bu ndalamumba. Na batshile kitshibilo kia kuipayisha boso bena kifuko kia bufumu bua bena Yuda, bekulu baye aye nabene! (2 Mya. 22:10, 11) Umune a ku bano bekulu boso, nyi Yowase baadi mupande, muanda Yekoshebate mukashi a Yekoyada baadi mumufuamishe, aye na mulume aye babaadi bafie yawa muana na abo nkumupasukila. Mu uno mushindo ngi mubaadi Yekoyada na Yekoshebate bakuashe bua kulama lutando lua bufumu bua Davide. Yekoyada baadi na lulamato kui Yehowa na ta baadi musuuse na kutshiina Ataliya nya. Nsaa ibalombeeshe Yowase bipua musambobidi, Yekoyada baadi muleshe dingi’shi e na lulamato kui Yehowa. Batshile mpango. Su badia kobesha ino mpango Yowase baadi mulombene kufika nfumu, mpianyi a nfumu Davide. Su ino mpango ibadia kukutua kulombana, Yekoyada badia kushimisha mpaa na muwa waye. Anka ku bukuashi bua miabi ya Yehowa, ino mpango ibaadi ikuatshikie. w23.06 17 ¶12-13

Nfumu Nabukodonosore baadi mulombene kunangushena’shi Ndaniele muishikuanyi naaye, na bino bibaadi bilombene kuipayisha Ndaniele. Anka Ndaniele balesheshe eshimba dinyingie na apatuula kilotua. Nkinyi kibaadi kilombene kukuasha Ndaniele buadia kuikala n’eshimba dinyingie mu nshalelo aaye? Kushi mpaka Ndaniele pabaadi ki nsongua baadi mulongiele ku kileshesho kia nshaye na nyinaye. (Miy. 6:6-9) Ndaniele tabaadi penda muukie Miiya ya kitako bu miiya Ekumi nya, anka baadi muukie dingi kantu pa kantu pabitale kiabadi balombene kudia kui bena Isaleele, na kiabashi balombene kudia. (Lv. 11:4-8; Nda. 1:8, 11-13) Ndaniele baadi mulongie dingi pabitale muilo wa Yehowa wa kala, na baadi muukie kibaadi kibafikile nsaa ibaabadi bakutue kunemeka mayi a kulonda a Yehowa. (Nda. 9:10, 11) Mianda ibaadi imone Ndaniele mu nshalelo aaye ibaadi imupe kishinkamisho’shi, Yehowa na ba mikeyilu baaye be bukome abamukuatshishena.​—Nda. 2:19-24; 10:12, 18, 19. w23.08 3 ¶5-6

Rebeka baadi muana mukashi sha binangu mu nshalelo aaye ooso, baadi aata bitshibilo n’eshimba dinyingie, na baadi auku nsaa na mushindo wa kuibitumikila. (Kib. 24:58; 27:5-17) Baadi muana mukashi sha kaneemo na baadi alondo buludiki. (Kib. 24:17, 18, 65) Su we muiyishe, okuatshishena mpango ya Yehowa nka bu bibakitshine Rebeka. Na okekala na bukitshishi bui buwa mu kifuko kiobe na mu kakongie. Kuipeelesha nyi eyikashi aditungu’shi bena Nkidishitu boso banyingie mu kikudi bekadikie nadio. Eshitele baadi mukashi muin’Efile muipeeleshe. Pa muanda wa’shi baadi muipeeleshe, ta baadi muitatule pabafikile bu ndalamumba nya. Bateemeshe elango dia mukuabo mulume Mordekayi, na aye nkuiditumikila. (Esh. 2:10, 20, 22) We kulesha kupopeela bu kubaadi nako Eshitele nsaa y’otekie bangi elango di buwa na kuiditumikila. (Tt. 2:3-5) Eshitele balesheshe kupopeela mu ungi mushindo. Uno nsonguakashi baadi “na mbidi ayimeekameeka, dingi baadi mulongame.” Tabaadi akumiina kukaka binangu bia bantu bua’shi bamubandile.​—Esh. 2:7, 15. w23.12 19-20 ¶6-8

Kuikalakasha kukilekile ta mbushito abutungu’shi tutuale nya. Su tui bapue kusokola muluisho wetu, tuapua kuilanga kuishimba, abitungu tukite matabula kampanda bua kupela kukita wawa muluisho dingi, na tuikale bashinkamishe’shi Yehowa mmupue kuitufuila lusa. (Bik. 3:19) Su tui bapue kukita ano matabula ooso, Yehowa takumiina’shi tutungunukie na kuikalakasha nya. Auku bukitshishi bui bubi bulombene kutuuka mu kuno kuikalakasha kukilekile. (Mis. 31:10) Su tubakambilua nka na kenyongoshi, bi kuitubofusha tualeka kusuuka lubilo lua kuenda ku muwa wa ikalaika. (2 Ko. 2:7) Nsaa yotungunuka na kuikalakasha kukilekile, tuula binangu biobe ku ‘lusa lwa binyibinyi’ luabadi balombene nkufuila kui Efile Mukulu. (Mis. 130:4) Nsaa i Yehowa afuila baaba boso belangie kuishimba mu binyibinyi lusa, e balaa’shi: “Tankatentekyeshanyi milwisho yabo, ooo.” (Yel. 31:34, EEM) Bino abipushisha’shi t’akanangushena dingi pabitale miluisho iboodi mukite, i baadi mukufuile lusa nya. Tuenyookanga obe nabene muanda wa’shi bilubilo biobe bia kala bibakupa mikalo, bua kiodi mulombene kukita binobino mu mudimo wa Yehowa. Yehowa t’atungunuka nka na kunangushena pabitale miluisho yobe nya, na tue mulombene kuibielela meeshi. w23.08 30-31 ¶14-15

Mu kipungo kia Corona-Virus, Tumonyi tua Yehowa tuikeele atuteemesha nka buludiki abutuukila mu ndumbuluilo eetu, na baleka kuinyongola bu abinyongolanga baaba bekeele abateemesha ino mikandu ya madimi. (Mat. 24:45) T’abitungu’shi tushimishe binangu bietu ku “mianda i na muulo” nya. (Fid. 1:9, 10) P’atutuulu binangu bietu ku ingi mianda, atushimisha nsaa yetu na bukome buetu bui bungi. Midimo y’atukitaa mu nshalelo eetu bu kudia, kutoma, kukisha kapapi, na kufuba mudimo wa ku mbidi, mbilombene kukumba binangu bietu su tuatadiila’shi ino mianda ikadikie na muulo ukata mu nshalelo eetu. (Luk. 21:34, 35) Kukatusha biabia, efuku dioso tukuete kupushanga na kubadika mianda i bungi yabakuete kuikakeena kui bena politike ngofu. Abitungu tuikale bashinkamishe’shi ta tui batuule binangu bietu mu kuno kuikakeena kua madimi. Abikala buwa su tuabanga kusangula lupese luatudia kutuula binangu bietu n’eshimba dietu. Satana kuete afubisha ano mayele ooso abatuteemuna kunundu, na kepatshila ka’shi tubofushe kitshibilo kietu kia kukita kiakia ki buwa. w23.07 16-17 ¶12-13

Bua muilo wa Yehowa, Kitentekiesho kia Nkidishitu nyi efuku di na muulo ukata dia ku kipua. Uno ngi penda muanda wi pa buawo ubaadi Yesu mulungule balongi baye’shi bekale abeukitshi. (Luk. 22:19, 20) Akitutentekieshaa mishindo yatudia kulesha lutumbu bua mulambu wa Yesu. (2 Ko. 5:14, 15) Akitupaa dingi mushindo watudia “kuinyingishena” na bakuetu balume na bakashi. (Lom. 1:12) Bantu be bungi abakumiinaa kubanga kulonga Bible bua mianda y’abamonaa na y’abapushaa. Nangushena Kitentekiesho bi’akibungaa bakuetu ba mu nsenga ishima. Kushi mpaka, Kitentekiesho ki na muulo kui ooso a kuatudi! w24.01 8 ¶1-3

P’atunyiisha kunangushena ku muulo wabadi bafute kui Yehowa na Yesu, atunyiisha kupusha bi bukata bua kifulo kiabo kui muntu ooso a kuatudi. (Nga. 2:20) Nkuulo nyi nkia buntu kia kifulo. Yehowa mmuituleshe kifulo pa kutusha mulambu wa kintu ki na muulo ukata kuadi, Yesu. Yehowa baadi mutadiile bua’shi Muana aaye akiengie na kufua bu’etu. Yehowa ta mmulame kifulo kiaye nka penda bua aye nabene nya, kadi mmuituleeshe kianka na muloo ooso. (Yel. 31:3) Yehowa mmuitukakie kuadi muanda mmuitufule. (Puandikisha na Miiya Ikituulwe 7:7, 8.) Ta kui kintu sunga muntu akuituabuula ku kino kifulo. (Lom. 8:38, 39) Opushaa namu naminyi pabitale kino kifulo? w24.01 28 ¶10-11

Bena Nkidishtu bedibue muimu abataa luno lukulupilo lua kuenda muiyilu na muulo ukata. Umune a kuabadi mukuetu Frederick Franz, bakuile muishimba diaye’shi: “Tui bashinkamishe’shi lukulupilo luetu alukalombana, na ooso a kuatudi a ku bantu 144 000 akatambula kiakia kiabadi betule kui Efile Mukulu efuto dietu adikekala buwa kukila bintu bioso.” Mu kipua kia 1991, mukuetu Frederick Franz baadi mushinkamishe’shi: “Tuki’atutungunuka na kuata lukulupilo luetu na muulo ukata. . . . Bu biatukuete kunyiisha kuilutengiela, tukuete kunyiisha kuikala na lutumbu lui bungi. Nyi nkintu ki na muulo ukata kibaadi akitungu’shi tutengiele. . . . Nkuete kuata lukulupilo luetu na muulo ukata kukila kumpala.” Sunga mbi’atutengiela kusangeela muwa muiyilu sunga pa nsenga, tui na lukulupilo lui buwa bukile aluitupa kabingilo ke buwa bukile ka kuikala na muloo. Na muloo wetu wa lukulupilo ngulombene kutama sunga kunyinga. w23.12 9¶6; 10 ¶8

Paasha pa kibelo kia tabernakele a kala ngi pabaadi kilambuilo kibaabadi abalambuila nyema bua kupa Yehowa. (Efi. 27:1, 2; 40:29) Biabia, yaya milambu taibaadi ilombene kukatusha miluisho yoso ya bantu bua losoo nya. (Eb. 10:1-3) Kutungunuka na kutuusha milambu ya nyema mu tabernakele kubaadi muesheshi wa mulambu umune ubaadia kukuula bantu booso ku miluisho yabo bua losoo. Yesu baadi auku’shi Yehowa mmumutume pano pa nsenga bua kutusha muwa waye wa bu muntu bu mulambu wa nkuulo bua bantu booso. (Mat. 20:28) Biabia, ku lubatshisho luaye, Yesu baadi muilambule aye nabene bua kukita kikiebe ki’eshimba dia Yehowa. (Yo. 6:38; Nga. 1:4) Muwa wa Yesu ubaadi utushibue “musango umune bua loso” bua kubuikila bua losoo miluisho ya muntu ooso akumiina mui Nkidishitu.​—Eb. 10:5-7, 10. w23.10 26-27 ¶10-11

Bu’atue banabene, ta tui balombene kuifungusha ku muluisho na lufu. (Mis. 49:7, 8) Biabia, Yehowa baadi muate mpango ya’shi Yesu atushe muwa waye bua kuitupaasha, Abo booso babidi Yehowa na Yesu mbekitshishe bikile. Su tuanyiisha kunangushena biikitshishe Yehowa na Yesu bu’etu, atunyiisha kuikala na lutumbu bua nkuulo. Nsaa ibakitshine Adama muluisho, baadi muluishe lukulupilo lua muwa wa ikalaika, kushi nka penda buaye’ye nabene, anka na bua bana baye booso. Bua kufuta dingi ku kibaadi Adama mushimishe, Yesu baadi mutushe muwa waye upuidikie bu mulambu. Pabaadi Yesu pa nsenga, munda a muwa waye ooso ushima “tabaadi mukite muluisho su ngumune, na tababadi basangane madimi mukanua muaye.” (1 Mp. 2:22) Efuku dia lufu luaye, Yesu baadi mutushe muwa waye upuidikie nka bu muwa ubaabadi bashimishe kui Adama.​—1 Ko. 15:45; 1 Ti. 2:6. w24.01 10 ¶5-6

Kunyima kua Yesu kusanguka, batuelele mu Kadimbo Kakile Kishila ka mu ntempelo a mu kikudi. Pano tui kumona kalolo bi bukata bua mpango ya Yehowa bua lulanguilo lui selele luimeene mu mulambu wa nkuulo na butshite muakuidi bua Yesu Nkidishitu. Tshite muakuidi mukata a mu Isaleele baadi atuele mu Kadimbo Kakile Kishila kabadi bakite kui bantu na mulambu wa mase a nyema, anka Yesu mmutuele “muiyilu munabene,” mbalo ya kishila bua booso bua’shi amuekie kumpala kua Yehowa. Kuakua kuete aleesha muulo wa muwa waye wa bumuntu upuidikie pa muanda wetu “bua kukatusha muluisho ku bukuashi bua mulambu waye.” (Eb. 9:24-26) Bi’atuikala na lukulupilo lua kuenda muiyilu sunga lua kushaala pa nsenga, atue booso tui balombene kulanguila Yehowa mu ntempelo a mu kikudi. w23.10 28 ¶13-14

Nangushena dingi pabitale mudimo winao Yesu muiyilu bu biadi Nfumu eetu etukunkusha na, Tshite muakuidi e Panundu sha lusa. Kukiila kuadi tui balombene kuiseesela ku nkuasa a Bufumu a Efile Mukulu aye aleshaa bantu kalolo mu luteko na kumuteka “lusa” na bukuashi mu “kipungo kilombane.” (Eb. 4:14-15) Ta tui balombene kukisha efuku su ndimune kushi kunangushena pabitale bitukishine Yehowa na Yesu, na ku biabaki’abatungunuka na kuitukishiina. Kifulo kiabo akitukumu ngofu ku mashimba na kuitutakula bua kuikala na kisumi mu mudimo wetu na mu lulanguilo luetu. (2 Ko. 5:14, 15) Mushindo umune wibuwa watudia kuleesha lutumbu luetu mpa kuipaana mu kukuasha bangi buabadia kufika Tumonyi tua Yehowa, na balongi ba Yesu. (Mat. 28:19, 20) Bino ngi bibakitshiine Mpoolo mutumiibua. Baadi auku’shi kikiebe ki’eshimba dia Yehowa nkia’shi: “Bantu ba mishindo yoso bapaashibue na bapete kiukilo kia bia binyibinyi.”​—1 Tim. 2:3, 4. w23.10 22-23 ¶13-14

Be bungi ba kuatudi ababadikaa ino verse bua kunyingisha bantu batulungula mukandu wi buwa, na kuibalungula abikeekala nshalelo mu Mpaladiiso. Mmushindo kinyi watudi balombene kushinkamisha atue banabene na kushinkamiisha bangi bantu’shi miabi yabadi baleshe mu Kibafumbuilue 21:3, 4 ayikalombana? Yehowa ta muitupe nka penda mulayilo aunyingisha nya, kadi mmuitupe dingi tubingilo tua buakinyi tui balombene kutuula lukulupilo luetu ku wanka. Atupete tubingilo tua kukulupila mu mulayilo wa Yehowa wa Mpaladiiso mu ino verse ayilondo. Atubadika’shi: “Na yawa baadi mushale ku nkuasa a bufumu bambile’shi: ‘Talayi, nkuete kukita bintu bioso bipia.’” Na aye nkuamba dingi’shi: “Funda, muanda ano mayi nga lulamato na nga binyibinyi.” Na bandunguile’shi: “Bibakumbana! Nnami Alfa na Omega, mbangilo na nfudiilo.”​—Kbf. 21:5, 6a. w23.11 3 ¶3-5

Nsongualume mulongie bia kunangushena abinangushenaa Yehowa, aleshaa bianka ku ntshibilo a nyene na ku nfuadilo aaye akuifuku n’efuku. Kebungi bantu abatelaa bilamba na abatshibaa nyene, bakuete kutshiba na kutela sunga kutshiba nyene y’abakumiina kui bantu be bungi bashi na kaneemo bua Yehowa na bena muikeelo wi butete. Binangu biabo bi butete, abimuenekiela ku bilamba biabo bi’abafuala mu nshalelo aabo, abituesha kabulakanyi p’atuibatala, bana balume abamueneka bu bana bakashi. Bakuetu ba nsongualume bakuete kuenda na kutama mu kikudi, pabakiebe kusangula bilamba bia kufuala, abitungu bakunkushibue na mayi a kulonda a mu Bible na bantu ba bileshesho bi buwa be mu kakongie. Nsongualume mmulombene kuiyipusha aye nabene’shi: ‘Bitshibilo biande, abilesha namu’shi ne muntu anangushenaa kalolo na anangushena bilombene kupusha bangi su? Mushindo wa kutshibisha nyene, aukuasha bangi buabadia kukumiina’shi ami ne mufubi a Efile Mukulu su?’ (1 Ko. 10:31-33) Nsongualume e na ngobesha ya kunangushena, t’apete kineemo nka penda kui bakuabo balume na bakashi nya, kadi apete dingi kineemo kui Nshaye e muiyilu. w23.12 26 ¶7

Mu mafuku a kala, “nfumu a kuushi” batukile muilo w’Efile Mukulu ngoshi. (Nda. 11:40) Bu kileshesho, pankatshi pa siekele a 20, bakuetu be bungi mbedibue mu nkano pa muanda wa buina Nkidishitu buabo na biabash’abatuelakanaa mu mianda ya politike, na bangi bana ba Tumonyi tua Yehowa mbabingibue mu tulaasa ku muanda wa kano kabingilo kamune. Mu bipua bi bungi bishaale, lulamato lua muilo wa Yehowa ushaale mu bukunkushi bua nfumu a kuushi ngupete kutompibua mu ingi mishindo ilekeenelekeene. Bu kileshesho, mafuku a kampanye ka kusangula ba depite, bena Nkidishitu babaadi batompibue bua kukuatshishena bingi bisaka bia politike sunga bantu abakiebe kusangudibua. Bangi sunga tabende mu ku vote, anka mu binangu biabo na mu mashimba aabo, be kuamba’shi lupese lua kisaka kampanda kia politeke lui buwa kukila lungi. Ngi buakinyi bi na muulo ngofu buatudia kushaala bash’abatuelakana mu mianda ya politike su ngimune kushi penda mu bikitshiino bietu kadi mpaa na mu binangu bietu na ku bi’atupusha!​—Yo. 15:18, 19. w23.08 12 ¶17

Bu biatukuete kusuuka lubilo bua nkapeta muwa, abitungu ‘tusuukie mu kipaso kiatudi balombene kupeta efuto.’ (1 Ko. 9:24) Yesu bakuile’shi abitungu: “Tudimukie tala mashimba eetu aneema bushito na kudia kukilekile, kutoma kukilekile na tuinyongoshi tua mu nshalelo.” (Luk. 21:34) Bino bifundue na bingi mbilombene kui tukuasha bua mianda ayitungu kushintuula mu nshalelo eetu, bua kumona bia kusuuka lubilo bua nkapeta muwa wa ikalaika. Tui balombene kushinkamisha’shi atukapete efuto dia lubilo bua muwa wa ikalaika, ku muanda Yehowa aketupa bukome buatudi nabo lukalo. (Yesh. 40:29-31) Biabia, totshimbishanga lubilo! Ambula Mpoolo mutumibua baadi muipaane aye ooso mu kusuuka kua lubilo bua’shi apete efuto dibaadi kumpala kuaye. (Fid. 3:13, 14) Uuka’shi, ta kui muntu su ngumune mulombene kusuuka lubilo pa mbalo yobe. Anka ku bukuashi bua Yehowa, we mulombene koobesha kusuuka. Biabia, Yehowa akukuasha bodia kusemuna bushito na bodia kusumbula bushito bushii na muulo. Bu bi Yehowa ku lupese loobe, okapete mushindo wa kusuuka lubilo na kunyingiila okapete efuto. w23.08 31 ¶16-17

Tutaleyi kibakitshikile pabaadi Yesu na bipua 12 baledi baaye babamulekiele mu Yelusalema. (Luk. 2:46-52) Bubaadi bushito bua Mariya na Yosefe bua kushinkamisha’shi bana baabo booso be munkatshi mua bantu babaabadi abaaluka naabo mu luendo kunyima kua musangeelo. Mariya na Yosefe pa baabamuene Yesu, Mariya baadi mumushaashile muanda wa lukalakashi lubaadi muibatuushiishe! Yesu baadi mulombene kumona uno muanda bu kukutua kua kululama. Mu kuilekeena na biabia, Yesu baadi mualuule baledi baaye mu bishima bipeelepeele na kaneemo kooso. Sunga mbiabia, Yosefe na Mariya “ta babaadi bapushe kibaadi ebalungula nya.” Na dingi Yesu “batungunukile na kuibakookiela.” Ba nsongua, anumonaa’shi bi bukopo kukookiela baledi benu nsaa yabash’abenupusha kalolo su? Nkinyi kilombene kuinukuasha? Banda kunangushena abipushaa Yehowa. Bible amba’shi nsaa y’anukookiela baledi beenu ‘bino abisankisha Muanana.’ (Kol. 3:20) Yehowa auku nsaa yabash’abenupusha kalolo kui baledi benu, na y’abenuelela miya ishi ibofule bua kukookiela. Anka nsaa y’anusangula bua kukookiela baledi benu mu mushindo ooso wawa, anusankisha Yehowa. w23.10 7 ¶5-6

Muina kalaasa neetu e kuamba’shi, Tumonyi tua Yehowa, ntulombene kushintuula mueneno aabo pabitale eyibakishi dia mulume na mulume sunga dia mukashi na mukashi. Abitungu tumushinkamiishe’shi atunemekaa bantu booso, na tui bawukie’shi muntu ooso e na bulungantu bua kuiatshila kitshibilo. (1 Mp. 2:17) Tui balombene kumupatuluila akiakula Bible na kumulungula’shi, su tubalondo akiakula Bible tui balombene kuikala na nshalelo a muloo. Su tubafumankana na muntu sh’asankila mianda y’atuakula, t’abitungu tuikale na bukidi bua kuamba’shi atuuku mianda yadi mukumiine. Bu kileshesho, we kukita naminyi su muina kalaasa noobe akula’shi, kukumiina mui Efile Mukulu, nkumueneka ku bisumanga? We kuamba nka musuusa umune’shi muanda mmukumiine mianda ya bintu bituukile na auku bibungi pabitale yaya mianda. Sunga’shi kuete kuambuula mianda ibapushiishe bangi abakula? Pangi we kumulungula’shi, bua kuuka mianda ibungi pabitale bipangua tuela mu jw.org. Pangi ekukumiina’shi nuisambile video sunga muisambo wadi mupete muanka. Biabia su tuamulesha kaneemo, bi kumukuasha bua’shi akumiine kulonga bi bungi pabitale abiakula Bible. w23.09 17 ¶12-13

Tui balombene kushinkamisha’shi Yehowa aketufubisha na kuituelela miabi sunga tuekala bapue kukita bilubilo, nka su tubatungunuka na kukita kioso akitungu bua kuilanga kuishimba ku bilubilo bietu, na kutungunuka na kumukulupila. (Nki. 28:13) Samesone tabaadi mupuidikie nya, na ta mulekie kuikitshisha bua kufubila Yehowa nya, sunga kunyima kua kukita kilubilo na Dalila. Yehowa baadi mutungunukie nka na kufubisha Samesone. Efile Mukulu baadi mufubishe dingi Samesone mu mushindo wa kukaanya. Yehowa baadi mutungunukie na kumumona bu muntu sha lukumiino lui bukopo, na aye nkufundisha eshina diaye mu mulongo wa bantu baasha lukumiino batusangana mu Bena Ebelu 11. Abitunyingisha pa kuuka’shi tukuete kufubila uno Nshetu e bino sha kifulo e muiyilu akumiina kuitunyingisha bikishekishe nsaa yatudi babofule! Anka bu Samesone, tuisendeele Yehowa’shi: “Mwanana Yehowa, ntentekyeshe, ompe bukome.”​—Bans. 16:28. w23.09 7 ¶18-19

Su tuatungunuka na kutuula efuku dia Yehowa mu binangu, abitutakula bua kulungula bangi mukandu wibuwa. Mu ingi mianda tui kuikala na kuikoka bua kulungula mukandu wibuwa. Buakinyi? Muanda tui kupeta moo wa bantu munda a kapindi kapeela. Bino bibakitshikiile Mpiele. Bufuku pabaadi Yesu akiengie, Mpiele baadi mupele kuilesha bu umune a ku balongi ba Yesu na aye nkupela misuusa isatu’shi t’amuuku. (Mat. 26:69-75) Anka kunyima Mpiele baadi mukambile moo waye na aye kufunda’shi: “Biabia, tanutshinanga kiakia kiabatshinyi, sunga kuikalakasha.” (1 Mp. 3:14) Mayi a Mpiele aetushinkamisha’shi n’atue namu tui kukambila moo wa bantu. Nkinyi kilombene kuitukuasha bua kukambila moo wa bantu? Mpiele etulungula’shi: “Ikashayi Nkidishitu bu Muanana mu mashimba enu.” (1 Mp. 3:15) Kukita bino nkutale kunangushena pabitale muasu na matalua adi nawo a bu Muanana na Nfumuetu Yesu Nkidishitu. w23.09 27-28 ¶6-8

Abitungu tutungunukie na kuikitshisha bua’shi tatukitanga: “Mifubo ya mu mufito ish’ayitusha bikuba.” (Ef. 5:11) Muyile mianda yabadi bapue kumona kui bantu ayilesha’shi, su muntu akambaa kubandila, kuteemesha, sunga kuakula pabitale mianda i butete, abikalaa bimubofuile buadia kukita mianda i bubi. (Kib. 3:6; Yak. 1:14, 15) Ndumbuluilo a Satana kuete ekitshisha bua kuitudimba, bua’shi tukumiine’shi mianda yooso y’abetanyina kui Yehowa bu i butete, t’ayi bubi nya. (2 Mp. 2:19) Amune a ku mayele a Diabulu atabafubiishe nga’shi, bantu bapete kabulakanyi, bakutue mushindo wa kutundula ki buwa na ki bubi. (Yesh. 5:20; 2 Ko. 4:4) Ngi buakinyi t’abitukaanyisha muanda ma video e bungi, mianda y’abalesha ku ma televizio, na ku internete, bi na binangu bia kuluisha mayi a kulonda alulame a Yehowa! Satana kuete kuikitshisha bua’shi tuikale na binangu bia’shi kukita mianda i butete, na kuikala na nshalelo a kutambuka lusandi mupalakane mu nsenga lelo uno ta kui bubi nya.​—Ef. 5:6. w24.03 22 ¶8-10

Tabernakele baadi nka bu nshibo y’epema ibaadi bena Isaleele abasemuna bua kuenda nayo mu mbalo ilekeenelekeene. Babaadi bamufubishe munda mua bipua bifikie ku 500, mpaa na pa baabadi bebakie ntempelo a mu Yelusalema na abo nkumutuula bua losoo. (Efi. 25:8, 9; Mb. 9:22) Tabernakele nyi baadi bu mbalo ikata ibaadi bena Isaleele abafumankena buakutuusha milambu yabo na kulanguila Efile Mukulu. (Efi. 29:43-46) Biabia, tabernakele baadi alesha dingi kintu kampanda ki na muulo. Baadi “muesheshi wa bintu bia muiyilu,” na baadi kinfuanyi kia ntempelo mukata a Yehowa a mu kikudi. Mpoolo mutumibua bambile’shi: “Ino nshibo y’epema [sunga tabernakele] nkifuanyi kia kino kipungo kiatudi.” (Eb. 9:9) Mu kipungo kibaadi Mpoolo mufundile bena Ebelu, ntempelo a mu kikudi baadi mupue kuikala kuanka binyibinyi bua bena Nkidishitu. Yawa ntempelo bekeele kuanka kubanga mu kipua kia 29 bino bipungo bietu (B.B.). Mu kiakia kipua, Yesu baadi mubatshishibue na abanga kufubila Yehowa bu “tshite muakuidi mukile bukata” mu ntempelo a mu kikudi.​—Eb. 4:14; Bik. 10:37, 38. w23.10 25-26 ¶6-7

Bua kutama mu kikudi abitungu muina Nkidishitu ekale na nkatshinkatshi, muilumbuule bua kutontama. Mushindo kinyi? Abitungu tuikale na nkatshinkatshi, pa kuiwubidishena na nshalelo nsaa ayimueka kushintuluka, na pa kuneemeka mueneno na bitshibilo bia bangi. Bu biatudi bafubi ba Yehowa, abitungu tuikale na nkatshinkatshi. Abitungu dingi tuikale beyishe na ba sha lusa. Yehowa abamuitanyinaa bu “lubwebwe” muanda mushimate pepoo na tasanishua. (Miy. 32:4) Sunga mbiabia e na nkatshinkatshi. Sunga abishintuluka mianda pa nsenga, Yehowa e na nkatshinkatshi, na mushinkamishe’shi mianda yooso yaadi muitulee ayikalombana. Yehowa bapangile muntu ku kinfuanyi kiaye na ngobesha ya kuiwubidishena na nshalelo apashintuluka mianda. Mmuitupe mayi a kulonda a mu Bible aapushika kalolo, bua adia kuitukuasha bua’shi tuate bitshibilo bi buwa, sunga kuatuuka nkalakashi i naminyi mu nshalelo eetu. Yehowa aye nabene nyi nkileshesho, na mayi aaye a kulonda aadi muitupe aetushinkamisha’shi, sunga biadi muikale bu “lubwebwe,” e na nkatshinkatshi. w23.07 20 ¶1-3

Mu Bible Yehowa mmuipuandikishe aye nabene na kifulo akikalaa nakio nyina muana. (Yesh. 66:12, 13) Banda nka penda kupuandikisha nyina muana bi’ekalaa na kifulo kia kupasukila muana aaye. Na su muana abanga kudila sunga’shi apeta lukalakashi, nyinaye akimbaa bia kushinkamisha kiadi nakio lukalo. Nsaa yatudi benyongole, tui balombene kukulupila kifulo kia Yehowa. T’akutuaa kuitufula sunga nsaa y’atukitshi muanda wi bubi. (Mis. 103:8) Muilo wa bena Isalele ubaadi awinyongosha Yehowa misuusa na misuusa; kadi, nsaa ibaabadi abenyongola na kuleka kukita mianda i bubi, Yehowa baadi ebashinkamiisha na bino bishima’shi: “We na muulo ukata ku meeso kwande, we na kineemo, n’ami nee mukufule.” (Yesh. 43:4, 5) Kifulo ki’Efile Mukulu ta nkishintulukie. Sunga tuakita bilubilo bikata. Nsaa y’atuilanga ku mashimba na kualukiila kui Yehowa, paapa atumono kalolo’shi ki nka muitufule. Yehowa mmulee’shi: ‘Aketufwila lusa lukata.’ (Yesh. 55:7, EEM) Bible alesha luno lusa bu, “bipungo bia kupetuula bukome bifikie kui Yehowa nabene.”​—Bik. 3:19. w24.01 27 ¶4-5

Yehowa mmulombene kuitukuasha patudi mu muanda wi bukopo. Bu kileshesho, su tuateka mukata eetu a mudimo bua’shi tuate mafuku a kuikisha bua kuenda ku kikongeno, sunga kumuteka bua’shi tushintuule programe eetu a mudimo bua kumona bia kutuela mu bisangilo bioso, paapa tubakimbi bia kumona bi mboko ya Yehowa mu nshalelo eetu. Yaaya nsaa tui kumona mianda bi’ayituyila kalolo biatush’abapuandishanga. Na dingi lukulupilo luetu mui Yehowa, alunyiisha kunyinga. Na kuiyisha kooso, Esela baadi mutekie bukuashi kui Yehowa. Baadi ekalakasha bua mashito abaadi nao nsaa yooso, na kuiyisha kooso Esela baadi mutekie Yehowa. (Esel. 8:21-23; 9:3-5) Muikeelo wa Esela ubaadi utakule bantu booso babaadi bamuifunyishe buabadia kumukuatshishena na kuambula lukumiino luaye. (Esel. 10:1-4) Su tuapusha’shi tui bakalakashue na tuinyongoshi pabitale nkalo ya bintu bia ku mbidi, sunga pabitale kupasukila kifuko kietu, abitungu tutekie Yehowa na lukulupilo looso. w23.11 18 ¶15-17

Yehowa t’akula’shi bua’shi tuikale balulame, abitungu tukite nka bibaadi abikitshi Abalahama nya. Anka kui mishindo i bungi yatudi balombene kulesha lukumiino mu bikitshino. Tui kukuukila bantu benyi ku kakongie, kukuasha bakuetu balume na bakashi be mu lukalo lukata, na kukitshina bena kifuko netu mianda i buwa. Su tubakitshi bino, Efile Mukulu etukumiina na kuituelela miabi. (Lom. 15:7; 1 Ti. 5:4, 8; 1 Yo. 3:18) Kikitshino kimune ki pabuakio akilesha’shi tui na lukumiino, mpa kuikala na kisumi kia kulungula bangi mukandu wibuwa. (1 Ti. 4:16) Atue boso tui kulesha ku bikitshino bietu’shi, tui na lukumiino’shi milayilo ya Yehowa ayikalombana, na’shi mashinda aaye e buwa. Na su tubakitshi bino, atuikala na kishinkamisho kia’shi Efile Mukulu aketuitanyina bu bantu balulame na atukekadika ba kuuku baye. w23.12 2 ¶3; 6 ¶15

Aye taadi pa kufua, Nfumu Davide balangile Solomone na ano mayi e kunundu. (1 Bf. 2:1, 3) Lelo uno balume boso bena Nkidishitu bakuete kutumikila dino elango. Bua kuibikita, abitungu balongie bia kukookiela miiya ya Efile Mukulu na kutumikila mayi a kulonda a mu Bible mu nshalelo aabo ooso mushima. (Luk. 2:52) Buakinyi bi na muulo bua’shi bakuetu ba nsongualume bafikie bu balume bena Nkidishitu banyingie mu kikudi? Balume bena Nkidishitu abalombashaa midimo i bungi mu bifuko biabo na mu kakongie. Bakuetu ba nsongualume, kushi mpaka nui bapue kunangushena pabitale mashito anudi balombene kupeta mu mafuku aafiki. Nui kuiatshila kepatshila ka kuikala bu ba mbala-mashinda ba mieshi yoso, bafubi ba midimo mu kakongie, na kunyima nuikale bu bakulu mu tukongie. Nui balombene dingi kukumiina kuibakila na kutanda bana. (Ef. 6:4; 1 Ti. 3:1) Bua kulombasha tuno tuipatshila kalolo, abitungu nuikale bena Nkidishitu banyingie mu kikudi. w23.12 24 ¶1-2

Bakulu bena Nkidishitu mbebape bushito bua kupasukila mikooko ya Yehowa i na muulo. Baaba balume bepaane abaataa mashito aabo na muulo bua kufubila bakuabo balume na bakashi, na abekitshishaa buabadia kuikala bu “balami . . . abalama kalolo.” (Yel. 23:4, NWT; 1 Mp. 5:2) Tui na lutumbu lukata lua kuikala na bana balume be bino mu tukongie tuetu! Bakulu mbalombene kulongiela ku kileshesho kia Nsushi Gideone. (Eb. 6:12) Baadi na midimo ibidi ya kukaluila na kulama muilo w’Efile Mukulu. (Bans. 2:16; 1 Mya. 17:6) Nka bu Gideone, bakulu mbatudibue bua kulama muilo w’Efile Mululu mu kipungo kia nkalakashi. (Bik. 20:28; 2 Ti. 3:1) Tui balombene kulongiela mu kuipeelesha kua Gideone, kuiyisha kuaye, na kukookiela kuaye. Kunyingiila kuaye, kubaadi kutompibue nsaa ibaadi alombasha midimo yaye. Biatufuba bu bakulu, sunga kukutua kufuba bu bakulu, abitungu tutamishe lutumbu luetu bua bakulu beetu ba mu tukongie. Tui balombene kukuasha bano bana balume abafubu ngofu bua bakuabo balume na bakashi na bua kuitupasukila mu tukongie.​—Eb. 13:17. w23.06 2 ¶1; 3 ¶3