Su mwina dibaka nobe bakutwa lulamato

“Nadi mukyebe kufwa nsaa ibandungwile mulume ande’shi, akyebe kumpela bwashi akebakile mukashi mukinga. Bibadi bubi bukile, bikishekishe nsaa yantentekyesha byoso byandi mumukitshine.”—Maria, Éspagne.

“Pababadi bampele kwi mukashi ande, napushishe nka bu’mi bashimisha kintu kampanda mu mbidi yande. Lukulupilo lwetu, na mpàngo yetu byoso bibadi bilwile. Kwi mafuku anshinadi napusha kenyongoshi, kadi kunyima naadi mukalakashwe ngofu.”—Bill, Éspagne.

MUNTU mmulombene kukalakashwa ngofu su mwina dibaka naye bakutwa lulamato. Eyendo’shi, bangi bena dibaka mbate kitshibilo kya kufwila mwina dibaka nabo lusa na kwalusha kipwano kyabo.a Anka, sunga bena dibaka bashaala beyibakishene sunga kukutwa kushala beyibakishene, baaba bafumbule’shi be na dibaka nabo mbakutwe lulamato kwabadi abakalakashwaa ngofu. Bano bantu mbalombene kukila naminyi na twinyongoshi twabo?

VERSE YA MU BIBLE ILOMBENE NKUKWASHA

Kukatusha kenyongoshi, bena dibaka bebungi babadi balwishishe mbanyingishibwe na Bifundwe. Mbalongye’shi, Efile Mukulu kwete kumona mpolo yabo na etulu pa mbalo yabo.—Malakii 2:13-16.

“Pabamonanga mpombo iilekeene, naapentanga mulòo wa kunyingisha kwobe.”—Misambo 94:19.

Bill atentekyesha’shi, “panabadikile yawa verse, napushishe bu Yehowa kwete kutaadisha busungu bwande, anka abikitaa nshe bana sha lusa.”

“We na kishìma kwi ee na kishìma.”—Misambo 18:25.

Carmen sha mulume aaye badi mukutwe lulamato kwadi amba’shi: “Mulume ande tabadi na lulamato kwandi, anka nadi mukulupile ku lulamato lwa Yehowa. Ta mulombene kundekyeela nya.”

“Tanwikalanga mashimba kwiyilu pa kintu su nkimune, anka, nguba ooso, mu nteko, mu kwiyaaya na mu ntumbu, uukishaayi Efile Mukulu nkalo yeenu. Naa butaale bw’Efile Mukulu abo butabukile binangu byooso, abulama mashimba eenu na binangu byeenu munda mwa Yesu Kidishitu.”—Beena-Fidipe 4:6, 7.

Sasha amba’shi: “Nadi nabadika uno verse misusa ibungi na panadi natekye Efile Mukulu nsaa yoso, napetele kufukama mu nshalelo ande.”

Bano bantu boso babatutemuna, babadi bapushe bu balombene kufudiila ingi nsaa. Anka babadi bakulupile mwi Yehowa Efile Mukulu na bapeta bukome Mwiyi dyaaye. Bill amba bino: “Lukumino lwande ndumpe kepatshila mu muwa wande nsaa ibadi ayimweneka bintu byande byoso bu bibashimina. Sunga ingi nsaa nadi ‘natambukila mu lupongo lwa mufito,’ Efile Mukulu badi nami.”—Misambo 23:4.

a Bwa kuuka myanda itale kufwila mwina dibaka lusa sunga kukutwa kumufwila lusa, tala miisambo i mu Réveillez-vous! a mu 22/04/1999, “L’infidélité conjugale.”

Byabadi bakite kwi bangi bwa koobesha

Badika na onangushene pabitale byobadika.

Bill amba’shi: “Nabadikaa mukanda wa Yoobo akupu nabadika mukanda wa Misambo, nafundu verse oso amweneka’shi mmutale mwanda wandi nao. Ne mumone’shi bano bafundji ba Bible mbapete myanda na twinyongoshi twi mumune na twandi mupete.”

Ikala otemesha sunga kuyimba mizike bwashi onyingye.

Carmen atentekyesha’shi: “Panadi nakutwa tulo nadi natemesha mizike, bino bibadi abinyingisha ngofu.” Daniel amba’shi: “Nalongyele bya komba kindala na mizike ibadi inkwashe bwa kwikala mu kufukama.”

Lungula bangi byopusha.

Daniel amba’shi: “Nadi na bangi ba kuuku, na nadi n’esamba nabo efuku dyooso. Nebalungula binadi napusha pa kwibafundjila mikanda na kwisamba nabo. Byabya bibadi binkwashe.” Sasha amba’shi: “Bukwashi bwa kifuko kyande bubadi na muulo. Nyin’ami badi nka kwanka bwande. Badi antemesha nsaa yoso inadi namulungula byampusha. Nsha’mi badi munkwashe bwandya kupusha’shi mbanfule na’shi ne mu kufukama, badi dingi munkwashe bwa kupetuula kufukama.”

Ikala otekye kushi kukooka.

Carmen amba’shi: “Nadi natekye nsaa yooso, napushishe’shi Efile Mukulu e nka pepi nami, antemesha, na kunkwasha. Mu aa mafuku a nkalakashi, nadi mwifubwile pepi n’Efile Mukulu.”