Mikanda yatudi bafubishe mu Programe a bisangilo bya Bwina Kidishitu na mudimo wetu
LUBINGO LWA 3-9/6/2019
BUPETA BWA MWIYI DY’EFILE MUKULU | BEENA-NGALATEA 4-6
“‘Mwanda wi bu lukindji’ na kyaupushisha kwatudi”
it-1-F 56 ¶1
Agaare
Muyile Mpoolo mutumibwa, Agaare abadi baleshe mu mwanda wi bu lukindji, badi alesha mwilo wa Isalele a ku mbidi mulamate kwi Yehowa ku bukwashi bwa kilombeno kya Mwiya, kibabadi bakite ku Mwengye wa Sinai, kilombeno kibadi kitushe ‘bana ba bupika.’ Pamwanda wa milwisho ya bantu, mwilo taubadi bya kulama milayilo yabo bwa kyakya kilombeno. Bu bibabadi mu kino kilombeno, bena Isalele ntambafikye mwilo wi mu bulungantu nya, anka abadi batshibilwe kiimu kya lufu; byabya abadi bapika. (Yo 8:34; Lom 8:1-3) Yeelusaleme a mu mafuku a Mpoolo badi alesha Agaare, mwanda Yeelusaleme nyi epata dibadi adilesha ndumbulwilo a Isalele a ku mbidi, badi mpika na bana baye. Byabya, Bena Kidishitu batandikwe mu kikudi, mbana ba “Yeelusaleme a mwiyilu,” mukashi a Efile Mukulu a mu kifwanyi. Bu bi Sara mukashi mulungatu, Uno Yeelusaleme, kashaa tekele mu bupika. Anka bu bibaabadi babigyebigye Isaake kwi Ismaele, bana ba “Yeelusaleme a mwiyilu,” bekashwe mu bulungantu kwi Mwana, babaadi bebabingyebingye kwi bana ba Yeelusaleme e ku bupika. Anka, Agaare na mwana aye babadi bebabingye, abilesha bibadi Yehowa mupele mwilo wa Isalele a ku mbidi bu mwilo waye.—Nga 4:21-31; tala dingi Yo 8:31-40.
Ikala na lukumiino lunyingye mu lukulupilo lwa Bufumu
11 Kilombeno kya Abrahame kibaadi kilombane bwa musango wa kumpala kwi bekulu baye nsaa ibaabadi bapyane Nsenga ya mulayilo, kadi Bifundwe abilesha shi kyakya kilombeno akilombana dingi. (Gal. 4:22-25) Ku bukwashi bwa kikudi kiseleele, Mpoolo alesha shi, kipindji kya kumpala kya kekulu ka Abrahame nyi Kidishitu na kipindji kya kabidi akilesha bena Kidishitu bashingwe mwimu wa mu kikudi 144 000. (Gal. 3:16, 29; Bif. 5:9, 10; 14:1, 4) Mwana mukashi atusha kekulu nyi “Yeelusaleme a mwiyilu”—kipindji kya ndumbulwilo a Efile Mukulu ki mwiyilu, kisangishe bipangwa bya mu kikudi bimulamate. (Gal. 4:26, 31) Anka bu bibalayile kilombeno kya Abrahame, kekulu ka mukashi akakyebe kufwisha myabi kwi bantu.
Kukimbuula bwa kupeta mabwe a muulo a mu kikudi
w09-F 1/4 13
Oukanga su?
Bwakinyi Yesu badi mwitamine Yehowa mu luteko bu “Abba, Yaya”?
Kishima ʼab·baʼʹ kya mu kina Arameya ki kupushisha’shi “yaya” sunga’shi “O Yaya.” Kino kishima akisanyanyibwa misusa isatu mu Bifundwe, mususa oso wabekitemuna mu luteko, mbwa kwakwila Yaya e mwiyilu, Yehowa. Kino kishima akikyebe kulesha kinyi?
Ungi mukanda wa (The International Standard Bible Encyclopedia) awamba’shi: “Kishima ʼabbāʼ kibabadi abakula mu mafuku a Yesu, abadi na kyubishi kya kwikyakula kwi bana bwa kulesha kanemo kwi ba mashaabo.” Kibadi kishima kya kalolo na kya kanemo, kibadi kimune kya ku bishima bya kumpala bibadi mwana alongo bwa kwakula. Yesu badi mwakule kino kishima mu luteko lwi pabwalo bwa kwitamina Nshaye. Pabaadi mwifuba dya Getesemane nsaa yipela kumpala kwa lufu lwaye, Yesu badi mwele luteko kwi Yehowa atemuna kino kishima “Abba, Yaya.”—Maako 14:36.
Kino kishima “ʼAbbāʼ tababadi abekyakula kwi bena Yuda mu mafuku a bena Greke na be Looma, kushi mpaka, kwabadi kibadya kupushika bu kukutwa kwa kanemo nsaa y’abetamina Efile Mukulu mu kino kishima kyabadi baubiile.” Anka, “Yesu . . . pabadi mwakule kino kishima mu luteko, mbwa kulesha kipwano kipabwakyo Kibadi nakyo n’Efile Mukulu.” Ingi misango ibidi yabadi bakule kino kishima “Abba” mu Bifundwe—yoso misusa ibidi mbeyifunde kwi Mpoolo mutumibwa—bwa kulesha’shi bena Kidishitu ba mu siekele a kumpala abadi bekyakule mu nteko yabo.—Lom 8:15; Nga 4:6.
w10-F 1/11 15
Oukanga su?
Mpoolo badi akyebe kwakula kinyi pabambile’shi, badi na ‘bitundwilo bya bu mpika a Yesu’ pa mbidi yaaye?—Beena-Ngalatea 6:17.
▪ Bishima bya Mpoolo bibaadi bikumbene kwikala na bipatulwilo bibungi mu binangu bya bantu babadi abamuteemesha mu siekele a kumpala. Bu kileshesho, kyamo kimongye na kaalo babadi abekitemuna bwa kulesha be na lukano babadi bakwate ku ngoshi, ba ngifi ba mu ntempelo, na ba mpika. Nsaa yabekisambila kwi bantu mu uno mushindo, bitundwilo bibadi abilesha kwishibwa milongo.
Kadi, bitundwilo tababadi nka abebimono mu mushindo wibubi nya. Bantu ba kala bebungi babadi abele bitundwilo bwa kulesha bantu ba kisamba kampanda sunga ba mu kipwilo kampanda. Bu kileshesho, muyiile abyamba mukanda wa (Theological Dictionary of the New Testament,) “bena Sirii babadi abepana kwi b’efile Hadade na Atargatis ku bitundwilo bibabadi abeyele mu kyadi sunga ku nshingo . . . Balangwidi ba Dionysos babadi abebeele kitundwilo ky’esaki dya kilongo kyabetamina bu lierre.”
Bantu bebungi basha binangu lelo uno abapwandikisha’shi Mpoolo badi akwila mikofu ibadi mupete nsaa ibabadi abamukyengesha ku mbidi mu mudimo waye wa bu misionere. (2 Beena-Kodinda 11:23-27) Sunga mbyabya, pangi Mpoolo badi esambila nshalelo aaye—kushi penda bitundwilo abimweneka na meso—badi alesha’shi mwina Kidishitu.
LUBINGO LWA 10-16/6/2019
BUPETA BWA MWIYI DY’EFILE MUKULU | BEENA-EFESO 1-3
“Bukunkushi bwa Yehowa na mudimo wabo”
it-2-F 858 ¶2
Kifibwe kiselele
Bufumu bwa Mesiya. Muyile bibadi bifunde Mpoolo, apatuula patooka kufumbulwa kwa kifibwe kiselele kya Kidishitu. Mu Beena-Efeso 1:9-11 akula’shi Efile Mukulu aukisha “kifibwe [kiselele] kya kikyebe ky’eshimba dyaaye, amba’shi: “Kiadi mupwandikishe’ye nabene bwa nfubilo a kulombana kwa bipungo, [kwamba’shi] kubunga mu kimune bintu bioso mu Kidishitu, bintu bi mwiyilu na bintu bi pa nsenga mwadi. Mwadi’ye ngi mwatudi’nyi beekashwe bu ba-mpiani, p’atwe kwikala baabikishwe kumpala muyiile mpango ya yawa afubisha bintu bioso bu bi lukuku lwa kikiebe ky’eshimba dyaye.” Kino “kifibwe kiselele” akilesha mbulamatadi, Bufumu bwa Mesiya bw’Efile Mukulu. “Bintu bi mwiyilu,” byabesambila kwi Mpoolo, nyi ndukulupilo lwa kwikala bu bakunkushi ba bwabwa Bufumu pamune na Kidishitu. “Bintu bi pa nsenga” nyi mbaaba babakunkusha pa nsenga. Yesu balungwile balondji baaye’shi kifibwe kiselele nkitale buno Bufumu nsaa ibebalungwile’shi: “Kwanudi mbinupebwe bwa kuwuka [kifiibwe kiselele] kya bufumu bw’Efile Mukulu.”—Mak 4:11.
w12-F 15/7 27-28 ¶3-4
“Yehowa ngumune” abungu kifuko kyaaye
3 Moyiise balungwile bena Isalele’shi: “Yehowa Efile Mukulu etu ngumune.” (Miy. 6:4) Bikitshino bya Yehowa na mpàngo yaaye ngimune. Byabya, “bwa kufisha bipungo ku mukumbeno wabyo,” Efile Mukulu mutuule “bukunkushi”—nyi nkwamba’shi, ndongamisho a kubunga bipangwa byoso bi na binangu. (Badika Beena-Efeso 1:8-10.) Buno bukunkushi abulombasha mpàngo yabo mu bipindji bibidi. Kipindji kya kumpala akilumbuula kakongye ka bedibwe mwimu bwa kwenda mwiyilu ku bukunkushi bwa Yesu Kidishitu bu Nfumwako a mu kikudi. Kino kipindji kibabangile mu Pentekote a mu 33 B.B. pababangile Yehowa kubunga baaba abakamunana na Kidishitu mwiyilu. (Bik 2:1-4) Bu bi bedibwe mwimu mbatshibwe bu bantu balulame bwabadya kupeta muwa ku bukwashi bwa mulambu wa nkuulo wa Kidishitu, abashinkamisha musango umune’shi mbebakumine bu “baana b’Efile Mukulu.”—Lom. 3:23, 24; 5:1; 8:15-17.
4 Kipindji kya kabidi akilumbuula baba abakashala mu Mpaladiso pa nsenga ku bukunkushi bwa Bufumu bwa Mesiya. Be mu “kibumbu kikata” nyi abekala bantu ba kumpala abakatwele mu Mpaladiso. (Kibaf. 7:9, 13-17; 21:1-5) Mu bukunkushi bwa Bipwa kinunu, abakebungu pamune na midiyala ya bantu abakasanguka. (Kibaf. 20:12, 13) Banda kunangushena lusangukilo byaluketwikasha mu buumune! Ku nfudilo kwa bipwa kinunu, “bintu bi pa nsenga” abikapete kitompwanga kya nfudilo. Baba abakekala na lulamato abakebakumina bu “baana b’Efile Mukulu” be pa nsenga.—Lom. 8:21; Kibaf. 20:7, 8.
Kukimbuula bwa kupeta mabwe a muulo a mu kikudi
w13-F 15/2 28 ¶15
Totadilanga kintu sunga nkimune kikukutshishwe kupeta ntumbo
15 Kunyingiila kwetu mu kukita kikyebe ky’eshimba dya Yehowa akukwasha bangi bwabadya kupeta ntumbo. Mpoolo badi mufundjile kakongye ka Efeso bino: “Nenutekye’shi tanukumanga kubofusha maboko ku mwanda wa mpombo yampomboloka pa mwanda wenu: ayo ngi ntumbo yenu.” (Ef. 3:13) Mu kipaso kinyi mubaadi makyenga a Mpoolo bu “ntumbo” ya bena Efeso? Kwikala kwa Mpoolo na lukalo lwa kutungunuka na mudimo waye sunga kumpala kwa bitompwanga, kubadi akulesha bena Efeso shi, kinemo kyabo kya kwikala bu bena Kidishitu nyi mbushito bwi na muulo ukata. Su Mpoolo badya kubofula pa mwanda wa bitompwanga, bino tabibadya kulesha’shi kipwano kyabo na Yehowa, mudimo wabo na lukulupilo lwabo tabibadi na muulo su? Kunyingiila kwa Mpoolo kubadi kutumbishe Bwina Kidishitu na kulesha’shi abitungu kwisumina ingi miloo bwa kwikala mulondji.
“Kuuka bi kifulo kya Kidishitu”
21 Kishima kya mu kina Greke kyabadi baluule bu “kuuka” akilesha kuuka “mu bikitshino, muyile myanda ayiuku muntu.” Patuuku abilesha kifulo mu mushindo ubaadi auku Yesu—akikyebe kwitutuma bwatudya kwilambula bwa bangi, kwibapushiisha muyiile nkalo yaabo, kwibafwila lusa alukatukila mwishimba dyetu—kupusha kalolo byabya byabakwete kupusha. Patukitshi byabya muyiile myanda yatuuku, atukyebe “kuuka bi kifulo kya Kidishitu kikile kuuka kooso” kalolo. Tatulubanga shi, patukitshi byabya atukyebe kwambula Kidishitu, atukyebe kwifubwila pepi naaye, aye baadi mwambule kileshesho kya Efile Mukulu eetu a kifulo Yehowa.
LUBINGO LWA 17-23/6/2019
BUPETA BWA MWIYI DY’EFILE MUKULU | BEENA-EFESO 4-6
“Fwalayi biina ngoshi bilombane by’Efile Mukulu”
Ba nsongwa nyingayi kumpala kwa Diabulu
MPOOLO mutumibwa badi mupwandikishe bena Kidishitu na basalayi. Twi mu ngoshi, na twi na beshikwanyi binyibinyi! Anka ngoshi yetu tatulu na bantu nya; atulu na Satana na ba demo. Abo mbabangye kulwa ino ngoshi takudi bipwa binunu na binunu na bakwete kwiyilwa kalolo. Byabya mbilombene kumweneka’shi ta twi bya kutshokola ino ngoshi, bikishekishe su twi ba nsongwa. Ba nsongwa mbalombene kutshokola ino ngoshi yabalu na bano beshikwanyi be bukome su? Oolo, mbalombene kutshokola na bakwete kwiyitshokola! Bwakinyi? Mwanda bakwete kupeta bukome kwi Yehowa. Na dingi, nka bu basalayi balongyeshibwe kalolo, ‘mbafwale biina-ngoshi bilombane bi’Efile Mukulu’ bwabadya kwilumbuula bwa kulwa ino ngoshi.—Badika Beena-Efeso 6:10-12.
w18.05 28 ¶4,7, 29 ¶10
Ba nsongwa nyingayi kumpala kwa Diabulu
4 Nka bu mukoba, bya binyibinyi byatulongo mu eyi dy’Efile Mukulu abitukalwila ku ndambukisho ya madimi. (Yowano 8: 31, 32; 1 Yowano 4:1) Su tubanyisha kulonga bya kufula bya binyibinyi bi mu eyi dy’Efile Mukulu, abinyisha kwitubofwila bwa kwikala na nshalelo mwipusheene na miya y’Efile Mukulu, sunga’shi kufwala “ngabo ya kyadi.” (Misambo 111:7, 8; 1 Yowano 5:3) Na dingi, su tubapusha bino bya binyibinyi kalolo, atukamono bya kwibikalwila kumpala kwa beshikwanyi netu.—1 Mpyeele 3:15.
7 Miya ya kululama ya Yehowa, ayikalwila ‘mashimba’ eetu sunga bu muntu bwetu bwa munda, twi kwiyipwandikisha na ino ngabo ya pa kyadi. (Nkindji 4:23) Musalayi ta mulombene kushintuula ngabo yaye ya kyamo ki bukopo bwadya kwata ingi ngabo ya kyamo kibofule nya. Mu mushindo umune, ta twi balombene kushintuula miya ya Yehowa bwa kulonda binangu abitusankisha pabitale kibuwa nya. Ta twi balombene kwikala na binangu byatudi balombene kulama mashimba eetu’twe banabene nya. (Nkindji 3:5, 6) Ngi bwakinyi abitungu twikale atutaluula “ngabo yetu ya kyadi” nsaa na nsaa bwa kuuka su ikwete kukalwila eshimba dyetu.
10 Bilato bibabadi abafwala kwi basalayi ba bena Looma bibadi abibakwasha bwabadya kutshokola ngoshi, kadi bilato bya mu kifwanyi byatufwala abitukwasha bwatudya kulungula “mukandu wibuwa wa kufukama.” (Yeeshaya 52:7; Beena-Looma 10:15) Anka, ingi nsaa abitungu kwikala n’eshimba dinyingye ngofu bwa kumona bya kulungula mukandu wibuwa. Bo, e na bipwa 20 akula’shi: “Nadi na moo wa kulungula mukandu wibuwa kwi bena kalasa nami. Namono’shi nadi na bufu. Pantala kumongo, ntanguku bwakinyi nadi napusha buno bufu nya. Binobino ne na muloo wa kulungula mpa na kumpala kwa bena nshibo.”
Ba nsongwa nyingayi kumpala kwa Diabulu
13 “Mmikyetwe” kinyi yabadi balombene nkwasa kwi Satana? Pangi mulombene nkulwisha na myanda ya madimi pabitale Yehowa. Satana akumina opushe’shi Yehowa ta mukufule na’shi ta kwi muntu su ngumune akupasukila. Ida, e na bipwa 19, akula’shi: “Misusa ibungi nadi napusha’shi Yehowa te pepi nami na’shi takumina kwikala Kuuku ande nya.” Akitaa naminyi nsaa yapusha bino? Akula’shi: “Bisangilo ngi ngabo ikata ayikalwilaa lukumino lwande. Nadi na kyubishi kya kwimushala nka bisumanga kushi kwaluula, nadi napwandikisha’shi ta kwi muntu su ngumune akumina kupusha byangakula. Anka binobino, nalumbulaa bisangilo na kwikitshisha bwa kwaluula misango ibidi sunga isatu. Kukita bino kwi bukopo, anka nepushaa bibuwa ngofu su nebikitshi. Na dingi bakwetu balume na bakashi abankankamikaa ngofu. Nsaa yoso yanfikaa mu bisangilo naukaa’shi Yehowa munfule.”
16 Nka bu bi kifulu akikalwilaa bongo bwa musalayi, ‘lukulupilo lwa kipandjilo’ kyetu alukalwilaa binangu byetu. (1 Beena-Tesalonika 5:8; Nkindji 3:21) Lukulupilo alwitukwasha bwatudya kutula binangu byetu ku milayilo y’Efile Mukulu na kupela kubofula pa mwanda wa myanda yatudi nayo. (Misambo 27:1, 14; Bikitshino 24:15) Anka su atukumina’shi lukulupilo lwetu lwitukalwile, abitungu lwikale lwa binyibinyi kwatudi. Abitungu tufwale “kifulu” ku mutwe kushi kwikyembelesha ku mboko.
20 Mpoolo mutumibwa bambile’shi Eyi dy’ Efile Mukulu di nka bu lupete. Yehowa ngi mwitupe dyanka. Anka abitungu tulongye bya kwidifubisha kalolo na kukalwila lukumino lwetu sunga kulumbuula ngyelelo eetu a binangu. (2 Beena-Kodinda 10:4, 5; 2 Timote 2:15) We kulongamisha mushindo obe wa kwidifubisha naminyi? Sebastian, e na bipwa 21 akula’shi: “Nafundaa verse umune a mu shapitre oso ambadika mu Bible. Ne na mulongo wa ma verse andi mufule ngofu.” Bino abimukwashaa bwadya kupusha kalolo abinangushenaa Yehowa. Daniel alombasha’shi: “Nsaa yanebadikila Bible, nasangulaa ma verse amono’shi ngalombene kukwasha bantu banfumankana nabo mu bulungudi. Ne mumone’shi bantu abakumina nsaa yabamono’shi we mwipaane ku myanda i mu Bible na’shi okitaa mobe moso bwa kwibakwasha.”
Kukimbuula bwa kupeta mabwe a muulo a mu kikudi
it-2-F 859-860 ¶6
Bwiselele
Kikudi kiselele. Bukome bwa Yehowa bwafubaa nabo, sunga bu kikudi, aye kwete kwibukunkusha na alombashaa nabo mpàngo yaaye. Nkitookane, ki selele, nkya kishila, na mbekilame ku lupese kwi Efile Mukulu bwa kwikifubisha kalolo. Byabya abekitamina bu “kikudi kiselele” na bu ‘kikudi kya bwiselele.’ (Mis 51:11; Luk 11:13; Ro 1:4; Ef 1:13) Kikudi kiselele akifubu mwi muntu nyi mbukome bwa bwiselele sunga butookane. Kukita mwanda oso wibutete nyi nkubindwila sunga “kwinyongosha” kyakya kikudi. (Ef 4:30) Sunga ta muntu, kikudi kiselele akilesha bu muntu bw’Efile Mukulu bwiselele nyi bwakinyi nkilombene ‘ kwinyongola.’ Kukita kwa mwanda wibubi akufwisha muntu mu “kushima [kaalo ka] kikudi.” (1Tes 5:19) Su muntu batungunuka na kukita byabya, kikudi kiselele ky’Efile Mukulu ‘akinyongola’ na yawa muntu ntomboshi afiki bu mwishikwanyi a Efile Mukulu. (Yesh 63:10) Muntu benyongosha kikudi kiselele mukumbene kwenda kula ekala bu ekisabuula, mulwisho ubadi Yesu Kidishitu mwambe’shi ta mbalombene kwiulekyela mu uno ndumbulwilo a myanda sunga mu yawa afiki.—Mat 12:31, 32; Mak 3:28-30; tala KIKUDI.
it-1-F 237 ¶6
Lwabi
Kumweneka mu bikitshino. Lwambi alumwenekyelaa mu bikitshino kampanda abilesha lukalo lwibubi lwi mwi muntu. Shaake mufundji a Bible etulungula’shi malaka ebubi su abamene mishi aatanda mulwisho. (Shak 1:14, 15) Muntu sha lwabi mbalombene kumutundwila ku bikitshino byaye. Mpoolo mutumibwa alesha’shi kwikala na lwabi akupatula kulangwila ma nkishi. (Ef 5:5) Pa mwanda wa lwabi lwaye, muntu ayikasha kintu kyalakila bu efile aaye, ekituulu kumpala kwa mudimo na lulangwilo lwa Mupangi aaye.—Lom 1:24, 25.
LUBINGO LWA 24-30/6/2019
BUPETA BWA MWIYI DY’EFILE MUKULU | BEENA-FIDIPE 1-4
“Tanwinyongolanga pa mwanda wa kintu sunga kimune”
‘Butaale bw’Efile Mukulu . . . mbutabukile binangu byooso’
10 Nkinyi ki bya kwitukwasha bwa kupela “kwinyongola pa mwanda wa kintu sunga nkimune” na kwikala na “butaale bw’Efile Mukulu”? Mayi a Mpoolo abadi mufundile bena Fidipe aalesha’shi, nsaa yatwikalakasha bwa mwanda ooso wawa, luteko ndwikale bwanga bukata. Byabya nsaa yoso yatudi na kinyongwa, abitungu tupyanyishe kinyongwa kyetu na nteko. (Badika 1 Mpyeele 5:6, 7.) Nsaa yotekye Yehowa, ikala mushinkamishe’shi, kwete nkupasukila. Ikala omutumbula bwa myabi yoso yadi mukwelele. Tolubanga’shi Yehowa mulombene “kukita bikile pa byaabya byaatutekye naa byaatupwandjikisha.”—Beena-Efeso 3:20.
‘Butaale bw’Efile Mukulu . . . mbutabukile binangu byooso’
7 Bakwetu ba mu Fidipe pababadi ababadika mukanda ubabadi bebatumine kwi Mpoolo, abadi abanangushena ku kinyi? Pangi bebungi ba kwabadi abadi abatentekyesha myanda ibadi ifikile Mpoolo na Silase na mushindo wa kukaanya ubabadi bebakwashe kwi Yehowa. Mpoolo badi ebapa dilongyesha kinyi mu uno mukanda? Dilongyesha dibadi bino: Tanwikalanga mashimba kwiyilu. Ikalayi anwele nteko, kunyima anukapete “butaale bw’Efile Mukulu abo butabukile binangu byooso.” Ano mayi aapushisha kinyi? Mu angi ma Bible mbealuule’shi: “mbutabukile bilotwa byoso” sunga’shi: “mbukile kipaso kyoso kipwandjikile muntu kunangushena.” Byabya Mpoolo badi akula’shi “butaale bw’Efile Mukulu” mbukile myanda yoso yatudi balombene kwelela binangu. Myanda yatumono’shi ibukopo bwatudya kwiyipudisha, Yehowa mulombene kwiyipudisha. Na dingi mulombene kwitukitshina myanda ya kukaanya.—Badika 2 Mpyeele 2:9.
‘Butaale bw’Efile Mukulu . . . mbutabukile binangu byooso’
16 Nkinyi akikitshika nsaa yatupete “butaale bw’Efile Mukulu, abo butabukile binangu byooso”? Bible amba’shi, “abulama” mashimba na binangu byetu. (Beena-Fidipe 4:7) Mu ludimi lwabadi baate kishima “kulama” nkituukile mu ngakwilo a basalayi pabitale kisaka kya basalayi ki ku mudimo wa kulama lupata. Bantu abadi bashaale mu lupata lwa Fidipe abadi abebalama kwi kyakya kisaka. Abaadi balombeene kulala kushii moo, mwanda abauku’shi lupata ndulamibwe. Mu kipaso kimune, patudi na “Butaale bw’Efile Mukulu,” tatubasuka kintu nya, mwanda mashimba na binangu byetu abikala mu butaale. Atuuku’shi Yehowa kwete kwitupasukila na akumina’shi tobeshe nshalelo etu. (1 Mpyeele 5:10) Na abwitulama bwashi tatukambilwanga na kenyongoshi sunga kubofula.
Kukimbuula bwa kupeta mabwe a muulo a mu kikudi
it-2-F 850 ¶1
Mulambu
Kitomwanga pa mulambu. Kitomwanga babaadi abekitusha pamune na ingi milambu yooso, bikishekishe kunyima kwa bena Isalele kutwela mu Nsenga ya mulayilo. (Mb 15:2, 5, 8-10) Mwanka mubaadi nfinyo (“bitomwanga abikolanaa”) na babadi abekipongoola ku kitapilo. (Mb 28:7, 14; tala byabidi bipushene na Efi 30:9; Mb 15:10.) Mpoolo mutumibwa baadi mufundjile bena Kidishitu ba mu Fidipe shi: “Sunga naatshiibwa bu kia kumiaminwa pa kitapilo mpaa na pa mufubo wa lukumiino lwenu ne n’abio muloo.” Pano badi mutushe kileshesho kya kitomwanga ki pa mulambu bwa kulesha kwipana kwaye bwa bakwabo bena Kidishitu. (Fid 2:17) Mafuku apela kumpala kwa lufu lwaye, badi mufundile Timote: “Bwande’mi ngiwu ntandji bu mulambo wa kusukumuna paashi, mpaa na nguba a kushimina kwande baakumbana.”—2Tim 4:6.
w07 1/1 26-27 ¶5
“Lusangukilo lwa kumpala”—Lukwete kukitshika!
5 Akupu, bedibwe mwimu be mu “Isalele eEfile Mukulu” abalondo Mwanana Yesu Kidishitu na ntumbo mwiyilu, mwamwa ‘abekala na mwanana ngub’oso.” (Nga 6:16; 1 Tes 4:17) Wawa mwanda abewitamina bu “lusangukilo lwa mbangilo” sunga “lusangukilo lwa kumpala.” (Fid 3:10, 11; Kibaf 20:6) Nsaa ayikapu lwalwa lusangukilo, kipindji a kikalombana kya’shi midiyo ya bantu basangukye bwa kwikala na muwa pa nsenga na mushindo wa kupeta muwa wa looso mu Mpaladiiso. Byabya, sunga lukulupilo lwetu lwekala lwa kwikala na muwa mwiyilu sunga pa nsenga, twi batule binangu byetu ngofu ku “lusangukilo lwa kumpala.” Ndusangukilo lwa mushindo kinyi? Alwikala nsaa kinyi?