Mueshi wa 12

Yehowa e na bukome bua kusangula bafue su? Oolo! Aye ‘Nsha-bukome booso.’ (Kibaf. 1:8) Biabia, aye e na bukome bui bungi bua kubutula muishikuanyi ooso yawa, mpaa na lufu. (1 Kod. 15:26) Kangi kabingilo ka buakinyi atuuku’shi Efile Mukulu e na ngobesha ya kusangula bafue nka’shi, e na binangu bishi na mfudiilo. Ayitanyinaa luenyenye looso muishina dialo. (Yesh. 40:26) Dingi, atentekieshaa booso batababafuile. (Yob. 14:13; Luk. 20:38) Mbibofule buadia kutentekiesha tu mianda tupeela kantu pa kantu, pabitale baaba bakasangula. Bino mbitale mapala aabo, bumuntu buabo, mianda ibabakitanga mu nshalelo aabo, na binangu biabo. Abipushika kalolo’shi, tui balombene kukumiina mu mulayilo wa Yehowa wa mu mafuku aafiki, ku muanda atuuku’shi e na bioso bibidi lukalo na bukome bua kuiwulombasha. Tutaleyi kangi kabingilo ka kukumiina mu mulayilo w’Efile Mukulu wa lusangukilo: Nka’shi Yehowa tababushiishe bantu. Mu mafuku a kala, Yehowa baadi mupe ndambo ya bantu babaadi na lulamato bukome, mpaa na Yesu bua kusangula bafue. w23.04 9-10 ¶7-9

Su atue banabene atuakula na kalolo na kupopeela, bantu mbalombene kukumiina kunyiisha kuituteemesha na kutungunuka na kuisamba neetu. Biabia su muntu akumiina penda nka’shi etolomone sunga kuitubepuula, t’abitungu’shi tutungunukie na muisambo nya. (Nki. 26:4) Biabia, bantu be uno mushindo ta mbalombene kuikala bungi nya, anka bantu be bungi abakumiina kuituteemesha.Mu binyibinyi atupete miabi i bungi, p’atulongo bia kuikala na kupopeela. Teka Yehowa akupe bukome boodi naabo lukalo nsaa y’ofumankana na nkonko ayikukalakasha, sunga penda ya kukoolomona. Tentekiesha’shi kupopeela koobe nkulombene nkukaluila bua kupela kuikakeena na bantu be na mmueneno muilekeene na oobe. Kupopeela koobe, na kutuusha ngaluulo na kaneemo kooso, kui kutakula abakuteemesha buabadia kushintuula mueneno aabo pabitutale na pabitale bia binyibinyi bia mu Bible. Ikalayi belumbuule bua kualuula pabitale nkumiino yenu, kadi “nuibikite na kupopeela na kanemo kakata.” (1 Mp. 3:15) Biabia, ikashaayi kupopeela bu bukome buenu! w23.09 19 ¶18-19

Tutaleyi mishindo inanka yatudi balombene kulesha luishinko. Wa kumpala, muntu sha luishinko t’akuataa nsungu bukidi. Ashalaa muwumiine, na t’aluula nsaa y’abamolomona sunga yadi muinyongole. (Efi. 34:6, EEM) Wa kabidi, muntu sha luishinko ashalaa muwumiine nsaa ya kuete kutengiela. Su kintu kampanda kiakita nsaa i bungi mu mushindo washatengielanga, muntu e na luishinko ekitshishaa bua kupela kufiita munda. (Mat. 18:26, 27) Wa kasatu, muntu e na luishinko t’akitaa mianda kushi kunangushena. Nsaa ya kunangushena bua bukata bua mudimo, na kuata mpango ya mushindo wadi mulombene kuiukita. Na dingi, akitaa wawa mudimo kalolo pa nsaa yaudi utekibue. Wa kananka, muntu e na luishinko ekitshishaa bua kunyingiila nkalakashi kushi kuidiladila. Na ekitshishaa bua kutungunuka na kufubila Yehowa na muloo. (Kol. 1:11) Bu biatudi bena Nkidishitu, abitungu tuleshe luishinko mu ino mishindo yooso. w23.08 20-21 ¶3-6

Kabingilo kakata ka kukaluila eshimba dietu dia mu kinfuanyi nka’shi, Yehowa atalulaa mashimba etu. Bino abipushisha’shi Yehowa t’atalaa biatumueneka ku meeso bu abimonaa bangi bantu nya, kadi auku kiatudi munda muetu binyibinyi. Su tubatungunuka na kulama dino elango mu binangu bietu, bino abitukuasha bua kuikala na muwa wa losoo. (Yo. 4:14) Na dingi ta tukakakibua na muikelo wi bubi na madimi a Satana na bantu baye be bubi mu ino nsenga yaye nya. (1 Yo. 5:18, 19) Bu biatunyisha kuifubuila kui Yehowa, kifulo kietu na kaneemo buaye abinyisha kutama. Kumuanda tátukumina kutapa Nshetu e muiyilu kuishimba, atukashikua kinangu kioso kia kukita mpekato. Marta mukuetu mukashi a mu Croatie, baadi mutompibue buadia kukita muluisho wa kutambuka lusandi, bafundile’shi: “Naadi musangane’shi abitungu nnangushene kalolo buandia kukatusha luabi na kupela kupeta muloo wa kapindi kapeela bua kukita muluisho. Anka kutshiina Yehowa kubaadi ku nkaluile.” Kutshiina Efile Mukulu akukitaa bino mushindo kinyi? Marta bakuile’shi baadi munangushene ngofu ku masaku alombene kutuka ku bitshibilo bi bubi. N’atue namu tui balombene kukita nka biabia. w23.06 20-21 ¶3-4

Yesu baadi muukie’shi, mpango ya Yehowa ngia’shi, ekashe eshina diaye dia kishila na kuidikaluila ku madimi oso abadi bedidimbile. Ngi buakinyi Nfumuetu balongieshe balongi baaye buabadia kuteka’shi: “Yaya etu e muiyilu, eshina diobe dikashue dia kishila.” (Mat. 6:9) Yesu baadi muukie’shi, uno nyi muanda ukata ukuete kufumankana na bipangua bioso. Takui kipangua sunga nkimune ki na binangu muiyilu na pa nsenga, kitakidi kikite mudimo wi bungi bua kuikasha eshina dia Yehowa bu dia kishila kukila Yesu. Pababakuatshile Yesu, beshikuanyi baaye babaadi bamufunde’shi bakitshi muluisho kinyi? Babambile’shi baadi asabuula Nshaye! Yesu baadi mupushe bubi ngofu muanda’shi, kudimbila eshina dia Nshaye dia kishila kubaadi bu muluisho ukata kukila yoso. Bibaadi bimukalakashe ngofu pabo kumudimbiila’shi mmukite kibeshi kia wawa mushindo. Kano nyi kabingilo kakata kabaadi kenyongoshe Yesu ngofu nsaa ibungi kumpala kuashi bamukuate.​—Luk. 22:41-44. w24.02 11 ¶11

Mu lubilo luetu bua nkapeta muwa wa ikalaika, abitungu tufule Yehowa na Yesu kukila biatudi bafule bena kifuko neetu. (Mat. 10:37) Bino t’abipushisha’shi tui balombene kubepuula mashito a mu bifuko bietu nya. Na ano mashito a mu kifuko kietu namu, nta ngalombene kuitukutshishua kusankisha Efile Mukulu na Nkidishitu nya. Mu kuilekeena na biabia, bua’shi Efile Mukulu na Yesu be tukumiine, abitungu tulombashe mashito eetu a mu kifuko. (1 Ti. 5:4, 8) Su tubakitshi biabia, atuikala na muloo. Ku nfudiilo a bioso Yehowa auku’shi kifuko ki kuikala na muloo su mulume na mukashi bekitshishena mianda na kifulo na kaneemo. Na dingi su baledi balambukisha bana na kifulo kioso, na bana namu bakookiela baledi baabo. (Ef. 5:33; 6:1, 4) Biekala mulume, mukashi, sunga muana, kulupila mu malango a binangu a mu Bible. Tokitanga kintu nka penda muanda wa’shi obe bomono’shi nkilulame, sunga pa muanda wa’shi bantu benuifunyishe mbalo yanudi bashaale abeyikitaa sunga abiamba basha binangu’shi kitayi. Fubisha mikanda yetu ayipatuula Bible kalolo. Ino mikanda ayilesha mushindo oodia kutumikila mayi a kulonda a mu Bible. w23.08 28 ¶6-7

Muana mukashi muina Nkidishitu abitungu ekale na ngobesha yadia kufubisha. Kui ingi ngobesha ilombene nsonguakashi kulonga pa ki mukinga bua’shi ikamukuashe mu nshalelo aaye. Bu kileshesho longa bia kufunda na kubadika kalolo. Mu bingi bipikua t’abamona kulongiesha muana mukashi kubadika na kufunda bu bi na muulo ukata nya. Aku namu ino ngobesha i na muulo kui muina Nkidishitu ooso. (1 Ti. 4:13) Biabia t’olekielanga kintu su nkimune ki’akukutshishua kulonga kubadika na kufunda kalolo. Abikakukuasha mushindo kinyi? Yaya ngobesha ngilombene nkukuasha bua kupeta mudimo na kuiufuba kalolo. Okekala mulongi e buwa na mulongieshi a Eyi di’Efile Mukulu e buwa, na kikile bioso okefubuila peepi na Yehowa p’obadika Eyi diaye na kuidinangushena.​—1 Ti. 4:15. w23.12 20 ¶10-11

Teka Yehowa bukuashi bua kunyingiila bitompuanga. Bu biatudi bantu bashi bapuidikie, atuikitshishaa misuusa yooso bua kupela kukita mianda i bubi. Satana kuete ekitshisha na muaye mooso bua kuikasha kuikitshisha kuetu bua kukita bi buwa bukopo. Mushindo umune wakuete kuikitshisha bua kuluisha binangu bietu, nkukiila mu kukisha kapapi mu mushindo wi bubi. Kukisha kapapi mu uno mushindo nkulombene kuusha binangu bietu na mianda i butete. Na biabia binangu bi bubi, mbilombene kuituikasha be butete ku meeso kua Yehowa na kuitutakula mu kukita miluisho ikata. (Mak. 7:21-23; Shak. 1:14, 15) Abitungu tutekie bukuashi bua Yehowa su atukumiina kukambila kitompuanga kia kukita muanda wi bubi. Yesu baadi muteemune uno muanda aulondo mu luteko luaye lua kileshesho amba’shi: “Twetufishanga mu kutompiibwa, anka etupaashe kwi mubi.” (Mat. 6:13) Yehowa akumiina kuitukuasha, anka abitungu tumutekie bukuashi. Abitungu dingi tukite mianda ipushene na nteko yeetu. w23.05 6-7 ¶15-17

Nsaa i bantu beyibakishene abataluula bi kipuano kiabo na kia Nshabo e muiyilu, abilesha’shi mbelumbuule bua kutaluula dino elango, na kunyima adibakuasha bua kuleka na kukambila nkalakashi ilombene kufuisha kifulo kiabo mu kubofula ku muntu na mukuabo. Bantu ba mu kikudi, abekitshishaa bua kuambula Yehowa, na kudima ngikashi bu ino: Kalolo, luishinko, na kuifuidishena lusa. (Ef. 4:32–5:1) Su beyibakishene balesha ino ngikashi, abikala bibabofuile buabadia kutamisha kifulo kiabo. Ungi mukuetu mukashi abetanyinaa bu Lena baadi mutuele ku bulunda akita bipua bikile pa 25, amba’shi: “Mbibofule bua kufula na kuneemeka muntu a mu kikudi.” Tutaleyi kileshesho kia mu Bible. Yehowa baadi musangule mulume na mukashi babaadia kuikala baledi ba Mesiya akafiki, na baadi musangule Mariya na Yosefe batuukile mu beekulu ba Davide. Buakinyi? Booso babidi, babaadi mu kipuano ki buwa na Yehowa, na Yehowa baadi muukie’shi mbalombene kunyingisha eyibakishi diabo bua kifulo kiabadi naaye. w23.05 21 ¶3-4

Yesu Mukata eetu mmpuidikie, anka bakuetu bakuete kufubisha bua kukunkusha kakongie ta mbapuidikie nya. Tui balombene kuikitshisha bua kuibakookiela, bikishekishe p’abetutekie bua kukita muanda watush’atukumiina kukita. Na Mpiele mutumiibua baadi eekoko bua kukookiela. Nsaa ibamulunguile muikeyilu bua kudia muita wa nyema ibaadi ayimueka bu i butete mu muiya wa Moyise. Mpiele bapelele kushi musuusa umune kadi misuusa isatu! (Bik. 10:9-16) Buakinyi? Buno buludiki bupia, tabubaadi na muulo kuadi. Ku lungi lupese, Mpoolo mutumibua baadi mukookiele nsaa ibaadi bena Nkidishitu babaapu kununupa ba mu Yelusalema, bamulungule buadia kuata bana balume bananka ende nabo mu ntempelo na etooshe pamune naabo muyile bipikua, bua kulesha’shi baadi aneemeka Muiya. Mpoolo baadi muukie’shi bena Nkidishitu ta be muushi mua muiya wa Moyise nya. Na tabaadi mukite kintu kibubi su nkimune. Sunga mbiabia Mpoolo “batshile baaba bantu, na nkuitoosha aye nabene muyile kipikua pamune nabo.” (Bik. 21:23, 24, 26) Pa muanda wa’shi Mpoolo baadi mukookiele buno buludiki, baadi mukuashe bua’shi buumune butungunukie munkatshi mua bena Nkidishitu.​—Lom. 14:19, 21. w23.10 10 ¶15-16

Pangi tue mulombene kunangushena kutshiina bu eyikashi di na muulo ukata kui ba kuuku be buwa nya. Anka, boso abakumiina kuikala mu kipuano ki buwa na Yehowa abitungu ‘bamutshiine.’ Sunga tuekala bapue kufubila Yehowa munda mua bipua bungi kinyi, abitungu ooso a kuatudi atungunukie na kutshiina Yehowa. Kadi kutshiina Efile Mukulu akupushisha kinyi? Muntu e na moo wibuwa wa Efile Mukulu, mumufule, na t’akumiina’shi kintu su nkimune kiluishe kipuano kiaye naaye. Yesu baadi na kuno “kutshina . . . ku’Efile Mukulu.” (Eb. 5:7) Tabaadi na moo wi bubi wa Yehowa nya. (Yesh. 11:2, 3) Pamutue pa biabia, baadi na kifulo kikata buaye, baadi mukumiine kumukookiela. (Yo. 14:21, 31) Nka bu Yesu, tui na kaneemo kakata na muloo bua Yehowa muanda, e na kifulo, e na binangu, kululama na bukome. Atuuku dingi’shi Yehowa mmuitufule, muanda abimukumaa kuishimba p’amono mushindo w’atukookiela buludiki buaye. Su tubakutua kukookiela Yehowa, abimutapa kuishimba ngofu, kadi su tubamukokiela abimupa muloo.​—Mis. 78:41; Nki. 27:11. w23.06 14 ¶1-2; 15 ¶5

Pa bapetele Nfumu Oziase matalua e bungi, baadi muiluankane’shi Yehowa ngi baadi Nsulo ya buabua bukome buaye na bupeta bibaadi nabio. Abitulongiesha kinyi? Abitungu tutentekieshe’shi Yehowa ngi kuete etupa bintu bioso bi buwa biatudi nabio na biatukuete kusangeela mu nshalelo eetu na mu mudimo waye. Pamutue pa kuitumbisha bua mianda yatukuete kulombasha, abitungu tutumbishe Yehowa bua ngobesha yadi muitupe bua kuibikita. (1 Ko. 4:7) Abitungu tuikale beyishe pa kuuka’shi tui bantu bashi bapuidikie na tui balombene kunyokibua. Ungi mukuetu mulume e na bipua bifikie ku 60 bafundile’shi: “Ne mulongie biansha kuiata na muloo ami nabene ukilekile nsaa y’abampa dinyoka bua bilubilo biande ami nabene biandi mukite. Anka nekitshishaa buandia kuibua na kutungunuka na kuenda kumpala.” Binyibinyi bi’shi, nsaa y’atutshinyi Yehowa na kushaala beyishe atue banabene, nshalelo eetu ekala buwa.​—Nki. 22:4. w23.09 10 ¶10-11

Bena Nkidishitu ba kumpala babaadi na lukalo na kunyingiila. Kukatusha kunyingiila kua nkalakashi ibaadi ayikuata bantu booso, abo babaadi abapete nyi bitompua bu biabadi bena Nkidishitu. Bebungi ba kuabadi babaadi ababinguabingua, kui bakata ba bipuilo bia mu Yudeya, na bakata ba mu Loma, mpaa na kui bena bifuko biabo abo banabene. (Mat. 10:21) Na babaadi abekitshisha bua kushinkamisha’shi, malambukishi a madimi a bantu basuumbule lukumiino abaadi aabuula tukongie, ta e na bukitshishi kuabadi. (Bik. 20:29, 30) Biabia baaba bena Nkidishitu babaadi banyingiile. (Kbf. 2:3) Mu mushindo kinyi? Babaadi abalondo bileshesho bia mu bifundue bia kunyingiila, bu kileshesho kia Yobo. (Yak. 5:10, 11) Babaadi abeele nteko, bua kupeta bukome bua kunyingiila. (Bik. 4:29-31) Na babaadi batuule binangu biabo nka ku bipeta bibuwa bibaadi abituuku mu kunyingiila kuabo. (Bik. 5:41) N’atue namu tui kunyingiila su atubadika efuku dioso bileshesho bia kunyingiila Muiyi di’Efile Mukulu, na mu mikanda yetu, na kunangushena ku bianka. w23.07 3 ¶5-6

Yehowa na Yesu ta baan’etusumbushene nya. Kunyima kua Mpiele mutumibua kupela Yesu, baadi muate kitshibilo ki na muulo. Badia kuleka sunga’shi badia kutungunuka na kuikala bu mulongi a Nkidishitu su? Yesu baadi musendeele Yehowa bua’shi lukumiino lua Mpiele ta lubofulanga. Yesu balunguile Mpiele pabitale lualua luteko na kumushinkamiisha’shi okapete dingi bukome bua kunyingisha bakuenu. (Luk. 22:31, 32) Biobino bibaadi bishinkamiishe Mpiele buadia kutungunuka na kutentekiesha mayi a Yesu! Nsaa y’atukiebe kuata kitshibilo ki na muulo ukata, Yehowa mmulombene kufubisha balami ba mikooko buabadia kuitushinkamiisha, kuitupa bukome buatudi nabo lukalo bua kushaala na lulamato. (Ef. 4:8, 11) Nka bibaadi Yehowa mupe Mpiele na bangi batumibua bintu bia ku mbidi, aketupasukila namu n’atue ku nkalo yetu ya bintu bia ku mbidi, su tubatuulu mudimo wa bulungudi pa mbalo ya kumpala mu nshalelo eetu. w23.09 24-25 ¶14-15

Yehowa amonaa mpaa na tu bikitshiino tupeela tua kalolo tu’atukitshiinaa bangi. Yehowa p’ataluulaa bianka ebimonaa bu mulambu na bu ebaasa dibatumupa diadi mulombene kufuta. Su kala boodi ofubu bu mufubi a midimo mu kakongie sunga bu mukulu, Yehowa atentekieshaa mufubo ooso oodi mukite kala, na kifulo kibaadi kikutakule bua kuiwukita. (1 Ko. 15:58) Kuete amono dingi kifulo ki’okuete kutungunuka na kulesha. Yehowa akumiina’shi atue booso tutamishe kifulo kietu muadi na kui bangi. Tui kunyingisha kifulo kietu bua Yehowa, pa kubadikanga Eyi diaye na kunangushena ku bi’atubadika, na kumulungulanga mianda yetu mu nteko nsaa yooso. Tui kutamisha kifulo kietu bua bakuetu balume na bakashi, pa kuibakuashanga na bintu abimueneka. Apatama kifulo kietu, atunyiisha kuifubuila kui Yehowa na kui kifuko kietu kia mu kikudi. Na atukasangeela kipuano ki buwa naabo bua losoo! w23.07 10 ¶11; 11 ¶13; 13 ¶18

Abitungu muina Nkidishitu ooso aate kitshibilo kia mushindo wadia kupasukila mbidi yaye aye nabene. Nsaa ayaata muina Nkidishitu kitshibilo kia kubukiibua, abitungu aneemekie miiya ya mu Bible ya kupela kuedibua mase na kukita lubuko. (Bik. 15:20; Nga. 5:19, 20) Kitshibilo kia kubukibua muntu nabene eatshilaa. Tui kuikala bashinkamishe atue banabene’shi kubukibua kampanda kui buwa sunga’shi kui bubi, anka abitungu tunemekie mueneno a bakuetu balume na bakashi, pabitale kitshibilo kiabo kia kubukibua. Pabitale uno muanda, abitungu tulamiine ino mianda ayilondo mu binangu bietu: (1) Nka penda Bufumu bu’Efile Mukulu ngi abuketupaasha bua losoo ku mikumbo yeetu. (Yesh. 33:24) (2) Abitungu muina Nkidishitu ooso “ekale mushinkamishe” kiakia kibuwa kuadi’ye nabene. (Lom. 14:5) (3) T’abitungu tutshibile bangi kiimu, sunga kuikala bu mabue a kikokoshi kumpala kuabo. (Lom. 14:13) (4) Bena Nkidishitu abalesha kifulo, abapushaa’shi buumune bua kakongie bui na muulo ukata kukila mueneno aabo.​—Lom. 14:15, 19, 20. w23.07 24 ¶15

We mufule Yehowa ngofu su? Kushi mpaka, we mumufule! Mu mafuku a kala, kui bantu be bungi babadi bafule Yehowa nka bu biodi mumufule namu. (Mis. 104:33, 34) Be bungi ba kuabadi babadi bekutshishe ingi miloo buabadia kumona bia kulanguila Yehowa ngofu. Bino nyi bibakitshine banazi ba mu Isalele a kala sunga “bantu belambule bua kukita mudimo wi pabuao. Banazi mbena Isalele babadi na kisumi, na babadi abesumina ingi miloo bua kufubila Yehowa mu mushindo wi pabuao. Muiya wa Moyise ubadi aupa bana balume na bana bakashi mushindo wa kuela mutshipo wi pabuao kui Yehowa, bua kusangula bua kuikala banazi munda mua kipungo kikampanda. (Mba. 6:1, 2) Pabadi muina Isalele akitshi mutshipo wa bu munazi, badi na kia kulonda mayi a kulonda ashibadi bangi bena Isalele abalondo. Biabia, buakinyi muina Isalele badi mulombene kusangula bua kuikala bu munazi? Kushi mpaka, muina Isalele badi akitshi biabia muanda badi mufule Yehowa ngofu, na badi na lutumbu bua miabi yadi mumuelele.​—Miy. 6:5; 16:17. w24.02 14 ¶1-2

Mu Bible, kishima kia mu kina Ebelu kiabadi baleshe bu “lulamato” sunga “kifulo kina lulamato,” akituusha kinangu kia lulamato lui na muloo, alulesha kifulo ki’abakambaa kufubisha bua kulesha kifulo ki’Efile Mukulu kui bafubi baaye. Mbafubishe dingi bino bishima bimune bua kulesha dingi kufulo kia bu bana na bana ki munkatshi mua bafubi b’Efile Mukulu. (2 Sam. 9:6, 7) Lulamato luetu ndulombene kufika lui bukopo munda a mafuku e bungi. Tutaleyi mushindo ubaadi ufikie lulamato lua Ndaniele lunyingie. Lulamato lua Ndaniele kui Yehowa, lubaadi lutompibue misuusa ibungi mu nshalelo aaye. Anka kimune kia ku bitompuanga bikata kibaadi mupete, kibamufikiile pa baadi na bipua bikile pa 90. Bakata ba muibalasa dia nfumu, babaadi bashikue Ndaniele na kukutua kunemeka Efile aaye abaadi alanguila. Ngi buakinyi babaadi badie lukuku lua kuipaa Ndaniele. Babaadi beele muiya ubaadi autungu’shi batompe Ndaniele, su ashaala na lulamato kui Efile aaye, sunga kui nfumu. Kioso kibadia kukita Ndaniele bua kulesha lulamato luaye kui nfumu, nyi nkuleka kuteka Yehowa munda a mafuku 30. Ndaniele baadi musangule bua kushaala na lulamato kui Yehowa.​—Nda. 6:12-15, 20-22. w23.08 5 ¶10-12

Yehowa akumiina’shi tutungunukie na kulesha bakuetu balume na bakashi kifulo. Su bakuetu bena Nkidishitu bakutua kuitukitshina mianda bu bena Nkidishitu, ta tuambanga musuusa nka umune’shi abakumiina kuitutapa ku mashimba, sunga’shi t’abakumiina kukita ki’abamba kui Yehowa’shi ki buwa. (Nki. 12:18) Efile Mukulu e na kifulo ki na lulamato kui bafubi baye sunga mbiabadi bakutue kupuidika. Sunga tuakita bilubilo, atungunukaa nka na kuikala kuuku eetu na t’etulaminaa nsungu. (Mis. 103:9) Bi na muulo ukata buatudia kuambula Nshetu afuilanaa lusa! (Ef. 4:32–5:1) Tentekiesha dingi’shi, bu bikuete kuifubuila nfudiilo abitungu tuikale pamune na bakuetu balume na bakashi. Tui balombene kutengiela’shi kubinguabingua akukekala bukopo bukile. Tui kuisangana atue banabene mu lukano muanda wa lukumiino luetu. Su bino biakakitshika, atukekala na lukalo lua bakuetu balume na bakashi ngofu mu kiakia kipindi.​—Nki. 17:17. w24.03 15-16 ¶6-7

Mu Bible mui mianda ya bangi ba nsongua babaadi befubuile kui Yehowa, babaadi bakuminyibue naye na abo nkuikala na nshalelo a muloo. Davide ngumune a kuabadi. Pa baadi ki nsongua, baadi musangule bua kuikala lupese lu’Efile Mukulu na kunyima aye nkufika nfumu sha lulamato. (1 Bf. 3:6; 9:4, 5; 14:8) P’olongo pabitale nshalelo a Davide, kileshesho kiaye nkilombene nkunyingisha bodia kufubila Yehowa na lulamato. We kuiatshila mpango pabitale kileshesho kia Maako na kia Timote. Bababangile kufubila Yehowa pa baabadi baki bakinga ngofu na babatungunukile na kufubila Yehowa na lulamato looso. Bitshibilo biabo bia kufubila Yehowa, bibaadi bikashe Yehowa na muloo. Mushindo osangula bia kufubisha nshalelo oobe kubanga binobino, aukekala na bukitshishi mu nshalelo oobe mu mafuku aafiki. Su b’okulupila mui Yehowa kushi kukulupila binangu biobe obe nabene, akakukuasha bua kuata bitshibilo bi buwa. We kuikala na muloo na nshalelo e buwa. Tentekiesha’shi, Yehowa ataa kiakia kiokuete omukitshiina na muulo. Ta kui kingi kintu ki buwa kukila kufubisha nshalelo eetu mu kufubila Nshetu e muiyilu, Yehowa. w23.09 13 ¶18-19

Mpoolo mutumibua baadi muukie’shi, bakuabo bena Nkidishitu balume na bakashi babaadi bakutue kupuidika. Bu kilesheho, mafuku apeela kunyima ku’aye kufika bu muina Nkidishitu, bakuetu balume na bakashi babaadi abamutshinyi. (Bik. 9:26) Kunyima, bangi babaadi abamupalakeesha mianda i bubi, bua kuluisha nkumo yaaye. (2 Ko. 10:10) Mpoolo baadi mumone mukulu a mu kakongie, aata kitshibilo ki bubi kibaadi kilombene kukokosha bangi. (Nga. 2:11, 12) Mpaa na winyi kuuku aaye a p’eshimba Maako, baadi mumutshoboloshe ngofu. (Bik. 15:37, 38) Mpoolo ta baadi mutadiile’shi muanda su ngumune wa ku ino mianda, umukutshishue kuibunga na baaba babaadi bamutape kuishimba nya. Anka baadi mulame nka mueneno e buwa a bakuabo balume na bakashi, na kutungunuka na kufubila Yehowa na lulamato looso. Nkinyi kibaadi kikuashe Mpoolo bua kutungunuka na kufuba? Mpoolo baadi mufule bakuabo balume na bakashi. Kifulo kia Mpoolo bua bakuabo, kibaadi kimukuashe buadia kutuula binangu biaye, nka ku ngikashi yabo i buwa. Kifulo kibaadi dingi kikuashe Mpoolo buadia kukita mianda iteemunyibue mu kifundue kia lelo. w24.03 15 ¶4-5

Mu Bible mui mianda ibungi ayilesha muulo wa kuikala na kupopeela. Tubande kuata kileshesho kia Isaake. Pa baadi mukashaale mu kipindi kia nsenga kia bena Filistine ku Gerare, ba kungishanyi naye baasha kiutu babaadi bashikie bitonko bia meema bibaadi bafubi ba Nshaye babundule. Pamutue a kulua naabo pa muanda wa bitonko biaye, Isaake bakatuishe nshibo yaye enda kula mu nkabundula bingi bitonko. (Kib. 26:12-18) Bena Filistine babamulondele nyi kuakua baata biabia bitonko bia meema bu biabo. Sunga mbiabia bioso Isaake baadi mukite mianda nka na butaale. (Kib. 26:19-25) Nkinyi kibaadi kimukuashe bua kushaala na kupopeela, sunga nsaa ibaadi bangi abamueneka’shi, mbaate kitshibilo kia kumoolomona? Mu binyibinyi baadi abekiela kileshesho kia baledi baaye, baadi mulongie bi bungi ku mishindo ibaadi Abalahama afuisha butaale. Na “binangu bibuwa na kupopeela” kua Sara.​—1 Mp. 3:4-6; Kib. 21:22-34. w23.09 15 ¶4

Yehowa batumine Muana aaye a kifulo eeleka pa nsenga bua kulongiesha bantu pabitale Bufumu na kuibapa muwa waye bu nkuulo, bua kuibakuula ku miluisho na lufu. Kunyima Yehowa baadi musangule Yesu, amutuula muiyilu bu Nfumu a Bufumu bu’Efile Mukulu. Mutue wa muanda ukata wa mu Bible wi’shi eshina dia Yehowa, adikalombasha mpango yaaye pa nsenga, ku bukuashi bua Bufumu buaye abukakunkushibua na Nkidishitu. Mpango ya Yehowa ta ngishintulukie, mmulee’shi mianda yooso ayikalombana nka bu bibaadi muakule. (Yesh. 46:10, 11; Eb. 6:17, 18) Mu kiakia kipungo, nsenga ayikaalulua bu mpaladiiso mupuidikie, bekulu ba Adama na Eeva balulame ‘abakeekala na mûwa mafuku oso.’ (Mis. 22:27, EEM) Kukatusha biabia, Yehowa e na ingi mpango mu binangu y’akiebe kulombasha, na mpango yaaye ikata ngia kubunga bipangua biaye bi na binangu bi muiyilu na bi pa nsenga mu buumune. Na bipangua bioso bi pa nsenga na bi muiyilu bi na lulamato, abikakookiela Yehowa bu Mukunkushi aabio. (Ef. 1:8-11) Biabia, uno muanda wi buwa bukile na awitukaanyisha pa kumona’shi Yehowa akalombasha mpango yaaye! w23.10 20 ¶7-8

Nsaa ibatuukile bena Yuda babaadi mu babilone bafika mu Yelusaleme, bababangile kupeta nkalakashi ya mushindo wa kudisha bifuko biabo. Na dingi Ampire a bena Perse na miilo ibaadi ibefunyishe, ibabangile kui babingabinga. Na bangi bibaadi bibeelele bukopo buabadia kuata mudimo wa kuibakuula Ntempelo a Yehowa na muulo mu nshaleelo aabo. Biabia, Yehowa baadi muibatumiine batemuki babidi, Angai na Sekadia buabadia kukankamika muilo wapeta dingi kisumi, kibaadi na bukitshishi bukata. (Ang. 1:1; Sek. 1:1) Kunyima kua bipua bifikie ku 50, baaba bena Yuda babaadi ku Yelusaleme, babaadi na lukalo lua kunyingishibua dingi. Esela mufundi a muiya sha kishima, baadi mukatukie ku babilone, enda ku Yelusaleme mu kunyingisha muilo w’Efile Mukulu buawudia kutuula lulanguilo lua Yehowa pa mbalo ya kumpala mu muwa wabo. (Esel. 7:1, 6) Nka bibaadi ano matemuki a Sekadia na Angai akuashe muilo w’Efile Mukulu wa kala buaudia kutungunuka na kukulupila mui Yehowa mu kipungo kia buluishi, ngalombene kuitukuasha natue namu lelo uno buatudia kukulupila mu bukuashi bua Yehowa sunga tuekala na nkalakashi mu nshalelo eetu.​—Nki. 22:19. w23.11 14-15 ¶2-3

Tui kulesha kifulo bua bakuetu balume na bakashi naminyi? Atukekala na mushindo wa “kutungunuka na kuinyingishena” nka su lusa luetutakula bua kuibikita. (1 Tes. 4:18) Tui kutungunuka na kuikala na kifulo ki bukopo ku muntu na muntu naminyi? Nka p’atufuila bakuetu balume na bakashi lusa ku bilubilo biabo sunga biekala bukopo bua kuibikita. Buakinyi bi na muulo bikishekishe lelo uno buatudia kuileshena kifulo ku muntu na muntu? Tala kabingilo k’abetupa kui Mpiele, amba’shi: “Nfudiilo a bintu bioso taadi pepi. Kukatusha biabia, . . . ikalayi na kifulo kikata munkatshi muenu.” (1 Mp. 4:7, 8) Bu bibanyiisha kuifubuila nfudiilo a uno ndumbuluilo peepi, tui kutengiela kinyi? Pa baadi Yesu akula na balongi baye, baadi mubadiile kuibalungula’shi: “Miilo yoso ayikenushikua bu’eshina diande.” (Mat. 24:9) Bua kunyingiila wawa mushikua, abitungu tulame buumune buetu. Su tubakitshi biabia, bukitshishi bua Satana bua kuituabuula abufudiila, muanda kifulo nkituanyiine kuamba’shi, “buumune bupuidikie.​—Fid. 2:1, 2. w23.11 13 ¶18-19

Bia binyibinyi bia muiyi di’Efile Mukulu bi na bukome bui bungi. P’atulongiesha bantu pabitale Yehowa na biakumiina, abitusha bipeta bi buwa bukile. Mu kukila kua mafuku, bantu tabekala dingi babuikidibue ku meso na madimi a Satana nya, ababanga mpa na kumona ngikashi i buwa ya Nshetu. Na abekala abasankila bukome bua Yehowa bushi na mpuilo. (Yesh. 40:26) Na abalongo bia kumukulupila muanda wa kululama kuaye kupuidikie. (Miy. 32:4) Abalongo mianda i bungi kukiila ku binangu biaye. (Yesh. 55:9; Lom. 11:33) Na abanyingishibua pa kuuka’shi, Efile Mukulu nyi nkifulo. (1 Yo. 4:8) Pabefubuila kui Yehowa, lukulupilo luabo lua kuikala na muwa wa loso bu bana b’Efile Mukulu, alufiki lua binyibinyi. Tui na kineemo kikata kia kukuasha bantu buabadia kuifubuila kui Nshetu! Su tubakitshi biabia, Yehowa etumono’shi ‘tukuete kufuba naye pamune.’​—1 Ko. 3:5. w24.02 12 ¶15

Su we mulongi a Bible, sunga’shi okuete kukushibua na baledi bekale Tumonyi tua Yehowa, okuete kunangushena namu pabitale kubatshishibua? Kino ngi kitshibilo ki buwa! Kumpala kua kubatshishibua, abitungu obande kuilambula obe nabene kui Yehowa. We kuilambula obe nabene kui Yehowa naminyi? Omulaa mu luteko’shi okamulanguila nka penda aye, na’shi okatuulu kikiebe ki’eshimba diaye pa mbalo ya kumpala mu nshalelo oobe. Na dingi, olaa Yehowa’shi okatungunuka na kumufula “n’eshimba diobe dioso, na anyima oobe oso, na binangu biobe bioso, na bukome bobe boso.” (Mak. 12:30) Kuilambula abekukitaa pa bupenka, penda obe nabene na Yehowa. Kadi kubatshishibua abekukitaa pa butooka; bua kulesha bantu abakumono’shi we mupue kuilambula. Kuilambula koobe nyi mmulayilo wi na muulo ukata. Abitungu’shi kepatshila koobe kekale ka kulombasha wawa mulayilo, na Yehowa namu atengiela’shi okite biabia.​—Mul. 5:4. w24.03 2 ¶2; 3 ¶5

Mayibakishi ooso e na nkalakashi. Bible mmuleshe patooka’shi bantu beyibakishene be na “nkalakashi mu mbidi yabo.” (1 Ko. 7:28) Buakinyi? Muanda eyibakishi, adibungaa bantu babidi bakutue kupuidika na be na ngikashi ilekeene ya ki’abakumiinaa na ki’abapelaa. Beyibakishene be kuikala na bipikua bilekeene sunga kukudila mu ma mbalo elekeene. Pangi bena eyibakishi be kuileshena ingi ngikashi, ya bashi beleshene kumpala kua kuiyibakishena. Ino mianda yooso i kutusha bilumbu. Pa mutue pa kuiwuka’shi muntu ooso e mu kilubilo na kukimba bia kupua muanda, bangi be muiyibakishi abesashishenaa. Bekufika mpaa na mukumona’shi kuilekeena sunga kuipeleena ngi akupu bilumbu biabo. Kadi be kuikala na muloo su belekeena sunga kuipeleena su? Nya. Yehowa alungula beyibakishene buabadia kuneemeka eyibakishi sunga winyi muntu aadi muiyibakishene naye amuikasha na nshalelo i bukopo. w24.03 16 ¶8; 17 ¶11

Kuilambula na kubatshishibua, bu bi’otungunuka na kulonga bi bungi na kutama mu kikudi, lukulupilo loobe lua kushaala mu Mpaladiiso pa nsenga bua losoo alutungunuka na kutama. (Eb. 5:13–6:1) Biabia, okamono kulombana kua mayi e mu mukanda wa Bena Loma 5:2-4. We mupue kupeta bitompuanga bi bungi, anka we muibinyingiile na bino mbikuashe bodia kukuminyibua n’Efile Mukulu. Muanda ouku’shi mmukufule na we mukuminyibue naye, binobino we na kabingilo kakata ka kutengiela bua kupeta biabia bintu biabadi betulee kui Efile Mukulu. Lukulupilo loobe lubanyiisha kunyinga kukila bi’aluikalanga kumpala. Lubekala lua binyibinyi, lua pa bupenka. Na bino, bi kuikala na bukitshishi bukata koodi. Mu ungi mpushisho, bi kuikala na bukitshishi mu mianda yooso ya mu nshalelo oobe na bi kushintula mushindo okitshiina kifuko kiobe mianda, mushindo wata bitshibilo, sunga mushindo ofubisha nsaa yobe. Mpoolo mutumibua akumbasha ungi muanda wi na muulo ukata pabitale lukulupilo lodi mupete kunyima koobe kukuminyibua n’Efile Mukulu. Akushinkamiisha’shi lukulupilo loobe alukalombana.​—Lom. 15:13. w23.12 12-13 ¶16-19

Nsaa y’atupete lukalakashi lui bukopo, bi’atuipushaa, na biatudi balombene kukita, binangu bietu bi kukutua kuikala bifukame. Tui balombene kuipusha nka bu’shi tubafudiila na tubakutua kia kukita. Mushindo kinyi awitukuashaa Yehowa nsaa y’atupusha mu binangu bietu’shi tui bafudiile ngofu? Yehowa etushinkamisha’shi, akekala neetu ta tui bia kuponeshua. Su buato buafumankana na kipapi kikata mu meema, abubanga kutenkatenka bi masaku mpese yoso. Bua’shi bulekie kutenkatenka, abitungu buikale na nyindo e bushito ku mpese yooso ibidi muushi mua meema. Kuno kuimika kua buato kui kukuasha buato bua’shi tabutenkatenkanga, na’shi bantu be muanka bepushe mu bulami, na luendo luabo luikale luibuwa. Na dingi maato e bungi aakambaa kuenda kumpala kalolo su ma nyindo aafubu kalolo. Mu mushindo umune, Yehowa etuikasha bashi bia kuponeshua, buatudia kutungunuka na kumufubila na lulamato mu kipungo kia nkalakashi i bukopo. w24.01 22 ¶7-8

P’opusha moo eyipushe obe nabene’shi nkinyi kiabadi bapue kukita kui Yehowa? Na onangushene ku bipangua biaye. Bu kileshesho, nsaa y’atutala kalolo mushindo w’abapasukilaa toonyi na bilongo kui Yehowa, biadi mupangie kushi ku kinfuanyi kiaye, na bishi na mushindo wa kumulanguila, abinyiisha kunyingisha lukulupilo luetu muadi lua’shi aketupasukila namu n’atue. (Mat. 6:25-32) Tutaleyi dingi ingi mianda yabadi bapue kukita kui Yehowa bua balanguidi baaye. We kulongiela ku bileshesho bia bantu ba mu Bible, babaadi baleshe lukumiino lui bukopo, sunga kuibadikila muanda wabadi bamone kui bafubi ba Yehowa ba ano eetu mafuku. Kukatusha biabia, nangushena mushindo wabadi bapue nkupasukila kui Yehowa. Mmushindo kinyi wadi mukukakie mu bia binyibinyi? (Yo. 6:44) Mmushindo kinyi wadi mupue kualuula ku nteko yoobe? (1 Yo. 5:14) Mmushindo kinyi wa kuete akukuasha efuku dioso kukiila ku mulambu wa nkuulo ya Muana aaye a kifulo?​—Ef. 1:7; Eb. 4:14-16. w24.01 4 ¶6; 7 ¶17