Mbibofule Bodya Kwikala Na Muloo Lelo Uno
MUWA ushi na makyenga, mikumbo, bununu, na lufu—wekala nao mu mafuku e kumpala! Anka bwa binobino bantu boso bena myanda na nkalakashi ibungi. Kwi kintu kikumbene nkukwasha? Bible mulombene nkukwasha bodya kupeta muloo mu nshalelo oobe. Banda kutala ingi nkalakashi na mushindo ulombene nkukwasha Bible.
KUSANKA NA BYODI NABYO
Elango dya mu Bible: “Mwikeelo wenu wikale kushii lwabi lwa mmono, nwikale basangale na kiakia kianudi nakio.” —Beena-Ebelu 13:5, Kilombeeno kipya 2014.
Lelo uno kwi bintu bibungi byabamba kwi bantu’shi abitungu twikale nabyo. Anka Bible amba’shi twi bakumbene “kusanka na byatudi nabyo.” Naminyi?
Leka “kifulo kya nfwalanga” Bantu mbalombene kukita kintu kampanda, sunga kyalwisha mbidi, kifuko, bukuuku, mwikelo, sunga kinemo kyabo—byoso bwa “kifulo kya nfwalanga.” (1 Timote 6:10) Mwanda ukile bukata! Ku nfudiilo, basha kifulo kya bupeta “t’abebupetela muloo.”—Mulungudi 5:10, NWT.
Bantu be na muulo kukila bintu.Eyendo, bintu byatuulu bi kwitukwasha. Anka bintu ta mbilombene kwitufula sunga kwitusangela; anka bantu nyi balombene kwibikita. Kwikala na “kuuku a binyibinyi” nkulombene kwitukwasha bwa kusanka na byatudi nabyo mu muwa wetu.—Nkindji 17:17.
TWIKWIKALA NA NSHALELO EBUWA LELO UNO PA KULONDA MALANGO A MU BIBILE
NYINGIILA NSAA YODI NA MUKUMBO
Elango dya mu Bible: “Muloo wa mwishimba aupashaa muntu.”—Nkindji 17:22.
Nka abikalaa bwanga, muloo ngulombene kwitukwasha bwa kunyingiila mukumbo. Kadi twi kupeta muloo naminyi nsaa yatudi na mukumbo?
Ikala na lutumbu. Su twekala atunangushena penda ku nkalakashi yetu, atwikala atumono “mafuku ooso” bu a mpombo. (Nkindji 15:15) Kadi, Bible amba’shi: “Ikaalaayi na lutumbu.” (Beena-Kolose 3:15) Longa bya kwikala na lutumbu mpa na bwa tu bintu tupeela. Nsembwe ya nguba, kapapi kebuwa, tusepo twa muntu oodi mufule—bino byoso bi kulumbuula nshalelo oobe.
Kitshina bangi myanda. Sunga wekala na maladi, uuka’shi, “mwabi wa mu kupaana ngukile wa mu kupeebwa.” (Bikitshino 20:35) Nsaa i bangi abetutumbula bwa byatwibakitshiina, atupusha muloo ukata na tatukamba kunangushena ku nkalakashi yetu nya. Twi balombene kwikala na muloo mu nshalelo nsaa yatukwasha bangi.
NYINGISHA DIBAKA DYOBE
Elango dya mu Bible: ‘Shinguula kikile byooso ku buuwa.’—Beena-Fidipe 1:10.
Mulume na mukashi abakisha nsaa ipela pamune mbakumbene kulwisha kipwano kyabo. Mulume na mukashi bibuwa baate dibaka dyabo bu kintu ki na muulo ukata mu nshalelo aabo.
Kitayi myanda pamune. Pamutwe pa kukita myanda bupenka, bwakinyi tanwi balombene kwata mpàngo ya kwiyikita pamune? Bible amba’shi: “Bantu babidi be na muloo ukile wa muntu umunenka.” (Mulungudi 4:9) Pamune, nwi balombene kuteeka kidibwa, kudya pamune, sunga kwasha masha pamune.
Lesha’shi we mufule mwina dibaka nobe. Bible anyingisha mulume na mukashi bwabadya kwifulena na kwinemekyeshena. (Beena-Efeso 5:28, 33) Tusepo twa muloo, kwikamena bipa na kifulo, sunga kwipeshena tuntu nkulombene kunyingisha dibaka ngofu. Eyendo, bena dibaka ta mbalombene kukita myanda ya kifulo na muntu shii mulume sunga mukashi aabo.—Beena-Ebelu 13:4.