MIISAMBO YA MBANGILO | WE MULOMBEENE KUPUSHA BIBLE
Bwakinyi abitungu kupusha Bible?
“Bible nyi mukanda wabafubaa nao bikata mu bipwilo. Kadi kwi beena Chine, mmukanda wenyi na ushii na muulo.”—LIN a mu CHINE.
“Ntshi mulombeene kupusha mikanda iselele ya mu kipwilo kyande kya Hindu. Byabya mmushindo kinyi wandji mulombeene kupusha mukanda wiselele bu Bible?”—AMIT a mu INDE.
“Nanemekaa Bible bu mukanda wa kala na nemupushe’shi abeulu ngofu. Anka ta mwene Bible efuku su ndimune nya.”—YUMIKO a mu JAPON.
Mu nsenga ishima bantu bebungi abataa Bible na muulo ukata. Kadi, be kuuka myanda ipeela, sunga kukutwa kuuka myanda i mu Bible. Nyi bi bantu bebungi bashaale mu Asie, na bashaale mu maumbo ebungi mwi Bible mmupalakane kwi bantu bebungi.
Byabya, we kwiyipusha bino: ‘Bwakinyi abitungu netatshishe bwa kupusha Bible?’ Kushinguula myanda i mu uno mukanda wiselele nkulombeene nkukwasha ku ino myanda ayilondo:
Kupeta muloo na kusanka na byodi nabyo
Kupudisha myanda ya mu kifuko
Kukambila twinyongoshi
Kulongamisha kipwano kyoobe na bantu
Kufubisha makuta na binangu
Twate kileshesho kya Yoshiko mushaale mu Japon. Baadi eyipusha myanda i mu Bible aye nkwata kitshibilo kya kumwibadikila. Nkinyi kibaadi mupete? Akula’shi: “Bible mmunkwashe bwa kuuka bwakinyi ne na muwa na mumpe lukulupilo bwa mafuku aafiki, ntshikwete kwipusha dingi bu’mi shii na muulo nya.” Amit, atudi bateemune kunundu, baatshile kitshibilo kya kwilongyela Bible. Akula’shi: “Naadi mukeme ngofu, p’ami kumona’shi mu Bible mwi myanda ya mu nshalelo itale muntu ooso.”
Bible mmukwashe bantu midiyo mu nshaleelo aabo. Bwakinyi twe bya kumwilongyela bwa kumona byaadi mulombeene nkukwasha?