Mueshi wa 11

Su we nambutuile, kuasha bana bobe bakinga buabadia kulumbuula ngaluulo i buwa muyile bipua biabo. Ingi nsaa, akuikadikaa mianda i na muulo, bu mianda itale mulume na mukashi, sunga mianda ya mu muikeelo yanukuete kulonga. Anka, kui kuikadika namu pangi kikoso kimune sunga bibidi, bilombene muana atuusha ngaluulo. Dingi, kuasha bana bobe buabadia kupusha buakinyi ta nsaa yooso y’abeele maboko muiyilu, yabadi balombene kuibasangula nya. Kuno kuibapatuluila, nkulombene kuibakuasha biabasha kuinyongola nsaa y’abasangula bangi bua kutuusha ngaluulo. (1 Tim. 6:18) Atue booso, tui balombene kulumbuula ngaluulo ayinyingisha bua kutumbisha Yehowa na kunyingisha bena Kidishitu netu. (Nki. 25:11) Nsaa y’abetusangula bua kuakula mianda yatudi bamone mu kikoso, abitungu tulekie kuakula mianda i bungi pa bitutale atue banabene. (Nki. 27:2; 2 Ko. 10:18) Pa mutue pa biabia, atuikitshisha buatudia kutuula binangu bietu nka kui Yehowa, Muiyi diaye, na kui muilo waye ooso ushima.​—Kbf. 4:11. w23.04 24-25 ¶17-18

Kifulo ki na muulo bua kushaala bapasukie na kutungunuka na kulama binangu bietu. (Mat. 22:37-39) Kifulo bu’Efile Mukulu ki kuitukuasha bua kunyingiila nkalakashi yooso yatudi balombene kufumankana nayo mu mudimo wa bulungudi. (2 Ti. 1:7, 8) Bu bi kifulo kietu akiende na kutama mpaa na kui bashi balanguidi netu, atutungunuka na kulungula mukandu wibuwa, sunga bi’ateka kukita bulungudi ku telefone sunga bua kufunda mikanda. Ta tushimishanga lukulupilo’shi dingi efuku bankungishanyi netu abakashintuluka na kukita mianda i buwa. (Es. 18:27, 28) Kifulo bua bankungishanyi netu akilesha dingi kifulo bua bakuetu balume na bakashi. Atulesha kino kifulo pa “kuikankamishena na kuinyingishena.” (1 Te. 5:11) Nka abitumikaa basalayi epampa ku’epampa mu ngoshi, n’atue namu tuinyingisheneyi. Tatui balombene kukumiina kutapa bakuetu balume na bakashi ku mashimba, sunga kuibaluisha bubi ku bubi. (1 Te. 5:13, 15) Atulesha dingi kifulo kietu pa kuneemeka bakuetu balume bakuete kukunkusha bisangilo mu tukongie.​—1 Te. 5:12. w23.06 10 ¶6; 11 ¶10-11

Mushindo umune watudi balombene kunyingisha lukumiino luetu, mpa kunangushena ku nkuulo. Nkuulo ayitupa kishinkamiisho kia’shi milayilo y’Efile Mukulu, ayikalombana. Nsaa y’atunangushena kalolo buakinyi nkuulo ngitushibue, na ki’ayilesha, atunyingisha lukumiino luetu’shi mulayilo w’Efile Mukulu wa muwa ushi na mpuilo mu nsenga i buwa, aukalombana binyibinyi. Buakinyi tui kuamba bino? Biabia, nkuulo ayilesha kinyi? Yehowa baatumine Muana aaye a kifulo eeleka, kuuku aaye mukata, amukatusha muiyilu bua’shi atandikue bu muntu mupuidikie pano pa nsenga. Yesu pa baadi pano pa nsenga, baadi munyingiile nkalakashi ya bipaso bioso. Dingi, Yesu bakiengiele na afua lufu lua dikienga. Yehowa, baadi mupushe kenyongoshi kakata! Efile Mukulu eetu sha kifulo, ta kukumiina bua’shi atadiile Muana aaye akiengie na kufua penda bua kuitupa muwa wi buwa bua kapindi kapeela nya. (Yo. 3:16; 1 Mp. 1:18, 19) Ku muanda Yehowa mmuitupe Muana aaye e buwa bukile bua kuitukuasha, akashinkamisha’shi tui na mushindo wa kuikala na muwa wa ikalaika mu nsenga ipia. w23.04 27 ¶8-9

Yehowa, e na lukalo lua kubusha bafue? Oolo, ngi lukalo luadi nalo. Baadi muyokiele bafundi ba Bible be bungi, buabadia kufunda mulayilo waye wa lusangukilo lua mafuku aafiki. (Yesh. 26:19; Kibaf. 20:11-13) Nsaa ayilaa Yehowa, ebilombashaa misuusa yooso. (Yos. 23:14) Yehowa ngi mukumiine nkasangula baaba booso bafue. Tubandeyi kutala bishima bia mfumu a kifuko Yobo. Baadi mushinkamishe’shi sunga afua, Yehowa akumiina kumumona dingi na muwa. (Yob. 14:14, 15) Yehowa apushaa nka mu uno mushindo umune bua balanguidi baaye booso bafue. Mmukumiine kuibabusha dingi na muwa, na mbidi bukome, na muloo. A bi kuikadika naminyi bua midiyala ya bantu batababafuile kushi’bo kupeta mushindo wabadia kulonga bia binyibinyi pabitale Yehowa? Efile Mukulu eetu sha kifulo, akumiina kuibasangula nabo. (Bik. 24:15) Akumiina kuibapa mushindo wabadia kufika ba kuuku baaye, na kupeta muwa wa ikalaika pa nsenga.​—Yo. 3:16. w23.04 9 ¶5-6

We kunyingisha lukulupilo lobe naminyi? Bu kileshesho, su we na lukulupilo lua kushaala pa nsenga bua losoo, badika mu Bible biabadi baleshe Mpaladiiso na onangushene. (Yesh. 25:8; 32:16-18) Nangushena abikekala muwa mu nsenga ipia. Epuandikishe obe nabene muanka. Su tubashaala bashimate pepoo na lukulupilo luetu lua nsenga ipia, “makienga eetu aekala a kapindi kapeela.” (2 Ko. 4:17) Biabia, bukome bu’abakakupa kui Yehowa, abukakunyingisha. Mmukupe bintu bioso biodi nabio lukalo bodia kupeta bukome abutukila kuadi. Su we na lukalo na bukuashi bua kulombasha mudimo oobe, kunyingiila lukalakashi, sunga bua kulama muloo oobe, efubuile kui Yehowa mu luteko, omufunguile eshimba diobe, na olonde buludiki buaye p’obe kuilongiela. Kumiina kunyingishibua akufiki kui bakuenu balume na bakashi bena Nkidishitu. Ikala wata nsaa ya kunangushena pabitale lukulupile lobe lua mafuku aafiki. Na dingi, atukekala ‘banyingishibue na bukome booso muyile bukome buaye bua ntumbo buatudia kumona bia kunyingiila mu mianda yoso na luishinko na muloo.’​—Kol. 1:11. w23.10 17 ¶19-20

Tui na tubingilo tui bungi tua kutumbula Yehowa mu luteko. Tui balombene kumutumbula bua kintu kioso ki buwa kiatudi naakio, muanda kia buntu kioso ki buwa akifiki kuadi. (Shak. 1:17) Bu kileshesho, tui balombene kulesha lutumbu luetu bua nsenga i buwa yadi mupangie na bintu bia kukaanya biadi mupangie. Tui kumutumbula dingi bua muwa wetu, kifuko kietu, ba kuuku beetu, na lukulupilo luetu. Na dingi, atutumbulaa Yehowa bua biadi mukumiine bua’shi tuikale naaye mu kipuano ki buwa. Abitungu tuikitshishe ngofu bua kunangushena ku tubingilo tuatudi naato pa bupenka bua kutumbula Yehowa. Bantu be bungi lelo uno ta be na lutumbu nya. Bantu bakuete kutuula binangu nka ku biabakumiina, pa mutue pa kutuula binangu ku kiabadi balombene kukita buabadia kuikala na lutumbu ku biabia biabadi nabio. Su tui babangie kuambula bino binangu, abitungu tuibiele mu mulongo wa mianda yatudi balombene kuelela mu nteko yeetu. Bua kupela’shi bino tabitufikilanga, abitungu tutungunukie na kukimba bia kuikala na lutumbu bua bioso bia bakuete kuitukitshiina kui Yehowa.​—Luk. 6:45. w23.05 4 ¶8-9

Bu biadi Nshetu sha kifulo, Yehowa t’akumiina’shi tukiengie nya. (Yesh. 63:9) Na dingi ta mulombene kushikiila bitompuanga bioso bi’atupete, bilombene kumueneka bu muela sunga bu ndimi ya kaalo nya. (Yesh. 43:2) Anka, etulaa kuitukuasha amba’shi: “Okidi munkatshi” mwabyo. T’akatadiila’shi nkalakashi yatudi nayo itukambile nya. Yehowa etupa bukome bua kikudi kiaye kiselele bua’shi buitukuashe bua kunyingiila. (Luk. 11:13; Fid. 4:13) Ngi buakinyi, tui balombene kushinkamisha’shi, ekala etupa efuku dioso nka biabia biatudi nabio lukalo buatudia kunyingiila na buatudia kushaala na lulamato kuadi. Yehowa namu atengiela kuatudi’shi tu mukulupile. (Eb. 11:6) Ingi misuusa, tui kumona bitompuanga bietu bu bi bukopo buatudia kuibikambila. Ingi nsaa tui kubanga kuela na mpaka ya’shi ta mmulombene kuitukuasha. Anka Bible etushinkamiisha’shi, ku bukome bu’Efile Mukulu, tui balombene “kuitumba kimano.” (Mis. 18:29, NWT) Pa mutue pa kutadiila mpaka yetu itungunukie na kutama, tui kuteka na lukumiino looso bakulupile’shi Yehowa akaluula ku nteko yetu.​—Yak. 1:6, 7. w23.11 22 ¶8-9

Bino abilesha bi buwa bua kifulo kia binyibinyi! Bino bishima abishinkamiisha bia binyibinyi kui beyibakishene’shi: Nui balombene kuikala na kifulo kia binyibinyi kui muntu na muinaye. Abitungu beyibakishene bekitshishe ngofu bua kuifulena ku muntu na muinaye mu nshalelo aabo ooso. Bu kileshesho, bua’shi kaalo katungunukie na kutemba, abitungu muntu kampanda ekale eele nteete. Biabia su aleka kuela nteete, kaalo akashimi. Mu mushindo umune, kifulo ki pankatshi pa mulume na mukashi nkilombene kushaala kinyingie, nka su banyingisha kipuano kiabo. Ingi nsaa, bantu beyibakishene mbalombene kupusha’shi kifulo kiabo kibabofula, bikishekishe nsaa yabadi na nkalakashi ya kupeta makuta, mikumbo, na nkalakashi ya kukusha bana. Biabia, bua’shi mulume na mukashi balame “ndimi ya kaalo ka Yah” ayitembe, abitungu booso babidi bekitshishe bua kulama kipuano kiabo kinyingie na Yehowa. w23.05 20-21 ¶1-3

Bua’shi tuikale n’eshimba dinyingie abitungu tukite kinyi? Baledi betu be kuituteka buatudia kuikala n’eshimba dinyingie, anka ta mbalombene kuituikasha atue n’eshimba dinyingie bu’shi ndikale bupianyi bua mu kifuko. Kuikala n’eshimba dinyingie kui nka bu kulonga mayele apia. Mushindo umune wa kulamiina mayele apia, nkubekiela kalolo bi bikitshino bia mulongieshi oobe, na kuambula kileshesho kiaye. Mu mushindo umune, tui kulonga bia kuikala n’eshimba dinyingie pa kutala kalolo mushindo w’abalesha dino eyikashi kui bangi, na kuambula kileshesho kiabo. Nka bu Ndaniele abitungu tuukie Eyi di’Efile Mukulu kalolo. Abitungu tuikale mu kipuano ki buwa na Yehowa pa kumulungula mianda yeetu nsaa yooso, na tumulungule nka biabia biatupusha. Abitungu tukulupile mui Yehowa bashinkamishe’shi e neetu. Dingi su lukumiino luetu luatompibua, atukekala n’eshimba dinyingie. Bantu be na eshimba dinyingie, misuusa yoso abebanemekaa kui bangi. Mbalombene kukuasha bangi bantu bena mashimba alulame buabadia kuuka Yehowa. Mu binyibinyi, tui na tubingilo tui buwa tua tudia kuikala n’eyikashi di’eshimba dinyingie. w23.08 2 ¶2; 4 ¶8-9

Kishima kia mu kiina Greke kiabadi baluule bu “kutaluula,” babaadi bekifubishe bua kulesha bi’abataluulaa Òlo na Arja bua kushinkamisha’shi bi buwa. Biabia, abitungu tutaluule ki’atuteemesha na ki’atubadika bua kushinkamisha’shi ki buwa. Bino bi na muulo ukata kuatudi bu bia tukuete kuifubuila ku mpombo ikata. Pa mutue pa kukumiina mianda ayakula bangi bu bantu balotakane, abitungu tufubishe ngobesha yetu ya kunangushena bua kupuandikisha mianda y’atubadika sunga y’atuteemesha y’abaakula kui Bible na ndumbuluilo a Yehowa. Su tubakitshi biabia, t’atukadimbibua na madimi su ngamune abakuete kupalakasha kui ba demo. (Nki. 14:15; 1 Ti. 4:1) Atuuku’shi muilo w’Efile Mukulu aukapanda ku mpombo ikata. Atue booso t’atuuku kilombene kuitufikila malooba. (Yak. 4:14) Sunga mpombo ikata yafika pa tuki na muwa, sunga’tue bapue kufua atukapete efuto dia muwa wa ikalaika nka su tubashaala na lulamato. Biabia, atue booso tutuuleyi binangu bietu ku lukulupilo luetu lui buwa na tushaale belumbuule bu’efuku dia Yehowa! w23.06 13 ¶15-16

Ta tuiwuku mushindo aukalombana angi matemuki a mu Bible nya. (Nda. 12:8, 9) Biabia, sunga biekala’shi t’atuuku kalolo abikalombana matemuki, bino t’abipushisha’shi aakutua kulombana nya. Kushi mpaka, tui kukulupila’shi Yehowa aketufumbuila kiakia akitungu’shi tuiwukie kalolo pa nsaa ilombane, nka bibaadi muibikite mu mafuku a kala. Abakeele musaase wa “Butaale na kuiyikela.” (1 Te. 5:3) Makome a politike a mu nsenga ishima, aakalulukila bipuilo bia madimi na kuibibutula bioso. (Kbf. 17:16, 17) Kunyima abakatuku muilo w’Efile Mukulu ngoshi. (Es. 38:18, 19) Ino mianda yooso ayiketutuala ku ngoshi ya nfudiilo ya Armagedone. (Kbf. 16:14, 16) Tui kushinkamisha’shi ino mianda yooso, ayikitshika binobino. Kubanga binobino, tutungunukieyi na kulesha lutumbu luetu kui Nshetu sha kifulo e muiyilu, pa kutuula binangu bietu ku matemuki a mu Bible na kukuasha namu bangi buabadia kukita ya mianda imune. w23.08 13 ¶19-20

Nsaa ibaadi Mpoolo mutumibua esambila pabitale lukumiino, lukulupilo, na kifulo, baadi mufudiishe pa kuakula’shi: “Kadi kikile bino bioso [ngikashi] nyi nkifulo.” (1 Ko. 13:13) Buakinyi Mpoolo bakuile bino? Muanda mu mafuku aafiki, t’atukekadika na lukalo na lukumiino mu milayilo y’Efile Mukulu pabitale nsenga ipia, sunga lukulupilo bua mianda yooso yadi mupue kulombasha, muanda yooso ayikekala ipue kulombana. Biabia, atukekala nsaa yooso na lukalo lua kuikala na kifulo bua Yehowa na bua bantu. Ngi buakinyi kifulo kietu bu’abo akikatungunuka na kutama bua losoo. Na dingi kifulo akitutundushaa bu bena Nkidishitu ba binyibinyi. Yesu balunguile balongi baye’shi: “Bua biabia bantu boso abakauku’shi nui balongi bande: su nui na kifulo munkatshi muenu.” (Yo. 13:35) Na dingi, p’atuikala na kifulo ku muntu na muntu, atunyingisha buumune buetu. Mpoolo bambile’shi: Kifulo “akinubungu mu buumune bupuidikie.” (Kol. 3:14) Yowano mutumibua baadi mufundile bena Nkidishitu naye mukanda amba’shi: “Yawa oso mufule Efile Mukulu abitungu namu afule mukuabo.” (1 Yo. 4:21) Su tubeleshena kifulo ku muntu na muntu, tubalesha kifulo kietu bu’Efile Mukulu. w23.11 8 ¶1, 3

Bible apuandikisha nshalelo eetu a buina Nkidishitu na bantu abasukaa lubilo. Baaba aboobesha kusuuka lubilo na nkafika ku mulongo wa nfudiilo abapete efuto dia muwa wa ikalaika. (2 Ti. 4:7, 8) Abitungu tuikitshishe ngofu buatudia kutungunuka na kusuuka lubilo. Bikishekishe pano pa batuifubuila peepi na nfudiilo a lubilo luetu. Mpoolo mutumibua baadi mutundule kilombene kuitukuasha buatudia nkafika ku mulongo wa nfudiilo wa lubilo luetu. Baadi muitulungule bia “kukatusha dingi bushito boso . . . na kusuuka na mufuaka, lubilo lui kumpala kuetu.” Mpoolo baadi akiebe kuamba’shi muina Nkidishitu ta mmulombene kutuala bushito su? Ta mbiabia nya. Baadi akiebe kuamba’shi abitungu kuleka kusemuna bushito boso bushii na muulo. Muanda buno bushito mbulombene kuitukookiesha mpaa na kuituponesha. Bua kunyingiila abitungu kukita bukidi bua kutundula na kusumbula bushito bushii na muulo bulombene kuituponesha sunga kui tukambila. Mu mushindo umune, ta tukiebe kusumbula mashito atudi balombene kutuala nya. Su tuakutua kutuala bungi bushito, tui kukutua kusuuka lubilo.​—2 Ti. 2:5. w23.08 26 ¶1-2

Kuikala na nkashinkatshi akuitukuasha bua kunemeka mueneno a bangi. Bu kileshesho, bangi bakuetu bakashi abakumiinaa kuimpeeta, bangi namu t’abakumiinaa. Bangi bena Nkidishitu abakumiinaa kutoma ndambo ya maalua, anka bangi namu mbaate kitshibilo kia kupela kutoma su ntupeela. Bena Nkidishitu booso abakumiinaa kuikala na mbidi bukome, kadi mbasangule mishindo ilekeene ya kuiyipasukila. Su tuanangushena’shi nka atue ngi abakitaa mianda ibuwa, tui kubanga kutompa kukitshisha bakuetu balume na bakashi biabia bietu biatukumiina, bino mbilombene kukokosha bakuetu na kuabuula kakongie. (1 Ko. 8:9; 10:23, 24) Bu kileshesho, Yehowa ta muitulungule mushindo watudia kufuala nya, anka muitupe mayi a kulonda atudia kutumikila. Atufualaa bilamba mu mushindo wibuwa aulesha kineemo kia bu bafubi b’Efile Mukulu be na nkatshinkatshi, kuiyisha, na “binangu bibuwa.” (1 Ti. 2:9, 10) T’abitungu tuikale na nfuadilo atungu’shi bantu bekale abetubandila nka atue. Mayi a kulonda a mu Bible aakuasha dingi bakulu, buabadia kuleka kuela miya yabo abo banabene pabitale kufuala, na kutshiba sunga kuitshikisha nyene. w23.07 23-24 ¶13-14

Yehowa etulesha mushindo watukekala na muloo mu mafuku aafiki. Baaba booso abakumiina ku luno luitanyino lua uno muana “mukashi sha kayambala” na “mmulôtakane” abapete muloo mu muikelo wi butete. Bikitshino biabo “abibakunkusha ku lufu.” (Nki. 9:13, 17, 18) Nkuilekena kinyi kui pankatshi pa bano booso abakumiina luitanyino alufiki ku “binangu bia binyibinyi?” (Nki. 9:1) Atulongo bia kufula kiakia kiabadi bafule kui Yehowa, na kushikua kiakia kiadi mushikue. (Mis. 97:10) Atupete muloo mu kuitanyina bangi bua’shi bapete bukuashi abutukila ku “binangu bia binyibinyi.” Tui nka bu bafubi, “bemane ku bitenta bikile bula bya kibalo na abetanyina bantu na dino eyi dye’shi: ‘Anwe bashi na lushingulwilo, fikayi nutwele kuno.’” Bino t’abitukuasha nka penda atue na baaba abakumiina luitanyino kubanga binobino nya, p’abanyingiila abetupa mushindo wa kupeta “muwa wa losoo” bu biatutungunuka na kulonda eshinda muatukapete lushinguluilo.​—Nki. 9:3, 4, 6. w23.06 24 ¶17-18

Opushaa naminyi p’abakuipusha kui muina mudimo noobe sunga muina kalaasa noobe pabitale nkumiino yoobe. Abikukalakashaa su? Be bungi bakuatudi abebikitaa. Lukonko bu luno ndulombene kuitukuasha bua kuuka ki mu binangu bia muntu binyibinyi, sunga mianda yadi mukumiine na bietubofuila bua kumulungula mukandu wibuwa. Ingi nsaa mbalombene kuituela nkonko penda muanda wa’shi ta mbetukumiine sunga’shi abakumiina penda kuitukalakasha. Biabia ta mbilombene kuitukaanyisha. Na bangi abetuelaa nkonko, p’abateemesha mianda i bubi y’abetuakula kui bangi pabitale nkumiino yeetu. (Bik. 28:22) Dingi, tui mu “mafuku a ku nfudiilo,” kipungo ki bantu be bungi bashi na kikudi kia butaale na dingi “ba ntomboshi.” (2 Ti. 3:1, 3) We kuiyipusha obe nabene’shi, ‘mushindo kinyi wandia kuikala na kalolo na mayele apangolomona muntu pabitale mianda yandi mukumiine?’ Nkinyi akikakukuasha? Kupopeela ngi akukakukuasha. Muntu mupopeele ekalaa na ngobesha ya kushaala muumiine nsaa y’abamolomona, sunga nsaa yash’auku kia kualuula. w23.09 14 ¶1-2

Ingi nsaa, atupetaa malango aatukila kui ndumbuluilo bua kuitukaluila. Bu kileshesho, abetudimushaa pabitale kuikala na kifulo kia nfualanga, na kuleka kukita mianda ayitutakula bua kuipaa miiya y’Efile Mukulu. Su tubalondo dingi bukunkushi bua Yehowa mu ino mianda, etuelela miabi. (Yesh. 48:17, 18; 1 Tim. 6:9, 10) Kushi mpaka, Yehowa atungunuka’nka na kufubisha bantu abalesha mpala yaye bua kuitupa bukunkushi mu nsaa ya mpombo ikata mpaa na patukatuele mu Kumunana kua Bipua Kinunu. Atukatungunuka’nka na kulonda buabua buludiki su? Abiketuikeela bibofule, su tukuete kulonda bukunkushi bua Yehowa kubanga binobino. Biabia, tuikaleyi atulondo bukunkushi bua Yehowa, mpa na kulonda buabua abutukila kui bantu badi mutuule bua kuitupasukila. (Yesh. 32:1, 2; Eb. 13:17) Na p’atukitshi biabia, atuikala na kabingilo ka kukulupila mui Mukunkushi eetu Yehowa, aye kuete kuitukunkusha bua kuitukatusha mu mbalo i masaku na buatudia kuikala muishinda aditutuala ku muwa wa ikalaika mu nsenga ipia. w24.02 25 ¶17-18

Mpoolo mutumibua baadi na muloo bua kufubila Yehowa, anka misuusa yooso ta bibaadi bibofule nya. Mpoolo baadi ende nyendo i bula, na yaya nyendo ta ibaadi ibofule misuusa yooso nya. Mu nyendo yaye, Mpoolo baadi ingi misuusa “mupete masaku pa muanda wa miela” na “masaku pa muanda wa ba ntomboshi.” Mpoolo baadi dingi mukupilue ngofu dingi efuku na beshikuanyi baaye. (2 Ko. 11:23-27) Na bakuabo bena Nkidishitu ta babaadi abamutumbula bua bibaadi ekitshisha bua’shi ebakuashe nya. (2 Ko. 10:10; Fid. 4:15) Nkinyi kibaadi kikuashe Mpoolo buadia kutungunuka mu mudimo wa Yehowa? Mpoolo baadi mulongie mianda i bungi pabitale bu muntu bua Yehowa mu Bifundue, na ku mianda yadi mumone aye nabene. Mpoolo bekeele mushinkamishe’shi Yehowa Efile mukulu mmu mufule. (Lom. 8:38, 39; Ef. 2:4, 5) N’aye namu bafikile mu kufula Yehowa ngofu. Mpoolo balesheshe kifulo kiaye bua Yehowa, “p’aye kufubila beselele na p’aye kutungunuka na kuibafubila.”​—Eb. 6:10. w23.07 9 ¶5-6

Bantu be bungi mbakumiine’shi bibuwa tuikale na bena mbulamatadi, na kukookiela ku ingi miiya yabo y’abeele. Nka baaba bantu bamune, ta bakuete kukookiela muiya aumueka bu ushi ululame, sunga autekie mianda i bungi. Bible amba’shi mbulamatadi ya bana ba bantu ikuete kufuisha makienga, muanda ikuete kukunkushibua na Satana, na kubashaala kapindi kapeela bua’shi ibutudibue yooso. (Mis. 110:5, 6; Mul. 8:9; Luk. 4:5, 6) Ngi buakinyi Bible etulungula dingi’shi: “Muntu oso atombokiela ba sha matalua atombokiela mpango y’Efile Mukulu.” Bua binobino, Yehowa mmutadiile’shi mbulamatadi ya bana ba bantu ikunkushe mianda. Atengiela’shi atue namu tui bakookiele. Biabia, abitungu “tupe muntu oso kiakia kimulombene” mu biabia bintu mui mpaa na, bitadi, kaneemo, na kukookiela. (Lom. 13:1-7) Ingi nsaa tui kumona muiya bu wi bubi, ushi ululame, na wi bukopo kukookiela. Anka, atukookiela Yehowa na etulungula’shi tukookiele be na matalua mu mianda yooso, su biabetutekie ta bikutuena na mayi aaye a kulonda.​—Bik. 5:29. w23.10 8 ¶9-10

Pa baadi Samesone mutandikue, bena Filistine babaadi abamunu muilo wa Isaleele na kuiwukiengiesha. (Bans. 13:1) Bena Isaleele babaadi abakiengie ngofu muanda wa bena Filistine babaadi ba ntomboshi. Yehowa baadi musangule Samesone buadia ‘kubanga kupaasha bena Isaleele kw’eyasa dya beena-Filistine.’ (Bans. 13:5) Bua kukita uno mudimo bibaadi abitungu’shi Samesone akulupile nka mui Yehowa. Dingi efuku, basalayi ba bena Filistine babaadi bukome, babafikile bua kukuata Samesone mu kibundi kia Lehi, kibaadi pangi mu Yuda. Bana balume bena Yuda babaadi na moo ukile, ngi abo nkuata kitshibilo kia kumupana ku maasa a beshikuanyi baabo. Muilo wa Samesone ubaadi umuanye mioshi ibidi ipia ya bipaaba, na abo nkumutuala kui bena Filistine. (Bans. 15:9-13) Biabia, ‘Kikudi kya Yehowa kibamupeele bukome’ ngi Samesone nkutshiba bipaaba. Kunyima, Samesone “bamwene lubangabanga lwa mpunda lubishi ê nkwilusangula nkwipâ” n’alo bena Filistine 1 000!​—Bans 15:14-16. w23.09 2 ¶3-4

Yehowa mmuleshe bi “mpango yaye ya losoo” ku kapeelakapeela mu Bible. Yehowa mmulombene kusangula mishindo ilekeenelekeene bua kulombasha mpango yaye na ‘bakitshîne bintu byoso bua kulombasha mpango yaye.’ (Nki. 16:4, EEM) Na dingi, bioso abikitaa Yehowa abikalaa kuanka bua ikalaika. Mpango ya Yehowa nkinyi? Na mianda kinyi yadi mushintuule bua’shi eyilombashe? Efile Mukulu balunguile bantu ba kumpala pabitale mpango yaaye. Yehowa bebalunguile’shi, “etandênei nufwime pa nsenga pooso, nwikale bu banfumu bâyo . . . nwikale’nyi na matalwa pe mishipa na toonyi, mpaa na tunyema toso atwikakâ pâshi.” (Kib. 1:28, EEM) Nsaa ibaadi Adama na Eeva batombokiele Yehowa, babaadi batueshe muluisho mu kifuko kia bantu, mpango ya Yehowa ta ngilombane dingi nya. Anka baadi mushintuule dingi eshinda, bua kulombasha mpango yaaye. Bipua bi bungi kumpala, baadi muate kitshibilo kia kutuula Bufumu muiyilu abukalombasha mpango yaaye ya ku kibangilo bua bantu na bua nsenga.​—Mat. 25:34. w23.10 20 ¶6-7

Yehowa e kuitukuasha bua’shi tutungunukie na kumufubila. Misuusa i bungi ta bikalaa bibofule nya, bikishekishe nsaa y’atuikitshisha bua kukambila kubofula kutakudi mafuku e bungi. Ingi misuusa kubofula kuetu kui kumueka bu nkalakashi i bukopo kukila ibapetele Mpiele mutumibua. Anka Yehowa e kuitupa bukome bua’shi ta tukookanga. (Mis. 94:18, 19) Bu kileshesho, ungi mukuetu mulume baadi muipaane mu kutambuka lusandi lua mulume na mulume bipua bi bungi kumpala kua’shi alongie bia binyibinyi. Baadi mushintulukie mu nshalelo aaye, na aye nkuikala na nshalelo muipushene na abiamba Bible. Sunga mbiabia, ingi nsaa kuete kuikitshisha bua kukambila nkalo i bubi. Nkinyi kimukuashe buadia kutungunuka na kufubila Yehowa? Apatuula’shi: “Yehowa etupeya bukome.” Akumbasha dingi’shi: “Ku bukuashi bua kikudi kia Yehowa. . . . Ne mulongie’shi mbibofule bua kutungunuka na kutambukila muishinda dia binyibinyi. . . . Yehowa mmufubishe sunga biandi mukutue kupuidika, na ki’atungunukaa na kumpa bukome.” w23.09 23 ¶12

Bakuetu ba nsongualume, abitungu kuikitshisha ngofu bua kufika bu bakuetu bena Nkidishitu banyingie mu kikudi. Abitungu kusangula bileshesho biodi mulombene kuambula, kutamisha ngobesha ya kunangushena, kuikala muntu a kukulupilua, kukimba mudimo ulombene nkukuasha mu nshalelo oobe na kuilumbuula bua midimo y’okekala nayo mu mafuku aafiki. P’opuandikisha bungi bua midimo y’okakitshi mu mafuku aafiki, ingi nsaa bi nkukalakasha. Anka we koobesha kuiyikita. Tentekiesha’shi Yehowa e kuanka bua nkukuasha. (Yesh. 41:10, 13) Bakuenu balume na bakashi mu kakongie, abakakukuasha n’abo namu. Su bolombasha kepatshila ka kuikala mulume muina Nkidishitu munyingie mu kikudi, nshalelo oobe akekala buwa na a muloo. Bakuetu ba nsongualume, tui be nufule bikata! Yehowa e nuelele miabi i bungi bu bianukuete kuikitshisha ngofu buanudia kufika balume bena Nkidishitu banyingie mu kikudi. w23.12 29 ¶19-20

Tutaluuleyi kino kileshesho. Puandikisha’shi nui mu kisangilo kampanda mu kisaka na bakuenu balume na bakashi. Nui na muloo wa kukisha nsaa pamune na, nubakuata mafoto mu kisaka. Bokuata mafoto abidi muanda ya kumpala ta ngitukie kalolo. Paapa toodi na mafoto asatu. Kadi mu imune ya ku anka, bomono’shi mukuenu mulume mmushingile. W’eyishimi, muanda we na mafoto abidi e buwa mui bantu booso ba mu kisaka mpaa na yawa mukuetu mulume abasepe. Binyibinyi, tui na mianda i buwa ayitukuasha buatudia kutentekiesha nsaa ibatudi bakishe na bakuetu balume na bakashi. Biabia, banda kupuandikisha’shi mukuetu mulume sunga mukashi baakula sunga kukita kintu kampanda ki bubi. Tui kukita naminyi na kiakia kintu ki bubi kiatudi bamone? Buakinyi tue mulombene kuikitshisha bua kuluba kiakia kintu ki bubi kiuwekeele mumone nka bu biodi mulombene kushima foto i bubi ya ku aa mafoto oodi nao? (Ef. 4:32) Tui balombene muanda atutentekiesha nsaa i bungi i buwa yatudibakishe naye pamune. Ino ngi mishindo ya mianda ayitungu’shi tulame na kuata na muulo. w23.11 12-13 ¶16-17

Kishima kia mu kina Greke kiabadi bafubishe pano pabitale nfuadilo a bana bakashi bena Nkidishitu, mmulombene kuikala a kaneemo e kulesha biuataa bangi na muulo na mueneno aabo. Tui na nfiedi bakuetu bakashi ba kifulo bua bia nukuete kulonda dino elango dia kuikala na kuipeelesha na nfuadilo e buwa. Lushinguluilo lua mianda nyi ndingi eyikashi aditungu’shi bakuetu boso bakashi bena Nkidishitu banyingie mu kikudi bedileshe. Lushinguluilo nkinyi? Nyi eyikashi di buwa, ngobesha ya kuuka ki buwa na ki bubi, na adikupa mushindo wa kukita mianda i buwa. Tutaluuleyi kileshesho kia Abigaile. Mulume aaye baadi muate bitshibilo bi bubi bibaadi bilombene kuipayisha kifuko kiaye kioso kishima. Abigaile bakitshine mianda kushi kunyengakana. Lushinguluilo luaye lubaadi lupaashe miuwa yabo boso. (1 Sam. 25:14-23, 32-35) N’atue namu lushinguluilo aluitukuashaa bua kuuka nsaa ya kuakula na nsaa ya kushaala baumiine. Na dingi, aluitukuashaa bua kuikala na nkatshinkatshi nsaa y’atulungula bangi bi mueneno eetu.​—1 Te. 4:11. w23.12 20 ¶8-9

Mpoolo mutumibua baadi mufunde bino bishima bioso bua kakongie kabaadi mu Loma. Bakuetu balume na bakashi babaadi mu Loma babaadi balongie bi bungi pabitale Yesu, abo nkulesha lukumiino, na abo nkufika bena Nkidishitu. Biabia, Efile Mukulu “baadi muibabadikie bu balulame ku muanda wa lukumiino,” na baadi muibeele muimu wa kikudi kiselele. (Lom. 5:1) Oolo, babaadi bapete lukulupilo lua binyibinyi, na lui buwa bukile. Kunyima kua mafuku Mpoolo baadi mufundile bena Nkidishitu bedibue muimu ba mu Efeso mukanda pabitale lukulupilo lubaabadi bebape kui Efile Mukulu. Mu lualua lukulupilo mubaadi mpaa na “kutambula bupianyi bua beselele.” (Ef. 1:18) Na dingi Mpoolo baadi muleshe’shi bena Kolose babaadi bakulupile efuto diabo. Bayitanyine lualua lukulupilo bu “lukulupilo luabadi benulamine muiyilu.” (Kol. 1:4, 5) Lukulupilo lua bena Nkidishitu bedibue muimu ndua’shi abakasanguka bua nkapeta muwa wa ikalaika muiyilu bua nkamunana pamune na Nkidishitu.​—1 Te. 4:13-17; Kbf. 20:6. w23.12 9 ¶4-5

Kishima kia ku kibangilo kiabadi baluule bu “kulama” kibaadi kishima kia basalayi, na babaadi abekifubisha bua kulesha basalayi babaadi abalama kibundi na kuikikaluila ku buluishi boso buabua.Bantu babaadi bashale mu kiakia kibundi, babaadi abepusha mu bulami na mu kukaluilua, muanda babaadi abauku’shi basalayi bakuete kuibalama. Mu mushindo umune, nsaa i butaale bu’Efile Mukulu abulama mashimba etu na binangu bietu, atuipusha mu butaale muanda autuuku’shi tui mu bulami. (Mis. 4:8) Nka bu muanda wa Aana, sunga muanda wetu wakutua kushintuluka mususa umune, tui kutungunuka na kupusha nka butaale. (1 Sam. 1:16-18) Na dingi nsaa y’atupusha butaale, abitubofuila buatudia kunangushena kalolo na kuata bitshibilo bi buwa. Nkinyi kiatudia kukita? Nsaa yodi mu mianda i bukopo, we kuteka “bulami.” Mu mushindo kinyi? Teka mpa na popusha butaale bu’Efile Mukulu. (Luk. 11:9; 1 Te. 5:17) Su we mu kipungo ki bukopo teka kushi kukooka, okapusha butaale bua Yehowa bi’abulama eshimba diobe na binangu biobe.​—Lom. 12:12. w24.01 21 ¶5-6

Bua kuikasha eshina dia Nshaye dia kishila, Yesu baadi munyingile mianda i bukopo bu kukayibua, na kudimbilua mianda. Baadi muukie’shi baadi akokiela Nshaye mu mianda yoso na takubaadi kintu su nkimune kibaadi kilombene kumukutshishua kuibikita. (Eb. 12:2) Baadi muukie dingi’shi Satana nyi baadi alu naye mu yaaya nsaa ya makienga. (Luk. 22:2-4; 23:33, 34) Satana baadi ashinkamisha mu binyibinyi’shi, akutshishua Yesu lulamato luaye; anka Satana baadi muidimbe ngofu! Yesu baadi muleshe’shi Satana nsha madimi na’shi Yehowa e na bafubi baye basha lulamato, abalama lulamato luabo mpa na mu bitompuanga bi bukopo! Okumiina kusankisha Nfumobe kuete kumunana su? Tungunuka na kutumbisha eshina dia Yehowa, na kukuasha bangi bua’shi baukie Efile etu a binyibinyi. Su bokitshi biabia, wambula Yesu. (1 Mp. 2:21) Nka bu Yesu, osankisha Yehowa na olesha pa butooka’shi, Satana diabulu muishikuanyi a Yehowa ngi nsulo ya madimi! w24.02 11-12 ¶11-13

Mu bipua bitano bishaale, bantu bakile pa mudiyo umune mbabatshishibue bu Tumonyi tua Yehowa. Nsaa yuelambula kui Yehowa obe nabene, bosangula kuikala bu mulongi a Yesu Nkidishitu na bokumiina kulombasha kikiebe ki’eshimba di’Efile Mukulu bu kintu ki na muulo ukata mu muwa oobe. Kuilambula bu muina Nkidishitu akutekie kinyi? Yesu bambile’shi: “Su muntu akiebe kundonda, epele aye nabene.” (Mat. 16:24) Kishima kia mu kiina Greke kiabadi bapatuule bu “kuipela obe nabene,” nkilombene kulesha dingi’shi “kuilungula obe nabene’shi nya.” Nka bu bangi bafubi ba Yehowa belambule, abitungu wakule’shi nya ku kintu kioso kilombene nkukutshishua bua kukita kikiebe ki’eshimba dia Yehowa. (2 Ko. 5:14, 15) Bino abipushisha’shi abitungu kuamba nya ku “bikitshino bia ku mbidi,” bu kutambuka lusandi. (Nga. 5:19-21; 1 Ko. 6:18) Kukookiela ku ino miiya kui nkuelela bukopo su? Nya, muanda we mufule Yehowa na we mushinkamishe’shi miiya yaye i kuanka bua buwa bobe.​—Mis. 119:97; Yesh. 48:17, 18. w24.03 2 ¶1; 3 ¶4

Yehowa apeeyaa baaba booso baadi mukumiine kikudi kiaye kiselele. (Mat. 12:18) Nangushena ku luno lukonko: ‘Naleshaa ingi ngikashi ya kikudi kiselele mu nshalelo ande su?’ Botundula’shi toodi na luishinko lui bungi kui bangi, kukila biboodi kumpala kua’shi oukie Yehowa su? P’onyiisha kuikala na ngikashi i buwa ya kikudi ki’Efile Mukulu, onyiisha kuikala na kishinkamiisho kia’shi Yehowa mmukukumiine! Yehowa afubishaa kineemo kia nkuulo kui baaba booso baadi mukumiine. (1 Ti. 2:5, 6) Kadi bi kuikala naminyi su muishimba dietu tui na mpaka ya’shi Yehowa ta mmuitukumiine, sunga tuekala babatshishibue na tui na lukumiino mu mulambu wa nkuulo? Tentekiesha’shi, t’abitungu tukulupile mu binangu bietu atue banabene, anka abitungu tukulupile mui Yehowa. Na dingi amonaa baaba booso be na lukumiino mu mulambu wa nkuulo bu bantu balulame ku meso kuaye, na ebalaa’shi akebelela miabi.​—Mis. 5:12; Lom. 3:26. w24.03 30 ¶15; 31 ¶17