MIISAMBO YA BANGILO | BUFUMU BW’EFILE MUKULU—MBULOMBENE NKUKITSHINA KINYI?

Bufumu Bw’efile Mukulu—Abwikala na muulo kinyi koodi?

Kushi mpaka, ku bukwashi bwa ino miisambo ibatukatuka mu kumona, bomono shi Bufumu bw’Efile Mukulu bwi na muloo ukata kwi Batemwe ba Yehowa. Pangi, ingi myabi ayikafwisha Bufumu bw’Efile Mukulu ibatwisambila mu uno mwisambo ibakusankisha. Kadi, we mulombene kwiyipusha su yaya milayilo ayikalombana binyibinyi.

Bibuwa wekale na budimu bwa kupela kukumiina mwanda ooso okwete kupusha. (Myeele 14:15) Na dingi, budimu boobe mbulombene kwifwanena na bwa beena Beree ba kala.a Pababebalwingwile mukandu wibuwa bwa musango wa kumpala, Beena Beree abaadi bakumiine myanda ibabapushishe, anka kushi pa mwanda wa shi abaadi abakumiina kwiyipusha. Kadi, na budimu booso abaadi abataluula Bifundwe “bwa kumona su bibaadi byabya eyendo.” (Bikitshino 17:11) Mu angi mayi, Beena Beree abapwandikishanga mukandu wibuwa ubaabadi bapushe na bibaadi abyamba Bifundwe. Ndjo, abo nkushinkamisha shi mukandu wibuwa ubaadi autuukila mw’Eyi dy’Efile Mukulu binyibinyi.

Na muloo ooso, Batemwe ba Yehowa abakutekye bwashi okite bibaabadi bakite. Ku bukwashi bwa programe a kulongyesha bantu Bible ku mashibo aabo, tubakupa mushindo wa kupwandjikisha myanda ikumiine Batemwe ba Yehowa pabitale Bufumu bw’Efile Mukulu na kikwete kulongyesha Bible.

Kukatusha kulonga myanda itale Bufumu bw’Efile Mukulu, kulonga koobe kwa Bible nkulombene nkukwasha bwa kupeta myaluulo ku ingi nkonko ikata ya mu nshalelo.

Twi batuukye kunyi?
Bwakinyi ne na muwa?
Bwakinyi Efile Mukulu mmutadile makyenga?
Nkinyi akikitshikaa kunyima kwa lufu?
Nnsenga ayikabutudibwa su?
Mmushindo kinyi wa kwikala na nshalelo a muloo mu kifuko?

Kukatusha byabya, kulonga kwa Bible akukukwasha bwa “kwifubwila kwi Efile Mukulu.” (Jaake 4:8) Akupu, bu byokwete kwifubwila peepi n’Efile Mukulu, okamono shi Bufumu bw’Efile Mukulu mbulombene nkukitshina myanda ibuwa bukile—kushi penda bwa binobino kadi bwa looso. Yesu baadi mwakule mu luteko kwi Nshaye shi: “Muwa wa looso nguno, bakuwukye obe Efile Mukulu umune a eyendo, na yawa abotumine, Yesu Kidishitu.”—Yowano 17:3, Kilombeeno kipya 2009.

Batemwe ba Yehowa mbalombene kulonga noobe Bible ku bukwashi bwa uno mukanda.

Bwa kupeta muntu a kulonga noobe Bible buntu, ipusha umune a ku Batemwe ba Yehowa sunga kutwela mu www.jw.org/sop. (Tala mbalo ifunde shi, TEKA BWA KULONGA BIBLE mwisaki dyambangilo)

a Beree baadi musoko wa mu Masedoine a kala.

Akimutumu bwa kwata Bufumu bw’Efile Mukulu na muulo

Mafuku ashale, abekalanga batekye ka nsongwakashi ka bipwa 10 kabetanyina bu Folake bwa kufunda mukanda ku kalasa pa kina mwanda akyamba shi: “Kintu kyandji mukumiine ngofu pano pa nsenga.” Folake nkusangula bwa kulesha mu wawa mukanda bwakinyi akuminaa kulungula bangi pabitale Bufumu bw’Efile Mukulu.

Folake nkupushisha shi: “Bufumu bw’Efile Mukulu nyi guvernema a binyibinyi. Kadi shamwekaa, byabya twemukumbene kumumona—sunga ofwala manete!”

Folake nkutungunuka na kufunda pabitale myabi ayikafwisha buno Bufumu yakwete kutengyela. Bwa kulesha ingi myanda yabakapudisha kwi buno Bufumu, bafundjile shi: “Ne na kinyongwa kya kumona bantu bakutwe mashibo a kushala be mu bilayi” mpa na “bana bakinga bakwete kufwa bwa nsala mu bipindji bilekenelekene bya nsenga.” Akumbasha shi: “Ne na muloo dingi nsaa yambadika Yeeshaya 65:21.” Pabitale bantu abakashala mu kumunana kwa Bufumu bw’Efile Mukulu, yawa verse alaa shi: “Abebaka mashibo, bemushale; abakunu mvinyo na abadi bikuba byayo.”

Folake amba shi kwete kutengyela kipungo akikyebe Efile Mukulu, ku bukwashi bwa Bufumu bwaye, kukatusha mikumbo yooso. Mu wawa mukanda waye, baadi mutemune Bifumbulwe 21:4, alesha shi Efile Mukulu “akakumuna mpolo yooso ku meso aabo. Lufu talwikala kwanka dimo. Takwikala dimo sunga maalo, sunga kwidila, sunga mukumbo.” Baadi mufudiishe pa’ye kwamba shi kwakula “pabitale Yehowa na Bufumu bwaye nyi kintu kyadi mufule ngofu pano pa nsenga.” Eyendo, Bufumu bw’Efile Mukulu bwi na muloo ukata ngofu kwi kano ka nsongwakashi!