Mikanda yatudi bafubishe mu Programe a bisangilo bya Bwina Kidishitu na mudimo wetu
LUBINGO LWA 3-9/12
BUPETA BWA MWIYI DY’EFILE MUKULU | BIKITSHINO 9-11
“Mulwishi mukata bafiki mulungudi a kishima”
bt-F 60 ¶1-2
Kakongye “kabatwelele mu kipungo kya kufukama”
KISAKA kya bantu kibefubwila pabwipi na Damase, ki na binangu bibubi byabakimbi nkalombasha kwakwa. Bakwete kukana bwa nkatusha balongi ba Yesu mu mashibo aabo, kwibakwata, kwibayisha milongo na kwibatwala ku Yelusaleeme bwabadya nkasamba kumpala kwa beena Sanendrine.
2 Mukata a kisaka abetamina bu Soolo badi mupwe kusemuna mase a muntu ku maboko kwaye. Mwanda badi mukumiine bwabadya kwaasa Etshyene mulongi a Yesu mabwe mpa na ku lufu. (Bikitshino 7:57–8:1) Sunga byekala shi abadi bakyengeshe balongi ba Yesu babadi mu Yelusaleeme, Soolo bakimbile nka bya kutusha kafutakanyi bwa kukyengyesha bangi abadi mu angi ma mbalo. Badi akimbi bwadya kushimisha kisaka kibabadi abetamina bu “Eshinda.”—Bikitshino 9:1, 2; tala kashibo akamba shi: “Le mandat de Saul à damas,” mwisaki 61.
Ikala okumiina bwa’shi Yehowa ekale Mbuufi oobe
4 Yehowa tamonaa bantu mu kipaso kyatwibamonaa’twe nya. Anka, aye atalaa eshimba dya muntu ooso a kwatudi kalolo. (Badika 1 Samwele 16:7b.) Yehowa baadi muleeshe bino nsaa ibaadi mutuule kakongye ka beena Kidishitu. Mmwikakile na kukakila Mwan’aye bantu bebungi na bangi ba munkatshi mwabo babaadi bu bantu bashii na muulo. (Yowano 6:44) Bu kileshesho, Mpoolo baadi Mufadisee n’eshina dya bu Soolo, muntu e na “kasaabu ka biin’Efile byooso, mulwishi, na sha-kifita.” (1 Timote 1:13) Anka Yehowa pabaadi mutalule eshimba dya Soolo tabaadi mumumone bu ema dishii bya kubumba nya. (Nkindji 17:3) Anka, Yehowa bamwene’shi e bya kubumba Soolo bu “kyaamo kya mufubo” na kumwikasha bu mulungudi “kumpala kwa bisamba bya bashii-bakumiine, kwa banfumu na kwa beena-Isaleele.” (Bikitshino 9:15) Dingi’nyi Yehowa mmusangule bangi abakumina’shi ebabumbe bu “kintu . . . kya muulo ukata.” Munkatshi mwabo mwi babaadi bankodi’a malwa, bankitshishi ba bubi, na ba ngifi. (Beena-Looma 9:21; 1 Beena-Kodinda 6:9-11) Kunyima kwa’bo kulonga Bible, babaadi banyingishe lukumiino lwabo mwi Yehowa na kumutadiila bwa’shi ebabumbe.
bt-F 64 ¶15
Kakongye “kabatwelele mu kipungo kya kufukama”
15 Banda kunangushena bibadi abikaanya bantu, bibabadi batapikye ku mashimba na nsungu pabadi apalongyesha Soolo pabitale Yesu mu bitumbwilo! Abadi abeyipusha shi: “Uno nyi muntu ekeele akyengesha bantu be mu Yelusaleeme abatumbishanga eshina dyaye?”. (Bikishino 9:21) Pabadi ebapatulwila bibadi mushintule binangu pabitale Yesu, Soolo badi ‘ebashinkamiisha shi Yesu baadi binyibinyi Kidishitu.’ (Bikitshino 9:22) Anka bangi t’abakuminaa sunga bebalungula myanda byayidi. Ntambilombene kushintuula muntu e na bipikwa bya bankabwa sunga e na kwitatula. Anka Soolo tabadi mutshobolokye nya.
Kukimbuula bwa kupeta mabwe a muulo a mu kikudi
bt-F 60-61 ¶5-6
Kakongye “kabatwelele mu kipungo kya kufukama”
5 Pabadi Yesu mwimikye Soolo mwishinda dya ku Damase, tabadi mumwipushe shi: “Bwakinyi okwete kukyengesha balongi bande?” Kadi nka byatwibimonanga kumpala, bambile shi: “Bwakinyi ombingabinga?” (Bikitshino 9:4) Eyendo, Yesu badi apusha makyenga abadi nao balongi baye.—Mat. 25:34-40, 45.
6 Su okwete kukyengyeshibwa mwanda wa lukumiino loobe mwi Kidishitu, ikala mushinkamishe shi Yehowa na Yesu abauku lukalashi loobe. (Mat. 10:22, 28-31) Pangi be kukutwa nkupudisha makyenga oobe. Anka tentekyesha shi, Yesu badi atala bibadi Soolo mukwatshishene lufu lwa Etshyene, na badi amono bibadi Soolo mukyengeshe balongi baye mu Yelusaleeme. (Bikitshino 8:3) Kadi Yesu tabadi mwibapwile mwanda wabo mu yaya nsaa nya. Sunga mbyabya, Yehowa ku bukwashi bwa Kidishitu, badi mupe Etshyene na bangi balongi bukome bwa kushala na lulamato.
nwtsty ma note aakwasha bwa kwilongyela mu Bik 10:6
Simone, muntu atelaa misokya: Muntu atelaa misokya badi afubu na bikomba bya nyema, badi afubisha lime bwa kukatusha tu misamba tooso na mwimu. Akupu badi alumbuula kyakya kikoba bwakidya kufika cuir a kukita nakyo bintu bya cuir. Mudimo wa kukita misokya ubadi autusha eshiko di bubi na ubatunganga kwikala na meema e bungi, byabya nyi bibatakwile Simone bwa kushaala pabwipi na kalunga, bibadi pangi pabwipi na Yopee. Muyile Mwiya wa Moyise, abadi abamono muntu afubu na bitanda bya nyema bu e butete. (Lev 5:2; 11:39) Byabya, bena Yuuda bebungi abadi ababepuula muntu atelaa misokya na kupela kufikila kwaye. Pa mwanda wa byabya, mukanda wa myanda ya kulangwila wa bena Yuuda wabetamina bu Talmud ubadi aulesha mudimo wa nkitshishi a misokya bu ushadile pe wa muntu asangulaa tufi twa nyema. Nyi bwakinyi Mpyeele tabadi mutadiile ntondo bwayidya kumukutshisha bwa kushala kwa Simone nya. Binangu bibuwa bya Mpyeele mu uno mwanda bibamukwashishe bwa mudimo ubadi na kya kufika kunyima wa nkatusha bu kamonyi mu nshibo ya muntu a bingi bisamba. Bangi bafundji abataluula kishima kya mu kiina Greke kya “nkitshishi a misokya” (byr·seusʹ) bu eshina dingi dya Simone.
LUBINGO LWA 10-16/12
BUPETA BWA MWIYI DY’EFILE MUKULU | BIKITSHINO 12-14
“Barnabase na Mpoolo abekasha balongi mu maumbo e kula”
bt-F 86 ¶4
“Baule na muloo na kikudi kiselele”
4 Kadi bwakinyi kikudi kiselele kibadi kisangule nka Barnabase na Soolo bwabadya kwikala pa bwabo bwa kukita “mufubo”? (Bikitshino 13:2) Bible t’ebileesha nya. Atuuku shi kikudi kiselele kibadi kikunkushe bano bantu babadi basangule. Takwi kintu akilesha shi batemuki na balambukishi mu Atyoshe babaadi bapele kyakya kitshibilo nya. Anka, abaadi bakwatshishene wawa mudimo. Banda kunangushena bibadi Barnabase na Soolo na kya kupusha pabadi bakwabo ba mu kikudi bashii na lwabi ‘beshidikye na kuteka na kwibatenteka maasa pa kwilekeena nabo.’ (Bikitshino 13:3) Abitungu tukwatshishene namu baba abapete mashito mu ndumbulwilo, pamune na balume abatuku bu bakunkushi. Pamutwe wa kwikala na lwabi bwa baaba abapete aa mashito, abitungu twikale ‘atwibanemeka bikile bukata na kwibafula kifulo kikile bukata pa mwanda wa mufubo wabo.’—1 Tes. 5:13.
bt-F 95 ¶5
“Babakulanga na mashimba anyingye na matalwa aafiki kwi Yehowa”
5 Mpoolo na Barnabase ababandjile kwimana mu Ikonyume, mu kyakya kibundji mubadi bantu be na bipikwa bya bena Greke na kibadi kimune kya ku bibundji bikata bya mu Looma mu beena Galate. Mu kino kibundji, mubadi bena Yuuda bebungi abadi na kineemo na bantu ba bingi bisamba. Muyile bipikwa byabo, Mpoolo na Barnabase abatwelele mu kitumbwilo bwa kubanga kulambukisha. (Bikishino 13:5, 14) Abadi “abakula mu kipaso kibakumine beena Yuuda na beena Greke bebungi abadi bakumiine.”—Bikitshino 14:1.
Fubila Efile Mukulu na bulamate sunga mu “mpombo ibungi”
4 Abo abakatuka ku Derbee, Mpoolo na Barnabee “babalukiile dimo ku Lystre, ku Ikonyume, na ku Antyoshe. Babaadi abanyingisha balongi ku mashimba, dingi babaadi abebakankamika bwabadya kwikala na katshintshi mu lukumiino. Babaadi abamba shi: ‘Twi na kya kukidila mu mpombo ibungi bwa kutwela mu Bufumu bw’Efile Mukulu.’ ” (Bik. 14:21, 22) Kya kumpala, uno mwanda aupushika bu upya. Akupu, kinangu kya kukidila mu “mpombo ibungi” akimweneka bu akitusha kinyongwa pamutwe pa kukankamika. Byabya, mmushindo kinyi ubaadi Mpoolo na Barnabee ‘banyingishe balongi’ na mukandu aulesha shi abakyebe kupeta mpombo ibungi?
5 Twibalombene kupeta lwalulo su twatala kalolo mayi a Mpoolo. Ta mmwakule penda shi: “Twi na kya kukambila mpombo ibungi.” Kadi akula shi: “Twi na kya kukidila mu mpombo ibungi, bwa kutwela mu Bufumu bw’Efile Mukulu.” Byabya Mpoolo baadi munyingishe balongi pa kulesha bipeta bibuwa bilombene kutukila ku lukumiino lwabo. Buno bwedi ta mmwanda wa kupwandikisha bisumanga nya. Oolo, Yesu bakwile shi: “Yaawa akanyingi nyaa na ku nfudiilo, yawa akapanda.”—Mat. 10:22.
Kukimbuula bwa kupeta mabwe a muulo a mu kikudi
w08-F 15/5 32 ¶7
Myanda ikata ya mu mukanda wa Bikitshino
12:21-23; 14:14-18. Erode badi mukumine ntumbo ibadi ilombanyine penda kwi Efile Mukulu nabene. Bibadi kwilekena kukata na bibakitshine Mpoolo na Barnabase musango umune pa kupela kukumiina ntumbo na kineemo kishibadi kibalombeene! Tatukimbanga kupeta ntumbo bwa mwanda ooso watudi balombene kukita mu mudimo wa Yehowa.
nwtsty ma note aakwasha bwa kwilongyela mu Bik 13:9
Soolo, ayitaminyibwa dingi bu Mpoolo: Kubanga binobino, Soolo ababanga kumwitamina bu Mpoolo. Mpoolo mutumiibwa badi mutandjikwe mwina Ebelu na matalwa a Beena Looma. (Bik 22:27, 28; Fid 3:5) Nyi abimweneka shi kubanga ku bukinga badi na mashina ooso abidi, dya mu kiina Ebelu dya bu Soolo na dya bwina Looma dya bu Mpoolo. Tabibadi mwanda wa kukaanya kwi beena Yuuda ba aa mafuku, bikishekishe kwi baba abadi paasha pa Isaleele bwa kwikala na mashina abidi. (Bik 12:12; 13:1) Abimweneka shi bangi ba ku bakwabo na Mpoolo abadi na mashina a beena Looma na beena Greke. (Lom 16:7, 21) Bu bibadi “mutumiibwa a ba maumbo,” Mpoolo bapeelwe mudimo wa kulungula mukandu wibuwa kwi bantu ba bingi bisamba. (Lom 11:13) Abimweneka shi batshile kitshibilo kya kufubisha eshina dya bwina Looma; bamwene pangi shi byabya bi kwikala bikuminyibwe. (Bik 9:15; Gal 2:7, 8) Bangi abapwandjikisha shi baatshile eshina dya bwina Looma bwa kupa Sergyuse Pauluse kineemo badi n’eshina difwanene na dyaye, nyi bwakinyi Mpoolo balamine dyadya eshina sunga kunyima kwa kukatuka ku Shiipre. Bangi abapwandjikisha shi Mpoolo bapelele kufubisha eshina dyaye dya kiina Ebelu mwanda bibabadi abeditamina mu kiina Greke bibadi bifwanene na kishima kya mu kiina Greke akilesha muntu (sunga nyema) atambuka na kwisadika.—Tala ma note aakwasha bwa kwilongyela mu mukanda wa Bik 7:58.
Mpoolo: Mu Bifundwe bya kiina Greke, eshina Pauʹlos, adifiki mu Latin bu Paulus adipatuula “Mukinga; sunga kapeela,” mbedifubishe misango 157 pabakyebe kwisambila Mpoolo na musango umune pabesambila mutontshi a ku Shiipre abetamina bu Sergyuse Pauluse.—Bik 13:7.
LUBINGO LWA 17-23
BUPETA BWA MWIYI DY’EFILE MUKULU | BIKITSHINO 15-16
“Kitshibilo kya mu buumune muyile Eyi dy’Efile Mukulu”
bt-F 102-103 ¶8
“Kubatukile kwikakeena kukata”
8 Luka badi mukumbashe shi: “P’abebwele eunga dikata na mpaka ikile pankatshi pa Mpoolo na Barnabase na’bo, [bakulu] babakimbile shi Mpoolo na Barnabase na bangi ba munkatshi mwabo [bana balume] bakaamine ku Yelusaleeme kwi batumiibwa na bakulu bwa uno mwanda.” (Bikitshino 15:2) “Eunga dikata na mpaka” ibadi kwanka ayilesha shi bantu abakimbanga nka kulamata ku byabakula bwashi bangi bebikumiine, nyi bwakinyi bibadi bukopo bwashi kakongye ka mu Antyoshe keupudishe. Pa mwanda wa kukimba kufukama na butaale, kakongye kabaatshile mpàngo ya binangu bwa kwenda na wawa mwanda kwi “batumiibwa na bakulu ku Yelusaleeme” abo abadi kasaka ka bakunkushi bakulu. Nkinyi kyatudya kulongyela kwi bakulu ba mu Antyoshe?
w12-F 15/1 5 ¶6-7
Bena Kidishitu ba binyibinyi abanemaka Eyi dy’Efile Mukulu
6 Kifundwe kibakwashile bwa kupwa uno mwanda kibadi kya mukanda wa Amose 9:11, 12. Muyile byabadi bekiteemune mu Bikitshino 15:16, 17, akyakula shi: “Naafiki mu kwibakuula nshibo ya Daavide ibaadi ipone. Bibunda biikushaale, neebiibakuula, nneyiimikye dimo. Byatshiile paapa, bamo bantu bashaale abakimbi Yehowa pamune na bisamba byooso byuudikwe eshina dyande. Byaabya ngi bibambile Yehowa.”
7 ‘Anka,’ ungi muntu e kupela shi, ‘kyakya kifundwe t’akyakula shi tabibadi na muulo bwa balangwidi ba bingi bisamba kusadiibwa.’ Nkyeeyendo; anka, beena Kidishitu bena Yuuda abadya kwibipusha. Mwanda tababadi abamono bantu ba bingi bisamba bashii basadiibwe bu ‘bantu ba ingi miilo’ anka abebamonanga bu bakwabo. (Efi. 12:48, 49) Bu kileshesho, muyile ungi Bible a Bagster a Septente, mbafunde mukanda wa Estere 8:17 shi: “Bantu ba bingi bisamba bebungi abadi basadiibwe, abo nkufika bena Yuuda.” Byabya, nsaa ibadi Bifundwe bitemukye shi bamo bantu bashale ba mu nshibo ya Isaleele (bena Yuuda basadiibwe na bantu ba ingi miilo) pamune na “bantu ba bingi bisamba” (bena Yuuda bashii basadiibwe) abadi na kya kufika mwilo bw’eshina dy’Efile Mukulu, papa bibadi bipushikye kalolo. Tabibadi abitungu shi bantu ba bingi bisamba abakimbi kufika bena Kidishitu basadibwe nya.
bt-F 123 ¶18
“Badi anyingisha tukongye”
18 Mpoolo na Timote abafubanga pamune munda mwa bipwa. Bibabadi abende na kukunka tukongye, abadi balombashe mifubo i bungi mwishina dya kasaka ka bakunkushi-bakulu. Bible akula shi: “Mu mpata mubabadi abakidila, Mpoolo na Silase babaadi abaukisha bitshibilo bibabadi baate kwi batumiibwa na bakulu ba mu Yelusaleema na kuteka’shi beebifubile.” (Bikitshiino 16:4) Muyile byabimwenka, tukongye tubadi atulondo buludiki bwa batumibwa na bwa bakulu ba mu Yelusaleeme. Pa mwanda wa kwakwa kukokyela, ‘tukongye tubadi atunyingi’nka kunyinga mu lukumino kwifuku n’efuku.”—Bikitshino 16:5.
Kukimbuula bwa kupeta mabwe a muulo a mu kikudi
w12-F 15/1 10 ¶8
Batumibwa abetulongyesha bya kwikala bapasukye
8 Uno mwisambo awitulongyesha kinyi? Lamiina shi nka penda kunyima kwa Mpoolo kukatuka bwa kwenda ku Asie nyi pabadi kikudi ky’Efile Mukulu kimuludikye. Dingi, nka penda kunyima kwa kufika pa bwipi na Betani nyi pabadi Yesu mumuleshe eshinda. Akupu, nka penda kunyima kwa Mpoolo kufika ku Trowase nyi pabadi Yesu muludikye Mpoolo bwa kwenda ku Masedwane. Bu byadi mutwe wa kakongye, Yesu e kukita namu bya mumune kwatudi. (Kol. 1:18) Bu kileshesho, pangi we na kinangu kya kufuba bu mbala-mashinda sunga kukatuka bwa kwenda mu kufuba mbalo i lukalo. Anka, Yesu mulombene nkuludika ku bukwashi bwa kikudi ky’Efile Mukulu nka kunyima kwa kukita matabula bwa kulombasha kitshibilo kyobe. Twi kwibipwandjikisha na na muntu atambusha mootoka, mmulombene kwiuludika ku mboko ibakashi sunga ibalume nka su mootoka ukwete kutambuka. Mu kipaso kimune, Yesu e kwitukunkusha bwa kutamisha mudimo wetu nka su tukwete kutentuluka—su tukwete kwitatshisha bwa kulombasha bipatshila byetu.
nwtsty ma note aakwasha bwa kwilongyela mu Bik 16:37
twi bena Looma: Abakwila matalwa a beena Looma. Mpoolo pangi na Silase abadi bana kibundji ba mu Looma. Mwiya wa mu Looma ubadi awakula shi mwan’akibundji badi na bulungantu bwa kunyokiibwa bikumbanyine kushii kumunyoka munkatshi mwa bantu sunga kumutshibila kibawo. Bu mwan’akibundji a mu Looma bubadi abupa muntu matalwa na kineemo mbalo yooso yadi mu bibundji bya Looma. Mwan’akibundji a mu Looma badi akookyela penda mwiya wa mu Looma kushii bwa bingi bibundji. Su bamufunda, badi na kya kukumiina bwashi bapime kumusambisha muyile mwiya wa mbalo yadi, anka badi kii’nka na matalwa bwadya kusambishibwa ku tumilaadi twa mu Looma. Su ekala mu mwanda ukata, badi na bulungantu bwa kuteka matalwa a nfumu. Mpoolo mutumiibwa badi alungula mu Looma eese mushima. Badi mufubishe matalwa aaye a bu mwan’akibundji a mu Looma misango isatu yabaadi bafunde. Badi mufubishe matalwa aaye musango wa kumpala mu Fidipe pabalungwile nsushi mukata a mu Fidipe shi abakutwa kunema matalwa aaye p’abo kumukupila.—Tala mu note aakwasha bwa kwilongyela mu mu mukanda wa Bik 22:25; 25:11 bwa kuuka ingi misango ibidi.
LUBINGO LWA 24-30/12
BUPETA BWA MWIYI DY’EFILE MUKULU | BIKITSHINO 17-18
“Ambula Mpoolo mutumibwa mu kulungula na kulambukisha”
nwtsty ma note aakwasha bwa kwilongyela mu Bik 17:2, 3
kunangushena: Mpoolo tabadi alungula bantu penda mukandu wibuwa nya. Badi ebapatulwila na kwibalesha bishinkamiisho bya mu Bifundwe, Bifundwe biyokyelwe bya kiina Ebelu. Tabadi abadika penda Bifundwe nya; badi anangushena nabo muyile nshalelo aabo bwa kwisamba nabo. Kishima kya mu kina Greke di·a·leʹgo·mai abadi abekilesha bu “kwishitushena bishima, kwisamba sunga kutentekyesha.” Kibaleshanga bantu abesamba. Mbafubishe dingi kino kishima kya mu kiina Greeke mu Bik 17:17; 18:4, 19; 19:8, 9; 20:7, 9.
kutusha bishinkamiisho: Kishima kya mu kiina Greke akilesha “kutuula ku lupese.” Bino abilesha shi Mpoolo badi apwandjikisha kalolo matemuki a Mesiya mu Bifundwe bya kiina Ebelu na myanda ya mu nshalelo a Yesu pa kulesha bibaadi Yesu mulombashe aa matemuki.
nwtsty ma note aakwasha bwa kwilongyela mu Bik 17:17
mbalo ya kisalwe: Ibadi dya kuushi kwa kupona nguba kwa acropole, mbalo ya kisalwe kya bena Atene (mu Greke, a·go·raʹ) ibadi bukata bwa metre 200 x 250 sunga kukila paapa. Mbalo ya kisalwe ibaadi bukata kukila mbalo ya kuula sunga ya kuudisha. Ibadi mbalo ikata bwa myanda ya makuta, ya politike na ya bipikwa bya mu nshalelo. Beena Atene abadi na muloo wa kwibunga pa ino mbalo ibadi myanda yoso ya mu nshalelo bwa miisambo ya bantu be na kapatupatu.
nwtsty ma note aakwasha bwa kwilongyela mu Bik 17:22, 23
kwi Efile shaukiibwa: Abaadi bafunde kishima kya mu Greke A·gnoʹstoi the·oiʹ ku bilambwilo bya mu Atene. Bena Atene abaleeshanga kutshina kwabo kwa b’efile pa kwibaka ma ntempelo na bilambwilo sunga kukita bilambwilo bwa kulesha bi b’efile baabo na Ntumbo, Bukome, kukuminyishibwa na lusa. Pangi bwa kutshina shi tala bakatusha efile umune na kukutwa bulami bwaye, abadi abafundu shi “kwi Efile shaukiibwa.” Ku bukwashi bwa kilambwilo, bantu abadi na kya kukumina kwikala kw’Efile abashabauku kintu su nkimune pabimutale. Binobino Mpoolo badi mufubishe kilambwilo bwa kubanga bulungi bwaye na kulesha bantu abadi abamuteemesha Efile Mukulu—a binyibinyi—abashibabadi babande kuuka.
Kukimbula bwa kupeta mabwe a muulo a mu kikudi
w08-F 15/5 32 ¶5
Myanda ikata ya mu mukanda wa Bikitshino
18:1—Mpoolo badi mwele mutshipo kinyi? Bangi banfundji abapwandjikisha shi Mpoolo badi mukite mutshipo wa bu Naziiri. (Mb. 6:1-21) Anka, Bible t’alesha su mutshipo wa Mpoolo ubadi naminyi nya. Byabya, Bifundwe ta bitulungula su Mpoolo badi mukite wawa mutshipo kumpala sunga kunyima kwa’ye kwaluluka sunga shi badi mubangye kwela sunga kupudiisha mutshipo. Mu bipaso byoso byabidya kwikala, kukita wawa mushipo takubadi mulwisho nya.
nwtsty ma note aakwasha bwa kwilongyela mu Bik 18:21
su Yehowa akumiina: Nyi nkishima akishimika kasele pa lukalo lwa ‘kikyebe ky’eshimba dy’Efile Mukulu mu mwanda kampanda sunga nsaa yatwata mpango bwa kukita kintu kapanda. Mpoolo mutumiibwa badi auku kalolo uno mwanda. (1Kod 4:19; 16:7; Eb 6:3) Shake badi dingi munyingishe bantu ababadika byadi mufunde pa kwakula shi: “su Yehowa akumiina binyibiinyi, atwikala na muuwa, byaabya atukitshi kino sunga akyaa.” (Shak 4:15) Ano mayi nta mpenda bishima bya kwakula bisumanga nya; su muntu e na kululama akula shi “su Yehowa akumiina,” abitungu etatshishe bwa kukita mwaye mooso bwa’shi akite myanda mu kwipushena na kikyebe ky’eshimba dya Yehowa. Kino kishima t’akitungaa penda kwakulwa kukanwa nya, akikambaa kufika penda mwishimba.—tala ma note aakwasha bwa kwilongyela mu Bik 21:14; 1Kod 4:19; Shak 4:15 na Kipindji kya 1 kya Mukanda aukwasha bwa kulonga Eyi dy’Efile Mukulu.
LUBINGO LWA 31/12–6/1
BUPETA BWA MWIYI DY’EFILE MUKULU | BIKITSHINO 19-20
“Dimukayi anwe banabebene mpa na lombe loso lwa mikooko”
w11-F 15/6 20-21 ¶5
“Lamayi mikooko y’Efile Mukulu yabadi beenupe”
5 Mpoolo mutumibwa bafundjile shi bakulu be na kya ‘kulama mikooko y’Efile Mukulu yabadi beebape.’ Bi na muulo ukata bwabadya kuuka shi mikooko ngya Yehowa na Yesu Kidishitu. Bakulu abakayimuka muyile kipaso kyabakwete kutala mikooko y’Efile Mukulu. Banda kupwandjikisha shi kuuku oobe bakutekye bwa kumutadila bana baye padi mu lwendo. Twe bya kwibadiisha na kwibalama kalolo su? Su umune a kwabadi e na maladi, twe kushinkamisha shi bapete bukwashi bwa munganga bulombane? Mu kipaso kimune, bakulu mu kakongye be na kya ‘kulama kakongye k’Efile Mukulu kaadi muule ku mase a Mwan’aye.’ (Bikitshino 20:28) Abatuulu mu binangu byabo shi mukooko ooso mbewule na mase e na muulo ukata a Yesu Kidishitu. Bu byabadi na nkya nkayimuka, bakulu abadiishaa, kukalwila na kulama lombe.
w13-F 15/1 31 ¶15
Bakulu bena Kidishitu—‘abafubu bwa muloo wetu’
15 Kwikala mulami akutungaa kufuba ngofu. Ingi nsaa bakulu abakutwa tulo bwa kwela nteko pabitale lombe lw’Efile Mukulu sunga mu kukwasha na kukwatshishena bakwabo bena Kidishitu mu kikudi. (2 Kod. 11:27, 28) Nsunga mbyambya, bakulu abalombashaa mudimo wabo kalolo na muloo nka bu bibakitshine Mpoolo. Bafundjile bena Kodinda shi: “Na muloo ooso natusha byooso na kwipaana ami nabeene na bushima bwande pa mwanda wenu.” (2 Kod. 12:15) Byabya, pa mwanda wa kifulo bwa bakwabo, Mpoolo badi mwipaane bwa kwibanyingisha. (Badika 2 Beena-Kodinda 2:4; Fid. 2:17; 1 Tes. 2:8) Ta bya kwitukaanyisha su bakwetu abadi na kifulo kikata bwa Mpoolo!—Bikitshino 20:31-38.
bt-F 172 ¶20
“Ne mwisuule mu mwanda wa mase a muntu ooso”
20 Nshalelo a Mpoolo badi mwilekeene na a bantu abafikile kunyima babadi babangye kukimba kudiila mu mongo mwa mikooko. Aye badi afubu bwa kulombasha nkalo yaaye kushi kutenteka kakongye bushito nya. Kwitatshisha kwaye bwa bakwabo bena kulangwila t’akubadi bwa buwa bwaye nya. Mpoolo badi munyingishe bakulu ba mu Efeeso bwabadya kwipaana. Bebalungwile shi: “Neenuleshanga nguboa ooso shi mu kufwambuka nyi mulombene kupetshibwa bintu bya kukwasha nabyo babofule na kutentekyeshanga bino bishima bibadi Nfumu Yesu mubwele shi; ‘mwabi wa mu kupaana ngukile wa mu kupeebwa.’”—Bikitshino 20:35.
Kukimbuula bwa kupeta mabwe a muulo a mu kikudi
bt-F 161 ¶11
Eyi “dibendanga na kupalakana na kulesha bukome bwadyo” sunga mu bulwishi
11 Mpoolo badi pangi mwimane mu yaya mbalo ya kilongyelo bwa kwisamba kubanga mu 11h na ku 16h efuku dyoso (Bik 19:9) Ibadi nsaa ishiibadi tulee twibungi kadi ibadi kibobo kikile, bantu abadi abatshibi midimo yabo bwa kudya kantu na kwikisha. Su badi mukite bino efuku dyoso munda mwa bipwa bibidi, twi kwamba shi bakitshine nsaa ikile pa 3 000 ya bulungudi. Kano nkangi kabingilo akalesha bwakinyi Eyi dy’Efile Mukulu dibadi aditungunuka na kupalakana na kulesha bukome bwadyo. Mpoolo badi mufubi sha kisumi na eubidishena na myanda. Badi elumbuula bwashi bulungudi bwaye bulombashe nkalo ya bantu mu mbalo ibadi. Kubatukile bipeta kinyi? ‘Bantu booso abapushishe Eyi dya Yehowa, beena Asie, beena Yuuda na beena Greke.’ (Bikitshino 19:10) Batushishe bukomonyi bukata!
bt-F 162-163 ¶15
Eyi “dibendanga na kupalakana na kulesha bukome bwadyo” sunga mu bulwishi
15 Kwishibwa kwa milongo kwa bana ba Sceva kubatakwile bantu mu kutshina Efile, mwanda bebungi abafikile balangwidi na abo nkuleka myanda yabo ya malenganyi. Bipikwa bya bena Efeso bibatakulanga bantu mu myanda ya lubuko. Abadi abakitshi lubuko na kufwala bikano bya myanda ya malenganyi na mikanda ya myanda ya malenganyi. Beena Efeso bebungi babatwadile mikanda yabo ya myanda ya malenganyi, abo nkwiyishiika kaalo patooka munkatshi mwa bantu—sunga byekala shi ibaadi na muulo wa binunu bya dolare bibungi. Luka bafundjile shi: “ku bukome bwa Yehowa, Eyi dy’Efile dibendanga na kutama na kulesha bukome bwadyo.” (Bikitshino 19:17-20) Bibaadi ntumbo ikata bwa bya binyibinyi ku myanda ya madimi na ya malenganyi! Baaba bantu basha lulamato mbetulekyele kileshesho kibuwa lelo uno. Twi bekale n’atwe namu mu ndumbulwilo muwule na myanda ya malenganyi. Su twapeta shi twi na kantu ke mu kwipushena na myanda ya malenganyi, twi kukita nka bibakitshine bena Efeso—kwikakatusha kushii kunyengakana! Byabya, tushaleyi kula na bino bikitshino bibubi sunga byekala na muulo wi naminyi.