Mueshi wa 10

Opushaa namu ingi nsaa’shi bi bukopo bua kukookiela su? Ngi bibaapushiishe Nfumu Davide, batekiele Efile Mukulu’shi: “Mpe namu eshimba dia kukukookiela.” (Mis. 51:12, NWT) Davide baadi mufule Yehowa ngofu. Ingi nsaa, bibaadi abielela Davide bukopo bua kukookiela, n’atue namu tui kupusha nka biabia. Buakinyi? Kia kumpala, tui bapiane kinangu kia kukutua kukookiela. Kia kabidi, Satana kuete ekitshisha bua’shi tutombokiele Yehowa nka bu’ye. (2 Ko. 11:3) Kia kasatu, tui befunyishibue na bantu be na kinangu kia bu ntomboshi “kikudi kikuete kufuba binobino mui bana bash’abakookiela.” (Ef. 2:2) Abitungu tuikitshishe kushi penda bua kulua na kikudi kia kukita muluisho, anka tulue dingi bua kukambila bukitshishi bua Satana, na uno ndumbuluilo etutakula mu kukutua kukookiela. Abitungu tuikitshishe bua kukookiela Yehowa na baaba baadi musangule na ebapa matalua a kukunkusha. w23.10 6 ¶1

Nkinyi kiatudi balombene kulongiela ku kilengieleeshi kia Yesu kia kualuula meema bu maalua a nfinyo? Atupete dilongiesha dia kuiyisha. Yesu ta baadi muileshe pabitale kilengieleeshi nya, dingi, ta muileshe musuusa su ngumune ku bintu biadi mukite nya. Mu kuilekeena na biabia, bu bibaadi muiyishe ntumbo yooso na kineemo baadi ebipa nka Nshaye misuusa yooso. (Yo. 5:19, 30; 8:28) Su tubambula Yesu pa kulama mueneno a kuiyisha atue banabene, t’atukekadika na kuilesha ku kintu su nkimune ki’atukitshi. Tatukumanga kuitumbisha atue banabene, anka tuitumbishe pabitale kinemo kibuwa kiatudi na kio kia kufubila Efile Mukulu. (Yel. 9:23, 24) Abitungu tumupe kineemo kimulombeene. Kunyima kua bioso, kui kintu ki buwa kiatudi balombene kuikala na ngobesha ya kukita kushi ku bukuashi bua Yehowa su? (1 Kod. 1:26-31) Su tui beyishe t’atukimbi kineemo kia mianda i buwa yatudi bakitshiine bangi nya. Tui na muloo muanda atuuku’shi kioso ki’atukitshi, Yehowa ekimono na ki na muulo kuadi. (Puandikisha na Mateo 6:2-4; Eb. 13:16) Mu binyibinyi atusankisha Yehowa, nsaa y’atuambula Yesu mu kulesha kuiyisha.​—1 Mp. 5:6. w23.04 4 ¶9; 5 ¶11-12

Ku bukuashi bua kikudi kiselele Mpoolo mutumibua baadi munyingishe bena Nkidishitu buabadia kukimba namu buwa bua bangi. Tui kutumikila dino elango mu bisangilo naminyi? Pa kutentekieshanga’shi bangi bantu namu be nka bu atue, abakumiinaa na abo namu kutuushanga ngaluulo. Banda kunangushena pabitale uno muanda. Su okuete kuisamba na ba kuuku boobe, we mulombene kuakula nka bi bungi webalekiela mushindo upeela wa kuakula? Atuuku’shi nya! Okumiinaa’shi na abo namu, besambe bakulungule yabo mianda. Mu mushindo umune, mu bisangilo, atukumiinaa kutadiila bua’shi be bungi, bapete mushindo wa kutuusha ngaluulo. Mu binyibinyi, mushindo umune wa ku mishindo i buwa wa kunyingisha bakuetu balume na bakashi, mpatuibapa nsaa yabadia kuakula bi lukumiino luabo. (1 Kod. 10:24) Biabia, nkutungunuka na kutuusha ngaluulo yipi, p’atukitshi bino, atulekie nsaa bua’shi be bungi batuushe namu ngaluulo. Sunga nsaa y’otuusha ngaluulo yipi, leka kuisamba pabitale mianda ikata i bungi. Su buakula mianda yooso i mu kikoso, olekiela bangi tu mianda tupeela bua kuakula. w23.04 22-23 ¶11-13

Abitungu tutentekieshe muulo wa kutungunuka na kukuasha bangi bikishekishe, mu mudimo wetu wa bulungudi. Abitungu tuikale na nkatshinkatshi mu mudimo wetu wa bulungudi. Atufumankanaa na bantu be na nkumiino ilekeene, mikeelo ilekeene, na bakudile mu ma mbalo elekeene. Mpoolo mutumibua baadi na nkatshinkatshi, n’atue namu tui kulongiela ku kilesheho kiaye. Yesu batudile Mpoolo bu “mutumibua a ingi miilo.” (Lom. 11:13) Mu uno mudimo waye Mpoolo baadi alungula mukandu wibuwa kui bena Yunda, bena Greke, bantu balongie, bantu beyishe, bantu bakata, na ba nfumu. Bua kukuma mashimba elekeene a bantu babaadi abamuteemesha, Mpoolo bafikile “kioso akitungu kui bantu ba mishindo yoso.” (1 Ko. 9:19-22) Mpoolo mutumibua baadi mutuule binangu biaye ku bipikua, mbalo ikudile bantu, malongiesha, nkumiino yabo, na kuiwubidishena na nshalelo aabo bua’shi ebakakie kui Efile Mukulu. N’atue namu tui kulumbuula mudimo wetu wa bulungudi, su atuiwubidishena na nshalelo a bantu na atutompo kunangushena mu mushindo wibuwa bua kukuasha muntu ooso atufumankana naaye. w23.07 23 ¶11-12

Kupopeela nyi mbukome, ta nkubofula nya. Abitungu bukome bua mu binangu bua kushaala baumiine nsaa y’atufumankana na nkalakashi. Kupopeela nyi nkimune kia ku bipindi bia “kikuba kia kikudi.” (Nga. 5:22, 23) Ingi nsaa kishima kia mu kina Greke kiabadi baluule bu kupopeela, babaadi abekifubisha bua kulesha bibaabadi abaata mpunda a mu kisuku, abamumunu paasha. Nkifuatulo kia mpunda a mu kisuku shi na bukielo dingi. Bino abilesha’shi bataala, kadi e na bukome. Atue bantu tui kuikala na eyikashi dia kupopeela naminyi aku tui na bukome? Tatua kuibikita mu’tue banabene, muanda wi na muulo nkuteka Efile Mukulu kikudi kiaye, na kumuteka bua kudima dino eyikashi di buwa. Be bungi mbalongie bia kuikala na kupopeela. Bu kileshesho, bakuetu balume na bakashi be bungi mbaleshe kupopeela, nsaa ayitompo bangi bantu kuibolomona. Na bino mbikuashe bangi bua kuikala na mmueneno e buwa pabitale Tumonyi tua Yehowa.​—2 Tim. 2:24, 25. w23.09 15 ¶3

Mu kimonua kia kukaanya Yowano mutumibua bamuene bakulu 24 muiyilu, abalanguila Yehowa. Babaadi abatumbisha Efile Mukulu baukie’shi, mmulombene kutambula “ntumbo, na kineemo, na bukome.” (Kbf. 4:10, 11) Na ba mikeyilu baasha lulamato namu’nyi be na tubingilo tui bungi tua kupa Yehowa ntumbo na kineemo. Be naaye muiyilu na abamuuku kalolo. Abamonaa ngikashi yaye mu bioso bi’akitaa. Bu bi’ababandilaa bi bikitshiino bia Yehowa, abibatakulaa bua kumutumbisha. (Yob. 38:4-7) N’atue namu atukumiina kutumbisha Yehowa mu nteko yetu, p’atumulesha kiatudi bamufudile na kiatumunemekielaa. Nsaa y’obadika na kuilongiela Bible, ekitshishe bua kumona ngikashi ya Yehowa ayikambaa nkukaka kuadi pa bupenka. (Yob. 37:23; Lom. 11:33) Akupu lungula Yehowa bi’opusha pabitale yaya ngikashi yooso. Tui balombene kutumbisha Yehowa muanda etukuashaa, na kukuasha bena Nkidishitu neetu booso balume na bakashi.​—1 Sam. 2:1, 2. w23.05 3-4 ¶6-7

Mu kipua kia 1919, Babilone Mukata, baadi mushimishe matalua abaadi nao kui muilo w’Efile Mukulu. Mu kiakia kipua, “mpika a lulamato na mudimukie” babangile kuikala kuanka, aye nkubanga kukita mudimo na kishima kioso na kukukila bantu bapia baasha mashimba alulame bua badia kutambukila mu dino “Eshinda diselele” dib’abebafunguila. (Mat. 24:45-47; Yesh. 35:8) Atutumbula kano kasaka ka bantu baasha lulamato babaadi “bafube dino eshinda” mu mafuku a kala, baaba babaadi batambukile mu dino eshinda bua kutamisha kiukilo kia mpango ya Yehowa. (Nki. 4:18) Babaadi bekale dingi na nshalelo muipushene na kikiebe ki’eshimba dia Yehowa. Yehowa t’atengielaa’shi muilo waye ushintulukie nka musuusa umune mu mianda yooso nya. Baadi mushintuule kiukilo kia muilo waye ku kapeela kapeela. Atukekala na miloo i bungi nsaa yatuikala na mushindo wa kusankisha Efile Mukulu eetu mu mianda yooso yatukitshi! Eshinda dioso aditungaa kuidilumbuula nsaa yooso. Kubanga mu kipua kia 1919, mudimo w’eshinda, “Eshinda diselele” ubaadi utungunukie bua kubofuisha bantu be bungi bua’shi batukie mu Babilone Mukata. w23.05 17 ¶15; 19 ¶16

Kasaka ka Bakunkushi-Bakulu ako ka nabene kakuete kulongiesha bakuashi ba ma komite elekeenelekeene a Kasaka ka Bakunkushi-Bakulu. Bano bakuashi basha lulamato binobino, mbakumiine kuata mashito e bungi mu ndumbuluilo a Yehowa. Bakuete kuilumbuula kalolo buabadia kutungunuka na mudimo wa kupasukila mikooko ya Nkidishitu. Apakende bedibue muimu ba nfudiilo muiyilu, peepi na nfudiilo a mpombo ikata, muilo wa Yehowa wi pano pa nsenga aukatungunuka na kumufubila na lulamato losoo. Ku bukuashi bua bukunkushi bua Yesu Nkidishitu, balanguidi b’Efile Mukulu, t’abakakutua kintu su nkimune. Mu binyibinyi mu aa mafuku, kisaka kia maumbo esangie ki’abayitanyina kui Bible bu Goge a kuiwumbo dia Magoge, akikatuuku muilo w’Efile Mukulu ngoshi. (Es. 38:18-20) Anka ino ngoshi ya kapindi kapeela t’ayikoobesha, t’ayikemika muilo w’Efile Mukulu buawudia kuleka kulanguila Yehowa. Yehowa akebakaluila mu binyibinyi! Mu kimonua Yowano mutumibua bamuene kibumbu kikata kia ingi mikooko ya Nkidishitu. Yowano bakuile’shi kino “kibumbu kikata” akituukila mu “mpombo ikata.” (Kbf. 7:9, 14) Oolo, biabia atuuku’shi Yehowa akebapaasha! w24.02 5-6 ¶13-14

Tui kukita kinyi bua kupeta kikudi kiselele? Tui balombene kuteka Efile Mukulu etupe kikudi kiaye, tuilongiele Eyi diaye diyokielue na kutuela mu ndumbuluilo a Efile Mukulu akukushibua na kikudi kiaye. Su tubakitshi bino, abiketukuasha bua tudia kudima eyikashi dia “kikuba kia kikudi kiselele.” (Nga. 5:22, 23) Efile Mukulu apeyaa baaba be na binangu bi buwa na muikeelo wibuwa kikudi kiaye kiselele. Mmulombene kutungunuka na kuitupa kikudi kiaye kiselele, su tuatungunuka na kupela kuikala na binangu bi bubi na bikitshiino biabio. (1 Te. 4:7, 8) Bua’shi tutungunukie na kupeta kikudi kiaye kiselele, abitungu dingi tulekie “kubepuula mayi a butemuki.” (1 Te. 5:20) Pano “matemuki” aalesha mikandu ayituuku ku bukuashi bua kikudi ki’Efile Mukulu, mu ino mianda mui mpaa na Efuku dia Yehowa na mianda ayitungu’shi tukite mu kino kipungo kietu bukidibukidi. Ta tui balombene kumona mu binangu bietu’shi diadia efuku diki kula, na kunangushena’shi Armagedone t’afiki ansangane pa nki na muwa nya. Ngi buakinyi atulesha’shi tukuete kutengiela bua’shi diadia efuku difikie binobino, na kuidilama mu binangu bietu p’atuikala na bibungi bia kukita na “bikitshino bia kulamata Efile Mukulu.”​—2 Mp. 3:11, 12. w23.06 12 ¶13-14

Bu biatudi bena Nkidishitu, tui kukita naminyi su nsaa yatukuete kufubisha telefone eetu bifuatulo bia pornografi biamueneka kushii mu kukumina kuetu? We kushima telefone na kuleka kumubandila kushi kunyengakana. Abiketubofuila bua kukita bino su tuatentekiesha’shi kintu ki na muulo ukata kuatudi nyi nkipuano kietu na Yehowa. Sunga bingi bifuatulo biamueneka bu bishi bia pornografi, mbilombene kuitupa kinangu kia kutambuka lusandi. Buakinyi abitungu tulekie kuibitala? Muanda ta tukumina kukita ka muanda su nkapeela kalombene kuitutakula mu kukita muluisho wa kutambuka lusandi muishimba dietu. (Mat. 5:28, 29) Ungi mukulu mu kakongie a mu Tailande abetanyinaa bu David bakuile’shi: “Neyipushaa ami nabene’shi, ‘Su biabia bifuatulo ta mbia pornografi, Yehowa e kusanka nsaa yantungunuka na kuibibandila su?’ Kunangushena mu uno mushindo nkukuashe buandia kuikala nakitshi mianda yooso na binangu bi buwa.” Tui bakuashibue p’atukitshi mianda na binangu bibuwa na kuikala na moo wibuwa wa kupela kukita mianda ayinyongosha Yehowa. Kutshiina Efile Mukulu ngi “mbangilo,” sunga kitako, kia “binangu.” w23.06 23 ¶12-13

“Mashibo” ngalombene kulesha tukongie tuetu. Mu kipungo kia mpombo ikata, Yehowa aketukaluila, biadi muitulee nka su tubatungunuka na kulama buumune na bakuetu balume na bakashi. Pano pashafikile mpombo ikata, abitungu wekitshishe ngofu biosha kusumbushena bakuetu balume na bakashi, anka onyiishe kutamisha kifulo kiobe kuabadi. Bua’shi tupande abitungu tuikale nka na kifulo! Efuku dikata dia Yehowa adikekasha bantu na “twinyongoshi tukile.” (Sef. 1:14, 15) Mpaa na muilo wa Yehowa, aukakiengie ngofu. Biabia su tuelumbuula kubanga binobino, atukapete mushindo watudia kushaala baumiine, na kukuasha bangi. Atukanyingiila lukalakashi looso lulombene kuitufikila. Nsaa ayikiengie bakuetu, atukakitshi muetu mooso bua kuibakuasha pa kuibalesha lusa na kuibapa bintu biabadi naabio lukalo. Biabia su tubalongo bia kufula bakuetu kubanga binobino, atukebalesha kifulo mu mafuku aafiki. Yehowa aketupa efuto dia muwa wa ikalaika, pa nsenga. Masaku aatukila ku bintu bipangibue, na mpombo atukebilubu.​—Yesh. 65:17. w23.07 7 ¶16-17

Eyi di’Efile Mukulu adileshaa bantu baasha lulamato bu be bukome. Sunga baaba abamueka’shi be na bukome ngofu munkatshi muabo, kadi misuusa yoso t’abepushaa nka na bukome nya. Bu kileshesho, ungi musuusa Nfumu Davide bapushiishe’shi baadi ‘mukankamishibue nka bu ngulu,’ anka angi mafuku ‘mô ukata ubamukuatshile.’ (Mis. 30:7, EEM) Kikudi ki’Efile Mukulu ngi kibaadi akipa Samesone bukome bua mbidi bui bungi, anka Samesone baadi awuku’shi kushi bukome bu’Efile Mukulu, akekala na ‘bukome bupeela nka bi muntu êse yawa.’ (Bans. 14:5, 6; 16:17, EEM) Baaba bana balume baasha lulamato babaadi na bukome nka penda muanda wa’shi Yehowa ngi baadi ebapa buanka. Mpoolo mutumibua baadi awuku’shi n’aye namu baadi na lukalo lua bukome abufiki kui Yehowa. (2 Ko. 12:9, 10) Mpoolo baadi mukuatshikie na mikumbo i bungi. (Nga. 4:13, 14) Ingi misuusa, bibaadi abimuelela mpaa na bukopo bua kukita mianda ilulame. (Lom. 7:18, 19) Na ingi misuusa namu baadi enyongola na kupusha moo bua kilombene kumufikila. (2 Ko. 1:8, 9) Anka, pa baadi Mpoolo mubofule ngi pa baadi na bukome. Mmushindo kinyi? Yehowa baadi apa Mpoolo bukome bubaadi nabo lukalo, bua kunyingiila nkalakashi ibaadi apete. w23.10 12 ¶1-2

Su ingi nsaa tukuete kuipusha bu bashi na muulo, abitungu tutentekieshe’shi Yehowa ngi muitukakie kuadi mu kukumiina kuaye aye nabene. (Yo. 6:44) Yehowa amonaa ngikashi i buwa i muatudi yatushi balombene kumona atue banabene, na auku mashimba eetu kalolo. (2 Mya. 6:30) Biabia, abitungu tukulupile muadi nsaa y’etulungula’shi tui na muulo. (1 Yo. 3:19, 20) Kumpala ku’atue kulonga bia binyibinyi, be bungi ba kuatudi babaadi bakite mianda iki’ayibenyongosha mpaa na binobino. (1 Mp. 4:3) Sunga bena Nkidishitu ba sha lulamato, bakuete kulua bua kukambila bukitshishi bua miluisho. Eshimba diobe adikutopekaa su? Su adikutopekaa, ikala munyingishibue pa kuuka’shi bafubi ba Yehowa ba sha lulamato, bakuete kulua bua kukambila biabia binangu bimune. Bu kileshesho, Mpoolo mutumibua bepushiishe bu muntu sha dikienga pabaadi anangushena ku kukutua kua kupuidika kuaye. (Lom. 7:24) Mu binyibinyi, Mpoolo mutumibua baadi muilangie kuishimba ku miluisho yaye, n’aye nkubatshishibua. Ngi buakinyi baadi muileshe aye nabene bu muntu, “mukile bupeela a ku batumibua boso” na a “kumpala” a ku baaba ba sha miluisho.​—1 Ko. 15:9; 1 Ti. 1:15. w24.03 27 ¶5-6

Dilongiesha dimune diatudi balombene kulongiela ku bitshibilo bi bubi bia Nfumu Yoase ndia’shi, abitungu tusangule ba kuuku be na bukitshishi bui buwa kuatudi, kuamba’shi ba kuuku bafule Yehowa na abakumiina kumusankisha. T’abitungu’shi ba kuuku betu bekale nka batudi nabo mulongo nya. Tentekiesha’shi, Yoase baadi mukinga ngofu pe kuuku aaye Yekoyada. Pabitale kusangula kua ba kuuku eyipushe obe nabene’shi: ‘Ba kuuku bande mbalombene kunkuasha bua kunyingisha lukumiino luande mui Yehowa? Abanyingishaa bua kuikala na nshalelo muipushene na mayi a kulonda a Efile Mukulu su? Abakulaa namu pabitale Yehowa na bia binyibinyi biaye su? Bakuete kulesha’shi mbakutue kaneemo bua mayi a kulonda a Efile Mukulu su? Abekalaa n’eshimba dinyingie bua kuntopeka pankitshi bilubilo, su abandungulaa nka penda mianda yankumiina kupusha?’ (Nki. 27:5, 6, 17) Mu binyibinyi, su ba kuuku boobe ta mbafule Yehowa, t’abitungu’shi wekale nabo nya. Anka su we na ba kuuku bafule Yehowa, elamatshishene nabo, muanda abakakukuasha bua kukita mianda i buwa!​—Nki. 13:20. w23.09 9-10 ¶6-7

Mu alfabe a kina Greke, Alfa ndileeta dia mbangilo, na Omega ndileeta dia nfudiilo. Yehowa p’aye kuakula’shi nnaaye “Alfa na Omega,” baadi akiebe kuitukuasha buatudia kupusha’shi nsaa y’abanga kintu kampanda ekifudishaa. Kunyima kua Yehowa kupanga Adama na Eeva, Efile Mukulu bebalunguile’shi: ‘Etandênei, nufwime pa nsenga poso, nwikale bu banfumu bâyo.” (Kib. 1:28, EEM) Nsaa i Yehowa abanga mpango yaaye, bi nka bu’shi Yehowa amba’shi: “Alfa.” Nsaa ayikafiki, apakeekala bekulu ba Adama bapuidikie na abakookiela, bawushe nsenga na kuiyaluula bu mpaladiiso. Apakalombana mpango yaaye bi nka bu’shi Yehowa akamba’shi: “Omega.” Kunyima kua Yehowa kupanga “eyilu na nsenga na bioso bi muanka,” Yehowa baakuile kintu kampanda bua kuleesha’shi mpango yaaye ayikalombana binyibinyi. Etushinkamiisha’shi ta mulombene kukambilua bua kulombasha mpango yaaye bua bantu na bua nsenga. Bino abilesha’shi mpango ya Yehowa bua bantu na bua nsenga, ayikalombana yooso kalolo ku nfudiilo ku’efuku dia musambobidi.​—Kib. 2:1-3. w23.11 5 ¶13-14

Luendo lui bukopo lua kukatuka ku Babilone na kuenda ku Isaleele, lubaadi lulombene kukita mieshi ikile pa inanka. Anka Yehowa baadi mulee’shi ta kui kikokoshi su nkimune kilombene kumueneka muishinda kia kui bakutshishua kualuka mu Isaleele. Muyile mu binangu bia bena Yuda babaadi na lulamato, kualukiila mu Isaleele kubaadi na muulo ukata kukila bintu bioso bibaabadi balombene kuisumina. Muabi ukata ubaabadi bapete, nkualushuula dingi lulanguilo luabo. Anka, ta mubaadi ntempelo a Yehowa mu Babilone nya. Bena Isaleele ta babaadi na kilambuilo kia kukitshiina bitapilo bu bibaadi abibatekie muiya wa Moyise. Ta kubaadi ba tshite-muakuidi balombene kulumbuula bua kukita bitapilo. Kukatusha biabia, muilo wa Yehowa ubaadi munkatshi mua ba mpangano bakile bungi balume na bakashi, bashi baadi abanemeka mayi a kulonda a Yehowa. Binunu bia bena Yuda babaadi abatshinyi Efile Mukulu, babaadi abatengiela kualukila mu nsenga yabo, buabadia nkalushuula lulanguilo lui selele. w23.05 14-15 ¶3-4

Tui na lukalo na bukuashi bua kikudi kiselele ki’Efile Mukulu bua’shi tutungunukie na kuikala na muikeelo wa bu “bana b’etaata.” Buakinyi? Muanda ta mbibofule buatudia kushaala batookane mu ino nsenga muule na mianda i butete. (1 Te. 4:3-5, 7, 8) Kikudi kiselele akitukuasha buatudia kulua na binangu bia uno ndumbuluilo e bubi, muanda bantu ta be na mueneno a mianda bu a Yehowa nya. Kikudi kiselele akitukuasha dingi buatudia kuikala na “buwa bua mishindo yoso na kululama.” (Ef. 5:9) Bua’shi tupete kikudi kiselele, abitungu tutekie. Yesu bakuile’shi Yehowa “apa baaba abamutekie kikudi kiselele.” (Luk. 11:13) Na nsaa y’atutumbisha Yehowa pamune mu bisangilo bia bena Nkidishitu, atupete kikudi kiselele. (Ef. 5:19, 20) Bukitshishi bui buwa bua kikudi kiselele abuitukuasha buatudia kuikala na nshalelo asankisha Efile Mukulu. w24.03 23-24 ¶13-15

We na lukalo lua luishinko lui bungi su? Su we nalo lukalo ela luteko bua kuilupeta. Luishinko nyi nkipindi kia kikuba kia kikudi kiselele. (Nga. 5:22, 23) Biabia, abitungu tuele luteko kui Yehowa etupe kikudi kiaye kiselele, na kumuteka bukuashi buatudia kudima kino kipindi kia kikuba kia kikudi. Nsaa y’atupete muanda autompo luishinko luetu, atutungunuka na kuteka bua kupeta kikudi kiselele, kitukuashe bua kuikala na luishinko. (Luk. 11:13) Tui balombene dingi kuteka Yehowa bua’shi etukuashe tuikale na mmueneno a mianda bu aaye. Na kunyima kua kuela nteko, abitungu tuikitshishe buatudia kuikala na luishinko efuku dioso. Su tubatungunuka na kuteka bua kuikala na luishinko na kuikitshisha bua kuikala na luishinko, Yehowa aketukuasha buatudia kuikala na luishinko lui bungi sunga biekala’shi kumpala ta tubaadi na luishinko. Luishinko alukuasha dingi bua kunangushena ku bileshesho bia mu Bible. Mu Bible mui bileshesho bia bantu be bungi babaadi baleshe luishinko. P’atunangushena ku bino bileshesho bioso, tui balombene kulongiela mishindo i bungi ya kulesha luishinko. w23.08 22 ¶10-11

Yesu baadi mushinkamiishe Mpiele mutumibua’shi Yehowa amupasukila. Kunyima kua Yesu kusanguka, baadi mukitshine Mpiele na bangi balongi kilengieleshi kia kukuata mishipa i bungi. (Yo. 21:4-6) Kushi mpaka kino kilengieleshi kibaadi kishinkamiishe Mpiele’shi mbibofuile Yehowa buadia kumupasukila ku nkalo yaaye ya ku mbidi. Pangi mutumibua baadi mutentekieshe mayi a Yesu aamba’shi, Yehowa mmulombene kupua nkalo ya baaba abatungunuka na “kukimba kumpala Bufumu.” (Mat. 6:33) Bino bioso bibaadi bikuashe Mpiele buadia kutuula mudimo wa kulungula mukandu wibuwa pa mbalo ya kumpala mu nshalelo aaye, kukila mudimo waye wa kuloba. Mpiele baadi mulungule mukandu wibuwa n’eshimba dinyingie muifuku dia Pantekote a mu kipua kia 33 (B.B.), na aye nkukuasha bantu binunu bua kukumiina mukandu wibuwa. (Bik. 2:14, 37-41) Kunyima kua mafuku, bakuashishe dingi bangi bantu bena Samadiya na ingi Miilo buabadia kukumiina Nkidishitu. (Bik. 8:14-17; 10:44-48) Kushi mpaka Yehowa baadi mufubishe Mpiele mu mushindo wa kukaanya buadia kutuesha bantu ba bipaso bioso mu kakongie. w23.09 20 ¶1; 23 ¶11

Munda a bipua bibidi kunyima kua bena Babilone kubutula Yelusaleme. Nfumu Nabukodonosore a mu Babilone baadi na moo ukata wa kilotua kia nkishi mukata kibaadi muloote. Baadi mutume eyi kui ba sha binangu baye mpaa na kui Ndaniele akula’shi bamupatuluile kilotua na ki’akipushisha. Su ta mbapatuule, booso abayipayibua. (Nda. 2:3-5) Ndaniele baadi mukite mianda kushi kunyengakana, bisumanga bantu bebungi babaadia kushimisha miuwa yabo. “Ndaniele baîle’nka papa kwi nfumu, akamusendêla byadya kubanda kumupa kipindji kilombêne eûka kînyi kilôtwa kyê na kipatulwilo kyâkyo.” (Nda. 2:16, EEM) Biabia, bibaadi abitekie lukumiino n’eshimba dinyingie. Bible t’alesha’shi Ndaniele baadi mupatuule kingi kilotua kumpala kua kino nya. Balunguile ba kuuku baye’shi ‘tusendeleyi Efile Mukulu e mwiyilu etufwile lusa, na etufumbwile bifibwe mu kino kilotwa.’ (Nda. 2:18, EEM) Yehowa baluluile ino nteko yoso. Ku bukuashi bu’Efile Mukulu, Ndaniele baadi mupatuule kilotua kia Nabukodonosore. Ndaniele na ba kuuku baaye tababafuile nya. w23.08 3 ¶4

Taluula miabi ayifikaa mu kulesha kua luishinko. Su tui na luishinko, atuikala na muloo na butaale. Luishinko luikuitukuasha bua kulumbuula binangu bietu na kushaala na mbidi bukome. Patudi na luishinko kui bangi, atupete muloo wa kushaala naabo mu kipuano kibuwa. Na kakongie keetu akanyiisha kuikala mu buumune. Su muntu kampanda etoolomona, kukutua kuetu kua kukuata nsungu bukidi kui kulumbuula muanda, pa mutue wa kuiuluisha. (Mis. 37:8; Nki. 14:29) Biabia atue booso, atuambula Nshetu e muiyilu na atunyinsha kuifubuila kuadi. Luishinko lua binyibinyi nyi eyikashi dibuwa bukile adikuashaa ooso akuatudi! Sunga biekala’shi ta mbibofule misuusa yooso bua kulesha luishinko, anka ku bukuashi bua Yehowa, tui kutungunuka na kudima dino eyikashi. Na dingi, bu bi’atukiatutengiela kufika kua nsenga ipia na luishinko looso, abitungu tushinkamishe’shi: “Eyiso dia Yehowa di pe baaba abamutshinyi, baaba booso abamutengiela na kifulo ki na lulamato.” (Mis. 33:18, NWT) Biabia, atue booso tutungunukieyi na kuikala na kitshibilo kia kuikala na luishinko. w23.08 22 ¶7; 25 ¶16-17

Yakobo baadi muakule’shi, uno muntu e kuimona aye nabene bu e na lukumiino, anka bikitshino biaye bibaadi bileshe’shi te na lukumiino. (Yak. 2:1-5, 9) Yakobo baadi muteemune dingi muntu kampanda bamuene ‘mukuabo mulume sunga mukashi mukutue bilamba sunga bidibua,’ kadi akutua kumukuasha. Sunga bibaadi bimone yawa muntu bu e na lukumiino, anka bikitshino biaye bibaadi abilesha’shi te na lukumiino. (Yak. 2:14-16) Yakobo baadi muambe pabitale Rahabe’shi, nkileshesho ki buwa kia muntu sha lukumiino lui na bikitshino. (Yak. 2:25, 26) Baadi mupushe abakula pabitale Yehowa bibaadi akuasha bena Isalele. (Yos. 2:9-11) Baadi muleshe lukumiino luaye ku bikitshino p’aye kukaluila ba mpuupa babidi ba bena Isalele pabaadi muwa wabo mu masaku. Bu kipeta, yawa muana mukashi shi mupuidikie, shi muina Isalele baadi muitanyinue bu muntu mululame, nka bibaabadi betanyine Abalahama. Tubalongiela kui Rahabe’shi bi na muulo kulesha lukumiino ku bikitshino. w23.12 5-6 ¶12-13

Bu biatudi bena Nkidishitu, t’abitungu’shi tulongie nka penda bia binyibinyi bia mu Bible bia kitako nya. Ku bukuashi bua kikudi kiselele ki’Efile Mukulu, abitungu tuikale na lukalo lua kulonga “mianda ifuame y’Efile Mukulu.” (1 Ko. 2:9, 10) Buakinyi mu kuilongiela koobe kua pa bupenka, abikutungu otale mianda ayikukuasha bua kuifubuila peepi na Yehowa? Bu kileshesho, we kutaluula mushindo ubaadi Yehowa muleeshe bafubi baye ba kala kifulo, na mushindo wakuete nkushikamiisha’shi n’obe namu mmukufule. We kulonga mushindo ubaadi Yehowa akumiina’shi bena Isaleele bamulanguile, na kupuandikisha na mushindo wakumiina’shi tumulanguile n’atue namu lelo uno. Pangi we mulombene kulonga matemuki abaadi Yesu mulombashe na mudimo waye wa bulungudi pano pa nsenga kantu pa kantu. Okapete muloo wi bungi pa kulonga ino mianda ku bukuashi bua mukanda wa Index des publications des Témoins de Jéhovah sunga wa Mukanda aukwasha ba Temwe ba Yehowa bwa kukimbuula myanda. Kulonga Bible kalolo akunyingisha lukumiino lobe na nkukuasha bua kupeta ‘kiwukilo ki’Efile Mukulu.”​—Nki. 2:4, 5. w23.10 18-19 ¶3-5

Kishima kiabadi bafubishe kui Mpiele mutumibua bu “kikata” akipushisha kuikala na “kifulo kikata” bua bangi. Kipindi kia kabidi kia verse akilesha bukitshishi bulombene kuikala na kifulo kikata kui bangi. Muanda kifulo akibuikilaa miluisho ya bakuetu balume na bakashi. Tubande kuata kileshesho kia uno mushindo: Tui bakuate kifulo kietu mu maasa abidi, bi nka bu’shi tui na kipese kia kilamba ki’atukaka bua kubuikila, kushi muluisho umune sunga ibidi, kadi “mututo wa miluisho.” Pano “kubuikila” mbekuleshe mu mushindo wa kufuidishena lusa. Nka bilombene kilamba kubuikila kilema kampanda ki pa mbidi petu, kifulo namu nkilombene kubuikila kubofula na kukutua kua kupuidika kua bangi. Kifulo kietu bua bangi nkilombene kuikala bukopo nka mu mushindo w’atufuila bena Nkidishitu netu lusa mu kukutua kuabo kua kupuidika, kuamba’shi sunga bino biatunga’shi tuikitshishe ngofu. (Kol. 3:13) Su tobesha kufuila bangi lusa, atulesha’shi kifulo kietu ki bukopo na atukumiina kusankisha Yehowa. w23.11 11-12 ¶13-15

Nfumu Yosiase pa balombeshe bipua 26, babangile kulumbuula ntempelo. Pa baadi akitshi wawa mudimo, bapetele “mukanda wa miya ya Yehowa ubabafundile kui Moyise.” Nsaa ibaadi nfumu muteemeshe bibaadi abiakula mu wawa mukanda ubaadi mubadikie, bashintulukile musuusa nka umune akookiela bibaadi bifundibue muanka. (2 Mya. 34:14, 19-21) Obe namu okumiinaa kubadika Bible efuku dioso su? Su wekitshishaa bua kumubadika, osangeelaa kumubadika su? Otungunukaa na kuela tu mifunda pa bifundue bi na muulo bilombene nkukuasha pa bupenka su? Pabaadi Yosiase na bipua bifikie ku 39, bakitshiine kilubilo kibaadi kimutuale mpaa na ku lufu. Baadi muikulupile aye nabene sunga mbibaadi atekie’shi Yehowa amukunkushe. (2 Mya. 35:20-25) Bino abitulongiesha kinyi? Sunga tuekala na bipua bi bungi naminyi, sunga bapue kulonga Bible munda a bipua bi bungi, abitungu tutungunukie na kuifubuila nka kui Yehowa. Bino abipushisha kuteka buludiki efuku dioso, kuilongiela Eyi diaye na kutekanga elango kui bena Nkidishitu banyingie mu kikudi. P’atunyiisha kuleka kukita bilubilo bikata, atunyiisha nkekala na muloo wi bungi.​—Yak. 1:25. w23.09 12 ¶15-16

Bible mmuteemune mashina a bana bakashi be bungi babaadi bafule Yehowa na babaadi abamufubila. Babaadi na “nkatshinkatshi mu bikitshino biabo” na “lulamato mu mianda yoso.” (1 Ti. 3:11) Kukatusha biabia, bakuetu ba nsonguakashi be kumona bileshesho bia bana bakashi bena Nkidishitu banyingie mu kikudi na ba kukulupilua, babadi balombene kuambula mu kakongie kaabo. Ba nsonguakashi, buakinyi ta nui balombene kutundula bana bakashi bena Nkidishitu banyingie mu kikudi banuiwuku banudi balombene kuambula bileshesho biabo? Nubekiele ngikashi yabo i buwa, akupu nukimbe mushindo wa kuiyilesha. Eyikashi di na muulo aditungu’shi muina Nkidishitu munyingie mu kikudi ekadikie nadio nyi nkuiyisha. Su muana mukashi mmuiyishe, akasangeela kuikala mu kipuano ki buwa na Yehowa, na kuikala mu kipuano ki buwa na bangi bantu. Bu kileshesho, muana mukashi mufule Yehowa, na e na kuiyisha, ataa kitshibilo kia kukuatshishena mayi a kulonda a baaba abakunkusha babadi batuule kui Nshetu e muiyilu. (1 Ko. 11:3) Aa mayi a kulonda abeatumikilaa mu mushindo wi pa buawo mu kakongie na mu mpango ya mu kifuko. w23.12 18-19 ¶3-5

Yehowa akumiina’shi balume bafule bakashi baabo, be bapasukile ku nkalo yabo ya ku mbidi, ya mu binangu na ya mu kikudi. Kutamisha ngobesha ya kunangushena, kuneemeka bakuetu bakashi, na kuikala muntu akukulupilua, abikakukuasha bodia kuikala mulume e buwa muiyibakishi. Kunyima koobe kuibakila, we kufika nshe bana. We kulongiela kinyi pabitale kuikala nshe bana e buwa? (Ef. 6:4) Yehowa balunguile Muana aaye mulume Yesu pa butooka’shi mumufule na’shi mumukumiine. (Mat. 3:17) Su buekala nshe bana, abitungu wekale mushinkamishe’shi okuete kulungula bana bobe nsaa yooso’shi we muibafule. Ikala we batumbula na kalolo kooso bua mianda i buwa yabakuete kukita. Ba nshe bana abambula kileshesho kia Yehowa, abakuasha bana baabo buabadia kufika balume sunga bakashi bena Nkidishitu banyingie mu kikudi. We kubanga kuilumbuula kubanga binobino bua uno mudimo pa kukumiina kupasukila bangi mu kifuko kiobe, mu kakongie na kulonga bia kulungula bangi’shi we muibafule na kuibatumbula.​—Yo. 15:9. w23.12 28-29 ¶17-18

Sunga biatudi bekale bafubi ba Yehowa basha lulamato, atufumankanaa na nkalakashi, na tui bashinkamishe’shi yaya nkalakashi ayikuataa bantu boso. Tui kunyingiila dingi buluishi sunga kubinguabingua akutukila kui bantu bashikue muilo w’Efile Mukulu. Sunga biekala’shi Yehowa t’akitaa bia’shi ino mianda ibukopo tayitukuatanga, kadi mmuitulee bua kuitukuasha. (Yesh. 41:10) Ku bukuashi buaye, tui kulama muloo wetu, tuata bitshibilo bibuwa, tua shala na lulamato kuadi sunga tuekala mu nkalakashi ibukopo naminyi. Yehowa mmuitulee bua kuitupa ki’abetanyina mu Bible bu “butaale bu’Efile Mukulu.” (Fid. 4:6, 7) Buno butaale abulesha butaale bu’atupushaa muanda tui mu kipuano kibuwa na Yehowa. Buno butaale “mbukile binangu bioso,” bui buwa kukila kintu kioso kiatudi balombene kupuadikisha. Kashaa topushishe namu butaale abukukanyisha kunyima k’obe kuteka Yehowa na kuiyaaya koso su? Biabia bi’opushaa nyi buinyi “butaale bu’Efile Mukulu” buabua. w24.01 20 ¶2; 21 ¶4

Kifulo bu’Efile Mukulu kibaadi kitakule bantu ba sha lulamato buabadia kutumbisha Yehowa na mashimba aabo ooso. Nfumu Davide baadi muukie kalolo’shi, kutumbisha eshina dia Yehowa nyi nkutumbisha Yehowa aye nabene. Nsaa yatupusha pabitale eshina dia Yehowa, atunangushena bi bumuntu buaye na bi ngikashi yaye i buwa na bikitshino biaye bia kukaanya. Davide baadi mukumiine kuikasha eshina dia Yehowa bu dia kishila na kuiditumbisha. Baadi mukumiine kukita biabia na “bintu biaye bioso,” kuamba’shi n’eshimba diaye dioso. Mu mushindo umune, bena Levi namu babatshile mpango yakubanga kutumbisha Yehowa. Na kuiyisha koso babaadi bakumiine’shi, mayi abo t’aanalombane kutumbisha Yehowa, n’eshina diaye dikale dia kishila. (Ne. 9:5) Kushi mpaka, kuno kuiyisha na kumutumbisha n’eshimba diabo dioso, kubaadi kusankishe eshimba dia Yehowa. w24.02 9 ¶6

Yehowa ta mulombene nkumona bu muntu shi kapu muanda tue mulombashe kepatshila koobe. (2 Kod. 8:12) Longiela ku mianda i nkukutshishua kulombasha kepatshila koobe. Lamiina mu binangu biobe bipatshila biodi mupue kulombasha. Bible aakula’shi: “Mwanda Efile Mukulu tamukutwe kululama bwadia kwiilwa mufubo wenu.” (Eb. 6:10, Kilombeeno Kipya 2014) N’atue namu t’abitungu’shi tuiluankane bipatshila biatudi bapue kulombasha. Nangushena ku bipatshila biodi mupue kulombasha, tamisha kipuano kiobe na Yehowa, lungula bangi pabitale biabia biodi mulombashe na obatshishibue. Nka bu biodi mupue kuenda kumpala na kulombasha bipatshila bia mu kikudi mu mafuku ashaale, we mulombene kutungunuka na kuenda kumpala bua kulombasha kepatshila koobe kapia koodi naako binobino. Ku bukuashi bua Yehowa, tui balombene kulombasha kepatshila keetu. Mu mushindo umune ikala nsaa yooso wekitshisha bua kumona mushindo aukukuasha Yehowa, na akakukuasha bodia kuikala na muloo nsaa yu’ekitshisha bua kulombasha bipatshila toobe. (2 Kod. 4:7) Biabia, su tue mukookie okapete miabi i bungi.​—Nga. 6:9. w23.05 31 ¶16-18

Yehowa akimbaa mishindo ya kuleesha muilo waye’shi muiwufule na’shi eusangeelaa. Bifundue abilesha misuusa ibidi ibaadi Yehowa mulungule Yesu’shi we Muana ande andi mufule, na andi mukumiine. (Mat. 3:17; 17:5) Obe namu okumiina kupusha Yehowa p’akushinkamiisha’shi mmukukumiine su? Yehowa ta ki’akulaa neetu kukatukila muiyilu nya, kadi akulaa neetu kukiila Kuiyi diaye Bible. Tui “kupusha” eyi dia Yehowa diamba’shi mmuitukumiine, p’atubadika mayi a Yesu e mu ma Evanjile. Yesu baadi muambule bumuntu bua Nshaye mu mushindo upuidikie. P’atubadika mushindo ubaadi Yesu mulungule balongi baaye ba sha lulamato, kadi bashi bapuidikie’shi muibakumiine, tui kupuandikisha’shi Yehowa etulungula namu ano mayi. (Yo. 15:9, 15) Su bitompuanga bibetufikila, t’abileesha’shi tubakutua kukuminyibua n’Efile Mukulu nya. Kadi, abitupa mushindo wa kuleesha Yehowa’shi tui bamufule ngofu, na’shi tui bamukulupile.​—Yak. 1:12. w24.03 28 ¶10-11